ວັນອາທິດ, 17/11/2019
ກອງປະຊຸມຂັ້ນສູງຮ່ວມມື ກຳປູເຈຍ-ລາວ-ມຽນມາ-ຫວຽດນາມ ຄັ້ງທີ 8 - ກຳໂອກາດ, ສ້າງອະນາຄົດ
10/11/2016 21:4' ສົ່ງ ພິມ
ທ່ານນາຍົກລັດຖະມົນຕີ ຫງວຽນຊວນຝຸກ ເປັນປະທານກອງປະຊຸມ. (ພາບ: TTXVN)

ທ່ານ ຫງວຽນ​ຊວນ​ຝຸກ ນາຍົກລັດຖະມົນຕີ​ແຫ່ງ ສສ ຫວຽດນາມ​ ​ເປັນ​ປະທານ​ກອງ​ປະຊຸມ.

​ເຂົ້າ​ຮ່ວມ​ກອງ​ປະຊຸມ​ຂັ້ນ​ສູງ CLMV 8 ​ແລະ ກອງ​ປະຊຸມ​ຂັ້ນ​ສູງ ACMECS 7 ລວມມີ ​​ປະທານາທິບໍດີ​ມຽນມາ ທິນຈໍ, ນາຍົກລັດຖະມົນຕີລາວ ທອງ​ລຸນ ສີ​ສຸ​ລິດ, ນາຍົກລັດຖະມົນຕີກຳປູ​ເຈຍ ສົມ​ເດັດ ຮຸນ​​ເຊນ, ຮອງ​ນາຍົກລັດຖະມົນຕີ​ໄທ ສົມ​ກິດ ຈັດ​ຕຸ​ສຣິພິທັກ, ​ເລຂາ​ທິການ​ໃຫຍ່​ສະມາ​ຄົນ​ປະຊາ​ຊາດ​ແຫ່ງ​ອາຊີ​ຕາ​ເວັນ​ອອກສຽງ​ໃຕ້ (ອາ​ຊຽນ) ທ່ານ​ ເລ​ເລືອ​ງມິ​ງ, ຮອງ​ເລຂາທິການ​ໃຫຍ່​ສະຫະ​ປະຊາ​ຊາດ - ​ເລຂາທິການ​ບໍລິຫານ​ຂອງ​ຄະນະ​ກຳມະການ​ເສດຖະກິດ - ສັງຄົມ ພາກ​ພື້ນ​ອາຊີ - ປາຊີ​ຟິກ (ESCAP) ທ່ານ ຊາມຊາ​ດ ອາ​ຄະ​ຕາ, ຜູ້ຕາງໜ້າ​ທະນາຄານ​ໂລກ, ຜູ້ຕາງໜ້າທະນາຄານ​ພັດທະນາ​ອາຊີ​ ພ້ອມ​ດ້ວຍ​ຄູ່​ຮ່ວມ​ງານ​ການ​ພັດທະນາ​ຫຼາຍ​ປະ​ເທດ​ໃນ​ພາກ​ພື້ນ ​ແລະ​ໃນ​ໂລກ.

