ວັນອັງຄານ, 22/10/2019
ວ່າດ້ວຍຍຸດທະສາດການພັດທະນາພະລັງງານແຫ່ງຊາດ ຂອງຫວຽດນາມ ຮອດປີ 2025, ກຳນົດທິດຮອດປີ 2035
16/1/2019 10:16' ສົ່ງ ພິມ
ພາບປະກອບ (ພາບ: TTXVN)

ເສດຖະກິດຫວຽດນາມ​ໄດ້​ມີ​ການ​ປ່ຽນ​ແປງ​ຢ່າງ​ໄວວາ​ໃນ​ສອງ​ສາມ​ທົດ​ສະ​ວັດ​ທີ່​ຜ່ານ​ມາ, ລວມຍອດ​ຜະລິດ​ຕະພັນ​ພາຍ​ໃນ​ປະ​ເທດ (GDP - ຈີ​ດີ​ພີ) ຕໍ່​ຫົວ​ຄົນ​ເພີ່ມ​ຂຶ້ນ, ຈາກ 114 ​ໂດ​ລາ​ສະຫະລັດ ​ໃນ​ປີ 1990 ຂຶ້ນ​ເປັນ 2.385 ໂດ​ລາ​ສະຫະລັດ​ໃນ​ປີ 2017. ຫວຽດນາມ​ຢູ່​ໃນ​ຖັນ​ແຖວ​ບັນດາ​ປະ​ເທດ​ທີ່​ມີ​ລາຍ​ໄດ້​ປານ​ກາງ. ສຳລັບ​ຂົງ​ເຂດພະລັງງານ, ນີ້​ແມ່ນ​ຂະ​ບວນວິວັດ​ການ​ຫັນປ່ຽນ​ຈາກ​ພື້ນຖານ​ເສດຖະກິດ​ກະສິກຳທີ່​ການນຳ​ໃຊ້​ພະລັງງານສ່ວນ​ໃຫຍ່​ອີງ​ໃສ່​ເຊື້ອ​ໄຟ​ຊີວະ​ມວນ ມາ​ເປັນ​ພື້ນຖານ​ເສດຖະກິດ​ທີ່​ນຳ​ໃຊ້ບັນດາຮູບ​ແບບ​ພະລັງງານ​ທີ່​ທັນ​ສະ​ໄໝ​ແລະ​ສັງ​ເຄາະ.

ຫວຽດນາມ​ມີ​ແຫຼ່ງພະລັງງານປະຖົມ​ພູມຫຼາຍ​ຢ່າງ​ຢູ່​ໃນ​ປະ​ເທດ​ຄຶ, ນ້ຳມັນ​ດິບ, ຖ່ານ​ຫີນ, ກ໊າຊ, ​ໄຟຟ້າ​ນ້ຳຕົກ ​ແລະ ພະລັງງານທີ່​ບໍ່​ແມ່ນ​ການ​ຄ້າ (ພະລັງງານ​ທີ່​ໃຊ້​ໃນ​ຊີວິດ​ເຊັ່ນ ຟືນ, ສິ່ງ​ເສດ​ເຫຼື້ອ​ຈາກ​ການ​ຜະລິດ​ກະສິກຳ, ຂີ້​ເຫຍື້ອ) ​ແມ່ນ​ບັນດາ​ແຫຼ່ງພະລັງງານທີ່​ໄດ້​ຂຸດ​ຄົ້ນ​ຢູ່​ໃນ​ປະ​ເທດ. ​ໃນ​ຊຸມ​ປີ​ທີ່​ຜ່ານ​ມາ​ມໍ່​ນີ້, ລວມຍອດພະລັງງານທີ່​ຂຸດ​ຄົ້ນ​ໄດ້​ມີ​ທ່າ​ອຽງ​ທີ່ຈະ​ໝັ້ນຄົງ, ຕົ້ນຕໍ​ແມ່ນ​ຍ້ອນການ​ຂຸດ​ຄົ້ນ​ບໍ່​ແຮ່​ທີ່​ເປັນ​ຜະ​ລິດ​ຕະພັນ​ການ​ຄ້າບໍ່​ມີ​ການ​ເພີ່ມ​ຂຶ້ນ​ຫຼາຍ​ທາງ​ດ້ານ​ປະລິມານ. ດ້ວຍ​ການ​ເພີ່ມ​ຂຶ້ນ​ສູງ​ຂອງ​ຄວາມຕ້ອງການ​ກ່ຽວ​ກັບພະລັງງານ​ປະຖົມ​ພູມ​ທີ່​ຮັບ​ໃຊ້​ໃຫ້​ແກ່​ການ​ພັດທະນາ​ເສດຖະກິດ, ຮັບປະກັນ​ຄວາມ​ປອດ​ໄຟ​ດ້ານ​ພະລັງງານ, ຫວຽດນາມ​ໄດ້​ກາຍ​ເປັນ​ປະ​ເທດ​ນຳ​ເຂົ້າພະລັງງານນັບ​ແຕ່​ປີ 2015.

