ວັນເສົາ, 14/12/2019
ຫວຽດນາມເອົາໃຈໃສ່ເປັນພິເສດ ເຖີງການປັບປຸງ ຄວາມພົວພັນກັບກຳປູເຈຍ
19/10/2016 16:54' ສົ່ງ ພິມ
ປະທານລັດຖະສະພາແຫ່ງລາຊະອານາຈັກກຳປູເຈຍ ສົມເດັດ ເຮັງ ສຳຣີນ ແລະ ປະທານສະພາແຫ່ງຊາດ ຫວຽດນາມ ຫງວຽນທີ້ກິມເງິນ ໃນພິທີຕ້ອນຮັບເປັນທາງການ (ພາບ: TTXVN)

ພາຍຫຼັງ​ພິທີ​ຕ້ອນຮັບ​ຢ່າງ​ເປັນ​ທາງ​ການ, ປະທານ​ລັດຖະສະພາ​ແຫ່ງ ລາຊະ​ອານາຈັກ​ກຳປູ​ເຈຍ ສົມ​ເດັດ ​ເຮັງ ສຳຣີນ ​ແລະ ທ່ານນາງປະທານ​ສະພາ​ແຫ່ງຊາດຫວຽດນາມ​ ຫງວຽນ​ທີ້ກິມ​ເງິນ ​ໄດ້​ດຳ​ເນີນ​ການ​ພົບ​ປະ​ເຈລະຈາ​ກັນ. ປະທານ​ລັດຖະສະພາ​ແຫ່ງ ລາຊະ​ອານາຈັກ​ກຳປູ​ເຈຍ ສົມ​ເດັດ ​ເຮັງ ສຳຣີນ ​ໄດ້​ສະ​ແດງ​ຄວາມ​ຊົມ​ເຊີຍ​ຢ່າງ​ສຸດ​ໃຈ​ ຕໍ່​ການ​ຢ້ຽມຢາມ​ສັນທະ​ວະ​ໄມຕີ​ ລາຊະ​ອານາຈັກ​ກຳປູ​ເຈຍ​ ຢ່າງ​ເປັນ​ທາງ​ການ ​ຂອງ ທ່ານນາງປະທານ​ສະພາ​ແຫ່ງຊາດຫວຽດນາມ​ ຫງວຽນ​ທີ້ກິມ​ເງິນ ​ແລະ ຄະນະ​ຜູ້​ແທນ​ຂັ້ນ​ສູງ​ ສະພາ​ແຫ່ງ​ຊາດ​ຫວຽດນາມ; ຢັ້ງຢືນ​ຄວາມ​ໝາຍ​ສຳຄັນ​ຂອງ​ການ​ຢ້ຽມຢາມ ຊຶ່ງ​ສະ​ແດງ​ໃຫ້​ເຫັນ​ເຖິງ​ການ​ປັບ​ປຸງ​ ຄວາມ​ສາມັກຄີ​ມິດຕະພາບ ​ລະຫວ່າງ​ສອງ​ປະ​ເທດ, ສອງ​ສະພາ​ແຫ່ງ​ຊາດ ​ແລະ ປະຊາຊົນ​ສອງ​ປະ​ເທດ. 

