ວັນຈັນ, 18/11/2019
ກໍ່ສ້າງຕົວເມືອງສະຫຼາດ ຢູ່ນະຄອນຫຼວງຮ່າໂນ້ຍ ໃນສະພາບການປະຕິວັດອຸດສາຫະກຳຄັ້ງທີສີ່
9/3/2019 9:50' ສົ່ງ ພິມ
ພາບປະກອບ (ພາບ: TTXVN)

ການກໍ່ສ້າງ​ຕົວ​ເມືອງ​ສະຫຼາດ​​​ແມ່ນ​ຄວາມ​ຕ້ອງການທີ່​ຮີບ​ດ່ວນ

ດ້ວຍ​ການລະ​ເບີດ​ຂອງ​ການ​ປະຕິວັດ​ອຸດສາຫະກຳຄັ້ງ​ທີ​ສີ່, ທ່າ​ອຽງ​ກໍ່ສ້າງ​ຕົວ​ເມືອງ​ສະຫຼາດ​ໄດ້​ກາຍ​ເປັນ​ແບບ​ວິທີ​ການ​ພັດທະນາທີ່​ຈຳ​ເປັນ​ແນ່ນອນ​ສຳ​ລັບ​ຕົວ​ເມືອງ​ຕ່າງໆ, ​ໂດຍ​ສະ​ເພາະ​ແມ່ນ​ບັນດານະຄອນ​ໃຫຍ່​ໃນ​ໂລກ ກໍ​ຄື​ຢູ່​ຫວຽດນາມ, ພິ​ເສດ​ແມ່ນ​ສຳລັບນະຄອນ​ທີ່​ມີ​ການ​ຂະຫຍາຍຕົວ​ຢ່າງ​ໄວວາຄື ຮ່າ​ໂນ້ຍ. ວັນ​ທີ 01-8-2018, ນາຍົກລັດຖະມົນຕີ​ໄດ້ອະນຸມັດ​ໂຄງການ ພັດທະນາ​ຕົວ​ເມືອງ​ສະຫຼາດ​ຂອງ​ຫວຽດນາມ​ຢ່າງ​ຍືນ​ຍົງ ​ໃນ​ໄລຍະ 2018 - 2025, ​ໃນ​ນັ້ນ ຮອດ​ປີ 2020 ຈະ​ມີ​ຢ່າງ​ໜ້ອຍ 3 ຕົວ​ເມືອງ ​ໄດ້​ຮັບ​ການ​ອະນຸມັດ​ໂຄງການ​ໂດ​ຍລວມກ່ຽວ​ກັບ​ການ​ພັດທະນາ​ຕົວ​ເມືອງ​ສະຫຼາດ ​ແລະ ຈັດ​ຕັ້ງ​ປະຕິບັດ​ການ​ລົງທຶນ​ໂຄງ​ສ້າງ​ພື້ນຖານ ​ແລະ ພັດທະນາ​ລະບົບ​ສາທາລະ​ນູປະ​ໂພ​ກສະຫຼາດ​ໃນ​ເມືອງ. ​ໂຄງການນີ້​ເປັນ​ພື້ນຖານ​ໃຫ້​ນະຄອນ​ຮ່າ​ໂນ້ຍຄົ້ນຄວ້າ, ວາງ​ແຜນການ​ແລະ​ແຜນ​ງານ​ປະຕິບັດ​ການ​ພັດທະນາ​ຕົວ​ເມືອງ​ສະຫຼາດ.

ປະຈຸ​ບັນ​ນີ້ ນະຄອນຫຼວງ​ຮ່າ​ໂນ້​ຍຖືກ​ຖື​ວ່າ​ເປັນ​ມະຫາ​ນະຄອນ​ທາງ​ດ້ານພື້ນ​ທີ່ ​ແລະ ຂະໜາດປະຊາກອນ. ດ້ວຍ​ຄວາມ​ໄວ​ຂອງ​ການ​ຫັນ​ເປັນ​ຕົວ​ເມືອງ​ ແລະ​ ການ​ເຕີບ​ໂຕ​ຂອງ​ປະຊາກອນ​ຢ່າງ​ໄວວາ ​ໄດ້​ພາ​ໃຫ້​ເກີດ​ມີ​ຫຼາຍ​ບັນຫາ​ກ່ຽວ​ກັບການວາງ​ແຜນ, ການ​ຈະລາຈອນ, ຄວາມ​ປອດ​ໄພ, ສາທາລະນະ​ສຸກ, ການ​ສຶກສາ, ພະລັງງານ, ການ​ພັດທະນາ​ທີ່ຢູ່​ອາ​ໄສ, ການ​ແກ້​ໄຂ​ມົນ​ລະພິດ​ສິ່ງ​ແວດ​ລ້ອມ... ຄວາມ​ຕ້ອງການ​ກໍ່ສ້າງ​ຕົວ​ເມືອງ​ສະຫຼາດ ຮັບປະກັນອົງ​ປະກອບ​ຂອງ​ການ​ພັດທະນາ​ແບບ​ຍືນ​ຍົງ, ນຳ​ເອົາ​ຄວາມ​ສະດວກ​ສະບາຍ, ຄວາມ​ປອດ​ໄພ ​ແລະຄວາມ​ເປັນ​ມິດ ​ມາ​ໃຫ້​ປະຊາຊົນ ພວມກາຍ​ເປັນຄວາມ​ຮີບ​ດ່ວນຫຼາຍ​ຂຶ້ນ. ບັນດາ​ວິທີ​ປະ​ຍຸກ​ເຕັກ​ໂນ​ໂລ​ຊີ​ທີ່ໃໝ່ແລະ​ສຳຄັນ​ ຂອງ​ການ​ປະຕິວັດ​ອຸດສາຫະກຳຄັ້ງ​ທີ​ສີ່ ຄາດ​ວ່າ​ຈະ​ເປັນ​ທາງ​ອອກ​ທີ່​ມີ​ປະສິດທິພາບ ​ເພື່ອ​ຊ່ວຍ​ຕອບ​ສະໜອງ​ຄວາມ​ຕ້ອງການ​ນີ້.

ຕົວ​ເມືອງ​ສະຫຼາດ​ມີລັກສະນະ​ຕົ້ນຕໍ​ຄື ຕົວ​ມື​ອງທັນ​ສະ​ໄໝ, ມີພື້ນຖານເສດຖະກິດດິຈິຕອນ, ສິ່ງແວດລ້ອມສະຫຼາດ, ການບໍລິຫານສະຫຼາດ, ການຈະລາຈອນສະຫຼາດ, ພະລັງງານສະຫຼາດ, ສາທາລະນະສຸກສະຫຼາດ, ການສຶກສາສະຫຼາດ, ແລະ ຫຼາຍປັດໄຈທີ່ສະຫຼາດອື່ນອີກ. ຢູ່ນັ້ນ, ເຕັກໂນໂລຊີຂໍ້ມູນແລະການສື່ສານ (ລະບົບ IoT ໃນບັນດາວິທີປະຍຸກ, ເຄືອຂ່າຍໂທລະຄົມມະນາຄົມ (Wifi, 4G/5G), ໂທລະສັບສະຫຼາດ (ສະມາດໂຟນ), ຖານ​ຂໍ້​ມູນ​ຂະໜາ​ກ​ໃຫຍ່ (Big data) ​ແລະ ລະບົບ​ວິ​ເຄາະ​ການ​ນຳ​ໃຊ້​ປັນຍາ​ປະດິດ ຖືກນຳໃຊ້ ແລະ ເຮັດໃຫ້ວຽກງານການກໍ່ສ້າງ, ຄຸ້ມ​ຄອງ​ແລະ​ພັດທະນາຕົວ​ເມືອງ ມີ​ປະສິດທິ​ຜົນ​ກວ່າ​ເກົ່າ, ສະຫຼາດກວ່າ​ເກົ່າ, ​ໃຫ້​ບໍລິການ​ແລະ​ສະໜອງ​ສາທາລະ​ນູປະ​ໂພ​ກ ​ແກ່ປະຊາຊົນ​​ແລະ​ວິ​ສາ​ຫະກິດ, ປະກອບສ່ວນໃນການຍົກສູງຄຸນນະພາບຊີວິດ, ​ເພີ່ມ​ທະວີ​ຄວາມ​ສາມາ​ແຂ່ງຂັນ ຂອງ​ພື້ນຖານ​ເສດຖະກິດ. ການ​ກໍ່ສ້າງ​ຕົວ​ເມືອງ​ສະຫຼາດ​ແນ​ໃສ່​ສ້າງ​ຊີວິດ​ທີ່​ດີງາມ​ໃຫ້​ປະຊາຊົນ, ຖື​ເອົາ​ປະຊາຊົນ​ແລະ​ວິ​ສາ​ຫະກິດເປັນ​ໃຈກາງ​ເພື່ອ​ຮັບ​ໃຊ້ ນັ້ນ​ແມ່ນ​ທັດສະນະ​ທີ່​ບໍ່​ປ່ຽນ​ແປງ​ຂອງ​ອຳນາດ​ການ​ປົກຄອງ​ນະຄອນ​ຮ່າ​ໂນ້ຍ ​ໃນ​ຂະ​ບວນວິວັດ​ການ​ກໍ່ສ້າງ​ຮ່າ​ໂນ້ຍ​ເປັນ​ນະຄອນ​ສະຫຼາດ.

