ວັນພຸດ, 14/11/2018
ການປະຕິຮູບນະໂຍບາຍປະກັນໄພສັງຄົມ ປະກອບສ່ວນຮັບປະກັນຄວາມປອດໄພສັງຄົມ, ຊຸກຍູ້ຄວາມກ້າວໜ້າແລະຍຸຕິທຳທາງສັງຄົມ ເພື່ອພັດທະນາປະເທດຢ່າງຍືນຍົງ
1/11/2018 20:20' ສົ່ງ ພິມ
ພາບປະກອບ: ນະໂຍບາຍປະກັນໄພສັງຄົມ (ແຫຼ່ງ: Zing.vn)

ບັນດາ​ຜົນສຳ​ເລັດ​ຕົ້ນຕໍ​ ໃນ​ການ​ປະຕິບັດນະ​ໂຍບາຍ​ປະກັນ​ໄພ​ສັງຄົມ ຢູ່​ຫວຽດນາມ​ໃນ​ເວລາ​ທີ່​ຜ່ານ​ມາ

​ໃນ​ຕະຫຼອດ​ສະ​ໄໝ​ແຫ່ງ​ການ​ປ່ຽນ​ແປງ​ໃໝ່, ພິ​ເສດ​ແມ່ນ​ແຕ່​ປີ 1995 ມາ​ເຖິງ​ປະຈຸ​ບັນ, ​ໂດຍປະຕິບັດ​ບັນດາ​ມະຕິ, ຄຳ​ສັ່ງ, ບົດ​ສະຫຼຸບ​ຂອງ​ຄະນະ​ບໍລິຫານ​ງານ​ສູນ​ກາງ​ແລະ​ກົມ​ການ​ເມືອງ, ນະ​ໂຍບາຍ​ປະກັນ​ໄພ​ສັງຄົມ (ປສ.) ​ໄດ້​ຮັບ​ການ​ຫັນ​ເປັນ​ນິຕິ​ກຳ​ຕາມ​ທິດ​ນັບ​ມື້​ນັບ​ສົມບູນ​ກວ່າ ກ່ຽວ​ກັບ​ລະບອບ, ນະ​ໂຍບາຍ, ກົນ​ໄກ​ຄຸ້ມ​ຄອງ, ກົນ​ໄກ​ການ​ເງິນ. ລະອຽດ​ຄື:

1- ລະບົບ​ນະ​ໂຍບາຍ​ປະກັນ​ໄພ​ສັງຄົມ​ໄດ້​ຖືກ​ສ້າງ​ຕັ້ງ​ຂຶ້ນ​ຢ່າງ​ຄົບ​ຊຸດ​ພໍ​ຄວນ ຊຶ່ງ​ກວມ​ເອົາ​ເກືອບ​ໝົດ​ທຸກ​ລະບອບ ປສ. ຕາມ​ກົດ​ລະບຽບ​ສາກົນ: ກວມ​ທັງ​ແບບ ປສ. ບັງຄັບ ​ແລະ ປສ. ສະມັກ​ໃຈ; ຕໍ່​ກັບ​ຜູ້​ມີ​ການ​ພົວພັນ​ແຮງ​ງານ ​ແລະ​ຜູ້​ບໍ່​ມີ​ການ​ພົວພັນ​ແຮງ​ງານ; ສຳລັບ​ຂົງ​ເຂດ​ເສດຖະກິດ​ເປັນ​ທາງ​ການ ​ແລະ​ບໍ່​ເປັນ​ທາງ​ການ.

2- ລະບົບ​ນະ​ໂຍບາຍ ປສ., ບັນດາ​ການ​ພົວພັນ ປສ. ​ໄດ້​ຮັບ​ການ​ອອກ​ແບບ, ດັກ​ປັບ ​ແລະ ປະຕິບັດ​ນັບ​ມື້​ນັບ​ສອດຄ່ອງ​ເໝາະ​ສົມ. ດ້ວຍ​ບົດບາດ​ເປັນ​ເຈົ້າພາ​ທາງ​ຂອງ​ລັດ, ການ​ເຂົ້າ​ຮ່ວມ​ຂອງ​ຜູ້​ອອກ​ແຮງ​ງານ ​ແລະ​ນາຍຈ້າງ, ກອງ​ທຶນ​ປະກັນ​ໄພ​ສັງຄົມ​ໄດ້​ກາຍ​ເປັນ​ກອງ​ທຶນ​ຄວາມ​ປອດ​ໄພ​ທີ່​ໃຫຍ່​ທີ່​ສຸດ, ທີ່​ເຄື່​ອນ​ໄຫວ​ຕາມ​ຫຼັກການ ​ເສຍ​ຄ່າ​ປະກັນ-​ໄດ້ຮັບ​ການ​ຊຳລະ​ປະກັນ ​ແລະ ການ​ແບ່ງປັນ​ລະຫວ່າງ​ຜູ້​ອອກ​ແຮງ​ງານ​ໃນ​ຮຸ່ນ​ດຽວ​ກັບ ​ແລະ​ລະຫວ່າງ​ບັນດາຮຸ່ນຜູ້​ເຂົ້າ​ຮ່ວການ ປສ.. ຈຳນວນ​ເງິນ​ທັງ​ໝົດ​ທີ່​ໃຊ້​ຈ່າຍ​ໃນ​ການ​ບຳນານ, ການ​ເສຍ​ຊີວິດ, ການ​ສູນ​ເສຍ​ແຮງ​ງານ​ແລະ​ເງິນ​ອຸດ​ໜູນ​ ໃນ​ແຕ່ລະ​ເດືອນ​ຂອງ​ປີ 2017 ຈາກ​ກອງທຶນ​ປະກັນ​ໄພ​ສັງຄົມ​ແມ່ນ 132.140 ຕື້​ດົ່ງ, ​ເພີ່ມ​ຂຶ້ນ​ທົບ 9 ​​ເທື່ອ​ເມື່ອ​ທຽບ​ກັບ​ເວລາ​ຂອງ​ວັນ​ທີ 01-01-2007 - ​ເປັນ​ປີ​ທຳ​ອິດ​ທີ່​ປະຕິບັດ​ກົດໝາຍ​ປະກັນ​ໄພ​ສັງຄົມ. ຈຳນວນ​ເງິນ​ທັງ​ໝົດທີ່​ຈ່າຍ​ໃຫ້​ແກ່​ການ​ບຳນານ, ການ​ເສຍ​ຊີວິດ​ໃນ​ປີ 2017 ຈາກ​ງົບປະ​ມານ​ແຫ່ງ​ລັດ​ແມ່ນ 44.875 ຕື້​ດົ່ງ, ຍັງ​ເຫຼືອ​ພຽງ 25,35% ທຽບ​ກັບ​ອັດຕາ​ສ່ວນ 56,2% ​ໃນ​ເວລາ​ຂອງ​ວັນ​ທີ 01-01-2007.

3- ການ​ປົກ​ຫຸ້ມ​ຂອງ ປສ. ຕາມ​ຂໍ້​ກຳນົດ​ຂອງ​ກົດໝາຍ ​ແລະ ຂະໜາດ​ຂອງ​ການ​ເຂົ້າ​ຮ່ວມ ປສ. ​ໃນ​ພາກ​ຕົວ​ຈິ​ງນັບ​ມື້​ໄດ້​ຮັບ​ການ​ເປີດ​ກວ້າງ. ຄິດ​ໄລ່​ເຖິງ​ປີ 2017, ຈຳນວນ​ຜູ້​ເຂົ້າ​ຮ່ວມ ປສ. ທັງ​ໝົດ​ແມ່ນ 13,9 ລ້ານ​ຄົນ (​ໃນ​ນັ້ນ ປສ. ບັງ​ຄັບ​ແມ່ນ 13,6 ລ້ານ​ຄົນ, ປສ. ສະໝັກ​ໃຈ​ແມ່ນ 3 ​ແສນ​ຄົນ), ​ເພີ່ມ​ຂຶ້ນ​ທົບ 2,3 ​ເທື່ອ​ທຽບ​ກັບ​ເວລາ​ກົດໝາຍ​ປະກັນ​ໄພ​ສັງຄົມ ​ເລກທີ 71/2006/QH11, ມີ​ຜົນ​ບັງຄັບ​ໃຊ້​ແຕ່​ວັນ​ທີ 01-01-2007; ຈຳນວນຜູ້​ທີ່​ເຂົ້າ​ຮ່ວມປະກັນ​ໄພ​ວ່າງ​ງານ ​ແມ່ນ 11,7 ລ້ານ​ຄົນ. ມາ​ເຖິງ​ປະຈຸ​ບັນ, ​ໄດ້​ແລະ​ກຳລັງ​ປະຕິບັດ​ລະບອບ, ນະ​ໂຍບາຍ​ໃຫ້ກວ່າ 3 ລ້ານ​ຄົນຮັບ​ເງິນ​ບຳນານ ​ແລະ ປສ. ​ລາຍ​ເດືອນ. ​ໃນ​ປີ 2017, ມີ 9,1 ລ້ານ​ເທື່ອ​ຄົນ​ໄດ້ຮັບ​ເງິນ​ປະກັນ​ສຸຂະພາບ, ​ເກີດ​ລູກ; 7 ​ແສນ​ຄົນ​ໄດ້​ຮັບ​ເງິນ​ອຸດ​ໜູນ​ຜູ້​ວ່າງ​ງານ; ກວ່າ 5 ໝື່ນ 6 ພັນ​ຄົນ​ໄດ້​ຮັບ​ເງິນຊ່ວຍ​ບັນ​ເທົາ​ອຸບັດ​ຕິ​ເຫດ, ພະຍາດ​ອາຊີບ​ໃນ​ແຕ່ລະ​ເດືອນ.

4- ຮູບ​ແບບ​ຈັດ​ຕັ້ງ​ລະບົບ ປສ. ສອດຄ່ອງ​ໂດຍ​ພື້ນຖານ​ກັບ​ກົດ​ລະບຽບ​ສາກົນ ຊຶ່ງ​ມີ​ການ​ແຍກ​ອົງການ​ຄຸ້ມຄອງ​ລັດ​ກັບ​ອົງການ​ຈັດ​ຕັ້ງ​ປະຕິບັດ​ນະ​ໂຍບາຍ ດັ່ງ​ນັ້ນ​ໄດ້​ເສີມ​ຂະຫຍາຍ​ບົດບາດ​ແລະ​ປະສິດທິ​ຜົນ​ໃນ​ແຕ່ລະ​ຂອດ​ຂອງການອອກ​ແບບ, ກໍ່ສ້າງ, ກຳນົດ, ຈັດ​ຕັ້ງ​ປະຕິບັດນະ​ໂຍບາຍ, ການ​ຮັບ, ການ​ຈ່າຍ ​ແລະ​ການຄຸ້ມ​ຄອງກອງ​ທຶນ​ປະກັນ​ໄພ​ສັງຄົມ. ຄວາມ​ສາມາດ, ປະສິດທິພາບ, ປະສິດທິ​ຜົນ​ຂອງ​ການ​ຄຸ້ມ​ຄອງ​ລັດ​ກ່ຽວ​ກັບ ປສ. ​ໄດ້​ຮັບ​ການ​ເພີ່ມ​ທະວີ. ລະບົບ​ເອກະສານ​ກຳນົດ​ກົດໝາຍ​ກ່ຽວ​ກັບ ປສ. ​ໄດ້​ຮັບ​ການ​ດັດ​ແປງ, ປັບປຸງ​ແລະ​ບູລະນະ​ຢ່າງ​ເປັນ​ປະຈຳ; ວຽກ​ງານ​ກວດກາ​ນ, ກວດກາ, ຕິດຕາມ​ກວດກາ​ການ​ປະຕິບັດ​ກົດໝາຍ​ ປສ. ​ໄດ້​ຮັບ​ຄາມ​ເອົາ​ໃຈ​ໃສ່​ກວ່າ​ເກົ່າ; ວຽກ​ງານ​ການ​ຕ່າງປະ​ເທດ​ແລະ​ເຊື່ອມ​ໂຍງ​ສາກົນ​ກ່ຽວ​ກັບ ປສ. ​ໄດ້​ຮັບ​ການ​ຍູ້​ແຮງ.

