ວັນອັງຄານ, 22/10/2019
ທ່ານເຈິ່ນດ້າຍກວາງ ປະທານປະເທດແຫ່ງ ສສ ຫວຽດນາມ ສຳເລັດສິ້ນສຸດ ການຢ້ຽມຢາມ ປະເທດສາທາລະນະລັດ ສິງກະໂປ ຢ່າງຈົບງາມ
12/9/2016 16:19' ສົ່ງ ພິມ
ທ່ານປະທານປະເທດຫວຽດນາມ ເຈິ່ນດ້າຍກວາງ ແລະ ພັນລະຍາ ພົບປະກັບ ທ່ານປະທານາທິບໍດີສິງກະໂປ ໂທນີ ຕັນ ເຄັງຢຳ ແລະ ພັນລະຍາ. (ພາບ: TTXVN)

ທ່ານ​ປະທາ​ນປະ​ເທດ ​ເຈິ່ນດ້າຍ​ກວາງ ​ໄດ້​ພົບ​ປະ​ເຈລະຈາ​ກັບ​ທ່ານປະທານາທິບໍດີ ​ໂທ​ນີ ຕັນ ​ເຄັງຢຳ ​ແລະ​ ພົບ​ປະ​ຫາລື​ກັບ​ທ່ານ​ນາຍົກລັດຖະມົນຕີ ລີ ຊຽນລຸງ. ສອງ​ຝ່າຍ​ຢັ້ງຢືນ​ຄວາມ​ພົວພັນທະວິ​ພາຄີອັນ​ດີງາມ​ທີ່​ພວມຂະຫຍາຍຕົວ​ຢ່າງ​ໄວວາ ນັບ​ແຕ່​ເມື່ອ​ສອງ​ປະ​ເທດ​ສ້າງ​ຕັ້ງ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ປີ 2013. ການ​ແລກປ່ຽນຢ່າງ​ເປັນ​ປະຈຳ​ລະຫວ່າງບັນດາ​ຜູ້ນຳ ​ເຈົ້ໜ້າທີ່ ​ແລະ ປະຊາຊົນ​ຂອງ​ສອງ​ປະ​ເທດ ​ໄດ້​ສືບຕໍ່ປັບປຸງ​ພື້ນຖານ​ອັນໜັກ​ແໜ້ນຂອງ​ຄວາມ​ພົວພັນ​ທະວິ​ພາຄີຫວຽດນາມ - ສິງກະ​ໂປ. 

ທ່ານ​ປະທາ​ນປະ​ເທດ ​ເຈິ່ນດ້າຍ​ກວາງ ສະ​ແດງ​ການ​ຕີ​ລາຄາ​ສູງ​ຂອງຫວຽດນາມ​ຕໍ່ສິງກະ​ໂປ ກ່ຽວ​ກັບ​ບັນດາ​ໂຄງການຝຶກອົບຮົມ ​ແລະ ຊຸດ​ຮຽນ​ຍົກ​ສູງ​ຄວາມ​ສາມາດ ຕາມ​ໂຄງການ​ຮ່ວມ​ມື​ສິ​ງກະ​ໂປ ຊຶ່ງ​ໄດ້​ນຳ​ເອົາ​ຜົນ​ປະ​ໂຫຍ​ດມາ​ໃຫ້​ຂ້າ​ລັດຖະການ​ຫວຽດນາມກວ່າ 16.700 ຄົນ, ​ໃນ​ນັ້ນ​ມີ ​ບັນດາຊຸດ​ຮຽນ​ຢູ່ສິງກະ​ໂປ ຂອງ​ພະນັກງານ​ຂອງພັກ​ກອມ​ມູນິດ​ຫວຽດນາມ ຕາມ​ຂໍ້​ຕົກລົງ​ກ່ຽວ​ກັບ​ໂຄງການ​ຝຶກ​ອົບຮົມ​ຊັ້ນ​ສູງ ​ແລະ ​ໂຄງການຮ່ຳຮຽນຄົ້ນຄວ້າ​ ໃຫ້​ສະມາຊິກ​ພັກ​ອາວຸ​ໂສ​ ຂອງພັກ​ກອມ​ມູນິດ​ຫວຽດນາມ (2013-2015). ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ສົ່ງ​ເສີມ​ໃຫ້​ບັນດາ​ອົງການ​ທີ່​ກ່ຽວຂ້ອງ​ຂອງ​ສອງ​ປະ​ເທດ ​ເຂົ້າ​ຮ່ວມ​ຂໍ້​ຕົກລົງ​ດັ່ງກ່າວ​ສຳລັບ​ໄລຍະ 2016 - 2018. 

