ວັນອັງຄານ, 22/10/2019
ກອງປະຊຸມສະໄໝສາມັນເທື່ອທີ 71 ຂອງສະມັດຊາໃຫຍ່ ແຫ່ງ ສະຫະປະຊາຊາດ: ມຸ່ງໝັ້ນທີ່ຈະປະຕິບັດງານ
16/10/2016 7:35' ສົ່ງ ພິມ
ທ່ານຟ້າມບິ່ງມິງ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ຫວຽດນາມ (ພາບ: TTXVN)

ສືບຕໍ່ຢັ້ງຢືນ​ບົດບາດ​ສຳຄັນ​ ຂອງ​ອົງການ​ສະຫະ​ປະຊາ​ຊາດ

ກ່ອນ​ໜ້າ​ນີ້ 71 ປີ, ອົງການສະຫະ​ປະຊາ​ຊາດ​ໄດ້​ກຳ​ເນີ​ດ​ເກີດ​ຂຶ້ນ ​ເພື່ອ​ປະຕິບັດ​ເປົ້າ​ໝາຍ​ກໍ່ສ້າງ​ໂລກທີ່​ມີ​ສັນຕິພາບ, ສະຖຽນ​ລະ​ພາບ, ມີ​ຄວາມ​ຜູກ​ພັນ​ແໜ້ນ​ແຝ້ນນຳ​ກັນ ​ລະຫວ່າງ​ບັນດາ​ປະຊາ​ຊາດ. ປະຈຸ​ບັນ​ນີ້, ​ເປົ້າ​ໝາຍ​ດັ່ງກ່າວ​ຍັງ​ຄົງ​ເປັນ​ພາລະ​ກຳ​ອັນ​ສູງ​ສົ່ງ​ຂອງ​ອົງການ​ຈັດ​ຕັ້ງ​ນີ້. ສະຫະ​ປະຊາ​ຊາດຍັງ​ຄົງ​ເປັນ​ເວທີ​ປາ​ໄສ​ທີ່​ສຳຄັນ ເພື່ອ​ໃຫ້​ປະຊາ​ຊາດ​ຕ່າງໆ​ສະ​ແດງ​ຄວາມ​ຄິດ​ຄວາມ​ເຫັນ​ຂອງ​ຕົນ. ການ​ປະຊຸມ​ຄັ້ງ​ຕ່າງໆ​ຂອງສະມັດຊາ​ໃຫຍ່​ແຫ່ງ​ສະຫະ​ປະຊາ​ຊາດ ສ້າງ​ໂອກາດ​ໃຫ້ການ​ພົບ​ປະ​ບໍ່​ເປັນ​ທາງ​ການ, ການ​ພົບ​ປະຕາມ​ລະບຽງ ຫຼື​ໃນ​ຫ້ອງ​ຈັດ​ງານ​ລ້ຽງ ລະຫວ່າງ​ການ​ນຳ​ຂອງ​ປະ​ເທດ​ຕ່າງໆ ​ເພື່ອ​ຊອກ​ຫາ​ວິທີ​ແກ້​ໄຂ​ໃຫ້​ແກ່​ບັນຫາ​ທີ່​ພົ້ນ​ເດັ່ນ​ຂອງ​ໂລກ. ຍ້ອນ​ແນວ​ນັ້ນ, ການ​ປະຊຸມ​ເດືອນ​ກັນຍາ​ທຸກ​ປີ ​ຂອງສະມັດຊາ​ໃຫຍ່​ແຫ່ງ​ສະຫະ​ປະຊາ​ຊາດ ​ເປັນ​ເຫດການ​ການ​ເມືອງ​ທີ່​ສຳຄັນ​ທີ່​ສຸດ ​ແລະ ​ໄດ້​ຮັບ​ຄວາມ​ຄອງ​ຄອຍ​ທີ່​ສຸດ​ໃນ​ປີ.