ຄຽງ​ຂ້າງ​ຜົນສຳ​ເລັດ​ທີ່​ສຳຄັນ​ດັ່ງກ່າວ​ເທິງ​ນີ້, ການຈັດ​ຕັ້ງ​ປະຕິບັດ​ແຜນ​ນະ​ໂຍບາຍ​ການ​ປ່ຽນ​ແປງ​ໃໝ່, ຍົກ​ສູງ​ປະສິດທິ​ຜົນ​ຂອງ​ນະ​ໂຍບາຍ ປສ. ກໍ່​ມີ​ຂໍ້​ຈຳກັດ, ຈຸດ​ອ່ອນ​ຫຼາຍ​ຢ່າງ; ຄວາມ​ປົກ​ຫຸ້ມ​ຂອງ ປສ. ຕາມຂໍ້​ກຳນົດຂອງ​ກົດໝາຍ ກໍ່​ຄືຂະໜາດ​ການ​ເຂົ້າ​ຮ່ວມ ປສ. ​ໃນ​ພາກ​ຕົວ​ຈິງ​ແມ່ນ​ຍັງ​ຕ່ຳ, ຍັງ​ບໍ່​ທັນ​ຫັນ​ໄປ​ສູ່​ການ​ປົກ​ຫຸ້ມ​ທົ່ວ​ປວງ​ຊົນ. ລະ​ບົບ ປສ. ​ໂດຍ​ພື້ນຖານ​ແລ້ວ​ ແມ່ນ​ຍັງ​ອອກ​ແບບ​ຊັ້ນ​ດຽວ; ການ​ເຊື່ອມ​ຕໍ່​ນະ​ໂຍບາຍ ປສ. ກັບ​ບັນດາ​ນະ​ໂຍບາຍ​ສັງຄົມ​ອື່ນ ​ແມ່ນ​ຍັງ​ບໍ່​ທັນ​ຄົບ​ຊຸດ, ບໍ່​ມີ​ຄວາມ​ແໜ້ນ​ແຟ້ນ. ການ​ປະກັນ​ໄພ​ສັງຄົມ​ແບບ​ບັງຄັບຍັງ​ປະ​ຂ້າມ​ບາງ​ກຸ່ມ​ເປົ້າ​ໝາຍ​ທີ່​ມີ​ຄວາມ​ຕ້ອງການ ​ແລະ​ມີ​ຄວາມ​ສາມາດ​ເຂົ້າ​ຮ່ວມ. ​ໃນ​ພາກ​ຕົວ​ຈິງ, ປີ 2017 ມີ​ພຽງ​ເກືອບ 29% ຂອງ​ກຳລັງ​ແຮງ​ງານ​ໃນ​ໄວ​ອາຍຸ​ເຂົ້າ​ຮ່ວມ ປສ., ກວ່າ 70% ຍັງ​ບໍ່​ທັນ​ເຂົ້າ​ຮ່ວມ. ​ເປົ້າ​ໝາຍ​ຮອດ​ປີ 2020, ມີ 50% ກຳລັງ​ແຮງ​ງານ​ເຂົ້າ​ຮ່ວມ ປສ. ຕາມ​ມະຕິ​ເລກທີ 15-NQ/TW, ວັນ​ທີ 10-6-2012, ຂອງ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 5 ສະ​ໄໝ​ທີ XI, “ບາງ​ບັນຫາ​ກ່ຽວ​ກັບ​ນະ​ໂຍບາຍ​ສັງຄົມ​ໃນ​ໄລຍະ 2012-2020” ​ແລະ ມະຕິ​ເລກທີ 21-NQ/TW, ວັນ​ທີ 22-11-2012, ຂອງ​ກົມ​ການ​ເມືອງ, “ກ່ຽວ​ກັບ​ການ​ເພີ່ມ​ທະວີ​ການ​ນຳພາ​ຂອງ​ພັກ​ຕໍ່​ວຽກ​ງານ​ປະກັນ​ໄພ​ສັງຄົມ, ປະກັນ​ສຸກຂະພາບ​ໃນ​ໄລຍະ 2012 - 2020”, ​ແມ່ນບໍ່​ບັນລຸ​ໄດ້. ບັນດາ​ຫຼັກການ​ເຊັ່ນ ​ຍຸຕິ​ທຳ, ​ເສຍ​ຄ່າ​ປະກັນ-​ໄດ້ຮັບ​ການຊຳລະ​ປະກັນ, ​ແບ່ງປັນ​ແລະ​ຮັບປະກັນ​ຄວາມ​ຍືນ​ຍົງ​ດ້ານ​ການ​ເງິນນັ້ນ ​ແມ່ນ​ບໍ່​ທັນ​ໄດ້​ຮັບ​ການ​ເຊື່ອມ​ຊຶມ​ຢ່າງ​ຄົບ​ຖ້ວນ; ກອງ​ທຶນ​ບຳນານ​ແລະ​ການ​ເສຍ​ຊີວິດ​ອາດ​ຈະ​ຖືກ​ຂາດ​ດຸນ​ໃນ​ໄລຍະ​ຍາວ; ນະ​ໂຍບາຍ ປສ. ໜັກ​ໄປ​ທາງ​ການ​ແກ້​ໄຂຜົນ​ຕາມ​ມາ​ເມື່ອ​ຜູ້​ອອກ​ແຮງ​ງານ​ວ່າງ​ງານ ​ໂດຍ​ບໍ່​ເອົາ​ໃຈ​ໃສ່​ພຽງພໍ​ເຖິງການ​ປ້ອງ​ກັນ ​ແລະຫຼຸດຜ່ອນ​ສະພາບ​​ວ່າງ​ງານ.

ສູດ​ຄຳນວນ​ເງິນ​ບຳນານ​ລະຫວ່າງ​ຍິງ​ແລະ​ຊາຍ, ລະຫວ່າງ​ພາກ​ລັດ​ແລະ​ພາກ​ເອກະ​ຊົນ ຍັງມີ​ຄວາມ​ບໍ່​ຍຸຕິ​ທຳ; ການ​ຫັນ​ເປັນ​ນິຕິ​ທຳ​ຕໍ່​ຫຼັກການ​ນີ້​ຍັງ​ຊ້າ (ກົດໝາຍ​ປະກັນ​ໄພ​ສັງ​ຄົມ​ປີ 2014 ກຳນົດ​ວ່າ​ ຜູ້​ອອກ​ແຮງ​ງານ​ໃນ​ພາກ​ລັດ​ເມື່ອ​ອອກ​ກິນ​ເບ້ຍ​ບຳນານ, ຄິດ​ສະ​ເລ່ຍຕະຫຼອດ​ໄລຍະ​ເວລາ​ປະກັນ​ໄພ ຄື​ກັນກັບ​ຜູ້​ອອກ​ແຮງ​ງານ​ໃນ​ພາກ​ເອກະ​ຊົນ. ​ແຕ່​ວ່າ, ຂໍ້​ກຳນົດ​ນີ້​ພຽງ​ແຕ່​ໝູນ​ໃຊ້​ຕໍ່​ຜູ້​ທີ່​ເລີ່​ມ​ເຂົ້າ​ຮ່ວມ​ ປສ. ​ແຕ່​ປີ 2025. ​ເປັນ​ອັນວ່າ, ຜູ້​ອອກ​ແຮງ​ງານ​ໃນ​ພາກ​ລັດຜູ້​ທຳ​ອີດ ​ທີ່​ໄດ້ຄິດ​ສະ​ເລ່ຍຕະຫຼອດ​ໄລຍະ​ເວລາ​ປະກັນ​ໄພ ​ແມ່ນ​ຜູ້​ທີ່​ຈະ​ອອກ​ກິນ​ເບ້ຍບຳນານ​​ປີ 2045). ການຈັດ​ຕັ້ງ​ປະຕິບັດ​ຍັງ​ຕິດ​ຂັດຢູ່(1).

ການ​ອອກ​ແບບ​ນະ​ໂຍບາຍປະກັນ​​ໄພບຳນານມີ​ຫຼາຍ​ຈຸດ​ທີ່​ບໍ່​ເໝາະ​ສົມ: 1- ກຳນົດ​ກ່ຽວ​ກັບ​ເວລາ​ເຂົ້າ​ຮ່ວມ ປສ. ​ເພື່ອ​ໄດ້​ຮັບ​ເງິນ​ບຳນາມ​ແມ່ນ​ຍາວ​ໂພດ (20 ປີ) ​ໃນ​ຂະນະທີ່​ເງື່ອນ​ໄຂສຳລັບ​ການ​ຮັບ​ເງິນ​ປະກັນ​ໄພ​ສັງຄົມ​ຄັ້ງ​ດຽວພັດ​ງ່າຍດາຍ(2), ລະດັບ​ເງິນປະກັນ​ໄພ​ທີ່​ຈະ​ໄດ້​ຮັບ​ຄັ້ງ​ດຽວ​ກໍ່​ສູງ(3); 2- ການ​ອອກ​ແບບສູດ​ຄຳນວນ​ເງິນ​ບຳນານຍັງບໍ່​ສົມ​ເຫດ​ສົມ​ຜົນ, ໜັກ​ໄປ​ທາງ​ຫຼັກການ ​ເສຍ​ຄ່າ​ປະກັນ-​ຮັບ​ການ​ຊຳລະ​ປະກັນ, ​ບໍ່​ເອົາ​ໃຈ​ໃສ່​ຢ່າງ​ເໝາະ​ສົມ​ເຖິງຫຼັກການ​ແບ່ງປັນ ​ເພື່ອ​ຫຼຸດຜ່ອນ​ຊ່ອງ​ວ່າງ​ໃນ​ລະດັບ​ການ​ດຳລົງ​ຊີວິດ​ລະຫວ່າງ​ບັນດາ​ຜູ້​ກິນ​ເບ້ຍ​ບຳນານ(4); 3- ຈຳນວນ​ຜູ້​ຮັບ​ເງິນ​ບຳນານ, ​ເສຍ​ຊີວິດ​ເພີ່ມ​ຂຶ້ນ​ຢ່າງ​ໄວ, ຈຳນວນ​ຜູ້​ເຂົ້າ​ຮ່ວມ​ໃໝ່​ເພີ່ມ​ຂຶ້ນ​ຢ່າງ​ຊ້າ, ປີ 1996, ​ໃນ​ຈຳນວນຜູ້​ເສຍ​ຄ່າ​ປະກັນ​ໄພ​ສັງຄົມ 217 ຄົນ​ໃດ ມີ​ພຽງ​ຜູ້​ໜຶ່ງ​ໄດ້​ຮັບ​ເງິນ​ບຳນາມ; ປີ 2006 ອັດຕາ​ສ່ວນ​ນີ້​ແມ່ນ 12,6 ຕໍ່ 1 ​ແລະ​ປີ 2016 ​ແມ່ນ 8,5 ຕໍ່ 1; ຈຳນວນ​ຜູ້​ຮັບ​ເງິນ​ປະກັນ​ໄພ​ສັງຄົມ​ຄັ້ງ​ດຽວ​​ເພີ່ມ​ຂຶ້ນ​ຫຼາຍ, ​ໃນ​ໄລຍະ​ປີ 2012-2017, ຄິດ​ສະ​ເລ່ຍ​ແຕ່ລະ​ປີມີ 628 ພັນ​ຄົນ​ຮັບ​ເງິນ ປສ. ຄັ້ງ​ດຽວ, ພາ​ໃຫ້​ຈຳນວນ​ຜູ້​ເຂົ້າ​ຮ່ວມ​ ປສ. ​ເພີ່ມ​ຂຶ້ນ​ພຽງ 594 ພັນ​ຄົນ; ໝາຍ​ຄວາມ​ວ່າ​ແຕ່ລະ 2 ຄົນ​ໃດ​ທີ່​ເຂົ້າ​ຮ່ວມ​ໃໝ່​ໃນ​ການ ປສ. ກໍ່​ຈະ​ມີ 1 ຄົນ​ອອກ​ຈາກ​ລະບົບ; ລະດັບ​ເງິນ​ບຳນານ​ສູງ​ແລະ​ໄລຍະກິນ​ເບ້ຍ​ບຳນານ​ຍາວ​ນານ ​ໃນ​ຄວາມ​ສຳພັນ​ກັບລະດັບ​ເສຍ​ຄ່າ​ປະກັນ​ແລະ​ເວລາ​ເສຍ​ຄ່າ​ປະກັນ. ອາຍຸ​ໄຂ​ສະ​ເລ່ຍ​ເພີ່ມ​ຂຶ້ນ​ຢ່າງ​ໄວວາ​ ແຕ່​ອາຍຸບຳນາມ​ໄດ້​ກຳນົດ​ແຕ່​ປີ 1960, ມາ​ເຖິງ​ດຽວ​ນີ້​ເປັນ​ເວລາ​ເກືອບ 60 ປີ​ແລ້ວ​ ແຕ່​ບໍ່​ມີ​ການ​ປ່ຽນ​ແປງ, ​ໄດ້​ສ້າງ​​ແຮງ​ກົດ​ດັນ​ຕໍ່ຄວາມ​ສາມາດຮັກສາ​ຄວາມ​ສົມ​ດຸນ​ຂອງ​ກອງ​ທຶນ.

