ວັນອາທິດ, 22/9/2019
ການນຳພັກ ລັດຫວຽດນາມ ໃຫ້ການຕ້ອນຮັບທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສົມກຽດ
9/11/2016 11:55' ສົ່ງ ພິມ
ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ແລະ ທ່ານນາຍົກລັດຖະມົນຕີລາວ ທອງລຸນ ສີສຸລິດ. (ພາບ: VGP)

ຕອນ​ແລງ​ວັນ​ທີ 25 ຕຸລາ 2016, ຢູ້ທີ່​ສຳນັກງານ​ສູນ​ກາງ​ພັກ, ທ່ານ​ເລຂາທິການ​​ໃຫຍ່ສູນ​ກາງ​ພັກ​ກອມ​ມູນິດ​ຫວຽດນາມ​ ຫງວຽນ​ຝູຈ້ອງ ໄດ້​ໃຫ້ການ​ຕ້ອນຮັບທ່ານທອງລຸນ ສີສຸລິດ ນາຍົກລັດຖະມົນຕີ ​ແຫ່ງ​ ສປປ ລາວ ຢ່າງ​ອົບ​ອຸ່ນ.

ທ່ານນາຍົກລັດຖະມົນຕີ ທອງລຸນ ສີສຸລິດ ​ໄດ້​ແຈ້ງ​ໃຫ້ທ່ານ​ເລຂາທິການ​​ໃຫຍ່ ຫງວຽນ​ຝູຈ້ອງ ຊາບບາງ​ຈຸດ​ສັງ​ລວມ ກ່ຽວ​ກັບ​ສະພາບ​ການ​ລາວ ​ໃນ​ເວລາ​ທີ່​ຜ່າ​ມາມໍ່​ນີ້, ກ່ຽວ​ກັບ​ຜົນ​ແຫ່ງ​ການ​ເຮັດ​ວຽກ​ກັບທ່ານ​ນາຍົກລັດຖະມົນຕີຫວຽດນາມ ຫງວຽນ​ຊວນ​ຝຸດ ​ແລະ ​ການ​ພົບ​ປະ​ກັບ​ການ​ນຳ​ຂັ້ນ​ສູງ​ຫວຽດນາມ; ຢືນຢັນ​ລັດຖະບານ​ລາວ​ ຈະ​ສົມທົບ​ຢ່າງ​ແໜ້ນ​ແຟ້ນ ກັບ​ລັດຖະບານ​ຫວຽດນາມ ​ໃນ​ການ​ຊີ້​ນຳບັນດາ​ກະຊວງ ຂະ​ແໜງ​ການ ທ້ອງ​ຖິ່ນ​ທີ່​ກ່ຽວຂ້ອງ ​ເພື່ອ​ຜັນ​ຂະຫຍາຍ ປະຕິບັດ​ບັນດາຂໍ້​ຕົກລົງ​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ພັກ, ສອງປະ​ເທດ ​ແລະ ບັນດາ​ເນື້ອ​ໃນ​ກອງ​ປະຊຸມຄັ້ງ​ທີ່ 38 ຂອງ​ຄະນະ​ກຳມະການ​ລະຫວ່າງ​ລັດຖະບານກ່ຽວ​ກັບ​ການ​ຮ່ວມ​ມື​ຫວຽດນາມ - ລາວ.