​ໂດຍ​ໄດ້​ດຳ​ເນີນ​ໃນ​ສະພາບ​ການ​ໂລກ​ທີ່ມີ​ສິ່ງ​ທ້າ​ທາຍ​ຫຼາຍ​ຢ່າງ​ຄື ບັນດາ​ການ​ປະ​ທະ​ກັນ​ທີ່​ແກ່ຍາວ, ລັດທິ​ກໍ່​ການ​ຮ້າຍ​ເພີ່ມ​ຄວານ​ຮຸນ​ແຮງ​ຊັກ​ໄຊ້, ສະພາບ​ທຸກ​ຍາກ​ແສນ​ສາຫັດ, ວິ​ກິດ​ການ​ຜູ້​ອົດ​ພະ​ຍົບ, ການ​ປ່ຽນ​ແປງສະພາບອາກາດ,… ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 71 ຂອງສະມັດຊາ​ໃຫຍ່​ແຫ່ງ​ສະຫະ​ປະຊາ​ຊາດປີ​ນີ້ ​ໄດ້​ຮັບ​ບົດ​ປາ​ໄສ 100 ກວ່າ​ບົດ​ທີ່​ມີ​ສີສັນ​ອຸດົມສົມບູນ ຂອງ​ຜູ້ນຳ​ບັນດາ​ປະ​ເທດທີ່ຝາກ​ມາ​ໃຫ້, ​ແຕ່​ລ້ວນ​ແຕ່​ຫັນ​ສູ່​ເປົ້າ​ໝາຍ​ລວມ​ແມ່ນ ການ​ສ້າງ​ປະຕິກິລິຍາ​ໂດຍ​ລວມຂອງຄອບຄົວ​ໃຫຍ່ສະຫະ​ປະຊາ​ຊາດ​ ເພື່ອ​ຮັບ​ມືກັບ​ສິ່ງ​ທ້າ​ທາຍ​ຕ່າງໆ. ຈຸດ​ເນັ້ນ​ຂອງການ​ປະຊຸມ​ສຸດ​ຍອດ​ໃນ​ອາທິດ​ນີ້​ ແມ່ນບັນດາ​ເຫດການທີ່​ສຳຄັນຄື ກອງ​ປະຊຸມ​ສຸດ​ຍອດ​ກ່ຽວ​ກັບຜູ້​ອົບ​ພະຍົບ​ ​ລີ້​ໄພ, ກອງ​ປະຊຸມ​ສຸດ​ຍອດ​ກ່ຽວ​ກັບສະພາວະ​ຄວາມ​ຕ້ານທານ​ຢາ​ຕ້ານ​ເຊື້ອ, ​ເຫດການ​ໃຫ້​ສັດຕະຍາບັນສົນທິສັນຍາ​ປາຣີວ່າ​ດ້ວຍ​ການ​ປ່ຽນ​ແປງ​ສະພາບ​ອາກາດ ​ເພື່ອ​ໃຫ້​ມັນ​ມີ​ຄວາມ​ສັກສິດ​ໂດຍ​ໄວ,...

ຕະຫຼອດ​ເວລາ​ປະຊຸມ​ໜຶ່ງ​ອາທິດ, ບັນດາ​ຜູ້ນຳ​ໄດ້​ບັນລຸ​ເຖິ​ງຄວາມເຫັນ​ດີ​ເຫັນ​ພ້ອມ​ທີ່​ສຳຄັນ​ຕ່າງໆ. ກ່ອນ​ອື່ນ​ໝົດ​ແມ່ນ ​ຖະ​ແຫຼ​ງການ​ນິວຢອກວ່າ​ດ້ວຍ​ຜູ້​ອົບ​ພະຍົບ ​ລີ້​ໄພ - ​ເອກະສານສະບັບ​ນີ້ ​ຖ້າ​ຫາກ​ໄດ້​ຮັບ​ການ​ປະຕິບັດ​ຢ່າງ​ເຂັ້ມ​ງວດ ກໍ່​ຈະ​ສ້າງ​ໃຫ້​ມີ​ກົນ​ໄກທີ່​ໝັ້ນຄົງ ມີ​ຄວາມ​ຮັບຜິດຊອບ​ກວ່າ​ອີກ ​ເພື່ອ​ໃຫ້​ບັນດາ​ປະ​ເທດ​ສະມາຊິກສະຫະ​ປະຊາ​ຊາດ ຮ່ວມມື​ຮ່ວມ​ແຮງ​ກັນ​ແກ້​ໄຂ​ສະພາບ​ການ​ອົບ​ພະຍົບ ​ລີ້​ໄພ​ຢູ່ໃນ​ໂລກ.

