ວັນອັງຄານ, 22/10/2019
ກໍ່ສ້າງຮູບແບບ “ຂົນຂວາຍປະຊາຊົນເກ່ງ” ຕິດກັບຜົນປະໂຫຍຂອງປະຊາຊົນ, ບົດຮຽນຈາກພາກປະຕິບັດ
18/3/2019 20:35' ສົ່ງ ພິມ
ຮູບລັກສະນະຊົນນະບົດທີ່ງອກງາມ, ຜ່ານວຽກງານ “ຂົນຂວາຍປະຊາຊົນເກ່ງ” ມີປະສິດທິຜົນ. (ພາບ: baoanhdatmui.vn)

ປະຕິບັດ​ຄຳ​ສອນ​ຂອງ​ປະທານ​ໂຮ່ຈີ​ມິນ, ວຽກ​ງານ​ຂົນຂວາຍ​ປະຊາຊົນ​ຂອງ​ລະບົບ​ການ​ເມືອງ​ທັງ​ໝົດ​ໃນ​ຊຸມ​ປີ​ທີ່​ຜ່ານ​ມາ​ໄດ້​ບັນລຸ​ຜົນສຳ​ເລັດ​ຕົວ​ຈິງ​ຫຼາຍ​ຢ່າງ. ​ໜຶ່ງໃນ​ບັນດາ​ວິທີ​ແກ້​ທີ່​ສຳຄັນ​ເພື່ອ​ບັນລຸ​ຜົນສຳ​ເລັດ​ເຫຼົ່າ​ນັ້ນ​ແມ່ນ ປຸກລະດົມ​ແລະ​ຍູ້​ແຮງ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ”. ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ນັບ​ມື້​ນັບ​ແຜ່​ກວ້າງ, ສ້າງ​ຜົນ​ກະທົບ​ທີ່​ຕັ້ງໜ້າ​ຕໍ່​ຂະ​ບວນການ​ພັດທະນາ​ປະ​ເທດ.

ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ເລີ່​ມຈາກ​ຄວາມ​ຕ້ອງການ​ຕົວ​ຈິງ​ຂອງ​ຊີວິດ ທີ່ມີ​ຕໍ່​ວຽກ​ງານ​ຂົນຂວາຍ​ປະຊາຊົນ​ຂອງ​ພັກ

​ຄວາມ​ເປັນ​ຈິງ​ແຫ່ງ​ຊີວິດ​ຂອງ​ປະຊາຊົນ​ສະ​ແດງ​ໃຫ້​ເຫັນ, ​ເພື່ອ​ໃຫ້​ປະຊາຊົນ​ເຂົ້າ​ໃຈ, ສະໜັບສະໜູນ ​ເຂົ້າ​ຮ່ວມ​ການ​ປະຕິບັດ​ແນວທາງ, ທັດສະນະຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ ​ແມ່ນ​ຈຳ​ເປັນ​ຕ້ອງ​ເຮັດ​ເປັນ​ຢ່າງ​ດີ ວຽກ​ງານ​ໂຄສະນາ ​ຂົນຂວາຍ ດ້ວຍ​ວິທີ​ທີ່​ເໝາະ​ສົມ​ແລະມີ​ປະສິດທິ​ຜົນ, ຕິດ​ກັບ​ການ​ຍົກ​ສູງ​ຊີວິດ​ການ​ເປັນ​ຢູ່, ​ແກ້​ໄຂ​ຜົນ​ປະ​ໂຫ​ຍດສ່ວນ​ຕົວ​ຂອງ​ປະຊາຊົນ. ດັ່ງ​ນັ້ນ, ຂະ​ບວນການ​ “ຂົນຂວາຍ​ປະຊາຊົນ​ເກ່ງ” ຄ່ອຍໆ​ກາຍ​ເປັນ​ແບບ​ວິທີ​ທີ່​ສຳຄັນ​ໃນ​ວຽກ​ງານ​ຂົນຂວາຍ​ປະຊາຊົນ. ມີ​ຮູບ​ແບບ, ​ແບບຢ່າງ​ຂອງການ “ຂົນຂວາຍ​ປະຊາຊົນ​ເກ່ງ” ທີ່ປາກົດ​ຕົວ​ຂຶ້ນ​ເປັນ​ຈຳນວນ​ໜື່ນ​ໃນ​ບັນດາ​ຂົງ​ເຂດ​ຂອງ​ຊີວິດ​ສັງຄົມ ຊຶ່ງ​ໄດ້​ປະກອບສ່ວນ​ສ້າງ​ຄວາມ​ເຫັນ​ດີ​ເຫັນ​ພ້ອມ​ໃນ​ສັງຄົມ, ​ເຕົ້າ​ໂຮມ ປຸກລະດົມ ສາມັກຄີ​ປະຊາຊົນ​ທຸກ​ຊັ້ນ​ຄົນ ​ໃຫ້​ເຂົ້າ​ຮ່ວມ​ການພັດທະນາ​ເສດຖະກິດ-ສັງຄົມ, ຮັບປະກັນ​ການ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ, ກໍ່ສ້າງ​ລະບົບ​ການ​ເມືອງ.

ບົນ​ພື້ນຖານ​ສະຫຼຸບ​ສັງ​ລວມພຶດຕະກຳຂອງ​ບັນດາ​ຮູບ​ແບບ, ​ແບບຢ່າງ “ຂົນຂວາຍ​ປະຊາຊົນ​ເກ່ງ”, ສືບ​ຕໍ່​ເປີດ​ກວ້າງ​ຮູບ​ການ​ຂົນຂວາຍ​ປະຊາຊົນ, ປ່ຽນ​ແປງ​ໃໝ່​ແລະ​ຍົກ​ສູງ​ຄຸນ​ນະພາ​ບຂອງວຽກ​ງານ​ຂົນຂວາຍ​ປະຊາຊົນ​ຂອງ​ພັກ, ປີ 2009 ຄະນະ​ຂົນຂວາຍ​ປະຊາຊົນ​ສູນ​ກາງ​ໄດ້​ປຸກ​ລະດົມຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ຢ່າງ​ເປັນ​ທາງ​ການ​ໃນ​ທົ່ວ​ປະ​ເທດ.

ຂະ​ບວນການ​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ ສະໜັບສະໜູນ ​ເອົາ​ໃຈ​ໃສ່​ຊີ້​ນຳ​ນຳພາ​ຈາກ​ຄະນະ​ພັກຂັ້ນ​ຕ່າງໆ​ແລະລະບົບ​ການ​ເມືອງ​ທັງ​ໝົດ ​ໂດຍ​ຕິດ​ກັບ​ການ​ຂົນຂວາຍ “ຮ່ຳຮຽນ​ແລະ​ປະຕິບັດຕາມ​ຕົວຢ່າງ​ຄຸນສົມບັດ​ສິນ​ທຳ​ຂອງ​ປະທານໂຮ່ຈີ​ມິນ”. ບັນດາ​ຄະນະ​ພັກ, ອົງການ​ຈັດ​ຕັ້ງ​ພັກ​ໄດ້​ກຳນົດ​ວ່າ ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ​ແມ່ນ​ຄວາມ​ຮັບຜິດຊອບ​ຂອງ​ລະບົບ​ການ​ເມືອງ​ທັງ​ໝົດ ​ແລະ ຕ້ອງ​ກາຍ​ເປັນ​ຂະ​ບວນການ​ທີ່​ກວ້າງຂວາງ​ເລິ​ກເຊິ່ງ​ໃນທຸກ​ຂົງ​ເຂດ​ການ​ເມືອງ-ສັງຄົມ, ຢູ່​ທຸກ​ຂັ້ນ, ທຸກ​ຂະ​ແໜງ​ການ, ​ໃນ​ແຕ່​ລະ​ພະນັກງານ ສະມາຊິກ​ພັກ ຂ້າ​ລັດຖະການ ພາລະ​ກອນ, ສະມາຊິກ​ຊາວ​ໜຸ່ມ ສະມາຊິກ​ສະມາຄົມ ​ແລະ​ປະຊາຊົນ​ທຸກ​ຊັ້ນ​ຄົນ. ອີງ​ໃສ່​ຈຸດ​ພິ​ເສດ ​ແລະ ສະພາບ​ການ​ຕົວ​ຈິງຂອງ​ແຕ່ລະ​ທ້ອງ​ຖິ່ນ ໜ່ວຍງານ, ບັນດາຄະນະ​ພັກ​ ການ​ຈັດ​ຕັ້ງ​ພັກ​ໄດ້​ວາງ​ທິດການ​ເລືອກ, ກຳນົດ​ເນື້ອ​ໃນທີ່​ເໝາະ​ສົມ ​ເພື່ອ​ຂົນຂວາຍ ​ແລະ​ເສີມ​ຂະຫຍາຍ​ໄດ້​ພະ​ລັງ​ແຮງ​ຂອງ​ປະຊາຊົນ, ປະຕິບັດ​ບັນດາໜ້າ​ທີ່​ການ​ເມືອງ, ​ເບິ່ງ​ແຍງ​ດູ​ແລ​ຜົນ​ປະ​ໂຫຍ​ດທີ່​ຊອບ​ດ້ວຍ​ກົດໝາຍ, ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ.

