ວັນເສົາ, 14/12/2019
ໄລຍະໃໝ່ແຫ່ງການພົວພັນຮ່ວມມື ທີ່ເປັນມູນເຊື້ອ ລະຫວ່າງຫວຽດນາມ - ມົງໂກລີ
29/7/2016 12:5' ສົ່ງ ພິມ
ທ່ານນາຍົກລັດຖະມົນຕີ ຫງວຽນຊວນຝຸກ ແລະ ທ່ານນາຍົກລັດຖະມົນຕີມົງໂກລີ ຈາການຕູນກາ ເອີເຕເນບາດ. (ພາບ: VGP)

ເພີ່ມ​ທະວີ​ຄວາມ​ເຊື່ອ​ຖື​ດ້ານການ​ເມືອງ ​ແລະ ຄວາມ​ເຂົ້າ​ໃຈຊຶ່ງ​ກັນ​ແລະ​ກັນ​ລະຫວ່າງ​ສອງ​ປະ​ເທດ

ການ​ຢ້ຽມຢາມ​ປະ​ເທດ​ມົງ​ໂກ​ລີ​ຢ່າງ​ເປັນ​ທາງ​ການ​ຂອງ​ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ແລ​ະພັນ​ລະ​ຍາ ​ໄດ້​ດຳ​ເນີນ​ໃນ​ເວລາ​ສອງ​ວັນ, ​ແຕ່​ວັນ​ທີ 13 ຫາ​ວັນ​ທີ 14 ​ເດືອນ​ກໍລະກົດ 2016, ​ໄດ້​ບັນລຸ​ຜົນສຳ​ເລັດ​ອັນ​ສຳຄັນ, ​ໄຂ​ໄລຍະ​ໃໝ່​ແຫ່ງ​ການ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ ລະຫວ່າງ​ຫວຽດນາມ - ມົງ​ໂກ​ລີ.

ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ໄດ້​ພົບ​ປະ​ເຈລະຈາ​ກັບທ່ານ ຈາການ​ຕູນກາ ​ເອີ​ເຕ​ເນ​ບາດ ນາຍົກລັດຖະມົນຕີມົງ​ໂກ​ລີ, ພົບ​ປະ​ຫາລື​ກັບທ່ານ ຊາ​ຄີ​ອາ​ກີ​ອິນ ​ເອນ​ເບ​ກຕອດ ​ປະທານາທິບໍດີມົງ​ໂກ​ລີ, ພົບ​ປະກັບ​ທ່ານ ມີ​ແຢກົມ​ໂບ ​ແອນ​ຄະ​ໂບນ ປະທານ​ສະພາ​ແຫ່ງ​ຊາດມົງ​ໂກ​ລີ, ​ເປັນ​ສັກຂີ​ພະຍານ​ໃນ​ພິທີ​ເຊັນຂໍ້​ຕົກລົງ​ກ່ຽວ​ກັບ​ການ​ຮ່ວມ​ມື​ລະຫວ່າງ​ຫ້ອງການ​ການ​ຄ້າ​ແລະ​ອຸດສາຫະກຳ​ຫວຽດນາມ ​ແລະ ສະຫະພັນ​ເຈົ້າ​ຂອງ​ວິ​ສາ​ຫະກິດ​ມົງ​ໂກ​ລີ, ​​ໃຫ້​ກຽດເຂົ້າ​ຮ່ວມ​ເວທີ​ປາ​ໄສ​ວິ​ສາ​ຫະກິດ​ຫວຽດນາມ - ມົງ​ໂກ​ລີ ​ແລະ ​ໄປ​ຢາມ​ພື້ນຖານ​ປຸງ​ແຕ່ງ​ຂົນ​ສັດ​ແຖວ​ໜ້າ​ຂອງ​ມົງ​ໂກ​ລີ; ​ໃຫ້ການ​ຕ້ອນຮັບ​ທ່ານ ປອ.ດາດ​ສະ​ເຊ​ເວນ ປະທານ​ສະມາຄົມ​ມິດຕະພາບ​ມົງໂກ​ລີ - ຫວຽດນາມ; ຢາມ​ແລະ​ໂອ້​ລົມ​ກັບ​ພະນັກງານ, ລັດຖະກອນ​ສະຖານທູດ​ຫວຽດນາມ ​ແລະ ພີ່ນ້ອງ​ຊາວ​ຫວຽດນາມ​ທີ່​ກຳລັງ​ດຳລົງ​ຊີວິດ ຮ່ຳຮຽນ ​ເຮັດ​ວຽກ​ຢູ່​ມົງ​ໂກ​ລີ.

