ວັນອັງຄານ, 22/10/2019
ເຮັດໃຫ້ຄວາມພົວພັນຄູ່ຮ່ວມມືຍຸດທະສາດ ຫວຽດນາມ - ອິນເດຍ ເລິກເຊິ່ງຍິ່ງຂຶ້ນ
29/9/2016 10:8' ສົ່ງ ພິມ
ທ່ານນາຍົກລັດຖະມົນຕີອິນເດຍ ນະເຣນດຣາ ໂມທີ ແລະ ນາຍົກລັດຖະມົນຕີຫວຽດນາມ ຫວຽນຊວນຝຸກ (ພາບ: TTXVN)

ໃນ​ຂອບ​ການ​ຢ້ຽມຢາມ, ທ່ານ​ນາຍົກລັດຖະມົນຕີ ນະ​ເຣນດຣາ ​ໂມ​ທີ ​ແລະ ທ່ານນາຍົກລັດຖະມົນຕີ ຫວຽນ​ຊວນ​ຝຸກ ​ໄດ້​ມີ​ການ​ພົບ​ປະ​ເຈລະ​ຈາ ​ແລະ ​ເປັນ​ສັກຂີ​ພະຍານ​ໃນ​ພິທີ​ເຊັນ​ເອກະສານ​ການ​ຮ່ວມ​ມື​ລະຫວ່າງ​ສອງ​ປະ​ເທດ. ທ່ານ​ນາຍົກລັດຖະມົນຕີ ນະ​ເຣນດຣາ ​ໂມ​ທີ ​ໄດ້​ເຂົ້າ​ຢ້ຽມ​ຄຳນັບ​ເລຂາທິການ​ພັກ​ກອມ​ມູນິດ​ຫວຽດນາມ ຫງວຽນຝູຈ້ອງ, ປະທານ​ປະ​ເທດ ​ເຈິ່ນດ້າຍ​ກວາງ ​ແລະ ປະທານ​ສະພາ​ແຫ່ງ​ຊາດ ຫງວຽນ​ທີ້ກິມ​ເງິນ. ກ່ອນ​ນັ້ນ, ທ່ານ​ນາຍົກລັດຖະມົນຕີ ນະ​ເຣນດຣາ ​ໂມ​ທີ ​ໄດ້​ໄປ​ວາງ​ພວງມາລາ​ທີ່​ອະ​ນຸ​ສາ​ວະລີວິລະ​ຊົນ​ທີ່​ໄດ້​ເສຍ​ຊີວິດ​ເພື່ອ​ຊາດ, ວາງ​ພວງມາລາ​​ໄຫວ້​ອາ​ໄລທີ່​ສຸສານ​ປະທານ​ໂຮ່ຈີ​ມິນ, ​ໄປ​ຢາມ​ເຮືອນ​ສາລານິຍະ​ລະນຶກ​ລຸງ​ໂຮ່ ​ແລະ ຢາມວັດກວ໋ານສື ທີ່​ຮ່າ​ໂນ້ຍ.

ຫວຽດນາມ ​ແລະ ອິນ​ເດຍ ​ໄດ້​ແລະ​ພວມ​ເປັນ​ເພື່ອນ​ມິດ​ທີ່​ເປັນ​ມູນ​ເຊື້ອ​ມາ​ແຕ່​ດົນ​ນານ ​ແລະ ກໍ​ເປັນ​ຄູ່​ຮ່ວມ​ມື​ຍຸດ​ທະ​ສາດ​ໃນ​ນະ​ໂຍບາຍ​ການ​ຕ່າງປະ​ເທດ. ​ເພາະ​ສາ​ນັ້ນ, ​ໃນ​ການ​ຢ້ຽມຢາມ​ຄັ້ງ​ນີ້​ ທ່ານ​ຜູ້ນຳລັດ​ທັງ​ສອງໄດ້ສົນທະ​ນາ​​ເຈລະຈາກ່ຽວ​ກັບ​ຫຼາ​ຍຫົວຂໍ້​ທີ່​ກ່ຽວພັນ​ເຖິງການ​ພົວພັນ​ສອງ​ຝ່າຍ​ແລະ​ຫຼາຍ​ຝ່າຍ​ລະຫວ່າງ​ສອງ​ປະ​ເທດ.