ການ​ປະ​ກັນ​ໄພ​ວ່າງ​ງານຍັງ​ບໍ່​ທັນ​ກາຍ​ເປັນ​ເຄື່ອງມືທີ່​ແທ້​ຈິ​ງ​ ໃນ​ການ​ຄຸ້ມ​ຄອງ​ຕະຫຼາດ​ແຮງ​ງານ. ນະ​ໂຍບາຍ ປສ. ​ເອົາ​ໃຈ​ໃສ່​ເຖິງ​ບັນດາ​ວິທີ​ການ​ແກ້​ໄຂ​ຜົນ​ສະທ້ອນ​ຕາມ​ມາ ​ໂດຍ​ຜ່ານ​ການ​ຊ່ວຍ​ໃຫ້​ຜູ້​ອອກ​ແຮງ​ງານ​ໄດ້​ຮັບ​ເບ້ຍ​ອຸດ​ໜູນ​ການ​ວ່າງ​ງານ, ຝຶກ​ອົບຮົມ​ເພື່ອ​ຕອບ​ສະໜອງ​ຄວາມ​ຕ້ອງການ​ຂອງ​ວຽກ​ງານ​ໃໝ່, ​ແນະນຳວຽກ​ງານ​ໃໝ່ ​ແຕ່​ຍັງ​ບໍ່​ທັນ​ເອົາ​ໃຈ​ໃສ່​ຢ່າງ​ເໝາະ​ສົມ​ເຖິງມາດ​ຕະການ​ປ້ອງ​ກັນ, ​ເຊັ່ນ​ຊ່ວຍ​ເຫຼືອ​ວິ​ສາ​ຫະກິດ​ໃນ​ການ​ຮັກສາ​ວຽກ​​ເຮັດ​ງານ​ທຳ, ຫຼີກ​ລ່ຽງການ​ຄັດ​ເຂ່ຍ​ແຮງ​ງານອອກ, ດຶງ​ດູດ​ແຮງ​ງານ​ວ່າງ​ງານ​ຍາວ​ນານ​ທີ່​ຫາ​ວຽກ​ເຮັດ​ງານ​ທຳ​ຍາກ... ຄື​ທີ່​ຕ່າງປະ​ເທດ​ເຄີຍ​ເຮັດ(5).

ຍັງ​ບໍ່​ທັນ​ດຳ​ເນີນ​ການ​ປັບ​ເບ້ຍບຳນານຢ່າງ​ເປັນ​ເອກະລາດ​ກັບ​ເງິນ​ເດືອນ​ຂອງ​ຜູ້​ທີ່​ກຳລັງ​ເຮັດ​ວຽກ ຕາມ​ບົດ​ສະຫຼຸບ​ເລກທີ 63-KL/TW, ວັນ​ທີ່ 27-5-2013, ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ຊຸ​ດທີ XI, “ບາງ​ບັນຫາ​ກ່ຽວ​ກັບ​ນະ​ໂຍບາຍ​ເງິນ​ເດືອນ, ປະກັນໄພສັງຄົມ, ການອຸດໜູນພິເສດຕໍ່ຜູ້ທີ່ມີຄຸນງາມຄວາມດີ ແລະກໄນົດທິດທາງປະຕິຮູບຮອດປີ 2020" ​ແລະ ກົດໝາຍ​ປະກັນ​ໄພ​ສັງຄົມ. ປະສິດທິພາບ, ປະສິດທິ​ຜົນ​ຂອງ​ການ​ຄຸ້ມ​ຄອງ​ລັດຍັງ​ຖືກ​ຈຳກັດ. ສະພາບ​ການລະ​ເມີດ​ກົດໝາຍ, ຫຼີກ​ລ່ຽງການ​ເສຍ​ຄ່າ​ປະກັນ, ຕິດ​ໜີ້​ຄ່າ ປສ., ​ເປັນ​ຕົ້ນ​ແມ່ນ​ຢູ່​ຂົງ​ເຂດ​ວິ​ສາ​ຫະກິດ, ຍັງ​ແຜ່​ຫຼາຍ​ພໍ​ຄວນ ​ແລະ​ຖືກ​ແກ້​ໄຂ​ຜ່ານ​ຜ່າ​ຢ່າງ​ຊັກ​ຊ້າ. ການຈັດ​ຕັ້ງ​ປະຕິບັດ​ນະ​ໂຍບາຍ ປສ., ປະກັນ​ໄພ​ວ່າງ​ງານ ຍັງ​ມີ​ຄວາມ​ຈຳກັດ​ຫຼາຍ​ຢ່າງ. ກົນ​ໄກ​ຄຸ້ມ​ຄອງ, ກົນ​ໄກ​ການ​ເງິນ ​ແລະ​ບຸກຄະລາ​ກອນ​ປະຕິບັດ​ການ​ປະກັນ​ໄພ​ວ່າງ​ງານ​ ຍັງ​ບໍ່​ສົມ​ເຫດ​ສົມ​ຜົນ, ຂຶ້ນ​ກັບ​ງົບປະມານ​ແຫ່ງ​ລັດ, ບໍ່​ສອດຄ່ອງ​ກັບຫຼັກ​ມູນ​ຂອງ​ການ​ປະກັນ ​ແລະກົດ​ລະບຽບ​ສາກົນ ​ແຕ່​ພັດ​ຊັກ​ຊ້າ​ໃນ​ການ​ແກ້​ໄຂ​ດັດ​ແປງ, ບໍ່​ເສີມ​ຂະຫຍາຍ​ໄດ້ພະ​ລາ​ບົດບາດ​ຕັ້ງໜ້າ​ຂອງ​ນະ​ໂຍບາຍ. ຄວາມ​ຮັບ​ຮູ້​ຂອງ​ຜູ້​ອອກ​ແຮງ​ງານ​ແລະ​ນາຍ​ຈ້າງ​ພາກສ່ວນ​ໜຶ່ງ​ກ່ຽວ​ກັບ ປສ. ຍັງ​ບໍ່​ທັນ​ຄົບ​ຖ້ວຍ. ວຽກ​ງານ​ຂໍ້​ມູນ​ຂ່າວສານ ການໂຄສະນາ ການ​ເຜີຍ​ແຜ່​ນະ​ໂຍບາຍ​ແລະກົດໝາຍ ບໍ່ມີ​ປະສິດທິ​ຜົນ​.

ບັນດາ​ຈຸດ​ອ່ອນ, ຂໍ້​ຈຳກັດ​ທີ່​ກ່າວ​ມາ​ເທິງ​ນີ້​ແມ່ນ​ຍ້ອນ​ຫຼາຍ​ສາ​ເຫດ, ​ໃນ​ນັ້ນ​ສາ​ເຫດ​ອັດຕະວິ​ໄສ​ເປັນ​ຕົ້ນຕໍ:

ທີ​ໜຶ່ງ, ນະ​ໂຍບາຍ ປສ. ຂອງ​ຫວຽດນາມ​ຫາ​ກໍ່​ເປັນ​ຮູບ​ເປັນ​ຮ່າງ​ຂຶ້ນ​ແລະພັດທະນາ ພ້ອມ​ກັນ​ກັບ​ຂະ​ບວນວິວັດ​ການຫັນປ່ຽນ​ຮູບ​ແບບ​ເສດຖະກິດ ຈາກ​ເສດຖະກິດ​ແຜນການ​ລວມສູນ, ​ເກື້ອກູນ ​ໄປ​ເປັນ​ເສດຖະກິດ​ຕະຫຼາດ​ກຳນົດ​ທິດ​ສັງຄົມ​ນິຍົມ, ​ໃນ​ເມື່ອ ຈິນຕະນາການ, ທິດ​ສະ​ດີ, ຄວາມ​ຮັບ​ຮູ້​ກ່ຽວ​ກັບ ປສ. ຕ້ອງການ​ວິວັດ​ການ​ບູລະນະ​ເທື່ອ​ລະ​ກ້າວ; ຄວາມ​ສາມາດ​ອອກ​ແບບ​ລະບົບ​ຍັງ​ຖືກ​ຈຳກັດ. ການ​ກໍ່​ຕັ້ງ, ບູລະນະ​ນະ​ໂຍບາຍ ປສ. ຕ້ອງການ​ມີ​ເວລາ​ຍາວນານ, ​ໃນ​ເມື່ອ​ພວກ​ເຮົາ​ຫາ​ກໍ່​ປະຕິບັດ​ໄດ້ 20 ກວ່າ​ປີ. ​ເພາະສະ​ນັ້ນ, ການ​ກໍ່​ສ້າງ​ນະ​ໂຍບາຍ, ກົດໝາຍ, ອອກ​ແບບ​ກົງ​ຈັກ​ຈັດ​ຕັ້ງ​ປະຕິບັດ ປສ. ຍັງ​ງຸ່ມ​ງ່າມ, ບໍ່​ຄົບ​ຊຸດ, ຂາດ​ຄວາມ​ສະ​ເໝີ​ຕົ້ນ​ສະ​ເໝີ​ປາຍ.

ທີ​ສອງ, ຄຸນ​ລັກສະນະ​ພິ​ເສດ​ຂອງ​ໂຄງ​ປະກອບ​ແຮງ​ງານ​ຢູ່​ປະ​ເທດ​ເຮົາ​ແມ່ນ ສ່ວນ​ຫຼາຍ​ເຮັດ​ວຽກ​ຢູ່​ໃນ​ຂົງ​ເຂດ​ທີ່​ບໍ່​ມີ​ການ​ພົວພັນ​ແຮງ​ງານ. ລາຍ​ໄດ້​ຂອງ​ປະຊາຊົນ​ສ່ວນ​ຫຼາຍ​ຍັງ​ຕ່ຳ ​ແລະ​ບໍ່​ເປັນ​ປົກກະຕິ, ຄວາມ​ກົດ​ດັນ​ການ​ໃຊ້​ຈ່າຍ​ສະ​ເພາະ​ໜ້າ​ຍັງ​ແຮງ​ຫຼາຍ. ​ເຄືອ​ຂ່າຍ​ຄວາມ​ປອດ​ໄພ​ສັງຄົມທີ​ບໍ່​ເປັນ​ທາງ​ການ​ອີງ​ບົນ​ຮູບ​ແບບ​ຄອບຄົວ​ດັ້ງ​ເດີມ​ຍັງ​ແຜ່​ຫຼາຍ. ດັ່ງ​ນັ້ນ, ປະຊາຊົນ​ພາກສ່ວນ​ໜຶ່ງ​ທີ່​ບໍ່​ໜ້ອຍ ບໍ່​ໄດ້​ເອົາ​ໃຈ​ໃສ່​ເຖິງ​ການ​ເຂົ້າ​ຮ່ວມ ປສ..

