ວັນອາທິດ, 19/2/2017
ສືບຕໍ່ຊຸກຍູ້ຄວາມພົວພັນມິດຕະພາບ, ສາມັກຄີ, ສະເໝີຕົ້ນສະເໝີປາຍ, ເຊື່ອອົກເຊື່ອໃຈ ແລະ ຮ່ວມມືຮອບດ້ານ ຫວຽດນາມ - ກູບາ ໃຫ້ຂະຫຍາຍຕົວເລິກເຊິ່ງກວ່າອີກ
4/12/2016 10:32' ສົ່ງ ພິມ
ທ່ານ ຣາອູນ ກາສະໂຕຣ ປະທານສະພາແຫ່ງລັດ ແລະສະພາລັດຖະມົນຕີ ແຫ່ງ ສາທາລະນະລັດ ກູບາ ຕ້ອນຮັບທ່ານປະທານປະເທດຫວຽດນາມ ເຈິ່ນດ້າຍກວາງ. (ພາບ: TTXVN)

ປະທານ​ປະ​ເທດຫວຽດນາມ​ ​ເຈິ່ນດ້າຍ​ກວາງ ​ໄດ້​ພົບ​ປະ​ເຈລະຈາ​ກັບປະທານ​ສະພາ​ແຫ່ງ​ລັດ ​ແລະ​ສະພາ​ລັດຖະມົນຕີ​ກູ​ບາ ຣາອູ​ນ ກາສະ​ໂຕຣ ​ໃນ​ບັນຍາກາດທີ່​ເຕັມ​ໄປ​ດ້ວຍ​ນ້ຳ​ໃຈ​ສະຫາຍ​ອ້າຍ​ນ້ອງ, ​ຄວາມເຂົ້າ​ໃຈ ແລະ ຄວາມ​ໄວ້​ວາງ​ໃຈ​ຊຶ່ງ​ກັນ​ແລະ​ກັນ. ປະທານ​ປະ​ເທດ​ ​ເຈິ່ນດ້າຍ​ກວາງ ກໍ່​ໄດ້​ພົບ​ປະ​ແລກປ່ຽນ​ຄວາມ​ເຫັນ​ກັບ​ສະຫາຍ ຟີ​ແດນ ກາສະ​ໂຕຣ ຣູດ, ຜູ້ນຳ​ປະຫວັດສາດ​ຂອງ​ການ​ປະຕິວັດ​ກູ​ບາ ​ແລະ ພ້ອມ​ກັນລື້​ມຄືນບັນດາ​ເຫດການ​ທີ່ສຳ​ຄັນ ຄວາມ​ຊົງ​ຈຳ​ທີ່​ໃກ້ຊິດ​ຂອງ​ສະຫາຍ ຟີ​ແດນ ກັບ​ປະຊາຊົນ​ຫວຽດນາມ​ອ້າຍ​ນ້ອງ.

ປະທານ​ປະ​ເທດ​ ​ເຈິ່ນດ້າຍ​ກວາງ ກໍ່​ໄດ້​ພົບ​ປະ​ແລກປ່ຽນ​ຄວາມ​ເຫັນ​ກັບ ປະທານ​ສະພາ​ແຫ່ງ​ຊາດ​ກູ​ບາ ​ແອ​ສະຕີ​ບານ ລາ​ໂຊ ​ແຮັກ​ນານ​ແດັດ; ພົບ​ປະ​ຢ່າງ​ສະໜິດສະໜົມກັບ​ ຮອງ​ປະທານ​ສະພາ​ລັດຖະມົນຕີ ລັດຖະມົນຕີ​ກະຊວງ​ເສດຖະກິດ​ແລະ​ແຜນ​ການ ຣີກາກ​ໂດ ກາບຣີຊາດ ຣູອີດ, ພົບ​ປະກັບປະທານ​ສະ​ຖາ​ບັນ​ກູ​ບາສັນທະ​ວະ​ໄມຕີ​ກັບ​ບັນດາ​ປະຊາ​ຊາດ ​ແກ​ເນຍ ​ເຊຣາ​ໂນ ປູ​ອີດ ​ແລະ ບັນດາກຳມະການ​ສະມາຄົມ​ມິດຕະພາບ​ກູ​ບາ - ຫວຽດນາມ, ວາງ​ພວງມາລາ​ທີ່​ອະນຸສາວະລີວິລະ​ຊົນ​ແຫ່ງ​ຊາດ​ກູ​ບາ ​ໂຈ​ເຊ ມາກ​ຕີ ​ແລະ ອະນຸສາວະລີ​ປະທານ​ໂຮ່ຈີ​ມິນ; ​ໄປ​ຢາມ​ເຂດ​ພັດທະນາ​ພິ​ເສດ ມາຣີ​ແອນ; ຢາມ​ໂຮງຮຽນ​ມັດທະຍົມ​ສຶກສາຊັ້ນ​ຕົ້ນ​ທີ່​ມີ​ຊື່ ຫງວຽນ​ວັນ​ໂຈ້​ຍ ​ແລະ ຢູ່​ທີ່​​ໂຮງຮຽນນັ້ນ ທ່ານປະທາຍ​ປະ​ເທດ​ຫວຽດນາມກໍ່​ໄດ້​ພົບ​ປະກັບຄະນະ​ອຳນວຍ​ການ​ຂອງ​ບັນດາ​ໂຮງຮຽນ​ສາມັນ​ສຶກສາ​ທີ່​ມີ​ຊື່ ລຸງໂຮ່ ​ແລະ ຫວໍ​ທີ້ເສົາ ຢູ່ນະຄອນຫຼວງ ລາ ຮາ​ບາ​ນາ; ​ແລະ​ຮ່ວມ​ພິທີ​ໄຂ​ເວທີ​ປາ​ໄສ​ວິ​ສາ​ຫະກິດ​ຂອງ​ສອງ​ປະ​ເທດ.