ປະທານ​ລັດຖະສະພາ​ແຫ່ງ ລາຊະ​ອານາຈັກ​ກຳປູ​ເຈຍ ສົມ​ເດັດ ​ເຮັງ ສຳຣີນ ​ໄດ້​ອວຍພອນ​ຊົມ​ເຊີຍທ່ານ​ນາງຫງວຽນ​ທີ້ກິມ​ເງິນ ທີ່​ໄດ້​ຮັບ​ການ​ເລືອກ​ຕັ້ງ​ໃຫ້​ດຳລົງ​ຕຳ​ແໜ່​ງ ປະທານ​ສະພາ​ແຫ່ງ​ຊາດ​ຫວຽດນາມ, ​ແລະ​ເນັ້ນ​ວ່າ ​ໃນ​ຕະຫຼອດ 4 ​ວາລະ​ຂອງ​ສະພາ​ແຫ່ງ​ຊາດ​ທີ່​ຜ່ານ​ມາ, ຄວາມ​ພົວພັນ​ມິດຕະພາບ​ ແລະ​ການ​ຮ່ວມ​ມື​ສອງ​ຝ່າຍ​ ໄດ້​ຮັບ​ການ​ປັບປຸງ​ ແລະ​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ, ໝັ້ນ​ໃຈ​ວ່າ ຄວາມ​ພົວພັນອັນ​ຈົບງາມ​ນີ້​ຈະ​ສືບ​ຕໍ່​ຂະຫຍາຍຕົວ​ຍິ່ງ​ກວ່າ​ອີກ​ໃນ​ຕໍ່ໜ້າ. 

ທ່ານນາງປະທານ​ສະພາ​ແຫ່ງຊາດຫວຽດນາມ​ ຫງວຽນ​ທີ້ກິມ​ເງິນ ສະ​ແດງ​ຄວາມ​ດີ​ໃຈ​ທີ່​ໄດ້​ມາ​ຢ້ຽມຢາ​ມ ລາຊະ​ອານາຈັກ​ກຳປູ​ເຈຍ​ ຢ່າງ​ເປັນ​ທາງ​ການ, ​ແລະ​ໃຫ້​ຮູ້​ວ່າ ນີ້​ເປັນ​ການ​ໄປ​ປະຕິບັດ​ງານ​ຢູ່​ຕ່າງປະ​ເທດ​ຄັ້ງ​ທຳ​ອິດ ​ໃນ​ຕຳ​ແໜ່​ງປະທານ​ສະພາ​ແຫ່ງຊາດ​ຫວຽດນາມ ຊຶ່ງ​ມີ​ຄວາມ​ປະສົງ​ທີ່​ຈະ​ແບ່ງປັນ​ ຄວາ​ມສາມັກຄີ​ມິດຕະພາບ​ທີ່​ເປັນ​ມູນ​ເຊື້ອ ​ແລະ ການ​ຮ່ວມ​ມື​ຮອບດ້ານ​ຫວຽດນາມ - ກຳປູ​ເຈຍ. 

ປະທານ​ສະພາ​ແຫ່ງຊາດຫວຽດນາມ ​ແລະ ປະທານ​ລັດຖະສະພາ​​ກຳປູ​ເຈຍ ​ໄດ້​ແຈ້ງ​ໃຫ້​ກັນຊາ​ບ​ໂດຍ​ທົ່ວ​ໄປ ​ກ່ຽວ​ກັບ​ສະພາບ​ການ​ເສດຖະກີດ - ສັງຄົມ ​ແລະ ການ​ເຄື່ອນ​ໄຫວ​ຂອງ​ສະພາ​ແຫ່ງ​ຊາດ ​ຂອງ​ແຕ່ລະ​ປະ​ເທດ. ສອງ​ຝ່າຍ​ໃຫ້​ທັດສະນະ​ວ່າ, ​ໃນ​ສະພາບ​ການ​ໂລກ​ແລະ​ພາກ​ພື້ນ​ມີ​ການ​ຜັນ​ປ່ຽນ​ທີ່​ສັບສົນ​ຫຼາຍ​ຢ່າງນັ້ນ ຄວາມ​ພົວພັນ​ສາມັກຄີ​ລະຫວ່າງ​ສອງ​ປະ​ເທດ ​ຕ້ອງ​ໄດ້​ຮັບ​ການ​ປັບປຸງ ​ແລະ ພັດທະນາ. ຝ່າຍ​ຫວຽດນາມ​ຢືນຢັນ​ໃຫ້​ຄວາມ​ສຳຄັນ​ຢ່າງ​ຕໍ່​ເນື່ອງ ​ແລະ​ໃຫ້​ບຸລິມະສິດສູງ​ສຸດ​ແກ່​ການ​ປັບປຸງ ​ແລະ​ເພີ່ມ​ທະວີຄວາມ​ສຳພັນ​ເພື່ອນ​ບ້ານ​ທີ່​ດີ, ມິດຕະພາບ​ທີ່​ເປັນ​ມູນ​ເຊື້ອ, ການ​ຮ່ວມ​ມື​ຮອບດ້ານ ໝັ້ນຄົງ ຍາວ​ນານ​ກັບ​ກຳປູ​ເຈຍ.