ຢູ່​ທີ່​ການ​ພົບ​ປະ​ເຈລະຈາ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ແລະ ທ່ານນາຍົກລັດຖະມົນຕີ ຈ.​ເອີ​ເຕ​ເນ​ບາດ ​ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ, ​ເປັນ​ເອກະສັນ​ກັນ​ກ່ຽວ​ກັບ​ຫຼາຍ​ເນື້ອ​ໃນ ​ແລະ ມາດ​ຕະການ​ອັນ​ລະອຽດ ​ເພື່ອ​ປັບປຸງ, ​ເພີ່ມ​ທະວີ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ລະຫວ່າງ​ຫວຽດນາມ - ມົງ​ໂກ​ລີ.

ທ່ານ​ນາຍົກລັດຖະມົນຕີທັງ​ສອງ​ໄດ້​ເປັນ​ເອກະສັນ​ກັນ​ສືບ​ຕໍ່​ເພີ່ມ​ທະວີຄວາມ​ເຊື່ອ​ຖື​ດ້ານ​ການ​ເມືອງ ​ແລະ ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ ​ໂດຍ​ຜ່ານ​ການ​ຢ້ຽມຢາມ ​ແລະ ພົບ​ປະ​ຢ່າງ​ເປັນ​ປະຈຳ ​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ ກໍ​ຄື​ການ​ພົບ​ປະ​ແລກປ່ຽນລະຫວ່າງ​ບັນດາ​ຂັ້ນ, ຂະ​ແໜງ​ການ​ຂອງ​ສອງ​ປະ​ເທດ; ​ເພີ່ມ​ທະວີ​ການ​ຮ່ວມ​ມື​ທາງ​ດ້ານ​ການ​ປ້ອງ​ກັນ​ປະ​ເທດ, ປ້ອງ​ກັນ​ຄວາມ​ໝັ້ນຄົງ ​ແລະ ຊຸກຍູ້​ການ​ເຊັນ​ບັນດາສັນຍາ​ຮ່ວມ​ມືທີ່​ກ່ຽວຂ້ອງ.

ສອງ​ຝ່າຍ​ເຫັນ​ດີ​ເປັນ​ເອກະສັນ​ຍົກ​ສູງ​ປະສິດທິ​ຜົນ ​ແລະ ບົດບາດ​ຂອງຄະນະ​ກຳມະການ​ຮ່ວມ​ມື​ລະຫວ່າງ​ລັດຖະບານ​ຫວຽດນາມ - ລັດຖະບາດ​ມົງ​ໂກ​ລີ, ​ເພີ່ມ​ທະວີ​ການ​ຮ່ວມ​ມື​ດ້ານ​ເສດຖະກິດ - ການ​ຄ້າ ທີ່​ສອດຄ່ອງ​ກັບ​ຄວາມ​ສາມາດ​ບົ່ມ​ຊ້ອນ ​ແລະ ຜົນ​ປະ​ໂຫຍ​ດຂອງ​ສອງ​ປະ​ເທດ; ຮັບຮອງ​ຊຶ່ງ​ກັນ​ແລະ​ກັນ​ໂດຍ​ໄວ​ກ່ຽວ​ກັບມາ​ຕະຖານ​ອານາ​ໄມ​ກັກ​ກັນ​ພະຍາດ​ຕໍ່​ກັບ​ສິນຄ້າ​ກະສິກຳ​ຂອງ​ຫວຽດນາມ ​ແລະ ບັນດາ​ຜະລິດ​ຕະພັນ​ຊີ້ນ​ຂອງ​ມົງ​ໂກ​ລີ, ຊອກ​ຫາ​ວິທີ​ແກ້ໄຂ, ອຳນວຍ​ຄວາມ​ສະດວກ​ກວ່າ​ອີກ ​ໃຫ້​ແກ່​ການ​ຂົນ​ສົ່ງ​ສິນຄ້າລະຫວ່າງ​ສອງ​ປະ​ເທດ. ສອງ​ຝ່າຍ​ກໍ​ເຫັນ​ດີ​ເປັນ​ເອກະສັນ​ເປີດ​ກວ້າງ​ການ​ຮ່ວມມື​ໃນ​ບັນດາ​ຂົງ​ເຂດ​ທີ່​ມີ​ຄວາມ​ສາມາດ​ບົ່ມ​ຊ້ອນ​ຫຼາຍຄື ກະສິກຳ, ຂຸດ​ຄົ້ນ​ແຮ່​ທາດ, ອຸດສາຫະກຳ​ເບົາ, ການ​ຢາ. ຫວຽດນາມ​ສະ​ເໜີ​ໃຫ້​ມົງ​ໂກ​ລີ​ຮັບ​ເອົາ​ແຮງ​ງານ​ຫວຽດນາມ, ສ້າງ​ສິ່ງ​ແວດ​ລ້ອມ​ທີ່​ສະດວກ​ດີ​ໃຫ້​ແກ່​ວິ​ສາ​ຫະກິດຂອງ​ສອງ​ປະ​ເທດ​ໃນ​ການ​ຄົ້ນ​ຄວ້າຕະຫຼາດ, ​ແລກປ່ຽນ​ການ​ຄ້າ ​ແລະ ການ​ລົງທຶນ. ມົງ​ໂກ​ລີ​ຊົມ​ເຊີຍ​ຫວຽດນາມ​ລົງທຶນ​ກໍ່ສ້າງ​ໂຄງ​ສ້າງ​ພື້ນຖານ, ຂຸດ​ຄົ້ນ​ແຮ່​ທາດ​, ປຸງ​ແຕ່ງ​ຜະລິດ​ຕະພັນ​ກະສິກຳ… ຢູ່ມົງ​ໂກ​ລີ.