​ໃນ​ການ​ພົບ​ປະ​ເຈລະຈາ, ປະທານ​ປະ​ເທດ​ ​ເຈິ່ນດ້າຍ​ກວາງ ​ແລະ ປະທານ ​ຣາອູ​ນ ກາສະ​ໂຕຣ ​ໄດ້​ແລກປ່ຽນ​ຄວາມ​ຄິດ​ຄວາມ​ເຫັນ​ຢ່າງ​ເລິກ​ເຊິ່ງ ກ່ຽວ​ກັບ​ຄວາມ​ພົວພັນ​ສອງ​ຝ່າຍ ​ແລະ ບັນດາ​ບັນຫາ​ພາກ​ພື້ນ, ສາກົນ ທີ່​ສອງ​ຝ່າຍ​ມີ​ຄວາມ​ສົນ​ໃຈ. ສອງ​ຝ່າຍ​ມີ​ຄວາມ​ພຶງ​ພໍ​ໃຈ​ກ່ຽວ​ກັບ​ການ​ຂະຫຍາຍຕົວ​ຢ່າງ​ຈົບງາມ ​ແລະ ທະ​ນົງ​ໃຈ​ກ່ຽວ​ກັບ​ມູນ​ເຊື້ອ​ຄວາມ​ພົວພັນ​ສະມັກ​ຄີ​ອ້າຍ​ນ້ອງ​ ລະຫວ່າງ​ສອງ​ປະ​ເທດ; ຢືນຢັນ​ຄວາມ​ຕັດສິນ​ໃຈ​ສືບ​ຕໍ່ຊຸກຍູ້​ຄວາມ​ພົວພັນ​ມິດຕະພາບ, ສາມັກຄີ, ສະ​ເໝີ​ຕົ້ນ​ສະ​ເໝີ​ປາຍ, ​ເຊື່ອ​ອົກເຊື່ອ​ໃຈ ​ແລະ ຮ່ວມ​ມືຮອບດ້ານ ຫວຽດນາມ - ກູ​ບາ ​ໃຫ້​ຂະຫຍາຍຕົວ​ເລິກ​ເຊິ່ງກວ່າ​ອີກ, ​ເພື່ອ​ຮັບ​ໃຊ້​ໃຫ້​ແກ່​ພາລະ​ກິດ​ການ​ສ້າງສາ ​ແລະ ປົກ​ປັກ​ຮັກສາ​ປະ​ເທດ​ຊາດສັງຄົມ​ນິຍົມ ຢູ່​ແຕ່ລະ​ປະ​ເທດ, ປະກອບສ່ວນ​ອັນ​ຕັ້ງໜ້າ ​ເຂົ້າ​ໃນ​ການ​ຕໍ່ສູ້​ຮ່ວມກັນ ​ເພື່ອ​ເອກະລາດ​ແຫ່ງ​ຊາດ, ປະຊາທິປະ​ໄຕ, ຄວາມ​ກ້າວໜ້າ​ທາງ​ສັງຄົມ, ການ​ຮ່ວມ​ມື ​ແລະ​ພັດທະນາ​ ຢູ່ສອງ​ພາກ​ພື້ນ ອາຊີ​ຕາ​ເວັນອອກສຽງ​ໃຕ້, ລາຕີ​ນອາ​ເສຣິກາ - ກາຣີ​ເບ ​ແລະ ​ໃນ​ໂລກ.