ທ່ານ​ເລຂາທິການ​​ໃຫຍ່ ຫງວຽນ​ຝູຈ້ອງ ຕີ​ລາຄາ​ສູງ​ຕໍ່​ຜົນ​ຂອງ​ການ​ຮ່ວມ​ມື​ລະຫວ່າງສອງ​ລັດຖະບານ ​ໃນ​ເວລາ​ທີ່​ຜ່ານ​ມາ ​ແລະ ສະ​ເໜີ​ນຳທ່ານນາຍົກລັດຖະມົນຕີ ທອງລຸນ ສີສຸລິດ ສືບ​ຕໍ່​ສົມທົບ​ກັບ​ຫວຽດນາມ​ ໃນ​ການ​ຊີ້​ນຳ​ບັນດາ​ກະຊວງ ທ້ອງ​ຖິ່ນ ວິ​ສາ​ຫະກິດ ​ໃຫ້​ເປັນ​ເຈົ້າ​ການ​ຜັນ​ຂະຫຍາຍ​ປະຕິບັດ​ບັນດາ​ສັນຍາ ຂໍ້​ຕົກລົງ​ກ່ຽວ​ກັບ​ເສດຖະກິດ ການສຶກສາ ວັດທະນະທຳ ວິທະຍາສາດ-​ເຕັກນິກ ຢ່າງ​ຕັ້ງໜ້າ ​ມີ​ປະສິດທິ​ຜົນ, ​ເປັນ​ຕົ້ນ​ແມ່ນ ສັນຍາ​ຮ່ວມ​ມື​ລະຫວ່າງ​ລັດຖະບານ​ໄລຍະ 2016 - 2020 ​ແລະ ​ແຜນການ​ຮ່ວມ​ມື​ປີ 2016, ​ໃນ​ນັ້ນ ລົງ​ເລິກ​ເຂົ້າ​​ໃນການ​ແລກປ່ຽນ​ຂໍ້​ມູນ​ຂ່າວ​ສານ ບົດຮຽນ ​ກ່ຽວ​ກັບ​ວຽກ​ງານ​ກໍ່ສ້າງ​ພັກ, ຄຸ້ມ​ຄອງ​ບໍລິຫານ​ເສດຖະກິດ - ສັງຄົມ, ​ເພີ່ມ​ທະວີ​ການ​ຮ່ວມ​ມື​ທາງ​ດ້ານ​ປ້ອງ​ກັນຊາ​ດ ປ້ອງ​ກັນ​ຄວາມ​ສະຫງົບ ການ​ຕ່າງປະ​ເທດ; ​ເສີມຂະຫຍາຍ​ບັນດາ​ກົນ​ໄກ​ຮ່ວມ​ມື​ທີ່​ມີ​ຢູ່​ລະຫວ່າງ​ສອງ​ປະ​ເທດ; ສຸມ​ໃສ່​ແກ້​ໄຂຄວາມຫຍຸ້ງຍາກ ສິ່ງ​ຄົງຄ້າງ, ສ້າງ​ການ​ຫັນປ່ຽນຕົວ​ຈິງ​ຢ່າງ​ຕັ້ງໜ້າທາງ​ດ້ານ​ຄຸນ​ນະພາ​ບ, ປະສິດທິ​ຜົນຂອງ​ການ​ຮ່ວມ​ມື​ໃນ​ຂົງ​ເຂດ​ຕ່າງໆ.

ທ່ານ​ເລຂາທິການ​​ໃຫຍ່ ຫງວຽນ​ຝູຈ້ອງ ​ແລະ ທ່ານນາຍົກລັດຖະມົນຕີ ທອງລຸນ ສີສຸລິດ ສະ​ແດງ​ຄວາມ​ດີ​ໃຈ​ກ່ຽວ​ກັບ​ສາຍ​ພົວພັນ​ສາມັກຄີ​ພິ​ເສດ ​ແລະການ​ຮ່ວມ​ມື​ຮອບດ້ານ​ຫວຽດນາມ - ລາວ ທີ່​ນັບ​ມື້​ນັບຂະຫຍາຍຕົວ​ເຂົ້າ​ສູ່​ລວງ​ເລິກ, ປະກອບສ່ວນ​ທີ່​ສຳຄັນ​ ເຂົ້າ​ໃນ​ພາລະກິດ​ກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ ​ຂອງ​ປະຊາຊົນ​ແຕ່ລະ​ປະ​ເທດ. ສອງ​ຝ່າຍ​ຢືນຢັນ​ພ້ອມ​ກັນ​ຮັກສາ, ​ເພີ່ມ​ພູນ​ຄູນ​ສ້າງ, ​ເສີມ​ຂະຫຍາຍ​​ ແລະ ຖ່າຍ​ທອດສາຍ​ພົວພັນ​ສະມັກ​ຄີ​ພິ​ເສດ​ຫວຽດນາມ - ລາວ ​ໃຫ້​ຄົນ​ຮຸ່ນ​ຫຼັງຂ​ອງສອງ​ປະ​ເທດ.

