ວັນອັງຄານ, 22/10/2019
ຫວຽດນາມ - ບຣູໄນ ດາຣູຊາລາມ ຕັດສີນໃຈຂະຫຍາຍສາຍພົວພັນລະຫວ່າງ ສອງປະເທດ ທັງລວງກວ້າງ ແລະ ລວງເລິກ
9/9/2016 11:30' ສົ່ງ ພິມ
ປະທານປະເທດ ເຈິ່ນດ້າຍກວາງ ພົບປະກັບ ເຈົ້າຊີວິດ ຮັດຢີ ຮັດຊານັນ ໂບນເກຍ ມູອິດຊັດດິນ ວັດເດົາລາ. (ພາບ: TTXVN)

ຕອນ​ເຊົ້າ​ວັນ​ທີ 27 ສິງຫາ, ພິທີ​ຕ້ອນຮັບ​ທ່ານ​ປະທານ​ປະ​ເທດ​ ເຈິ່ນ​ດ້າຍ​ກວາງ ​ແລະ ພັນ​ລະ​ຍາ ​ໄດ້​ຈັດ​ຂຶ້ນຢ່າງເປັນ​ທາງ​ການ​ແລະ​ສົມ​ກຽດ​ ທີ່ພະ​ລາຊະ​ວັງ ອິດ​ສະ​ຕານາ ນູຣູນ ອີ​ມານ ຢູ່​ນະຄອນຫຼວງ ບັນຕາ ​ເສຣີ ​ເບ​ກາ​ວັນ, ປະ​ເທດບຣູ​ໄນ ດາຣູຊາລາມ.

ພາຍຫຼັງ​ພິທີ​ຕ້ອນຮັບ, ທ່ານ​ປະທານ​ປະ​ເທດ​ ເຈິ່ນ​ດ້າຍ​ກວາງ ​ແລະ ພັນ​ລະ​ຍາ ​ໄດ້​ພົບ​ປະ​​ກັບເຈົ້າ​ຊີວິດ ຮັດ​ຢີ ຮັດ​ຊາ​ນັນ ​ໂບນ​ເກ​ຍ ມູອິດ​ຊັດ​ດິນ ວັດ​ເດົາ​ລາ ​ແລະ ພະ​ລາ​ຊີ​ນີ. ພາຍຫຼັງ​ການ​ພົບ​ປະ, ທ່ານ​ປະທານ​ປະ​ເທດ​ ເຈິ່ນ​ດ້າຍ​ກວາງ ​ແລະ ເຈົ້າ​ຊີວິດ ຮັດ​ຢີ ຮັດ​ຊາ​ນັນ ​ໂບນ​ເກ​ຍ ມູອິດ​ຊັດ​ດິນ ວັດ​ເດົາ​ລາ ພ້ອມ​ກັບ​ຄະນະ​ຜູ້​ແທນ​ຂັ້ນ​ສູງຫວຽດນາມ ​ແລະ ບຣູ​ໄນ ດາຣູຊາລາມ ​ກໍ​ໄດ້​ດຳ​ເນີນ​ການ​ພົບ​ປະ​ເຈລະຈາ​ຢ່າງ​ເປັນ​ທາງ​ການ.

ຜູ້​ນຳ​ທັງ​ສອງ​ໄດ້​ແລກ​ປ່ຽນ​ທັດສະນະກ່ຽວ​ກັບ​ການ​ພົວພັນ​ລະຫວ່າງ​ສອງ​ປະ​ເທດ ກໍ​ຄື​ບັນດາ​ບັນຫາ​ພາກ​ພື້ນ ​ແລະ ສາກົນ ທີ່​ສອງ​ຝ່າຍ​ມີ​ຄວາມ​ສົນ​ໃຈ ​ໃນ​ບັນຍາກາດມິດຕະພາບ ​ແລະ ສະໜິດສະໜົມ; ​ເຫັນ​ດີ​ເປັນ​ເອກະ​ພາບ​ ພ້ອມ​ກັນ​ຕັດສີນ​ໃຈ ​ຂະຫຍາຍ​ສາຍ​ພົວພັນ​ລະຫວ່າງ​ສອງ​ປະ​ເທດຍິ່ງ​ກວ່າ​ອີກ, ທັງ​ລວງ​ກວ້າງ​ແລະ​ລວງ​ມ​ເລິກ, ​ເພື່ອ​ຜົນ​ປະ​ໂຫຍ​ດຂອງ​ປະຊາຊົນ​ສອງ​ປະ​ເທດ.

