ວັນອາທິດ, 22/9/2019
ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກີມເງິນ ເຂົ້າຮ່ວມສະມັດຊາໃຫຍ່ ລັດຖະສະພາ ລະຫວ່າງຊາດ ອາຊຽນ ຄັ້ງທີ 37
21/10/2016 11:24' ສົ່ງ ພິມ
ປະທານສະພາແຫ່ງຊາດຫວຽດນາມ ທ່ານນາງ ຫງວຽນທິກີມເງິນ ນຳໜ້າຄະນະຜູ້ແທນຂັ້ນສູງຂອງ ສະພາແຫ່ງຊາດ ສສ ຫວຽດນາມ ເຂົ້າຮ່ວມວາລະປະຊຸມ ຄະນະບໍລິຫານງານ ອາຍປາ (AIPA). (ພາບ: ຂ່າວພາບ ຫວຽດນາມ)

ສະ­ມັດ­ຊາ​ໃຫຍ່ ​ລັດ​ຖະ​ສະ­ພາ ​ລະ­ຫວ່າງ​ຊາດ ອາ​ຊຽນ ຄັ້ງ​ທີ 37 ເປັນກອງ​ປະຊຸມ​ທຳ​ອິດ ​ຂອງ​ລັດ​ຖະ​ສະພາ​ ບັນ­ດາ​ປະ­ເທດອາ​ຊີຕາ​ເວັນ​ອອກສຽງ​ໃຕ້ ພາຍຫຼັງທີ່ປະ­ຊາ​ຄົມອາ​ຊຽນ ໄດ້​ຮັບ​ການ​ສ້າງ­ຕັ້ງ​ຂຶ້ນ​ຢ່າງ​ເປັນ​ທາງ​ການ. ຫົວ­ຂໍ້​ຂອງສະ­ມັດ­ຊາ​ຄັ້ງ​ນີ້​ແມ່ນ “ອາຍ​ປາ​ຟົດ­ຟື້ນ​ເພື່ອ​ປະ­ຊາ​ຄົມອາ​ຊຽນທີ່​ກ້າວ­ໜ້າ” ແນ­ໃສ່​ສືບ​ຕໍ່​ຊຸກ­ຍູ້​ການ​ກໍ່­ສ້າງ​ປະ­ຊາ​ຄົມອາ​ຊຽນ ຕາມ​ບັນ­ດາ​ເນື້ອ​ໃນ​ທີ່​ໄດ້​ວາງ​​ໄວ້​ ໃນ​ເອ­ກະ­ສານ​ກ່ຽວ​ກັບ​ວິ­ໄສ​ທັດອາ​ຊຽນ 2025.

ອາຍ​ປາ​​ທີ່​ຟົດ­ຟື້ນ, ສາ­ມັກ­ຄີ, ປະ­ຊາ­ທິ­ປະ­ໄຕ, ເອ­ກະ​ພາບ

ໃນ​ບົດ​​ປາ​ໃສ​ຢູ່​ວາລະ​ປະ­ຊຸມ​ຄົບ​ຄະ­ນະ​ທຳ​ອິດ ຂອງ​ສະ­ມັດ­ຊາ​ໃຫຍ່ ອາຍ​ປາ-37, ​ໃນ​ນາມ​ຫົວໜ້າ​ຄະນະ​ຜູ້​ແທນຂອງຫວຽດ­ນາມ, ຕາງ­ໜ້າ​​ຄະ­ນະ​ຜູ້​ແທນ​ສະພາ​ແຫ່ງ​ຊາດຫວຽດ­ນາມ ທ່ານ​ນາງປະ­ທານສະ­ພາ​ແຫ່ງ​ຊາດ ຫງວ​ຽນ​ທິ​ກີມເງິນ ໄດ້​ຝາກ​ຄຳ​ຂ່ຳນັບ​ຊົມ​ເຊີຍ​ອັນ​ປະ­ເສີດ ມາ​ຍັງ​ທ່ານ ມານວິນ​ຄາງຕານ ປະ­ທານ​ລັດຖະສະພາ, ປະ­ທານສະ­ພາ​ສູງມຽນ​ມາ, ​ປະ­ທານອາຍ​ປາ-37; ທ່ານນາງ ອ​ອງ​ຊານ​ຊູ​ຈີ ຜູ້ທີ່​ປຶກ­ສາ​ລັດ, ລັດຖະມົນ­ຕີການ​ຕ່າງປະ­ເທດ, ລັດ­ຖະ­ມົນ­ຕີ​ຫ້ອງ​ວ່າ­ການປະ­ທາ­ນາ­ທິ­ບໍ­ດີມຽນມາ ແລະ ບັນ­ດາ​ປະ­ທານ, ຮອງ​ປະທານ ​ລັດ​ຖະ​ສະພາ ບັນດາ​ປະ­ເທດ​ສະ­ມາ­ຊິກຂອງ ອາຍ​ປາ, ທ່ານເລ­ຂາ­ທິ­ການ​ໃຫຍ່​ ສະຫະພັນ​ ລັດ​ຖະ​ສະ­ພາ​ສາ­ກົນ (​ໄອ​ປູ), ທ່ານເລ­ຂາ­ທິ­ການ​ໃຫຍ່ ອາ​ຊຽນ, ບັນ­ດາ​ທ່ານ​ຜູ້​ແທນ ແລະ ຂໍ​ຜ່ານ​ບັນ­ດາ​ທ່ານ​ຜູ້​ແທນ​ ຝາກຄວາມຮັກ​​ແພງ ​ໄມຕີ​ຈິດ​ມິດ­ຕະ­ພາບ​ອັນ​ສະ­ໜິດ­ສະ­ໜົມ ​ຂອງ​ປະ­ຊາ­ຊົນຫວຽດ­ນາມ ມາ​ຍັງລັດ​ຖະສະພາ ແລະ ປະ­ຊາ­ຊົນພົນລະ​ເມືອງ ອາ​ຊຽນ ທຸກ​ຄົົນ. ທ່ານ​ນາງປະ­ທານ​ສະ­ພາ​ແຫ່ງ​ຊາດຫວຽດ­ນາມ ໄດ້​ສະ­ແດງ​ຄວາມ​ຂອບ​ອົກ​ຂອບ­ໃຈຢ່າງ​ຈິງ​ໃຈ ​ຕໍ່​ປະ­ເທດ​​ເຈົ້າ­ພາບມຽນມາ ທີ່​ໄດ້​ໃຫ້ການ​ຕ້ອນ­ຮັບອັນ​ສົມ​ກຽດ ​ແກ່​ຄະ­ນະ​ຜູ້​ແທນສະພາ​ແຫ່ງ​ຊາດຫວຽດ­ນາມ ຢູ່ນະຄອນ­ຫຼວງ ​ເນ​ປີ​ດໍ ຂອງປະ​ເທດມຽນ​ມາທີ່​ສວຍ​ງາມ.