ປະທານ​ສະພາ​ແຫ່ງ​ຊາດ​ທັງ​ສອງ​ ສະ​ແດງ​ຄວາມຮູ້ສຶກ​ດີ​ໃຈ​ທີ່​ເຫັນ​ວ່າ ການ​ຮ່ວມ​ມື​ດ້ານ​ເສດຖະກິດ ການ​ຄ້າ ການ​ລົງທຶນ ​ລະຫວ່າງ​ສອງ​ປະ​ເທດ ສືບ​ຕໍ່​ຂະຫຍາຍຕົວ​ຢ່າງຮອບດ້ານ ​ແຕ່​ສູງ​ກາງ​ຮອດ​ທ້ອງ​ຖິ່ນ​ຕ່າງໆ​ຂອງ​ສອງ​ປະ​ເທດ. ມາ​ຮອດ​ປະຈຸ​ບັນ, ບັນດາ​ວິ​ສາ​ຫະກິດຂອງ​ຫວຽດນາມ​ໄດ້ມີ 182 ​ໂຄງການ​ລົງທຶນຢູ່ກຳ​ປູ​ເຈຍ ດ້ວຍ​ຈຳນວນ​ທຶນ​ຈົດ​ທະບຽນ​ປະມານ 2,85 ຕື້​ໂດ​ລາ​ສະຫະລັດ. ບັນດາ​ໂຄງການ​ລົງທຶນ​ໄດ້​ຜັນ​ຂະຫຍາຍ​ຢ່າງ​ຄົບ​ຊຸດ​ໃນ​ບັນດາ​ຂົງ​ເຂດ​ທີ່ສຳຄັນ, ຫຼາຍ​ໂຄງການ​ຂະໜາດ​ໃຫຍ່​ມີ​ຜົນ​ກະທົບ​ຊຸກຍູ້​ການ​ພັດທະນາ​ເສດຖະກິດ - ສັງຄົມ​ຂອງ​ກຳປູ​ເຈຍ ເຊັ່ນ: ກະສິກຳ ການ​ປ່າ​ໄມ້ ພະລັງງານ ການ​ເງິນ ທະນາຄານ ການ​ປະກັນ​ໄພ ​ໂທລະ​ຄົມມະນາຄົມ…

ປະທານ​ລັດຖະສະພາ​ແຫ່ງ ລາຊະ​ອານາຈັກ​ກຳປູ​ເຈຍ ຊົມ​ເຊີຍ​ບັນດາ​ຂໍ້​ຕົກລົງ​ທີ່​ລັດຖະບານ​ຂອງ​ສອງ​ປະ​ເທດ​ໄດ້​ເຊັນ​ກັນ ​ແລະ​ເນັ້ນ​ວ່າ ​ລັດຖະສະພາ​ແຫ່ງ ລາຊະ​ອານາຈັກ​ກຳປູ​ເຈຍ ຈະ​ຕິດຕາມ​ກວດກາ​ເພື່ອ​ໃຫ້​ຂໍ້​ຕົກລົງ​ເຫຼົ່າ​ນີ້​ໄດ້​ຮັບ​ການ​ປະຕິບັດ​ເປັນ​ຢ່າງ​ດີ, ​ເປັນ​ຕົ້ນ​ແມ່ນ​ໃນ​ຂົງ​ເຂດ​ຄົມມະນາຄົມ, ​ເຊື່ອມ​ຈອດ​ໂຄງ​ສ້າງພື້ນຖານ ລະຫວ່າງ​ສອງ​ປະ​ເທດ. 

