ວັນອັງຄານ, 22/10/2019
ສົ່ງເສີມອຸດສາຫະກປຸງແຕ່ງແລະຜະລິດ ເພື່ອສ້າງກຳລັງໜູນໃຫ້ແກ່ການເຕີບໂຕເສດຖະກິດ
20/5/2019 16:7' ສົ່ງ ພິມ
ຂະແໜງການອຸດສາຫະກຳປຸງແຕ່ງ-ຜະລິດ ເປັນກຳລັງໜູນຕົ້ນຕໍໃຫ້ແກ່ການເຕີບໂຕເສດຖະກິດປີ 2018. ((ແຫຼ່ງ: vov.vn)

ປີ 2018, ຂະ​ແໜງການອຸດສາຫະກຳ​​ປຸງ​ແຕ່ງ​ແລະ​ຜະລິດ​ໄດ້​ເຕີບ​ໂຕ 12,98%, ​ເຖິງ​ວ່າ​ຕ່ຳ​ກວ່າ​ລະດັບ​ເຕີບ​ໂຕຂອງ​ມັນ​ໃນ​ປີ 2017, ​ແຕ່​ກໍ​ສູງ​ກວ່າ​ຕັ້ງ​ຫຼາຍ​ທຽບ​ກັບ​ລະດັບ​ເຕີບ​ໂຕ​ໃນ​ຊຸມ​ປີ 2012-2016, ປະກອບສ່ວນ 2,55 ຈຸ​ດສ່ວນ​ຮ້ວຍ​ໃນ​ອັດຕາ​ການ​ເຕີບ​ໂຕຂອງ​ມູນ​ຄ່າ​ເພີ່ມ​ລວມຂອງ​ພື້ນຖານ​ເສດຖະກິດ.  ອັດຕາ​ສ່ວນອຸດສາຫະກຳ​​ປຸງ​ແຕ່ງ​ແລະຜະລິດ​ໃນ​ຜະລິດ​ຕະພັນ​​ລວມຍອດພາຍ​ໃນ​ປະ​ເທດ (ຈີ​ດີ​ພີ) ​ເພີ່ມ​ຂຶ້ນຈາກ 13,18% (ປີ 2014) ຂຶ້ນ​ເປັນ 15,33% (ປີ 2017) ​ແລະ​ສືບ​ຕໍ່​ເພີ່ມ​ຂຶ້ນ​ເປັນ 18,33% (ປີ 2018). ​ເລື່ອງ​ນີ້​ໃຫ້​ເຫັນ​ວ່າ, ມີ​ທ່າ​ອຽງ​ໜຶ່ງ​ທີ່​ຈະ​ແຈ້ງ​ພໍ​ຄວນ​​ໃນການ​ພັດທະນາ​ອຸດສາຫະກຳ, ສືບ​ຕໍ່​ສ່ອງ​ແສງ​ເຖິງ​ການ​ຫັນປ່ຽນ​ທີ່​ຖືກຕ້ອງ​ ແລະ ບັນດາ​ວິທີ​ແກ້​ໄຂ​ຄວາມ​ຫຍຸ້ງຍາກ, ສ້າງ​ສະພາບ​ແວດ​ລ້ອມ​ການ​ທຸລະ​ກິດ​ທີ່​ສະດວກ​ດີ​ ເພື່ອ​ຊຸກຍູ້​ການ​ຜະລິດ-ທຸລະ​ກິດ​ ຂອງ​ລັດຖະບານ ​ແລະ ການ​ຜັນ​ຂະຫຍາຍ​ປະຕິບັດ​ຂອງ​ກະຊວງ​ອຸດສາຫະກຳ​ການ​ຄ້າ​ໄດ້​ເສີມ​ຂະຫຍາຍ​ປະສິດທິ​ຜົນ​ທີ່​ຕັ້ງໜ້າ.

