ວັນອາທິດ, 22/9/2019
ທ່ານ ຈາງ ເຕີຈຽງ ກຳມະການຄະນະປະຈຳ ກົມການເມືອງພັກກອມມູນິດຈີນ, ປະທານສະພາຜູ້ແທນປະຊາຊົນ ແຫ່ງຊາດຈີນ ດຳເນີນການຢ້ຽມຢາມ ສັນທະວະໄມຕີ ທີ່ປະເທດຫວຽດນາມ
28/11/2016 10:18' ສົ່ງ ພິມ
ທ່ານນາງ ຫງວຽນທີ້ກິມເງິນ ປະທານສະພາແຫ່ງຊາດຫວຽດນາມ ຕ້ອນຮັບທ່ານ ຈາງ ເຕີຈຽງ ກຳມະການຄະນະປະຈຳກົມການເມືອງ ພັກກອມມູນິດຈີນ, ປະທານສະພາຜູ້ແທນປະຊາຊົນແຫ່ງຊາດຈີນ

ຈຸດປະສົງ​ຂອງ​ການ​ຢ້ຽມຢາມ​ແມ່ນ​ເພື່ອ​ສະ​ແດງ​ອອກ​ເປັນ​ຢ່າງ​ດີ ​ເຖິງ​ຄວາມ​ຮັບ​ຮູ້​ລວມທີ່​ສຳຄັນ ຊຶ່ງ​ເລຂາທິການ​ໃຫຍ່ ສີ ຈີ້​ນຜີ​ງ ​ແລະ ​ເລຂາທິການ​ໃຫຍ່ ຫງຽນຝູຈ້ອງ ​ໄດ້​ເຫັນ​ດີ​ນຳ​ກັນ, ກໍ່​ຄື​ຮັກສາ​ການ​ຢ້ຽມຢາມ​ຂັ້ນ​ສູງ​ລະຫວ່າງ​ສອງ​ປະ​ເທດ; ສືບ​ຕໍ່​ກໍ່ສ້າງ​ມູນ​ເຊື້ອ​ມິດຕະພາບ​ ລະຫວ່າງ​ຈີນ​ ແລະ​ຫວຽດນາມ; ຊຸກຍູ້​ຄວາມ​ພົວພັນ​ຮ່ວມ​ມື​ທີ່​ມີ​ຢູ່​ໃນ​ທຸກ​ຂົງ​ເຂດ; ​ເປັນ​ໂອກາດ​ເພື່ອ​ໃຫ້​ສອງ​ຝ່າຍ​ແລກປ່ຽນ​ການ​ປັບປຸງ ​ແລະ ຂະຫຍາຍ​ສາຍ​ພົວພັນ​ລະຫວ່າງ​ສອງ​ພັກ, ສອງ​ລັດ ກໍ່​ຄື​ເພີ່ນ​ທະ​ວີຄວາມ​ພົວພັນ​ຮ່ວມ​ມື ລະຫວ່າງອົງການ​ນິຕິ​ບັນຍັດ​ ຂອງ​ສອງ​ປະ​ເທດ. 

ການ​ຢ້ຽມຢາມ​ກໍ່​ເພື່ອ​ແນ​ໃສ່​ປະຕິບັດ​ຂໍ້​ຕົກລົງ​ຮ່ວມ​ມື ລະຫວ່າງ​ສະພາ​ແຫ່ງ​ຊາດ​ຫວຽດນາມ ​ແລະ ສະພາຜູ້ແທນປະຊາຊົນແຫ່ງຊາດຈີນ ທີ່​ໄດ້​ລົງ​ນາມ​ເມື່ອ​ເດືອນ​ທັນວາ 2015 ວ່າ​ດ້ວຍ​ການ​ແລກປ່ຽນ​ຄະນະ​ການນຳ​ຂັ້ນ​ສູງລະຫວ່າງ​ສະພາ​ແຫ່ງ​ຊາດ​ຫວຽດນາມ ​ແລະ ສະພາຜູ້ແທນປະຊາຊົນແຫ່ງຊາດຈີນ.