ບັນດາ​ເປົ້າ​ໝາຍ​ທີ່​ວາງ​ອອກ​ມາ​ ໃນ​ການ​ກໍ່ສ້າງ​ຮ່າ​ໂນ້ຍ​ເປັນ​ນະຄອນ​ສະຫຼາດ

- ການພັດທະນາອຳນາດ​ການ​ປົກຄອງ​ເອ​ເລັກ​ໂຕຣນິກ ​ເປັນ​ແກນ​ຫຼັກ​ໃນ​ການ​ກໍ່ສ້າງ​ນະຄອນ​ທີ່​ສະຫຼາດ, ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ທີ່​ສຸດ ​ໃຫ້​ປະຊາຊົນ​ແລະ​ວິ​ສາ​ຫະກິດ ​ເມື່ອ​ຕິດ​ຕໍ່​ກັບ​ໜ່ວຍ​ງານ​ຂອງ​ລັດ, ຍົກ​ສູງ​ຄຸນ​ນະພາ​ບຊີວິດ​ຂອງ​ປະຊາຊົນ​ຂຶ້ນ​ເທື່ອລະ​ກ້າວ ບົນ​ພື້ນຖານ​ເລືອກ​ຂົງ​ເຂດ​ທີ່​ສຳຄັນ​ທີ່​ສຸດສຳລັບ​ການ​ປັບປຸງ: ສິ່ງ​ແວດ​ລ້ອມ, ສາທາລະນະ​ສຸກ, ການ​ສຶກສາ, ການ​ຈະລາຈອນ, ຄວາມ​ສະຫງົບ​ຄວາມ​ປອດ​ໄພ, ການທ່ອງທ່ຽວ, ການ​ຄຸ້ມ​ຄອງ​ຕົວ​ເມືອງ...

- ກໍ່ສ້າງ​ຮາກ​ຖານ​ໂຄງ​ສ້າງ​ພື້ນຖານ​ສຳລັບນະຄອນ​ສະຫຼາດ ຊຶ່ງ​ມີ​ສູນ​ກາງ​ຕິດຕາມ​ກວດກາ​ແລະ​ປະຕິບັດ​ງານ ທີ່​ເຊື່ອມ​ຕໍ່​ກັບ​ໂຄງ​ສ້າງ​ພື້ນຖານ​ໂທລະ​ຄົມມະນາຄົມ, IoT, ຮັບ​ແລະ​ປະມວນ​ຜົນ​ກະ​ແສ​ຂໍ້​ມູນ​ຕ່າງໆ​ກ່ຽວ​ກັບບັນ​ດາ​ຂົງ​ເຂດ​ຊີ​ວິ​ດສັງຄົມ​​ໃນ​ນະຄອນ, ສ້າງ​ລະບົບ​ຂໍ້​ມູນ​ຂ່າວສານ​ແລະ​ຖານ​ຂໍ້​ມູນ​ຂະໜາດ​ໃຫຍ່, ປະສົມ ຂຸດ​ຄົ້ນແລະ​ສະໜອງ​ຂໍ້​ມູນ​ທີ່​ເປັນ​ພາບ ​ເພື່ອ​ສະໜັບສະໜູນ​ການ​ນຳ​ທຸກ​ຂັ້ນ​ໃນ​ການ​ຕັດສິນວຽກ​ງານ​ຢ່າງ​ຖືກຕ້ອງ​ແລະ​ທັນ​ເວລາ.

- ຈັດ​ຕັ້ງ​ເຂດ​ລວມສູນການຖ່າຍ​ໂອນ​ວິທະຍາສາດ​ແລະ​ເຕັກ​ໂນ​ໂລ​ຊີ ​ແລະ​ ສ້າງສູນ​ບົ່ມ​ເພາະ​ວິ​ສາ​ຫະກິດ​ທີ່​ເລີ່​ມຕົ້ນ​ທຸລະ​ກິດ ​ເພື່ອ​ເຂົ້າ​ຮ່ວມ​ຢ່າງ​ຕັ້ງໜ້າ​ໃນ​ຂະ​ບວນວິວັດ​ການ​ຫັນ​ເປັນອຸດສາຫະກຳ ທັນ​ສະ​ໄໝ ​ແລະ ກໍ່ສ້າງ​ຮ່າ​ໂນ້ຍ​ເປັນ​ນະຄອນ​ສະຫຼາດ.

- ​ເພີ່ມ​ທະວີ​ວຽກ​ງານ​ຝຶກ​ອົບຮົມຊັບພະຍາກອນ​ມະນຸດ​ທີ່​ມີ​ຄຸນ​ນະພາ​ບສູງ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ​ໃຫ້​ແກ່​ການ​ພັດທະນາ​ນະຄອນ​ສະຫຼາດ. ​ເພີ່ມ​ທະວີ​ວຽກ​ງານການ​ໂຄສະນາ​ສື່ສານ​ແລະ​ສົ່ງ​ເສີມ ​ເພື່ອ​ຍົກ​ສູງ​ຄວາມ​ຮູ້​ຂອງ​ຊຸມ​ຊົນ ກ່ຽວ​ກັບ​ຜົນ​ປະ​ໂຫຍ​ດຂອງ​ນະຄອນ​ສະຫຼາດ ​ແລະ ການ​ເຂົ້າຮ່ວມ​ຢ່າງ​ຕັ້ງໜ້າ​ໃນ​ຂະ​ບວນການກໍ່ສ້າງ​ແລະ​ຂັບ​ເຄື່ອນນະຄອນ​ສະຫຼາດ.

​ແຜນການ​ສ້າງ​ຮ່າ​ໂນ້ຍ​​ໃຫ້ເປັນ​ນະຄອນ​ສະຫຼາດ ​ໄດ້​ແບ່ງ​ອອກ​ເປັນ​ສາມ​ໄລຍະ​ການ​ພັດທະນາ ​ດັ່ງ​ນີ້:

ໄລຍະ​ທີ 1, ຮອດ​ປີ 2020: ສ້າງ​ສ່ວນ​ພື້ນຖານ​ຂອງ​ອົງ​ປະກອບ​ຫຼັກຂອງ​ນະຄອນ​ສະຫຼາດ, ລວມມີ: ຮາກ​ຖານ​ຂອງ​ໂຄງ​ສ້າງ​ພື້ນຖານ (​ເຄືອ​ຂ່າຍ​ໂທລະ​ຄົມມະນາຄົມ​ຄວາມ​ໄວ​ສູງ, ລະບົບ​ເຊັນ​ເຊີ, ລະບົບ​ກ້ອງ​ວົງ​ຈອນ​ປິດ, ​ໂຄງ​ສ້າງ​ພື້ນຖານ​ຄວາມ​ປອດ​ໄພ, ຄວາມ​ປອດ​ໄພ​ຂອງ​ຂໍ້​ມູນ, ສູນ​ຂໍ້​ມູນ...); ບັນດາ​ຖານ​ຂໍ້​ມູນ​ຫຼັກ (ພົນລະ​ເມືອ​ງ, ທີ່​ດິນ, ວິ​ສາ​ຫະກິດ...); ກໍ່​ສ້າງອຳນາດ​ການ​ປົກຄອງ​ເອ​ເລັກ​ໂຕຣນິກຮ່າ​ໂນ້ຍປະສົບ​ຄວາມສຳ​ເລັດ​ພາກສ່ວນ​ໜຶ່ງ​ທີ່​ເປັນ​ພື້ນຖານ; ກໍ່ສ້າງ​ບັນດາ​ລະບົບ​ອັດ​ສະ​ລິ​ຍະ​ໃນ​ບັນດາ​ຂົງ​ເຂດ​ທີ່​ສຳຄັນ​ຄື ການ​ສຶກສາ, ສາທາລະນະ​ສຸກ, ການ​ຈະລາຈອນ, ການທ່ອງທ່ຽວ, ຄວາມ​ປອດ​ໄພ​ທາງ​ສັງຄົມ, ສິ່ງ​​ແວດ​ລ້ອມ.

ໄລຍະ​ທີ 2, ​ແຕ່​ປີ 2021 ຮອດ​ປີ 2025: ສຳ​ເລັດ​ໂດຍ​ພື້ນຖານ​ບັນດາ​ລະບົບ​ອັດ​ສະ​ລິ​ຍະ​ໃນບັນດາ​ຂົງ​ເຂດ​ເສດຖະກິດ-ສັງຄົມ; ປະຊາຊົນ​ເຂົ້າ​ຮ່ວມ​ຢ່າງ​ເປັນ​ເຈົ້າ​ການ​ໃນ​ການຄຸ້ມ​ຄອງ​ແລະ​ກໍ່ສ້າງ​ນະ​ໂຍບາຍການ​ພັດທະນາ​ສັງຄົມ; ຂໍ້​ມູນ​ຂ່າວສານ, ຖານ​ຂໍ້​ມູນ​ກາຍ​ເປັນ​ຊັບພະຍາກອນ​ພື້ນຖານ​ໃນ​ການ​ພັດທະນາ​ສັງຄົມ, ສ້າງ​ເສດຖະກິດ​ດິຈິ​ຕອນ.

ໄລຍະ​ທີ 3, ຫຼັງ​ປີ 2025: ນະຄອນ​ຮ່າ​ໂນ້ຍພັດທະນາ​ໃນ​ລະດັບ​ສູງ ດ້ວຍ​ຄຸນ​ລັກສະນະ​ຂອງ​ເສດຖະກິດ​ພູມ​ປັນຍາ.

