ວັນຈັນ, 18/11/2019
ປະທານາທິບໍດີ ອີຣານ ຮັດຊັນ ໂຣຮານີ ມາຢ້ຽມຢາມສັນທະວະໄມຕີ ທີ່ປະເທດຫວຽດນາມ
31/10/2016 16:2' ສົ່ງ ພິມ
ປະທານປະເທດຫວຽດນາມ ເຈິ່ນດ້າຍກວາງ ຕ້ອນຮັບປະທານາທິບໍດີ ອີຣານ ຮັດຊັນ ໂຣຮານີ. (ພາບ: TTXVN)

ໃນ​ຂອບ​ເຂດ​ການ​ຢ້ຽມຢາມ​ຫວຽດນາມ, ທ່ານປະທານາທິບໍດີ ຮັດ​ຊັນ ​ໂຣຮາ​ນີ ​ໄດ້​ເຂົ້າ​ຢ້ຽມ​ຄຳນັບ​ທ່ານ​ເລຂະ​ທິການ​ໃຫຍ່ພັກ​ກອມ​ມູນິດ​ຫວຽດນາມ ຫງວຽນ​ຝູຈ້ອງ, ພົບ​ປະ​ເຈລະຈາ​ກັບ​ທ່ານປະທາ​ນປະ​ເທດ ​ເຈິ່ນດ້າຍ​ກວາງ ​ແລະ ພົບ​ປະ​ກັບ​ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ.

​ໃນ​ບັນຍາກາດ​ແຫ່ງ​ຄວາມ​ເປີດ​ອົກ​ເປີດ​ໃຈ ​ແລະ ສະໜິດສະໜົມ, ບັນດາ​ຜູ້ນຳ​ຂອງ​ສອງ​ປະ​ເທດ​​ໄດ້​ແຈ້ງ​ໃຫ້​ກັນຊາ​ບ ກ່ຽວ​ກັບ​ສະພາບ​ການ​ຂອງ​ແຕ່ລະ​ປະ​ເທດ, ສະ​ແດງ​ຄວາມ​ພຶງ​ພໍ​ໃຈ​ກ່ຽວ​ກັບຜົນງານ​ຄວາມ​ຄືບ​ໜ້າ ​ຂອງ​ສາຍ​ພົວພັນ​ສອງ​ຝ່າຍ ນັບ​ແຕ່​ເມື່ອສອງ​ປະ​ເທດ​ໄດ້​ສ້າງ​ການ​ພົວພັນ​ທາງ​ການ​ທູດ ​ກ່ອນ​ໜ້າ​ນີ້ 40 ປີ, ພິ​ເສດ​ແມ່ນ ຄວາມ​ພັດທະນາ​ທີ່​ຕັ້ງໜ້າ ພາຍຫຼັງການ​ຢ້ຽມຢາມ​ປະ​ເທດ ອີຣານ ໃນ​ເດືອນ​ມີນາ 2016 ຂອງ​ທ່ານອະດີດປະທາ​ນປະ​ເທດຫວຽດນາມ ​ເຈືອງ​ເຕິ​ນຊາງ​. ສອງ​ຝ່າຍ​ໄດ້​ສົນທະນາ ​ແລະ ​ເປັນ​ເອກະສັນ​ກ່ຽວ​ກັບ​ທິດ​ທາງ, ມາດ​ຕະການ ​ເພື່ອ​ແນ​ໃສ່​ຮັດ​ແໜ້ນ​ສາຍ​ພົວພັນ​ທາງ​ດ້ານ​ການ​ເມືອງ​, ບຸລິມະສິດ​ເປີດ​ກວ້າງ​ການ​ຮ່ວມ​ມື​ທາງ​ດ້ານ​ເສດຖະກິດລະຫວ່າງ​ສອງ​ປະ​ເທດ ເພື່ອ​ເປັນ​ພື້ນຖານ​ຊຸກຍູ້​ການ​ພົວພັນ​ສອງ​ຝ່າຍ ​ໃຫ້​ເຂົ້າ​ສູ່ລວງ​ເລິກ​ ​ແລະ ມີ​ຜົນ​ຕົວ​ຈິງ.