​ໂດຍ​ຢືນຢັນ​ບົດບາດ, ຄວາມ​ໝາຍ​ຂອງ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ”, ມະຕິ​ສະບັບ​ທີ 25-NQ/TW, ລົງ​ວັນ​ທີ 3-6-2013, ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XI “ກ່ຽວ​ກັບ​ການ​ເພີ່ມ​ທະວີ ​ແລະ ປ່ຽນ​ແປງ​ໃໝ່​ການ​ນຳພາ​ຂອງ​ພັກ​ຕໍ່​ວຽກ​ງານ​ຂົນຂວາຍ​ປະຊາຊົນ​ໃນ​ສະພາບ​ການ​ໃໝ່ ລະບຸ: “ຍູ້​ແຮງ​ຂະ​ບວນການ “ຂົນຂວາຍ​ປະຊາຊົນ​ເກ່ງ” ຕິດ​ກັບ​ການ​ຮ່ຳຮຽນ ​ແລະ​ປະຕິບັດ​ຕາມ​ແບບຢ່າງ​ຄຸນສົມບັດ​ສິນ​ທຳ​ຂອງ​ປະທານ​ໂຮ່ຈີ​ມິນ ​ແລະ ບັນດາ​ຂະ​ບວນການ​ໂດຍ​ແນວ​ໂຮມ​ປະ​ເທດ​ຊາດ, ບັນດາ​ອົງການຈັດ​ຕັ້ງ​ການ​ເມືອງ-ສັງຄົມ​ເປັນ​ຜູ້​ປຸກລະດົ​ມ”. ມາ​ເຖິງ​ດຽວ​ນີ້, ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ​ໄດ້​ມີ​ບາດກ້າວພັດທະນາ​ໃໝ່, ຫຼາຍ​ແບບຢ່າງ​ດີ​ເດັ່ນ​ໄດ້​ແຜ່​ຂະຫຍາຍ ​ແລະ​ສົ່ງຜົນ​ກະທົບ​ຢ່າງ​ເລິກ​ເຊິ່ງ​ເຖິງ​ຊີ​ວິດ​ປະຊາຊົນ. ປີ 2010, ທົ່ວ​ປະ​ເທດ​ມີ​ຫຼາຍ​ກວ່າ 200 ພັນ​ຮູບ​ແບບ, ​ແບບຢ່າງ “ຂົນຂວາຍ​ປະຊາຊົນ​ເກ່ງ”. ຮອດ​ປີ 2015 ມີ​ຫຼາຍກວ່າ 400 ຮູບ​ແບບ, ​ແບບຢ່າງ, ​ໃນ​ນັ້ນ​ມີ 279 ​ແບບຢ່າງ​ດີ​ເດັ່ນ​ໃນ​ບັນດາ​ຂົງ​ເຂດ​ທີ່​ໄດ້​ຮັບ​ການ​ຍ້ອງຍໍ​ຊົມ​ເຊີຍ​ແລະ​ໄດ້​ຮັບ​ລາງວັນ ​ໃນ​ກອງ​ປະຊຸມ​ໃຫຍ່​ການ​ແຂ່ງຂັນ​ຮັກ​ຊາດ​ຂອງ​ຂະ​ແໜງ​ການ​ຂົນຂວາຍ​ປະຊາຊົນ. ຮອດ​ໄຕ​ມາດ​ທີ I ປີ 2018 ​​ກໍ່ສ້າງ​ໄດ້ 863.364 ຮູບ​ແບບ, ​ແບບຢ່າງ “ຂົນຂວາຍ​ປະຊາຊົນ​ເກ່ງ” ​ໃນ​ທົ່ວ​ປະ​ເທດ, ມີ​ທ້ອງ​ຖິ່ນ​ທີ່​ເປັນ​ຕົວ​ແທນ​ຄື ນະຄອນ​ໂຮ່ຈີ​ມິນ, ຮ່າ​ໂນ້ຍ, ຕວຽນ​ກວາງ, ຮ່ວາ​ບິ່ງ, ຮ່າ​ຢາງ, ນິງບິ່ງ, ​ເຊີນ​ລາ, ​ເງ້ອານ, ດາ​ນັ້ງ, ກອນ​ຕຸ​ມ, ດັກ​ລັກ, ​ເກີ່​ນ​ເທີ, ກ່າ​ເມົາ, ອານ​ຢາງ...

​ໃນ​ຂົງ​ເຂດ​ເສດຖະກິດ, ນັ້ນ​ແມ່ນ​ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໃນ​ການ​ຜະລິດທຸລະ​ກິດ, ​ໂດຍ​ສະ​ເພາະ​ແມ່ນ​ຢູ່​ຊົນນະບົດ, ​ເຊັ່ນ ການ​ປ່ຽນ​ໂຄງ​ສ້າງ​ຕົ້ນ​ປູກ​ແລະ​ສັດລ້ຽງ; ການ​ກໍ່ສ້າງຟາມກະສິກຳ, ການ​ພັດທະນາ​ຫັດຖະກຳ ອຸດສາຫະກຳ​ນ້ອຍ, ການ​ບໍລິການ... ​ເພື່ອ​ພັດທະນາ​ເສດຖະກິດ, ຫຼຸດຜ່ອນ​ຄວາມທຸກ​ຍາກ​ຂາດ​ເຂີນ, ສົ່ງ​ເສີມ​ການ​ຜະລິດ​ທຸລະ​ກິດ​ທີ່​ເກ່ງ ​ແລະ ການ​ສ້າງ​ຄວາມ​ຮັ່ງມີທີ່​ຖືກຕ້ອງ. ພິ​ເສດ, ຂະ​ບວນການ​ເລີ່​ມ​ເຂົ້າສູ່​ບັນດາ​ຂົງ​ເຂດ​ໃໝ່ ທີ່​ຮຽກຮ້ອງ​ຕ້ອງການ​ປະຢຸກວິທະຍາສາດເຕັກ​ໂນ​ໂລ​ຊີສູງ, ມີ​ປະສິດທິ​ຜົນ​ເສດຖະກິດ​ແລະ​ຂອບ​ເຂດ​ການກະທົບ​ກວ້າງ, ປະຕິບັດ​ການຫຸ້ນສ່ວນ, ​ເຊື່ອມ​ໂຍງ, ​ແລກປ່ຽນ, ຊ່ວຍ​ເຫຼືອ, ສະໜັບສະໜູນ​ທາງ​ເຕັດ​ນິກ, ທຶນ, ບົດຮຽນ​ ໃນ​ເງື່ອນ​ໄຂ​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ. ພ້ອມ​ກັນ​ນັ້ນ, ສຸມ​ໃສ່​ໂຄສະນາ ຂົນຂວາຍ​ປະຊາຊົນ​ໃນ​ຂະ​ບວນວິວັດ​ການ​ເປີດ​ກວ້າງ​ຕົວ​ເມືອງ, ປະສານສົມທົບຢ່າງກົມກຽວລະຫວ່າງ​ຜົນ​ປະ​ໂຫຍ​ດທີ່​ເໝາະ​ສົມ​ຖືກ​ກົດໝາຍ​ຂອງ​ປະຊາຊົນ ກັບ​ຜົນ​ປະ​ໂຫຍ​ດຂອງ​ລັດ, ຂອງ​ວິ​ສາ​ຫະກິດ. ມີ​ຫຼາຍຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໃນ​ການ "​​ເຕົ້າໂຮມທີ່​ດິນ, ​ແລກປ່ຽນ​ເນື້ອ​ທີ່", ການປ່ຽນ​ຕົ້ນ​ປູກ ສັດລ້ຽງ, ການກໍ່ສ້າງ​ຟາ​ມປູກພືດ ຟາ​ມລ້ຽງສັດ, ການພັດທະນາ​ອາຊີບ​, ບ້ານຫັດຖະກຳ, ໜ່ວຍ​ຮ່ວມ​ມື, ສະຫະກອນ,... ດຶງ​ດູດ​ແຮງ​ງານ, ປະກອບສ່ວນ​ແກ້​ໄຂ​ວຽກ​ເຮັດ​ງານ​ທຳ, ​ເພີ່ມ​ລາຍ​ໄດ້, ກໍ່​ຕັ້ງ​ພວງ​ເຊື່ອມ​ຕໍ່​ຄຸນຄ່າ​ໃນ​ການ​ຜະລິດ​ກະສິກຳ​ຕິດ​ກັບ​ຕະຫຼາດ. ມີ​ຫຼາຍ​ວິທີ​ເຮັດ​ທີ່​ດີ, ປະດິດ​ສ້າງ​ໃນ​ການ​ລະດົມການ​ເຂົ້າ​ຮ່ວມຂອງ​ປະຊາຊົນ ດ້ວຍ​ການບໍລິຈາກ​ເງິນ, ທີ່​ດິນ​ແລະ​ແຮງ​ງານ ​ເພື່ອ​ກໍ່ສ້າງ​ຊົນນະບົດ​ໃໝ່... ດ້ວຍ​ທິດ​ນຳ “ປະຊາຊົນ​ຮູ້, ປະຊາຊົນ​ສົນທະນາ, ປະຊາຊົນ​ເຮັດ, ປະຊາຊົນ​ກວດກາ" ​ແລະ ຍ້ອນ “ຊ່າງ​ຂົນຂວາຍ” ຈຶ່ງ​ສາມາດ​ກໍ່ສ້າງ​ໄດ້​ຫຼາຍກິດຈະກຳ​ຮັບ​ໃຊ້​ຊີວິດ, ພັດທະນາ​ເສດຖະກິດ​ຢູ່​ທ້ອງ​ຖິ່ນ, ປະກອບສ່ວນປະຕິບັດ​ໜ້າ​ທີ່ພັດທະນາ​ເສດຖະກິດ-ສັງຄົມ, ຜ່ານ​ສິ່ງ​ດັ່ງກ່າວ​ໄດ້​ເຮັດ​ໃຫ້​ມີ​ການ​ຫັນປ່ຽນ​ໃນ​ຄວາມ​ຮັບ​ຮູ້, ປຸກ​ລະດັມບັນດາ​ພາກສ່ວນ​ເສດຖະກິດ​ໃຫ້​ຫ້າວຫັນ​ເຂົ້າ​ຮ່ວມ, ສ້າງ​ຊີວິດ​​ໃຫ້​ດີຂຶ້ນ.

ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໃນ​ການ​ກໍ່ສ້າງ​ຊົນນະບົດ​ໃໝ່ ມີ​ການ​ຫັນປ່ຽນ​ຢ່າງ​ຕັ້ງໜ້າ, ປະກອບສ່ວນ​ເຮັດ​ໃຫ້​ໃບໜ້າ​ຊົນນະບົດ​ມີການ​ປ່ຽນ​ແປງ, ປົວ​ແປງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ດີ​ຂຶ້ນ. ​ແຕ່​ປີ 2013 ມາ​ເຖິງ​ປີ​ນີ້ (2), ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໃນ​ຊົນນະບົດ​ໄດ້​ຂົນຂວາຍການ​ປະກອບສ່ວນ​ໂດຍ​ສະໝັກ​ໃຈ​ໄດ້​ຫຼາຍ​ກວ່າ 10.000 ຕື້​ດົ່ງ, 29 ລ້ານ​ວັນ​ງານ, ບໍລິຈາກ​ທີ່​ດິນ​ເກືອບ 6 ລ້ານ​ແມັດ​ມົນທົນ, ກໍ່ສ້າງ​ໃໝ່ ສ້ອມ​ແປງ ​ແລະ​ຍົກ​ລະ​ດັບ ​ລຳ​ຄອງຮ່ອງ​ເໝືອງ​ໄດ້​ກວ່າ 847.000 ກມ ​ແລະ​ເສັ້ນທາງ​ຊົນນະບົດ 678.000 ກມ...; ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໃນ​ນັກຮົບ​ເກົ່າ​ໄດ້​ຂົນ​ຂວານ​ການ​ປະກອບສ່ວນ​ໂດຍ​ສະໝັກ​ໃຈຫຼາຍທີ່​ສຸດ: ​ເນື້ອ​ທີ່ດິນ​ກວ່າ 1,45 ລ້ານ​ແມັດ​ມົນທົນ, ​ເງິນຫຼາຍ​ກວ່າ 97,5 ຕື້​ດົ່ງ, ​ແຮງ​ງານຫຼາຍ​ກວ່າ 350.000 ວັນ​ງານ, ກໍ່ສ້າງ​ໃໝ່​ແລະ​ສ້ອມ​ແປງ​ທາງ​ຄົມມະນາຄົມກວ່າ 2.430 ກມ, ກໍ່ສ້າງ​ປັບປຸງ​ລຳ​ຄອງຮ່ອງ​ເໝືອງກວ່າ 2.950 ກມ, ຂົວ​ແລະ​ທໍ່​ລະບາຍ​ນ້ຳ 190 ອັນ, ຈັດ​ສັນ​ການ​ປັບປຸງ​ຮັກສາ​ປ່າ​ໄມ້​ໃນ​ເນື້ອ​ທີ່​ນັບ​ໝື່ນ​ແຮັກ​ຕາ... ​ໃນ​ການ​ພັດທະນາ​ເສດຖະກິດ, ຫຼຸດຜ່ອນ​ຄວາມທຸກ​ຍາກ​ຂາດ​ເຂີນ, ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ຢູ່ຊົນນະບົດ​ໄດ້​ຊ່ວນ​ເຫຼືອ​ຄອບຄົວ​ທຸກ​ຍາກຫຼາຍ​ກວ່າ 790.000 ຄອບຄົວ​ກ່ຽວ​ກັບ​ອຸປະກອນ, ​ແຮງ​ງານ ​ແລະ​ການຈຳໜ່າຍ​ຂາຍ​ຜະລິດ​ຕະພັນ, ​ເປັນ​ມູນ​ຄ່າ​ຫຼາຍ​ກວ່າ 15.000 ຕື້​ດົ່ງ, ສ້າງ​ວຽກ​ເຮັດ​ງານ​ທຳ​ກັບ​ບ່ອນ​ໃຫ້ຜູ້​ອອກ​ແຮງ​ງານ 11 ລ້ານຄົນ, ຊ່ວຍ​ໃຫ້ປະມານ 200.000 ຄອບຄົວ​ຊາວ​ກະສິກອນຫຼຸດພົ້ນຈາກ​ຄວາມທຸກ​ຍາກ, ບືນ​ຕົວ​ຂຶ້ນ​ເປັນ​ຄອບຄົວ​ທີ່​ດີກ​ວ່າ; ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ໃນນັກຮົບ​​ເກົ່າ, ​ເຊັ່ນ ໜ່ວຍ​ຮ່ວມ​ມື, ກອງທຶນ “ນ້ຳ​ໃຈ​ຂອງນັກຮົບ”, ກອງ​ທຶນ “ລົບ​ລ້າງ​ຄວາມທຸກ​ຍາດ​ໃນ້ສະມາຊິກ” ​ໄດ້​ຊ່ວຍ​ເຫຼືອ​ນັກຮົບ​ເກົ່າ​ໃນ​ທົ່ວ​ປະ​ເທດ​ເພື່ອ​ຫຼຸດຜ່ອນ 14.840 ຄົວ​ເຮືອນ​ທຸກ​ຍາກ (0,53%), ຈຳນວນ​ຄອບຄົວ​ທຸກ​ຍາກ​ຍັງ​ເຫຼືອ​ປະມານ 4,23%, ອັດຕາ​ສ່ວນ​ຄອບຄົວທີ່​ດີ​ແລະ​ຮັ່ງມີ​ແມ່ນ 56,2% (ຮອດທ້າຍ​ປີ 2017); ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໃນ​ແມ່ຍິງ​ໄດ້​ຊ່ວຍ​ໃຫ້​ປະມານ 100.000 ຄອບຄົວ​ຫຼຸດ​ພົ້ນ​ຈາກ​ຄວາມທຸກ​ຍາກ​ໃນ​ແຕ່ລະ​ປີ; ​ໃນ​ຊາວ​ໜຸ່ມ​ທົ່ວ​ປະ​ເທດ​ກໍ່​ມີປະ​ມານ 14.000 ຮູບ​ແບບ​ຊາວ​ໜຸ່ມ​ພັດທະນາ​ເສດຖະກິດ​ເກ່ງ, 356 ສະຫະກອນ​ຊາວ​ໜຸ່ມ ​ແລະ​ເກືອບ 1.200 ໜ່ວຍ​ຮ່ວມ​ມື​ພັດທະນາ​ເສດຖະກິດ​ຂອງ​ຊາວ​ໜຸ່ມ; ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໃນ​ສະມາຊິກ​ກຳມະບານ​ໄດ້​ຊ່ວຍ​ເຫຼືອກ​ວ່າ 20.000 ຄອບຄົວ​ສະມາຊິກ, ຜູ້​ອອກ​ແຮງ​ງານ​ທຸກ​ຍາກ ​ໃນ​ການ​ກໍ່ສ້າງ​ເຮືອນ​ໃໝ່ຫຼື​ສ້ອມ​ແປງ​ເຮືອນທີ່​ມີ​ມູນ​ຄ່າ​ຫຼາຍ​ກວ່າ 500 ຕື້​ດົ່ງ...

​ໃນ​ຂົງ​ເຂດ​ວັດທະນະທຳ-ສັງຄົມ, ມີ​ຂະ​ບວນການ​ທີ່​ເປັນ​ແບບຢ່າງ​ຄື “ທົ່ວ​ປວງ​ຊົນ​ສາມັກຄີ​ກໍ່ສ້າງ​ຊີ​ວິດວັດ​ທະນະ​ທຳ​ຢູ່​​ໃນເຂດທີ່ຢູ່​ອາ​ໄສ”, “ທົ່ວ​ປວງ​ຊົນ​ສາມັກຄີ​ກໍ່ສ້າງ​ຊົນນະບົດ​ໃໝ່, ຕົວ​ເມືອງ​ສີວິ​ໄລ”, ວັນ “​ສຳລັບຜູ້​ທຸກ​ຍາດ”, “ອອກ​ແຮງ​ງານ​ປະດິດ​ສ້າງ”, “​ເຮັດ​ວຽກ​ງານ​ຂອງ​ລັດ​ເກ່ງ, ຮັບ​ພາລະ​​ວຽກບ້ານ​ການ​ເຮືອນ”, “ຂຽວ-ສະອາດ-ງາມ”, “ຮັບປະກັນ​ຄວາມ​ປອດ​ໄພ​ອະນາ​ໄມ​ໃນ​ການ​ອອກ​ແຮງ​ງານ”, “​ແມ່ຍິງ​ຕັ້ງໜ້າຮ່ຳຮຽນ, ອອກ​ແຮງ​ງານ​ປະດິດ​ສ້າງ​, ກໍ່ສ້າງ​ຄອບຄົວ​ຜາ​ສຸກ”. ມີ​ຫຼາຍ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ທີ່​​ເປັນ​ຕົວ​ແທນ​ຄື ຮູບ​ແບບ “ໜ່ວຍ​ເຊື່ອມ​ໂຍງ​ຄອບຄົວ”, “ໜ່ວຍ​ຄຸ້ມ​ຄອງ​ຕົນ​ເອງ”, “ໜ່ວຍ​ໄກ່​ເກ່ຍ”, “​ເຂດ​ຊຸມ​ຊົນ​ບໍ່​ມີ​ອາ​ຊະ​ຍາ​ກຳ, ບໍ່​ມີ​ຄວາມ​ຊົ່ວ​ຮ້າຍ​ທາງ​ສັງຄົມ”, “ຄອບຄົວ, ສາຍ​ຕະກຸນ​ບໍ່​ມີ​ອາ​ຊະ​ຍາກ​ອນ​ແລະ​ຄວາມ​ຊົ່ວ​ຮ້າຍ​ທາງ​ສັງຄົມ”, “ໜ່ວຍ​ຮັກສາ​ຄວາມ​ປອດ​ໄພ​ຂອງ​ປະຊາຊົນ”, ໜ່ວຍ​ປ້ອງ​ກັນ​ປະຊາຊົນ, ​ໂຄງການ “ສະ​ວັດ​ດີກາ​ນຂອງ​ສະມາຊິກ​ກຳມະບານ”, “ບຸນປີ​ໄໝ່​ໄດ້ໂຮມ​ຢູ່​ຢ່າງ​ມ່ວນ​ຊື່ນ”, “ຊາຍຄາອັນ​ອົບ​ອຸ່ນຂອງ​ກຳມະບານ”(3), “ຊາວ​ໜຸ່ມ​ສະໝັກ​ໃຈ​ຮັສາ​ສະພາບ​ແວດ​ລ້ອມ”, “ໜ່ວຍ​ແມ່ຍິງ​ເກັບ​ໂຮມ​ແລະຈຳ​ແນກສິ່ງເສດ​ເຫຼືອ”... ​ໃນ​ການ​ປະຕິບັດ​ໂຄງການ​ແຫ່ງ​ຊາດ​ກ່ຽວ​ກັບການ​ຫຼຸດຜ່ອນ​ຄວາມທຸກ​ຍາກ, ຄຽງ​ຂ້າງ​ບັນດາ​ນະ​ໂຍບາຍ​ສະໜັບສະໜູນ​ການ​ພັດທະນານັ້ນ, ການ​ເສີມ​ຂະຫຍາຍ​ບົດບາດ​ຂອງ​ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ກໍ່​ໄດ້​ຮັບ​ຄວາມ​ເອົາ​ໃຈ​ໃສ່, ຕົວຢ່າງ​ເຊັ່ນ ຮູບ​ແບບ “ລົບ 1 ຄອຍ​ຄົວ​ອຶດຫິວ, ຫຼຸດ 1 ຄອບຄົວ​ທຸກ​ຍາກ” ຢູ່​ແຂ​ວງດັກ​ລັກ; ຮູບ​ແບບ​ປ່ຽນ​ຈາກ​ການ​ປູກ​ສາລີ, ມັນ​ຕົ້ນ​ທີ່​ມີ​ລາຍ​ໄດ້​ຕ່ຳ ​ມາ​ປູກ​ຊາ​ຢູ່​ເມືອງ ທ້ວນ​ເຈົາ, ​ແຂວງ​ເຊີນ​ລາ; ຮູບ​ແບບ “​ໄຫ​ເຂົ້າ​ສານເພື່ອ​ຜູ້​ທຸກ​ຍາກ” ຂອງ​ກຳລັງ​ປະກອບ​ອາວຸດ​ແຂວງ​ກວາງ​ນາມ…ຜ່ານ​ສິ່ງ​ດັ່ງກ່າວ​ໄດ້​ປະກອບສ່ວນ​ຍົກ​ສູງ​ຊີວິດ​ການ​ເປັນ​ຢູ່​ດ້ານ​ວັດຖຸ​ແລະ​ວັດທະນະທຳ, ຈິດ​ໃຈ​ຂອງ​ປະຊາຊົນ, ຮັບປະກັນ​ຄວາມ​ປອດ​ໄພ​ທາງ​ສັງຄົມ, ລົບ​ລ້າງ​ຮີດຄອງ​ທີ່​ຫຼ້າ​ຫຼັງ, ​ແກ້​ໄຂ​ບັນຫາ​ທີ່​ຫຍຸ້ງຍາກ​ຫຼາຍ​ຢ່າງຂອງ​ທ້ອງ​ຖິ່ນ, ກົມ​ກອງ ​ເພື່ອ​ພັດທະນາ​ເສດຖະກິດ-ສັງຄົມ.

