ວັນອາທິດ, 22/9/2019
ປະທານາທິບໍດີ ແຫ່ງສາທາລະນະລັດ ສະຫະພາບ ມຽນມາ ດຳເນີນການຢ້ຽມຢາມ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ
26/11/2016 14:48' ສົ່ງ ພິມ
ປະທານປະເທດຫວຽດນາມ ເຈີ່ມດ້າຍກວາງ ແລະ ປະທານາທິບໍດີມຽນມາ ທີນຈໍ ທີ່ພິທີຕ້ອນຮັບອັນສົມກຽດ (ພາບ: ຂ່າວພາບຫວຽດນາມ)

ທ່ານປະ­ທານປະ­ເທດຫວຽດນາມ ເຈີ່ມ​ດ້າຍ​ກວາງ ແລະ ພັນ​ລະ​ຍາ ໄດ້​ເປັນ​ປະ­ທານ​​ໃນ​ພິ­ທີ­ການ​ຕ້ອນຮັບ​ປະທານາທິ­ບໍ­ດີມຽນ​ມາ ທີ​ນຈໍ ແລະ ພັນ​ລະ​ຍາ ຕາມ​ພິ­ທີ​ຕ້ອນ­ຮັບ​ທີ່ສູງ​ສຸດ​​ແລະ​ສົມ​ກຽດ ສຳ­ລັບ​ປະ­ມຸກ​ແຫ່ງ​ຊາດ​.

ໃນ​ກອບການ​ຢ້ຽມ­ຢາມ, ປະ­ທາ­ນາ­ທິ­ບໍ­ດີ ທີ​ນຈໍ ແລະ ຄະ­ນະ​ຜູ້​ແທນ​​ມຽນມາ ໄດ້ວາງ​ພວງ­ມາ­ລາ​ທີ່​ອະນຸສາວະ­ລີ​ບັນ­ດາ​ນັກ­ຮົບ​ວິ­ລະ​ຊົນ​ຜູ້​ທີ່​ເສຍ​ຊີ­ວິດ​ເພື່ອ​ຊາດ, ເຂົ້າ​ຮ່ວມ​ພິ­ທີ​ຕ້ອນ­ຮັບ ​ພົບ​ປະ​ເຈລະຈາ ແລະ ຮ່ວມງານ​ລ້ຽງຂັ້ນ​ລັດ​ໂດຍປະ­ທານ​ປະເທດ ເຈີ່ນ​ດ້າຍ​ກວາງ ຈັດ​ຂຶ້ນ, ເຂົ້າ​ຢ້ຽມ​ຂ່ຳ­ນັບ ເລ­ຂາ­ທິ­ການ​ໃຫຍ່ພັກ​ກອມ​ມູ​ນິດຫວຽນ​າມ ຫງວ​ຽນຝູ​ຈ້ອງ ແລະ ພົບ​ປະ​ແລກ­ປ່ຽນ​ຄຳ​ຄິດ​ເຫັນ​ກັບ​ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ຫງວ​ຽນ​ຊວນ​ຝຸກ; ຢ້ຽມ­ຊົມ​ເຮືອນ​ລຸງ​ໂຮ່, ວິຫານວັນ­ນະກຳ ກວັກ​ຕື້​ຢ໋າມ; ​ພິ​ພິ​ທະ​ພັນ​ປະ­ຫວັດ­ສາດການ​ທະຫານ; ຕ້ອນຮັບນັກ​ວິ​ສາ​ຫະ​ກິດຫວຽດ­ນາມ​ຈຳ­ນວນ​ໜຶ່ງ ແລະ ພົບ​ປະ​ກັບຊຸມ​ຊົນ​ຊາວມຽນ​ມາຢູ່ຮ່າ​ໂນ້ຍ.

ໃນ​ບັນ­ດາ​ການ​ເຈລະ­ຈາແລະ​ພົບ​ປະ​ຫາ­ລື​ດັ່ງ­ກ່າວ ບັນ­ດາ​ຜູ້­ນຳຂອງຫວຽດ­ນາມ​ໄດ້​ໃຫ້​ຄຳ​ອວຍ­ພອນ​ໄຊ​ອັນ​ປະ­ເສີດ​ຕໍ່​ການ​ຢ້ຽມ­ຢາມ​ຂັ້ນ​ລັດ​ເປັນ​ເທື່ອ​ທຳ​ອິດ​ ຂອງ​ປະ­ທາ­ນາ­ທິ­ບໍ­ດີ​ແຫ່ງ ສາທາ​ລະ​ນັລັດ ສະ­ຫະ­ພາບມຽນ​ມາ ທີ່ ສສ ຫວຽດນາມ; ​ອວຍ­ພອນຊົມ​ເຊີຍ​ ບັນ­ດາ​ຜົນ­ງານ​ທີ່​ລັດ­ຖະ­ບານ​ໃໝ່ຂອງ ມຽນ​ມາ ​ບັນ­ລຸ​ໄດ້ ໃນ​ພາລະ­ກິດ​ແຫ່ງ​ການປອງ​ດອງ​ຊາດ, ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ເປີດ​ກ້ວ​າງ​ການ​ພົວ­ພັນ​ການ​ຕ່າງປະເທດ, ໃນ​ນັ້ນ​ມີການ​ເປັນ​ເຈົ້າພາບຈັດ​ຕັ້ງ​ກອງ​ປະຊຸມ ສະ­ມັດ­ຊາ​ໃຫຍ່ລັດ​ຖະ​ສະ­ພາ​ລະ­ຫວ່າງ​ຊາດ ອາ​ຊຽນ ຄັ້ງ​ທີ 37 (ອາຍ​ປາ - 37); ໃຫ້​ຄຳ​ເຊື່ອ​ໝັ້ນ​ວ່າ ການ​ຢ້ຽມ­ຢາມ​ຂອງ​ທ່ານ​ປະ­ທາ­ນາ­ທິ­ບໍ­ດີ ທີ​ນຈໍ ຈະ​ໄຂ​ໄລຍະ​ໃໝ່​ແຫ່ງ​ການ​ພັດ­ທະ­ນາ​​ການ​ພົວພັນ​ມິດ­ຕະ­ພາບ ແລະ ການຮ່ວມ​ມື​ ລະ­ຫວ່າງ​ສອງ​ປະ­ເທດ.