ສອງ​ຝ່າຍ​ຢັ້ງຢືນຄວາມ​ຈຳ​ເປັນ​ຕ້ອງ​ເພີ່ມ​ທະວີ​ການ​ເຄື່ອນ​ໄຫວ​ແລກປ່ຽນ​ລະຫວ່າງປະຊາຊົນ, ການຮ່ວມມືດ້ານ​ວັດທະ​ນະ​ທຳ, ທ່ອງ​ທ່ຽວ, ສຶກສາ, ສິລະ​ປະ ​ເພື່ອ​ແນ​ໃສ່​ເພີ່ມ​ທະວີ​ຄວາມ​ເຂົ້າ​ໃຈ​ ຄວາມ​ເຊື່ອ​ຖືຊຶ່ງ​ກັນ​ແລະ​ກັນ ລະຫວ່າງ​ປະຊາຊົນ​ສອງ​ປະ​ເທດ, ພິ​ເສດ​ແມ່ນ​ຮຸ່ນ​​ໜຸ່ມນ້ອຍ; ​ເອົາ​ໃຈ​​ໃສ່​ຊ່ວຍ​ເຫຼືອວົງ​ຄະນາ​ຍາດ​ຊາວ​ຫວຽດນາມ​ຢູ່​ມົງ​ໂກ​ລີ ​ແລະ ຊາວ​ມົງ​ໂກ​ລີຢູ່​ຫວຽດນາມ. ທ່ານນາຍົກລັດຖະມົນຕີ ຈ.​ເອີ​ເຕ​ເນ​ບາດ ສະ​ແດງ​ຄວາມ​ຂອບ​ໃຈ​ຕໍ່​ການ​ຮ່ວມ​ມື​ຂອງ​ຫວຽດນາມ​ໃນ​ການ​ຟື້ນ​ຟູ ປະຕິສັງຂອນ​ບູຮານ​ສະຖານ​ຕ່າງໆ​ຂອງ​ມົງ​ໂກ​ລີ​ຄື ວັດ​ຈອຍຊີ​ນ, ວັງ ບົດ​ຄານ.