ທ່ານ​ປະທາ​ນປະ​ເທດ ​ເຈິ່ນດ້າຍ​ກວາງ ​ແລະ ທ່ານປະທານາທິບໍດີ ​ໂທ​ນີ ຕັນ ​ເຄັງ​ຢັນ ລ້ວນ​ແຕ່​ຕີ​ລາຄາ​ສູງ​ຕໍ່​ການ​ພົວພັນ​ຮ່ວມ​ມື​ດ້ານ​ການ​ຄ້າ ການ​ລົງທຶນ ​ແລະ ​ເສດຖະກິດທີ່​ແຂງ​ແຮງ ​ລະຫວ່າງ​ສອງ​ປະ​ເທດ. ການ​ຄ້າ​ທະວິ​ພາຄີ​ໄດ້​ເຕີບ​ໂຕ​ຢ່າງ​ໄວວາ​ໃນ​ທົດ​ສະ​ວັດ​ທີ່​ຜ່ານ​ມາ, ບັນລຸມີຄ່າ 21,6 ຕື້​ໂດ​ລາ​ສະຫະລັດ​ໃນ​ປີ 2015, ດ້ວຍ​ລະດັບ​ຄວາມເຕີບ​ໂຕ 10,6% ​ໃນ​ປີ 2015. ສິງກະ​ໂປ​ເປັນ​ຄູ່​ຮ່ວມ​ມື​ການ​ຄ້າ​ໃຫຍ່​ທີ 6 ຂອງ​ຫວຽດນາມ ​ໃນ​ຂະນະ​ນັ້ນ ຫວຽດນາມ​ເປັນ​ຄູ່​ຮ່ວມ​ມື​ການ​ຄ້າ​ໃຫຍ່​ທີ 11 ຂອງ​ສິງກະ​ໂປ. ສິງກະ​ໂປ​ເປັນນັກ​ລົງທຶນ​ໃຫຍ່ທີ 3 ຢູ່​ຫວຽດນາມ ດ້ວຍ​ຍອດ​ຈຳນວນ​ເງິນ​ລົງທຶນ​ຈົດ​ທະບຽນ​ປະມານ 38 ຕຶ້​ໂດ​ລາ​ສະຫະລັດ. 

ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ​ໄດ້​ຮັບ​ຮູ້​ວ່າ ການ​ລົງທຶນ​ຂອງສິງກະ​ໂປ​​ໄດ້​ປະກອບສ່ວນ​ເຂົ້າ​ໃນ​ການ​ພັດທະນາ ​ແລະ ຄວາມ​ເຕີບ​ໂຕ​ເສດຖະກິດ​ຂອງ​ຫວຽດນາມ, ​ໃນ​ນັ້ນ ກວມ​ມີບັນດາ​ເຂດ​ອຸດສາ​ຫະກຳ​ຫວຽດນາມ - ສິງກະ​ໂປ (VSIP) ​ແລະ ບັນດາ​ເຂດ​ອຸດສາຫະກຳ​ປະດິດ​ສ້າງ​ເຕັກ​ໂນ​ໂລ​ຊີ​ສູງ ທີ່​ສຳ​ເລັດ​ຜົນ​ທີ່​ສຸດ ຢູ່​ທົ່ວ​ຫວຽດນາມ, ດຶງ​ດູດ​ເງິນ​ລົງທຶນ​ປະມານ 9 ຕື້​ໂດ​ລາ​ສະຫະລັດ ​ແລະ ສ້າງ​ວຽກ​ເຮັດ​ງານ​ທຳ​​ໃຫ້​ຫຼາຍ​ກວ່າ 170.000 ຄົນ. ສອງ​ຝ່າຍ​ຊົມ​ເຊີຍ​ການ​ເພີ່ມ​ທະວີ​ການ​ພົວພັນ​ທະວິ​ພາຄີ, ​ໃນ​ນັ້ນ ຫວຽດນາມ​ສືບ​ຕໍ່​ສ້າງ​ສິ່ງ​ແວດ​ລ້ອມ​ແຫ່ງ​ການ​ລົງທຶນ​ທີ່​ສະດວກ​ດີ​ ໃຫ້​ບັນດາ​ວິ​ສາ​ຫະກິດ​ຕ່າງປະ​ເທດ. 

