ວັນຈັນ, 18/11/2019
ມະນຸດຕ້ອງການໂລກແຫ່ງໜຶ່ງທີ່ບໍ່ມີສົງຄາມ, ບໍ່ມີຄວາມອຶດຫີວທຸກຍາກ
2/12/2013 18:4' ສົ່ງ ພິມ
ທ່ານຫງວຽນເຕິນຢຸ໊ງ ກຳມະການກົມການເມືອງ, ນາຍົກລັດຖະມົນຕີ ແຫ່ງສສ ຫວຽດນາມ ກ່າວປາໄສທີ່ສະມັດຊາໃຫຍ່ ສະພະປດຊາຊາດ

ຂ້າພະເຈົ້າຮູ້ສຶກມີກຽດຢ່າງຍິ່ງທີ່ໄດ້ກ່າວບົດປາໄສຢູ່ເວທີອັນສູງສົ່ງນີ້. ຂ້າພະເຈົ້າຂໍຊົມເຊີຍ ດຣ John William Ashe ທີ່ໄດ້ຮັບການແຕ່ງຕັ້ງເປັນປະທານກອງປະຊຸມສະ​ໄໝສາມັນ​ເທື່ອທີ 68 ຂອງສະມັດ​ຊາໃຫຍ່ສະຫະປະຊາຊາດ. ຂ້າພະເຈົ້າເຊື່ອໝັ້ນວ່າ ພາຍໃຕ້ການບັນຊາຂອງທ່ານປະທານ ກອງປະຊຸມ​ເທື່ອນີ້ຈະສຳເລັດຜົນໃນການກຳນົດ ບາດກ້າວພັດທະນາຕ່າງໆ ຂອງໂລກພາຍຫຼັງປີ 2015 ຢ່າງຈົບງາມ. ຂ້າພະເຈົ້າກໍ່ຂໍສະແດງຄວາມນັບຖືຢ່າງສູງ ຕໍ່ກັບການປະກອບສ່ວນອັນສຳຄັນ ຂອງພະນະທ່ານເລຂາທິການໃຫຍ່ ເຂົ້າໃນຜົນສຳເລັດຂອງສະຫະປະຊາຊາດ ໃນເວລາຜ່ານມາ.

ຫຼຽວເບິ່ງຄືນ 100 ປີຜ່ານມາ, ໂລກມີການຜັນປ່ຽນທີ່ເລິກເຊິ່ງ, ຄືວ່າ “​ແພບ​ພຽງ” ລົງ, ຄືວ່ານ້ອຍລົງ ຍ້ອນຜົນສຳເລັດ ອັນມະຫັດສະຈັນ ຂອງວິທະຍາສາດ - ເຕັກໂນໂລຊີ. ຊີວິດຂອງຄົນເຮົາໄດ້ຮັບປົວ​ແປງ​ດີກວ່າ​ເກົ່າຫຼາຍ. ແຕ່ ພ້ອມກັນກັບສິ່ງດີງາມຕ່າງໆນັ້ນ, ຍັງມີບັນດາໄພອັນຕະລາຍທີ່ຊ້ອນແຝງຢູ່. ຄວາມໃຝ່ຝັນຂອງມະນຸດກ່ຽວກັບຊີວິດໜຶ່ງ ທີ່ປອດໄພ ສັນຕິພາບ ແລະ ຈະເລີນຮຸ່ງເຮືອງ ຍັງຢູ່ໄກໆໃນຕໍ່ໜ້າ.

ມະນຸດມີຄວາມມຸ່ງຫວັງ​ຕໍ່ສັນຕິພາບ, ແຕ່ເປັນຫຍັງຍັງເກີດມີການປະທະກັນ ຍັງມີສົງຄາມ. ເສດຖະກິດຂະ ຫຍາຍຕົວ, ແຕ່ເປັນຫຍັງຄົນເປັນຫຼາຍຕື້ຍັງທຸກຍາກ. ວິທະຍາສາດ - ເຕັກໂນໂລຊີມີຄວາມກ້າວໜ້າກະໂດດຂັ້ນ, ແຕ່ເປັນຫຍັງຍັງບໍ່ທັນມີວິທີ​ເພື່ອຮັບ​ມືກັບໄພທຳມະຊາດ ຕອບ​ໄຕ້ໂລກລະບາດ ໄດ້ຢ່າງມີ​ຜົນສັກສິດ.

