ວັນຈັນ, 18/11/2019
ທ່ານປະທານາທິບໍດີ ແຫ່ງ ສາທາລະນະລັດ ຟີລິບປີນ ຢ້ຽມຢາມ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ
30/10/2016 9:46' ສົ່ງ ພິມ
ທ່ານປະທານປະເທດ ຫວຽດນາມ ເຈີ່ນດ້າຍກວາງ ຕ້ອນຮັບ ທ່ານປະທານາທິບໍດີ ຟີລິບປີນ ໂຣດຣີໂກ ດູເຕີແຕ. (ພາບ: ຂ່າວພາບຫວຽດນາມ)

ໃນ​ຂອບ​ການ​ຢ້ຽມ­ຢາມຫວຽດນາມ, ທ່ານປະ­ທາ­ນາ­ທິ­ບໍ­ດີ ຣ. ດູ​ເຕີ​ແຕ ໄດ້​ມີ​ການ​ພົບ​ປະເຈລະ­ຈາ​ກັບ ປະ­ທານ​ປະເທດຫວຽດນາມ ເຈີ່ນ​ດ້າຍກວາງ, ເຂົ້າ​ຢ້ຽມ​ຄຳນັບ​ເລ­ຂາ­ທິ­ການ​ໃຫຍ່​ ພັກ​ກອມ​ມູ​ນິດຫວຽດນາມ ທ່ານ ຫງວ​ຽນຝູຈ້ອງ, ພົບ​ປະ​ແລກ­ປ່ຽນ​ຄຳ​ຄິດ​ເຫັນ​ກັບ​ນາ­ຍົກ­ລັດ­ຖະ­ມົນ­ຕີຫວຽດນາມ ທ່ານ ຫງວ​ຽນ​ຊວນຝຸກ, ເຂົ້າ​ຮ່ວມ​ງານ​ລ້ຽງ​ຂັ້ນ​ລັດ​ ຂອງ​ທ່ານ​ປະ­ທານ​ປະ­ເທດຫວຽດນາມ ເຈີ່ນ​ດ້າຍກວາງ ແລະ ຕ້ອນ­ຮັບ​ຄະ­ນະ​ວິ​ສາ​ຫະ​ກິດຫວຽດນາມ; ຕັ້ງ​ພວງ­ມາ­ລາ​ທີ່​ອະ​ນຸ​ສາ​ວະ­ລີ​ບັນ­ດາ​ນັກ­ຮົບ​ວິ­ລະ​ຊົນ​ຜູ້​ທີ່​ເສຍ​ຊີ­ວິດ​ເພື່ອ​ຊາດ.

* ໃນ​ຕອນ​ເຊົ້າ​ວັນ​ທີ 29 ກັນ­ຍາ, ທີ່​ທຳນຽບ​ປະ​ທານ​ປະ­ເທດຫວຽດນາມ, ທ່ານ​ປະ­ທານ​ປະ­ເທດ ເຈີ່ນ​ດ້າຍກວາງ ໄດ້​ມີ​ການ​ພົບ​ປະ​ເຈລະ­ຈາ​ກັບ​ທ່ານ​ປະ­ທາ­ນາ­ທິ­ບໍ­ດີ ຣ. ດູ​ເຕີ​ແຕ. ທ່ານ​ປະ­ທານ​ປະ­ເທດ ເຈີ່ນ​ດ້າຍກວາງ​ ໄດ້​ຕີ​ລາ­ຄາ​ສູງ​ຕໍ່​ຄວາມ​ໝາຍ​ແຫ່ງ​ການ​ຢ້ຽມ­ຢາມ​ເນື່ອງ​ໃນ​ໂອ­ກາດ​ທັງ​ສອງ​ປະ­ເທດ​ພວມ​ສະເຫຼີມສະຫຼອງ 40 ປີ ແຫ່ງ​ການ​ສ້າງ­ຕັ້ງ​ສາຍ​ພົວ­ພັນ​ທາງ​ການ​ທູດ; ສະແດງ​ຄວາມ​ເຊື່ອ​ໝັ້ນ​ວ່າ ການ​ຢ້ຽມ­ຢາມ​ຂອງ ທ່ານ​ປະ­ທາ­ນາ­ທິ­ບໍ­ດີ ຣ. ດູ​ເຕີ​ແຕ ຄັ້ງ​ນີ້ ​ຈະ​ປະ­ກອບ­ສ່ວນ​ອັນ​ສຳ­ຄັນ​ເຂົ້າ​ໃນ​ການ​ປັບ­ປຸງ ແລະ ຍູ້​ແຮງ​ການ​ພົວ­ພັນ​ຄູ່​ຮ່ວມ​ມື​ຍຸດ​ທະ​ສາດ​ ລະຫວ່າງ​ສອງ​ປະ­ເທດ​ ໃນ​ໄລ­ຍະ​ໃໝ່. ທ່ານ​ປະ­ທາ­ນາ­ທິ­ບໍ­ດີ ຣ. ດູ​ເຕີ​ແຕ ​ໄດ້​ສະ­ແດງ​ຄວາມປິ​ຕິ​​ຊົມ­ຊື່ນ​ທິ່​ໄດ້​ມາ​ຢ້ຽມ­ຢາມ​ປະ­ເທດ ສສ ຫວຽດ­ນາມ ຢ່າງ​ເປັນ​ທາງ​ການ ແລະ ມີ​ຄວາມ​ນິ­ຍົມ​ຊົມ​ຊອບ​ຕໍ່​ບັນ­ດາ​ຜົນ­ງານ​ທີ່ ຫວຽດ­ນາມບັນ­ລຸ​ໄດ້ ​ໃນ​ພາ­ລະ­ກິດ​ແຫ່ງ​ການ​ກໍ່­ສ້າງ​ ​ແລະ ພັດ­ທະ­ນາ​ປະ­ເທດ.

