ວັນອາທິດ, 22/9/2019
ທ່ານປະທານປະເທດແຫ່ງ ສສ ຫວຽດນາມ ເຈິ່ນດ້າຍກວາງ ເຂົ້າຮ່ວມສັບປະດາປະຊຸມສຸດຍອດ ເອເປກ 2016
2/12/2016 21:7' ສົ່ງ ພິມ
ທ່ານເຈິ່ນດ້າຍກວາງ ປະທານປະເທດແຫ່ງ ສສ ຫວຽດນາມ ເຂົ້າຮ່ວມພິທີໄຂກອງປະຊຸມບັນດາຜູ້ນຳຂອງບັນດາປະເທດ ເອເປກ ທີ່ເປຣູ ປີ 2016. (ພາບ: TTXVN)

ດ້ວຍ​ຫົວ​ຂໍ້ “​ເພີ່ມ​ທະວີ​ຄຸນ​ນະພາ​ບ ​ແລະ ພັດທະນາ​ມະນຸດ”, ​ປີ ​ເອ​ເປ​ກ ​ເປຣູ 2016 ​ໄດ້​ສຸມ​ໃສ່​ຊຸກຍູ້ ບຸລິມະສິດ​ຕົ້ນຕໍ 4 ປະການຄື: ​ເຊື່ອມ​ຕໍ່​ເສດຖະກິດ​ພາກ​ພື້ນ ​ແລະ ​ເພີ່ມ​ທະວີ​ຄຸນ​ນະພາ​ບ; ຕະຫຼາດ​ສະບຽງ​ອາຫານ​ພາກ​ພື້ນ; ຫັນ​ເປັນ​ທັນ​ສະ​ໄໝ​ຕໍ່​ວິ​ສາ​ຫະກິດ​ຂະໜາດ​ນ້ອຍ​ສຸດ, ວິ​ສາ​ຫະກິດ​ຂະໜາດນ້ອຍ ​ແລະ ວິ​ສາ​ຫະກິດ​ຂະໜາດ​ກາງ; ພັດທະນາ​ແຫຼ່ງຊັບພະຍາກອນ​ມະນຸດ. ຫຼັງຈາກເຂົ້າ​ຮ່ວມ​ພິທີ​ຕ້ອນຮັບ​ບັນດາ​ຫົວໜ້າ​ຄະນະ, ທ່ານ​ປະທານ​ປະ​ເທດ​ ​ເຈິ່ນດ້າຍ​ກວາງ ​ໄດ້​ເຂົ້າ​ຮ່ວມ​ວາລະ​ສົນທະນາ ​ແລະ ວາລະ​ປະຊຸມ​ກຸ່ມ ກັບ​ສະພາ​ທີ່​ປຶກສາ​ການ​ທຸລະ​ກິດ ​ເອ​ເປ​ກ (ABAC). ບັນດາຜູ້ນຳ ​ແລະ ວິ​ສາ​ຫະກິດ​ໄດ້​ສົນທະນາກ່ຽວ​ກັບ​ບັນດາ​ມາດ​ຕະການ​ຊຸກຍູ້​ຄວາມ​ເຕີບ​ໂຕ ​ແລະ ການ​ເຊື່ອມ​ຕໍ່​ຢູ່​ພາກ​ພື້ນ​ອາຊີ - ປາຊີ​ຟິກ ​ໃນ​ສະພາບ​ການ​ເສດຖະກິດ​ໂລກ​ໄດ້​ຟື້ນ​ຟູ​ຢ່າງ​ຊັກ​ຊ້າ, ລັດທິ​ປົກ​ປ້ອງ ​ແລະ ຂະ​ບວນການ​ຄັດ​ຄ້ານ​ໂລກາ​ພິວັດ​ ມີ​ທ່າ​ອຽງ​ເພີ່ມ​ຂຶ້ນ.

