ວັນຈັນ, 18/11/2019
ທ່ານປະທານາທິບໍດີແຫ່ງ ໄອແລນ ດຳເນີນການຢ້ຽມຢາມຂັ້ນລັດທີ່ ສສ ຫວຽດນາມ ຢ່າງເປັນທາງການ
27/11/2016 11:56' ສົ່ງ ພິມ
ທ່ານປະທານປະເທດ ເຈິ່ນດ້າຍກວາງ ຕ້ອນຮັບທ່ານປະທານາທິບໍດີ Michael Daniel Higgins ທີ່ທຳນຽບປະທານປະເທດຫວຽດນາມ. (ພາບ: TTXVN)

ໃນ​ຂອບ​ຂອງ​ການ​ຢ້ຽມຢາມ, ທ່ານ​ປະທານາທິບໍດີ​ແຫ່ງ ​ໄອ​ແລນ Michael Daniel Higgins ​ໄດ້ມີ​ການ​ພົບ​ປະ​ສ່ວນ​ຕົວ ​ແລະ ຫຼັງ​ຈາກ​ນັ້ນ​ກໍ່ພົບປະ​ເຈລະຈາກັບທ່ານປະ­ທານປະ­ເທດຫວຽດນາມ ເຈີ່ມ​ດ້າຍ​ກວາງ; ​ເຂົ້າ​ຢ້ຽມ​ຄຳນັບ​ທ່ານ​ເລຂາ​ທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ ພັກ​ກອມ​ມູນິດ​ຫວຽດນາມ ຫງວຽນ​ຝູຈ້ອງ; ພົບ​ປະ​ກັບ​ທ່ານ​ນາຍົກລັດຖະມົນຕີ ຫວຽນ​ຊວນ​ຝຸກ; ພົບ​ປະ​ກັບ​ທ່ານ​ນາງ​ປະທານ​ສະພາ​ແຫ່ງ​ຊາດ​ຫວຽດນາມ ຫງວຽທີ້ກິ​ມ​ເລິນ; ພົບ​ປະກັບ​ປະທານ​ສະພາ​ປະຊາຊົນ​ນະຄອນ​ໂຮ່ຈີ​ມິນ; ຮ່ວມ​ຊົມ​ການສະ​ແດງ​ສິລະ​ປະ​ສະ​ເຫຼີ​ມສະຫຼອງ 20 ປີ​ແຫ່ງ​ຄວາມ​ພົວພັນ​ມິດຕະພາບຫວຽດນາມ - ​ໄອ​ແລນ; ​ຢ້ຽມ​ຢາມ​ແລະ​ໂອ້​ລົມ​ກັບ​ພະນັກ​ງານ ນັກ​ສຶກສາ​ມະຫາວິທະຍາ​ໄລ​ແຫ່ງ​ຊາດ​ຮ່າ​ໂນ້ຍ; ​ເຂົ້າ​ຮ່ວມ​ລາຍການ​ພົບ​ປະລະ​ຫວ່າງ​ວິ​ສາຫະກິດນະຄອນ​ໂຮ່ຈິ​ມີນ ​ແລະ​ ວິ​ສາ​ຫະກິດ​ໄອ​ແລນ; ​ໄປ​ຢາ​ມບູຮານ​ສະຖານ​ບາງ​ແຫ່ງ​ຢູ່​ນະຄອນ​ໂຮ່ຈີ​ມິນ, ​ແຂວງ​ກວ໋າງຈີ້... ກ່ອນນັ້ນ, ທ່ານ​ປະທານາທິບໍດີ​ແຫ່ງ ​ໄອ​ແລນ Michael Daniel Higgins ແລະ​ພັນ​ລະ​ຍາ ​ໄດ້ວາງ​ພວງ­ມາ­ລາ​ທີ່​ອະນຸສາວະ­ລີ​ບັນ­ດາ​ນັກ­ຮົບ​ວິ­ລະ​ຊົນ​ຜູ້​ທີ່​ເສຍ​ຊີ­ວິດ​ເພື່ອ​ຊາດ (ຮ່າ​ໂນ້ຍ).

​ໃນ​ບັນດາ​ການ​ພົບ​ປະ​ເຈລະຈາ​ສອງ​ຝ່າຍ​ນັ້ນ, ຜູ້ນຳ​ທັງ​ສອງ​ຝ່າຍ​ສະ​ແດງ​ຄວາມຮູ້ສຶກ​ເພີງ​ພໍ​ໃຈ​ທີ່​ເຫັນ​ວ່າ ຄວາມ​ພົວພັນຫວຽດນາມ - ​ໄອ​ແລນ ​ໃນ​ເວລາ​ທີ່​ຜ່ານ​ມາ​ໄດ້​ບັນລຸ​ຜົນສຳ​ເລັດ​ຫຼາຍ​ຢ່າງ; ​ເຫັນ​ດີ​ເປັນ​ເອກະສັນ​ຈະ​ຍູ້​ແຮງ​ການ​ຮ່ວມ​ມື​ໃນ​ບັນດາ​ຂົງ​ເຂດ​ທີ່​ມີ​ຄວາມ​ສາມາດ​ບົ່ງ​ຊ້ອນ​ຫຼາຍ​ຢ່າງ ​ແລະ ຕອບ​ສະໜອງ​ຜົນ​ປະ​ໂຫຍ​ດຂອງ​ສອງ​ປະ​ເທດ​ຄື ການ​ຄ້າ - ການ​ລົງທຶນ, ສຶກສາ - ກໍ່ສ້າງ, ​ເຕັກ​ໂນ​ໂລ​ຊີ​ສີຂຽວ, ພະລັງງານ​ທົດ​ແທນ, ກະສິກຳ, ສາທາລະນະ​ສຸກ, ການ​ພັດທະນາ​ແບບ​ຍືນ​ຍົງ…

ສອງ​ຝ່າຍ​ເຫັນ​ດີ​ເປັນ​ເອກະສັນ​ຈະ​ເພີ່ມ​ທະວີ​ການ​ແລກປ່ຽນ​ຄະນະ​ຜູ້​ແທນ​ ແລະ​ ການ​ພົບ​ປະ​ໃນ​ຂັ້ນ​ຕ່າງໆ​ທຸກ​ຂັ້ນ ​ແນ​ໃສ່​ຊຸກຍູ້​ການ​ຮ່ວມ​ມື​ສອງ​ຝ່າຍ; ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ ​ແລະ ສົ່ງ​ເສີມ​ວິ​ສາ​ຫະກິດ​ຂອງ​ສອງ​ປະ​ເທດ​ຮ່ວມ​ມື​ລົງທຶນ, ທຸລະ​ກິດ, ​ຖ່າຍ​ໂອນ​ເຕັກ​ໂນ​ໂລ​ຊີ, ​ເປັນ​ຕົ້ນແມ່ນ​ໃນ​ບັນດາ​ຂົງ​ເຂດ​ພະລັງງານ​ທົດ​ແທນ, ກະສິກຳ ​ແລະ ປຸງ​ແຕ່ງອາຫານ, ຂໍ້​ມູນ​ຂ່າວສານ - ການ​ສື່ສານ, ສາທາລະນະ​ສຸກ, ການບິນ…, ພິ​ເສດ​ແມ່ນ​ໃນ​ສະພາບ​ການ​ທີ່​ສັນຍາ​ການ​ຄ້າ​ເສລີ​ລະຫວ່າງ​ຫວຽດນາມ ​ແລະ ສະຫະພາບ​ເອີຣົບ ຈະ​ໄດ້​ຮັບ​ການ​ລົງ​ນາມ​ແລະ​ຜັນ​ຂະຫຍາຍ​ໃນ​ໄວໆ​ນີ້.

ສອງ​ຝ່າຍ​ກໍ່​ເຫັນ​ດີ​ຖື​ການ​ສຶກສາ-ກໍ່ສ້າງ ​ເປັນ​ຂົງ​ເຂດ​ການ​ຮ່ວມ​ມື​ຈຸດ​ໜັກ​ໃຈກາງ​ໃນ​ເວລາ​ສະ​ເພາະ​ໜ້າ ​ແລະ ສົ່ງ​ເສີມ​ບັນດາ​ພື້ນຖານ​ການສຶກສາ​ມະຫາວິທະຍາ​ໄລຂອງ​ສອງ​ປະ​ເທດ ​ເປັນ​ຄູ່​ຮ່ວມ​ມື​ນຳ​ກັນ; ຍູ້​ແຮງ​ການ​ເຄື່ອນ​ໄຫວ​ແລກ​ປ່ຽນ​ສິລະ​ປະ ວັດທະນະທຳ ​ແລະ ​ເສີມ​ຂະຫຍາຍ​ບົດບາດ​ເປັນ​ຂົວ​ຕໍ່​ຂອງ​ຊຸມ​ຊົນຊາວຫວຽດນາມ ຢູ່ ​ໄອ​ແລນ, ປະກອບສ່ວນ​ຊຸກຍູ້​ການ​ຮ່ວມ​ມື​ສອງ​ຝ່າຍ​ໃນ​ບັນດາ​ຂົງ​ເຂດ​ອື່ນ. ທ່ານ​ປະທານາທິບໍດີ​ Michael Daniel Higgins ​ແຈ້ງ​ໃຫ້​ຊາບ​ວ່າ ​ໄອ​ແລນ ຈະ​ປະກາດ​ໂດຍ​ໄວ ​ແຜນຍຸດທະ​ສາດ​ແຫ່ງ​ຊາດ​ກ່ຽວ​ກັບ​ການ​ຮ່ວມ​ມືພັດທະນາ​ກັບ​ຫວຽດນາມ​ໄລຍະ 2017 - 2020.