ທີ​ສາມ, ຄວາມ​ສາມາດ​ກໍ່ສ້າງ​ແລະຈັດ​ຕັ້ງ​ປະຕິບັດ​ແຜນ​ນະ​ໂຍບາຍຂອງ​ພັກ, ກົດໝາຍ​ຂອງ​ລັດ​ກ່ຽວ​ກັບ ປສ. ຍັງ​ຖືກ​ຈຳກັດ​ໃນ​ຫຼາຍ​ດ້ານ. ຄວາມ​ຮັບ​ຮູ້​ກໍ່​ບໍ່​ຄົບ​ຖ້ວຍ ​ເລິກ​ເຊິ່ງ; ຍັງ​ບໍ່​ທັນ​ຖື​ວຽກ​ງານ​ນີ້​ເປັນ​ເສົາ​ຄ້ຳ​​ໃນ​ການ​ພັດທະນາ​ເສດຖະກິດ-ສັງຄົມ​ແບບ​ຍືນ​ຍົງ. ຄວາມ​ສາມາດ​ວິ​ເຄາະ​​ໄຈ້​ແຍກ, ຄາດ​ຄະ​ເນ​ຍັງ​ອ່ອນ​ຫຼາຍ. ວຽກ​ງານ​ສະຫຼຸບ​ເບື້ອງ​ຕົ້ນ, ສະຫຼຸບສັງ​ລວມພຶດຕິ​ກຳ ​ແລະ ກວດກາ, ຕິດຕາມ​ກວດກາ, ​ຈັດການແກ້​ໄຂການລະ​ເມີດ​ນະ​ໂຍບາຍ​ແມ່ນ​ບໍ່​ໄດ້​ຕາມ​ຄວາມ​ຕ້ອງການ.

ທີ​ສີ່, ບໍ່​ໄດ້​ເອົາ​ໃຈ​ໃສ່​ ​ໃຫ້​ຄວາມ​ສຳຄັນ​ແກ່​ວຽກ​ງານ​ຂໍ້​ມູນ​ຂ່າວສານ. ຄວາມ​ຮັບ​ຮູ້​ຂອງ​ຜູ້​ເຂົ້າ​ຮ່ວມ ປສ. ກ່ຽວ​ກັບ ປສ. ​ໃນ​ພື້ນຖານ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ຍັງ​ຖືກ​ຈຳກັດ​ຫຼາຍ, ​ເປັນ​ຕົ້ນ​ແມ່ນ​ຈິດ​ສຳນຶກ​ກ່ຽວ​ກັບ​ສິດຜົນປະ​ໂຫຍ​ດ, ຄວາມ​ຮັບຜິດຊອບ​ເສຍ​ຄ່າ ປສ. ຂອງ​ຜູ້ນຳ​ໃຊ້​ແຮງ​ງານ (ນາຍ​ຈ້າງ) ​ແລະ​ຜູ້​ອອກ​ແຮງ​ງານ.

ທິດ​ທາງ​ບູລະນະນະ​ໂຍບາຍ​ປະກັນ​ໄພ​ສັງຄົມ ຕາມ​ຈິດ​ໃຈ​ຂອງ​ມະຕິ​ກອງ​ປະຊຸມ​ສູນ​ກາງ​ພັກ​ຄັ້ງ​ທີ 7 ສະ​ໄໝ​ທີ XII (ມະຕິ​ເລກທີ 28-NQ/TW)

ພາຍຫຼັງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່ (1986-2018), ຫວຽດນາມ​ໄດ້​ພົ້ນອອກ​ຈາກ​ສະພາບ​ການ​ປະ​ເທດ​ດ້ອຍ​ພັດທະນາ, ກຳລັງ​ແຮງ​ຂອງ​ປະ​ເທດ​ໄດ້​ເພີ່ມ​ຂຶ້ນ​ພໍ​ຄວນ; ມູນເຊື້ອ​ສາມັກຄີ, ຮັກ​ແພງ​ຊ່ວຍ​ເຫຼືອຊຶ່ງ​ກັນ​ແລະ​ກັນຂອງ​ຊາດ ​ສືບ​ຕໍ່​ໄດ້​ຮັບ​ການ​ເສີມ​ຂະຫຍາຍ; ການ​ເຊື່ອມ​ໂຍງ​ສາກົນ​ນັບ​ມື້​ນັບ​ກວ້າງຂວາງ​ເລິກ​ເຊິ່ງ; ຖອດ​ຖອນ​ໄດ້​ບົດ​ຮຽນ​ທີ່​ລ້ຳ​ຄ່າຫຼາຍ​ຢ່າງຜ່ານ 20 ກວ່າ​ປີ​ແຫ່ງ​ການ​ພັດທະນາ​ນະ​ໂຍບາຍ ປສ.. ​ແຕ່​ວ່າ, ​ເສດຖະກິດ​ພາຍ​ໃນ​ປະ​ເທດ​ຍັງ​ມີ​ຄວາມ​ຫຍຸ້ງຍາກ, ​ແຫຼ່ງງົບປະມານ​ແຫ່ງ​ລັດ​ຍັງ​ຖືກ​ຈຳກັດ; ລາຍ​ໄດ້​ຂອງ​ປະຊາຊົນ​ສ່ວນ​ຫຼາຍ​ຍັງ​ຕ່ຳ​ແລະ​ບໍ່​ເປັນ​ປົກກະຕິ; ອັດຕາ​ສ່ວນ​ແຮງ​ງານ​ໃນ​ຂົງ​ເຂດ​ທີ່​ບໍ່​ເປັນ​ທາງ​ການ​ຍັງ​ສູງ; ການ​ປັບ​ປ່ຽນ​ບາງ​ນະ​ໂຍບາຍ ປສ. ຜ່ານ​ຫຼາຍ​ໄລຍະ ​ເພື່ອ​ຮັບປະກັນ​ຄວາມ​ໝັ້ນຄົງ​ຂອງ​ກອງ​ທຶນ​ປະກັນ​ໄພ​ສັງຄົມ ກໍ່​ໄດ້​ພາ​ໃຫ້​ເກີດ​ຄວາມ​ບໍ່​ສົມ​ເຫດ​ສົມ​ຜົນ​ທີ່​ແນ່ນອນ; ຄວາມດັນ​ຂອງ​ປະຊາກອນ​ສູງ​ອາຍຸ​ຕໍ່​ລະບົບ ປສ. ​ແມ່ນ​​ແຮງ​ທີ່​ສຸດ; ຜົນ​ກະທົບ​ຂອງການ​ປະຕິວັດ​ອຸດສາຫະກຳ 4.0 ​ເຮັດ​ໃຫ້​ມີ​ການ​ປ່ຽນ​ແປງ​ຢ່າງ​ໄວ​ວາໃນ​ໂຄງ​ກະ​ກອບ​ແຮງ​ງານ ​ແລະ​ການ​ພົວພັນ​ແຮງ​ງານ. ສະຖານະ​ການ, ​ເງື່ອນ​ໄຂ​ໃໝ່​ໃນ​ປະຈຸ​ບັນພວມພາ​ໃຫ້​ເກີດ​ໂອກາດ ​ແລະສິ່ງທ້າ​ທາຍ​ຫຼາຍ​ຢ່າງ​ທີ່​ແຊກ​ຊ້ອນ​ກັນ ຊຶ່ງ​ຮຽກຮ້ອງ​ໃຫ້​ມີ​ທັດສະນະ​ຊີ້​ນຳ​ກ່ຽວ​ກັບ​ການ​ປະຕິ​ຮູບ​ນະ​ໂຍບາຍ ປສ. ທີ່​ສອດຄ່ອງ​ເໝາະ​ສົມ.

ທີ​ໜຶ່ງ, ປສ. ​ເປັນ​ເສົາ​ຄ້ຳ​ຫຼັກ​ຂອງ​ລະບົບ​ຄວາມ​ປອດ​ໄພ​ສັງຄົມ​ ໃນ​ພື້ນຖານ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ, ປະກອບສ່ວນ​ສຳຄັນ​ເຂົ້າ​ໃນ​ການ​ປະຕິບັດ​ຄວາມ​ກ້າວໜ້າ ຍຸຕິ​ທຳ​ສັງຄົມ, ຮັບປະກັນ​ຄວາມ​ໝັ້ນຄົງ​ທາງ​ການ​ເມືອງ-ສັງຄົມ, ຊີວິດ​ການ​ເປັນ​ຢູ່​ຂອງ​ປະຊາຊົນ ​ແລະ​ພັດທະນາ​ປະ​ເທດ​ຢ່າງ​ຍືນ​ຍົງ.

ທີ​ສອງ, ພັດທະນາ​ລະບົບ​ນະ​ໂຍບາຍ ປສ. ຢ່າງ​ໄຫວ​ພິບ, ຫຼາຍ​ຮູບ​ຫຼາຍ​ແບບ, ຫຼາຍ​ຊັ້ນ, ທັນ​ສະ​ໄໝ, ​ເຊື່ອມ​ໂຍງ​ສາກົນ​ຫັນ​ໄປ​ສູ່ການປົກ​ຫຸ້ມທົ່ວ​ປວງ​ຊົນ​ ຕາມ​ຂັ້ນ​ຕອນ​ທີ່ສອດຄ່ອງ​ກັບ​ເງື່ອນ​ໄຂ​ພັດທະນາ​ເສດຖະກິດ-ສັງຄົມ, ສົມທົບ​ຢ່າງ​ກົມກຽວ​ບັນດາ​ຫຼັກການ ​ເສຍ​ຄ່າ​ປະກັນ-ຮັບ​ການ​ຊຳລະ​ປະກັນ; ຍຸຕິ​ທຳ, ສະ​ເໝີ​ພາບ; ​ແບ່ງປັນ​ແລະ​ຍືນ​ຍົງ.

ທີ​ສາມ, ການປະຕິ​ຮູບນະ​ໂຍບາຍ ປສ. ​ມີ​ລັກສະ​ນະ​ຮີບ​ດ່ວນ ທັງ​ມີ​ລັກສະນະ​ຍາວ​ນານ; ສົມທົບ​ຢ່າງ​ກົມກຽວລະຫວ່າງ​ການ​ສືບ​ທອດ, ຄວາມ​ໝັ້ນ​ຄົງ​ແລະ​ການ​ປ່ຽນ​ແປງ​ໃໝ່, ການພັດທະນາ ​ແລະ ​ຕ້ອງຕັ້ງ​ຢູ່​ໃນ​ສາຍ​ພົວພັນ​ກັບ​ການປ່ຽນ​​ແປງ​ໃໝ່, ພັດທະນາ​ບັນດາ​ນະ​ໂຍບາຍ​ສັງຄົມ​ອື່ນ, ​ເປັນ​ຕົ້ນ​ແມ່ນ​ລະບອບ​ເງິນ​ເດືອນ, ລາຍ​ໄດ້, ການ​ອຸດ​ໜູນ​ສັງຄົມ ​ເພື່ອ​ໃຫ້​ພົນລະ​ເມືອງ​ທຸກ​ຄົນລ້ວນ​ແຕ່​ໄດ້​ຮັບປະກັນ​ຄວາມ​ປອດ​ໄພ​ສັງຄົມ.

ທີ​ສີ່, ພັດທະນາ​ລະບົບ​ການຈັດ​ຕັ້ງ​ປະຕິບັດ​ນະ​ໂຍບາຍປະກັນ​ໄພ​ສັງຄົມ​ແບບ​ອາຊີບ, ທັນ​ສະ​ໄໝ ​ແລະ​ເຊື່ອມ​ໂຍງ​ສາກົນ, ປັບປຸງ​ຄວາມ​ເຊື່ອ​ຖື, ຄວາມ​ຈັບ​ໃຈ ​ແລະ ຄວາມ​ພໍ​ໃຈ​ຂອງ​ປະຊາຊົນ ກໍ່​ຄື​ບັນດາ​ເຈົ້າພາບ​ທີ່​ເຂົ້າ​ຮ່ວມ​ການ ປສ..

ທີ​ຫ້າ, ປະຕິບັດ​ນະ​ໂຍບາຍ ປສ. ​ເປັນ​ຢ່າງ​ດີ ​ແມ່ນ​ໜ້າ​ທີ່​ຂອງ​ທົ່ວ​ທັງ​ລະບົບ​ການ​ເມືອງ, ​ແມ່ນ​ຄວາມ​ຮັບຜິດຊອບ​ຂອງ​ບັນດາ​ຄະນະ​ພັກ, ອຳນາດ​ການ​ປົກຄອງ, ອົງຄະ​ນະມະ​ຫາ​ຊົນ, ອົງການ​ຈັດ​ຕັ້ງ​ສັງຄົມ, ວິ​ສາ​ຫະກິດ ​ແລະ​ຂອງ​ປະຊາຊົນ​ແຕ່ລະຄົນ.

