ວັນຈັນ, 15/10/2018
ການສຶກສາຫວຽດນາມ ໃນສະພາບການປະຕິວັດອຸດສາຫະກຳຄັ້ງທີສີ່
25/8/2018 8:19' ສົ່ງ ພິມ
ພາບປະກອບ. (ພາບ: TTXVN)

ສະ​ພາບ​ການປ​ະ​ຕິ​ວັດ​ອຸ​ດ​ສາ​ຫະ​ກຳ​ຄັ້ງ​ທີ​ສີ່

ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່​ໄດ້​ແຜ່​ລາມ​ໃນ​ຂອບ​ເຂດ​ທົ່ວ​ໂລກ​ຄື​ປະ​ຈຸ​ບັນ​ນີ້​ ແມ່ນ​ຍ້ອນຄວາມ​ໄວ​ໃນ​ການ​ພັດ​ທະ​ນາແລະການ​ກະ​ທົບ​ບຸກ​ທະ​ລຸ​ຂອງ​ເຕັກ​ໂນ​ໂລ​ຊີ​​ ເຊິ່ງໄດ້​ສົ່ງ​ຜົນ​ສ​ະ​ທ້ອນ​ຢ່າງ​ແຂງ​ແຮງທີ່​ບໍ່​ເຄີຍ​ມີ​ມາ​ກ່ອນ. ນະ​ວັດຕະ​ກຳ ຂໍ້​ຄິດປະດິດ ແລະຄວາມ​ກ້​າວ​ໜ້າ​ທາງ​ວິ​ທະ​ຍາສາດ​ມີ​ຢູ່​ໃນ​ທຸກ​ຂົງ​ເຂດ, ​ເຊັ່ນ ປັນຍາ​ປະດິດ, ຫຸ່ນ​ຍົນ, ອິນ​ເຕີ​ເນັດ​ສັບພະ​ສິ່ງ (IoT), ລົດ​ແລ່ນ​ດ້ວຍ​ຕົນ​ເອງ, ​ເຕັກ​ໂນ​ໂລ​ຊີ​ຊີ​ວະ​ພາບ, ​ເຕັກ​ໂນ​ໂລ​ຊີ​ນາ​ໂນ, ​ເຕັກ​ໂນ​ໂລ​ຊີ​ການ​ພິມ 3D, ວິທະຍາສາດ​ອຸປະກອນ, ຄອມ​ພິວ​ເຕີຄວານ​ຕັນ (quantum computer) ... ທີ່​ໄດ້ສົ່ງ​ຜົນ​ກະ​ທົນ​ເຖິງ​ທຸກໆ​ຂະ​ແໜງ​ການ​ອຸດ​ສາ​ຫະ​ກຳ ​​ດ້ວຍ​ຄວາມ​ໄວ​ເຖິງ​ລະ​ດັບ​ທີ່​ເຂົາ​ເຈົ້າ​ເວົ້າ​ວ່າ ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່​ພວມພັດ​ທະ​ນາ​ດ້ວຍ​ຄວາມ​ໄວຕາມຕຳລາ​ເລກ​ຄູນ(1).

ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່​ມີ​ບົດ​ບາດສຳ​ຄັນ​ໃນ​ການ​ສ້າງ​ຜະ​ລິດ​ຕະ​ພັນແລະ​ບໍ​ລິ​ການ ​ເຊິ່ງອະ​ນຸຍາດ​ໃຫ້​ພວກ​ເຮົາ​ມີ​ຊີ​ວິດ​ທີ່​ດີ​ງາມກວ່າ​ອີກ. ກົງ​ກັນ​ຂ້າມ, ການ​ປະ​ຕິ​ວັດ​ນີ້ກໍ່​ອາດ​ຈະ​​ພາ​ໃຫ້​ເກີດຄວາມບໍ່​ສະ​ເໝີ​ພາບ​​, ຊ້ຳ​ຍັງ​ກໍ່​ໃຫ້​ເກີດ​ຄວາມ​ບໍ່​ສະ​ເໝີ​ພາບ​ທີ່​ຮ້າຍ​ແຮງ ​ເມື່ອ​ເຕັກ​ໂນ​ໂລ​ຊີ​ໃໝ່​​​ປ່ຽນແທນ​​ໃຫ້ວຽກ​ງານ​ທີ່​ນຳ​ໃຊ້​ແຮງ​ງານເປັນ​ຈຳ​ນວນຫຼາຍ. ນີ້​ຖືກ​ຖື​ວ່າ​ເປັນ​ສິ່ງ​ທ້າ​ທາຍທີ່ໃຫຍ່ກວ່າ​ໝູ່​ໂດຍ​ການ​ປະ​ຕິ​ວັດ​ນີ້​ນຳ​ມາ​ໃຫ້. ຄຽງ​ຄູ່​ກັນ​ນັ້ນ, ຍັງມີ​ສິ່ງ​ທ້າ​ທາຍ​ອີກ​ຄື ເຮັດ​ແນວ​ໃດ​ເພື່ອ​ສ້າງວຽກ​ງານ​ທີ່​ມີ​​ຄວາ​ມ​ຮຽກ​ຮ້ອງ​ດ້ານ​​ທັກ​ສ​ະ​ສູງກວ່າໃຫ້​ມະ​ນຸດ​​ໃນເມື່ອ​ເຕັກ​ໂນ​ໂລ​ຊີອັດ​ໂນ​ມັດ​ໄດ້ແລະພວມ​ປ່ຽນ​ແທນ​​​ໃຫ້ແຮງ​ງານ​ໃນຫຼາຍ​ວຽກ​ງານ​ປະ​ຈຳ​ວັນ(2).

ດັ່ງນັ້ນ, ວະ​ລີ “ການປະ​ຕິ​ວັດ​ອຸດ​ສາ​ຫະ​ກ​ກຳ” ​ໄດ້​ໝາຍ​ເຖິງ​ການ​ປ່ຽນ​ແປງ​ທີ່​ຍິ່ງ​ໃຫຍ່, ບໍ່​ພຽງແຕ່​ປ່ຽນ​ແປງ​ເສດ​ຖະ​ກິດ​ເທົ່າ​ນັ້​ນ ຫາກ​ຍັງ​ປ່ຽນ​ແປງ​ທັງ​ວັດ​ທະ​ນະ​ທຳ, ສັງ​ຄົມ​ຢ່າງ​ສົມ​ບຸນ. ຫວຽດ​ນາມກຳ​ລັງ​ຫັນ​ປ່ຽນ​ຢ່າງ​ໄວ​ວາ ຈາກ​ໂຄງ​ປະ​ກອບ “​ປະຊາກອນ​ຄຳ” ມາສູ່​ໄລ​ຍະ​​ປະຊາກອນ​ສູງ​ອາຍຸ. ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່​ຕ້ອງ​​​ໄດ້ຮັບ​ຮູ້​ວ່າ​ເປັນ​​ເໝືອນໂອ​ກາດ​ເພື່ອ​ໃຫ້​ພວກ​ເຮົາ​ເພີ່ມ​ສະມັດ​ຖະພາບການ​ຜະລິດ​ຂອງ​ງານອີງ​ໃສ່​ການ​ໝູນ​ໃຊ້​ວິ​ທະ​ຍາ​ສາດ​ເຕັກ​ນິ​ກ ​ແລະ​ສວຍໃຊ້ຢ່າງ​ມີ​ປະ​ສິດ​ທິ​ຜົນ​ໂຄງ​ປະ​ກອບ “ປະຊາກອນ​ຄຳ” ໃນ​ປະ​ຈຸ​ບັນ. ແນ່ນອນ​ວ່າ, ການ​ສຶກ​ສາແລະການຝຶກ​ອົບ​ຮົມ​ຈະ​ມີ​ບົດ​ບາດ​ສຳ​ຄັນ​​ໃນ​ການ​ແກ້​ໄຂ​ບັນ​ຫາ​ໃຫຍ່ນີ້.

ຜົນ​ກະ​ທົບ​ຂອງ​ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່​ຕໍ່​ການ​ສຶກ​ສາ

ໜຶ່ງ​ໃນ​ບັນ​ດາ​ຄວາມ​ຮຽກ​ຮ້ອງຕ້ອງ​ການ​ເພື່ອ​ກະ​ກຽມ​ໃຫ້​ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່ນັ້ນ ​ແມ່​ນ​ປົວ​ແປງ​ຊັບພະຍາກອນ​ມະ​ນຸ​ດ​ເພື່ອ​ອາດ​ສາ​ມາດ​ຕອບ​ສະ​ໜອງ​ໄດ້​ຄວາ​ມ​ຮຽກ​ຮ້ອງ​ຕ່າງໆ​ກ່ຽວ​ກັບ​ຄວາມ​ຮູ້ ​ແລ​ະທັກ​ສະ​ທີ່​ປ່ຽນ​ແປງ​ຢ່າງ​ຕໍ່​ເນື່​ອງ ​ໃນ​ສິ່ງ​ແວດ​ລ້ອມ​ແຫ່ງການ​ອອກແຮງ​ງານ​ໃໝ່. ດັ່ງ​ນັ້ນ, ​​ພາ​ລະ​ກຳ​ອັນ​ຍິ່ງ​ໃຫຍ່​ຂອງການ​ສຶກ​ສາແລະຝຶກ​ອົບຮົມແມ່ນ​​ກະ​ກຽມ​ຖັນ​ແຖວ​ບຸກ​ຄະ​ລາ​ກອນ ​ເພື່ອ​ຕອບ​ສະ​ໜອງ​ຄວາມ​ຮຽກ​ຮ້ອງ​ຕ້ອງ​ການ​ແຫ່ງ​ການ​ພັດ​ທະ​ນາ​ຂອງ​ປະ​ເທດ. ບັນ​ຫາ​ທີ່ຫຼາຍ​ປະ​ເທດ​ຮັບ​ຮູ້​​ໄດ້ແລະວ​າງ​ອອກມາ​ແມ່ນ ​ຫັນປ່ຽນ​ຈາກການ​ສຶກ​ສາ​ທີ່​ເນັ້ນ​ໄປ​ທາງ​ດ້ານ​ປະ​ກອບ​ຄວາມ​ຮູ້​ແລະທັກ​ສະ​ໃຫ້​ຜູ້​ຮຽນ​ ມາ​ເປັນການ​ສຶກ​ສາທີ່​ຊ່ວຍ​ພັດ​ທະ​ນາຄວາມ​ສາ​ມາດ, ຊຸກ​ຍູ້​ການ​ປ່ຽນ​ແປງ​ໃໝ່ແລະຄວາມ​ປະ​ດິດ​ສ້າງ​ຂອງ​ຜູ້​ຮຽນ, ຕອບ​ສະ​ໜອງຄວາມ​ຮຽກ​ຮ້ອງ​ທີ່​ວາງ​ອອກ​ມາໃຫ້ພົນ​ລະ​ເມືອງ​​ໃນສະ​ໄໝ​ການປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່(3).