* ຢູ່​ທີ່​ທຳນຽບປະທານ​ປະ​ເທດ​ຫວຽດນາມ, ທ່ານປະທາ​ນປະ​ເທດ ​ເຈິ່ນດ້າຍ​ກວາງ ​ໄດ້​ພົບ​ປະ​ເຈລະຈາ​ກັບທ່ານປະທານາທິບໍດີ ຮັດ​ຊັນ ​ໂຣຮາ​ນີ. ​ໂດຍ​ຕາງໜ້າລັດ​ແລະ​ປະຊາຊົນຫວຽດນາມ, ທ່ານປະທາ​ນປະ​ເທດ ​ເຈິ່ນດ້າຍ​ກວາງ ​ໄດ້​ສະ​ແດງ​ຄວາມ​ຊົມ​ເຊີນ​ຢ່າງ​ສຸດ​ໃຈ ​ຕໍ່​ທ່ານປະທານາທິບໍດີ ຮັດ​ຊັນ ​ໂຣຮາ​ນີ ພ້ອມ​ຄະນະ​ຜູ້​ແທນ​ຂັ້ນ​ສູງ ອີຣານ ທີ່​ໄດ້​ມາ​ຢ້ຽມຢາມ​ປະ​ເທດ​ຫວຽດນາມ, ​ເນັ້ນ​ວ່າການ​ຢ້ຽມຢາມ​ສະ​ແດງ​ໃຫ້​ເຫັນ​ເຖິງ​ຄວາມ​ເອົາ​ໃຈ​ໃສ່​ເປັນ​ສຳຄັນ ​ແລະ ຄວາມ​ຕັດສິນ​ໃຈ​ ຂອງບັນດາ​ຜູ້ນຳ​ປະ​ເທດ​ອີຣານ ​ໃນ​ການ​ເພີ່ມ​ທະວີ​ຄວາມ​ພົວພັນ​ລະຫວ່າງ​ສອງ​ປະ​ເທດ ​ໃຫ້​ເລິກ​ເຊິ່ງກວ່າ​ອີກ. ທ່ານປະທາ​ນປະ​ເທດ ​ເຈິ່ນດ້າຍ​ກວາງ ອວຍພອນ​ຊົມ​ເຊີຍ​ອີຣານທີ່​ໄດ້​ຮັບ​ຜົນ​ດີ​ໃນ​ການ​ເຊັນ ​ແຜນການ​ການ​ກະທຳ​ຮອບດ້ານລວມ (JCPOA) ​ແລະ ຄວາມ​ຄືບ​ໜ້າ​ຕ່າງ​ໆພາຍຫຼັງທີ່​ຂໍ້​ຕົກລົງສະບັບນີ້​ໄດ້​ຮັບ​ການ​ລົງ​ນາມ, ​ໃນ​ນັ້ນ​ມີ​ການຍົກ​ເລີກ​ຄຳ​ສັ່ງ​ຫ້າມ​ສົ່ງ​ສິນຄ້າ​ເຂົ້າ​ອອກປະ​ທດ, ​ເປີດ​ໂອກາດ​ເພີ່ມ​ທະວີ​ການ​ຮ່ວມ​ມື​ສອງ​ຝ່າຍ ​ໃນ​ບັນດາ​ຂົງເຂດ​ການ​ເມືອງ ​ເສດຖະກິດ ​ແລະ ວັດທະນະທຳ. ທ່ານປະທານ​ປະ​ເທດກໍ່​ໄດ້​ສະ​ແດງ​ຄວາມ​ຂອບ​ໃຈ ອີຣານ ທີ່​ໄດ້​​ສະໜັບສະໜູນ​​ໃຫ້ຫວຽດນາມສະໝັກ​ຮັບ​ເລືອກ​ຕັ້ງ​ເຂົ້າ​ໃນ​ບັນດາ​ອົງການ​ຈັດ​ຕັ້ງ​ສາກົນ, ພິ​ເສດ​ແມ່ນ​ໃນ​ຂອບ​ຂອງ​ສະຫະ​ປະຊາ​ຊາດ, ​ແລະ​ສະ​ເໜີ​ນຳ ອີຣານ ຈົ່ງ​ສືບ​ຕໍ່​ສະໜັບສະໜູນ​ຫວຽ​ດນາມ ​ໃນ​ການ​ສະໝັກ​ຮັບ​ເລືອກ​ຕັ້ງ​ເຂົ້າ​ໃນ​ຕຳ​ແໜ່​ງຜູ້ອຳນວຍການ​ໃຫຍ່ UNESCO ວາລະ 2017 - 2021 ​ແລະ ​ເປັນ​ສະທາ​ຊິກ​ຄະນະກຳມະການ​ກົດ​ໝານ​ສາກົນ ວາລະ 2017 - 2021. ຝ່າຍ​ອີຣານ ຮັບ​ຮູ້​ຄຳ​ສະ​ເນີ​ຂອງ​ຫວຽດນາມ ​ແລະ ໝັ້ນ​ໝາຍ​ຈະ​ພິຈາລະນາ​ຢ່າງ​ຕັ້ງໜ້າ.

