ວັນເສົາ, 15/12/2018
ພັດທະນາການພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງຫວຽດນາມ-ອິນເດຍ
1/12/2018 9:2' ສົ່ງ ພິມ
ທ່ານປະທານປະເທດຫວຽດນາມ ຫງວຽນຝູຈ້ອງ ຖ່າຍຮູບຮ່ວມກັນກັບ ທ່ານປະທານາທິບໍດີອິນເດຍ ຣາມ ນາດ ໂກວິນ (ພວບ: TTXVN)

ໃນ​ຂອບ​ເຂດ​ການ​ຢ້ຽມຢາມ, ທ່ານປະທານາທິບໍດີ​ອິນ​ເດຍ ຣາມ ນາດ ​ໂກ​ວິນ ​ໄດ້​ພົບ​ປະ​ເຈລະຈາ​ກັບ ເລຂາທິການ​ໃຫຍ່, ປະທານ​ປະ​ເທດຫວຽດນາມ ຫງວຽນ​ຝູຈ້ອງ; ພົບ​ປະ​ຫາລື​ກັບ​ນາຍົກລັດຖະມົນຕີ ຫງວຽນ​ຊວັນ​ຝຸກ, ປະທານ​ສະພາ​ແຫ່ງ​ຊາດ ຫງວຽນ​ທິກິມ​ເງິນ, ກ່າວ​ປາ​ໄສ​ທີ່​ສະພາ​ແຫ່ງ​ຊາດຫວຽດນາມ. ທ່ານ​ປະທານາທິບໍດີ ຣາມ ນາດ ​ໂກ​ວິນ ​ໄດ້​ໄປ​ວາງ​ພວງມາລາ​ໄຫວ້​ອາ​ໄລ​ທີ່​ສຸສານ​ປະທານໂຮ່ຈີ​ມິນ ​ແລະ​ວາງ​ພວງມາລາທີ່​ອະນຸສາວະລີ​ວິລະ​ຊົນ​ທີ່​ໄດ້​ເສຍ​ສະຫຼະ; ກ່າວ​ປາ​ໄສ​ທີ່​ເວທີ​ປາ​ໄສ​ການ​ທຸລະ​ກິດ​ອິນ​ເດຍ - ຫວຽດນາມ, ພົບ​ປະ​ໂອ້​ລົມ​ກັບ​ຊາວ​ອິນ​ເດຍ​ແລະບັນດາ​ເພື່ອນ​ມິດ​ຂອງ​ອິນ​ເດຍຢູ່​ຫວຽດນາມ; ​ໄປ​ຢາມ​ນະຄອນ​ດາ​ນັ້ງ ​ແລະບູຮານ​ສະຖານ​ໝີ​ເຊີນ.

ບັນດາ​ການ​ພົບ​ປະ​ເຈລະຈາ ຫາລື​ໄດ້​ດຳ​ເນີນ​ໃນ​ບັນຍາກາດ​ອົບ​ອຸ່ນ​ ແລະ​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ. ທັງສອງ​ຝ່າຍ​ຢືນຢັນຄວາມ​ພົວພັນທີ່​ເປັນ​ມູນ​ເຊື້ອ​ຍາວ​ນານລະຫວ່າງ​ສອງ​ປະ​ເທດ ຊຶ່ງ​ບັນດາ​ຮຸ່ນ​ຜູ້ນຳ​ແລະ​ປະຊາຊົນ​ສອງ​ປະ​ເທດ​ໄດ້​ທຸ່ມ​ເຫື່ອ​ເທ​ແຮງເພີ່ມ​ພູນ​ຄູນ​ສ້າງ. ​ເປັນເອກະ​ສັນຮັບ​ຮູ້​ວ່າ ການ​ພົວພັນ​ສອງ​ຝ່າ​ຍໄດ້​ຂະຫຍາຍຕົວ​ຢ່າງ​ແຂງ​ແຮງນັບ​ແຕ່​ເມື່ອ​ສອງ​ປະ​ເທດ​ສ້າງ​ຕັ້ງ​ການ​ພົວພັນຄູ່​ຮ່ວມ​ມື​ຍຸດ​ທະ​ສາດປີ 2007 ​ແລະ​ຍົກ​ຂຶ້ນ​ເປັນ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ປີ 2016.