ສ້າງ​ພາກ​ພື້ນ​ທີ່​ມີການ​ເຊື່ອມ​ຕໍ່​ເປັນ​ຢ່າງ​ດີ

ກອງ​ປະຊຸມ​ຂັ້ນ​ສູງ CLMV 8 ​ໄດ້​ຮັບ​ການ​ຈັດ​ຕັ້ງ​ຂຶ້ນ​ດ້ວຍ​ຫົວ​ຂໍ້ “ກຳ​ໂອກາດ, ສ້າງ​ອະນາຄົດ”. ສົນທະນາ​ທີ່​ກອງ​ປະຊຸມ, ບັນດາ​ຜູ້ນຳ​ໄດ້​ແບ່ງປັນ​ການ​ຕີ​ລາຄາ​ກ່ຽວ​ກັບ​ສິ່ງ​ແວດ​ລ້ອມ​ແຫ່ງ​ການ​ພັດທະນາ​ໃໝ່ ​ຂອງພາກ​ພື້ນ​ແມ່​ນ້ຳຂອງ, ຢືນ​ຢັນວ່າ ບັນດາ​ປະ​ເທດ​ກຳປູ​ເຈຍ ລາວ ມຽນມາ ຫວຽດນາມ​ ພວມ​ຢືນ​ຢູ່​ຕໍ່ໜ້າ​ໂອກາດ​ໃໝ່ຫຼາຍ​ຢ່າງ ​ເພື່ອ​ພັດທະນາ​ເສດຖະກິດ. ບັນດາ​ໂອ​ກາດ​ນີ້​ແມ່ນ​ມາ​ຈາກ​ການ​ປະຕິວັດວິທະຍາສາດ ​ແລະ​ເຕັກໂນ​ໂລ​ຊີ​ໃນ​ໂລກ, ວິວັດ​ການ​ເຊື່ອມ​ໂຍງ​ເສດຖະກິດ​ຢ່າງ​ແຂງ​ແຮງ​ຂອງ​ພາກ​ພື້ນ, ພິ​ເສດ​ແມ່ນ ​ການ​ເປັນ​ຮູບ​ເປັນ​ຮ່າງຂອງ​ປະຊາ​ຄົມ​ເສດຖະກິດ​ອາ​ຊຽນ.

ບັນດາ​ປະ​ເທດ​ກຳປູ​ເຈຍ ລາວ ມຽນມາ ຫວຽດນາມ ກໍ່​ມີ​ທ່າ​ໄດ້​ປຽບ​ໃນ​ການ​ແຂ່ງຂັນ​ທີ່​ສຳຄັນ​ຫຼາຍ​ຢ່າງ​ເຊັ່ນ ມີ​ທີ່​ຕັ້ງ​ພູມສາດ​ເສດຖະກິດ​ຍຸດ​ທະ​ສາດ ​ໃກ້​ກັບ​ບັນດາ​ຕະຫຼາດ​ໃຫຍ່, ມີ​ຊັບພະຍາກອນ​ອຸດົມສົມບູນ, ກຳລັງ​ແຮງ​ງານ​ຫຼວງ​ຫຼາຍ​ແລະ​ໜຸ່ມ, ລາຄາ​ມີ​ຄວາມ​ສາມາດ​ແຂ່ງຂັນ​ດີ, ນະ​ໂຍບາຍ​ການ​ຄ້າ​ແລະ​ການ​ລົງທຶນ​ສະດວກ​ດີ.

ຄຽງ​ຂ້າງ​ນັ້ນ, ບັນດາ​ຜູ້ນຳ​ກໍ່​ໄດ້​ໃຫ້​ທັດສະນະ​ວ່າ ​ພາກ​ພື້ນ​ແມ່​ນ້ຳຂອງພວມ​ຕ້ອງ​ປະ​ເຊີນ​ໜ້າກັບ​ສິ່ງ​ທ້າ​ທາຍ​ບໍ່​ໜ້ອຍ​ເຊັ່ນ ຖືກ​ຈຳກັດ​ທາງ​ດ້ານ​ແຫຼ່ງພະລັງ, ​ໂຄງ​ສ້າງ​ພື້ນຖານ​ຍັງ​ອ່ອນ​ນ້ອຍ, ຖືກ​ຜົນ​ກະທົບ​ທາງ​ລົບ​ຂອງ​ການ​ປ່ຽນ​ແປງ​ດິນ​ຟ້າ​ອາກາດ, ສະພາບ​ຄວາມບໍ່​ໝັ້ນຄົງ​ຂອງ​ເສດຖະກິດ​ພາກ​ພື້ນ ​ແລະ​ເສດຖະກິດ​ໂລກ, ລັກສະນະ​ຖືກ​ເສຍ​ຫາຍ​ງ່າຍ​ຂອງ​ບັນດາ​ພື້ນຖານ​ເສດຖະກິດ​ເປີດ​ປະຕູ ​ແລະ ຂະໜາດ​ນ້ອຍ.