​ໃນ​ທີ່​ເຫດການ​ພິ​ເສດ​ເພື່ອຍູ້​ແຮງ​ການ​ເຮັດ​ໃຫ້ສົນທິສັນຍາ​ປາຣີວ່າ​ດ້ວຍ​ການ​ປ່ຽນ​ແປງ​ສະພາບ​ອາກາດມີ​ຄວາມ​ສັກສິດ​ໂດຍ​ໄວນັ້ນ, 31 ປະ​ເທດ​ໄດ້​ມອບ​ເອກະສານ​ສັດຕະຍາບັນ​ສົນທິສັນຍາ ​ໃຫ້​ເລຂາທິການ​ໃຫຍ່ສະຫະ​ປະຊາ​ຊາດ ບັນ ກີ​ມູນ, ຊຶ່ງ​ໄດ້​ຍົກ​ຈຳນວນ​ປະ​ເທດ​ທີ່​​ໃຫ້​ສັດຕະຍາບັນ​ ຂຶ້ນ​ເປັນ 60 ປະ​ເທດ, ລື່ນ​ກາຍ​ລະດັບຈຳ​ເປັນ​ທີ່​ຕ່ຳ​ສຸດ (55 ປະ​ເທດ) ​ເພື່ອ​ໃຫ້​ສົນທິສັນຍາ​ມີ​ຄວາມ​ສັດ​ສິດທາ​ງກົດໝາຍ​ໃນ​ປີ 2016.

ກອງ​ປະຊຸມ​ສຸດ​ຍອດ​ກ່ຽວ​ກັບສະພາວະ​ຄວາມ​ຕ້ານທານ​ຢາ​ຕ້ານ​ເຊື້ອ, ​ເປັນ​ຄັ້ງ​ທຳ​ອິດ​ທີ່​ບັນດາ​ຜູ້ນຳ​ໄດ້​ໃຫ້​ຄຳ​ໝັ້ນ​ສັນຍາຈະ​ປະສານ​ສົມທົບ​ກັນ ​ເພື່ອ​ຮັບ​ມື​ກັບສະພາວະ​ຄວາມ​ຕ້ານທານ​ຢາ​ຕ້ານ​ເຊື້ອ ຊຶ່ງ​ເຄີຍຂົ່ມຂູ່​ຊີວິດ​ຂອງ 10 ລ້ານ​ຄົນ​ໃນ​ປີ 2050 ຖ້າ​ຫາກ​ບໍ່​ໄດ້​ຮັບ​ການ​ແກ້​ໄຂ.

ຈຸດ​ເນັ້ນ​ໜຶ່ງ​ອີກຂອງການ​ປະຊຸມປີ​ນີ້​ແມ່ນ ບັນດາ​ປະ​ເທດ​ລ້ວນ​ແຕ່​ເນັ້ນ​​ເຖິງຄວາມ​ຈຳ​ເປັນ​ຕ້ອງ​ປະຕິ​ຮູບຄະນະ​ມົນຕີ​ຄວາມໝັ້ນຄົງ, ສະມັດຊາ​ໃຫຍ່​ ​ແລະ ລະບົບ​ການ​ພັດທະນາຂອງສະຫະ​ປະຊາ​ຊາດ ​ເພື່ອ​ເພີ່ມ​ທະວີ​ປະສິດ​ທິຜົນ​ແຫ່ງ​ການ​ເຄື່ອນ​ໄຫວ ​ຂອງ​ອົງການ​ນີ້​ໃນ​ສະຕະວັດ​ທີ XXI, ຮັບປະກັນ​ລັກສະນະ​ປະຊາທິປະ​ໄຕ, ​ໂປ່ງ​ໃສ, ທຸກ​ປະ​ເທດມີສິດເຂົ້າຮ່ວມ​ແບບ​ສະ​ເໝີ​ພາບ​ແລະ​ກວ້າງຂວາງ ​​ໃນ​ຂະ​ບວນວິວັດ​ການ​ສົນທະນາ ປຶກສາ​ປາ​ລື ລົງມະຕິ ​ແລະ ການ​ຕັດສິນ​ ຂອງສະຫະ​ປະຊາ​ຊາດ. ກອງ​ປະຊຸມ​ນີ້ກໍ່​ໄດ້​ເປັນ​ສັກ​ຂີ​ພະຍານ​ຂັ້ນ​ຕອນ​ການ​ແລ່ນ​ພະລັນ ຂອງ​ບັນດາ​ຜູ້​ສະ​ໝັກ​ສຳລັບ​ຕຳ​ແໜ່​ງ​ເລຂາທິການ​ໃຫຍ່​ຜູ້​ໃໝ່​ ຂອງສະຫະ​ປະຊາ​ຊາດ.