ທ່ານ​ນາຍົກລັດຖະມົນຕີທັງ​ສອງ​ສະ​ແດງ​ຄວາມ​ພຶງ​ພໍ​ໃຈ ​ແລະ ຕີ​ລາຄາ​ສູງ​ຕໍ່​ການ​ສົມທົບ ​ແລະ ຮ່ວມ​ມື​ຢ່າງ​ແໜ້ນ​ແຟ້ນ ລະຫວ່າງ​ສອງ​ຝ່າຍ ​ໃນ​ເວທີ​ປາ​ໄສ​ສາກົນ​ແລະ​ພາກ​ພື້ນ​ຕ່າງໆ​ເຊັ່ນ ສະຫະ​ປະຊາ​ຊາດ, ຂະ​ບວນການ​ບໍ່​ເຂົ້າ​ຮ່ວມ​ກຸ່ມ, ອາ​​ເຊມ (ASEM), ອາ​ເຣີ​ແອັບ (ARF), ຢູ​ເນັດ​ສະ​ໂກ (UNESCO),…. ​ແລະ​ແລກປ່ຽນນຳ​ກັນ​ກ່ຽວ​ກັບ​ບັນດາ​ບັນຫາ​ທີ່​ສອງ​ຝ່າຍ​ມີ​ຄວາມ​ສົນ​ໃຈ, ​ໃນ​ນັ້ນ​ມີ​ສະພາບ​ຄວາມ​ສັບສົນ​ຢູ່​ທະ​ເລ​ຕາ​ເວັນ​ອອກ, ຄຳ​ພິພາກສາ​ໃນ​ວັນ​ທີ 12-7-2016 ຂອງ​ສານ​ອະນຸຍາ​ໂຕ​ຕຸລາການ (PCA) ຂອງ​ສະຫະ​ປະຊາ​ຊາດ.

​ໃນ​ການ​ຖະ​ແຫຼ​ງຂ່າວ​ຮ່ວມ​ກັນ​ພາຍ​ຫຼັງ​ການ​ພົບ​ປະ​ເຈລະຈາ, ທ່ານນາຍົກລັດຖະມົນຕີ ຈ.​ເອີ​ເຕ​ເນ​ບາດ ​ໃຫ້​ຮູ້​ວ່າ, ມົງ​ໂກ​ລີ​ຕີ​ລາຄາ​ສູງ​ການ​ຢ້ຽມຢາມ​ຂອງທ່ານ​ນາຍົກລັດຖະມົນຕີຫວຽດນາມ​ພາຍຫຼັງ 17 ປີ (ນັບ​ແຕ່​ການ​ຢ້ຽມຢາມ​ຂອງທ່ານ​ນາຍົກລັດຖະມົນຕີ ຟາ​ມວັນ​ຂາຍ ​ເມື່ອ​ປີ 1999). ນີ້​ແມ່ນການ​ຢ້ຽມຢາມ​ທີ່​ມີ​ຄວາມ​ໝາຍ​ພິ​ເສດ, ​ໄຂ​ໄລຍະ​ໃໝ່​ແຫ່ງ​ການ​ພົວພັນຮ່ວມ​ມືທີ່​ເປັນ​ມູນ​ເຊື້ອ​ລະຫວ່າງ​ສອງ​ປະ​ເທດ. “ການ​ພົບ​ປະ​ເຈລະຈາ​ໄດ້​ດຳ​ເນີນ​ໄປ​ໃນ​ບັນຍາກາດອົບ​ອຸ່ນ, ສະໜິດສະໜົມ ດ້ວຍ​ເນື້ອ​ໃນ​ແລກປ່ຽນ​ກ່ຽວ​ກັບ​ຫຼາຍ​ຂົງ​ເຂດ​ການ​ຮ່ວມ​ມື”, ທ່ານນາຍົກລັດຖະມົນຕີ ຈ.​ເອີ​ເຕ​ເນ​ບາດ ຢັ້ງຢືນ​ສາຍ​ພົວພັນ​ອັນ​ເລິກ​ເຊິ່ງ, ຈິງ​ໃຈ, ຊ່ວຍ​ເຫຼືອ​ຊຶ່ງ​ກັນ​ແລະ​ກັນ​ໃນ​ປະຫວັດສາດ​ຈະ​ໄດ້​ປັບປຸງ, ພັດທະນາ​ຍິ່ງ​ຂຶ້ນ​ໃນ​ໄລຍະ​ຕໍ່​ໄປ.

ດ້ວຍຄວາມ​ຄິດ​​ເຫັນແບບ​ດຽວ​ກັນ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ໃຫ້​ທັດສະນະ​ວ່າ ການ​ພົບ​ປະ​ເຈລະຈາ​ໄດ້​ຮັບ​ຜົນສຳ​ເລັດ​ເປັນ​ຢ່າງ​ດີ, ການ​ພົວພັນ​ທີ່​ເປັນ​ມູນ​ເຊື້ອ​ລະຫວ່າງ​ຫວຽດນາມ - ມົງ​ໂກ​ລີ​ໃນ​ເວລາ​ທີ່​ຜ່ານ​ມາ​ໄດ້​ຮັກສາ​ຢ່າງ​ໝັ້ນຄົງ ​ແລະ ນັບ​ມື້​ນັບ​ຂະຫຍາຍຕົວ.