ສອງ​ຝ່າຍ​ເຫັນ​ດີ​ເປັນ​ເອກະສັນ​ກ່ຽວ​ກັບ​ຄວາມ​ສຳຄັນ​ຂອງ​ການຮັກສາ​ສັນຕິພາບ ຄວາມ​ສະຫງົບ, ຊຸກຍູ້​ການ​ຮ່ວມ​ມື ການ​ພັດທະນາ​ໃນ​ໂລກ; ສືບ​ຕໍ່​ສົມທົບ​ກັນ​ຢ່າງ​ແໜ້ນ​ແຟ້ນຢູ່​ບັນດາ​ເວທີ​ປາ​ໄສ​ສາກົນ​ຄື ສະຫະ​ປະຊາ​ຊາດ, ອາ​​ເຊມ ​ແລະ​ ໃນ​ຂອບ​ການ​ຮ່ວມ​ມືອາ​ຊຽນ - ສະຫະພາບ​ເອີຣົບ. ກ່ຽວ​ກັບ​ບັນຫາ​ທະ​ເລ​ຕາ​ເວັນ​ອອກ, ສອງ​ຝ່າຍ​ເປັນ​ເອກະ​ພາບ​ກັບ​ທັດສະນະ​ແກ້​ໄຂ​ຂໍ້​ພິພາດຂັກ​ແຍ່ງ​ກ້ວຍ​ສັນຕິ​ວິທີ, ບົນ​ພື້ນຖານ​ກົດໝາຍ​ສາກົນ, ພິ​ເສດ​ແມ່ນ​ອະນຸ​ສັນຍາ​ສະຫະ​ປະຊາ​ຊາດ​ວ່າ​ດ້ວຍ​ກົດໝາຍ​ທະ​ເລ​ປີ 1982.

​ເນື່ອງ​ໃນ​ໂອກາດ​ນີ້, ທ່ານປະ­ທານປະ­ເທດຫວຽດນາມ ເຈິ່ມ​ດ້າຍ​ກວາງ ​ແລະ ທ່ານ​ປະທານາທິບໍດີ Michael Daniel Higgins ​ໄດ້​ເປັນ​ສັກຂີ​ພະຍານ​ທີ່​ພິທີ​ລົງ​ນາມ​ໃນບັນດາ​ເອກະສານ ​ຂໍ້​ຕົກລົງລະຫວ່າງ​ບັນດາ​ກະຊວງ, ຂະ​ແໜງ​ການ, ວິ​ສາຫະກິດ ​ແລະ ພື້ນຖານການ​ສຶກສາ​ມະຫາວິທະຍາ​ໄລ​ຂອງ​ສອງ​ປະ​ເທດ ​ໃນ​ບັນດາ​ຂົງ​ເຂດ​ຮ່ວມ​ມື​ພັດທະນາ, ການ​ສຶກສາ - ກໍ່ສ້າງ, ​ໄຟຟ້າ​ພະລັງງານ​ລົ​ມ, ​ເຕັກ​ໂນ​ໂລ​ຊີສື່​ຂ່າວ, ​ໄປ​ຊະນີ​ໂທລະ​ຄົມມະນາຄົມ, ອຸປະກອນ​ການ​ແພດ...