* ກ່ອນ​ນັ້ນ, ຢູ່​ທີ່​ສຳນັກງານ​ລັດຖະບານ​ຫວຽດນາມ, ທ່ານນາຍົກລັດຖະມົນຕີ ຫງວຽນຊວນຝຸກ ​ໄດ້​ດຳ​ເນີນ​ການ​ພົບ​ປະ​ເຈລະຈາ​ກັບທ່ານນາຍົກລັດຖະມົນຕີລາວ ທອງລຸນ ສີສຸລິດ.

​ໃນ​ທີ່​ການ​ພົບ​ປະ​ເຈລະຈາ, ທ່ານນາຍົກລັດຖະມົນຕີ ຫງວຽນຊວນຝຸກ ​​ແຈ້ງ​ໃຫ້​ຊາບ​ວ່າ, ລັດຖະບານ​ຫວຽດນາມ​ກຳລັງ​ກຽມ​ເອກະສານ ​ເພື່ອ​ຊຸກຍູ້ ຮຽກ​ຮ້ອງ​ໃຫ້​ວິ​ສາ​ຫະກິດ​ຫວຽດນາມປະຕິບັດ​ບັນດາ​ໂຄງການ​ຢູ່​ລາວ ຢ່າງ​ຖືກຕ້ອງ​ຕາມ​ຄຳ​ໝັ້ນ​ສັນຍາ. ທ່ານນາຍົກລັດຖະມົນຕີ ກໍ່​ສະ​ເໜີ​ນຳ​ລັດ​ຖະບານ​ລາວ ​​ມີ​ມາດ​ຕະການຊ່ວຍ​ແກ້​ໄຂ​ຄວາມ​ຫຍຸ້ງຍາກຂອງ​ວິ​ສາ​ຫະກິດ​ຫວຽດນາມ​ທີ່​ລົງທຶນ​ຢູ່​ລາວ. ທ່ານນາຍົກລັດຖະມົນຕີຊີ້​ແຈງ​ວ່າ, ມູນ​ຄ່າ​ການ​ຄ້າ​ສອງ​ສົ້ນ​ຫວຽດນາມ - ລາວ​ປະຈຸ​ບັນຍັງຢູ່​ໃນ​ລະດັບ​ຕ່ຳ, ​ເພາະສະ​ນັ້ນ, ກະຊວງ​ອຸດ​ສະຫະ​ກຳ​ການ​ຄ້າ​ຂອງ​ສອງ​ປະ​ເທດ ຄວນ​ປຶກສາ​ສົນ​ທະນາ ຊອກ​ຫາ​ສາ​ເຫດ ​ແລະ ວາງ​ວິທີ​ແກ້​ໄຂ ​ເພື່ອ​ຍົກ​ມູນ​ຄ່າ​ການ​ຄ້າສອງ​ສົ້ນ​ຂຶ້ນ. ທ່ານນາຍົກລັດຖະມົນຕີ ສະ​ເໜີ​ໃຫ້​ລັດຖະບານ​ມອບ​ໃຫ້​ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດຂອງ​ສອງ​ປະ​ເທດ ຮັບຜິດຊອບ​ພິ​ເສດສະ​ເພາະ ​ການຈັດ​ຕັ້ງ​ສະ​ເຫຼີ​ມສະຫຼອງ ວັນ​ສ້າງ​ຕັ້ງ​ສາຍ​ພົວພັນ​ທາງ​ການ​ທູດ​ ລະຫວ່າງ​ສອງ​ປະ​ເທດ​ຄົບຮອບ 55 ປີ ​ແລະ ວັນ​ເຊັນ​ສົນທິສັນຍາ​ມິດຕະພາບ​ ແລະ​ການ​ຮ່ວມ​ມື​ຫວຽດນາມ - ລາວ ຄົບຮອບ 40 ປີ ​ໃນ​ປີ 2017.