​ໃນ​ບັນດາ​ການ​ພົບ​ປະ​ເຈລະຈາ, ສອງ​ຝ່າຍ​ເຫັນ​ດີ​ເປັນ​ເອກະ​ພາບຈະ​ເພີ່ມ​ທະວີ​ການ​ແລກປ່ຽນຄະນະ​ຜູ້​ແທນ​ຂັ້ນ​ສູງ ​ແລະ ຂັ້ນ​ຕ່າງໆ, ຊຸກຍູ້​ການພົວພັນ​ທາງ​ດ້ານ​ພັກ, ສະພາ​ແຫ່ງ​ຊາດຂອງ​ສອງ​ປະ​ເທດ, ສ້າງ​ຕັ້ງ​ການ​ພົວພັນ​ລະຫວ່າງ​ບັນດາ​ທ້ອງ​ຖິ່ນ​ຂອງ​ສອງ​ປະ​ເທດ, ​ເສີນ​ຂະຫຍາຍ​ປະສິດທິ​ຜົນ​ຂອງ​ບັນດາກົນ​ໄກສົນທະ​ນາ​ທີ່​​ໄດ້​ສ້າງ​ຂຶ້ນ​ແລ້ວ ​ແລະ ປະຕິບັດ​ບັນດາ​ຂໍ້​ຕົກລົງ​ທີ່​ໄດ້​ເຊັນ​ກັນ​ລະຫວ່າງ​ສອງ​ຝ່າຍ​ ໃຫ້​ມີ​ປະສິດທິ​ຜົນ. ສອງ​ຝ່າຍ​ສະ​ເໜີ​ໃຫ້​ບັນດາ​ກະຊວງ, ຂະ​ແໜງ​ການ​ທີ່​ກ່ຽວຂ້ອງ ປະຕິບັດ​ບັນດາ​ມາດ​ຕະການ​ທີ່​ແທດ​ຈິງ ລະອຽດ ​ເພື່ອ​ຍົກ​ມູນ​ຄ່າ​ການ​ຄ້າ​ສອງ​ສົ້ນຂຶ້ນ​ເປັນ 15 ຕື້​ໂດ​ລາ​ສະຫະລັດ​ໃນ​ປີ 2020; ສະ​ເໜີ​ໃຫ້​ບັນດາ​ອົງກາ, ວິ​ສາ​ຫະກິດ​ຂອງສອງປະ​ເທດ​ເພີ່ມ​ທະວີ​ການ​ຂຸດ​ຄົ້ນ​ບັນດາ​ໂອ​ກາດ​ຮ່ວມ​ມື​ໃນ​ບັນດາ​ຂົງ​ເຂດ​ບຸລິມະສິດ; ສົ່ງ​ເສີມ​ເພີ່ມ​ທະວີ​ການ​ລົງທຶນ​ສອງສົ້ນ​ລະຫວ່າງຫວຽດນາມ​ແລະ​ອິນ​ເດຍ.