ບັນດາຄຳຖາມເຫຼົ່ານັ້ນ ​ໄດ້ຕັ້ງຂຶ້ນໃຫ້ວົງຄະນະຍາດສາກົນພວກເຮົາໜ້າທີ່ຮັບຜິດຊອບສູງສົ່ງ ແລະ ໜັກໜ່ວງທີ່ສຸດ.

ຢູ່ໃນປະຫວັດສາດຂອງມວນມະນຸດ, ການສົງຄາມໄດ້ດັບສູນຫຼາຍພື້ນຖານອະລິຍະທຳ. ​ໃນກະໂຕ 100 ປີຜ່ານມາ, ສົງຄາມໂລກ 2 ຄັ້ງ ແລະ ການສົງຄາມທີ່ໂຫດຮ້າຍຕ່າງໆ, ໃນນັ້ນມີສົງຄາມຢູ່ຫວຽດນາມ, ໄດ້ເຮັດໃຫ້ຄົນເສຍຊີວິດ ເປັນຫຼາຍລ້ານ ແລະ ປະໄວ້ຜົນຢ້ອນຫຼັງໜັກໜ່ວງທີ່ສຸດ ທີ່ແກ່ຍາວຫຼາຍຮຸ້ນຄົນ.

ແນ່ນອນ ບັນດາທ່ານຈະເຫັນດີກັບຂ້າພະເຈົ້າວ່າ, ເຖິງວ່າສັນຕິພາບ ການຮ່ວມມື ການພັດທະນາ ແມ່ນທ່າອຽງຕົ້ນຕໍ, ແຕ່ໄພອັນຕະລາຍສົງຄາມ ຍັງບໍ່ທັນຖືກ​ກຳຈັດປັດເຂ່ຍ​ເທື່ອ. ຍັງມີຄວາມຮຸນແຮງ ຢູ່ຕາເວັນອອກກາງ, ອາຟຣິກກາເໜືອ, ມໍ່ໆນີ້ແມ່ນຢູ່ຊີຣີ - ບ່ອນທີ່ພວກເຮົາຕ້ອງກ່າວປະນາມຢ່າງແຂງແຮງ ກ່ຽວກັບການນຳໃຊ້ອາວຸດເຄມີ, ພ້ອມກັນນັ້ນ ສ້າງທຸກໂອກາດໃຫ້ແກ່ສັນຕິພາບ, ຊອກຫາທຸກສັນຕິວິທີ ເພື່ອປັດເຂ່ຍອາວຸດເຄມີ ບົນພື້ນຖານກົດໝາຍສາກົນ ແລະ ມະຕິຕ່າງໆ ຂອງສະຫະປະຊາຊາດ. ຍັງມີຄວາມເປັນຫ່ວງທີ່ເລິກເຊິ່ງ ກ່ຽວກັບບັນດາການຜັນປ່ຽນທີ່ຄາດຄະເນໄດ້ຍາກ ຢູ່ໃນແຫຼມເກົາຫຼີ.

ທະເລຈີນຕາເວັນອອກ, ທະເລຕາເວັນອອກ ຍັງບໍ່ທັນງຽບສະຫງົບຍ້ອນບັນດາການຍາດແຍ້ງອະທິປະໄຕ ຍາດແຍ້ງເຂດແດນ... ພຽງແຕ່ການກະທຳໜຶ່ງທີ່ຂາດຄວາມຮັບຜິດຊອບ ກໍ່ອາດຈະພາໃຫ້ເກີດມີການປະທະກັນ, ຊ້ຳບໍ່ໜຳ ພາໃຫ້ເກີດສົງຄາມ.

