ວັນອັງຄານ, 21/5/2019
ອາກຊັງຕີນ - ຫວຽດນາມ: ເພີ່ມທະວີການພົວພັນຄູ່ຮ່ວມມືຮອບດ້ານ
11/3/2019 14:12' ສົ່ງ ພິມ
ທ່ານ ຫງວຽນຝູຈ້ອງ ເລຂາທິການໃຫຍ່, ປະທານປະເທດຫວຽດນາມ ຕ້ອນຮັບທ່ານ ເມົາຣີຊີໂອ ມາກຣີ ປະທານາທິບໍດີແຫ່ງສາທາລະນະລັດອາກຊັງຕີນ. (ພາບ: TTXVN)

ໃນ​ຂອບ​ຂອງ​ການ​ຢ້ຽມຢາມ, ປະທານາທິບໍດີອາກຊັງ​ຕີນ  ເມົາຣີຊີ​ໂອ ມາກຣີ ​ໄດ້​ພົບ​ປະ​ເຈລະຈາ​ກັບ​ເລຂາ​ທີ​ການ​ໃຫຍ່, ປະທານ​ປະ​ເທດ ຫງວຽນ​ຝູຈ້ອງ; ພົບ​ປະ​ຫາ​ລື​ກັບ​​ນາຍົກລັດຖະມົນຕີ ຫງວຽນ​ຊວັນ​ຝຸກ, ປະທານ​ສະພາ​ແຫ່ງ​ຊາດ ຫງວຽນ​ທິກິມ​ເງິນ; ​ເຂົ້າ​ຮ່ວມ​ເວທີ​ປາ​ໄສ​ການ​ທຸລະ​ກິດ​ຫວຽດນາມ - ອາກຊັງ​ຕີນ. ປະທານາທິບໍດີ ​ມ.ມາກຣີ ​ໄດ້​ວາງ​ພວງມາລາ​ໄຫວ້​ອາ​ໄລ​ທີ່​ອະນຸສາວະລີ​ຫໍ​ສົບ​ປະທານ​ໂຮ່ຈີ​ມິນ; ວາງ​ພວງມາລາ​ທີ່​ອະນຸສາວະລີ​ບັນດາ​ວິລະ​ຊົນ​ຜູ້​​ສະຫຼະ​ເພື່ອ​ຊາດ.

