ວັນອາທິດ, 17/11/2019
ຊຸກຍູ້ການພົວພັນຄູ່ຮ່ວມມືຍຸດທະສາດ ຝຣັ່ງ-ຫວຽດນາມ
21/11/2018 11:40' ສົ່ງ ພິມ
ນາຍົກລັດຖະມົນຕີຝຣັ່ງ ເອດູອາດ ຟີລິບ ພົບປະເຈລະຈາກັບນາຍົກລັດຖະມົນຕີຫວຽດນາມ ຫງວຽນຊວັນຝຸກ (ພາບ: TTXVN)

ໃນ​ຂອບ​ເຂດ​ການ​ຢ້ຽມຢາມຫວຽດນາມ, ນາຍົກລັດຖະມົນຕີ ​ເອດູ​ອາດ ຟີ​ລິບ ​ໄດ້​ພົບ​ປະ​ເຈລະຈາ​ກັບ ນາຍົກລັດຖະມົນຕີ ຫງວຽນ​ຊວັນ​ຝຸກ; ຢ້ຽມ​ຄຳນັບ​ທ່ານ​ເລຂາທິການ​ໃຫຍ່ ປະທານ​ປະ​ເທດ​ຫວຽດນາມ ຫງວຽນ​ຝູຈ້ອງ; ພົບ​ປະ​ຫາລື​ກັບ​ປະທານ​ສະພາ​ແຫ່ງ​ຊາດ ຫງວຽນ​ທິກິມ​ເງິນ, ​ເລຂາ​ຄະນະ​ພັກ​ນະຄອນ​ໂຮ່ຈີ​ມິນ ຫງວຽນ​ທ້ຽນ​ເຍິນ, ປະທານ​ຄະນະ​ກຳມະການ​ປະຊາຊົນ​ນະຄອນ​ຮ່າ​ໂນ້ຍ ຫງວຽນ​ດຶກ​ຈຸ​ງ.

​ໃນ​ເວລາ​ຢ້ຽມຢາມ​ປະ​ເທດ​ຫວຽດນາມ​ຢ່າງ​ເປັນ​ທາງ​ການ, ນາຍົກລັດຖະມົນຕີຝຣັ່ງ ​ເອດູ​ອາດ ຟີ​ລິບ ​ໄດ້​ໄປ​ຢາມ​ອະນຸສອນ​ສະຖານ​ທຳນຽບປະທານ​ປະ​ເທດ; ​ເຂົ້າ​ຮ່ວມ​ພິທີ​ເປີດ​ນຳ​ໃຊ້​ສະຖານ​ທີ່​ໃໝ່​ຂອງ​ໂຮງຮຽນ​ມັດຖະຍົມ​ຝຣັ່ງ ອາ​ເລັກ​ຊານ​ດຣີ ​ແຢກຊີ​ນ (ນະຄອນຮ່າ​ໂນ້ຍ); ຢານດອຍ A1 ​ແລະ​ວາງ​ພວງມາລາ​ທີ່​ອະນຸສາວະລີ​ນັກຮົບ​ດ້ຽນບຽນ​ຟູ (​ແຂວງ​ດ້ຽນບຽນ); ​ເຂົ້າ​ຮ່ວມ​ພິທີ​ເປີດ​ນຳ​ໃຊ້​ສູນ​ສາທາລະນະ​ສຸກ​ຝຣັ່ງ ​ແລະ ​ເວທີ​ປາ​ໄສ​ວິ​ສາ​ຫະກິດ​ເຕັກ​ໂນ​ໂລ​ຊີຝຣັ່ງ-ຫວຽດນາມ (ນະຄອນ​ໂຮ່ຈີ​ມິນ).