ທັງສອງ​ຝ່າຍ​ໄດ້​ແບ່ງປັນ​ວິ​ໄສ​ທັດ​ລວມກ່ຽວ​ກັບ​ການ​​ເພີ່ມ​ທະວີການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ຍິ່ງ​ກວ່າ​ອີກ ​ໃນ​ທຸກ​ຂົງ​ເຂດ, ​ເຫັນ​ດີ​ຮັກສາການ​ຢ້ຽມຢາມ​ຂັ້ນ​ສູງ​ແລະ​ຂັ້ນ​ຕ່າງໆ​ຢ່າງ​ສະ​ໝ່ຳສະ​ເໝີ ຕາມ​ສາຍ​ພັກ, ລັດ, ລັດຖະບານ, ອົງການ​ນິຕິບັນຍັດ, ທ້ອງ​ຖິ່ນ ​ແລະ​ການ​ພົບ​ປະລະ​ຫວ່າງ​ປະຊາຊົນຂອງ​ສອງ​ປະ​ເທດ.

ທັງສອງ​ຝ່າຍຮັບ​ຮູ້​ວ່າ ການ​ຄ້າ​ສອງ​ຝ່າຍ​ໄດ້​ເຕີບ​ໂຕ​ຢ່າງ​ໄວ​ໃນ​ເວລາ​ທີ່​ຜ່ານ​ມາ, ອິນ​ເດຍກາຍ​ເປັ​ນໜຶ່ງ​ໃນ​ສິບ​ຄູ່​ຮ່ວມ​ການ​ຄ້າ​ທີ່​ໃຫຍ່​ທີ່​ສຸດ​ຂອງ​ຫວຽດນາມ, ​ແລະ​ເຊື່ອ​ໝັ້ນ​ວ່າ​ ມູນ​ຄ່າ​ການ​ຄ້າ​ສອງ​ຝ່າຍ​ຈະ​ເພີ່ມ​ຂຶ້ນ​ເປັນ 15 ຕື້​ໂດ​ລາສະຫະລັດ​​ໂດຍ​ໄວ. ທັງສອງ​ຝ່າຍຊົມ​ເຊີຍ​ການ​ເຊັນ​ບົດ​ບົນ​ທຶກ​ຄວາມ​ຈຳ​ກ່ຽວ​ກັບ​ການ​ຮ່ວມ​ມືທາງດ້ານ​ເສດຖະກິດ-ການ​ຄ້າ​ ລະຫວ່າງ​ສອງ​ກະຊວງ​ອຸດສາຫະກຳ​ການ​ຄ້າ​ຂອງ​ສອງ​ປະ​ເທດ (​ເດືອນ​ມີນາ 2018); ສະ​ເໜີ​ໃຫ້​ວາງ​ແຜນການ​ອັນ​ລະ​ດຽດ​ໂດຍ​ໄວ ​ເພື່ອ​ຜັນ​ຂະຫຍາຍບັນດາ​ຂໍ້​ຕົກລົງ​ທີ່​ໄດ້​ລົງ​ລາຍ​ເຊັນ ​ແນ​ໃສ່​ຊຸກຍູ້ການ​ຄ້າ​ສອງ​ຝ່າຍ​ໃຫ້​ຂະຫຍາຍຕົວ​ຍິ່ງ​ກວ່າ​ອີກ, ​ໃນ​ນັ້ນ​ມີ​ບັນດາ​ມາດ​ຕະການ​ກ່ຽວ​ກັບ​ການ​ສົ່ງ​ເສີມ​ການ​ຄ້າ.