​ເພື່ອຮັກສາກຳລັງ​ຊຸກ​ດັນ​ຄວາມ​ເຕີບ​ໂຕ ​ແລະ ຍົກ​ສູງ​ຄວາມ​ສາມາດ​ແຂ່ງ​ຂັນ, ບັນດາ​ຜູ້ນຳ​ໄດ້ເຫັນ​ດີ​ເປັນ​ເອກະ​ພາບກັນ ທັງ​ດຳ​ເນີນ​ການ​ປະຕິ​ຮູບ​ເສດຖະກິດ​ໃນ​ປະ​ເທດ, ຮັກສາ​ສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ ​ແລະ ສ້າງ​ສິ່ງ​ແວດ​ລ້ອມ​ແຫ່ງ​ການ​ລົງທຶນ​ທີ່​ສະດວກ​ດີ, ທັງ​ເປັນ​ເຈົ້າ​ການ​ເຊື່ອມ​ໂຍງ​ຢ່າງ​ກວ້າງຂວາງ​ກວ່າ​ອີກ​ເຂົ້າ​ກັບ​ເສດຖະກິດ​ພາກ​ພື້ນ ​ແລະ ​ເສດຖະກິດ​ໂລກ.

ບັນດາ​ຜູ້ນຳ​ກໍ່​ເຫັນ​ດີ​ເປັນ​ເອກະສັນ​ຈະຜັນ​ຂະຫຍາຍ​ບັນດາ​ມາດ​ຕະການ​ລະອຽດ​ ເພື່ອ​ເພີ່ມ​ທະວີ​ການ​ເຊື່ອມຈອດ​ເສດຖະກິດ​ແລະ​ຕະຫຼາດ​ຂອງ​ສີ່​ປະ​ເທດ, ມຸ່ງ​ໄປ​ສູ່​ພາກ​ພື້ນ​ທີ່​ມີ​ການ​ເຊື່ອມ​ຕໍ່​ເປັນ​ຢ່າງ​ດີ. ມ້ວນທ້າຍ​ກອງ​ປະຊຸມ, ບັນດາ​ຜູ້ນຳ​ໄດ້​ຮັບຮອງ​ຖະ​ແຫຼ​ງການ​ຮ່ວມ​ຂອງ​ກອງ​ປະຊຸມ​ຂັ້ນ​ສູງ CLMV 8 ​ແລະ ​ເຫັນ​ດີ​ເປັນ​ເອກະສັນ​ໃຫ້​ກຳປູ​ເຈຍ​ເປັນ​​ເຈົ້າພາບຈັດ​ຕັ້ງ ກອງ​ປະຊຸມ​ຂັ້ນ​ສູງ CLMV 9 ​ໃນ​ປີ 2018.

ເຮັດ​ໃຫ້ພາກພື້ນ​ແມ່​ນ້ຳຂອງ​ກາຍ​ເປັນ​ໃຈ​ກາງ​ເສດ​ທະ​ກິດ ​ທີ່​ຂະຫຍັນ​ຂັນ​ເຄື່ອນ ​ແລະພັດທະນາ​ແບບ​ຍືນ​ຍົງ.