ທ່ານ​ປະ­ທາ­ນາ­ທິ­ບໍ­ດີ ທີ​ນຈໍ ໄດ້​ສະ­ແດງ​ຄວາມ​ປິ​ຕິ​ຊົມ­ຊື່ນ​ທີ່​ໄດ້​ມາ​ຢ້ຽມ­ຢາມ​ຂັ້ນ​ລັດ​ ທີ່ ສສ ຫວຽດ­ນາມ; ອວຍ­ພອນຊົມ​ເຊີຍ ບັນ­ດາ​ຜົນ­ງານ​ອັນ​ສຳ­ຄັນ​ທີ່ ຫວຽດ­ນາມ ບັນ­ລຸ​ໄດ້​ພາຍ­ຫຼັງ 30 ປີ ແຫ່ງ​ການ​ປ່ຽນ­ແປງ​ໃໝ່, ເປັນ­ຕົ້ນ​ແມ່ນ​ໃນ​ການ​ຮັບ­ປະ­ກັນ​ສະ­ຫວັດ­ດີ​ການ​ສັງ­ຄົມ ແລະ ພັດ­ທະ­ນາ​ແບບ​ຍືນ​ຍົງ; ສະ­ແດງ​ຄວາມ​ເຊື່ອ​ໝັ້ນວ່າ ຫວຽດ­ນາມ​ຈະ​ບັນ­ລຸ​ໄດ້​ເປົ້າ​ໝາຍ​ກາຍ­ເປັນ​ປະ­ເທດ​ອຸດ­ສາ­ຫະ­ກຳ​ຕາມ​ທິດ​ທັນ​ສະ­ໄໝ ດ້ວຍ​ບົດ­ບາດ ຖາ­ນະ​ບັບ​ມື້​ນັບ​ສູງ​​ໃນ​ພາກ​ພື້ນ ແລະ ໃນ​ໂລກ. ທ່ານ​ປະ­ທາ­ນາ­ທິ­ບໍ­ດີ ທີ​ນຈໍ ກໍ່​ໄດ້​ຢືນ­ຢັນ​ວ່າ ມຽນມາ​ໃຫ້​ຄວາມ​ສຳ­ຄັນ ແລະ ​ມຸ່ງ​ຫວັງ​ຈະ​ສືບ​ຕໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ໃນ​ຫຼາຍ​ດ້ານ​ກັບ ຫວຽດ­ນາມ​ໃນ​ເວ­ລາ​ຕໍ່​ໜ້າ.

* ໃນ​ຕອນ​ບ່າຍ​ວັນ​ທີ 26 ຕຸ­ລາ, ທີ່​ທຳ​ນຽບ​ປະ­ທານ​ປະ­ເທດ, ໃນ​ບັນ­ຍາ­ກາດ​ແຫ່ງ​ຄວາມ​ເປີດອົກ​ເປີດ​ໃຈ ຄວາມເຂົ້າ­ໃຈ​ເຊິ່ງ​ກັນແລະກັນ, ທ່ານ​ປະ­ທານ​ປະ­ເທດ ເຈີ່ນ​ດ້ານ​ກວາງ ໄດ້​ມີ​ການ​ພົບ​ປະ​ເຈລະ­ຈາ​ກັບ​ທ່ານ ປະທາ­ນາ­ທິ­ບໍ­ດີ ທີ​ນຈໍ.