ຮ່າ​ໂນ້ຍກໍ່ສ້າງ​ນະຄອນ​ສະຫຼາດ​ບົນ​ພື້ນຖານ​ເຕັກ​ໂນ​ໂລ​ຊີ​ດິຈິ​ຕອນ

ຈາກ​ບົດຮຽນ​ຂອງ​ຕ່າງປະ​ເທດ ​ແລະ ບັນດາ​ລັກສະນະ​ສະ​ເພາະ, ນະຄອນ​ຮ່າ​ໂນ້ຍ​ໄດ້ກຳນົດ​ຫຼັກການ: ການ​ກໍ່ສ້າງ​ຕົວ​ເມືອງ​ສະຫຼາດ​ແມ່ນ​ເນື້ອ​ໃນ​ສຳຄັນ​ໜຶ່ງ​ຂອງການ​ປະຕິວັດ​ອຸດສາຫະກຳ​ຄັ້ງ​ທີ​ສີ່.  ນຳ​ໃຊ້​ອຸປະກອນ​ສະໜັບສະໜູນ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ (ICT) ​ແລະ​ບັນດາ​ພາຫະນະ​ອຸປະກອນ​ອື່ນ ​ເພື່ອປະກອບສ່ວນ​ຍົກ​ສູງ​ຄວາມ​ສາມາດ​ແຂ່ງ​ຂັນ, ການປ່ຽນ​ແປງ​ໃໝ່, ການປະດິດ​ສ້າງ, ຄວາມ​ໂປ່​ງ​ໄສ, ຄວາມ​ກະທັດ​ລັດ​ເບົາບາງ, ປະສິດທິ​ພາຍ, ປະສິດທິ​ຜົນ​ໃນ​ການ​ຄຸ້ມ​ຄອງ​ບໍລິຫານ ຂອງ​ອຳນາດ​ການ​ປົກຄອງ​ໃນ​ຕົວ​ເມືອງ, ຍົກ​ສູງ​ປະສິດທິ​ຜົນ​ໃນ​ການ​ນຳ​ໃຊ້​ທີ່​ດິນ, ພະລັງງານ ​ແລະ ຊັບພະຍາກອນ​ການ​ພັດທະນາ, ປົວ​ແປງ​ແລະ​ຍົກ​ສູງ​ຄຸນ​ນະພາ​ບຊີວິດສິ່ງ​ແວດ​ລ້ອມ​ໃນ​ຕົວ​ເມືອງ, ປຸກ​ກະຕຸ້ນ​ການ​ເຕີບ​ໂຕ​ແລະ​ພັດທະນາ​ເສດຖະກິດ-ສັງຄົມ. ຄຽງ​ຂ້າງ​ນັ້ນ, ການ​ກໍ່ສ້າງ​ຕົວ​ເມືອງ​ສະຫຼາດອີງ​ໃສ່​ຄວາມສຳ​ເລັດຂອງ​ວິທະຍາສາດ​ເຕັກ​ໂນ​ໂລ​ຊີທີ່​ກ້າວ​ໜ້າ, ປະ​ຍຸກ​ໃຊ້​ບັນດາ​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ, ຄົບ​ຊຸດ, ຮັບປະກັນຄວາມ​ເປັນກາງ​ຂອງ​ເຕັກ​ໂນ​ໂລ​ຊີ, ມີ​ຄວາມ​ສາມາດ​ເຂົ້າກັນ​ໄດ້​ກັບຫຼາຍ​ຮາກ​ຖານ, ຮັບປະກັນ​ຄວາມ​ປອດ​ໄພຂອງ​ຂໍ້​ມູນ​ເຄືອ​ຂ່າຍ, ຄວາມ​ປອດ​ໄພ​ເຄືອ​ຂ່າຍ ​ແລະ ປົກ​ປ້ອງ​ຂໍ້​ມູນ​ສ່ວນ​ບຸກຄົນ​ຂອງ​ປະຊາຊົນ, ຮັບປະກັນ​ການ​ປະສານ​ສົມທົບ​ລະຫວ່າງ​ວິທີ​ເຕັກ​ໂນ​ໂລ​ຊີ ​ແລະ ວິທີ​ແກ້​ໄຂ​ທີ່​ບໍ່​ແມ່ນ​ເຕັກ​ໂນ​ໂລ​ຊີ.

ຮ່າ​ໂນ້ຍ​ໄດ້​ວາງ​ແຜນ​ຍຸດ​ທະ​ສາດ​ແລະ​ແຜນ​ງານ​ການ​ກໍ່ສ້າງ​ນະຄອນ​ສະຫຼາດ​ຮອດ​ປີ 2025, ກຳນົດ​ທິດ​ເຖິງ​ປີ 2030 ​ແລະ “ສະຖາປັດຕະຍະກຳ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ແລະການ​ສື່ສານ (ICT) ຂອງ​ນະຄອນ​ສະຫຼາດຂອງຮ່າ​ໂນ້ຍ”, ​ໃນ​ນັ້ນ ກຳນົດ​ການ​ກໍ່ສ້າງ​ໂຄງ​ສ້າ​ງພື້ນຖານ​ຂໍ້​ມູນດິຈິ​ຕອນ​​ທີ່​ປອດ​ໄພ, ສົ່ງ​ເສີມ​ການ​ສະໜອງ​ຂໍ້​ມູນ​ເປີດ ​ເພື່ອ​ຊຸກຍູ້​ການ​ເຄື່ອນ​ໄຫວ​ເລີ່​ມຕົ້ນ​ທຸລະ​ກິດ ປ່ຽນ​ແປງ​ໃໝ່​ປະດິດ​ສ້າງ, ຊ່ວຍ​ວິ​ສາ​ຫະກິດ​ຫຼຸດຜ່ອນ​ຄ່າ​ໃຊ້​ຈ່າຍ, ​ເປີດ​ກວ້າງ​ໂອກາດ​ຮ່ວມ​ມື​ທຸລະ​ກິດ​ໃນ​ພື້ນຖານ​ເສດຖະກິດ. ຮັບປະກັນ​ໃຫ້​ປະຊາຊົນ​ທຸກ​ຄົນ​ໄດ້​ຊົມ​ໃຊ້​ການ​ບໍລິການ​ສາທາລະນະ​ຢ່າງ​ໄວວາ ​ແລະ​ສະດວກ​ສະບາຍ ​ໃນ​ໂຄງ​ສ້າງ​ພື້ນຖານ​ຂໍ້​ມູນດິຈິ​ຕອນ​ທີ່​ກວ້າງ​ໃຫຍ່. ​ເພີ່ມ​ທະວີ​ການຮັບປະກັນຄວາມ​ປອດ​ໄພ, ຄວາມ​ເປັນ​ລະບຽບ​ທາງ​ສັງຄົມ, ປ້ອງ​ກັນ​ແລະ​ຕ້ານ​ອາ​ຊະ​ຍາ​ກຳ.

​ລະບົບຂໍ້​ມູນ​ຂ່າວສານ​ກ່ຽວ​ກັບ​ການ​ຄຸ້ມ​ຄອງ​ບັນດາ​​ໂຄງ​ສ້າງ​ພື້ນຖານ​ທາງ​ເຕັກນິກ-ບໍລິການ​ຕົ້ນຕໍ​ໃນ​ຕົວ​ເມືອງ ກໍ່​ໄດ້​ຫັນ​ເປັນ​ດິຈິ​ຕອນ, ​ເຊື່ອມ​ໂຍງ​ກັນ, ​ແບ່ງປັນ​ຂໍ້​ມູນ​ລະຫວ່າງ​ບັນດາ​ຂະ​ແໜງ​ການ; ​ເພີ່ມ​ທະວີ​ການ​ເຂົ້າ​ຮ່ວມ​ຂອງ​ປະຊາຊົນ ​ເພື່ອ​ແນ​ໃສ່​ຍົກ​ສູງ​ຄວາມ​ສາມາດພະຍາກອນ, ປະ​ສິດທິ​ຜົນ​ ແລະ​ປະສິດທິພາບ​ການ​ຄຸ້ມ​ຄອງ​ຂອງ​ອຳນາດ​ການ​ປົກຄອງ​ທ້ອງ​ຖິ່ນ. ກໍ່ສ້າງ​ບັນດາ​ລະບົບ​ຕິດຕາມ​ກວດກາ ​ແລະ ກ່າວ​ເຕື່ອນອອນ​ໄລ ກ່ຽວ​ກັບ​ສິ່ງ​ແວດ​ລ້ອມ (ນ້ຳ, ອາກາດ, ສຽງ​ລົບ​ກວນ, ດິນ, ສິ່ງ​ເສດ​ເຫຼືອ...); ບັນດາ​ລະບົບ​ເກັບ​ກຳ, ວິ​ເຄາະ​ໄຈ້ແຍກ​ຂໍ້​ມູນ​ກ່ຽວ​ກັບ​ສິ່ງ​ແວດ​ລ້ອມ ​ເພື່ອ​ຮັບ​ໃຊ້​ໃຫ້​ແກ່​ການ​ຍົກ​ສູງ​ຄວາມສາມາດ​ພະຍາກອນ, ການ​ປ້ອງກັນ​ແລະ​ຕ້ານ, ກໍ​ລິ​ນີສຸກ​ເສີນ​ ແລະ ​ເປັນ​ເຈົ້າ​ການ​​ໃນ​ການຮັບ​ມື​ກັບ​ການ​ປ່ຽນ​ແປງສະພາບພູມິ​ອາກາດ.