ຜູ້​ນຳ​ທັງ​ສອງ​ໄດ້​ສະ­ແດງ​ຄວາມ​ເພິ່ງ​ພໍ­ໃຈ​ກ່ຽວ​ກັບ​ການ​ພັດ­ທະ­ນາ​ຢ່າງ​ແຂງ­ແຮງ ແລະ ມີ​ປະ​ສິດ­ທິ​ຜົນ​ແຫ່ງ​ການ​ພົວ­ພັນ​ຮ່ວມ​ມື, ມິດ­ຕະ­ພາບ ​ລະ­ຫວ່າງ​ສອງ​ປະ­ເທດ​ໃນ 40 ປີ​ທີ່​ຜ່ານ​ມາ. ສອງ​ຝ່າຍ​ໄດ້​ມີ​ການ​ແລກປ່ຽນ​​ຄະ­ນະ​ຜູ້​ແທນຂັ້ນ​ສູງ​ກໍ່​ຄື​ຂັ້ນຕ່າງໆ ແລະ ສືບ​ຕໍ່​ປະ­ຕິ­ບັດ​ບັນ­ດາ​ກົນ​ໄກຮ່ວມ​ມື​ໃນ​ຫຼາຍ​ຂົງເຂດ​ ຢ່າງ​ເປັນ​ປົກ­ກະ­ຕິ. ການ​ຮ່ວມ​ມື​ດ້ານ​ທະ­ເລ​ໄດ້​ຮັບ​ການ​ຍູ້​ແຮງ ເຊິ່ງ​ໄດ້​ນຳ​ເອົາຜົນ​ປະ­ໂຫຍດທີ່​ແທ້​ຈິງ​ມາ​ໃຫ້​ທັງ​ສອງ​ຝ່າຍ. ການ​ພົວ­ພັນ​ດ້ານປ້ອງ​ກັນ​ຊາດ, ປ້ອງ​ກັນ​ຄວາມ​ສະ­ຫງົບ, ການ​ຄ້າ, ການ​ລົງ­ທຶນ, ວັດ­ທະ­ນະ­ທຳ, ການ​ພົບ​ປະແລກ­ປ່ຽນ​ຂອງ​ປະ­ຊາ­ຊົນ ​ສືບ​ຕໍ່​ໄດ້​ຮັບ​ການ​ເປີດ​ກວ້າງ ດ້ວຍ​ລວມ​ຍອດ​ມູນ​ຄ່າ​ການ​ຄ້າ​ສອງ​ສົ້ນ​ໃນ​ປີ 2015 ບັນ­ລຸ​​ເກືອບ 3 ຕື້ໂດ​ລາ​ສະ­ຫະ­ລັດ, ແລະ ມີ​ນັກ​ລົງ­ທຶນຟີ​ລິບ​ປິນ​ທີ່​ໄດ້​ມາ​ລົງ­ທຶນ​ຢູ່ຫວຽດ­ນາມ ເປັນ​ຈຳ­ນວນ​ຫຼາຍ. ສອງ​ປະ­ເທດ​ໄດ້​ຜັນ​ຂະ­ຫຍາຍ​ ບັນດາການ­ເຄື່ອນ­ໄຫວ​ທີ່ແທດຈິງ ​ເພື່ອ​ສະ­ເຫຼີມ­ສະ­ຫຼອງ ​ວັນ​ສ້າງ­ຕັ້ງ​ການ​ພົວ­ພັນ​ທາງ​ການ​ທູດລະຫວ່າງ​ສອງ​ປະ​ເທດ​ຄົບຮອບ 40 ປີໃນ​ປີ 2016, ໃນ​ນັ້ນ ພິ­ເສດ​ແມ່ນເຫດ­ການ “ບັນ­ດາ​ວັນ​ວັດ​ທະນະ​ທຳຫວຽດ­ນາມຢູ່ ຟີ​ລິບ​ປິນ” (ໃນ​ເດືອນກໍ­ລະ­ກົດ 2016) ແລະ “ບັນ­ດາ​ວັນວັດ​ທະ­ນະ​ທຳຟີ​ລິບ​ປິນຢູ່ ຫວຽດ­ນາມ” (ໃນ​ເດືອນສິງ­ຫາ 2016).