ຕໍ່ກັບທະເລຕາເວັນອອກ, ບ່ອນທີ່ສິນຄ້າຂອງໂລກກວ່າເຄິ່ງໜຶ່ງ ໄດ້ໄປຜ່ານ - ຮັບປະກັນຄວາມສະຫງົບ ປອດໄພ​ໃນການເດີນທະເລ ແມ່ນຜົນປະໂຫຍດຕົວຈິງ ບໍ່ພຽງແຕ່ຕໍ່ກັບພາກພື້ນ​ເທົ່າ​ນັ້ນ ຫາກຍັງຕໍ່ກັບທົ່ວໂລກນຳ​ອີກ. ຫວຽດນາມ ມີແຜນນະໂຍບາຍສະເໝີຕົ້ນສະເໝີປາຍ ​ໃນ​ການແກ້ໄຂການພິພາດຍາດແຍ້ງ ດ້ວຍສັນຕິວິທີ; ປົກປ້ອງຜົນປະໂຫຍດ ອັນຊອບທຳຂອງຕົນ, ພ້ອມກັນນັ້ນກໍ່ເພື່ອຜົນປະໂຫຍດລວມ, ສອດຄ່ອງກັບກົດໝາຍສາກົນ, ສົນທິສັນຍາຂອງສະຫະປະຊາຊາດ ກ່ຽວກັບກົດໝາຍທະເລປີ 1982, ປະຕິບັດຕາມຖະແຫຼງການວ່າ​ດ້ວຍວິທີ​ການ​ປະພຶດຂອງຝ່າຍຕ່າງໆ ຢູ່ໃນທະເລຕາເວັນອອກ (DOC), ບັນດາສັນຍາໃນພາກພື້ນ ແລະ ກ້າວໄປສູ່ປະມວນ​ຂໍ້​ກຳນົດ​ກ່ຽວ​ກັບການປະພຶດຂອງບັນດາຝ່າຍ ຢູ່ທະເລຕາເວັນອອກ (COC).

“ທຸກຄົນເກີດມາລ້ວນແຕ່ມີສິດເທົ່າທຽມກັນ. ໂລກສ້າງໃຫ້ເຂົາເຈົ້າມີສິດທີ່ບໍ່ມີໃຜສາມາດລ່ວງລະເມີດໄດ້; ໃນບັນດາສິດເຫຼົ່ານັ້ນ ມີສິດດຳລົງຄົງ​ຕົວ, ສິດເສລີພາບ ແລະ ສິດສະແຫວງຫາຄວາມຜາສຸກ”. ຊີ​ວິ​ຄົນ​ເຮົາ ເຖິງວ່າ ຜິວໜັງໃດກໍຕາມ ກໍ່ປະເສີດຄືກັນ. ຊີວິດຂອງຄົນຜູ້ໜຶ່ງຖືກເສຍໄປເຖິງແມ່ນວ່າຄອບຄົວນັ້ນຢູ່ໃນກະໂຕເຂດ ມາຮາດທານນີ້ ຫຼືວ່າ ຢູ່ເຂດຫ່າງໄກສອກຫຼີກໃດໜຶ່ງໃນໜ່ວຍໂລກນີ້ກໍຕາມ ກໍ່ລ້ວນແຕ່ ແມ່ນຄວາມເສຍຫາຍທີ່ເຈັບໃຈ.

ການກະທຳກະຫາຍສົງຄາມໃດໆ ກໍ່ລ້ວນແຕ່ຕ້ອງຖືກກ່າວປະນາມ, ສະກັດກັ້ນ. ຄວາມ​ພະຍາຍາມ​ກີດ​ກັ້ນ​ການ​ປະ​ທະກັນໃດໆ ກໍ່ລ້ວນແຕ່ຕ້ອງໄດ້ຮັບ​ຄວາມນັບຖື, ສະໜັບສະໜູນ. ​ເຖິງ​ວ່າຄົນເຈັບຍັງມີລົມ​ຫາຍ​ໃຈພຽງ​ໜ້ອຍໜຶ່ງ​ກໍຕາມ ​ແຕ່ຜູ້ເປັນທ່ານໝໍກໍ່ຕ້ອງກູ້ຊີວິດຄົນເຈັບນັ້ນ ຢ່າງສຸດອົກສຸດໃຈ. ສັນຕິພາບ​ຍັງ​ເຫຼືອ​ພຽງ​ແຕ່​ສັນຍານ​ໜຶ່ງ​ເຖິງວ່າອ່ອນນ້ອຍກໍຕາມ ພວກເຮົາກໍ່ຕ້ອງພະຍາຍາມສຸດຂີດ ເພື່ອຫຼີກລ້ຽງສົງຄາມ. ຍ້ອນວ່າ ສົງຄາມຈະເຮັດໃຫ້ບໍ່ພຽງແຕ່ຄົນໜຶ່ງຖືກເສຍຊີວິດເທົ່ານັ້ນ ຫາກຫຼາຍໆ ຄົນຖືກເສຍຊີວິດ - ​ໃນ​ນັ້ນ​ແນ່ນອນ​ຈະ​ມີ​ແມ່ຍິງ ແລະ ເດັກນ້ອຍຫຼາຍຄົນ.