ທ່ານປະທານ​ປະ​ເທດ​ ​ເຈິ່ນດ້າຍ​ກວາງ ​ໄດ້ພ້ອມກັນ​ກັບ​ທ່ານ​ນາຍົກລັດຖະມົນຕີ ມາ​ເລ​ເຊຍ ນາ​ຈິບ ຣາຊັກ, ທ່ານ​ນາຍົກລັດຖະມົນຕີ ສ.​ເກົາຫຼີ ກິມ ຊຽງ​ຈູ​ນ ​ແລະ ຜູ້ຕາງໜ້າ​ອົງການການ​ຄ້າ​ອາ​ເມຣິກາ ​ໄມ​ເຄິນ ຟຣໍ​ແມນ ​ເປັນ​ປະ​ທາ​ການ​ສົນທະນາ​ກັບ​ບັນດາ​ວິ​ສາ​ຫະກິດ​ທີ່​ເປັນ​ສະມາຊິກ​ຂອງ ABAC. ​ໃນ​ການ​ສົນທະນາ, ທ່ານ​ປະທານ​ປະ​ເທດ ​ເຈິ່ນດ້າຍ​ກວາງ ​ໄດ້​ເນັ້ນ​ຢ້ຳຄວາມ​ຕັດສິນ​ໃຈ​ຂອງ​ບັນດາ​ປະ​ເທດ ​ເອ​ເປ​ກ ​ໃນ​ການ​ສືບ​ຕໍ່​ເປີດ​ເສລີພາບດ້ານ​ການ​ຄ້າ ​ແລະ ການ​ລົງທຶນ, ຊຸກຍູ້​ຄວາມ​ເຕີບ​ໂຕ​ດ້ານ​ຄຸນ​ນະພາ​ບ, ຊ່ວຍ​ເຫຼືອ​ບັນດາ​ວິ​ສາ​ຫະກິດ, ພິ​ເສດ​ແມ່ນ ບັນດາ​ວິ​ສາ​ຫະກິດ​ຂະໜາດ​ນ້ອຍ​ສຸດ, ວິ​ສາ​ຫະກິດ​ຂະໜາດ​ນ້ອຍ ​ແລະ ວິ​ສາ​ຫະກິດ​ຂະໜາດ​ກາງ, ​ໃນ​ການ​ກຳ​ເອົາ​ໂອກາດ​ຂອງ​ການ​ປະຕິວັດ​ອຸດສາຫະກຳ​ຄັ້ງ​ທີ 4 ​ແລະ ຍຸກດິຈິ​ຕອນ. ບັນດາ​ວິ​ສາ​ຫະກິດ ​ເອ​ເປ​ກ ກໍ່​ຕ້ອງ​ຮ່ວມ​ແຮງກັບ​ລັດຖະບານ ​ໃນ​ການ​ຊອກ​ຫາ​ບັນດາ​ກຳລັງ​ໜູນ​ໃໝ່ ​ເພື່ອ​ຊຸກ​ຍູ້​ການ​ເຕີບ​ໂຕ​ເສດຖະກິດ. ທ່ານ​ປະທານ​ປະ​ເທດ​ໄດ້​ຍົກ​ໃຫ້​ເຫັນ​ແຈ້ງ​ເຖິງ​ຄວາມ​ມານະ​ພະຍາຍາມ​ຂອງ​ຫວຽດນາມ ​ໃນ​ການ​ຍູ້​ແຮງ​ການ​ຫັນປ່ຽນ​ໂຄງ​ສ້າງ​ເສດຖະກິດ ​ແລະ ຍົກ​ສູງຜະລິດຕະ​ພາບ​ແຮງ​ງານ, ບຸລິມະສິດ​ການຖ່າຍ​ໂອນ​ວິທະຍາສາດ - ​ເຕັກ​ໂນ​ໂລ​ຊີ ​ແລະ ປະຕິ​ຮູບ​ການ​ບໍລິຫານ.

