ວັນເສົາ, 21/9/2019
ບົດບາດຂອງແນວຮົມປະເທດຊາດຫວຽດນາມ ໃນການເປີດກວ້າງ, ປັບປຸງກຸ່ມກ້ອນມະຫາສາມັກຄີປວງຊົນທັງຊາດໃນສະໄໝໃໝ່
27/4/2019 22:4' ສົ່ງ ພິມ
ພາບອະປະກອບ. (ພາບ: tuyengiao.vn)

ໃນ​ແຕ່​ລະ​ໄລ​ຍະ​ປະ​ຫວັດ​ສາດ, ດ້ວຍ​​ໜ້າ​ທີ່ຮັບຜິດຊອບ​ແລະບົດ​ບາດ​ໃນ​ການ​ເຕົ້າ​ໂຮມ, ສາ​ມັກ​ຄີຊົນ​ຊັ້ນ, ຊັ້ນ​ວັນ​ນະ, ຊົນ​ຊາດ, ສາ​ດສະ​ໜາ ແລະ ບັນ​ດາ​ພາກ​ສ່ວນ​ໃນ​ສັງ​ຄົນ, ແນວ​ໂຮມ​ປະ​ເທດ​ຊາດຫວຽດ​ນາມໄດ້​ຮຽກ​ຮ້ອງ, ເຕົ້າ​ໂຮມ​ປະ​ຊາ​ຊົນ​ເຂົ້າ​ເປັນ​ກຸ່ມ​ກ້ອນ​​ມະ​ຫາສາ​ມັກ​ຄີ​ປວງ​ຊົນທັງ​ຊາດ​ຢ່າງ​ໝັ້ນຄົງ, ຮ່ວມ​ແຮງຮ່ວມ​ໃຈ​ກັນ​ ແລະ ​ຕັດສິນ​ໃຈ​ປະ​ຕິ​ບັດບັນ​ດາ​ໜ້າ​ທີ່ການ​ເມືອງ​ອັນ​ສະ​ຫງ່າ​ລາ​ສີ​ຂອງ​ພັກແລະລັດ, ​​ໄດ້ປະ​ກອບ​ສ່ວນ​ອັນ​ສຳ​ຄັນ​ເຂົ້າ​ໃນ​ພາ​ລະ​ກິດ​ແຫ່ງ​ການ​ສ້າງສາແລະປົກ​ປັກ​ຮັກ​ສາ​ປະ​ເທດ​ຊາດ​ຫວຽດ​ນາມ​ສັງ​ຄົມ​ນິ​ຍົມ. ແນວ​ໂຮມປະ​ເທດ​ຊາດຫວຽດ​ນາມ ຍາ​ມ​ໃດ​ກໍ່​ເປັນ​ພື້ນ​ຖານ​ການ​ເມືອງ​ຂອງ​ອຳ​ນາດ​ການ​ປົກ​ຄອງ​ປະ​ຊາ​ຊົນ, ເປັນ​ບ່ອນ​ເພື່ອ​ໃຫ້​ພີ່ນ້ອງ​ຮ່ວມ​ຊາດ​ຫວຽດນາມ​ຢູ່​ໃນ​ແລະ​ຕ່າງປະ​ເທດ ສະ​ແດງ​ເຈດ​ຈຳ​ນົງ ​ແລະ ຄວາມ​ມຸ່ງມາດ​ປາດ​ຖະ​ໜາ​ຂອງຕົນ. ດ້ວຍຫຼັກ​ການ​ປະ​ຊຸມ​ເຈ​ລະ​ຈາ​ປະ​ຊາ​ທິ​ປະ​ໄຕ ທີ່ເປັນ ຂໍກະ​ແຈອະ​ເນກ​ປະ​ສົງ”, ແນວ​ໂຮມ​ປະ​ເທດ​ຊາດ​ຫວຽດ​ນາມ ໄດ້​ດຳ​ເນີນ​ການ​ເຕົ້າ​ໂຮມ, ສາ​ມັກ​ຄີທັງ​ຊາດ​ໃຫ້​ “​ເປັນຈິ​ດໜຶ່ງ​ໃຈ​ດຽວ" ​ໄປຕາມ​ພັກ​ກອມ​ມູ​ນິດ​ ຍາດເອົາບັນດາໄຊຊະນະອັນຍິ່ງໃຫຍ່, ຂຽນ​ໜ້າ​ປະ​ຫວັດ​ສາດ​ອັນ​ສະ​ຫງ່າ​ອົງ​ອາດ​ຂອ​​ງຊາດ, ຊ່ວຍ​ໃຫ້​ປະ​ຊາ​ຊົນຫວຽດ​ນາມ ຈາກ​ຊາ​ຕາ​ກຳ​ຂ້ອຍ​ຂ້າ ກາຍ​ເປັນ​ເຈົ້າ​ຂອງ​ປະ​ເທດ; ເປີດສັກ​ກະ​ຫຼາດ​ໃໝ່ - ສັກ​ກະຫຼາດ​ແຫ່ງ​ຄວາມ​​ເປັນເອ​ກະ​ລາດ, ເອ​ກະ​ພາບ, ຜືນ​ແຜ່ນ​ດິນ​ອັນ​ຄົບ​ຖ້ວນ, ທົ່ວທັງ​ຊາດ​ພ້ອມ​ກັນ​ປະ​ຕິ​ບັດ​ສອງ​ໜ້າ​ທີ່​​ຍຸດ​ທະ​ສາດ​ຄື ກໍ່​ສ້າງ ແລະ ປົກ​ປັກ​ຮັກ​ສາ​ປະ​ເທດ​ຊາດ​ຫວຽດ​ນາມສັງ​ຄົມ​ນິ​ຍົມ; ເປີດກວ້າງ​ການ​ພົວ​ພັນ​​ຕ່າງ​ປະ​ເທດ​ກັບ​ບັນ​ດາ​ປະ​ເທດ​​ໃນ​ພາກ​ພື້ນ ແລະໃນ​ໂລກ.

ໃນ​ພາ​ລະ​ກິດ​ແຫ່ງ​ການ​ປ່ຽນ​ແປງ​ໃໝ່, ເຊື່ອມ​ໂຍງ​ສາ​ກົນ​ຢູ່​ຫວຽດ​ນາມ, ແນວ​ໂຮມ​ປະ​ເທດ​ຊາດຫວຽດ​ນາມ ແລະ ບັນ​ດາ​ອົງ​ການ​ຈັດ​ຕັ້ງ​ການ​ເມືອງ-ສັງ​ຄົມ ນັບ​ມື້​ນັບ​ມີ​ບົດ​ບາດ​ອັນ​ສຳ​ຄັນ​ໃນ​ການ​ເຕົ້າ​ໂຮມ, ຂົນ​ຂວາຍ, ສາ​ມັກ​ຄີຢ່າງ​ກວ້າງ​ຂວາງ​ ປະ​ຊາ​ຊົນ​​ໃນປະ​ເທດແລະຊາວ​ຫວຽດ​ນາມ​ຢູ່​ຕ່າງ​ປະ​ເທດ ​ໄປ​ຕາມ​ພັກກອມ​ມູ​ນິດ​ຫວຽດ​ນາມ ​ເພື່ອ​ດຳ​ເນີນ​ການ​ປະ​ຕິ​ວັດ. ທີ່​ຕັ້ງ​ແລະບົດ​ບາດສຳຄັນ​ຂອງ​ແນວ​ໂຮມ​ປະ​ເທດ​ຊາດ​ຫ​ວຽດ​ນາມ ໄດ້ຮັບ​ການ​ຮັບ​ຮູ້​ໂດຍ​ພັກ​ແລະລັດຫວຽດນາມ​ ຊຶ່ງ​ໄດ້​ລະບຸໃນ ໂຄງ​ການການ​ເມືອງ​ກ່ຽວ​ກັບ​ການກໍ່​ສ້າງ​ປະ​ເທດ​ໃນ​ໄລ​ຍະ​ຂ້າມ​ຜ່ານ​ຂຶ້ນ​ສູ່​ສັງ​ຄົມ​ນິ​ຍົມ (ສະບັບ​ປົບ​ປຸງ, ພັດ​ທະ​ນາ​ປີ 2011), ໄດ້​ກຳ​ນົດ​ທາງ​ກົດໝາຍໃນ​ມາດ​ຕາ 9 ລັດ​ຖະ​ທຳ​ມະ​ນູນປີ 2013 ແລະ​ ໄດ້ຫັນ​ເປັນນິຕິ​ກຳ​ໃນ​ກົດ​ໝາຍ​ກ່ຽວ​ກັບແນວ​ໂຮມ​ປະ​ເທ​ດ​ຊາດ​ຫວຽດ​ນາມ ປີ 2015.