ການປະທະກັນ ສົງຄາມອາດຈະຖືກສະກັດກັ້ນ ເມື່ອບັນດາການກະທຳທີ່ຜິດກັບກົດບັດສະຫະ ປະຊາຊາດ, ຜິດກັບກົດໝາຍສາກົນ, ມີລັກສະນະບັງຄັບ ແລະ ອຳນາດບາດ​ໃຫຍ່ທາງດ້ານການເມືອງ,… ຖືກ​ກຳຈັດ​ປັດເຂ່ຍ. ສັນຕິພາບພຽງແຕ່ໄດ້ຮັບ​ການ​ປົກ​ປັກ​ຮັກສາ​ໄວ້ ໃນເມື່ອປະເທດຕ່າງໆ ລ້ວນ​ແຕ່​ນັບຖືເອກະລາດ ອະທິປະໄຕ ແລະ ມູນເຊື້ອວັດທະນະທໍາ ຂອງກັນແລະກັນ, ບໍ່ນຳເອົາມາດຕະຖານດ້ານການເມືອງ ແລະ ຄຸນສົມບັດຂອງຕົນມາຍັດໃສ່ປະເທດອື່ນ; ໃນເມື່ອບົດບາດຂອງ ສະຫະປະຊາຊາດ, ຂອງສະພາປ້ອງກັນຄວາມໝັ້ນຄົງ ສະຫະປະຊາຊາດໄດ້ເສີມຂະຫຍາຍ… ແລະ ກ່ອນອື່ນໝົດ ແມ່ນຄວາມ​ໄວ້​ວາງໃຈຍຸດທະສາດລະຫວ່າງບັນດາປະເທດ ຕ້ອງໄດ້ເພີ່ມພູນຄຸນສ້າງຢ່າງບໍ່ຢຸດຢັ້ງ ດ້ວຍຄວາມຈິງໃຈ, ກິລິຍາມາລະຍາດຊື່ສັດ, ບັນດາການກະທຳ​ແທດ​ຈິງ, ລະອຽດເຊັ່ນ ການລົບລ້າງການປິດລ້ອມຕໍ່ກັບກູບາ ຫຼື ການຮັບຮອງເອົາສິດຕັດສິນດ້ວຍຕົນເອງຂອງປາແລສຕິນ.

ວົງຄະນະຍາດສາກົນພວກເຮົາລໍຄອຍບັນດາປະເທດໃຫຍ່ຈົ່ງເປັນບັນດາແວ່ນແຍງໃນການສ້າງສັນຕິພາບ. ສະພາປ້ອງກັນຄວາມໝັ້ນຄົງສະຫະປະຊາຊາດຈົ່ງເປັນບ່ອນອີງ, ເປັນກຳລັງໜູນ ເພື່ອໃຫ້ບັນດາປະເທດ, ບັນດາ ຊົນຊາດຮ່ວມມືພ້ອມກັນປົກປັກຮັກສາສັນຕິພາບ… ຝາມື​ແຫ່ງການລົ້ມຫາຍຕາຍຈາກຂອງການສົງຄາມ, ຂອງການກໍ່ການຮ້າຍ, ຂອງຄວາມຮຸນແຮງ ກຳລັງມີໜ້າຢູ່ຫຼາຍບ່ອນຫວັງຈະຂ້າຊີວິດຂອງຫຼາຍພັນ ຫຼາຍໝື່ນ ຫຼາຍລ້ານຄົນທີ່ບໍ່ມີໂທດ. ຢ່າສະໜັນສະໜູນ. ຢ່າປິດຫູຫຼັບຕາ. ຈົ່ງສະກັດກັ້ນຝາມືດັ່ງກ່າວ.

ຂ້າພະເຈົ້າເຫັນດີຕໍ່ກັບທັດສະນະຂອງພະນະທ່ານເລຂາທິການໃຫຍ່ວ່າ, ບັນດາ​ເປົ້າໝາຍພັດທະນາສະຫັດສະວັດ ທີ່ພະຍາຍາມຕ້ານຄວາມອຶດຫີວທຸກຍາກ ​ແມ່ນ​ມີຜົນສຳເລັດທີ່ສຸດໃນປະຫວັດສາດ. ແຕ່ພວກເຮົາບໍ່ລືມວ່າ, ຊັບສົມບັດທົ່ວໂລກ 40% ແມ່ນນອນຢູ່ໃນມືຂອງຈຳນວນຄົນກວມເອົາພຽງແຕ່ເກືອບ 1% ປະຊາກອນໂລກ. ຄວາມ​ແຕກ​ໂຕນ​ກັນລະຫວ່າງ ຮັ່ງມີ-ທຸກຍາກ ຍັງສືບຕໍ່ເພີ່ມຂຶ້ນ. ໃນໂລກຍັງມີໜຶ່ງກວ່າຕື້ຄົນຕ້ອງດຳລົງຊີວິດຢູ່ ໃນສະພາບທຸກຍາດລຳບາກ. ໝາຍຄວາມວ່າ ຫຼາຍຮ້ອຍລ້ານຄົນ - ໃນນັ້ນມີເດັກນ້ອຍຫຼາຍຄົນ - ຫີວຍ້ອນອາຫານບໍ່ພຽງພໍ, ໜາວຍ້ອນເຄື່ອງນຸ່ງຂາດເຂີນ, ເຈັບເປັນບໍ່ມີຢາກິນ, ເຖິງອາຍຸໄປຮຽນບໍ່ໄດ້ໄປໂຮງຮຽນ…