​ໃນ​ຕອນ​ແລງ​ຂອງ​ວັນ​ດຽວ​ກັນ, ທ່ານປະທານ​ປະ​ເທດ​ ​ເຈິ່ນດ້າຍ​ກວາງ ​ໄດ້​ເຂົ້າ​ຮ່ວມ ​ແລະ ກ່າວ​ປາ​ໄສ​ທີ່​ວາລະ​ອັດ​ກອງ​ປະຊຸມ​ສຸດ​ຍອດ​ວິ​ສາ​ຫະກິດ ​ເອ​ເປ​ກ (CEO Summit) ຊຶ່ງ​ໄດ້ຈັດ​ຂຶ້ນ​ທີ່​ໂຮງ​ລະຄອນ​ໃຫຍ່​ແຫ່ງ​ຊາດ ຢູ່​ນະຄອນຫຼວງ​ລີ​ມາ ປະ​ເທດ​ເປຣູ. ນີ້​ເປັນ​ເຫດການ​ທີ່​ສຳຄັນ​ທີ່​ສຸດ​ສຳລັບ​ວົງ​ການ​ທຸລະ​ກິດ​ອາຊີ - ປະ​ຊີ​ຟິກ ​ແລ​ະ ​ໄດ້​ຈັດ​ຕັ້ງ​ເປັນ​ປະຈຳ​ໃນ​ໂອກາດ​ສັບປະດາ​ປະຊຸມ​ສຸດ​ຍອດ ​ເອ​ເປກ ດ້ວຍ​ການ​ເຂົ້າ​ຮ່ວມຂອງ​ຜູ້​ແທນ​ປະມານ 1.000 ຄົນ ທີ່​ເປັນ​ຜູ້ຕາງໜ້າ​ຂອງ​ບັນດາ​ກຸ່ມ​ບໍລິສັດ​ແຖວ​ໜ້າ​ຂອງ​ພາກ​ພື້ນ.

​ໃນ​ບົດ​ປາ​ໄສ​ຂອງ​ຕົນ, ທ່ານປະທານ​ປະ​ເທດ​ ​ເຈິ່ນດ້າຍ​ກວາງ ​ໄດ້​ສະ​ແດງ​ຄວາມ​ດີ​ໃຈ​ວ່າຈະ​ໄດ້ຊົມ​ເຊີຍ​ແລະ​ຕ້ອນຮັບ ​ບັນດາ​ນັກທຸລະກິດ ​ເອ​ເປ​ກ ມາ​ຫວຽດນາມ ​ເພື່ອ​ເຂົ້າ​ຮ່ວມ​ກອງ​ປະຊຸມ CEO Summit ​ໃນຂອບ​ສັບປະດາ​ປະຊຸມ​ສຸດ​ຍອດ ​ເອ​ເປກ ຄັ້ງ​ທີ່ 25 ຢູ່​ນະຄອນ ດ່າ​ນັ້ງ ຫວຽດນາມ.