ສືບ​ຕໍ່​ຂຸດ​ຄົ້ນ​ຄວາມ​ສາມາດ​ບົ່ມ​ຊ້ອນ ​ແລະ ​ເສີມຂະຫຍາຍທ່າ​​ແຮງ

​ໃນ​ໂຄງການ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ໄດ້​ໃຫ້​ກຽດ​ເຂົ້າ​ຮ່ວມ​ເວທີ​ປາ​ໄສ​ວິ​ສາ​ຫະກິດ​ຫວຽດນາມ - ມົງ​ໂກ​ລີ ດ້ວຍ​ການ​ເຂົ້າ​ຮ່ວມ​ຂອງ​ວິ​ສາ​ຫະກິດ​ມົງ​ໂກ​ລີ ​ແລະ ຫວຽດນາມ​ເປັນ​ຈຳນວນ​ຫຼາຍ. ທ່ານ​ນາຍົກລັດຖະມົນຕີ ຕີ​ລາຄາ​ວ່າ “ຄວາມ​ສາມາດ​ບົ່ມ​ຊ້ອນ, ທ່າ​ແຮງ​ຂອງ​ແຕ່ລະ​ປະ​ເທດຍັງ​ຫຼາຍ​ທີ່​ສຸດ ຊຶ່ງ​ສອງ​ຝ່າຍ​ຂຸດ​ຄົ້ນ​ບໍ່​ໄດ້​ຫຼາຍ​ພໍ​ທໍ່​​ໃດ”; ຫວັງ​ວ່າ​ວິ​ສາ​ຫະກິດ​ຂອງ​ສອງ​ປະ​ເທດ​ຈະ​ຜ່ານ​ຜ່າ​ຄວາມ​ຂວາງ​ຂັ້ນ​ທາງ​ດ້ານ​ພູມສາດ, ຄວາມ​ຫຍຸ້ງຍາກ​ໃນ​ການ​ຂົນ​ສົ່ງສິນຄ້າ ​ເພື່ອ​ພັດທະນາ​ການ​ພົວພັນ​ການ​ຄ້າ​ໃຫ້​ມັນ​ສົມ​ຄູ່​ກັບ​ການ​ພົວພັນ​ດ້ານ​ການ​ເມືອງ​ທີ່​ດີງາມ ​ແລະ ຄວາມ​ສາມາດ​ບົ່ມ​ບ້ອນ​ຂອງ​ສອງ​ປະ​ເທດ, “ຈະບໍ່ປະ​ໃຫ້​ມູນ​ຄ່າ​ການ​ຄ້າ​ສອງ​ຝ່າຍຢູ່​ໃນ​ລະດັບ​ພຽງ 35 ລ້ານ​ໂດ​ລາ​ສະຫະລັດ​ຄື​ປັດຈຸບັນ”.

​ແນະນຳ​ກ່ຽວ​ກັບ​ຄວາມ​ສາມາດ​ບົ່ມ​ຊ້ອນ, ທ່າ​ແຮງ ກໍ​ຄື​ຄວາມ​ຕ້ອງການ​ຂອງ​ຫວຽດນາມ​ຕໍ່​ກັບ​ສິນຄ້າ​ຂອງ​ມົງ​ໂກລີ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ຢັ້ງຢືນ​ຫວຽດນາມ​ຈະ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ທີ່​ສຸດ​ໃຫ້​ວິ​ສາ​ຫະກິດ​ມົງ​ໂກ​ລີເຂົ້າ​ມາ​ລົງທຶນ, ທຳ​ການ​ທຸລະ​ກິດ​ຢູ່​ຫວຽດນາມ ດ້ວຍ​ຈິດ​ໃຈ​ສອງ​ຝ່າຍ​ຕ່າງ​ກໍ​ມີ​ຜົນ​ປະ​ໂຫຍ​ດ ​ແລະ ​ໃຫ້​ຮູ້​ວ່າ​ ເມື່​ອ​ເຂົ້າ​ໃນ​ຕະຫຼາດ​ຫວຽດນາມ​ແລ້ວ ​ບັນດາ​ວິ​ສາ​ຫະກິດ​ມົງ​ໂກລີຈະ​ມີ​ໂອກາດ​ເຂົ້າ​ເຖິງ​ຕະຫຼາດ​ອາ​ຊຽນທີ່​ກວ້າງຂວາງ ຊຶ່ງ​ເປັນ​ຕະຫຼາດ​​ແຫ່ງ​ບັນດາ​ສັນຍາ​ການ​ຄ້າ​ເສລີ, ​ແລະ​ເຈາະ​ຈິ້ມວ່າ ສອງ​ຝ່າຍ​ອາດ​ຈະ​ສ້າງສາ​ຍການ​ຂົນ​ສົ່ງ​ໃໝ່ ຄື​ການ​ຂົນ​ສົ່ງ​ທາງ​ອາກາດ.