ສອງ​ຝ່າຍ​ເຫັນ​ດີ​ເປັນ​ເອກະ​ພາບຈະ​ເພີ່ມ​ທະວີ​ການ​ຮ່ວມ​ມື​ໃນ​ຂົງ​ເຂດ​ນ້ຳມັນ​ອາຍ​​ແກັດ; ຊຸກຍູ້​ການ​ຮ່ວມ​ມື​ໃນ​ຂົງ​ເຂດ​ພະລັງງານທົດ​ແທນ; ​ເພີ່ມ​ທະວີ​ການ​ເຊື່ອມ​ຈອດ​ໃນ​ຂົງ​ເຂດ​ທະນາຄານ ​ແລະ ການ​ເງິນ ​ເພື່ອ​ແນ​ໃສ່​ຊຸກຍູ້​ການ​ພົວພັນ​ເສດຖະກິດ​ລະຫວ່າງ​ສອງ​ປະ​ເທດ; ​ເພີ່ມ​ທະວີ​ການ​​ແລກປ່ຽນ ​ແລະ ຮ່ວມ​ມື​ໃນ​ຂົງ​ເຂດ​ທ່ອງ​ທ່ຽວ ວັດທະນະທຳ ການພົບ​ປະ​ສັງ​ສັນຂອງ​ປະຊາຊົນ, ​ເປັນ​ຕົ້ນ​ແມ່ນ​ການ​ພົບ​ປະ​ສັງ​ສັນ​ຂອງຊາວ​ໜຸ່ມ​ລະຫວ່າງຫວຽດນາມ​ແລະ​ອິນ​ເດຍ. ອິນ​ເດຍປະ​ກາດ​ມອບ​ທຶນ​ສຶກສາ​ພິ​ເສດ​ແຕ່ລະ​ປີ ​ໃຫ້ສະມາຄົມ​ພຸດທະ​ສາສະໜາ​ຫວຽດນາມ ​ເພື່ອ​ໄປ​ສຶກສາ​ປຣິນຍາ​​ໄທ ປຣິນຍາເອກ ກ່ຽວກັບສາສະໜາ​ພຸດ​ ແລະ ​ຮຽນ​ຮູ້​ພາສາ​ສັນສະກິດ​ ຢູ່​ປະ​ເທດ​ອິນ​ເດຍ. ອິນ​ເດຍຢັ້ງຢືນສືບ​ຕໍ່​ກໍ່ສ້າງ​ຍົກ​ສູງ​ຄວາມ​ສາມາດ​ໃຫ້​ຫວຽດນາມ ​ໂດຍ​ຜ່ານ​ໂຄງການ​ຮ່ວມມືດ້ານ​ເຕັກນິກ (ITEC) ​ແລະ ​ໃຫ້​ທຶນ​ສຶກສາ​ແກ່​ນັກຮຽນ ນັກ​ສຶກສາ ​ແລະ ລັດຖະກອນ​ຂອງ​ຫວຽດນາມ.

ສອງ​ຝ່າຍ​ສະ​ແດງ​ຄວມພຶງ​ພໍ​​ໃຈ​ກ່ຽວ​ກັບ​ບັນດາ​ໂຄງການ​ຮ່ວມ​ມື​ໃນ​ຂົງ​ເຂດ​ຮັກສາ​ສັນຕິພາບ; ​ເຫັນ​ດີ​ເປັນ​ເອກະ​ພາບ​ເພີ່ມ​ທະວີ​ການ​ຮ່ວມ​ມື ​ເປັນ​ຕົ້ນ​ແມ່ນ​ຢູ່​ທີ່​ອົງການສະຫະ​ປະຊາ​ຊາດ, ຂະ​ບວນການ​ບໍ່​ເຂົ້າ​ຮ່ວມ​ກຸ່ມ, ອົງການ​ການ​ຄ້າ​ໂລກ, ອາ​ຊຽນ ​ແລະ ບັນດາ​ເວທີ​ປ​າໄສທີ່​ກ່ຽວຂ້ອງ​ຂອງ​ອາ​ຊຽນ; ສອງ​ຝ່າຍ​ຢັ້ງຢືນ​ອີກ​ຄັ້ງ​ກ່ຽວ​ກັບ​ຄວາມ​ມຸ່ງ​ຫວັງ ​ແລະ ຄວາມ​ຕັດສິນ​ໃຈ​ຮ່ວມ​ມື​​ໃນ​ການ​ຮັກສາ​ສັນຕິພາບ ສະຖຽນ​ລະ​ພາບ ການ​ພັດທະນາ ​ແລະ ຄວາມ​ວັດທະນາ​ຖາວອນ​ຢູ່​ອາຊີ ​ແລະ ​ໃນ​ໂລກ. ສອງ​ຝ່າຍ​ຮັບ​ຮູ້​ຄຳ​ພິພາກສາ​ໃນ​ວັນ​ທີ 12 ​ເດືອນ​ກໍລະກົດ 2016 ຂອງ​ສານ​ອະນຸຍາ​ໂຕ​ຕຸລາການ​ທີ່​ຈັດ​ຕັ້ງຂຶ້ນຕາມ​ພາກ​ຜະໜວກ​ທີ VII ຂອງ​ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982 (UNCLOS), ພ້ອມ​ກັນ​ນັ້ນ ​ກໍ​ເນັ້ນ​ຄວາມ​ສະໜັບສະໜູນ​ຕໍ່​ສັນຕິພາບ ສະຖຽນ​ລະ​ພາບ ຄວາມ​ສະຫງົບ ຄວາມ​ປອດ​ໄພ ​ແລະ ​ເສລີພາບ​ໃນ​ການ​ເດີນ​ທະ​ເລ​ແລະ​ເດີນ​ອາກາດ ​ແລະ​ການ​ຄ້າທີ່​ບໍ່​ຖືກ​ກີດຂວາງ, ບົນ​ພື້ນຖານ​ບັນດາ​ຫຼັກການ​ຂອງ​ກົດໝາຍ​ສາກົນ, ພິ​ເສດ​ແມ່ນ​ບັນດາ​ຫຼັກການ​ທີ່​ລະບຸ​ໄວ້​ໃນ UNCLOS.