ທັງສອງ​ຝ່າຍ​ເຫັນ​ດີ​ຈະ​ສືບ​ຕໍ່​ຊຸກຍູ້​ການ​ລົງທຶນ​ສອງ​ຝ່າຍ, ​ໃນ​ນັ້ນ​ມີ​ບັນດາ​ໂຄງການ​ຮ່ວມ​ມື​ລະຫວ່າງກຸ່ມ​ບໍລິສັດ​ນ້ຳມັນ​ອາຍ​ແກ໊ສຫວຽດນາມ ​(PVN) ແລະບໍລິສັດ​ນ້ຳມັນ​ອາຍ​ແກ໊ສ​ແຫ່ງຊາດ​ອິນ​ເດຍ (ONGC) ໃນການ​ສືບສວນ​ແລະ​ຂຸດ​ຄົ້ນນ້ຳມັນ​ອາຍ​ແກ໊ສ ຢູ່​ເຂດ​ດິນ​ຕໍ່​ແຜ່ນ, ​ໄຫຼ່​ທະວີບ ​ແລະ​ເຂດ​ເສດຖະກິດ​ພິ​ເສດ​ຂອງ​ຫວຽດນາມ; ສົ່ງ​ເສີມ​ສອງ​ຝ່າຍ​ໃຫ້​ມີ​ຄວາມ​ພະຍາຍາມ​ກວ່າ​ອີກ ​ໃນ​ການ​ການ​ຊອກ​ຫາ​ຮູບ​ແບບ​ການ​ຮ່ວມ​ມື, ນັບ​ທັງ​ການ​ຮ່ວມ​ມື​ກັບປະ​ເທດ​ທີ່​ສາມ. ຝ່າຍ​ຫວຽດນາມ​ຊົມ​ເຊີນ​ແລະ​ເຫັນ​ດີ​ຈະ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ວິ​ສາ​ຫະກິດ​ອິນ​ເດຍລົງທຶນ​ເຂົ້າ​ໃນ​ບັນດາ​ໂຄງການພະລັງງານ​ໃໝ່ ​ແລະ​ພະລັງງານ​ທົດ​ແທນ​ຢູ່​ຫວຽດນາມ. ຝ່າຍ​ອິນ​ເດຍຊົມ​ເຊີຍ​ແລະ​ເຫັນ​ດີ​ຈະ​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້ວິ​ສາ​ຫະກິດ​ຫວຽດນາມ​ລົງທຶນ​ເຂົ້າ​ອິນ​ເດຍ, ພິ​ເສດ​ແມ່ນ​ໃນ​ຂົງ​ເຂດ​ກະສິກຳ, ປຸງ​ແຕ່ງ​ຜະລິດ​ຕະພັນ​ກະສິກຳ, ອາຫານ​ທະ​ເລ, ​​ເຄື່ອງ​ໄມ້. ສອງ​ຝ່າຍ​ເປັນ​ເອກະສັນ​ຮັບ​ຮູ້​ຄວາມ​ສຳຄັນ​ຂອງ​ການ​ເພີ່ມ​ທະວີການ​ເຊື່ອມ​ຕໍ່ ​ແລະ​ຊຸກຍູ້ລະບຽບ​ການ​ຕ່າງ​ໆ ​ເພື່ອ​ໃຫ້​ຫວຽດ​​ເຈດ (Vietjet) ອາດ​ຈະ​ຂຸດ​ຄົ້ນ​ສາຍ​ການບິ​ນໂດຍ​ກົງ ນະຄອນ​ໂຮ່ຈີ​ມິນ-ນິວ​ເດ​ລີ ​ໃນ​ໄວໆ​ນີ້.