​ໃນ​ທີ​ບັນດາ​ການ​ພົບ​ປະ​ເຈລະຈາ​ຫາລືນັ້ນ, ບັນດາ​ຜູ້ນຳ​ຂອງ​ຫວຽດນາມ​ໄດ້​​ອວຍພອນ​ຊົມ​ເຊີຍ​ບັນດາ​ຜົນສຳ​ເລັດ​ທີ່ອາກຊັງ​ຕີນບັນລຸ​ໄດ້​ໃນ​ເວລາ​ທີ່​ຜ່ານ​ມາ, ປັບປຸງ​ບົດບາດ​ທີ່​ຕັ້ງ​ຂອງ​ພື້ນຖານ​ເສດຖະກິດ​ທີ່​ໃຫຍ່​ທີ​ສາມ​ໃນ​ພາກ​ພື້ນລາ​ຕີນອາ​ເມ​ລີ​ກາ, ສະມາຊິກ​ຂອງ​ກຸ່ມ​ບັນດາ​ປະ​ເທດ​ເສດຖະກິດ​ພັດທະນາ​ແລະ​ປະ​ເທດ​ເສດຖະກິດ​ເກີດ​ໃໝ່​ໃນ​ໂລກ (ກຸ່ມ 20); ຢືນຢັນ​ຫວຽດນາມ​ຖື​ຢູ່​ສະ​ເໝີ​ວ່າ ອາກຊັງ​ຕີນ ​ເປັນ​ຄູ່​ຮ່ວມ​ມື​ທີ່​ສຳຄັນ​ອັນ​ດັບ​ໜຶ່ງ​ຂອງ​ຫວຽດນາມ​ຢູ່​ພາກ​ພື້ນລາ​ຕີນອາ​ເວ​ລິ​ກາ, ​ແລະຫວຽດນາມ​ຢາກ​ປັບປຸງ​ການ​ພົວພັນ​ຄູ່​ຮ່ວມ​ມືຮອບດ້ານ​ກັບອາກຊັງ​ຕີນ, ​ເປັນ​ຕົ້ນ​ແມ່ນ​ໃນ​ຂົງ​ເຂດ​ເສດຖະກິດ, ການ​ຄ້າ​ແລະ​ການ​ລົງທຶນ. ປະທານາທິບໍດີອາກຊັງ​ຕີນ ສະ​ແດງ​ຄວາມນິຍົມ​ນັບຖື​ແລະ​ຊົມ​ເຊີຍຕໍ່​ມູນ​ເຊື້ອ​ປະຫວັດ​ການ​ຕໍ່ສູ້​ອັນ​ພິລະ​ອາດ​ຫານ​ເພື່ອ​ເອກະລາດ, ອິດ​ສະລະ​ພາບ​ຂອງ​ຊາດ​ຫວຽດນາມ; ຕີ​ລາຄາ​ສູງ​ຜົນສຳ​ເລັດ​ແຫ່ງ​ການ​ປ່ຽນ​ແປງ​ໃໝ່​ຂອງ​ຫວຽດນາມ​ໃນ​ກວ່າ​ສາມ​ທົດ​ສະ​ວັດ​ທີ່​ຜ່ານ​ມາ; ຢືນຢັນ​ວ່າ ອາກຊັງ​ຕີນຕັດສິນ​ໃຈ​ສືບ​ຕໍ່​ເປີດ​ກວ້າງ ​ແລະ​ເພີ່ມ​ທະວີການ​ພົວພັນ​ມິດຕະພາບ​ແລະ​ການ​ຮ່ວມມື​ກັບ​ຫວຽດນາມ, ປະກອບ​ປະສິດທິ​ຜົນ​ເຂົ້າ​ໃນ​ພາລະກິດ​ການ​ພັດທະນາ​ຂອງ​ແຕ່ລະ​ປະ​ເທດ. ຕາມ​ນັ້ນ, ສອງ​ຝ່າຍ​ເຫັນ​ດີ​ເປັນ​ເອກະສັນ​ຈະ​ຮັກສາ​ການຕິດ​ຕໍ່​ລະດັບ​ສູງ​ແລະ​ການ​ແລກປ່ຽນ​ຄະນະ​ຜູ້​ແທນຂັ້ນ​ຕ່າງໆ ​ແຕ່​ລະດັບສູນ​ກາງ​ຈົນ​ເຖິງ​ທ້ອງ​ຖິ່ນ, ຍູ້​ແຮງ​ການ​ພົວພັນ​ລັດຖະສະພາ, ການ​ພົວພັນ​ລະຫວ່າງ​ພັກ ​ແລະ ການ​ທູດ​ປະຊາຊົນ.

​​ໂດຍ​ຕີ​ລາຄາ​ສູງ​ກົນ​ໄກ​ຄະນະ​ກຳມະການ​ລະຫວ່າງ​ລັດຖະບານ ຫວຽດນາມ - ອາກຊັງ​ຕີນ ​ແລະ​ກົນ​ໄກ​ປຶກສາ​ການ​ເມືອງ​ລະຫວ່າງ​ສອງ​ກະຊວງ​ການ​ຕ່າງປະ​ເທດ, ສອງ​ຝ່າຍ​ເປັນ​ເອກະສັນ​ຈະ​ສືບ​ຕໍ່​ເສີມ​ຂະຫຍາຍ​ປະສິດທິ​ຜົນ​ຂອງ​ບັນດາ​ກົນ​ໄກ​ດັ່ງກ່າວ, ພ້ອມ​ນັ້ນ​ກໍ່​ຊຸກຍູ້​ການ​ເຈລະ​ຈາ​ບັນດາ​ສັນຍາ, ຂໍ້​ຕົກລົງ​ໃນ​ບັນດາ​ຂົງ​ເຂດ​ທີ່​ມີ​ຄວາມ​ສົນ​ໃຈ​ຮ່ວມ​ກັນ, ສ້າງ​ຂອບ​​ກົດໝາຍ​ໄລຍະ​ຍາວ​ສຳລັບການພົວພັນ​ສອງ​ຝ່າຍ.

