ວັນຈັນ, 18/2/2019
ນາຍົກລັດຖະມົນຕີຫວຽດນາມ ຫງວຽນຊວັນຝຸກ ເຂົ້າຮ່ວມກອງປະຊຸມປະຈຳປີ ຂອງເວທີປາໄສເສດຖະກິດໂລກ
2/2/2019 14:57' ສົ່ງ ພິມ
ນາຍົກລັດຖະມົນຕີຫວຽດນາມ ຫງວຽນຊວັນຝຸກ ແລະ ປະທານເວທີປາໄສເສດຖະກິດໂລກ ບໍເກີ ແບຣນດີ. (ພາບ: TTXVN)

ນາຍົກລັດຖະມົນຕີ ຫງວຽນ​ຊວັນ​ຝຸກ ​ໄດ້​ມີ​ໂຄງການ​ເຮັດ​ວຽກ​ທີ່​ຮີບ​ດ່ວນພ້ອມ 37 ກິດຈະກຳ​ຕໍ່​ເນື່ອງ: ກ່າວ​ປາ​ໄສ​ໃນ​ການ​ສົນທະນາ “ກາ​ນພົບ​ປະລະ​ຫວ່າງ​ບັນດາ​ຜູ້ນຳ​ກ່ຽວ​ກັບ​ວາລະ​ການ​ປະຕິບັດ​ການ​ທາງ​ມະຫາ​ສະໝຸດ”, ​ເຂົ້າຮ່ວມ​ການສົນທະນາ​ລະຫວ່າງ​ຜູ້ນຳຂັ້ນ​ສູງ (IGWEL) ພາຍ​ໃຕ້​ຫົວ​ຂໍ້ “​ໂລກ​ໃນ​ຍຸກ​ສະ​ໄໝ​ໂລກາ​ພິວັດ 4.0” ​ແລະ ​ການ​ປຶກສາ​ຫາລື​ກັບທ່ານ ບໍ​ເກີ ​ແບຣນດີ ​ປະທານ WEF ທີ່​ໄດ້ສົ່ງ​ອອນ​ໄລ​ໃນ​ເຄືອ​ຂ່າຍທົ່ວ​ໂລກ​ຢ່າງ​ເປັນ​ທາງ​ການ​ຂອງ WEF ພາຍ​ໃຕ້​ຫົວ​ຂໍ້ “ຫວຽດນາມ​ແລະ​ໂລກ”. ນີ້​ເປັນ​ຄັ້ງ​ທຳ​ອິດ​ທີ່ WEF ຈັດ​ຕັ້ງ​ການ​ສົນທະນາ​ພິ​ເສດສະ​ເພາະ​ກ່ຽວ​ກັບ​ຫວຽດນາມ ​ເພື່ອ​ສົ່ງ​ເສີມ​ການ​ພັດທະນາ​ແລະ​ເຊື່ອມ​ໂຍງ​ສາກົນ​ຂອງ​ຫວຽດນາມ. ນາຍົກລັດຖະມົນຕີ ຫງວຽນ​ຊວັນ​ຝຸກ ກໍ່​ມີ​ການ​ພົບ​ປະ​ກັບ​ຜູ້ນຳ​ຂອງ​ບາງ​ປະ​ເທດ ​ແລະ ຫົວໜ້າ​ອົງການ​ຈັດ​ຕັ້ງ​ສາກົນ​ທີ່​ສຳຄັນ; ພົບ​ປະ ສົນທະນາ​ກັບ​ບັນດາຫົວໜ້າ​ບໍລິຫານ, ຜູ້ນຳ​ຂອງ​ບໍລິສັດ​ຊັ້ນ​ນຳ​ຂອງ​ໂລກ; ພ້ອມ​ກັນ​ກັບທ່ານ​ສາດສະດາຈານ ​ເກຼົາຊະວາ​ບ ​ປະທານ​ກຳມະການ​ບໍລິຫານ​ແລະ​ຜູ້​ກໍ່​ຕັ້ງ WEF ເປັນສັກຂີ​ພະຍານ​ ພິທີ​ລົງ​ນາມ​ໃນຂໍ້​ຕົກລົງ​ການ​ຮ່ວມ​ມືກ່ຽວ​ກັບການ​ກໍ່ສ້າງ​ສູນ​ປະຕິວັດ​ເຕັກ​ໂນ​ໂລ​ຊີ 4.0 ​ແລະ ໜັງສື​ສະ​ແດງ​ເຈດ​ຈຳນົງ​ກ່ຽວ​ກັບ​ການສ້າງ​ຄວາມ​ຄິດ​ລິ​ເລີ່​ມສິ່ງ​ເສດ​ເຫຼືອ​ພາດ​ສະຕິ​ກລະຫວ່າງ WEF ​ແລະ ​ຫວຽດນາມ.