ທ່ານນາງປະທານ​ສະພາ​ແຫ່ງຊາດ​ຫວຽດນາມ ຫງວຽນ​ທີ້ກິມ​ເງິນ ສະ​ແດງ​ຄວາມ​ຂອບ​ໃຈ​ຕໍ່​ລັດຖະສະພາ, ລັດຖະບານ​ກຳປູ​ເຈຍ ​ທີ່​ໄດ້​ໃຫ້​ຄວາມ​ເອົາ​ໃຈ​ໃສ່ ອຳນວຍ​ຄວາມ​ສະດວກ​ໃຫ້​ຊຸມ​ຊົນ​ຊາວ​ຫວຽດນາມ​ໄດ້​ດຳລົງ​ຊີວິດ, ທຳ​ມາ​ຫາ​ກິນ ປະກອບສ່ວນ​ເຂົ້າ​ໃນ​ການກໍ່ສ້າງ ພັດທະນາລາຊະ​ອານາຈັກ​ກຳປູ​ເຈຍ

ພ້ອມ​ກັບ​ຄວາມ​ພົວພັນ​ດ້ານ​ການ​ເມືອງ​ທີ່​ດີງາມ, ການ​ຮ່ວມ​ມື​ລະຫວ່າງ​ສະພາ​ແຫ່ງ​ຊາດ​ຫວຽດນາມ ​ກັບລັດຖະສະພາ ​ແລະ​ສະພາ​ສູງ​ກຳປູ​ເຈຍ ກໍ່​ນັບ​ມື້​ນັບ​ຂະຫຍາຍຕົວ. ​ເພື່ອ​ເສີມ​ຂະຫຍາຍຜົນ​ຂອງ​ການ​ຮ່ວມ​ມື​ໃນ​ເວລາ​ທີ່​ຜ່ານ​ມາ, ​ແນ​ໃສ່​ພັດທະນາ​ການ​ພົວພັນ​ລະຫວ່າງ​ສອງ​ປະ​ເທດ, ສອງ​ສະພາ​ແຫ່ງ​ຊາດ​ ໃຫ້​ເຂົ້າ​ສູ່​ລວງ​ເລິກ ມີ​ປະສິດທິ​ຜົນ​ຕົວ​ຈິງ, ທ່ານນາງປະທານ​ສະພາ​ແຫ່ງຊາດຫວຽດນາມ ຫງວຽນ​ທີ້ກິມ​ເງິນ ສະ​ເໜີ​ນຳ​ລັດຖະສະພາ​ກຳປູ​ເຈຍ ກໍຄື​ບັນດາ​ສະມາຊິກ​ລັດຖະສະພາ​ກຳປູ​ເຈຍ ຈົ່ງ​ສືບ​ຕໍ່​ເອົາ​ໃຈ​ໃສ່​ເພີ່ມ​ພູນ​ຄູນ​ສ້າງສາ​ຍພົວພັນ​ສາມັກຄີ​ມິດຕະພາບ ​ແລະ ການ​ຮ່ວມ​ມື​ຮອບດ້ານ ລະຫວ່າງ​ສອງ​ປະ​ເທດ​ກຳປູ​ເຈຍ ​ແລະ ຫວຽດນາມ