ພາຍຫຼັງ​ການ​ພົບ​ປະ​ເຈລະຈາ, ນາ​ຍົກ​ລັດຖະມົນຕີ​ຂອງ​ສອງ​ປະ​ເທດ​ໄດ້​ເປັນ​ສັກ​ຂີ​ພະຍານ​ໃນ​ພິທີ​ເຊັນ​ບັນດາ​ສັນຍາ​ຂໍ້​ຕົກລົງ​ທີ່​ສຳຄັນ​ ລະຫວ່າງ​ສອງ​ປະ​ເທດ​ເຊັ່ນ: ຂອບສັນຍາລະຫວ່າງ​ລັດຖະບານ​ຫວຽດນາມ ​ແລະ ລັດຖະບານ​ອິນ​ເດຍ ກ່ຽວ​ກັບ​ການ​ຮ່ວມ​ມື​ຂຸດ​ຄົ້ນ ​ແລະ​ນຳ​ໃຊ້​ອາ​ວະ​ກາດ ​ເພື່ອ​ຈຸດປະສົງ​ສັນຕິພາບ; ອະນຸ​ສັນຍາດັດ​ແປງ​ແກ້​ໄຂ​ສັນຍາ​ວ່າ​ດ້ວຍ​ການ​ຫຼີກ​ລ່ຽງການ​ເກັບພາສີ​ຊ້ອນ; ​ໂຄງການ​ຮ່ວມ​ມື​ໃນ​ຂົງ​ເຂດ​ຮັກສາ​ສັນຕິພາບ; ອະນຸ​ສັນຍາ​ລະຫວ່າງ​ກະຊວງ​ການ​ຕ່າງປະ​ເທດ​ຫວຽດນາມ ​ແລະ ກະຊວງ​ການ​ຕ່າງປະ​ເທດ​ອິນ​ເດຍ ວ່າ​ດ້ວຍ​ການສະ​ເຫຼີ​ມສະຫຼອງ “ປີ​ມິດຕະພາບ” 2017; ບົດບັນ​ທຶກ​ຄວາມ​​ຮ່ວມ​ມື​ດ້ານ​ສາທາລະນະ​ສຸກ; ບົດ​ບັນທຶກ​ຄວາມ​ຮ່ວມ​ມື​ດ້ານ​ເຕັກ​ໂນ​ໂລ​ຊີ​ສື່ສານ; ບົດ​ບັນທຶກ​ຄວາມ​ຮ່ວມ​ມື​ລະຫວ່າງ​ສະ​ຖາ​ບັນ​ບັນດິດວິທະຍາສາດ​ສັງຄົມ​ຫວຽດນາມ ​ແລະ ສະພາ​ອິນ​ເດຍກ່ຽວ​ກັບ​ບັນດາ​ບັນຫາ​ສາກົນ; ບົດບັນທຶກ​ຄວາມ​ຮ່ວມ​ມື​ໃນ​ການ​ຮັກສາ​ຄວາມ​ປອດ​ໄພ​ເຄືອ​ຂ່າຍ; ບົດ​ບັນທຶກ​ຄວາມ​ຮ່ວມ​ມື​ໃນ​ຂົງ​ເຂດຫັນ​ເປັນ​ມາດຕະຖານ ​ແລະ ຕີ​ລາຄາ​ຄຸນ​ນະພາ​ບ; ຂໍ້​ຕົກລົງ​ກ່ຽວ​ກັບ​ການ​ກໍ່ສ້າງ​ໂຄງ​ສ້າງ​ພື້ນຖານ​ຂໍ້​ມູນ​ຂ່າວສານ ​ໃຫ້​ແກ່​ການ​ອົບຮົມກໍ່ສ້າງ​ເຕັກ​ໂນ​ໂລ​ຊີ​ສື່ສານ​ຄຸນ​ນະພາ​ບສູງ; ຂໍ້​ຕົກລົງ​ເຕັກນິກ​ກ່ຽວ​ກັບ​ການ​ແລກປ່ຽນ​ຂໍ້​ມູນ​ຂ່າວສານ​ການ​ເດີນ​ທະ​ເລ​ປອດ​ທະຫານ; ສັນຍາ​ກ່ຽວ​ກັບ​ການ​ສະໜອງ​ກຳ​ປັ່ນ​ຄວາມ​ໄວ​ສູງ.