​ໂດຍ​ຕີ​ລາຄາ​ສູງການ​ຊ່ວຍ​ເຫຼືອ​​ຍາວ​ນານ​ແລະຕໍ່​ເນື່ອງ​ຂອງ​ອິນ​ເດຍ ຕໍ່​ບັນດາ​ໂຄງການ​ພັດທະນພາຍ​ໃຕ້ຫຼາຍ​ຮູບ​ການ​ເຊັ່ນ ການ​ຊ່ວຍ​ເຫຼືອ​​ໂດຍ​ບໍ່​ຕ້ອງ​ສົ່ງ​ຄືນ, ການ​ປ່ອຍສິນ​ເຊື່ອ​ພິ​ເສດ, ການ​ຝຶກ​ອົບຮົມ​ແຫຼ່ງບຸກຄະລາ​ກອນ ​ໃນ​ບັນດາ​ຂົງ​ເຂດ​ທີ່​ຫວຽດນາມ​ມີ​ຄວາມ​ຕ້ອງການ, ທັງສອງ​ຝ່າຍສຸມ​ໃສ່​ຜັນ​ຂະຫຍາຍ​ຢ່າງ​ທັນ​ການ​ ບັນດາ​ບ້ວງ​ເງິນ​ຊ່ວຍ​ເຫຼືອ​ໂດຍ​ບໍ່​ຕ້ອງ​ສົ່ງ​ຄືນ​ແລະບ້ວງ​ເງິນ​ໃຫ້​ກູ້​ຢືມ​ພິ​ເສດ​ຂອງ​ລັດຖະບານ​ອິນ​ເດຍ ສຳລັບຫວຽດນາມ ກໍ່​ຄື​ບັນດາ​ໂຄງການ​ປະຈຳ​ປີ ສັງກັດ​ກອງ​ທຶນພັດທະນາ​ໂຄງການ​ດ່ວນ (QIPs) ສຳລັບບັນດາ​ປະ​ເທດ​ກຳປູ​ເຈຍ, ລາວ, ມຽນມາ ​ແລະ​ຫວຽດນາມ. ລັດຖະບານ​ອິນ​ເດຍ​ໃຫ້​ຄຳ​ໝັ້ນ​ສັນຍາ​ຈະສືບ​ຕໍ່​ສະໜອງ​ທຶນ​ການ​ສຶກສາ 200 ທຶນ​ຕໍ່​ປີ​ໃຫ້​ຫວຽດນາມ ​ໂດຍ​ຜ່ານ​ໂຄ​ງການ​ຮ່ວມ​ມືດ້ານ​ເຕັກນິກ (ITEC) ​ແລະ 30 ທຶນ​ຕາມ​ໂຄງການ​ແລກປ່ຽນ​ວັດທະນະທຳ (CEP/GCSS). 

ທັງສອງ​ຝ່າຍຊົມ​ເຊີນ​ການ​ເປີດ​ນຳ​ໃຊ້​ສູນວັດທະນະທຳ​ອິນ​ເດຍ Swami Vivekananda (​ເດືອນ​ເມສາ 2017), ສູນ​ການ​ຄົ້ນຄວ້າ​ອິນ​ເດຍຢູ່​ຮ່າ​ໂນ້ຍ (​ເດືອນກັນຍາ 2014) ​ແລະ​ສູນ​ການ​ຄົ້ນຄວ້າ​ຫວຽດນາມ​ຢູ່​ນິວ​ເດ​ລີ (​ເດືອນມີ​ນາ 2018). ຝ່າຍ​ອິນ​ເດຍສະ​ແດງ​ຄວາມ​ຂອບ​ໃຈ​ຫວຽດນາມ ​ທີ່​ໄດ້ປະສານສົມທົບ​ຈັດ​ຕັ້ງການ​ເຄື່ອນ​ໄຫວສະ​ເຫຼີ​ມສະຫຼອງວັນ​ຄ້າຍ​ວັນ​ເກີດ​ຂອງ ມະຫາຕະມະ ຄານ​ທີ ຄົບຮອບ 150 ປີ​ໃນ​ປີ 2018 ​ແລະ​ຊ່ວຍ​ເຫຼືອ​ຈັດ​ຕັ້ງ “ວັນ​​ໂຢຄະ​ສາ​ກົນ” ທຸກ​ປີ. 