​ໃນ​ຂົງ​ເຂດ​ຄວາມ​ປອດ​ໄພ - ການ​ປ້ອງ​ກັນ​ປະ​ເທດ, ຍູ້​ແຮງ​ການ​ໂຄສະນາ​ເຜີ​ຍ​ແຜ່​ກົດໝາຍ, ກຳ​ແໜ້ນ​ສະພາບ​ການ​ປະຊາຊົນ, ກໍ່ສ້າງ​ກຳລັງ​ຫຼັກ​ແຫຼ່ງ, ສະ​ເໜີ​ແນະ​ແລະ​ຈັດການ​ແກ້​ໄຂ​ກໍລະນີ ​ເຫດການ​ທີ່​ສັບ​ສົນ​ຢູ່​ຮາກ​ຖານ​ຢ່າງ​ທັນ​ການ​ແລະ​ມີປະ​ສິດທິ​ຜົນ, ຮັກ​ສາ​ຄວາມ​ໝັ້ນຄົງ​ດ້ານ​ການ​ເມືອງ, ຄວາມ​ເປັນ​ລະບຽບ​ແລະ​ປອດ​ໄພ​ທາງ​ສັງຄົມ, ​ໂດຍ​ສະ​ເພາະ​ແມ່ນ​ຢູ່​ພື້ນ​ທີ່​ຫ່າງ​ໄກ​ສອກຫຼີກ, ຢູ່​ເຂດ​ຊາຍ​ແດນ, ​​ເຂດ​ທະ​ເລ​ໝູ່ເກາະ, ​ເຂດ​ຈຸດ​ສຸມ​ທາງ​ດ້ານ​ຄວາມ​ປອດ​ໄພ​ແລະ​ການ​ປ້ອງ​ກັນ​ປະ​ເທດ. ມີ​ຫຼາຍຕົວ​ແທນຄື ບັນດາ​ຮູບ​ແບບ “​ເຄື່ອນ​ທັບ​ເພື່ອ​ເຮັດ​ວຽກ​ງານ​ຂົນຂວາຍ​ປະຊາຊົນ”, “ສຽງ​ກະ​ແລ່ງ​ຕ້ານ​ຜູ້​ຮ້າຍ”, “ຈຸດ​ສະຫວ່າງ​ຢູ່​​ເຂດຊາຍ​ແດນ”, “​ເພື່ອ​ປະ​ເທດ​ຈົນ​ລືມ​ຮ່າງ​ການ, ​ເພື່ອ​ປະຊາຊົນ​ອົດ​ທົນ​ຮັບ​ໃຊ້”, “​ເສຍ​ສະລະ​ເພື່ອ​ຮວ່າງ​ຊາ, ​ເຈື່ອງ​ຊາ”, “​ແຫ​ຫາ​ປາ​​ແຫ່ງ​ຄວາມ​ຮັກ”, “ຫຼັງຄາ​ທີ່​ອົບ​ອຸ່ນ​ສຳລັບ​ຜູ້​ທຸກ​ຈົນ​ຢູ່​ເຂດ​ຊາຍ​ແດນ, ​ເກາະ​ທະ​ເລ”, ຮູບ​ແບບ “3 ຫຼຸດຜ່ອນ, 4 ຮັກສາ”, “ກໍ່ສ້າງ​ກຸ່ມ, ​ເຂດ​ອຸດສາຫະກຳ, ອຸດສາຫະກຳ​ນ້ອຍ, ຫັດຖະກຳທີ່​ປອດ​ໄພ​ທາງ​ດ້ານ​ຄວາມ​ໝັ້ນຄົງ​ແລະ​ສະຫງົບ​ຮຽບຮ້ອຍ”, “ສາຍ​ຕະກຸນຄຸ້ມ​ຄອງ​ຕົນ​ເອງ​ທາງ​ດ້ານຄວາມ​ປອດ​ໄພ​ແລະ​ສະຫງົບ​ຮຽບຮ້້ອຍ”, “ໜ່ວຍ​ຮັກສາ​ຄວາມ​ປອດ​ໄພ​ດ້ວຍ​ຕົນ​ເອງ​ຕາມ​ຮ່ອມ​ບ້ານ”, “ກໍ່ສ້າງ​ຕາ​ແສງບໍ່​ມີ​ອາ​ຊະ​ຍາ​ກຳ​ແລະ​ໄພ​ຢາ​ເສບ​ຕິດ”, ຮູບ​ແບບ 3+1 (​ແມ່ຍິງ 3 ຄົນ​ຊ່ວຍ​ເຫຼືອ​ແມ່ຍິງ​ຄົນ 1 ທີ່​ເຄີຍ​ລະ​ເມີດ​ກົດໝາຍ). ດ້ວຍ​ຫຼາຍ​ວິທີ​ການ​ປະດິດ​ສ້າງ, ບັນດາ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ​ໄດ້​ປຸກ​ຕື່ນມູນ​ເຊື້ອ​ຮັກ​ຊາດ, ​ເສີມຂະຫຍາຍ​ຄວາມ​ຮັບຜິດຊອບ, ສິດ​ເປັນ​ເຈົ້າ​ຕົນ​ເອງ​ຂອງ​ປະຊາຊົນ, ຕັ້ງໜ້າ​ເຂົ້າ​ຮ່ວມ​ການ​ຮັກສາ​ລະບຽບຄວາມສະຫງົບ, ປະກອບສ່ວນ​ກໍ່ສ້າງ​ພື້ນຖານ​ການ​ປ້ອງ​ກັນຊາ​ດທົ່ວ​ປວງ​ຊົນ ​ແລະ ທ່າ​ສະໜາມ​ການ​ຮັກສາ​ຄວາມ​ໝັ້ນຄົງ​ປະຊາຊົນ, ທັບ​ມ້າງ​ຫຼາຍ​ກົນອຸບາຍ, ​ເລ່ລ່ຽມຂອງ​ບັນດາ​ອິດ​ທິກຳລັງ​ສັດຕູ, ຍູ້​ຖອນ​ອາ​ຊະ​ຍາ​ກຳ​ແລະ​ຄວາມ​ຊົ່ວ​ຮ້າຍ​ທາງ​ສັງຄົມ​ເທື່ອ​ລະ​ກ້າວ, ຮັບປະກັນ​ຄວາມ​ໝັ້ນຄົງ​ທາງ​ການ​ເມືອງ, ຄວາມ​ເປັນ​ລະບຽບ​​ແລະ​ຄວາມ​ປອດ​ໄພ​ທາງ​ສັງຄົມ, ຮັບປະກັນ​ການ​ປ້ອງ​ກັນຊາ​ດ​-ຄວາມ​ໝັ້ນ​ຄົງ ແລະ ຊີວິດ​ສັນຕິ​ສຸກ​ຂອງ​ປະຊາຊົນ.

​ໃນ​ຂົງ​ເຂດ​ກໍ່ສ້າງ​ລະບົບ​ການ​ເມືອງ, ຮູບ​ແບບ “ຂົນຂວາຍ​ປະຊາຊົນ​ເກ່ງ” ຕິດ​ກັບ​ການ​ປະຕິບັດ​ກົດ​ລະບຽບ​ປະຊາທິປະ​ໄຕ​ຢູ່ຮາກ​ຖານ ​ແລະ ວຽກ​ງານ​ກໍ່ສ້າງ, ປັບປຸງ​ພັກ; ຂົນຂວາຍ​ປະຊາຊົນ​ເຂົ້າ​ຮ່ວມ​ການປະກອບ​ຄວາມ​ເຫັນ​ກ່ຽວ​ກັບ​ນະ​ໂຍບາຍ, ກົດໝາຍທີ່​ກ່ຽວຂ້ອງ​ໂດຍ​ກົງ​ເຖິງ​ຊີວິດ​ຂອງ​ປະຊາຊົນ; ​ເປີດ​ກວ້າງ​ຮູບ​ການ​ຕິດ​ຕໍ່​ກັບ​ຜູ້​ມີ​ສິດ​ເລືອກ​ຕັ້ງ (ຢູ່​ທີ່ຢູ່​ອາ​ໄສ, ບ່ອນ​ເຮັດ​ວຽກ, ຕາມ​ຫົວ​ຂໍ້, ຂົງ​ເຂດ, ຕາມ​ເປົ້າ​ໝາຍ​ແລະ​ບຸກຄົນ ຫຼືກຸ່ມ​ຜູ້​ມີ​ສິດ​ເລືອກ​ຕັ້ງ...), ​ເພີ່ມ​ທະວີ​ຄວາມ​ເປັນ​ໃຈ, ​ເປີດ​ກວ້າງ​ປະຊາທິປະ​ໄຕ, ​ເສີມ​ຂະຫຍາຍ​ຄວາມ​ຮັບຜິດຊອບ​ຂອງ​ຜູ້​ມີ​ສິດ​ເລືອກ​ຕັ້ງ ​ໃນ​ການ​ເຂົ້າ​ຮ່ວມການປະກອບ​ຄວາມ​ເຫັນ​ກໍ່ສ້າງ​ນະ​ໂຍບາຍ, ກົດໝາຍ, ສ່ອງ​ແສງ​ຄວາມ​ຄິດ​ເຫັນ​ຂອງ​ຜູ້​ມີ​ສິດ​ເລືອກ​ຕັ້ງ. ອົງການ​ບໍລິຫານ​ຂອງລັດກໍ່ສ້າງ​ຮູບ​ແບບ “ຂົນຂວາຍ​ປະຊາຊົນ​ເກ່ງ” ຕິດ​ກັບ​ການ​ຍູ້​ແຮງ​ການ​ປະຕິ​ຮູບ​ການ​ບໍລິຫານ, ​ໂດຍ​ສະ​ເພາະ​ແມ່ນ​ປະຕິ​ຮູບ​ຂັ້ນ​ຕອນ​ການ​ບໍລິຫານ; ກໍ່ສ້າງ​ຈັນ​ຍາ​ບັນ​ການ​ງານສາທາລະນະ, ​ເພີ່ມ​ທະວີ​ການຕ້ອນຮັບ ສົນທະນາກັບ​ປະຊາຊົນ, ​ແກ້​ໄຂ​ບັນດາ​ບັນຫາທີ່​ຮ້ອນ​ເຄືອງ ສັບສົນ​ໃນ​ປະຊາຊົນ. ມີ​ຮູບ​ແບບ​ທີ່​ເປັນ​ຕົວ​ແທນ​ແມ່ນ ຮູບ​ແບບ​ການ​ສົມທົບ​ລະຫວ່າງ​ພາກສ່ວນຮັບ​ຕ້ອນ​ແລະ​ສະຖານີໄປສະນີວັດທະນະທຳ​ຕາ​ແສງ, ​ແກ້​ໄຂຂັ້ນ​ຕອນ​ການ​ບໍລິຫານ “​ໄຮ້​ເຂດ​ແດນ”, ຮູບ​ແບບ “ວັນ​ບໍ່​ນັດ”, “ວັນ​ບໍ່​ຂຽນ”; ຈັດ​ຕັ້ງໜ່ວຍຜູ້​ອາສາ​ສະໝັກ​ແນະນຳ​ສຳ​ເນົາ​ແລະຂັ້ນ​ຕອນ​ບໍລິຫານ ຢູ່​ພາກສ່ວນ​ຮັບ​ແລະ​ສົ່ງ​ຜົນ​ການ​ແກ້​ໄຂ​ຂັ້ນ​ເມືອງ, ຕາ​ແສງ; ລາຍ​ງານ​ໄລ່​ລຽງ​ພາສີ​ເອ​ເລັກ​ໂຕຣນິກ... ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມສືບ​ຕໍ່​ການ​ປ່ຽນ​ແປງ​ໃໝ່, ຫັນ​ລົງ​ສູ່​ຮາກ​ຖານ, ​ເບິ່ງ​ແຍງ​ດູ​ແລ​ຜົນ​ປະ​ໂຫຍ​ດທີ່​ເໝາະ​ສົມ​ຖືກ​ກົດໝາຍ ​ແລະ​ເສີມ​ຂະຫຍາຍ​ສິດ​ເປັນ​ເຈົ້າ​ຂອງສະມາ​ຊິກ​ແລະ​ປະຊາຊົນ; ຈັດ​ຕັ້ງ​ເປັນ​ຢ່າງ​ດີ​ ບັນດາ​ຮູບ​ແບບ​ຄຸ້ມ​ຄອງ​ດ້ວຍ​ຕົນ​ເອງ​ໃນຊຸມ​ຊົນທີ່ຢູ່​ອາ​ໄສ; ປະຕິບັດ​ເປັນ​ຢ່າງ​ດີ​ ຂໍ້​ກຳນົດ​ກົດ​ລະບຽບ​ຂອງ​ໝູ່​ບ້ານຕາ​ແສງ ຕິດ​ກັບ​ບັນດາ​ຂະ​ບວນການ​ແຂ່ງຂັນ, ບັນດາ​ບັ້ນ​ຂົນຂວາຍປະຊາຊົນ.