ອີງ​ໃສ່​ບັນດາ​ທັດສະນະ​ຊີ້​ນຳ​​ເທິງ​ນີ້, ​ເປົ້າ​ໝາຍ​ສັງລວມ ​ໃນ​ການ​ປະຕິ​ຮູບນະ​ໂຍບາຍ ປສ. ຂອງ​ປະ​ເທດ​ເຮົາ​ໃນ​ໄລຍະ​ເວລາຕໍ່​ໄປ​ແມ່ນ: ປສ. ກາຍ​ເປັນ​ເສົາຄ້ຳ​ຫຼັກ​ທີ່ແທ້​ຈິງ​ຂອງລະບົບ​ຄວາມ​ປອດ​ໄພ​ສັງຄົມ, ​ໄດ້​ຮັບ​ການ​ເປີດ​ກວ້າງ​​ເທື່ອ​ລະ​ກ້າວ​ຢ່າງ​ໜັກ​ແໜ້ນ ກ້າວ​ໄປ​ເຖິງ​ການ​ປະຕິບັດ ປສ. ທົ່ວ​ປວງ​ຊົນ. ພັດທະນາ​ລະບົບ ປສ. ຢ່າງ​ໄຫວ​ພິບ, ຫຼາຍ​ຮູບ​ຫຼາຍ​ແບບ, ຫຼາຍ​ຊັ້ນ, ທັນ​ສະ​ໄໝ ​ແລະ ​ເຊື່ອມ​ໂຍງ​ສາກົນ​ ຕາມຫຼັກການ ​ເສຍ​ຄ່າ​ປະກັນ-​ໄດ້ຮັບ​ການ​ຊຳລະ​ປະກັນ, ຍຸຕິ​ທຳ, ສະ​ເໝີ​ພາບ, ​ແບ່ງປັນ ​ແລະ ໝັ້ນຄົລຍືນ​ຍົງ. ຍົກ​ສູງ​ປະສິດທິພາບ, ປະສິດທິ​ຜົນ​ການ​ຄຸ້ມ​ຄອງ ​ແລະ ປະຕິບັດ​ນະ​ໂຍບາຍ ປສ. ທີ່​ກະທັດ​ລັດ​ເບົາບາງ, ມື​ອາຊີບ, ທັນ​ສະ​ໄໝ, ມີ​ປະສິດທິ​ຜົນ, ​ເຊື່ອ​ຖື​ໄດ້ ​ແລະ​ໂປ່​ງ​ໃສ.

​ເປົ້າ​ໝາຍ​ສັງ​ລວມນີ້​ຕ້ອງ​ໄດ້​ຫັນ​ເປັນ​ລະອຽດ​ໃນ​ເປົ້າໝາຍ​ຕ່າງໆ ທີ່​ມີ​ຂັ້ນ​ຕອນ​ການ​ປະຕິບັດ​ທີ່​ລະອຽດ: 1- ​ໄລຍະ​ຮອດ​ປີ 2021, ສູ້​ຊົນ​ເພື່ອ​ມີ​ປະມານ 35% ຂອງ​ກຳລັງ​ແຮງ​ງານ​ໃນ​ໄວ​ອາຍຸ​ ​ໄດ້ເຂົ້າ​ຮ່ວມ​ການ ປສ.; ຮອດ​ປີ 2025 ມີ​ປະມານ 45% ​ແລະ​ຮອດ​ປີ 2030 ມີ​ປະມານ 60%. 2- ​ໄລຍະ​ຮອດ​ປີ 2021, ສູ້​ຊົນ​​ເພື່ອ​ມີ​ປະມານ 45% ຂອງ​ຈຳນວນຄົນ​ຫຼັງ​ໄວ​ກະສຽນ​ ໄດ້​ຮັບ​ເງິນ​ບຳນານ, ປສ. ລາຍ​ເດືອນ ​ແລະ​ຄວາມ​ຊ່ວຍ​ເຫຼືອ​ທາງ​ສັງຄົມ (ເງິນ​ບຳນານ​ທາງ​ສັງຄົມ); ຮອດ​ປີ 2025 ມີ​ປະມານ 55% ​ແລະ​ຮອດ​ປີ 2030 ມີ​ປະມານ 60%. 3- ​ໄລຍະ​ຮອດ​ປີ 2021, ອັດຕາ​ການ​ເຮັດ​ທຸລະ​ກຳ​ທາງ​ເອ​ເລັກ​ໂຕຣນິກບັນລຸ 100%. ປະຕິບັດ​ບໍລິການ​ສາທາລະນະ​ອອນ​ໄລ​ລະດັບ 4. ຫຼຸດຜ່ອນ​ເວລາ​ຕິດ​ຕໍ່​ລະຫວ່າງ​ອົງການ ປສ. ກັບ​ວິ​ສາ​ຫະກິດ ລົງ​ໃຫ້​ເທົ່າ​ກັບ​ລະດັບຂອງ​ບັນດາ​ປະ​ເທດ​ອາ​ຊຽນ 4. 4- ​ໄລຍະ​ຮອດ​ປີ 2021, ສູ້​ຊົນ​ຍົກ​ດັດ​ສະ​ນີການ​ປະ​ເມີນ​ລະດັບ​ຄວາມ​ເພິ່ງ​ພໍ​ໃຈ​ຂອງ​ຜູ້​​ເຂົ້າ​ຮ່ວມ​ການ​ປະກັນ​ໄພ​ສັງຄົມ​ຂຶ້ນ​ເປັນ 80%; ຮອດ​ປີ 2025 ບັນລຸ​ລະດັບ 85% ​ແລະ​ຮອດ​ປີ 2030 ບັນລຸ​ລະດັບ 90%.

ຜ່ານ​ການ​ສະຫຼຸບ​ສັງ​ລວມທິດ​ສະ​ດີ​ແລະ​ພຶດຕິ​ກຳ​ແຫ່ງ​ການ​ພັດທະນາ ປສ. ຢູ່​ຫວຽດນາມ ​ແຕ່​ປີ 1995 ຮອດ​ດຽວ​ນີ້; ຜົນ​ຂອງ​ການ​ຄົ້ນຄວ້າ​ສຳ​ຫຼວດຢ່າງ​ກວ້າງຂວາງ​ຢູ່​ໃນ​ປະ​ເທດແລະຕ່າງປະ​ເທດ ດ້ວຍ​ການ​ປະກອບ​ຄວາມ​ຄິດ​ຄວາມ​ເຫັນ​ຂອງ​ຫຼາຍ​ສຳນັກງານ​ອົງການ, ການຈັດ​ຕັ້ງ, ຜູ້​ຊ່ຽວຊານ, ນັກວິທະຍາສາດ​ໃນ​ປະ​ເທດ​ແລະ​ຕ່າງປະ​ເທດ ​ໄດ້​ທຳ​ຄວາມ​ກະຈ່າງ​ແຈ້ງ​ບັນດາ​ເນື້ອ​ໃນ​ພື້ນຖານ​ກ່ຽວ​ກັບ​ການ​ປະຕິ​ຮູບ​ນະ​ໂຍບາຍ ປສ. ຂອງ​ຫວຽດນາມ​ໃນ​ເວລາ​ຕໍ່​ໄປ, ກວມ​ມີ: 1- ກໍ່ສ້າງ​ລະບົບ ປສ. ຫຼາຍ​ຊັ້ນ. 2- ການ​ກໍ່ສ້າງ​ເພີ່ມ​ເຕີມ​ຂໍ້​ກຳນົດ​ກ່ຽວ​ກັບ​ເງື່ອນ​ໄຂ​ເວລາ​ເຂົ້າ​ຮ່ວມ ປສ. ​ເພື່ອ​ຮັບ​ເງິນ​ບຳນານຕາມ​ທິດ​ໄຫວ​ພິບ ພ້ອມ​ກັບ​ການ​ດັດ​ປັບ​ສູດ​ຄິດ​ໄລ່​ເງິນ​ບຳນານຕາມ​ຫຼັກການ ​ເສຍ​ຄ່າ​ປະ​ກັນ-ຮັບ​ເງິນ​ປະກັນ, ຍຸຕິ​ທຳ, ສະ​ເໝີ​ພາບ, ​ແບ່ງປັນ​ແລະ​ໝັ້ນ​ຄົງຍືນ​ຍົງ. ​ຂະຫຍາຍ​ເປົ້າ​ໝາຍ​ເຂົ້າ​ຮ່ວມ ປສ. ບັງຄັບ ​ໄປ​ຍັງ​ກຸ່ມ​ເປົ້າ​ໝາຍ​ອື່ນ. 3- ​ເພີ່ມ​ທະວີ​ການ​ເຊື່ອມ​ຕໍ່, ຊ່ວຍ​ໜູນ​ກັນ​ລະຫວ່າງບັນດາ​ນະ​ໂຍບາຍ ປສ. ກໍ່​ຄື​ຄວາມ​ໄຫວ​ພິບ​ຂອງ​ບັນດາ​ນະ​ໂຍບາຍ, ​ແນ​ໃສ່​ບັນລຸ​ຈຸດປະສົງ​ຂະຫຍາຍ​ຄວາມ​ປົກ​ຫຸ້ມ. 4- ດຳ​ເນີນ​ການປະຕິ​ຮູບ​ໃນ​ການກໍ່ສ້າງ​ແລະປະຕິບັດ​ນະ​ໂຍບາຍ ​ແນ​ໃສ່​ປັບປຸງ​ຄວາມ​ເຊື່ອ​ຖື, ​ເພີ່ມ​ຄວາມ​ເພີ່ງ​ພໍ​ໃຈ​ຂອງ​ຜູ້​ເຂົ້າ​ຮ່ວມ​ລະບົບ ປສ.. 5- ຊຸກຍູ້​ຂະ​ບວນການ​ເພີ່ມ​ຈຳນວນ​ແຮງ​ງານ​ເຂົ້າ​ຮ່ວມ ປສ. ​ໃນ​ຂົງ​ເຂດ​ທີ່​ບໍ່​ເປັນ​ທາງ​ການ. 6- ດັດ​ແປງ, ​ແກ້​ໄຂ​ສິ່ງ​ທີ່​ບໍ່​ສົມ​ເຫດ​ສົມ​ຜົນ​ໃນ​ລະບອບ​ປະກັນ​ໄພ​ບຳນາມ​ໃນ​ປະຈຸ​ບັນ ຕາມ​ທິດ​ມີ​ຄວາມ​ໄຫວ​ພິບ​ກວ່າ​ ກ່ຽວ​ກັບ​ເງື່ອນ​ໄຂ​ໄດ້​ຮັບ​ເງິນ​ບຳນານ, ​ມີ​ຄວາມແໜ້ນ​ແຟ້ນກວ່າ​ໃນ​ຂໍ້​ກຳນົດ​ການ​ຮັບ​ເງິນ ປສ. ຄັ້ງ​ດຽວ, ​ເພີ່ມ​ອາຍຸ​ກະສຽນ​ສະ​ເລ່ຍຕາມ​ຈິງຂອງ​ຜູ້​ອອກ​ແຮງ​ງານ. 7- ປະຕິບັດ​ການ​ປັບ​ອາຍຸ​ກະສຽນ​ຕາມ​ແຜນການ. 8- ດັດ​ແປງ​ຂໍ້​ກຳນົດ​ຕ່າງໆ​ກ່ຽວ​ກັບຄ່າ​ປະກັນ​ໄພ, ຫຼັກ​ຖານ​ຂອງ​ການ​ເສຍ​ຄ່າ ​ປສ. ​ເພື່ອ​ບັນລຸ​ຈຸດປະສົງ​ຂະ​ຫຍາ​ຍຄວາມ​ປົກ​ຫຸ້ມ​ຂອງ ປສ.. 9- ດັດ​ປັບ​ອັດຕາ​ສ່ວນ​ສະ​ສົມ ​ເພື່ອ​ບັນລຸ​ອັດຕາ​ສ່ວນ​ການ​ຮັບ​ເງິນ​ບຳນານ​ສູງ​ສຸດ ທີ່​ສອດຄ່ອງ​ກັບ​ກົດ​ລະບຽບ​ສາກົນ. 10- ​ເປີດ​ຄວາມ​ຫຼາກ​ຫຼາຍທາງ​ດ້ານ​ລາຍ​ຊື່​ແລະ​ໂຄງ​ສ້າງການ​ລົງທຶນ​ຂອງ​ກອງ​ທຶນ​ປະກັນ​ໄພ​ສັງຄົມ ຕາມ​ຫຼັກການ​ປອດ​ໄພ, ຍືນ​ຍົງ, ມີ​ປະສິດທິ​ຜົນ. 11- ປະຕິບັດກາ​ນດັດສົມ​ເງິນ​ບຳນານ​ຢ່າງ​ເປັນ​ເອກະລາດ​ທຽບ​ຖານ ​ໃນ​ສາຍ​ພົວພັນ​ກັບ​ເງິນ​ເດືອນຂອງ​ຜູ້​ທີ່​ພວມ​ເຮັດ​ວຽກ, ປ່ຽນ​ແປງ​ວິທີ​ດັດ​ປັບ​ເງິນ​ເດືອນ​ຕາມ​ທິດ​ແບ່ງປັນ.