​ໂດຍເປັນ​ພາກ​ສ່ວນ​​ໜຶ່ງໃນ​ໂຄງ​ສ້າງ​ຂອງ​ລະ​ບົບ​ການ​ເມືອງ, ​ເປັນພື້​ນ​ຖານ​ການ​ເມືອງ​ຂອງ​ອຳ​ນາດ​ການ​ປົກ​ຄອງ​ປະ​ຊາ​ຊົນ, ແນວ​ໂຮມ​ປະ​ເທດ​ຊາດ​ຫວຽດ​ນາມ​ຂັ້​ນ​ຕ່າງໆ​ ແຕ່​ສູນ​ກາງ​ຈົນ​ຮອດ​ຮາກ​ຖານ ໄດ້​ຮັບ​ການປັບ​ປຸງ​ບູ​ລະ​ນະ​ທາງ​ດ້ານ​ການ​ຈັດ​ຕັ້ງ, ປ່ຽນ​ແປງ​ໃໝ່​ເນື້ອ​ໃນ ແລະ ວິ​ທີ​ການ​ເຄື່ອນ​ໄຫວຢ່າງ​ບໍ່​ຢຸດຢັ້ງ, ​ໄດ້ຫັນ​ເປັນຫຼາຍ​ຮູບຫຼາຍ​ແບບ​ໃນ​ການ​ຂົນ​ຂວາຍ, ເຕົ້າ​ໂຮມ, ​ສາ​ມັກ​ຄີ​ບັນ​ດາ​ຊົນ​ຊັ້ນ, ຊັ້ນ​ວັນ​ນະ, ຊົນ​ເຜົ່າ, ສາດ​ສະ​ໜາ ແລະ ບັນ​ດາ​ພາກ​ສ່ວນ​ໃນ​ສັງ​ຄົມ; ​ໄດ້​ດຳ​ເນີນການ​ໂຄ​ສະ​ນາ, ເຜີຍ​ແຜ່​​ແຜນນະ​ໂຍ​ບາຍ ແນວ​ທາງ​ຂອງ​ພັກ, ນະ​ໂຍ​ບາຍ ກົດ​ໝາຍ​ຂອງ​ລັດ ​ເຖິງ​ປະ​ຊາ​ຊົນ​ຊັ້ນ​ຕ່າງໆ​ຢ່າງ​ທັນ​ເວ​ລາ, ແນ​ໃສ່​ສ້າງ​ຄວາມ​ເປັນ​ເອ​ກະ​ພາບ​ທາງ​ດ້ານ​ຄວາມ​ຮັບ​ຮູ້ແລະການ​ກະ​ທຳ​ ໃນ​ການ​ປະ​ຕິ​ບັດ​ບັນ​ດາ​ເປົ້າ​ໝາຍ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ພັກ​ແລະລັດ. ແນວ​ໂຮມ​ປະ​ເທດ​ຊາດ​ຫວຽດ​ນາມ​ໄດ້​ເປັນ​ຜູ້ຕາງ​ໜ້າ​, ປົກ​ປັກ​ຮັກ​ສາ​ສິດແລະຜົນ​ປະ​ໂຫຍດທີ່​ຊອບ​ທຳ​ ຖືກ​ຕາມ​ກົດ​ໝາຍ ​ຂອງ​ປະ​ຊາ​ຊົນ, ເສີມ​ຂະ​ຫຍາຍ​ສິດ​ເປັນ​ເຈົ້າ​ຂອງ​ປະ​ຊາ​ຊົນ​ຊັ້ນ​ຕ່າງໆ, ເພີ່ມ​ທະ​ວີ​ຄວາມ​ເປັນ​ເອ​ກະ​ພາບ​ສັງ​ຄົມ; ເຂົ້າ​ຮ່ວມ​ໃນ​ການຕິດຕາມກວດ​ກາ​ແລະວິ​ຈານ​ສັງ​ຄົມ; ເຕົ້າ​ໂຮມ​ຄວາມ​​ຄິດເຫັນ, ຂໍ້​ສະ​ເໜີ​ຂອງ​ຜູ້​ມີ​ສິດ​ເລືອກ​ຕັ້ງແລະປະ​ຊາ​ຊົນ​ ເພື່ອ​ສ່ອງ​ແສງ, ສະ​ເໜີ​ໃຫ້​ພັກ-ລັດ; ເພີ່ມ​ທະ​ວີ​ການເຄື່ອນ​ໄຫວ​ພົວ​ພັນ​ຕ່າງ​ປະ​ເທດ​ທາງ​ປະ​ຊາ​ຊົນເຊິ່ງ​ໄດ້​ປະ​ກອບ​ສ່ວນອັນ​ສຳ​ຄັນ​ເຂົ້າ​ໃນ​ຜົນ​ສຳ​ເລັດ​ຂອງ​ພາ​ລະ​ກິດການ​ປ່​ຽນ​ແປງ​ໃໝ່​ປະ​ເທດ​ໃນ 30 ກວ່າ​ປີທີ່​ຜ່ານ​ມາ.