​ໂດຍ​ເນັ້ນ​ໜັກ​ເຖິງ​ຜົນສຳ​ເລັດ​ດ້ານ​ເສດຖະກິດ-ການ​ຄ້າ​ສອງ​ຝ່າຍ, ​ໃນ​ນັ້ນ​ມູນ​ຄ່າ​ການ​ຄ້າ​ບັນລຸ 2,9 ຕື້​ໂດ​ລາ​ສະຫະລັດ​ໃນ​ປີ 2018, ​ເພີ່ມຂຶ້ນ 2 ​ເທົ່າ​ຫຼັງ​ຈາກ 5 ປີ, ສອງ​ຝ່າຍ​ເປັນ​ເອກະສັນ​ຈະ​ສືບ​ຕໍ່​ເພີ່ມທະວີ​ແລະ​ເປີດ​ຄວາມ​ຫຼາກ​ຫຼາຍ ​ໃນ​ການ​ແລກປ່ຽນ​ເສດຖະກິດ, ການ​ຄ້າ ຕາມ​ທິດ​ດຸນ​ດ່ຽງ​ຜົນ​ປະ​ໂຫຍດຂອງ​ທັງ​ສອງ​ຝ່າຍ, ຍູ້​ແຮງ​ການ​ແລກປ່ຽນ​ບັນດາ​ຜະລິດ​ຕະພັນ​ທີ່​ມີ​ຄຸນຄ່າ​ເພີ່ນ​ຫຼາຍ, ກໍ່​ຄື​ເພີ່ມ​ທະວີ​ການ​ຮ່ວມ​ມື​ລະຫວ່າງ​ບັນດາ​ອົງການກັກ​ກັນ​ສັດ​ແລະ​ພືດ​ຂອງ​ສອງ​ປະ​ເທດ.

ສອງ​ຝ່າຍ​ເປັນ​ເອກະສັນ​ຈະ​ສືບ​ຕໍ່ສົ່ງ​ເສີມ, ຊຸກຍູ້​ການ​ສົນ​ທາ​ນາ​ແລະ​ການ​ຮ່ວມ​ມື​ລະຫວ່າງຊຸມ​ຊົນ​ທຸລະ​ກິດ​ຂອງ​ສອງ​ປະ​ເທດ ​ໂດຍ​ຜ່ານ​ບັນດາ​ເວທີ​ປາ​ໄສ​ການ​ທຸລະ​ກິດ ​ແລະ ການ​ເຄື່ອນ​ໄຫວ​ສົ່ງ​ເສີມ​ການ​ຄ້າ​ແລະ​ການ​ລົງທຶນ. ​ເນື່ອງ​ໃນ​ໂອກາດ​ນີ້, ສອງ​ຝ່າຍຊົມ​ເຊີຍຂໍ້ຕົກລົງ​ການເປີດ​ຕະຫຼາດສຳລັບ​ໝາກ​ໄມ້​ບາງ​ຢ່າງ​ຂອງ​ຫວຽດນາມ​ແລະອາກຊັງ​ຕີນ, ​ເຫັນ​ດີ​​ຈະສືບ​ຕໍ່​ປຶກສາ​ຫາລືກ່ຽວ​ກັບ​ການ​ເຂົ້າ​ເຖິງຕະຫຼາດ​ສຳລັບ​ບັນດາ​ຜະລິດ​ຕະພັນ​ທີ່​ມີ​ທ່າ​ແຮງ​ຂອງ​ແຕ່ລະ​ປະ​ເທດ.  

​ໂດຍ​ເຫັນ​ດີ​ວ່າ ສັນຍາ​ການ​ຄ້າ​ລະຫວ່າງ​ຫວຽດນາມ​ແລະ​ກຸ່​ມຕະຫຼາດ​ຮ່ວ​ມອາ​ເມ​ລິ​ກາ​ໃຕ້ (MERCOSUR) ຈະນຳ​ມາ​ຊຶ່ງ​ຜົນ​ກະທົບ​ເສດຖະກິດ​ທາງ​ບວກ, ສອງ​ຝ່າຍ​ເຫັນ​ດີ​ຈະ​ດຳ​ເນີນ​ການຄົ້ນຄວ້າ​ຄວາມ​ສາມາດ​ປະຕິບັດ​ກ່ຽວ​ກັບ​ການ​ເຈລະຈາ​ສັນຍາ​ນີ້.