ດ້ວຍ​ກະ​ແສ​ຂອງ​ຮູບ​ແບບ​ການຮຽນຮູ້​ໃໝ່​ ພ້ອມ​ກັບ​ການ​ພັດ​ທະ​ນາ​ຂອງວິ​ທະ​ຍາ​ສາດ​ເຕັກ​ໂນ​ໂລ​ຊີ, ​ແນ່ນອນ​ວ່າ ​ວິ​ທີ​ການ​ສຶກ​ສາ​​ແບບ​ດັ້ງ​ເດີມ​ຈະ​ປະ​ເຊີນ​ກັບ​ຄວາມ​ທ້າ​ທາຍ​ຫຼາຍ​ຢ່າງ​.

ໜຶ່ງ​ໃນ​ບັນ​ດາ​ຈຸດ​ເດັ່ນຄື ​ຄວາມຜັນ​ແຍກ​ໃນ​ແຕ່​ລະ​ເປົ້າ​ໝາຍ​ຜູ້​ຮຽນ. ​ນັກ​ຮຽນ​ແຕ່ລະຄົນ​ມີ​ຄວາມ​ຕ້ອງ​ການແລະຄວາມ​ສາ​ມາດ​ໃນ​ການ​ຮ່ຳ​ຮຽນ​ທີ່​ແຕກ​ຕ່າງ​ກັນ. ​ຄວາມ​ກ້າວ​ໜ້າ​ທາງ​ດ້ານ​ເຕັກ​ໂນ​ໂລ​ຊີ​ອະ​ນຸຍາ​ດ​ໃຫ້ນັກການ​ສຶກ​ສາສາມາດ​ອອກ​ແບບ​ລຳ​ດັບ​ການ​​ຮ່ຳ​ຮຽນ​ຕ່າງ​ຫາກ​ທີ່​ເໝາະ​ສົມ​ກັບ​ແຕ່​ລະ​ກໍ​ລະ​ນີ​ທີ່​ລະ​ອຽດ. ບັນ​ດາ​ຊອບແວ​ການ​ສຶກ​ສາ​ທີ່ໄດ້​ນຳ​ໃຊ້​​ເຂົ້າ​ໃນ​ການ​ສິດສອນ​ນັ້ນ ​ມີ​ຄວາມ​ສາ​ມາດ​ເໝາະ​ສົມ​ກັບ​ຄວາມ​ສາ​ມາດ​ຂອງ​ນັກ​ຮຽນ​ແຕ່ລະຄົນ ແລະ​ອະ​ນຸ​ຍາດ​ໃຫ້​ນັກ​ຮຽນ​ຮຽນຮູ້​ດ້ວຍ​ຄວາມ​ໄວ​ທີ່​ເໝາະ​ສົມ​ກັບ​ຄວາມ​ຕ້ອງ​ການ​ຂອງ​ຕົນ​ເອງ. ຢູ່ຫຼາຍ​ປະ​ເທດ, ບັນ​ດາ​ຊອບ​ແວການ​ສຶກສາ​ທີ່​ເໝາະ​ສົມ​ນີ້​ໄດ້ປ່ຽນ​ແທນ​ຢ່າງ​ໄວ​ວາ​ໃຫ້​ບາງ​ສ່ວນ ຫຼື​ບົດບາດ​ທັງ​ໝົດຂອງ​ປື້ມ​ຮຽນ​ໃນ​ຫ້ອງ​ຮຽນ.

ຄຽງ​ຄູ່​ກັນ​ນັ້ນ, ກາ​ນ​ເຂົ້າ​ເຖິງ​ຂໍ້​ມູນ​ຂ່າວ​ສານ​ຢ່າງ​ງ່າຍ​ດາຍກວ່າ​ເວ​ລາ​ໃດໝົດ ​ໄດ້ພາ​ໄປ​ເຖິງຄຳ​ຖາມ​ໜຶ່ງ​ເຊິ່ງ​ບັນ​ດາ​ນັກ​ສຶກ​ສາ​ຕ້ອງ​ໃຫ້​ຄຳ​ຕອບ​ຄື​ ກຳ​ນົດ​ຄວາມ​ຮູ້​ຫຼັກ​ທີ່ຜູ້​ຮຽນ​ຈຳ​ເປັນຕ້ອງໄດ້​ຮັບ​ການຕິດ​ຕັ້ງ​ໃນ​ອະ​ນາ​ຄົດ. ໃນ​ຂະ​ນະ​ທີ່ບັນ​ດາ​ຮູບ​​ແບບການ​ສຶກ​ສາ​ໃນ​ອະ​ດິດ ລວມ​ສູມ​ໃສ່​​ການ​ສະ​ໜອງ​ໃຫ້​ຜູ້​ຮຽນ​ມີ​ຄວາມ​ຮູ້​ແລະທັກ​ສະ​ທີ່​ຈຳ​ເປັນ ​ເພື່ອ​ຊ່ວຍ​ໃຫ້ເຂົາ​ເຈົ້າ​ກາຍ​ເປັນຜູ້​ທີ່​ມີ​ສີ​ມື​ ວິ​ຊາສະ​ເພາະ​ລະ​ດັບ​ສູງ, ບັນ​ດາ​ນັກ​ສຶກ​ສາ​ໃນ​ປະ​ຈຸ​ບັນ​ໄດ້​ເອົາ​ໃຈ​ໃສ່​ຫຼາຍ​ກວ່າເຖິງ​ການ​ສອນ​ໃຫ້​ນັກຮຽນ​ມີ​ວິ​ທີ​ຮຽນ​ດ້ວຍ​ຕົນ​ເອງ. ການ​ສຶກ​ສາ​​ສອນ​ໃຫ້​ນັກ​ຮຽນ​ຮູ້​ວິທີ​ຈິນ​ຕະ​ນາ​ການ, ວິທີ​ປະ​ເມີນ​ສະຖານະ​ການ ​ແລະບັນ​ດາ​ບັນ​ຫາ​ທີ່​ສັບ​ສົນ​ໃນ​ຊີ​ວິດ, ຜ່ານນັ້​ນ​ສ້າງ​​ໃຫ້​ຜູ້​ຮຽນ​ມີ​ຄວາມ​ສາ​ມາດ​ໃນ​ການ​ແກ້​ໄຂ​ບັນ​ຫາ.

ການ​ພັດທະນາ​ຂອງເຕັກ​ໂນ​ໂລ​ຊີ​ໄດ້ສົ່ງ​ຜົນ​ສະ​ທ້ອນ​ຢ່າງ​ໃຫຍ່ຫຼວງ​ເຖິງ​ບົດ​ບາດ​ຂອງ​ຄູ​ອາ​ຈານ​ໃນ​ຫ້ອງ​ຮຽນ. ລະ​ບົບ​ຄຸ້ມ​ຄອງ​ໂຮງ​ຮຽນ​ດ້ວຍ​ການ​ຊ່ວຍ​ເຫຼືອ​ຂອງ​ເຕັກ​ໂນ​ໂລ​ຊີ​ອາດ​ຈະ​ສະ​ໜອງ​ລະ​ບົບ​ຂໍ້​ມູນ​ຂ່າວ​ສານ​ເພື່ອ​ຊ່ວຍ​ໃຫ້​ຄູ​ອາ​ຈານ​ຕິດ​ຕາມ​ຄວາມ​ກ້າວ​ໜ້າ​ຂອງ​ນັກ​ຮຽນ​ແຕ່​ລະ​ຄົນ, ຜ່ານນັ້ນ​ມີ​ການ​ກະທົບ​ຕອບ​ທັນ​ທີ​ກັບຄວາມ​ຫຍຸ້ງ​ຍາກ​ທີ່​ນັກ​ຮຽນ​​​ກຳ​ລັງປະ​ເຊີນ​ໜ້າ. ແ​​ຕ່​​ ​ເຖິງວ່າເຕັກ​ໂນ​ໂລ​ຊີ​ຈະ​ທັນ​ສະ​ໄໝແລະສຳ​ຄັນ​​ເຖິງ​ພຽງ​ໃດ​ກໍ່​ຕາມ ກໍ່ບໍ່​ສາມາດ​ປ່ຽນ​ແທນ​ໃຫ້​ບົດ​ບາດ​ຂອງ​ຄູ​ອາ​ຈານ​ໄດ້​ ຫຼືບໍ່​ສາມາດຫັນ​ຄູ​ອາ​ຈານ​ເປັນ​ຫຸ່ນ​ຍົນ​​ໄດ້. ດ້ວຍ​ເຫດນັ້ນ, ເຮັດ​ແນວ​ໃດ​ເພື່ອ​ສວຍ​ໃຊ້ແລະເປັນ​ເຈົ້າ​ຂອງ​ເຕັກ​ໂຂ​ໂລ​ຊີ, ເພື່ອ​​ໃຫ້​ເຄື່ອງມື​ນີ້​​ຊ່ວຍ​ເຫຼືອແລະສ້າງ​ໃຫ້​ມີຄວາມ​ເສ​ລີ​ພາບ, ຄວາມ​ປະ​ດິດ​ສ້າງ​ໃນ​ການ​ສຶກ​ສາ ນັ້ນ​ເປັນ​ສິ່ງ​ທ້າ​ທາຍ​ສຳລັບ​ຄູ​ອາ​ຈານ​ແຕ່​ລະ​ຄົນ ແລະສະ​ຖາ​ບັນການ​ສຶ​ກ​ສາ​ແຕ່ລະ​ແຫ່ງ.