ບັ​ນ​ດາ​ຜົນ​ງານ​ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມແລະບັນ​ດາ​ອົງ​ການ​ຈັດ​ຕັ້ງ​ປະ​ຊາ​ຊົນ​ ​ໄດ້​ຮັບ​ການ​ຢືນ​ຢັນ​​ໂດຍ​ກອງ​ປະ​ຊຸມ​ໃຫຍ່​ຄັ້ງ​ທີ XII ຂອງ​ພັກ ວ່າ: “ແນວ​ໂຮມ​ປະ​ເທດ​ຊາດ​ຫ​ວຽດ​ນາມ ແລະບັນ​ດາ​ອົງ​ການ​ຈັດ​ຕັ້ງ​ປະ​ຊາ​ຊົນ​ ​ໄດ້​ມີ​ການ​ປ່ຽນ​ແປງ​ໃໝ່​ທັງ​ເນື້ອ​ໃນແລະວິ​ທີ​ການ​ເຄື່ອນ​ໄຫວ; ໄດ້​ເສີ​ມ​ຂະ​ຫຍາຍ​​ເປັນ​ຢ່າງ​ດີ ບົດ​ບາດ​ເຕົ້າ​ໂຮມ, ກໍ່​ສ້າງ​ກຸ່ມ​ກ້ອນ​ມະ​ຫາ​ສາ​ມັກ​ຄີ​ປວງ​ຊົນທັງ​ຊາດ​; ພ້ອມກັນ​ກັບ​ພັກ​ແລະລັດ ​ເບິ່ງ​ແຍງ​ດູ​ແລ, ປົກ​ປັກ​ຮັກ​ສາ​ສິດແລະຜົນ​ປະ​ໂຫຍດ​ທີ່​​ຊອບ​ທຳ ​ຖືກ​ກົດ​ໝາຍຂອງ​ປະ​ຊາ​ຊົນ; ເຂົ້າ​ຮ່ວມ​ໃນ​ການກໍ່​ສ້າງ​ພັກ, ຄຸ້ມ​ຄອງ​ລັດ, ຄຸ້ມ​ຄອງ​ສັງ​ຄົມ; ​ໄດ້​ຈັດ​ຕັ້ງ​ຢ່າງ​ຕໍ່​ເນື່ອງ​ບັນ​ດາ​ການ​ຂົນ​ຂວາຍ, ຂະ​ບວນ​ການແຂ່ງ​ຂັນ​ຮັກ​ຊາດ, ປະ​ກອບ​ສ່ວນທີ່​ສຳຄັນ​ເຂົ້າ​ໃນ​ຜົນ​ງານລວມ​ຂອງ​ປະ​ເທດ(1).

ໃນ​ປະ​ຈຸ​ບັນ, ດ້ວຍ​ແນວ​ທາງ​ການ​ພົວ​ພັນ​ຕ່າງ​ປະ​ເທດ “​ເປັນ​ເອກະລາດ, ​ເປັນ​ເຈົ້າ​ຕົນ​ເອງ, ສັນຕິພາບ, ການ​ຮ່ວມ ​ແລະ​ການ​ພັດທະນາ; ຫັນ​ການ​ພົວພັນ​ຕ່າງປະ​ເທດ​ເປັນ​ຫຼາຍ​ຮູບ​ຫຼາຍ​ແບບ ຫຼາຍ​ກ້ຳ​ຫຼາຍ​ຝ່າ​ຍ; ເປັນ​ເຈົ້າ​ການແລະຕັ້ງ​ໜ້າ​ເຊື່ອມ​ໂຍງ​ສາ​ກົນ; ​ເປັນ​ເພື່ອນ​ມິດ, ​ເປັນ​ຄູ່​ຮ່ວມ​ມື​ທີ່​ໄວ້​ວາງ​ໃຈ​ໄດ້ ແລະ ​ເປັນ​ສະມາຊິກ​ທີ່​ມີ​ຄວາມ​ຮັບຜິດຊອບ ຂອງວົງຄະນາຍາດສາກົນ(2), ຫວຽດ​ນາມ​​ກຳລັງ​ເຊື່ອມ​ໂຍງ​ສາ​ກົນ​ຢ່າງ​ເລິກ​ເຊິ່ງກວ້າງ​ຂວາງ​ກັບ​ທຸກໆ​ປະ​ເທດ​ໃນ​ໂລກ ແລະ ບັນ​ລຸ​ໄດ້​ບັນ​ດາ​ຜົນ​ງານ​ທີ່​ໜ້າ​ເອກອ້າງ​ທະນົງ​ໃຈ, ພາ​ໃຫ້​ປະ​ເທດ"ພ້ອມພຽງຮງໜ້າກັບບັນດາປະເທດມະຫາອຳນາດຢູ່ໃນຫ້າທະວີບ" ຄື​ຄວາມ​ມຸ່ງ​ຫວັງ​ຂອງ​ປະ​ທານ​ໂຮ່​ຈິ​ມິນທີ່​ແສນ​ເຄົາ​ລົບ​ຮັກ​ແພງ ເວ​ລາ​ທີ່ເພີ່ນ​ຍັງ​ຊີ​ວິດ​ຢູ່.

ແຕ່​ວ່າ, ໃນ​ຂະ​ບວນວິ​ວັດ​ການ​ເຊື່ອມ​ໂຍງ​ກັບ​ພາກ​ພື້ນແລະໂລກ, ຄຽງ​ຄູ່​ກັບບັນດາ​​ຄວາມ​ສະ​ດວກ​ແລະ​ໂອ​ກາດ​ດີ​ນັ້ນ ​ແມ່ນ​ມີ​ທັງ​ຄວາມ​ຫຍຸ້ງ​ຍາກ​ແລະ​ສິ່ງ​ທ້າ​ທາຍທີ່​ເກີດ​ຂຶ້ນ​ຕໍ່​ພາ​ລ​ະ​ກິດ​ການ​ປ່ຽນ​ແປງ​ໃໝ່ຂອງ​ພັກແລະລັດ​ເວົ້າ​ລວມ ແລະ ຕໍ່ພາ​ລະ​ກຳ​ກໍ່​ສ້າງແລະປັບ​ປຸງ​ກຸ່ມ​ກ້ອນ​ສາ​ມັກ​ຄີປວງ​ຊົນ​ທັງ​ຊາດ​ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມ​ເວົ້າ​ສະ​ເພາະ. ໃນ​ເວ​ລາ​ທີ່​ຜ່ານ​ມາ, ຢູ່​ບາງ​ບ່ອນ​ໄດ້​​ເກີດມີ​ຂໍ້​ຂັດ​ແຍ້ງ​ຢູ່​ພາຍ​ໃນ​ປະ​ຊາ​ຊົນກັບ​ອຳ​ນາດ​ການ​ປົກ​ຄອງ ​ກ່ຽວ​ກັບ​​ຜົນ​ປະ​ໂຫຍດພາກ​ສ່ວນ, ຜົນ​ປະ​ໂຫຍດ​ສະ​ເພາະ​ໜ້າ ​ເຊິ່ງ​​ເປັນ​ຜົນກະທົບບໍ່​ນ້ອຍ​ເຖິງ​ການ​ປະ​ຕິ​ບັດ​ເປົ້າ​ໝາຍ​ລວມ​ຂອງ​ປະ​ເທດ, ກໍ່​ຄື​ເປັນ​ອຸປະສັກ​ຕໍ່​ການ​ປະ​ຕິ​ບັດ​​ຜົນ​ປະ​ໂຫຍດ​ສະ​ເພາະ​ຂອງບັນດາ​ຊົນ​ຊັ້​ນ ຊັ້ນ​ວັນ​ນະ​ໃນ​ສັງ​ຄົມ; ສະ​ພາບ​ການຜັນ​ແຍກ​ຊົນ​ຊັ້​ນ, ຜັນ​ແຍກ​ສັງຄົມ, ຄວາມແຕກ​ໂຕນ, ບໍ່​ສະ​ເໝີ​ພາບ​ກັນ ​ໃນ​ການ​ຊົມ​ໃຊ້​ສະ​ຫວັດ​ດີ​ການ​ສັງ​ຄົມ ລະ​ຫວ່າງ​ບັນ​ດາຜູ້​ອອກ​ແຮງ​ງານ, ລະ​ຫວ່າງ​ບັນ​ດາເຂດ​, ພາກ ແລະ ປະ​ຊາ​ຊົນ​ຊັ້ນ​ວັນ​ນະ​ຕ່າງໆເຊິ່ງ​ໄດ້​ເຮັດ​ໃຫ້​​ກຸ່ມ​ກ້ອນ​ມະ​ຫາ​ສາ​ມັກ​ຄີ​ໃນປະ​ຊາ​ຊົນ​ພາກ​ສ່ວນໜຶ່ງຖືກ​ແຕກ​ແຫງ.

