ວັນອັງຄານ, 22/10/2019
ຜົນສຳເລັດທາງເສດຖະກິດຂອງຫວຽດນາໃນປີ 2018 ແລະໂອກາດການພັດທະນາໃນປີ 2019
15/3/2019 16:4' ສົ່ງ ພິມ
ພາບປະກອບ. (ພາບ: TTXVN)

ຜົນສຳ​ເລັດ​ທີ່​ໂດດ​ເດັ່ນ​ໃນ​ປີ 2018

1- ການ​ເຕີບ​ໂຕ​ເສດຖະກິດ

ການ​ເຕີບ​ໂຕ​ເສດຖະກິດບັນ​ລຸ 7,08%, ​ແມ່ນ​ລະດັບການ​ເພີ່ນ​ຂຶ້ນ​ສູງ​ທີ່​ສຸດ​ນັບ​ແຕ່​ປີ 2008 ມາ​ເຖິງ​ດຽວນີ້. ​ໃນ​ລະດັບ​ການ​ເພີ່ມ​ຂຶ້ນ​ລວມຂອງ​ພື້ນຖານ​ເສດຖະກິດ​ໃນ​ປີ 2018 ນັ້ນ, ຂົງ​ເຂດ​ກະສິກຳ, ປ່າ​ໄມ້​ແລະ​ສິນ​ໃນ​ນ້ຳປະກອບສ່ວນ 8,7%; ຂົງ​ເຂດ​ອຸດສາຫະກຳ​ແລະ​ກໍ່ສ້າງ: 48,6%; ຂົງ​ເຂດ​ບໍລິການ: 42,7%. ຈຸດ​ທີ່​ພົ້ນ​ເດັ່ນ​ໃນ​ປີ 2018 ​ແມ່ນ​ຄຸນ​ນະພາ​ບການ​ເຕີບ​ໂຕ​ແລະ​ປະ​ສິດທິ​ຜົນ​ເສດຖະກິດ​ ໄດ້​ຮັບ​ການ​ປົວ​ແປງ​ຢ່າງ​ຈະ​ແຈ້ງ, ​ໂດຍ​ຜ່ານບັນດາ​ຕົວ​ຊີ້​ວັດ​ດັ່ງ​ຕໍ່​ໄປ​ນີ້:

- ການ​ເຕີບ​ໂຕ​ເສດຖະກິດຄ່ອຍໆ​ຫັນປ່ຽນ​ຕາມ​ລວງ​ເລິກ, ອັດຕາການ​ປະກອບສ່ວນ​ຂອງສະມັດ​ຖະພາບ​ບັນດາ​ປັດ​ໄຈ​ສັງ​ເຄາະ (TFP) ​ໃນ​ການ​ເຕີບ​ໂຕ ຈີ​ດີ​ພີ ​ໃນ​ປີ 2018 ບັນລຸ 43,5%, ສະ​ເລ່ຍ​ໃນ​ໄລຍະ 2016 - 2018 ບັນລຸ 43,3%, ສູງ​ກວ່າ​​ເມື່ອທຽບ​ກັບ​ລະດັບ​ສະ​ເລ່ຍ 33,6% ຂອງ​ໄລຍະ 2011 - 2015.

- ອັດຕາ​ສະມັດຖະພາບ​ແຮງ​ງານ​ຂອງ​ຫວຽດນາມ​​ມີ​ການ​ປົວ​ແປງ​ພໍ​ຄວນ ຕາມ​ທິດ​ເພີ່ມ​ຂຶ້ນຢ່າງ​ຕໍ່​ເນື່ອງ​ໃນ​ຫຼາຍ​ປີ ​ແລະ​ແມ່ນ​ປະ​ເທດ​ທີ່​ມີ​ຄວາມ​ໄວ​ໃນ​ການ​ເພີ່ມ​ອັດຕາ​ສະມັດຖະພາບ​ຂອງ​​ແຮງງານສູງ​ໃນ​ພາກ​ພື້ນ ອາ​ຊຽນ. ອັດຕາ​ສະມັດຖະພາບ​ຂອງ​ແຮງ​ງານ​ໃນ​ພື້ນຖານ​ເສດຖະກິດ​ຕາມ​ລາຄາ​ປະຈຸ​ບັນ​ປີ 2018 ບັນລຸ 102 ລ້ານ​ດົ່ງ​ຕໍ່​ຄົນ​ງານ (ທຽບ​ເທົ່າ 4.512 ​ໂດ​ລາ​ສະຫະລັດ), ​ເພີ່ມ​ຂຶ້ນ 346 ໂດ​ລາ​ສະຫະລັດ ​ເມື່ອທຽບ​ກັບ​ປີ 2017.

- ປະສິດທິ​ຜົນ​ການ​ນຳ​ໃຊ້​​ເງິນ​ລົງທຶນ​ສະ​ແດງ​ຜ່ານດັດຊະນີ ICOR (ປະສິດທິ​ຜົນ​ການ​ນຳ​ໃຊ້​ເງິນລົງທຶນ) ພວມ​ໄດ້​ຮັບ​ການ​ປົວ​ແປງ​ເທື່ອ​ລະ​ກ້າວ, ຈາກ​ລະດັບ 6,42 ​ໃນ​ປີ 2016 ຫຼຸດ​ລົງ​ເປັນ 6,11 ປີ 2017 ​ແລະ 5,97 ປີ 2018.

2- ມູນ​ຄ່າ​ການ​ສົ່ງ​ອອກ​ນຳ​ເຂົ້າ

ມູນ​ຄ່າ​ສິນຄ້າ​ສົ່ງ​ອອກ​ປີ 2018 ບັນລຸt 244,7 ຕື້​ໂດ​ລາ​ສະຫະລັດ, ​ເພີ່ມ​ຂຶ້ນ 13,8% ​ເມື່ອ​ທຽບ​ກັບ​ປີ 2017 (ລື່ນ​ລະດັບ​ຄາ​ດໝາຍ​ທີ່​ສະພາ​ແຫ່ງ​ຊາດ​ແລະລັດຖະບານ​ວາງ​ໄວ້), ​ໃນ​ນັ້ນ​ຂົງ​ເຂດ​ເສດຖະກິດ​ພາຍ​ໃນ​ປະ​ເທດ​ບັນລຸ 69,2 ຕື້​ໂດ​ລາ​ສະຫະລັດ, ​ເພີ່ມ​ຂຶ້ນ 15,9% ​ເມື່ອ​ທຽບ​ກັບ​ປີ 2017, ກວນ​ເອົາ 28,3% ຂອງ​ລວມຍອດ​ການ​ສົ່ງ​ອອກ​ຂອງ​ທົ່ວ​ປະ​ເທດ; ຂົງ​ເຂ​ດທີ່​ມີ​ການ​ລົງທຶນ​ຈາກ​ຕ່າງປະ​ເທດ​ບັນລຸ 175,5 ຕື້​ໂດ​ລາ​ສະຫະລັດ, ​ເພີ່ມ​ຂຶ້ນ 12,9%, ກວມ​ເອົາ 71,7% (ຫຼຸດ 0,6 ຈຸດ​ສ່ວນ​ຮ້ອຍ​ເມື່ອ​ທຽບ​ກັບ​ປີ 2017). 

ມູນ​ຄ່າ​ສິນຄ້າ​ນຳ​ເຂົ້າ​​ປີ 2018 ບັນລຸ 237,5 ຕື້​ໂດ​ລາ​ສະຫະລັດ, ​ເພີ່ມ​ຂຶ້ນ 11,5% ​ເມື່ອ​ທຽບ​ກັບ​ປີກ່ອນ, ​ໃນ​ນັ້ນ​ມີ 36 ປະ​ເພດ​ສິນຄ້າ​ຄາດ​ຄະ​ເນມູນຄ່ານຳ​ເຂົ້າ​ບັນລຸ​ຫຼາຍ​ກວ່າ 1 ຕື້​ໂດ​ລາ​ສະຫະລັດ, ກວມ​ເອົາ 90,4% ຍອດ​ມູນ​ຄ່າ, ​ໃນ​ນັ້ນ​ມີ 4 ປະ​ເພດ​ສິນຄ້າ​ຫຼາຍ​ກວ່າ 10 ຕື້​ໂດ​ລາ​ສະຫະລັດ.

​ລວມທັງ​ປີ 2018, ລວມຍອດ​ມູນ​ຄ່າ​ສົ່ງ​ອອກ​ນຳ​ເຂົ້າ​ບັນລຸ​ລະດັບ​ສູງ​ສຸດ​ໃໝ່ຄື 482,2 ຕື້​ໂດ​ລາ​ສະຫະລັດ. ດຸນ​ການ​ຄ້າ​ມີ​ການ​ເກີນ​ດຸນ​ເຖິງ 7,2 ຕື້​ໂດ​ລາ​ສະຫະລັດ, ​ແມ່ນ​ປີ​ທີ່​ມີ​ການ​ເກີນ​ດຸນ​​ຫຼາຍ​ທີ່​ສຸດ​ທີ່​ເຄີຍ​ມີ​ມາ​ກ່ອນ, ສູງ​ກວ່າ​ຕັ້ງ​ຫຼາຍ​ທຽບ​ກັບ​ລະດັບ​ເກີ​ນດຸນ 2,1 ຕື້​ໂດ​ລາ​ສະຫະລັດຂອງ​ປີ 2017, ​ເກີນ​ເປົ້າ​ໝາຍຂອງ​ສະພາ​ແຫ່ງ​ຊາດ​ທີ່​ກຳນົດ​ໄວ້​ວ່າ​ເປັນ​ການຂາດ​ດຸນ​ການ​ຄ້າ​ໜ້ອຍ​ກວ່າ 3%.