​ການ​ປ່ຽນ​ແປ​ງຕ່າງໆ​ເທິງນີ້​ເປັນ​ການເຈາະຈິ້ມ​ກ່ຽວ​ກັບ​ວິ​ທີ​ທີ່ບັນ​ດາ​ຮູບ​ແບບ​ການ​ສຶກ​ສາອາດຈະ​ເຄື່ອນ​ໄຫວ​ໃນ​ເວ​ລາ​ຕໍ່​ໄປ: ຄອມ​ພິວ​ເຕີ​ເຄື່ອນ​ໄຫວ​ຄື​ກັບເຄື່ອງ​ມື​ທີ່​ຊ່ວຍ​ເຫຼືອ​ບຸກ​ຄົນ​ໃນ​ຫ້ອງ​ຮຽນ​ດ້ວຍຫຼາຍ​ລຳ​ດັບ​ການ​ດຳ​ເນີນ​ການ​ຮ່ຳ​ຮຽນທີ່​ອຸດົມສົມ​ບຸນ; ຄູ​ອາ​ຈານແລະພໍ່​ແມ່​ນັກ​ຮຽນ​ໄດ້​ຮັບ​ການປະ​ກອບ​ທີ່​ດີກວ່າ​ ເພື່ອ​ເຂົ້າ​ໃຈ​ການ​ຮ່ຳ​ຮຽນ​ຂອງ​ນັກ​ຮຽນ; ຫ້ອງ​ຮຽນ​ໄດ້​ແບ່ງ​ເປັນ​ກຸ່ມ​ນ້ອຍໆຫຼາຍ​ກຸ່ມ ລວມ​ມີ​ບັນ​ດາ​ນັກ​ຮຽນ​ທີ່​ມີ​ຄວາມ​ຮູ້, ມີ​ທັກ​ສະ​ທີ່​ເໝາະ​ສົມ​ເພື່ອ​ເຮັດ​ວຽກ​ຮ່ວມ​ກັນ.

ສິ່ງ​ທ້າ​ທາຍແລະໂອ​ກາດສຳລັບ​ການ​ສຶກ​ສາຂອງຫວຽດ​ນາມ

ຕໍ່​ໜ້າ​ທັດສະນີ​ຍະ​ພາບແຫ່ງ​ການ​ພັດ​ທະ​ນາ​ຂອງ​ການ​ສຶກໃນ​ສະ​ພາບ​ການປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່, ການ​ສຶກ​ສາ​​ຂອງຫວຽດ​ນາມ​ມີ​ຄວາມ​ສະ​ດວກ​ອັນ​ພື້ນ​ຖານຕ່າງໆ​ເພື່ອ​ຕ້ອນ​ຮັບ​ໂອ​ກາດ​ພັດ​ທະ​ນາ ​ເຊິ່ງ​ການ​ປະ​ຕິ​ວັດ​ອຸດ​ສາ​ຫະ​ກຳຄັ້ງນີ້​ນຳ​ມາ​ໃຫ້.

ພັກແລະລັດຫວຽດ​ນາມໄດ້​ຄ​າດ​ຄະ​ເນກ່ຽວ​ກັບ​ສິ່ງ​ທ້າ​ທາຍ​ໃນການ​ເຄື່ອນ​ໄຫວ​ສຶກສາ​ອົບຮົມ​ໃຫ້​ຄົນ​ຮຸ່ນ​ຫຼັງ. ​ວັນ​ທີ 4 ພະ​ຈິກ 2013, ກອງ​ປະ​ຊຸມ​ຄັ້ງ​ທີ 8 ຂອງຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ກອມ​ມູ​ນິດຫວຽດ​ນາມສະ​ໄໝທີ XI ຜ່ານ​ມະ​ຕິເລກ​ທີ  29-NQ/TW ກ່ຽວ​ກັບ​ການ​ປ່ຽນ​ແປງ​ໃໝ່ການ​ສຶກ​ສາແລະຝຶກອົບຮົມ ໂດຍ​ພື້ນ​ຖານຮອບ​ດ້ານ​ ເພື່ອ​ຕອບ​ສະ​ໜອງ​ຄວາມ​ຮຽ​ກ​ຮ້ອງ​​ຕ້ອງ​ການຂອງ​ການ​ຫັນ​ເປັນ​ອຸດ​ສາ​ຫະ​ກຳ, ທັນ​ສະ​ໄໝ​ ໃນ​ເງື່ອນ​ໄຂ​ເສ​ດຖະ​ກິດ​ຕະຫຼາດ​ກຳ​ນົດ​ທິດ​ສັງ​ຄົມ​ນິ​ຍົມ ແລະເຊື່ອມ​ໂຍງ​ສາ​ກົນ. ທັດ​ສະ​ນະ​ຊີ້​ນຳ​ກ່ຽວ​ກັບ​ການປ່ຽນ​ແປງ​ໃໝ່​ການ​ສຶກ​ສາ​ຂອງ​ມະ​ຕິ​ແມ່ນ: “ຫັນ​ຂະ​ບວນ​ວິ​ວັດ​ການ​ສຶກ​ສາ​ຈາກການ​ປະ​ກອບ​ຄວາມ​ຮູ້​ມາ​​ເປັນ​ການ​ພັດ​ທະ​ນາ​​ຄວາມ​ສາມ​າດແລະຄຸນ​ສົມ​ບັດ​ຂອງ​ຜູ້​ຮຽນຢ່າງຮອບ​ດ້ານ, ​ແຂງ​ແຮງ. ການ​ຮຽນ​ໄປ​ຄຽງ​ຄູ່​ກັບ​ການ​ປະ​ຕິ​ບັດ; ທິດ​ສ​ະ​ດີ​​ມີ​ການຕິດ​​ພັນກັບ​ພາກ​ຕົວ​ຈິງ; ການ​ສຶກ​ສາ​ທາງ​ໂຮງ​ຮຽນ​ປະ​ສົ​ມ​ກັບ​ການ​ສຶກ​ສາ​​ໃນ​ຄອບ​ຄົວ ແລະການ​ສຶກ​ສາ​ທາງ​ສັງ​ຄົມ”. ວັນ​ທີ 4 ພຶດ​ສະ​ພາ 2017, ນາ​ຍົກ​ລັດ​ຖະ​ມົນ​ຕີ​ໄດ້​ປະ​ກາດ​ໃຊ້​ຄຳ​ສັ່ງ​ເລກ​ທີ 16/CT-TTg ວ່າ​ດ້ວຍການ​ເພີ່ມ​ທະ​ວີ​ຄວາມ​ສາ​ມາດ​ເຂົ້າ​ເຖິງ​ການ​ປະ​ຕິ​ວັດ​ອຸ​ດ​ສາ​ຫະ​ກຳ​ຄັ້ງ​ທີສີ່ ດ້ວຍຫຼາຍ​ມາດ​ຕະ​ການ​ທີ່​ສຳ​ຄັນ. ໃນ​ນັ້ນ, ນາ​ຍົກ​ລັດ​ຖະ​ມົນ​ຕີ​ໄດ້​ຮຽກ​ຮ້ອງ​​ໃຫ້ປ່ຽນ​ແປງ​​ນະ​ໂຍ​ບາຍ, ເນື້ອ​ໃນ, ວິ​ທີ​ການ​​ສຶກ​ສາ​ຢ່າງ​ແຂງ​ແຮງ ເພື່ອແນ​ໃສ່​ສ້າງ​ແຫຼ່ງ​ບຸກ​ຄະ​ລາ​ກອນ​ທີ່​ມີ​ຄວາມ​ສາ​ມາດ​ຮັບ​ຮອງ​ເອົາ​ບັນ​ດາທ່າອຽນ​ເຕັກ​ໂນ​ໂລ​ຊີ​ຜະ​ລິດໃໝ່. ວັນ​ທີ 5 ພຶດ​ສະ​ພາ 2017, ກະ​ຊວງ​ສຶກ​ສາ​ທິ​ການແລະການກໍ່​ສ້າງ​ ໄດ້​ສົ່ງໜັງ​ສື​ທາງ​ການ​ເລກ​ທີ 1891/BGDĐT-GDĐH ​ເຖິງສະ​ຖາ​ບັນການ​ສຶກ​ສາ​ມະ​ຫາ​ວິ​ທະ​ຍາ​ໄລທຸກ​ແຫ່ງ ​ເພື່ອ​ກຳ​ນົດ​ທິດ​ຊີ້​ນຳ​ກ່ຽວ​ກັບ​ການກໍ່​ສ້າງ​ແຫຼ່ງ​​ບຸກ​ຄະ​ລາ​ກອນ​ທີ່​ມີ​ຄວາມ​ສາ​ມາດຄ່ອງ​ຕົວ​ກັບ​ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີ​ສີ່. ແຕ່​ປີ 2018, ນີ້​ຈະ​ເປັນ​ໜຶ່ງ​ໃນ​ບັນ​ດາ​ເນື້ອ​ໃນ​​ພື້ນ​ຖານ​ ເພື່ອ​ຕີ​ລາ​ຄາ, ກຳ​ນົດ​ທິດ​ການພັດ​ທະ​ນາ​​ໃຫ້​ທົ່ວ​ຂະ​ແໜງ​ການ.

ຄຽງ​ຄູ່​ກັນ​ນັ້​ນ, ​ຄວາມ​ສະ​ດວກ​ອັນ​ພື້ນ​ຖານ​ທີ່​ສຸດ​ເພື່ອ​​ໃຫ້ການ​ສຶກ​ສາ​ສວຍ​ໃຊ້​ໂອ​ກາດ​ພັດ​ທະ​ນາ​ຄື ​ສັງ​ຄົມຫວຽດ​ນາມຍາມ​ໃດ​ກໍ່​​ໃຫ້​ຄວາມ​ສຳຄັນ​​ແກ່​ການ​ຮຽນຮູ້. ພ​ວກ​ເຮົາ​ຍາມ​ໃດ​ກໍ່​​ໄດ້​ຮັກ​ບການຕີ​ລາ​ຄາ​ສູງ​ກ່ຽວ​ກັບ​ການ​ສ້າງ​ສິ່ງ​ແວດ​ລ້ອມ​ແຫ່ງ​ການ​ຮ່ຳ​ຮຽນທີ່​ຕັ້ງ​ໜ້າ, ຮັບ​ປະ​ກັນລະບຽບວິໄນ, ຄວາມ​ເປັນ​ລະ​ບຽບ​ຮຽບ​ຮ້ອຍ​ຂອງ​ໂຮງ​ຮຽນ ແລະຊ່ວຍ​ໃຫ້​ນັກ​ຮຽນ​ມີ​ທ່າ​ທີ​ຮ່ຳ​ຮຽນ​ດີ. ການ​ທີ່ພໍ່​ແມ່​ນັກ​ຮຽນ​ເຂົ້າ​ຮ່ວມ​ແລະສົ່ງ​ເສີມ​ການ​ຮ່ຳຮຽນ​ຂອງໄວ​ໜຸ່ມ​​ແມ່ນ​ເປັນ​ປັດ​ໃຈ​ທາງ​ບວກອັນ​ໜຶ່ງ​ໃນ​ການ​ສ້າງ​ຕັ້ງ​ສັງ​ຄົມ​ຮຽນຮູ້.