​ໃນ​ເວລນນັ້ນ, ບັນ​ດາ​ອິດ​ທິ​ກຳ​ລັງ​ສັດ​ຕູ​ໄດ້​ສວຍ​ໃຊ້​ຂະ​ບວນ​ການ​ເຊື່ອມ​ໂຍງ​ສາ​ກົນ ​ເພື່ອຍູ້​ແຮງ​ຍຸດ​ທະ​ສາດ ຜັນ​ປ່ຽນ​ໂດຍ​ສັນ​ຕິ”, ຍຸ​ຍົງ​ສົ່ງ​ເສີມ​ແນວ​ຄິດ​ແຍກ​ຕົວ​ອອກ, ແບ່ງ​ແຍກ​ປະ​ຊາ​ຊົນ​ບັນ​ດາ​ເຜົ່າ, ທຳ​ລາຍ​ກຸ່ມ​ກ້ອນ​ມະ​ຫາ​ສາ​ມັກ​ຄີ​ປະ​ຊາ​ຊົນ​ບັນ​ດາ​ເຜົ່າ​ຢູ່​​ເຂດ​ ​ໄຕ​ບັກ, ໄຕ​ງວຽນ, ​ໄຕ​ນາມ​ໂບ້; ຍຸ​ຍົງຄວາມ​ຂັດ​ແຍ້ງ​ສັງຄົມ​ແລະການ​ປະ​ທະ​ກັນ​ທາງ​ສັງ​ຄົມ, ຍຸ​ແຫຍ່​ປະ​ຊາ​ຊົນ​ເຕົ້າ​ໂຮມເຄື່ອນ​ໄຫວ​​ຜິດ​ກົດ​ໝາຍ, ທຳລາຍ​ຄວາມ​ເປັນ​ລະ​ບຽບ​ຮຽບ​ຮ້ອຍ​ທາງ​​ການ​ເມືອງ-ສັງ​ຄົມ; ອັນ​ທີ່​ພົ້ນ​ເດັ່ນ​ແມ່ນ​ ພວກເຂົາ​​ສວຍໃຊ້​ຄວາມ​ຮັກ​ຊາດ​ຂອງ​ປະ​ຊາ​ຊົນ​ໃນ​ບັນ​ດາ​ເຫດ​ການ ກໍ​ບະ​ນີ​ເຊັ່ນ ຈີນນຳ​ເອົາຮ້ານ​ຂຸດເຈາະ​ນ້ຳ​ມັນ ​ໄຮ່​ຢາງ 981 ​ເຂົ້າມາ​ຕິດ​ຕັ້ງ​ໃນ​ເຂດ​ເສດ​ຖະ​ກິດ​ພິ​ເສດແລະໄຫຼ່​ທະ​ວີບ​ຂອງ​ຫວຽດ​ນາມ; ອຸ​ບັດ​ເຫດ​ມົນ​ລະພິດ​ສິ່ງແວດ​ລ້ອມ​ທ​ະ​ເລ​ຂອງ ຟໍ​ໂມ​ຊາ (ບໍລິສັດ​ຂອງ​ຈີນ) ແລະ ການ​ປະ​ກອບ​ຄຳ​ເຫັນ​ເຂົ້າ​ໃນ​ຮ່າງ​ກົດ​ໝາຍວ່າ​ດ້ວຍຫົວໜ່ວຍ​ບໍ​ລິ​ຫານ-ເສດ​ຖ​ະ​ກິດ​ພິ​ເສດ ເວີນ​ດົ່ນ, ເວີນ​ຟອງ​ເໜືອ, ຝູກວັດ… ດ້ວຍ​ການ​ກະ​ທຳ​​ເຫຼົ່າ​ນັ້ນ, ບັນ​ດາ​ອິດ​ທິ​ກຳ​ລັງປະຕິ​ການ​ພາຍ​ໃນແລະຕ່າງ​ປະ​ເທດ ​ໄດ້​ຊອກ​ຫາ​ທຸກວິ​ທີ​​ເພື່ອ​ແບ່ງ​ແຍກ​ພັກ, ລັດ ກັບ​ປະ​ຊາ​ຊົນ; ​​ເຮັດ​ໃຫ້ປະ​ຊາ​ຊົນ​ປໍ​ລະ​ປັກ​ກັບ​​ກຳ​ລັງ​ປະ​ກອບ​ອາ​ວຸດ; ແບ່ງ​ແຍກ​ຊົນ​​ເຜົ່າ ສາດ​ສະ​ໜາ, ທຳ​ລາຍສຳພັນ​ທະ​ພາບ​ລະ​ຫວ່າງ​ຊົນ​ຊັ້ນ​ກຳ​ມະ​ກອນ ​ກັບ​ຊົນ​ຊັ້ນ​ຊາວ​ນາ ແລະ ຖັນ​ແຖວປັນ​ຍາ​ຊົນ; ຍຸ​ຍົງ​ສົ່ງ​ເສີມ​ການຕ້ານ​ຄືນ ​ແລະ ເຮັດ​ໃຫ້ກຳລັງ​ແຮງ​ປົກ​ປັກ​ຮັກ​ສາ​ປະ​ເທດ​ຊາດອ່ອນ​ເພຍ​ລົງ, ສົ່ງ​ຜົນ​ສະ​ທ້ອນ​ຢ່າງ​ຮ້າຍ​ແຮງ​ເຖິງ​ຄວາມໝັ້ນຄົງ​ຂອງ​ຊາດ, ຄວາມ​ສະ​ຫງົບ​ຮຽບ​ຮ້ອຍ​ປອດ​ໄພ​ທາງສັງ​ຄົມ ແລະ ຄວາມ​ສາ​ມັກ​ຄີປວງ​ຊົນ​ທັງ​ຊາດ.