ທັງສອງ​ຝ່າຍຢືນຢັນ​ຈະ​ສືບ​ຕໍ່​ສະໜັບສະໜູນ​ການ​ແລກປ່ຽນລະຫວ່າງ​ບັນດາ​ການຈັດ​ຕັ້ງ​ມິດຕະພາບ, ນັກວິຊາການ​ຂອງ​ສອງ​ປະ​ເທດ; ​ເຫັນ​ດີ​ຈະສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້ບັນດາ​ອົງການ​ສື່​ມວນຊົນຂອງ​ສອງ​ປະ​ເທດ​ ເພີ່ມ​ທະວີ​ການປາກົດ​ຕົວ​ແລະ​ເຄື່ອນ​ໄຫວຢູ່​ໃນ​ແຕ່ລະ​ປະ​ເທດ. ສອງ​ຝ່າຍ​ເຫັນ​ດີ​ເປັນ​ເອກະສັນ​ກ່ຽວ​ກັບ​ຄວາມ​ສຳຄັນຂອງ​ການ​ເພີ່ມ​ທະວີ​ການ​ແລກ​ປ່ຽນ​ປະຊາຊົນ ​ໂດຍ​ຜ່ານ​ການຈັດ​ງານ​ເທດສະການ​ຟີມຮູບ​ເງົາ ​ແລະ​ຊຸກຍູ້​ການ​ຮ່ວມ​ມື​ທາງ​ດ້ານ​ການທ່ອງທ່ຽວ​ຍິ່ງ​ກວ່າ​ອີກ. ຮັບ​ຮູ້​ວ່າ​ປີ​ທ່ອງ​ທ່ຽວ​ອິນ​ເດຍ-ອາ​ຊຽນ 2019 ຈະ​ສາມາດ​ສ້າງ​ໂອກາດ​ຫຼາຍ​ຢ່າງ​ເພື່ອ​ຊຸກຍູ້​ການທ່ອງທ່ຽວ​ລະຫວ່າງ​ສອງ​ປະ​ເທດ. 

ສອງ​ຝ່າຍ​ໄດ້​ເນັ້ນໜັກ​ວ່າ ການ​ຮ່ວມ​ມື​ທາງ​ດ້ານ​ການ​ປ້ອງ​ກັນຊາ​ດ​ແລະ​ປ້ອງ​ກັນ​ຄວາມ​ສະຫງົບ​ແມ່ນ​ເສົາ​ຄ້ຳ​ຂອງ​ການ​ພົວພັນ​ສອງ​ຝ່າຍ, ຮັບ​ຮູ້​ການຈັດ​ຕັ້ງ​ຢ່າງ​ສຳ​ເລັດ​ຜົນ​ ກົນ​ໄກ​ຮ່ວມ​ມື​ທາງ​ດ້ານ​ການ​ປ້ອງ​ກັນປະ​ເທດທຸກ​ປີ, ພິ​ເສດ​ແມ່ນ​ການ​ສົນທະນາ​ນະ​ໂຍບາຍ​ການ​ປ້ອງ​ກັນປະ​ເທດດຂັ້ນ​ຮອງ​ລັດຖະມົນຕີ, ການ​ສົນທະນາດ້ານ​ຄວາມ​ປອດ​ໄພ​ຄັ້ງ​ທຳ​ອິດ (​ເດືອນ​ກໍລະກົດ 2018). ຕາມ​ນັ້ນ, ​ເຫັນ​ດີ​ເປັນ​ເອກະສັນຜັນ​ຂະຫຍາຍ​ຢ່າງ​ມີ​ປະສິດທິ​ຜົນ ຖະ​ແຫຼ​ງການ​ກ່ຽວ​ກັບ​ວິ​ໄສ​ທັດ​ການ​ຮ່ວມ​ມື​ດ້ານ​ການ​ປ້ອງ​ກັນ​ປະ​ເທດ​ຫວຽດນາມ - ອິນ​ເດຍ ​ໄລຍະ 2015 - 2020. ​ເພີ່ມ​ທະວີ​ການ​ຮ່ວມ​ມື​ໃນ​ຂົງ​ເຂດ​ຝຶກ​ອົບຮົມ​ແຫຼ່ງບຸກຄະລາ​ກອນ, ຜັນ​ຂະຫຍາຍ​ການ​ຮ່ວມມືລະຫວ່າງກອງທັບ​ບົກ, ກອງທັບ​ອາກາດ, ກອງທັບ​ເຮືອ ​ແລະ​ຕຳຫຼວດ​ຍາມ​​ຝັ່ງທະ​ເລ​ຂອງ​ສອງ​ປະ​ເທດ ກໍ່​ຄືກ​ານ​ຮ່ວມ​ມື​​ໃນຂົງ​ເຂດການ​ຮັກສາ​ຄວາມ​ປອດ​ໄພ​ເຄືອ​ຂ່າຍ, ການ​ແບ່ງປັນຂໍ້​ມູນ​. ​ເຫັນ​ດີ​ເປັນ​ເອກະສັນ​ກ່ຽວ​ກັບ​ຄວາມ​ຕ້ອງການ​ເພີ່ມ​ທະວີ​ການ​ຮ່ວມ​ມື​ໃນ​ຂົງ​ເຂດການ​ເດີນ​ເຮືອ​ທະ​ເລ, ກວມ​ທັງ​ການ​ຕ້ານ​ໂຈນ​ສະ​ລັດ, ຄວາມ​ປອດ​ໄພ​ທາງ​ທະ​ເລ, ​ການແລກປ່ຽນຂໍ້​ມູນ​ທາງ​ເຮືອ​ທີ່​ບໍ່​ແມ່ນ​ທະຫານ.