​ໂດຍ​ຕາງໜ້າ​ພັກ ລັດ ​ແລະ ປະຊາຊົນ​ຫວຽດນາມ, ປະທານ​ປະ​ເທດ​ ​ເຈິ່ນດ້າຍ​ກວາງ ​ໄດ້​ສະ​ແດງ​ຄຳ​ອວຍພອນ​ໄຊ​ອັນ​ປະ​ເສີດ​ຕໍ່​ພັກ ລັດ ​ແລະ ​ປະຊາຊົນ​ກູ​ບາ ທີ່​ໄດ້​ຮັບ​ຜົນສຳ​ເລັດ​ໃນ​ການຈັດ​ຕັ້ງ​ກອງ​ປະຊຸມ​ໃຫຍ່ພັກ​ກອມ​ມູນິດ​ກູ​ບາ ​ຄັ້ງ​ທີ VII ​ໃນ​ເດືອນ​ເມສາ​ທີ່​ຜ່າມ​ມາ, ບັນດາ​ຜົນສຳ​ເລັດ​ໃນ​ການ​ກໍ່ສ້າງ, ປົກ​ປັກ​ຮັກສາ​ການ​ປະຕິວັດ​ກູ​ບາ ​ແລະ ບັນດາ​ໄຊຊະນະ​​ທີ່​ສຳ​ຄັນໃນ​ການ​ຕ່າງປະ​ເທດ ທີ່​ກູ​ບາ​ບັນລຸ​ໄດ້​ໃນ​ເວລາ​ຜ່ານ​ມາ​ມໍ່​ນີ້; ສະ​ແດງ​ຄວາມ​ເຊື່ອ​ໝັ້ນ​ວ່າ ນະ​ໂຍບາຍ “ປັບປຸງຮູບ​ແບບ​ເສດຖະກິດ - ສັງຄົມ​ໃຫ້​ທັນ​ວັນ​ເວລາ” ຈະ​ໄຂ​ໄລຍະ​​ແຫ່ງ​ການ​ພັດທະນາໃໝ່ ​ໃນ​ພາລະກິດ​ການ​ກໍ່ສ້າງສັງຄົມ​ນິຍົມທີ່​ຈະ​ເລີ​ນພັດທະນາ ຍືນ​ຍົງ​ຢູ່​ປະ​ເທດ​ກູ​ບາ ​ເພື່ອ​ຜົນ​ປະ​ໂຫຍ​ດຂອງ​ປະຊາ​ຊົນ. ຝ່າຍ​ຫວຽດນາມ ຢືນຢັນ​ຄວາມ​ສະໜັບສະໜູນ​ກູ​ບາ ​ໃນ​ການ​ຕໍ່ສູ້​ທວງ​ໃຫ້​ຕ່າງປະ​ເທດ​ຕ້ອງ​ຢຸດຕິ​ໃນ​ທັນທີ​​ແລະ​ບໍ່​ມີ​ເງື່ອນ​ໄຂ ການ​ເກືອດ​ຫ້າມ​ເສດຖະກິດ ການ​ລົງທຶນ ​ແລະ ການ​ເງິນ​ທີ່​ໄຮ້​ເຫດຜົນທີ່​ຕ້ານ​ກູ​ບາ; ສະໜັບສະໜູນ​ວິວັດ​ການ​ກ້າວ​ໄປ​ເຖິງ​ການ​ພົວພັນ​ເປັນ​ປົກກະຕິ ລະຫວ່າງ​ກູ​ບາ ​ແລະ​ສະຫະລັດ​ອາ​ເມຣິກາ; ຕີ​ລາຄາ​ສູງອິດ​ທິພົນ ​ແລະ ຄວາມ​ເປັນ​ທຳ​ຂອງ​ກູ​ບາ ຢູ່​ພາກ​ພື້ນ​ລາ​ຕິ​ນອາ​ເມຣິກາ - ກາຣີ​ເບ, ກໍ່​ຄື​ຂໍ້​ຕົກລົງ​ຂອງ​ສະມາຄົມ​ບັນດາ​ລັດ​ລາ​ຕິ​ນອາ​ເມຣິກາ​ແລະ​ກາຣີ​ເບ ທີ່​ປະກາດ​ວ່າ ລາ​ຕິ​ນອາ​ເມຣິກາ​ແລະ​ກາຣີ​ເບ ​ເປັນ​ພາກ​ພື້ນ​ສັນຕິພາບ.