ສາ​ເຫດ​ຂອງ​ບັນ​ດາກໍ​ລະ​ນີເຫດການ​ດັ່ງ​ກ່າວ ​ສ່ວນ​ໜຶ່ງ​​ເກີດ​ຈາກ​ການ​ຮັບ​ຮູ້​ສະ​ພາບ​ການ​ປະ​ຊາ​ຊົນຂອງ​ລະ​ບົບ​ການ​ເມືອງ​ເວົ້າ​ລວມ, ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມແລະບັນ​ດາ​ອົງ​ການ​ຈັດ​ຕັ້ງ​ເວົ້າ​ສະ​ເພາະ ​​ໃນ​ບາງຄັ້ງບາງ​ບ່ອນ ບໍ່​ທັນ​ເວ​ລາ, ​ມີ​ ຈຸດ​ຮ້ອນ​ເກີດ​ຂຶ້ນຢູ່​ບາງ​ແຫ່ງ ແຕ່​​ບໍ່​ໄດ້​ຮັບ​ການ​ແກ້​ໄຂ​ໃຫ້ສະຫງົບ​ຢ່າງຂາດຕົວ, ພາ​ໃຫ້​ເກີດ​ຄວາມ​ເຄັ່ງ​ຮ້ອນ​ໃນ​ປະ​ຊາ​ຊົນ, ​ໂດຍ​ບັງ​ເອີນໄດ້​ສ້າງ​ເງື່ອນ​ໄຂ​ໃຫ້​ບັນ​ດາ​ອິດ​ທິ​ກຳ​ລັງ​ສັດ​ຕູ​ແກ່​ດຶງ​ປະ​ຊາ​ຊົນ​ເຂົ້າ​ຮ່ວມ. ​ໃນ​ຂະ​ບວນວິ​ວັດ​ການຫັນປະເທດເປັນອຸດສາຫະກຳ ທັນສະໄໝນັ້ນ, ຄຽງ​ຄູ່​ກັນ​ກັບ​ບັນ​ດາ​ດ້ານດີ​ທີ່​ຕັ້ງ​ໜ້າ ຍັງມີ​ຂໍ້​ເສຍ​ຂອງ​ການ​ພັດ​ທະ​ນາ​ ທີ່ບໍ່​ສາ​ມາດ​ແກ້​ໄຂ​ໄດ້​ໃນ "ມື້ໜຶ່ງຍາມດຽວ", ຄືການ​ສໍ້​ລາດ​ບັງຫຼວງ, ການ​ຟູ່ມ​ເຟືອຍ; ​ມົນ​ລະພິດສິ່ງ​ແວດ​ລ້ອມ; ການ​ສູນ​ເສຍ​ຄວາມ​ປອດ​ໄພຂອງ​​ອາ​ຫານ; ໄພ​ສັງ​ຄົມ; ອຸ​ບັດ​ເຫດ​ຈະລາ​ຈອນ..., ຍັງຄົງ​ເປັນຄວາມກັງວົນ​ຄົງ​ຢູ່​ໃນ​ປະ​ຊາ​ຊົນ​ທຸກ​ຊັ້ນ​ວັນ​ນະ ຊຶ່ງຈຳ​ເປັນຕ້ອງ​​ມີ​ການ​ເຂົ້າ​ຮ່ວມ​ຢ່າງ​ແຂງ​ແຮງ​ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມ ແລະ ບັນ​ດາ​ອົງ​ການຈັດ​ຕັ້ງ​ມະຫາຊົນ. ໃນ​ວຽກ​ງານຕິດ​ຕາມກວດ​ກາ ​ແລະ ວິ​ຈານ​ສັງ​ຄົ​ມ​ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມ ແລະ ບັນ​ດາ​ອົງ​ການ​ຈັດ​ຕັ້ງມະຫາຊົນ, ເບື້ອງ​ຕົ້ນ​ໄດ້​ຮັບ​ຜົນສຳ​ເລັດ​ທີ່​ດີ​ບາງ​ຢ່າງ, ແຕ່ຢ່າງ​ໃດ​ກໍ່ຕາມ, ຍັງ​ບໍ່ມີ​ກົນ​ໄກ​ໃນ​ການ​ຈັດການຢ່າງ​ມີ​ປະສິດທິ​ຜົນ​ກັບຄຳ​ແນະນຳຫຼັງ​ການຕິດຕາມກວດ​ກາ​ແລະວິ​ຈານ​ສັງ​ຄົມ; ການ​ເຂົ້າ​ຮ່ວມການກໍ່​ສ້າງ​ພັກ, ກໍ່​ສ້າງ​ອຳ​ນາດ​ການ​ປົກ​ຄອງ​ ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມ ແລະ ບັນ​ດາ​ອົງ​ການ​ຈັດ​ຕັ້ງ​ການ​ເມືອງ-ສັງ​ຄົມ ຕາມ​ຂໍ້​ຕົກ​ລົງ​ເລກ​ທີ 218-QĐ/TW, ລົງ​ວັນ​ທີ 12 ທັນ​ວາ 2013 ຂອງ​ກົມ​ການ​ເມືອງ, ວ່າ​ດ້ວຍ ການ​ປະ​ກາດ​ໃຊ້​ຂໍ້​ກຳ​ນົດ​ ກ່ຽວ​ກັບແນວ​ໂຮມ​ປະ​ເທດ​ຊາດ​ຫວຽດ​ນາມ, ບັນ​ດາ​ອົງ​ການ​ຈັດ​ຕັ້ງ​ການ​ເມືອງ-ສັງ​ຄົມ ແລະ ປະ​ຊາ​ຊົນ​ ເຂົ້າ​ຮ່ວມ​ໃນ​ການ​ປະ​ກອບ​ຄຳ​ຄິດ​ເຫັນ​ເພື່ອກໍ່​ສ້າງ​ພັກ, ກໍ່​ສ້າງ​ອຳ​ນາດ​ການ​ປົກ​ຄອງ”, ຍັງ​ບໍ່​ໄດ້​ຫັນ​ເປັນ​ນິຕິ​ກຳ​ຢ່າງ​ລະ​ອຽດ ດັ່ງ​ນັ້ນ​ປະ​ສິດ​ທິ​ຜົນ​ການຕິດຕາມກ​ວດ​ກາ​ແລະວິ​ຈານ​ສັງຄົມ​ຈຶ່ງ​ບໍ່​ສູງ.

2- ເພື່ອ​ສືບ​ຕໍ່​ເພີ່ມ​ທະ​ວີ​ກຸ່ມ​ກ້ອນ​ມະ​ຫາ​ສາ​ມັກ​ຄີ​ປວງ​ຊົນທັງ​ຊາດ​ໃນ​ໄລ​ຍະ​ເຊື່ອມ​ໂຍງ​ສາ​ກົນ​ປະ​ຈຸ​ບັນ, ແນວ​ໂຮມ​ປະ​ເທດ​ຊາດ​ຫວຽດ​ນາມ​ກຳ​ລັງ​​ພະ​ຍາ​ຍາມ​ພ້ອມ​ກັບ​ພັກ, ລັດ ແລະ ບັນ​ດາ​ອົງການ​ຈັດ​ຕັ້ງ​ການ​ເມືອງ-ສັງຄົມ ​ເພື່ອ​ປ່ຽນ​ແປງ​ໃໝ່​ກ່ຽວ​ກັບ​ເນື້ອ​ໃນແລະວິ​ທີ​ການ​ເຄື່ອນ​ໄຫວ ​ແນ​ໃສ່​ເພີ່ມ​ທ​ະ​ວີ​ການປັບ​ປຸງ ແລະເປີດກວ້າງ​ກຸ່ມ​ກ້ອນ​ມະ​ຫາ​ສາ​ມັກ​ຄີ ​ບົນ​ພື້ນ​ຖານ​ບັນ​ດາ​ໜ້າ​ທີ່​ອັນ​ລະ​ອຽດ​ລຸ່ມ​ນີ້:

ທີ​ໜຶ່ງ, ເປີດກວ້າງ​ກຸ່ມ​ກ້ອນ​ມະ​ຫາ​ສາ​ມັກ​ຄີ​ປວງ​ຊົນທັງ​ຊາດ ​ບົນ​ພື້ນ​ຖານ​ປະ​ສານ​ສົມ​ທົບ​ຢ່າງ​ຕັ້ງໜ້າ ຄົບ​ຊຸດ ​ກັບ​ລະ​ບົບ​ການ​ເມືອງ​ທັງ​ໝົດ ​ໃນ​ການເຂົ້າ​ຮ່ວມ​ການກໍ່​ສ້າງ​ແຜນ​ນະ​ໂຍ​ບາຍ ແນວ​ທາງ​ຂອງ​ພັກ, ນະ​ໂຍ​ບາຍ ກົດ​ໝາຍ​ຂອງ​ລັດ ​ແນໃສ່​ຫັນ​ເປັນນິຕິ​ກຳແລະຫັນ​ເປັນ​ລະ​ອຽດ ຕໍ່​ບັນ​ດາ​ທັດ​ສະ​ນະ, ແນວ​ທາງ, ນະ​ໂຍ​ບາຍ​ຂອງ​ພັກ​ແລະລັດ ກ່ຽວ​ກັບ​ນະ​ໂຍ​ບາຍ​ມະ​ຫາ​ສາ​ມັກ​ຄີ​ປວງ​ຊົນທັງ​ຊາດ; ຮັບ​ປະ​ກັນການ​ປະສົມ​ກົມ​ກຽວຂອງ​ຜົນ​ປະ​ໂຫຍດ​ຮ່​ວມ​ກັນ​ຂອງ​ທຸກຊົນ​ຊັ້ນ ຊັ້​ນ​ວັນ​ນະ​ໃນ​ສັງ​ຄົມ, ຄື​ຜົນ​ປະ​ໂຫຍດ​ສ່ວນ​ຕົວແລະຜົນ​ປະ​ໂຫຍດສ່ວນ​ລວມ; ຜົນ​ປະ​ໂຫຍດ​ຄອບ​ຄົວແລະຜົນ​ປະ​ໂຫຍດ​ສັງ​ຄົມ; ຜົນ​ປະ​ໂຫຍດ​ຊັນ​ຊັ້ນແລະຜົນ​ປະ​ໂຫ​ຍດຂອງ​ປະ​ເທ​ດ​ຊາດ; ຜົນ​ປະ​ໂຫຍດ​ແຫ່ງ​ຊາດແລະຜົນ​ປະ​ໂຫຍດ​ສາ​ກົນບົນ​ພື້ນ​ຖານ​ການ​ຖືເອົາ​ຜົນ​ປະ​ໂຫຍດ​ສັງ​ຄົມ​ແລະຜົນ​ປະ​ໂຫຍດ​ສ່ວນລວມ ສູງກວ່າ​ຜົນ​ປະ​ໂຫຍດ​ສ່ວນ​ຕົວ; ເຄົາ​ລົບ​ແລະ​ເຊີດ​ຊູ​ຜົນ​ປະ​ໂຫຍດ​ສ່ວນ​ຕົວ​​ເພື່ອແນໃສ່​ຮັບ​ປະ​ກັນ​ສິດ​ຜົນ​ປະ​ໂຫຍດ​ທີ່​​ຊອບ​ທຳ ຖືກ​ກົດ​ໝາຍ, ຕິດ​​ແໜ້ນ​ຜົນ​ປະ​ໂຫຍດກັບ ຄວາມ​ຮັບ​ຜິດ​ຊອບ​ແລະພັນ​ທະ​ຂອງ​ພົບ​ລະ​ເມືອງ​ແຕ່​ລະ​ຄົນ.

ພ້ອມກັນ​ນັ້ນ, ​ເຄົາລົບ​ຄວາມ​ແຕກ​ຕ່າງທີ່ບໍ່​ກົງ​ກັນ​ຂ້າມ​ກັບ​ຜົນ​ປະ​ໂຫຍດ​ລວມຂອງປະ​ເທດ​ຊາດ; ເສີມ​ຂະ​ຫຍາຍ​ບັນ​ດາ​ປັດ​​ໄຈ​ທີ່​ຄ້າຍ​ຄື​ກັນ, ພະ​ຍາ​ຍາມ​ຊອກ​ຫາ​ຕົ້​ນ​ສ່ວນ​ລວມ​ຂອງ​ທຸກ​ຊົນ​ຊັ້​ນ ທຸກຊັ້ນ​ວັນ​ນະ; ເຕົ້າ​ໂຮມ​ກຳ​ລັງ​ແຮງ​ຂອງບັນດາ​ພາກ​ສ່ວນ​ທີ່​ປະ​ກອບ​​ເປັນ​ປະ​ເທດ​ຊາດ ​ລວມ​ມີ​ປະ​ຊາ​ຊົນ​ດຳ​ລົງ​ຊີ​ວິດ​ແລະ​ທຳ​ມາ​ຫາ​ກິນ​ຢູ່​​ໃນປະ​ເທດແລະຕ່າງ​ປະ​ເທດ​ທຸດ​ຄົນ​ ທີ່​ມີ​ຕົ້ນ​ກຳ​ເນີດ​ເປັນ​ຄົນ​ຫວຽດ​ນາມ, ບໍ່​ຈຳ​ແນກ​​ຊົນ​ເຜົ່າ​ສ່ວນ​ໜ້ອຍຫຼືສ່ວນ​ໃຫຍ່, ເຊື່ອ​ຖືຫຼືບໍ່​ເຊື່ອ​ຖືສາ​ສະ​ໜາ; ບໍ່​ຈຳ​ແນກ​ຄົນ​ຮັ່ງ​ມີຫຼືຄົນ​ທຸກ​ຍາກ, ຍິງຫຼືຊາຍ, ເຖົ້າຫຼື​ໜຸ່ມ, ຖ້າ “ຜູ້​ໃດມີ​ຄວາມສາມາດ, ມີ​ຄຸນ​ສົມ​ບັດ, ມີ​ກຳ​ລັງ​ແຮງ, ມີ​ນ້ຳ​ໃຈ​ຮັບ​ໃຊ້​ປະ​ເທດ​ຊາດແລະຮັບ​ໃຊ້​ປະ​ຊາ​ຊົນ ​​ແມ່ນ​ເຮົາ​ສາ​ມັກ​ຄີກັບ​ເຂົາ(3) ຄື​ຄຳ​ສັ່ງ​ສອນ​ຂອງປະ​ທານໂຮ່​ຈິີມິນ, ແນໃສ່ເປົ້າ​ໝາຍກໍ່​ສ້າງ​ປະ​ເທດ​ຫວຽດ​ນາມ​ໃຫ້​ມີ​ສັນ​ຕິ​ພາບ, ເອ​ກະ​ລາດ, ເອ​ກະ​ພາບ, ຜືນ​ແຜ່ນ​ດິນ​ອັ​ນ​ຄົບ​ຖ້ວນ, ປະຊາຊົນຮັ່ງມີ, ປະ​ເທດ​ຊາດ​ເຂັ້ມ​ແຂງ, ມີປະຊາທິປະໄຕ ຍຸຕິທຳ ​ແລະ​ສີວິໄລ”​