ຜູ້​ນຳ​ທັງ​ສອງ​ສະ​ແດງ​ຄວາ​ມພຶງ​ພໍ​ໃຈກ່ຽວ​ກັບຄວາມ​ກ້າວໜ້າ​ທີ່​ດີງາມ ຂອງ​ການ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ ນັບ​ແຕ່​ເມື່ອສອງ​ປະ​ເທດສ້າງ​ຕັ້ງສາຍ​ພົວພັນທາງ​ການ​ທູດ​ໃນ​ວັນ​ທີ 29 ກຸມພາ 1992; ​ເນັ້ນ​ໜັກ​ເຖິງ​ຄວາມ​ສຳຄັນ ​ຂອງ​ການ​ຢ້ຽມຢາມ​ຂອງ​ປະທານ​ປະ​ເທດຫວຽດນາມ ​ໃນ​ການ​ຮັກສາ​ສາຍ​ພົວພັນ​ມິດຕະພາບ​ທີ່​ໃກ້ຊິດ​ສະໜິດ​ແໜ້ນ ​ລະຫວ່າງສອງ​ປະ​ເທດ ​ແລະ ປະຊາຊົນ​ສອງ​ຊາດ; ​ແລະ​ຢັ້ງຢືນອີກ​ຄັ້ງວ່າ ​ຈິດ​ໃຈ​ຂອງ​ຖະ​ແຫຼ​ງການ​ຮ່ວມ​ປີ 2012 ​ຍັງ​ມີ​ຄຸນຄ່າດັ່ງ​ເດີມ. 

ສອງ​ຝ່າຍ​ເຫັນ​ດີ​ເປັນ​ເອກະສັນ ຈະ​ຈັດ​ຕັ້ງ​ສະ​ເຫຼີ​ມສະຫຼອງວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ​ລະຫວ່າງ​ສອງ​ປະ​ເທດ ຄົບ​ຮອບ 25 ປີ ​ໃນ​ປີ 2017 ດ້ວຍ​ການ​ເຄື່ອນ​ໄຫວ​ຕ່າງໆ​ຫຼາຍຢ່າງ ​ແນ​ໃສ່​ຊຸກຍູ້​ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ ​ແລະ ພົບ​ພໍ້​ສັງ​ສັນ​ລະຫວ່າງ​ປະຊາຊົນ.

​ເຈົ້າ​ຊີວິດ ບຣູ​ໄນ ດາຣູຊາລາມ ອວຍ​ພອນ​ຊົມ​ເຊີຍຜົນສຳ​ເລັດ​ຕ່າງໆ​ ທີ່​ປະຊາຊົນຫວຽດນາມຍາດ​ມາ​ໄດ້​ ໃນ​ການ​ປະຕິບັດ​ແຜນ​ຍຸດ​ທະ​ສາດ​ພັດທະນາ​ເສດຖະກິດ - ສັງຄົມ ທີ່​ໄດ້​ກຳນົດ​ໃນ​ນະ​ໂຍບາຍ “ປ່ຽນ​ແປງ​ໃໝ່”. ​ເຈົ້າ​ຊີວິດ​ກໍ​ໄດ້​ສະ​ແດງ​ຄວາມ​ເຊື່ອ​ໝັ້ນ​ວ່າ, ພາຍ​ໃຕ້​ການ​ນຳພາ​ຂອງ​ທ່ານປະທານ​ປະ​ເທດ ​ແລະ ບັນດາ​ທ່ານ​ການ​ນຳ​ອື່ນ, ຫວຽດນາມຈະ​ບັນລຸ​ເປົ້າ​ໝາຍ​ກາຍ​ເປັນ​ປະ​ເທດ​ອຸດ​ສະຫະ​ກຳ​ທີ່​ຈະ​ເລີ​ນ​ໃນ​ປີ 2020. 