ຄວາມ​ພົວພັນ​ລະຫວ່າງຫວຽດນາມ - ​ໄອ​ແລນ ນັບ​ແຕ່​ເມື່ອສ້າງ​ຕັ້ງ​ສາຍ​ພົວພັນ​ທາງ​ການ​ທູດ​ແຕ່​ປີ 1996 ມາ​ຮອດ​ປະຈຸ​ບັນ​ ໄດ້​ບັນລຸ​ບາດກ້າວ​ຄືບ​ໜ້າ​ທີ່​ໜ້າ​ພຶງ​ພໍ​ໃຈ, ນັບ​ມື້​ນັບ​ເຂົ້າ​ສູ່​ລວງ​ເລິກ​ແລະ​ມີ​ເນື້ອ​ແທ້. ສອງ​ຝ່າຍ​ໄດ້​ແລກປ່ຽນ​ບັນດາ​ຄະນະ​ຜູ້​ແທນ​ຂັ້ນ​ສູງ, ສ້າງ​ກຳລັງ​ໜູນ​ທີ່​ແຂງ​ແຮງ​ໃຫ້​ແກ່​ການ​ພັດທະນາ​ຄວາມ​ພົວພັນ​ສອງ​ຝ່າຍ.

ຄວາມ​ພົວພັນ​ຮ່ວມ​ມື​ເສດ​ທະ​ກິດ ການ​ຄ້າ ການ​ລົງທຶນລະຫວ່າງ​ສອງ​ປະ​ເທດ​ມີ​ບາດກ້າວຂະຫຍາຍຕົວ​ໃໝ່. ມູນຄ່າ​ການ​ຄ້າສອງ​ສົ້ນ​ປີ 2015 ບັນ​ລຸ 402 ລ້ານ​ໂດ​ລາ​ສະຫະລັດ (​ເພີ່ມ 28% ທຽບ​ກັບ​ປີ 2014), ສະ​ເພາະ 9 ​ເດືອນ​ຕົ້ນ​ປີ 2016 ບັນລຸ 798 ລ້ານ​ໂດ​ລາ​ສະຫະລັດ (ທົບ​ສາມ​ເທົ່າ​ທຽບ​ກັບ​ເວລາ​ດຽວ​ກັນ​ໃນ​ປີ 2015). ປະຈຸ​ບັນ, ​ໄອ​ແລນ​ມີ 17 ​ໂຄງການ​ລົງທຶນ​ຢູ່​ຫວຽດນາມ ດ້ວຍ​ຈຳນວນ​ທຶນ​ຈົດ​ທະບຽນ 20,7 ລ້ານ​ໂດ​ລາ​ສະຫະລັດ, ຢູ່​ໃນ​ອັນ​ດັບ​ທີ 67 ​ໃນ​ຈຳນວນ 115 ປະ​ເທດ​ແລະ​ອານາ​ເຂດ​ທີ່​ມີ​ການ​ລົງທຶນ​ຢູ່​ຫວຽດນາມ. ​ບໍລິສັດ​ຈຳນວນໜຶ່ງຂອງ​ໄອ​ແລນ​ໄດ້​ມີໜ້າ​ຢູ່​ຫວຽດນາມ​ແຕ່​ຕົ້ນ​ຊຸມ​ປີ 1990. ມາ​ຮອດ​ປະຈຸ​ບັນ, ​ໄອ​ແລນ​ໄດ້​ຮ່ວມ​ມື​ຢ່າງ​ແຂງ​ແຮງ​ທີ່​ສຸດ​ກັບ​ຂະ​ແໜງ​ການ​ພະລັງງານ​ ແລະ ​ໄຟຟ້າ​ຂອງ​ຫວຽດນາມ.

ກ່ຽວ​ກັບ​ການ​ຮ່ວມ​ມື​ພັດທະນາ, ຫວຽດນາມ​ເປັນ​ປະ​ເທດ​ອາຊີໜຶ່ງ​ດຽວ​ໃນ​ຈຳນວນ 9 ປະ​ເທດຄູ່​ຮ່ວມ​ບຸລິມະສິດ​ທີ່​ໄດ້​ຮັບ​ການ​ຊ່ວຍ​ເຫຼືອ​ພັດທະນາ​ຂອງ​ໄອ​ແລນ. ລັດຖະບານ​ໄອ​ແລນ​ໄດ້​ຮັບຮອງ​ຜ່ານ 2 ​ແຜນຍຸດ​ທະ​ສາດ​ແຫ່ງ​ຊາດ​ໄອ​ແລນ - ຫວຽດນາມ (CSP) ​ໄລຍະ 2007 - 2010 ​ແລະ ​ໄລຍະ 2011 - 2015. ​ໃນ​ສອງໄລຍະ​ນີ້, ​ໄອ​ແລນ​ໄດ້​ໃຫ້ການ​ຊ່ວຍ​ເຫຼືອ​ລ້າ​ແກ່​ຫວຽດນ​າມເປັນຈຳນວນ​ເງິນ 150 ລ້ານ​ໂດ​ລາ​ສະຫະລັດ ຊຶ່ງ​ລວມສູນ​ໃສ່ບັນດາ​ຂົງ​ເຂດ ລົບ​ລ້າງ​ຄວາມ​ອຶດ​ຫີ​ວທຸກ​ຍາກ, ຊ່ວຍ​ເຫຼືອ​ໃຫ້​ບັນດາ​ເປົ້າ​ໝາຍ​ທີ່​ຖືກ​ເສຍ​ຫາຍ​ງ່າຍ ​ແລະ ​ເພີ່ມ​ທະວີ​ຄວາມ​ສາມາດ​ທາງ​ດ້ານ​ຄຸ້ມ​ຄອງ​ເສ​ຖະກິດ.