ຮູບ​ແບບ “ຂົນຂວາຍ​ປະຊາຊົນ​ເກ່ງ” ມຸ່ງ​ໝັ້ນ​ໃນ​ສິດ​ແລະ​ຜົນ​ປະ​ໄຫ​ຍດທີ່​ຖືກຕ້ອງ, ຖືກ​ກົດໝາຍ, ປະກອບສ່ວນ​ປົວ​ແປງ​ແລະ​ຍົກສູງຊີວິດ​ການ​ເປັນ​ຢູ່​ຂອງ​ປະຊາຊົນ, ປັບປຸງ​ຄວາມ​ເຊື່ອ​ຖື​ຂອງ​ປະຊາຊົນຕໍ່​ພັກ, ລັດ ​ແລະ​ລະບົບ​ການ​ເມືອງ

ພ້ອມ​ກັນ​ກັບ​ບັນດາ​ຜົນສຳ​ເລັດຂອງ 30 ກວ່າ​ປີ​ແຫ່ງ​ການ​ປ່ຽນ​ແປງ​ໃໝ່ພາຍ​ໃຕ້​ການ​ນຳພາ​ຂອງ​ພັກ, ຊີວິດ​ການ​ເປັນ​ຢູ່​ຂອງ​ປະຊາຊົນ​ເຮົາ​ໄດ້​ມີ​ການ​ປ່ຽນ​ແປງ​ດີ​ຂຶ້ນ. ບັນດາ​ນະ​ໂຍບາຍ​ທີ່​ສຳຄັນ​ເຊັ່ນ ການ​ສຶກສາ, ການ​ຝຶກ​ອົບຮົມ​ວິຊາ​ຊີບ, ວຽກ​ເຮັດ​ງານ​ທຳ, ການ​ກໍ່ສ້າງ​ຊົນນະບົດ​ໃໝ່, ການ​ຫຼຸດຜ່ອນ​ຄວາມທຸກ​ຍາກ​ແບບ​ຍືນ​ຍົງ, ການ​ເບິ່ງ​ແຍງ​ສຸຂະພາບ, ຮັກສາ​ສະພາບ​ແວດ​ລ້ອມ, ການ​ປ້ອງ​ກັນ​ ຄວບ​ຄຸມ​ໄພ​ທຳ​ມະ​ຊາດ ​ແລະ ຮັບ​ມື​ກັບ​ການ​ປ່ຽນ​ແປງ​ສະພາບ​ອາກາດ, ການ​ຕໍ່ສູ້​ປ້ອງ​ກັນ​ແລະ​ຕ້ານ​ອາ​ຊະ​ຍາ​ກຳ, ຕ້ານ​ຄວາມ​ຊົ່ວ​ຮ້າຍ​ໃນ​ສັງຄົມ, ການ​ຮັບປະກັນ​ຄວາມ​ໝັ້ນຄົງ​ທາງ​ການ​ເມືອງ, ຄວາມ​ເປັນ​ລະບຽບ​ແລະ​ຄວາມ​ປອດ​ໄພ​ທາງ​ສັງຄົມ, ພິ​ເສດ​ແມ່ນ​ນະ​ໂຍບາຍ​ສຳລັບ​ຜູ້​ທີ່​ມີຄຸນງາມ​ຄວາມ​ດີຕໍ່​ການ​ປະຕິວັດ, ນະ​ໂຍບາຍ​ຕໍ່​ຜູ້​ທຸກ​ຍາກ, ​ໃກ້​ທຸກ​ຍ້າກ, ຜູ້​ອອກ​ແຮງ​ງານ, ຜູ້​ພົບ​ຄວາມ​ຫຍຸ້ງຍາກ​ໃນ​ຊີວິດຢູ່​ເຂດ​ຫ່າງ​ໄກ​ສອກຫຼີກ, ​ເຂດ​ຊົນ​ເຜົ່າ​ສ່ວນ​ນ້ອຍ, ​ໄດ້​ຮັບ​ຄວາມ​ເອົາ​ໃຈ​ໃສ່​ປະຕິບັດ​ເພື່ອ​ຄວາມ​ກ້າວໜ້າ​ແລະ​ຄວາມ​ຍຸຕິ​ທຳ​ທາງ​ສັງຄົມ. ນັ້ນ​ແມ່ນ​ພື້ນຖານ​ທີ່​ສຳຄັນ​ເພື່ອ​ສ້າງ​ຄວາມ​ເຫັນດີ​ເຫນ​ພ້ອມ​ຂອງ​ປະຊາຊົນ. ບັນດາ​ນະ​ໂຍບາຍ, ​ໂຄງການ​ຫຼຸດຜ່ອນ​ຄວາມທຸກ​ຍາກ ​ໄດ້​ບັນລຸ​ຜົນສຳ​ເລັດ​ຕົວ​ຈິງ, ​ໄດ້​ຮັບ​ຄວາມ​ຍອມຮັບ​ແລະ​ຕີ​ລາຄາ​ສູງ​ຂອງ​ປະຊາຊົນ. ອັດຕາ​ສ່ວນ​ຄອບຄົວ​ທຸກ​ຍາກ​ຫຼຸດ​ລົງ​ຈາກ 14,2% (ປີ 2010) ຍັງ​ເຫຼືອ 6,7% (ປີ 2017) ​ແລະ​ຕ່ຳ​ກວ່າ 6% (ທ້າຍ​ປີ 2018). ຈຳນວນ​ຄອບຄົວ​ທຸກ​ຍາກລວມສູນ​ຢູ່​ເຂດ​ພູຜາ​ແລະ​ເຂດ​ຊົນ​ເຜົ່າ​ສ່ວນນ້ອຍ ກວມ​ເອົາ 72%, ຫຼຸດ​ລົງ​ຍັງ​ເຫຼືອ 30%. ຮອດ​ປີ 2018, 87,2% ຂອງ​ປະຊາກອນ​ມີ​ບັດ​ປະກັນ​ສຸຂະພາບ; ຄຸນ​ນະພາ​ບຂອງ​ການກວດ​ແລະ​ປົວ​ພະຍາດ, ຈຳນວນ​ຕຽງ​ພະ​ຍາບານ​ແລະນາຍ​ແພດ​ ເພີ່ມ​ຂຶ້ນ​ຢ່າງ​ຕໍ່​ເນື່ອງ; ລະບົບ​ການ​ສຶກສາ​ແຫ່ງ​ຊາດ​ໄດ້​ຈັດ​ຕັ້ງ​ຮອດ​ຮາກ​ຖານ, ​ແຕ່​ປີ 2011 ​ເຖິງ​ດຽວ​ນີ້​ມີ 48 ​ໃນ​ຈຳນວນ 54 ຊົນ​ເຜົ່າ​ໄດ້​ປະຕິບັດ​ລະບອບການ​ເລືອກ​ຮັບສຳລັບ​ນັກຮຽນ 8.681 ຄົນ; ອັດຕາ​ການ​ປົກ​ຫຸ້ມຂອງ​ຄື້ນວິທະຍຸ​ແລະ​ໂທລະພາບບັນລຸ​ສູງ​ກວ່າ 98%, ປະມານ 70% ປະຊາກອນ​ໃຊ້​ອິນ​ເຕີ​ເນັດ; ນະ​ໂຍບາຍ​ສຳລັບ​ຜູ້​ພົບ​ຄວາມ​ຫຍຸ້ງຍາກ​ໃນ​ຊີວິດ (​ແມ່ຍິງ, ​ເດັກນ້ອຍ, ຜູ້​ພິການ, ຜູ້​ສູງ​ອາຍຸ...) ​ໄດ້​ຮັບ​ການ​ປົວ​ແປງ; ຮອດ​ທ້າຍ​ປີ 2018, ມີ 55 ​ເມືອງ​ແລະ​ປະມານ 40% ຈຳນວນ​ຕາ​ແສງ​ ບັນລຸ​ມາດຕະຖານ​ຊົນນະບົດ​ໃໝ່. ຜົນສຳ​ເລັດ​ເຫຼົ່າ​ນັ້ນ ມີ​ການ​ປະກອບສ່ວນ​ຫຼາຍ​ທີ່​ສຸດ​ຂອງ​ຮູບ​ແບບ “ຂົນຂວາ​ມປະຊາຊົນ​ເກ່ງ” ຢູ່​ທ້ອງ​ຖິ່ນ, ຮາກ​ຖານ​ໃນ​ຂົງ​ເຂດ​ຕ່າງໆ.

ຄະນະ​ພັກ, ອົງການ​ຈັດ​ຕັ້ງ​ພັກ, ອຳນາດ​ການ​ປົກຄອງ​ຂັ້ນ​ຕ່າງໆ​ໄດ້​ເອົາ​ໃຈ​ໃສ່ ​ແລະ ​ແກ້​ໄຂຄວາມ​ຮ້ອນ​ເຄືອງ, ຄວາມ​ປາຖະໜາ​ທີ່​ຖືກຕ້ອງ ຖືກ​ກົດໝາຍ​ຂອງ​ປະ​ຂາ​ຂົນ ​ຢ່າງ​ມີ​ປະສິດທິ​ຜົນ​ກວ່າ​ເກົ່າ; ​ເພີ່ມ​ທະວີ​ການ​ສົນທະນາ, ຕ້ອນຮັບ​ປະຊາຊົນ, ​​ໂດ​ຍສະ​ເພາະ​ແມ່ນ​ກ່ຽວ​ກັບການ​ຮ້ອງ​ຟ້ອງທີ່​ສັບສົນ ມີ​ຄົນເຂົ້າ​ຮ່ວມ​ຫຼາຍ; ພ້ອມ​ກັນ​ນັ້ນ, ຮັບ​ເອົາ​ການ​ປະກອບ​ຄວາມ​ເຫັນ​ຂອງ​ປະຊາຊົນ, ​ເປີດ​ເຜີຍ ”ສາຍ​ດ່ວນ", ມອບ​ໝາຍ​ຄວາມ​ຮັບຜິດຊອບ​ໃນ​ການ​ແກ້​ບັນຫາ, ຕອບ​ການ​ສ່ອງ​ແສງ, ຂໍ້​ສະ​ເໜີ​ແນະ​ທີ່​ຖືກຕ້ອງ​ຂອງ​ປະຊາຊົນ; ປະຕິບັດ​ວິ​ໄນ​ຢ່າງ​ເຂັ້ມ​ງວດ​ຕໍ່​ພະນັກງານ ຂ້າ​ລັດ​ຖະການ​ທີ່​ລະ​ເມີດວິ​ໄນກົດໝາຍ; ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ແນວ​ໂຮມ​ປະ​ເທດ​ຊາດ​ຫວຽດນາມ, ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ແລະ​ປະຊາຊົນ ປະຕິບັດ​ການ​ຕິດຕາມ​ກວດກາ, ການວິຈານ; ​ເສີມ​ຂະຫຍາຍ​ບົດບາດ​ຂອງຜູ້​ທີ່​ມີ​ຊື່​ສຽງ​ໃນ​ຊົນເຜົ່າສ່ວນ​ນ້ອຍ ​ແລະ​ຜູ້​ທີ່​ສຳຄັນໃນ​ສາສະໜາ.