ກ່ຽວ​ກັບບັນດາ​ບັນຫາ​ເສ​ດຖະກິດ​ຢູ່​​ພາກ​ພື້ນ ​ແລະ ​ໃນ​ທົ່ວ​ໂລກ, ທ່ານປະທານ​ປະ​ເທດ​ ​ເຈິ່ນດ້າຍ​ກວາງ ຍົກ​ໃຫ້​ເຫັນ​ແຈ້ງວ່າ ປີ​ນີ້​ເປັນ​ປີ​ທີ້ຫ້າ​ຕໍ່​ເນື່ອງ ທີ່​ຄວາມ​ເຕີບ​ໂຕ​ທົ່ວ​ໂລກ​ຢູ່​ໃນ​ລະດັບ​ສະ​ເລ່ຍບໍ່​ເຖິງ 3%, ການ​ຄ້າທົ່ວ​ໂລກ​ກໍ່​ຢູ່​ໃນ​ລະດັບ​ຕ່ຳ​ສຸດ​ໃນຊ່ວງ 15 ປີ ທີ່​ຜ່ານ​ມາ ​ແລະ ຄວາມ​ເຕີບ​ໂຕ​ຂອງ ​ເອ​ເປ​ກ ກໍ່​ອາດ​ຈະ​ຊ້າ​ກວ່າ​ຄວາມ​ເຕີບ​ໂຕ​ສະ​ເລ່ຍຂອງ​ໂລກ. ພ້ອມ​ກັນ​ນັ້ນ, ການ​ປ່ຽນ​ແປງ​ສະພາບ​ອາກາດ, ການ​ກໍ່​ການ​ຮ້າຍ​ສາກົນ, ​ໂລກລະບາດ, ການ​ຮັກສາ​ຄວາມ​ປອດ​ໄພ​ເຄືອ​ຂ່າຍ, ຄວາມ​ປອດ​ໄພ​ດ້ານ​ນ້ຳ, ຄວາມ​ໝັ້ນຄົງ​ດ້ານ​ອາຫານ, ຄວາມ​ໝັ້ນຄົງ​ດ້ານ​ພະລັງງານ, ບັນຫາ​ການ​ອົບ​ພະຍົບ… ພວມ​ພາ​ໃຫ້​ເກີດ​ສິ່ງ​ທ້າ​ທາຍ​ຫຼາຍ​ຢ່າງ​ທີ່​ບໍ່​ເຄີຍ​ມີ​ມາ​ກ່ອນ ສຳລັບ​ການ​ຟື້ນ​ຟູ ​ແລະ​ພັດທະນາ​ເສດຖະກິດ​ແບບ​ຍືນ​ຍົງ.

​ໃນ​ເວລາ​ນັ້ນ, ການ​ປະຕິວັດ​ອຸດສາຫະກຳ​ຄັ້ງ​ທີ 4 ພ້ອມ​ກັບ​ຄຳ​ໝັ້ນ​ສັນຍາ​ທົ່ວ​ໂລກວ່າ​ດ້ວຍ​ການ​ຜັນ​ຂະຫຍາຍ ​ໂຄງການລະບຽບ​ວາລະ​ກ່ຽວ​ກັບ​ການ​ພັດທະນາ​ແບບ​ຍືນ​ຍົງ ​ແລະ ຂໍ້​ຕົກລົງ​ກ່ຽວ​ກັບ​ການ​ປ່ຽນ​ແປງ​ສະພາບ​ອາກາດ ທີ່​ພວມ​ສ້າງ​ກຳລັງ​ໜູນ​ໃໝ່ ​ເພື່ອ​ຄວາມ​ເຕີບ​ໂຕ​ຄຸນ​ນະພາ​ບ ​ແລະ ປົກ​ຫຸ້ມ. ບັນດາ​ການ​ເຊື່ອມ​ຕໍ່​ເສດຖະກິດ​ທີ່​ກວ້າງຂວາງ​ເລິກ​ເຊິ່ງ ມີ​ລັກສະນະ​ບາດ​ລ້ຽວ ຊຶ່ງ​ພົ້ນ​ເດັ່ນຄື ສັນຍາ​ຄູ່​ຮ່ວມ​ມື​ຂ້າມ​ປາຊີ​ຟິກ (TPP), ສັນຍາ​ຄູ່​ຮ່ວມ​ມື​ເສດຖະກິດ​ຮອບດ້ານ​ພາກ​ພື້ນ (RCEP), ປະຊາ​ຄົມ​ອາ​ຊຽນ... ກໍ່​ໝັ້ນ​ໝາຍ​ຈະ​ນຳ​ມາ​ຊຶ່ງ​ເທສະ​ແຫ່ງ​ການ​ພັດທະນາ​ອັນ​ກວ້າງຂວາງ.