ພວກເຮົາກໍ່ບໍ່ລືມວ່າ, ຄວັນເສຍ, ໄພທຳລາຍປ່າໄມ້, ການຂຸດຄົ້ນຊັບພະຍາກອນຈົນບົກແຫ້ງ… ເຮັດໃຫ້ໜ່ວຍ ໂລກຮ້ອນຂຶ້ນ, ນ້ຳທະເລຍຶ່ງສູງຂຶ້ນ, ໄພທຳມະຊາດຮ້າຍແຮງ, ໂລກລະບາດລ່ວງລ້ຳ… ບັນດາໄພອັນຕະລາຍໃຫຍ່​ໂຕເຫຼົ່ານັ້ນ ເຮັດໃຫ້ບັນດາປະເທດທຸກຍາກແຮງທຸກຍາກກວ່າເກົ່າ.

ເພື່ອຫລຸດພົ້ນອອກຈາກຄວາມທຸກຍາກ; ເພື່ອກັນໄພທຳມະຊາດ; ເພື່ອສະກັດກັ້ນໂລກລະບາດ; ເພື່ອປົກ ປັກຮັກສາ ສິ່ງແວດລ້ອມ… ເພື່ອໂລກໜຶ່ງທີ່ຂຽວກວ່າ, ຍຸຕິທໍາກວ່າ ຕ້ອງການຄວາມຮ່ວມມືຂອງພວກເຮົາທັງໝົດ. ຜູ້ທຸກຍາກ, ປະເທດທຸກຍາກ ຕ້ອງພະຍາຍາມບືນຕົວຂຶ້ນ ດ້ວຍຄວາມຊ່ວຍເຫຼືອຂອງຜູ້ຮັ່ງມີກວ່າ, ປະເທດພັດທະນາກວ່າ. ຄວາມຊ່ວຍເຫຼືອນັ້ນ ບໍ່ແມ່ນພຽງແຕ່ດ້ວຍນ້ຳໃຈເມດຕາ “ໃບໄມ້ບໍ່ຂາດຫຸ້ມຫໍ່ໃບໄມ້ຂາດ” ເທົ່ານັ້ນ ຫາກຍັງ ກ່ອນອື່ນໝົດ ຕ້ອງດ້ວຍໜ້າທີ່ຮັບຜິດຊອບ ຍ້ອນວ່າຢູ່ໃນຄວາມຮັ່ງມີຂອງຫຼາຍຄົນ ຄວາມຂະຫຍາຍຕົວຂອງຫຼາຍປະເທດນັ້ນ ບໍ່ແມ່ນບໍ່ມີສ່ວນ​ເຊິ່ງຕາມ​ຄວນແມ່ນຂອງຜູ້ທຸກຍາກ ຂອງປະເທດທຸກຍາກຕ່າງໆ.