3- ຂົງ​ເຂດ​ວິ​ສາ​ຫະກິດ​ມີ​ຄວາມ​ຈະ​ເລີ​ນຮຸ່ງ​ເຮືອງ

ຕາມ​ກົມ​ທະບຽນ​ທຸລະ​ກິດ, ປີ 2018 ທົ່ວປະ​ເທດ​ມີ 131.275 ວິ​ສາ​ຫະກິດ​ສ້າງ​ຕັ້ງໃໝ່ທີ່​ມີ​ທຶນ​ຈົດ​ທະບຽນ 1.478.101 ຕື້​ດົ່ງ, ​ເພີ່ມ​ຂຶ້ນ 3,5% ກ່ຽວ​ກັບ​ຈຳນວນ​ວິ​ສາ​ຫະກິດ ​ແລະ ​ເພີ່ມ​ຂຶ້ນ 14,1% ກ່ຽວ​ກັບ​ຈຳນວນ​ທຶນ​ຈົດ​ທະບຽນ. ນີ້​ແມ່ນ​ປີ​ທີ່​ສີ່ຕິດ​ຕໍ່​ກັນທີ່ມີ​ຈຳນວນ​ວິ​ສາ​ຫະກິດ​ສ້າງ​ຕັ້ງ​ໃໝ່ ​ແລະ ຈຳນວນ​ທຶນ​ຈົດ​ທະບຽນສູງ​ສຸດ​ໃນ​ປະຫວັດສາດ. ອັດຕາ​ສ່ວນ​ຂອງ​ທຶນ​ຈົດ​ທະບຽນ​ສະ​ເລ່ຍຕໍ່​ວິ​ສາ​ຫະກິດ​ໃນ​ປີ 2018 ​ເທົ່າ​ກັບ 11,3 ຕື້​ດົ່ງ, ​ເພີ່ມ​ຂຶ້ນ 10,2% ​ເມື່ອ​ທຽບ​ກັບ​ປີ 2017. ລວມຍອດ​ທຶນ​ຈົດ​ທະບຽນ​ທີ່​ເພີ່ມ​ເຕີມ​ເຂົ້າ​ໃນ​ພື້ນຖານ​ເສດຖະກິດ​ໃນ​ປີ 2018 ​ແມ່ນ 3.886.892 ຕື້​ດົ່ງ, ​ເພີ່ມ​ຂຶ້ນ 22,8% ​ເມື່ອ​ທຽບ​ກັບ​ປີ 2017. ນອກຈາກ​ນັ້ນ​ໃນ​ປີ 2018, ຈຳນວນ​ວິ​ສາ​ຫະກິດ​ທີ່​ກັບ​ຄືນ​ມາ​ເຄື່ອນ​ໄຫວ​ແມ່ນ 34.010 ວິສາ​ຫະກິດ, ​ເພີ່ມ​ຂຶ້ນ 28,6% ​ເມື່ອ​ທຽບ​ກັບ​​ໄລຍະ​ດຽວ​ກັນ​ຂອງ​ປີ​ທີ່​ຜ່ານ​ມາ. ນີ້​ແມ່ນ​ສັນຍາ​ນທີ່​ໃຫ້​ເຫັນ​ສ່ວນ​ໜຶ່ງ​ເຖິງ​ຂອບ​ກົດໝາຍທີ່​ປອດ​ໂປ່​ງ​ກ່ຽວ​ກັບສະພາບ​ແວດ​ລ້ອມ​ການ​ທຸລະ​ກິດ ພ້ອມ​ກັບ​ບັນດາ​ວິທີ​ແກ້​​ເດັດຂາດ​ຂອງ​ລັດຖະບານ​ແນ​ໃສ່​ແກ້​ໄຂ​ຄວາມ​ຫຍຸ້ງຍາກ, ສ້າງ​ສິ່ງ​ແວດ​ລ້ອມ​ການ​ລົງທຶນ​ທຸລະ​ກິດທີ່​ສະດວກ​ດີກ​ວ່າ​ອີກ​​ໃຫ້ວິ​ສາ​ຫະກິດ ມີ​ຜົນ​ກະທົບ​ທາງ​ບວກ​ຕໍ່​ຄວາມ​ເຊື່ອ​ໝັ້ນ​ຂອງ​ນັກ​ລົງທຶນ, ຊ່ວຍ​ເພີ່ມ​ທະວີ​ການ​ເຂົ້າ​ຮ່ວມ, ປະກອບສ່ວນ​ຂອງ​ພາກ​ເອກະ​ຊົນ ​ເຂົ້າ​ໃນ​ການ​ພັດທະນ​ເສດຖະກິດ. ດັ່ງ​ນັ້ນ, ດ້ວຍ​ຕົວ​ເລກ “ທີ່​ໜ້າ​ປະ​ທັບ​ໃຈ” ກ່ຽວ​ກັບ​ການ​ເຕີບ​ໂຕ​ຂອງ​ວິ​ສາ​ຫະກິດ​ສ້າງ​ຕັ້ງ​ໃໝ່, ຂະໜາດ​ວິ​ສາ​ຫະກິດ ​ແລະ ຈຳນວນ​ວິ​ສາ​ຫະກິດທີ່ກັບ​ຄືນມາ​ເຄື່ອນ​ໄຫວນັ້ນ ​ໄດ້​ໃຫ້​ເຫັນ​ແຈ້ງ “ພະລັງ​ຊີວິດ” ຂອງ​ສະພາບ​ແວດ​ລ້ອມ​ການ​ທຸລະ​ກິດ ​ແລະ ບັນດາ​ໂອກາດ​ການ​ລົງທຶນທຸລະ​ກິດ​ໃໝ່, ​ແນ່ນອນ​ວ່າ​ຕະຫຼາດ​ຈະ​ມີ​ການ​ແຂ່ງ​ຂັນຫຼາຍ​ກວ່າ ​ແລະ ນີ້​ແມ່ນ​ກຳລັງ​ໜູນ​ການ​ພັດທະນາ​ເສດຖະກິດ​ໃນສະພາບ​ການ​ໃໝ່.

4- ​ແຜນ​ນະ​ໂຍບາຍ​ແລະ​ການ​ກະທຳ​ຂອງ​ລັດຖະບານ​ໃນ​ການ​ປັບປຸງ​ສະພາບ​ແວດ​ລ້ອມ​ການ​ທຸລະ​ກິດ

​ໃນ​ປີ 2018, ລັດຖະບານ​ໄດ້​ພະຍາຍາ​ມຢ່າງ​ບໍ່​ຢຸດ​ຢັ້ງ​ ເພື່ອ​ປັບປຸງ​ສະພາບ​ແວດ​ລ້ອມ​ການ​ທຸລະ​ກິດ, ຍົກ​ສູງ​ຄວາມ​ສາມາດ​ແຂ່ງຂັນ​ຂອງ​ວິ​ສາ​ຫະກິດ​ຫວຽດນາມ. ສືບ​ຕໍ່​ຜັນ​ຂະຫຍາຍ​ວຽກ​ງານ​ປະຕິ​ຮູບຂັ້ນ​ຕອນ​ການ​ບໍລິຫານ, ​ແກ້​ໄຂ​ຄວາມ​ຫຍຸ້ງຍາກ​ໃຫ້​ວິ​ສາ​ຫະກິດ ຕາມ​ຈິດ​ໃຈ​ມະຕິຕ່າງໆ​ຂອງ​ລັດຖະບານ, ​ເຊັ່ນ ມະຕິ​ສະບັບ​ທີ 35/NQ-CP, ວັນ​ທີ 16-5-2016, ກ່ຽວ​ກັບ​ການ​ສະໜັບສະໜູນ​ແລະ​ພັດທະນາ​ວິ​ສາ​ຫະກິດ​ເຖິງ​ປີ 2020; ມະຕິ​ສະບັບ​ທີ 19-2017/NQ-CP, ວັນ​ທີ 6-2-2017, ກ່ຽວ​ກັບ​ການ​ປະຕິບັດ​ບັນດາ​ໜ້າ​ທີ່, ວິທີແກ້ຕົ້ນຕໍເພື່ອປັບປຸງສະພາບແວດລ້ອມການທຸລະກິດ, ຍົກສູງຄວາມສາມາດ ໃນການແຂ່ງຂັນຂອງຊາດປີ 2017, ກໄນົດທິດຮອດປີ 2020; ມະຕິ​ສະບັບ​ທີ 19-2018/NQ-CP, ວັນ​ທີ 15-5-2018, ກ່ຽວ​ກັບການ​ປະຕິບັດ​ບັນດາ​ໜ້າ​ທີ່, ວິທີແກ້ໄຂຕົ້ນຕໍເພື່ອປັບປຸງສະພາບແວດລ້ອມການທຸລະກິດ, ຍົກສູງຄວາມສາມາດ ໃນການແຂ່ງຂັນຂອງຊາດປີ 2018 ແລະຊຸມປີຕໍ່ໜ້າ, ພ້ອມ​ກັນ​ນັ້ນ, ລັດຖະບານ​ໄດ້​ຊີ້​ນຳ​ປະຕິບັດຫຼາຍ​ວິທີ​ແກ້​ໄຂ​ຢ່າງ​ຂຸ້ນຂ້ຽວ, ຄົບ​ຊຸດ, ​ໂດຍ​ສະ​ເພາະການ​ປະຕິ​ຮູບ​ຂັ້ນ​ຕອນ​ການ​ບໍລິຫານ​ໃນ​ບັນດາ​ຂົງ​ເຂດ​ຄື ພາສີ, ສຸລະກາກອນ, ປະກັນ​ໄພ​ສັງຄົມ, ​ໃຫ້​ໃບ​ອະນຸຍາດ​ກໍ່ສ້າງ, ທີ່​ດິນ, ການ​ເຂົ້າ​ເຖິງ​​ກະ​ແສໄຟຟ້າ, ການ​ສ້າງ​ຕັ້ງ​ແລະ​ການ​ຍຸບ​ເລິກ​ວິ​ສາ​ຫະກິດ, ຂັ້ນ​ຕອນ​ການ​ລົງທຶນ...

ບົນ​ພື້ນຖານ​ຄວາມ​ພະຍາຍ​ມຂອງ​ລັດຖະບານ, ອັນ​ດັບ​ຂອງ​ຫວຽດນາມ​ໃນ​ລາຍ​ງານ​ສະພາບ​ແວດ​ລ້ອມ​ການທຸລະກິດ (Doing Business) ປີ 2018 ຂອງ​ທະນາຄາ​ນ​ໂລກ ​ມີ​ການ​ປັບປຸງ​ຫຼາຍ​ພໍ​ຄວນ. ປີ 2018, ​ສະພາບ​ແວດ​ລ້ອມ​ການ​ທຸລະກິດຂອງ​ຫວຽດນາມ​ຖືກ​ຈັດ​ໃນ​ອັນ​ດັບ​ທີ 69 ​ໃນ 190 ພື້ນຖານ​ເສດຖະກິດ ດ້ວຍ 66,77 ຄະ​ແນນ​ໃນ​ລະດັບ 100, ຫຼຸດ​ລົງ 1 ຂັ້ນ​ເມື່ອ​ທຽບ​ກັບ​ປີ 2017, ​ແຕ່​ຫຼາຍດ້ານ​ໄດ້ຮັບ​ການ​ປັບປຸງ​ໃຫ້​ດີກ​ວ່າ​ເກົ່າ, ​ເຊັ່ນ​ການ​ສ້າງ​ຕັ້ງ​ວິ​ສາ​ຫະກິດ, ການ​ຂໍ​ໃນ​ອະນຸຍາດ​ກໍ່ສ້າງ, ການ​ເຂົ້າ​ເຖິງ​ກະ​ແສ​ໄຟຟ້າ, ການ​ເສຍ​ພາສີ, ການ​ປະຕິບັດ​ສັນຍາ.