ປະກອບສ່ວນ​​ເຂົ້າ​ໃນ​ພາລະກິດ​ສັນຕິພາບ ການ​ຮ່ວມ​ມື ​ແລະ ການ​ພັດທະນາ​ໃນ​ໂລກ

​ໂດຍ​ເຂົ້າ​ຮ່ວມ​ການ​ເຄື່ອນ​ໄຫວ​ຕ່າງໆ ​ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 71 ຂອງສະມັດຊາ​ໃຫຍ່​ແຫ່ງ​ສະຫະ​ປະຊາ​ຊາດ, ທີ່​ການ​ປະຊຸມ​ສຸດ​ຍອດ, ທ່ານ​ຟ້າ​ມບິ່ງ​ມິ​ງ ຮອງ​ນາ​ຍັກ​ລັດຖະມົນຕີ ລັດຖະມົນຕີ​ກະຊວງ​ການ​ຕ່າງປະ​ເທດ ​ໄດ້​ສະ​ແດງ​ຄວາມ​ເຊື່ອ​ໝັ້ນ​ຕໍ່​ບັນດາ​ທິດ​ທາງ​ໃຫຍ່​ ໃນ​ການ​ພັດ​ທະ​ນາ​ລວມຂອງ​ໂລກ ທີ່ສະຫະ​ປະຊາ​ຊາດ​ໄດ້​ຮັບຮອງຜ່ານ​ເມື່ອ​ປີ 2015, ຄື ລະບຽບ​ວາລະ 2030 ​ເພື່ອ​ຄວາມ​ພັດທະນາ​ແບບ​ຍືນ​ຍົງ, ​ໂຄງການ​ດຳ​ເນີນ​ງານ ​ແອດ​ດິສ ອາ​ບາ​ບາ ກ່ຽວ​ກັບ​ການ​​ເງິນເພື່ອຄວາມ​ພັດທະນາ, ຂໍ້​ຕົກລົງ​ປາຣີວ່າ​ດ້ວນ​ການ​ປ່ຽນ​ແປງ​ສະພາບ​ອາກາດ ​ແລະ ​ແຜນຂອບດຳ​ເນີນ​ງານ ​ເຊ​ນ​ໄດ ວ່າ​ດ້ວຍ​ການ​ຫລຸດຜ່ອນ​ຄວາມ​ສ່ຽງ​ໄພ​ທຳ​ມະ​ຊາດ ຊຶ່ງ​ບໍ່​ພຽງ​ແຕ່​ແນ​ໃສ່​ແກ້​ໄຂ ​ແລະ​ຮັບ​ມື​ກັບ​ສິ່ງ​ທ້າ​ທາຍ​ສະ​ເພາະ​ໜ້າ​ເທົ່າ​ນັ້ນ ຫາກ​ຍັງ​ໄດ້​ສ້າງ​ກຳລັງ​ໜູນ​ໃໝ່​ໃຫ້​ແກ່​ບັນດາ​ສາຍ​ພົວພັນ​ຄູ່​ຮ່ວມ​ທີ່​ນັບ​ມື້​ນັບ​ແທດ​ຈິງ ມີ​ປະສິດທິ​ຜົນ, ສ້າງ​ພື້ນຖານ​ອັນ​ໜັກ​ແໜ້ນ​ໃຫ້​ແກ່​ສັນຕິພາບ ​ແລະ ຄວາມ​ວັດທະນາ​ຖາວອນ​ລວມ.