ກອງ​ປະຊຸມ​ຂັ້ນ​ສູງ ACMECS 7 ​ໄດ້​ຮັບ​ການຈັດ​ຕັ້ງ​ພາຍ​ໃຕ້​ຫົວ​ຂໍ້ “ຫັນ​ໄປ​ສູ່​ພາກ​ພື້ນ​ແມ່​ນ້ຳຂອງ​ທີ່​ຂະຫຍັນ​ຂັນ​ເຄື່ອນ ວັດທະນາ​ຖາວອນ”. ຢູ່​ທີ່ກອງ​ປະຊຸມ, ບັນດາ​ຜູ້ນຳ​ຂອງ ACMECS ​ໄດ້ສຸມ​ໃສ່​ປຶກສາ​ຫາລື​ບັນດາ​ມາດ​ຕະການ ​ເພື່ອ​ແນ​ໃສ່​ຊຸກຍູ້​ການ​ພັດທະນາ​ເສດຖະກິດ - ສັງຄົມ, ​ເພີ່ມ​ທະວີຄວາມ​ສາມາດ​ແຂ່ງຂັນ​ໃຫ້ພື້ນຖານ​ເສດຖະກິດຂອງ​ປະ​ເທດ​ສະມາຊິກ, ​ເພີ່ມ​ທະວີ​ການ​ເຊື່ອມ​ໂຍງ​ເສດຖະກິດ​ພາກ​ພື້ນ ​ແລະ ​ວາງ​ກຳນົດ​ທິດ​ທາງ​ຮ່ວມ​ມື​ ເພື່ອ​ການ​ພັດທະນາ​ແບບ​ຍືນ​ຍົງ ​ຢູ່​ພາກ​ພື້ນ​ແມ່​ນ້ຳຂອງ.

ບັນດາ​ຜູ້ນຳຂອງ ACMECS ​ໄດ້​ຮັບ​ຮູ້​ຜົນສຳ​ເລັດ​ຕ່າງໆ​ຂອງ​ການ​ຮ່ວມ​ມື ACMECS ​ໃນ​ເວລາ​ທີ່​ຜ່ານ​ມາ, ພິ​ເສດ​ແມ່ນ​ ໃນ​ຂົງ​ເຂດການ​ເຊື່ອມ​ຕໍ່​ຄົມມະນາຄົມ, ອຳນວຍ​ຄວາມ​ສະດວກ​ໃຫ້​ແກ່​ການ​ຄ້າ - ການ​ລົງທຶນ, ພັດທະ​ນາ​ການທ່ອງທ່ຽວ ​ແລະ ປົກ​ປັກ​ຮັກສາ​ສິ່ງ​ແວດ​ລ້ອມ, ​ແຕ່ ບັນດາການ​ນຳ​ຂອງ ACMECS ກໍ່​ໃຫ້​ຄວາມ​ສັງ​ເກດ​ວ່າ ພາກ​ພື້ນ​ແມ່​ນ້ຳຂອງ​ພວມ​ຕ້ອງ​ປະ​ເຊີນ​ໜ້າ​ກັບ​ຄວາມ​ຫຍຸ້ງຍາກ ສິ່ງ​ທ້າ​ທາຍ​ຫຼາຍ​ຢ່າງ ​ໃນ​ການ​ຮັບປະກັນ​ແຫຼ່ງການ​ເງິນ​ໃຫ້​ແກ່​ບັນດາ​ໂຄງການພັດທະ​ນາ​ລວມ, ຮັບ​ມື​ກັບ​ການ​ປ່ຽນ​ແປງ​ດິນ​ຟ້າ​ອາກາດ, ​ໄພ​ທຳ​ມະ​ຊາດ ​ແລະ ປົກ​ປັກ​ຮັກສາ​ສິ່ງ​ແວດ​ລ້ອມ.

ບັນດາ​ຜູ້ນຳ​ໄດ້​ຮັບຮອງ​ຜ່ານ​ຖະ​ແຫຼ​ງການ​ຮ່າ​ໂນ້ຍຂອງກອງ​ປະຊຸມ​ຂັ້ນ​ສູງ ACMECS 7 ດ້ວຍ​ເປົ້າ​ໝາຍ ​ເຮັດ​ໃຫ້ພາກພື້ນ​ແມ່​ນ້ຳຂອງ ​ກາຍ​ເປັນ​ໃຈ​ກາງ​ເສດ​ທະ​ກິດ​ທີ່​ຂະຫຍັນ​ຂັນ​ເຄື່ອນ ​ແລະ ພັດທະນາ​ແບບ​ຍືນ​ຍົງ. ຕາມ​ນັ້ນ, ​ໃນ​ເວລາ​ສະ​ເພາະ​ໜ້າ, ບັນດາ​ປະ​ເທດ ACMECS ຈະ​ສຸມ​ໃສ່​ຊຸກຍູ້ບັນດາ​ເນື້ອ​ໃນຮ່ວມມືທາງ​ດ້ານ​ຄົມມະນາຄົມ, ການ​ຄ້າ - ການ​ລົງທຶນ, ທ່ອງ​ທ່ຽວ, ກະສິກຳ, ສິ່ງ​ແວດລ້ອມ…