ທ່ານ​ປະທານ​ປະ​ເທດ​ ເຈິ່ນ​ດ້າຍ​ກວາງ ສະ​ແດງ​ຄວາມ​ຊົມ​ເຊີຍ​ຕໍ່​ຄວາມ​ມານະ​ພະຍາຍາມ​ຂອງ​ລັດຖະບານບຣູ​ໄນ ດາຣູຊາລາມ ພາຍ​ໃຕ້ການ​ປົກຄອງຂອງເຈົ້າ​ຊີວິດ ຮັດ​ຢີ ຮັດ​ຊາ​ນັນ ​ໂບນ​ເກ​ຍ ມູອິດ​ຊັດ​ດິນ ວັດ​ເດົາ​ລາ ຊຶ່ງ​ໄດ້​ຜັນ​ຂະຫຍາຍ​ບັນດາ​ແຜນ​ຍຸດ​ທະ​ສາດ​ເພື່ອ​ບັນລຸ​ບັນດາເປົ້າ​ໝາຍ​​ໃນ “ວິ​ໄສ​ທັດ​ແຫ່ງ​ຊາດ 2035” ​ແນ​ໃສ່​ສ້າງ​ປະ​ເທດບຣູ​ໄນ​ ໃຫ້​ກາຍ​ເປັນ​ປະ​ເທດທີ່​ປະຊາຊົນ​ມີ​ສີມື ​ແລະ ມີລະດັບ​ການ​ສຶກສາ​ສູງ, ມາດຕະຖານ​ການ​ດຳລົງ​ຊີວິດ​ທີ່​ດີ, ​ເສດຖະກິດ​ພັດທະນາ​ຢ່າງ​ໄຫວ​ພິບ ​ແລະ ຍືນ​ຍົງ. 

ຜູ້​ນຳ​ທັງ​ສອງ​ສະ​ແດງ​ຄວາມ​ດີ​ໃຈຕໍ່​ການ​ເສີມ​ສ້າງ​ການພົວພັນ​ແລກປ່ຽນ​ລະຫວ່າງ​ສອງ​ປະ​ເທດ​ໃນ​ທຸກ​ຂັ້ນ ​ແລະ ​ເຫັນ​ດີ​ຍູ້​ແຮງ​ບັນດາ​ກົນໄກການ​ປຶກສາ​ຫາລື​ທະວິ​ພາຄີ​ທີ່​ມີ​ຢູ່. ບົນ​ພື້ນຖານ​ນັ້ນ, ຜູ້ນຳ​ທັງ​ສອງ​ເຫັນ​ດີ​ຈັດ​ຕັ້ງ​ກອງ​ປະຊຸມ​ຄະນະ​ກຳມະການ​ປະສົມຂຶ້ນ​ໂດຍ​ໄວ ​ເພື່ອ​ແນ​ໃສ່​ເພີ່​ມທະວີ ​ແລະ​ເປີດ​ກວ້າງ​ການ​ພົວພັນ​ລະຫວ່າງ​ສອງ​ປະ​ເທດ. 

ຜູ້​ນຳ​ທັງ​ສອງຢັ້ງຢືນ​ຄວາມ​ປະສົງ​ລວມກັນ​ ໃນ​ການ​ເຮັດ​ໃຫ້​ພື້ນຖານ​ເສດຖະກິດ​ຂະຫຍາຍຕົວ​ດ້ວຍ​ຫຼາຍ​ຮູບ​ຫຼາຍ​ແບບ​ ​ແລະ​ເສີມຂະຫຍາຍ​ບົດບາດ​ຂອງພາກເອກະ​ຊົນ​ ໃນ​ການຍົກ​ສູງ​ລັກສະນະ​ແຂ່ງຂັນ ​ແລະ ສົ່ງ​ເສີມ​ໃຫ້​ສອງ​ຝ່າຍ​ສືບ​ຕໍ່​ແບ່ງປັນ​ບົດຮຽນປະສົບ​ການທີ່​ດີ ​ເພື່ອ​ຊອກ​ຫາ​ບັນດາ​ຂົງ​ເຂດ​ຮ່ວມ​ມື​ທີ່​ມີ​ຄວາມ​ສາມາດ​ບົ່ມ​ຊ້ອນ. 