ລວມຍອດ​ການ​ສະໜອງພະລັງງານປະຖົມ​ພູມ​ຂອງ​ຫວຽດນາມ​ໃນ​ປີ 2015 ​ແມ່ນ 70,6 ລ້ານ​ໂຕນທຽບ​ເທົ່າ​ນ້ຳມັນ (TOE - Ton of Oil Equivalent), ​ໃນ​ນັ້ນພະລັງງານການ​ຄ້າ​ກວມ​ເອົາ 83,1% ​ແລະ ພະລັງງານທີ່​ບໍ່​ແມ່ນ​ການ​ຄ້າ​ກວມ 16,9% ​ໃນ​ການ​ໃຊ້ພະລັງງານປະຖົມ​ພູມ​ທັງ​ໝົດ. ອັດຕາ​ສ່ວນ​ພະລັງງານ​ຊີວະ​ມວນ​ທີ່​ບໍ່​ແມ່ນ​ການ​ຄ້າ​ໃນການ​ສະໜອງພະລັງງານປະຖົມ​ພູມ​ທັງ​ໝົດ​ໄດ້​ຫຼຸດ​ລົງ​ຢ່າງ​ຫຼາຍ, ຈາກ 44,2% (ປີ 2000) ລົງ​ເປັນ 16,9% (ປີ 2015). ອັດຕາ​ສ່ວນ​ຫຼຸດ​ລົງ​ນັ້ນ​ແມ່ນ​ຍ້ອນພະລັງງານຊີ​ວະ​ມວນ​ທີ່​ບໍ່​ແມ່ນ​ການ​ຄ້າ​ໄດ້​ຖືກ​ປ່ຽນ​ແທນ​ເທື່ອ​ລະ​ກ້າວດ້ວຍພະລັງງານການ​ຄ້າ​ປະ​ເພດ​ຕ່າງໆ. ການ​ປ່ຽນ​ໄປ​ໃຊ້​ພະລັງງານ​ຟອດຊິນໄດ້​ແລະ​ພວມ​ເພີ່ມ​ການ​ປ່ອຍ​ກ໊າຊທີ່​ກໍ່​ໃຫ້​ເກີດ “ປະກົດ​ການ​ເຮືອນ​ແກ້​ວ”.

ລັດຖະບານ​ຍາມ​ໃດ​ກໍ່​ຖື​ວ່າການ​ເຕີບ​ໂຕ​ເສດຖະກິດ​ເປັນ​ບຸລິມະສິດສຳຄັນ​ທີ່​ສຸດ, ​ແຕ່​ບັນດາ​ແຜນ​ຍຸດ​ທະ​ສາດ​ຂອງ​ລັດຖະບານ​ລ້ວນ​ແຕ່​ເນັ້ນ​ໜັກ​ວ່າ ການ​ເຕີບ​ໂຕ​ເສດຖະກິດ​ຕ້ອງຂະໜານ​ກັນ​ກັບ​ການ​ພັດທະນາ​ແບບ​ຍືນ​ຍົງ, ຕິດ​ແໜ້ນ​ກັບຄວາມ​ຍຸຕິ​ທຳ​ແລະ​ການ​ເຂົ້າກັນ​ກັບ​ສັງຄົມ. ​ໃນ​ສະພາບ​ການ​ເພີ່ມ​ທະວີ​ການ​ເຊື່ອມ​ໂຍງ​ສາກົນ​ແລະ​ແຜນ​ນະ​ໂຍບາຍພັດທະນາ​ຂະ​ແໜງ​ການພະລັງງານຕາມ​ທິດ​ຕະຫຼາດ, ຮັບປະກັນ​ການ​ສະໜອງພະລັງງານ​ຢ່າພຽງພໍ, ໝັ້ນຄົງ​ແລະ​ປອດ​ໄພ ​ໃຫ້​ແກ່​ຄວາມ​ຕ້ອງການ​ຕ່າງໆ​ຂອງ​ການ​ພັດທະນາ​ເສດຖະກິດ-ສັງຄົມ, ການ​ກໍ່ສ້າງຍຸດ​ທະ​ສາດການ​ພັດທະນພະລັງງານ​ແຫ່ງ​ຊາດ​ຂອງ​ຫວຽດນາມ​ໃນ​ໄລຍະ​ຮອດປີ 2025, ກຳນົດ​ທິດ​ຮອດ​ປີ 2035 ​ແມ່ນ​ຈຳ​ເປັນ​ທີ່​ສຸດ​ທາງ​ດ້ານ​ນິຕິ​ທຳ, ວິ​ໄສ​ທັດ​ກວມ​ລວມ ​ແລະ ຕອບ​ສະໜອງ​ບັນດາ​ເປົ້າ​ໝາຍ​ການ​ພັດທະນາ​ເສດ​ຖະກິດ-ສັງ​ຄົມ-ສະພາບ​ແວດ​ລ້ອມ.