ໃນ​ສະ­ພາບ​ການ​ໂລກ​ມີ​ການ​ຜັນ​ແປ​​ສັບ­ສົນຫຼາຍ​ຢ່າງ ທີ່ບໍ່​ສາ­ມາດ​ຄາດ​ຄະ­ເນ​ລ່ວງ​ໜ້າ​ໄດ້, ຄວາມ​ສັນຕິພາບ, ສະ​ຖຽມ​ລະ​ພາບ, ການຮ່ວມ​ມື ແລະ ພັດ­ທະ­ນາ ​ຈະ​ສືບ​ຕໍ່​ເປັນສິ່ງ​​ທີ່​ໄດ້​ຮັບ​ການ​ບູ​ລິ​ມະ​ສິດ​ອັນ​ດັບ​ໜຶ່ງ​ ຂອງ​ທຸກ​ປະ­ເທດ, ທ່ານນາງ​ປະ­ທານ​ສະ­ພາ​ແຫ່ງ​ຊາດ​ ໄດ້​ໃຫ້​ທັດສະນະ​ວ່າ: ອາ­ຊີ - ປາ​ຊີ​ຟິກ​ນັບ​ມື້​ນັບ​ເປັນ​ພາກ​ພື້ນ​ທີ່​ສຳ­ຄັນ, ​ມີຄວາມ​ສະຫງົບ ​ມີສະ​ຖຽມ​ລະ​ພາບ ແລະ ສືບ​ຕໍ່​ເປັນ​ກຳລັງ​ໜູນ​ຕົ້ນ​ຕໍ່ ​ໃຫ້​ແກ່​ການ​ພັດ­ທະ­ນາ​​ຂອງ​ລະບົບເສດຖະກິດ​ໂລກ. ໃນ​ນັັັ້ນ, ປະ­ຊາ​ຄົມອາ​ຊຽນ ໄດ້​ກາຍ­ເປັນ​ປັດ­ໃຈ​ອັນ​ຕັ້ງ­ໜ້າ ​ທີ່ປະກອບ​ເປັນ​ໂຄງ​ປະ­ກອບພາກ​ພື້ນ, ເພີ່ມ​ທະ­ວີ​ການ​ເຊື່ອມ​​ໂຍງ ແລະ ​ເຊື່ອມຈອດ​ຜົນ​ປະ­ໂຫຍດ. ໃນ​ເກືອບ 50 ປີ​ທີ່​ຜ່ານ​ມາ, ອາ​ຊຽນ ໄດ້​ມີ​​ບາດ­ກ້າວ​ຄືບ​ໜ້າ​ທີ່​ຍາວ​ຢຽດ, ​ໄດ້ຜ່ານ​ຜ່າຄວາມ​ຫຍຸ້ງຍຍາກ ສິ່ງ​ກີດ­ຂວາງ​ປະ­ຫວັດ­ສາດ, ແຕ່​ມັນ​ໄດ້​ຂະຫຍາຍຕົວ​ຈາກ​ສະ­ມາ​ຄົມ​ໜຶ່ງ ­ກາຍເປັນປະ­ຊາ­ຄົມ​ພາກ​ພື້ນ​ໜຶ່ງ ທີ່ມີ​ສະ­ມາ­ຊິກ​ເປັນ 10 ປະ­ເທດ ແລະ ມີການ​ພົວ­ພັນ​ການ​ຕ່າງ­ປະ­ເທດ​ທີ່ໄດ້​ເປີດ​ກວ້າງ. ໃນ​ໄລ­ຍະ​ເວ­ລາ​ນັ້ນ, ອາຍ​ປາ ດ້ວຍ​ພາ­ລະ​ບົດ­ບາດ​ເປັນ​ອົງ​ການຈັດຕັ້ງ​ລັດ​ຖະ​ສະ­ພາ​ ລະ­ຫວ່າງ​ຊາດ​ຂອງ​ພາກ​ພື້ນ ​ໄດ້​ກຽມ​ຄວາມ​ພ້ອມ​ເພື່ອ​ສາ­ມັກ­ຄີ ແລະ ຮ່ວມ​ທາງ​​ກັບ ອາ​ຊຽນ.