​ເພື່ອມຸ່ງ​ໄປ​ສູ່​ການ​ກໍ່ສ້າງ​ນະຄອນ​ສະຫຼາດ, ຮ່າ​ໂນ້ຍ​ໄດ້​ເລີ່​ມຕົ້ນ​ປະຕິບັດ​ເປົ້າ​ໝາຍ​ກໍ່ສ້າງ​ອຳນາດ​ການ​ປົກຄອງ​ເອ​ເລັກ​ໂຕຣນິກ. ຄະນະ​ກຳມະການ​ປະຊາຊົນ​ນະຄອນ​ໄດ້ກຳນົດ​ການ​ກໍ່ສ້າງ​ລະບົບ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ຕາມ​ທິດ​ກວມ​ລວມ, ຄົບ​ຊຸດ, ການ​ນຳ​ໃຊ້​ລວມ​ເປັນ​ເອກະ​ພາບ​ໃນ​ທົ່ວ​ນະຄອນ; ຫັນປ່ຽນ​ຈາກ​ຮູບ​ການ​ຜັນ​ຂະຫຍາຍ​​ແບບ​ນ້ອຍ​ແຕ່​ລະ​ອັນ ​ໄປ​ເປັນ​ການ​ຜັນ​ຂະຫຍາຍ​ຕາມ​ຮູບ​ແບບ​ລວມສູນ, ບຸລິມະສິດ​ຮູບ​​ການຈ້າງການ​ບໍລິການ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ. ຮ່າ​​ໂນ້ຍກໍ່​ກຳນົດ​ການ​ກໍ່ສ້າງ​ນະຄອນ​ສະຫຼາດ​ແບບ​ຍືນ​ຍົງ, ນຳ​ຄວາມ​ສະດວກ​ສະບາຍ, ຄວາມ​ປອດ​ໄພ ​ແລະ​ຄວາມ​ເປັນ​ມິດ ມາ​ໃຫ້​ປະຊາຊົນທຸກ​ຄົນ ອີງ​ໃສ່​​ການ​ປະ​ຍຸກ​ໃຊ້​ເຕັກ​ໂນ​ໂລ​ຊີ​ທີ່​ສຳຄັນ​ ຂອງການປະຕິວັດ​​ເຕັກ​ໂນ​ໂລ​ຊີ 4.0, ​ເຊັ່ນ ​ເຕັກ​ໂນ​ໂລ​ຊີ​ຄຼາວກອມ​ພິວຕິ້ງ (CCT), ຂໍ້​ມູນ​ຂະໜາດ​ໃຫຍ່ (Big data), ປັນຍາ​ປະດິດ (AI), ອິນເຕີ​ເນັດ​ເຊື່ອມ​ຕໍ່​ທຸກ​ຢ່າງ (IoT), ​ເຕັກ​ໂນ​ໂລ​ຊີ​ພິມ 3D, ​ເຕັກ​ໂນ​ໂລ​ຊີ​ສະ​ເໝືອນ​ຈິງ.

ການ​ເຄື່ອນ​ໄຫວ​ແລກປ່ຽນ​ ຮ່ວມ​ມື​ສາກົນ​ ກ່ຽວ​ກັບ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ຂອງ​ນະຄອນ​ຮ່າ​​ໂນ້ຍ​ໄດ້​ຮັບ​ການ​ຍູ້​ແຮງ. ນະຄອນ​ໄດ້​​ເຮັດ​ວຽກ​ຢ່າງ​ຕັ້ງໜ້າ​ກັບບັນດາ​ວິ​ສາ​ຫະກິດ​ຕ່າງປະ​ເທດ ​ເພື່ອ​ກໍ່ສ້າງບັນດາ​ສູນ​ຂໍ້​ມູນ​ທີ່​ໃຫຍ່​ທີ່​ສຸດ​ທົ່ວ​ປະ​ເທດໃນ​ຮ່າ​ໂນ້ຍ, ປະກອບ​ມີ 6 ສູນ​ຂໍ້​ມູນ ທີ່​ມີ​ຄວາມ​ຈຸ​ທັງ​ໝົດ 1.200MW. ນະຄອນ​ໄດ້​ຕິດ​ຕໍ່, ​ແລກປ່ຽນ​ບົດຮຽນກັບບັນດາ​ກຸ່ມ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ຊັ້ນ​ນຳ​ໃນ​ໂລດ, ​ເຊັນ​ຂໍ້​ຕົກລົງ​ການ​ຮ່ວມ​ມື​ກັບ​ກຸ່ມ​ບໍລິສັດ Microsoft, ກຸ່ມ​ເຕັກ​ໂນ​ໂລ​ຊີ Dell ກ່ຽວ​ກັບ​ການ​ກໍ່ສ້າງ​ອຳນາດ​ການ​ປົກຄອງ​ເອ​ເລັກ​ໂຕຣນິກ ​ແລະ ນະຄອນ​ສະຫຼາດ.

ຄຽງ​ຄູ່​ກັບ​ການ​ຜັນ​ຂະຫຍາຍການ​ປະ​ຍຸກ​ເຕັກ​ໂນ​ໂລ​ຊີຂໍ້​ມູນ​ຂ່າວສານ, ນະຄອນ​ຮ່າ​ໂນ້ຍ​ໄດ້​ສຸມ​ໃສ່​ຊີ້​ນຳ​ການ​ພັດທະນາ​ອຸດສາຫະກຳ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ​ເພື່ອ​ເປັນ​ພື້ນຖານ​ໃຫ້​ແກ່​ການພັດທະນາ​ການ​ປະ​ຍຸກ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ຂອງ​ນະຄອນ. ​ໃນ​ເວລາ​ຕໍ່ໜ້າ, ນະຄອນ​ຈະ​ສຸມ​ໃສ່ພັດທະນາ​ການ​ກໍ່ສ້າງໂຄງ​ສ້າງ​ພື້ນຖານ ​ແລະ ​ເປີດ​ນຳ​ໃຊ້​ເຂດ​ສວນ​ຊອບ​ແວ​ ຂອງ​ນະຄອນ​ຮ່າ​ໂນ້ຍ, ສືບ​ຕໍ່​ດຶງ​ດູດ​ເອົາ​ການ​ລົງທຶນ​ເຂົ້າ​ໃນ​ບັນດາ​ເຂດ​​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ລວມສູນ​ຂອງ​ນະຄອນ.

ນຳ​​ເອົາ​ຄວາມ​ສະດວກ​ສະບາຍ, ຄວາມ​ປອດ​ໄພ ​ແລະ​ຄວາມ​ເປັນ​ມິດ​ ມາ​ໃຫ້​ປະຊາຊົນ​ທຸກ​ຄົນ

ການ​ກໍ່ສ້າງ​ນະຄອນ​ສະຫຼາດ​ຢູ່​ຮ່າ​ໂນ້ຍ​ເພື່ອ​ແກ້​ໄຂ​ບັນຫາ​ຫຍັງ? ຄຳ​ຕອບ​ແມ່ນ: ຮ່າ​ໂນ້ຍຕ້ອງການ​ຕັ້ງ​ຈຸດ​ມຸ່ງໝາຍ​ໃນ​ຮູບ​ແບບ​ຕົວ​ເມືອງ​ສະຫຼາດທີ່​ນຳ​ຄວາມ​ສະດວກ​ສະບາຍ, ຄວາມ​ປອດ​ໄພ ​ແລະ ຄວາມ​ເປັນ​ມິດ ​ມາ​ໃຫ້​ປະຊາຊົນ​ທຸກ​ຄົນ ອີງ​ໃສ່​ການ​ປະ​ຍຸກ​​ເຕັກ​ໂນ​ໂລ​ຊີ​ຫຼັກ​ ຂອງການປະຕິວັດ​ອຸດສາຫະກຳ​ຄັ້ງ​ທີ​ສີ່. ດັ່ງ​ນັ້ນ, ​ໃນ​ການຫັນ​ໄປ​ສູ່​ການ​ກໍ່ສ້າງ​ນະຄອນ​ສະຫຼາດນັ້ນ, ທັດສະນະ​ທີ່​ບໍ່​ປ່ຽນ​ແປງ​ຂອງ​ອຳນາດ​ການ​ປົກຄອງ​ນະຄອນ​ຮ່າ​ໂນ້ຍ​ແມ່ນ ຖື​ເອົາ​ປະຊາຊົນ​ເປັນ​ໃຈ​ກາງ, ​ແນ​ໃສ່​ເປົ້າ​ໝາຍ​ເພື່ອ​ໃຫ້ທຸກ​ພາກສ່ວນ​​ຂອງ​ສັງຄົມສາມາດ​ໄດ້​ຮັບ​ຜົນ​ປະ​ໂຫຍ​ດ, ​ໄດ້​ເຂົ້າ​ຮ່ວມ​ການລົງທຶນ​ກໍ່ສ້າງ ​ແລະ​ຕິດຕາມ​ກວດກາ, ຄຸ້ມ​ຄອງ​ນະຄອນ​ສະຫຼາດ.

​ເລີ່​ມຈາກ​ຄວາມ​ຮຽກຮ້ອງ​ຕ້ອງການ​ຕົວ​ຈິງ, ນະຄອນ​ຮ່າ​ໂນ້ຍພວມ​ໃຫ້​ບຸລິມະສິດ​ແກ່​ການ​ຜັນ​ຂະຫຍາຍບັນດາ​ລະບົບ​ອັດ​ສະ​ລິ​ຍະ, ຖານ​ຂໍ້​ມູນ​ຫຼັກ​ແລະສະ​ເພາະ​ຂະ​ແໜງ ຕາມ​ທິດ​ລວມສູນ, ປະສົມ​ຢູ່​ທີ່​ສູນ​ຂໍ້​ມູນ, ສ້າງ​​ຂໍ້​ມູນ​ຂະ​ໜາດ​ໃຫຍ່ (Big data); ຮັບປະກັນ​ການ​ເຊື່ອມ​ຕໍ່, ​ແບ່ງປັນ​ຕໍ້​ມູນ​ກັບບັນດາ​ຖານ​ຂໍ້​ມູນ​ແຫ່ງ​ຊາດ​ຕາມ​ທີ່​ໄດ້​ກຳນົດ. ມາ​ເຖິງ​ປະຈຸ​ບັນ, ບັນດາ​ອົງ​ປະກອບ​ພື້ນຖານ​ຂອງ​ອຳນາດ​ການ​ປົກຄອງ​ເອ​ເລັກ​ໂຕຣນິກຂອງ​ນະຄອນ​ປະກອບ​ມີ: ສູນ​ຂໍ້​ມູນ​ແຫ່ງ​ລັດ; ​ເຄືອ​ຂ່າຍ​ພື້ນ​ທີ່​ກວ້າງ (WAN) ​ເຊື່ອມ​ຕໍ່ກັບ 100% ຈຳນວນ​ພະ​ແນ​ກ, ຄະນະ, ຂະ​ແໜງ​ການ, ​ເມືອງ, ​ເທດສະບານ​ເມືອງ ​ແລະ ຕາ​ແສງ​ໃນ​ນະຄອນ;  ຊ່ອງ​ການ​ສື່ສານ​ເອ​ເລັກ​ໂຕຣນິກຂອງ​ນະຄອນ; ປະຕູ​ບໍລິການ​ສາທາ​ລະນາ​ອອນ​ໄລ​ໄດ້​ກໍ່​ຕົວ​ຂຶ້ນ​ແລ້ວ; ບັນດາ​ລະບົບ​ຂໍ້​ມູນ​ຂ່າວສານ ​ແລະ ຖານ​ຂໍ້​ມູນ​ຫຼັກ; ລະບົບ​ແລະ​ວິທີ​ຮັກສາ​ຄວາມ​ປອດ​ໄພ ​ແລະ​ຄວາມ​ໝັ້ນຄົງ​ທາງ​ຂໍ້​ມູນ; ​ໂຄງ​ສ້າງ​ພື້ນຖານດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານຢູ່​ໃນ​ໜ່ວຍ​ງານ​ຂອງ​ລັດ​ຂອງ​ນະຄອນ​ພວມ​ໄດ້​ຮັບ​ການ​ປັບປຸງ​ບູລະນະ.