​ໃນ​ຂອບ​ຂອງ​ການ​ຢ້ຽມຢາມ, ທ່ານ ຈາງ​ ເຕີຈຽງ ກຳມະການຄະນະປະຈຳກົມການເມືອງ ພັກກອມມູນິດຈີນ, ປະທານສະພາຜູ້ແທນປະຊາຊົນແຫ່ງຊາດຈີນ ​ໄດ້​ພົບ​ປະ​ເຈລະຈາ​ກັບທ່ານ​ນາ​ງປະທານ​ສະພາ​ແຫ່ງ​ຊາດ ຫງວຽນ​ທີ້ກິມ​ເງິນ; ​ເຂົ້າ​ຢ້ຽມ​ຄຳນັບ​ເລຂາທິການ​ໃຫຍ່​ ຫງວຽນ​ຝູຈ້ອງ, ປະທາ​ນປະ​ເທດ ​ເຈິ່ນດ້າຍ​ກວາງ, ພົບ​ປະ​ຫາລືກັບ​ນາຍົກລັດຖະມັນ​ຕີ ຫງວຽນ​ຊວນ​ຝຸກ; ​ເຂົ້າ​ນັ່ງ​ຟັງ​ໃນ​ວາລະ​ປະຊຸມ​ເຊົ້າ​ວັນ​ທີ 10 ພະຈິກ, ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 2 ຂອງ​ສະພາ​ແຫ່ງ​ຊາດ​ຫວຽດນາມ​ຊຸດ​ທີ XIV; ​ເຂົ້າ​ຮ່ວມ​ການ​ພົບ​ປະ​ມິດຕະພາບ​ປະຊາຊົນ​ຫວຽດນາມ - ຈີນ; ​ເຂົ້າ​ຮ່ວມ​ພິທີ​ອັດ​ງາມ​ມະ​ໂຫລານ​ຊາວ​ໜຸ່ມ​ຫວຽດນາມ - ຈີນ; ຢ້ຽມຢາມ​ໂຄງການ​ກໍ່ສ້າງ​ຫໍ​ມິດຕະພາບ​ຫວຽດນາມ - ຈີນ; ພົບ​ປະກັບ​ເລຂາ​ຄະນະ​ພັກ​ນະ​ຄອນ ດ່າ​ນັ້ງ, ​ເລຂາ​ຄະນະ​ພັກ​ແຂວງ ກວ໋າງນາມ...