ຄວາມ​ສະ​ດວກ​ທີ່​ສາມ​ແມ່ນ​ ຖັນ​ແຖວ​ພະ​ນັກ​ງານ​ຄຸ້ມ​ຄອງການ​ສຶກສາ, ຄູອາ​ຈານ - ກຳ​ລັງ​ທີ່​ມີ​ບົດ​ບາດ​ຕົ້ນ​ຕໍ່​ໃນ​ພາ​ລະ​ກິດ​ປ່ຽນ​ແປງ​ໃໝ່​ການ​ສຶກ​ສາ - ຍາມ​ໃດ​ກໍ່​ໄດ້​ຮັບ​ຄວາມ​ເອົາ​ໃຈ​ໃສ່, ການລົງ​ທຶນ ແລະຊ່ວຍ​ເຫຼືອ​ເພື່ອ​ເພີ່ມ​ທະ​ວີ​ຄວາມ​ສາ​ມາດ. ບັນ​ດາ​ບັດ​ທັດ​ຖານ ​ແລະລະ​ບຽບຂໍ້​ບັງຄັບ​ກ່ຽວ​ກັບ​ອາ​ຊີບ​ຂອ​ງ​ພະ​ນັກ​ງານ​ຄຸ້ມ​ຄອງຂັ້ນ​ຕ່າງໆ​ແລະຄູ​ອາ​ຈານ​ທີ່​ກຳ​ລັງ​ໄດ້​ຮັບ​ການ​ກະ​ກຽມ​ປະ​ກາດ​ໃຊ້. ບັນ​ດາ​ບັນ​ທັດ​ຖານ​ແລະລະ​ບຽບຂໍ້​ບັງຄັບນັ້ນ​ ຈະ​ເປັນ​ເຄື່ອງ​ມື​ຊ່ວຍ​ເຫຼືອ​ພະ​ນັກ​ງານ​ຄຸ້ມ​ຄອງ​ແລະຄູ​ອາ​ຈານ​ໃນ​ການບຳ​ລຸງ​ສ້າງ ​ຍົກ​ສູງ​ຄວາມ​ສາ​ມາດ​ ເພື່ອ​ອາດ​ຈະ​ຕອບ​ສະ​ໜອງ​ໄດ້​ຄວາມ​ຮຽກ​ຮ້ອງ​ຕ້ອງ​ການ​ໃນ​ໄລ​ຍະ​ໃໝ່.

​ເຖິງວ່າ​ຍັງ​ມີ​ຄວາມ​ກັງວົນໃຈກ່ຽວກັບ​​ໂຄງການ​ຮ່ຳ​ຮຽນ​ຂອງ​ຫວຽ​ດ​ນາມທີ່​ບໍ່ຕິດກັບ​ພາກ​ຕົວ​ຈິງ, ​ຜົນ​ໄດ້​ຮັບ​ສູງ​ຈາກ​ການທົດ​ສອບ PISA, ​ໃນການ​ສອບ​ເສັ​ງວິ​ທະ​ຍາ​ສາດແລະເຕັກ​ນິກ​ສາ​ກົນ Intel ISEF, ​ການ​ສອບ​ເສງໂອ​ລິມ​ປິກລະດັບສາ​ກົນແລະພາກ​ພື້ນ​ ໄດ້​ປະ​ກອບ​ສ່ວນ​ຢືນ​ຢັນ​ວ່າ ​ລະບົບ​ການສຶກ​ສາ​ຂອງ​ພ​ວ​ກ​ເຮົາ​ເລີ່ມມີ​ການ​ເຄື່ອນ​ຍ້າຍ, ​ໃຫ້​ຄວາມ​ສຳຄັນ​ເຖິງ​ການ​ແນະນຳ​ໃຫ້ນັກ​ຮຽນ​ຫັນສູ່​ການ​ໝູນ​ໃຊ້​ຄວາມ​ຮູ້​ເຂົ້າ​ໃນ​ການ​ແກ້​ໄຂ​ບັນ​ດາ​ບັນ​ຫາ​ທີ່​ມີ​ລັກ​ສະ​ນະ​ຕົວ​ຈິງ, ແທນທີ່​ຈະ​ພຽງ​ແຕ່​​ຮຽນຮູ້​ຈື່ຈຳ​ເນື້ອ​ໃນຈາກ​ຕຳລາຮຽນ. ຜົ​ນ​ສຳ​ເລັດນີ້ກໍ່​ສະ​ແດງ​ໃຫ້​ເຫັນ​ເຖິງ​ຄວາມ​ສາ​ມາດ​ບົ່ມ​ຊ້ອນຂອງຫວຽດ​ນາມ ທາງດ້ານ​ແຫຼ່ງ​ບຸກ​ຄະ​ລ​າ​ກອນ​ໃນ​ບັນ​ດາ​ຂົງ​ເຂດ​ຄະ​ນິດ​ສາດແລະວິ​ທະ​ຍາ​ສາດ ​ຖ້າ​ຫາກມີ​ການ​ລົງ​ທຶນ​ຢ່າງ​ເໝາະ​ສົມ.

ນອກຈາກ​ນັ້​ນ, ​ໂຄງ​ການ​ສຶກ​ສາ​​ຂອງຫວຽດ​ນາມຍາມ​ໃດ​ກໍ່​​ເນັ້ນ​ໜັກ​ເຖິງ​​ການ​ຊ່ວຍ​ເຫຼືອ​ນັກ​ຮຽນ​​ໃຫ້ເຂົ້າ​ໃຈ​ຢ່າງ​ເລິກ​ເຊິ່ງ ກ່ຽວ​ກັບ​ຄວາມ​ສຳ​ນຶກ​ຫຼັກຕ່າງໆ ແລະຄວາມ​ສາ​ມາດ​ກຳ​ແໜ້ນ​ຄວາມ​ຮູ້. ໂຄງ​ການ​ການສຶກ​ສາ​ສາ​ມັນ​​ໃໝ່​ຈະ​ຖືກ​ນຳ​ໄປ​ປະຕິບັດ​ໃນ​ປີ 2019, ຫັນ​ປ່ຽນ​ຈາກ​ວິ​ທີ​ເຂົ້າ​ເຖິງ​ເນື້ອ​ໃນ​ມາ​ເປັນ​ການ​ພັດ​ທະ​ນາ​ຄວາມ​ສາ​ມາດແລະຄຸນ​ສົມ​ບັດ ຊຶ່ງ​ຈະ​ເປັນ​ປະ​ຖົມ​ປັດ​ໃຈ​ໃຫ້​ແກ່​ການ​ປ່ຽນ​ແປງ​ໃໝ່​ການ​ສຶກ​ສາສາ​ມັນ ຢ່າງ​ເປັນ​ພື້ນ​ຖານແລະຮອບ​ດ້ານ​.

ໃນ​ເວ​ລາ​ທີ່​ຜ່ານ​ມາ, ກະ​ຊວງ​ສຶກ​ສາ​ທິ​ການແລະການກໍ່​ສ້າງ ​ໄດ້​ຍູ້​ແຮງ​ແຜນ​ນະ​ໂຍ​ບາຍ​ເພື່ອ​ໃຫ້ໂຮງ​ຮຽນ​ເປັນ​ເຈົ້າ​ການ​ໃນ​ການ​ຜັນ​ຂະ​ຫຍາຍ​ໂຄງ​ການສິດ​ສອນ ແລ​ະກວດ​ກາປະ​ເມີນ​ຜົນ. ​ການ​ປ່ຽນ​ແປງໃໝ່​​ເຫຼົ່ານີ້​ໄດ້ນຳ​ມາ​ເຊິ່ງ​ຜົນ​ງານ​ທາງ​ບວກໃນການ​ຍົກ​ສູງ​ຄຸນ​ນະ​ພາບ​ຂອງ​ການ​ສຶກ​ສາຫວຽດ​ນາມ. ໃນ​ບົດ​ລາຍ​ງານທີ່​ຜ່ານ​ມາມໍ່​​ນີ້ຂອງທະ​ນາ​ຄາມ​ໂລກ ການຈະເລີນເຕີບໂຕ ທີ່ສະຫຼາດສະຫຼຽວ: ການຮຽນຮູ້ແລະການພັດທະນາທີ່ຍຸດຕິທຳ ຢູ່ອາຊີຕາເວັນອອກ - ປາຊີຟິກ(4), ຫວຽດ​ນາມ​ແລະ​ຈີນຖືກ​ຖື​ວ່າ​ເປັນ​ສອງ​ປະ​ເທດ​ທີ່​ນຳ​ໜ້າ​ໃນ​ການປ່ຽນ​ແປງ​ໃໝ່​ການ​ສຶກ​ສາ​, ມີ​ລະ​ບົບ​ການ​ສຶກ​ສາ​ທີ່ພັດ​ທະ​ນາຢ່າງ​ປະ​ທັບ​ໃຈ, ອາດຈະ​ກາຍ​ເປັນ​ບົດ​ຮຽນທີ່​ສຳ​ຄັນ​ສຳລັບ​ປະ​ເທດ​ອື່​ນໆ.

​ບາງທິດ​ທາງ​ສຳລັບ​ການ​ສຶກ​ສາຂອງຫວຽດ​ນາມ ໃນ​ສະ​ພາບ​ການ​ການ​ປະ​ຕິ​ວັດ​ອຸດ​ສາ​ຫະກຳ​ຄັ້ງທີສີ່

