ວັນອັງຄານ, 22/10/2019
ສະພາແຫ່ງຊາດຫວຽດນາມ ແລະ ສະພາແຫ່ງຊາດລາວ ເປັນເອກະພາບເພີ່ມທະວີການຮ່ວມມືນຳກັນ
18/10/2016 21:28' ສົ່ງ ພິມ
ປະທານສະພາແຫ່ງຊາດຫວຽດນາມ ທ່ານນາງ ຫງວຽນທີ້ກິມເງິນ ເຂົ້າຢ້ຽມຄຳນັບ ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ (ພາບ: TTXVN)

ຫຼັງ​ຈາ​ພິທີ​ຕ້ອນຮັບ​ທີ່​ສົມ​ກຽດ, ສອງ​ຝ່າຍ​ໄດ້​ດຳ​ເນີນ​ການ​ພົບ​ປະ​ເຈລະຈານຳ​ກັນ. ທ່ານນາງ ປານີ ຢາ​ທໍ້​ຕູ້ ປະທານ​ສະພາ​ແຫ່ງຊາດລາວ ​ໄດ້​ສະ​ແດງ​ຄວາມ​ດີ​ໃຈ ​ແລະ​ ຊົມ​ເຊີນ​ທ່ານ​ນາງ ຫງວຽນ​ທີ້ກິມ​ເງິນ ປະທານ​ສະພາ​ແຫ່ງຊາດ​ຫວຽດນາມ ​ທີ່ໄດ້​ເລືອກ​ເອົາ​ປະ​ເທດ​ລາວ​ເປັນ​ປະ​ເທດ​ທຳ​ອິດ​ ເພື່ອ​ມາ​ຢ້ຽມຢາມ​ໃນ​ຖານະ​ຕຳ​ແໜ່​ງ​ໃໝ່​ຂອງ​ຕົນ; ອວຍ​​ພອນຊົມ​ເຊີຍ​ຫວຽດນາມ​ ທີ່​ໄດ້​ບັນລຸ​ຜົນສຳ​ເລັດ ​ໃນ​ການຈັດ​ຕັ້ງ​ການ​ເລືອກ​ຕັ້ງ ສະມາຊິກສະພາ​ແຫ່ງຊາດຊຸດ​ໃໝ່ ​​ແລະ ປະທານ​ສະພາ​ແຫ່ງຊາດຫງວຽນ​ທີ້ກິມ​ເງິນ ​ໄດ້​ຮັບ​ຄວາມ​ເຊື່ອ​ຖື​ແລະ​ຖືກເລືອກ​ເປັນ ທ່ານ​ນາງປະທານ​ສະພາ​ແຫ່ງຊາດຜູ້ທຳ​ອິດ​ ຂອງ​ຫວຽດນາມ. ປະທານ​ສະພາ​ແຫ່ງຊາດລາວຢັ້ງຢືນ, ການ​ຢ້ຽມຢາມ​ຂອງ​ຄະນະ​ຜູ້​ແທນ​ຂັ້ນ​ສູງ ສະພາ​ແຫ່ງຊາດຫວຽດນາມ ​ເປັນ​ການ​ສະໜັບສະໜູນ ລະດົມ​ກຳລັງ​ໃຈ​ທີ່​ສຳຄັນ​ຕໍ່ສະພາ​ແຫ່ງຊາດ ​ແລະ ປະຊາຊົນ​ລາວ ​ໃນ​ກິດຈະການກໍ່ສ້າງ ​ແລະ ພັດທະນາ​ປະ​ເທດ​ໃນ​ເວລາ​ຕໍ່​ໄປ. 

ທ່ານນາງປະທານ​ສະພາ​ແຫ່ງຊາດ​ ຫງວຽນ​ທີ້ກິມ​ເງິນ ສະ​ແດງ​ຄວາມ​ດີ​ໃຈ​ທີ່​ໄດ້​ມາ​ຢ້ຽມຢາມ​ສັນທະ​ວະ​ໄມຕີ​ປະ​ເທດ​ສປປ ລາວ ​ໃນ​ພາລະກິດ​ຕ່າງປະ​ເທດ​ຄັ້ງ​ທຳ​ອິດ​ຂອງ​ຕົນ ​ແລະ ສະ​ແດງ​ຄວາມ​ຂອບ​ອົກ​ຂອບ​ໃຈ​ຢ່າງ​ຈິງ​ໃຈ ຕໍ່ການ​ຕ້ອງ​ຮັບມິດຕະພາບ​ທີ່​ອົບ​ອຸ່ນ​ຂອງ​ສະພາ​ແຫ່ງຊາດລາວ. 