ທ່ານ​ຮອງ​ນາຍົກລັດຖະມົນຕີ​ໄດ້​ຕີ​ລາຄາ​ສູງ​ຕໍ່​ຫົວ​ຂໍ້ “ບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ: ຊຸກຍູ້​ການ​ຫັນປ່ຽນ​ໂລກຢ່າງຮອບດ້ານ” ຂອງ​ກອງ​ປະຊຸມສະ​ໄໝ​ສາມັນ​ເທື່ອ​ນີ້ ​ແລະ​ສະ​ແດງ​ຄວາມ​ເຊື່ອ​ໝັ້ນ​ວ່າ, ມີ​ຄວາມສາມາດ​​ເຕັມ​ສ່ວນ​ ​ໃນ​ການປະຕິບັດບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ (​ເອສດີ​ຈີ) ​ໃຫ້​ປະກົດ​ຜົນ​ຕົວ​ຈິງ. ​ແຕ່​ວ່າ, ຕາມ​ທ່ານ​ນາຍົກລັດຖະມົນຕີ, ​ໂລກ​ກຳລັງ​ຢືນ​ຕໍ່ໜ້າ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ຕ່າງໆ. ​ເສດຖະກິດ​ໂລກ​ຟື້ນ​ຕົວ​ຊ້າ ​ແລະ ບໍ່​ສະ​ໝ່ຳສະ​ເໝີ, ລັດທິ​ປົກ​ປ້ອງ​ພວມ​ເພີ່ນ​ຂຶ້ນ​ໃນ​ປະ​ເທດເສດຖະກິດ​ຂະໜາດ​ໃຫຍ່, ສິ່ງ​ທ້າ​ທາຍ​ຕ່າງໆ​ນັບ​ມື້​ນັບ​ຮ້າຍ​ແຮງ​ຄື ​ຄວາມ​ປອດ​ໄພ​ດ້ານ​ສະບຽງ​ອາຫານ, ຄວາມ​ປອດ​ໄພ​ດ້ານ​ແຫຼ່ງນ້ຳ, ຊັບພະຍາກອນ​ທຳ​ມະ​ຊາດ​ຖືກ​ບົກ​ແຫ້ງ, ການ​ປ່ຽນ​ແປງ​ສະພາບ​ອາກາດ, ​ໄພ​ທຳ​ມະ​ຊາດ, ​ໂລຄາ​ພະຍາດ, ວິ​ກິດ​ການ​ດ້ານ​ມະນຸດສະທຳ ​ແລະ ການ​ອົບ​ພະຍົບ… ພວມ​ສົ່ງ​ຜົນ​ກະທົບ​ທາງ​ລົບ​ເຖິງ​ບັນດາ​ປະ​ເທດ​ກຳລັງ​ພັດທະນາ. ຊ່ອງວ່າງ​ການ​ພັດທະນາ ​ແລະ ລາຍ​ໄດ້ ​ນັບ​ມື້​ນັບ​ນັບ​ມື້​ນັບ​ເພີ່ມ​ຂຶ້ນ ​ໃນ​ຂອບ​ເຂດ​ທົ່ວ​ໂລກ ພາກ​ພື້ນ ​ແລະ ຢູ່​ໃນ​​ແຕ່ລະປະ​ເທດ. ພ້ອມ​ກັນ​ນັ້ນ, ສະພາວະ​ຄວາມ​ເຄັ່ງ​ຕຶງ​ແລະ​​ວຸ່ນວາຍ, ການ​ໃຊ້​ຄວາມ​ຮຸນ​ແຮງ, ການ​ປະ​ທະ​ກັນ, ການ​ກໍ່​ການ​ຮ້າຍ ​ໄດ້​ເກີດ​ຂຶ້ນ​ຢ່າງ​ສັບສົນ​ຢູ່​ຫຼາຍ​ແຫ່ງ​ໃນ​ໂລກ. ຈິນຕະນາການສົ່ງ​ເສີມ​ກຳລັງ​ແຮງ, ນຳ​ໃຊ້​ຫຼື​ຂົ່ມຂູ່​ວ່າ​ຈະ​ໃຊ້​ກຳລັງ​ອາວຸດ​ໃນ​ການ​ພົວພັນ​ສາກົນ ສືບ​ຕໍ່​ເປັນ​ໄພ​ຂົ່ມຂູ່ຕໍ່ຄວາມ​ເປັນ​ເອກະລາດ ອຳນາດ​ອະທິປະ​ໄຕ ​ຂອງ​ຫຼາຍ​ປະ​ເທດ ກໍ​ຄື​ຕໍ່​ສັນຕິພາບ ສະຖຽນ​ລະ​ພາບ​ໃນ​ໂລກ. ດັ່ງນັ້ນ, ບັນດາ​ປະ​ເທດ​ຕ້ອງ​ພ້ອມ​ກັນ “​ເພີ່ມ​ທະວີ​ລັດທິ​ພະຫຸ​ພາຄີ, ປະຕິບັດ​ຕາມ​ກົດໝາຍ​ສາກົນ ​ເພື່ອ​ສັນຕິພາບ ການ​ຮ່ວມ​ມື ​ແລະ ການ​ພັດທະນາ”.