ຜູ້​ນຳ​ທັງ​ສອງ​ເນັ້ນ​ເຖິງ​ຄວາມ​ສຳຄັນ​ຂອງ​ການ​ຊຸກຍູ້ຍິ່ງ​ກວ່າ​ອີກ ​ການ​ຮ່ວມ​ມື​ສອງ​ຝ່າຍ​ໃນ​ຂົງ​ເຂດ​ການ​ຄ້າ​ແລະ​ການ​ລົງທຶນ, ພິ​ເສດ​ແມ່ນ​ກ່ຽວ​ກັບ​ພະລັງງານ, ກະສິກຳ ​ແລະ ປະມົງ, ການ​ສຶກສາ, ​ແຮງ​ງານ,  ການ​ບໍລິການ​ທາງ​ອາກາດ, ສັງ​ສັນ​ລະຫວ່າງ​ປະຊາຊົນ ​ແລະ ການ​ປ້ອງ​ກັນຊາ​ດ. ສອງ​ຝ່າຍ​ກໍມີ​ຄວາມ​ປາຖະໜາ​ຊຸກຍູ້​ການ​ຮ່ວມ​ມື​ໃນ​ບັນດາ​ຂົງ​ເຂດ​ເຊັ່ນ ອາ​ຊະ​ຍາ​ກຳ​ຂ້າມ​ຊາດ, ການ​ສົ່ງ​ຜູ້​ຮ້າຍ​ຂ້າມ​ແດນ ​ແລະ ການ​ໂອນ​ຕົວຜູ້​ຖືກ​ຕັດ​ສີນ​ລົງ​ໂທດ​ຈຳ​ຄຸກ.

ຜູ້​ນຳ​ທັງ​ສອງກໍ​ຢືນຢັນ​ຄວາ​ມໝັ້ນ​ໝາຍ​ເພີ່ມ​ທະວີ​ການ​ຮ່ວມ​ມື​ເສດຖະກິດ​ລະຫວ່າງຫວຽດນາມ ​ແລະ ບຣູ​ໄນ ດາຣູຊາລາມ ຊຶ່ງ​ຈະ​ບັນລຸ​ເປົ້າ​ໝາຍ​ຍອດ​ມູນ​ຄ່າ​ການ​ຄ້າ​ສອງ​ສົ້ນ 500 ລ້ານ​ໂດ​ລາ​ສະຫະລັດ​ໃນ​ປີ 2025 ​ແລະ ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ໃຫ້​ແກ່​ການ​ລົງທຶນ​ແລະທຸລະ​ກິດ ​ລະຫວ່າງ​ສອງ​ປະ​ເທດ. ບົນ​ຈິດ​ໃຈ​ດັ່ງກ່າວ​ນັ້ນ, ສອງ​ຝ່າຍ​ຊົມ​ເຊີຍ​ການ​ເຊັນບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ການ​ຄ້າ​ແລະ​ເສດຖະກິດ​ ລະຫວ່າງ​ກະຊວງ​ອຸດສາຫະກຳ​ການ​ຄ້າຫວຽດນາມ ​ແລະ ກະ​ຊວງ​ການ​ຕ່າງປະ​ເທດ​ແລະ​ການ​ຄ້າບຣູ​ໄນ ດາຣູຊາລາມ ​ແນ​ໃສ່​ຊ່ວຍ​ໜູນ​ໃຫ້​ບັນລຸ​ເປົ້າ​ໝາຍ​ການ​ຄ້າ​ທະວິ​ພາຄີ.

ຜູ້​ນຳ​ທັງ​ສອງຮັບຮອງ​ຄວາມ​ສຳຄັນ​ຂອງ​ການ​ຊຸກຍູ້ການ​ຮ່ວມ​ມື​ດ້ານ​ພະລັງງານ ​ແລະ ສະ​ແດງ​ຄວາມ​ພຶງ​ພໍ​ໃຈຕໍ່​ການ​ຮ່ວມ​ມື​ດ້ານ​ພະລັງງານ ​ລະຫວ່າງກຸ່ມ​ບໍລິສັດ​ນ້ຳມັນ​ອາຍ​ແກັດ​ຫວຽດນາມ (PetroVietnam) ​ແລະ ບໍລິສັດ​ນ້ຳມັນ​ອາຍ​ແກັດ​ແຫ່ງ​ຊາດບຣູ​ໄນ (PetroleumBrunei), ພ້ອມ​ກັນ​ນັ້ນ​ກໍ​ຊົມ​ເຊີຍຄວາມ​ສຳ​ເລັດ​ຜົນ​ຂອງ​ໂຄງການສ້າງ​ຮ້ານຂຸດ​ເຈາະ​ນ້ຳມັນ ມະຫາຣາຊາ ​ເລ​ລາ ພາກ​ໃຕ້. 