​ເພື່ອກຳ­ນົດ​ທິດ​ໃຫ້​ແກ່​ການ​ພັດ­ທະ­ນາ​​ການ​ພົວ­ພັນ​ລະຫວ່າງ​ສອງ​ປະ­ເທດ​ໃນ​ໄລ­ຍະ​ໃໝ່, ສອງ​ຝ່າຍ​ໄດ້​​ເຫັນ​ດີ​ເປັນ​ເອ­ກະ​ພາບ ​ຈະ​ເພີ່ມ​ທະ­ວີ​ການ​ຮ່ວມ​ມື​ດ້ານ​ການ­ເມືອງ - ການທູດ​ລະຫວ່າງ​ສອງ­ປະ­ເທດ​ ໂດຍ​ຜ່ານ​ການ​ເພີ່ມ​ທະ­ວີ​ການ​ແລກ­ປ່ຽນ​ຄະນະ​ຜູ້​ແທນ​ໄປ​ຢ້ຽມ­ຢາມ, ​ພົບປະ​ຂັ້ນ​ສູງ ແລະ ​ຂັ້ນຕ່າງໆ; ຊຸກ­ຍູ້​ການ​ພົວ­ພັນ​ຕາມ​ຊ່ອງສາຍ​ຕ່າງໆ​ຄື ພັກ, ລັດ​ທະ​ບານ, ສະ­ພາ​ແຫ່ງ​ຊາດ ແລະ ແລກ­ປ່ຽນ​ປະ­ຊາ­ຊົນ; ຍົກ​ສູງ​ປະ​ສິດ­ທິ​ຜົນ​ຂອງ​ບັນດາ​ກົນ​ໄກ​ຮ່ວມ​ມື​ ລະຫວ່າງ​ສອງ​ຝ່າຍ​ທີ່​ມີຢູ່​ຄື: ຄະ­ນະ​ກຳ­ມະ­ການ​ຮ່ວມ​ມື​ຂັ້ນ​ລັດ­ຖະ­ມົນ­ຕີກະ­ຊວງ​ການ​ຕ່າງປະເທດ, ຄະ­ນະ​ກຳມະ­ການ​ປະ­ສົມ​ກ່ຽວ​ກັບ​​ທະ­ເລ ແລະ ມະ­ຫາ​ສະ​ໝຸດ, ອາ​ນຸ​ກຳ­ມະ­ການ​ການ​ຄ້າ, ການສົນທະນາກ່ຽວ​ກັບ​ນະ­ໂຍ­ບາຍປ້ອງ​ກັນ​ຊາດ, ໜ່ວຍ​ປະ­ຕິ­ບັດ​ງານ​ຮ່ວມ​ກັນໃນ​ຂົງ­ເຂດ​ສິນ​ໃນ​ນ້ຳ. ສອງ​ຝ່າຍ​ກໍ່​ໄດ້​ເຫັນ​ດີ​ເປັນ​ເອກະ​ພາບ ຈະ​ສືບ​ຕໍ່​ປະ­ສານ​ສົມ­ທົບກັນ ຈັັດ​ຕັ້ງ​​ການ­ເຄື່ອນ­ໄຫວ​ສະ­ເຫຼີມ­ສະ­ຫຼອງ ​ວັນ​ສ້າງ­ຕັ້ງ​ການ​ພົວ­ພັນທາງ​ການ​ທູດລະ­ຫວ່າງ​ສອງ​ປະ­ເທດຄົບຮອບ ​40 ປີໃນ​ປີ 2016.

ຜູ້​ນຳ​ທັງ​ສອງ​ກໍ່​ໄດ້​ເນັ້ນວ່າ, ສອງ​ຝ່າຍ​ຄວນ​ມາ­ນະ​ພະ­ຍາ­ຍາມ​ກວ່າ​ອີກ ເພື່ອ​ຂຸດ​ຄົ້ນບັນ­ດາ​ຄວາມ​ສາມາດ​ບົ່ມ​ຊ້ອນ ​ຂອງ​ສອງ​ປະ­ເທດ​ຢ່າງ​ມີ​ປະ​ສິດ­ທິ​ຜົນ. ທ່ານ​ປະ­ທານ​ປະ­ເທດຫວຽດນາມ​ໄດ້​ຊົມ­ເຊີຍບັນ­ດາ​ນັກ​ລົງທຶນ ຟີ​ລິບ​ປິນ ທີ່​​ໄດ້ມາ​ລົງ­ທຶນ​ຢູ່ຫວຽດ­ນາມ ໃນ​ບັນ­ດາ​ຂົງ­ເຂດ​ຄື​ກະ­ສິ­ກຳ, ປຸງ​ແຕ່ງ​ສະ­ບຽງ​ອາ­ຫານ, ການ​ບໍ​ລິ​ການທ່ອງ­ທ່ຽວ, ແລະ ສະ­ເໜີ​ໃຫ້ຟີ​ລິບ​ປິນ ສ້າງ​ເງື່ອນ­ໄຂອຳນວຍ​ຄວາມ​ສະ­ດວກ ໃຫ້​​ນັກ​ລົງ­ທຶນຫວຽດນາມ ເຂົ້າ​ຮ່ວມ​ໃນ​ຂົງ­ເຂດ​ຕ່າງໆ​ຂອງຟີ​ລິບ​ປິນຄື: ໂຄງ​ສ້າງພື້ນ­ຖານ​, ການ​ສຳ​ຫຼວດແລະຂຸດ​ຄົ້ນ​ນ້ຳມັນອາຍ​ແກັສ, ​ແຮ່ທາດ, ການ​ບໍ­ລິ­ການ. ສອງ​ຝ່າຍ​ກໍ່​ໄດ້​ເຫັນ​ດີ​ເປັນ​ເອ­ກະ​ພາບ​ກັນ​ວ່າ ຈະ​ເພີ່ມ​ທະ­ວີ​ການ​ຮ່ວມ​ມື​ການ​ຄ້າ​ເຂົ້າສານ, ຕາມ​ນັ້ນ ທ່ານ​ປະ­ທານ​ປະ­ເທດ​ກໍ່​ໄດ້​ຢືນ­ຢັນ​ວ່າ ຫວຽດ­ນາມຈະ​ສືບ​ຕໍ່​ສະ­ໜອງ​ເຂົ້າ­ສານ​ໃຫ້​ແກ່ ຟີ​ລິບ​ປິນ ຢ່າງ​ເປັນ​ປົກກະ­ຕິ ແລະ ຍາວ​ນານ.