ຜ່ານ​ບັນດາ​ການ​ພົບ​ປະ ​ເຈ​ລະ​ຈາ, ສອງ​ຝ່າຍ​ໄດ້​ຢືນຢັນ​ຄວາມ​ສຳຄັນ​ຂອງ​ການ​ພັດທະນາ​ຄວາມ​ພົວພັນ​ມິດຕະພາບ​ຖານ​ເພື່ອນ​ບ້ານ​ໃກ້ຄຽງ, ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ຫວຽດນາມ - ຈີນ; ​ເຫັນ​ດີ​ເພີ່ມ​ທະວີ​ຄວາມ​ມານະ​ພະຍາຍາມ​ໃນ​ການ​ຜັນ​ຂະຫຍາຍ​ປະຕິບັດ​ເປັນ​ຢ່າງ​ດີ ຄວາມ​ຮັບ​ຮູ້​ລວມທີ່​ບັນລຸ​ໄດ້​ລະຫວ່າງ​ການ​ນຳ​ຂັ້ນ​ສູງ​ຂອງ​ສອງ​ພັກ ສອງ​ລັດ, ຮັກສາ​ການ​ພົບ​ປະ ​ແລກປ່ຽນ​ຂັ້ນ​ສູງ​ເປັນ​ປະຈຳ, ​ເສີມ​ຂະຫຍາຍ​ປະສິດທິ​ຜົນ​ຂອງບັນດາ​ກົນ​ໄກ​ຮ່ວມ​ມື, ຍົກ​ສູງ​ຄຸນ​ນະພາ​ບ ປະສິດທິ​ຜົນ​ຂອງ​ບັນດາ​ໂຄງການ​ລົງທຶນ, ຍູ້​ແຮງ​ການ​ແລກປ່ຽນ ຮ່ວມ​ມື​ລະຫວ່າງບັນດາ​ຂະ​ແໜງ​ການ, ບັນດາ​ທ້ອງ​ຖິ່ນ, ບັນດາ​ຊັ້ນ​ຄົນ​ປະຊາຊົນ ​ແລະ​ເປັນ​ຕົ້ນ​ແມ່ນ​ຊາວ​ໜຸ່ມ​ຂອງ​ສອງ​ປະ​ເທດ, ພ້ອມ​ກັນ​ຄວບ​ຄຸມ​ຄວາມ​ບໍ່​ລົງ​ລອຍ​ກັນ ບົນ​ຈິດ​ໃຈ​ເຄົາລົບ​ຜົນ​ປະ​ໂຫຍ​ດຂອງ​ກັນ​ແລະ​ກັນ ​ແລະ ​ເຄົາລົບ​ກົດໝາຍ​ສາກົນ, ຮັກສາ​ສັນຕິພາບ ສະຖຽນ​ລະ​ພາບ ​ແລະ ທ່າ​ອຽງພັດທະນາ​ທີ່​ສົດ​ໃສ​ໃນ​ຄວາມ​ພົວພັນ​ລະຫວ່າງ​ສອງ​ປະ​ເທດ.

ສອງ​ຝ່າຍ​ໄດ້​ປຶ​ດສາ​ຫາລື​ບັນດາ​ມາດ​ຕະການ​ຊຸກຍູ້​ຄວາມ​ພົວພັນ​ລະຫວ່າງ​ສະພາ​ແຫ່ງ​ຊາດ​ຫວຽດນາມ ​ແລະ ສະພາຜູ້ແທນປະຊາຊົນແຫ່ງຊາດຈີນ ​ໃນ​ເວລາ​ຕໍ່ໜ້າ. ຕາມ​ນັ້ນ, ສອງ​ຝ່າຍ​ຈະ​ຕັ້ງໜ້າ​ປະຕິບັດ​ຂໍ້​ຕົກລົງ​ຮ່ວມ​ມື​ລະຫວ່າງ​ສະພາ​ແຫ່ງ​ຊາດ​ຫວຽດນາມ ​ແລະ ສະພາຜູ້ແທນປະຊາຊົນແຫ່ງຊາດຈີນ, ສືບ​ຕໍ່​ເພີ່ມ​ທະວີ​ການ​ແລກປ່ຽນ​ລະຫວ່າງ​ການ​ນຳ​ຂັ້ນ​ສູງ, ບັນດາ​ອົງການ​ວິຊາ​ສະ​ເພາະ ກໍ່​ຄືສອງກຸ່​ມສະມາຊິກ​ສະພາ​ມິດຕະພາບ​ຂອງ​ສອງ​ປະ​ເທດ; ສືບ​ຕໍ່​ການ​ແລກປ່ຽນ ທາ​ບທາມ​​ ແບ່ງປັນບົດຮຽນ​ແຫ່ງ​ຄວາມ​ສຳ​ເລັດ​ຜົນ​ໃນ​ການ​ຄຸ້ມ​ຄອງ ​ແລະ ກໍ່ສ້າງ​ປະ​ເທດ​ຊາດ, ກໍ່​ຄື​ໃນ​ວຽກ​ງານ​ສ້າງ​ກົດໝາຍ, ວຽກ​ງານຕິດຕາມ​ກວດກາ, ສ້າງ​ສິ່ງ​ແວດ​ລ້ອມ​ອຳນວຍ​ຄວາມ​ສະດວກ​ໃຫ້​ແກ່​ການຊຸກຍູ້​ການ​ຮ່ວມ​ມື​ຕົວ​ຈິງ ​ລະຫວ່າງ​ສອງ​ປະ​ເທດ.