​ໃນ​ເວລະ​ເກືອບ 40 ປີ ນັບ​ແຕ່​ເມື່ອ​ໄດ້​ຮັບ​ການ​ສ້າງ­ຕັ້ງ​ຢ່າງ​ເປັນ​ທາງ​ການ, ອາຍ​ປາ ກໍ່​ມີ​ບາດ­ກ້າວ ຂະຫຍາຍ­ຕົວ​​ຢ່າງ​​ແຂງ­ແຮງ, ຈຳນວນ​ສະ­ມາ­ຊິກ​ເພີ່ມ​ຂຶ້ນ, ​ໄດ້ປັບ­ປຸງ​ກົນ​ໄກ​ຮ່ວມ​ມື ​ກໍ່​ຄື​ສະ­ໜັບ­ສະ­ໜູນ​ວິ­ວັດ​ແຫ່ງ​ການ​ກໍ່­ສ້າງ​ປະ­ຊາ​ຄົມອາ​ຊຽນ. ທ່ານ​ນາງປະ­ທານ​ສະ­ພາ​ແຫ່ງ​ຊາດ​ ຫງວ​ຽນ​ທິກີມເງິນ ກໍ່​ເນັ້ນ​ວ່າ: “ຈາກ​ພື້ນຖານ​ອັນ​ໜັກ​ແໜ້ນ​ດັ່ງ­ກ່າວ, ພວກ​ເຮົາ​ຕ້ອງ​ສືບ​ຕໍ່​ພາ­ໃຫ້ ອາຍ​ປາ ພັດ­ທະ­ນາ​ຢ່າງ​ແຂງ­ແຮງ​ກວ່າ​ອີກ. ອາຍ​ປາ​ທີ່ຟົດຟື້ນແມ່ນ ອາຍ​ປາ ​ທີ່ມີ​ຄວາມ​ສາ­ມັກ­ຄີ, ປະ­ຊາ­ທິ­ປະ­ໄຕ, ສັນ­ຕິ­ພາບ, ປະຕິບັດ​ຕາມລະບຽບ​ກົດ­ໝາຍ; ມີ​ຄວາມ​ກົມ­ກຽວ​ທາງດ້ານ​ກົດ­ໝາຍ, ຊ່ວຍ​ເຫຼືອ​ຊຶ່ງ​ກັນ​ແລະ​ກັນ; ຫຍໍ້​ສັ້ນ​ຄວາມ​ແຕກ​ໂ​ຕນ​ທາງດ້ານ​ນິຕິ​ທຳ; ມີ​ການ​ປ່ຽນແປງ​ໃໝ່​ຢ່າງ​ບໍ່​ຢຸດ​ຢັ້ງ. ອາຍ​ປາ ຕ້ອງ​ສືບ​ຕໍ່​ຊຸກ­ຍູ້​ໃຫ້​ລັດ­ຖະ­ບານ​ບັນ­ດາ​ປະ­ເທດ​ສະ­ມາ­ຊິກ ປະຕິ­ບັດ​​ຄຳ​ໝັ້ນ​ສັນ­ຍາ​ພາກ​ພື້ນ ໃຫ້​ເໝາະ​ສົມ​ກັບ ວິ­ໄສ​ທັດ ອາ​ຊຽນ 2025; ພ້ອມ​ທັງ ສົ່ງ­ເສີມ​ການ​ມີ​ສ່ວນ​ຮ່ວມ ຂອງ​ປະ­ຊາ­ຊົນ ເຂົ້າ​ໃນ​ບັນ­ດາ​ການ​ເເຄື່ອນ​ໄຫວ​ນີ້. ອາຍ​ປາ ​ກໍ່​ຈະ​ເພີ່ມ​ທະ­ວີ​ພາ­ລະ​ບົດ­ບາດ ໃນ​ການ​ກວດ­ກາ​ຕິດ­ຕາມ​ການ​ປະ­ຕິ­ບັດ ບັນ­ດາ​ແຜນ­ການ​ຮ່ວມ​ມື​ພາຍ​ໃນ ກໍ່​ຄື​ປະ­ຕິ­ບັດ​ນະ­ໂຍ­ບາຍ​ຮ່ວມ​ມື ລະ­ຫວ່າງ ອາ​ຊຽນ ກັບ​ບັນ­ດາ​ຄູ່​ຮ່ວມ​ມື​ຢູ່​ພາຍ​ນອກ ​ໃນ​ການ​ແກ້​ໄຂ​ບັນ­ດາ​ບັນ­ຫາ​ຂອງ​ພາກ​ພື້ນ”.