​ເພື່ອ​ຍົກ​ສູງປະສິດທິ​ຜົນ​ຂອງ​ນະ​ໂຍບາຍ​ປະກັນ​ໄພ​ສັງຄົມ​ຢູ່​ຫວຽດນາມ ​ໃນ​ເງື່ອນ​ໄຂ​ໃໝ່

ອີງ​ໃສ່​ເນື້ອ​ໃນ​ພື້ນຖານຂອງ​ການ​ປະຕິ​ຮູບ​ນະ​ໂຍບາຍ ປສ. ຂອງ​ຫວຽດນາມ ​ແລະ​ເພື່ອ​ບັນລຸ​ບັນດາ​ເປົ້າ​ໝາຍ​ທີ່​ກ່າວ​ມາ​ຂ້າງເທີ​ງ, ​ໃນ​ຊຸມ​ປີ​ສະ​ເພາ​ໜ້າ, ຕ້ອງການ​ປະຕິບັດ​ບັນດາ​ໜ້າ​ທີ່, ວິທີ​ແກ້​ໄຂຕົ້ນຕໍ​ລຸ່ມ​ນີ້:

ທີ​ໜຶ່ງ, ​ເພີ່ມ​ທະວີ​ການ​ນຳພາ, ຊີ້​ນຳ​ວຽກ​ງານ​ໂຄສະນາ​ຖະ​ແຫຼ​ງຂ່າວ, ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ນະ​ໂຍບາຍ ປສ.

ຍົກ​ສູງ​ບົດບາດ, ຄວາມ​ຮັບຜິດ​ຊອບ​ຂອງ​ບັນດາ​ຄະນະ​ພັກ, ອຳນາດ​ການ​ປົກຄອງ​ໃນວຽກ​ງານ​ໂຄສະນ​າ, ​ເຜີ​ຍ​ແຜ່​ນະ​ໂຍບາຍ, ກົດໝາຍ​ກ່ຽວ​ກັບ ປສ., ​ເພື່ອ​ໃຫ້ພະນັກງານ, ສະມາຊິກ​ພັກ, ປະຊາຊົນ​ເຫັນ​ແຈ້ງບົດບາດ, ຄວາມ​ໝາຍ​ຂອ​ງນະ​ໂຍບາຍ ປສ. ຕໍ່​ການ​ສ້າງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​​ເປັນ​ປົກກະຕິ, ຮັບປະກັນ​ສະຖຽນ​ລະ​ພາບທາງ​ດ້ານ​ເສດຖະກິດ-ສັງຄົມ ​ແລະ​ ຮັບປະກັນ​ຄວາມ​ປອດ​ໄພ​ສັງຄົມ; ຄວາມ​ຕ້ອງການ​ແລະ​ບັນດາ​ເນື້ອ​ໃນ​ພື້ນຖານ​ຂອງ​ການ​ປະຕິ​ຮູບນະ​ໂຍບາຍ ປສ., ສ້າງ​ຄວາມ​ເປັນ​ໃຈ​ເຫັນ​ດີ​ເຫັນ​ພ້ອມ​ຂອງ​ສັງຄົມ.

ທີ​ສອງ, ບູລະນະ​ລະບົບ​ກົດໝາຍ​ກ່ຽວ​ກັບ​ແຮງ​ງານ, ວຽກ​ເຮັດ​ງານ​ທຳ ​ແລະ​ການປະກັນ​ໄພ​ສັງຄົມ.

ການຫັນ​ແຜນ​ນະ​ໂຍບາຍ​ຕ່າງໆ​ເປັນ​ນິຕິ​ກຳ ​ແລະບູລະນະ​ນະ​ໂຍບາຍ, ກົດໝາຍ​ກ່ຽວ​ກັບ ປສ. ຕ້ອງ​ສົມທົບ​ກັບ​ການ​ບູລະນະ​ນະ​ໂຍບາຍ, ກົດໝາຍ​ກ່ຽວ​ກັບລະບອບ​ເງິນ​ເດືອນ, ວຽກ​ເຮັດ​ງານ​ທຳ, ນະ​ໂຍບາຍ​ຕໍ່​ຜູ້​ທີ່​ມີ​ຄຸນ​ງານ​ຄວາມ​ດີ​​ຕໍ່​ການ​ປະຕິວັດ ​ແລະ ນະ​ໂຍບາຍ, ກົດໝາຍ​ໃນ​ບັນດາ​ຂົງ​ເຂດ​ອື່ນທີ່​ກ່ຽວຂ້ອງ.

ປັບປຸງ, ​ເພີ່ມ​ເຕີມ​ກົດໝາຍ​ກ່ຽວ​ກັບ ປສ. ຕາມ​ທິດ​ກ້າວ​ໄປ​ເຖິງ​ການ​ປະຕິບັດ ປສ. ທົ່ວ​ປວງ​ຊົນ; ອອກ​ແບບ​ລະບົບ ປສ. ຫຼາຍ​ຊັ້ນ; ບູລະນະ​ຂໍ້​ກຳນົດ​ຕ່າງໆ​ກ່ຽວ​ກັບ ​ການ​ເສຍ​ຄ່າ​ປະກັນ-ການ​ຮັບ​ເງິນປະກັນ, ຮັບປະກັນ​ບັນດາ​ຫຼັກການ​ຍຸຕິ​ທຳ, ສະ​ເໝີ​ພາບ, ​ແບ່ງປັນ​ແລະ​ໝັ້ນ​ຄົມ​ຍືນ​ຍົງ. ກວດຄືນ, ດັດ​ແປງ​ຂໍ້​ກຳນົດ​ຕ່າງໆ​ກ່ຽກັບ​ຜູ້​ອອກ​ແຮງ​ງານ​ຫວຽດນາມ​ໄປ​ເຮັດ​ວຽກ​ຢູ່​ຕ່າງປະ​ເທດ, ຄົນ​ຕ່າງປະ​ເທດ​ມາ​ເຮັດ​ວຽກຢູ່​ຫວຽດນາມທີ່​ເຂົ້າ​ຮ່ວມ ປສ. ​ແບບ​ບັງຄັບ, ​ໂດຍ​ຕິ​ດກັບ​ການ​ຍູ້​ແຮງ​ການ​ເຈລະຈາ​ແລະ​ເຊັນ​ສັນຍາ​ສອງ​ຝ່າຍ​ກ່ຽວ​ກັບ ປສ..

ປັບປຸງ, ​ເພີ່​ມ​ເຕີມ​ນະ​ໂຍບາຍປະກັນ​ໄພ​ວ່າງ​ງານ, ນະ​ໂຍບາຍ​ວຽກ​ເຮັດ​ງານ​ທຳ ຕາມ​ທິດຊ່ວຍ​ເຫຼືອ​ວິ​ສາ​ຫະກິດ ​ແລະ​ຜູ້​ອອກ​ແຮງ​ງານຮັກສາ​ວຽກ​ເຮັດ​ງານ​ທຳ, ຮັບປະກັນ​ຜົນ​ປະ​ໂຫຍ​ດທີ່​ຖືກຕ້ອງ​ຂອງ​ວິ​ສາ​ຫະກິດ ​ແລະ​ຂອງ​ຜູ້​ອອກ​ແຮງ​ງານ, ​ເພື່ອ​ແກ້​ໄຂ​ຜ່ານ​ຜ່າ​ສະຖານະ​ພາບ​ການ​ສໍ້​ໂກງ, ສວຍ​ໃຊ້​ການ​ປະກັນ​ໄພ​ວ່າງ​ງານ. ມີ​ຂໍ້​ກຳນົດ​ລະອຽດ ​ແລະ​ກົນ​ໄກ​ຄຸ້ມ​ຄອງການ​ລົງທຶນ​ຂອງ​ກອງ​ທຶນ​ປະກັນ​ໄພ​ສັງຄົມ​ຢ່າງ​ແໜ້ນ​ແຟ້ນ, ຮັບປະກັນ​ການ​ລົງທຶນ​ຂອງ​ກອງ​ທຶນ​ປະກັນ​ໄພ​ສັງຄົມ​ມີ​ຄວາມ​ປອດ​ໄພ, ໝັ້ນຄົງ​ຍືນ​ຍົງ ​ແລະ​ມີ​ປະສິດທິ​ຜົນ.

ປັບປຸງບູລະນະບັນດາ​ບົດ​ລົງ​ໂທດ​ຕໍ່​ການລະ​ເມີດ​ກົດໝາຍ​ກ່ຽວ​ກັບ ປສ., ​ເປັນ​ຕົ້ນ​ແມ່ນການ​ກະທຳ​ທີ່​ເປັນ​ການ​ຫຼີກ​ລ່ຽງບໍ່​ເສຍ​ຄ່າ​ປະກັນ, ຕິດ​ໜີ້​ຄ່າປະກັນ, ສວຍ​ໃຊ້ ປສ., ຕາມ​ທິດ ອົງການ​ຄຸ້ມ​ຄອງ​ລັດ​ກ່ຽວ​ກັບ ປສ. ​ແລະ​ອົງການ​ຄຸ້ມ​ຄອງ​ກອງ​ທຶນ​ປະກັນ​ໄພ​ສັງຄົມ ມີ​ອຳນາດ​ໃນ​ການ​ລົງ​ໂທດ​ຕໍ່​ວິ​ສາ​ຫະກິດ​ທີ່ຫຼີກ​ລ່ຽງບໍ່​ເສຍ​ຄ່າ​ປະກັນ, ຕິດ​ໜີ້​ຄ່າ​ປະກັນ, ສໍ້​ໂກງ ສວຍ​ໃຊ້ ປສ.; ພ້ອມ​ກັນ​ນັ້ນ, ຜູ້​ໃຊ້​ແຮງ​ງານ​ແລະ​ຜູ້​ອອກ​ແຮງ​ງານມີ​ສິດ​ທີ່​ຈະ​ຮ້ອງທຸກ, ຫຼື​ເລິ່ມການ​ຮ້ອງ​ຟ້ອງ​ຕໍ່​ອົງການ​ຄຸ້ມຄອງ​ລັດ ​ແລະ​ອົງການ​ຄຸ້ມຄອງ​ກອງ​ທຶນ​ປະກັນ​ໄພ​ສັງຄົມ ຖ້າ​ຫາກ​ເຫັນ​ມີ​ຄວາມ​ຜິດພາດ​ໃນ​ການ​ປະຕິບັດ​ນະ​ໂຍບາຍ ປສ..

ທີ​ສາມ, ຍົກ​ສູງ​ປະສິດທິພາບ ​ແລະ​ປະສິດທິ​ຜົນ​ຂອງ​ການຄຸ້ມ​ຄອງ​ລັດ​ກ່ຽວ​ກັບ ປສ..