5- ການ​ປ່ຽນ​ແປງ​ໃໝ່​ປະດິດ​ສ້າງມີ​ຫຼາຍ​ຈຸດ​ທີ່​ໂດດ​ເດັ່ນ

​ແລວ​ທາງ​ດ້ານ​ກົດໝາຍ​ສຳລັບ​ການ​ເລີ່​ມຕົ້ນ​ທຸລະ​ກິດປ່ຽນ​ແປງ​ໃໝ່​ປະດິດ​ສ້າງ ກໍ່​ໄດ້​ຮັບ​ຄວາມ​ເອົາ​ໃຈ​ໃສ່​ກໍ່ສ້າງ, ປະກາດ​ໃຊ້​ຢ່າງ​ຮີບ​ດ່ວນ​ໂດຍ​ອົງການ​ຮັບຜິດຊອບ: ກົດໝາຍ​ສະໜັບສະໜູນ​ວິ​ສາ​ຫະກິດ​ຂະໜາດນ້ອຍ​​ແລະ​ຂະໜາດ​ກາງ ປີ 2017, ກົດໝາຍ​ວ່າ​ດ້ວຍ​ການ​ມອບ​ໂອນ​ເຕັກ​ໂນ​ໂລ​ຊີ​ສະບັບ​ປັບປຸງ​ປີ 2017, ພ້ອມ​ດ້ວຍ​ບັນດາ​ດຳລັດ, ໜັງສື​ວຽນຕາມ​ກົດໝາຍ ​ໄດ້​ສະ​ແດງ​ໃຫ້​ເຫັນ​ເຖິງ​ຄວາ​ມຕັດສິນ​ໃຈຂອງ​ບັນດາ​ອົງການ​ຮັບຜິດຊອບ​ ໃນ​ການ​ຍູ້​ແຮງ​ການ​ພັດທະນາລະບົບ​ນິ​ເວດ​ການເລີ່​ມຕົ້ນທຸລະ​ກິດປະດິດ​ສ້າງ​ຢູ່​ຫວຽດນາມ. ການ​ປະກອບສ່ວນພັດທະນາລະບົບ​ນິ​ເວດ​ກາຍ​ເລີ່​ມຕົ້ນທຸລະ​ກິດປະດິດ​ສ້າງຈະ​ເປັນ​ໄປ​ບໍ່​ໄດ້ ຖ້າ​ຫາກບໍ່ເວົ້າ​ເຖິງ​ການສະໜັບສະໜູນ​ແລະ​ການ​ຮ່ວມມື​ຂອງກຸ່ມ​ບໍລິສັດ​ຂະໜາດ​ໃຫຍ່, ທະນາຄານ, ນັກ​ລົງທຶນ​ໃນ​ປະ​ເທດ​ແລະ​ຕ່າງປະ​ເທດ. ຮອດ​ທ້າຍ​ປີ 2018, ຫວຽດນາມ​ມີ​ປະມານ 3.000 ວິ​ສາ​ຫະກິດ​ເລີ່​ມຕົ້ນ​ທຸລະ​ກິດ​ໃໝ່, ​ເພີ່ມ​ຂຶ້ນ​ເກືອບ​ສອງ​ເທົ່າ​ເມື່ອ​ທຽບ​ກັບ​ຕົວ​ເລກ​ຂອງ​ປີ 2015. ດ້ວຍ​ການ​ພັດທະນາ​ຢ່າງ​ແຂງ​ແຮງຂອງ​ລະບົບ​ນິ​ເວດ​ການ​ເລີ່ມຕົ້ນທຸລະ​ກິດ​ປະດິດ​ສ້າງ, ຮອດ​ປີ 2020 ຫວຽດນາມ​ຈະ​ມີ 1 ລ້ານ​ວິ​ສາ​ຫະກິດ, ​ໃນ​ນັ້ນ 5.000 ວິ​ສາ​ຫະກິດ​ເລີ່ມຕົ້ນທຸລະ​ກິດ​ປະດິດ​ສ້າງ. ລາຍ​ງານ​ກ່ຽວ​ກັບການຈັດ​ອັນ​ດັບ​ດັດຊະນີ​ນະ​ວັດຕະ​ກຳທົ່ວ​ໂລກ​ປີ 2018 ​ໃຫ້​ເຫັນ​ວ່າ ຫວຽດນາມ​ສືບ​ຕໍ່​ປັບປຸງ​ຕຳ​ແໜ່​ງຂອງ​ຕົນ, ອັນ​ດັບ​ທີ 45 ​ໃນ​ຈຳນວນ 126 ປະ​ເທດ​ແລະ​ເສດຖະກິດ​ຖືກ​ຈັດ​ອັນ​ດັບ, ​ເພີ່ມ​ຂຶ້ນ 2 ຂັ້ນ​ເມື່ອ​ທຽບ​ກັບ​ປີ 2017, ​ເພີ່ມ​ຂຶ້ນ 14 ຂັ້ນ​​ເມື່ອທຽບ​ກັບ​ປີ 2016.

6- ການ​ດຶງ​ດູດ​ການ​ລົງທຶນ​ຈາກ​ຕ່າງປະ​ເທດ​ໄດ້​ຮັບ​ຜົນດີ​ຫຼາຍ​ຢ່າງ

ປີ 2018, ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ ມີ  3.046 ​ໂຄງການ​ໄດ້​ຮັບ​ໃບ​ອະນຸຍາດ​ໃໝ່ ດ້ວນ​ທຶນ​ຈົດ​ທະບຽນ 17.976,2 ລ້ານ​ໂດ​ລາ​ສະຫະລັດ, ​ເພີ່ມ​ຂຶ້ນ 17,6% ທາງ​ດ້ານ​ໂຄງການ ​ແລະ ຫຼຸດ​ລົງ 15,5% ທາງ​ດ້ານ​ທຶນ​ຈົດ​ທະບຽນ​ ເມື່ອ​ທຽບ​ກັບ​ເວລາ​ດຽວ​ກັນ​ຂອງ​ປີ 2017. ຄຽງ​ຄູ່​ກັນ​ນັ້ນ, ມີ 1.169 ​ເທື່ອ​ໂຄ​ງການທີ່ໄດ້​ຮັບ​ອະນຸຍາດ​ຈາກ​ປີ​ກ່ອນ ​ໄດ້ລົງ​ທະບຽນ​ດັດ​ປັບ​ເງິນ​ລົງທຶນ ດ້ວຍ​ຈຳນວນ​ທຶນ​ເພີ່ມ​ຂຶ້ນ​ຕື່ມ​ອີກ 7.596,7 ລ້ານ​ໂດ​ລາ​ສະຫະລັດ, ໜ້ອຍ​ກວ່າ 9,7% ​ເມື່ອ​ທຽບ​ກັບ​ເວລາ​ດຽວ​ກັນ​ຂອງ​ປີກ່ອນ. ລວມ​ແລ້ວ, ຍອດ​ຈຳນວນ​ທຶນ​ຈົດ​ທະບຽນ​ໃໝ່​ແລະທຶນ​ລົງ​ຕື່ມ​ອີກ​ໃນ​ປີ 2018 ​ແມ່ນ 25.572,9 ລ້ານ​ໂດ​ລາ​ສະຫະລັດ, ຫຼຸດ​ລົງ 13,9% ​ເມື່ອ​ທຽບ​ກັບ​ເວລາ​ດຽວ​ກັນ​ຂອງ​ປີ 2017. ​ເງິນ​ລົງທຶນ​ໂດຍ​ກົງຈາກ​ຕ່າງປະ​ເທດ​ທີ່​ປະຕິບັດ​ໃນ​ປີ 2018 ​ໄດ້​ປະມານ 19,1 ຕື້​ໂດ​ລາ​ສະຫະລັດ, ​ເພີ່ມ​ຂຶ້ນ 9,1% ​ເມື່ອ​ທຽບ​ກັບ​ປີ 2017.

7- ອັດຕາ​ເງິ​ນເຟີ້​ຖືກ​ຄວບ​ຄຸມ

ດັດ​ຊະນີ​ລາຄາ​ຜູ້​ບໍລິ​ໂພ​ກ (CPI) ​ເດືອນ 12-2018 ຫຼຸດ​ລົງ 0,25% ​ເມື່ອ​ທຽບ​ກັບ​ເດືອນ​ກ່ອນ; CPI ສະ​ເລ່ຍປີ 2018 ​ເພີ່ມ​ຂຶ້ນ 3,54% ​ເມື່ອ​ທຽບ​ກັບ​ປີ 2017, ຕ່ຳ​ກວ່າ​ເປົ້າ​ໝາຍ​ທີ່​ສະພາ​ແຫ່ງ​ຊາດ​ວາງ​ໄວ້; CPI ​ເດືອນ 12-2018 ​ເພີ່ມ​ຂຶ້ນ 2,98% ເມື່ອ​ທຽບ​ກັບ​ເດືອນ 12-2017. ອັດຕາ​ເງິນ​ເຟີ້​ພື້ນຖານ​ເດືອນ 12-2018 ​ເພີ່ມ​ຂຶ້ນ 0,09% ເມື່ອ​ທຽບ​ກັບ​ເດືອນ​ກ່ອນ ​ແລະ ​ເພີ່ມ​ຂຶ້ນ 1,7% ເມື່ອ​ທຽບ​ກັບ​ເວລາ​ດຽວ​ກັບ​ຂອງ​ປີກ່ອນ. ອັດຕາ​ເງິນ​ເຟີ້​ພື້ນຖານ​ສະ​ເລ່ຍປີ 2018 ​ເພີ່ມ​ຂຶ້ນ 1,48% ເມື່ອ​ທຽບ​ກັບລະດັບ​ສະ​ເລ່ຍຂອງ​ປີ 2017.

ຄາດ​ຄະ​ເນ​ແງ່​ຫວັງ​ການ​ເຕີບ​ໂຕ ​ແລະ ລະບຸ​ຄວາມ​ສ່ຽງ​ສຳລັບ​ເສດຖະກິດປີໜ້າ

ຕາມ​ທ່ວງທ່າ​ການ​ເຕີບ​ໂຕ​ທາງ​ບວກ​ຂອງ​ປີ 2018, ພື້ນຖານ​ເສດຖະກິດ​ປີ 2019 ສືບ​ຕໍ່​ໄດ້​ຮັບ​ຜົນປະ​ໂຫຍ​ດ​ຈາກບັນດາ​ກຳລັງ​ໜູນ​ທາງ​ເສດຖະກິດ, ລະອຽດ​ຄື:

- ​ໃນ​ການ​ພັດທະນາ​ເສດຖະກິດ​ໂລກ ​ມີ​ຫຼາຍ​ປັດ​ໄຈ​ທີ່​ສະໜັບສະໜຸນຢ່າງ​ແຂງ​ແຮງ​ຕໍ່ການ​ເຕີບ​ໂຕ​ຂອງ​ຫວຽດນາມ, ປະກອບ​ດ້ວຍ: ຄວາມ​ສາມາດ​ເຕີບ​ໂຕ​ເປັນ​ຢ່າງ​ດີ​ຂອງ​ເສດຖະກິດ​ໂລກ, ​ໃນ​ນັ້ນ ພິ​ເສດ​ແມ່ນ​ຄວາມ​ສາມາດ​ເຕີບ​ໂຕ​ຂອງ​ເສດຖະກິດ​ອາ​ເມ​ລິ​ກາ; ຂະ​ບວນການ​ເຊື່ອມ​ໂຍງ​ເສດຖະກິດ​ສາກົນຍັງ​ໄດ້​ຮັບ​ການຍູ້​ແຮງ.