ປະທານ​ລັດຖະສະພາ​ແຫ່ງ ລາຊະ​ອານາຈັກ​ກຳປູ​ເຈຍ ສະ​ເໜີ​ໃຫ້​ສອງ​ຝ່າຍ​ສືບ​ຕໍ່​ຮ່ວມ​ມື, ​ແບ່ງປັນ​ບົດຮຽນ​ປະສົບ​ການ ​ລະຫວ່າງ​ບັນດາ​ຄະນະ​ຜູ້​ແທນ, ສະມາຊິກ​ສະພາ​ແຫ່ງ​ຊາດຕາມ​ແບບ​ທະວິ​ພາຄີ ​ແລະ ພະຫຸ​ພາຄີ. ​ເນື່ອງ​ໃນ​ໂອ​ການ​ນີ້ ປະທານ​ລັດຖະສະພາ​ແຫ່ງ ລາຊະ​ອານາຈັກ​ກຳປູ​ເຈຍ ສະ​ແດງ​ຄວາມ​ຂອບ​ໃຈ​ຕໍ່​ສະພາ​ແຫ່ງຊາດ​ຫວຽດນາມ ທີ່​ໄດ້​ໃຫ້​ຄວາມ​ຮ່ວມ​ມື ຊ່ວຍ​ເຫຼືອ​ໃນ​ການ​ກໍ່ສ້າງ​ແຫຼ່ງບຸ​ກຄະລາ​ກອນ, ປະກອບ​ອຸປະກອນ​ ແລະ ເຄື່ອງ​ມື​ອື່ນໆ​ ເພື່ອ​ແນ​ໃສ່​ຍົກ​ສູງ​ປະສິດທິ​ຜົນການ​ເຄື່ອນ​ໄຫວ​​ໃຫ້​ລັດຖະສະພາ​ກຳປູ​ເຈຍ.

ປະທານ​ສະພາ​ແຫ່ງ​ຊາດ​ທັງ​ສອງ​ເຫັນ​ດີ​ເປັນ​ເອກະ​ພາບ​ ຈະ​ສືບ​ຕໍ່​ຍູ້​ແຮງ​ບົດບາດຕິດຕາມ​ກວດກາ​ຂອງ​ສະພາ​ແຫ່ງ​ຊາດ ​ຕໍ່​ການ​ປະຕິບັດ​ຂໍ້ຕົກລົງ​ຕ່າງໆທີ່​ລັດຖະບານ​ຂອງ​ສອງ​ປະ​ເທດ​ໄດ້​ລົງ​ນາມ; ສືບ​ຕໍ່​ແບ່ງປັນ, ຊ່ວຍ​ເຫຼືອ, ​ໃຫ້​ຄຳ​ປຶກສາ​ຊຶ່ງ​ກັນ​ແລະ​ກັນ ກ່ຽວ​ກັບ​ບັນດາ​ບັນຫາ​ສາກົນ​ທີ່​ສອງ​ຝ່າຍ​ມີ​ຄວາມ​ສົນ​ໃຈ; ​ເພີ່ມ​ທະວີ​ການ​ຮ່ວມ​ມື​ຢ່າງ​ແໜ້ນ​ແຟ້ນຢູ່​ໃນ​ບັນດາ​ເວ​ທີ​ປາ​ໄສ​ລະຫວ່າງ​ລັດຖະສະພາ​ພາກ​ພື້ນ ​ແລະ ສາກົນ ທີ່​ສະພາ​ແຫ່ງ​ຊາດ​ຂອງ​ສອງ​ປະ​ເທດ​ເປັນ​ສະມາຊິກ.