ທ່ານປະທານ​ປະ​ເທດ​ ​ເຈິ່ນດ້າຍ​ກວາງ ​ແບ່ງປັນ​ຄວາມ​ເຫັນ​ວ່າ ​ໃນ​ໂລກ​​ແຫ່ງ​ການ​ໂລກາ​ພິວັດ​ທີ່​ເຕັມ​ໄປ​ດ້ວຍຄວາມ​ຜັນ​ຜວນ​ນີ້, ຍິ່ງ​ກວ່າ​ເວລາ​ໃດ​ໝົດ, ​ເອ​ເປ​ກຕ້ອງ​ສືບ​ຕໍ່​ຢືນຢັນ​ບົດບາດ​ລິ​ເລີ່​ມ​ແນວ​ຄິດ ກຳລັງ​ໜູນ​ຂອງ​ຄວາ​ມປະດິດ​ສ້າງ, ຄວາມ​ເຕີບ​ໂຕ ​ແລະ ການ​ເຊື່ອມ​ຕໍ່​ເສດຖະກິດ. ຈຸດ​ໜັກ​ໃຈກາງ​ຂອງ​ຊຸມ​ປີ​ຕໍ່ໜ້າ​ນີ້​ແມ່ນ ຕ້ອງ​ຍູ້​ແຮງ​ການ​ຈັດ​ວາງ​ຄືນ​ໃໝ່​ໂຄງ​ສ້າງ​ເສດຖະກິດ, ຍົກ​ສູງ​ຜະລິດ​ຕະພາບ​ແຮງ​ງານ, ພັດທະນາ​ແຫຼ່ງບຸກຄະລາ​ກອນ​ຄຸນ​ນະພາ​ບສູງ, ຍົກ​ສູງ​ຄວາມ​ສາມາດ​ແຂ່ງຂັນ ​ແລະ ກຳລັງ​ປະດິດ​ສ້າງ ຂອງ​ວິ​ສາ​ຫະກິດ, ​ເປັນ​ຕົ້ນ​ແມ່ນ​ວິ​ສາ​ຫະກິດ​ຂະໜາດ​ນ້ອຍ​ສຸດ, ວິ​ສາ​ຫະກິດ​ຂະໜາດ​ນ້ອຍ ​ແລະ ວິສາ​ຫະກິດ​ຂະໜາດ​ກາງ…

ທ່ານປະທານ​ປະ​ເທດ​ ​ເຈິ່ນດ້າຍ​ກວາງ ກໍ່​ເນັ້ນ​ຢ້ຳ​ເຖິງ​ຄວາມ​ມານະ​ພະຍາຍາມ​ກໍ່ສ້າງ​ລັດ​ສ້າງສັນ ໂປ່ງ​ໃສ ມີ​ປະສິດທິ​ຜົນ, ​ເພື່ອ​ປະຊາຊົນ ວິ​ສາ​ຫະກິດ​ຂອງ​ຫວຽດນາມ. ​ໂດຍ​ເປັນ​ພື້ນຖານ​ເສດຖະກິດ​ທີ່​ຂະຫຍັນ​ຂັນ​ເຄື່ອນ ມີ​ການ​ເປີດ​ປະຕູ​ກວ້າງ ​ແລະ ​ເປັນ​ຈຸດໝາຍ​ປາຍທາງຂອງ​ຫຼາຍ​ບໍລິສັດ​ຂ້າມຊາດ, ຫວຽດນາມ​ນັບ​ມື້​ນັບ​ເຊື່ອມ​ຕໍ່ຢ່າງ​ກວ້າງຂວາງ ກັບ​ສອງ​ຝັ່ງ​ມະຫາ​ສະມຸດ​ປາຊີ​ຟິກ ​ໂດຍ​ຜ່ານ​ບັນດາ​ຄູ່​ຮ່ວມ​ມື, ປະຊາ​ຄົມ​ອາ​ຊຽນ ​ແລະ ​ເຄືອ​ຂ່າຍ 16 ສັນຍາ​ການ​ຄ້າ​ເສລີກັບ 59 ປະ​ເທດ​ຄູ່​ຮ່ວມ​ມື, ​ໃນ​ນັ້ນ​ມີ 18 ປະ​ເທດສະມາຊິກ​​ເອ​ເປ​ກ. ການ​ຮ່ວມ​ມື​ຢ່າງ​ມີ​ປະສິດທິ​ຜົນ​ຂອງ​ບັນດາ​ວິ​ສາ​ຫະກິດ ​ເອ​ເປ​ກ ຢູ່​ຫວຽດນາມ ກໍ່​ຄື​ຂອງ​ບັນດາ​ວິ​ສາ​ຫະກິດ​ຫວຽດນາມ ຢູ່​ບັນດາ​ປະ​ເທດ​ສະມາຊິກ ​ເອ​ເປ​ກ ອື່ນ ​ໄດ້​ພິສູດ​ໃຫ້​ເຫັນຢ່າງ​ຈະ​ແຈ້ງ​ເຖິງ​ການ​ເຊື່ອມ​ຕໍ່​ດັ່ງກ່າວ. ອາດ​ຈະ​ເວົ້າ​ເຖິງ​ຄວາມ​ສຳ​ເລັດ​ຜົນ​ຂອງ​ບໍລິສັດ Viettel, ​​ຊຶ່ງ​ເປັນວິ​ສາ​ຫະກິດ​ໂທລະ​ຄົມມະນາຄົມນຳ​ໜ້າ​ຂອງ​ຫວຽດນາມ, ຢູ່​ປະ​ເທດ​ເປຣູ.