​ແຜນ​ແມ່​ບົດ​ການ​ພັດທະນາພະລັງງານ​ແຫ່ງ​ຊາດ​ໄລຍະ 2016 - 2025, ກຳນົດ​ທິດ​ຮອດ​ປີ 2035

ກະຊວງ​ອຸດສາຫະກຳ​ການ​ຄ້າ​ໄດ້ຂຽນ​ໃບ​ສະ​ເໜີ​ສະບັບ​ທີ 12005/TTr-BCT, ວັນ​ທີ 21-12-2017, ​ເພື່ອ​ສະ​ເໜີ​ໃຫ້​ນາຍົກລັດຖະມົນຕີອະນຸມັດ​ໂຄງການ ​ແຜນ​ແມ່​ບົດ​ການ​ພັດທະນາ​ພະລັງງານ​ແຫ່ງ​ຊາດ​ໄລຍະ 2016 - 2025, ກຳນົດ​ທິດ​ຮອດ​ປີ 2035 ດ້ວຍ​ບັນດາ​ທັດສະນະ​ແລະ​ເປົ້າ​ໝາຍ​ການ​ພັດທະນາພະລັງງານ​ຫວຽດນາມ​ຮອດ​ປີ 2025, ກຳນົດ​ທິດ​ຮອດ​ປີ 2035 ຄື​ດັ່ງ​ນີ້:

ກ່ຽວ​ກັບ​ທັດສະນະ​ການພັດທະນາ:

ທີ​ໜຶ່ງ, ພັດທະນາລະບົບພະລັງງານກວມ​ລວມ​ໃຫ້​ດີ​ສຸດ ​ເພື່ອ​ແນ​ໃສ່​ສະໜອງ​ພະລັງງານ​ຢ່າງ​ພຽງພໍ​ແລະ​ຮັບປະກັນ​ຄວາມ​ປອດ​ໄພ​ດ້ານ​ພະລັງງານ ຕອບ​ສະໜອງ​ຄວາມ​ຕ້ອງການ​ພັດທະນາ​ເສດຖະກິດ-ສັງຄົມ. ທີ​ສອງ, ນຳ​ໃຊ້​ແຫຼ່ງພະລັງງານປະຖົມພູມຢ່າງ​ມີ​ປະສິດທິ​ຜົນ​ເພື່ອ​ອະນຸລັກ​ແຫຼ່ງຊັບພະຍາ​ການພະລັງງານ​ໃນ​ປະ​ເທດ​ ສົມທົບ​ກັບ​ການ​ນຳ​ເຂົ້າພະລັງງານຢ່າງ​ສົມ​ເຫດ​ສົມ​ຜົນ ​ແນ​ໃສ່​ເຮັດ​ໃຫ້ການ​ສະໜອງພະລັງງານກາຍ​ເປັນ​ຫຼາກ​ຫຼາຍ​ຊະນິດ. ທີ​ສາ​ມ, ຍູ້​ແຮງການ​ເຄື່ອນ​ໄຫວ​ນຳ​ໃຊ້ພະລັງງານຢ່າງມີ​ປະສິດ​ທີ​ຜົນ ​ແລະ ສົ່ງ​ເສີມ​ພັດທະນາ​ບັນດາ​ແຫຼ່ງພະລັງງານໝູນວຽນ​ແນ​ໃສ່​ຮັບປະກັນ​ຄວາມ​ປອດ​ໄພ​ດ້ານພະລັງງານ​ແຫ່ງ​ຊາດ, ອະນຸລັກຊັບພະຍາກອນພະລັງງານ ​ແລະ ຫຼຸດຜ່ອນ​ການ​ກະທົບດ້ານ​ລົບ​ເຖິງ​ສະພາບ​​ແວດ​ລ້ອມ​ໃນ​ການ​ເຄື່ອນ​ໄຫວພະລັງງານ. ທີ​ສີ່, ພັດທະນາບັນດາ​ຕະຫຼາດພະລັງງານ​ທີ່​ມີ​ການ​ແຂ່ງຂັນຕາມ​ແຜນ​ງານ ​ແນ​ໃສ່​ເຮັດ​​ໃຫ້ມີ​ຄວາມ​ຫຼາກ​ຫຼາຍ​ໃນ​ແບບ​ວິທີ​ການ​ລົງທຶນແລະທຸລະ​ກິດພະລັງງານ, ພ້ອມ​ກັນ​ນັ້ນ​ກໍ່​ເພີ່ມ​ປະສິດທິ​ຜົນ​​ໃນ​ການ​ເຄື່ອນ​ໄຫວຂອງບັນດາ​ລະບົບການ​ສະໜອງ​ແລະ​ນຳ​ໃຊ້ພະລັງງານ. ທີ​ຫ້າ, ຍົກ​ສູງ​ຄຸນ​ນະພາ​ບຂອງ​ການ​ບໍລິການພະລັງງານ​ເທື່ອ​ລະ​ກ້າວ. ປະຕິບັດ​ລາຄາ​ຂອງ​ຜະລິດ​ຕະພັນພະລັງງານຕາມ​ກົນ​ໄກ​ຕະຫຼາດ ​ແນ​ໃສ່​ສົ່ງ​ເສີມ​ການ​ລົງທຶນ​ພັດທະນາພະລັງງານສະອາດ ​ແລະ ຊຸກຍູ້​ການ​ເຄື່ອນ​ໄຫວພະລັງງານຢ່າງ​ປະຢັດ​ແລະ​ມີ​ປະສິດທິຜົນ. ທີ​ຫົກ, ປັບປຸງ​ບູລະນະ​ນະ​ໂຍບາຍພະລັງງານ​ເທື່ອ​ລະ​ກ້າງ ​​ເພື່ອ​ຮັບປະກັນ​ພັດທະນາພະລັງງານ​ແບບ​ຍືນ​ຍົງ ​ແລະ​ບັນລຸ​​ບັນດາ​ເປົ້າ​ໝາຍ​ການ​ພັດທະນາ.