ທ່ານ​ນາງປະ­ທານ​ສະ­ພາ​ແຫ່ງ​ຊາດ ຫງວ​ຽນ​ທິກີມເງິນ ໄດ້​ຊົມ­ເຊີຍແລະຕີ​ລາ­ຄາ​ສູງ ​ບົດ​ປາ​ໃສ​ຂອງ​ທ່ານ​ປະ­ທານ ອາຍ​ປາ-37 ທີ່​ໄດ້​ຍົກ​ໃຫ້​ເຫັນ​ບັນ­ດາ​ໜ້າ­ທີ່​ຂອງ ອາຍ​ປາ ໃນ​ການ​ຊຸກ­ຍູ້​ຂະ​ບວນ​ວິ­ວັດ​ແຫ່ງ​ການ​ພັດທະນາ​ຂອງ​ປະ­ຊາ​ຄົມ ອາ​ຊຽນ. ສະ­ພາ​ແຫ່ງ​ຊາດ ສສ ຫວຽດ­ນາມ ໂດຍ​ພາ­ລະ​ບົດ­ບາດ ແລະ ຄວາມ​ຮັບຜິດຊອບ​ຂອງ​ຕົນ​ເອງ, ໄດ້​ສະ­ໜັບ­ສະ­ໜູນ​ຢ່າງ​ສົມ​ບູນ​ຕໍ່​ຫົວ­ຂໍ້ “ອາຍ​ປາ​ຟົດ­ຟື້ນ​ເພື່ອ​ປະ­ຊາຄົມ​ອາ​ຊຽນທີ່​ກ້າວໜ້າ", ສະໜັບສະໜູນລະບຽບວາ­ລະການ​​ປະ­ຊຸມ​ຂອງ ສະ­ມັດ­ຊາ​ໃຫຍ່ ອາຍ​ປາ-37 ຄັ້ງ​ນີ້, ແລະ ຈະ​ປະກອບສ່ວນປະ­ຕິ­ບັດ​ມະ­ຕິ​​ຕົກ­ລົງ​ຂອງ ສະ­ມັດ­ຊາ​ໃຫຍ່ ອາຍ​ປາ ​ໃຫ້​ສຳ​ເລັດ​ຜົນ. ທ່ານ​ນາງປະ­ທານ​ສະ­ພາ​ແຫ່ງ​ຊາດ ຫງວ​ຽນ​ທິ​ກີມເງິນ ໄດ້​ເນັ້ນ​​ວ່າ: “ພວກ​ຂ້າ​ພະ​ເຈົ້າ, ​ບັນ­ດາ​ສະ​ມາ​ຊິ​ສະ­ພາ​ແຫ່ງ​ຊາດ​ຊຸດ​ທີ XIV ຂອງ ສສ ຫວຽດ­ນາມ, ທີ່ໄດ້​ຮັບ​ການ​ເລືອກ​ຕັ້ງ​ໃນ​ວັນ​ທີ 22 ພຶດ­ສະ­ພາ 2016 ເປັນ​ສະ­ພາ​ແຫ່ງ​ຊາດ​ທີ່​ສາ­ມັກ­ຄີ, ມີຫົວຄິດ​ປະດິດ​ສ້າງ ແລະ ປະ­ຕິ­ບັດ​ເພື່ອ​ຜົນ​ປະ­ໂຫຍດ​ຂອງ​ປະ­ຊາ­ຊົນ, ເພື່ອ​ປະ­ເທດຫວຽດ­ນາມ​ທີ່ມີ​ຄວາມ​ພັດທະນາ ແລະ ເຊື່ອມ​ໂຍງ. ຂ້າ​ພະ​ເຈົ້າ​ຂໍ​​ຢືນ­ຢັນ​ວ່າ ຫວຽດ­ນາມຈະ​ສືບ​ຕໍ່​ຜັນ​ຂະ­ຫຍາຍ​ນະ­ໂຍ­ບາຍ​ພົວ­ພັນ​ຕ່າງປະເທດ​ທີ່ ເປັນ​ເອ­ກະ­ລາດ ເປັນ​ເຈົ້າ​ຕົນ​ເອງ, ການ​ພົວ­ພັນ​ຫຼາຍ​ຮູບຫຼາຍ​ແບບ​ກັບ​ປະ­ເທດ​ຕ່າງໆໃນໂລກ; ພ້ອມ​ແລ້ວ​ທີ່​ຈະ​ປະ­ກອບ­ສ່ວນ​ຢ່າງ​ເປັນ​ເຈົ້າ​ການ, ຕັ້ງ­ໜ້າ ແລະ ມີ​ຄວາມ​ຮັບ­ຜິດ­ຊອບ ​ເຂົ້າ​ໃນ​ການ​ແກ້​ໄຂ​ບັນ­ຫາ​ສາ­ກົນ ແລະ ພາກ​ພື້ນ; ພ້ອມກັນ​ປະ­ກອບ­ສ່ວນ​ເຂົ້າ​ໃນ​ການ​ກຳ­ນົດ​ຮູບ​ແບບ ແລະ ການປ່ຽນ­ແປງ​ໃໝ່ ​ບັນ­ດາ​ລະ­ບຽບ​ການ​ດຳເນີນງານ ​ການເຄື່ອນ­ໄຫວ​ຂອງ ອາຍ​ປາ, ຮ່ວມ​ມື​ເພື່ອ​ໃຫ້ ອາຍ​ປາຟົດ­ຟື້ນ, ອາ​ຊຽນກ້າວ­ໜ້າ​”.