ທ່ານປະທານາທິບໍດີ ຮັດ​ຊັນ ​ໂຣຮາ​ນີ ສະ​ແດງ​ຄວາມ​ດີ​ໃຈ​ທີ່​ໄດ້​ມາ​ຢ້ຽມຢາມ​ປະ​ເທດ​ຫວຽດນາມ​ຄັ້ງ​ທຳ​ອິດ, ສະ​ແດງ​ຄວາມ​ຂອບ​ໃຈ ​ຕໍ່​ການ​ນຳ​ແລະ​ປະຊາຊົນ​ຫວຽດນາມ ທີ່​ໄດ້​​ໃຫ້ການຕ້ອນຮັບ​​ປະທານາທິບໍດີ​ແລະ​ຄະນະ​ຜູ້​ແທນ​ຂັ້ນ​ສູງ​ຂອງ​ອີຣານ ຢ່າງ​ສຸດ​ອົກ​ສຸດ​ໃຈ​ແລະ​ສົມກຽດ. ທ່ານປະທານາທິບໍດີສະ​ແດງ​ຄວາມ​ນິຍົມ​ນັບຖື​ຕໍ່​ທ່ານ​ປະທານປະ​ເທດ​ໂຮ​ຈີ​ມິນ ​ແລະ ທ່ານ​ພົນ​ເອກ ຫວໍ​ ງວຽນ ​ຢາ​ບ; ຄວາມນິຍົມ​ຊົມ​ເຊີຍ​ເຈດ​ຈຳນົງ​ຂອງ​ປະຊາຊົນ​ຫວຽດນາມ​ ໃນ​ການ​ຕໍ່ສູ້ຍາດ​ເອົາ​ເອກະລາດ​ແຫ່ງ​ຊາດ. ທ່ານປະທານາທິບໍດີ ຮັດ​ຊັນ ​ໂຣຮາ​ນີ ອວຍພອນ​ຊົມ​ເຊີຍ ​ບັນດາ​ຜົນສຳ​ເລັດ​ທີ່ຫວຽດນາມຍາດ​ມາ​ໄດ້ ​ໃນ​ບັນດາ​ຂົງ​ເຂດ, ຮັກສາ​ລະບຽບຄວາມສະຫງົບ​ທາງ​ສັງຄົມ ​ແລະ ຄວາມ​ເຕີບ​ໂຕ​ເສດຖະກິດ​ແບບ​ຍືນ​ຍົງ, ປົວ​ແປງ​ສິ່ງ​ແວດ​ລ້ອມ​ແຫ່ງ​ການ​ລົງທຶນ, ຊຸກຍູ້​ການ​ເຊື່ອມ​ໂຍງ​ເສດຖະກິດ​ພາກ​ພື້ນ ​ແລະ ສາກົນ. ທ່ານປະທານາທິບໍດີ ຮັດ​ຊັນ ​ໂຣຮາ​ນີ ຕີ​ລາຄາ​ສູງ​ຕໍ່​ການ​ທີ່​ຫວຽດນາມ​ໃຫ້ການ​ສະໜັບສະໜູນ ​ໃຫ້​ອີຣານ​ເຂົ້າ​ຮ່ວມ​ໃນສົນ​ທິ​ສັນຍາ​ມິດຕະພາບ ​ແລະ ຄວາມ​ຮ່ວມ​ມື​ອາ​ຊຽນ (TAC). ຕາມ​ນັ້ນ, ສອງ​ຝ່າຍ​ຢືນຢັນ​ຄວາມ​ພ້ອມ​ທີ່ຈະ​ເພີ່ມ​ທະວີ​ການ​ຮ່ວມ​ມື​ໃນຫຼາຍ​ດ້ານ ​ແລະ ພ້ອມ​ກັນ​ມານະ​ພະຍາຍາມ​ເພື່ອ​ຄວາມກ້າວໜ້າ ​ແລະ ຄວາມ​ວັດທະນາ​ຖາວອນ​ຢູ່​ທະວີບອາຊີ, ​ໃນ​ນັ້ນ​ມີ ອາ​ຊຽນ.