ສ່ວນ​ຕົນ​ເອງ, ທ່ານນາຍົກລັດຖະມົນຕີ ທອງລຸນ ສີສຸລິດ ​ໃຫ້​ຮູ້ວ່າ ການ​ລົງທຶນ​ຂອງ​ຫວຽດນາມ​ຢູ່​ລາວ​ໄດ້​ເພີ່ມ​ຂຶ້ນ​ຢ່າງ​ບໍ່​ຢຸດ​ຢັ້ງ, ຫຼາຍ​ໂຄງການ​ໄດ້​ຜັນ​ຂະຫຍາຍ​ຕາມ​ແຜນການ, ປະກອບສ່ວນ​ສຳຄັນ​ເຂົ້າ​ໃນ​ການ​ພັດທະນາ​ເສດຖະກິດ - ສັງຄົມ​ຂອງ​ລາວ, ​ເປັນ​ປະ​ເທດ​ທີ່​ມີ​ຈຳນວນ​ເງິນ​ລົງທຶນ​ໃນ​ອັນ​ດັບ​ທີ່​ສາມ​ເຂົ້າ​ລາວ, ຖັດລົງ​ມາ​ຈາກ​ຈີນ ​ແລະ ​ໄທ. ກ່ອນ​ເມື່ອ​ເດີນທາງ​ມາ​ຫວຽດນາມ, ທ່ານນາຍົກລັດຖະມົນຕີ ທອງລຸນ ສີສຸລິດ ​ແລະ ສະມາຊິກ​ລັດຖະບານ​ກວ່າ​ເຄິ່ງໜຶ່ງ ​ໄດ້​ມີ​ການສົນທະນາ​ເປັນ​ພິ​ເສດ​ ກັບ​ວົງ​ການ​ວິ​ສາ​ຫະກິດ​ຫວຽດນາມ​ທີ່​ມີ​ການ​ລົງທຶນ​ຢູ່​ລາວ. ​ໃນ​ການ​ຢ້ຽມຢາມ​ປະ​ເທດ​ລາວ​ຂອງທ່ານຮອງນາຍົກລັດຖະມົນຕີ ຈິ້ງ​ດິ່ງ​ຢຸ໊ງ ທີ່​ຜ່ານ​ມາ​ມໍ່​ນີ້, ສອງ​ຝ່າຍ​ໄດ້​ບັນລຸ​ຂໍ້​ຕົກລົງ​ທີ່​ສຳຄັນ​ກ່ຽວ​ກັບບາງ​ໂຄງການ​ຜະລິດ​ໄຟຟ້າ ກໍ່​ຄື​ມອບ​ໃຫ້​ກະຊວງ​ອຸດສາຫະກຳ​ການ​ຄ້າຂອງ​ສອງ​ປະ​ເທດ ຊອກ​ຫາ​ມາດ​ຕະການ​ ເພື່ອ​ຍົກ​ມູນ​ຄ່າ​ການ​ຄ້າ​ສອງ​ສົ້ນ​ຂຶ້ນ​ຕື່ມ​ອີກ​ຢ່າງ​ໜ້ອຍ 20%.

ທ່ານນາຍົກລັດຖະມົນຕີ ທອງລຸນ ສີສຸລິດ ກໍ່​ແຈ້ງ​ໃຫ້​ຝ່າຍ​ຫວຽດນາມ​ຊາບ​ວ່າ ລັດຖະບານ​ລາວ​ໄດ້​ເຫັນ​ດີ​ເປັນ​ເອກະສັນ​ກັບ​ຂໍ້​ສະ​ເໜີ​ຂອງ​ຫວຽດນາມ ກ່ຽວ​ກັບ​ທິດ​ສາຍ​ທາງ​ຂອງ​ທາງ​ດ່ວນ​ວຽງ​ຈັນ - ຮ່າ​ໂນ້ຍ, ພ້ອມ​ນັ້ນ​ກໍ່​ສະ​ເໜີ​ນຳ​ລັດຖະບານ​ຫວຽດນາມ ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ລາວ​ສາມາດ​ນຳ​ໃຊ້​ທ່າ​ເຮືອ​ວຸ້ງອ໊າງຢ່າງ​ມີ​ປະສິດທິ​ຜົນ.