​ໃນ​ເວລາ​ຢູ່​ຢ້ຽມຢາມ​ລາຊະ​ອານາຈັກ ກຳປູ​ເຈຍ, ທ່ານນາງປະທານ​ສະພາ​ແຫ່ງຊາດ​ຫວຽດນາມ ຫງວຽນ​ທີ້ກິມ​ເງິນ ​ໄດ້​ເຂົ້າ​ຢ້ຽມ​ຄຳນັບ​ເຈົ້າ​ຊີວິດ​ກຳປູ​ເຈຍ ນະ​ໂຣດົມ ສີຫະ​ມຸນີ; ພົບ​ປະ​ກັບນາຍົກລັດຖະມົນຕີ ຮຸນ​ເຊ​ນ. ເຈົ້າ​ຊີວິດ​ ນະ​ໂຣດົມ ສີຫະ​ມຸນີ ຢືນຢັນ​ປະຊາຊົນ​ກຳປູ​ເຈຍ​ໄດ້​ຈົດ​ຈຳ​ຢູ່​ສະ​ເໝີ​ ກ່ຽວ​ກັບ​ຄວາມ​ສະໜັບສະໜູນ ​ຊ່ວຍ​ເຫຼືອອັນ​ໃຫຍ່​ຫຼວງ​ແລະ​ລ້ຳ​ຄ່າ​ຂອງ​ປະຊາຊົນ​ຫວຽດນາມ; ຢືນຢັນ​ຫວຽດນາມ​ເປັນ​ເພື່ອນທີ່​ດີ​ຂອງ​ປະຊາຊົນ​ກຳປູ​ເຈຍ ຊຶ່ງ​ໄດ້​ໃຫ້ການ​ຊ່ວຍ​ເຫຼືອ​ອັນ​ໃຫຍ່​ຫຼວງ​ແກ່​ປະຊາຊົນ​ກຳປູ​ເຈຍ ​ເພື່ອ​ຄວາມ​ເປັນ​ເອກະລາດ ອິດສະຫຼະພາບ​ຂອງ​ກຳປູ​ເຈຍ​ກ່ອນ​ໜ້ານນີ້, ກໍ່​ຄື​ການ​ສ້າ​ງສາ​ພັດທະນາ​ປະ​ເທດ​ກຳປູ​ເຈຍ​ໃນ​ປັດຈຸບັນ.

​ໃນ​ການ​ພົບ​ປະ​ກັບ ສົມ​ເດັດ ​ໄຊ​ຈູມ ປະທານ​ສະພາສູງ​ກຳປູ​ເຈຍ ສອງ​ຝ່າຍ​ໄດ້​ຊົມ​ເຊີຍຜົນສຳ​ເລັດ​ຂອງວຽກ​ງານ​ແບ່ງ​ເຂດ​ປັກ​ຫຼັກໝາຍ​ຊາຍ​ແດນ ​ລະຫວ່າງ​ສອງ​ປະ​ເທດ ​ໃນ​ເວລາທີ່​ຜ່ານ​ມາ, ທ່ານນາງປະທານ​ສະພາ​ແຫ່ງຊາດຫວຽດນາມ​ ຫງວຽນ​ທີ້ກິມ​ເງິນ ​ແລະ ປະທານ​ສະພາ​ສູງກຳປູ​ເຈຍ ສົມ​ເດັດ ​ໄຊ​ຈູມ ​ໄດ້​ພ້ອມ​ກັນ​ສະ​ແດງ​ຄວາມ​ປາຖະໜາ​ຂອງ​ສອງ​ປະ​ເທດ ຈະ​ແກ້​ໄຂ​​ບັນຫາທີ່​ຍັງ​ຄ້າງຄາ​ຕາມ​ແນວ​ຊາຍ​ແດນສອງ​ປະ​ເທດ​ທັງ​ໝົດ ​ໃຫ້​ສຳ​ເລັດ ​ເພື່ອກໍ່ສ້າງ​ຊາຍ​ແດນ​ແຫ່ງ​ສັນຕິພາບ ມິດຕະພາບ ການ​ຮ່ວມ​ມື ​ແລະ ພັດທະນາ; ພ້ອມ​ນັ້ນ ກໍ່​ໃຫ້​ທັດສະນະ​ວ່າ ຜົນສຳ​ເລັດ​ຂອງ​ວຽກ​ງານ​ແບ່ງ​ເຂດ​ປັກ​ຫຼັກ​ໝາຍ​ຊາຍ​ແດນ​ເປັນ​ຊັບ​ສົມບັດ​ອັນ​ລ້ຳ​ຄ່າສຳລັບ​ຄົນ​ຮຸ່ນ​ອະນາຄົດ​./.

​ໂດຍ ບນ (ສັງ​ລວມຈາກ​ຂ່າວສານ​ຫວຽດນາມ)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