ໃນ​ຂອບ​ເຂດ​ກອງ​ປະຊຸມ ອາຍ​ປາ-37, ທ່ານ​ນາງປະ­ທານ​ສະ­ພາ​ແຫ່ງ​ຊາດ ຫງວ​ຽນ​ທິ​ກີມເງິນ ໄດ້ໃຫ້ການ​ຕ້ອນ­ຮັບ ເລ­ຂາ­ທິ­ການ​ໃຫຍ່ ສະ­ຫະ­ພັນ​ລັດ​ຖະ​ສະ­ພາ​ສາ­ກົນ (​IPU - ໄອ​ປູ) ທ່ານ ມ. ຈູນ​ກອນ. ທ່ານ​ນາງຫງວ​ຽນ​ທິ​ກີມເງິນ ​ໄດ້​ຕີ​ລາ­ຄາ​ສູງ​ກ່ຽວ​ກັບ​ພາ­ລະ​ບົດ­ບາດ​ທີ່​ສຳ­ຄັນ​ຂອງ ເລ­ຂາ­ທິ­ການ​ໃຫຍ່ ​ໄອປູ ທີ່​ມີຕໍ່​ເວ­ທີ​ປາ​ໄສ​ສະຫະພັນ​ລັດ​ຖະ​ສະ­ພາ​ສາ­ກົນ ​ໄອປູ; ໄດ້​ສະ­ແດງ​ຄວາມ​ເຊື່ອ​ໝັ້ນ​ວ່າ ດ້ວຍ​ບົດຮຽນ​ປະສົບ​ການ 20 ປີ​ແຫ່ງ​ການ​ເຮັດ​ວຽກ​ໃນ​ຄະ­ນະ​ເລ­ຂາ ​ໄອ​ປູ ແລະ ​ຜ່ານຫຼາຍ​ຕຳແໜ່ງປະຈຳການ​ທີ່​ຕ່າງ​ກັນ, ທ່ານ ມ. ຈູນ​ກອນ ຈະ​ຊ່ວຍ­ເຫຼືອ​ໃຫ້ ສະ­ຫະ­ພັນ​ລັດ​ຖະ​ສະ­ພາ​ທີ່​ໃຫຍ່​ທີ່​ສຸດ​ໃນ​ໂລກ ແລະ ບັນດາ​ລັດ​ຖະ​ສະ­ພາສະ­ມາ­ຊິກ ​ບັນ­ລຸ​ໄດ້​ເປົ້າ​ໝາຍ​ກ່ຽວ​ກັບ​ຄວາມ​ສັນ­ຕິ­ພາບ, ປະ­ຊາ­ທິ­ປະ­ໄຕ, ການຮ່ວມ​ມື ແລະ ການພັດທະ­ນາ​ຢ່າງ​ໝັ້ນ­ຄົງ.

ທ່່ານ ມ. ຈູນ​ກອນ ເລ­ຂາ­ທິ­ການ​ໃຫຍ່ ສະ­ຫະ­ພັນ​ລັດ​ຖະ​ສະ­ພາ​ສາ­ກົນ ​ໄອ​ປູ ກໍໄດ້ຕີ​ລາ­ຄາ​ສູງ​ຕໍ່​ການ​ປະກອບ­ສ່ວນ​ຂອງ​ສະ­ພາ​ແຫ່ງ​ຊາດ ສສ ຫວຽດ­ນາມ ໃນ​ອົງ​ການ­ຈັດ­ຕັ້ງ ສະ­ຫະ­ພັນ​ລັດ​ຖະ​ສະ­ພາ​ສາ­ກົນ ດ້ວຍ​ການ​ເຂົ້າ​ຮ່ວມ​ສະ­ຫະ­ພັນ​ລັດ​ຖະ​ສະ­ພາ​ສາ­ກົນ​ໃນ​ທຸກ​ຄັ້ງ; ພິ­ເສດ ​ໃນ​ການ​ເປັນ​ເຈົ້າ­ພາບ​ຈັດ​ຕັ້ງ ​ໄອປູ 132, ​ໂດຍ​ສະ​ເພາະ​ຢ່າງ​ຍິ່ງແມ່ນ ຖະ­ແຫຼງ­ການຮ່າ​ໂນ້ຍ ຊຶ່ງໄດ້ສະ​ແດງ​ໃຫ້​ເຫັນ​ເຖິງ​ຄຳ​ໝັ້ນ​ສັນ­ຍາ​ ຂອງ​ບັນ­ດາ​ລັດ​ຖະ​ສະ­ພາ ສະ­ມາ­ຊິກ ທີ່ຈະ​ຊຸກ­ຍູ້​ໃຫ້​ບັນ­ດາ​ປະ­ເທດ​ປະ­ຕິ­ບັດ​ເປົ້າ​ໝາຍ​​ພັດ­ທະ­ນາ​ແບບ​ຍືນ​ຍົງ​ພາຍ­ຫຼັງ​ປີ 2015.

ການ​ຮັບ­ຮອງ​ບັນ­ດາ​ຂໍ້​ສະ­ເໜີ​ຂອງ ສສ ຫວຽດ­ນາມ

ທີ່ສະ­ມັດ­ຊາ​ໃຫຍ່ ອາຍ​ປາ-37 ຄັ້ງ​ນີ້, ຫວຽດ­ນາມໄດ້​ມີ​ການ​ສະ­ເໜີແລະຍື່ນ​ມະ­ຕິ​ສາມ​ສະ­ບັບ. ​ມະຕິທັງສາມ​ສະບັບ​ນັ້ນ ​ໄດ້​ຮັບ​ການ​ຊົມ­ເຊີຍ, ສະ­ໜັບ­ສະ­ໜູນ​ສູງ ແລະ ໄດ້​ຖືກຮັບ­ຮອງ​ເອົາ​ໃນ​ສະ­ມັດ­ຊາ​ໃຫຍ່​ຄັ້ງ​ນີ້.