ກອງ​ປະຊຸມ​ເຫັນ​ດີ​ເປັນ​ເອກະສັນ​ ຈະ​ຈັດ​ຕັ້ງ​ກອງ​ປະຊຸມ​ຂັ້ນ​ສູງ ACMECS ຄັ້ງ​ທີ 8 ຢູ່ປະ​ເທດ​ໄທ ​ໃນ​ປີ 2018.

ຕາມ​ຂໍ້​ລິ​ເລີ່​ມຂອງ​ຫວຽດນາມ, ​ເປັນ​ຄັ້ງ​ທຳ​ອິດ​ທີ່​ໃນ​ຂອບ​ຂອງບັນດາກອງ​ປະຊຸມ​ຂັ້ນ​ສູງ ACMECS ​ແລະ ກອງ​ປະຊຸມ​ຂັ້ນ​ສູງ CLMV ​ໄດ້​ຈັດ​ເວທີ​ປາ​ໄສ​ເສດຖະກິດ​ໂລກ​ກ່ຽວ​ກັບ​ພາກ​ພື້ນ​ແມ່​ນ້ຳຂອງ  ຊຶ່ງມີ​ການ​ເຂົ້າ​ຮ່ວມ​ຂອງ​ບັນດາຄູ່​ຮ່ວມ​ມື​ທີ່​ສຳຄັນ.

ຂໍ້​ລິ​ເລີ່​ມນີ້​ຊ່ວຍ​ຊຸກຍູ້​ການ​ເຊື່ອມ​ຕໍ່​ ລະຫວ່າງ​ບັນດາ​ວິ​ສາ​ຫະກິດ​ຢູ່​ໃນ​ພາກ​ພື້ນ​ແມ່​ນ້ຳຂອງ​ເຂົ້ານຳ​ກັນ ​ແລະ ລະຫວ່າງບັນດາ​ວິ​ສາ​ຫະກິດ​ໃນ​ພາກ​ພື້ນກັບ​ບັນດາ​ກຸ່ມ​ບໍລິສັດຂະໜາດ​ໃຫຍ່​ໃນ​ໂລກ, ​ເພີ່ມ​ທະວີ​ການ​ສົນທະນາ​ລະຫວ່າງ​ວົງ​ການ​ວິ​ສາ​ຫະກິດ ກັບບັນດາ​ພະນັກງານກຳນົດ​ນະ​ໂຍບາຍ, ​ເພີ່ມ​ທະວີ​ການ​​ເຂົ້າ​ຮ່ວມ​ຂອງ​ບັນດາ​ຄູ່​ຮ່ວມ​ມື​ທີ່​ສຳຄັນ ​ເຂົ້າ​ໃນ​ບັນດາ​ໂຄງການ​ຮ່ວມ​ມື CLMV ​ແລະ ACMECS. ຂໍ້​ລິ​ເລີ່​ມຂອງ​ຫວຽດນາມ​ໄດ້ຮັບ​ການ​ຕີ​ລາຄາ​ສູງ​ແລະ​ສະໜັບສະໜູນ​ຢ່າງ​ສຸດ​ໃຈ ​ຂອງ​ບັນດາ​ປະ​ເທດ​ສະມາຊິກ.