ໃນ​ກະ​ແສ​ຟອງ​ໃໝ່​ແຫ່ງ​ການ​​ຫັນ​ເປັນອຸດ​ສາ​ຫະ​ກຳ, ລະ​ບົບ​ການສຶກ​ສາຕ້ອ​ງ​ສຸມ​ໃສ່​​ການ​ພັດ​ທະ​ນາ​ຄຸນນະພາ​ບ ແລະຄວາມ​ສາ​ມາດ​ຂອງ​ຜູ້​ຮ​ຽນ ​ໂດຍ​ຜ່ານ​ການ​ກຳ​ນົດ​ທິດທາງ​ທີ່​ເໝາະ​ສົມ​ທີ່​ສຸດ​ສຳລັບ​​ບັນ​ດາກຸ່ມ​ນັກ​ຮຽນ, ນັກ​​ສຶກສາ​ທີ່​ແຕກ​ຕ່າງ​ກັນ ​ເພື່ອ​ຊ່ວຍ​ໃຫ້​ເຂົາ​ເຈົ້າ​ເສີມ​ຂະ​ຫຍາຍ​ໄດ້​ທ່າ​ແຮງ​ຂອງ​ແຕ່​ລະ​ບຸກ​ຄົນ. ບັນຫາ​ນີ້​ຄວນ​ຈະ​ຖືກ​ນຳ​ໃຊ້​​ໃນ​ທຸກ​ລະດັບ​ການ​ສຶກສາ, ລະ​ດັບ​ການຝຶກ​ອົບຮົມ​. ພິ​ເສດ, ສຳລັບ​ໂຮງ​ຮຽນ​ມະ​ຫາ​ວິ​ທະ​ຍາ​ໄລ, ຜົນ​ສຳ​ເລັດ​ຂອງ​ມະ​ຫາ​ວິ​ທະ​ຍາ​ໄລ​ແຫ່ງ​ໜຶ່ງບໍ່​ພຽງ​ແຕ່​ແມ່ນ​ອັດ​ຕາ​ສ່ວນ​ນັກ​​ຮຽນຮຽນ​ຈົບ, ​ຄວາມ​ສາ​ມາດ​ໃນ​ການ​ຫາ​ວຽກ​ຂອງ​ນັກຮຽນ ຫຼືຕຳ​ແໜ່​ງ​ໃນການ​ຈັດ​ອັນ​ດັບ​ສາ​ກົນ, ຫ​າກ​ຍັງແມ່ນ​ການ​ພັດ​ທະ​ນາ​​ໃນ​ໄລຍະ​ຍາວ​ແລະ​ຄວາມ​ຍືນ​ຍົງຂອງ​ນັກຮຽນ, ຄວາມ​ພ້ອມທີ່​ຈະ​ຮັບມື​ກັບ​ຄວາມ​ສ່ຽງ, ຄວາມ​ສາ​ມາດ​ປ່ຽນ​ແປງ​ໃໝ່ແລະຄວາມ​ປະ​ດິດ​ສ້າງ​ຂອງ​ນັກຮຽນອີກ​ດ້ວຍ.

ເພື່ອ​ປະ​ຕິ​ບັດ​ໄດ້​ຄື​ແນວ​ນັ້ນ, ພວກ​ເຮົາ​ຕ້ອງ​ຢືນ​ຢັນ​ຄວາມ​ສຳ​ຄັນ​ຂອງ​ລະ​ບົບ​ການສຶກ​ສາ​ທີ່ສະໜັບສະໜູນ​ການ​ຮຽນ​ຮູ້ຕະຫຼອດ​ຊີ​ວິດ. ລະ​ບົບ​ການສຶກ​ສາ​ທັງໝົດ​ຕ້ອງ​ເຫັນ​ໄດ້​​ເຖິງ​ຄວາມ​ຫຼາກ​ຫຼາຍ​ຂອງທ່າ​ແຮງ ແລະຄວາມ​ສາ​ມາດ​ຂອງ​ຊາວ​ໜຸ່ມ. ມີ​ແຕ່ຂະ​ບວນ​ວິ​ວັດ​ການ​ຮ່ຳ​ຮຽນ​ຕາມ​ຄວາມ​ເມົາ​ມົວໃໝ່​ຈຶ່ງ​ສາມາດກໍ່​ສ້າງ​ຄົນຮຸ່ນ​ໃໝ່​​ທີ່​ມີຫຼັກ​ໝັ້ນ ຄວາມ​ກ້າຫານ ຄວາມ​ສາ​ມາດ​ກຳ​ນົດ​ທິດ​ດ້ວຍ​ຕົນ​ເອງ ແລະຕັ້ງ​ໝັ້ນ​ໃນ​ການ​ປະ​ຕິ​ບັດ​ເປົ້າ​ໝາຍ.

ຕໍ່​ໄປ​ນີ້​ແມ່ນບາງ​ທິດທາງ​ການ​ສຶກ​ສາຂອງຫວຽດ​ນາມ ໃນ​ສະ​ພາບ​ການ​ປະ​ຕິ​ວັດ​ອຸດ​ສາ​ຫະ​ກຳ​ຄັ້ງ​ທີສີ່.

ທີ​ໜຶ່ງ, ​ເຊື່ອມ​ຕິດການ​ສອນແລະການ​ຮຽນ ​ກັບ​ພາກ​ຕົວ​ຈິງ

ການ​ສຶກ​ສາ​ຈຳ​ເປັນຕ້ອງມີ​ການ​ຈຳລອງແລະກະ​ກຽມໃຫ້​ຜູ້​ຮຽນ​ກ້າວ​ເຂົ້າ​ສູ່​ຊີ​ວິດ​​ຈິງຫຼາຍທີ່​ສຸດ​ເທົ່າ​ທີ່​ເປັນ​ໄປ​ໄດ້ ​ເມື່ອ​ເຕັກ​ໂນ​ໂລ​ຊີ​ໄດ້​ເຮັດ​ໃຫ້​ຄວາມ​ສາ​ມາດ​ເຂົ້າ​ເຖິງ​ຄວາມ​ຮູ້​ກາຍ​ເປັນ​ງ່າຍ​ດາຍ​ ເຮັດ​ໃຫ້​ຄວາມ​ຮູ້ບໍ່​ມີ​ຄວາມ​ໝາຍ “ຮັບ​ປະ​ກັນ​” ໃຫ້​ອະ​ນາ​ຄົດ​ຂອງ​ຜູ້​ຮຽນ​ຄື​ກ່ອນນີ້(5). ໜຶ່ງ​ໃນ​ບັນ​ດາ​ວິທີ​ເຂົ້າ​ເຖິງທີ່​ເໝາະ​ສົມ​ແມ່ນ​ເພີ່ມ​ທະ​ວີ​ການ​ສຶກ​ສາ​ດ້ານ​ວິ​ທະ​ຍາ​ສາດ, ເຕັກ​ໂຍນ​ໂລ​ຊີ, ເຕັກ​ນິກ ແລະ ຄະ​ນິດ​ສາດ (ສຶກ​ສາ STEM) ໃນ​ໂຮງ​ຮຽນ. ຕາມນັ້​ນ, ນັກ​ຮຽນ​ຈະ​ໄດ້​ປະ​ກອບ​ຄວາມ​ຮູ້​ທີ່​ຕິດ​ພັ​ນ​ກັບ​ການ​ໝູນ​ໃຊ້​ຂອງ​ມັນ​ໃນ​ພາກ​ຕົວ​ຈິງ; ໄດ້ຜ່ານ​ປະສົບ​ການຊອກ​ຫາ, ຄົ້ນພົບ​ເຕັກ​ໂນ​ໂລ​ຊີ​ ຕິດ​ກັບ​ຄວາມ​ຮູ້ທີ່​ຮຽນຮູ້​ໃນຫຼັກສູດ; ໄດ້​ຮັບ​ການ​ສະໜັບສະໜູນ​ໃຫ້ປະ​ດິດ​ສ້າງ​​ວິ​ທະ​ຍາ​ສາດເຕັກ​ນິກ​ ແນ່​ໃສ່​ປົວ​ແປງ​ການ​ພັດ​ທະ​ນາ​ເຕັກ​ໂນ​ໂລ​ຊີ​ໃໝ່. ນີ້​ແມ່ນວິທີ​ເຂົ້າ​ເຖິງ​ແບບ​ສະຫະ​ວິຊາ​ຊ່ວຍ​ໃຫ້​ຜູ້​ຮຽນມີ​ຄວາມ​ຮູ້​ແລະທັກ​ສະ ​ເພື່ອ​​ໃຫ້ຜູ້​ຮຽນ​ສາມາດນຳ​ໃຊ້​ໃນ​ການ​ແກ້​ໄຂ​ບັນ​ຫາຕ່າງໆ​ໃນ​ຊີ​ວິດ.

ກະ​ຊວງ​ສຶກ​ສາ​ທິ​ການແລະການກໍ່​ສ້າງ ໄດ້​ຈັດ​ຕັ້ງ​ທົດ​ລອງການ​ສຶກ​ສາ STEM ທີ່ໂຮງ​ຮຽນ​ມັດ​​ທະ​ຍົມສຶກສາ​ຕອນຕົ້​ນ ແລະມັດ​ທະ​ຍົມ​ສຶກສາ​ຕອນປາຍຢູ່ 15 ແຫ່ງ ທີ່​ຂຶ້ນ​ກັບບັນດາ​​ແຂວງ-ກຳ​ແພງ​ນະຄອນຄື ຮ່າ​ໂນ້ຍ, ຫາຍ​ເຢືອງ, ຫາຍ​ຟ່ອງ, ນາມ​ດິ້ງ ແລະ ກວາງ​ນິງ. ຜົນ​ສຳ​ເລັດ​ຂອງ​ການ​ທົດ​ລອງ​ໄດ້​ໃຫ້​ຮູ້​ວ່າ, ການ​ສຶກ​ສາ STEM ​​ໄດ້​ຫັນ​ນັກ​ຮຽນ​ໄປ​ສູ່​ຄວາມ​ຄິດ​ທ້ອງ​ຖິ່ນ​ທີ່​ໄກ້​ຊິກ, ບັນ​ດາ​ສະ​ໂມ​ສອນນອກ​ເວ​ລາ​ຮຽນ​ທີ່​ເຕັມ​ໄປ​ດ້ວຍຄວາມຮັກ​ຄວາມ​ເມົາ​ມົວ ແລະການ​ປ່ຽນ​ແປ​ງ​ສ່ວນ​ໃດ​ສ່ວນໜຶ່ງ​ໃນ​ວິ​ທີ​ການ​ສອນ, ​ວິ​ທີການ​ຮຽນ​ວິ​ຊາ​ວິ​ທະ​ຍາ​ສາດ.