ການຮ່ວມ​ມື​ພະຫຸ​ພາຄີ​ມີ​ບົດບາດ​ນັບ​ມື້​ນັບ​ສຳຄັນ​ໃນ​ການ​ພົວພັນ​ສາກົນ ຊຶ່ງ​ສະ​ແດງ​ອອກ​ໃນ​ການ​ເພີ່ມ​ຈຳນວນສະ​ຖາ​ບັນ​ພະຫຸ​ພາຄີ​ ແລະ ທ່າ​ອຽງຮ່ວມ​ມື​ ​ເຊື່ອມ​ຕໍ່​ຫຼາຍ​ຊັ້ນ​ຫຼາຍ​ຂັ້ນ ​ແຊກ​ຊ້ອນ​ກັນ​ລະຫວ່າງ​ຫຼາຍ​ຮູບ​ແບບ​ໃໝ່. ການ​ເຂົ້າ​ເຖິງ​ແບບ​ພະຫຸ​ພາຄີ​ ເພື່ອ​ພ້ອມ​ກັນຊຸກ​ຍູ້​ແກ້​ໄຂ​ບັນດາ​ບັນຫາ​ແລະ​ສິ່ງ​ທ້າ​ທາຍ​ລວມ ​ໄດ້​ກາຍ​ເປັນ​ມາດ​ຕະການ​ທີ່​ມີ​ຄວາມ​ສັກສິດ ​ແລະ ທົນ​ທານ​ດີ ຍ້ອນ​ວ່າ​ບໍ່​ມີ​ປະ​ເທດ​ໃດ​ໜຶ່ງ, ​ເຖິງ​ວ່າ​ຈະ​ໃຫຍ່​ໂຕ​ຮັ່ງມີ, ຈະ​ສາມາດ​ຮັບ​ມື​ກັບ​ສິ່ງ​ທ້າ​ທາຍ​ລະດັບ​ໂລກ​ແຕ່​ຜູ້​ດຽວ​ໄດ້, ພິ​ເສດ​ແມ່ນ​ ໃນ​ເມື່ອທີ່​ບັນດາ​ບັນຫາ​ສັນຕິພາບ, ຄວາມ​ສະຫງົບ ​ແລະ ການ​ພັດທະນາ ​ໄດ້​ຕິດ​ພັນ​ກັນ, ສັບ​ແຊກ​ກັນ ​ແລະ ພົວ​ພັນຊຶ່ງ​ກັນ​ແລະ​ກັນຢູ່​ສະ​ເໝີ. ພ້ອມ​ນັ້ນ, ບັນດາ​ສະ​ຖາ​ບັນ​ພະຫຸ​ພາຄີ​ກໍ່​ເປັນ​ສະຖານ​ທີ່ ​ເພື່ອ​ໃຫ້ບັນດາ​ປະ​ເທດ ​ໄກ່​​ເກ່ຍ​ຜົນ​ປະ​ໂຫຍ​ດ​ໃຫ້​ກົມກຽວ, ຄວບ​ຄຸມ​ຂໍ້​ຂັດ​ແຍ່ງ ຂໍ້​ພິພາດ ​ແລະ ​ເປີດ​ກວ້າງ​ເທສະ​ແຫ່ງ​ການ​ພັດທະນາ. ຍ້ອນ​ແນວ​ນັ້ນ, ຫວຽດນາມ​ຈຶ່ງ​ສະໜັບສະໜູນ​ການ​ສົ່ງ​ເສີມ​ລັດທິ​ພະຫຸ​ພາຄີ ​ແລະ ​ເພີ່​ມທະວີ​ປະສິດທິ​ຜົນ​ການ​ເຄື່ອນ​ໄຫວ​ຂອງ​ບັນດາ​ກົນ​ໄກ​ພະຫຸ​ພາຄີ, ພິ​ເສດ​ແມ່ນສະຫະ​ປະຊາ​ຊາດ. ຫວຽດນາມ​ຕີ​ລາຄາ​ສູງ​ຕໍ່​ບົດບາດ ​ແລະ ການ​ເຄື່ອນ​ໄຫວຂອງສະຫະ​ປະຊາ​ຊາດ ​ໃນ​ການ​ປະສານ​ງານ ສົມທົບ​ຄວາມ​ພະຍາຍາມ​ສາກົນ ​ເພື່ອ​ແນ​ໃສ່​ຮັບ​ມື​ກັບ​ສິ່ງ​ທ້າ​ທາຍ​ທົ່ວ​ໂລກ ​ແລະ ສ້າງສັນ​ເທສະ​ໃຫ້​ແກ່​ການ​ຮ່ວມ​ມື​ຮັບ​ໃຊ້​ການ​ພັດທະນາ. ບໍ່​ມີ​ອົງການ​ໃດ​ ນອກ​ຈາກສະຫະ​ປະຊາ​ຊາດ ທີ່​ອາດ​ຈະ​ເຮັດ​ໄດ້​ເປັນ​ຢ່າງ​ດີ ການ​ຊຸກຍູ້​ການ​ພົວພັນ​ຄູ່​ຮ່ວມ ​ແລະ ຊ່ວຍ​ເຫຼືອ​ບັນດາ​ປະ​ເທດ​ປະຕິບັດ ​ເອສດີ​ຈີ ຢ່າງ​ສຳ​ເລັດ​ຜົນ.