ລັດຖະບານ​ສ້າງ​ລະບົບ​ການ​ຮັບ​ຕອບການ​ສ່ອງ​ແສງ ​ແລະ ຄຳ​ສະ​ເໜີ​ແນະ​ຂອງ​ປະຊາຊົນ. ​ແຕ່​ປີ 2012, ລັດຖະບານ​ໄດ້​ສ້າງ​ເກນ​ກຳນົດ ​ແລະ ປະກາດ​ດັດຊະນີ​ການ​ປະຕິ​ຮູບ​ການ​ບໍລິຫານ, ດັດຊະນີ​ຄວາມ​ພຶງ​ພໍ​ໃຈ​ຂອງ​ປະຊາຊົນ. ຫຼາຍ​ສຳນັກງານ ອົງການ, ​ໂດຍ​ສະ​ເພາະ​ຂະ​ແໜງ​ການ​ພາສີ, ສຸລະກາກອນ, ທະນາຄານ, ຊັບພະຍາກອນ​ສິ່ງ​ແວດ​ລ້ອມ... ຈັດ​ຕັ້ງ​ການ​ສົນທະນາ​ເພື່ອ​ແກ້​ໄຂການ​ສະ​ເໜີ​ແນະຂອງ​ປະຊາຊົນ, ວິ​ສາ​ຫະກິດ​ຢ່າງ​ທັນ​ການ.

ນາຍົກລັດຖະມົນຕີສົນທະນາ​ໂດຍ​ກົງ​ກັບ​ນັກທຸລະກິດ, ກຳມະກອນ, ຊາວນາ ​ເພື່ອ​ຄົ້ນຄວ້າ, ດັດ​ແປງ​ນະ​ໂຍບາຍ​ທີ່​ກ່ຽວຂ້ອງ (4). ​ໃນ​ຂົງ​ເຂດ​ວິ​ສາ​ຫະກິດ ການ​ເຄື່ອນ​ໄຫວ​ສົນທະນາ​ໄດ້​ຮັບ​ການຈັດ​ຕັ້ງ 2 ​ເຖິງ 4 ​ເທື່ອ​ຕໍ່​ປີ ​ແລະ ກອງ​ປະຊຸມ​ຜູ້​ອອກ​ແຮງ​ງານ​ປະຈຳ​ປີ ​ເພື່ອ​ແກ້​ໄຂຢ່າງ​ທັນ​ການ​ຄວາມ​ຫຍຸ້ງຍາກ, ຂໍ້​ຂັດຂ້ອງ​ໃນ​ການ​ພົວພັນ​ແຮງ​ງານ, ການ​ພັດທະນາ​ການ​ຜະລິດ ທຸລະ​ກິດ, ປະກອບສ່ວນ​ເຮັດ​ໃຫ້​ຜູ້​ອອກ​ແຮງ​ງານມີ​ຄວາມ​ໝັ້ນ​ໃຈ​ແລະ​ອຸ່ນ​ອຽນ​ໃຈ​ໃນ​ການ​ອອກ​ແຮງ​ງາ, ຜະລິດ, ​ເຂົ້າ​ຮ່ວມ​ການ​ພັດທະນາ​ວິ​ສາ​ຫະກິດ. 

ບັນດາ​ອົງການ​ຕຸລາການ​ສຸມ​ໃສ່​ການ​ປະຕິ​ຮູບດ້ານ​ຍຸຕິ​ທຳ ຕິດ​ກັບ​ການ​ປະຕິ​ຮູບ​ຂັ້ນ​ຕອນ​ການ​ບໍລິຫານ​ດ້ານ​ຍຸຕິ​ທຳ; ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້ບັນດາ​ອົງການ, ການ​ຈັດ​ຕັ້ງ, ປະຊາຊົນ​ກວດ​ກາ, ຕິດຕາມ​ກວດກາ​ການ​ເຄື່ອ​ນ​ໄຫວຂອງ​ບັນດາ​ອົງການ​ຕຸລາການ. ສານ​ປະຊາຊົນ​ສູງ​ສຸດ​ໄດ້​ດຳ​ເນີນການ​ປະກາດເປີດ​ເຜີຍ​ຂໍ້​ຕົກລົງ, ຄຳ​ຕັດສິນ​ຄະດີຂອງ​ສານ; ຈັດ​ຕັ້ງ​ການ​ທົດ​ລອງ​ຮູບ​ແບບ​ການ​ສົນທະນາ, ​ໄກ່​ເກ່ຍກ່ອນ​ການ​ພິຈາລະນາ​ຄະດີ ​ໃນ​ຂໍ້​ພິພາດ​ທາງ​ແພ່ງ; ຫັນ​ໄປ​ສູ່​ການ​ສ້າງ​ຮ່າງ​ກົດໝາຍ​ກ່ຽວ​ກັບ​ການ​ໄກ່​ເກ່ຍ, ສົນທະນາ​ຢູ່​ສານ.

ການ​ປ່ຽງ​ແປງທາ​ງດ້ານ​ຄວາມ​ຮັບ​ຮູ້, ການ​ກະທຳ​ຂອງ​ຄະນະ​ພັກ, ອຳນາດ​ການ​ປົກຄອງ, ລະບົບ​ການ​ເມືອງ ​ແມ່ນ​ພື້ນຖານ​ທີ່​ສຳຄັນ​ເພື່ອ​ຍູ້​ແຮງ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ”, ​ເພີ່ມ​ທະວີ​ຄວາມ​ເຫັນ​ດີ​ເຫັນ​ພ້ອມ, ກໍ່ສ້າງ​ກ້ອນ​ກຳລັງ​ສາມັກຄີ​ປວງ​ຊົນ​ທັງ​ຊາດ, ປັບປຸງ​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ພັກ​ແລະ​ລັດ, ​ເພີ່ມ​ທະວີ​ສາຍ​ພົວພັນ​ສະໜິດ​ແໜ້ນ​ລະຫວ່າງ​ພັກ​ກັບ​ປະຊາຊົນ.

ຄຽງ​ຂ້າງ​ບັນດາ​ຜົນງານ​ທີ່​ບັນລຸ​ໄດ້, ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ກໍ່​ຍັງ​ມີ​ຂໍ້​ຈຳກັດ, ​ເຊັ່ນ ຂະ​ບວນການ​ຍັງ​ບໍ່​ທັນ​ກວ້າງຂວາງ​ໃນ​ທຸກ​ຂົງ​ເຂດ​ຂອງ​ຊີວິດ​ສັງຄົມ; ບັນດາ​ແບບຢ່າງ “ຂົນຂວາຍ​ປະຊາຊົນ​ເກ່ງ” ​ໃນ​ອົງການ​ລັດ, ​ໃນ​ວິ​ສາ​ຫະກິດ, ສະຫະກອນ, ​ໃນ​ລະບົບ​ການ​ເມືອງ​ ແມ່ນ​ຍັງ​ໜ້ອຍ; ການທະວີຄູນ​ຮູບ​ແບບ ​ແບບຢ່າງ ບໍ່​ເປັນ​ໄປ​ຕາມຄວາມ​ຕ້ອງການ. ບາງ​ຄະນະ​ພັກ, ອຳນາດ​ການ​ປົກຄອງ ​ແລະ ​ພະນັກງານສະມາຊິກ​ພັກຈຳນວນ​ໜຶ່ງ, ​ໂດຍ​ສະ​ເພາະ​ແມ່ນຫົວໜ້າ ມີ​ຄວາມ​ຮັບ​ຮູ້​ບໍ່​ພຽງພໍ, ບໍ່​ເອົາ​ໃຈ​ໃສ່​ຊີ້​ນຳ​ນຳພາ; ວຽກ​ງານ​ປະສານ​ສົມທົບ​ລະຫວ່າງ​ບັນດາ​ຄະນະ, ຂະ​ແໜງ​ການ, ອົງຄະ​ນະມະຫາຊົນ​ຢູ່​ບາງ​ແຫ່ງ ບໍ່​ແໜ້ນ​ແຟ້ນ, ບໍ່​ເຂົ້າ​ແກັບ​ເຂົ້າ​ເກ​ຍກັນ, ມີ​ລັກສະນະ​ຮູບ​ນອກ.

ຜ່ານ​ການ​ປະຕິບັດ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ​ໃຫ້​ເຫັນ​ວ່າ, ຈຳ​ເປັນ​ຕ້ອງ​ຍົກ​ສູງ​ຄວາມ​ຮັບ​ຮູ້​ ຂອງ​ບັນ​ດາ​ຂັ້ນ ຂະ​ແໜງ​ການ, ​​ຖັນ​ແຖວ​ພະນັກງານ, ສະມາຊິກ​ພັກ, ສະມາຊິກ​ຊາວ​ໜຸ່ມ, ສະມາຊິກ​ສະມາ​ຄົນ​ຕ່າງໆ, ​ໂດຍ​ສະ​ເພາະ​ແມ່ນ​ຫົວໜ້າ, ກ່ຽວ​ກັບ​ປະສິດທິ​ຜົນ​ຂອງ​ຂະ​ບວນການ “ຂົນຂວາຍ​ປະຊາຊົນ​ເກ່ງ”. ຈາກ​ນັ້ນ, ກຳນົດ​ແຈ້ງ​ເນື້ອ​ໃນຈຸດ​ໜັກ​ໃນ​ແຕ່ລະ​ໄລຍະ, ​ແຕ່ລະ​ປະ​ເພດ, ​ແຕ່ລະ​ທ້ອງ​ຖິ່ນ ສຳນັກງານ​ອົງການ ທີ່​ຕ້ອງ​ມຸ່ງ​​ໃສ່ຜົນ​ປະ​ໂຫຍ​ດທີ່​ຖືກ​ກົດໝາຍ, ຊອບ​ທຳ, ​ແທດ​ຈິງ​ຂອງປະຊາ​ຊົນ, ສ້າງ​ກຳລັງ​ໜູນ​ເພື່ອ​ພັດທະນາ​ເສດຖະກິດ-ສັງ​ຄົມ, ປະກອບສ່ວນ​ຍົກ​ສູງ​ຄຸນ​ນະພາ​ບຊີວິດ​ຂອງ​ປະຊາຊົນ.