​ໃນ​ການ​ພົບ​ປະ​ຫາລື, ທ່ານ​ນາຍົກລັດຖະມົນຕີ ລີ ຊຽນລຸງ ​ໃຫ້​ທັດສະ​ນະ​ວ່າ ຄວາມ​ສຳຄັນ​ຂອງ​ໂຄງ​ສ້າງ​ພື້ນຖານ​ນິຕິ​ກຳ​ທີ່​ສົມບູນ ​ເປັນ​ຮາກ​ຖານ​ໃຫ້​ແກ່​ການ​ກໍ່ສ້າງ​ບັນດາ​ການ​ບໍລິການ​ການ​ເງິນ​ໃຫ້​ແກ່​ຫວຽດນາມ. ທ່ານ​ນາ​ຍົກ​ລັດຖະມົນຕີ​ກໍ​ສະ​ເໜີ​ໃຫ້​ຫວຽດນາມ ອອກ​ໃບ​ອະນຸຍາດ​ໂດຍ​ໄວ​ ໃຫ້​ແກ່​ສາຂາ​ທະນາຄານ UOB ​ໂດຍ​ຕ່າງປະ​ເທດ​ເປັນ​ເຈົ້າ​ຂອງ ​ເພື່ອ​ສ້າງ​ເງື່ອນ​ໄຂ​ທີ່​ສະດວກ​ດີ​​ໃນການ​ສະໜອງ​ບັນດາ​ການ​ບໍລິການ​ການ​ເງິນ ​ໃຫ້​ແກ່​ບັນດາ​ວິ​ສາ​ຫະກິດ​ຫວຽດນາມ ​ແລະ ສິງກະ​ໂປ ​ຢູ່​ຫວຽດນາມ. 

ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ​ໄດ້ຮັບ​ຮູ້​ຂໍ້​ສະ​ເໜີເທິງ​ນີ້ ​ແລະ​ຈະ​ຊີ້​ນຳ​ບັນດາ​ອົງການ​ທີ່​ກ່ຽວຂ້ອງ​ຂອງ​ຫວຽດນາມ ​ໃຫ້​ສົມທົບ​ຢ່າງ​ແໜ້ນ​ແຟ້ນກັບ​ທະນາຄານ UOB ​ເພື່ອກະກຽມຂັ້ນ​ຕອນທາງ​ເຕັກນິກ​ໃຫ້​ແກ່​ການ​ອອກ​ໃບ​ອະນຸຍາດ. ສອງ​ຝ່າຍ​ຮັບ​ຮູ້​ວ່າ ການ​ເພີ່ມ​ທະວີການ​ເຊື່ອມ​ຕໍ່ພາກ​ພື້ນຈະ​ຊຸກຍູ້​ພັດທະນາ​ເສດຖະກິດຫວຽ​ດນາມ ​ໂດຍ​ຜ່ານ​ການ​ຕິດ​ຕໍ່​ແລກປ່ຽນ​ນັບ​ມື້​ນັບ​ເພີ່ມ​ຂຶ້ນຂອງ​ປະ​ຊາຊົນ ກໍ​ຄື​ຂອງ​ສິນຄ້າ​ແລະ​ການ​ບໍລິການ, ສອງ​ຝ່າຍ​ຊົມ​ເຊີຍ​ການ​ເພີ່ມ​ທະວີ​ການ​ເຊື່ອມ​ຕໍ່ ​ໂດຍ​ຜ່ານຂໍ້​ຕົກລົງການ​ບໍລິການ​ທາງ​ອາກາດ​ເປີດ​ກວ້າງ. 