ທີ​ສອງ, ນຳ​ໃຊ້​ຫຼາຍເສັ້ນທາງ​ການ​ສຶກ​ສາ​ທີ່​ອຸດົມສົມບູນ

​ນັກ​ຮຽນ​ແຕ່​ລະ​ຄົນ​ຈະ​ມີ​ຄວາມ​ຕ້ອງ​ການແລະຄວາມ​ສາ​ມາດ​ຮ່ຳ​ຮຽນ​ທີ່​ແຕກ​ຕ່າງ​ກັນ ແລະ ໜ້າ​ທີ່​ຂອງການ​ສຶກສາ​ແມ່ນ​ຄົ້ນ​ເຜີ​ຍ, ບຳລຸງລ້ຽງ ແລະສ້າງ​ກຳ​ລັງ​ໜູນ​ ເພື່ອ​​ໃຫ້ຜູ້​ຮຽນ​ກຳ​ນົດແລະປະຕິບັດຕານ​ຄວາມ​ສົນ​ໃຈ, ​ຄວາມປາຖະໜາ​ຂອງ​ຕົນ​ເອງ. ​ເລື່ອງນີ້​ຮຽກ​ຮ້ອງ​ໃຫ້​ລະ​ບົບ​ການ​ສຶກ​ສາ​ຕ້ອງ​ສ​ະ​ໜອງ​ເສັ້ນທາງ​ການ​ສຶກສາ​​​ທີ່​ຫຼາກ​ຫຼາຍ ​ເພື່ອ​ຮັບ​ໃຊ້​ໃຫ້​ບັນ​ດາ​ແນວ​ໂນ້ມການຮຽນຮູ້ ແລະແບບ​ແຜນການຮຽນຮູ້​ທີ່​ແຕກ​ຕ່າງ​ກັນ​ຂອງ​ແຕ່​ລະ​ບຸກ​ຄົນ. ໂຄງ​ການ​ສຶກ​ສາ​ສາ​ມັນ​ໃໝ່ກໍ່​ມີ​ການ​ປ່ຽນ​ແປງ​ຂັ້ນ​ພື້ນ​ຖານ ​ດ້ວຍ​ການ​ປະສານ​ລວມ​ເນື້ອ​ໃນ​ຢູ່​ຂັ້ນ​ປະ​ຖົມແລະມັດ​ທະ​ຍົມ​​ຕອນຕົ້ນ, ມີການ​ຜັນ​ແຍກ​ຢ່າງແຮງ​ຢູ່​ຂັ້ນ​ມັດ​ທະ​ຍົມຕອນ​ປາຍ, ຍູ້​ແຮງ​ການ​ກຳ​ນົດ​ທິດ​ທາງ​ອາ​ຊີບ ແລະການແບ່ງສາຍ​ໃນ​ການ​ສຶກ​ສາສາມັນ.

ທີ​ສາມ, ສົ່ງ​ເສີມ​ການ​ຮຽນຮູ້ຕະຫຼອດ​ຊີ​ວິດ

ໜຶ່ງ​ໃນ​​ເປົ້າ​ໝາຍ​ທີ່​ສຳ​ຄັນທີ່​ສຸດ​ຂອງ​ການ​ສຶກ​ສາ​ແມ່ນ ​ຄົ້ນຜີ​ຍແລະບຳລຸງ​ລ້ຽງ​ພອນ​ສະຫວັນ, ສົ່ງ​ເສີມຄວາມ​ມານະ​ພະຍາຍາມ, ຄວາມ​ເມົາ​ມົວ ແລະຄວາມ​ຕ້ອງ​ການຮຽນຮູ້​ຕະຫຼອດ​ຊີ​ວິດ​ຂອງ​ຜູ້​ຮຽນ. ເພື່ອ​ບັນ​ລຸ​ເປົ້າ​ໝາຍນີ້, ຕ້ອງ​ມີການ​ປ່ຽນ​ແປງ​ໃຫຍ່ຄື ຈັດ​ວາງ​ຄືນໃໝ່​​ລະບົບບັນ​ດາ​ສູນການ​ສຶກ​ສາ​ປົກ​ກະ​ຕິ ແລະບັນ​ດາ​ສູນ​ການຮຽນຮູ້​ຂອງ​ຊຸມ​ຊົນ, ປ່​ຽນ​ແປງ​ບັນ​ດາ​ແບບ​ຢ່າງ​ດັ້ງ​ເດີມ ​ເພື່ອສ້າງ​ບັນ​ດາ​ສູນ​ການຮຽນຮູ້​ຕະຫຼອດ​ຊີ​ວິດ. ນີ້ກໍ່​ແມ່ນ​ມາດ​ຕະ​ການ​ອັນ​ພື້ນ​ຖານ ​ເພື່ອ​ປະ​ຕິ​ບັດ​ການ​ປ່ຽນ​ແປງ​ໃໝ່​ລະບົບ​ການ​ສຶກສາ​ຢ່າງ​ເປັນ​ພື້ນຖານ​ແລະຮອບ​ດ້ານ, “ປັບປຸງ​ບູ​ລະ​ນະ​ລະ​ບົບ​ການ​ສຶກ​ສາແຫ່ງ​ຊາດ ​ຕາມ​ທິດ​ລະ​ບົບ​ສຶກ​ສາ​​ເປີດ​ກວ້າງ, ຮຽນຮູ້​ຕະຫຼອດຊີ​ວິດ ແລະສ້າງ​ສັງ​ຄົມ​​ແຫ່ງ​ການຮຽນຮູ້” ຕາມ​ຈິດ​ໃຈ​ມະ​ຕິ​ເລກ​ທີ 29-NQ/TW ຂອງກອງ​ປະ​ຊຸມ​ຄັ້ງ​ທີ 8 ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກສະ​ໄໝ XI.

ທີ​ສີ່, ຍູ້​ແຮງ​ການ​ສອນແລະຮຽນ​ພາ​ສາ​ຕ່າງ​ປະ​ເທດ, ພິ​ເສດ​ແມ່​ພາ​ສາ​ອັງ​ກິດ; ເພີ່ມ​ທະ​ວີ​ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ​ໃນ​ການ​ຮ່ຳ​ຮຽນ ແລະການຄຸ້ມ​ຄອງ

ກະ​ຊວງ​ສຶກ​ສາ​ທິ​ການແລະການກໍ່​ສ້າງ​ໄດ້​ສະ​ເໜີ​ໃຫ້​ນາ​ຍົກ​ລັດ​ຖະ​ມົນ​ຕີ​ປະ​ກາດ​ໃຊ້​ຂໍ້​ຕົກ​ລົງ​ດັດ​ແປງ, ປັບ​ປຸງ​ໂຄງກ​ານ​ສອນແລະຮຽນ​ພາ​ສາ​ຕ່າງປະ​ເທດ ໄລ​ຍະ 2017 – 2025(6) ຊຶ່ງ​​ໄດ້​ລະບຸ​ທິດທາງ​ຈຳ​ນວນ​ໜຶ່ງ, ​ຄື “ສ້າງ​ບາດ​ກ້າວ​ບຸກ​ທະ​ລຸ​ກ່ຽວ​ກັບ​ຄຸນ​ນະ​ພາບ​ໃນ​ການ​ສອນແລະຮຽນ​ພາ​ສາ​ຕ່າງ​ປະ​ເທດ ​ໃຫ້​ຂັ້​ນ​ຮຽນແລະລະ​ດັບການ​ຝຶກ​ອົບຮົມ​ຂັ້ນ​ຕ່າງໆ, ສົ່ງ​ເສີມ​ການ​ນຳ​ເອົາ​ພາ​ສາ​ຕ່າງ​ປະ​ເທດ​ເຂົ້າ​ໃນ​ໂຮງ​ຮຽນ​ແຕ່​ຂັ້ນ​ອະ​ນຸ​ບານ ແລະ​ເຂົ້າ​ໃນ​ການ​ເຄື່ອນ​ໄຫວ​ສັງ​ຄົມ. ຍູ້​ແຮງ​ການ​ສອນ​ພາ​ສາ​ຕ່າງ​ປະ​ເທດ​ທີ່​ປະສານໃນ​ວິ​ຊາ​ການ​ຮຽນ​ອື່ນ ​ແລະ​ການ​ສອນວິ​ຊາ​ອື່ນ (ຄື​ຄະ​ນິດສາດ ແລະບັນ​ດາ​ວິ​ຊາ​ວິ​ທະ​ຍາ​ສາດ, ວິ​ຊາ​ສະ​ເພາະ...) ດ້ວຍ​ພາ​ສາ​ຕ່າງປະ​ເທດ. ຍູ້​ແຮງ​ການ​ໝູນ​ໃຊ້​ເຕັກ​ໂນ​ໂລ​ຊີ​ທີ່​ກ້າວ​ໜ້າ​ໃນ​ການ​ສອນແລະຮຽນ​ພາ​ສາ​ຕ່າງ​ປະ​ເທດ ​ດ້ວຍ​ລະ​ບົບ​ຂໍ້ມູນ​ການ​ຮຽນ​ອອນ​ໄລ​ທີ່​ເໝາະ​ສົມ​ກັບ​ທຸກ​ເປົ້າ​ໝາຍ​ ເພື່ອ​​ໃຫ້​ຜູ້​ຮຽນ​ອາດ​ຈະ​ຮຽນ​ພາ​ສາ​ຕ່າງ​ປະ​ເທດ​, ເຂົ້າ​ເຖິງ​ພາ​ສາຕ່າງປະ​ເທດ​ຢູ່​​ທຸກບ່ອນທຸກ​ເວ​​ລາ, ດ້ວຍ​ທຸກ​ພາ​ຫະ​ນະ, ພິ​ເສດ​ໃນ​ການ​ພັດ​ທະ​ນາທັກ​ສະ​ການ​ຟັງແລະທັກ​ສະ​ການ​ເວົ້າ. ສ້າງ​ສິ່ງ​ແວດ​ລ້ອມ​ການຮຽນພາ​ສາ​ຕ່າງ​ປະ​ເທດ​ໃນ​ໂຮງ​ຮຽນແລະສັງ​ຄົມ ​ເພື່​ອ​​ໃຫ້ຄູ​ອາ​ຈານ, ສະ​ມາ​ຊິກ​ໃນ​ຄອບ​ຄົວແລະຜູ້​ຮຽນ (ນັກ​ຮຽນ, ນັກ​ສຶກ​ສາ...) ພ້ອມ​ກັນ​ຮຽນ​ພາ​ສາ​ຕ່າງ​ປ​ະເທດ.

ຄຽງ​ຄູ່​ກັນ​ນັ້​ນ, ໂຄງ​ການການ​ສຶກ​ສາ​​ຂອງຫວຽດ​ນາມຕ້ອງ​ຮັບ​ປະ​ກັນ​ໃຫ້​ຜູ້​ຮຽນ​ມີ​ຄວາມ​ຮູ້​ຕ່າງໆ​ກ່ຽວ​ກັບດີ​ຈີ​ຕອນ ແລະເຕັກ​ໂນ​ໂລ​ຊີຢູ່​ທຸກ​ຂັ້​ນ​ຮຽນ ​ເພື່ອ​ເຂົ້າ​ເຖິງ​ຢ່າງ​ງ່າຍ​ດາຍກັບ​ຄວາມ​ກ້າວ​ໜ້າ​ທາງ​ວິ​ທະ​ຍາ​ສາດ ແລະເຕັກ​ໂນ​ໂລ​ຊີ. ໃນ​ໂຄງ​ການ​ສຶກ​ສາ​ສາມັນ​ໃໝ່, ວິ​ຊາ​ພາ​ສາ​ຕ່າງ​ປະ​ເທດ ແລະວິ​ຊາຄອມ​ພິວ​ເຕີ ໄດ້​ກາຍ​ເປັນ​ບັນ​ດາ​ວິ​ຊາ​ທີ່​​ມີ​ການບັງ​ຄັບ​ເລີ່ມ​ແຕ່​ຂັ້ນ​ຮຽນ​ທຳ​ອິດ.