ຍົກ​ສູງ​ຄວາມ​ສາມາດ, ປະສິດທິພາບ​ແລະ​ປະສິດທິ​ຜົນ​ຂອງ​ການ​ຄຸ້ມ​ຄອງ​ລັດ​ກ່ຽວ​ກັບ ປສ., ​ເປັນ​ຕົ້ນແມ່ນ​ໃນ​ການວາງ​ແຜນ​ຍຸດ​ທະ​ສາດ​ການ​ພັດທະນາ, ກໍ່ສ້າງ​ແລະ​ບູລະນະ​ລະບົບ​ກົດໝາຍ​ກ່ຽວ​ກັບ ປສ.. ​ເພີ່ມ​ທະວີ​ການ​ປະສານ​ສົມທົບ​ລະຫວ່າງ​ບະ​ດາ​ຂັ້ນ, ບັນດາ​ຂະ​ແໜງ​ການ​ແລະທ້ອງ​ຖິ່ນ ​ໃນ​ການ​ຊີ້​ນຳ​ນຳພາການຈັດ​ຕັ້ງ​ປະຕິບັດ​ນະ​ໂຍບາຍ ປສ., ​ແກ້​ໄຂ​ຢ່າງ​ທັນ​ການ​ຄວາມ​ຫຍຸ້ງຍາກ, ສິ່ງ​ຄົງ​ຄ້າງ​ທີ່​ມີ​ຢູ່.

ຍົກສູງ​ລັກສະນະ​ປະຕິບັດ​ຕາມ​ກົດໝາຍ​ກ່ຽວ​ກັບ ປສ. ​ໂດຍ​ຜ່ານ​ການ​ປະຕິບັດ​ຢ່າງ​ຄົບ​ຊຸດ​ບັນດາ​ມາດ​ຕະການການ​ບໍລິຫານ, ​ເສດຖະກິດ ​ແລ​ະກົດໝາຍ ​ເພື່ອ​ເພີ່ມ​ຈຳນວນ​ຄົນ​ເຂົ້າ​ຮ່ວມ ປສ., ​ໄປ​ຄຽງ​ຄູ່​ກັບ​ການ​ເອົາ​ໃຈ​ໃສ່​ເພີ່​ນຈຳ​ນວນຄົນ​ໄດ້​ຮັບ​ຜົນ​ປະ​ໂຫຍ​ດຈາກ ປສ., ​ໂດຍ​ສະ​ເພາະ​ແມ່ນ​ລະບອບ​ບຳນານ. ​ເພີ່ມ​ທະວີ​ວຽກ​ງານ​ກວດກາ​ນ, ກວດກາ, ຕິດຕາມ​ກວດກາ​ການ​ປະຕິບັດ​ກົດໝາຍ​ກ່ຽວ​ກັບ ປສ., ຄົ້ນ​ເຜີຍ​ຢ່າງ​ທັນ​ການ​ແລະ​ແກ້​ໄຂ​ລົງ​ໂທດ​ຢ່າງ​ເຂັ້ມ​ງວດ​ຕໍ່ການ​ກະທຳ​ຜິດ, ​ເປັນ​ຕົ້ນ​ແມ່ນ​ການ​ຫຼີກ​ລ່ຽງບໍ່​ເສຍ​ຄ່າ​ປະກັນ, ຕິດ​ໜ້າ​ຄ່າ​ປະ​ກັນ, ສໍ້​ໂກງ, ສວຍ​ໃຊ້​ເງິນ ປສ..

ປັບປຸງ, ​ເພີ່ມ​ເຕີມ, ບູລະນະ​ບັນດາ​ເອກະສານ​ກົດໝາຍ ​ເພື່ອ​ຍູ້​ແຮງ​ການ​ແບ່ງ​ຂັ້ນ​ໃຫ້​ແກ່​ບັນດາ​ອົງການ ປສ.; ປະຕິບັດ​ການ​ມອບ​ລະດັບ​ຄາດໝາຍການ​ພັດທະນາ​​ເປົ້າ​ໝາຍ​ເຂົ້າ​ຮ່ວມ ປສ. ​ໃຫ້​ທ້ອງ​ຖິ່ນ; ຈຳ​ແນ​ກ​ແຍກ​ການ​ຄຸ້ມ​ຄອງລັດ ກັບ​ການ​ບໍລິ​ຫານ​ກົງຈັກ​ການຈັດ​ຕັ້ງ​ປະຕິບັດ​ນະ​ໂຍບາຍ ປສ..

​ເພີ່​ມທະວີ​ການ​ປະສານ​ສົມທົບ, ​ແບ່ງປັນ, ​ເຊື່ອມ​ຕໍ່ຂໍ້​ມູນຂ່າວສານ​ ລະຫວ່າງ​ບັນດາ​ອົງການ​ຄຸ້ມ​ຄອງ​ລັດ​ກ່ຽວ​ກັບ​ການ​ລົງທຶນ, ການ​ເງິນ, ພາສີ​ອາກອນ, ​ແຮງ​ງານ ​ເພື່ອ​ຍົກ​ສູງ​ປະສິດທິ​ຜົນ​ການ​ຄຸ້ມຄອງ​ເປົ້າ​ໝາຍ​ທີ່​ເຂົ້າ​ຮ່ວມ ປສ. ​ແລະ​ປະຕິບັດ​ນະ​ໂຍບາຍ ປສ.. ຍົກ​ສູງ​ປະສິດທິພາບ​ແລະ​ປະສິດທິ​ຜົນຂອງ​ວຽກ​ງານ​ຄົ້ນຄວ້າ​ທິດ​ສະ​ດີ​ແລະ​ສະຫຼຸບ​ສັງ​ລວມພຶດຕິ​ກຳ​ກ່ຽວ​ກັບ ປສ.. ກໍ່ສ້າ​ງພື້ນຖານ​ຂໍ້​ມູນ​ກ່ຽວ​ກັບ ປສ., ຊຸດ​ເກນ​ການ​ປະ​ເມີນ​ປະສິດທິ​ຜົນ​ການ​ປະຕິບັດ​ໜ້າ​ທີ່ ​ແລະ​ຄຸນ​ນະພາ​ບຂອງ​ການ​ໃຫ້​ບໍລິການ​ຂອງ​ອົງການ ປສ..

ທີ​ສີ່, ຍົກ​ສູງ​ຄວາມ​ສາມາດ​ບໍລິຫານ​ຈັດການ ​ແລະ​ປະສິດທິ​ຜົນ​ຂອງ​ການຈັດ​ຕັ້ງ​ປະຕິບັດ​ນະ​ໂຍບາຍ ປສ., ປະກັນ​ໄພ​ວ່າງ​ງານ.

ປັບປຸງ​ບູລະນະ​ກົງຈັກ​ການຈັດ​ຕັ້ງ​ປະຕິບັດ​ນະ​ໂຍບາຍ ປສ., ປະກັນ​ໄພ​ວ່າງ​ງານ ຢ່າງຖືກຕ້ອງ​ຕາມ​ຈິດ​ໃຈມະຕິ​ເລກທີ 18-NQ/TW, ວັນ​ທີ 25-10-2017, ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XII, “ບາງ​ບັນຫາ​ກ່ຽວ​ກັບ​ການ​ສືບ​ຕໍ່​ປ່ຽນ​ແປງ​ໃໝ່, ສັບຊ້ອນການຈັດຕັ້ງກົງຈັກຂອງລະບົບການເມືອງ ໃຫ້ກະທັດລັດເບົາບາງ, ເຄື່ອນໄຫວຢ່າງມີປະສິດທິພາບ ແລະມີປະສິດທິຜົນ". ປັບປຸງ​ແລະຍົກ​ສູງ​ຄວາມ​ສາມາດ​ເຄື່ອນ​ໄຫວ​ຂອງ​ສະພາ​ບໍລິຫານ​ປະກັນ​ໄພ​ສັງຄົມ. ປະຕິບັດ​ລະບອບ​ການ​ເງິນ, ການ​ບັນຊີ, ການກວດ​ສອບ ​ແລະ ລາຍ​ງານ​ກ່ຽວ​ກັບ ປສ. ຕາມ​ຂໍ້​ກຳນົດ​ຂອງ​ກົດໝາຍ.

ຍູ້​​ແຮງການ​ປະຕິ​ຮູບຂັ້ນ​ຕອນ​ການ​ບໍລິຫານ, ປະຕິບັດ​ການ​ບໍລິການ​ສາທາ​ລະນະ​ລະດັບ 4 ​ໃນ​ທຸກ​ຂົງ​ເຂດ ປສ., ປະກັນ​ໄພ​ວ່າງ​ງານ; ບູລະ​ນະ​ພື້ນຖານ​ຂໍ້​ມູນ​ແຫ່ງ​ຊາດ ​ແລະ​ຍູ້​ແຮງ​ການ​ເຊື່ອມ​ຕໍ່​ພື້ນຖານ​ຂໍ້​ມູນ​ແຫ່ງ​ຊາດ​ກ່ຽວກັບການ​ປະກັນ​ໄພ ກັບ​ບັນດາ​ລະບົບ​ພື້ນຖານ​ຂໍ້​ມູນ​ທີ່​ກ່ຽວຂ້ອງ​ ​ແນ​ໃສ່​ຮັບ​ໃຊ້​ເປັນ​ຢ່າງ​ດີ​ໃຫ້​ແກ່​ວຽກ​ງານປະຕິບັດ​ນະ​ໂຍບາຍ ​ແລະ​ວຽກ​ງານ​ຄົ້ນຄວ້າ, ວາງ​ກຳນົດ​ນະ​ໂຍບາຍ. ສືບ​ຕໍ່​ຫັນ​ການ​ຄຸ້ມ​ຄອງ ປສ. ​ເປັນ​ທັນ​ສະ​ໄໝ, ລົງທຶນ​ພັດທະນາ​ເຕັກ​ໂນ​ໂລ​ຊີ​ແລະວິທີ​ຄຸ້ມ​ຄອງ​ທີ່ກ້າວໜ້າ​ໃນ​ການຈັດ​ຕັ້ງ​ປະຕິບັດ ປສ., ປະກັນ​ໄພ​ວ່າງ​ງານ. ກີດ​ກັ້ນ​ຢ່າງ​ທັນ​ການ​ຕໍ່​ສະພາບ​ການສໍ້​ໂກງ, ສວຍ​ໃຊ້​ນະ​ໂຍບາຍ ປສ., ປະກັນ​ໄພ​ວ່າງ​ງານ.

ຜັນ​ຂະຫຍາຍບັນດາ​ນະ​ໂຍບາຍ​ປະກັນ​ໄພ​ວ່າງ​ງານ​ຢ່າ​ງມີ​ປະສິດທິ​ຜົນ, ​ເສີມ​ຂະຫຍາຍ​ເຕັມ​ສ່ວນ​ບັນດາ​ພາລະ​ບົດບາດ​ຂອງ​ການປະກັນ​ໄພ​ວ່າງ​ງານ, ຮັບປະກັນ​ໃຫ້ການ​ປະກັນ​ໄພ​ວ່າງ​ງານ​ ເປັນ​ເຄື່ອງມື​ຄຸ້ມ​ຄອງ​ຕະຫຼາດ​ແຮງ​ງານ​ທີ່​ແທ້​ຈິງ. ຄ່າ​ໃຊ້​ຈ່າຍ​ໃນ​ການ​ປະຕິບັດ​ນະ​ໂຍບາຍ​ປະກັນ​ໄພ​ວ່າງ​ງານ​ແມ່ນ​ມາ​ຈາກ​ກອງ​ທຶນປະ​ກັນ​ໄພ​ວ່າງ​ງານ, ບໍ່​ເອົາ​ມາ​ຈາກງົບ​ປະມານ​ຂອງ​ລັດ. ມີ​ກົນ​ໄກ​ຈັດ​ຮັບ​ບຸກຄະລາ​ກອນ, ບຳລຸງ​ສ້າງ, ຝຶກ​ອົບຮົມ​ບຸກຄະລາ​ກອນ​ຕອບ​ສະໜອງຄວາມ​ຕ້ອງການ ໜ້າ​ທີ່, ​ເປັນ​ຕົ້ນ​ແມ່ນ​ໃນ​ສະພາບ​ການ​ຕະຫຼາດ​ແຮງ​ງານ​ມີ​ການ​ຜັນ​ປ່ຽນ​ຢ່າງ​ໄວວາ ​ແລະ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ ທີ່​ໄດ້​ແລະ​ພວມ​ເຮັດ​ໃຫ້​ໂຄງ​ປະກອບ​ຂອງ​ຕະຫຼາດ​ແຮງ​ງານ​ມີ​ການ​ປ່ຽນ​ແປງ​ໄປ.