ກ່າວ​ປາ​ໄສ​ໃນ​ການ​ປະຊຸມ​ສົນທະນາ, ປຶກສາ​ຫາລື​ເຫຼົ່າ​ນັ້ນ, ນາຍົກລັດຖະມົນຕີ ຫງວຽນ​ຊວັນ​ຝຸກ ​ໃຫ້​ທັດສະນະ​ວ່າ, ການ​ປະຕິວັດ 4.0 ພວມ “​ເຄາະ​ປະຕູ” ທຸກ​ວິ​ສາ​ຫະກິດ, ພາ​ໃຫ້​ມີ​ການ​ປ່ຽນ​ແປງ​ທີ່​ເລິກ​ເຊິ່ງ ຊຶ່ງ​ບໍ່​ມີ​ປະ​ເທດ​ໃດສາມາດ​ຢືນຢູ່ນອກ​ໄດ້. ດ້ວຍຄວາມ​ພະຍາຍາມ​ຜ່ານ​ຜ່າ​ຄວາມ​ຫຍຸ້ງຍາກ, ຂໍ້​ຈຳກັດ, ສິ່ງ​ທ້າ​ທາຍ, ຫວຽດນາມ​ຖື​ວ່າ​ນີ້​​ເປັນ​ໂອກາດທີ່​ດີ​ໃຫ້​ບັນດາ​ປະ​ເທດ​ແຂ່ງຂັນ​ກັນດ້ວຍ​ການ​ປະດິດ​ສ້າງ, ບໍ່​ພຽງ​ແຕ່​ແຂ່ງຂັນ​ກັນ​ດ້ວຍ​ບັນດາ​ປັດ​ໄຈ​ດັ້ງ​ເດີມ​ເຊັ່ນ: ການ​ຄ້າ​ເສລີ, ຂະໜາດ, ບົດຮຽນ, ​ແຮງ​ງານ, ​ເງິນ​ລົງທຶນ.

ການ​ປະຕິວັດອຸດສາຫະກຳ 4.0 ບໍ່​ພຽງ​ແຕ່​ກ່ຽວ​ກັບ​ເຕັກ​ໂນ​ໂລ​ຊີ​ເທົ່າ​ນັ້ນ ຫາກ​ຍັງ​ເປັນ​ການ​ປະຕິວັດ​ທີ່​ສຳຄັນ​ໃນ​ນະ​ໂຍບາຍ. ຫວຽດນາມ​ໄດ້​ເລີ່​ມ​ໂຄງການ “Make in Viet Nam 4.0” - ຄວາມຄິດ​ລິ​ເລີ່​ມທີ່​ສົ່ງ​ເສີມອຸດສາຫະກຳ ອີງ​ໃສ່​ນະ​ໂຍບາຍ​ໃໝ່, ຈິນຕະນາການ​ຄຸ້ມ​ຄອງ​ໃໝ່ ​ແລະ ບັນດາ​ເຕັກ​ໂນ​ໂລ​ຊີ​ໃໝ່. ຫວຽດນາມ​ກຳນົດ​ຂອບ​ນິຕິ​ທຳ​ທີ່​ໂປ່​ງ​ໃສ, ນັບ​ມື້​ນັບ​ເຂົ້າ​ໃກ້​ກັບ​ມາດຕະຖານ​ສາກົນ​ທີ່​ນຳ​ໜ້າ ​ແລະ ຫວັງ​ວ່າ WEF, ຊຸມ​ຊົນ​ທຸລະ​ກິດ​ໄວ້​ວາງ​ໃຈ​ໃນ​ຄວາມ​ຕັດສິນ​ໃຈ ​ແລະ​ ຄວາມ​ພະຍາຍາມ​ປ່ຽນ​ແປງ​ໃໝ່​ຂອງ​ຫວຽດນາມ.