ສອງ​ຝ່າຍ​ໄດ້​ຕີ​ລາ­ຄາວ່າ ການ​ຮ່ວມ​ມື​ດ້ານ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະ­ຫງົບ​ ເປັນ​ໜຶ່ງໃນ​ບັນ­ດາ​ເສົາຄ້ຳ​ອັນ​ສຳ­ຄັນ ​ແຫ່ງ​ການ​ພົວ­ພັນ​ຄູ່​ຮ່ວມ​ມື​ຍຸດ​ທະ​ສາດ​ ລະ­ຫວ່າງ​ສອງ​ປະ­ເທດ; ພ້ອມນັ້ນ ​ກໍ່​ໄດ້ເຫັນ​ດີ​ເປັນ​ເອກະ​ພາບ​ກັນ ຈະ​ສືບ​ຕໍ່​ເສີມ​ຂະ­ຫຍາຍ​ປະ​ສິດ­ທິ​ຜົນຂອງ​ບັນ­ດາ​ກົນ​ໄກ​ຮ່ວມ​ມື, ໃນ​ນັ້ນ​ມີ​ກົນ​ໄກສົນ­ທະ­ນາ​ນະໂຍບາຍ​ຂັ້ນ​ຮອງ​ລັດ­ຖະ­ມົນ­ຕີກະ­ຊວງ​ປ້ອງ​ກັນ​ຊາດ, ຍູ້​ແຮງ​ການ​ຮ່ວມ​ມື​ກໍ່­ສ້າງ, ຄົ້ນ­ຄວ້າ, ແບ່ງ­ປັນ​ບົດ­ຮຽນ ​ໃນການ​ເຂົ້າ​ຮ່ວມ​ກຳລັງ​ຮັກ­ສາ​ສັນ­ຕິ­ພາບ​ ຂອງ​ສະ­ຫະ​ປະ­ຊາ​ຊາດ. ຜູ້​ນຳ​ທັງ​ສອງ​ກໍ່​ໄດ້​ເຫັນ​ດີ​ເປັນ​ເອ­ກະ​ພາບ​ກັນ ​ຈະ​ມອບ​ໃຫ້​ບັນ­ດາ​ອົງ­ການ​ປ້ອງ​ກັນ​ຄວາມ​ສະ­ຫງົບ​ຂອງ​ສອງ​ຝ່າຍ ​ເພີ່ມ​ທະ­ວີ​ການ​ແບ່ງ­ປັນ​ຂໍ້​ມູນ​ຂ່າວສານ, ບົດ­ຮຽນ ແລະ ຮ່ວມ​ມືກັນ​ຕໍ່ສູ້​ປ້ອງ​ກັນຕ້ານ ​ອາດ­ຊະ­ຍາ​ກຳ​ປະ­ເພດ​ຕ່າງໆ, ຕໍ່­ຕ້ານ​ການ​ກໍ່​ການ​ຮ້າຍ, ອາດ­ຊະ­ຍາ​ກຳ​ດ້ານ​ເຕັກ​ໂນ​ໂລ​ຊີ​ສູງ, ອາດ­ຊະ­ຍາ​ກຳ​ດ້ານ​ຢາ​ເສບ​ຕິດ ແລະ ການ​ຄ້າ­​ມະ­ນຸດ; ພ້ອມ​ທັງ​ເຈລະຈາແລະເຊັນ ສັນ­ຍາວ່າ​ດ້ວຍ​ການ​ສົ່ງ​ຜູ້​ຮ້າຍ​ຂ້າມ​ແດນ ແລະ ສັນ­ຍາ​ວ່າ​ດ້ວຍ​ການ​ຍົກຍ້າຍ​ຜູ້​ທີ່ຖືກຕັດສິນ​ຈຳ​ຄຸກ ​ໂດຍ​ໄວ. ສອງ​ຝ່າຍ​ກໍ່​ໄດ້​ແລກ­ປ່ຽນ​ຢ່າງ​ເລິກ­ເຊິ່ງ ​ກ່ຽວ​ກັບ​ບັນ­ດາ​ຂົງ­ເຂດ​ຮ່ວມ​ມື​ອື່ນໆ​ຄື: ດ້ານ​ທະເລແລະມະຫາ​ສະໝຸດ, ກະສິກຳ, ຄົມ­ມະ­ນາ­ຄົມ​ຂົນ­ສົ່ງ, ວັດ­ທະ­ນະ­ທຳ ​ທ່ອງ​ທ່ຽວ, ການ​ແລກ­ປ່ຽນ​ປະ­ຊາ­ຊົນ, ການ​ສຶກ​ສາ... ທ່ານ​ປະທານ​ປະ­ເທດ​ຫວຽດນາມໄດ້​ຕີ​ລາ­ຄາ​ສູງ ​ຕໍ່​ລັດ­ຖະ­ບານຟີ​ລິບ​ປີນ ທີ່​ໄດ້​ມີ​ການ​ປະພຶດ​ຢ່າງ​ມະ­ນຸດ­ສະ­ທຳ ແລະ ຮ່ວມ​ມື​ຢ່າງ​ຕັ້ງ­ໜ້າ ​ໃນ​ບັນ­ຫາຊາວ​ປະ­ມົງ, ເຮືອກຳ​ປັ່ນ ໃນ​ຊຸມ​ປີ​ທີ່​ຜ່ານ​ມາ; ພ້ອມ​ທັງ​ສະ­ເໜີ​ໃຫ້ ຟີ​ລິບ​ປີນ ພິຈາລະ­ນາ​ປ່ອຍ​ຕົວ​​ຊາວ​ປະ­ມົງຫວຽດ­ນາມຈຳນວນ​ໜຶ່ງ ທີ່ກຳ­ລັງ​ຖືກ​ກັກ​ຕົວ.