ທີ​ໜຶ່ງ, ມະ­ຕິ​ກ່ຽວ​ກັບ​ເພີ່ມ​ທະ­ວີ​ການ​ຮ່ວມ​ມື​ແນ­ໃສ່​ຮັບ­ປະ­ກັນ​ຄວາມ​ປອດ​ໄພ​ດ້ານ ເຄືອ​ຂ່າຍ​ອີນ​ເຕີ​​ເນດ ພາຍ​ໃນອາ​ຊຽນ, ຮຽກ­ຮ້ອງ​ໃຫ້ ອາຍ​ປາ ຊຸກ­ຍູ້​ອາ​ຊຽນ ພ້ອມ​ກັນ​ກໍ່­ສ້າງ​ຂອບ​ນິ­ຕິ​ກຳຮ່ວມ​ກັນ ​ກ່ຽວ​ກັບ​ການ​ຮັບປະກັນ​ຄວາມ​ປອດ​ໄພ​ເຄືອ​ຂ່າຍ​ອີນ​ເຕີ​​ເນດ, ປ້ອງ​ກັນ​ຕ້ານອາດ­ຊະ­ຍາ​ກຳດ້ານ​ເຄືອ​ຂ່າຍອີນ​ເຕີ​ເນດ, ອາດຊະ­ຍາ​ກຳ​ຂ້າມ​ຊາດ ລະ­ຫວ່າງ​ບັນ­ດາ​ປະ­ເທດອາ​ຊຽນ ແລະ ລະ­ຫວ່າງອາ​ຊຽນ ກັບ​ບັນ­ດາປະ­ເທດ​ຄູ່​ສົນທະ­ນາ ແລະ ຄູ່​ຮ່ວມ​ມື; ເພີ່ມ​ທະ­ວີ​ການ​ຮ່ວມ​ມື​ກ່ຽວ​ກັບ​ຄວາມ​ປອດ​ໄພ​ດ້ານ​ເຄືອ​ຂ່າຍ​ອີນ​ເຕິ​ເນດ ພາຍ​ໃນອາ​ຊຽນ ແລະ ລະ­ຫວ່າງ ອາ​ຊຽນ ກັບບັນ­ດາ​ຄູ່​ຮ່ວມ​ມື​, ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ ແລະ ປັບ­ປຸງ​ຄວາມ​ໄວ້​ວາງ​ໃຈ, ເພີ່ມ​ທະ­ວີ​ຄວາມ​ເຂົ້າ­ໃຈ​ເຊິ່ງ​ກັນແລະກັນ, ຮັບ­ປະ­ກັນ​ຄວາມ​ປອດ​ໄພ​ເຄືອ​ຂ່າຍ​ອີນ​ເຕິ​​ເນດ, ຮັບ​ມື​ກັບ​ຄວາມ​ທົດ​ສອບ​ດ້ານ​ເຄືອ​ຂ່າຍ​ອີນ​ເຕິ​​ເນດ, ພ້ອມ​ກັນ​ຮັກ­ສາ​​ສັນ­ຕິ­ພາບ, ສະ​ຖຽມ​ລະ​ພາບ​ໃນພາກ​ພື້ນ ແລະ ​ໃນ​ໂລກ.

ທີ​ສອງ, ມະ­ຕິ​ກ່ຽວ​ກັບ​ການ​ຊຸກ­ຍູ້​ການ​ພັດ­ທະ­ນາ​ຂອງ​ບັນ­ດາ​ວິ​ສາ​ຫະ​ກິດ​ຂະ­ໜາດ​ກາງແລະນ້ອຍ ​ໃນການ​ເຂົ້າ​ຮ່ວມ ແລະ ປັບປຸງລະ­ບົບ​ຕ່ອງ​ໂສ​ມູນ​ຄ່າ​ທົ່ວ​ໂລກ ​ເພື່ອແນ­ໃສ່​ຍົກ​ສູງ​ຄວາມ​ຮັບ​ຮູ້ ກ່ຽວ​ກັບການ​ເຂົ້າ​ຮ່ວມ​ຂອງ​ບັນ­ດາ​ວິ​ສາ​ຫະ​ກິດ​ຂະ­ໜາດ​ນ້ອຍແລະກາງຂອງອາ​ຊຽນ ເຂົ້າ​ໃນ​ລະ­ບົບ​ຕ່ອງ​ໂສ້​ມູນ​ຄ່າ​ທົ່ວ​ໂລກ; ​ຜ່ານ​ນັ້ນຈະ​ຊຸກ­ຍູ້​ການ​ສ້າງ­ຕັ້ງ​ເຄືອ​ຂ່າຍ​ບັນ­ດາວິ​ສາ​ຫະ​ກິດ​ຂະ­ໜາດ​ນ້ອຍແລະກາງໃນ​ພາກ​ພື້ນ ເພື່ອ​ພ້ອມ​ກັນ​ພັດທະນາ​ວິ​ສາ​ຫະ​ກິດ​ຂະ­ໜາດ​ນ້ອຍແລະກາງ ແລະ ​ເພີ່ມ​ປະສິດທິພາບ​ຂອງ​ລະບົບ​ຕ່ອງ​​ໂສ້​ມູນ​ຄ່າ​ທົ່ວ​ໂລກ; ເສີມ​ຂະ­ຫຍາຍ​ພາລະ​ບົດບາດ​ຂອງ ອາຍ​ປາ ແລະ ບັນ­ດາ​ລັດ​ຖະ​ສະ­ພາ​ສະມາ­ຊິກ​ ​ໃນ​ການ​ສ້າງ​ຂອບ​ນິ­ຕິ​ກຳ, ປັບ­ປຸງ​​ກົດ­ໝາຍ​​ໃນ​ປະ​ເທດ ​ໃຫ້​ສອດຄ່ອງ​ກັບ​ບັນດາ​ເອກະສານ​ກົດໝາຍ ແລະ ບັນ­ດາ​ຂໍ້​ຕົກ­ລົງຂອງອາຊຽນ ແນ­ໃສ່​ຊຸກ­ຍູ້​ການ​ພັດທະນາ ແລະ ການເຂົ້າ​ຮ່ວມ​ຂອງ ບັນ­ດາ​ວິ​ສາ​ຫະ​ກິດ​ຂະ­ໜາດ​ນ້ອຍແລະກາງ ເຂົ້າ​ໃນ​ລະ­ບົບ​ຕ່ອງ​ໂສ່​ມູນ​ຄ່າ​ທົ່ວ​ໂລກ.