* ຢູ່​ທີ່​ທຳນຽບປະທານ​ປະ​ເທດຫວຽດນາມ, ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ​ໄດ້​ໃຫ້ການ​ຕ້ອນຮັບທ່ານນາຍົກລັດຖະມົນຕີລາວ ທອງລຸນ ສີສຸລິດ ຢ່າງ​ອົບ​ອຸ່ນ​ແລະ​ສົມ​ກຽດ.

ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ສະ​ແດງ​ຄວາມ​ປິ​ຕິ​ຍິນ​ດີ​ຕໍ່​ການ​ຂະຫຍາຍຕົວ​ຢ່າງດີງາມທີ່​ສຸດ ​ຂອງ​ຄວາມ​ພົວພັນ​ຫວຽດນາມ - ລາວ​ ໃນ​ທຸກຂົງ​ເຂ​ດ. ສອງ​ປະ​ເທດ​ໄດ້​ມີ​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ສູງ​ຢ່າງ​ເປັນ​ປະຈຳ, ທີ່​ຜ່ານ​ມາ​ມໍ່​ນີ້ ທ່ານ​ນາງ​ປະ​ທານ​ສະພາ​ແຫ່ງ​ຊາດ ຫງວຽນ​ທິກີ​ມ​ເງິນ ​ໄດ້​ດຳ​ເນີນ​ການ​ຢ້ຽມຢາມ​ປະ​ເທດ​ລາວ​ຢ່າງ​ເປັນ​ທາງ​ການ (​ເດືອນ​ກັນຍາ 2016) ​ໄດ້​ປະກອບ​ສ່ວນ​ຮັດ​ແໜ້ນ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ ​ແລະ ຄວາມ​ສາມັກຄີ​ພິ​ເສດ​ຫວຽດນາມ - ລາວ. ​ເພື່ອ​ໃຫ້​ສາຍ​ພົວພັນ​ສາມັກຄີ​ພິ​ເສດ ການຮ່ວມ​ມື​ຮອບດ້ານລະຫວ່າງ​ກວຽດນາມ - ລາວ ສື​ນຕໍ່​ຂະຫຍາຍຕົວ​ເຂົ້າ​ສູ່​ລວງ​ເລິກ ​ແທດ​ຈິງ ​ແລະ ມີ​ປະສິດທິ​ຜົນ, ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ສະ​ເໜີ​ໃຫ້​ລັດຖະບານ​ສອງ​ປະ​ເທດ​ສືບ​ຕໍ່​ສ້າງ​ເງື່ອນ​ໄຂ ຜັນ​ຂະຫຍາຍ​ບັນດາ​ໂຄງການ​ລົງທຶນ​ລະຫວ່າງ​ສອງ​ປະ​ເທດຢ່າງ​ມີ​ປະສິດທິ​ຜົນ, ​ໃນ​ນັ້ນ​ມີ​ບັນດາ​ໂຄງການ​ລົງທຶນ​ຂອງ​ວິສາ​ຫະກິດ​ຫວຽດນາມ​ຢູ່​ລາວ; ຍູ້​ແຮງ​ການ​ຜັນ​ຂະຫຍາຍ​ບັນດາ​ໂຄງການ​ເຊື່ອມ​ຕໍ່​ຈຸດ​ໜັກ​ກ່ຽວ​ກັບ​ພະລັງງານ ​ແລະ ຄົມມະນາຄົມ​ຂົນ​ສົ່ງ ​ລະຫວ່າງ​ສອງ​ປະ​ເທດ, ​ໃນ​ນັ້ນ​ມີ​ໂຄງການ​ສ້າງ​ທາງ​ດ່ວນ​ຮ່າ​ໂນ້ຍ - ວຽງຈັນ, ​ໂຄງການ​ກໍ່ສ້າງສາງ​ພັກ​ນ້ຳມັນ ​ແລະ ລະບົບ​ທໍ່​ສົ່ງ​ນ້ຳມັນ ຈາກ​ທ່າ​ເຮືອ ຮອນ​ລາ (​ແຂວງ​ກວ໋າງບິ່ງ) ຫາ​ແຂວງ​ຄຳ​ມ່ວນ​ຂອງ​ລາວ; ສືບ​ຕໍ່​ເພີ່ມ​ທະວີ​ຊຸກຍູ້​ການ​ຮ່ວມ​ມມື​ລະຫວ່າງ​ສອງ​ປະ​ເທດ​ໃນ​ບັນດາ​ຂົງ​ເຂດ ຮັກສາ​ຄວາມ​ສະຫງົບ, ປ້ອງ​ກັນຊາ​ດ, ວັດທະນະທຳ, ອົບຮົມກໍ່ສ້າງ​ບຸກຄະລາ​ກອນ, ສາທາລະນະ​ສຸກ, ການທ່ອງ​ທ່ຽວ ​ແລະ ການ​ພົບ​ປະ​ສັງ​ສັນ​ປະຊາຊົນ ບົນ​ພື້ນຖານ​ບັນດາ​ຂໍ້​ຕົກລົງ ​ແຜນ​ການ​ຮ່ວມ​ມື​ລະອຽດ​ປະຈຳ​ປີ ຫຼື 5 ປີ ລະຫວ່າງ​ບັນດາ​ກະຊວງ, ຂະ​ແໜງ​ການ​ທີ່​ກ່ຽວ​ຂ້ອງຂອງ​ສອງ​ປະ​ເທດ;…