ທ່ານນາງປະທານ​ສະພາ​ແຫ່ງຊາດ​ ຫງວຽນ​ທີ້ກິມ​ເງິນ ​ໃຫ້​ຮູ້​ວ່າ, ​ໃນ​ການ​ຢ້ຽມຢາມ​ປະ​ເທດ​ລາວ​ຄັ້ງ​ນີ້, ຄະນະ​ຜູ້​ແທນສະພາ​ແຫ່ງຊາດຫວຽດນາມ ປາຖະໜາ​ທີ່​ຈະ​ແບ່ງປັນ​ນ້ຳ​ໃຈ​ສາມັກຄີ​ພິ​ເສດ​ຫວຽດນາມ - ລາວ ​ກັບ​ບັນດາ​ສະຫາຍ​ອ້າຍ​ນ້ອງ​ລາວ; ​ແບ່ງປັນຜົນສຳ​ເລັດ​ຂອງ​ກອງ​ປະຊຸມ​ໃຫຍ່​ຂອງ​ສອງ​ພັກ ​ແລະ ຜົນສຳ​ເລັດ​ອັນ​ດີງາມ​ຂອງ​ການ​ເລືອ​ຕັ້ງສະມາຊິກສະພາ​ແຫ່ງຊາດຂອງ​ສອງ​ປະ​ເທດ​ ໃນ​ເວລາ​ທີ່​ຜ່ານ​ມາ.

​ໃນ​ການ​ພົບ​ປະ​ເຈລະຈາ, ທ່ານ​ນາງປະທານ​ສະພາ​ແຫ່ງຊາດທັງ​ສອງ ​ໄດ້​ພ້ອມ​ກັນ​ຕີ​ລາຄາ​ຜົນ​ຂອງ​ວຽກ​ງານຕິດຕາມ​ກວດກາ ​ການ​ປະຕິບັດ​ບັນດາ​ຂໍ້​ຕົກລົງ​ຮ່ວມ​ມື ລະຫວ່າງ​ສອງ​ປະ​ເທດ ​ໃນ​ເວລາ​ທີ່​ຜ່ານ​ມາ ​ແລະ ​ເປັນ​ເອກະສັນ​ກ່ຽວ​ກັບທິດ​ທາງ ມາດ​ຕະການ ​ເພື່ອ​ສືບ​ຕໍ່​ປັບປຸງ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ ​ແລະ ການ​ຮ່ວມ​ມືຮອບດ້ານ ລະຫວ່າງ​ອົງການ​ນິຕິບັນຍັດຂອງ​ສອງ​ປະ​ເທດ ​ເພື່ອ​ແນ​ໃສ່​ປະກອບສ່ວນຕົວ​ຈິງ​ເຂົ້າ​ໃນ​ການ​ປັບປຸງ ​ແລະ ຊຸກຍູ້​ການ​ຮ່ວມ​ມື​ລະຫວ່າງ​ສອງ​ປະ​ເທດ. 

ທັງ​ສອງ​ຝ່າຍ​ເຫັນ​ວ່າ, ​ໃນ​ສະພາບ​ການ​ໂລກ​ແລະພາກ​ພື້ນ​ກຳລັງ​ມີ​ການ​ຜັນ​ປ່ຽນ​ຢ່າງ​ໄວວາ, ຫວຽດນາມ ​ແລະ ລາວ ກຳລັງ​ເຊື່ອມ​ໂຍງ​ສາກົນ ​ແລະ ປ່ຽນ​ແປງ​ໃໝ່, ພວມ​ມີ​ໂອກາດ​ທີ່​ຍິ່ງ​ໃຫຍ່​ເພື່ອ​ສ້າງສາ ​ແລະ ພັດທະນາ​ປະ​ເທດ. ຄຽງ​ຂ້າງ​ກັບ​ໂອກາດ​ນັ້ນ ກໍ່​ຍັງມີ​ສິ່ງ​ທ້າ​ທາຍ​ບໍ່​ໜ້ອຍ​ ​ແລະ ມີ​ການ​ກະທົບ​ທາງ​ລົບຂອງ​ເສດຖະກິດ​ຕະຫຼາດ. ໃນສະພາບການດັ່ງກ່າວ, ສອງ​ຝ່າຍ​ຄວນ​ເພີ່ມ​ທະວີ ​ປະສານ​ສົມທົບ​ກັນ ​ໃນ​ການ​ຄົ້ນຄວ້າ​ທິດ​ສະ​ດີ ​ແລະ ພຶດຕິ​ກຳ ​ເພື່ອ​ວາງ​ກຳນົດ​ວິທີ​ແກ້​ໄຂ​ທີ່​ຖືກຕ້ອງ ​ແນ​ໃສ່ສ້າງສາ​ພັດທະນາ​ເສດຖະກິດ-ສັງ​ຄົມ, ປົກ​ປັກ​ຄ່າ​ນິຍົມ ​ແລະ ​ເອກະລັກ​ວັດທະນະທຳ​ຂອງ​ຊາດ. 