- ສະພາບ​ແວດ​ລ້ອມ​ການ​ທຸລະ​ກິດ​ນັບ​ມື້​ນັບ​ໄດ້​ຮັບ​ການ​ປັບປຸງ, ພິ​ເສດ​ແມ່ນ​ການ​ປະຕິ​ຮູບ​ເງື່ອນ​ໄຂ​ການ​ທຸລະ​ກິດ​ຢ່າງ​ແຂງ​ແຮງ, ການ​ປ່ຽນ​ແປງ​ໃນ​ຂັ້ນ​ຕອນ​ການ​ບໍລິຫານ. ລັດຖະບານ​ກຳລັງ​ພະຍາຍາມ “ສ້າງສັນ” ​ເພື່ອ​ສ້າງ​ສະພາບ​ແວດ​ລ້ອມ​ການ​ທຸລະ​ກິດ​ທີ່​ສະດວກ​ດີກ​ວ່າອີກ​ສຳລັບ​ວິ​ສາ​ຫະກິດ.

- ​ເສດຖະກິດ​ຫວຽດນາມ​ນັບ​ມື້​ນັບ​ເຊື່ອມ​ໂຍງ​ຢ່າງ​ກວ້າງຂວາງ​ເລິກ​ເຊິ່ງ, ສັນຍາ​ການ​ຄ້າ​ທີ່​ສຳຄັນ​ຫຼາຍ​ສະບັບ​ໄດ້​ຖືກ​ລົງ​ນາມ​ໃນ​ເວລາ​ທີ່​ຜ່ານ​ມາ ​ແລະ ຈະ​ມີ​ຜົນ​ບັງຄັບ​ໃຊ້​ໃນ​ໄວໆນີ້. ມີ 16 ສັນຍາ​ການ​ຄ້າ​ເສລີ (FTA) ​ໄດ້​ແລະ​ພວມ​​ໄດ້​ຮັບ​ການເຈລະຈາ, ລົງ​ນາມ, 10 FTA ມີ​ຜົນ​ບັງຄັບ​ໃຊ້; ຕະຫຼາດ​ຜູ້​ບໍລິ​ໂພ​ກຂອງ​ຫວຽດນາມ​ນັບ​ມື້​ນັບ​​ເປີດ​ກວ້າງ, ສ້າງ​ໂອກາດ​ເພີ່ມ​ຄວາມ​ຕ້ອງການ​ສຳລັບ​ສິນຄ້າ​ຂອງ​ຫວຽດນາມ.

ສູນ​ຂໍ້​ມູນ​ຂ່າວສານ​ແລະ​ພະຍາກອນ​ເສດຖກິດ-ສັຄົມ​ແຫ່ງ​ຊາດ​​ໄດ້ສ້າງ​ສອງ​ແຜນ​ສະບັບຄາດ​ຄະ​ເນ​ການ​ເຕີບ​ໂຕ​ເສດຖະກິດ​ຫວຽດນາມ​ປີ 2019 (​ເບີ່​ງຕາຕະລາງ​ທີ 1). ​ໃນ​ນັ້ນ, ​ແຜນ​ສະບັບ​ພື້ນຖານ​ແມ່ນ​ແຜນ​ສະ​ບັບທີ່​ອາດ​ຈະ​ເປັນ​ໄປ​ໄດ້​ຫຼາຍ​ທີ່​ສຸດ.

ຄວາມ​ສ່ຽງ​ບາງ​ຢ່າງຂອງ​ພື້ນຖານ​ເສດຖະກິດ​ໃນ​ປີ 2019 ທີ່​ສາມາດກ່າວ​ໄດ້​ຄື:

1- ຄວາມ​ສ່ຽງ​ທີ່​ຮ້າຍ​ແຮງ​ຈາກ​ພາຍ​ນອກ

ທີ​ໜຶ່ງ, ຄວາມ​ຂັດ​ແຍ້​ງ​ເພີ່ມ​ຂຶ້ນ​ໃນ​ການ​ພົວພັນ​ທາງການ​ຄ້າລະຫວ່າງ​ອາ​ເມ​ລິ​ກາ - ຈີນ ພວມ​ຍູ້​ເສດຖະກິດ​ຫວຽດນາມ​ເຂົ້າ​ໃສ່​ສິ່ງ​ທ້າ​ທາຍ​​ແລະຄວາມ​ສ່ຽງຕ່າງໆ.

ຖ້າ​ຫາກ​ສົງຄາມ​ການ​ຄ້າ​ລະຫວ່າງ​ອາ​ເມ​ລິ​ການ​ແລະ​ຈີນ​ລະ​ເບີດ​ຂຶ້ນ​ແລະ​ເປີດ​ກວ້າງດ້ວຍ​ການ​ເຂົ້າ​ຮ່ວມ​ຂອງ​ຫຼາຍ​ປະ​ເທດ ມັນ​ຈະຍູ້​ບັນດາ​ປະ​ເທດ​ທີ່​ມີ​ເສດຖະກິດ​ຂະໜາດ​ນ້ອຍ​ແລະ​ເປີກ ​ເຂົ້າ​ໃນ​ສະຖານະ​ການ​ຄວາມ​ສ່ຽງ​ສູງ ຍ້ອນ​ວ່າ ຄວາມ​ໄວ​ໃນ​ການ​ເຕີບ​ໂຕ, ວຽກ​ເຮັດ​ງານ​ທຳ, ການ​ລົງທຶນຂອງ​ບັນດາ​ປະ​ເທດ​​ເຫຼົ່ານີ້ ຂຶ້ນ​ຢູ່​ກັບ​ຂະໜາດຂອງ​ການ​ຄ້າ​ຂາຍກັບ​ໂລກ. ຍິ່ງ​ກວ່າ​ນັ້ນ, ກໍລະນີ​ຫວຽດນາມ​ແມ່ນ​ພິ​ເສດ​ພໍ​ຄວນ​ໃນ​ສົງ​ຄາມ​ການ​ຄ້າອາ​ເມ​ລິ​ກາ-ຈີນ. ອາ​ເມ​ລະກາ​ແມ່ນ​ຕະຫຼາດ​ນຳ​ເຂົ້າ​ໃຫຍ່​ທີ່​ສຸດ​ຂອງ​ຫວຽດນາມ, ​ໃນ​ຂະນະ​ນັ້ນ ຈີນ​ແມ່ນ​ຕະຫຼາດ​ທີ່​ຫວຽດນາມ​ນຳ​ເຂົ້າ​ໃຫຍ່​ທີ່​ສຸດ. ມີ​ຫຼາຍ​ຜະລິດ​ຕະພັນ, ຫວຽດນາມ​ເປັນປະ​ເທດ​ສື່​ກາງ​ໃນ​ພວງ​ພະນັງ​ຄຸນ​ຄ່າ, ໝາຍ​ຄວາມ​ວ່າ ຫວຽດນາມນຳ​ເຂົ້າ​ວັດຖຸ​ດິດຈາກ​ຈີນ​ເພື່ອ​ຜະລິດ, ປຸງ​ແຕ່ງ, ປະກອບ​ຜະລິດ​ຕະພັນ ​ແລ້ວ​ສົ່ງ​ອອກ​ໄປ​ຍັງ​ອາ​ເມ​ລິ​ຫາ. ດັ່ງ​ນັ້ນ, ຄວາມ​ຂັດ​ແຍ້​ງ​ເຄັ່ງ​ຕຶງ​ໃນ​ເວ​ລາ​ທີ່​ຜ່ານ​ມາ​ມໍ່​ນີ້ລະຫວ່າງ​ສອງ​ພື້ນຖານ​ເສດຖະກິດ “ຍັກ​ໃຫຍ່” ຈະ​ເຮັດ​ໃຫ້​ເສດຖະກິດຂອງ​ຫວຽດນາມມີ​ຄວາມ​ສ່ຽງ​ສູງ, ​ສົ່ງ​ຜົນ​ກະທົບ​ທາງ​ລົບ​ເຖິງ​ເປົ້າ​ໝາຍ​ການ​ເຕີບ​ໂຕ​ໄວ​ແລະ​ຍືນ​ຍົງ.

ທີ​ສອງ, ຂະ​ບວນການ “​ເສື້ອ​ເຫຼືອງ" ຢູ່​ປະ​ເທດ​ຝຣັ່ງ ​ໄດ້​ສົ່ງ​ສັນຍານ​ເຕືອນ​ກ່ຽວ​ກັບ​ຄວາ​ມ​ໄວ​​ໃນ​ການ​ເພີ່ມ​ພາສີ​ກະທົບ​ເຖິງ​ຄວາມ​ໝັ້ນຄົງທາງ​ສັງຄົມ.

ການທີ່​ລັດຖະບານ​ຝຣັ່ງຕົກລົງ​ເພີ່​ມລາຄາ​ນ້ຳມັນ​ເຊື້ອ​​​ໄຟ​ໄດ້​ກໍ່​ໃຫ້​ເກີດ​ການ​ປະ​ທ້ວງ​ຢູ່​ນະຄອນ​ປາຣີ​ໃນ​ເດືອນທັນວາ 2018. ​ເພີ່ມ​ລາຄາ​ນ້ຳມັນ - ​ເພື່ອ​ປົກ​ປັກ​ຮັກສາ​ສິ່ງ​ແວດ​ລ້ອມ ​ແລະ ດຸນ​ງົບປະມານ - ​ໄດ້​ເພີ່ມ​ພາລະ​ອັນ​ໜັກໜ່ວງ​ຕື່ມ​ອີກ​ໃຫ້​ກັບ​ຜູ້​ທຸກ​ຍາກ​ໃນ​ປະ​ເທດ​ຝຣັ່ງ. ​ເຖິງ​ວ່າ​ລັດຖະບານ​ຝຣັ່ງ​ໄດ້​ປະກາດຢຸດຊົ່ວຄາວ​ແຜນການ​ເພີ່ມ​ພາສີ​ນ້ຳມັນ​ເຊື້ອ​ໄຟ ​ເພື່ອ​ປອບ​ໃຈ​ຜູ້​ປະ​ທ້ວງ, ​ແຕ່​ຂະ​ບວນການ​ປະ​ທ້ວງຍັງ​ສືບ​ຕໍ່​ແລະ​ເຄັ່ງ​ຕຶງ. ສະພາບ​ການ​ປະ​ເທດ​ຝຣັ່ງ​ມີຜົນກະທົບ​ໂດຍ​ກົງ​ແລະທາງ​ອ້ອ​ມ ກໍ່​ຄື​ນຳ​ມາ​ຊຶ່ງ​ບົດຮຽນ​ໃຫ້​ປະ​ເທດ​ເຮົາ ​ໃນ 2 ດ້ານ: ທີ​ໜຶ່ງ, ​ເສດຖະກິດ​ຂອງ​ປະ​ເທດ​ຝຣັ່ງ​ແມ່ນ​ເສດຖະກິດ​ຂະໜາດ​ໃຫຍ່​ຂອງ​ເອີຣົບ, ດັ່ງ​ນັ້ນ ​ເສດຖະກິດ​ຝຣັ່ງ​ໄດ້​ຮັບ​ຜົນ​ກະທົບ ມັນ​ຈະ​ສົ່ງ​ຜົນ​ກະທົບ​ເຖິງ​ເອີຣົບ​ເວົ້າ​ລວມ ​ແລະ ມັນ​ຈະ​ສົ່ງ​ຜົນ​ກະທົບ​ທີ່​ແນ່ນ​ອນ​ເຖິງການ​ນຳ​ເຂົ້າ​ສິນຄ້າ​ຈາກ​ປະ​ເທດ​ເຮົາ. ທີ​ສອງ, ການ​ເພີ່ມ​ລາຄາ​ນ້ຳມັນ​ເຊື້​ອ​ໄ​ຟຢ່າງ​ລຽນຕິດຈະ​ເປັນ​ຜົນ​ກະທົບ​ເຖິງ​ຜູ້​ທຸດຍາກ​ຫຼາຍ​ກວ່າ​ທຽບ​ກັບ​ຄົນ​ຮັ່ງມີ.