ສືບ​ຕໍ່​ປະຕິບັດ​​ຂະ​ບວນການ​ແຂ່ງຂັນ, ກໍ່ສ້າງ​ຮູບ​ແບບ​ແບບຢ່າງ “ຂົນຂວາຍ​ປະຊາຊົນ​ເກ່ງ” ​ໃຫ້​ໄດ້ເປັນ​ຢ່າງ​ດີ

ຂະ​ບວນການ​ບູລະນະ​ແລະ​ພັດທະນາ​ພື້ນຖານ​​ເສດຖະກິດ​ຕະຫຼາດກຳນົດ​ທິດ​ສັງຄົມ​ນິຍົມ ​ແລະ ​ເຊື່ອມ​ໂຍງ​ສາກົນ​ກຳລັງ​ເປີດ​ໂອກາດ​ໃໝ່​ ເພື່ອຍົກ​ສູງ​ແລະປົວ​ແປງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ດີ​ຂຶ້ນ. ​ແຕ່, ບັນດາ​ສິ່ງ​ທ້າ​ທາຍ​ກ່ຽວ​ກັບ​ແຫຼ່ງພະລັງ​ສຳລັບ​ການ​ລົງທຶນ​ພັດທະນາ, ຍົກ​ສູງ​ສະ​ວັດ​ດີກາ​ນ​ແລະ​ຄວາມ​ປອດ​ໄພ​ທາງ​ສັງຄົມ, ຮັກສາ​ສະພາບ​ແວດ​ລ້ອມ, ຮັບ​ມື​ກັບ​ໄພທຳ​ມະ​ສາດ, ປັບປຸງ​ການ​ປ້ອງ​ກັນຊາ​ດ ປ້ອງ​ກັນ​ຄວາມ​ໝັ້ນຄົງ...ແມ່ນ​ຍັງຖືກ​ຈຳກັດ; ຄວາມ​ແຕກ​ໂຕນ​ຮັ່ງມີ-ທຸກ​ຍາກ​ເພີ່ມ​ຂຶ້ນ; ຄຸນທຳ​ທາງ​ສັງຄົມບາງ​ດ້ານ​ຖືກ​ຕົກ​ຕ່ຳ; ບາງ​ພື້ນ​ທີ່​ມີ​ຄວາມ​ສ່ຽງ​ຄວາມ​ສັບສົນ​ທາງ​ດ້ານຄວາມໝັ້ນຄົງ, ລະບຽບ​ຄວາມປອດ​ໄພທາງ​ສັງຄົມ, ບັນດາ​ພາກສ່ວນ​ທີ່​ບໍ່​ດີ ອິດ​ທິກຳລັງ​ສັດຕູ ພວກ​ປະຕິ​ການ ສືບ​ຕໍ່​ສວຍ​ໃຊ້​ບັນຫາ​ປະຊາທິປະ​​ໄຕ ສິດທິ​ມະນຸດ ຊົນ​ເຜົ່າ ສາສະໜາ ​ເພື່ອ​ໂຄສະນາ ​ເສກ​ສັນ​ປັ້ນ​ແຕ່ງ, ຫວັງ​ແບ່ງ​ແຍກ ທຳລາຍ​ກ້ອນ​ກຳລັງ​ມະຫາ​ສາມັກຄີ​ປວງ​ຊົນ​ທັງ​ຊາດ, ​ເຮັ​ດໃຫ້​ຄວາມ​ເຊື່ອ​ຖື​ຂອງ​ປະຊາຊົນ​ຕໍ່​ພັກ​ຫຼຸດ​ລົງ. ສະພາບ​ການ​ດັ່ງກ່າວ ຮຽກຮ້ອງ​ໃຫ້​ມີ​ການ​ປ່ຽນ​ແປງ​ໃໝ່​ແບບ​ວິທີ​ການ​ນຳພາຂອງ​ພັກ​ຕໍ່​ວຽກ​ງານ​ຂົນຂວາຍ​ປະຊາຊົນ ​ແນ​ໃສ່​ເຕົ້າ​ໂຮມ​ຂົນຂວາຍ​ປະຊາຊົນ​ປະຕິບັດ​​ເປັນ​ຢ່າງ​ດີ ບັນດາ​ແຜນ​ນະ​ໂຍບາຍ​ຂອງ​ພັກ, ນະ​ໂຍບາຍ ກົດໝາຍ​ຂອງ​ລັດ; ​ເສີມ​ຂະຫຍາຍ​ກຳລັງ​ແຮງ​ອັນ​ໃຫຍ່​ຫຼວງ​ຂອງ​ປະຊາຊົນ, ສ້າງ​ຂະ​ບວນການ​ປະຕິວັດ​ອັນ​ກວ້າງ​ໃຫຍ່ ​ໃນ​ພາລະກິດ​ການກໍ່ສ້າງ​ແລະ​ປົກ​ປັກ​ຮັກສາ​ປະ​ເທດ​ຊາດ. ​ເພື່ອ​ໃຫ້​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ສືບ​ຕໍ່​ແຜ່​ຂະຫຍາຍ​ກວ້າງ, ນຳ​ເອົາ​ປະສິດທິ​ຜົນ​ແລະ​ຜົນ​ປະ​ໂຫຍ​ດ​ຕົວ​ຈິງມາ​ໃຫ້​ປະຊາຊົນ, ບັນດາ​ຄະນະ​ພັກ​ຕ້ອງ​ເອົາ​ໃຈ​ໃສ່​ຊີ້​ນຳ​ນຳພາ, ​ເອົາ​ໃຈ​ໃສ່​ປະຕິບັດ​​ເນື້ອ​ໃນ​ທີ່​ສຳຄັນ​ຈຳນວນ​ໜຶ່ງ​ລຸ່ມ​ນີ້​ໃຫ້​ໄດ້ເປັນ​ຢ່າງ​ດີ:

ທີ​ໜຶ່ງ, ສືບ​ຕໍ່​ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ວຽກ​ງານ​ຂົນຂວາຍ​ປະຊາຊົນ, ກ່ຽວ​ກັບ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ​ແນ​ໃສ່​ສ້າງ​ການປ່ຽນ​ແປງ​ທີ່​ແທ້​ຈິງ​ໃນ​ການ​ພົວພັນ​ລະຫວ່າງ​ພັກ​ກັບ​ປະຊາຊົນ, ກຳນົດ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ​ແມ່ນ​ຄວາມ​ຮັບຜິດຊອບ​ຂອງ​ຄະນະ​ພັກ, ອຳນາດ​ການ​ປົກຄອງ, ລະບົບ​ການ​ເມືອງ. ​ເພີ່ມ​ທະວີ​ວຽກ​ງານ​ໂຄສະນາ, ກຳນົດ​ທິດ​ໃຫ້​ຂະ​ບວນ​ການຕິດ​ກັບ​ພາລະ​ບົດບາດ ໜ້າ​ທີ່ຂ​ອງສຳນັກງານ​ອົງການ, ການຈັດ​ຕັ້ງ​ໃນ​ລະບົບ​ການ​ເມືອງ. ​ເສີມ​ຂະຫຍາຍ​ບົດບາດ​ຂອງ​ບັນດາ​ອົງການ​ສື່​ມວນຊົນ​ໃນ​ວຽກ​ງານ​ໂຄສະນາ ຂົນຂວາຍ​ປະຊາຊົນ.

ທີ​ສອງ, ກຳນົດ​ເນື້ອ​ໃນ​ຈຸດ​ໜັກ​ໃຈກາງ​ຂອງ​ຂະ​ບວນການ​ແຂ່ງ​ຂົນ “ຂົນຂວາຍ​ປະຊາຊົນ​ເກ່ງ” ສອດຄ່ອງ​ກັບ​ເງື່ອນ​ໄຂ​ຂອງ​ແຕ່ລະ​ທ້ອງ​ຖິ່ນ, ​ແຕ່ລະ​ເປົ້າ​ໝາຍ. ​ເອົາ​ໃຈ​ໃສ່​ເປັນ​ສຳຄັນ​ເຖິງ​ໂຄງການ​ເປົ້າ​ໝາຍ​ແຫ່ງ​ຊາດ ​ກ່ຽວ​ກັບການ​ກໍ່ສ້າງ​ຊົນນະບົດ​ໃໝ່ ​ແລະ​ການຫຼຸດຜ່ອນ​ຄວາມທຸກ​ຍາກ​ແບບ​ຍືນ​ຍົງ ຕິດ​ກັບ​ບັນດາ​ຂະ​ບວນການ​ແຂ່ງຂັນ​ຂອງ​ແນວ​ໂຮມ​ປະ​ເທດ​ຊາດ​ຫວຽດນາມ ​ແລະ ບັນດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ດ້ວຍ​ການ​ປະຕິບັດ​ຄຳ​ສັ່ງ​ສະບັບ​ທີ 05-CT/TW ຂອງ​ກົມ​ການ​ເມືອງ ກ່ຽວ​ກັບ “ຍູ້​ແຮງ​ການ​ຮ່ຳຮຽນ​ແລະ​ປະຕິບັດ​ຕາມ​ແນວ​ຄິດ, ຄຸນສົມບັດ​ສິນ​ທຳ, ​ແບບ​ແຜນຂອງ​ປະທານ​​ໂຮ່ຈີ​ມິນ” ​ແລະ​ມະຕິ​ກອງ​ປະຊຸມ​ສູນ​ກາງ​ພັກຄັ້ງ​ທີ 4 ສະ​ໄໝ​ທີ XII “ກ່ຽວ​ກັບ​ການ​ເພີ່ມ​ທະວີ​ການ​ກໍ່ສ້າງ, ປັບປຸງ​ພັກ; ກີດ​ກັ້ນ, ຍູ້​ຖອຍ​ຄວາມ​ເສື່ອ​ມ​ໂຊມ​ທາງ​ດ້ານ​ແນວ​ຄິດ​ການ​ເມືອງ, ຄຸນສົມບັດ​ສິນ​ທຳ, ​ແບບ​ແຜນ​ດຳລົງ​ຊີວິດ, ບັນດາປະກົດການ "ຫັນປ່ຽນດ້ວຍຕົນເອງ", "ປ່ຽນແປງດ້ວຍຕົນເອງ" ຢູ່ພາຍໃນ".

ທີ​ສາມ, ​ເອົາ​ໃຈ​ໃສ່​ເປັນ​ສຳຄັນ​ເຖິງ​ການ​ກໍ່ສ້າງ, ພັດທະນາ​ຮູບ​ແບບ, ​ແບບຢ່າງ “ຂົນຂວາຍ​ປະຊາຊົນ​ເກ່ງ” ຢູ່​ບ່ອນ​ທີ່​ມີ​ຄວາມ​ຫຍຸ້ງຍາກ​ສັບສົນ, ຢູ່​ເຂດ​ຊົນ​ເຜົ່າ​ສ່ວນ​ນ້ອຍ, ​ເຂດ​ທີ່​ປະ​ຊາ​ຊົນ​ຖື​ສາສະໜາ, ​ໃນ​ກຳມະກອນ​ຢູ່​ເຂດ​ອຸດສາຫະກຳ, ​ເຂດ​ຜະລິດ​ອຸດສາຫະກຳ​ສົ່ງ​ອອກ, ​ໃນ​ການ​ແກ້​ໄຂ​ບັນດາ “ຈຸດ​ຮ້ອນ” ທີ່​ສັບສົນ​ເຄັ່ງຮ້ອນ, ​ໃນ​ການ​ປະຕິ​ຮູບ​ການ​ບໍລິຫານ, ກໍ່ສ້າງ​ກົງຈັກ​ໃຫ້​ກະທັດ​ລັດ​ເບົາບາ​ງ, ມີ​ປະສິດທິ​ພາບ ປະສິດທິ​ຜົນ, ຮັບ​​ໃຊ້​ປະ​ຊາ​ຊົນ.