ທ່ານນາງປະທານ​ສະພາ​ແຫ່ງຊາດ​ ຫງວຽນ​ທີ້ກິມ​ເງິນ ຢືນຢັນຫວຽດນາມ​ໃຫ້​ຄວາມ​ສຳຄັນ​ຢ່າງ​ຕໍ່​ເນື່ອງ ​ແລະ ບຸລິມະສິດ​ສູງ​ສຸດ​ໃຫ້​ແກ່​ການ​ປັບປຸງ ​ແລະ ​ເພີ່ມ​ທະວີ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ, ຄວາມ​ສາມັກຄີພິ​ເສດ ​ແລະ ການ​ຮ່ວມ​ມື​ຮອບດ້ານຫວຽດນາມ - ລາວ. ສາຍພົວພັນຫວຽດນາມ - ລາວ ​ແມ່ນ​ສາຍ​ພົວພັນ​ພາວະ​ວິ​ໄສ, ​​​ແມ່ນ​ປັດ​ໄຈສຳຄັນ​ຍິ່ງ ​ສຳລັບ​ພາລະກິດປະຕິວັດ ຂອງ​ສອງ​ຊາດ, ​​ແມ່ນ​ຊັບ​ສົມບັດທີ່​ລ້ຳ​ຄ່າ​ ຊຶ່ງ​ສອງ​ພັກ, ສອງ​ລັດ ​ແລະ ປະຊາຊົນ​ສອງ​ປະ​ເທດ ຄວນ​ຮັກສາ, ​ເສີມ​ຂະຫຍາຍ ​ແລະ ຖ່າຍ​ທອດ​ໃຫ້​ຄົນ​ຮຸ່ນ​ໃໝ່. 

ທ່ານນາງປະທານສະພາ​ແຫ່ງຊາດຫວຽດນາມ ສະ​ແດງ​ຄວາມ​ດີ​ໃຈ​ທີ່​ເຫັນ​ວ່າ, ການ​ຮ່ວມ​ມື​ດ້ານ​ເສດຖະກິດ ການ​ຄ້າ ການ​ລົງທຶນ ການ​ຊ່ວຍ​ເຫຼືອໂອ​ດີ​ເອ ລະຫວ່າງ​ສອງ​ປະ​ເທດ ​ໄດ້​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ ​ແຕ່​ສູນ​ກາງ​ຈົນ​ເຖິງ​ທ້ອງ​ຖິ່ນ​ຕ່າງໆ. ປະຈຸ​ບັນ ຫວຽດນາມ​ເປັນ​ນັກ​ລົງທຶນ​ອັນ​ດັບ 3 ຢູ່ລາວ ດ້ວຍ​ຈຳນວນ​ທຶນ​ຈົດ​ທະບຽນຫຼາຍ​ກວ່າ 5 ຕື້​ໂດ​ລາ​ສະຫະລັດ. ຄຽງຂ້ານນັ້ນ, ການຮ່ວມມືລະຫວ່າງສອງປະເທດໃນຂົງເຂດ ການສຶກສາ ຄົມມະນາຄົມຂົນສົ່ງ ການເງິນ-ທະນາຄານ ສາທາລະນະສຸກ ວັດທະນະທຳ ທ່ອງທ່ຽວ ການພົວພັນສັງສັນປະຊາຊົນ ນັບມື້ນັບມີປະສິດທິຜົນ ແລະ ໄດ້ເປີດກວ້າງ. ສອງຝ່າຍໄດ້ຮັບຜົນສຳເລັດໃນການກໍ່ສ້າງ ເສັ້ນຊາຍແດນແຫ່ງສັນຕິພາບ ມິດຕະພາບ.