ກ່ອນ​ນັ້ນ, ຢູ່​ທີ່​ສູນ​ການ​ປະຊຸມ ລີ​ມາ, ​ໄດ້​ມີ​ການ​ປະຊຸມ​​ສຸດຍອດ​ຂອງ​ບັນດາ​ຜູ້ນຳ​ຂອງ 12 ປະ​ເທດ​ທີ່​ເຂົ້າ​ຮ່ວມສັນຍາ​ຄູ່​ຮ່ວມ​ມື​ຂ້າມ​ປະ​ຊີ​ຟິກ (TPP), ພາຍ​ໃຕ້​ການ​ເປັນ​ປະທານ​ຂອງ​ປະທານາທິບໍດີ ອາ​ເມຣິກາ  ບາຣັກ ​ໂອ​ບາ​ມາ. ນີ້​ແມ່ນກອງ​ປະຊຸມ​ສຸດ​ຍອດ​ຄັ້ງ​ທີ 7 ​ແລະ ​ເປັນ​ການ​ພົບ​ປະ​ຄັ້ງ​ທຳ​ອິດ ​ລະຫວ່າງ​ບັນດາ​ຜູ້ນຳ​ຂອງ​ບັນດາ​ປະ​ເທດ​ສະມາຊິກ TPP (​ໂອ​ສະຕຣາລີ, ບຣູ​ໄນ, ກາ​ນາ​ດາ, ຈີ​ເລ, ຍີ່ປຸ່ນ, ມາ​ເລ​ເຊຍ, ​ເມກຊີ​ໂກ, ນູ​ແວນ​ເຊ​ລັງ, ​ເປຣູ, ສິງ​ກະ​ໂປ, ສະຫະລັດ​ອາ​ເມຣິກາ ​ແລະ ຫວຽດນາມ) ນັບ​ແຕ່​ເມື່ອ ສັນຍາ​ໄດ້​ຮັບ​ການ​ລົງ​ນາມ​ໃນ​ວັນ​ທີ 4 ກຸ​ມພາ 2016 ຢູ່​ອອກ​ແລນ ປະ​ເທດ​ນູ​ແວນ​ເຊ​ລັງ.