ສອງ​ຝ່າຍ​ໄດ້​ແລກປ່ຽນ​ທັດສະນະ​ຮ່ວມຫຼາຍ​ຈຸດ ກ່ຽວ​ກັບ​ບັນດາ​ບັນຫາ​ພາກ​ພື້ນ​ແລະ​ສາກົນທີ່​ມີ​ຄວາມ​ສົນ​ໃຈຮ່ວມ​ກັນ, ຢືນຢັນ​ຄວາມ​ສຳຄັນ​ຂອງ​ການ​ກໍ່ສ້າງ​ພາກ​ພື້ນ​ອາຊີ ​ແລະ ມະຫາ​ສະໝຸດ​ອິນ​ເດຍ - ປາຊີ​ຟິກ​ແຫ່ງ​ສັນຕິພາບ, ຈະ​ເລີ​ນຮຸ່ງ​ເຮືອງ ບົນ​ພື້ນຖານ​ເຄົາລົບນັບຖື​ອະທິປະ​ໄຕ ​ແລະ​ກົດໝາຍ​ສາກົນ, ​ເສລີພາບ​ໃນ​ການ​ເດີນ​ເຮືອ-ການບິນ ​ແລະ ​ບັນດາ​ການ​ເຄື່ອນ​ໄຫວ​ເສດຖະກິດທີ່​ບໍ່​ຖືກ​ຂັດຂວາງ. ອິນ​ເດຍຕີ​ລາຄາ​ສູງ​ຫວຽດນາມ​ທີ່​ໄດ້​ປະສານສົມທົບຈັດ​ຕັ້ງ​ຢ່າງ​ສຳ​ເລັດ​ຜົນ ກອງ​ປະຊຸມ​ມະຫາ​ສະໝຸດ​ອິນ​ເດຍຄັ້ງ​ທີ​ສາມ​ (​ເດືອນ​ສິງ​ຫາ 2018); ​ເນັ້ນ​ໜັກ​ເຖິງ​ບົດບາດ​ຂອງ​ອິນ​ເດຍ ​ແລະ​ຫວຽດນາມ​ໃນ​ການ​ຮັກສາ ​ແລະ​ ປັບປຸງ​ໂຄງ​ສ້າງ​ພາກ​ພື້ນ​ເປີດ, ​ໂປ່​ງ​ໃສ, ກວມ​ລວມ ​ແລະ​ອີງ​ຕາມ​ລະບຽບ​ກົດໝາຍ. ຕີ​ລາຄາ​ສູງ​ການ​ປະກອບສ່ວນ​ຂອງ​ຫວຽດນາມ​ ໃນ​ຖານະຜູ້​ປະສານ​ງານ​ການ​ພົວພັນ​ອາຊຽນ - ອິນ​ເດຍ ​ໄລຍະ​ປີ 2015 - 2018, ສະ​ເໜີ​ໃຫ້​ພ້ອມ​ກັນ​ຊຸກຍູ້​ການ​ປະຕິບັດຖະ​ແຫຼ​ງການ​ເດ​ລີ ຂອງ​ກອງ​ປະຊຸມ​ສຸດ​ຍອດ​ອາ​ຊຽນ - ອິນ​ເດຍ ​ໃນ​ໂອກາດ​ສະ​ເຫຼີ​ມສະຫຼອງ 25 ປີ​ແຫ່ງ​ການ​ພົວພັນ​ຄູ່​ຮ່ວມ​ມື​ສົນທະນາ (​ເດືອນ​ມັງກອນ 2018). 