​ໃນ​ການ​ສົນທະນາ​ກັບ​ປະທານ WEF ບໍ​ເກີ ​ແບຣນດີ ກ່ຽວ​ກັບ​ຫົວ​ຂໍ້ “ຫວຽດນາມ​ແລະ​ໂລກ”, ຕໍ່​ຄຳ​ຖາມ “ຫວຽດນາມ​ຈະ​ເຮັດ​ໃຫ້​ໂລກ​ປະຫຼາດ​ໃຈ​ໃນ 5 ປີ​ຂ້າງ​ໜ້າ​ຄື​ແນວ​ໃດ?”, ນາຍົກລັດຖະມົນຕີ ຫງວຽນ​ຊວັນ​ຝຸກ ຕອບ​ວ່າ, “ພວກ​ຂ້າພະ​ເຈົ້າ​ມີ​ຄວາມປາຖະໜາ​ອັນ​ແຮງ​ກ້າ​ແຫ່ງ​ຊາດ​ໃນ​ການ​ພັດທະນາ. ກ່ອນ​ອື່ນ​ໝົດ, ​ໃນ​ສະພາບ​ແວດ​ລ້ອມ​ປະຈຸ​ບັນ, ພວກ​ຂ້າພະ​ເຈົ້າ​ຮັກສາ​ທ່ວງທ່າ​ການຈະ​ເລີ​ນ​ເຕີບ​ໂຕ, ຍົກ​ສູງ​ຊີ​ວິດ​ການ​ເປັນ​ຢູ່​ຂອງ​ປະຊາຊົນ, ຮັກສາ​ສະຖຽນ​ລະ​ພາບ​ທາງ​ການ​ເມືອງ, ສັງຄົມ ​ແລະ ​ເປັນ​ປະ​ເທດ​ທີ່​ເຊື່ອ​ຖື​ໄດ້​ສຳ​ລັບ​ນັກ​ລົງທຶນຕ່າງປະ​ເທດ​ແລະ​ໃນ​ປະ​ເທດ​ທັງ​ໝົດ ທີ່​ມາ​ລົງທຶນ ທຳ​ການ​ທຸລະ​ກິດ​ຢູ່​ຫວຽດນາມ​ ໄດ້​ຮັບ​ຄວາມ​ສະ​ດວກ​ດີ​ທີ່​ສຸດ​ແລະ​ປອດ​ໄພ​ທີ່​ສຸດ. ດັ່ງ​ນັ້ນ, ພວກຂ້າພະ​ເຈົ້າ​ເພີ່ມ​ທະວີ​ການ​ສົນທະນາ, ຍູ້​ແຮງ​ການ​ປະຕິ​ຮູບສະ​ຖາ​ບັນ, ກົດໝາຍ, ປົກ​ປ້ອງ​ສິດຜົນ​ປະ​ໂຫຍ​ດທີ່​ຖືກຕ້ອງ​ຂອງນັກ​ລົງທຶນ, ​ເພື່ອ​ໃຫ້ການ​ລົງທຶນ, ທຸລະ​ກິດ​ຂອງ​ນັກ​ລົງທຶນ​ຢູ່​ຫວຽດນາມມີ​ຄວາມ​ຟົດ​ຟື້ນກວ່າ​ອີກ, ​ແກ້​ໄຂ​ວຽກ​ເຮັດ​ງານ​ທຳ​​ໃຫ້ໄດ້​ຫຼາຍ​ກວ່າ, ປະກອບສ່ວນ​ໃຫ້​ແກ່​ການ​ພັດທະນາ​ໄດ້​ດີກ​ວ່າ​ອີກ, ຮັກສາ​​ໄດ້ທ່ວງທ່າ​ການ​ເຕີບ​ໂຕ​ຢ່າງ​ຕໍ່​ເນື່ອງ​ໃນ​ສະພາບ​ການ​ໂລກ​ທີ່​ສັບສົນ​ປະຈຸ​ບັນ. ນັ້ນ​ແມ່ນສິ່ງ​ທີ່​ລັດຖະບານມຸ່ງ​ໝັ້ນ​ຕໍ່​ປະຊາຊົນ​ແລະ​ນັກ​ລົງທຶນ. ​ໃນ​ສະພາບ​ການ​ສາກົນ​ປະຈຸ​ບັນ, ພວກ​ເຮົາ​ຮັກສາ​​ການ​ເຕີບ​ໂຕ​ໃນ​ລະດັບ​ສູງກໍ່​ແມ່ນ​ຄວາມ​ພະຍາຍາມຫຼາຍ​ແລ້ວ, ຖ້າ​​ບໍ່​ຢາກ​ເວົ້າ​​ເຖິງ​ສິ່ງປະຫຼາດ”.