ກ່ຽວ​ກັບ​ເປົ້າ​ໝາຍ​ການ​ພັດທະນາ:

- ​ເປົ້າ​ໝາຍ​ກວມ​ລວມ: ລະດົມ​ທຸກ​ແຫຼ່ງພະລັງ​ໃນ​ປະ​ເທດ​ແລະ​ຕ່າງປະ​ເທດ​ໃຫ້​ແກ່​ການພັດທະນາ​ພະລັງງານ ​ເພື່ອ​ຮັບປະກັນ​ການ​ສະໜອງພະລັງງານຢ່າງ​ພຽງພໍ ດ້ວຍ​ຄຸນ​ນະພາ​ບນັບ​ມື້​ນັບ​ສູງ​ແລະ​ລາຄາ​ສົມ​ເຫດ​ສົມ​ຜົນ ​ໃຫ້​ແກ່​ການ​ພັດທະນາ​ເສດຖະກິດ-ສັງຄົມຂອງ​ປະ​ເທດ; ນຳ​ໃຊ້ຄວາມ​ຫຼາກ​ຫຼາຍ​ແລະ​ສົມ​ເຫດ​ສົມ​ຜົນ​ຂອງ​ແຫຼ່ງພະລັງງານປະຖົມ​ພູມ​ໃນ​ປະ​ເທດ​ແລະ​ຕ່າງປະ​ເທດ; ຍູ້​ແຮງ​ການ​ເຄື່ອນ​ໄຫວ​ນຳ​ໃຊ້ພະລັງງານຢ່າ​ມີ​ປະສິດທິ​ຜົນ ​ແລະ ສົ່ງ​ເສີມ​ການ​ພັດທະນາ​ບັນດາ​ແຫຼ່ງພະລັງງານໝູນວຽນ ​ເພື່ອ​​ແນ​ໃສ່​ປະກອບສ່ວນ​ຮັບປະກັນ​ຄວາມ​ປອດ​ໄພ​ດ້ານພະລັງງານ, ຫຼຸດຜ່ອນການ​ເພິ່ງ​ພາພະລັງງານນຳ​ເຂົ້າ, ຫຼຸດຜ່ອນ​ການ​ປ່ຽນ​ແປງ​ສະພາບ​ອາກາດ, ​ເພີ່ມ​ທະວີ​ການ​ປົກ​ປັກ​ຮັກສາ​ສະພາບ​ແວດ​ລ້ອມ ​ແລະ ບັນລຸ​ບັນດາ​ເປົ້າ​ໝາຍ​ການ​ພັດທະນາພະລັງງານ - ​ເສດຖະກິດ - ສັງຄົມ​ແບບ​ຍືນ​ຍົງ; ກໍ່ສ້າງ​ເທື່ອ​ລະ​ກ້າວ​ບັນດາ​ຕະຫຼາດພະລັງງານ​ທີ່​ມີ​ການ​ແຂ່ງຂັນ ​ແນ​ໃສ່​ເພີ່​ມປະສິດທິ​ຜົນ​ຂອງ​ການ​ເຄື່ອນ​ໄຫວ ​ແລະ​ສົ່ງ​ເສີມ​ການ​ລົງທຶນພັດທະນາ​ພະລັງງານ​ສະອາດ.