ຄຽງ​ຂ້າງ​ກັບການ​ຮ່ວມ​ມືສອງ​ຝ່າຍ, ສອງ​ຝ່າຍ​ກໍ່​ໄດ້​ສຸມ​ໃສ່​ແລກ­ປ່ຽນ​ກ່ຽວ​ກັບ​ບັນ­ດາ​ບັນ­ຫາ​ສາ­ກົນ ແລະ ພາກ​ພື້ນ ຊຶ່ງ​ຕ່າງ​ຝ່າຍ​ຕ່າງ​ມີ​ຄວາມ​ສົນ­ໃຈ. ສອງ​ຝ່າຍ​ກໍ່​ໄດ້​ຢືນ­ຢັນ​ຈະ​ສະ­ໜັບ­ສະ­ໜູນ​ເຊິ່ງ​ກັນ​ແລະ​ກັນ ເພື່ອ​ສຳເລັດ​ພາ­ລະ​ບົດ­ບາດ​ເປັນ​ປະ­ເທດ​ເຈົ້າ­ພາບ ອາ​ຊຽນ 2017 ຂອງຟີ​ລິບ​ປີນ ແລະ ເປັນ​ປະ­ເທດ​ເຈົ້າ­ພາບ ອາ​ແປກ 2017 ຂອງຫວຽດ­ນາມ; ພ້ອມ​ທັງ​ໃຫ້​ຄຳ​ໝັ້ນ​ສັນ­ຍາ​ສືບ​ຕໍ່​ປະ­ສານ​ສົມ­ທົບ ແລະ ມາ­ນະ​ພະ­ຍາ­ຍາມ ​ພ້ອມ​ກັບ​ບັນດາ​ປະ­ເທດ ອາ​ຊຽນ ອື່ນໆ ​ຜັນ​ຂະ­ຫຍາຍ​ປະ­ຊາ​ຄົມ ອາ​ຊຽນ ຢ່າງ​ສຳ­ເລັດ​ຜົນ, ເຊີດ​ຊູ​ຄວາມ​ສາ­ມັກ­ຄີ ແລະ ເສີມ​ຂະ­ຫຍາຍ​ພາ­ລະ​ບົດ­ບາດ​ເປັນ­ໃຈ​ກາງ­ຂອງອາ​ຊຽນ ໃນ​ໂຄງ​ປະ­ກອບ​ພາກ​ພື້ນ.

ກ່ຽວ​ກັບ​ບັນ­ຫາ​ທະ­ເລ​ຕາ­ເວັນ​ອອກ, ສອງ​ຝ່າຍ​ໃຫ້​ຄຳ​ໝັ້ນ​ສັນ­ຍາ​ຮັກ­ສາ ແລະ ຊຸກ­ຍູ້​ສັນ­ຕິ­ພາບ, ສະ­ຖຽນ​ລະ​ພາບ, ຄວາມ​ສະ­ຫງົບ​ປອດ​ໄພ ແລະ ຄວາມ​ເສລີ​ໃນ​ການ​ເດີນ​ທະ­ເລ, ​ເດີນ​ອາ­ກາດ ​ແລະ​ ການ​ຄ້າ, ​ບໍ່​ໃຫ້​​ຖືກ​ກີດ­ຂວາງ​ໃນ​ພາກ​ພື້ນ, ພິ­ເສດ​ແມ່ນ​ຢູ່​ທະ­ເລ​ຕາ­ເວັນ​ອອກ; ຮຽກ­ຮ້ອງ​ບັນ­ດາ​ຝ່າຍຈົ່ງ​ອົດທົນ​ອົດ​ກັ້ນ, ບໍ່​ນາບ​ຂູ່​ດ້ວຍ​ກຳ­ລັງ​ອາ­ວຸດ ຫຼື ນຳ​ໃຊ້​ກຳ­ລັງ​ອາ­ວຸດ; ເຄົາ­ລົບ​ວິ­ວັດ­​ການ​ດ້ານ​ການ​ທູດ ​ແລະ ດ້ານກົດໝາຍ ຢ່າງ​ຄົບ​ຖ້ວນ; ແກ້​ໄຂ​ຂໍ້​ຂັດ​ແຍ້ງພິພາດດ້ວຍ​ສັນ­ຕິ​ວິ­ທີ ບົນ​ພື້ນ­ຖານ​ບັນ­ດາ​ຫຼັກ­ການ​ພື້ນ­ຖານ​ຂອງ​ກົດ­ໝາຍ​ສາ­ກົນ, ໃນ​ນັ້ນ​ມີສົມ​ທິ​ສັນຍາສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ­ເລ​ປີ 