ທີ​ສາມ, ມະ­ຕິ​ກ່ຽວ​ກັບ​ການ​ຮຽກ­ຮ້ອງ​ໃຫ້ ​ລັດ­ຖະ­ບານ​ບັນ­ດາ​ປະ­ເທດສະ­ມາ­ຊິກອາ​ຊຽນ ​ມີ​ນະ­ໂຍ­ບາຍ​ສ້າງ​ເງື່ອນ­ໄຂອຳນວຍ​ຄວາມ​ສະດວກ, ຊ່ວຍ­ເຫຼືອ​ບັນ­ດາ​ວິ​ສາ​ຫະ​ກິດ​ຂະ­ໜາດ​ນ້ອຍແລະກາງ ​ໃນ​ການສ້າງ­ຕັ້ງ ແລະ ເຂົ້າ​ຮ່ວມ​ກຸ່ມ​ເຊື່ອມ​ຕໍ່​ຂະ­ແໜງ­ການ, ​ໄດ້ເຂົ້າ​ເຖິງ​ຂໍ້​ມູນ​ຂ່າວ­ສານ​ຢ່າງ​ຄົບ​ຖ້ວນ, ຕີ​ລາ­ຄາ, ວິ­ເຄາະ​ສະ​ເພາະ​ເລິກ­ເຊິ່ງ ກ່ຽວ​ກັບ​ບັນ­ດາ​ຄຳ​ໝັ້ນ​ສັນ­ຍາ​ໃນ​ການ​ເຊື່ອມ​​ໂຍງ​ເສດ­ຖະ­ກິດ​ສາ­ກົນ​ຂອງ ອາ​ຊຽນ, ກ່ຽວ​ກັບ​ຜົນກະທົບ​ຕໍ່ຂະແໜງອາ­ຊີບ​ຕ່າງໆ ເພື່ອ​​ກຳ​ກົນ​ໄກແລະກົດ​ເກນ​ຂອງ​ຕະ­ຫຼາດເສດ­ຖະ­ກິດ​​ໂລກ, ສວຍ​ໃຊ້​ໂອ­ກາດ​ທີ່ດີ ​ໂດຍສັນຍາ​ການ​ຄ້າ​ເສລີລະ­ຫວ່າງອາ​ຊຽນແລະຄູ່​ຮ່ວມ​ມື ອຳນວຍ​ໃຫ້. ສະ­ພາ​ແຫ່ງ​ຊາດຫວຽດ­ນາມ ໄດ້​ສະ­ເໜີ ມະຕິວ່າ​ດ້ວຍການເພີ່ມ​ທະ­ວີການຮ່ວມ​ມື​ໃນ​ອາ​ຊຽນ ​ເພື່ອ​ຮັບ​ມື​ກັບການ​ປ່ຽນ­ແປງ​ສະພາບ​ອາກາດ ຕໍ່ສະ­ມັດ­ຊາ​ໃຫຍ່ ອາຍປາ-37 ແລະ ສະມັດຊາ​ໃຫຍ່​ກໍ່​ໄດ້​ສະ­ໜັບ­ສະ­ໜູນ ແລະ ຮັບ­ຮອງ​ເອົາ​ມະຕິ​ສະບັບ​ນີ້ ​ເພື່ອ​ແນໃສ່​ຍົກ​ສູງ​ຄວາມ​ຮັບ​ຮູ້, ຄວາມ​ເຂົ້າ­ໃຈ​ຂອງ​ປະ­ຊາ­ຊົນ​ພາຍໃນ​ປະ­ຊາ​ຄົມ ອາ​ຊຽນ ກ່ຽວ​ກັບ​ບັນ­ຫາ​ປ່ຽນ­ແປງສະພາບ​ອາກາດ. ມະ­ຕິ​ສະ­ບັບ​ນີ້ ກໍ່​ໄດ້​ຮຽກ­ຮ້ອງ​ບັນ​ດາ​ລັດຖະ​ສະ­ພາ​ສະ­ມາ­ຊິກ ອາຍ​ປາ ເພີ່ມ​ທະ­ວີ​ການ​ຫັນ​ເປັນ­ຄວາມ​ກົມ­ກຽວ​ດ້ານ​ກົດ­ໝາຍ​ພາຍ​ໃນອາ​ຊຽນ, ພິ­ຈາ­ລະ­ນາ​​ໃຫ້​ສັດຕະຍາ​ບັນ ສົມ​ທິ​ສັນ­ຍາປາ​ຣີ 2015, ຮີບປະ­ຕິ­ບັດ​ບັນດາ​ລະ­ບຽບ​ການດຳ­ເນີນ​ງານ ເພື່ອ​ກໍ່­ສ້າງ​ລະ­ບົບ​ນະ­ໂຍ­ບາຍ, ກົດ­ໝາຍ​ ​ໃຫ້ສອດ​ຄ່ອງ​ກັບ​ບັນ­ດາ​ຄຳ​ໝັ້ນ​ສັນຍາ​ຂອງອາ​ຊຽນ ແລະ ຂອງໂລກ ​ກ່ຽວ​ກັບ​ການ​ຮັບ​ມື​ກັບ​ການ​ປ່ຽນ­ແປງສະພາບ​ອາ­ກາດ​; ປະ­ຕິ­ບັດ​ການຕິດຕາມ​ກວດ­ກາ​ການ​ປະ­ຕິ­ບັດຄຳ​ໝັ້ນ​ສັນ­ຍາຂອງ ອາ​ຊຽນ ກ່ຽວ​ກັບ​ການ​ປ່ຽນ­ແປງ​ສະພາບ​ອາ­ກາດ; ຊ່ວຍເຫຼືອ​ໃຫ້​ ລັດຖະ­ບານ​ບັນ­ດາ​ປະເທດອາ​ຊຽນ ປະ­ຕິ­ບັດ​ຖະ­ແຫຼງ­ການອາ​ຊຽນ ພາຍ­ຫຼັງ​ປີ 2015 ກ່ຽວ​ກັບ​ສິ່ງແວ­ດລ້ອມ​ແບບ​ຍືນ​ຍົງ ແລະ ການ​ປ່ຽນແປງສະພາບອາ­ກາດ, ຮັບ­ຮອງ​ໂດຍ​ໄວ ແລະ ກຽມ­ພ້ອມ​ເພື່ອ​ຜັນ​ຂະຫຍາຍ ແຜນ­​ປະ­ຕິ­ບັດງານ​ຍຸດ​ທະ​ສາດ ອາ​ຊຽນ ກ່ຽວ​ກັບ​ການ​ຮ່ວມ​ມື ດ້ານ​ສິ່ງ­ແວ­ດລ້ອມ​ໄລ­ຍະ 2016 - 2025 ຊຶ່ງ​ຈຸດໜັກ​ໃຈ­ກາງ​ແມ່ນ​ການ​ແບ່ງ­ປັນ​ຂໍ້​ມູນ​ຂ່າວ­ສານ ແລະ ບົດ­ຮຽນ​ປະສົບ​ການ ​ເພື່ອແນ­ໃສ່​ຍົກ​ສູງ​ຄວາມ​ສາ­ມາດ​ຮັບ​ມື ແລະ ຫລຸດ​ຜ່ອນ​ຜົນກະທົບ ຂອງ​ການ​ປ່ຽນ­ແປງ​ສະພາບ​ອາ­ກາດ, ພິ­ເສດ​ແມ່ນ​ບັນ­ຫາ​​ນ້ຳ​ທະເລຍຶ່ງຂຶ້ນ, ໄພ​ແຫ້ງ­ແລ້ງ ແລະ ນ້ຳ​ເຄັມ​ຄຸກ​ຄາມ.