ການ​ສົນທະນາ​ລະຫວ່າງ​ບັນດາ​ຜູ້ນຳ​ກ່ຽວ​ກັບວາລະ​ການ​ປະຕິບັດ​ການ​ທາງ​ມະຫາ​ສະໝຸດ ພາຍ​ໃຕ້​ຫົວ​ຂໍ້ “ການ​ກະທຳ​ເພື່ອ​ມະຫາ​ສະໝຸດ”, ນາຍົກລັດຖະມົນຕີ ຫງວຽນ​ຊວັນ​ຝຸກ ຢືນຢັນ, ຫວຽດນາມ​ຮ່ວມ​ມື​ຮ່ວມ​ແຮງ​ກັບ​ປະຊາ​ຄົມສາກົນ​ລົງມື​ກະທຳ ​ເພື່ອ​ມະຫາ​ສະໝຸດບໍ່​ມີ​ສິ່ງ​ເສດ​ເຫຼືອ​ພາດ​ສະຕິ​ກ, ​ແລະ​ນຳ​ສະ​ເໜີ​ບັນດາຂໍ້​ຄິດ​ລິ​ເລີ່ມ​ເຊັ່ນ: ສ້າງ​ຕັ້ງ “​ເວທີ​ປາ​ໄສ​ຄູ່​ຮ່ວມ​ມື​ພາກ​ລັດ-​ເອກະ​ຊົນ​ເປີດ​ກວ້າງ ກ່ຽວ​ກັບ​ການ​ຮັບ​ມື​ກັບ​ການ​ປ່ຽນ​ແປງ​ສະພາ​ບອາກາດ ​ແລະ ປົກ​ປັກ​ຮັກສາ​ສະພາບ​ແວດ​ລ້ອມ​ນິ​ເວດວິທະຍາ​ທາງທະ​ເລ”; ສະ​ເໜີ​ໃຫ້​ເວທີ​ປາ​ໄສ​ເສດຖະກິດ​ໂລກສົມທົບ​ກັບ​ຄູ່​ຮ່ວມ​ມື​ໃນ​ການ​ຄົ້ນຄວ້າ, ຊຸກຍູ້​ການກໍ່​ຕັ້ງ​ເຄືອ​ຂ່າຍ​ທົ່ວໂລກກ່ຽວ​ກັບ​ການ​ແບ່ງປັນ​ຂໍ້​ມູນ​ທະ​ເລດ​ແລະ​ມະຫາ​ສະໝຸດ; ພ້ອມ​ກັນ​ນັ້ນ​ກໍ່​ສະ​ແດງ​ຄວາມ​ຊົມ​ເຊີຍ​ຕໍ່​ປະຊາ​ຄົມ​ໂລກ​ທີ່​ໄດ້ສະໜັບສະໜູນ​ຫຼັກ​ໝັ້ນ​ລວມຂອງ ອາ​ຊຽນ ກ່ຽວ​ກັບ​ຄວາມ​ຈຳ​ເປັນ​ຕ້ອງ​ຮັບປະກັນ​ຄວາມ​ໝັ້ນຄົງ, ຄວາມ​ປອດ​ໄພ ​ແລະ ​ເສລີພາບ ​ໃນ​ການ​ເດີນ​ເຮືອ​ແລະ​ການບິນ​ ຢູ່​ໃນ​ເຂດ​ທະ​ເລ​ຕາ​ເວັນ​ອອກ, ປະກອບສ່ວນ​ຮັກສາ​ມະຫາ​ສະໝຸດ​ຂຽວ, ສັນຕິພາບ, ສະຖຽນ​ລະ​ພາບ ​ແລະ ການ​ຮ່ວມ​ມື.