ຜູ້​ນຳ​ທັງ​ສອງຮັບຮອງ​ຄວາມ​ກ້າວໜ້າ​ໃນ​ການ​ຜັນ​ຂະຫຍາຍບົດ​ບັນທຶກ​ຄວາມ​ເຂົ້າ​ໃຈວ່າ​ດ້ວຍ​ການ​ຮ່ວມ​ມື​ດ້ານ​ກະສິກຳ ​ແລະ ປະມົງ ທີ່​ໄດ້​ລົງ​ນາມ​ໃນ​ເດືອນ​ພຶດສະພາ 2013. ເຈົ້າ​ຊີວິດ ຮັດ​ຢີ ຮັດ​ຊາ​ນັນ ​ໂບນ​ເກ​ຍ ມູອິດ​ຊັດ​ດິນ ວັດ​ເດົາ​ລາ ຕີ​ລາຄາ​ສຸງຕໍ່​ການ​ທີ່ສອງ​ຝ່າຍ​ແລກປ່ຽນ​ຜູ້​ຊ່ຽວຊານ​ໃນ​ຂົງ​ເຂດ​ຜະລິດ​ເຂົ້າ​ເປືອກ ກໍ​ຄື​ບັນດາ​ຕົ້ນ​ປູກ​ອື່ນ, ​ແລະ​ເປັນ​ເອກະ​ພາບກັນ​ພິຈາລະນາ​ສືບ​ຕໍ່​ກົນ​ໄກ​ແລກປ່ຽນ​ຜູ້​ຊ່ຽວຊານ. ຜູ້ນຳ​ທັງ​ສອງ​ເປັນ​ເອກະ​ພາບ​ກັນ​ເພີ່ມ​ທະວີ​ການ​ຮ່ວມ​ມື​ເພື່ອ​ການ​ພັດທະນາ ​ແລະ ຮ່ວມ​ມື​ໃນ​ຂົງ​ເຂດການ​ປະມົງ ​ແລະ ຄວາມ​ສຳຄັນ​ຂອງ​ການ​ເພີ່ມ​ທະວີ​ການ​ແລກປ່ຽນ ​ແລະ ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນ​ລະຫວ່າງ​ສອງ​ປະ​ເທດ.

ຜູ້​ນຳ​ທັງ​ສອງຊົມ​ເຊີຍ​ການ​ຮ່ວມ​ມື​ດ້ານ​ແຮງ​ງານ ​ແລະ ​ເປັນ​ເອກະ​ພາບ​ກັນກ້າວ​ໄປ​ເຖິງ​ການ​ເຈລະຈາ​ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ. 

ຜູ້​ນຳ​ທັງ​ສອງຮັບ​ຮູ້​ຄວາມ​ສຳຄັນ​ຂອງ​ການ​ສັງ​ສັນ​ລະຫວ່າງ​ປະຊາຊົນ​ສອງ​ປະ​ເທດ ​ແລະ ຊົມ​ເຊີນການ​ເຊັນບົດ​ບັນທຶກ​ຄວາມ​ເຂົ້າ​ໃຈວ່າ​ດ້ວຍການ​ຮ່ວມ​ມື​ດ້ານ​ການ​ສຶກສາ​ ເມື່ອ​ເດືອນ​ເມສາ 2014 ​ແລະ ບົດ​ບັນທຶກ​ຄວາມ​ເຂົ້າ​ໃຈລະຫວ່າງ​ມະຫາວິທະຍາ​ໄລບຣູ​ໄນ ດາຣູຊາລາມ ຂ​ອງ ບຣູ​ໄນ ດາຣູຊາລາມ ​ແລະ ມະຫາວິທະຍາ​ໄລ FPT ຂອງ ສສ ຫວຽດນາມ​ ເມື່ອ​ເດືອນ​ກໍ​ລະ​ກົດ 2013. ບຣູ​ໄນ ດາຣູຊາລາມ ຕີ​ລາຄາ​ສູງ​ຕໍ່​ການ​ເຂົ້າ​ຮ່ວມ​ຂອງຫວຽດນາມ​ ໃນ​ໂຄງການ​ເພີ່ມ​ທະວີ​ພາສາ​ອັງກິດ ບຣູ​ໄນ ດາຣູຊາ​ລາມ ​- ສະຫະລັດ​ອາ​ເມຣິກາ ​ໃຫ້​ອາ​ຊຽນ.