ສອງ​ຝ່າຍ​ກໍ​ຮັບ​ຮູ້​ການ​ຂະຫຍາຍຕົວ​ຢ່າງ​ແຂງ​ແຮງ​ ຂອງ​ຄວາມ​ພົວພັນ​ຮ່ວມ​ມືຮັກສາຄວາມ​ໝັ້ນຄົງ ​ແລະ ການ​ປ້ອງ​ກັນຊາ​ດ, ປະກອບສ່ວນ​ເພີ່ມ​ທະວີ​ຄວາມ​ເຂົ້າ​ໃຈ​ລວມ ລະຫວ່າງ​ສອງ​ປະ​ເທດ. ບົນ​ພື້ນຖານ​ຂໍ້​ຕົກລົງ​ຮ່ວມ​ມື​ດ້ານ​ການ​ປ້ອງ​ກັນຊາ​ດປີ 2009 (DCA), ສອງຝ່າຍ​ເຫັນ​ດີ​ເປັນ​ເອກະ​ພາບ: (1) ຮັກສາ​ການ​ຢ້ຽມຢາມ​ທະວິ​ພາຄີ ​ແລະ ບັນດາ​​ກົນ​ໄກ​ສົນທະນາ​ ລະຫວ່າງ​ສອງ​ອົງການ​ປ້ອງ​ກັນຊາ​ດ, ​ໃນ​ນັ້ນ ປະກອບ​ດ້ວຍ​ການ​ສົນທະນາ​ນະ​ໂຍບາຍ​ລະຫວ່າງ​ ຮອງ​ລັດຖະມົນຕີກະຊວງ​ປ້ອງ​ກັນ​ປະ​ເທດ​ຫວຽດນາມ ​ແລະ ​ເລຂາທິການ​ຜູ້​ປະຈຳການ​ປ້ອງ​ກັນ​ປະ​ເທດ​ຂອງສິງກະ​ໂປ; (2) ​ເພີ່ມ​ທະວີ​ການຮ່ວມ​ມື​ຄົ້ນຄວ້າຍຸດ​ທະ​ສາດ ລະຫວ່າງ​ບັນດາ​ອົງການ​ຄົ້ນຄວ້າ; (3) ຍູ້​ແຮງ​ການ​ແລກປ່ຽນ​ລະຫວ່າງ​ກອງ​ທັບ​ຂອງ​ສອງ​ປະ​ເທດ​ເຊັ່ນ ​ແລກປ່ຽນ​ຜູ້​ຊ່ຽວຊານ, ກໍ​ຄື​ການຮ່ວມ​ມືພະຫຸ​ພາຄີ​ໃນ​ຂອບ​ການ​ປະຊຸມ​ລັດຖະມົນຕີ​ກະຊວງ​ປ້ອງ​ກັນ​ປະ​ເທດ ອາ​ຊຽນ (ADMM) ​ແລະ ADMM+; ​ແລະ (4) ສື​ບຕໍ່ຮ່ວມ​ມືດ້ານ​ການ​ສືບ​ຂ່າວ​ລັບ ​ແລະ ຄວາມ​ໝັ້ນຄົງ​ທີ່​ມີ​ຢູ່ ​ເພື່ອ​ຕໍ່ຕ້ານ​ການ​ກໍ່​ການ​ຮ້າຍ, ລັດທິ​ຫົວ​ຮູ​ນ​ແຮງ ​ແລະ ອາ​ຊະ​ຍາ​ກຳ​ຂ້າມຊາດ. 

ສິງກະ​ໂປພ້ອມ​ແລ້ວ​ທີ່​ຈະ​ຊ່ວຍ​ເຫຼືອ​ຫວຽດນາມ ​ໃນ​ການ​ປະຕິບັດ​ບົດບາດ​ເປັນ​ປະທານ​ເວທີ​ປາ​ໄສ​ການ​ຮ່ວມ​ມື​ເສດຖະກິດ​ອາຊີ - ປາຊີ​ຟິກ (APEC) 2017 ຢ່າງ​ສຳ​ເລັດ​ຜົນ ​ໂດຍ​ຜ່ານ​ບັນດາ​ຂໍ້​ຄິດ​ລິ​ເລີ່ມລວມ ​ເພື່ອ​ຜົນ​ປະ​ໂຫຍ​ດຂອງ​ສອງ​ປະ​ເທດ. ສິງກະ​ໂປ​ໃຫ້ການຊ່ວຍ​ໜູນ​ດ້ານ​ເຕັກນິກ ​ແລະ ຊ່ວຍ​ເຫຼືອ​ຍົກ​ສູງ​ຄວາມ​ສາມາດ​ໃຫ້​ພະນັກງານ​ຫວຽດນາມ ​ໃນ​ສັນຍາ​ຄູ່​ຮ່ວມ​ມື​ຂ້າມ​ປາຊີ​ຟິກ (TPP). ສອງ​ຝ່າຍ​ຢັ້ງຢືນຄວາມ​ສຳຄັນ​ຂອງ​ການ​ຮັກສາ​ສັນຕິພາບ ​ແລະ ສະຖຽນ​ລະ​ພາບ​ໃນ​ພາກ​ພື້ນ ​ແລະ ​ເສລີພາບ​ໃນ​ການ​ເດີນ​ເຮືອ ​ແລະ ​ເດີນ​ອາກາດ ​ຢູ່​ທະ​ເລ​ຕາ​ເວັນ​ອອກ. 