1982 (UNCLOS). ສອງ​ຝ່າຍ​ກໍ່​ໄດ້​ຢືນ­ຢັນ​ຄືນ­ໃໝ່ ກ່ຽວ​ກັບ​ການ​ສະໜັບສະໜູນ​ການ​ຜັນ​ຂະ­ຫຍາຍ​ ຖະ­ແຫຼງ­ການ​ກ່ຽວ​ກັບ​ການ​ປະ­ພຶດ​ຂອງ​ບັນ­ດາ​ຝ່າຍ​ຢູ່​ທະ­ເລ​ຕາເວັນ​ອອກ (DOC) ຢ່າງ​ຄົບ​ຖ້ວນ ແລະ ມີ​ປະ​ສິດ­ທິ​ຜົນ ແລະ ມີ​ການ​ຮ່ວມ​ມື ເພື່ອ​ແນ­ໃສ່​ບັນ­ລຸ​​ປະ­ມວນ​ຂໍ້​ກຳນົດ​ກ່ຽວ​ກັບ​ວິ­ທີ​ປະ­ພຶດ​ຢູ່​ທະ­ເລ​ຕາ­ເວັນ​ອອກ (COC) ​ໂດຍ​ໄວ.

* ໃນ​ຕອນ​ບ່າຍ​ວັນ​ທີ 29 ກັນ­ຍາ, ທີ່​ສຳ­ນັກ­ງານ​ລັດ­ຖະ­ບານ, ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ຊວນຝຸກ ໄດ້​ມີ​ການ​ພົບ​ປະຫາລື​​ກັບ​ທ່ານ​ປະ­ທາ­ນາ­ທິ­ບໍ­ດີ ຟີ​ລິບ​ປີນ ຣ. ດູ​ເຕີ​ແຕ. ກ່າວ​ປາ​ໃສ​ທີ່​ການ​ພົບ​ປະ​ດັ່ງກ່າວ, ໂດຍ​ຕາງ­ໜ້າ​ໃຫ້​ລັດ­ຖະ­ບານຫວຽດ­ນາມ, ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ຊວນຝຸກ ໄດ້ສະ​ແດງ​ຄວາມ​ຊົມເຊີຍ​ຕໍ່​ການ​ຢ້ຽມ­ຢາມຫວຽດ­ນາມ​ຢ່າງ​ເປັນ​ທາງ​ການ​ ຂອງ​ທ່ານ​ປະ­ທາ­ນາ­ທິ­ບໍ­ດີຟີ​ລິບ​ປີນ ຣ. ດູ​ເຕີ​ແຕ, ​ແລະໄດ້​ຖື​ວ່າ ​ນີ້​ເປັນ​ຂີດ​ໝາຍ​ທີ່​ສຳ­ຄັນ​ໃນ​ໂອ­ກາດ​ສະ­ເຫຼີມ­ສະ­ຫຼອງ 40 ປີ​ແຫ່ງ​ວັນ​ສ້າງ­ຕັ້ງ​ການ​ພົວ­ພັນ​ທາງ​ການ​ທູດ​ລະຫວ່າງ​ສອງ​ປະ­ເທດ. ທ່ານ​ນາ­ຍົກ­ລັດ­ຖະ­ມົນ­ຕີ​ໄດ້​ເຫັນ​ດີເປັນ​ເອ­ກະ​ພາບ​ວ່າ ສອງ​ຝ່າຍ​ຄວນ​ເພີ່ມ​ທະ­ວີ​ການຮ່ວມ​ມື​ໃນ​ທຸກ​ຂົງ­ເຂດ ​ຕາມ​ທິດ​ນັບ​ມື້​ນັບ​ມີ​​ປະ​ສິດ­ທິ​ຜົນຕົວ​ຈິງ, ເປັນ­ຕົ້ນ​ແມ່ນ​ດ້ານ​ປ້ອງ​ກັນ​ຊາດ, ປ້ອງ​ກັນ​ຄວາມ​ສະ­ຫງົບ, ການ​ຄ້າ, ການ​ລົງ­ທຶນ ກໍ່​ຄື​ຮ່ວມ​ມື​ໃນ​ບັນ­ດາ​ເວ­ທີ​ປາ​​ໄສ​ຢູ່​ພາກ​ພື້ນ ແລະ ສາ­ກົນ.