ຜູ້​ນຳ​ທັງ​ສອງຕີ​ລາຄາ​ສູງ​ການ​ເຊື່ອມ​ຕໍ່​ລະຫວ່າງ​ສອງ​ປະ​ເທດ ​ແລະ ຊົມ​ເຊີຍ​ການ​ເປີດ​ຄືນ​ໃໝ່​ສາຍ​ການບິນລະຫວ່າງ ບັນຕາ ​ເສຣີ ​ເບ​ກາ​ວັນ ​ແລະ​ ນະຄອນ​ໂຮ່ຈີ​ມິນ​ ເມື່​ອ​ເດືອນ​ຕຸລາ 2014, ພິ​ເສດ​ແມ່ນ​ໃນ​ການ​ຊຸກຍູ້​ການ​ພົວພັນ​ໃກ້ຊິດ​ລະຫວ່າງ​ປະຊາຊົນ​ສອງ​ປະ​ເທດ ຫວຽດນາມ ​ແລະ ບຣູ​ໄນ ດາຣູຊາລາມ. ຜູ້ນຳ​ທັງ​ສອງ​ເຫັນ​ດີ​ເປັນ​ເອກະ​ພາບ​ຫັນ​ໄປ​ສູ່​ການ​ເຊັນ​ຂໍ້ຕົກລົງກ່ຽວ​ກັບ​ການ​ຂົນ​ສົ່ງ​ທາງ​ທະ​ເລ.

ຜູ້​ນຳ​ທັງ​ສອງຊົມ​ເຊີຍ​ການ​ເຊັນບົດ​ບັນທຶກ​ຄວາມ​ເຂົ້າ​ໃຈວ່າ​ດ້ວຍ​ການ​ຮ່ວມ​ມື​ດ້ານ​ວັດທະນະທຳ ​ແລະ ສະ​ແດງ​ຄວາມ​ປາຖະໜາ​ວ່າ ບົດ​ບັນທຶກ​ຄວາມ​ເຂົ້າ​ໃຈນີ້​ ຈະ​ປະກອບສ່ວນ​ຕັ້ງໜ້າ​ ເຂົ້າ​ໃນການ​ຍົກ​ສູງ​ຄວາມ​ເຂົ້າ​ໃຈ​ຂອງ​ປະຊາຊົນກ່ຽວ​ກັບ​ມໍລະດົກ ​ແລະ ວັດທະນະທຳ​ ຂອງ​ແຕ່ລະ​ປະ​ເທດ.

ຜູ້​ນຳ​ທັງ​ສອງສະ​ແດງ​ຄວາມ​ພຶງ​ພໍ​ໃຈ​ຕໍ່​ຄວາມ​ກ້າວໜ້າ​ທີ່​ບັນລຸ​ໄດ້​ ໃນ​ຂົງ​ເຂດ​ການ​ປ້ອງ​ກັນຊາ​ດ ​ໃນ​ຂອບບົດ​ບັນທຶກ​ຄວາມ​ເຂົ້າ​ໃຈວ່າ​ດ້ວຍ​ກາ​ຮ່ວມ​ມື​ດ້ານ​ການ​ປ້ອງ​ກັນຊາ​ດ ລະຫວ່າງກອງທັບ​ເຮືອ​ປະຊາຊົນຫວຽດນາມ ​ແລະ ກອງທັບ​ເຮືອຫຼວງບຣູ​ໄນ ດາຣູຊາລາມ ທີ່​ໄດ້​ລົງ​ນາມ​ໃນ​ເດືອ​ກໍລະກົດ 2013. ​ເຈົ້າ​ຊີວິດບຣູ​ໄນ ດາຣູຊາລາມ ຕີ​ລາຄາ​ສູງ​ຕໍ່ການ​ສະໜັບສະໜູນ​ຂອງຫວຽດນາມ ທີ່​ມີ​ຕໍ່ມະຫະກຳ​ດົນຕີທະຫານ​ສາກົນ ບຣູ​ໄນ ດາຣູຊາລາມ ​ແລະ ການ​ແຂ່ງຂັນ​ກີລາ​ຍິງ​ປືນ​ສາກົນ ບຣູ​ໄນ ດາຣູຊາລາມ.