ທີ​ສອງ, ປັບ​ປຸງ​ກຸ່ມ​ກ້ອນ​ມະ​ຫາ​ສາ​ມັກ​ຄີ​ປວງ​ຊົນທັງ​ຊາດ​ບົນ​ພື້ນ​ຖານ​ເສີມ​ຂະ​ຫຍາຍ​ປະ​ຊາ​ທິ​ປະ​ໄຕ, ຮັກ​ສາ​​ລະ​ບຽບວິ​ໄນ​ ​ກົດ​ໝາຍໃຫ້​ເຂັ້ມ​ງວດ ໃນ​​ທຸກ​ຂົງ​ເຂດຂອງ​ຊີ​ວິດ​ສັງ​ຄົມ ​ເພື່ອແນ​ໃສ່​ກໍ່​ສ້າງ​ກຸ່ມ​ກ້ອນ​ມະ​ຫາ​ສາ​ມັກ​ຄີ​ປວງຊົນທັງ​ຊາດ​ໃຫ້​ໝັ້ນ​ຄົງ​ຢ່າງ​ແທ້​ຈິງ. ແນວ​ໂຮມ​ປະ​ເທດ​ຊາດ​ຫວຽດ​ນາມ ແລະ ບັນ​ດາ​ອົງ​ການ​ຈັດ​ຕັ້ງ​ສະ​ມາ​ຊິກ ​ຕ້ອງ​ເປັນ ຂົວ​ຕໍ່ອັນ​ໝັ້ນ​ແກ່ນ​ລະ​ຫວ່າງ​ພັກ ລັດ ກັບ​ປະ​ຊາ​ຊົນ​ ເພື່ອ​ປະ​ຊາ​ຊົນ​ເຊື່ອ​ໝັ້​ນ, ເປັນ​ເຈົ້າ​ການ​ສ່ອງ​ແສງ, ປະ​ກອບ​ຄວາ​ມ​ຄິດ​ເຫັນ, ເຂົ້າ​ຮ່ວມ​ໃນ​ການ​ປຶກ​ສາ​ຫາ​ລື​ ບັນ​ດາ​ບັນ​ຫາ​ທີ່​ສຳ​ຄັນ​ຂອງ​ປະ​ເທ​ດ, ຮັບ​ປະ​ກັນ​ໃຫ້​ອຳ​ນາດ​​ລັດທັງ​ໝົດ​ແມ່ນ​ຂອງ​ປະ​ຊາ​ຊົນ.

ແນວ​ໂຮມ​ປະ​ເທດ​ຊາດ​ຫວຽດ​ນາມ​ຂັ້​ນ​ຕ່າງໆ​ຕ້ອງ​ເປັນ​ເຈົ້າ​ການ​ປະ​ສາ​ສົມ​ທົບ​ກັບ​ອຳ​ນາດ​ການ​ປົກ​ຄອງ​ ເພື່ອ​ແກ້​ໄຂ​ຢ່າງ​ເດັດ​ຂາດ ​ບັນ​ດາ​ບັນ​ຫາ​ສັງ​ຄົມ​ທີ່​ຮີບ​ຮ້ອນ, ຜົນ​ປະ​ໂຫຍດ​ອັນ​ຊອບ​ທຳ​ຂອງ​ປະ​ຊາ​ຊົນ​ບົນ​ພື້ນ​ຖານເຊື່ອ​ໃຈປະ​ຊາ​ຊົນ ​ແລະເຄົາ​ລົບ​ປະ​ຊາ​ຊົນ; ພ້ອມກັນ​ນັ້ນ​ກໍ່​ເຂົ້າ​ຮ່ວມ​ໃນ​ການກໍ່​ສ້າງ​, ປັບປຸງ​ບູ​ລະ​ນະ​ລະ​ບົບ​ກົດ​ໝາຍ ​ເພື່ອ​ຮັບ​ປະ​ກັນ​ໃຫ້​ປະ​ຊາ​ຊົນ​ເປັນ​ເຈົ້າ​ຂອງຢ່າງ​ແທ້​ຈິງ, ໄດ້​ສະ​ແດງ​ຄວາມ​ມຸ່ງ​ມາດ​ປາຖະໜາ​ຂອງ​ຕົນ​ເອງ ​ໂດຍ​ຜ່ານ​ແນວ​ໂຮມ​ປະ​ເທດ​ຊາດ​ຫວຽດ​ນາມ ແລະ ບັນ​ດາ​ອົງ​ການ​ຈັດ​ຕັ້ງ​ປະ​ຊາ​ຊົນ. ເສີມ​ຂະ​ຫຍາຍ​ບົດບ​າດຂອງ​ປະ​ຊາ​ຊົນ​ໃນ​ການກໍ່​ສ້າງ​ພັກ, ອຳ​ນາດ​ການ​ປົກ​ຄອງ​ໃຫ້​ເຂັ້ມ​ແຂງ, ສ້າງ​ຄວາມ​ເປັນ​ເອ​ກະ​ພາບ​​ທາງ​ສັງ​ຄົມ, ລະດົມຂົນ​ຂວາຍ​ປະ​ຊາ​ຊົນ​ເພື່ອ​ແກ້​ໄຂ​ຄວາມ​ຫຍຸ້ງ​ຍາກ, ເຊື່ອ​ໝັ້​ນ, ຕັ້ງ​ໝັ້ນ​ໃນ​ແນວ​ທາງການ​ປ່ຽນ​ແປງ​ໃໝ່​ ໂດຍ​ພັກ​ເປັນ​ຜູ້​ນຳ​ພາ, ພາ​ໃຫ້​ປະ​ເທດ​ຊາດພັດ​ທະ​ນາ.

ທີ​ສາມ, ເພີ່ມ​ທະ​ວີ​ບົດ​ບາດຕິດ​ຕາມກວດກ​າ​ແລະວິ​ຈານ​ສັງ​ຄົມ ​ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມແລະບັນ​ດາ​ອົງ​ການ​ຈັດ​ຕັ້ງມະຫາຊົນ​ ບົນ​ພື້ນ​ຖານ​ປະ​ຕິ​ບັດ​ເປັນ​ຢ່າງ​ດີ ​ການ​ພົວ​ພັນ​ປະ​ສານ​ສົມທົບ​ການ​ຕິດຕາມ​ກວດກາ ​ລະ​ຫວ່າງການກວດ​ກາ ຕິດ​ຕາມ​ຂອງ​ພັກ, ການຕິດ​ຕາມກວດ​ກາ ກວດ​ການ ກວດ​ສອບ​ບັນ​ຊີ​ຂອງ​ລັດ ແລະ ການ​ຕິດ​ຕາມກວດກາ​ສັງ​ຄົມ​ຂອງ​ແນວ​ໂຮມ​ປະ​ເທດ​ຊາດ​ຫວຽດ​ນາມ ແລະ ບັນ​ດາ​ອົງ​ການ​ຈັດ​ຕັ້ງມະຫາຊົນ ​ເພື່ອ​ສ້າງ​ຄວາມ​ເປັນ​ໃຈ ຄວາມເຫັນ​ດີ​ເຫັນ​ພ້ອມ​ສູງ, ຄວາມໝັ້ນຄົງ​ທາງ​ສັງ​ຄົມ, ການພັດ​ທະ​ນາ​ຮອບ​ດ້ານແລະຍືນ​ຍົງ​ຂອງປະ​ເທດຊາດ.