ຫວຽດນາມ​ຢືນຢັນ​ການ​ສະໜັບສະໜູນນະ​ໂຍບາຍ “ປະຕິບັດ​ການ​ທາງ​ທິດຕາ​ເວັນ​ອອກ” ຂອງ​ອິນ​ເດຍ, ຕີ​ລາຄາ​ສູງ​ ຕໍ່ການທີ່ອິນ​ເດຍສະໜັບສະໜູນ​ບົດບາດ​ເປັນ​ໃຈ​ການ​ຂອງ​ອາ​ຊຽນ ​ໃນ​ໂຄງ​ສ້າງ​ພາກ​ພື້ນ​ທີ່​ພວມ​ເປັນ​ຮູບ​ເປັນ​ຮ່າງ​ຂຶ້ນ. ສອງ​ຝ່າຍ​ເຫັນ​ດີ​ເປັນ​ເອກະສັນ​ຈະ​ສືບ​ຕໍ່ປະສານ​ສົມທົບຢ່າງ​ແໜ້ນ​ແຟ້ນ, ສະ​ບັນ​ສະ​ໜູນ​ຊຶ່ງ​ກັນ​ແລະ​ກັນ​ຢູ່​ໃນ​ບັນດາ​ເວທີ​ປາ​ໄສ​ພະຫຸ​ພາຄີ, ​ໂດຍ​ສະ​ເພາະ​ແມ່ນ​ໃນ​ຂອບ​ເຂດ​ສະຫະ​ປະຊາ​ຊາດ; ຢືນຢັນ​ອີກ​ຄັ້ງ​ກ່ຽວ​ກັບ​ການສະໜັບສະໜູນ​ຊຶ່ງ​ກັນ​ແລະ​ກັນ​ ໃນ​ການ​ສະໝັກ​ຮັບ​ເລືອກ​ເປັນສະມາຊິກ​ບໍ່​ຖາວອນຂອງ​ສະພາ​ຄວາມ​ໝັ້ນຄົງ​ແຫ່ງ​ສະຫະ​ປະຊາ​ຊາດ, ຫວຽດນາມ​ໃນ​ໄລຍະ 2020 - 2021, ອິນ​ເດຍ​ໃນ​ໄລຍະ 2021 - 2022. 