ທ່ານ​ປະ­ທາ­ນາ­ທິ­ບໍ­ດີ ຟີ​ລິບ​ປີນ ຣ. ດູ​ເຕີ​ແຕ ​ໄດ້ສະ­ແດງຄວາມ​ນິຍົມ​ຊົມ​ເຊີຍ​ຜົນ­ງານແຫ່ງ​ການ​ຕໍ່­ສູ້​ຍາດ​ເອົາ​ເອກະລາດ​​ແຫ່ງ​ຊາດ ​​ແລະ ​ຜົນ­ສຳ­ເລັດ​ແຫ່ງ​ພາ­ລະ­ກິດ​ປ່ຽນ­ແປງ​ໃໝ່ ພັດ­ທະ­ນາ​ປະ­ເທດຂອງປະຊາຊົນ​ຫວຽດນາມ; ​ແລະໄດ້​ຖື​ເອົາຫວຽດ­ນາມເປັນ​​ແບບ­ຢ່າງ​ ເພື່ອ​ໃຫ້ຟີ​ລິບ​ປີນຮ່ຳ­ຮຽນນຳ. ທ່ານ​ປະທາ­ນາ­ທິບໍ­ດີ​ໄດ້​ຕີ​ລາຄາ​ສູງ​ຕໍ່​ການ​ສະໜັບສະໜູນ​ຊ່ວຍ​ເຫຼືອ​ ທີ່​ລັດ­ຖະ­ບານແລະປະ­ຊາ­ຊົນຫວຽດ­ນາມ ມີ​ຕໍ່​ປະຊາຊົນຟີ​ລິບ​ປີນ, ເປັນຕົ້ນ​ແມ່ນ​ການ​ສະ­ໜອງ​ເຂົ້າ­ສານ ​ຊ່ວຍ​ໃຫ້ຟີ​ລິບ​ປີນພົ້ນ​ອອກ​ຈາກ​ຄວາມ​ຂາດ­ເຂີນ​ອາຫານ​ ໃນ​ເວ­ລາ​ທີ່​ຫຍຸ້ງຍາກ. ທ່ານ​ປະ­ທາ­ນາ­ທິ­ບໍ­ດີ ຟີ​ລິບ​ປີນ ຣ. ດູ​ເຕີ​ແຕ ກໍ່​ໄດ້​ຢືນ­ຢັນ​ວ່າ ຟີ​ລິບ​ປີນມີ​ຄວາມ​ມຸ່ງ​ຫວັງ​ຈະ​ໄດ້​ລົງ​ນາມ ​ໃນຂໍ້​ຕົກ­ລົງ​ຮ່ວມ​ມື​ດ້ານ​ການ​ຄ້າ ​ກັບຫວຽດ­ນາມ​ຕື່ມ​ອີກເປັນ​ຫຼາຍ​ສະ­ບັບ ແລະ ຫວັງ​ວ່າ​ສາຍ​ພົວ­ພັນ​ນີ້ຈະ​ນັບ​ມື້​ນັບໄດ້​ຮັບ​ການ​ພັດ­ທະ­ນາ ເພື່ອ​ຊ່ວຍ​ໃຫ້​ທັງ​ສອງ​ປະ­ເທດ​​ກາຍ­ເປັນບັນ­ດາ​ປະ­ເທດທີ່​ຮັ່ງ­ມີ​ເຂັ້ມ­ແຂງ​ໃນ​ພາກ​ພື້ນ.

* ໃນ​ຕອນ​ບ່າຍ ວັນ​ທີ 29 ກັນ­ຍາ ທີ່​ສຳ­ນັກ­ງານ​ສູນ​ກາງ​ພັກ ທ່ານ​ເລ­ຂາ­ທິ­ການ​ໃຫຍ່​ພັກ​ກອມ​ມູ​ນິດ ຫວຽດ­ນາມ ຫງວ​ຽນ​ຟູຈ້ອງ ໄດ້​ຕ້ອນ­ຮັບທ່ານ​ປະ­ທາ­ນາ­ທິ­ບໍ­ດີ ຟີ​ລິບ​ປີນ ຣ. ດູ​ເຕີ​ແຕ ທີ່​ກຳ­ລັງ​ຢ້ຽມ­ຢາມ ສສ. ຫວຽດ­ນາມຢ່າງ​ເປັນ​ທາງ​ການ. ທ່ານ​ເລ­ຂາ­ທິ­ການ​ໃຫຍ່ ຫງວ​ຽນ​ຟູຈ້ອງ ໄດ້​ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ແຫ່ງ​ການ ເຈລະ­ຈາແລະພົບ​ປະ​ຫາລື ລະ­ຫວ່າງ​ການ​ນຳຫວຽດ­ນາມ ແລະ ປະ­ທາ­ນາ­ທິ­ບໍ­ດີຟີ​ລິບ​ປີນ ທີ່ແນ­ໃສ່ຫັນການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດລະ­ຫວ່າງ​ສອງ​ປະ­ເທດ ​ເປັນພາກ​ປະ­ຕິ­ບັດ​​ຕົວ​ຈິງ, ພາ​ໃຫ້​ການພົວພັນ​ນັບ​ມື້​ນັບ​ພັດທະ­ນາ, ​ສົມ​ກັບ​ຄວາມ​ມຸ່ງ​ມາດ​ປາດ​ຖະ​ໜາ ແລະ ຜົນ​ປະ­ໂຫຍດ​ ຂອງ​ປະ­ຊາ­ຊົນ​ທັງ​ສອງ​ປະ­ເທດ, ປະກອບສ່ວນ​ເຂົ້າ​ໃນ​ການ​ຮັກ­ສາ​ສັນ­ຕິ­ພາບ, ສະ​ຖຽມ​ລະ​ພາບ ແລະ ຮ່ວມ​ມື​ຢູ່​​ໃນພາກ​ພື້ນ. ທ່ານ​ເລ­ຂາ­ທິ­ການ​ໃຫຍ່​ກໍ່​ໄດ້​ຢືນ­ຢັນ​ວ່າ ຫວຽດນາມ ຍາມ​ໃດ​ກໍ່​ກຽມ­ພ້ອມ​ສະ­ໜັບ­ສະ­ໜູນ ແລະ ປະ­ສານ​ສົມ­ທົບ​ກັບ ຟີ​ລິບ​ປີນ ເພື່ອ​ສຳ­ເລັດ​ເປັນ​ຢ່າງ​ດີ​ພາລະ​ບົດ­ບາດ​ເປັນ​ປະ­ທານອາ​ຊຽນ ປີ 2017, ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ກໍ່­ສ້າງ ປະ­ຊາ​ຄົມອາ​ຊຽນ ​ທີ່​ເຂັ້ມແຂງ, ເອ­ກະ​ພາບ ແລະ ພັດ­ທະ­ນາ.