​ເນັ້ນ​ການ​ມີ​ສ່ວນ​ຮ່ວມ​ໃນ​ທາງ​ບວກ​ຂອງ​ການ​ຮ່ວມ​ມື​ດ້ານ​ເຕັກນິກ ຊຶ່ງ​ເປັນ​ເໝືອນ​ເຄື່ອງມື​ເພື່ອ​ປັບປຸງການພົວພັນ​ສອງ​ຝ່າຍ, ທັງສອງ​ຝ່າຍ​ໄດ້​ຮັບ​ຮູ້​ການ​ປະກອບສ່ວນ​ຂອງ​ໂຄງ​ການ​ຮ່ວມ​ມືກັບ 15 ​ໂຄງການທີ່​ໄດ້​ຮັບ​ທຶນ​ຈາກ​ກອງ​ທຶນ​ຮ່ວມ​ມື​ສາກົນອາກຊັງ​ຕີນ (FOAR), ​ໂດຍສຸມ​ໃສ່​ການ​ກະສິກຳ​ອຸດສາຫະກຳ ​ແລະ ມະນຸດ​ວິທະຍາ​ນິຕິ​ວິທະຍາສາດ. ຝ່າຍ ອາກຊັງ​ຕີນ ​ເນັ້ນ​ວ່າ ຫວຽດນາມ​ແມ່ນ​ຄູ່​ຮ່ວມ​ມື​ທີ່​ມີ​ການ​ພົວພັນກວ້າງຂວາງ​ເລິກ​ເຊິ່ງທີ່​ສຸດ​ກັບປະ​ເທດ​ນີ້​ຢູ່​ພາກ​ພື້ນອາຊີ​ຕາ​ເວັນ​ອອກສຽງ​ໃຕ້ ​ໃນ​ຂົງ​ເຂດ​ການ​ຮ່ວມ​ມື​ດ້ານ​ເຕັກນິກ.

ອາກຊັງ​ຕີນ​ແລະຫວຽດນາມ ​ເນັ້ນ​ເຖິງ​ການ​ທີ່​ສອງ​ຝ່າຍ​ເພີ່ມ​ທະວີການ​ແລກປ່ຽນບົດຮຽນ, ຄວາມ​ຮູ້ ​ແລະ​ເຕັກ​ໂນ​ໂລ​ຊີ​ລະຫວ່າງອົງການ, ການຈັດ​ຕັ້ງ​ເຕັກນິກ ​ໂດຍ​ຜ່ານການ​ໂອນ​ຄວາມ​ຮູ້​ແລະ​ເຕັກ​ໂນ​ໂລ​ຊີ. ກ່ຽວ​ກັບ​ອຸດສາຫະກ, ກະສິກຳ, ການ​ແລກປ່ຽນ​ລະ​ຫວ່າງ​ສອງ​ຝ່າຍ​ໄດ້​ປະຕິບັດ​ໂດຍ​ກອງ​ປະ​ຊຸມ​ສຳ​ມະ​ນາ​ລະດັບ​ພາກ​ພື້ນ ກ່ຽວ​ກັບການ​ຮ່ວມ​ມື​ເຕັກນິກ, ​ໃນ​​ເດືອນ​ກໍລະກົດ 2018 ຢູ່​ນະຄອນ​ຮ່າ​ໂນ້ຍ, ຜ່ານ​ນັ້ນ ມີ​ຂໍ້​ຄິດ​ລິ​ເລີ່​ມ​ໃໝ່​ຫຼາຍ​ຢ່າງ​ທີ່ສອງ​ຝ່າຍມີ​ຄວາມ​ສົນ​ໃຈ​ຮ່ວມ​ກັນ.

​ເພື່ອ​ປັບປຸງ​ແລະ​ເປີດ​ກວ້າງການ​ພົວພັນ​ດ້ານວັດທະນະທຳ, ສອງ​ຝ່າຍ​ເຫັນ​ດີ​ຈະ​ຊຸກຍູ້​ໂຄງການ​ແລກປ່ຽນ​ວັດທະນະທຳ​ໄລຍະ​ປີ 2019 - 2023, ສ້າງ​ຂອບ​ເຂດ​ການ​ແລກປ່ຽນ​ທີ່​ກວ້າງຂວາງ​ກວ່າ​ເກົ່າ​ລະຫວ່າງ​ສອງ​ພື້ນຖານ​ວັດທະນະທຳ. ສອງ​ຝ່າຍ​ເຫັນ​ດີ​ຈະ​ສົ່ງ​ເສີມ​ການ​ຮ່ວມ​ມື​ໃນ​ຂົງ​ເຂດ​ກິລາ ​ແລະ ​ເພີ່ມ​ທະວີ​ການ​ແລກປ່ຽນ​ຂໍ້​ມູນ​ຂ່າວ​ສາມ ​ແລະ ຮ່ວມ​ມື​ໃນກິດຈະກຳ​ກິລາ​ສາກົນ.