​ໃນ​ບັນຍາກາດ​ເປີດ​ອົກ​ເປີດ​ໃຈ, ​ຄວາມເຂົ້າ​ໃຈ​ແລະ​ໄວ້​ວາງ​ໃຈ​ຊຶ່ງ​ກັນ​ແລະ​ກັນ, ​ໃນ​ບັນດາ​ການ​ພົບ​ປະ​ເຈລະຈາ ຫາລື, ສອງ​ຝ່າຍ​ໄດ້​ແລກປ່ຽນ​ບັນດາມາດ​ຕະການຊຸກຍູ້​ການ​ພົວພັນ​ສອງ​ຝ່າຍ ​ແລະ​ບັນດາ​ບັນຫາ​ສາກົນ​, ​ພາກ​ພື້ນ ທີ່​ສອງ​ຝ່າຍມີ​ຄວາມ​ສົນ​ໃຈຮ່ວມ​ກັນ; ຢືນຢັນ​ຄວາມ​ຕັດສິນ​ໃຈ​ຊຸກຍູ້​ການ​ພົວພັນ​ສອງ​ຝ່າຍ ພາຍຫຼັງ 5 ປີ​​ແຫ່ງ​ການ​ເຊັນ​ຂໍ້​ຕົກລົງ​ກ່ຽວ​ກັບ​ຄູ່​ຮ່ວມ​ມື​ຍຸດ​ທະ​ສາດຝຣັ່ງ-ຫວຽດນາມ (2013 - 2018) ​ແລະ 45 ປີ​ແຫ່ງ​ການ​ສ້າງ​ຕັ້ງ​ການ​ພົວພັນ​ທາງ​ການ​ທູດ​ລະຫວ່າງ​ສອງ​ປະ​ເທດ (1973 - 2018).

ສອງ​ຝ່າຍ​ຢືນຢັນ​ເພີ່ມ​ທະວີ​ການ​ພົບ​ປະ​ແລກປ່ຽນ​ໃນ​ຂັ້ນ​ຕ່າງໆ, ​ໂດຍ​ສະ​ເພາະ​​ແມ່ນ​ຂັ້ນ​ສູງ, ພ້ອມ​ກັນ​ນັ້ນ​ກໍ່​ເພີ່ມ​ທະວີ​ບົດບາດ​ຂອງ​ບັນດາ​ກົນ​ໄກປະສານ​ງານ, ຊີ້​ນຳ​ການ​ຮ່ວມ​ມື​ສອງ​ຝ່າຍ ​ໃນ​ບັນດາ​ຂົງ​ເຂດ​ການ​ເມື​ອງ, ​ເສດຖະກິດ, ການ​ປ້ອງ​ກັນ​ປະ​ເທດ, ວິທະຍາສາດ-​ເຕັກ​ໂນ​ໂລ​ຊີ, ວັດທະນະທຳ, ການ​ສຶກສາ-ຝຶກ​ອົບຮົມ.

ການ​ຮ່ວມ​ມື​ທາງ​ດ້າງ​ເສດຖະກິດ​ສືບ​ຕໍ່​ເປັນ​ເສົາ​ຄ້ຳ​ບຸລິມະສິດ ​ໃນ​ການ​ພົວພັນສອງ​ຝ່າຍ. ສອງ​ຝ່າຍ​ເນັ້ນ​ໜັກ​ຄວາມ​ຈຳ​ເປັນ​ຕ້ອງ​ເພີ່ມ​ທະວີ​ການ​ຮ່ວມ​ມື, ຊຸກຍູ້​ບັນດາ​ໂຄງການ​ຈຸດ​ໜັກ​ທີ່​ສອງ​ຝ່າຍ​ກຳລັງ​ຜັນ​ຂະຫຍາຍ ກໍ່​ຄື​ໃນ​ການ​​ເພີ່ມ​ທະວີ​ການຮ່ວມ​ມືຫວຽດນາມ - ສະຫະພາບ​ເອີຣົບ (ອີ​ຢູ). ສົ່ງ​ເສີມ​ບັນດາ​ວິ​ສາ​ຫະກິດ​ຂອງ​ສອງ​ປະ​ເທດ ​ເພີ່ມ​ທະວີ​ການ​ເຊື່ອມ​ຕໍ່ການ​ຮ່ວມ​ມື​ລົງທຶນ​ທຸລະ​ກິດ​ໃນ​ບັນດາ​ຂົງ​ເຂດທີ່​ຝຣັ່ງມີ​ທ່າ​ແຮງ​ ​ແລະຫວຽດນາມມີ​ຄວາມ​ຕ້ອງການເຊັ່ນ ​ໂຄງ​ສ້າງ​ພື້ນຖານ, ພະລັງງານ, ການບິນ - ອະ​ວະ​ກາດ, ສາທາລະນະ​ສຸກ, ວິທະຍາສາດ-​ເຕັກ​ໂນ​ໂລ​ຊີ, ການ​ສື່ສານ, ການ​ຮັບ​ມື​ກັບ​ການ​ປ່ຽນ​ແປງ​ສະພາບ​ອາກາດ, ຕົວ​ເມືອງ​ອັດ​ສະ​ລິ​ຍະ.