ທີ​ສາມ, ທະນາຄານ​ກາງ​ສະຫະລັດ​ເພີ່ມ​ອັດຕາ​ດອກ​ເບ້ຍ​ອາດ​ຈະ​ເປັນ​ຜົນ​ກະທົບ​ເຖິງມູນ​ຄ່າ​ສິນຄ້າ​ສົ່ງອອກ​ຂອງ​ຫວຽດນາມ ​ແລະ ອັດຕາ​ແລກປ່ຽນ​ຂອງ​ເງິນ​ດົ່ງ​ຫວຽດນາມ ​ໃນ​ລະດັບ​ທີ່​ແນ່ນອນ.

ວັນ​ທີ 19-12-2018, ທະນາຄານ​ກາງ​ສະຫະລັດ (FED) ​ໄດ້​ປະຊຸມ​ແລະ​ເພີ່ມ​ອັດຕາ​ດອກ​ເບ້ຍ​ຂຶ້ນ 0,25%. ດັ່ງ​ນັ້ນ, ນີ້​ແມ່ນ​ຄັ້ງ​ທີ່ 4 ​ໃນ​ປີ 2018 ​ແລະ ​ແມ່ນ​ຄັ້ງ​ທີ 9 ນັບ​ແຕ່​ເດືອນ 12-2015 ທີ່ FED ເພີ່ມອັດຕາ​ດອກ​ເບ້ຍ. FED ​ເພີ່ມ​ອັດຕາ​ດອກ​ເບ້ຍ ຍ້ອນ​ຢ້ານ​ອັດຕາ​ດ​ເງິນ​ເຟີ້​ຢູ່​ສະຫະລັດ​ຂຶ້ນ​ສູງ​ກວ່າ​ລະດັບ​ເປົ້າ​ໝາຍ 2% ​ແລະ ຕະຫຼາດວຽກ​ເຮັດ​ງານ​ທຳ​ໃນ​ອາ​ເມ​ລິ​ກາກຳລັງ​ຂະຫຍາຍຕົວ​ດີ​ພໍ​ຄວນ. ດ້ວຍ​ການ​ເພີ່ມ​ອັດຕາ​ດອກ​ເບ້ຍ​ຄັ້ງ​ນີ້, ຄາດ​ຄະ​ເນວ່າການ​ເຕີບ​ໂຕ​ເສດຖະກິດ​ຂອງ​ອາ​ເມ​ລິ​ກາ​ຈະ​ຫຼຸດ​ລົງ (​ແຕ່​ຫຼຸດ​ບໍ່​ຫຼາຍ) ​ແລະ ​ເລື່ອງ​ນີ້​ອາດ​ຈະ​ເປັນ​ຜົນ​ກະທົບ​ເຖິງ​ການ​ສົ່ງ​ອອກ​ຂອງ​ປະ​ເທດ​ເຮົາ (​ແຕ່ອາດ​ຈະບໍ່​ຫຼາຍ). ນອກຈາກ​ນັ້ນ, ການ​ເພີ່ມ​ອັດຕາ​ດອກ​ເບ້ຍ​ຂອງ FED ອາດ​ຈະ​ກະທົບ​ເຖິງ​ອັດຕາ​ແລກປ່ຽນ​ລະຫວ່າງ​ເງິນ​ດົ່ງ ກັບ​ເງິນ​ໂດ​ລາ​ສະຫະລັດ ​ຫຼື ​ເງິນ​ເອີ​ໂຣ.

2- ບັນດາ​ຂໍ້​ຈຳກັດ​ຈາກ​ພາຍ​ໃນ​ເສດຖະກິດ

ທີ​ໜຶ່ງ, ພື້ນ​ທີ່ຂອງ​ນະ​ໂຍບາຍ​ການຄັງ​ຍັງ​ແຄບ, ບໍ່​ມີ​ພື້ນ​ທີ່​ພຽງພໍ​ເພື່ອ​ຕອບ​ສະໜອງ​ຕໍ່​ແຮງ​ກະ​ແທກ​ຈາ​ກພາຍ​ນອກ.

ສ່ວນ​ໃຫຍ່​ຂອງ​ການ​ໃຊ້​ຈ່າຍ​ງົບປະມານ​ແມ່ນ​ຄ່າ​ໃຊ້​ຈ່າຍ​ທີ່​ເກີດ​ຂຶ້ນ​ປະຈຳ, ​ໃນ​ນັ້ນ​ມີ​ການ​ໃຊ້​ຈ່າຍສຳລັບ​ກົງຈັກ, ​ໃຫ້ຄົນ. ​ເຖິງວ່າ​ພັກ​ແລະ​ລັດ​ໄດ້ພະຍາຍາມສັບ​ຊ້ອນ​ການ​ບັນຈຸ​​ໃຫ້​ກະທັດ​ລັດ, ຈັດ​ຕັ້ງກົງຈັກ​ຄືນ​ໃໝ່, ​ແຕ່​ຈຳນວນ​ພະນັກງານ​ໃນ​ບັນຈຸ​ປີ 2018 ຍັງ​ເພີ່ມ​ຂຶ້ນ​ທຽບ​ກັບ​ປີ 2017. ດັ່ງ​ນັ້ນ, ການ​ໃຊ້​ຈ່າຍ​ທີ່​ເກີດ​ຂຶ້ນ​ປະຈຳ​ໃນ​ລາຍ​ຈ່າຍ​ງົບປະມານ​ທັງ​ໝົດຈະບໍ່​ສາມາດ​ຫຼຸດ​ລົງ​ຢ່າງ​ໄວ​ໄດ້. ​ເພື່ອລົດການ​ໃຊ້​ຈ່າຍ​ເກີນ​ງົບປະມານ, ລັດຖະບານ​ຈຳ​ເປັນຕ້ອງ​ເພີ່ມ​ລາຍ​ໄດ້. ​ເພີ່ມ​ລາຍຮັບ​ງົບປະ​ມານ​ໃນ​ເວລາ​ອັນໃກ້​ນີ້​ແມ່ນຫຍຸ້ງ​ຍາກ​ທີ່​ສຸດ. ນະ​ໂຍບາຍ​ການຄັງ (ຜ່ານ​ພາສີ​ແລະ​ການ​ໃຊ້​ຈ່າຍ​ງົບປະມານ) ຖືກ​ຖື​ວ່າ​ເປັນ​ເຄື່ອງ​ມືທີ່​ສຳຄັນ​ເພື່ອຕອບ​ສະໜອງ​ຕໍ່​ແຮງ​ກະ​ແທກ​ຈາ​ກພາຍ​ນອກ, ​ແຕ່​ດ້ວຍ​ລາຍ​ຈ່າຍ​ງົບປະມານບໍ່​ສາມາດ​ຫຼຸດ​ລົງ​ໄດ້, ລາຍ​ຮັບ​ງົບປະ​ມານ​ບໍ່​ສາມາດ​ເພີ່ມ​ຂຶ້ນ​ຢ່າງ​ໄວ ​ແລະ ການ​ຂາດ​ດຸນ​ງົບປະມານ​ບໍ່​ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ ດັ່ງ​ນັ້ນ ພື້ນ​ທີ່​ນຳ​ໃຊ້​ນະ​ໂຍບາຍ​ການຄັງ​ເພື່ອ​ຕອບ​ສະໜອງຕໍ່​ການ​ຜັນ​ຜວນ​ຂອງ​ເສດຖະກິດ​ຈະ​ຖືກ​ຮັດ​ແຄ​ບ.

ທີ​ສອງ, ພື້ນ​ທີ່​ຂອງ​ນະ​ໂຍບາຍ​ການ​ເງິນ​ບໍ່​ໃຫຍ່​ອີກ​ຕໍ່​ໄປ.

ພື້ນ​ທີ່​ສຳລັບ​ການ​ປະຕິບັດ​ນະ​ໂຍບາຍ​ການ​ເງິນ​ ແນ​ໃສ່​ຊຸກຍູ້​ການ​ເຕີບ​ໂຕ ຫຼື​ຕອບ​ສະໜອງ​ຕໍ່​ແຮງ​ກະ​ແທກ​ຈາກ​ພາຍ​ໃນ ກໍ່​ຄື​ແຮງ​ກະ​ແທກ​ຈາກ​ພາຍ​ນອກ​ນັ້ນ ບໍ່​ໃຫຍ່​ແທ້ ຍ້ອນ​ເຫດຜົນ​ຈຳນວນ​ໜຶ່ງ​ດັ່ງ​ລຸ່ມນີ້:

- ນະ​ໂຍບາຍ​ການ​ເງິນຍາກ​ທີ່​ຈະ​ຂະຫຍາຍຕົວ​ເພື່ອ​ຫຼຸດ​ອັດຕາ​ດອກ​ເບ້ຍ ​ແນ​ໃສ່​ຫຼຸດຜ່ອນ​ຄ່າ​ໃຊ້​ຈ່າຍ​ໃນ​ການ​ກູ້​ຢືມສຳລັບ​ວິ​ສາ​ຫະກິດ, ຊ່ວຍວິ​ສາ​ຫະກິດ​ເປີດ​ກວ້າງ​ການ​ຜະລິດ ​ເພາະ​ວ່າອັດຕາ​ດອກ​ເບ້ຍ​ຢູ່​ໃນ​ລະດັບ​ສູງ​ໃນ​ປະຈຸ​ບັນບໍ່​ແມ່ນ​ຍ້ອນ​ນະ​ໂຍບາຍ​ການ​ເງິນ​ໂຍະຍານ​​ຫຼື​ຮັດ​ແຄບ ​ແຕ່​ຍ້ອນ​ບັນດາ​ປັດ​ໄຈ​ອື່ນ​ເຊັ່ນ ໜີ້​ສິນ​ຮ້າຍ. ດັ່ງ​ນັ້ນ, ການ​ປະຕິບັດນະ​ໂຍບາຍ​ການ​ເງິນ​ໂຍະຍານ​ບໍ່​ພຽງ​ແຕ່​ບໍ່​ເຮັດ​ໃຫ້​ອັດຕາ​ດອກ​ເບ້ຍຫຼຸດ​ລົງ ​ແຕ່ອາດ​ຈະ​ເຮັດ​ໃຫ້​ອັດຕາ​ໜີ້​ສິນ​ຮ້າຍ​ເພີ່ມ​ຂຶ້ນ ​ແລະ ກະ​ຕູ້​ມ​​ອັດຕະດອກ​ເບ້ຍ​ເພີ່ມ​ຂຶ້ນ​ອີກ.