ຫວຽດນາມ ​ແລະ ອິນ​ເດຍ ມີ​ຄວາມ​ພົວພັນ​ສະໜິດ​ແໜ້ນ​ທີ່​ເປັນ​ມູນ​ເຊື້ອ ຊຶ່ງ​ເລີ່​ມຈາກການ​ຕໍ່ສູ້​ຍາດ​ເອົາ​ອິດສະຫຼະພາບ​ຂອງ​ປະຊາຊົນ​ສອງ​ປະ​ເທດ ​ໂດຍ​ແມ່ນ​ທ່ານ​ນາຍົກລັດຖະມົນຕີ ມະຫາຕະມາ ຄານ​ທີ ​ແລະ ທ່ານ​ປະທານ​ໂຮ່ຈີ​ມິນ​ ເປັນ​ຜູ້ນຳ​ພາ. ອິນ​ເດຍບໍ່​ພຽງ​ແຕ່​ຢືນ​ຄຽງ​ຂ້າງ​ຫວຽດນາມ​ໃນ​ການ​ຕໍ່​ສູ້​ຍາດ​ເອົາ​ອິດສະຫຼະພາບ​ເທົ່າ​ນັ້ນ ຫາກ​ຍັງ​ສະໜັບສະໜູນ​ຫວຽດນາມ​ໃນ​ໄລຍະ​ໂຮມ​ປະ​ເທດ​ຊາດ​ເປັນ​ເອກະ​ພາບ​ອີກ​ນຳ. ​ໃນ​ຊຸມ​ປີ​​ແຕ່ທ້າຍ 1970 ​​ເຖີງ 1980 ​ແມ່ນ​ໄລຍະ​ທີ່​ຫວຽດນາມ​ມີ​ຄວາມ​ຫຍຸ້ງຍາກ​ທີ່​ສຸດ, ອິນ​ເດຍ​ເປັນ​ໜຶ່ງ​ໃນ​ບາງ​ປະ​ເທດ​ທີ່​ຢືນ​ຂ້າງຄຽງ​ທາງ​ຝ່າຍ​ຫວຽດນາມ ​ໃນ​ເວລາ​ທີ່​ຫວຽດນາມ​ຕ້ອງການ​ຄວາມ​ຊ່ວຍ​ເຫຼືອ​ຂອງ​ຕ່າງປະ​ເທດ​ທີ່​ສຸດ. ທັງ​ອິນ​ເດຍ ​ແລະ ຫວຽດນາມ ລ້ວນ​ແຕ່​ມີ​ພົນລະ​ເມືອງໜຸ່ມທີ່​ມີ​ຄວາມ​ຫ້າວຫັນ​ຂະຫຍັນຂັນ​ເຄື່ອນ ຊຶ່ງ​ພົນລະ​ເມືອງ​ສ່ວນ​ຫຼາຍ​ໃນ​ໄວ​ອາຍຸ​ບໍ່​ເຖິງ 35 ປີ. ດັ່ງ​ນັ້ນ, ສິ່ງສຳຄັນແມ່ນຕ້ອງຮັບປະກັນອະນາຄົດ​ຂອງ​ສອງ​ປະ​ເທດ ​ແລະ ຈຸດ​ໜັກ​ໃຈກາງ​ຂອງ​ຄວາມ​ພົວພັນ​ລະຫວ່າງຫວຽດນາມ - ອິນ​ເດຍ​ໄດ້​ຮັບ​ການ​ກໍ່ສ້າງ​ຢ່າງ​ຖືກຕ້ອງ ຫັນ​ໄປ​ສູ່​ຕອບ​ສະໜອງຄວາມ​ມຸ່ງ​ມາດ​ປາຖະໜາ​ຂອງ​ເຍົາວະ​ຊົນ​ຂອງ​ທັງ​ສອງ​ປະ​ເທດ. ຍິ່ງ​ກວ່າ​ນັ້ນ, ຄວາມ​ຄ້າຍຄື​ກັນ​ທາງ​ດ້ານ​ປະຫວັດສາດ, ວັດທະນະທຳ​ອັນ​ເປັນ​ມູນ​ເຊື້ອ ​ແລະ ສາສະໜາ, ນ້ຳ​ໃຈ​ມິດຕະພາບ​ແລະ​ຄວາມ​ເຂົ້າ​ໃຈ​ຊຶ່ງ​ກັນ​ແລະ​ກັນລະຫວ່າງ​ປະຊາຊົນ​ສອງ​ປະ​ເທດ​ໄດ້​ຜ່ານ​ການ​ທົດ​ສອບ​ໃນ​ຄວາມ​ຜັນ​ຜວນ​ຂອງ​ປະຫວັດສາດ ມັນ​ຮຽກຮ້ອງ​​ເຊັ່ນ​ຄົນ​ປະຈຸ​ບັນ​ຕ້ອງ​ເພີ່ມ​ພູນ​ຄູນ​ສ້າງ​ເຮັດ​ໃຫ້​ມູນ​ມໍ​ລະ​ດົກ​ນີ້​ອຸດົມສົມບູນ​ຍິ່ງ​ຂຶ້ນ.

ປະຈຸ​ບັນ​ນີ້, ອິນ​ເດຍກຳລັງ​ປະຕິບັດ​ນະ​ໂຍບາຍ “ການກະທຳຫັນສູ່​ຕ​າເວັນອອກ”, ​ແນ​ໃສ່​ສ້າງ​ການ​ພົວພັນ​ຄູ່​ຮ່ວມ​ມື​ກັບບັນດາ​ປະ​ເທດ​ເພື່ອນ​ບ້ານ​ຢູ່​ທາງ​ທິດຕາ​ເວັນ​ອອກ ຊຶ່ງ​ກວມ​ດ້ວຍ​ການ​ຮ່ວມ​ມື​ທາງດ້ານການ​ຮັກ​ສາ​ຄວາມ​ສະຫງົບ, ຍຸດ​ທະ​ສາດ, ການ​​ເມືອງ, ການ​ປ້ອງ​ກັນ​ປະ​ເທດ ​ແລະ ການ​ຕ້ານ​ພວກ​ກໍ່​ການ​ຮ້າຍ, ຄຽງ​ຂ້າງ​ກັບ​ບັນດາ​ການ​ພົວພັນ​ທາງ​ດ້ານ​ເສດຖະກິດ. ນະ​ໂຍບາຍ​ນີ້​ໄດ້​ຍົກ​ໃຫ້​ເຫັນຢ່າງ​ພົ້ນ​ເດັ່ນ​ເຖິງ​ຄວາມ​ສຳຄັນ​ຂອງ​ບັນດາ​ປະ​ເທດ​ເພື່ອນ​ບ້ານ​ຂອງ​ອິນ​ເດຍທີ່ຢູ່​ທາງ​ທິດຕາ​ເວັນ​ອອກຂອງ​ທະວີບອາຊີ ກໍ່​ຄື​ໃຫ້​ບຸລິມະສິດ​ແກ່​ບັນດາ​ປະ​ເທດ​ເຫຼົ່າ​ນັ້ນ​ໃນ​ນະ​ໂຍບາຍ​ການ​ຕ່າງປະ​ເທດ​ຂອງ​ອິນ​ເດຍ. ຫວຽດນາມ​ປະຈຸ​ບັນ​ເປັນ​ສະມາຊິກ​ທີ່​ສຳຄັນ​ໜຶ່ງ​ຂອງ​ອາ​ຊຽນ ​ແລະ ກໍ​ເປັນ​​ເສົາຄ້ຳ​ທີ່​ສຳຄັນ​ໃນ​ນະ​ໂຍບາຍ​ການ​ກະທຳ​ຫັນ​ສູ່​ຕາ​ເວັນ​ອອກ​ຂອງ​ອິນ​ເດຍ.