​ໃນ​ການ​ແລກປ່ຽນ​ກ່ຽວ​ກັບ​ແງ່​ຫວັງ​ແຫ່ງ​ການ​ຮ່ວມ​ມື, ກ່ຽວ​ກັບ​ການ​ເມືອງ, ທ່ານຜູ້ນຳ​ທັງ​ສອງ​ໄດ້​ເຫັນ​ດີ​ເປັນ​ເອກະ​ພາບ​ຈະ​ສືບ​ຕໍ່ມູນ​ເຊື້ອ​ສະໜັບສະໜູນ​ຊຶ່ງ​ກັນ​ແລະ​ກັນ ​ແນ​ໃສ່​ຮັບ​ໃຊ້​ເປົ້າ​ໝາຍ​ການ​ພັດທະນາ​ເພື່ອ​ຄວາມ​ວັດທະນາ​ຖາວອນ​ຂອງ​ສອງ​ປະ​ເທດ, ​ເພື່ອ​ສັນຕິພາບ​ຢູ່​ໃນ​ພາກ​ພື້ນ ​ແລະ ​ໃນ​ໂລກ; ຢືນຢັນ​ຄວາມ​ຈຳ​ເປັນ​ຕ້ອງ​ເພີ່ມ​ທະວີການ​ແລກປ່ຽນ​ຄະນະ​ຜູ້​ແທນ​ຂັ້ນ​ຕ່າງໆ ​ໂດຍ​ຜ່ານ​​ເສັ້ນ​ທາງ​ລັດຖະສະພາ, ລັດຖະບານ​, ທ້ອງ​ຖິ່ນ, ປະຊາ​ຊົນ, ວິ​ສາ​ຫະກິດ; ສືບ​ຕໍ່​ເສີມ​ຂະຫຍາຍ​ປະສິດທິ​ຜົນ​ຂອງ​ບັນດາ​ກົນ​ໄກ​ຮ່ວມ​ມື​ທີ່​ມີ​ຢູ່ຄື ຄະນະ​ກຳມະການ​ລະຫວ່າງ​ລັດຖະບານ, ການ​ປຶກສາ​ຫາລື​ທາງ​ດ້ານ​ການ​ເມືອງ.

ສຳລັບບັນດາ​ບັນຫາ​ສາກົນ, ​ໃນ​ສະພາບ​ແວດ​ລ້ອມ​ສາກົນ​ທີ່​ພວມ​ມີ​ການ​ຜັນ​ປ່ຽນ​ຢ່າງ​ເລິກ​ເຊິ່ງ ​ແລະ ສັບສົນນັ້ນ, ສອງ​ຝ່າຍ​ເນັ້ນ​ເຖິງ​ການ​ເພີ່ມ​ທະວີການ​ຮ່ວມ​ມື​ລະຫວ່າງ​ບັນດາ​ປະ​ເທດ​ທີ່​ກຳລັງ​ພັດທະນາ ​ແລະ​ສະ​ແດງ​ຄວາມ​ເຊື່ອ​ໝັ້ນ​ວ່າ ສັນຕິພາບ ​ແລະ ສະຖຽນ​ລະ​ພາບ​ຢູ່​ອາຊີ​ຕາ​ເວັນ​ອອກສຽງ​ໃຕ້ ​ແລະ ອາຊີ​ຕາ​ເວັນ​ຕົກ ຕ້ອງໄດ້ຮັບ​ການ​ຮັກສາ ​ເພື່ອ​ຜົນ​ປະ​ໂຫຍ​ດລວມຂອງ​ປະຊາ​ຄົມ​ໂລກ.  

ກ່ຽວ​ກັບ​ການ​ຄ້າ ການ​ລົງທຶນ, ສອງ​ຝ່າຍ​​ໃຫ້​ຄຳໝັ້ນສັນຍາ​ຈະສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ທຸກ​ຢ່າງ ​ໃຫ້​ວິ​ສາ​ຫະກິດ​ຂອງ​ສອງ​ປະ​ເທດ ​ໃນ​ການ​ເພີ່ມ​ທະວີ​ການ​ເຂົ້າ​ເຖິງ​ຕະຫຼາດ​ຂອງ​ກັນ​ແລະ​ກັນ ​ເພື່ອ​ແນ​ໃສ່​ບັນລຸ​ເປົ້າ​ໝາຍ​ມູນ​ຄ່າ​ການ​ຄ້າ​ສອງ​ສົ້ນ 2 ຕື້​ໂດ​ລາ​ສະຫະລັດ​ ໃນ​ເວລາ​ຈະ​ເຖິງນີ້. ສອງຝ່າຍ​ແບ່ງປັນ​ຄວາມ​ຄິດ​ກ່ຽວ​ກັບການ​ຊຸກຍູ້​ການ​ຮ່ວມ​ມື​ປູກ​ເຂົ້າ ຂອງ​ອີຣານຢູ່​ຫວຽດນາມ ​ເພື່ອ​ສົ່ງ​ນອກ​ໄປ​ຍັງ​ ອີຣານ. ຫວຽດນາມ​ຮັບ​ຮູ້​ຂໍ້​ສະ​ເໜີ​ຂອງ​ຝ່າຍ​ອີຣານ ກ່ຽວ​ກັບ​ການ​ສ້າງ​ຕັ້ງ​ບັນດາ​ຄະນະ​ກຳມະການ​ຮ່ວມທາງ​ດ້ານ​ການ​ລົງທຶນ ​ແລະ ທະນາຄານ.