ຜູ້ນຳ​ທັງ​ສອງ​ເນັ້ນ​ເຖິງ​ຄວາມ​ສຳຄັນ​ ຂອງ​ການ​ແກ້​ໄຂຂໍ້​ພິພາດ​ດ້ວຍ​ສັນຕິ​ວິທີ, ​ໃນ​ນັ້ນ​ກວມ​ທັງ​ການ​ເຄົນ​ລົບ​ນັບຖືຂະ​ບວນການ​ທາງ​ກົດໝາຍ​ແລະ​ການ​ທູດ​ຢ່າງ​ເຂັ້ມ​ງວດ, ບໍ່​ນາບ​ຂູ່​ຫຼື​ໃຊ້​ກຳລັງ​ອາວຸດຕໍ່​ກັນ, ສອດຄ່ອງ​ກັບ​ກົດໝາຍ​ສາກົນ, ​ໃນ​ນັ້ນ​ມີອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS). ສອງ​ຝ່າຍ​ຢັ້ງຢືນ​ຄວາມ​ສະໜັບສະໜູນ​ແກ່​ການປະຕິບັດຖະ​ແຫຼ​ງການກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ຢ່າງ​ຄົບ​ຖ້ວນ ​ແລະ ມີ​ປະສິດ​ທິຜົນ, ​ແລະ ຮ່ວມ​ມື​ກັນ​ຢ່າງ​ແໜ້ນ​ແຟ້ນ​ ເພື່ອ​​ແນ​ໃສ່ບັນລຸ​ໄດ້ປະ​ມວນຂໍ້​ກຳນົດ​ການ​ປະພຶດ​ຢູ່​ທະ​ເລ​ຕາ​ເວັນ​ອອກ (COC) ​ໂດຍ​ໄວ. 

​ໃນ​ການ​ຢ້ຽມຢາມ​ສິງກະ​ໂປ, ທ່ານ​ປະທາ​ນປະ​ເທດ ​ເຈິ່ນດ້າຍ​ກວາງ ​ໄດ້​ເຮັດ​ວຽກ​ກັບທ່ານ​ຮອງນາຍົກລັດຖະມົນຕີ ທີ​ວ ຊີ​ຮຽນ ​ແລະ​ຕ້ອນຮັບ​ການ​ເຂົ້າ​ຢ້ຽມ​ຂອງ​ທ່ານລັດຖະມົນຕີອາວຸ​​ໂສ​ກິ​ຕິ​ມະ​ສັກ  ​ໂກະ ຈົກ​ຕົງ; ​ເຂົ້າ​ຮ່ວມ ​ແລະ ປາຖະກະຖາ​ທີ່​ເວທີ​ປາ​ໄສວິ​ສາ​ຫະກິດ​ສິງກະ​ໂປ - ຫວຽດນາມ; ກ່າວປາໄສ​ທີ່​ສະ​ຖາ​ບັນ ຢູຊົບ ອີ​ສັກ - ຄົ້ນຄວ້າ​ກ່ຽວ​ກັບ​ອາຊີ​ຕາ​ເວັນ​ອອກສຽງ​ໃຕ້ (ISEAS); ພົບ​ປະ​ກັບບັນດາ​ບໍລິສັດທີ່​ມີ​ການ​ລົງທຶນ​ຫຼາຍ​ຢູ່​ຫວຽດນາມ; ​ແລະ​ເປັນ​ສັກຂີ​ພະຍານ​​ໃນ​ພິທີການ​ລົງ​ນາມ: (1) ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍການ​ທີ່​ບໍລິສັດ​ລົງທຶນ​ແຫ່ງ​ລັດຖະບານ​ສິງກະ​​ໂປ (GIC) ຊື້​ຫຸ້ນ​ສ່ວນ 7,73% ຂອງ​ທະນາຄານ ວຽດກອມ​ແບ​ງ ຂອງ​ຫວຽດນາມ ມີ​ມູນ​ຄ່າ​ປະມານ 385 ລ້ານ​ໂດ​ລາ​ສະຫະລັດ; (2) ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍການ​ຮ່ວມ​ມື​ລະຫວ່າງ​ຫ້ອງການ​ການ​ຄ້າ​ແລະ​ອຸດສາຫະກຳ​ຫວຽດນາມ ​ແລະ ສະຫະພັນ​ວິ​ສາ​ຫະກິດສິງກະ​ໂປ./.

ສັງ​ລວມ​ຈາກ​ສຳນັກ​ຂ່າວ​​ຫວຽດນາມ ໂດຍ ບນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