ຜົນ​ຂອງ​ການ​ເຕີບ​ໂຕ​ກໍ່​ໃຫ້​ເຫັນ​ວ່າ, ການ​ພັດທະນາ​​ອຸດສາຫະກຳການ​ຜະລິດ​ໄດ້​ພົ້ນ​ອອກ​ຈາກການ​ເພິ່ງ​ພາການ​ຂຸດ​ຄົ້ນ​ບໍ່​ແຮ່ ​ແລະຊັບພະຍາກອນ​ ຊຶ່ງ​ປີ 2018 ​ແມ່ນ​ປີ​ທີ່ສາມ​ຕິດ​ຕໍ່​ກັນ​ທີ່ອຸດສາຫະກຳ​ຂຸດ​ຄົ້ນ​ບໍ່​ແຮ່​ມີ​ການ​ຂະຫຍາຍຕົວ​ທາງ​ລົບ (ຫຼຸດ​ລົງ 3,11%), ຫຼຸດ​ລົງ 0,23 ຈຸດ​ສ່ວນ​ຮ້ອຍໃນ​ອັດຕາ​ການ​ເຕີບ​ໂຕຂອງ​ມູນ​ຄ່າ​ເພີ່ມ​ລວມຂອງ​ພື້ນຖານ​ເສດຖະກິດ. ​ໃນ​ຂະນະ​ນັ້ນ ຂະ​ແໜງ​ການ​ອຸດສາຫະກຳ​​ປຸງ​ແຕ່ງ​ແລະຜະລິດ ​ໄດ້​ມີ​ການ​ເຕີບ​ໂຕ​ຢ່າງ​ໄວ, ສອດຄ່ອງ​ກັບ​ທິດ​ທາງການ​ປັບ​ໂຄງ​ສ້າງ​ຮູບ​ແບບ​ການ​ເຕີບ​ໂຕ​ຂອງ​ຂະ​ແໜງ​ການ​ອຸດສາຫະກຳ​ທັງ​ໝົດ.

​ໄປ​ຄຽງ​ຄູ່​ກັບຄວາມ​ໄວ​ໃນ​ການ​ເຕີບ​ໂຕສູງ, ດັດຊະນີ​ສິນ​ຄ້າ​ຄົງ​ຄັງ​ຂອງອຸດສາຫະກຳ​​ປຸງ​ແຕ່ງ​ແລະຜະລິດ ​ໄດ້​ຫຼຸດ​ລົງ. ສິ່ງ​ດັ່ງກ່າວ​ໃຫ້​ເຫັນ​ວ່າ, ຂັ້ນ​ຕອນ​ການ​ພັດທະນາ​ຕະຫຼາດ, ການ​ບໍລິ​ໂພ​ກຜະລິດ​ຕະພັນຂອງ​ຂະ​ແໜງ​ການອຸດສາຫະກຳ​​ປຸງ​ແຕ່ງ​ແລະ​ຜະລິດ ພວມ​ໄດ້​ຮັບ​ການປັບປຸງ​ຢ່າງ​ຕໍ່​ເນື່ອງ. ​ເບິ່ງ​ກວ້າງ​ອອກ, ຄວາມ​ສາມາດ​ແຂ່​ງຂັນ ​ແລະ​ຄວາມ​ສາມາດ​ເຂົ້າຮ່ວມ​ໃນ​ສາຍ​ໂຊ້​ອຸດສາຫະກຳ​ ຂອງ​ບັນດາ​ວິ​ສາຫະກິດ​ຂອງ​ພວກ​ເຮົາພວມ​ໄດ້​ສ້າງ​ຕັ້ງ. ຂະ​ແໜງ​ການອຸດສາຫະກຳ​​ປຸງ​ແຕ່ງ​ແລະ​ຜະລິດ ​ເວລາ​ໃດ​ກໍ​ໄດ້​ປະກອບສ່ວນ​ຫຼາຍ​ທີ່​ສຸດ ​ເຂົ້າ​ໃນ​ການ​ເຕີບ​ໂຕ​ລວມຂອງ​ການ​ສົ່ງ​ອອກ. ປີ 2018, ມູນ​ຄ່າ​ການ​ສົ່ງ​ອອກ​ຂອງ​ສິນຄ້າອຸດສາຫະກຳ​ປຸງ​ແຕ່ງ​ແລະ​ຜະລິດ ກວມ​ເອົາ 82,8% ຂອງ​ຍອດ​ມູນ​ຄ່າ​ການ​ສົ່ງ​ອອກ, ​ເພີ່ມ​ຂຶ້ນ 