​ໃນ​ປະຈຸ​ບັນ, ນະຄອນ​ຮ່າ​ໂນ້ຍ​ໄດ້​ແລະ​ພວມ​ຜັນ​ຂະຫຍາຍ​ການ​ປະຍຸກເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ໃນ​ພື້ນ​ທີ່​ຢ່າງ​ເປັນ​ແບບ​​ແຜນ, ຮອບ​ຄອບ ​ແລະ ໜັກ​ແໜ້ນ, ​ເພື່ອ​ສ້າງ​ປະຖົມ​ປັດ​ໄຈ​ໃຫ້​ແກ່​ການ​ກໍ່ສ້າງ​ນະຄອນ​ສະຫຼາດ. ນະຄອນ​ໄດ້​ສ້າງ​ແຜນການ​ຕ່າງໆ​ ເພື່​ອ​ແປງ​ຂໍ້​ມູນ​ທີ່​ມີ​ຢູ່​ທັງ​ໝົດ​ເປັນ​ດິຈິ​ຕອນ, ກໍ່ສ້າງ​ໂຄງ​ສ້າງ​ພື້ນຖານ​ສຳລັບການປະ​ຍຸກ​ການ​ບໍລິການ​ສາທາລະນະ​ ຮັບ​ໃຊ້​ປະຊາຊົນ​ແລະວິ​ສາ​ຫະກິດ ກໍ​ຄື​ຮັບ​ໃຊ້ການ​ບໍລິຫານ ຄຸ້ມ​ຄອງ​ຂອງ​ນະຄອນ. ຮ່າ​ໂນ້ຍກໍ່​ໄດ້​ກໍ່ສ້າງ​ບັນດາ​ຖານ​ຂໍ້​ມູນ​ຫຼັກ ຮັບ​ໃຊ້​ໃຫ້​ແກ່​ການ​ບໍລິຫານ​ຈັດການ​ຂອງ​ນະ​ຄອງ, ​ເຊັ່ນ ຖານ​ຂໍ້​ມູນ​ປະຊາກອນ, ຖານ​ຂໍ້​ມູນ​ກ່ຽວກັບ​ທີ່​ດິນ... ນະຄອນ​ໄດ້​ກໍ່ສ້າງ​ແລະ​ຜັນ​ຂະຫຍາຍບັນດາ​ລະບົບ​ຂໍ້​ມູນ​ຂ່າວສານ ບົນ​ພື້ນຖານການ​ປະຍຸກ​​ແບບ​ຄົບ​ຊຸດ, ​ໃຊ້ການ​ຮ່ວມ​ກັນ, ​ເປັນ​ເອກະ​ພາບ, ສ້າງ​ປະຖົມ​ປັດ​ໄຈ​ທີ່​ສະດວກ​ດີ​ໃນ​ການ​ເຊື່ອມ​ຕໍ່, ​ແລກປ່ຽນ, ​ແບ່ງປັນ​ຂໍ້​ມູນ.

ນະຄອນ​ໄດ້​ຜັນ​ຂະ​ຫຍາຍ​ແລະຮັກສາ​ນຊ່ອງ DVC ຢ່າງ​ຕໍ່​ເນື່ອງ​ ເພື່ອ​ສະໜອງ​ບັນດາ​ການ​ບໍລິການ​ອອນ​ໄລ​ໃຊ້ການ​ຮ່ວມ​ກັນ​ລະດັບ 3, 4 ​ແລະຮອດ​ທ້າຍ​ປີ 2018, ປະສົມ​ລາຍ​ຊື່​ດິຈິ​ຕອນ​ສະ​ເພາະ​ສຳລັບ​ລັດຖະບານ. ປີ 2018, ນະຄອນ​ໄດ້​ບັນລຸ 55% ກ່ຽວ​ກັບ​ຂັ້ນ​ຕອນ​ການ​ບໍລິຫານ ທີ່​ໄດ້​ສະໜອງ​ອອນ​ໄລ​ລະດັບ 3, 4, ສູ້​ຊົນ​ຮອດ​ທ້າຍ​ປີ 2019 ຈະ​ສຳ​ເລັດການ​ບໍລິການ​ນອອນ​ໄລ 100% ລະດັບ 3, 4; ປະສານ​ສົມທົບ​ຢ່າງ​ເປັນ​ເອກະ​ພາບກ່ຽວ​ກັບ​ກົນ​ໄກ​ການ​ຊຳລະ​ ສຳລັບ​ການ​ບໍລິການ​ສາທາລະນະຂອງ​ນະຄອນ ​ເພື່ອ​ລົດ​ຜ່ອນ​ຄ່າ​ໃຊ້​ຈ່າຍ. ​ບໍລິການ​ສາທາລະນະ​ອອນ​ໄລລະດັບ 3, 4 ມີ​ການ​ທຸລະ​ກິດ​ອອນ​ໄລ​ຈຳນວນ​ຫຼາຍ​ຕໍ່​ປີ (ປີ 2016 ບັນລຸ 50%, ປີ 2017 ບັນລຸ 94%, ປີ 2018 ບັນລຸ 94%). ນະຄອນ​ສືບ​ຕໍ່​ຮັກສາ​ການ​ຈົດ​ທະບຽນ​ສ້າງ​ຕັ້ງ​ວິ​ສາ​ຫະກິດ​ອອນ​ໄລ​ໃນ​ອັດຕາ 100%, ສຸນລະກາ​ກອນ​ເອ​ເລັກ​ໂຕຣນິກ: 100%, ການ​ໄລ່​ລຽງ​ພາສີ​ເອ​ເລັກ​ໂຕຣນິກ​ແລະ​ປະກັນ​ໄພ​ສັງຄົມ: ຫຼາຍ​ກວ່າ 98%...

ການ​ໄລ່​ລຽງ, ຮັກສາ​ການ​ເຄື່ອນ​ໄຫວ​ຂອງ​ການ​ບໍລິການ​ສາທາລະນະ​ອອນ​ໄລ ກ່ຽວ​ກັບ​ການ​ແຈ້ງ​ການ​ກຳ​ເນີ​ດ​ແລະ​ແຈ້ງ​ການ​ເສຍ​ຊີວິດ, ການ​ຈ່າຍ​ເງິນ​ອຸດ​ໜູນ​ໃຫ້​ຄອບຄົວ​ຂອງ​ຜູ້​ຕາຍ​ແລະ​ຄ່າ​ທຳ​ນຽມການຝັງ​ສົບ, ຮັບປະກັນ​ຕາມ​ຂັ້ນ​ຕອນ​ແລະ​ປະສິດທິ​ຜົນ (ປະຢັດ​ຄ່າ​ໃຊ້​ຈ່າຍ​ໄດ້​ປະມານ 5 ຫຼື 6 ຕື້​ດົ່ງ​ຕໍ່​ປີ). ບົນ​ພື້ນຖານ​ຂອງ​ການດຳ​ເນີນ​ການ​ທົດ​ສອບ​ຊອບ​ແວ ປະຕູ​ເອ​ເລັກ​ໂຕຣນິກຄົບ​ວົງ​ຈອນ, ​ແຕ່​ວັນ​ທີ 26-10-2018, ນະຄອນ​ໄດ້​ຜັນ​ຂະຫຍາຍ​ຊອບ​ແວດັ່ງກ່າວ​ຢ່າງ​ກວ້າງ​ຂວາງ​ເຖິງ 30 ຄະນະ​ກຳມະການ​ປະຊາຊົນ​ເມືອງ, ​ເທດສະບານ​ເມືອງ ​ແລະ 584 ຕາ​​ແສງ, ຕົວ​ເມືອງ​ນ້ອຍ.

​ໃນ​ຂົງ​ເຂດ​ການ​ສຶກສາ, ນະຄອນ​ໄດ້​ຜັນ​ຂະຫຍາຍ​ຢ່າງ​ສຳ​ເລັດ​ຜົນ ການ​ລົງທະບຽນ​ອອນ​ໄລ​ເຂົ້າ​ຮຽນ​ຊັ້ນ​ຮຽນ​ຕອນ​ຕົ້ນ​​ໃນ​ໂຮງຮຽນ​ອະນຸບານ, ຫ້ອງ ປ.1 ​ແລະ ປ.6. ອັດຕາ​ການ​ບັນທຶກ​ການ​ລົງທະບຽນ​ອອນ​ໄລສຳລັບ​ທັງ 3 ຊັ້ນຮຽນ​ໃນ​ປີ 2018 ​ເພີ່ມ​ຂຶ້ນ​ເມື່ອ​ທຽບ​ກັບ​ປີ​ທີ່​ຜ່ານ​ມາ, ລະອຽດ​ຄື: ປີ 2016 ບັນລຸ 55,7%, ປີ 2017 ບັນ​ລຸ 70,6% ​ແລະ​ປີ 2018 ບັນລຸ 78,5% (​ສະ​ເພາະ​ປີ 2018: ຊັ້ນ​ອະນຸບານ​ບັນລຸ 86,24%, ຊັ້ນ ປ.1 ບັນລຸ 86,75% ​ແລະ​ຊັ້ນ​ ປ.6 ບັນລຸ 66,93%). ນອກຈາກ​ນັ້ນ ນະຄອນ​ກໍ​ໄດ້​ສືບ​ຕໍ່​ນຳ​ໃຊ້​ຊອບ​ແວການ​ຄຸ້ມ​ຄອງ​ສຳ​ເນົາ​ນັກຮຽນ​ເອ​ເລັກ​ໂຕຣນິກ, ການ​ສະໝັກ​ເຂົ້າ​ຮຽນ​ອອນ​ໄລ, ສະໝຸດ​ຕິດ​ຕໍ່​ເອ​ເລັກ​ໂຕຣນິກ, ການ​ຄຸ້ມ​ຄອງ​ຜົນ​ການ​ສຶກສາ​ຊັ້ນ​ປະຖົມສຶກສາ.