ທ່ານ​ປະ­ທາ­ນາ­ທິ­ບໍ­ດີ ຣ. ດູ​ເຕີ​ແຕ ກໍ່​ໄດ້​ເນັ້ນ​ວ່າ ຟິລິບປິນ ​ໃຫ້​ຄວາມ​ສຳ­ຄັນ​ແກ່​ການ​ຊຸກ­ຍູ້​ສາຍ​ພົວ­ພັນ​ຮ່ວມ​ມືກັບຫວຽດ­ນາມ ໃນ​ທຸກ​ຂົງ­ເຂດ, ທ່ານ​ໃຫ້​ທັດ­ສະ­ນະ​ວ່າ ສອງ​ຝ່າຍ​ຄວນ​ຜັນ​ຂະ­ຫຍາຍ​ເນື້ອ​ໃນ​ການ​ພົວ­ພັນຄູ່​ຮ່ວມ​ມື​ຍຸດ​ທະ​ສາດ​ໃຫ້ໄດ້ຮັບປະ​ສິດ­ທິ​ຜົນ, ແລະ ກໍ່­ສ້າງ ຜັນ​ຂະ­ຫຍາຍ​ການ​ຮັບ­ຮອງ​ເອົາໂຄງ­ການ​ປະ­ຕິ­ບັດງານ​ໄລ­ຍະ 2017 - 2022 ​ໂດຍ​ໄວ, ເສີມ​ຂະ­ຫຍາຍ ແລະ ຂຸດ​ຄົ້ນ​ຄວາມ​ສາ­ມາດ​ບົ່ມ​ຊ້ອນ ໃນ​ການ​ຮ່ວມ​ມື​ລະ­ຫວ່າງ​ສອງ​ປະ­ເທດ. ທ່ານ​ປະ­ທາ­ນາ­ທິ­ບໍ­ດີ​ກໍ່​ຢືນ­ຢັນ​ວ່າ ປະ­ຊາ­ຊົນຟີ​ລິບ​ປີນຈະ​ເປັນ​ອ້າຍ​ນ້ອງ ແລະ ເພື່ອນ​ມິດ​ທີ່ດີ ​ຂອງ​ປະຊາ­ຊົນຫວຽດ­ນາມຕະ­ຫຼອດ​ກາ­ລະ​ນານ.

ການ​ຢ້ຽມ­ຢາມ​ ສສ ຫວຽດ­ນາມ ເທື່ອ​ທຳ​ອິດ​ ຂອງທ່ານ​ປະ­ທາ­ນາ­ທິ­ບໍ­ດີ ຣ. ດູ​ເຕີ​ແຕ ​ໄດ້ສຳ​ເລັດ​ສິ້ນ​ສຸດ​ຢ່າງ​ຈົບ­ງາມ. ການ​ຢ້ຽມ­ຢາມ​ຄັ້ງ​ນີ້​ກໍ່​​ກົງ​ກັບ​ໂອ­ກາດ​​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ການ​ພົວ­ພັນທາງ​ການ​ທູດ​ ລະຫວ່າງ​ສອງ​ປະ­ເທດຄົບຮອບ 40 ປີ ຊຶ່ງໄດ້​ຈາລຶກ​ຜົນ­ງານ​ແຫ່ງການ​ພົວ­ພັນ​ສອງ​ຝ່າຍ ທີ່​ເປັນ​ໜ້າ​ປິ­ຕິ​ຊົມ­ຊື່ນ, ກໍ່​ຄື​ໄດ້​ສ້າງ​ແຮງ​ກະ​ຕູ້ນ​ໃໝ່​ທີ່​ພາ​ໃຫ້­ການ​ພົວ­ພັນ​ຄູ່​ຮ່ວມ​ມື​ຍຸດ​ທະ​ສາດຫວຽດ­ນາມ - ຟີ​ລິບ​ປີນ ຂະ­ຫຍາຍ­ຕົວ​ຢ່າງ​ແຂງ­ແຮງ​ກວ່າອີກ​ໃນ​ໄລ­ຍະ​ໃໝ່./.

ສັງ​ລວມ​ໂດຍ ​ເຟືອງ​ຈ່າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