ສອງ​ຝ່າຍ​ເປັນ​ເອກະສັນ​ຊຸກຍູ້​ການ​ຮ່ວມ​ມື​ ໃນ​ການ​ພັດທະນາລັດຖະບານ​ເອ​ເລັກ​ໂຕຣນິກ ​ແລະ​ຫັນ​ເປັນ​ທັນ​ສະ​ໄໝ​ຕໍ່​ການ​ຄຸ້ມ​ຄອງ​ບໍລິຫານ​ລັດ, ​ເຊິ່ງ​ເປັນ​ຂົງ​ເຂດ​ການ​ຮ່ວມ​ມື​ໃໝ່​ ​ແລະ ມີ​ຄວາມ​ສາມາດ​ພັດທະນາ​ດີ. ​ເພີ່ມ​ທະວີ​ການ​ຮ່ວມ​ມື​ຢ່າງ​ກວ້າງຂວາງ​ເລິກ​ເຊິ່ງ​ໃນ​ຂົງ​ເຂດ​ວັດທະນະທຳ, ຢືນຢັນ​ຄວາມ​ຕັດສິນ​ໃຈນຳ​ເອົາ​ສະ​ຖາ​ບັນ​ວັດທະນະທຳ​ຂອງ​​ປະ​ເທດນີ້ ​ເປັນ​ສູນ​ກາງ​ການ​ຮ່ວມ​ມື​ແລະ​ແລກປ່ຽນ​ວັດທະນະທຳຢູ່​ປະ​ເທດນັ້ນ, ລະອຽດ​ຄື ສູນວັດທະນະທຳ​ຫວຽດນາມ​ຢູ່​ຝຣັ່ງ ​ແລະ​ສະ​ຖາ​ບັນ​ຝຣັ່ງ​ໃນຫວຽດນາມ. ​ເພີ່ມ​ທະວີ​ການ​ປະສານ​ສົມທົບ​ເພື່ອ​ຮັບປະກັນຄວາມ​ສຳ​ເລັດ​ຂອງ​ກອງ​ປະຊຸມ​ການ​ຮ່ວມ​ມື​ລະຫວ່າງ​ບັນດາ​ທ້ອງ​ຖິ່ນ​ຫວຽດນາມ​ແລະ​ຝຣັ່ງ ຄັ້ງ​ທີ 11 ທີ່​ຈະ​ຈັດ​ຂຶ້ນ​ໃນ​ຕົ້ນ​ເດືອນ​ເມສາ 2019 ຢູ່​ນະຄອນ ຕູ​ລູ (ປະ​ເທດ​ຝຣັ່ງ).

ສອງ​ຝ່າຍຫວັງ​ວ່າ​ ຈະ​​ໄດ້ເພີ່ມ​ທະວີການ​ຮ່ວມ​ມື​ທາງ​ດ້ານ​ການ​ປ້ອງ​ກັນ​ຄວາມ​ສະຫງົບ-ປ້ອງ​ກັນຊາດ, ຊຸກຍູ້​ການ​ຢ້ຽມຢາມ​ຂອງ​ກຳ​ປັ່ນ​ທະຫານຝຣັ່ງມາຫວຽດນາມ, ຊ່ວຍ​ເຫຼືອ​ຫວຽດນາມ​ເຂົ້າ​ຮ່ວມ​ໃນ​ການ​ເຄື່ອນ​ໄຫວ​ຮັກສາ​ສັນຕິພາບຂອງ​ສະຫະ​ປະຊາ​ຊາດ.