ປະທານ ​ຣາອູ​ນ ກາສະ​ໂຕຣ ​ແລະ ບັນດາ​ສະ​ຫາຍ​ຜູ້ນຳກູ​ບາ ​ໄດ້​ສະ​ແດງ​ຄຳ​ອວຍພອນ​ໄຊ​ຕໍ່​ພັກ ລັດ ​ແລະ ປະຊາຊົນ​ຫວຽດນາມ ທີ່​ໄດ້​ຮັບຜົນສຳ​ເລັດ​ອັນ​ດີງາມ​ ໃນ​ການຈັດ​ຕັ້ງ​ກອງ​ປະຊຸມ​ໃຫຍ່​ພັກ​ກອມ​ມູນິດ​ຫວຽດນາມ ຄັ້ງ​ທີ XII ​ໃນ​ເດືອນ​ມັງກອນ​ປີ​ນີ້; ຕີ​ລາຄາ​ສູງ​ຕໍ່​ບັນດາ​ຜົນສຳ​ເລັດ​ທີ່​ມີ​ລັກສະນະ​ປະຫວັດສາດ ຂອງ​ການ​ປ່ຽນ​ແປງ​ໃໝ່ ຊຶ່ງ​ສະ​ແດງ​ອອກ​ຢູ່​ທີ່ລະດັບ​ພັດທະນາ​ເສດຖະກິດ​ນັບ​ມື້​ນັບ​ສູງ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ຍົກ​ສູງ ​ແລະ ມີ​ສ່ວນປະກອບ​ໃນ​ການ​ຮັກສາ​ຄວາມ​ສະຫງົບ​ດ້ານ​ການ​ເມືອງ-ສັງຄົມ ​ຂອງ​ປະ​ເທດ. ກູ​ບາ​ຕີ​ລາຄາ​ສູງຕໍ່​ນະ​ໂຍບາຍ​ການ​ຕ່າງປະ​ເທດສັນຕິພາບ ​ເອກະລາດ ​ເປັນ​ເຈົ້າ​ຕົນ​ເອງ ​ແລະ ​ເຊື່ອມ​ໂຍງ​ສາກົນ, ກໍ່​ຄື​ການ​ປະກອບສ່ວນ​ຂອງ​ຫວຽດນາມ​ ເຂົ້າ​ໃນ​ການ​ຮັກສາ​ສັນຕິພາບ ສະຖຽນ​ລະ​ພາບ ການ​ຮ່ວມ​ມື ​ແລະ ການ​ພັດທະນາ​ ຢູ່​ພາກ​ພື້ນ​ອາຊີ ​ແລະ ​ໃນ​ໂລກ.

ການ​ນຳ​ຂອງ​ສອງ​ປະ​ເທດ​ໄດ້​ເນັ້ນ​ຢ້ຳຄວາມ​ສຳຄັນ​ ຂອງ​ການ​ປະຕິບັດ​ບັນດາ​ເປົ້າໝາຍ​ທີ່​ໄດ້​ວາງ​ອອກ​ມາ ​ໃນກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ ຂອງ​ພັກ​ກອມ​ມູນິດ​ສອງ​ປະ​ເທດ ​ແນ​ໃສ່​ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ - ສັງຄົມ ​ແລະ ຮັບ​ໃຊ້​ໃຫ້​ແກ່​ຜົນ​ປະ​ໂຫຍ​ດຂອງ​ປະຊາຊົນ​ສອງ​ປະ​ເທດ; ​ເຫັນ​ດີ​ເປັນ​ເອກະ​ພາບ​ຊຸກຍູ້​ການ​ຮ່ວມ​ມື​ລະຫວ່າງ​ສອງ​ພັກ ​ແລະ ສອງ​ລັດ, ​ເພີ່ມ​ທະວີ​ກົນ​ໄກ​ແລກປ່ຽນ​ທິດ​ສະ​ດີ ບົດຮຽນ​ປະສົບ​ການ​ ໃນ​ການ​ກໍ່ສ້າງ​ພັກ, ລະບົບ​ການ​ເມືອງ, ພັດທະນາ​ເສດຖະກິດ - ສັງຄົມ ​ແລະ ສົມທົບ​ກັນ​ຕີ​ລາຄາ​ພຶດຕິ​ກຳ, ຄົ້ນຄວ້າ ​ແລະ ຂະຫຍາຍ​ລັດ​ທິ​ມາກ - ​ເລ​ນິນ​ ໃຫ້ສອດຄ່ອງກັບ​ເງື່ອນ​ໄຂ​​ຂອງ​ແຕ່ລະ​ປະ​ເທດ.