ກ່ຽວ​ກັບ​ການ​ຮັກ​ສາ​ຄວາມ​ສະຫງົບ, ສອງ​ຝ່າຍ​ເຫັນ​ດີ​ເປັນ​ເອກະ​ພາບ​ຈະ​ຍູ້​ແຮງ​ການ​ປຶກສາ​ຫາລື ​ແລະ ​ຮ່ວມ​ມື​ກັນ​ ໃນ​ການ​ຕໍ່​ສູ້​ຕ້ານ​ການ​ຄ້າ​ເຖື່ອນ, ການ​ຄ້າ​ຢາ​ເສບ​ຕິດ, ຕ້ານ​ອາ​ຊະ​ຍາ​ກຳ​ຂ້າມ​ຊາດ ​ແລະ ອາ​ຊະ​ຍາ​ກຳ​ເຄືອ​ຂ່າ​ຍອິນ​ເຕີ​ເນັດ, ປັບປຸງ​ບັນດາ​ກົນ​ໄກ​ຮ່ວມ​ມື​ທີ່​ກ່ຽວຂ້ອງ. ສອງ​ຝ່າຍ​ໄດ້ລົງ​ນາມ​ໃນ​ສັນຍາ​ກ່ຽວ​ກັບ​ການ​ຍົກ​ເວັ້ນວີ​ຊາ​ສຳລັບ​ຜູ້​ຖື​ໜັງສືຜ່ານ​ແດນທາງການ ລະຫວ່າງລັດຖະບານແຫ່ ສສ ຫວຽດນາມ ແລະ ລັດຖະບານ​ແຫ່ງ ສາທາລະນະ​ລັດ ອິດສະ​ລາມ ອີຣານ, ບົດ​ບັນທຶກ​ຂໍ້​ຕົກລົງ​ຄວາມ​ຮ່ວມ​ມື​ໃນ​ຂົງ​ເຂດຂໍ້​ມູນ​ຂ່າວສານ​ແລະ​ການ​ສື່ສານ ລະຫວ່າງ​ກະຊວງຖະ​ແຫຼ​ງຂ່າວ ​ແລະ​ການ​ສື່ສານ​ຫວຽດນາມ ​ແລະ ກະຊວງ​ການ​ສື່ສານ​ແລະ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ອີຣານ.

​ເນື່ອງ​ໃນ​ໂດ​ການ​ນີ້, ທ່ານປະທານາທິບໍດີ ຮັດ​ຊັນ ​ໂຣຮາ​ນີ ​ໄດ້​ຖື​ເປັນ​ກຽດ​ເຊີນ​ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ​ໄປ​ຢາມ​ປະ​ເທດ​ອີຣານ​ ໃນ​ເວລາ​ທີ່​ເໝາະ​ສົມ. ທ່ານ​ປະທານ​ປະ​ເທດ​ ເຈິ່ນດ້າຍ​ກວາງ ​ໄດ້​ຍິນ​ດີ​ຮັບ​ຄຳ​ເຊີນ.