​ໃນ​ດ້ານ​ການ​ຈະລາຈອນ​ຂົນ​ສົ່ງ​ໃນ​ເມືອງ, ນະຄອນ​ໄດ້​ສ້າງ​ແລະ​ເປີດ​ນຳ​ໃຊ້ ສູນການ​ຄຸ້ມ​ຄອງ​ແລະ​ຈັດການ​ຈະລາຈອນ​ໃນ​ເມືອງ​ເປັນ​ເວລາ​ຫຼາຍ​ປີ​ມາ​ແລ້ວ, ຊຶ່ງ​ມີ​ກ້ອງຖ່າຍຮູ​ບ 500 ກວ່າ​ໜ່ວຍ ທີ່​ໄດ້​ຕິດ​ຕັ້ງ​ຢູ່​ໃນ​ເສັ້ນທາງ​ການ​ຈະລາຈອນ​ທີ່​ສຳຄັນ ​ເພື່ອ​ກວດ​ສອບ​ການ​ຈະລາຈອນ ​ແລະ ລົງ​ໂທດປັບ​ໄໝ​ການລະ​ເມີດ​ກົດໝາຍ, ລະບົບ​ໄຟ​ສັນຍານ​ການ​ຈະລາຈອນ​ໄດ້​ຖືກຕິດ​ຕັ້ງ​ຢູ່ 179 ຈຸດ​ການ​ຈະລາຈອນ. ນະຄອນ​ໄດ້​ຜັນ​ຂະຫຍາຍປະ​ຍຸກການ​ຄຸ້ມ​ຄອງ​ການ​ເດີນທາງຂອງ​ລົດ​ເມ ​ໃນ​ເສັ້ນທາງຫຼາຍ​ກວ່າ 100 ​ສາຍ ດ້ວຍຈຳນວນ​ລົດ​ເມ 1.600 ຄັນ, ອຳນວຍ​ເງື່ອນ​ໄຂ​ໃຫ້​ບັນດາ​ບໍລິສັດ​ລົດ​ເມ​ ໃນ​ການ​ຄຸ້ມ​ຄອງ​ແລະ​ຂັບ​ເຄື່ອນ​​ເຄືອ​ຂ່າຍ​ລົດ​ເມ​ເປັນ​ຢ່າງ​ດີ ​ແລະ ​ສະໜອງ​ຂໍ້ມູນທີ່​ຊັດ​ເຈນ​ໃຫ້​ຜູ້​ໂດຍສານ ກ່ຽວ​ກັບການ​ເດີນທາງ​ຂອງ​ແຕ່ລະ​ເສັ້ນທາງ​ລົດ​ເມ​​. ປີ 2018, ນະຄອນ​ໄດ້​ຜັນ​ຂະຫຍາຍ​ໂຄງການຊ່ວຍ​ໜູນ​ປີ້ລົດ​ເມຕໍ່​ສາຍ ສຳລັບການ​ຂົນ​ສົ່ງ​ສາທາລະນະ​ຂອງ​ຮ່າ​ໂນ້ຍ ທີ່​ໃຊ້​ທຶນ​ຊ່ວຍ​ເຫຼືອ​ໃຫ້ລ້າ​ ຂອງອົງການ​ຮ່ວມ​ມື​ສາກົນ​ຍີ່ປຸ່ນ (JICA); ຜັນ​ຂະຫຍາຍ​ຊອບ​ແວຮັບ​ໃຊ້​ວຽກ​ງານ​ຄຸ້ມ​ຄອງ​ການສ້ອມ​ແປງ​ແລະ​ບຳລຸງ​ຮັກສາ​ລະບົບ​ໂຄງ​ສ້າງ​ພື້ນຖານ​ການ​ຄົມມະນາຄົມ​ໃນ​ຮ່າ​ໂນ້ຍ; ພວມ​ປັບປຸງ​ບູລະນະ​ໂຄງການ​ຄົມມະນາຄົມ​ທີ່ສະຫຼາດ, ສຸມ​ໃສ່​ການ​ສ້າງ​ຂໍ້​ມູນ​ດິຈິ​ຕອນ​ກ່ຽວ​ກັບ​ໂຄງສ້າງ​ພື້ນຖານ​ແລະ​ຍານພາຫະນະການ​ຄົມ​ມະນະ​ຄົນ; ສ້າງ​ຊອບ​ແວ, ວິ​ທີ​ປະຍຸກ​ຮັບ​ໃຊ້​ວຽກງານ​ການ​ຄຸ້ມ​ຄອງ, ຈັດ​ຕັ້ງ​ຂັບ​ເຄື່ອນການ​ຄົມມະນາຄົມ ​ແລະ ​ລົງ​ໂທດປັບ​ໄໝ​ຢ່າງ​ອັດຕະ​ໂນ​ມັດ.

ນະຄອນ​ໄດ້​ເຮັດ​ທົດ​ລອງ ​ແລະ ສືບ​ຕໍ່​ຂະຫຍາຍ​ຂອບ​ເຂດ​ການ​ປະຍຸກ​ວິທີ​ຊອກ​ຫາ​ບ່ອນ​ຈອດ​ລົດ​ແລະ​ຊຳລະ​ເງິນ​ຜ່ານ​ໂທລະສັບ​ມື​ຖື - IPARKING. ມາ​ເຖິງ​ດຽວ​ນີ້ ມີ​ບ່ອນ​ຈອດ​ລົດ 165 ​ແຫ່ງ​ໄດ້​ປະຍຸກ​ການ​ບໍລິການ IPARKING. ​ໃນ​ເວລາ​ຕໍ່ໜ້າ, ນະຄອນ​ຈະປັບປຸງ​ບູລະນະ​ລະບຽບ​ການ​ຄຸ້ມ​ຄອງ ​ແລະ ສະ​ເໜີ​ໃຫ້​ໃຊ້​ໃບ​ເກັບ​ເງິນ​ເອ​ເລັກ​ໂຕຣນິກສຳລັບ​ລະບົບ​ທັງ​ໝົດ; ທົດ​ລອງ​ການ​ຕິດ​ຕັ້ງ​ອຸປະກອນ​ລະບົບ​ຕົ໋ວ​ເອ​ເລັກ​ໂຕຣນິກທີ່​ສະຫຼາດ​​ໃນ​ເສັ້ນທາງ​ລົດ​ເມ BRT; ທົດ​ລອງການລົງ​ໂທດ​ປັບ​ໄໝການລະ​ເມີດກົດ​ຈະລາຈອນ​ ​ໂດຍ​ຜ່ານ​ລະບົບ​​ເຝົ້າ​ລະວັງ​ດ້ວຍກ້ອງຖ່າຍຮູບທີ່​ສະຖານີ​ຈອດ​ລົດຢາ​ບບ້າ​ດ (ລົງ​ໂທດ​ປັບ​ໄໝ​ເຢັນ).

​ໃນ​ຂົງ​ເຂດ​ກະສິກຳ, ນະຄອນ​ພວມ​ເຮັດ​ທົດ​ລອງລະບົບ​ຂໍ້​ມູນ​ເອ​ເລັກ​ໂຕຣນິກກວບສອບ​ຢ້ອນ​ຫຼັງການ​ໃຊ້​ລະຫັດ QR ດ້ວຍ​ອຸປະກອນ​ມື​ຖື​ອັດ​ສະ​ລິ​ຍະ, ຮັບປະກັນ​ຄວາມ​ປອດ​ໄພ​ສຳລັບ​ຜະລິດ​ຕະພັນ​ໝາກ​ໄມ້ ທີ່​ຮ້ານ​ຂາຍ​ໝາກ​ໄມ້​ໃນ​ຮ່າ​ໂນ້ຍ. ​ເຖິງ​ດຽວ​ນີ້  ມີ 652 ຮ້ານ​ໃນ​ຈຳນວນ 941 ຮ້ານ​ຂາຍ​ໝາກ​ໄມ້​ໄດ້ມີ​ສະ​ແຕມ​ຕິດຕາມ​ຜົນ​ຂອງ​ໝາກ​ໄມ້ (ບັນລຸ​ອັດຕາ​ສ່ວນ 66%), ສ້າງ​ພວງ​ພະນັງ​ເຊື່ອນ​ຕໍ່​ຈຳນວນ​ໜຶ່ງ​ຈາກ​ການ​ຜະລິດ​ໄປ​ສູ່​ການ​ບໍລິ​ໂພ​ກຜະລິດ​ຕະພັນ ບົນ​ພື້ນຖານ​ນັ້ນ ກໍ່ສ້າງ​ເຄື່ອງໝາຍ​ການ​ຄ້າ​ທີ່​ຕິດ​ສະ​ແຕມ, ຍີ່​ຫໍ້, ​ການ​ຫຸ້ມ​ຫໍ່ ​ເພື່ອ​ລະບຸ​ຜະລິດ​ຕະພັນ​ໝາກ​ໄມ້​ຂອງ​ຮ່າ​ໂນ້ຍ.