ທ່ານນາງປະທານ​ສະພາ​ແຫ່ງຊາດລາວ ປານາ ຢາ​ທໍ້​ຕູ້ ​ໃຫ້​ຮູ້​ວ່າ, ປີ 2016 ​ແມ່ນ​ປີ​ທີ່​ລາວ​ມີ​ຫຼາຍ​ເຫດການ​ທີ່​ສຳຄັນ. ທີ່​ຜ່ານ​ມາ​ມໍ່​ນີ້ ລາວ​ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດ​ອາ​ຊຽນດ້ວຍ​ຜົນສຳ​ເລັດອັນ​ຈົບງາມ ​ແລະ ສະພາ​ແຫ່ງຊາດລາວກໍ່​ໄດ້​ຮັບ​ຜົນສຳ​ເລັດ​ ໃນ​ການຈັດ​​ການ​ເລືອກ​ຕັ້ງສະມາຊິກສະພາ​ແຫ່ງຊາດ ​ແລະ ການ​ເລືອກຕັ້ງສະມາຊິກສະພາ​ປະຊາຊົນຂັ້ນ​ແຂວງ, ນະຄອນຫຼວງ. 

ດ້ວຍ​ຄວາມ​ປະສົງ​ຢາກ​ເສີມ​ຂະຫຍາຍ​ບົດບາດຜູ້ຕາງໜ້າ​ຂອງ​ອົງການ​ຜູ້​ແທນ​ປະຊາຊົນ, ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ ຈະ​ສືບ​ຕໍ່​ເພີ່ມ​ທະວີ​ການ​ຮ່ວມ​ມື​ ໃນ​ການ​ກໍ່ສ້າງ​ແຫຼ່ງບຸກຄະລາ​ກອນ, ​ແບ່ງປັນ​ບົດຮຽນ​ປະສົບ​ການ, ​ເປັນ​ຕົ້ນ​ແມ່ນ​ໃນ​ການ​ກໍ່ສ້າງລະບົບ​ກົດໝາຍ, ບົດຮຽນ​ປະສົບ​ການ ​ແລະ ຕິດຕາມ​ການ​ຜັນ​ຂະຫຍາຍ​ປະຕິບັດ​ກົດໝາຍ. ກ່ອນ​ອື່ນ, ສອງຝ່າຍ​ສຸມ​ໃສ່​ສົມທົບກັນ​ຈັດ​ຕັ້ງ ພິທີ​ເປີດບູ​ຮານ​ສະຖານ​ປະຫວັດສາດ​ປະຕິວັດ ຫວຽດນາມ - ລາວ ຢູ່​ແຂ​ວງ​ເຊີນ​ລາ ​ເນື່ອງ​ໃນ​ໂອ​ກາດ​ສະ​ເຫຼີມສະຫຼອງ ວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ ຫວຽດນາມ - ລາວ ຄົບຮອບ 55 ປີ ​ແລະ ວັນ​ເຊັນສົນທິສັນຍາ​ມິດຕະພາຍ ​ແລະ​ການ​ຮ່ວມ​ມືຫວຽດນາມ - ລາວ ຄົບຮອບ 40 ປີ; ຖື​ວ່າ​ນີ້​ເປັນ​ເຫດການ​ການ​ເມືອງ​ທີ່​ສຳຄັນ​ຂອງ​ສອງ​ປະ​ເທດ; ສົມທົບ​ກັນ​ເ​ພີ່​ມທະວີ​ການ​ກວດກາ ​ແລະ ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ບັນດາ​ໂຄງການ​ຮ່ວມ​ມື​ລົງທຶນລະຫວ່າງ​ສອງ​ປະ​ເທດ. 

ທ່ານນາງປະທານ​ສະພາ​ແຫ່ງຊາດ​ ຫງວຽນ​ທີ້ກິມ​ເງິນ ຂໍ​ເປັນ​ກຽດ​ສົ່ງ​ຄຳ​ສະ​ເໜີ​ອັນ​ລະ​ອຽດ​ຕ່າງໆ​ຂອງ​ບັນດາ​ກະຊວງ ຂະ​ແໜງ​ການຫວຽດນາມ ມາ​ຍັງປະທານ​ສະພາ​ແຫ່ງຊາດລາວ ​ແລະ ສະ​ເໜີ​ນຳສະພາ​ແຫ່ງຊາດ ​ແລະ ລັດຖະບານ​ລາວ ຈົ່ງ​ໃຫ້​ຄວາມ​ເອົາ​ໃຈ​ໃສ່​ພິຈາລະ​ນາ ​ເພື່ອ​ໃຫ້​ສອງ​ຝ່າຍ​ສືບ​ຕໍ່​ຊຸກຍູ້​ການ​ພົວພັນ​ຮ່ວມ​ມື​ຮອບ​ດ້ານ ລະຫວ່າງ​ສອງ​ປະ​ເທດ ​ເຂົ້າ​ສູ່​ລວງ​ເລິກ​ແລະ​ມີ​ປະສິດທິ​ຜົນ. 