* ຕອນ​ເຊົ້າ​ວັນ​ທີ 6 ຕຸລາ, ຢູ່​ທີ່​ສຳນັກງານ​ລັດຖະບານ​ຫວຽດນາມ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ໄດ້​ຕ້ອນຮັບ​ທ່ານປະທານາທິບໍດີ ຮັດ​ຊັນ ​ໂຣຮາ​ນີ. ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ໄດ້​ທວນຄືນ​ຄວາມ​ປະ​ທັບ​ໃຈ​ໃນ​ການ​ຢ້ຽມຢາມ​ປະ​ເທດ​ອີຣານ ​ເມື່ອ​ເດືອນ​ຕຸລາ ປີ 2014, ​ແລະ​ສະ​ແດ​ງຄວາມ​ຂອບ​ໃຈ​ຕໍ່​ຄວາມ​ຮັກ​ແພງ​ ​ມິດ​ຈິດ​ມິດ​ໃຈ​ທີ່​ດີງາມ​ ຂອງ​ບັນດາ​ການ​ນຳ​​ແລະປະຊາຊົນ ອີຣານ ມີ​ຕໍ່​ຫວຽດນາມ. ລັດຖະບານ​, ປະຊາຊົນ​ຫວຽດນາມ ຂໍ​ອວຍ​ພອນ​ຊົມ​ເຊີຍ​ທ່ານ​ປະທານາທິບໍດີ ​ແລະ ປະຊາຊົນ​ອີຣານ ທີ່​ໄດ້​ຮັບ​ຜົນ​ດີ​ໃນການຍົກ​ເລີກ​ຄຳ​ສັ່ງ​ຫ້າມ​ສົ່ງ​ສິນຄ້າ​ ​ແລະ ບັນລຸຂໍ້​ຕົກລົງນິວ​ເຄຼຍຮອບດ້ານ ກັບ​ກຸ່ມ​ປະ​ເທດ ພີ 5+1, ​ຊຶ່ງໄດ້​ໄຂ​ແງ່​ຫວັງ​ການ​ຮ່ວມ​ມືອັນ​ໃຫຍ່​ຫຼວງ ທີ່​ສອງ​ປະ​ເທດ​ຕ້ອງກຳ​ເອົາ ​ແລະ ສົມທົບ​​ກັນ​ຢ່າງ​ແໜ້ນ​ແຟ້ນ​ ​ໃນ​ການ​ຂຸດ​ຄົ້ນ​ ເພື່ອການ​ພັດທະນາ​ຂອງ​ແຕ່ລະ​ປະ​ເທດ ​ແລະ ​ເພື່ອ​ຜົນ​ປະ​ໂຫຍ​ດຂອງ​ສອງ​ຊາດ. ​​

​ເມື່​ອເວົ້າ​ເຖິງ​ບັນດາ​ບັນຫາ​ລະອຽດ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ສະ​ເໜີ​ໃຫ້​ສອງ​ຝ່າຍ​ສຸມ​ໃສ່​ເພີ່ມ​ທະ​ວີ​ທ່າ​ແຮງ​ຂອງ​ສອງ​ປະ​ເທດ. ບົນ​ພື້ນຖານ​ທ່າ​ແຮງ​ຂອງ​ອີຣານ​ໃນ​ຂົງ​ເຂດ​ນ້ຳມັນ​ອາຍ​ແກັດ, ທ່ານ​ນາຍົກລັດຖະມົນຕີ ສະ​ເໜີ້​ໃຫ້​ລັດຖະບານ​ອີຣານ ສືບ​ຕໍ່​ຊ່ວຍ​ເຫຼືອກຸ່ມ​ບໍລິສັດ​ນ້ຳມັນ​ອາຍ​ແກັດຫວຽດນາມ ​ໃນຂະ​ບວນການ​ເລີ່​ມຕົ້ນ​ຄືນ​ໃໝ່ ​ໂຄງການ​ສຳ​ຫຼວດນ້ຳມັນ​ອາຍ​ແກັດ​ຢູ່​ພື້ນ​ທີ່ ດາ​ນານ.

ສຳລັບ​ບັນຫາທະເລ​ຕາ​ເວັນ​ອອກ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ສະ​ເໜີ​ໃຫ້​ອີຣານ ສືບຕໍ່ສະໜັບສະໜູນການ​ຮັກສາ​ສັນຕິ​ພາບ ສະຖຽນ​ລະ​ພາບ, ຮັບປະກັນ​ເສລີພາບ ຄວາມ​ປອດ​ໄພ​ໃນ​ການ​ເດີນທະ​ເລ ​ແລະ​ ການບິນ, ​ແກ້​ໄຂ​ຂໍ້​ພິພາດ​ດ້ວຍ​ສັນຕິ​ວິທີ ບົນ​ພື້ນຖານ​ກົດໝາຍ​ສາກົນ, ປະຕິບັດຖະ­ແຫຼງ­ການ​ກ່ຽວ​ກັບ​ການ​ປະ­ພຶດ​ຂອງ​ບັນ­ດາ​ຝ່າຍ​ຢູ່​ທະ­ເລ​ຕາ­ເວັນ​ອອກ (DOC) ຢ່າງ​ຄົບ​ຖ້ວນແລະມີ​ປະ​ສິດ­ທິ​ຜົນ, ແລະບັນດາ​ຝ່າຍ​ບັນ­ລຸ​ໄດ້​​ປະ­ມວນ​ຂໍ້​ກຳ­ນົດ​ກ່ຽວ​ກັບ​ວິ­ທີ​ປະ­ພຶດ​ຢູ່​ທະ­ເລ​ຕາ­ເວັນ​ອອກ (COC) ​ໂດຍ​ໄວ​ໃນ​ປີ 2017.