ສອງ​ຝ່າຍ​ສະ​ແດງ​ຄວາມ​ກັງວົນ​ກ່ຽວ​ກັບ​ສະພາບ​ການ​ຜັນ​ປ່ຽນ​ຢູ່​ທະ​ເລ​ຕາ​ເວັນ​ອອກ ​ແລະ ຢືນຢັນ​ອີກ​ຄັ້ງ​ຄວາມ​ສຳຄັນ​ຂອງ​ການ​ຮັກສາ​ສັນຕິພາບ, ສະຖຽນ​ລະ​ພາບ, ຄວາມ​ປອດ​ໄພ, ​ເສລີພາບ​ໃນ​ການ​ເດີນ​ເຮືອ-​ເດີນ​ອາກາດ ​ແລະ ​ບັນດາ​ການ​ເຄື່ອນ​ໄຫວ​ເສດ​ຖະກິດ​ທີ່​ບໍ່​ຖື​ດຂັດຂວາງ​ ຢູ່​ທະ​ເລ​ຕາ​ເວັນ​ອອກ; ສອງ​ຝ່າຍ​ເນັ້ນ​ໜັກ​ຄວາມ​ຈຳ​ເປັນ​ຂອງການ​ປະຕິບັດ ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ຢ່າງ​ຄົບ​ຖ້ວນ​ແລະ​ມີ​ປະສິດທິ​ຜົນ ​ແລະ ການສຳ​ເລັດ​​ໂດຍ​ໄວ ປະ​ມວນຂໍ້​ກຳນົດກ່ຽວ​ກັບ​ການ​ປະພຶດຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (COC) ຢ່າງ​ມີ​ເນື້ອ​ແທ້, ມີ​ປະສິດທິ​ຜົນ​ແລະມີຄວາມຜູກ​ມັດ; ​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ການ​ແກ້​ໄຂຂໍ້​ພິພາດ​ຂັດ​ແຍ້​ງດ້ວຍ​ສັນ​ຕິ​ວິທີ, ກວມທັງການ​ເຄົາລົບຢ່າງ​ເຕັມທີ່ ຕໍ່​ຂະ​ບວນການ​ທາງ​ການ​ທູດ​ແລະ​ກົດໝາຍ, ສອດຄ່ອງ​ກັບ​ກົດໝາຍ​ສາກົນ, ພິ​ເສດ​ແມ່ນ​ອະນຸ​ສັນຍາ​ສະຫະ​ປະຊາ​ຊາດ​ກ່ຽວ​ກັບ​ກົດໝາຍ​ທະ​ເລ​ປີ 1982 (UNCLOS). 

​ເນື່ອງ​ໃນ​ໂອກາດ​ການ​ຢ້ຽມຢາມ​ຂອງ​ທ່ານປະທານາທິບໍດີ​ ຣາມ ນາດ ​ໂກ​ວິນ, ສອງ​ຝ່າຍ​ໄດ້​ລົງ​ນາມ​ໃນ​ເອກະສານ​ຫຼາຍ​ສະບັບ​ເຊັ່ນ: ບົດ​ບັນທຶກ​ຄວາມ​ຈຳ​ລະຫວ່າງ​ກະຊວງຖະ​ແຫຼ​ງຂ່າວ​ແລະ​ການ​ສື່ສານ​ແຫ່ງ​ປະ​ເທດ ສສ.ຫວຽດນາມ ​ແລະ ກະຊວງ​ການ​ສື່ສານ​ແຫ່ງ​ປະ​ເທດ ສ.ອິນ​ເດຍ ກ່ຽວ​ກັບ​ການ​ຮ່ວມ​ມື​ໃນ​ຂົງ​ເຂດ​ການ​ສື່ສານ; ບົດ​ບັນທຶກ​ຄວາມ​ຈຳກ່ຽວ​ກັບ​ການ​ຮ່ວມ​ມື​ລະຫວ່າງ​ສະ​ຖາ​ບັນ​ການ​ເມືອງ​ແຫ່ງ​ຊາດ​ໂຮ່ຈີ​ມິນ, ຮ່າ​ໄນ້ຍ, ຫວຽດນາມ ​ແລະ ມະຫາວິທະຍາ​ໄລ ຊະວາ​ຫະລານ ​ເນຣູ, ນິວ​ເດ​ລີ, ອິນ​ເດຍ; ບົດ​ບັນທຶກ​ຄວາມ​ຈຳກ່ຽວ​ກັບ​ການ​ຮ່ວມ​ມືລະຫວ່າງ​ກົມ​ການຕ່າງປະ​ເທດ, ກະຊວງ​ການ​ຕ່າງປະ​ເທດ​ຫວຽດນາມ ​ແລະ ສະມາຄົມ​ທຸລະ​ກິດ​ອິນ​ເດຍຢູ່​ຫວຽດນາມ (INCHAM); ບົດ​ບັນທຶກ​ຄວາມ​ຈຳລະຫວ່າງ​ ຫໍ​ການ​ຄ້າ​ແລະ​ອຸດສາຫະກຳ​ຫວຽດນາມ ​ແລະ ສະຫະພັນ​ອຸດສາຫະກຳ​ອິນ​ເດຍ./.

​ໂດຍ ​ເຟືອງ​ຈ່າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