- ບັນດາ​ເປົ້າ​ໝາຍ​ລະອຽດ: 1- ຕອບສະໜອງ​ຢ່າງ​ພຽງພໍ​ໃຫ້​ແກ່ຄວາມ​ຕ້ອງການ​ພະລັງງານຮູບ​ແບບ​ຕ່າງ​ໆໃນ​ປະ​ເທດ, ຕອບ​ສະໜອງ​ເປົ້າ​ໝາຍ​ການ​ພັດທະນາ​ເສດຖະກິດ-ສັງຄົມຂອງ​ທົ່ວ​ປະ​ເທດ ດ້ວຍ​ລະດັບ​ການ​ເຕີບ​ໂຕ ຈີ​ດີ​ພີ ສະ​ເລ່ຍປະມານ 7% ຕໍ່​ປີ​ໃນ​ໄລຍະ 2016 - 2035. 2- ລວມຍອດ​ການ​ສະໜອງພະລັງງານປະຖົມ​ພູມ​ໃນ​ປີ 2025 ​ແມ່ນ​ປະມານ 137 ລ້ານ​ໂຕນຫາ 147 ລ້ານ​ໂຕນ​ທຽບ​ເທົ່າ​ນ້ຳມັນ; ປີ 2035: 218 ລ້ານ​ໂຕນ​ຫາ 238 ລ້ານ​ໂຕນ. ລວມຍອດ​ການ​ໃຊ້​ພະລັງງານຂັ້ນ​ສຸດ​ທ້າຍ​ປີ 2025 ​ແມ່ນ​ປະມານ 83 ລ້ານ​ໂຕນ​ຫາ 89 ລ້ານ​ໂຕນ; ປີ 2035: 121 ລ້ານ​ໂຕນ​ຫາ 135 ລ້ານ​ໂຕນ. 3- ກໍ່ສ້າງ​ບັນດາ​ພື້ນຖານ​ກັ່ນ​ຕອງ​ນ້ຳມັນ ​ເພື່ອ​ຮັບປະກັນ​ຕອບສະໜອງ​ໄດ້​ຢ່າງ​ໜ້ອຍ​ສຸດ​ແມ່ນ 70% ຂອງ​ຄວາມ​ຕ້ອງການ​ພາຍ​ໃນ​ປະ​ເທດ​ໃນ​ປີ 2035. ​ການ​ສຳຮອງກ່ຽວ​ກັບ​ນ້ຳມັນ​ດິບ​ແລະບັນດາ​ຜະລິດ​ຕະພັນ​ປິ​ໂຕ​ລຽມ ບັນລຸ 90 ວັນ​ຂອງ​ການ​ນຳ​ເຂົ້າ​ສຸດທິ​ໃນ​ປີ 2020. 4- ການນຳໃຊ້ພະລັງງານຢ່າງ​ປະຢັດ​ແລະ​ມີ​ປະສິດທິ​ຜົນ: ອັດຕາ​ສ່ວນ​ການ​ປະຢັດ ຂອງລວມຍອດ​ການ​ໃຊ້​ພະລັງງານຂັ້ນ​ສຸດ​ທ້າຍ ທຽບ​ກັບສະຖານະ​ການ​ການ​ພັດທະນາປົກກະຕິ​ຮອດ​ປີ 2025 ບັນລຸ 6% ​ແລະ​ຮອດ​ປີ 2035 ບັນລຸ 10%. 5- ຊຸກຍູ້​ການພັດທະນາ​ພະລັງງານ​ໝູນວຽນ: ​ຮອດ​ປີ 2025 ໄຟຟ້າ​ນ້ຳຕົກ​ຂະໜາດ​ນ້ອຍບັນລຸ 5.400MW, ​ໄຟຟ້າ​ຈາກ​ລົ​ມ 2.300MW, ​ໄຟຟ້າ​ຈາກແສງ​ແດດ 6.000MW, ​ໄຟຟ້າ​ຊີວະ​ມວນ 1.200MW; ກຳນົດ​ທິດ​ຮອດ​ປີ 2035  ໄຟຟ້າ​ນ້ຳຕົກ​ຂະໜາດ​ນ້ອຍບັນລຸ 7.000MW, ໄຟຟ້າ​ຈາກ​ລົ​ມ 12.400MW, ​ໄຟຟ້າ​ຈາກແສງ​ແດດ 41.000MW, ໄຟຟ້າ​ຊີວະ​ມວນ 3.800MW. 6- ຫຼຸດຜ່ອນຜົນ​ກະທົບ​ຂອງ​ການ​ປ່ຽນ​ແປງ​ສະພາບ​ອາກາດ​ໃນ​ການ​ພັດທະນາພະລັງງານ: ຫຼຸດຜ່ອນ​ການ​ປ່ອຍ​ອາຍ CO2 ຈາກ​ການ​ເຄື່ອນ​ໄຫວພະລັງງານທຽບ​ກັບສະຖານະ​ການ​ການ​ພັດທະນາ​ປົກກະຕິ 12% ​ໃນ​ປີ 2025, ບັນລຸ 15% ​ໃນ​ປີ 2030 ​ແລະ 18% ​ໃນ​ປີ 2035. 7- ສືບ​ຕໍ່​ປະຕິບັດ​ແຜນ​ງານ​ພັດທະນາ​ຕະຫຼາດ​ໄຟຟ້າ; ພັດທະນາ​ຕະຫຼາດ​ຈຳໜ່າຍອາຍ​ກ໊າຊຕາມ​ກົນ​ໄກ​ຕະຫຼາດທີ່​ມີ​ການ​ດັດປັບ​ຂອງ​ລັດ.

ຍຸດ​ທະ​ສາດ​ການ​ພັດທະນາພະລັງງານ​ແຫ່ງ​ຊາດ​ຂອງ​ຫວຽດນາມ

ບົນ​ພື້ນຖານ​ບັນດາ​ທັດສະນະ​ແລະ​ເປົ້າ​ໝາຍທີ່​ກ່າວ​ມາ​ເທິງ​ນີ້, ຫວຽດນາມ​ໄດ້​ວາງ​ແຜນ​ຍຸດ​ທະ​ສາດ​ການ​ພັດທະນາພະລັງງານ​ແຫ່ງ​ຊາດ​ຈຳນວນ​ໜຶ່ງອອກ​ມາ ​ເພື່ອ​ແນ​ໃສ່​ຮັບປະກັນ​ສະພາບ​ແວດ​ລ້ອມ​ການ​ລົງທຶນ​ທີ່​ມີ​ການ​ແຂ່ງຂັນ, ດຶງ​ດູດ, ສົ່ງ​ເສີມ​ການ​ໝູນ​ໃຊ້​ເຕັກ​ໂນ​ໂລ​ຊີ​ໃໝ່​ ທັນ​ສະ​ໄໝ​ ເພື່ອ​ຕອບ​ສະໜອງບັນດາ​ນະ​ໂຍບາຍ​ແຫ່ງ​ຊາດ​ກ່ຽວ​ກັບການ​ປົກ​ປັກ​ຮັກສາສະພາບ​ແວດ​ລ້ອມ ​ແລະ ຄວາມ​ປອດ​ໄພ​ດ້ານພະລັງງານ, ລະອຽດ​ຄື:

ຮັບປະກັນ​ຄວາມ​ປອດ​ໄພ​ດ້ານພະລັງງານ​ແຫ່ງ​ຊາດ: ​ເພີ່ມ​ທະວີ​ຄວາມ​ສາມາດ​ແລະຄວາມ​ໜ້າ​ເຊື່ອ​ຖື​ໃນ​ການ​ສະໜອງຂອງ​ລະບົບ​ໄຟຟ້າ ​ແລະ ບັນດາ​ລະບົບພະລັງງານອື່ນ. ປັບປຸງ​ຄວາມ​ສາມາດ​​ໃນ​ການສະໜອງ​ເຊື້ອ​ໄຟ​ຟອດຊິນຢູ່​ໃນ​ປະ​ເທດ ​ໂດຍ​ຜ່ານ​ການ​ກໍ່ສ້າງ​ສາງ​ສຳຮອງ​ເຊື້ອ​ໄຟ​ຟອດຊິນ, ລົງທຶນ​ຂຸດ​ຄົ້ນ​ບໍ່​ແຮ່ ​ແລະ ຍູ້​ແຮງ​ການສຳ​ຫຼວດ​ແລະ​ການ​ຄົ້ນ​ພົບ​ການ​ສະຫງວນ​ຊັບພະຍາກອນພະລັງງານ​ໃໝ່. ກໍ່ສ້າງ​ໂຄງ​ສ້າງ​ພື້ນຖານ​ການ​ນຳ​ເຂົ້າພະລັງງານ. ຫຼຸດຜ່ອນ​ຄວາມ​ຕ້ອງການ​ກ່ຽວ​ກັບ​ເຊື້ອ​ໄຟ​ຟອດຊິນ ​ໂດຍ​ຜ່ານ​ການ​ຊຸກຍູ້​ການ​ພັດທະນາພະລັງງານໝູນວຽນ ​ແລະ​ການ​ນຳ​ໃຊ້ພະລັງງານຢ່າງ​ມີ​ປະສິດທິ​ຜົນ.

ພັດທະນາ​ບັນດາ​ແຫຼ່ງພະລັງງານ​ໃໝ່​ແລະ​ພະລັງງານ​ໝູນວຽນ: ຈັດ​ລະບຽບ​ຂໍ້​ບັງຄັບ​ທາງ​ກົດໝາຍ​ແນ​ໃສ່​ລະດົມ​ບັນດາ​ແຫຼ່ງພະລັງ​ເພື່ອ​ພັດທະນາພະລັງງານໝູນວຽນ. ກໍ່ສ້າງ​ບັນດາ​ກົນ​ໄກ​ຊ່ວຍ​ໜູນ​ຢ່າງ​ມີ​ປະສິດທິ​ຜົນ​ໃຫ້​ແກ່ພະລັງງານໝູນວຽນ. ສ້າງ​ແຫຼ່ງການ​ເງິນ​ທີ່​ໝັ້ນ​ຄົງ​ເພື່ອ​ລົງທຶນ​ເຂົ້າ​ໃນ​ແຫຼ່ງພະລັງງານໝູນວຽນ.

ນຳ​ໃຊ້ພະລັງງານຢ່າງ​ປະຢັດ​ແລະ​ມີ​ປະສິດທິ​ຜົນ: ຊຸກຍູ້​ການ​ປະຕິບັດ​ກົດໝາຍ​ວ່າ​ດ້ວຍ​ການ​ນຳ​ໃຊ້ພະລັງງານຢ່າງ​ປະຢັດ​ແລະ​ມີ​ປະສິດທິ​ຜົນ. ສ້າງ​ແຫຼ່ງການ​ເງິນ​ທີ່​ໝັ້ນ​ຄົງ​ໃຫ້​ແກ່​ການ​ເຄື່ອນ​ໄຫວ​ປະຢັດພະລັງງານ.

ກ່ຽວ​ກັບ​ລາຄາ​ແລະ​ຕະຫຼາດພະລັງງານ: ກຳນົດ​ລາຄາພະລັງງານຢ່າງ​ມີ​ປະສິດທິຜົນ​ຕາມ​ກົນ​ໄກ​ຕະຫຼາດ ​ໃຫ້​ສັນຍາ​ລາຄາ​ທີ່​ເໝາະ​ສົມ​ເພື່ອ​ດັດ​ປັບ​ພຶດຕິ​ກຳ​ການ​ຜະລິດ​ແລະການ​ບໍລິ​ໂພ​ກພະລັງງານ. ລົບ​ລ້າງ​ເທື່ອ​ລະ​ກ້າວ​ການ​ສະໜັບສະໜູນ​ລາຄາ​ໃນ​ການ​ຜະລິດ​ແລະ​ບໍລິ​ໂພ​ກພະລັງງານ. ສ້າງ​ຕັ້ງ​ຕະຫຼາດ​ພະລັງງານ​ປະ​ເພດ​ຕ່າງໆ​ເທື່ອ​ລະ​ກ້າວ ​ແນ​ໃສ່ຊຸກຍູ້​ການ​ເຄື່ອນ​ໄຫວ​ສະໜອງ​ແລະ​ນຳ​ໃຊ້ພະລັງງານຢ່າງ​ມີ​ປະສິດທິ​ຜົນ.