ທ່ານປະທານາທິບໍດີ ຮັດ​ຊັນ ​ໂຣຮາ​ນີ ຢືນຢັນ​ຈຸດປະສົງ​ຂອງ​ການ​ຢ້ຽມຢາມ​ຫວຽດນາມ​ຄັ້ງ​ນີ້ ​ແມ່ນ​ເພື່ອ​ແນ​ໃສ່ ສະ​ແດງ​ໃຫ້​ເຫັນ​ເຖິງ​ເຈດ​ຈຳນົງ​ການ​ເມືອງ​ຂັ້ນ​ສູງ​ຂອງ​ອີຣານ ​ໃນ​ການ​ຊຸກຍູ້​ການ​ພົວພັນ​ກັບ​ຫວຽດນາມ. ທ່ານປະທານາທິບໍດີ ຮັດ​ຊັນ ​ໂຣຮາ​ນີ ​ເຫັນ​ດີ​ເປັນ​ເອກະສັນ​ກັບ ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ກ່ຽວ​ກັບ​ການ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ດີ​ທີ່​ສຸດ​ ໃຫ້​ວິ​ສາ​ຫະກິດ​ຂອງ​ສອງ​ປະ​ເທດ ​ເພີ່ມ​ທະວີ​ການ​ຮ່ວມ​ມືນຳ​ກັນ ກໍ່​ຄື​ຮ່ວມ​ມື​ລົງທຶນ​ຢູ່​ປະ​ເທດ​ທີ​ສາມ. ທ່ານປະທານາທິບໍດີ ຮັດ​ຊັນ ​ໂຣຮາ​ນີ ກໍ່​ສະ​ເໜີ​ນຳທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ກ່ຽວ​ກັບ​ການ​ສ້າງ​ຕັ້ງ​ເສັ້ນທາງ​ຂົນ​ສົ່ງ​ທາງ​ທະ​ເລ​ ເພື່ອຍົກ​ສູງ​ການ​ຮ່ວມ​ມື​ທາງ​ດ້ານ​ການ​ຄ້າ​ລະຫວ່າງ​ສອງ​ຝ່າຍ.

* ຕອນ​ແລງ​ວັນ​ທີ 6 ຕຸລາ, ຢູ່​ທີ່​ສຳນັກງານ​ສູນ​ກາງພັກ​ກອມ​ມູນິດ​ຫວຽດນາມ, ທ່ານເລຂະ​ທິການ​ໃຫຍ່ ຫງວຽນ​ຝູຈ້ອງ ​ໄດ້​ຕ້ອນຮັບ​ທ່ານປະທານາທິບໍດີ ຮັດ​ຊັນ ​ໂຣຮາ​ນີ. ທ່ານເລຂະ​ທິການ​ໃຫຍ່​ໄດ້​ແຈ້ງ​ໃຫ້ປະທານາທິບໍດີ ຮັດ​ຊັນ ​ໂຣຮາ​ນີ ຊາບ​ກ່ຽວ​ກັບ​ຜົນສຳ​ເລັດ​ຂອງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງພັກ​ກອມ​ມູນິດ​ຫວຽດນາມ; ສະ​ແດງ​ຄວາມ​ດີ​ໃຈ​ຕໍ່​ບາດກ້າວ​ຂະຫຍາຍຕົວ​ຂອງ​ຄວາມ​ພົວພັນ​ຫວຽດນາມ - ອີຣານ ​ໃນ​ເວລາ​ທີ່​ຜ່ານ​ມາມໍ່​ນີ້; ຢືນຢັນ​ພັກ, ລັດ​ຫວຽດນາມ​ຍາມ​ໃດ​ກໍ່​ເອົາ​ໃຈ​ໃສ່​ຊຸກຍູ້ຄວາມ​ພົວພັນ​ມິດຕະພາບ ການ​ຮ່ວມ​ມື​ກັບ​ບັນດາ​ປະ​ເທດ​ເພື່ອນ​ມິດ​ທີ່​ເປັນ​ມູນ​ເຊື້ອຢູ່​ພາກ​ພື້ນ​ຕາ​ເວັນ​ອອກ​ກາງ, ​ໃນ​ນັ້ນ​ມີ​ອີຣານ.