ການ​ຢ້ຽມຢາມ​ປະ​ເທດ​ຫວຽດນາມ​ຂອງທ່ານ​ນາຍົກລັດຖະມົນຕີອິນ​ເດຍ ນະ​ເຣນດຣາ ​ໂມ​ທີ ​ໃນ​ຄັ້ງ​ນີ້​​ເພື່ອແນ​ໃສ່​ເພີ່ມ​ທະວີ​ນ້ຳ​ໃຈ​ມິດຕະພາບ ຄວາມສາມັກຄີ ​ແລະ ຮ່ວມ​ມື​ຢ່າງຮອບດ້ານລະຫວ່າງ​ສອງ​ປະ​ເທດ ກໍ​ຄື​ຊຸກຍູ້​ການ​ຮ່ວມ​ມື​ສອງ​ຝ່າຍ​ແລະ​ຫຼາຍ​ຝ່າຍ ​ໃນ​ບັນດາ​ຂົງ​ເຂດການ​ເມືອງ ​ເສດຖະກິດ ການ​ຄ້າ ວັດທະນະທຳ, ພັດທະນາ​ແຫຼ່ງບຸກຄະລາ​ກອນ, ວິທະຍາ​ສາດ​ແລະ​ເຕັກ​ນິກ, ຄົ້ນ​ຄວາ​ອາ​ວະ​ກາດ, ການ​ປ້ອງ​ກັນຊາ​ດ​ແລະ​ປ້ອງ​ກັນ​ຄວາມ​ສະຫງົບ. ການ​ຊຸກຍູ້​ການ​ພົວພັນ​ຫຼາຍ​ດ້ານ​ລະຫວ່ງສອງ​ປະ​ເທດ​ກໍ່​​ແມ່ນ​ເພື່ອ​ຫັນ​​ສູ່ຄວາມ​ສະຖຽນ​ລະ​ພາບ, ຮັກສາ​ສັນຕິພາບ, ​ເພີ່ມ​ຄວາມ​ເຕີບ​ໂຕ​ເສດຖະກິດ ​ແລະ ຄວາມ​ວັດທະນາ​ຖາວອນ​ຢູ່​ສອງ​ປະ​ເທດ, ຢູ່​ໃນ ​ແລະ ນອກ​ພາກ​ພື້ນ​ອາຊີ.

ຜົນສຳ​ເລັດ​ຂອງ​ການ​ຢ້ຽມຢາມ​ກໍ່​ປະກອບສ່ວນ​ປັບປຸງ​ຄວາ​ມ​ໄວ້​ວາງ​ໃຈ​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ປະ​ເທດ, ​ເພີ່ມ​ທະວີ​ຄວາມ​ພົວພັນ​ມິດຕະພາບທີ່​ເປັນ​ມູນ​ເຊື້ອ ​ແລະ ​ເຮັດ​ໃຫ້ຄວາມ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ ຫວຽດນາມ - ອິນ​ເດຍ ​ເລິກ​ເລິ່ງຍິ່ງ​ຂຶ້ນ ນັບທາງ​ດ້ານ​ສອງ​ຝ່າຍ​ແລະ​ຫຼາຍ​ຝ່າຍ, ​ແລະ​ໃຫ້​ໃນຂະຫຍາຍຕົວຂຶ້ນ​ສູ່ລະດັບ​ໃໝ່ ​ເພື່ອຕອບ​ສະໜອງ​ຜົນ​ປະ​ໂຫຍ​ດຂອງ​ປະຊາຊົນ​ແຕ່ລະ​ປະ​ເທດ, ​ເພື່ອ​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ ຄວາມ​ພັດທະນາ​ຢູ່​ພາກ​ພື້ນ ​ແລະ ​ໃນ​ໂລກ./.

ສັງ​ລວມ​ໂດຍ ທູ່​ຍລີງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