ທີ​ຫ້າ, ​ເພີ່ມ​ທະວີ​ບົດບາດນຳ​ພາ​ຂອງ​ພັກ, ​ເສີມ​ຂະຫຍາຍ​ບົດບາດ​ຂອງ​ປະຊາຊົນ, ​ແນວ​ໂຮມປະ​ເທດ​ຊາດ​ຫວຽດນາມ ​ແລະບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ.

ເພີ່ມ​ທະວີ​ບົດບາດນຳ​ພາ​ຂອງ​ພັກ​ໃນ​ການວາງ​ກຳນົດ​ນະ​ໂຍບາຍ ​ແລະ​ການຈັດ​ຕັ້ງ​ປະຕິບັດ​ນະ​ໂຍບາຍ ປສ. ຖືກຕ້ອງ​ຕາມ​ກຳນົດ​ທິດ​ສັງຄົມ​ນິຍົມ, ພິ​ເສດ​ແມ່ນ​ໃນ​ການ​ຂະຫຍາຍ​​ເປົ້າ​ໝາຍ​ເຂົ້າ​ຮ່ວມ ປສ. ​ແລະ​ປະຕິບັດ​ຕາມ​ກົດໝາຍ​ກ່ຽວ​ກັບ ປສ.. ເສີມ​ຂະຫຍາຍ​ບົດບາດ​ຂອງ​​ແນວ​ໂຮ​ໃປະ​ເທດ​ຊາດ​ຫວຽດນາມ, ຂອງ​ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແລະປະຊາຊົນ ​ໃນ​ການ​ຕິດຕາມ​ກວດກາ, ວິຈານ​ສັງຄົມ, ຈັດ​ຕັ້ງ​ການ​ໂຄສະນາ ຂົນຂວາຍ​ປະຊາຊົນ​ໃຫ້​ປະຕິບັດ​ນະ​ໂຍບາຍ ກົດໝາຍ​ກ່ຽວ​ກັບ ປສ. ​ເປັນຢ່າງ​ດີ.

ການປະກັນ​ໄພ​ສັງຄົມ​ແມ່ນ​ນະ​ໂຍບາຍ​ໃຫຍ່​ຂອງ​ພັກ​ແລະ​ລັດ, ການ​ປະຕິ​ຮູບ​ນະ​ໂຍບາຍ​ ປສ. ​ແມ່ນ​ບັນຫາ​ສຳຄັນ​ທີ່​ສຸດ, ມັນ​ພົວພັນ​ໂດຍ​ກົງ​ເຖິງ​ຊີວິດ​ການ​ເປັນ​ຢູ່​ຂອງ​ປະຊາຊົນ. ​ເພື່ອບັນລຸ​ເປົ້າໝາຍ​ທີ່​ວາງ​ໄວ້, ຕ້ອງ​ປະຕິບັດ​ຢ່າງ​ຄົບ​ຊຸດ​ບັນດາ​ມາດ​ຕະການ​ທີ່​ກ່າວມາ​ເທິງ​ນີ້, ​ໂດຍ​ມີ​ການ​​ເຂົ້າ​ຮ່ວມ​ດ້ວຍ​ຄວາມ​ຕັດ​ສິນ​ໃຈສູງຂອງ​ລະບົບ​ການ​ເມືອງ​ທັງ​ໝົດ, ​ແນ​ໃສ່​ປະກອບສ່ວນ​ທີ່​ສຳຄັນ​ເຂົ້າ​ໃນ​ການ​ປະຕິບັດຄວາມ​ກ້າວໜ້າ​ແລະ​ຍຸຕິ​ທຳ​ທາງ​ສັງຄົມ, ຮັບປະກັນ​ຄວາມ​ໝັ້ນຄົງທາ​ງການ​ເມືອງ, ລະບຽບ​ຄວາມ​ສະຫງົບ​ແລະ​ຄວາມ​ປອດ​ໄພ​ທາງ​ສັງຄົມ, ຊຸກຍູ້​ພາລະ​ກິ​ການ​ສ້າງສາ​ແລະ​ປົກ​ປັກ​ຮັກສາ​ປະ​ເທດ​ຊາດ./.

ສຈ. ປອ. ​ເວື​ອງດິ່ງ​ເຮວ້

ກຳມະ​ການ​ກົມ​ການ​ເມືອງ, ຮອງ​ນາຍົກລັດຖະມົນຕີ

---------------------------------------

- ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 912 (​ເດືອນ​ຕຸລາ 2018)

(1) ມາດຕາ 60, ວັກ 2 ຂອງ​ມາດຕາ 56 ​ແລະ ວັກ 2 ຂອງມາດຕາ 74 ຂອງ​ກົດໝາຍ​ປະກັນ​ໄພ​ສັງຄົມ​ປີ 2014.

(2) ຕາມ​ຂໍ້​ບັງຄັບ​ປັດຈຸບັນ, ຜູ້​ອອກ​ແຮງ​ງານຫຼັງ​ເລີກ​ງານ 1 ປີ, ຖ້າ​ມີ​ຄວາມ​ຕ້ອງການ​ກໍ່​ຈະ​ໄດ້​ຮັບ​ເງິນ​ປະກັນ​ໄພ​ສັງຄົມ​ຄັ້ງ​ດຽວ.

(3) ລະດັບ​ເງິນປະກັນ​ໄພ​ທີ່​ຈະ​ໄດ້​ຮັບ​ຄັ້ງ​ດຽວຢູ່​ຫວຽດນາມ​ໄດ້​ຄິດ​ໄລ່​ອີງ​ໃສ່​ສ່ວນ​ປະກອບ​ຂອງ​ຜູ້​ອອກ​ແຮງ​ງານ​ແລະ​ສ່ວນປະກອບ​ຂອງຜູ້​ຈ້າງ​ງານ, ​ໃນ​ຂະນະ​ນັ້ນ ບົດຮຽນ​ຂອງ​ຕ່າງປະ​ເທດ​​ໃນ​ການ​ໃຫ້​ຮັບ​ເງິນ​ປະກັນ​ໄພ​ສັງຄົມ​ຄັ້ງ​ດຽວ ​​ແມ່ນ​ໄດ້​ອີງ​ໃສ່​ພຽງ​ແຕ່​ພາກສ່ວນ​ປະກອບ​ຂອງ​ຜູ້​ອອກ​ແຮງ​ງານ​ເທົ່າ​ນັ້ນ ​ໂດຍ​ບໍ່​ຄິດ​ໄລ່​ພາກສ່ວນທີ່​ຜູ້​ຈ້າງ​ງານ​ປະກອບ.

(4) ວິທີ​ຄຳນວນ​ເງິນ​ບຳນານຢູ່​ຫວຽດນາມ​ແມ່ນຂຶ້ນ​ກັບ​ເງິນ​ເດືອນທີ່​ຜ່ານ​ມາ​ຂອງ​ຜູ້​ອອກ​ແຮງງານ​ແຕ່ລະຄົນ, ພາ​ໃຫ້​ຜູ້​ອອກ​ແຮງ​ງານ​ໃນ​ເວລາ​ໄປ​ເຮັດ​ວຽກ​ໄດ້​ຮັບ​ເງິນ​ເດືອນ​ສູງ ​ເມື່ອ​ອອກ​ກິນ​ເບ້ຍ​ບຳນາມ​ກໍ່​ຈະ​ໄດ້​ຮັບ​ເງິນ​ບຳນານ​ຫຼາຍ, ​ແລະ​ກົງ​ຂ້າມ. ຄິດ​ໄລ່​ຮອດ​ທ້າຍ​ປີ 2017, ຜູ້​ໄດ້​ຮັບ​ເງິນ​ບຳນານ​ສູງ​ທີ່​ສຸດ​ຢູ່​ປະ​ເທດ​ເຮົາ​ແມ່ນຫຼາຍກວ່າ 100 ລ້ານ​ດົ່ງ​ຕໍ່​ເດືອນ; ຜູ້​ໄດ້​ຮັບ​ຕ່ຳ​ສຸດ​ແມ່ນ 1 ລ້ານ 3 ​ແສນ​ດົ່ງຕໍ່​ເດືອນ. ​ເງິນ​ບຳນານ​ຂອງບາງ​ປະ​ເທດ, ​ເຊັ່ນ​ ສ.​ເກົາຫຼີ ​ແລະ ​ຈີນ ​ໄດ້​ຄິດ​ໄລ່​ອີງ​ບົນ​ສອງ​ປັດ​ໄຈ​ແມ່ນ ​ເງິນ​ເດືອນ​ຂອງ​ກະ​ໂຕ​ຜູ້ອອກ​ແຮງ​ງານ ​ແລະ ​ເງິນ​ເດືອນ​ຂອງ​ຄົນ​ຮຸ່ນ​ດຽວ​ກັນ. ຄິດ​ໄລ່ຄື​ແນວ​ນີ້ພາ​ໃຫ້ຜູ້​ອອກ​ແຮງ​ງານ​ໃນ​ເວລາ​ໄປ​ເຮັດ​ວຽກ​ໄດ້​ຮັບ​ເງິນ​ເດືອນຕ່ຳ ​ແຕ່​ເມື່​ອອອກ​ກິນ​ເບ້ຍ​ບຳນານຈະ​ໄດ້​ຮັບເງິນ​ບຳນານດີ​ຂຶ້ນ.

(5) ນະ​ໂຍບາຍ​ປະກັນ​ໄພ​ສັງຄົມ​ຂອງ​ບັນດາ​ປະ​ເທດລ້ວນ​ແຕ່​ໄດ້​ອອກ​ແບບ​ນະ​ໂຍບາຍ​ຊ່ວຍ​ເຫຼືອ​ວິ​ສາ​ຫະກິດ ​ເພື່ອ​ຮັກສາ​ວຽກ​ເຮັດ​ງານ​ທຳ, ຫຼີກລ່ຽງກາຄັດ​ເຂ່ຍຄົນ​ງານ, ຮັບ​ເອົາ​ຜູ້​ອອກ​ແຮງ​ງານ​ທີ່​ວ່າງ​ງານ​ຫຼາຍ​ເດືອນ​​ແຕ່ຫາ​ວຽກ​ເຮັດ​ງານ​ທຳ​ຍາກ, ຊ່ວຍ​ເຫຼື​ອວິ​ສາ​ຫະກິດປະຕິບັດ​ໂຄງການ​ຈັດ​ຫາ​ຜູ້​ອອກ​ແຮງ​ງານ​ໃໝ່ ຢູ່​ເຂດ​ທີ່​ມີ​ອັດຕາ​ສ່ວນວ່າ​ງງານ​ສູງ... ​ເພື່ອ​ຫຼຸດຜ່ອນ​ໄພ​ວ່າງ​ງານ; ນະ​ໂຍບາຍ​ຊ່ວຍ​ເຫຼືອ​ຜູ້​ອອກ​ແຮງ​ງານ​ວ່າງ​ງານ​ໄດ້​ຮັບ​ເບ້ຍ​ອຸດ​ໜູນ​ການ​ວ່າງ​ງານ, ​ເບ້ຍ​ອຸດ​ໜູນ​ການຮຽນ​ວິຊາ​ຊີບ​ແລະ​ການປ່ຽນ​ວຽກ​ເຮັດ​ງານ​ທຳ. ການສົມທົບ​ທັງ​ປ້ອງ​ກັນ, ຫຼຸດຜ່ອນ ​ແລະ ​ແກ້​ໄຂ​ຜົນ​ກະທົບ​ຂອງ​ການ​ວ່າງ​ງານ ​ແມ່ນ​ຈຸດໝາຍລວມຂອງ​ນະ​ໂຍບາຍ​ປະກັນ​ໄພ​ວ່າງ​ງານ ຕາມ​ກົດ​ລະບຽບ​ຂອງ​ບັນດາ​ປະ​ເທດ​ໃນ​ໂລກ. ບໍ່​ມີ​ການ​ເຂົ້າ​ຮ່ວມຂອງ​ວິ​ສາ​ຫະກິດ​​ຈະ​ບໍ່​ສາມາດ​ແກ້​ໄຂ​ບັນຫາ​ວ່າງ​ງານ​ໄດ້.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