​ໃນ​ຂອບ​ເຂດ WEF ດາ​ໂວ​ດ 2019, ຫວຽດນາມ​ແລະ WEF ​ໄດ້​ລົງ​ນາມ​ໃນຂໍ້​ຕົກລົງການ​ຮ່ວມ​ມື​ກ່ຽວ​ກັບ​ສູນປະຕິວັດ​ອຸດສາຫະກຳ 4.0 ຢູ່​ຫວຽດນາມ. ນາຍົກລັດຖະມົນຕີ ຫງວຽນ​ຊວັນ​ຝຸກ ​ໃຫ້​ຮູ້​ວ່າ, ສູນ​ດັ່ງກ່າວ​ຈະ​ໄດ້​ເຊື່ອມ​ຕໍ່​ກັບ​ບັນດາ​ສູນ​ປະຕິວັດ​ອຸດສາຫະກຳ 4.0 ຂອງ WEF ຢູ່ສະຫະລັດ​ອາ​ເມ​ລິ​ກາ, ອີ​ຢູ, ຈີນ, ອິນ​ເດຍ. ປະຕິບັດາກ​ານຮ່ວມ​ມື​ນີ້, ຫວຽດນາມ​ຈະ​ເປັນ​ຈຸດ​​ໃຈ​ກາງ​ກ່ຽວ​ກັບ​ນະ​ໂຍບາຍ 4.0 ຂອງ​ພາກ​ພື້ນ. ຫວຽດນາມ​ຈະ​ນຳ​ໜ້າ​ໃນ​ການ​ສ້າງ​ຂອບ​ນະ​ໂຍບາຍ, ຍອມຮັບ​ແລະ​ອະນຸຍາດ​ໃຫ້ທົດ​ລອງ​ເຕັກ​ໂນ​ໂລ​ຊີ​ໃໝ່, ນຳ​ໃຊ້​ຢ່າງ​ແຂງ​ແຮງ​ຮູບ​ແບບ​ການ​ຮ່ວມ​ມື​ພາກ​ລັດ-​ເອກະ​ຊົນ ​ເພື່ອ​ສ້າງຜະລິດ​ຕະພັນ​​​ແລະ​ບໍລິການທີ່​ກ້າວໜ້າ, ​ເປັນ​ມິດ​ກັບ​ສະພາບ​ແວດ​ລ້ອມ​ໃນ​ການ​ປະຕິວັດ​ອຸດສາຫະກຳ 4.0 ດ້ວຍ​ເຈົ້າພາບ​ຫຼັກ​ຄື​ນັກທຸລະກິດ​ໜຸ່ມທີ່​ມີ​ຄວາມ​ຕັ້ງ​ໃຈ​ສ້າງສັນ, ບໍ່​ຢ້ານ​ກົວອຸປະສັກ ​ເພື່ອ​ກ້າວ​ຂຶ້ນ​ຢ່າງ​ແຂງ​ແຮງ.

​ໃນ​ການ​ເຄື່ອນ​ໄຫວ​ທະວິ​ພາຄີ, ນາຍົກລັດຖະມົນຕີ ຫງວຽນ​ຊວັນ​ຝຸກ ​ໄດ້​ພົບ​ປະ​ກັບ​ນາຍົກລັດຖະມົນຕີ ​ເນ​ປານ, ​ເຈົ້າ​ຊີວິດ ແບນ​ຊິກ, ພະ​ລາ​ຊີ​ນີ​ ໂຮ​ນລັງ, ນາຍົກລັດຖະມົນຕີ​ ເຊັກ, ປະທານາທິບໍດີ ສະ​ວິດ, ຮອງ​ນາຍົກລັດຖະມົນຕີ ຣູມາ​ນີ, ຫົວໜ້າ​ເຂດ​ບໍລິຫານ​ພິ​ເສດ ຮົ່ງກົງ, ຜູ້ອຳ​ນວນ​ການ​ໃຫຍ່​ຂອງ WTO, ຮອງປະທານ​ຄະນະ​ກຳມາ​ທິການ​ ເອີຣົບ, ​ເລຂາທິການ OECD. ​ໃນ​ການ​ພົບ​ປະ​ເຫຼົ່າ​ນັ້ນ, ນາຍົກລັດຖະມົນຕີ ຫງວຽນ​ຊວັນ​ຝຸກ ​ໄດ້​ແລກປ່ຽນ​ຫຼາຍ​ມາດ​ຕະການ, ​ເຫັນ​ດີ​ຈະ​ເພີ່ມ​ທະວີ​ການ​ປະສານ​ສົມທົບ​ເພື່ອ​ຜັນ​ຂະຫຍາຍ​ຢ່າງ​ມີ​ປະສິດທິ​ຜົນ ບັນດາ​ກົນ​ໄກ​ຮ່ວມ​ມື​ທະວິ​ພາຄີທີ່​ມີ​ຜົນ​ປະ​ໂຫຍ​ດຮ່ວມ​ກັນ, ປະກອບສ່ວນ​ຊຸກຍູ້​ການ​ພັດທະນາ​ເສດຖະກິດ​-ສັງຄົມ​ຂອງ​ຫວຽດນາມ, ​ເພື່ອ​ຄວາມ​ຈະ​ເລີ​ນຮຸ່ງ​ເຮືອງ​ຂອງ​ພາກ​ພື້ນ ​ແລະ ຂອງ​ໂລກ.