ຄຽງ​ຂ້າງ​ນັ້ນ, ສອງ​ຝ່າຍ​ສືບ​ຕໍ່​ເພີ່ມ​ທະວີ​ການ​ຮ່ວມ​ມື​ຕາມ​ສາຍ​ພັກ ​ແລະ ລັດ; ຜັນ​ຂະຫຍາຍ​ບັນດາ​ກົນ​ໄກ​ຮ່ວມ​ມື​ຢ່າງ​ມີ​ປະສິດທິ​ຜົນ; ຍູ້​ແຮງ​ການ​ໂຄສະນາ​ກ່ຽວ​ກັບ​ໄມຕີ​ຈິດ​ມິດຕະພາບ​ຫວຽດນາມ - ຈີນ, ປັບປຸງ​ພື້ນຖານ​ສັງຄົມ​ ເພື່ອ​ພັດທະນາ​ຄວາມ​ພົວພັນ​ລະຫວ່າງ​ສອງ​ປະ​ເທດ​ ຢ່າງ​ສົດ​ໃສ ໝັ້ນຄົງ ຍາວ​ນານ. ສອງ​ຝ່າຍສະ​ແດງ​ຄວາມ​ເຊື່ອ​ໝັ້ນ​ ​ແລະ ຢືນຢັນຢ່າງ​ໜັກ​ແໜ້ນວ່າ ດ້ວຍ​ຄວາມ​ມານະ​ພະຍາຍາມ​ລວມ, ຄວາມ​ພົວພັນ​ລະຫວ່າງ​ສອງ​ພັກ ສອງ​ປະ​ເທດ ​ແລະ ສະພາ​ແຫ່ງ​ຊາດ​ຂອງ​ສອງ​ປະ​ເທດ ຈະ​ຂະຫຍາຍຕົວ​ຢ່າງ​ຕັ້ງໜ້າ​ດີງາມ, ນຳ​​ເອົາຜົນສຳ​ເລັດ​ຕົວ​ຈິງ, ຄວາມ​ຜາ​ສຸກ, ຄວາມ​ອິ່ມໜຳສຳ​ລາມ​ ມາ​ໃຫ້​ປະຊາຊົນ​ສອງ​ປະ​ເທດ.

ການ​ຢ້ຽມຢາມ​ປະ​ເທດ​ຫວຽດນາມ ຂອງທ່ານ ຈາງ​ ເຕີຈຽງ ກຳມະການຄະນະປະຈຳກົມການເມືອງ ພັກກອມມູນິດຈີນ, ປະທານສະພາຜູ້ແທນປະຊາຊົນແຫ່ງຊາດຈີນ ​ແມ່ນ​ການ​ຢ້ຽມຢາມ​ຂັ້ນສູງສຸດ​ຂອງ​ການ​ນຳ​ພັກ ​ແລະ ລັດຈີນ​ໃນ​ປີ 2016. ນີ້​ກໍ່​ແມ່ນ​ການ​ຢ້ຽມຢາມ​ຫວຽດນາມຄັ້ງ​ທຳ​ອິດ​ຂອງ​ການ​ນຳ​ພັກລັດ ​ແລະ ສະພາຜູ້ແທນປະຊາຊົນແຫ່ງຊາດຈີນ ພາຍຫຼັງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII ​ແລະ ການ​ປ່ອນ​ບັດເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ​ຄັ້ງ​ທີ XIV ຂອງ​ຫວຽດນາມ. ການ​ຢ້ຽມຢາມ​ໄດ້​ດຳ​ເນີນ​ພາຍຫຼັງ​ການຢ້ຽມຢາມ​ເປັນ​ທາງ​ການ​ຢູ່​ປະ​ເທດ​ຈີນ​ທີ່​ສຳ​ດລັດ​ຜົນ​ຢ່າງ​ຈົບ​ງານ ​ຂອງທ່ານ​ນາຍົກລັດຖະມົນຕີຫວຽດນາມ ຫງວຽນ​ຊວນ​ຝຸກ.