​ໃນ​ບັນຍາກາດ​ແຫ່ງ​ໄມຕີ​ຈິດ​ມິດຕະພາບ, ສອງ​ຝ່າຍ​ເປັນ​ເອກະສັນ​ຈະສືບ​ຕໍ່​ສົມທົບຢ່າງ​ແໜ້ນ​ແຟ້ນນຳ​ກັນ ​ໃນ​ບັນດາ​ເວທີ​ປາ​ໄສ​ຂອງ​ສະພາ​ແຫ່ງ​ຊາດ​ລະຫວ່າງ​ປະ​ເທດ. ​ສະພາ​ແຫ່ງຊາດລາວສະໜັບສະໜູນ​ເນື້ອ​ໃນ​ຂອງ​ຖະ​ແຫຼ​ງການ​ຮ່ວມ ​ຂອງ​ກອງ​ປະຊຸມ​ລັດຖະມົນຕີ​ການ​ຕ່າງປະ​ເທດ ອາ​ຊຽນ ຄັ້ງ​ທີ 49 ກ່ຽວ​ກັບ​ທະ​ເລ​ຕາ​ເວັນ​ອອກ. 

​ໃນ​ການ​ຄຸ້ມ​ຄອງ ນຳ​ໃຊ້​ແຫຼ່ງນ້ຳຂອງ​ແມ່​ນ້ຳຂອງ​ ແບບ​ຍືນ​ຍົງ​ແລະ​ມີ​ປະສິດທິ​ຜົນ, ຝ່າຍ​ລາວ​ໃຫ້​ຄຳ​ໝັ້ນ​ສັນຍາ​ຈະ​ຜັນ​ຂະ​ຫຍາຍປະຕິບັດ​ຢ່າງ​ຖືກຕ້ອງ ຕາມ​ຂໍ້​ຕົກລົງ​ລະຫວ່າງ​ການ​ນຳ​ຂອງ​ສອງ​ປະ​ເທດ. 

ສອງຝ່າຍ​ສະໜັບສະໜູນ​​ໃຫ້ ລັດຖະບານ​​ຂອງສອງ​ປະ​ເທດ ດຳ​ເນີນ​ການ​ເຈລະຈາ​ໂດຍ​ໄວ ​ເພື່ອ​ກ້າວ​ເຖິງ​ການ​ເຊັນ​ສັນຍາ​ວ່າ​ດ້ວຍ​ການສົ່ງ​ຜູ້​ຮ້າຍ​ຂ້າມ​ແດນ ​ແລະ ສັນຍາ​ວ່າ​ດ້ວຍ​ການຍົກຍ້າຍ​ຜູ້​ທີ່​ຖຶກຕັດສິນ​ຈຳ​ຄຸກ ລະຫວ່າງປະ​ເທດ ສສ ຫວຽດນາມ ​ແລະ ປະ​ເທດ ສປປ ລາ​ວ.

​ໃນ​ເວລາ​ຢູ່​ຢ້ຽມຢາມ​ປະ​ເທດລາວ, ທ່ານນາງປະທານ​ສະພາ​ແຫ່ງຊາດຫວຽດນາມ​ ຫງວຽນ​ທີ້ກິມ​ເງິນ ​ໄດ້​ເຂົ້າ​ຢ້ຽມ​ຄຳນັບ​ທ່ານ ບຸນ​ຍັງ ວໍລະ​ຈິດ ​ເລຂາທິການ​ໃຫຍ່ ປະທານ​ປະ​ເທດ ​ແຫ່ງ ສປປ ລາວ; ພົບ​ປະ​ຫາລື​ກັບ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ; ພົບ​ປະ​ກັບ​ທ່ານ ​ໄຊ​ສົມ​ພອນ ພົມວິຫານ ປະທານ​ຄະນະ​ກຳມະການ​ສູນ​ກາງ​ແນວ​ລາວ​ສ້າງ​ຊາດ.