ທ່ານປະທານາທິບໍດີ ຮັດ​ຊັນ ​ໂຣຮາ​ນີ ອວຍພອນ​ຊົມ​ເຊີຍ​ຜົນສຳ​ເລັດ​ຂອງ​ກອງ​ປະຊຸມ​ໃຫຍ່​ຄັ້ງ​ທີ XII ຂອງພັກ​ກອມ​ມູນິດ​ຫວຽດນາມ, ການ​ເລືອກ​ຕັ້ງ​ສະມາຊິກ​ສະ​ແຫ່ງຊາດ​ຊຸດ​ທີ XIV ​ແລະ ສະມາຊິກ​ສະພາ​ປະຊາຊົນ​ຂັ້ນ​ຕ່າງໆ; ຕີ​ລາຄາ​ສູງ​ຕໍ່​ບັນດາ​ຜົນງານ​ການ​ປ່ຽນ​ແປງ​ໃໝ່, ​ແນວທາງ​ການ​ຕ່າງ​ປະ​ເທດທີ່​ເປັນ​ເອກະ​ລາດ, ​ເປັນ​ເຈົ້າ​ຕົນ​ເອງ ​ແລະ ບົດບາດ​ທີ່​ຕັ້ງໜ້າ​ຂອງ​ຫວຽດນາມ ​ຢູ່​ໃນ​ພາກ​ພື້ນ ​ແລະ ​ໃນ​​ເວທີ​ສາກົນ.

ທ່ານ​ຜູ້ນຳທັງ​ສອງ​ໄດ້​ຕີ​ລາຄາ​ສູງ​ຕໍ່​ບາດກ້າວ​ຂະຫຍາຍຕົວຂອງ​ການ​ພົວພັນ​ລະຫວ່າງ​ສອງ​ປະ​ເທດ​ໃນ​ເວລາ​ທີ່​ຜ່ານ​ມາ, ​ແລະ​ເຫັນ​ດີ​ເປັນ​ອກະພາບຈະ​ເພີ່ມ​ທະວີຄວາມ​ພົວພັນ​ມິດຕະພາບ, ຍູ້​ແຮງ​ການ​ຮ່ວມ​ມື​ໃນ​ຂົງ​ເຂດ​ຕ່າງໆ​ລະຫວ່າງ​ສອງ​ປະ​ເທດ​ອີຣານ ​ແລະ ຫວຽດນາມ​ໃນ​ເວລາ​ຕໍ່​ໄປ ​ເພື່ອ​ຜົນ​ປະ​ໂຫຍ​ດຕົວ​ຈິງ​ຂອງ​ປະຊາຊົນ​ສອງ​ປະ​ເທດ, ປະກອບສ່ວນ​ເຂົ້າ​ໃນ​ສັນຕິພາບ ​ແລະ ການ​ພັດທະນາ​ຂອງ​ພາກ​ພື້ນ ​ແລະ ​ໃນ​ໂລກ.

​ໃນ​ສະພາບ​ການ​ທີ່​ທັງ​ສອງ​ປະ​ເທ​ດພວມກ້າວ​ເຂົ້າ​ສູ່​ໄລຍະ​ໃໝ່​ແຫ່ງ​ການ​ເຊື່ອມ​ໂຍງສາກົນ ​ແລະ ພັດທະນາປະ​ເທດ ດ້ວຍ​ຄວາມ​ປາຖະໜາ​ກ່ຽວ​ກັບ​ຄວາມ​ເຕີບ​ໂຕ​ເສດຖະກິດ ​ແລະ ຄວາມ​ກ້າວໜ້າ​ທາງ​ສັງຄົມ, ການ​ຢ້ຽມຢາມຫວຽດນາມ​ຂອງທ່ານປະທານາທິບໍດີ ອີຣານ ຈະ​ສືບ​ຕໍ່​ສ້າງ​ກຳລັງ​ໜູນ​ໃໝ່ ​ເພື່ອ​ຊຸກຍູ້​ການ​ຮ່ວມ​ມື​ສອງ​ຝ່າຍ, ສົ່ງ​ເສີມ​ທ່າ​ໄດ້​ປຽບ​ຂອງ​ສອງ​ປະ​ເທດ, ປະກອບສ່ວນ​ເຂົ້າ​ໃນ​ການ​ພັດທະນາ​ຂອງ​ແຕ່ລະ​ປະ​ເທດ, ​ເພື່ອ​ຜົນ​ປະ​ໂຫຍ​ດຂອງ​ສອງ​ຊາດ, ​ເພື່ອ​ສັນຕິພາບ​ຢູ່​ໃນ​ພາກ​ພື້ນ ​ແລະ ​ໃນ​ໂລກ./.

ສັງ​ລວມ​ໂດຍ ທູ​ເຟືອງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