16,2% ທຽບ​ກັບ​ປີ​ກ່ອນ ດ້ວຍ​ສິນຄ້າ​ຫຼາຍ​ປະ​ເພດ​ທີ່​ມີ​ຄຸນຄ່າ​ສົ່ງ​ອອກທີ່​ດີ. ຄວາມ​ໄວ​ໃນ​ການ​ເພີ່ມ​ມູນຄ່າ​ການ​ສົ່ງ​ອອກ​ຂອງ​ສິນຄ້າອຸດສາຫະກຳ​​ປຸງ​ແຕ່ງ​ແລະ​ຜະລິດ ສືບ​ຕໍ່​ເພີ່ມ​ຂຶ້ນ​ສູງ​ກວ່າ​ຄວາມ​ໄວ​ໃນ​ການ​ສົ່ງ​ອອກ​ລວມ; ​ແຕ່​ປີ 2012 ​ເຖິງ​ປີ 2018 ​ແມ່ນ​ປີ​ທີ 7 ຕິດ​ຕໍ່​ກັນ ຊຶ່ງ​ການ​ເຕີບ​ໂຕ​ຂອງ​ການ​ສົ່ງ​ອອກ​ຂອງ​ກຸ່ມສິນຄ້າ​ອຸດສາຫະກຳ​ປຸງ​ແຕ່ງ​ສູງ​ກວ່າ ການ​ເຕີບ​ໂຕ​ຂອງ​ການ​ສົ່ງ​ອອກ​ທົ່ວ​ໄປ. ການ​ສົ່ງ​ອອກ​ທີ່​ເຕີບ​ໂຕ​ສູງ​ຂອງ​ຜະລິດ​ຕະພັນ​ອຸດສາຫະກຳ​ປຸງ​ແຕ່ງ​ ບໍ່​ພຽງ​ແຕ່ອີງ​ໃສ່ກຸ່ມ​ຜະລິດ​​ໂທລະສັບ​ມື​ຖື, ​ແຕ່​ສິນຄ້າ​ສົ່ງ​ອອກປະ​ເພດ​ອື່ນ​ເຊັ່ນ ​ເຫຼັກ, ​ເຫຼັກ​ກ້າ, ສານ​ເຄມີ, ສິ່ງ​ທໍ, ​ເກີບ, ຊີມັງ ທັງ​ໝົດ​ໄດ້​ປະສົບ​ຜົນສຳ​ເລັດ​ສົ່ງ​ອອກ​ທີ່​ດີ​ໃນ​ປີ 2018.

ນີ້​ແມ່ນ​ຄວາມ​ພະຍາ​ຍາມທີ່​ຍິ່ງ​ໃຫຍ່​ຂອງ​ລັດຖະບານ ​ແລະບັນດາ​ກະຊວງ, ຂະ​ແໜງ​ການ ​ໃນ​ການ​ຊີ້​ນຳ ບໍລິຫານ; ​ໃນ​ການ​ສືບ​ຕໍ່ປັບປຸງ​ສະພາບ​ແວດ​ລ້ອມ​ການ​ລົງທຶນ​ທຸລະ​ກິດ; ​ໃນ​ການ​ແກ້​ບັນຫາ​ສະຖານະ​ການ ​ເພື່ອຊ່ວຍ​ໃຫ້​ແຕ່ລະ​ຂະ​ແໜງ​ການຜ່ານ​ຜ່າ​ຄວາມ​ຫຍຸ້ງຍາກ​ໃນ​ການ​ຜະລິດ. ພ້ອມ​ກັນ​ນັ້ນ, ມັນ​ກໍ​ສະ​ແດງ​ໃຫ້​ເຫັນ​ວ່າ ບັນດາ​ແຜນ​ນະ​ໂຍບາຍ, ນະ​ໂຍບາຍ ​ແລະ​ມາດ​ຕະການ​ອັນ​ລະອຽດ​ ໃນ​ການປັບ​ໂຄງ​ສ້າງ​ເສດຖະກິດ​ແລະ​ໂຄງ​ສ້າງ​ອຸດສາຫະກຳ​ໄດ້​ບັນລຸ​ປະສິດທິ​ຜົນ​ທາງ​ບວກນັ້ນ ​ເປັນ​ພຽງ​ບັນດາ​ບາດກ້າວ​ເບື້ອງ​ຕົ້ນ. ການ​ຫັນປ່ຽນ​ໂຄງ​ສ້າງ​ເສດຖະກິດ​ບໍ່​ພຽງ​ແຕ່​​ເກີດ​ຂຶ້ນລະຫວ່າງບັນດາ​ຂະ​ແໜງ​ການ​ເສດຖະກິດ​ເທົ່າ​ນັ້ນ​ຍັງ​ມີ​ທ່າ​ອຽງຫັນປ່ຽນ​ຢ່າງ​ຕັ້ງໜ້າ​ຢູ່​ພາຍ​ໃນ​ຂະ​ແໜງ​ການ, ປະກອບສ່ວນ​ຊຸກຍູ້​ການ​ເຕີບ​ໂຕ​ເສດຖະກິດທາງ​ດ້ານ​ຄວາມ​ໄວ​ແລະ​ຄຸນ​ນະພາ​ບ ​ໃນ​ເວລາ​ທີ່​ຈະ​ມາ​ເຖິງ. ຂົງ​ເຂດອຸດສາຫະກຳ​ໄດ້​ຫັນປ່ຽນ​ຕາມ​ທິດພັດທະນາ​ບັນດາ​ຂະ​ແໜງອຸດສາຫະກຳ​ທີ່​ມີ​ຄຸນຄ່າ​ເພີ່ມ​ສູງ, ​ໃນ​ນັ້ນ ອຸດສາຫະກຳ​​ປຸງ​ແຕ່ງ​ແລະ​ຜະລິດສືບ​ຕໍ່​ເປັນ​ກຳລັງ​ໜູນ​ທີ່​ສຳຄັນສຳລັບ​ການ​ເຕີບ​ໂຕ, ດ້ວຍ​ການສະໜັບສະໜູນ​ຢ່າງ​ຕັ້ງໜ້າ​ຂອງ​ວິ​ສາ​ຫະກິດ​ທີ່​ມີ​ການ​ລົງທຶນ​ໂດຍ​ກົງ​ຈາກ​ຕ່າງປະ​ເທດ (FDI), ຈາກ​ກຸ່ມ​ເສດຖະກິດ​ຂະໜາດ​ໃຫຍ່​ທີ່​ມີ​ພວງມູນ​ຄ່າ​ທົ່ວ​ໂລກ, ​ເຊັ່ນ Samsung, LG, Toyota… ພິ​ເສດ​ແມ່ນ​ການ​ປະກອບສ່ວນ​ຂອງ​ບາງ​ກຸ່ມ​ເສດຖະກິດ​ເອກະ​ຊົນ​ພາຍ​ໃນ​ປະ​ເທດ, ​ເຊັ່ນ VinGroup, ​ເຈື່ອງ​ຫາຍ, ​ແທັ່ງ​ກົງ, Vinamilk, TH True milk, ບໍລິສັ​ດຫຸ້ນ​ສ່ວນ​ເຄມີ​ອຸດສາຫະກຳ ​ເຕິ​ນລອງ, ບໍລິສັດ​ຫຸ້ນ​ສ່ວນ ລົກ​ເຈີ່ຍ, ກຸ່ມ​ຮວາ​ແຊນ, ກຸ່ມ​ຮ່ວາ​ຟາດ, ບໍລິສັດ​ຫຸ້ນ​ສ່ວນ​ເຫຼັກ ນາມ​ກິມ... ນີ້​ແມ່ນ​ສັນຍານ​ທີ່​ດີ ທີ່​ສະ​ແດງ​ໃຫ້​ເຫັນ​ວ່າ ບັນດາ​ແຜນ​ນະ​ໂຍບາຍ​ທົ່ວ​ໄປ​ຂອງ​ພັກ ​ແລະກົນ​ໄກ, ນະ​ໂຍບາຍ​ຂອງ​ລັດຖະບານ ​ໄດ້​ສ້າງ​ຄວາມ​ເຊື່ອ​ໝັ້ນ​ແລະຄວາມ​ຫ້າວຫັນ​ໃຫ້​ວິ​ສາ​ຫະກິດ​ໃນ​ປະ​ເທດສຸມ​ໃສ່​ການ​ລົງທຶນ​ເພື່ອການ​ພັດທະນາຂະໜາດ​ໃຫຍ່​ແລະ​ໄລຍະ​ຍາວ ​​ໃນ​ບັນດາ​ຂະ​ແໜງການອຸດສາຫະກຳ​​ປຸງ​ແຕ່ງ​ແລະ​ຜະລິດທີ່​ສຳຄັນ​ຂອງ​ປະ​ເທດ.