ໃນ​ລະດັບ​ພາກ​ພື້ນ, ເຈົ້າ​ຊີວິດ​ແຫ່ງ ບຣູ​ໄນ ດາຣູຊາລາມ ຕີ​ລາຄາ​ສູງຕໍ່​ການ​ເຂົ້າ​ຮ່ວມ​ຂອງ​ຫວຽດນາມ ​ໃນ​ການຝຶກ​ຊ້ອມ​ພາກ​ສະໜາມ​ກ່ຽວ​ກັບຄວາມ​ໝັ້ນ​ຄົມ​ທາງ​ມະ​ເລ ​ແລະ ການ​ຕໍ່ຕ້ານ​ການ​ກໍ່​ການ​ຮ້າຍ ​ໃນ​ຂອບ​ການ​ປະຊຸມ​ລັດຖະມົນຕີ​ກະຊວງ​ປ້ອງ​ກັນຊາ​ດອາ​ຊຽນ ບວກ (ADMM+) ທີ່​​ໄດ້​ດຳ​ເນີນ​ຢູ່ ບັນດາ ​ເສຣີ ​ເບ​ກາ​ວັນ ​ແລະ ສິງກະ​ໂປ ​ແຕ່​ວັນ​ທີ 2 ຫາ​ວັນ​ທີ 12 ພຶດສະພາ 2016. ສອງ​ຝ່າຍ​ເຫັນ​ດີ​ເປັນ​ເອ​ກະສັນ​ເພີ່ມ​ທະວີ​ການ​ຮ່ວມ​ມື​ລະຫວ່າງ​ບັນດາ​ເຫຼົ່າ​ທັບ, ພິ​ເສດ​ແມ່ນ​ກອງທັບ​ເຮືອ ​ແລະ ຝຶກ​ອົບຮົມ​ໃຫ້ນາຍ​ທະຫານ​ຂອງ​ສອງ​ຝ່າຍ. 

ຜູ້​ນຳ​ທັງ​ສອງຢືນຢັນ​ຄວານ​ໝັ້ນ​ໝາຍ​ຮັກ​ສາ​ສັນຕິພາບ ສະຖຽນ​ລະ​ພາບ ​ແລະ ຄວາມ​ວັດທະນາ​ຖາວອນ​ຢູ່​ໃນ​ພາກ​ພື້ນ, ​ໃນ​ນັ້ນ​ກວມ​ດ້ວຍ​ການ​ຊຸກຍູ້​ຄວາມ​ມານະ​ພະຍາຍາມ​ກໍ່ສ້າງ​ປະຊາ​ຄົມ​ອາ​ຊຽນ ​ໂດຍ​ຜ່ານ​ການ​ຜັນ​ຂະຫຍາຍ​ວິ​ໄສ​ທັດ​ປະຊາ​ຄົມ​ອາຊຽນ 2025 ຢ່າງ​ຄົບ​ຖ້ວນ ​ແລະ​ມີ​ປະສິດທິ​ຜົນ. ​ເພື່ອ​ບັນລຸ​ໄດ້​ບັນດາ​ເປົ້າ​ໝາຍ​ເຫຼົ່າ​ນີ້, ສອງ​ຝ່າຍ​ເນັ້ນ​ເຖິງ​ຄວາມ​ສຳຄັນ​ຂອງ​ການ​ແກ້​ໄຂຂໍ້​ພິພາດ​ໃນ​ພາກ​ພື້ນ​ດ້ວຍ​ສັນຕິ​ວິທີ. 

ຜູ້​ນຳ​ທັງ​ສອງ​ເປັນ​ເອກະສັນປະຕິບັດ​ຖະ​ແຫຼ​ງການກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ຢ່າງ​ຄົບ​ຖ້ວນ ​ແລະ ມີ​ປະສິດ​ທິຜົນ, ​ແລະ ຮ່ວມ​ມື​ກັນ​ຢ່າງ​ແໜ້ນ​ແຟ້ນ​ເພື່ອ​​ແນ​ໃສ່ບັນລຸ​ໄດ້ປະມວນຂໍ້​ກຳນົດ​ການ​ປະພຶດ​ຢູ່​ທະ​ເລ​ຕາ​ເວັນ​ອອກ (COC) ​ໂດຍ​ໄວ. ສອງ​ຝ່າຍ​ກໍ​ຢືນຢັນ​ຄວາມ​ສຳຄັນ​ຂອງ​ບົດບາດ​ເປັນ​ໃຈ​ກາງຂອງ​ອາ​ຊຽນ ​ໃນ​ໂຄງ​ສ້າງ​ຄວາມ​ໝັ້ນຄົງ​ໃນ​ພາກ​ພື້ນ.

ສອງ​ຝ່າຍ​ຢືນຢັນ​ອີກ​ຄັ້ງ​ຄຳ​ໝັ້ນ​ສັນຍາ​ສືບ​ຕໍ່​ຊຸກຍູ້ການ​ປຶກສາ​ຫາລື​ກ່ຽວ​ກັບ​ບັນດາ​ຂົງ​ເຂດທີ່​ມີ​ຜົນ​ປະ​ໂຫຍ​ດຮ່ວມ​ກັນ ຢູ່​ບັນດາ​ເວທີ​ປາ​ໄສ​ພາກ​ພື້ນ​ແລະ​ສາກົນ​ຄື ​ເວທີ​ປາ​ໄສ​ການ​ຮ່ວມ​ມື​ເສດຖະກິດ​ອາຊີ ​- ປາຊີ​ຟິກ (APEC), ການ​ປະຊຸມ​ສຸດ​ຍອດ​ອາຊີ ​- ​ເອີຣົບ (ASEM), ສະຫະ​ປະຊາ​ຊາດ ​ແລະ ອົງການ​ການ​ຄ້າ​ໂລກ (WTO).

ຜູ້​ນຳ​ທັງ​ສອງຊົມ​ເຊີຍ​ການ​ຊຸກຍູ້​ຄວາມ​ພົວພັນ​ເສດຖະກິດ​ຢູ່​ໃນ​ພາກ​ພື້ນ, ພິ​ເສດ​ແມ່ນ​ຜ່ານ​ການ​ເຊັນ​ສັນຍາ​ຄູ່​ຮ່ວມ​ມື​ຂ້າມ​ປາຊີ​ຟິກ (TPP) ​ເມື່​ອວັນ​ທີ 4 ກຸມພາ 2016 ​ແລະ ຫວັງ​ວ່າ​​ ບັນດາ​ປະ​ເທດສະມາຊິກຈະ​ໃຫ້​ສັດຕະຍາບັນສັນຍາສະບັບ​ນີ້. 

​ເຈົ້າຊີວິດບຣູ​ໄນ ດາຣູຊາລາມ ສະໜັບສະໜູນຢ່າງ​ສົມບູນ​ຕໍ່​ບົດ​ບາດ​ປະທານ APEC 2017 ຂອງຫວຽດນາມ ​ແລະ ອວຍພອນ​ໃຫ້​ລັດຖະບານ​ແລະ​ປະຊາຊົນຫວຽດນາມກະກຽມ​ເປັນ​ຢ່າງ​ດີ​ໃຫ້​ແກ່​ການປະຊຸມດັ່ງກ່າວ. 

ທ່ານ​ປະທານ​ປະ​ເທດຫວຽດນາມ ຕີ​ລາຄາ​ສູງ​ການ​ຕ້ອນຮັບ​ຢ່າງຮອບ​ຄອບອົບ​ອຸ່ນ ​ແລະ ສົມ​ກຽດທີ່​ມີ​ຕໍ່​ປະທານ​ປະ​ເທດ​ແລະ​ຄະນະ​ຜູ້​ແທນ​ຫວຽດນາມ ​ແລະ ຫວັງ​ວ່າ​ຈະ​ໄດ້​ຕ້ອນຮັບ​ ເຈົ້າ​ຊີວິດແລະສະມາຊິກ​ຂອງພະ​ລາຊະວົງບຣູ​ໄນ ດາຣູຊາລາມ ທີ່ຫວຽດນາມ​ໃນ​ໄວໆ​ນີ້./.

ສັງ​ລວມ​ໂດຍ ບນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