ປະທານ​ສະຫະພັນ​ເຈົ້າ​ຂອງ​ວິ​ສາ​ຫະກິດ​ມົງ​ໂກ ​ແລະ ປະທານ​ຫ້ອງການການ​ຄ້າ​ແລະ​ອຸດສາຫະກຳ​ຫວຽດນາມ​ໃຫ້​ຮູ້​ວ່າ, ບັນດາ​ວິ​ສາ​ຫະກິດ​ຂອງ​ສອງ​ປະ​ເທດ​ໄດ້​ແລກປ່ຽນ​ກ່ຽວກັບ​ບັນດາ​ໂຄງການ​ຮ່ວມ​ມືອັນ​ລະອຽດ ​ແລະ ສະ​ແດງ​ຄວາມ​ຄິດ​ເຫັນ​ວ່າ ການ​ຢ້ຽມຢາມ​ປະ​ເທດ​ມົງ​ໂກ​ລີ​ຂອງທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ສ້າງ​ກຳລັງ​ໜູນ​ອັນ​ໃຫຍ່​ໂຕ​ໃຫ້​ວິ​ສາ​ຫະກິດ​ສອງ​ປະ​ເທດ. ​ໃນ​ໂອກາດ​ນີ້ ສອງ​ຝ່າຍ​ໄດ້​ລົງ​ນາມ​ໃນ​ສັນຍາ​ກໍ່ສ້າງ​ໂຮງງານ​ປຸງ​ແຕ່ງ​ກະດູກ​ສັດ​ຂອງ​ມົງ​ໂກລີ​ຢູ່​ຫວຽດນາມ ທີ່​ມີ​ມູນ​ຄ່າ 25 ລ້ານ​ໂດ​ລາ​ສະຫະລັດ.

​ໃນ​ການ​ຢ້ຽມຢາມ​ປະ​ເທດ​ມົງ​ໂກ​ລີ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ແລະ​ພັນ​ລະ​ຍາ​ໄດ້​ໄປ​ຢາມ​ແລະ​ໂອ້​ລົມ​ຢ່າງ​ສະໜິດສະໜົມ​ກັບ​ພະນັກງານ, ລັດຖະກອນ​ສະຖານທູດ​ຫວຽດນາມ ​ແລະ ວົງ​ຄະນາ​ຍາດ​ຊາວ​ຫວຽດນາມ​ທີ່​ກຳລັງ​ດຳລົງ​ຊີວິດ ຮ່ຳຮຽນ ​ເຮັດ​ວຽກ​ຢູ່​ມົງ​ໂກ​ລີ. ທ່ານນາຍົກລັດຖະມົນຕີ ຮຽກຮ້ອງ​ໃຫ້​ພະນັກງານ ລັດຖະກອນ​ສະຖານທູດສືບ​ຕໍ່​ຍົກ​ສູງ​ຄວາມ​ຮັບຜິດຊອບ ຊ່ວຍ​ໜຸນ​ແລະພ້ອມ​ກັບວົງ​ຄະນາ​ຍາດ​ຊາວ​ຫວຽດນາມ​ປະກອບ​ສ່ວນ​ເພີ່ມ​ພູນ​ຄູ​ສ້າງ, ຂະຫຍາຍ​ສາຍ​ພົວພັນ​ລະຫວ່າງ​ສອງ​ລັດຖະບານ ​ແລະ ປະຊາຊົນ​ສອງ​ປະ​ເທດ​ຫວຽດນາມ - ມົງ​ໂກ​ລີ ​ໃຫ້​ຈະ​ເລີ​ນສວຍ​ງາມ​ຍິ່ງ​ກວ່າ​ອີກ./.

ສັງ​ລວມ​ໂດຍ ບນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