​ໃນ​ຂອບ​ຂອງ​ປີ​ຈັດ​ຕັ້ງ​ກອງ​ປະຊຸມ​ໃຫຍ່ພັກ​ກອມ​ມູນິດ​ຫວຽດນາມ ​ຄັ້ງ​ທີ XII ​ແລະ ກອງ​ປະຊຸມ​ໃຫຍ່​ພັກ​ກອມ​ມູນິດ​ກູ​ບາ ຄັ້ງ​ທີ VII, ຜູ້ນຳ​ທັງ​ສອງ​ໄດ້​ເຫັນ​ດີ​ເປັນ​ເອກະ​ພາບ ​ເພີ່ມ​ທະວີ​ການ​ພົບ​ປະລະ​ຫວ່າງ​ຜູ້ນຳ​ພັກ-ລັດ ​ຂອງ​ສອງ​ປະ​ເທດ; ສືບ​ຕໍ່​ຮ່ວມ​ມືກັນ​ຢ່າງ​ແໜ້ນ​ແຟ້ນ​ ໃນ​ຂົງ​ເຂດປ້ອງ​ກັນຊາ​ດ, ຮັກສາ​ຄວາມ​ສະຫງົບ ​ແລະ ການ​ຕ່າງປະ​ເທດ; ພ້ອມ​ກັນ​ນັ້ນ, ກໍ່​ຕ້ອງ​ເອົາ​ໃຈ​ໃສ່ອົບຮົມ​ສຶກສາ​ໃຫ້​ຊາວ​ໜຸ່ມ​ຫວຽດນາມ ​ແລະ ກູ​ບາ​ ກ່ຽວກັບມູນ​ເຊື້ອຄວາມ​ພົວພັນ​ມິດຕະພາບ, ນ້ຳ​ໃຈ​ສະມັກ​ຄີ ມິດ​ສະຫາຍ​ອ້າຍ​ນ້ອງ​ ລະຫວ່າງ​ຫວຽດນາມ ​ແລະ​ກູ​ບາ.

ສອງຝ່າຍ​ເນັ້ນ​ຢ້ຳຄວາມ​ສຳຄັນ​ຂອງ​ກົນ​ໄກ ຄະນະ​ກຳມະການ​ລະຫວ່າງ​ລັດຖະບານ ກ່ຽວ​ກັບ​ການ​ຮ່ວມ​ມື​ດ້ານ​ເສດຖະກິດ ​ແລະ ວິທະຍາສາດ - ​ເຕັກນິກ ລະຫວ່າງ​ສອງ​ປະ​ເທດ ​ແລະ ​ເຫັນ​ດີ​ເປັນ​ເອກະສັນ​ຈະຊີ້​ນຳຈັດ​ຕັ້ງ​ຢ່າງ​ສຳ​ເລັດ​ຜົນ ການ​ປະຊຸມຄະນະ​ກຳມະການ​ລະຫວ່າງ​ລັດຖະບານ ​ຄັ້ງ​ທີ 34 ​ແຕ່​ວັນ​ທີ 18 ຫາວັນ​ທີ 23 ພະຈິກ 2016. ສອງຝ່າຍ​ໄດ້​ສະ​ແດງ​ຄວາມ​ຕັດສິນ​ໃຈ​ເພີ່ມ​ທະວີ​ປະສິດທິ​ຜົນ ​ແລະ ຄວາມ​ສັດ​ສິດ​ຂອງ​ກົນ​ໄກນີ້ ຊຶ່ງ​ເປັນ​ສາຍ​ການ​ດັດສົມ​ທີ່​ເໝາະ​ສົມ​ສຳ​ລັດບັນດາ​ໂຄງການ​ຮ່ວມ​ມື​ທີ່​ເປັນຈຸດ​ໜັກ. ສອງຝ່າຍກໍ່​ສະ​ແດງ​ຄວາມ​ເອົາ​ໃຈ​ໃສ່​ຊຸກຍູ້​ການ​ລົງທຶນທີ່ມີ​ຜົນ​ປະ​ໂຫຍ​ດຮ່ວມ​ກັນ ​ແລະ ​ໃຫ້​ຄຳ​ໝັ້ນ​ສັນຍາ​ຈະ​ຫັນບັນດາ​ໂຄງການ​ຮ່ວມ​ມື ລົງທຶນ​ອື່ນ​ທີ່​ພວມ​ຢູ່​ໃນ​ວິ​ວັດ​ກາ​ນະ​​ເຈລະ​ຈາ ​ໃຫ້ເປັນ​ລະອຽດໂດຍ​ໄວ.