ການ​ເຂົ້າ​ຮ່ວມສະ­ມັດ­ຊາ​ໃຫຍ່​ ລັດ​ຖະ​ສະ­ພາ​ລະ­ຫວ່າງ​ຊາດ​ອາ­ຊຽນ ຄັ້ງ​ທີ 37 ຂອງຫວຽດ­ນາມຄັ້ງ​ນີ້​ ໄດ້​ປະ­ກອບ­ສ່ວນ​ສືບ​ຕໍ່​ເສີມ​ຂະ­ຫຍາຍ​ບົດ­ບາດ, ຖາ­ນະທີ່​ຕັ້ງ​ຂອງຫວຽດ­ນາມ ແລະ ສະ­ພາ​ແຫ່ງ​ຊາດຫວຽດ­ນາມ​ ໃນ​ບັນ­ດາ​ເວ­ທີ​ປາ​ໄສ​ຫຼາຍ​ຝ່າຍ ກໍ່​ຄື​​ເພື່ອ​ປະກອບສ່ວນ​ອັນ​ຕັ້ງ­ໜ້າ ​ເຂົ້າ​ໃນ​ການ​ຮ່ວມ​ມື​ໃນ​ສະ­ມັດ­ຊາ​ລັດ​ຖະ​ສະ­ພາ​ລະຫວ່າງ​ຊາດອາ­ຊຽນ ແລະ ການ​ຮ່ວມ​ມື​ໃນ​ພາກ​ພື້ນ./.

                                                      ສັງ​ລວມ​ໂດຍ ທູ​ເຟືອງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