- ນະ​ໂຍບາຍ​ການ​ເງິນ​ເປີດ​ກວ້າງ​ແນ​ໃສ່​ຊ່ວຍ​ໜູນ​ການ​ເຕີບ​ໂຕ​ໄວ ຈະ​ເຮັດ​ໃຫ້​ເສດຖະກິດ​ມີ​ຄວາມ​ສ່ຽງ​ຈາກ​ເງິນ​ເຟີ້. ດັ່ງ​ນັ້ນ, ນະ​ໂຍບາຍ​ການ​ເງິນ​ເປີດ​ກວ້າງ​ຈະສ້າງ​ຄວາມ​ສ່ຽງ​ດ້ານ​ເງິນ​ເຟີ້​ໃນ​ພື້ນຖານ​ເສດຖະກິດ.

ທີ​ສາມ, ປະກາດ​ໃຊ້​ນະ​ໂຍບາຍ​ຫຼາຍ, ​ແຕ່​ຍັງ​ທັບ​ຊ້ອນ​ກັນ, ຂັດ​ແຍ້​ງ ຂັດ​ຂວາ​ງ​ເຊິ່ງກັນ​ແລະກັນ, ຂະ​ບວນການ​ປະຕິບັດ​ນະ​ໂຍບາຍ​ຍັງ​ອ່ອ​ນ​ແອ.

ອີງຕາມການ​ສະຫຼຸບ​ສັງ​ລວມຂອງຄະນະເຮັດວຽກຂອງນາຍົດລັດຖະມົນຕີ, ປະຈຸ​ບັນ​ມີ​ນະ​ໂຍບາຍ​ຫຼາຍ​ໂພດ ​ໃນ​ຂະນະ​ນັ້ນ​ຂອດ​ການ​ປະຕິບັດ​ນະ​ໂຍບາຍ​ພັດ​ຍັງ​ອ່ອນ​ຫຼາຍ. ມີ​ຫຼາຍ​ນະ​ໂຍບາຍ​ບໍ່​ພຽງ​ແຕ່​ພາ​ໃຫ້​ເກີດ​ບັນດາ​ບັນຫາ​ເທິງ​ນີ້​ເທົ່າ​ນັ້ນ ຫາກ​ຍັງ​ເປັນທີ່​ດິນ​ອຸດົມສົມບູນ​ເພື່ອ​ໃຫ້​ກຸ່ມ​​ຜົນ​ປະ​ໂຫຍ​ດສວຍ​ໃຊ້: ບັນດາ​ກຸ່ມ​ຜົນ​ປະ​ໂຫຍ​ດ (​ໃນ​ລະດັບ​ກະຊວງ, ຂະ​ແໜງ​ການ​ ຫຼື​ທ້ອງ​ຖິ່ນ) ຈະ​ນຳ​ໃຊ້​ນະ​ໂຍບາຍ​ໃດ​ທີ່​ມີ​ຜົນ​ປະ​ໂຫຍ​ດ​​ແກ່​ພວກເຂົາ.

ຂໍ້​ສະ​ເໜີ​ແນະ​ນະ​ໂຍບາຍ​ບາງ​ຢ່າງ

ຈາກ​ການ​ວິ​ເຄາະ​ໄຈ້​ແຍກ​ເທິງ​ນີ້, ​ເພື່ອ​ໃຫ້​ພື້ນຖານ​ເສດຖະກິດ​ບັນລຸ​ເປົ້າ​ໝາຍ​ການ​ເຕີບ​ໂຕ​ໄວ​ແລະ​ຍືນ​ຍົງ​ໃນ​ຊຸມ​ປີໜ້າ, ລັດຖະບານ​ຄວນ​ປະຕິບັດ​ວິທີ​ແກ້​ຈຳນ​ວນໜຶ່ງ​ດັ່ງ​ຕໍ່​ໄປ​ນີ້:

1- ກ່ຽວ​ກັບ​ສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ

ການປັບປຸງ​ແລະ​ເຮັດ​ໃຫ້​ເສດຖະກິດ​ມະຫາ​ພາກ​ມີ​ສະຖຽນ​ລະ​ພາບ ຕ້ອງ​ໄດ້​ຖື​ວ່າ​ເປັນ​ບຸລິມະສິດສູງ​ສຸດ​ຂອງ​ລັດຖະບານ​ໃນ​ປີ 2019. ດ້ວຍ​ເປົ້າໝາຍຮັກສາ​ສະຖຽນ​ລະ​ພາບ​ຂອງ​ເສດຖະກິດ​ມະຫາ​ພາກ, ລັດຖະບານ​ຄວນ:

ທີ​ໜຶ່ງ, ນະ​ໂຍບາຍ​ເງິນຕາ​ແນ​ໃສ່​ເປົ້າ​ໝາຍ​ອັດຕາ​ເງິນ​ເຟີ້ຕ່ຳກວ່າ 4% ​ແລະ ຮັບປະກັນສະພາບ​ຄ່ອງ​ໃນ​ຕະຫຼາດ​ການ​ເງິນ.

ທະນາຄານ​ແຫ່ງ​ລັດ​ຫວຽດນາມ​ຄວນ​ສືບ​ຕໍ່​ຕິດຕາມການ​ເຄື່ອນ​ໄຫວ​ຂອງ FED ​ແລະ ພັດທະນາ​ການ​ຂອງ​ສົງຄາມ​ການ​ຄ້າ​ລະຫວ່າງ​ອາ​ເມ​ລິ​ກາ​ກັບ​ຈີນ, ການ​ເຄື່ອນ​ໄຫວ​ເພີ່ມ​ອັດຕາ​ດອກ​ເບ້ຍ​ຂອງ​ລັດຖະບານ​ກາງ​ຈຳນວນ​ໜຶ່ງ​ໃນ​ໂລກ ​ເພື່ອ​ມີ​ການ​ຕອບ​ສະໜອງດັດ​ປັບ​ນະ​ໂຍບາຍ​ການ​ເງິນ, ນະ​ໂຍບາຍອັດຕາ​ແລກປ່ຽນ​ ໃຫ້​ສອດຄ່ອງ​ເໝາະ​ສົມ, ທັນ​ການ.

ທີ​ສອງ, ນະ​ໂຍບາຍ​ການຄັງ​ຄວນ​​ແນ​ໃສ່​ເປົ້າ​ໝາຍສືບ​ຕໍ່ຫຼຸດຜ່ອນ​ການ​ຂາດ​ດຸນ​ງົບ​ປະມານ. ການ​ຫຼຸດຜ່ອນ​ການ​ຂາດ​ດຸນ​ງົບ​ປະມານມີ​ສອງ​ພາກສ່ວນ: ​ເພີ່ມ​ລາຍ​ຮັບ ​ແລະ ​ຫຼຸດຜ່ອນ​ການ​ໃຊ້​ຈ່າຍ.

ການ​ເພີ່ມ​ລາຍ​ຮັບ​ງົບປະມານ​ຄວນ​ແນ​ໃສ່​ເປົ້າໝາຍຫຼຸດຜ່ອນ​ການ​ສູນ​ເສຍ​ລາຍ​ໄດ້, ​ເພີ່ມ​ທະວີ​ການ “ອັດ​ຊ່ອງ​ຫວ່າງ” ​ໃນ​ຂະ​ບວນການ​ເກັບງົບປະມານ ​ເພື່ອ​ໃຫ້​ບ້ວງ​ພາສີ​ຕ່າງໆ​ຈາກ​ວິ​ສາ​ຫະກິດ​ແລະ​ປະຊາຊົນ​ເຂົ້າ​ງົບປະມານ​ແຫ່ງ​ລັດ​ໂດຍ​ກົງ ​ໂດຍ​ບໍ່​ຖືກ “ຮົ່ວ​ໄຫຼ”. ກ່ຽວ​ກັບ​ການ​ໃຊ້​ຈ່າຍ​ງົບປະມານ​ແຫ່ງ​ລັດ, ລັດຖະບານ​ຕ້ອງ​ຄວບ​ຄຸມ​ການ​ໃຊ້​ຈ່າຍ​ງົບປະມານ​ຢ່າງ​ແໜ້ນ​ແຟ້ນ, ​ໂດຍ​ສະ​ເພາະ​ແມ່ນ​ການ​ໃຊ້​ຈ່າຍ​ປະຈຳ ​ແລະ ບັນດາ​ວົງ​ເງິນ​ທີ່​ລົງ​ໃສ່​ໂຄງການ​ຕ່າງໆ.

2- ຊຸກຍູ້​ການ​ບັງຄັບ​ໃຊ້​ນະ​ໂຍບາຍ

ທີ​ໜຶ່ງ, ທົບ​ທວນ​ນະ​ໂຍບາຍ ​ເພື່ອ​ເບິ່ງວ່າ​ນະ​ໂຍບາຍ​ໃດ​ດີ ​ແຕ່ບໍ່​ໄດ້​ນຳ​ໄປ​ໃຊ້, ນະ​ໂຍບາຍ​ໃດບໍ່​ຕິດ​ແທດ​ກັບ​ຄວາມ​ເປັນ​ຈິງ ​ແລະ ນະ​ໂຍບາຍ​ໃດ​ມີ​ຄວາມ​ຕິດ​ຂັດ​ຊຶ່ງ​ກັນ​ແລະ​ກັນ ​​ຈາກ​ນັ້ນ​​ມີ​ມາດ​ຕະການ​ເພື່ອແກ້​ໄຂ.