​​ໂດຍຍົກ​ໃຫ້​ເຫັນ​ແຈ້ງ​ຄວາມ​ສຳຄັນ​ຂອງ​ການ​ຮັກສາ​ສັນຕິພາບ, ສະຖຽນ​ລະ​ພາບ, ຊຸກຍູ້​ການ​ຮ່ວມ​ມື​ໃນ​ພາກ​ພື້ນ​ແລະ​ສາກົນ, ສອງ​ຝ່າຍ​ໄດ້ຢືນຢັນ​ຄຳ​ໝັ້ນ​ສັນຍາ​ຮັກສາ​ເສລີພາບ​ໃນ​ການ​ເດີນ​ທະ​ເລ​ແລະ​ການບິນ, ​ແກ້​ໄຂ​ຂໍ້​ພິພາດ​ຂັກ​ແຍ້​ງ​ໃນ​ທະ​ເລ​ຕາ​ເວັນ​ອອກ​ດ້ວຍ​ສັນຕິ​ວິທີ, ບົນ​ພື້ນຖານ​ເຄົາລົບ​ນັບຖື​ກົດໝາຍ​ສາກົນ, ​ໃນ​ນັ້ນມີ​ອະນຸ​ສັນຍາ​ສະຫະ​ປະຊາ​ຊາດ​ກ່ຽວ​ກັບ​ທະ​ເລ​ປີ 1982. ​ສອ\ຝ່າຍເປັນ​ເອກະ​ພາບ​ເພີ່ມ​ທະວີ​ການ​ປະສານ​ສົມທົບ​ໃນ​ບັນດາ​ເວທີ​ປາ​ໄສ​ພະຫຸ​ພາຄີ, ພິ​ເສດ​ແມ່ນ​ສະຫະ​ປະຊາ​ຊາດ, ປະຊາ​ຄົມ​ຟຣັງ​ໂກ​​ໂພນີ; ສືບ​ຕໍ່​ຊ່ວຍ​ເຫຼືອ​ຊຶ່ງ​ກັນ​ແລະ​ກັນ ​ໃນ​ການ​ພັດທະນາ​ການ​ພົວພັນ​ຂອງຝຣັ່ງກັບ​ພາກ​ພື້ນ​ອາຊີ-ປາຊີ​ຟິກ, ກໍ່​ຄື​ການ​ພົວພັນ​ຂອງ​ຫວຽດນາມ​ກັບ​ອີ​ຢູ.

​ໃນ​ໂອກາດ​ນີ້, ສອງ​ຝ່າຍ​ໄດ້​ເປັນ​ສັກຂີ​ພະຍານ​ໃນ​ພິທີ​ລົງ​ນາມ, ​ແລກ​ປ່ຽນ​ບັນດາ​ເອກະສານ, ຂໍ້​ຕົກລົງ​ການ​ຮ່ວມ​ມື​​ໃນ​ຫຼາຍ​ຂົງ​ເຂດລະຫວ່າງສອງ​ປະ​ເທດ; ​ໃນ​ນັ້ນ​ມີ​ການ​ຝຶກ​ອົບຮົມ, ພັດທະນາ​ລັດຖະບານ​ເອ​ເລັກ​ໂຕຣນິກ, ຮ່ວມ​ມື​ທາງ​ດ້ານ​ສາທາລະນະ​ສຸກ, ຮັບ​ມື​ກັບ​ການ​ປ່ຽນ​ແປງ​ສະພາບ​ອາກາດ, ປົກ​ປັກ​ຮັກສາ​ສິ່ງ​ແວດ​ລ້ອມ, ອະ​ວະ​ກາດ, ການ​ຄຸ້ມ​ຄອງ​ຕົວ​ເມືອງ, ສະໜອງ​ເຮືອບິນ​ໂດຍສານ ​ແອຣ໌ບັສ, ພະລັງງານ./.

ໂດຍ ບກ.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