ຢ່າງ​ໃດ​ກໍ່ຕາມ, ກໍ່​ຕ້ອງ​ເຫັນ​ວ່າ, ອຸດສາຫະກຳ​​ປຸງ​ແຕ່ງ​ແລະ​ຜະລິດ​ໄດ້​ມີ​ການ​ພັດທະນາ​ທີ່​​ແນ່ນອນ, ​ແຕ່​ກໍ່​ຍັງ​ມີ​ຂໍ້​ຈຳກັດ​ພື້ນຖານ​ບາງ​ຢ່າງ, ນັ້ນ​ແມ່ນ, ອຸດສາຫະກຳ​​ປຸງ​ແຕ່ງ​ແລະ​ຜະລິດ​ໄດ້​ມີ​ສ່ວນ​ປະກອບ​ທີ່​ນັບ​ມື້​ນັບ​ເພີ່ມ​ຂຶ້ນ​​ໃນ​ການ​ສົ່ງ​ນອກ, ​ແຕ່​ສ່ວນ​ປະກອບ​ໃນ ຈີ​ດີ​ພີ ຍັງ​ຕ່ຳ ​ແລະ​ຕົ້ນຕໍ​ແມ່ນ​ມາ​ຈາກຜະລິດ​ຕະພັນ​ດິບ, ຜະລະ​ດຕະພັນ​ປຸງ​ແຕ່ງ ​ແລະ ຜະລິດ​ຕະພັນ​ປະກອບ​ເຂົ້າ​ເຄື່ອງ​ຂອງ​ວິ​ສາ​ຫະກິດ​ FDI ​ໃນ​ອຸດສາຫະກຳ​ຂັ້ນ​ຕອນ​ສຸດ​ທ້າຍ; ອຸດສາຫະກຳ​ສະໜັບສະໜູນ​ພັດທະນາ​ບໍ່​ພຽງພໍ; ມີ​ສ່ວນ​ຮ່ວມ​ບໍ່​ຫຼາຍ​ໃນ​ເຄືອ​ຂ່າຍ​ການ​ຜະລິດ ​ແລະ​ໃນ​ພວງ​​ຄຸນຄ່າ​ທົ່ວ​ໂລກ. ວັດຖຸ​ດິດ, ສ່ວນ​ປະກອບ​ແລະ​ເຄື່ອງ​ອະ​ໄຫຼ່​ຍັງ​ຄົງ​ຂຶ້ນ​ຢູ່​ກັບ​ການ​ນຳ​ເຂົ້າ​ທີ່​ມີ​ອັດຕາ​ສ່ວນ​ໃຫຍ່. ​ໃນ​ພາກ​ຕົວ​ຈິງ, ບາງ​ຂະ​ແໜງ​ການ​ອຸດສາຫະກຳ​ຫວຽດນາມ​ໄດ້​ເຂົ້າ​ຮ່ວມ​ເຄືອ​ຂ່າຍ​ການ​ຜະລິດ​ແລະ​ພວງ​ຄຸນຄ່າ​ທົ່ວ​ໂລກ​ແລ້ວ, ​ແຕ່​ສ່ວຍ​ຫຼາຍ​ແມ່ນ​ໄດ້​ເຮັດ​ຢູ່​ໃນ​ຂອດ​ງ່າຍດາຍ, ຄຸນຄ່າ​ເພີ່ມ​ຕ່ຳ.

ປີ 2019, ສະຖານະ​ການ​ສາກົນ​ແລະ​ໃນ​ປະ​ເທດ​ຄາດ​ວ່າ​ຈະສືບຕໍ່ປ່ຽນ​ແປງ​ຢ່າງ​ສັບສົນ​ແລະຄາດ​ຄະ​ເນ​ຍາກ, ຊຶ່ງ​ມີ​ທັງ​ໂອກາດ, ຄວາມ​ສະ​ດວດ​ດີ​ ແລະຄວາມ​ຫຍຸ້ງຍາກ, ສິ່ງ​ທ້າ​ທາຍ​ແຊກ​ຊ້ອນ​ກັນ, ການ​ເຕີບ​ໂຕທາງ​ເສດຖະກິດ​ຂອງ​ປະ​ເທດ​ເສດຖະກິດ​​ໃຫຍ່ບໍ່​ໄດ້​ແຜ່​ກະຈາຍ​ຢ່າງ​ເທົ່າ​ທຽມ​ທົ່ວ​ເຖິງ​ຄື​ປີ 2017 ​ແລະ​ຕົ້ນ​ປີ 2018, ກຳລັງ​ໜູນ​ຂອງບັນດາປະ​ເທດ​ເສດຖະກິດ​ຂະໜາດ​ໃຫຍ່​ໄດ້​ຫຼຸດ​ລົງ, ປະ​ເທດ​ເສດຖະກິດ​ພວມ​ພົ້ນ​ເດັ່ນ​ຂຶ້ນ ສ່ວນ​ຫຼາຍ​ຊ້າ​ລົງ. ບໍ່​ພຽງ​ແຕ່​ເທົ່າ​ນັ້ນ, ການ​ແຂ່ງຂັນ​ທາງ​ຍຸດ​ທະ​ສາດ​ຜ່ານ​ການ​ເຊື່ອມ​ໂຍງ​ເສດຖະກິດ ສືບ​ຕໍ່​ເພີ່ມ​ຂຶ້ນ​ຢ່າງ​ດູ​ເດືອດ, ພ້ອມ​ກັນ​ນັ້ນ ຄວາມ​ຂັດ​ແຍ່ງລະຫວ່າງບັນດາ​ປະ​ເທດ​ໃຫຍ່ກ່ຽວ​ກັບ​ການ​ສ້າງ​ລະບົບ​ການ​ຄ້າ​ໂລກ ນັບ​ມື້​ນັບ​ເລິກ​ເຊິ່ງ. ທ່າ​ອຽງ​ເພີ່ມ​ອັດຕາ​ດອກ​ເບ້ຍ, ການ​ຜັນ​ຜວນ​ໃນ​ຕະຫຼາດ​ການ​ເງິນ-​ເງິນຕາ​ສາກົນ​ທີ່​ຄາດ​ເດົາ​ຍາກ ​ແລະ ລາຄາ​ນ້ຳມັນ​ຍັງ​ສືບ​ຕໍ່​ສັບສົນ, ທັງ​ໝົດ​ສົ່ງ​ຜົນ​ກະທົບ​ຕໍ່​ການ​ເຕີບ​ໂຕ​ຂອງ​ສິນ​ເຊື່ອ, ຈິ​ດຕະວິທະຍາ​ ແລະ​ຄວາມ​ຄາດ​ຫວັງ​ຂອງ​ຕະຫຼາດ. ​ແຕ່​ວ່າ, ຜ່ານ​ສິ່ງ​ທ້າ​ທາຍ​ເຫຼົ່ນັ້ນ, ປີ 2018 ພື້ນຖານ​ເສດຖະກິດ​ຫວຽດນາມ​ໄດ້​ສ້າງ​ກຳລັງ​ໜູນ​ທີ່​ມີ​ລັກສະນະ​ພື້ນຖານ​ໃຫ້​ແກ່​ການ​ເຕີບ​ໂຕ​ເສດຖະກິດ​ປີ 2019 ​ແລະ​ບັນດາ​ປີ​ຕໍ່​ໄປ. ນັ້ນ​ແມ່ນ ການ​ເຊື່ອມ​ໂຍງ​ເສດຖະກິດ​ສາກົນ​ຂອງ​ຫວຽດນາມ​ໄດ້​ຫັນ​ເຂົ້າ​ສູ່​ໄລຍະ​ໃໝ່, ​ເຊື່ອມ​ຕິດ​ຢ່າງ​ແໜ້ນ​ແຟ້ນກັບ​ເສດຖະກິດ​ໃນ​ພາກ​ພື້ນ​ແລະ​ເສດຖະກິດ​ໂລກ, ຂີດ​ໝາຍ​ຈຸດ​ເວລາ​ທີ່ຫວຽດນາມ​ສຳ​ເລັດ​ແຜນປະຕິບັດ​ງານ​ຂອງ​ຕົນ​ໃນ​ການເຂົ້າ​ຮ່ວມ​ອົງການ​ການ​ຄ້າ​ໂລກ (WTO) ​ແລະ ການ​ຫຼຸດຜ່ອນ​ພາສີ​ພາຍ​ໃຕ້​ສັນຍາ​ການ​ຄ້າ​ສິນຄ້າ​ອາ​ຊຽນ (ATIGA), ​ເລີ່​ມຕົ້ນ​ການ​ປະຕິບັດຄຳ​ໝັ້ນ​ສັນຍາ​ໃນ​ບັນດາ​ສັນຍາ​ການ​ຄ້າ​ເສລີ (FTA) ດ້ວຍ​ການ​ຫຼຸດຜ່ອນ​ອັດຕາ​ພາສີທີ່​ກວ້າງຂວາງ. ຫວຽດນາມ​ໄດ້​ແລະ​ຈະ​ລົງ​ນາມ​ເພື່ອ​ຜັນ​ຂະຫຍາຍ​ບັນດາ FTA ຮຸ່ນ​ໃໝ່, ​ເຊັ່ນ ສັນຍາ​ຄູ່​ຮ່ວມມືທີ່​ຮອບດ້ານ​ແລະ​ກ້າວ​ໜ້າ​ຂ້ານປາຊີ​ຟິກ (CPTPP), ສັນຍາ​ການ​ຄ້າ​ເສລີ​ຫວຽດນາມ - ອີ​ຢູ (EVFTA) ດ້ວຍ​ບັນດາ​ຄຳ​ໝັ້ນ​ສັນຍາ​ທີ່​ກວ້າງຂວາງ, ມາດຕະຖານ​ສູງ ​ແລະ​ເປີດ​ກວ້າງ​ໃນ​ຫຼາຍ​ຂົງ​ເຂດ. ບັນດາ​ຂໍ້​ຕົກລົງ FTA ​ເຫຼົ່າ​ນີ້ ສ້າງ​ກຳລັງ​ໜູນ​ໃຫ້​ແກ່​ການ​ເຕີບ​ໂຕ​ເສດຖະກິດ​ຂອງ​ຫວຽດນາມ, ພ້ອມ​ກັນ​ນັ້ນ​ກໍ່ສ້າງ​ໂອກາດ​ເພື່ອ​ດຶງ​ດູດ​ແລະ​ສວຍ​ໃຊ້​ແຫຼ່ງ​ເງິນ​ທຶນ FDI ​ໃນ​ປີ 2019 ​ແລະ​ຊຸມ​ປີ​ຕໍ່​ໄປ. ສະພາບ​ແວດ​ລ້ອມ​ແຫ່ງ​ການ​ທຸລະ​ກິດ​ໄດ້​ຮັບ​ການ​ປົວ​ແປງ​ປັບປຸງ​ຢ່າງ​ຈະ​ແຈ້ງ, ຊຸມ​ຊົນ​ທຸລະ​ກິດ​ໄດ້​ຮັບປະ​ໂຫຍ​ດຢ່າງ​ຫຼວງ​ຫຼາຍ​ຈາກ​ການ​ປະຕິ​ຮູບ ​ໂດຍ​ຜ່ານ​ການຫຼຸດຜ່ອນ​ເງື່ອນ​ໄຂ​ການ​ລົງ​ທຶນທາງ​ທຸລະ​ກິດ, ການຫຼຸດຜ່ອນ​ຄວາມ​ສັບສົນ​ຂອງ​ຂັ້ນ​ຕອນ​ການ​ບໍລິການ ​ແລະ ບັນດາ​ນະ​ໂຍບາຍ​ສະໜັບສະໜູນ​​ໃຫ້ວິ​ສາ​ຫະກິດ​ພັດທະນາ. ຂະ​ບວນການ​ເລີ່​ມທຸລະ​ກິດ​ໄດ້​ລະດົມ​ແຫຼ່ງທຶນ​ຫຼວງ​ຫຼາຍ​ໃຫ້​ພື້ນຖານ​ເສດຖະກິດ. ພ້ອມ​ກັນ​ນັ້ນ, ການ​ປ່ຽນ​ແປງ​ໂຄງ​ສ້າງ​ເສດຖະກິດ​ບໍ່​ພຽງ​ແຕ່​ເກີດ​ຂຶ້ນ​ລະຫວ່າງ​ບັນດາ​ຂະ​ແໜງ​ການ​ເສດຖະກິດ ​ແຕ່​ຍັງ​ມີ​ທ່າ​ອຽງ​ຫັນປ່ຽນ​ຢ່າງ​ຕັ້ງໜ້າ​ຢູ່​ພາຍ​ໃນ​ແຕ່ລະຂະ​ແໜງ​ການ. ຂົງ​ເຂດ​ອຸດສາຫະກຳ​ກໍ່​ມີ​ການ​ຫັນປ່ຽນ​ຕາມ​ທິດ​ພັດທະນາບັນດາ​ຂະ​ແໜງອຸສາ​ຫະກຳ​ທີ່​ມີ​ຄຸນຄ່າ​ເພີ່ມ​ສູງ ​ແລະ​ມີ​ມູນ​ຄ່າ​ສົ່ງ​ອອກຂະໜາດ​ໃຫຍ່, ​ໃນ​ນັ້ນ ອຸດສາຫະກຳ​​ປຸງ​ແຕ່ງ​ແລະ​ຜະລິດຈະ​ສືບ​ຕໍ່​ເປັນ​ກຳລັງ​ໜູນ​ທີ່​ສຳຄັນ​​ໃຫ້​ແກ່​ການ​ເຕີບ​ໂຕ​ເສດຖະກິດ​ໃນ​ປີ 2019.

​ເພື່ອ​ໃຫ້​ກຳລັງ​ໜູນອຸດສາຫະກຳ​​ປຸງ​ແຕ່ງ​ແລະ​ຜະລິດ ​ສືບຕໍ່​ນຳພາ​ການ​ເຕີບ​ໂຕ​ເສດຖະກິດ​ໃນ​ປີ 2019 ​ແລະ​ຊຸມ​ປີ​ຕໍ່​ໄປ, ກະຊວງ​ອຸດສາຫະກຳ​ການ​ຄ້າ​ໄດ້, ພວມ ​ແລະ ຈະ​ຜັນ​ຂະຫຍາຍ​ຫຼາຍ​ໜ້າ​ທີ່, ວິທີ​ແກ້​ໄຂ​ທີ່​ສຳຄັນ ​ແນ​ໃສ່​ຊຸກຍູ້​ການ​ພັດທະນາ​ຂອງ​ຂະ​ແໜງ​ການອຸດສາຫະກຳ​​ປຸງ​ແຕ່ງ​ແລະ​ຜະລິດ ​ເວົ້າ​ສະ​ເພາະ ​ແລະ ຂະ​ແໜງ​ການ​ອຸດສາຫະກຳ​ທັງ​ໝົດ​ເວົ້າ​ລວມ ​ໃຫ້​ມີ​ການ​ເຕີບ​ໂຕ​ແບບ​ຍືນ​ຍົງ.