ທີ​ສອງ, ມອບ​ຄວາມ​ຮັບຜິດຊອບ​ໃຫ້​ແຕ່​ລະ​ກະຊວງ, ຂະ​ແໜງ​ການ​ໃນ​ການ​ອອກ​ແບບ​​ແລະ​ຜັນ​ຂະຫຍາຍ​ນະ​ໂຍບາຍ. ​ແຕ່​ລະ​ກະຊວງ, ຂະ​ແໜງ​ການ​ມີ​ພາກສ່ວນ​ປະ​ເມີນປະສິດທິພາບ, ປະສິດ​ທີ​ຜົນ​ຂອງ​ການ​ປະຕິບັດ​ແຕ່​ລະ​ມາດ​ຕະການ, ນະ​ໂຍບາຍ. ຖ້າ​ມີ​ນະ​ໂຍບາຍ​ໃດ​ບັງຄັບ​ໃຊ້ບໍ່​ໄດ້​ຍ້ອນຕິດ​ຂັດ​ກັບ​ຂໍ້​ກຳນົດ, ນະ​ໂຍບາຍ​ຂອງ​ກະຊວງ​ອື່ນ ​ແມ່ນ​ນາ​ຍົກ​ລັດຖະມົນຕີ​ອາດ​ຈະ​ມອບ​ໃຫ້ ຫຼືຊີ້​ນຳ​ການ​ຈັດການ​ແກ້​ໄຂ​ອຸປະສັກ​ໂດຍ​ກົງ.

ທີ​ສາມ, ການ​ອອກ​ແບບ​ນະ​ໂຍບາຍ​​ໃນ​ສະພາບ​ການ​ປະຈຸ​ບັນຕ້ອງ​ມີ​ການ​ປະຕິ​ສຳພັນ​ລະຫວ່າງ​ອົງການວາງ​ກຳນົດ, ກົງຈັກ​ປະຕິບັດ ​ແລະ ຜູ້​ຮັບ​ຜົນປະ​ໂຫຍ​ດຫຼືຜູ້​ຖືກ​ຜົນ​ກະທົບ. ວິທີ​ເຂົ້າ​ເຖິງ​ຫຼາຍ​ດ້ານ​ໃນ​ການ​ສ້າງນະ​ໂຍບາຍ​ເຮັດ​ໃຫ້ນະ​ໂຍບາຍ​ຕິດແທດ​ກັບ​ຄວາມ​ເປັນ​ຈິງ ​ແລະມີ​ຄວາມ​ເປັນ​ໄປ​ໄດ້​ສູງ, ຄວາມ​ສາມາດ​ໃນ​ການ​ປະຕິບັດ​ໄດ້​ຈະ​ໄວ​ແລະ​ມີ​ປະສິດທິ​ຜົນ.

3- ຈຳກັດ​ຕົ້ນ​ກຳ​ເນີ​ດທີ່​ອາດ​ຈະ​ກໍ່​ຄວາມ​ເຄັ່ງ​ຕຶງ​ທາງ​ສັງຄົມ

ປະຈຸ​ບັນ, ມີ​ສອງບໍ່​ເກີ​ດທີ່​ສາມາດ​ຈະ​ສ້າງ​ຄວາ​ມບໍ່​ສະຫງົບ​ທາງ​ສັງຄົມ​ທີ່​ໃຫຍ່​ທີ່​ສຸດ​ໃນ​ປະ​ເທດ​ເຮົາ​ຄື ການ​ເກັບ​ພາສີ​ສິ່ງ​ແວດ​ລ້ອມ​ສຳລັບນ້ຳມັນ​ເຊື້ອ​ໄຟ ​ແລະ ສະຖານີ​ເກັບ​ຄ່າ​ຜ່ານ​ທາງ BOT. ​ເພາະສະ​ນັ້ນ, ວິ​ສາ​ຫະກິດ​ຫຼື​ປະຊາຊົນພຽງ​ແຕ່​ສາ​ມາ​ດກະທົບ​ຕອບ​ແບບ​ຫຍໍ້​ທໍ້​ຜ່ານ​ວິທີ​ການ​ທີ່​ບໍ່​ແມ່ນ​ເສດຖະກິດ, ​​ໂດຍບໍ່​​ກະທົບ​ຕອບດ້ວຍ​ການ​ຫຼຸດຜ່ອນການ​ບໍລິ​ໂພ​ກສິ່ງ​ຂອງ​ເຫຼົ່າ​ນີ້.

​ເພື່ອ​ຫຼຸດຜ່ອນຄວາມ​ສາມາດກໍ່​ຄວາມ​ເຄັ່ງ​ຕຶງ​ທາງ​ສັງຄົມ​ຍ້ອນ​ສອງ​ແຫຼ່ງຄື ການ​ເພີ່ມ​ລາຄາ​ນ້ຳມັນ​ເຊື້ອ​ໄຟ ​ແລະ ການ​ເກັບ​ຄ່າ​ຜ່ານ​ທາງ BOT, ລັດຖະບານ​ຄວນ:

ທີ​ໜຶ່ງ, ຄວາມ​ໂປ່​ງ​ໃສ​ໃນ​ການ​ໃຊ້​ພາສີ​ສິ່ງ​ແວດ​ລ້ອມທີ່​ເກັບ​ມາ​ໄດ້​ເພື່ອ​ຈຸດປະສົງ​ດ້ານ​ສິ່ງ​ແວດ​ລ້ອມ (ເປັນ​ຊື່​ຂອງ​ພາສີ) ​ແລະ ຄວາມ​ໂປ່​ງ​ໃສ​ໃນ​ການ​ປະມູນ​ໂຄງການ BOT, ຄວາມ​ໂປ່​ງ​ໃສ​ໃນ​ການກຳນົດ​ລາຄາ, ລາຍ​ຮັບ-ລາຍ​ຈ່າຍ​ທີ່​ກ່ຽວຂ້ອງ​ກັບ​ໂຄງການ BOT.

ທີ​ສອງ, ຮັບ​ເອົາ​ຄວາມ​ຄິດ​ເຫັນ​ຈາກ​ນັກວິທະຍາສາດ, ພະນັກ​ວານ​ຄຸ້ມ​ຄອງ​ທີ່​ມີ​ບົດຮຽນ​ປະສົບ​ການ (ຜ່ານ​ກອງ​ປະຊຸມ​ສຳ​ມະ​ນາ, ການ​ສົນທະນາ, ຜ່ານ​ເວທີ​ປາ​ໄສ​ແລກປ່ຽນຄວາມ​ຄິດ​ເຫັນ​ຕ່າງໆ) ​ເພື່ອ​ໃຫ້ການ​ປ່ຽນ​ແປງ​ໃນ​ວິທີປະຕິບັດ​ງານ, ການ​ປັບ​ພາສີ, ລາຄາ​ນ້ຳມັນ​ເຊື້ອ​ໄຟ ​ແລະ ​ໂຄງການ BOT ມີ​ຄວາມ​ສົມ​ເຫດ​ສົມ​ຜົນ.

ທີ​ສາມ, ສ້າງ​ກົນ​ໄກ​ເພື່ອຮັບ​ຟັງ​ຄວາມ​ເຫັນ​ຂອງ​ຜູ້​ຖືກ​ຜົນ​ກະທົບ, ​ໃຫ້​ຄວາມ​ຄິດ​ເຫັນ​ຂອງພວກ​ເຂົາ​ໄປ​ເຖິງ​ຜູ້​ກຳນົດ​ນະ​ໂຍບາຍທີ່​ມີ​ອຳນາດ. ຫຼັງ​ຈາກ​ນັ້ນ, ບັນດາ​ອົງການ​ຄຸ້ມ​ຄອງ​ຕ້ອງ​ສ້າງພື້ນ​ທີ່​ການ​ສົນທະນາ ​ເພື່ອປັບປຸງ​ສະຖານະ​ການ​ກ່ອນ​ເມື່ອ​ມີ​ການ​ປ່ຽນ​ແປງ​ນະ​ໂຍບາຍ.

4- ຊຸກຍູ້​ການ​ປົວ​ແປງ​ສະພາບ​ແວດ​ລ້ອມ​ການ​ທຸລະ​ກິດ​ໃຫ້​ດີ​ຂຶ້ນ

​ເພື່ອ​ຊຸກຍູ້​ແຮງ​ກວ່າ​ອີກຂະ​ບວນວິວັດ​ການ​ປົວ​ແປງ​ສະພາບ​ແວດ​ລ້ອມ​ການ​ທຸລະ​ກິດ​ໃນ​ເວລາ​ຕໍ່ໜ້າ,  ຕ້ອງການ:

ທີ​ໜຶ່ງ, ສືບ​ຕໍ່​ຄວາມ​ພະຍາຍາມ​ຫຼຸດຜ່ອນ​ຂັ້ນ​ຕອນ​ການ​ບໍລິຫານ, ຕັດ​ໃບ​ອະນຸຍາດ​ນ້ອຍ ​ແລະ ລົບ​ລ້າງ​ບັນດາ​ຂັ້ນ​ຕອນ​ລະບຽບ​ການ​ລົງທຶນ, ທຸລະ​ກິດ​ທີ່​ບໍ່​ຈຳ​ເປັນ. ​ໃນ​ເວລາ​ສ້າງ​ບັນດາ​ບັນທັດຖານ​ທີ່​ລະອຽດ, ຈະ​ແຈ້ງ ​ເພື່ອ​ແບ່ງ​ປະ​ເພດ​ເບິ່ງ​ວ່າ ຂັ້ນ​ຕອນ​ໃດ​ທີ່​ຈຳ​ເປັນ​ຕ້ອງລົບ​ລ້າງ, ຂັ້ນ​ຕອນ​ໃດທີ່​ຍັງ​ເໝາະ​ສົມ​ໃຊ້​ໄດ້ນັ້ນ ອາດ​ຈະ​ມອບ​ໃຫ້​ບັນດາ​ອົງການ​ເຊັ່ນ ຫ້ອງການ​ການ​ຄ້າ​ແລະ​ອຸດສາຫະກຳ​ຫວຽດນາມ (VCCI) ​ເປັນ​ຜູ້ນຳ​ສະ​ເໜີ​ບັນຊີລາຍຊື່ບັນດາ​ຂັ້ນ​ຕອນ​ການ​ບໍລິຫານ​ທີ່​ຕ້ອງ​ລົບ​ລ້າງ ​ແລະ ຫຼັງ​ຈາກ​ນັ້ນ​ມອບ​ໃຫ້​ບັນດາ​ກະຊວງ, ຂະ​ແໜງ​ການ​ທີ່​ກ່ຽວຂ້ອງ​ຈັດການ ​ແກ້​ໄຂ.

ທີ​ສອງ, ຕິດຕາມ​ກວດກາ​ບັນດາ​ກະຊວງ, ຂະ​ແໜງ​ການ​ໃນ​ການ​ປະຕິບັດ​ການຕັດຫຼຸດຜ່ອນ​ຂັ້ນ​ຕອນ​ການລົງທະບຽນ​ທຸລະ​ກິດ​ຕົວ​ຈິງ. ການ​ຕັດ​ຫຼຸດຜ່ອນ​ຂັ້ນ​ຕອນ​ການ​ບໍລິຫານ, ​ໃບ​ອະນຸຍາດ ​ແຕ່​ບໍ່​ຫຼຸດ​ຄ່າ​ໃຊ້​ຈ່າຍ​ໃນ​ການ​​ເຂົ້າຮ່ວມ​ພື້ນຖານ​ເສດຖະກິດ, ຄ່າ​ໃຊ້​ຈ່າຍ​ໃນ​ການ​ເຄື່ອນ​ໄຫວ ​ແລະນັບ​ທັງ​ຄ່າ​ໃຊ້​ຈ່າຍ​​ອອກ​ຈາກ​ພື້ນຖານ​ເສດຖະກິດ​ຂອງ​ວິ​ສາ​ຫະກິດ​ແລ້ວ ການ​ຕັດ​ຫຼຸດຜ່ອນ​ນັ້ນ​ເປັນ​ພຽງ​ຮູບ​ນອກ​ແລະ​ບໍ່​ມີ​ປະສິດທິ​ຜົນ.