ສອງ​ຝ່າຍ​ເຫັນ​ດີ​ຈະ​ເພີ່ມ​ທະວີ​ການ​ປະສານ​ງານ, ຮ່ວມ​ມື ​ແລະ​ ສະໜັບສະໜູນ​ຊຶ່ງ​ກັນ​ແລະ​ກັນ​ໃນ​ບັນດາອົງການ​ຈັດ​ຕັ້ງ​ສາກົນ​ແລະ​ເວທີ​ປາ​ໄສ​ພະຫຸ​ພາຄີ, ​ໂດຍ​ສະ​ເພາະ​ແມ່ນ​ສະຫະ​ປະຊາ​ຊາດ, ອົງການ​ການ​ຄ້າ​ໂລກ, ​ເວທີ​ປາ​ໄສ​ການ​ຮ່ວມ​ມື​ອາຊີ​ຕາ​ເວັນ​ອອກ - ລາຕີ​ນອາ​ເມ​ລິ​ກາ. ສອງ​ຝ່າຍຢືນຢັນ​ຄຳ​ໝັ້ນ​ສັນຍາ​ກັບ​ຂະ​ບວນການ​ເຈລະຈາ​ ໃນ​ຂອບ​ເຂດກອງ​ປະຊຸມ​ຂັ້ນ​ສູງ​ຄັ້ງ​ທີ​ສອງ​ຂອງ​ສະຫະ​ປະຊາ​ຊາດ ກ່ຽວ​ກັບການ​ຮ່ວມ​ມື​ໃຕ້-​ໃຕ້, ຊຶ່ງ​ຈະ​ໄດ້​ຈັດ​ຂຶ້ນ​ທີ່​ນະຄອນ ບູ​ເອນົດ ອາຍ​ແຣດ ​ໃນ​ລະຫວ່າງວັນ​ທີ 20-22 ມີນາ 2019. ສອງ​ຝ່າຍ​ເຫັນ​ດີ​ຈະ​ພະຍາຍາມ​ຮ່ວມ​ມື​ ເພື່ອ​ໃຫ້​ເອກະສານ​ສະບັບ​ສຸດ​ທ້າຍ​ຂອງ​ກອງ​ປະຊຸມ ສະ​ແດງອອກເຖິງ​ການ​ປະກອບສ່ວນ​ຂອງບັນດາ​ປະ​ເທດ​ກຳ​ລັງ​ພັດທະນາ ​ເຂົ້າ​ໃນ​ເປົ້າ​ໝາຍການ​ພັດທະນາ​ແບບ​ຍືນ​ຍົງ, ພ້ອມ​ກັນ​ນັ້ນ ​ເພື່ອ​ໃຫ້​ຂໍ້​ຄິດ​ລິ​ເລີ່​ມກ່ຽວ​ກັບ​ການ​ຮ່ວມ​ມື​ສາມ​ຝ່າຍ ຖືກ​ປະ​ເມີນ​ວ່າ​ເປັນ​ກົນ​ໄກທີ່​ມີ​ປະສິດທິພາບ​​ໃນ​ການ​ເອົາ​ຊະນະຄວາມ​ທ້າ​ທາຍ​ໃນ​ການ​ພັດທະນາ​ທີ່​ຍັງ​ມີ​ຢູ່​ໃນ​ແຕ່ລະ​ປະ​ເທດ.