** ​ໃນ​ຕອນ​ແລງ​ຂອງ​ວັນ​ດຽວ​ກັນ, ທີ່​​ສູນ​ປະຊຸມ​ແຫ່ງ​ຊາດ ຢູ່​ຮ່າ​ໂນ້ຍ, ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ໄດ້​​ເປັນ​ປະທານ​ການປະຊຸມຂ່າວສານ​ສາກົນ ກ່ຽວ​ກັບ​ຜົນສຳ​ເລັດ​ຂອງ​ບັນດາ​ກອງ​ປະຊຸມ ACMECS, CLMV, WEF-Mekong. ທ່ານ​ນາຍົກລັດຖະມົນຕີ ສະ​ແດງ​ຄວາມ​ດີ​ໃຈ​ທີ່​ໄດ້​ພົບ​ປະ​ກັບ​ນັກ​ຂ່າວ​ເປັນ​ຄັ້ງ​ທຳ​ອິດ​ໃນ​ຖານະ​ນາຍົກລັດຖະມົນຕີ ​ແລະ ຫວັງ​ວ່າ​ບັນດາ​ອົງການ​ສື່-ນັກ​ຂ່າວ​ຈະ​ສືບ​ຕໍ່​ປະກອບສ່ວນ​ເຂົ້າ​ໃນ​ການ​ພັດທະນາ​ປະ​ເທດ ​ແລະ ຍົກ​ສູງ​ບົດບາດ​ທີ່​ຕັ້ງ​ຂອງ​ຫວຽດນາມ.

ທ່ານ​ນາຍົກລັດຖະມົນຕີ ຫງວຽນ​ຊວນ​ຝຸກ ​ໃຫ້​ຮູ້​ວ່າ ຫວຽດນາມ​ເປັນ​ເຈົ້າພາບ​ຈັດ​ຕັ້ງ​ກອງ​ປະຊຸມ “3 ​ໃນ 1” (​ກອງ​ປະຊຸມ ACMECS 7, ​ກອງ​ປະຊຸມ CLMV 8 ​ແລະ ​ກອງ​ປະຊຸມເວ​ທີ​ປາ​ໄສ​ເສດ​ຖະ​ກິດ​ໂລກ​ກ່ຽວ​ກັບ​ພາກ​ພື້ນແມ່ນ້ຳ​ຂອງ (WEF-Mekong)). ​ກອງ​ປະຊຸມ WEF-Mekong ​ແມ່ນ​ຂໍ້​ຄິດ​ລິ​ເລີ່​ມຂອງ​ຫວຽດນາມ​ທີ່​ໄດ້​ຮັບ​ການ​ສະໜັບສະໜູນ​ຈາກ​​ ເວທີ​ປາ​ໄສ​ເສດຖະກິດ​ໂລກ (WEF) ​ແລະ ບັນດາ​ປະ​ເທດ​​ໃນພາກ​ພື້ນ​ແມ່​ນ້ຳຂອງ. ນີ້​ເປັນ​ຄັ້ງ​ທຳ​ອິດ​ທີ່ WEF ຈັດ​ຕັ້ງ​ກອງ​ປະຊຸມ​ສະ​ເພາະ​ກ່ຽວ​ກັບ​ພາກ​ພື້ນ​ແມ່ນ້ຳຂອງ. “ສາມ​ກອງ​ປະຊຸມ​ນີ້​ໄດ້​ບັນລຸ​ຜົນສຳ​ເລັດ​ດີ​ທີ່​ສຸດ”, ທ່ານ​ນາຍົກລັດຖະມົນຕີ ສັງ​ເກດ​ແລະ​ໃຫ້​ຮູ້​ວ່າ ຜົນສຳ​ເລັດ​ນັ້ນ​ສະ​ແດງ​ອອກ​ໃນ​ດ້ານ​ຕ່າງໆ​ຄື.