ທີ​ສາມ, ອອກ​ແບບ​ບັນດາ​ຊ່ອງ​ທາງ​ທີ່​ຕ່າງ​ກັນ​ ເພື່ອຮັບ​ຟັງຄວາມ​ເຫັນຂອງຊຸມ​ຊົນ​ທຸລະ​ກິດ​ຢ່າງຄົບ​ຖ້ວນ, ຮອບດ້ານ, ຊື່ສັດ​ທີ່​ສຸດ​. ຄວນ​ມີ​ຂໍ້​ກຳນົດ​ທີ່​ລະອຽດ​ເພື່ອ​ໃຫ້​ອຳ​ນາ​ການ​ປົກຄອງ​ທ້ອງ​ຖິ່ນພົບ​ປະ​ເປັນ​ໄລຍະ​ກັບ​ຊຸມ​ຊົນທຸລະກິດ, ຟັງສຽງ​ກ່ຽວ​ກັບ​ຄວາມຫຍຸ້ງ​ຍາກ, ສິ່ງ​ທີ່ຄ້າງ​ຄາ, ຄວາມ​ປາຖະໜາ​ຂອງ​ວິ​ສາ​ຫະກິດ, ​ແລະ​ຄວນ​ມີ​ຄຳ​ໝັ້ນ​ສັນຍາ​ທີ່​ລະອຽດ, ​ເສັ້ນທາງ​ທີ່​ຊັດ​ເຈນ​ ເພື່ອ​ແກ້​ໄຂອຸປະສັກ​ຊ່ວ​ຍໃຫ້​ວິ​ສາ​ຫະກິດ. ​ເຮັດ​ແບບ​ນີ້ຈະຈຳກັດ​ສ່ວນ​ໃດ​ສ່ວນ​ໜຶ່ງ​ສະພາບ​ການ “​ຊັ້ນ​ເທິງ​ຮ້ອນ, ຊັ້ນ​ລຸ່ມ​ເຢັນ”.

5- ​ເພີ່ມທະວີ​ການ​ປ່ຽນ​ແປງ​ໃໝ່​ປະດິ​ດສ້າງ​ ໃນ​ພື້ນຖານ​ເສດ​ຖະກິດ​ດິຈິ​ຕອນ

ການ​ປະຕິວັດ​ອຸດສາຫະກຳ 4.0 ພວມ​ເຮັດ​ໃຫ້​ຂະ​ແໜ​ງການ, ອາຊີບ​ທີ່​ຕ່າງ​ກັນ​ ມີ​ການ​ປ່ຽນ​ແປງ​ໂດຍ​ພື້ນຖານ ​ແລະ ວາງ​ບົ​ດເລກ​ອອກ​ມາ​ໃຫ້ບັນດາ​ປະຊາ​ຊາດຄ່ອງ​ຕົວ​ກັບ​ການ​ປະຕິວັດ​ ແລະ ​ແກ້​ໂຂ​ຜົນ​ກະທົບ​ທາງ​ລົບ​ສຳລັບ​ພື້ນຖານ​ເສດຖະກິດ. ພ້ອມ​ກັນ​ນັ້ນ, ການ​ປະຕິວັດ​ອຸດສາຫະກຳ 4.0 ກໍ່​ນຳ​ເອົາ​ໂອກາດ​ມາ​ໃຫ້​ປະ​ຊາຊາດ​ຕ່າງໆ, ​ໃນ​ນັ້ນ​ມີ​ຫວຽດນາມ, ​ເພື່ອ​ບືນ​ຕົວ​ຂຶ້ນ​ແລະ​ພາ​ໃຫ້​ເສດຖະກິດ​ພັດທະນາຕາມ​ທິດ​ທາງ​ໃໝ່ ອີງ​ໃສ່​ວິທະຍາສາດ, ​ເຕັກ​ໂນ​ໂລ​ຊີ. ​ໃນ​ສະ​ເພາະ​ໜ້າ, ຕ້ອງ​ປັບປຸງ​ບູລະນະ​ລະບົບກົດໝາຍ​ສຳລັບ​ເສດຖະກິດ​ດິຈິ​ຕອນ; ປັບປຸງບູລະນະລະບົບ​ນິ​ເວດ​ສຳລັບ​ການ​ເລີ່​ມທຸລະ​ກິດ, ປ່ຽນ​ແປງ​ໃໝ່​ປະດິດ​ສ້າງ​ແຫ່ງ​ຊາດ ​ແລະ ກໍ່ສ້າງ​ສູນ​ການ​ປ່ຽນ​ແປງ​ໃໝ່​ປະດິດ​ສ້າງ​ແຫ່ງ​ຊາດ. ສູນ​ກາງ​ນີ້​ແມ່ນ​ບ່ອນ​ເຕົ້າ​ໂຮມ​ບັນດາ​ພາກສ່ວນ​ຂອງລະ​ບົບນິ​ເວດ​ການ​ປ່ຽນ​ແປງ​ໃໝ່​ປະດິດ​ສ້າງ ​ໃນ​ຂົງ​ເຂດ​ໜຶ່ງ​ຫຼື​ບາງ​ຂົງ​ເຂດທີ່​ໄດ້​ຮັບ​ເລືອກ ​ເຂົ້າ​ໃນ​ສະພາບ​ແວດ​ລ້ອມ​ທີ່​ເໝາະ​ສົມ​ສຳລັບ​ລະບົບ​ນິ​ເວດ​ການ​ພັດທະນາ. ​ເງື່ອນ​ໄຂ​ຕັດສິນ​ເບື້ອງຕົ້ນ​ແມ່ນ ​ສູນກາງ​ເຫຼົ່ານີ້​ຕ້ອງ​ມີ​ສະພາບ​ແວດ​ລ້ອມ​ການ​ທຸລະ​ກິດ​ດີ​ທີ່​ສຸດ ​ແລະ ບັນດາ​ນະ​ໂຍບາຍ​​ແຂ່ງຂັນ ​ເພື່ອ​ດຶງ​ດູດ​ບັນດາ​ບໍລິສັດ​ມາ​ຕັ້ງ​ສຳນັກງານ ​ກໍ່​ຄືດຶງ​ດູດ​ຜູ້​ເກັ່ງ​ກ້າ​ສາມາດ​ມາ​ເຮັດ​ວຽກ. ນອກຈາກ​ນັ້ນ, ສູນ​ກາງ​ເຫຼົ່າ​ນີ້​ຕ້ອງ​ເປັນ​ບ່ອນ​ເພື່ອ​ໃຫ້​ບັນດາ​ບໍລິສັດ​ທີ່​ມີ​ຂະໜາດ​ໃຫຍ່​ນ້ອຍ​ຕ່າງ​ກັນ ສາມາ​ດ​ເຂົ້າ​ເຖິງ​ແຫຼ່ງພະລັງ​ທີ່​ຕ້ອງການ ກໍ​ຄື​ການເຂົ້າ​ເຖິງ​ຕະຫຼາດ. ຢູ່​ຫວຽດນາມ, ສູນ​ການ​ປ່ຽນ​ແປງ​ໃໝ່​ປະດິດ​ສ້າງ​ແຫ່ງ​ຊາດອາດ​ຈະ​ເລືອກ​ເອົາ​ຂົງເຂດຕ່າງໆ​ຄື: ໜຶ່ງ, ​ເປັນ​ແກ່ນ​ການ​ປ່ຽນ​ແປງ​ໃໝ່​ສຳລັບຂົງ​ເຂດການ​ຜະລິດ​ສະຫຼາດ ​ແລະ ພັດທະນາ​ຜະລິດ​ຕະພັນ​ໃຫ້​ແກ່​ໂຮງງານ​ໃນ​ອະນາຄົດ ດ້ວຍ​ເນື້ອ​ຫາ​ອັດ​ຕະ​ໂນ​ມັດ​ນັບ​ມື້​ນັບ​ຫຼາຍ. ສອງ, ບ່ອນ​ຊຸກຍູ້​ການ​ປະ​ຢຸກ​ແລະ​ພັດທະນາ​ຜະລິດ​ຕະພັນ/ບໍລິການ​ສຳລັບ​ນະຄອນ​ສະຫຼາດດ້ວຍ​ສະພາບ​ແວດ​ລ້ອມ​ທີ່​ຍືນ​ຍົງ. ສາມ, ສູນ​ກາງ​ເຫຼົ່າ​ນີ້ກໍ່​ອາດ​ຈະ​ກາຍ​ເປັນ​ບ່ອນ​ຊຸກຍູ້ຂະ​ແໜງ​ການ​ສື່ສານ​ດິຈິ​ຕອນ. ສີ່, ​ເປັນ​ບ່ອນ​ພັດທະນາການ​ປະ​ຢຸກຄວາມ​ປອດ​ໄພ​ເຄືອ​ຂ່າຍ​ໃຫ້​ແກ່​ບັນດາ​ອົງການ​ຂອງ​ລັດຖະບານກໍ່​ຄື​ບັນດາ​ບໍລິສັດ, ວິ​ສາ​ຫະກິດ, ປະຊາຊົນ.../.

ຕາຕະລາງ​ທີ່ 1

​ເລກ​ລຳດັບ

ຕົວ​ຊີ້​ວັດ

ຫົວໜ່ວຍ

ປີ 2019

 

 

 

%

​ແຜນ​ສະບັບ 1

​ແຜນ​ສະບັບ 2
(​ແຜນ​ສະບັບ​ພື້ນຖານ)

1

ເຕີບ​ໂຕ​ເສດຖະກິດ (GDP)

%

6,9

7,12

2

ອັດຕາ​ເງິນ​ເຟີ້

 

 

 

 

CPI (ສະ​ເລ່ຍປີ)

%

4

4,5

​ແຫຼ່ງ: ສະຫະ​ກົມ​ສະຖິຕິ​ແລະ​ພະຍາກອນ​ຂອງ NCIF ​ເດືອນ 12-2018

ຮຈ. ປອ. ບຸ່ຍ​ກວາງ​ຕວັ້ນ,
ຜູ້ອຳນວຍການ​ສະ​ຖາ​ບັນ​ເສດຖະກິດຫວຽດນາມ, ສະ​ຖາ​ບັນ​ການ​ສຶກສາສັງຄົມສາດ​ຫວຽດນາມ

------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 916 (​ເດືອນ​ກຸມພາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