ທ່ານ​ປະທານ​ປະ​ເທດ ​ແລະ ທ່ານ​ປະທານາທິບໍດີ ໄດ້​ສະ­ແດງ​ຄວາມ​ເພິ່ງ​ພໍ­ໃຈ​ຕໍ່​ການ​ພັດ­ທະ­ນາ​ຂອງສາຍ​ພົວ­ພັນ​ມິດ­ຕະ­ພາບທີ່​ເປັນ​ມູນ​ເຊື້ອ ແລະ ການຮ່ວມ​ມື​ໃນ​ຫຼາຍ​ດ້ານ​ ລະຫວ່າງ​ສອງ​ປະ­ເທດ​ໃນ​ໄລ­ຍະ 40 ປີ​ທີ່​ຜ່ານ​ມາ (1975 - 2016) ​ເຊິ່ງ​ບົນ​ພື້ນ​ຖານທີ່​ທ່ານ​ປະ­ທານ ໂຮ່​ຈີ​ມີນ ແລະທ່ານ ອອງ​ຊານ ​ວີ­ລະ​ຊົນ​ແຫ່ງ​ຊາດ​ມຽນມາ ​ເປັນ​ຜູ້ກໍ່ຕັ້ງ. ກ່ຽວ​ກັບການ​ຮ່ວມ​ມື​ດ້ານ​ການ­ເມືອງ, ສອງ​ຝ່າຍ​ໄດ້​ມີ​ຄວາມ​ເຂົ້າ­ໃຈ ຄວາ​ມ​ໄວ້​ວາງ​ໃຈ​ຊຶ່ງ​ກັນ​ແລະ​ກັນ ​ໂດຍ​ຜ່ານ​ການ​ຢ້ຽມ­ຢາມແລະພົບ​ປະ​ຂັ້ນ​ສູງລະຫວ່າງ​ສອງປະ​ເທດ. ການ​ພົວພັນ​​ດ້ານ​ເສດ­ຖະ­ກິດ, ການ​ຄ້າ, ການ​ລົງ­ທຶນ​ ໄດ້​ຮັບ​ການ​ຂະ­ຫຍາຍ­ຕົວ​ຢ່າງ​ໝັ້ນ­ຄົງ. ທາງ​ດ້ານ​ການ​ຄ້າ, ການ​ລົງ­ທຶນ ​ຫວຽດ­ນາມພວມ​ເປັນ​ຄູ່​ຮ່ວມ​ມືອັນ​ດັບ​ທີ 10 ຂອງມຽນ​ມາ. ສອງ​ຝ່າຍ​ກຳ­ລັງ​ຜັນ​ຂະ­ຫຍາຍການ​ຮ່ວມ​ມື​ຢ່າງ​ຕັ້ງໜ້າ​ໃນ 12 ຂົງ­ເຂດ​​ບຸລິ​ມະ​ສິດ​ຄື ​ກະສິກຳ, ຕົ້ນໄມ້​ອຸດ­ສາ­ຫະ­ກຳ, ສິນ​ໃນ​ນ້ຳ, ການ​ເງິນ - ທະນາຄານ, ການບິນ, ໂທລະ​ຄົມມະນາ­ຄົມ, ນ້ຳມັນອາຍແກັສ, ຂຸດ​ຄົ້ນແຮ່​ທາດ, ຜະ­ລິດ​ອຸ­ປະ­ກອນ​ໄຟ­ຟ້າ,  ຜະ­ລິດ​ແລະຕິດ​ຕັ້ງລົດໂອ​ໂຕ, ການ​ກໍ່­ສ້າງ ແລະ ຮ່ວມ​ມື​ດ້ານ​ການ​ຄ້າ - ການ​ລົງ­ທຶນ.

ເພື່ອ​ກຳ­ນົດ​ທິດ​ທາງການ​ພັດ­ທະ­ນາ​ສາຍ​ພົວ­ພັນ​ລະຫວ່າງສອງ​ປະ­ເທດ​ໃນ​ໄລ­ຍະ​ໃໝ່, ສອງ​ຝ່າຍ​ໄດ້​ເຫັນ​ດີ​ເປັນ​ເອກະ​ພາບ​ ​ຈະ​ເພີ່ມ​ທະ­ວີ​ການ​ຮ່ວ​ມື​ດ້ານ​ການ­ເມືອງ ​ການທູດ ​ໂດຍ​ຜ່ານ​ການ​ຍູ້​ແຮງ​ການ​ຢ້ຽມ­ຢາມ ແລະ ພົບ​ປະ​ຂັ້ນ​ສູງ ແລະ ​ຂັ້ນຕ່າງໆ​ ໃນທຸກ​ຊ່ອງ​ສາຍ​ຄື ພັກ, ລັດ­ຖະ­ບານ, ສະ​ພາ​​ແຫ່ງ​ຊາດ ແລະ ການ​ແລກປ່ຽນ​ປະຊາ­ຊົນ; ພ້ອມກັນ​ນັ້ນ​ ກໍ່​ຮັກ­ສາ​ບັນ­ດາ​ກົນ​ໄກ​ຮ່ວມ​ມື​ສອງ​ຝ່າຍ​ທີ່ມີຢູ່​ຄື: ຄະ­ນະ​ກຳ­ມະ­ການ​ປະ­ສົມ​ກ່ຽວ​ກັບ​ການ​ຮ່ວມ​ມື​ສອງ​ຝ່າຍຫວຽດ­ນາມ - ມຽນ​ມາ, ​ແລກປ່ຽນ​ຄວາມ​ເຫັນ​ການ­ເມືອງ​ຂັ້ນ​ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງປະ­ເທດ, ອາ​ນຸ​ກຳ­ມະ­ການ​ປະ­ສົມ​ດ້ານການ​ຄ້າ ແລະ ບັນ­ດາ​ກົນ​ໄກ​ຮ່ວມ​ມືສະ​ເພາະ​ຂະ­ແໜງ­ການອື່ນອີກ.

ສອງ​ຝ່າຍ​ໄດ້​ໃຫ້ຄຳ​ໝັ້ນ​ສັນ­ຍາ​​ຈະ​ເພີ່​ມທະວີ​ການ​ພົວ­ພັນ​ດ້ານການ​ຄ້າ, ການ​ລົງ­ທຶນ​ ບົນ​ພື້ນ­ຖານ​ຕ່າງ​ຝ່າຍ​ຕ່າງ​ມີ​ຜົນປະ​ໂຫຍດ. ທ່ານ​ປະ­ທາ­ນາ­ທິ­ບໍ­ດີ ທີ​ນຈໍ ໄດ້​ຮັບຮູ້​ການ­ເຄື່ອນ­ໄຫວ​ທີ່​ມີ​ປະ​ສິດ­ທິ​ຜົນ​ຂອງ​ສະ­ຫະ­ພັນ​ບັນ­ດາ​ນັກ​ລົງ­ທຶນຫວຽດ­ນາມທີ່​ລົງທຶນຢູ່​ມຽນ​ມາ (AVIM); ພ້ອມ​ນັ້ນ​ກໍ່​ໄດ້​ຢືນ­ຢັນ​ວ່າ ລັດ­ຖະ­ບານມຽນ​ມາ ຈະ​ໃຫ້​ຄວາມ​ເອົາ­ໃຈ­ໃສ່ ແລະ ອຳ­ນວຍ​ຄວາມ​ສະ­ດວກ, ເປັນ­ຕົ້ນ​ແມ່ນ​ສຳ­ລັບ​ບັນ­ດາ​ຂົງ­ເຂດ​ທີ່​ມີ​ລັກ­ສະ­ນະ​ເປັນ​ຂົວ​ຕໍ່, ເປີດ​ທາງ ແລະ ສ້າງ​ເງື່ອນ­ໄຂ​ໃຫ້​ແກ່​ບັນ­ດາ​ຂົງ­ເຂດ​ຮ່ວມ​ມື​ອື່ນ.