ການ​ເພີ່ມ​ທະ​ວີ​ການ​ໝູນ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ​ໃນ​ການ​ຄຸ້ມ​ຄອງ​ການ​ສຶກ​ສາກໍ່​ຕ້ອງ​​ໄດ້​ຮັບ​ຄວາມ​ເອົາ​ໃຈ​ໃສ່​ແບບ​ພິ​ເສດ. ຂະ​ແໜງ​ການ​ສຶກ​ສາ​​ກຳລັງ​ສືບ​ຕໍ່​ຍູ້​ແຮງການ​ນຳ​ໃຊ້​ຄອມ​ພິວ​ເຕີ​ໃນ​ການ​ຄຸ້ມ​ຄອງ, ຕັດ​ສິນ​ໃຈ​ກໍ່​ສ້າງ​ລະ​ບົບ​ຂໍ້​ມູນ​ຂ່າວ​ສານ​ເຊື່ອມ​ຕໍ່​ລະ​ຫວ່າງ​ກະ​ຊວງ​ສຶກ​ສາ​ທິ​ການແລະການກໍ່​ສ້າງ ກັບ​ບັນ​ດາສະຖານ​ບັນ​ການ​ສຶກ​ສາແລະຝຶກ​ອົບຮົມ, ກໍ່​ສ້າງ​ພື້​ນ​ຖານ​ຂໍ້​ມູນ​ຮ່ວມ​ກັນ​ຂອງ​ຂະ​ແໜງ​ການ.

ທີ​ຫ້າ​, ຍົກ​ສູງ​ຄວາມ​ສາ​ມາດ ແລະເປີດກວ້າງ​ບົດ​ບາດ​ຂອງ​ບັນ​ດາ​ໂຮງ​ຮຽນ​ມະ​ຫາ​ວິ​ທະ​ຍາ​ໄລ

ເພື່ອ​ເພີ່ມ​ທະ​ວີຄວາມ​ສາມາດ​ແຂ່ງ​ຂັນ​ຂອງ​ແຫຼ່ງ​ບຸກ​ຄະ​ລາ​ກອນ, ຄຽງ​ຄູ່​ກັບການ​ຍົກ​ສູງ​ຄວາມ​ສາ​ມາດ​ຄົ້ນ​ຄວ້າ​ວິ​ທະ​ຍາ​ສາດ ແລະການສິດ​ສອນ​ຢ່າ​ງບໍ່​ຢຸດຢັ້ງ, ບັນ​ດາມ​ມະ​ຫາ​ວິ​ທະ​ຍາ​ໄລ​ຕ້ອງ​ສະ​ແດງ​ບົດ​ບາດ​ນຳ​ໜ້າ​ຂອງ​ຕົນ​​ໃນ​ການ​ປະ​ຕິ​ບັດ​ພາລະ​ໜ້າ​ທີ່​ປ່ຽນ​ແປງ​ໃໝ່​ປະ​ດິດ​ສ້າງ ແລະເລີ່ມ​ທຸ​ລະ​ກິດ​ຢ່າງມີ​ຫົວ​ຄິ​ປະ​ດິດ​ສ້າງ. ຜົນ​ກະ​ທົບ​ຈາກ​ມະ​ຫາ​ວິ​ທະ​ຍາ​ໄລ​ໜຶ່ງໆ​ຈະ​ບໍ່​ຈຳກັດ​ໃນ​ການ​ສຶກ​ສາ ແລະປ່ຽນ​ແປງ​ຊີ​ວິດ​ຂອງ​ນັກຮຽນ ນັກ​ສຶກ​ສາ. ມະ​ຫາ​ວິ​ທະ​ຍາ​ໄລ​ຕ້ອງ​ເປັນພື້ນ​ຖານ​ທີ່​ໝັ້​ນ​ຄົງ​ຊຸກ​ຍູ້​ຄວາມ​ຄິດ​ປະ​ດິ​ດ​ສ້າງ, ສະ​ໜອງ​ຖານບິນໃຫ້​ແກ່​​ນັກ​ທຸ​ລະ​ກິດໃນ​ອະ​ນາ​ຄົດ ແລະ​ໃຫ້​ບໍ​ລິ​ສັດ​ເລີ່ມ​ການ​ທຸ​ລະ​ກິດ, ຮັກ​ສາ​ຈັງ​ຫວະ​ການ​ພັດ​ທະ​ນາ​ໃຫ້​ແກ່​ບັນ​ດາຂະ​ແໜງ​ການ​ອຸ​ດ​ສາ​ຫະ​ກຳ. ກະ​ຊວງ​ສຶກ​ສາ​ທິ​ການແລະການກໍ່​ສ້າງ ໄດ້ສະ​ເໜີ​ໃຫ້​ໃຫ້​ນາ​ຍົກ​ລັດ​ຖະ​ມົນ​ຕີປະ​ກາດ​ໃຊ້ ຂໍ້​ຕົກ​ລົງອະ​ນຸ​ມັດ​ຜ່ານ ໂຄງ​ການ​ຊ່ວຍ​ເຫຼືອ​ນັກ​ສຶກ​ສາ​ເລີ່ມ​ການ​ທຸ​ລະ​ກິດ​ເຖິງ​ປີ 2025(7); ຊີ້​ນຳ​ໃຫ້​ບັນ​ດາ​ໂຮງ​ຮຽນ​ປ່ຽນ​ແປງໃໝ່​ວຽກ​ງານກໍ່​ສ້າງ​ໂຄງ​ການຝຶກ​ອົບຮົມ, ໃນ​ນັ້ນ​ມີ​ການ​ເຂົ້າ​ຮ່ວມ​ຂອງນັກ​ຄຸ້ມ​ຄອງ ​ແລະ​ຜູ້​ນຳ​ໃຊ້​ແຮງ​ງານ; ກໍ່​ສ້າງແລະປະ​ກາດ​ມາດ​ຕະ​ຖານ​ສົ້ນ​ອອກ​ຂອງ​ບັນ​ດາ​ໂຄງ​ການຝຶກ​ອົບຮົມ; ຊ່ວຍ​ເຫຼືອການ​ປະ​ສານ​ສົມ​ທົບ​ລະ​ຫວ່າງ​​ໂຮງຮຽນ​ມະ​ຫາ​ວິ​ທະ​ຍາ​ໄລ​ ກັບ​​ບໍລິສັດ ວິ​ສາ​ຫະ​ກິດ​ທີ່​ນຳ​ໃຊ້​ແຮງ​ງານ​ໃນ​ການຝຶກ​ອົບຮົມ; ຊີ້​ນຳ​ບັນ​ດາ​ໂຮງຮຽນມະ​ຫາ​ວິ​ທະ​ຍາ​ໄລ​ເພີ່ມ​ທະ​ວີ​ການ​ຮ່ວມ​ມື​ກັບ​ບໍລິສັດ ​ວິ​ສາ​ຫະ​ກິດຕ່າງໆ ເພື່ອ​ເຊື່ອມ​ຕິດການຝຶກ​ອົບຮົມ​ກັບ​ຄວາມ​ຮຽກ​ຮ້ອງ​ຕ້ອງ​ການ​ຂອງ​ຕະຫຼາດ​ແຮງ​ງານ​ພາຍ​ໃນ ແລະຕ່າງ​ປະ​ເທດ.

ບັນ​ດາ​ມະ​ຫາ​ວິ​ທະ​ຍາ​ໄລ​ກໍ່​ຕ້ອງ​ລັດ​ໜ້າທ່າ​ອຽງ​ໜຶ່ງ​ຄື ​ເວ​ລາຝຶກ​ອົບຮົມແຮງ​ງານ​ລະ​ດັບ​ສູງ​ຈະ​ບໍ່​​ຈຳກັດ​ໃນເວ​​ລາ 4 ປີຫຼື 5 ປີ, ຫາກ​ໄດ້​ແກ່ຍາວໃນ​ຕະຫຼອດ​ຊີ​ວິດ​​ແຫ່ງການອອກ​ແຮງ​ງານ​ຂອງ​ເຂົາ​ເຈົ້າ, ເມື່ອຜູ້​ຮຽນກັບມາຮຽນ​ຕໍ່​ພາຍຫຼັງ​ຮຽນ​ຈົບ​ແລ້ວ ເພື່ອ​ມີ​ຄວາມ​ຮູ້ແລະທັກ​ສະຕື່ມ​ອີກ​. ດັ່ງ​ນັ້ນ, ຈິນ​ຕະ​ນາ​ການເກົ່າ​ຂອງ​ພື້ນ​ຖານການ​ສຶກ​ສາ​ລັດ​ໜ້າຈະ​ມີ​ການ​ປ່ຽນ​ແປງ, ​ເມື່ອ​ບັນ​ດາ​ໂຮງ​ຮຽນ​ມະ​ຫາ​ວິ​ທະ​ຍາ​ໄລ​ກຳ​ນົດ​ການຮຽນຮູ້​ຕະຫຼອດ​ຊີວິດເປັນ​ພາກ​ສ່ວນ​ໜຶ່ງ​​ແຫ່ງພາ​ລະ​ກຳ​ຂອງ​ຕົນ​. ເພື່ອ​ຊ່ວຍ​ໃຫ້ບັນ​ດາ​ສະ​ຖາ​ບັນ​ການ​ສຶກ​ສາ​ມະ​ຫາ​ວິ​ທະ​ຍາ​ໄລ​ເສີມ​ຂະ​ຫຍາຍ​ຄວາມ​ສາ​ມາດ​ເປັນ​ເຈົ້າ​ການ ປະ​ດິດ​ສ້າງ, ຍົກ​ສູງ​ປະ​ສິດ​ທິ​ຜົນ​ການ​ເຄື່ອນ​ໄຫວ, ເພີ່ມທະ​ວີຄວາມ​ສາມາດ​ແຂ່ງ​ຂັນ ແລະນຳ​ໃຊ້ຫຼາຍ​ປະ​ເພດ​ການ​ສຶກ​ສາ ຝຶກ​ອົບຮົມ, ຕອບ​ສະ​ໜອງ​ຄວາມ​ຕ້ອງ​ການ​ກ່ຽວ​ກັບ​ແຫຼ່​ງ​ບຸກ​ຄະ​ລາ​ກອນ​ຂອງ​ປະ​ເທດ, ກະ​ຊວງ​ສຶກ​ສາ​ທິ​ການແລະການກໍ່​ສ້າງ​ ໄດ້​ເລັ່ງກໍ່​ສ້າງຮ່າງ​ກົດ​ໝາຍວ່າ​ດ້ວຍ​ການ​ປັບ​ປຸງ​ແລະ​ເພີ່ມ​ເຕີມ​ບາງ​ມາດ​ຕາ​ຂອງ​ກົດ​ໝາຍການສຶກ​ສາ​ມະ​ຫາ​ວິ​ທະ​ຍາ​ໄລ ສະ​ເໜີ​ໃຫ້​ສະ​ພາ​ແຫ່ງ​ຊາດ​ຮັບຮອງ​ຜ່ານ ແລະສືບຕໍ່​ປົວ​ແປງ​ບຸ​ລະ​ນະ​ລະ​ບົບ​ເອ​ກະ​ສານທາງກົດໝາຍທີ່​ແນະນຳ​ການຈັດ​ຕັ້ງປະ​ຕິ​ບັດ​ກົດ​ໝາຍການສຶກ​ສາ​ມະ​ຫາ​ວິ​ທະ​ຍາ​ໄລ ພາຍຫຼັງທີ່​ໄດ້​ຮັບ​ການ​ປັບ​ປຸງ. ກະ​ຊວງຍັງໄດ້​ສະ​ເໜີໃຫ້​ລັດຖະບານ​ອອກດຳລັດກ່ຽວ​ກັບການ​ເປັນ​ເຈົ້າຕົນ​ເອງ​ຂອງ​ມະ​ຫາ​ວິ​ທະ​ຍາ​ໄລ ແທນ​ໃຫ້ມະ​ຕິເລກ​ທີ 77/NQ-CP, ການຫັນ​ເປັນເຈົ້າ​ຕົນ​ເອງ​ຂອງ​ມະ​ຫາ​ວິ​ທະ​ຍາ​ໄລ​ເປັນ​ທາງ​ການ ​ແມ່ນ​ເສັ້ນ​ທາງ​ທີ່​ຈຳ​ເປັນຂອງ​ການ​ສຶກ​ສາ​ມະ​ຫາ​ວິ​ທະ​ຍາ​ໄລຫ​ວຽດ​ນາມ.