ວົງຄະນະຍາດສາກົນພວກເຮົາ ຈົ່ງດ້ວຍໜ້າທີ່ຮັບຜິດຊອບ ແລະ ນ້ຳໃຈເມດຕາ ພະຍາຍາມກວ່າເກົ່າ ອີກໃຫ້ແກ່ ​ລະບຽບວາລະການພັດທະນາພາຍຫຼັງປີ 2015 ແນໃສ່ປົກປັກຮັກສາສັນຕິພາບ, ຊຸກຍູ້ການຮ່ວມມື, ລົບລ້າງ ຄວາມອຶດຫີວທຸກຍາກໃຫ້ໝົດໄປ ແລະ ປົກປັກຮັກສາດາວພະເຄາະຂອງພວກເຮົາ. ຈົ່ງເພີ່ມທະວີການຊ່ວຍເຫຼືອ ແລະ ມີຂັ້ນຕອນສອດຄ່ອງ ເພື່ອໃຫ້ບັນດາປະເທດທີ່ດ້ອຍພັດທະນາກວ່າ ເຂົ້າຮ່ວມສັນຍາ ຂໍ້ກຳນົດສາກົນ ແລະ ແກ້ໄຂບັນຫາລວມຕ່າງໆ ຂອງມະນຸດຢ່າງມີປະສິດທິຜົນ. ຈົ່ງພ້ອມກັນປະເຊີນໜ້າ ແລະ ຜ່ານຜ່າບັນດາສິ່ງທ້າທາຍ, ໄພອັນຕະລາຍທົ່ວໂລກ ດ້ວຍຈິດໃຈ “ຄົນຜູ້ໜຶ່ງເພື່ອທຸກຄົນ, ທຸກຄົນເພື່ອຄົນຜູ້ໜຶ່ງ” ຄືດັ່ງທະຫານຮັກສາ​ພະ​ອົງຂອງນັກປະພັນຜູ້ລື​ຊື່ ອາເລກຊານເດີ ດຸຍມາ.

ເປັນຄົນຫວຽດນາມຜູ້ໜຶ່ງ, ສິ່ງທີ່ຂ້າພະເຈົ້າແລກປ່ຽນມານັ້ນລ້ວນແຕ່ແມ່ນພຶດຕິກຳຕົວຈິງທີ່ເຕັມໄປດ້ວຍ ເຫື່ອແຮງ ແລະ ເລືອດເນື້ອ. ພຽງແຕ່ກ່ອນໜ້ານີ້ຈັກສິບປີ, ສອງຄໍາວ່າຫວຽດນາມ ຕິດພັນກັບສົງຄາມ ແລະ ຕັດ ແຍກ, ກັບເລືອດເນື້ອ ແລະ ນໍ້າຕາ. ປະເທດໜຶ່ງຢູ່ຫ່າງໄກທີ່ມີຊື່ເອີ້ນວ່າຫວຽດນາມ ຖືກຮັບເອົາລູກແຕກລະເບີດ 15 ກວ່າລ້ານໂຕນ, ໝາຍຄວາມວ່າ ຫຼາຍກວ່າ 4 ເທື່ອຂອງຈຳນວນລູກແຕກລະເບີດທີ່ໄດ້ນຳໃຊ້ໃນສົງຄາມໂລກ ຄັ້ງທີ II. ຄົນຫວຽດນາມແຕ່ລະຄົນພວກຂ້າພະເຈົ້າ ຖືກຮັບເອົາຈຳນວນລູກແຕກລະເບີດຫຼາຍກວ່າເກືອບ 10 ເທື່ອຂອງນໍ້າໜັກຕົນເອງ. ນັ້ນແມ່ນຍັງບໍ່ທັນໄດ້ນັບເອົາ ຫຼາຍຮ້ອຍລ້ານລິດເຄມີທີ່ບັນຈຸທາດດີໂອຊີນ - ຄາຕະກອນຜູ້ໜຶ່ງທີ່ໂຫດຮ້າຍຕໍ່ກັບສຸຂະພາບ ແລະ ເຊື້ອສາຍຄົນ.

ດ້ວຍມູນເຊື້ອ “ເອົາຄວາມເປັນທຳເພື່ອຜາບ​​ແພ້ຄວາມຮ້າຍກາດ, ເອົາ​ຄວາ​ມ​ເມ​ຕາມາປ່ຽນ​ແທນໃຫ້ຄວາມ​ໂຫດຮ້າຍ”; ດ້ວຍນໍ້າໃຈອາດຫານເສຍສະຫຼະ ແລະ ຄວາມປະດິດສ້າງອັນເລີດລ້ຳ; ຍ້ອນຄວາມສະໜັບສະໜູນ ຊ່ວຍເຫຼືອຂອງ ປະຊາຊົນຜູ້ຮັກຫອມສັນຕິພາບ ຢູ່ໃນໂລກ, ປະຊາຊົນຫວຽດນາມ ຈຶ່ງປົກປັກຮັກສາ​ເອກະລາດ​ແຫ່ງຊາດໄດ້ ​ແລະ ​ໂຮມປະເທດຊາດ​ເປັນ​ເອກະ​ພາບ ໄດ້ຢ່າງສົມບູນ, ອັດອະດີດຕະການໄວ້, ຫັນໄປສູ່ອະນາຄົດ, ລົງມືກໍ່ສ້າງຟື້ນ​ຟູປະເທດຄືນ​ໃໝ່ຈາກກອງຂີ້ເທົ່າ; ປ່ຽນແປງໃໝ່, ເຊື່ອມໂຍງ​ເຂົ້າ​ກັບ​ສາກົນ ແລະ ພັດທະນາ.