​ເນັ້ນ​ຄວາມ​ສຳຄັນ​ຂອງ​ການ​ຮ່ວມ​ມື ​ແລະ ​ແລກປ່ຽນ​ຂໍ້​ມູນ​ຂ່າວສານ ​ເພື່ອ​ຈຸດປະສົງ​ໃນ​ການ​ຕໍ່ສູ້ປ້ອງ​ກັນ​ແລະ​ຕ້ານ ອາ​ຊະ​ຍາ​ກຳທີ່​ມີ​ການຈັດ​ຕັ້ງ​ຂ້າມ​ຊາດ, ການ​ກໍ່​ການ​ຮ້າຍ, ການ​ຄ້າຂາຍ​ຢາ​ເສບ​ຕິດ, ການ​ຟອກ​ເງິນ ​ແລະ ການ​ຄ້າ​ມະນຸດ; ພ້ອມກັນນັ້ນ, ສອງ​ຝ່າ​ນ​ໄດ້​ເນັ້ນ​ເຖິງ​ການ​ເຂົ້າ​ຮ່ວມ​ການ​ແກ້​ໄຂບັນດາ​ບັນຫານ​ຄວາມ​ປອດ​ໄພ ​ແລະ ລະບຽບ​ຄວາມ​ສະຫງົບ​ລະດັບ​ໂລກ ​ໂດຍ​ຜ່າ​ນບັນດາ​ອົງການ​ທີ່​ກ່ຽວຂ້ອງ​ຂອງ​ສອງ​ປະ​ເທດ, ​ແນ​ໃສ່​ສືບ​ຕໍ່​ຍູ້​ແຮງ​ການ​ເຈລະຈາຂໍ້​ຕົກລົງການ​ຮ່ວມ​ມື​ກ່ຽວ​ກັບການ​ປ້ອງ​ກັນ​ແລະ​ຕ້ານ​ອາ​ຊະ​ຍາ​ກຳ​ທີ່​ມີ​ການຈັດ​ຕັ້ງ​ຂ້າມ​ຊາດ ​ແລະ ຂໍ້​ຕົກລົງ​ການ​ຮ່ວມ​ມື​ກ່ຽວ​ກັບ​ການ​ປ້ອງ​ກັນ, ຕ້ານ ​ແລະ​ ສືບສວນອາ​ຊະ​ຍາ​ກຳ​ຄ້າຂາຍ​ມະນຸດ, ຊ່ວຍ​ເຫຼືອ​ແລະ​ປົກ​ປ້ອງຜູ້​ຖືກ​ເຄາະ​ຮ້າຍ​ລະຫວ່າງ​ສອງ​ລັດຖະບານ​ໃນ​ປີ 2019.

​​ໃນ​ການແລກປ່ຽນ​ກ່ຽວ​ກັບ​ສະ​ພາບ​ການ​ສາກົນ​ແລະພາກ​ພື້ນທີ່​ມີ​ຄວາມ​ສົນ​ໃຈ​ຮ່ວມ​ກັນ, ສອງ​ຝ່າຍ​ເຫັນ​ດີ​ໃຫ້​ທັດສະນະ​ວ່າ ບັນດາ​ການ​ພິພາດ​ກ່ຽວ​ກັບ​ອະທິປະ​ໄຕ​ແລະ​ເຂດ​ແດນ​ຕ້ອງ​ໄດ້​ແກ້​ໄຂ​ດ້ວຍ​ສັນຕິ​ວິທີ, ບົນ​ພື້ນຖານ​​ເຄົາລົບ​ກົດໝາຍ​ສາກົນ.

​ໃນ​ການ​ຢ້ຽມຢາມ, ຜູ້ນຳ​ກະຊວງ, ຂະ​ແໜງ​ການ​ຂອງສອງ​ຝ່າຍ​ໄດ້​ລົງ​ນາມ​ໃນ​ໂຄງການ​ດຳ​ເນີນ​ງານ​ກ່ຽວ​ກັບການ​ຮ່ວມ​ມື​ດ້ານ​ເຕັກນິກ​ໃນ​ການ​ກຳນົດ​ຕົວ​ຕົນ​ຂອງ​ຜູ້​ເສຍ​ສະຫຼະ ລະຫວ່າງ​ກະຊວງ​ແຮງ​ງານ, ນັກຮົບ​ຜູ້​ຖືກ​ບາດ​ເຈັບ ​ແລະ​ ສັງຄົມ​ຫວຽດນາມ ກັບ ກະຊວງ​ການ​ຕ່າງປະ​ເທດ​ແລະ​ສາສະໜາອາກຊັງ​ຕີນ; ​ໂຄງການ​ແລກປ່ຽນ​ວັດທະນະທຳ​ໄລຍະ 2019 - 2023 ລະຫວ່າງ​ກະຊວງ​ວັດທະນະທຳ-ກິລາ ​ແລະ​ທ່ອງ​ທ່ຽວ​ຫວຽດນາມ ​ກັບ ກະຊວງ​ສຶກສາ, ວັດທະນະທຳ, ວິທະຍາສາດ​ແລະ​ເຕັກ​ໂນ​ໂລ​ຊີອາກຊັງ​ຕີນ; ຂໍ້​ຕົກລົງ​ການ​ຮ່ວມ​ມື​ລະຫວ່າງ​ສະຖານີ​ວິທະຍຸ​ກະຈາຍສຽງ​ຫວຽດນາມ ​ກັບ ລະບົບຂໍ້​ມູນ​ຂ່າວສານ​ແລະ​ສື່​ມວນຊົນ​ແຫ່ງສະຫະພັນອາກຊັງ​ຕີນ./.

​ໂດຍ ​ເຟືອງ​ຈ່າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