ເວົ້າ​ລວມ​ແລ້ວ, ເພື່ອ​ໄດ້​ຮັບ​ຜົນ​ສຳ​ເລັດ​ໃນທົດ​ສະ​ວັດ​ຕໍ່​ໄປ​, ຂະ​ແໜງ​ການ​ສຶກ​ສາຕ້ອງ​ມີວິ​ໄສ​ທັດ​ທີ່ກວ້າງ​ໄກ​​ໃນ​ສະ​ພາບ​ການ​ທີ່ຮູບ​ການ​ຈັດ​ຕັ້ງແລະ​ຄວາມ​ຮຽກ​ຮ້ອງ​ຕ້ອງ​ການ​ທາງ​ດ້ານ​ທັກ​ສະມີ​ການປ່ຽນ​ແປງ​ຢ່າງ​ຕໍ່​ເນື່ອງ​. ຕາມນັ້ນ, ຜູ້ອອກ​ແຮງ​ງານ​ໃນ​ອະ​ນາ​ຄົດ​ຈະ​ຕ້ອງ​ມີ​ຄວາມ​ສາ​ມາດ​ໃນ​ການ​ຮຽນຮູ້​ຕະຫຼອດ​ຊີ​ວິດ ເພື່ອ​ກຽມຄວາມ​ພ້ອມ​ໃນ​ການ​ປ່ຽນ​ແປງຕ່າງໆ. ບັນ​ດາສະ​ຖາ​ບັນ​ການ​ສຶກ​ສາ​​ປະ​ຈຸ​ບັນຕົ້ນຕໍ່​ແມ່ນ​ຜະ​ລິດ​ຕະ​ພັນ​ຂອງ​ໂຄງສ້າງ​ພື້ນ​ຖານ​ເຕັກ​ໂຂ​ໂລ​ຊີ ແລະສະ​ພານສັງ​ຄົມ​ໃນ​ອະ​ດິດ​ຕະ​ການ. ຕໍ່​ໜ້າ​ສະ​ພາບ​ການ​ທີ່​ກຳລັງ​ປ່ຽນ​ແປງ​ຢ່າງ​ໄວ​ວາ, ບັນ​ດາສະ​ຖາ​ບັນ​ການ​ສຶກ​ສາ​ຕ້ອງ​ຮັບ​ຮູ້​ຄືນ​ໃໝ່​ ເພື່ອ​ຍົກ​ສູງ​ຄວາມ​ສາ​ມາດ​ຕອບ​ສະໜອງ​ສະພາບ​ການ. ບັນ​ດາ​ສຳນັກງານອົງ​ການ, ວິ​ສາ​ຫະ​ກິດກໍ່​ຕ້ອງ​ມີ​ການປັບ​ຕົວ​ໃຫ້​ຖືກ​ເໝາະ​ກັບ​ສິ່ງ​ແວດ​ລ້ອມ​ທີ່​ກຳ​ລັງ​ປ່ຽນ​ແປງ ແລະຕ້ອງກຳ​ນົດ​ຄວາມ​ສຳ​ຄັນຂອງ​ການກໍ່​ສ້າງ​ຍຸດ​ທະ​ສາດ​ພັດ​ທະ​ນາ​ແຫຼ່ງ​ບຸກ​ຄະ​ລາ​ກອນ​ມຸ່ງ​ໄປ​ສູ່​ເປົ້າ​ໝາຍ​ພັດ​ທະ​ນາ​ແບບ​ຍືນ​ຍົງ ​ໂດຍ​ຜ່ານ​ການ​ຮ່ວມ​ມື​ກັບ​ໂຮງ​ຮຽນ​ມະ​ຫາ​ວິ​ທະ​ຍາ​ໄລ​ຕ່າງໆ.

ເພື່ອ​ກະ​ກຽມ​ໃຫ້ຄົນ​ຮຸ່ນ​ຕໍ່​ໄປ​ໃນ​ອະ​ນາ​ຄົດ ແລະເພີ່ມ​ຄວາມ​ສາມ​າດ​ແຂ່ງ​ຂັນ​ຂອງ​ຄົນຫວຽດ​ນາມ, ພວກ​ເຮົາ​ຕ້ອງກໍ່​ສ້າງ​ລະ​ບົບ​ການ​ສຶກ​ສາທີ່​ຊຸກ​ຍູ້ການ​ປ່ຽນ​ແປງ​ໃໝ່ ແລະປະ​ດິດ​ສ້າງ, ໃນ​ນັ້ນ​ເນັ້ນ​ໜັກ​ເຖິງ​ຄວາມ​ສຳ​ຄັນ​ຂອງ​ການ​ຮຽນຮູ້​ຕະຫຼອດ​ຊີ​ວິດ ແລະຄວາມ​ສາ​ມາດ​ພັດ​ທະ​ນາຍາວ​ນານ​ຂອງ​ຜູ້​ຮຽນ. ຍິ່ງກວ່ານັ້ນ, ການຈັດແບ່ງ​ງົບ​ປະ​ມານ​ຢ່າງ​ມີ​ປະ​ສິດ​ທິ​ຜົນ, ໄປ​ຄຽງ​ຄູ່​ກັນ​ກັບ​ຄຳ​ໝັ້ນ​ສັນ​ຍາ​ການ​ເມືອງ​ຢ່າງ​ແຂງ​ແຮງ​ຕໍ່​ການ​ສຶກ​ສາ​ແລະຝຶກ​ອົບຮົມ ຈະ​ສ້າງ​​ຄວາມ​ແຕກ​ຕ່າງ​​ໃຫ້ກັບ​ອະ​ນາ​ຄົດ​ຂອງ​ເຍົາວະ​ຊົນ​ຮຸ່ນ​ໃໝ່​ຂອງຫວຽດ​ນາມ./.

 ​ໂດຍ ຟູ່ງ​ຊວັນ​ຍ້າ,
ກຳ​ມະ​ການ​ສູນ​ກາງ​ພັກກອ​ມ​ມູນິດຫວຽດ​ນາມ,
ລັດ​ຖະ​ມົນ​ຕີກະ​ຊວງສຶກ​ສາ​ທິ​ການແລະການກໍ່​ສ້າງ.

---------------------------------------

(1) K. Schwab (2016): The Fourth Industrial Revolution: what it means, how to respond https://www.weforum.org/agenda/2016/01/the-fourth-industrial-revolution-what-it-means-and-how-to-respond/

(2) K. Schwab (2017): The Fourth Industrial Revolution, Crown Business Publisher.

(3) B. Abersek (2017): Evolution of competences for new era or Education 4.0, The XXV conference of Czech Educational Research Association (CERA/CAPV) “Impact of Technologies in the Sphere of Education and Educational Research”.

(4) World Bank (2018): Growing Smarter: Learning & Equitable Development in East Asia Pacific.

(5) FICCI (2017): Leapfrogging to Education 4.0: Student at the core, FICCI-EY Future of Skills and Jobs in India Report.

(6) ຂໍ້​ຕົກ​ລົງເລກ​ທີ 2080/QĐ-TTg, ​ລົງ​ວັນ​ທີ 22 ທັນ​ວາ 2017, ຂອງນາ​ຍົກ​ລັດ​ຖະ​ມົນ​ຕີ ວ່າ​ດ້ວຍ "ອະນຸມັດຜ່ານສະບັບປັບປຸງ ໂຄງການສອນແລະຮຽນພາສາຕ່າງປະເທດ ໃນລະບົບການສຶກສາແຫ່ງຊາດ ໄລຍະ 2017-2025".

(7) ຂໍ້​ຕົກ​ລົງເລກ​ທີ 1665/QĐ-TTg, ​ລົງ​ວັນ​ທີ 30 ຕຸ​ລາ 2017, ຂອງນາ​ຍົກ​ລັດ​ຖະ​ມົນ​ຕີ ວ່າ​ດ້ວຍ ອະ​ນຸ​ມັດ​ຜ່ານສະ​ບັບ​ປັບ​ປຸງໂຄງ​ການ​ “ຊ່ວຍ​ເຫຼືອ​ນັກ​ຮຽນ, ນັກ​ສຶກ​ສາ​ໃນ​ການ​ເລີ່ມ​ທຸ​ລະ​ກິດເຖິ​ງ​ປີ 2025”.

- ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດສະບັບ​ທີ 909 (​ເດືອນ​​ກໍ​ລະ​ກົດ 2018).

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