ຫວຽດນາມ ໄດ້ນຳເອົາບັນດາເປົ້າໝາຍພັດທະນາສະຫັດສະວັດເຂົ້າໃນແຜນຍຸດທະສາດການພັດທະນາຂອງຕົນ, ສົມທົບຢ່າງແໜ້ນ​ແຟ້ນລະຫວ່າງການເຕີບໂຕດ້ານເສດຖະກິດ ກັບຄວາມກ້າວໜ້າ, ຍຸຕິທຳສັງຄົມ ແລະ ໄດ້ອົງການຈັດຕັ້ງ ກະສິກຳ ແລະ ສະບຽງອາຫານສະຫະປະຊາຊາດ ມອບລາງວັນຜົນງານດີເລີດ ໃນການລົບລ້າງຄວາມອຶດຫີວ, ຫລຸດຜ່ອນຄວາມທຸກຍາກ. ດ້ວຍທິດນຳ​ທີ່​ວ່າ ມະນຸດ​ເປັນ​ເປົ້າໝາຍ ເປັນໃຈກາງຂອງການພັດທະນາ, ຫວຽດນາມໄດ້ເອົາໃຈໃສ່​ເປັນພິເສດ ເຖິງການລົງທຶນໃຫ້ແກ່ສາທາລະນະສຸກ, ການສຶກສາ, ການ​ສື່ຂ່າວຖະ​ແຫຼ​ງການ… ​ເພື່ອ​ຮັບ​ໃຊ້ໃຫ້ແກ່ປະຊາຊົນທຸກຄົນ, ໂດຍສະເພາະແມ່ນຢູ່ເຂດຫຍຸ້ງຍາກ, ເຂດຊົນເຜົ່າສ່ວນໜ້ອຍຕ່າງໆ.

ຫວຽດນາມ ກໍ່ພະຍາຍາມພ້ອມກັນກັບບັນດາສະມາຊິກອື່ນໆ ກໍ່ສ້າງວົງຄະນະຍາດອາຊຽນ - ເຮືອນຫຼັງ ລວມ ຂອງບັນດາປະເທດອາຊີຕາເວັນອອກສຽງໃຕ້, ທີ່ເຄີຍຖືກແບ່ງແຍກຢ່າງເລິກເຊິ່ງຍ້ອນສົງຄາມ. ນັ້ນແມ່ນສິ່ງຢືນຢັນ ທີ່ມີຊີວິດຊີວາ ໃຫ້ແກ່ຄວາມມຸ່ງມາດປາຖະໜາ ກ້າວໄປສູ່ອະນາຄົນສັນຕິພາບ, ຮ່ວມມື, ພັດທະນາ, ວັດທະນາຖາວອນ; ໃຫ້ແກ່ ຄວາມເປັນເອກະພາບ​ໃນຄວາມ​ຫຼາກຫຼາຍ; ແລະ ໃຫ້ແກ່ການປະຕິບັດບັນດາ​ເປົ້າ​ໝາຍພັດທະນາສະຫັດສະວັດ.