ກອງ​ປະຊຸມຄັ້ງ​ນີ້​ມີ​ຜູ້​ມາ​ຮ່ວມຢ່າງ​ຫຼວງ​ຫຼາຍ ຫຼາຍ​ກວ່າ​ທຸກ​ຄັ້ງ, ລວມທັງ​ຜູ້ນຳ​ຂອງ​ບັນດາ​ປະ​ເທດ​ທີ່​ກ່ຽວຂ້ອງ. ພິ​ເສ​ດ​​​ແມ່ນ ​ໃນ​ຄັ້ງ​ນີ້​ຫວຽດນາມ​ໄດ້​ສະ​ເໜີ​ໃຫ້​ເຊີນ​ບັນດາ​ຄູ່​ຮ່ວມ​ມື​ທີ່​ສຳຄັນ​ມາຮ່ວມ​ຕັ້ງ​ແຕ່​ຕົ້ນ​ຈົນ​ສຳ​ເລັດ​ສິ້ນ​ສຸດ​ການ​ປະຊຸມຄື ທະນາຄານ​ໂລກ, ສະຫະ​ປະຊາ​ຊາດ, ທະນາຄານ​ພັດທະນາ​ອາຊີ. ນອກ​ນັ້ນ ຍັງ​ມີ​ບັນດາ​ກຸ່ມ​ບໍລິສັດ​ໃຫຍ່​ຂອງ WEF ​ແລະ​ບັນດາ​ປະ​ເທດ​ໃນ​ພາກ​ພື້ນ, ​ໃນ​ນັ້ນ​ມີ​ຫຼາຍ​ວິ​ສາ​ຫະກິດ​ຂອງ​ຫວຽດນາມ. ພ້ອມ​ດ້ວຍ​ບັນດາ​ເອກອັກຄະ​ລັດຖະທູດ ​ແລ​ະ ຕົວ​ແທນ​ທາງ​ການ​ທູດ​ຢູ່​ຮ່າ​ໂນ້ຍ ກໍ່​ໄດ້​ມາ​ຮ່ວມ​ກອງ​ປະຊຸມ ACMECS ​ແລະ CLMV.

ກອງ​ປະຊຸມ​ຄັ້ງ​ນີ້​ໄດ້​ວາງຫຼາຍແຜນ​ນະ​ໂຍບາຍ, ມາດ​ຕະການທີ່​ແຂງ​ແຮງ​ໃໝ່ອອກ​ມາຄື ການ​ພັດທະນາຂຽວ, ການ​ພັດທະນາກວມ​ໄປ​ທົ່ວ, ​ເພື່ອ​ສູ້​ຊົນ​ກໍ່ສ້າງ​ສັງຄົມ​ທີ່​ຫັນ​ໄປ​ສູ້​ປະຊາຊົນ, ຮັບ​ມື​ຢ່າງ​ທັນ​ການ​ກັບ​ການ​ປ່ຽນ​ແປງ​ຂອງສະພາບ​ອາກາດຢູ່​ໃນ​ພາກ​ພື້ນ.

ບັນດາ​ປະ​ເທດ​ລ້ວນ​ແຕ່​ເຫັນ​ວ່າ ຄວນ​ເພີ່ມ​ທະວີ​ການ​ພົວພັນ​ພາຍ​ໃນ​ກຸ່ມ​ໃຫ້​ດີກ​ວ່າ​ອີກ, ພ້ອນນັ້ນ​ກໍ່​ຂະຫຍາຍ​ການ​ພົວພັນ​ຢ່າງ​ແຂງ​ແຮງ ​ກັບບັນດາ​ປະ​ເທດ​ພັດທະນາ, ນັບ​ແຕ່​ບັນດາ​ປະ​ເທດ​ນຳ​ໜ້າ​ອາ​ຊຽນ, ອີ​ຢູ, ຈີນ, ບັນດາ​ປະ​ເທດ​ອື່ນ ​ຈົນ​ເຖິງບັນດາ​ຄູ່​ຮ່ວມ​ມື​ສຳຄັນ​ຄື ທະນາຄານ​ໂລກ ທະນາຄານ​ພັດທະນາ​ອາ​ຊີ./.

ສັງ​ລວມຂ່າວຈາກ​ສຳນັກຂ່າວ​​ຫວຽດນາມ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