ທີ​ສີ່, ລະບົບ​ອົງການ​ເຮັດ​ວຽກ​ງານ​ຂົນຂວາຍ​ປະຊາຊົນ ​ເພີ່ມ​ທະວີ​ການ​ຄົ້ນຄວ້າ, ​ເປັນ​ທີ່​ປຶກສາ​ໃຫ້​ຄະນະ​ພັກ​ໃນ​ການ​ຊີ້​ນຳ​ນຳພາ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ​ໃຫ້​ໄດ້​ຮັບ​ຜົນ​ດີກ​ວ່າ​ອີກ. ບັນດາ​ຂັ້ນ ຂະ​ແໜງ​ການ, ສຳນັກງານ​ອົງການ, ກົມ​ກອງ ​ຕ້ອງ​ກຳນົດ​ທິດ, ​ແນະ​ນຳ, ຊ່ວ​ຍເຫຼືອ​ໃນ​ການ​ສ້າງ​ຮູບ​ແບບ, ​ແບບຢ່າງ; ກວດກາ ຊຸກຍູ້​ຢ່າງ​ເປັນ​ປະຈຳ, ດຳ​ເນີນ​ການ​ສະຫຼຸບ​ເບື້ອງຕົ້ນ​ແລະ​ສະຫຼຸບ​ສັງ​ລວມ​ເປັນ​ລາຍ​ຄາບ, ຍ້ອງຍໍ​ໃຫ້​ລາງວັນ​ຢ່າງ​ທັນ​ການ ​ແລະ ມີ​ມາດ​ຕະການເພື່ອ​ທະວີຄູນ​ຮູບ​ແບບ, ​ແບບຢ່າງ “ຂົນຂວາຍ​ປະຊາຊົນ​ເກ່ງ” ​ໃຫ້​ກວ້າງ​ອອກ.

ຈາກ​ພຶດຕິ​ກຳ​ຂອງ​ຂະ​ບວນການ​ແຂ່ງຂັນ “ຂົນຂວາຍ​ປະຊາຊົນ​ເກ່ງ” ​ໃນ​ຫຼາຍປີ​ທີ່​ຜ່ານ​ມາ ສາມາດ​ຢືນຢັນວ່າ ນີ້​ແມ່ນ​ແຜນ​ນະ​ໂຍບາຍ​ທີ່​ຖືກຕ້ອງ, ​ແມ່ນ​ຂະ​ບວນການ​ທີ່​ແທດ​ຈິງ ມີ​ປະສິດທິ​ຜົນ, ຖືກ​ກັບ​ຈິດ​ໃຈ​ຂອງ​ປະຊາຊົນ, ​ໄດ້​ຮັບ​ການ​ສະໜັບສະໜູນ​ແລະ​ເຂົ້າ​ຮ່ວມ ​ຂອງສະມາຊິກ​ຊາວ​ໜຸ່ມ ສະມາຊິກ​ສະມາຄົມ​ແລະປະຊາຊົນຈຳນວນ​ຫຼວງ​ຫຼາຍ, ປະກອບສ່ວນ​ທີ່​ສຳຄັນ​ເຂົ້າ​ໃນ​ການ​ຮັກສາ​ຄວາມ​ໝັ້ນຄົງ​ທາງ​ການ​ເມືອງ, ພັດທະນາ​ເສດຖະກິດ-ສັງຄົມ, ​ເພີ່ມ​ທະວີ​ການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​ແລະ ກໍ່ສ້າງ​ລະບົບ​ການ​ເມືອງ​ໃຫ້​ສະອາດ​ປອດ​ໃສ, ໝັ້ນຄົງ​ເຂັ້ມ​ແຂງ./.

​ໂດຍ ​ເຈືອງທິມາຍ

ກຳມະ​ການ​ກົມ​ການ​ເມືອງ, ເລຂາ​ທິການ​ສູນ​ກາງ​ພັກ
ຫົວໜ້າ​ຄະນະ​ຂົນຂວາຍ​ປະຊາຊົນ​ສູນ​ກາງ

-------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 916 (​ເດືອນກຸມພາ 2019).0

(1) ໜັງສືພິມ ຊື້​ເທິ​ດ (ຄວາມ​ຈິງ), ສະບັບ​ອອກ​ວັນ​ທີ 15 ຕຸລາ 1949.

(2) ​ແຫຼ່ງ: ລາຍ​ງານ​ຂອງ​ຄະນະ​ຊີ້​ນຳ​ສູນ​ກາງ ກ່ຽວ​ກັບ​ການ​ສະຫຼຸບ 5 ປີ​ແຫ່ງ​ການ​ປະຕິບັດ​ມະຕິ​ສະບັບ​ທີ 25-NQ/TW, ລົງ​ວັນ​ທີ 3-6-2013, ຂອງ​ຄະນະ​ບໍລິຫານ​ງານ​ສູນ​ການ​ພັກ​ສະ​ໄໝ​ທີ XI ກ່ຽວ​ກັບ “​ເພີ່ມ​ທະວີ​ແລະ​ປ່ຽນ​ແປງ​ໃໝ່​ການ​ນຳພາ​ຂອງ​ພັກຕໍ່​ວຽກງານຂົນຂວາຍ​ປະຊາຊົນ​ໃນ​ສະພາບ​ການ​ໃໝ່”.

(3) ​ໂຄງການ “ສະ​ຫວັດີກາ​ນສຳລັບ​ສະມາຊິກ​ກຳມະບານ” ຊຶ່ງ​ກຳມະບານ​ຂັ້ນ​ຕ່າງໆ​ໄດ້​ຈັດ​ຕັ້ງ​ການ​ເຈລະຈາ, ​ເຊັນ​ຂໍ້​ຕົກລົງ​ການ​ຮ່ວມ​ມືກັບ 1.157 ຄູ່​ຮ່ວມ​ມື, ສະໜອງ​ຜະລິດ​ຕະພັນ, ບໍລິການ​ພິ​ເສດ​ໃຫ້​ສະມາຊິກ, ຜູ້​ອອກ​ແຮງ​ງານ 1,7 ລ້ານຄົນ ດ້ວຍ​ມູນ​ຄ່າ 526 ຕື້​ດົ່ງ. ​ໂຄງການ “​ເດືອນ​ກຳມະກອນ” ຈັດ​ຕັ້ງ​ການ​ປຸກລະດົມ​ຂົນຂວາຍ 19.352 ຄັ້ງ ​ດຶງ​ດູດ​ການ​ຕອບ​ສະໜອງ ​ເຂົ້າ​ຮ່ວມ​ຂອງ​ສະມາຊິກ​ກຳມະບານ​ແລະ​ຜູ້​ອອກ​ແຮງ​ງານ 2,9 ລ້ານ​ຄົນ; ​ມີ​ສະມາຊິກ​ກຳມະບານ, ຜູ້​ອອກ​ແຮງ​ງານ 573.772 ຄົນ​ໄດ້​ຮັບ​ການຢ້ຽມ​ຢາມ​ແລະ​ຂອງຂວັນ ​ທີ່​ມີ​ມູນ​ຄ່າປະມານ 149 ຕື້​ດົ່ງ. ​ໂຄງການ “​ບຸນປີ​ໃໝ່​ໄດ້ໂຮມ​ຢູ່​ຢ່າງມ່ວນ​ຊື່ນ” ​ໄດ້​ຈັດ​ຕັ້ງ​ການ​ເບິ່ງ​ແຍງ​ດູ​ແລ, ມອບ​ຂອງຂວັນ​ປີ​ໃໝ່, ຊ່ວຍ​ເຫຼືອ​ປີ້​ລົດ​ໄຟ ປີ້ລົດ​ໂອ​ໂຕ​ໃຫ້​ສະມາຊິກຜູ້​ອອກ​ແຮງ​ງານ 8 ລ້ານ​ຄົນກັບ​ບ້ານ​ກິນ​ບຸນປີ​ໃໝ່, ດ້ວຍ​ຈຳນວນ​ເງິນ​ຫຼາຍ​ກວ່າ 8.500 ຕື້​ດົ່ງ.

(4) ວັນ​ທີ 22 ​​ເມສາ 2017, ຢູ່​​ນະຄອນ​ດາ​ນັ້ງ, ນາຍົກລັດຖະມົນຕີ​ໄດ້​ພົບ​ປະ​ແລະ​ສົນທະນາ​ກັບກຳມະກອນ​ຜູ້​ອອກ​ແຮງ​ງານ​ໃນ​ເຂດ​ເສດຖະກິດ​ຈຸດ​ໜັກ​ພາກ​ກາງ 2.000 ຄົນ. ວັນ​ທີ 17 ພຶດສະພາ 2017, ​ໃນ​ກອງ​ປະຊຸ​ມລະຫວ່າງ​ນາຍົກລັດຖະມົນ​ຕີ​ກັບ​ວິ​ສາ​ຫະກິດ ພາຍ​ໃຕ້​ຫົວ​ຂໍ້ “ພ້ອມ​ກັນ​ເດີນ​ທາງ​ກັບ​ວິ​ສາ​ຫະກິດ”, ນາຍົກລັດຖະມົນຕີ, ບັນດາ​ຮອງ​ນາຍົກລັດຖະມົນຕີ ​ໄດ້​ພົບ​ປະສົນທະນາ​ກັບ​ນັກທຸລະກິດຫຼາຍ​ກວ່າ 10.000 ຄົນ. ວັນ​ທີ 9 ​ເມສາ 2018, ຢູ່​ແຂວງ​ຫາຍ​ເຢືອງ, ນາຍົກລັດຖະມົນຕີ​ໄດ້​ຮ່ວມ​ກອງ​ປະຊຸມ​ສົນທະນາ​ກັບ​ຊາວ​ກະສິກອນ​ພາຍ​ໃຕ້​ຫົວ​ຂໍ້ “​ແກ້​ຂໍ້​ຂັດຂ້ອງ, ປຸກ​ຕື່ນ​ກຳລັງ​ໜູນ, ສືບຕໍ່ທ່ວງທ່າຂອງ 30 ປີ ແຫ່ງການປ່ຽນແປງໃໝ່". ວັນ​ທີ 20 ພຶດສະພາ 2018, ຢູ່​​ແຂວງ​ຮ່າ​ນາມ, ນາຍົກລັດຖະມົນຕີ​ໄດ້​ພົບ​ປະ​ແລະ​ສົນທະນາ​ກັບກຳມະກອນ​ຜູ້​ອອກ​ແຮງ​ງານຂອງ​ບັນດາ​ເຂດ​ອຸດສາຫະກຳ​ໃນ​ເຂດ​ທົ່ງພຽງ​ແມ່​ນ້ຳແດງ​ເກືອບ 1.000 ຄົນ ພາຍ​ໃຕ້​ຫົວ​ຂໍ້ “ອັດຕາ​ສະມັດຖະພາບ​ສູງ​ກວ່າ, ສະຫວັດດີ​ການ​ດີກ​ວ່າ” (​ແຫຼ່ງ: ລາຍ​ງານ​ການ​ສະຫຼຸບ​ເບື້ອງ​ຕົ້ນ​ມະຕິ​ສະບັບ​ທີ 25 ຂອງ​ຄະນະ​ກຳມະການ​ພັກ​ລັດຖະບານ).

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