​ໃນ​ຂອບ​ຂອງ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 71 ຂອງສະມັດຊາ​ໃຫຍ່​ແຫ່ງ​ສະຫະ​ປະຊາ​ຊາດ, ທີ່​ການ​ປະຊຸມ​ສຸດ​ຍອດສະມັດຊາ​ໃຫຍ່​ເພື່ອ​ສະ​ເຫຼີ​ມສະຫຼອງ 30 ປີ ຖະ​ແຫຼ​ງການ​ກ່ຽວ​ກັບ​ສິດທິ​ໃນ​ການ​ພັດທະນາ, ທ່ານ​ຮອງ​ນາຍົກລັດຖະມົນຕີ ຟ້າ​ມບິ່ງ​ມິງ ​ໄດ້​ນຳ​ສະ​ເໜີ​ທັດສະນະ: ຫວຽດນາມຖື​ມະນຸດ​ເປັນ​ໃຈກາງຂອງວິວັດ​ການ​ພັດທະນາ.

​ເນັ້ນ​ຄວາມ​ສຳຄັນ​ຂອງຖະ​ແຫຼ​ງການ​ກ່ຽວ​ກັບ​ສິດທິ​ໃນ​ການ​ພັດທະນາ, ທ່ານ​ຮອງ​ນາຍົກລັດຖະມົນຕີ​ໃຫ້​ທັດສະນະ​ວ່າ, ຖະ​ແຫຼ​ງການ​ກ່ຽວ​ກັບ​ສິດທິ​ໃນ​ການ​ພັດທະນາ​ ໄດ້​ກາຍ​ເປັນ​ແຮງ​ບັນດານ​ໃຈຂອງ​ໂຄງການ​ພັດທະນາ​ສາກົນ​ທີ່​ສຳຄັນ​ຫຼາຍ​ໂຄງການ. ຫັນ​ເບິ່ງ​ຄືນ​ຫຼັງ 30 ປີ​ທີ່​ຜ່ານ​ມາ, ອາດ​ຈະ​ເຫັນ​ວ່າ, ບັນດາ​ປະ​ເທດ​ໃນ​ໂລກ​ບັນລຸ​ຜົນສຳ​ເລັດ​ຫຼາຍ​ຢ່າງ​ທາງ​ດ້ານ​ການ​ພັດທະນາ, ​ແຕ່​ກໍ່​ຕ້ອງ​ຮັບ​ຮູ້​ວ່າ, ຍັງ​ຄົງ​ມີ​ອຸປະສັກ​ຫຼາຍ​ຢ່າງ​ທີ່​ກີດຂວາງ​ການ​ພັດທະນາ ​ແລະ ການ​ຮັບປະກັນ​ສິດທິ​ໃນ​ການ​ພັດທະນາ​ຂອງ​ປະຊາຊົນ​ ຢູ່​ຫຼາຍ​ແຫ່ງ​ໃນ​ໂລກ.

ທ່ານ​ຮອງ​ນາຍົກລັດຖະມົນຕີ​ໃຫ້​ຄຳ​ສັງເກດ​ວ່າ, ຍ້ອນ​ການ​ພັດທະນາ​ແມ່ນ​ຂະ​ບວນການ​ໜຶ່ງ​ທີ່​ຮອບດ້ານ, ດັ່ງ​ນັ້ນ ​ຕ້ອງມີ​ວິທີ​ເຂົ້າ​ເຖິງ​ສິດທິ​ໃນ​ການ​ພັດທະນາຢ່າງຄົບ​ຊຸດ ​ແລະ ຈາກ​ຫຼາຍ​ແງ່​ຫຼາຍ​ດ້ານ. ​ໄດ້​ຊົມ​ໃຊ້ສິດທິ​ໃນ​ການ​ພັດທະນາຢ່າງ​ສົມບູນ ​ແມ່ນ​ຄວາມ​ປາຖະໜາ​ລວມຂອງ​ມະນຸດ. ​ເປົ້າ​ໝາຍ​ນີ້​ຈະປະກົດ​ເປັນ​ຈິງ​ໄດ້, ມີ​ການ​ປ່ຽນ​ແປງ​ຢ່າງ​ແທ້​ຈິງ​ໄດ້ ກໍ່​ຕໍ່​ເມື່ອ​ມີ​ການ​ຮ່ວມ​ມື ​ແລະ ​ການເຂົ້າ​ຮ່ວມ​ຂອງ​ທຸກ​ໜ່ວຍງານ ທຸກ​ປະ​ເທດ. ​ໂດຍ​ເປັນ​ປະ​ເທດ​ກຳລັງ​ພັດທະນາ, ຫວຽດນາມ​ຈະ​ເຮັດ​ຈົນ​ສຸດ​ຄວາມ​ສາມາດ​ຂອງ​ຕົນ ​ເພື່ອ​ຮັບປະກັນສິດທິ​ໃນ​ການ​ພັດທະນາຂອງ​ປະຊາຊົນ​ທຸກ​ຄົນ. ຫວຽດນາມຖື​ມະນຸດ​ເປັນ​ໃຈກາງຂອງວິວັດ​ການ​ພັດທະນາ, ສັບຊ້ອນສິດທິ​ໃນ​ການ​ພັດທະນາ​ເຂົ້າ​ໃນ​ນະ​ໂຍບາຍ, ພິ​ເສດ​ແມ່ນ​ບັນດາ​ນະ​ໂຍບາຍ​ທີ່​ກ່ຽວ​ພັນ​ກັບ 3 ​ເສົາ​ຄ້ຳ​ຂອງ​ການ​ພັດທະນາ​ແບບ​ຍືນ​ຍົງ, ນັ້ນ​ແມ່ນ​ນະ​ໂຍບາຍ​ສັງຄົມ, ​ເສດຖະກິດ ​ແລະ ສິ່ງ​ແວດ​ລ້ອມ. ຫວຽດນາມ​ສູ້​ຊົນ​ຢ່າງ​ບໍ່​ຢຸດ​ຢັ້ງ​ເພື່ອ​ສ້າງສັນ​ສິ່ງ​ແວດ​ລ້ອມ​ທີ່​ເອື້ອ​ອຳນວຍ​ໃຫ້​ແກ່ບັນດາ​ກຸ່ມຄົນ​ທີ່​ຖືກ​ເສຍ​ຫາຍ​ງ່າຍ ​ແລະ ຮັບປະກັນ​ໂອກາດ​ພັດທະນາ​ທີ່​ສະ​ເໝີ​ພາບ​ໃຫ້​ປະຊາຊົນ​ທຸກ​ຄົນ.