ຈຸດ​ເນັ້ນ​ໃນ​ການຢ້ຽ​ມຢາມສັນທະ​ວະ​ໄມຕີ​ເປັນ​ທາງ​ການ​ປະ​ເທດ​ລາວ​ຄັ້ງ​ນີ້​ແມ່ນ ທ່ານ​ນາງປະທານ​ສະພາ​ແຫ່ງຊາດຫວຽດນາມ ​ແລະ ທ່ານ​ນາງປະທານ​ສະພາ​ແຫ່ງຊາດລາວ ​ໄດ້​ຮ່ວມ​ເປັນ​ປະທານ​ກອງ​ປະຊຸມ​ສຳ​ມະ​ນາ​ໃນ​ຫົວ​ຂໍ້ “ປະສົບ​ການ​ດ້ານ​ການ​ຄຸ້ມ​ຄອງ​ໜີ້​ສາທາລະນະ”. ການ​ສຳ​ມະ​ນາ​ນີ້​ໄດ້​ສະ​ແດງ​ໃຫ້​ເຫັນ​ເຖິງ​ບົດບາດ ຄວາມ​ຮັບຜິດຊອບ​ ຂອງສະພາ​ແຫ່ງຊາດຂອງ​ສອງ​ປະ​ເທດ ຕໍ່​ບັນດາ​ບັນຫາ​ທີ່​ສຳຄັນ​ຂອງ​ປະ​ເທດ ​ໃນ​ການ​ຄຸ້ມ​ຄອງ​ເສດຖະກິດ, ພ້ອມ​ນັ້ນ​ ກໍ່​ສະ​ແດງ​ໃຫ້​ເຫັນ​​ເຖິງ​ການພົວພັນ​ຮ່ວມ​ມື ທີ່​ນັບ​ມື້​ນັບ​ແໜ້ນ​ແຟ້ນ ມີ​ປະສິດທິ​ຜົນ​ລະຫວ່າງສະພາ​ແຫ່ງຊາດ ​ແລະ ລັດຖະບານ​ຂອງ​ສອງ​ປະ​ເທດຫວຽດນາມ ​ແລະ ລາວ.

ທ່ານນາງປະທານ​ສະພາ​ແຫ່ງຊາດ​ ຫງວຽນ​ທີ້ກິມ​ເງິນ ກໍ່​ໄດ້​ພົບ​ປະ​ໂອ້​ລົມ​ກັບ​ພະນັກງານ​ສະຖານທູດ​ຫວຽດນາມ, ພີ່ນ້ອງ​ຮ່ວມ​ຊາດ​ຊາວ​ຫວຽດນາມ ​ແລະ ຜູ້ຕາງໜ້າ​ວິ​ສາ​ຫະກິດຫວຽດນາມ ຢູ່ລາວ. ປະທານ​ສະພາ​ແຫ່ງຊາດ ສະ​ເໜີ​ໃຫ້​ພະນັກງານ​ການ​ທູດ ມີ​ສ່ວນ​ຮ່ວມ​ປະກອບ​ເຂົ້າ​ໃນ​ການ​ກໍ່ສ້າງສຳນັກງານ​ການ​ທູດ​ຫວຽດນາມ ​ຢູ່​ຕ່າງປະ​ເທດ ​​ໃຫ້ເປັນ​ອົງການ​ສົມບູນ​ແບບ ທັນ​ສະ​ໄໝ; ກໍ່ສ້າງຮູບ​ພາບ​ຂອງ​ພະນັກງານ​ການ​ທູດທີ່​ມີ​ຄວາມ​ສາມາດກ້າ​ແກ່ນ ມີ​ສະຕິ​ປັນຍາ, ປັບປຸງ​ແລະ​ປົວ​ແປງ​ພື້ນຖານ​ວັດຖຸ​ສຳນັກງານ​ເມື່ອ​ລະ​ກ້າວ ​ໃຫ້​ສົມ​ກັບ​ຖານະ​ທີ່​ຕັ້ງ​ຂອງ​ປະ​ເທດ, ຕອບ​ສະໜອງ​ໄດ້​ກັບ​ຄວາມ​ຮຽກຮ້ອງ​ຕ້ອງການ​ນັບ​ມື້​ນັບ​ສູງ ​ຂອງ​ປະ​ເທດ​ໃນ​ສະ​ໄໝ​ແຫ່ງ​ການ​ເຊື່ອມ​ໂຍງ​ສາກົນ​ຢ່າງຮອບດ້ານ.../.

ສັງ​ລວມ​ໂດຍ ບນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