ສອງ​ຝ່າຍ​ໄດ້ແບ່ງ­ປັນ​ທັດ­ສະ­ນະ, ຜົນ​ປະ­ໂຫຍດ​ຮ່ວມ​ກັນ ​ກ່ຽວ​ກັບ​ຄວາມ​ສັນ­ຕິ­ພາບ, ຄວາມ​ສະ­ຫງົບ​ປອດ​ໄພ​ໃນ​ພາກ​ພື້ນ ແລະ ຢືນ­ຢັນ​​ຄຳ​ໝັ້ນ​ສັນ­ຍາ​​ເພີ່ມ​ທະ­ວີ​ການ​ຮ່ວມ​ມື​ດ້ານ​ປ້ອງ​ກັນ​ຊາດ - ປ້ອງ​ກັນ​ຄວາມ​ສະຫງົບ​ລະ​ຫງ່າງ​ສອງ​ປະ­ເທດ​ ໂດຍ​ຜ່ານ​ການ​ແລກ­ປ່ຽນ​ຂໍ້​ມູນ​ຂ່າວ­ສານ, ບົດ­ຮຽນ, ເສີມ​ຂະ­ຫຍາຍ​ປະ​ສິດ­ທິ​ຜົນ​ຂອງບັນ­ດາ​ກົນ​ໄກ​ຮ່ວມ​ມື​ທີ່​​ມີຢູ່ ແລະ ​ເປັນ​ເອ­ກະ​ພາບກັນ​ກ່ຽວ​ກັບ​ການສ້າງ­ຕັ້ງ​ກົນ​ໄກ “ສົນ­ທະ­ນາ​ກ່ຽວ​ກັບ​ນະໂຍບາຍ​ການ​ປ້ອງ​ກັນ​ຊາດ” ຂັ້ນຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຊາດ, ກົນ​ໄກ “ໜ່ວຍ​ງານເຮັດ​ວຽກ​ຮ່ວມ​ກັນ” ລະ­ຫວ່າງກົມ​ພົວ­ພັນ​ການ​ຕ່າງ­ປະ­ເທດ​ຂອງ​ສອງກະ­ຊວງ​ປ້ອງ​ກັນ​ຊາດ, ກໍ່​ຄື​ຈັດ​ຕັ້ງ​ການ​ສົນ­ທະ­ນາກ່ຽວ​ກັບ​ການ​ປ້ອງ​ກັນ​ຄວາມ​ສະ­ຫງົບ ຄັ້ງ​ທີ 4 ໃນ​ເວ­ລາ​ຕໍ່​ໄປ​ນີ້; ຕັ້ງ­ໜ້າ​ເຈລະ­ຈາ ແລະ​ ​ເຊັນສັນ­ຍາ​ວ່າ​ດ້ວຍ​ການ​ສົ່ງ​ຜູ້​ຮ້າຍ​ຂ້າມ​ແດນ ແລະ ສັນ­ຍາ​ວ່າ​ດ້ວຍ​ການ​ຍົກ­ຍ້າຍ​ຜູ້​ທີ່​ຖືກ​ຕັດ­ສິນ​ຈຳ​ຄຸກລະ­ຫວ່າງ​ສອງ​ປະ­ເທດ​ ​ໂດຍ​ໄວ.

ສຳ­ລັບ​ບັນ­ດາ​ບັນ­ຫາ​ສາ­ກົນ ແລະ ພາກ​ພື້ນ ທີ່​ສອງ​ຝ່າຍ​ມີ​ຄວາມ​ສົນ­ໃຈນັ້ນ ສອງ​ຝ່າຍ​ໄດ້​ໃຫ້​ຄຳ​ໝັ້ນ​ສັນຍາ​ຈະ​ປະ­ສານ​ສົມ­ທົບ​ພ້ອມ​ກັບ​ບັນ­ດາ​ປະ­ເທດ ອາ​ຊຽນ ຊຸກ­ຍູ້​ຄວາມ​ມາ­ນະ​ພະ­ຍາ­ຍາມ​ກໍ່­ສ້າງປະ­ຊາ​ຄົມ ອາຊຽນ ໂດຍ​ຜ່ານ​ການ​ຜັນ​ຂະ­ຫຍາຍວິ­ໄສ​ທັດປະ­ຊາ​ຄົມອາ​ຊຽນ 2025 ຢ່າງ​ມີ​ປະ​ສິດ­ທິ​ຜົນຄົບ​ຖ້ວນ​ ​ແລະ ຊຸກ­ຍູ້​ພາ­ລະ​ບົດບາດ​ເປັນ­ໃຈ​ກາງຂອງອາ​ຊຽນ ໃນ​ບັນ­ດາໂຄງ​ສ້າງ​ພາກ​ພື້ນ; ເພີ່ມ​ທະ­ວີ​ການ​ຮ່ວມ​ມື​ນຳ​ໃຊ້​ແຫຼ່ງ​ນ້ຳ​ແມ່ນ້ຳ​ຂອງ ແບບ​ຍືນ​ຍົງແລະມີ​ປະ­ສິດ​, ເປັນ­ຕົ້ນ​ແມ່ນ​ໃນ​ຂອບ​ຄະ­ນະ​ກຳ­ມະ­ການ​ແມ່ນ​ນ້ຳ­ຂອງ​ສາ­ກົນ (MRC) ແລະ ບັນ­ດາ​ອົງ​ການ­ຈັດ­ຕັ້ງ​ທີ່​ກ່ຽວ­ຂ້ອງ. ທ່ານ​ປະ­ທາ­ນາ­ທິ­ບໍ­ດີ ມຽນ​ມາ ໄດ້​ເຫັນ​ດີ​ເປັນ​ເອ­ກະ​ພາບ​ຈະ​ພິຈາລະນາຂໍ​ໃຫ້​ມຽນມາ​ເປັນ​ສະມາຊິກ​ສົມ​ບຸນຂອງ MRC.