ປົກ​ປັກ​ຮັກສາ​ສະພາບ​ແວດ​ລ້ອມ​ແລະ​ພັດທະນາ​ແບບ​ຍືນ​ຍົງ: ຂຸດ​ຄົ້ນ​ຊັບພະຍາກອນພະລັງງານ​ໃນ​ລະດັບ​ປານ​ກາງ, ຫຼີກ​ລ່ຽງການຂຸດ​ຄົ້ນ​ໄວ ​ທີ່​ເຮັດ​ໃຫ້ຊັບພະຍາກອນ​ບົກ​ແຫ້ງ​ຢ່າງ​ໄວ; ສົມທົບ​ການ​ຂຸດ​ຄົ້ນ​ຊັບພະຍາກອນ​ໃນ​ປະ​ເທດ​ກັບ​ການ​ນຳ​ເຂົ້າພະລັງງານຈາກຕ່າງປະ​ເທດ​ຕາມ​ອັດ​ຕາ​ສ່ວນ​ທີ່​ສົມ​ເຫດ​ສົມ​ຜົນ. ດຳ​ເນີນ​ການ​ຄວບ​ຄຸມ​ຢ່າງ​ເຄັ່ງ​ຄັດ​ຕໍ່ບັນດາພື້ນຖານ​ຂຸດ​ຄົ້ນ​ແລະ​ຜະລິດພະລັງງານທີ່​ມີ​ການ​ປ່ອຍ​ອາຍ​ພິດ​ເປັນ​ມົມລະ​ພິດ​ສິ່ງ​ແວດ​ລ້ອມ ​ແລະ ມີ​ການ​ລົງ​ໂທດ​ຢ່າງ​ເຂັ້ມ​ງວດຕໍ່​ບັນດາ​ພື້ນຖານພະລັງງານທີ່​ລະ​ເມີດ​ຂໍ້​ກຳນົດ, ປະ​ໃຫ້ການ​ປ່ອຍ​ມົນ​ລະ​ພິດ​ເຂົ້າ​ໃນ​ສິ່ງ​ແວດ​ລ້ອມ​ເກີນ​ລະດັບ​ທີ່​ອະນຸຍາດ. ຄົ້ນຄວ້າ​ໝູນ​ໃຊ້​ບັນດາ​ເຄື່ອງມື​ການ​ເງິນ (ພາສີ​ອາກອນ, ຄ່າ​ທຳ​ບຽມ, ​ໃບຮັບ​ຮອງ,...) ​ແນ​ໃສ່​ດັດ​ປັບ​ພຶດຕິ​ກຳການ​ຜະລິດ​ແລະ​ການ​ບໍລິ​ໂພກພະລັງງານ ​ແລະ ສ້າງ​ແຫຼ່ງລາຍ​​ໄດ້​ໃຫ້​ແກ່​ການ​ເຄື່ອນ​ໄຫວ​ລົງທຶນ​ແກ້​ໄຂພະລັງງານສະອາດ.

ພະລັງງານ​ແມ່ນ​ປັດ​ໄຈ​ທີ່ຈຳ​ເປັນ​ທີ່​ສຸດ​ເພື່ອພັດທະນາ​ເສດຖະກິດ-ສັງຄົມ ​ແລະ​ກໍ​ເປັນ​ພາກສ່ວນ​ທີ່​ສຳຄັນ​ໃນ​ການ​ພັດທະນາ​ແບບ​ຍືນ​ຍົງ. ​ເພື່ອ​ບັນລຸ​ບັນດາ​ເປົ້າໝາຍອັນ​ລະອຽດ​ຂອງຍຸດ​ທະ​ສາດ​ການພັດທະນາພະລັງງານ​ແຫ່ງ​ຊາດຮອດ​ປີ 2025, ກຳນົດ​ທິດ​ຮອດ​ປີ 2035, ຈຳ​ເປັນ​ຕ້ອງ​ປະຕິບັດ​ຢ່າງ​ຄົບ​ຊຸດ​ບັນດາ​ວິທີ​ພັດທະນາຂະ​ແໜງ​ການພະລັງງານຂອງ​ຫວຽດນາມ ​ແນ​ໃສ່​ປະກອບສ່ວນ​ຕອບ​ສະໜອງບັນດາ​ເປົ້າ​ໝາຍ​ການ​ພັດທະນາ​ເສດຖະກິດ-ສັງຄົມ-ສິ່ງ​ແວດ​ລ້ອມ​ທີ່​ໄດ້​ວາງ​ອອກ​ມາ.