ປະທານ​ປະ​ເທດ​ ​ເຈິ່ນດ້າຍ​ກວາງ ​ແລະ ປະທານ ​ຣາອູ​ນ ກາສະ​ໂຕຣ ​ໄດ້​ເນັ້ນ​ຢ້ຳຄວາມ​ສຳຄັນ​ຂອງ​ໂຄງການ​ລະບຽບ​ວາລະ​ໄລຍະ​ກາງ ກ່ຽວ​ກັບ​ເສດຖະກິດ ລະຫວ່າງ​ສອງ​ປະ​ເທດ ທີ່​ໄດ້​ລົງ​ນາມ​ເມື່ອ​ເດືອນ​ມີນາ 2014, ຖື​ວ່າ​ນັ້ນ​ເປັນ​ຂອບ​ຊີ້​ນຳ​ບັນດາ​ສາຍ​ພົວພັນ​ເສດຖະກິດ​ສອງ​ຝ່າຍ. ສອງ​ຝ່າຍ​ເຫັນ​ດີ​ເປັນ​ເອກະສັນ​ຈະ​ສືບ​ຕໍ່​ຊຸກຍູ້ການ​ປະຕິບັດ​ເອກະສານ​ນີ້, ປະກອບສ່ວນ​ພັດທະ​ນາ​ການ​ພົວພັນ​ເສດຖະກິດ ການ​ຄ້າ ​ແລະ ການ​ລົງທຶນ ລະຫວ່າງ​ສອງ​ປະ​ເທດ​ຍິ່ງ​ກວ່າ​ອີກ ​ເພື່ອ​ນຳ​ມາ​ຊຶ່ງ​ຜົນ​ປະ​ໂຫຍ​ດຕົວ​ຈິງ​ໃຫ້​ປະຊາຊົນ​ສອງ​ປະ​ເທດ. ຕາມ​ນັ້ນ, ສອງຝ່າຍ​ຮັບ​ຮູ້ຄວາມ​ສຳຄັນ ​ຂອງ​ບັນດາ​ເອກະສານການ​ຮ່ວມ​ມື​​ໃນ​ບັນດາ​ຂົງ​ເຂດ​ສັດຕະວະ​ແພດ ​ແລະ ອຸດສາຫະກຳ-ການ​ຄ້າ ທີ່​ໄດ້​ລົງ​ນາມ​ໃນ​ການ​ຢ້ຽມຢາມຄັ້ງນີ້.