ກ່ຽວ​ກັບ​ບັນ­ຫາ​ທະ­ເລ​ຕາ­ເວັນ​ອອກ, ສອງ​ຝ່າຍ​ໃຫ້​ຄຳ​ໝັ້ນ​ສັນ­ຍາ​ຈະ​ຮັກ­ສາ ແລະ ຊຸກ­ຍູ້​ສັນ­ຕິ­ພາບ, ສະຖຽນ​ລະ​ພາບ, ຄວາມ​ສະ­ຫງົບ​ປອດ​ໄພ ແລະ ຄວາມ​ເສລີ​ໃນ​ການ​ເດີນ​ທະ­ເລ, ເດີນ​ອາ­ກາດ ແລະ ການ​ຄ້າ, ບໍ່​ໃຫ້​ຖືກ​ກີດ­ຂວາງ​ໃນ​ພາກ​ພື້ນ, ພິ­ເສດ​ແມ່ນ​ຢູ່​ທະ­ເລ​ຕາ­ເວັນ​ອອກ; ຮຽກ​ຮ້ອງ​ບັນ­ດາ​ຝ່າຍ​ຈົ່ງ​ອົດ­ທົນ​ອົດ​ກັ້ນ, ບໍ່​ນາບ​ຂູ່​ດ້ວຍ​ກຳ­ລັງ​ອາ­ວຸດ ຫຼືນຳ​ໃຊ້​ກຳ­ລັງ​ອາ­ວຸດ; ເຄົາ­ລົບ​ວິ­ວັດ​ການ​ດ້ານ​ການ​ທູດ ແລະ ດ້ານ​ກົດ­ໝາຍ ຢ່າງ​ຄົບ​ຖ້ວນ; ແກ້​ໄຂ​ຂໍ້​ຂັດ​ແຍ້ງ​ພິ­ພາດ​ດ້ວຍ​ສັນ­ຕິ​ວິ­ທີ ບົນ​ພື້ນ­ຖານ​ບັນ­ດາ​ຫຼັກ­ການ​ພື້ນ­ຖານ​ຂອງ​ກົດ­ໝາຍ​ສາ­ກົນ, ໃນ​ນັ້ນ​ມີອະນຸ​ສັນ­ຍາ​ສະ­ຫະ​ປະ­ຊາ​ຊາດ​ວ່າ​ດ້ວຍ​ກົດ­ໝາຍ​ທະ­ເລ​ປີ 1982 (UNCLOS 1982); ຢືນ­ຢັນ​ຄືນ­ໃໝ່ກ່ຽວ​ກັບ​ການ​ສະໜັບສະ­ໜູນ​ການ​ຜັນ​ຂະ­ຫຍາຍ ຖະ­ແຫຼງ­ການ​ກ່ຽວ​ກັບ​ການ​ປະ­ພຶດ​ຂອງ​ບັນ­ດາ​ຝ່າຍ​ຢູ່​ທະ­ເລ​ຕາ­ເວັນ​ອອກ (DOC) ຢ່າງ​ຄົບ​ຖ້ວນ ແລະ ມີ​ປະ​ສິດ­ທິ​ຜົນ ແລະ ມີ​ການ​ຮ່ວມ​ມືເພື່ອ​ແນ­ໃສ່​ບັນ­ລຸ​ປະ­ມວນ​ຂໍ້​ກຳ­ນົດ​ກ່ຽວ​ກັບ​ວິ­ທີ​ປະ­ພຶດ​ຢູ່​ທະ­ເລ​ຕາ­ເວັນ​ອອກ (COC) ໂດຍ​ໄວ.

ທ່ານ​ປະ­ທາ­ນາ­ທິ­ບໍ­ດີ ທີນຈໍ ໄດ້​ຖື​ເປັນ​ກຽດ​ເຊີນ​ທ່ານ​ປະ­ທານ​ປະ­ເທດ ເຈີ່ນ​ດ້ານ​ກວາງ ແລະ ພັນ​ລະ​ຍາ ໄປ​ຢ້ຽມ­ຢາມ ສາທາ​ລະນະ​ລັດ ສະ­ຫະ­ພາບ ມຽນ​ມາ​ໃນ​ເວ­ລາ​ມໍ່ໆ​ນີ້. ທ່ານ​ປະ­ທານ​ປະ­ເທດ ເຈີ່ຍ​ດ້ານ​ກວາງ ໄດ້​ຮັບ​ຄຳ​ເຊີນ​ດ້ວຍ​ຄວາມ​ປິ​ຕິ​ຍິນ​ດີ.

* ໃນ​ຕອນ​ບ່າຍ ວັນ​ທີ 26 ຕຸ­ລາ, ທີ່​ສຳ­ນັກ­ງານ​ສູນ​ກາງ​ພັກ​ກອມ​ມູ​ນິດຫວຽດນາມ ທ່ານ​ເລ­ຂາ­ທິ­ການ​ໃຫຍ່ຄະນະບໍລິຫານງານສູນກາງພັກ ຫງວ​ຽນ​ຝູ​ຈ້ອງ ໄດ້​ຕ້ອນ­ຮັບທ່ານ​ປະ­ທາ­ນາ­ທິ­ບໍ­ດີ ທີນຈໍ ຢ່າງ​ສະໜິດສະໜົມ.