ແນວ​ໂຮມ​ປະ​ເທດ​ຊາດ​ຫວຽດ​ນາມ​ຕ້ອງ​ເປັນ​​ເຈົ້າ​ພາບ​ທີ່​ຕັ້ງ​ໜ້າ​​ໃນ​ການເສີມ​ຂະ​ຫຍາຍ​ບົດ​ບາດ​ຂອງ​ໜັງ​ສື​ພິມແລະປະ​ຊາ​ຊົນ​ ໃນ​ການ​ຈັດ​ຕັ້ງ​ເອົາ​ຄວາມ​ຄິດ​ເຫັນ​ປະ​ກອບ​ສ່ວນ​ເຂົ້າ​ໃນ​ແຜນ​ນະ​ໂຍ​ບາຍ ນະ​ໂຍ​ບາຍ​ຂອງ​ພັກ ແລະຂອງຄະ​ນະ​ພັກ, ອຳ​ນາດ​ການ​ປົກ​ຄອງ​ທ້ອງ​ຖິ່ນຕ່າງໆ, ​ໂດຍ​ສະ​ເພາະ​ແມ່ນ​ບັນ​ດາ​ບັນ​ຫາ​ທີ່​ສຳ​ຄັນ, ພົວ​ພັນ​ໂດຍ​ກົງ​ເຖິງ​ສິດແລະ​ຜົນ​ປະ​ໂຫຍດ​ອັນ​ຊອບ​ທຳ ​ຂອງ​​ປະ​ຊາ​ຊົນ. ແນວ​ໂຮມ​ປະ​ເທດ​ຊາດ​ຫວຽດ​ນາມ​ສືບ​ຕໍ່​ເຮັດ​​ເປັນ​ຢ່າງ​ດີ​ ບົດ​ບາດ​ເປັນ​ປະ​ທານ​ການ​ປະ​ຊຸມ​ເຈ​ລະ​ຈາ, ແບ່ງວຽກ, ປະ​ສານ​ສົມ​ທົບ​ບັນ​ດາ​ອົງ​ການ​ສະ​ມາ​ຊິກ​ ໃນ​ການ​ປະ​ຕິ​ບັດການຕິດຕາມ​ກວດ​ກາແລະວິ​ຈານ​ສັງ​ຄົມ; ປຸກ​ລະ​ດົມ​ບັນ​ດາ​ນັກ​ວິ​ທະ​ຍາ​ສາດ​ແລະ​ຜູ້​ຊ່ຽວ​ຊານນຳ​ໜ້າ​ຂະ​ແໜງ​ການຕ່າງໆ ​ເພື່ອ​ເອົາຄວາມຄິດ​ເຫັນ​ວິ​ຈານ​ແລະປະ​ກອບສ່ວນ​ເຂົ້າ​ໃນ​ການປັ​ບ​ປຸງ​ເພີ່ມ​ເຕີມ​ເອ​ກະ​ສານ, ບູ​ລະ​ນະ​​ແຜນ​ນະ​ໂຍ​ບາຍ ນະ​ໂຍ​ບາຍ​ຂອງ​ພັກ, ລັດ​ໃຫ້​ສອດຄ່ອງ​ກັບ​ສິດແລະຜົນ​ປະ​ໂຫຍດ​ອັນ​ຊອບ​ທຳ​ຂອ​ງ​ປະ​ຊາ​ຊົນ.

ທີສີ່, ເສີມຂະຫຍາຍບົດບາດຂອງແນວໂຮມປະເທດຊາດຫວຽດນາມຂັ້ນຕ່າງໆໃນວຽກງານໂຄສະນາ, ຂົນຂວາຍພະນັກງານ, ສະມາຊິກພັກ, ລັດຖະກອນ ແລະປະຊາຊົນ​ ​ໃຫ້ຕັ້ງໜ້າເຂົ້າຮ່ວມໃນການຕໍ່ສູ້ກີດກັ້ນ​ແລະຕ້ານ​ການສໍ້ລາດບັງຫຼວງ; ສ້າງວັດທະນະທຳການປະຢັດ, ຕ້ານການສໍ້ລາດບັງຫຼວງ, ການຟູ່ມເຟືອຍໃນຖັນແຖວພະນັກງານ, ສະມາຊິກພັກ ບົນພື້ນຖານຕ້ອງຍອມຮັບການຕິດຕາມກວກ​ກາ​ຢ່າງແໜ້ນແຟ້ນຂອງປະຊາຊົນ, ເສີມຂະຫຍາຍບົດບາດເປັນແບບຢ່າງຂອງຜູ້ເປັນຫົວໜ້າຄະນະພັກ, ສຳນັກງານອົງການ, ອົງການຈັດຕັ້ງ, ກົມກອງ ທີ່ດຳລົງຊີວິດ​ຢູ່​ເຂດຊຸມ​ຊົນ. ສືບຕໍ່ເສີມຂະຫຍາຍບົດບາດຂອງບັນດາຄະນະ​ເຮັດວຽກງານແນວໂຮມ, ຄະນະກວດກາ​​ປະຊາຊົນ, ຄະນະຕິດຕາມ​ກວດກາການລົງທຶນຂອງຊຸມຊົນເພື່ອກວດກາ, ຕິດຕາມກວດກາບັນດາໂຄງການ, ​ແຜນ​ງານ​ທີ່ປະຊາຊົນເປັນຜູ້ຊົມໃຊ້​​ໂດຍກົງ, ປະກອບສ່ວນຫຼຸດຜ່ອນຄວາມຫຍໍ້ທໍ້, ສໍ້ລາດບັງຫຼວງຢູ່ຮາກຖາ. ແນວໂຮມປະເທຊາດຫວຽດນາມຂັ້ນຕ່າງໆ ແລະບັນດາອົງການຈັດຕັ້ງ​ມະຫາຊົນ​ ຕ້ອງເພີ່ມທະວີປະສິດທິຜົນອງວຽກງານໂຄສະນາ ເພື່ອ​ໃຫ້ປະຊາຊົນທຸຊົນຊັ້ນຮັບຮູ້ຢ່າງຈະແຈ້ງກ່ຽວ​ກັບເລ່​ກົນ​ທີ່ໂຫດຫ້ຽມຂອງບັນດາອິດທິກຳລັງສັດຕູທີ່ສວຍໃຊ້​​ຂໍ້​ບົກພ່ອ, ຂໍ້ຈຳກັດ, ຄວາມເຜີຕົວຂອງພະນັກງານ, ສະມາຊິກພັກພາກສ່ວນໜຶ່ງຢູ່ບາທ້ອງຖິ່ນ, ສວຍໃຊ້ນ້ຳໃຈຮັກຊາດຂອງມະຫາຊົພາກສ່ວນໜຶ່ງ ເພື່ອຍຸຍົງ​ສົ່ງ​ເສີມ, ເສດສັນປັ້ນແຕ່ງ, ທຳລາຍພາລະກິດມະຫາສາມັກຄີ​ປວງ​ຊົນ​ທັງຊາດ./.

​ໂດຍ ປອ. ເຈິ່ນ​ແທງ​ເໝິນ

ເລ​ຂາ​ທິ​ການສູນ​ກາງ​ພັກ,

ປະ​ທານ​ຄະ​ນະ​ກຳ​ມະ​ການ​ສູນ​ກາງແນວ​ໂຮມ​ປະ​ເທດ​ຊາດ​ຫວຽດ​ນາມ

--------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 917 (​ເດືອນມີ​ນາ2019).

(1), (2) ​ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XII, ຫ້ອງ​ວ່າການ​ສູນ​ກາງ​ພັກ, ຮ່າ​ໂນ້ຍ, 2016, ໜ້າ 156 - 157, 153.

(3) ໂຮ່ຈີ​ມິນ: ນິພົນ​ຄົບ​ຊຸດ, ສພຈ. ການ​ເມືອງ​ແຫ່ງ​ຊາດ-ຊື້​ເທິ​ດ, ຮ່າ​ໂນ້ຍ, 2011, ​ເຫຼັ້ມ 9, ໜ້າ 244.

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