ລະບົບ​ພື້ນຖານ​ສາທາລະນະ​ສຸກ​ຂອງ​ຮ່າ​ໂນ້ຍ ມີ 3 ລະດັບ, ​ແຕ່​ຍ້ອນ​ມີ​ປະຊາກອນ​ຫຼາຍ ດັ່ງນັ້ນ ບັນດາສາຍ​ການດູ​ແລ​ສຸຂະພາບ​ຂອງ​ຮ່າ​ໂນ້ຍຈຶ່ງ​​ແອ​ອັດ​ທີ່​ສຸດ, ​ໂດຍ​ສະ​ເພາະ​ແມ່ນ​ສາຍ​ການ​ແພດ​ລະດັບ​ນະຄອນ. ​ເພື່ອ​ຮັບ​ໃຊ້​ການ​ດູ​ແລ​ສຸຂະ​ພາບ​ຂອງ​ປະຊາຊົນ​ ​ແລະ ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ປະຊາຊົນ​ມາກ​ວດສຸຂະພາບ ​ແລະ ປິ່ນປົວຢູ່​ບັນດາ​ໂຮງໝໍ, ຮ່າ​ໂນ້ຍ​ໄດ້ຜັນ​ຂະຫຍາຍ​ການປະຍຸກ​ໃຊ້​ສຳ​ເນົາ​ສຸຂະພາບ​ເອ​ເລັກ​ໂຕຣນິກ ສຳລັບ​ປະຊາຊົນ​ຫຼາຍ​ກວ່າ 7,5 ລ້ານ​ຄົນ (​ເຖິງ​ດຽວ​ນີ້ ​ໄດ້​ສ້າງ​ສຳ​ເນົາ​ສຸຂະພາບ​ເອ​ເລັກ​ໂຕຣນິກ 6.325.000 ສະບັບ​ໃຫ້​ປະຊາຊົນ, ບັນລຸ​ອັດຕາ 82,2%); ຈັດ​ຕັ້ງການ​ກວດ​ຄັດ​​ໂລກ​ມະ​ເລງ​ໄລຍະ​ຕົ້ນ​ສຳລັບຜູ້​ທີ່​ມີ​ອາຍຸ​​ເກີນ 40 ປີ ​ໃຫ້​ແກ່​ປະຊາຊົນ 2 ລ້ານ​ກວ່າ​ຄົນ​ໃນ​ນະຄອນຮ່າ​ໂນ້ຍ (​ໃນ​ນັ້ນ, ການ​ກວດ​ຄັດ​​ໂລກ​ມະ​ເລງບໍ່​ເກັບ​ຄ່າ​ໃຫ້​​ແກ່ປະຊາຊົນເກືອ​ນ 400.000 ຄົນ); ​​ໄດ້ເຊື່ອມ​ຕໍ່​ບັນດາ​ໂຮງໝໍ​ໃນ​ພື້ນ​ທີ່, ​ເຊື່ອມ​ຕໍ່​ການກວດ​ສຸຂະພາບ, ການປິ່ນປົວ ກັບລະບົບ​ປະກັນ​ສຸຂະພາບ.

​ໃນ​ຂົງ​ເຂດ​ຊັບພະຍາ​ການ​ແລະ​ສິ່ງ​ແວດ​ລ້ອມ ນະຄອນ​ໄດ້​ສະໜອງ​ຂໍ້​ມູນການກວດ​ສອບ​ສິ່ງ​ແວດ​ລ້ອມ​ໃຫ້​ປະຊາຊົນ ກ່ຽວ​ກັບ​ຄຸນ​ນະພາ​ບອາກາດ, ຄຸນ​ນະພາ​ບນ້ຳ, ປະລິມານ​ນ້ຳ​ຝົນ, ​ແຜນ​ທີ່​ນ້ຳ​ຖ້ວມ... ນະຄອນ​ກໍ່​ພວມ​ຜັນ​ຂະຫຍາຍການ​ລົງທຶນ​ກໍ່ສ້າງ​ລະບົບສຳ​ເນົາ​ທີ່​ດິນ ​ແລະ ຖານ​ຂໍ້​ມູນ​ການ​ຄຸ້ມ​ຄອງ​ທີ່​ດິນ​ໃນ​ນະຄອນ.

​ໃນ​ເວລາ​ທີ່​ຈະ​ເຖິງ, ຮ່າ​ໂນ້ຍສືບ​ຕໍ່​ກໍ່ສ້າງ​ອົງ​ປະກອບ​ພື້ນຖານ​ຈຳນວນ​ໜຶ່ງ​ ຂອງ​ນະຄອນ​ສະຫຼາດ, ​ເຊັ່ນ ສູນ​ປະຕິບັດ​ການ​ອັດ​ສະ​ລິ​ຍະ​ຂອງ​ນະຄອນ​ຮ່າ​ໂນ້ຍ, ລະບົບ​ຄົມມະນາ​ຄົນ​ຂົນ​ສົ່ງ​ອັດ​ສະ​ລິ​ຍະ, ການທ່ອງທ່ຽວ​ອັດ​ສະ​ລິ​ຍະ... ຜັນ​ຂະຫຍາຍ​ບັນດາ​ເນື້ອ​ໃນ​ອັນ​ພື້ນຖານ​ຂອງລະບົບ​ຄົມມະນາ​ຄົນ​ຂົນ​ສົ່ງ​ອັດ​ສະ​ລິ​ຍະ ຄື: ລະບົບ​ຂໍ້​ມູນ​ຂ່າວສານ​ການ​ຈະລາຈອນ; ລະບົບ​ຄຸ້ມ​ຄອງ​ການຂົນ​ສົ່ງ​ສາທາລະນະ; ລະບົບ​ຄຸ້ມ​ຄອງ​ການ​ຈະລາຈອນ; ລະບົບ​ຄວບ​ຄຸມ ຈັດການ​ແກ້​ໄຂ​ການລະ​ເນີ​ດ... ກໍ່ສ້າງ​ສູນ​ຄວບ​ຄຸມ​ບໍລິຫານ​ການ​ຈະລາຈອນ​ອັດ​ສະ​ລິ​ຍະ; ສ້າງ​ຊຸດ​ຖານ​ຂໍ້​ມູນ​ດິຈິ​ຕອນ ​ໃຫ້​ແກ່​ລະບົບຄົມມະນາຄົມ​ຂົນ​ສົ່ງ​ອັດ​ສະ​ລິ​ຍະ (ກວມ​ດ້ວຍ​ໜ້າ​ທີ່​ການ​ລວມຖານ​ຂໍ້​ມູນ​ທີ່​ມີ​ຢູ່ ແລະ ສ້າງ​ຖານ​ຂໍ້​ມູນ​ທີ່​ຍັງຂາດ​ເຂີນ ກ່ຽວ​ກັບ​ໂຄງ​ສ້າງ​ພື້ນຖານ, ຍານພາຫະນະ, ຜູ້ໃຊ້). ຮ່າ​ໂນ້ຍກຳລັງ​ສົມທົບ​ກັບ​ບໍລິສັດ FPT ​ໃນ​ການ​ສ້າງ​ແຜນ​ທີ່​ດິຈິ​ຕອນ​ການ​ຈະລາຈອນ ​ເພື່ອ​ແນ​ໃສ່​ສະໜອງ​ໃຫ້​ປະຊາຊົນ​ແລະອົງການ​ຄຸ້ມ​ຄອງ ກ່ຽວ​ກັບ​ຂໍ້​ມູນ​ຂ່າວສານ​ຮອບດ້ານກ່ຽວ​ກັບ​ສະພາບ​ການ​ຈະລາຈອນ, ລາຍ​ຊື່​ອຸປະກອນ​ໂຄງ​ສ້າງ​ພື້ນຖານ​ການ​ຂົນ​ສົ່ງ, ​ເຊັ່ນ ສະຖານີ​ຈອດ​ລົດ, ປ້າຍ​ແລະ​ສັນຍານ​ຈະລາຈອນ,... ປະສົມ​ປະສານ​ກັບ​ບັນດາ​ພາຫະນະ​ຂົນ​ສົ່ງ​ສາທາລະນະ​ໃນພື້ນ​ທີ່​ຮ່າ​ໂນ້ຍ. ລະບົບ​ການ​ຄົມມະນາຄົມ​ຂົນ​ສົ່ງ​ອັ​ດສະ​ລິ​ຍະ​ຂອງ​ນະຄອນຮ່າ​ໂນ້ຍ ຈະ​ສາມາດ​ຕອບ​ສະໜອງ​ຄວາມ​ຕ້ອງການກ່ຽວກັບ​ຂໍ້​ມູນ​ຂ່າວສານຮັບ​ໃຊ້​ຜູ້​ເຂົ້າ​ຮ່ວມ​ການ​ຈະລາຈອນ ​ແລະ ອົງການ​ຄຸ້ມ​ຄອງ​ລັດ; ລະບົບ​ຄວບ​ຄຸມ​ການ​ຈະລາຈອນ​ໂດຍ​ສັນຍານ​ໄຟ; ລະບົບ​ການ​ຕິດຕາມ​ກວດກາ​ແລະ​ຈັດການ​ການລະ​ເມີດ​ໂດຍ​ຮູບ; ລະບົບ​ຊອບ​ແວສັ່ງ​ການ - ຄວບ​ຄຸມ​ການ​ຈະລາຈອນ​ອັດ​ສະ​ລິ​ຍະ...