ທ່ານ​ເລ­ຂາ­ທິ­ການ​ໃຫຍ່ ຫງວ​ຽນ​ຝູ​ຈ້ອງ ​ໄດ້​ສະ­ແດງ​ຄວາມ​ຊົມ­ເຊີຍ​ຢ່າງ​ສຸດ​ໃຈ ແລະ ໃຫ້​ທັດ­ສະ­ນະ​ວ່າ ການ​ຢ້ຽມ­ຢາມ​ຂອງ​ທ່ານປະ­ທາ­ນາ­ທິ­ບໍ­ດີ ທີນຈໍ ມີ​ຄວາມ​ໝາຍ​ສຳ­ຄັນ​ໃນ​ສະ­ພາບ​ການ​ເຊິ່ງ​ສອງ​ປະ­ເທດ​ລ້ວນ​ແຕ່​ໄດ້​ເລືອກ​ຕັ້ງ​ຄະ­ນະ​ຜູ້­ນຳ​ໃໝ່, ໄດ້​ປະ­ກອບ­ສ່ວນ​ເພື່ອ​ໄຂ​​ໄລ­ຍະ​ໃໝ່​​ແຫ່ງ​ການ​ພົວ­ພັນລະຫວ່າງ​ສອງ​ປະ­ເທດ. ທ່ານ​ເລຂາ­ທິ­ການ​ໃຫຍ່​ກໍ່​ໄດ້​ຢືນ­ຢັນ​ກ່ຽວ​ກັບ​ນະ­ໂຍ­ບາຍ​ສະ­ເໝີ​ຕົ້ນ​ສະ­ເໝີ​ປາຍ​ຂອງຫວຽດ­ນາມ ທີ່ຍາມ​ໃດ​ກໍ່​ຖື​ເປັນ​ສຳຄັນ​ການ​ເພີ່ມ​ທະ­ວີ ແລະ ເປີດ​ກວ້າງ​ການ​ພົວ­ພັນ​ມິດ­ຕະ­ພາບ ແລະ ການຮ່ວມ​ມື​ໃນ​ຫຼາຍ​ດ້ານ​ກັບມຽນ​ມາ; ທ່ານ​ໃຫ້​ທັດ­ສະ­ນະ​ວ່າ ການ​ແບ່ງ­ປັນ​ຈຸດ​ລວມ​ພ້ອມ​ກັນ​ຫຼາຍ​ຈຸດ​ໃນ​ປະ­ຫວັດ­ສາດ​ແຫ່ງ​ການ​ຕໍ່­ສູ້​ປົດ​ປ່ອຍ­ປະ​ເທດ​ຊາດ ກໍ່​ຄື​ໃນ​ການ​ຜັນ​ຂະ­ຫຍາຍ​​ນະ­ໂຍ­ບາຍ​​ປະ­ຕິ​ຮູບ​ເສດ­ຖະ­ກິດ ​ໃນ​ເວ­ລາ​ທີ່​ຜ່ານ​ມາມໍ່​ນີ້ ​​ເປັນ​ພື້ນຖານ​ອັນ​ສຳ­ຄັນ​ເພື່ອ​​ໃຫ້ສອງ​ປະເທດ​ເປີດ​ກວ້າງ ແລະ ເພີ່ມ​ທະ­ວີ​ການ​ພົວ­ພັນ​ມິດ­ຕະ­ພາບ ແລະ ການຮ່ວມ​ມື​ໃນ​ຫຼາຍ​ດ້ານ​ຍິ່ງ​ຂຶ້ນ.

ທ່ານ​ປະ­ທາ­ນາ­ທິ­ບໍ­ດີ ທີນຈໍ ຊົມ​ເຊີຍຫວຽດ­ນາມຊຶ່ງພາຍ​ໃຕ້​ການ​ນຳ­ພາ​ຂອງ​ພັກ​ກອມ​ມູ​ນິດຫວຽດ­ນາມ ໄດ້​ບັນ­ລຸ​ບັນ­ດາ​ຜົນ­ງານ​ທີ່​ສຳ­ຄັນ​ພາຍ­ຫຼັງ 30 ປີ ແຫ່ງ​ການ​ປ່ຽນ­ແປງ​ໃໝ່, ເປັນ­ຕົ້ນ​ແມ່ນ​ໃນ​ການ​ພັດ­ທະ­ນາ​ເສດຖະ­ກິດ - ສັງ­ຄົມ, ມີ​ຖາ­ນະ​ບົດ­ບາດ​ນັບ​ມື້​ນັບ​ສູງໃນ​ພາກ​ພື້ນ ແລະ ໃນ​ໂລກ.  ທ່ານ​ປະ­ທາ­ນາ­ທິ­ບໍ­ດີ ທີນຈໍ ​ຢືນ­ຢັນ​ຈະ​ສືບ​ຕໍ່​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ​ອັນ​​ເປັນມູນ­ເຊື້ອ ລະຫວ່າງ​ສອງ​ປະ​ເທດ; ໃຫ້​ຄຳ​ໝັ້ນ​ສັນ­ຍາ​ຈະ​ສືບ​ຕໍ່​ປະຕິບັດ​​ເປັນ​ຢ່າງດີ​ ບັນ­ດາ​ຂໍ້​ຕົກ­ລົງ​ທີ່​ໄດ້​ຮັບ​ການ​ລົງ​ນາມ; ຍູ້​ແຮງ​ການ​ຢ້ຽມ­ຢາມແລະພົບ​ປະ​ຂັ້ນ​ສູງ ແລະ ​ຂັ້ນຕ່າງໆ; ເພີ່ມ​ທະ­ວີ​ການພົບ​ປະ​ແລກ­ປ່ຽນ​ລະຫວ່າງປະ­ຊາ­ຊົນ ແລະ ປະ­ສານ​ສົມ­ທົບ​ຢ່າງ​ແໜ້ນ​ແຟ້ນ​ພາຍ​ໃນ ອາ​ຊຽນ ແລະ ​ໃນ​ເວ­ທີ​ປາ​ໄສ​ພາກ​ພື້ນ ແລະ ສາ­ກົນ​ຄື ກອງ​ປະ­ຊຸມຂັ້ນ​ສູງກ່ຽວ​ກັບ​ການ​ຮ່ວມ​ມື ກຳປູເຈຍ - ລາວ - ມຽນ​ມາ - ຫວຽດ­ນາມ (CLMV), ກອງ​ປະ­ຊຸມ​ຂັ້ນ​ສູງ​ຍຸດ​ທະ​ສາດ​ການ​ຮ່ວມ​ມື​ແມ່​ນ້ຳ 3 ສາຍ ​ເອຢາ​ສະ​ດີ - ​ເຈົ້າພຣະຢາ - ​ແມ່​ຂອງ ຄັ້ງ​ທີ 7 (ACMECS 7), ການ​ຮ່ວມ​ມື​ອະ​ນຸ​ພາກ​ພື້ນ​ແມ່­ນ້ຳ​ຂອງເປີດ​ກວ້າງ (GMS)...