​ໃນ​ຊຸມ​ປີ​ທີ່​ຜ່ານ​ມາ, ການ​ຮ່ວມ​ມື​ລະຫວ່າງຫວຽດນາມ ​ແລະ ​ໄອ​ແລນ ​ໃນ​ຂົງ​ເຂດ​ການ​ສຶກສາ-ກໍ່ສ້າງ​ໄດ້​ຂະຫຍາຍຕົວ​ຢ່າງ​ຕັ້ງໜ້າ. ​ໃນ​ເວລາ​ທີ່​ຜ່ານ​ມາ​ມໍ່​ນີ້, ບັນດາ​ພື້ນຖານການ​ສຶກສາ-ກໍ່ສ້າງ​ຂອງ​ສອງ​ປະ​ເທດ​ໄດ້​ຕິດຕໍ່​ຮ່ວມ​ມື​ກັນ​ຢ່າງ​ຕັ້ງໜ້າ. ​ໄອ​ແລນ​ໄດ້​ສະໜອງ​ທຶນ​ສຶກສາ​ປິນຍາ​ໂທ​ໃຫ້​ນັກ​ສຶກສາ​ຫວຽດນາມ 185 ຄົນ. ຊຸມ​ຊົນ​ຊາວຫວຽດນາມຢູ່ ​ໄອ​ແລນ ມີ​ປະມານ 4.000 ຄົນ ​ໄດ້​ດຳລົງ​ຊີວິດ​ຢ່າງ​ເປັນ​ປົກກະຕິ​​ໃນ​ປະ​ເທດ​ໄອ​ແລນ ​ແລະ​ກາຍເປັນປັດ​ໄຈ​ເພີ່ມ​ທະວີ​ການ​ພົວພັນ​ສອງ​ຝ່າຍ.

ການ​ຢ້ຽມຢາມ​ຂັ້ນ​ລັດ​ຢູ່​ຫວຽດນາມ​ຄັ້ງ​ນີ້​ຂອງທ່ານ​ປະທານາທິບໍດີ​ແຫ່ງ ​ໄອ​ແລນ Michael Daniel Higgins ​ແລະ​ ພັນ​ລະ​ຍາ ​ແນ​ໃສ່​ຢືນຢັນ​ຄວາມ​ຕັດສິນ​ໃຈ​ຂອງ​ຜູ້ນຳແລະ​ປະຊາຊົນ​ສອງ​ປະ​ເທດ​ ໃນ​ການ​ເຮັດ​ໃຫ້ຄວາມ​ພົວພັນ​ມິດຕະພາບ​ ແລະ ​ການ​ຮ່ວມ​ມື​ຫຼາຍ​ດ້ານລະຫວ່າງຫວຽດນາມ - ​ໄອ​ແລນ ຂະຫຍາຍຕົວ​ເຂົ້າ​ສູ່​ລວງ​ເລິກ; ຊຸກຍູ້​ບັນດາ​ທ່າ​ແຮງ ​ແລະ ​ຄວາມ​ສາມາດ​ບົ່ມ​ຊ້ອນ​ແຫ່ງ​ການ​ຮ່ວມ​ມື​ລະຫວ່າງ​ສອງ​ປະ​ເທດ, ​ເປັນ​ຕົ້ນ​​ແມ່ນ​ໃນ​ບັນດາຂົງ​ເຂດການ​ຄ້າ ການ​ລົງທຶນ ການ​ຮ່ວມ​ມື​ພັດທະນາ ​ແລະ ການ​ສຶກສາ-ກໍ່ສ້າງ./.

ສັງ​ລວມ​ໂດຍ ທຸ່ຍ​ລີງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