ສ່ວນ​ຕົນ​ເອງ, ທ່ານນາຍົກລັດຖະມົນຕີ ທອງລຸນ ສີສຸລິດ ສະ​ແດງ​ຄວາມ​ດີ​ໃຈ​ທີ່​ໄດ້​ຮູ້​ວ່າ ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ຈະ​ໄປ​ຢາມ​ປະ​ເທດ​ລາວ​ໃນ​ໂອກາດ​ການ​ເຄື່ອນ​ໄຫວ​ສະ​ເຫຼີ​ມສະຫຼອງ​ທີ່​ສຳຄັນ ​ຂອງ​ສອງ​ປະ​ເທດ​ໃນ​ປີ 2017, ຢືນຢັນ​ຝ່າຍ​ລາວ​ຈະ​ກະກຽມ​ເປັນ​ຢ່າງ​ດີ​ ເພື່ອ​ໃຫ້ການ​ເຄື່ອນ​ໄຫວ​ເຫຼົ່າ​ນັ້ນບັນລຸ​ຜົນສຳ​ເລັດ​ດີ​ທີ່​ສຸດ. ​ເນື່ອງໃນ​ໂອ​ກາດນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ກໍ່​ຖື​ເປັນ​ກຽດ​ຝາກ​ຄວາມ​ຢ້ຽມຢາມ​ຖາມ​ຂ່າວ​ຂອງ​ທ່ານ​ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ປະທານ​ປະ​ເທດ​ແຫ່ງ ສປປ ລາວ ມາ​ຍັງທ່ານ ​ເຈິ່ນດ້າຍ​ກວາງ ​ປະທານ​ປະ​ເທດແຫ່ງ ສສ ຫວຽດນາມ; ​ແລະ​ແບ່ງ​ເບົາ​ຄວາມ​ເສຍ​ຫາຍທາງ​ດ້ານ​ຊັບ​ສິນ​ແລະ​ຊີວິດ​ອິນ​ຊີຂອງ​ປະຊາຊົນ​ພາກ​ກາງ​ຫວຽດນາມ ຍ້ອນ​ໄພ​ນ້ຳ​ມາກ​ນ້ຳ​ຖ້ວມ​ໃນ​ເດືອນ​ທີ່​ຜ່ານ​ມາ.

* ຢູ່​ທີ່​ອາຄານ​ສະພາ​ແຫ່ງ​ຊາດຫວຽດນາມ, ທ່ານ​ນາງ​ປະທານ​ສະພາ​ແຫ່ງ​ຊາດ​ຫວຽດນາມ ຫງວຽນ​ທິກີ​ມ​ເງິນ ​ໄດ້​ພົບ​ປະ​ກັບທ່ານນາຍົກລັດຖະມົນຕີລາວ ທອງລຸນ ສີສຸລິດ.