ຕ້ອງ​ມີ​ການ​ປະສານ​ສົມທົບ​ລະຫວ່າງ​ຮາກ​ຖານ​ເຕັກ​ໂນ​ໂລ​ຊີ, ຖັນ​ແຖວພະນັກງານ ​ແລະ ຊັບພະຍາກອນ​ທາງການ​ເງິນ

​ເປົ້າ​ໝາຍ​ການ​ກໍ່ສ້າງ​ຕົວ​ເມືອງ​ສະຫຼາດ​ຂອງ​ຮ່າ​ໂນ້ຍ ​ໄດ້​ດຳ​ເນີນ​ປະຕິບັດ​ໃນ​ສະພາບການ​ປະຕິວັດ​ອຸດສາຫະກຳຄັ້ງ​ທີ​ສີ່ ພວມ​ເກີດ​ຂຶ້ນ​ຢ່າງ​ໄວວາ​ແລະ​ມີ​ບັນດາ​ເຕັກ​ໂນ​ໂລ​ຊີ​ທີ່​ໂດດ​ເດັ່ນ, ຊຶ່ງ​ຮຽກຮ້ອງ​ຕ້ອງການ​ບາດກ້າວ​ເດີນ​ທີ່​ເໝາະ​ສົມ ​ເພື່ອ​ໃຫ້​ນະຄອນ​ທີ່​ສະຫຼາດນັ້ນ ​ສາມາດປົວ​ແປງ​ແລະ​ຍົກ​ສູງ​ຄຸນ​ນະພາ​ບຊີວິ​ຂອງປະຊາຊົນ, ປຸກ​ກະ​ຕູ້ນການ​ເຕີບ​ໂຕ​ແລະ​ພັດທະນາ​ເສດຖະກິດ-ສັງຄົມ. ​ເມື່ອ​ວາງ​ໂຄງການ​ກໍ່ສ້າງ​ນະຄອນຫຼວງ​ໃຫ້​ກາຍ​ເປັນ​ນະຄອນ​ທີ່​ສະຫຼາດ​ນັ້ນ, ຮ່າ​ໂນ້ຍກໍ່​ໄດ້​ຈັດ​ສັນ​ເງິນ​ທຶນ​ຈຳນວນ​ໜຶ່ງ​ທີ່​ແນ່ນອນ​​ໃນງົບປະມານ​ຂອງ​ນະຄອນ ​ເພື່ອ​ປະຕິບັດ​ໂຄງການ. ​ແຕ່​ວ່າ, ຮ່າ​ໂນ້ຍກໍ່​ຈະ​ລະດົມ​ຊັບພະຍາກອນ​ຈາກ​ບັນດາວິ​ສາ​ຫະກິດ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​​ໃນ​ພື້ນ​ທີ່. ທ່າ​ອຽງ​ຕົ້ນຕໍ​ແມ່ນ ​ໃນ​ເມື່ອ​ກໍ່​ຕັ້ງ​ບໍລິການ​ສາທາລະນະ, ຮ່າ​ໂນ້ຍຈະ​ສ້າງ​ແລະແບ່ງ​ປະ​ເພດບໍລິການ​ເທື່ອ​ລະ​ກ້າວ ບົນ​ຈິດ​ໃຈ​ການບໍລິການ​ໃດ​ທີ່​ເອກະ​ຊົນ​ສາມາ​ດ​ເຮັດ​ໄດ້ ຈະຄ່ອຍໆ​ໂອນ​ໃຫ້​ເອກະ​ຊົນ​ເຮັດ. ​ແຫຼ່ງລາຍ​ໄດ້​ຈາກ​ການ​ໂອນ​ໃຫ້​ເອກະ​ຊົນນີ້ ຮ່າ​ໂນ້ຍຈະ​ລະດົມ​​ເພື່ອ​ເຮັດ​ວຽກ​ງານຕໍ່​ໄປ​ໃນ​ການ​ສ້າງນະຄອນ​ສະຫຼາດ.

ນະຄອນ​ກໍ່​ຈະ​ຈ້າງ​ບໍລິການ​ເຕັກ​ໄນ​ໄລ​ຊີ​ຂໍ້​ມູນ​ຂ່າວສານຂອງ​ວິ​ສາ​ຫະກິດ, ນັບ​ແຕ່​ສູນ​ຂໍ້​ມູນ (Data Center) ຈົນ​ເຖິງບໍລິການ​ຮັກສາ​ຄວາມ​ລັບ, ບໍລິການ​ເຊົ່າ​ສາຍ, ຈ້າງ​ການ​ສ້າ​ງຊອບ​ແວ. ອາດ​ຈະ​ເວົ້າ​ວ່າ, ຮ່າ​ໂນ້ຍຫັນ​ໄປ​ສູ່​ການ​ລະດົມ​ຊັບພະຍາກອນ​ທຸກ​ຢ່າງ, ​ໃນ​ນັ້ນ​ມີ​ທັງ​ຊັບພະຍາກອນ​ທາງ​ການ​ເງິນ ​ແລະມັນສະໝອງ ​ເຂົ້າ​ໃນ​ການ​ກໍ່ສ້າງ​ຕົວ​ເມືອງ​ສະຫຼາດ​ໃຫ້​ຮ່າ​ໂນ້ຍ.

ດັ່ງ​ນັ້ນ, ​ເພື່ອ​ສ້າງ​ຕົວ​ເມືອງ​ສະຫຼາດ​ໃຫ້​ປະສົບ​ຄວາມ​ສຳ​ເລັດ, ນອກຈາກ​ຄວາມ​ພະຍາຍາມ​ຂອງ​ອຳນາດ​ການ​ປົດ​ຄອງ​ນະຄອນ​ຮ່າ​ໂນ້ຍ​ແລ້ວ, ຍັງ​ຕ້ອງການ​ທີ່​ສຸດ​ເຖິງ​ການ​ເຂົ້າ​ຮ່ວມ​ຂອງ​ວິ​ສາ​ຫະກິດ​ແລະຊຸມ​ຊົນ. ນະຄອນ​ເອົາ​ໃຈ​ໃສ່​ທີ່​ສຸດ​ເຖິງ​ການ​ດຶງ​ດູດ​ການ​ລົງທຶນ​ຈາກ​ສັງຄົມ, ຍູ້​ແຮງ​ການ​ຮ່ວມ​ມື​ສາກົນ​ກ່ຽວ​ກັບ​ການ​ໂອນ​ເຕັກ​ໂນ​ໂລ​ຊີ, ບົດຮຽນ ​ແລະ ປັນຍາຄວາມ​ຮູ້ ​ໂດຍ​ຜ່ານ​ການ​ເຊັນ​ບົດ​ບັນທຶກ​ຄວາມ​ຈຳ​ ກັບ​ຫຼາຍ​ກຸ່ມ​ບໍລິສັດ​ຢູ່​ໃນ​ແລະຕ່າງປະ​ເທດ. ຮ່າ​ໂນ້ຍ​ໄດ້​ແລກປ່ຽນ, ​ເປັນ​ເອກະ​ພາບ​ລົງ​ນາມ​ໃນບົດ​ບັນທຶກ​ຄວາມ​ຈຳ ກັບ​ບັນ​ດາ​ກຸ່ມ​ບໍລິສັດ​ທີ່​ສຳຄັນ​ຄື Microsoft ຫວຽດນາມ, Viettel, VNPT, FPT, ​ເຍິດ​ເກື່ອງ,... ກ່ຽກັບ​ການ​ຮ່ວມ​ມື​ໃນ​ການ​ກໍ່ສ້າງ​ອຳນາດ​ການ​ປົກຄອງ​ເອ​ເລັກ​ໂຕຣນິກ ​ແລະ ນະຄອນ​ສະຫຼາດ; ພ້ອມ​ກັນ​ນັ້ນ​ ກໍ່​ເຊີນ​ບັນດາ​ຄູ່​ຮ່ວມ​ງານ​ຂອງ​ລັດຖະບານ​ ແລະວິ​ສາ​ຫະກິດ​ອາ​ເມ​ລິ​ກາ ມາ​ຮ່າ​ໂນ້ຍ​ໃຫ້​ຄຳ​ປຶກສາກ່ຽວກັບ​ການ​ກໍ່ສ້າງ ສູນ​ຄວບ​ຄຸມ​ຕິດຕາມ​ການ​ດຳ​ເນີນ​ງານ​ລວມສູນ, ສ້າງ​ການ​ປະຍຸກ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ໃນ​ການຄຸ້ມ​ຄອງ​ຕົວ​ເມືອງ, ການວາງ​ແຜນການ​ກໍ່ສ້າງ, ທີ່​ດິນ ​ບົນ​ພື້ນຖານ​ແຜນ​ທີ່​ດິຈິ​ຕອນ...

ບົນ​ພື້ນຖານ​ບົດຮຽນ​ປະສົບ​ການ​ທີ່​ມີ​ຢູ່, ບັນດາ​ພື້ນຖານ​ເຕັກ​ໂນ​ໂລ​ຊີ​ທີ່ພວມ​ເ​ປັນຮູບ​ເປັນ​ຮ່າງ​ຂຶ້ນ, ປັດ​ໄຈ​ມະນຸດ​ແລະ​ຊັບພະຍາກອນ​ທາງ​ການ​ເງິນ, ຮ່າ​ໂນ້ຍມີ​ຄວາມ​ສາມາດ​ຢ່າງ​ພຽງພໍ​​ໃນ​ການກໍ່ສ້າງ​ນະຄອນ​ສະຫຼາດ ​ເພື່ອ​ເປົ້າ​ໝາຍ​ທີ່​ໄດ້​ວາງ​ອອກ​ມາຄື ນຳ​ເອົາ​ຄວາມ​ສະດວກ​ສະບາຍ, ຄວາມ​ປອດ​ໄພ ​ແລະ​ຄວາມ​ເປັນ​ມິດ​ ມາ​ໃຫ້​ປະຊາຊົນ​ທຸກ​ຄົນ./.

​ໂດຍ ປອ. ຫງວຽນ​ດຶກ​ຈູງ,
ກຳມະການ​ສູນ​ກາງ​ພັກ, ຮອງ​ເລຂາ​ຄະນະ​ພັກ​ກຳ​ແພງນະຄອນ,
ປະທານ​ຄະນະ​ກຳມະການ​ປະຊາຊົນ​ນະຄອນ​ຮ່າ​ໂນ້ຍ

----------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 915 (​ເດືອນ​ມັງກອນ 2019).

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