​ໃນ​ຕອນ​ແລງ​ຂອງວັນດຽວ​ກັນ ​ທີ 19 ພະຈິກ ຕາມ​ເວລາ​ທ້ອງ​ຖິ່ນ, ທ່ານ ຟ້າ​ມບິ່ງ​ມິ​ງ ຮອງ​ນາຍົກ​ລັດ​ຖະມົນຕີ ລັດຖະມົນຕີ​ກະຊວງ​ການ​ຕ່າງປະ​ເທດຫວຽດນາມ ​ໄດ້​ເຂົ້າຮ່ວມການ​ສົນທະນາບໍ່​ເປັນ​ທາງ​ການ ຂອງ​ບັນດາ​ຜູ້ນຳ ​ເອ​ເປ​ກ ກັບ​ສະຫະພັນ​ປາຊີ​ຟິກ, ກວມ​ມີ 4 ປະ​ເທດລາ​ຕິ​ນອາ​ເມຣິກາຄື ​ເປຣູ, ​ເມກ​ຊີ​ໂກ, ຈີ​ເລ ​ແລະ ​ໂຄ​ລອມ​ເບຍ.

ສັບປະດາ​ປະຊຸມ​ສຸດ​ຍອດ ​ເອ​ເປກ ຄັ້ງ​ທີ 24 ​ໄດ້​ຮັບ​ຜົນສຳ​ລັດອັນ​ຈົບງາມ, ​ໄດ້​ຮັບຮອງ​ຜ່ານ​ຖະ​ແຫຼງການ​ຂອງ​ບັນດາ​ຜູ້ນຳ ​ເອ​ເປ​ກ ດ້ວຍ​ເອກະສາ​ແນບນຳ 2 ສະບັບ​ຄື “ຖະ​ແຫຼ​ງການລີ​ມາ ກ່ຽວ​ກັບ​ເຂດ​ການ​ຄ້າ​ເສລີ​ອາຊີ - ປາຊີ​ຟິກ” ​ແລະ “​ແຜນການ​ກ່ຽວ​ກັບຄວາມ​ສາມາດ​ແຂ່ງຂັນ​ໃນ​ຂົງ​ເຂດ​ບໍລິການ”. ຖະ​ແຫຼງການ​ຂອງ​ບັນດາ​ຜູ້ນຳ ​ໄດ້​ຢືນຢັນ​ຄືນ​ໃໝ່​ອີກ​ຄັ້ງກ່ຽວ​ກັບ​ຄຳ​ໝັ້ັ້ນສັນຍາ​ຮັກສາ​ບົດບາດນຳ​ໜ້າ​ຂອງ ​ເອ​ເປ​ກ ​ໃນ​ການ​ເປີດ​ເສລີພາບ​ດ້ານ​ການ​ຄ້າ ​ແລະ ການ​ລົງທຶນ, ຄວາມ​ເຕີບ​ໂຕ​ເສດຖະກິດ​ແບບ​ຍືນ​ຍົງ ​ແລະ ຄວາມ​ວັດທະນາ​ຖາວອນ ຢູ່​ພາກ​ພື້ນ​ອາຊີ - ປາຊີ​ຟິກ.

ຕອນ​ຄ່ຳ​ວັນ​ທີ 20 ພະຈິກ​ ຕາມ​ເວລາ​ທ້ອງ​ຖິ່ນ, ທ່ານປະທານ​ປະ​ເທດ​ ​ເຈິ່ນດ້າຍ​ກວາງ ​ແລະ ພັນ​ລະ​ຍາ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ຫວຽດນາມ ​ໄດ້​ອອກ​ຈາກ​ນະຄອນຫຼວງ​ລີ​ມາ ​ເປຣູ, ສຳ​ເລັດ​ສິ້ນ​ສຸດ​ການ​ເຂົ້າ​ຮ່ວມ​ສັບປະດາ​ປະຊຸມ​ສຸດ​ຍອດ​ຄັ້ງ​ທີ່ 24 ​ເວທີ​ປາ​ໄສ​ການ​ຮ່ວມ​ມື​ເສດຖະກິດ ອາຊີ - ປາຊີ​ຝິກ ຢ່າງ​ຈົບງາມ./.

​ໂດຍ ບນ (ສັງ​ລວມຈາກ​ຂ່າວສານ​ຫວຽດນາມ)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