* ໃນ​ຕອນ​ບ່າຍ ວັນ​ທີ 26 ຕຸ­ລາ, ທີ່​ສຳ­ນັກ­ງານ​ລັດ­ຖະ­ບານ, ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ຊວນ​ຝຸກ​ໄດ້​ຕ້ອນ­ຮັບ​ທ່ານ​ປະ​ທາ​ນາ​ທິ​ບໍ​ດີ​ ທີ​ນຈໍ ແລະ ພັນ​ລະ​ຍາ ​ທີ່​ກຳ­ລັງ​ຢ້ຽມ​ຢາມ ​ສສ ຫວຽດ­ນາມ​ຢ່າງ​ເປັນ​ທາງ​ການ.

ໂດຍ​ຕາງ­ໜ້າ​ລັດ­ຖະ­ບານ ສສ ຫວຽດ­ນາມ, ທ່ານ​ນາ­ຍົກ­ລັດ­ຖະ­ມົນ­ຕີ ຫງວ​ຽນ​ຊວນ​ຝຸກ ໄດ້​ຊົມ­ເຊີຍ​ຢ່າງ​ສຸດ​ໃຈ ຕໍ່​ການ​ຢ້ຽມ­ຢາມ​ຂັ້ນ​ລັດທີ່ ສສ ຫວຽດ­ນາມ​ຂອງ​ທ່ານປະ­ທາ­ນາ­ທິ­ບໍ­ດີ ທີນຈໍ ແລະ ພັນ​ລະ​ຍາ; ​ສະ­ແດງ​ຄວາມ​ຂອບ​ອົກ​ຂອບ­ໃຈ​ຕໍ່​ພະ​ທ່ານປະ­ທາ­ນາ­ທິ­ບໍ­ດີ ທີ່​ໄດ້​ເຂົ້າ​ຮ່ວມ ແລະ ມີ​ການ​ປະ­ກອບ­ສ່ວນ​ເຂົ້າ​ໃນ​ຄວາມ​ສຳເລັດ​ຜົນ​ຂອງ​ບັນ­ດາ​ກອງ​ປະ­ຊຸມ ACMECS 7, CLMV 8 ແລະ WEF - Mekong.

ເຫັນ​ດີ​ກັບ​ບັນ­ດາ​ຂໍ້​ສະ­ເໜີ​ກ່ຽວ​ກັບ​ການ​ຮ່ວມ​ມື​ສອງ​ຝ່າຍ​ລະ­ຫວ່າງ​ສອງ​ປະ­ເທດ, ທ່ານ​ນາ­ຍົກ­ລັດ­ຖະ­ມົນ­ຕີ​ໃຫ້​ທັດ­ສະ­ນະ​ວ່າ ສອງ​ປະ­ເທດ​ຕ້ອງ​ຍູ້​ແຮງ​ການ​ຮ່ວມ​ມື​ໃນ​ບັນ­ດາ​ຂົງ­ເຂດ​ທີ່​​ແຕ່​ລະ​ຝ່າຍມີ​ທ່າ​ແຮງຄື ການ​ປູກລ້ຽງ​ສິນ​ໃນ​ນ້ຳ, ກາ­ເຟ, ໝາກພິກ​ໄທ, ໝາກມ່ວງ​ຫິມະ​ພານ. ນອກ​ນັ້ນ, ຫວຽດ­ນາມມີທ່ານ​ແຮງ​ໃນ​ການ​ສົ່ງ​ນອກ​ສິນຄ້າ​ກະສິກຳ, ຈຶ່ງມີ​ຄວາມ​​ຫວັງ​ຈະ​ຮ່ວມ​ມື​ຢ່າງ​ແໜ້ນ​ແຟ້ນ​ກັບມຽນ​ມາ ໃນ​ຂົງ­ເຂດ​ນີ້.