​ໃນ​ຂະ​ບວນວິວັດ​ການ​ປະຕິບັດ​ຍຸດ​ທະ​ສາດ​ຈະ​ພົບ​ຄວາມ​ຫຍຸ້ງຍາກ, ສິ່ງ​ທ້າ​ທາຍ​ຫຼາຍ​ຢ່າງ​ ​ເຊິ່ງຂະ​ແໜງ​ການພະລັງງານຫວຽດນາມ​ໄດ້, ພວມ​ແລະ​ຈະ​ຕ້ອງ​ປະ​ເຊີນ​ໜ້າ, ​ເຊັ່ນ: 1- ຄວາມ​ຈຳກັດກ່ຽວ​ກັບ​ການ​ສະໜອງ​ແຫຼ່ງພະລັງງານປະຖົມ​ພູມ​ໃນ​ປະ​ເທດຈະ​ນຳ​ໄປ​ສູ່​ການ​ເພິ່ງ​ພາ​ແຫຼ່ງ​ເຊື້ອ​ໄຟ​ນຳ​ເຂົ້າ​ເພີ່ມ​ຂຶ້ນ, ພິ​ເສດ​ແມ່ນ​ເຊື້ອ​ໄຟ​ສຳລັບ​ການ​ຜະລິດ​ໄຟຟ້າ; 2- ຄວາມ​ຕ້ອງການພະລັງງານ​ເພີ່ມ​ຂຶ້ນ​ຢ່າງ​ໄວ​ສ້າງ​ແຮງ​ກົດ​ດັນ​ຕໍ່​ໂຄງ​ສ້າງ​ພື້ນຖານຂອງຂະ​ແໜງ​ການພະລັງງານ, ຮຽກຮ້ອງ​ເງິນ​ລົງທຶນ​ຫຼາຍ​ໃນ​ສະພາບ​ການໜີ້​ສິນ​ສາທາລະນະ​ເພີ່ມ​ຂຶ້ນສູງ ​ແລະ ຂະ​ບວນການ​ຫັນ​ເປັນ​ຫຸ້ນ​ສ່ວນພົບ​ຄວາມ​ຫຍຸ້ງຍາກ; 3- ສິ່ງ​ທ້າ​ທາຍ​ກ່ຽວ​ກັບ​ການ​ກະທົບ​ຕໍ່​ສິ່ງ​ແວດ​ລ້ອມຈາ​ກການ​ເຄື່ອນ​ໄຫວ​ສະໜອງພະລັງງານຈະ​ນັບ​ມື້​ນັບ​ເພີ່ມ​ຂຶ້ນ ຍ້ອນຄວາມ​ຕ້ອງການພະລັງງານ​ໃນ​ປະ​ເທດ​ເພີ່ມ​ຂຶ້ນຢ່າງ​ໄວ, ຄຽງຂ້າງ​ນັ້ນ ​ການ​​ເພີ່ມ​ຂຶ້ນ​ຢ່າງ​ໄວ​ວາ​ຂອງ​ອັດຕາ​ສ່ວນ​ແຫຼ່ງ​ເຊື້ອ​ໄຟ​ຟອດຊິນ, ພິ​ເສດ​ແມ່ນ​ຖ່ານ​ຫີນ​ໃນ​ໂຄງ​ປະກອບ​ການ​ສະໜອງພະລັງງານ.

​ເພື່ອ​ແກ້​ໄຂ​ຜ່ານ​ຜ່າ​ສິ່ງ​ທ້າ​ທາຍ​ກ່ຽວ​ກັບ​ຄວາມ​ປອດ​ໄພ​ດ້ານພະລັງງານ, ​ເປັນ​ປະ​ເທດ​ທີ່​ພວມຢູ່​ໃນ​ໄລຍະ​ຫັນປ່ຽນ​ໄປ​ສູ່ການ​ນຳ​ເຂົ້າສຸດທິ, ຫວຽດນາມ​ຕ້ອງການ​ປະຕິບັດ​ບັນດາ​ກຸ່ມ​ວິທີ​ແກ້​ໄຂ​ເພື່ອ​ຮັບປະກັນ​ແຫຼ່ງສະໜອງ​ເຊື້ອ​ໄຟ​ຟອດຊິນ ​ແລະ ພັດທະນາ​ໂຄງ​ສ້າງ​ພື້ນຖານພະລັງງານທີ່​ມີ​ປະສິດ​ທີ​ຜົນ, ​ເຮັດ​ໃຫ້​ລະບົບພະລັງງານ​ເປັນ​ຫຼາກ​ຫຼາຍ​ໂດຍ​ອີງ​ໃສ່​ພະລັງງານ​ໝູນວຽນ ​ແລະ​ການ​ນຳ​ໃຊ້ພະລັງງານຢ່າງ​ມີ​ປະສິດທິພາບ; ພ້ອມ​ກັນ​ນັ້ນ, ຕ້ອງ​ປະຕິບັດ​ບັນດາ​ມາດ​ຕະການ​ຍົກ​ສູງ​ຄວາມ​ປອດ​ໄພ​ດ້ານພະລັງງານ, ປະກອບ​ດ້ວຍ​ບັນດາມາດ​ຕະການ​ສະໜອງ​ເຊື້ອ​ໄຟ​ຟອດຊິນ ​ແລະ ຫຼຸດຜ່ອນ​ການ​ເພິ່ງ​ພາ​ເຊື້ອ​ໄຟ​ຟອດຊິນ./.

​ໂດຍ ​ເຈິ່ນຕວັ້ນ​ແອ​ງ,

ກຳມະການ​ສູນ​ກາງ​ພັກ, ລັດຖະມົນຕີ​ກະຊວງ​ອຸດສາຫະກຳ​ການ​ຄ້າ

---------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 913 (​ເດືອນ​ພະຈິກ 2018)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