ຍ້ອນ​ເຄີຍ​ໄດ້ຜ່ານບັນດາການສົງຄາມຮຸກຮານທີ່ໂຫດຮ້າຍ ແລະ ຄວາມອຶດຫີວລຳບາກ ດັ່ງນັ້ນຄວາມມຸ່ງມາດປາຖະໜາ ສັນຕິພາບ ແລະ ວັດທະນາຖາວອນ ຂອງຫວຽດນາມພວກຂ້າພະເຈົ້າຍິ່ງແຮງກ້າ. ພວກຂ້າພະເຈົ້າຍາມໃດກໍ່ພະຍາຍາມ ເຂົ້າຮ່ວມກໍ່ສ້າງສັນຕິພາບ, ລົບລ້າງຄວາມອຶດຫີວ, ຫລຸດຜ່ອນຄວາມທຸກຍາກ, ປົກປັກຮັກສາດາວພະເຄາະ ຂອງພວກເຮົາ. ຫວຽດນາມກຽມພ້ອມປະກອບສ່ວນແຫຼ່ງກຳລັງ, ເຖິງວ່າຍັງນ້ອຍ, ເພື່ອສົມມະນາຄຸນ ຕໍ່ກັບເພື່ອນມິດສາກົນ ທີ່ໄດ້ຊ່ວຍພວກຂ້າພະເຈົ້າໃນການຕໍ່ສູ້ຍາດ​ເອົາ​ເອກະລາດ ແລະ ປົກປັກຮັກສາເອກະລາດ, ​ໂຮມປະເທດຊາດ​ເປັນເອກະພາບ, ພົ້ນອອກຈາກຄວາມອຶດຫີວທຸກຍາກ. ຫວຽດນາມ ໄດ້ ແລະ ຈະເປັນຄູ່ຮ່ວມງານໜຶ່ງທີ່​ໄວ້​ວາງ​ໃຈ​ໄດ້ ​ເປັນສະມາຊິກໜຶ່ງທີ່ມີໜ້າທີ່ຮັບຜິດຊອບຕະຫຼອດກາລະນານ ຂອງວົງຄະນະຍາດ.

ຂ້າພະເຈົ້າຂໍເວົ້າເຖິງສະບຽງອາຫານຄືກັບຕົວຢ່າງໜຶ່ງ. ຈາກປະເທດໜຶ່ງທີ່ຂາດເຂີນອຶດຫີວ, ຫວຽດນາມ ໄດ້ກາຍເປັນປະເທດທີ່ສົ່ງອອກເຂົ້າສານ ຢືນໃນແຖວໜ້າຂອງໂລກ. ພວກຂ້າພະເຈົ້າບໍ່ພຽງແຕ່ຮັບປະກັນຄວາມສະຫງົບ ດ້ານສະບຽງອາຫານໃຫ້ແກ່ຕົນເອງ​ໄດ້ເທົ່ານັ້ນ ຫາກຍັງປະກອບສ່ວນຕັ້ງໜ້າ ຮັບປະກັນຄວາມສະຫງົບດ້ານສະບຽງອາຫານ ຂອງໂລກອີກດ້ວຍ. ພວກຂ້າພະເຈົ້າບໍ່ພຽງແຕ່ສົ່ງອອກເທົ່ານັ້ນ ຫາກຍັງຊ່ວຍໃຫ້ປະເທດອື່ນໆ ສາມາດຜະລິດເຂົ້າເປືອກເຂົ້າສານ ດ້ວຍຕົນເອງ ເຊັ່ນໄດ້ປະຕິບັດຢູ່ກູບາ, ໂມຊຳບິກ, ອັງໂກລາ, ມາລີ, ມາດາກາສກາ, ພະມ້າ… ພວກຂ້າພະເຈົ້າຫວັງວ່າ, ບັນດາປະເທດພັດທະນາ, ບັນດາອົງການຈັດຕັ້ງສາກົນ ຈະເຂົ້າຮ່ວມຊ່ວຍເຫຼືອ​ໃຫ້ບັນດາ​ໂຄງການທີ່ຄ້າຍຄື​ແນວ​ນັ້ນ. ນັ້ນຈະແມ່ນບັນດາຕົວແບບການຮ່ວມມືຫຼາຍຝ່າຍ ທີ່ເຕັມໄປດ້ວຍຄວາມໝາຍ ແລະ ມີປະສິດທິຜົນຕົວຈິງ.

ຂ້າພະເຈົ້າຢາກສິ້ນສຸດບົດປາໄສຂອງຕົນດ້ວຍຄວາມເຊື່ອໝັ້ນວ່າ “ລະບຽບວາລະການພັດທະນາພາຍຫຼັງປີ 2015” ຈະໄດ້ບູລະນະ​ໃຫ້ສົມບູນແບບ​ເພື່ອກ້າວໄປສູ່ໂລກແຫ່ງໜຶ່ງທີ່ບໍ່ມີສົງຄາມ, ບໍ່ມີຄວາມອຶດຫີວທຸກຍາກ. ທັງໝົດເພື່ອ ສັນຕິພາບ ການຮ່ວມມື ພັດທະນາ ວັດທະນາຖາວອນ. ທຸກສິ່ງທຸກຢ່າງເພື່ອດາວພະເຄາະຂອງພວກເຮົາ ຂຽວງາມຕະຫຼອດກາລະນານ. ສີຂຽວຂອງສັນຕິພາບ, ສີຂຽວຂອງການພັດທະນາແບບຍືນຍົງ./.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