ທ່ານ​ນາ­ຍົກ­ລັດ­ຖະ­ມົນ­ຕີ ຫງຽນຊວນ​ຝຸກ ​ໃຫ້​ທັດສະນະ​ວ່າ ຫວຽດ­ນາມແລະມຽນ​ມາມີ​ເອກະລັກ​ວັດທະນະທຳ​ອັນ​ດີງາມ​ຫຼາກ​ຫຼາຍ ດັ່ງ​ນັ້ນ​ສອງ​ປະ​ເທດ​ຄວນ​ຜັນ​ຂະ­ຫຍາຍ​ໂຄງ­ການ​ຮ່ວມ​ມື​ໃນ​ຂົງ­ເຂດ​ຕ່າງໆ​ຄື ​ການ­ທ່ອງ­ທ່ຽວ ຄົມ­ມະ­ນາ­ຄົມ​ທາງ​ອາ­ກາດ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ປະ­ຊາ­ຊົນ​ທັງ​ສອງ​ປະ­ເທດ. ຄຽງ​ຄູ່​ກັບ​ການ​ຮ່ວມ​ມື​ທາງ​ດ້ານ​ການ­ເມືອງ ​ການ​ຕ່າງ­ປະ­ເທດ, ສອງ​ປະ­ເທດ​ຕ້ອງ​ຖື​ເປັນ​ສຳ­ຄັນ ແລະ ຊຸກຍູ້ການ​ຮ່ວມ​ມື​ລະ­ຫວ່າງ​ບັນ­ດາ​ວິ​ສາ​ຫະ​ກິດ; ແກ້​ໄຂ​ສິ່ງ​ກີດ­ຂວາງ, ອຳນວຍ​ຄວາມ​ສະ­ດວກ​​ໃຫ້​ວິ​ສາ​ຫະ​ກິດ​ຂອງສອງ​ປະເທດ​ລົງ­ທຶນ ຜະ­ລິດ ແລະ ທຸ­ລະ​ກິດ​ໄດ້​ຮັບ​ປະສິດທິ​ຜົນ.

ທ່ານ​ປະ­ທາ­ນາ­ທິ­ບໍ­ດີ​ ທີ​ນຈໍ ໃຫ້​ຮູ້​ວ່າ ຫວຽດ­ນາມ​ພວມ​ເປັນ​ນັກ​ລົງ­ທຶນ​ຂະໜາດໃຫຍ່​ຢູ່ມຽນ​ມາ ດ້ວຍ​ມູນ​ຄ່າ​ການ​ລົງ­ທຶນ​​ເພີ່ມ​ຂຶ້ນ​ຢ່າງ​ບໍ່​ຢຸດ​ຢັ້ງ. ນອກ​ຈາກການ​ຮ່ວມ​ມື​ໃນ​ຂົງ­ເຂດ​ການ​ເງິນ - ທະ­ນາ­ຄານ, ຄົມມະນາ­ຄົມ, ທ່ານ​ປະ­ທາ­ນາ­ທິ­ບໍ­ດີມຽນ​ມາ ສະ­ເໜີ​​ໃຫ້ສອງ​ຝ່າຍ​ເປີດ​ກວ້າງ​ການ​ພົວ­ພັນ​ຮວ່ມ​ມື​ໃນ​ຫຼາຍ​ຂົງເຂດ​ອື່ນ​​ອີກ, ໃນ​ນັ້ນ​ມີ​ຂົງ­ເຂດ​ປູກລ້ຽງ​ສິນ​ໃນ​ນ້ຳ, ຜະ­ລິດ ແລະ ປຸງ​ແຕ່ງຜະ​ລິ​ຕະ​ພັນ​ກະ­ສິ­ກຳ. ມຽນມາຊົມ­ເຊີຍ​ວິ​ສາ​ຫະ​ກິດຫວຽດ­ນາມ ທີ່​ໄດ້ຜັນ​ຂະ­ຫຍາຍ​ໂຄງ­ການ​ລົງ­ທຶນ ໃນ​ການ​ປູກລ້ຽງ​ສິນ​ໃນ​ນ້ຳ​, ກາ­ເຟ, ໝາກພິກ​ໄທ, ໝາກມ່ວງ​ຫິ​ມະ​ພານ ຢູ່ມຽນ​ມາ. ມຽນ​ມາໄດ້​ປະ­ກາດ​ໃຊ້​ບັນ­ດາ​ນະ­ໂຍ­ບາຍ​ໃໝ່​ກ່ຽວ​ກັບ​ການ​ພັດ­ທະ­ນາ​ເສດ­ຖະ­ກິດ, ສ້າງ​ເງື່ອນໄຂອຳນວຍ​ຄວາມ​ສະດວກ​ໃຫ້​ບັນ­ດາ​ນັກ​ລົງ­ທຶນ​​ຕ່າງ­ປະ­ເທດ ແລະ ມຽນ​ມາ, ສົ່ງ­ເສີມ​ວິ​ສາ​ຫະ​ກິດຫວຽດນາມ ມາລົງທຶນ​ຢູ່ມຽນ​ມາ.

ການ​ຢ້ຽມ­ຢາມ​ຂອງ​ທ່ານປະ­ທາ­ນາ­ທິ­ບໍ­ດີ ທີນຈໍ ທີ່ຫວຽດ­ນາມ ​ໄດ້​​ສິ້ນ​ສຸດລົງ​ດ້ວຍ​ຜົນ​ສຳ​ເລັດອັນ​ດີງາມ, ໄດ້​ປະ­ກອບ­ສ່ວນ​ອັນ​ສຳຄັນ ເຂົ້າ​ໃນ​ການຊຸກ­ຍູ້​ການ​ພົວ­ພັນ​ມິດ­ຕະ­ພາບ​ ການຮ່ວມ​ມື​ ລະ­ຫວ່າງ​ສອງ​ປະ­ເທດ​.

ສັງ​ລວມ​ໂດຍ ​ເຟືອງ​ຈ່າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