​ໃນ​ຂອບ​ເຂດ​ກອງ​ປະຊຸມ, ນາຍົກລັດຖະມົນຕີ ຫງວຽນ​ຊວັນ​ຝຸກ ກໍ່​ໄດ້​ພົບ​ປະ, ສົນທະນາ​ກັບ​ຜູ້ນຳ​ຫຼັກ​ຂອງ​ບັນດາ​ກຸ່ມ​ເສດຖະກິດ​ຂ້າມ​ຊາດ, ບັນດາ​ບໍລິສັດ​ຊັ້ນ​ນຳ​ເຊັ່ນ Siemens, Qualcomn, Google, Total, Allianz, JBIC, GE, Prudential, Facebook, Sanofi,… ​ເພື່ອ​ແກ້​ໂດຍ​ກົງ​ຫຼາຍ​ບັນຫາ​ທີ່ນັກທຸລະກິດ​ສົນ​ໃຈ, ລວມທັງອຸປະສັກ​ໃນ​ການ​ພັດທະນາ​ທຸລະ​ກິດ​ການ​ນຳ​ໃຊ້​ເຕັກ​ໂນ​ໂລ​ຊີ​ສູງ​ໃນ​ໂລກ​ໄຊ​ເບີ.

ການ​ເຂົ້າ​ຮ່ວມ​ກອງ​ປະຊຸມ WEF ຂອງນາຍົກລັດຖະມົນຕີ ຫງວຽນ​ຊວັນ​ຝຸກ ​ໄດ້​ນຳ​ສະ​ເໜີ​ຂໍ້ຄວາມ​ທີ່​ເຂັ້ມ​ແຂງ​ກ່ຽວ​ກັບ​ແນວທາງ, ທິດ​ທາງ, ນະ​ໂຍບາຍ ​ແລະ​ຄວາມ​ຕັດສິນ​ໃຈ​ຂອງ​ຫວຽດນາມ ​ໃນ​ການ​ປ່ຽນ​ແປງ​ໃໝ່​ປະ​ເທດ​ຢ່າງຮອບດ້ານ ​ແລະ ​ເຊື່ອມ​ໂຍງ​ສາກົນ, ​ເພີ່ມ​ທະວີ​ການ​ພົວພັນ​ລະຫວ່າງ​ຫວຽດນາມ​ແລະ​ບັນດາ​ຄູ່​ຮ່ວມ​ມື, ກຸ່ມ​ເສດຖະກິດ​ຊັ້ນ​ນຳ​ຂອງ​ໂລກ, ປະກອບສ່ວນ​ປັບປຸງ​ສະພາບ​ແວ​ດລ້ອມສາກົນ​ທີ່​ອຳນວຍ​ໃຫ້​ແກ່​ການ​ພັດທະນາປະ​ເທດ, ​ໂດຍ​ສະ​ເພາະ​ແມ່ນ​ປະຕິບັດ​ເປົ້າ​ໝາຍ “ບຸກທະລຸ” ທາງ​ດ້ານ​ເສດຖະກິດ-ສັງຄົມ​ໃນ​ປີ 2019./.

ໂດຍ ຫງວຽນ​ດຶກ 

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