ບົນ​ຈິດ​ໃຈ​ກຽມ​ຄວາມ​ພ້ອມທີ່​ຈະ​ຮ່ວມ​ມື​ກັບ​ບັນດາປະ​ເທດ​ສະມາຊິກ​ຂອງສະຫະ​ປະຊາ​ຊາດ, ປະກອບສ່ວນ​ເພື່ອ​ໃຫ້​ລະບົບ​ການ​ພັດທະນາ​ຂອງສະຫະ​ປະຊາ​ຊາດ ສອດຄ່ອງ​ກັບ​ສະພາບ​ການ​ໃໝ່, ຫວຽດນາມ​ໃຫ້​ຄຳ​ໝັ້ນ​ສັນຍາ​ຈະ​ປະຕິບັດບັນດາ ​ເອສດີ​ຈີ ​ແລະ ລະບຽບ​ວາລະ 2030 ຢ່າງ​ເຂັ້ມ​ງວດ; ປະສານ​ສົມທົບ​ກັບສະຫະ​ປະຊາ​ຊາດ ​ໃນ​ການສ້າງ​ແຜນຍຸດ​ທະ​ສາດ​ລວມຂອງ​ຫວຽດນາມ - ສະຫະ​ປະຊາ​ຊາດ ​ໄລຍະ 2017 - 2021. ຄຽງ​ຂ້າງ​ນັ້ນ, ຫວຽດນາມ​ໃຫ້​ຄຳ​ໝັ້ນ​ສັນຍາ​ຈະ​ສົ່ງ​ເສີມ​ລັດທິ​ພະຫຸ​ພາຄີ ​ແລະ ກົດໝາຍ​ສາກົນ, ມານະ​ພະຍາຍາມ​ປະກອບສ່ວນ​ເຂົ້າ​ໃນ​ພາລະກິດ​ສັນຕິພາບ ການ​ຮ່ວມ​ມື ​ແລະ ການ​ພັດທະນາ​ໃນ​ໂລກ. ບົນ​ຈິດ​ໃຈ​ດັ່ງກ່າວ​ນັ້ນ, ຫວຽດນາມ​ຕັດສິນ​ໃຈອອກ​ສະໝັກ​ຮັບ​ເລືອກ​ຕັ້ງ​ເປັນສະມາຊິກ​ບໍ່​ຖາວອນ ​ຂອງຄະນະ​ມົນຕີ​ຄວາມໝັ້ນຄົງ ສະ​ໄໝ 2020 - 2021, ​ເພີ່ມ​ທະວີ​ການ​ເຂົ້າ​ຮ່ວມ​ໃນ​ການ​ເຄື່ອນ​ໄຫວ​ຮັກສາ​ສັນຕິພາບຂອງສະຫະ​ປະຊາ​ຊາດ./.

ສັງ​ລວ​​ມ​ໂດ​ຍ ​ເຟືອງ​ຈ່າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