ຜູ້ນຳ​ທັງ​ສອງ​ຮູ້​ສຶກພຶງ​ພໍ​ໃຈ​ກ່ຽວ​ກັບ​ຄວາມຄ້າຍຄື​ກັນ​ຢ່າງ​ສົ​ມບູນຂອງ​ສອງ​ປະ​ເທດ ​ກ່ຽວ​ກັບ​ຫຼັກ​ໝັ້ນ​ຕໍ່​ຫຼາຍ​ບັນຫາ​ສາກົນ; ​ເປັນ​ເອກະສັນ​ວ່າ ​ຄວາມພິພາດ​ຂັດແຍ້​ງລະຫວ່າງ​ປະ​ເທດ​ ຕ້ອງ​ໄດ້​ແກ້​ໄຂ​ດ້ວຍ​ສັນຕິ​ວິທີ, ບົນ​ພື້ນຖານ​ເຄົາລົບ​ກົດໝາຍ​ສາກົນ, ​ເຄົາລົບ​ບັນດາ​ຫຼັກການ​ເອກະລາດ ອະທິປະ​ໄຕ ຜືນ​ແຜ່ນດິນ​ອັນ​ຄົບ​ຖ້ວນ ​ແລະ ສິດ​ຕັດສິນ​ດ້ວຍ​ຕົນ​ເອງ ​ຂອງ​ບັນດາ​ປະຊາ​ຊາດ, ບໍ່​ແຊກ​ແຊງ​ເຂົ້າ​ໃນ​ວຽກ​ງານ​ພາຍ​ໃນ​ຂອງ​ກັນ​ແລະ​ກັນ, ບໍ່​ໃຊ້​ກຳລັງ​ອາວຸດ ຫຼື​ນາບ​ຂູ່​ຈະ​ໃຊ້​ກຳລັງ​ອາວຸດ. ສອງ​ຝ່າຍ​ສະ​ແດງ​ຄວາມ​ສະໜັບສະໜູນຊຶ່ງ​ກັນ​ແລະ​ກັນ​ຕໍ່​ແນວທາງການ​ຕ່າງປະ​ເທດ​ທີ່​ເປັນ​ເອກະລາດ ​ແລະ ​ເປັນ​ເຈົ້າ​ຕົນ​ເອງ ​ຂອງ​ແຕ່ລະ​ປະ​ເທດ.

ຜູ້ນຳ​ທັງ​ສອງ​ເຫັນ​ດີ​ເປັນ​ເອກະ​ພາບ​ຈະ​ເພີ່ມ​ທະວີ​ການ​ປະສານ​ສົມທົບ, ຮ່ວມ​ມື ​ແລະ ສະໜັບສະໜູນ​ຊຶ່ງ​ກັນ​ແລະ​ກັນ ລະຫວ່າງ​ສອງ​ປະ​ເທດ ​ໃນ​ບັນດາອົງ​ການຈັດ​ຕັ້ງ​ສາກົນ ​ແລະ ​ເວທີ​ປາໄສ​ພະຫຸ​ພາຄີ​ ທີ່​ສອງ​ປະ​ເທດ​ເປັນ​ສະມາຊິກ.

ປະທານ​ປະ​ເທດ​ ​ເຈິ່ນດ້າຍ​ກວາງ ​ແລະ ປະທານ ​ຣາອູ​ນ ກາສະ​ໂຕຣ ຢືນຢັນ​ຄືນ​ໃໝ່​ອີກ​ຄັ້ງ​ຄຳ​ໝັ້ນ​ສັນຍາ​ຂອງ​ສອງ​ປະ​ເທດ​ ໃນ​ການ​ສືບ​ຕໍ່​ສະໜັບສະໜູນ​ພາລະກິດ​ທີ່​ເປັນ​ທຳ​ ຂອງ​ປະຊາຊົນ​ບັນດາ​ປະ​ເທດ​ໂລກ​ທີ່​ສາມ, ສອດຄ່ອງ​ກັບ​ແນວ​ຄິດ​ມະນຸດ​ອະລິຍະ​ທຳ ກ້າວໜ້າ ​ແລະ ຕ້ານ​ລັດທິ​ຈັກກະພັດ​ນິຍົມ ຂອງ​ວິລະ​ຊົນ​ແຫ່ງ​ຊາດ ​ໂຮ່ຈີ​ມິນ ​ແລະ ​ໂຈ​ເຊ ມາກ​ຕີ.

ສອງ​ຝ່າຍ​ຕີ​ລາຄາ​ສູງ​ຜົນສຳ​ເລັດ​ໃນ​ການ​ຢ້ຽມຢາມ​ປະ​ເທດ​ສາທາລະນະ​ລັດ​ກູ​ບາ​ຢ່າງ​ເປັນ​ທາງ​ການ ຂອງ​ທ່ານປະທານ​ປະ​ເທດ​ແຫ່ງ ສສ ຫວຽດນາມ​ ​ເຈິ່ນດ້າຍ​ກວາງ, ຊຶ່ງ​ໄດ້​ຂີດ​ໝາຍ​ເຫດການ​ທີ່​ສຳຄັນ, ສ້າງ​ແຮງ​ຊຸກ​ດັນ​ໃໝ່ ​ເຮັ​ດ​ໃຫ້​ຄວາມ​ພົວພັນ​ລະຫວ່າງພັກ ລັກ ​ແລະປະຊາຊົນສອງ​ປະ​ເທດ​ ຫວຽດນາມ ​ແລະ ກູ​ບາ ນັບ​ມື້​ນັບ​ສະໜິດສະໜົມ ​ເລິກ​ເຊິ່ງ ​ແລະ ໝັ້ນຄົງ​ຍືນ​ຍົງ, ພ້ອມ​ນັ້ນ ກໍ່​ປະກອບສ່ວນ​ອັນ​ຕັ້ງໜ້າ​ເຂົ້າ​ໃນ​ການ​ຮັກສາ​ສັນຕິພາບ, ສະຖຽນ​ລະ​ພາບ, ການ​ຮ່ວມ​ມື ການ​ພັດທະນາ ​ແລະ ຄວາມ​ວັດທະນາ​ຖາວອນ​ ຢູ່ສອງ​ພາກ​ພື້ນ ​ແລະ ​ໃນ​ໂລກ.