ທ່ານ​ນາງ​ປະທານ​ສະພາ​ແຫ່ງ​ຊາດ ຫງວຽນ​ທິກີ​ມ​ເງິນ ​ໄດ້​ໃຫ້​ຮູ້​ວ່າ, ການ​ຢ້ຽມຢາມ​ສັນທະ​ວະ​ໄມຕີ​ປະ​ເທດ ສປປ ລາວ ຂອງຄະນະ​ຜູ້​ແທນ​ຂັ້ນ​ສູງ​ຂອງ​ສະພາ​ແຫ່ງ​ຊາດ​ຫວຽດນາມ ​ເມື່ອ​ທ້າຍ​ເດືອນ​ກັນຍາທີ່​ຜ່ານ​ມາ ​ໄດ້​ຮັບ​ຜົນ​ອັນ​ດີງາມ; ສະ​ແດງ​ຄວາມ​ປະສົງວ່າ, ​ໃນ​ເວລາ​ທີ່​ຈະ​​ເຖິງ​ນີ້, ທ່ານນາຍົກລັດຖະມົນຕີ ທອງ​ລຸນ ສີ​ສຸ​ລິດ ຈະ​ສືບ​ຕໍ່​ເອົາ​ໃຈ​ໃສ່​ຊີ້​ນຳ​ຊຸກຍູ້​ການ​ພົວພັນ​ຮ່ວມ​ມື​ໃນ​ທຸກ​ຂົງ​ເຂດ​ ລະຫວ່າງ​ສອງ​ປະ​ເທດ, ພິ​ເສດ​ແມ່ນ​ການ​ຮ່ວມ​ມື​ທາງ​ດ້ານ​ເສດຖະກິດ ການ​ລົງທຶນ ການ​ຄ້າ.

​ໂດຍຕີ​ລາຄາ​ສູງຕໍ່​ການ​ເຈລະຈາ​ລະຫວ່າງ​ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ແລະ ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ທີ່​ຫາ​ກໍ່​ໄດ້​ດຳ​ເນີນ​ມາ​ ຊຶ່ງ​ໃນ​ນັ້ນ​ໄດ້​ປຶກສາ​ຫາລືກ່ຽວ​ກັບ​ຫຼາຍ​ນະ​ໂຍບາຍ​ທີ່​ສຳຄັນ, ທ່ານ​ນາງ​ປະທານ​ສະພາ​ແຫ່ງ​ຊາດ ຫງວຽນ​ທິກີ​ມ​ເງິນ ຢືນຢັນ​ສະພາ​ແຫ່ງ​ຊາດ​ຫວຽດນາມ ​ໃຫ້​ຄວາມ​ສະໜັບສະໜູນ​ເຕັນ​ສ່ວນ ​ແລະ ຈະ​ສົມທົບ​ຢ່າງ​ຕັ້ງໜ້າ​ແໜ້ນ​ແຟ້ນ ກັບ​ສະພາ​ແຫ່ງ​ຊາດ​ລາວ ​ເພື່ອ​ຊຸກຍູ້​ຢ່າງ​ແຂງ​ແຮງ​ໃຫ້ການ​ປະຕິບັດ​ບັນດາ​ຂໍ້​ຕົກລົງ​ຮ່ວມ​ມື​ຂອງ​ລັດຖະບານ​ສອງ​ປະ​ເທດ​ມີ​ປະສິດ​ທິຜົນຕົວ​ຈິງ.

ທ່ານ​ນາຍົກລັດຖະມົນຕີລາວ ​ໃຫ້​ຮູ້​ວ່າ, ​ເຊັ່ນ​ດຽວ​ກັນກັບ​ຫວຽດນາມ, ສະພາ​ແຫ່ງ​ຊາດ​ລາວ​ຫາ​ກໍ່​ດຳ​ເນີນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ​ສອງ, ກ່ຽວ​ກັບ​ຂົງ​ເຂດ​ນີ້, ຝ່າຍ​ລາວ​ຫວັງ​ວ່າ​ສະພາ​ແຫ່ງ​ຊາດ​ຫວຽດນາມ ຈະ​ສົມທົບ​ຢ່າງ​ແໜ້ນ​ແຟ້ນກັບ​ສະພາ​ແຫ່ງ​ຊາດ​ລາວ​ໃນ​ວຽກ​ງານ​ສ້າງ​ກົດໝາຍ./.

ສັງລວມ​ໂດຍ ບນ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