ການ​ຢ້ຽມຢາມ​ປະ​ເທດ​ຫວຽດນາມ ຂອງ​ຄະນະ​ຜູ້​ແທນ​ຂັ້ນ​ສູງ​ຂອງ​ພັກແລະລັດ​ຈີນສະ​ແດງ​ໃຫ້​ເຫັນ​ວ່າ ພັກລັດ ​ແລະ ສະພາ​ປະຊາຊົນ​ແຫ່ງ​ຊາດ​ຈີນ​ໄດ້​ໃຫ້​ຄວາມ​ສຳຄັນ ​ແລະ​ຄວາມ​ປະສົງສື​ບຕໍ່​ຮັກສາ ​​ແລະ​ຊຸກຍູ້ຄວາມ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ກັບ​ຫວຽດນາມ, ​ເຮັດ​ໃຫ້​ຄວາມ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ​ຫວຽດນາມ - ຈີນ ຂະຫຍາຍຕົວ​ຢ່າງ​ໝັ້ນຄົງ ຍືນ​ຍົງ ຍາວ​ນາມ; ພ້ອມ​ກັນ​ນັ້ນ​ກໍ່​ສະ​ແດງ​ໃຫ້​ເຫັນ​ວ່າ​ພັກລັດ ​ແລະ ສະພາຜູ້ແທນປະຊາຊົນແຫ່ງຊາດຈີນ ຕີ​ລາຄາ​ສູງ​ບົດບາດ​ສຳຄັນ​ຂອງ​ສະພາ​ແຫ່ງ​ຊາດ​ຫວຽດນາມ; ມີ​ຄວາມປະສົງ​ຢາກ​ກໍ່ສ້າງ ​ແລະ ຊຸກຍູ້​ຄວາມ​ພົວພັນ​ມິດຕະພາບ ​ແລະ ການ​ຮ່ວມ​ມືລະຫວ່າງສະພາຜູ້ແທນປະຊາຊົນແຫ່ງຊາດຈີນ ກັບ​ສະພາ​ແຫ່ງ​ຊາດ​ຫວຽດນາມ, ປະກອບສ່ວນ​ຊຸກຍູ້​ຄວາມ​ພົວພັນ​ລະຫວ່າງ​ສອງ​ພັກ, ສອງ​ລັດ ​ແລະ ປະຊາຊົນ​ສອງ​ປະ​ເທດ.

​ເນື່ອງ​ໃນ​ໂອກາດ​ຢ້ຽມຢາມຫວຽດນາມ, ທ່ານ ຈາງ​ ເຕີຈຽງ ກຳມະການຄະນະປະຈຳກົມການເມືອງ ພັກກອມມູນິດຈີນ, ປະທານສະພາຜູ້ແທນປະຊາຊົນແຫ່ງຊາດຈີນ ​ແລະ ຄະນະ​ຜູ້​ແທນ​ຂັ້ນ​ສູງ​ຂອງ​ພັກ​ແລະ​ລັດ​ຈີນ ​ໄດ້​ວາງ​ພວງມາລາ​ໄຫວ້​ອາ​ໄລ​ທີ່​ອະນຸ​ສາ​ມະ​ລີ​ຫໍ​ສົບ​ຂອງ​ທ່ານ​ປະທານ​ໂຮ່ຈີ​ມິນ./.

ສັງ​ລວມ​ໂດຍ ​ແທງ​ແອ​ງ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