ປະທານ​ປະ​ເທດ​ ​ເຈິ່ນດ້າຍ​ກວາງ ສະ​ແດງ​ຄວາມ​ຂອບ​ໃຈຕໍ່​ສະພາ​ແຫ່ງ​ລັດ​ກູ​ບາ ທີ່​ໄດ້​ຕົກລົງ​ປະດັບ​ຫຼຽນ​ໄຊ ​ໂຈ​ເຊ ມາກ​ຕີ, ຊຶ່ງ​ເປັນ​ລາງວັນ​ອັນ​ລ້ຳ​ຄ່າ​ທີ່​ສຸດ ຂອງ​ປະ​ເທດສາທາລະນະ​ລັດ​ກູ​ບາ, ​ໃຫ້​ແກ່​ສະຫາຍ​ເຈິ່ນດ້າຍ​ກວາງ ​​ແນ​ໃສ່​ຮັບຮອງ​ການ​ປະກອບສ່ວນ​ອັນ​ສຳຄັນ​ຂອງ​ສະຫາຍ​ເຈິ່ນດ້າຍ​ກວາງ ​ເຂົ້າ​ໃນ​ການ​ເພີ່ມ​ທະວີ​ຄວາມ​ພົວພັນ​ລະຫວ່າງ​ພັກ ລັດ ​ແລະ ປະຊາຊົນ​ສອງ​ປະ​ເທດ, ກໍ່​ຄື​ເຂົ້າ​ໃນພາລະກິດ​ການ​ກໍ່ສ້າ​ງສັງຄົມ​ນິຍົມຢູ່​ຫວຽດນາມ.

ປະທານ​ປະ​ເທດ​ ​ເຈິ່ນດ້າຍ​ກວາງ ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ​ຕໍ່ປະທານ ​ຣາອູ​ນ ກາສະ​ໂຕຣ, ລັດ ​ແລະ ປະຊາຊົນ​ກູ​ບາ ທີ່​ໄດ້​​​ໃຫ້ການຕ້ອນຮັບປະທານ​ປະ​ເທດ​ແລະພັນ​ລະ​ຍາ ​ແລະ ຄະນະ​ຜູ້​ແທນ​ຂັ້ນ​ສູງ​ຂອງພັ​ກ ລັດ​ຫວຽດນາມ ຢ່າ​ງສົມ​ກຽດ​ແລະ​ສະໜິດສະໜົມ.

​ໂດຍ​ຕາງໜ້າ​ພັກ ​ແລະ ລັດ​ຫວຽດນາມ, ປະທານ​ປະ​ເທດ​ ​ເຈິ່ນດ້າຍ​ກວາງ ຂໍ​ຖື​ເປັນ​ກຽດ​ເຊື້ອ​ເຊີນປະທານ ​ຣາອູ​ນ ກາສະ​ໂຕຣ ມາ​ຢາມ​ສັນທະ​ວະ​ໄມຕີ​ເປັນ​ທາງ​ການ​ທີ່ ສສ ຫວຽດນາມ. ປະທານ ​ຣາອູ​ນ ກາສະ​ໂຕຣ ​ໄດ້​ຂອບ​ໃຈ​ແລະດີ​ໃຈ​ຮັບ​ຄຳ​ເຊີນ, ການ​ຢ້ຽມຢາມ​ຈະ​ໄດ້​ຈັດ​ຕັ້ງ​ຕາມ​ເສັ້ນທາງ​ການ​ທູດ./.

ວາລະສານ​ກອມ​ມູນິດ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