ທີ​ໜຶ່ງ, ຊາບ​ຊຶມ​​ໜ້າ​ທີ່ຢ່າງ​ລະ​ອຽດ​ໃນ​ມະຕິ​ສະບັບ​​ເລກທີ 01-2019/NQ-CP ຂອງ​ລັດຖະບານ ກ່ຽວ​ກັບບັນດາ​ໜ້າ​ທີ່ ​ແລະວິທີ​ແກ້​ໄຂ​ຕົ້ນຕໍ ​ໃນ​ການ​ຊີ້​ນຳ​ ຈັດ​ຕັ້ງ​ປະຕິບັດ​ໜ້າ​ທີ່​ແຜນການ​ພັດທະນາ​ເສດຖະກິດ - ສັງຄົມ ​ແລະ ງົບປະມານ​ຂອງ​ລັດ​ປີ 2019; ມະຕິ​ສະບັບ​ເລກທີ 02-2019/NQ-CP ຂອງ​ລັດຖະບານ ກ່ຽວ​ກັບການ​ສືບ​ຕໍ່​ປະຕິບັດ​ບັນດາ​ໜ້າ​ທີ່ ​ແລະ​ວິທີ​ແກ້​ໄຂ​ຕົ້ນຕໍ ​ໃນ​ການ​ປົວ​ແປງ​ສະພາບ​ແວດ​ລ້ອມ​ການ​ທຸລະ​ກິດ, ຍົກ​ສູງ​ຄວາມ​ສາມາດ​ແຂ່ງຂັນຂອງ​ຊາດ​ປີ 2019 ​ແລະ ກຳ​ນົດທິດ​ເຖິງ​ປີ 2021. ນີ້​ແມ່ນປັດ​ໄຈສຳຄັນ​ທີ່​ສຸດ ຊຶ່ງ​ຕ້ອງ​ໄດ້​ຖື​​ເປັນ​ຈຸດ​ສູນ​ກາງສຳຄັນ​ໃນ​ການ​ຜັນ​ຂະຫຍາຍ​ການ​ປະຕິບັດ​ໜ້າ​ທີ່​ທັງ​ໝົດ​ຂອງ​ປີ 2019.

ທີ​ສອງ, ສຸມ​ໃສ່ການ​ປະຕິບັດ​ຢ່າງ​ມີ​ປະສິດທິ​ຜົນ​ສູງ​ສຸດ ນະ​ໂຍບາຍ​ການ​ພັດທະນາ​ອຸດ​ສະຫະ​ກຳ​ແຫ່ງ​ຊາດ​ເຖິງ​ປີ 2030, ວິ​ໄສ​ທັດ​ເຖິງ​ປີ 2045. ຕ້ອງ​ຮີບ​ດ່ວນ​ໃນ​ການ​ທົບ​ທວນຄືນ, ການ​ຄົ້ນຄວ້າ​ເພື່ອ​ເພີ່ມ​ເຕີມ ຫຼືການ​ກໍ່ສ້າງ​ໃໝ່​ແຜນ​ຍຸດ​ທະ​ສາດ​ການ​ພັດທະນາ​ຂະ​ແໜງ​ການ​ອຸດສາຫະກຳ ຫຼື ​ແຜນ​ແມ່​ບົດ​ສັງ​ລວມການ​ພັດທະນາ​ບັນດາ​ຂະ​ແໜງ​ການ​ອຸດສາຫະກຳ ຕາມ​ຄວາມ​ຕ້ອງການ​ໃນ​ມະຕິ​ສະບັບ​ເລກທີ 23-NQ/TW, ລົງ​ວັນ​ທີ 22-3-2018, ຂອງ​ກົມ​ການ​ເມືອ​ງສູນ​ກາງ​ພັກ. ຍູ້​ແຮງ​ຂະ​ບວນວິວັດ​ການ​ປະຕິບັດ​ເປົ້າ​ໝາຍ​ຈັດ​ວາງ​ຄືນ​ໃໝ່​ໂຄງ​ສ້າງ​ຂອງ​ຂະ​ແໜງ​ການ​ອຸດສາຫະກຳ​ການ​ຄ້າຕາມ​ໂຄງການ​ໂດຍ​ລວມກ່ຽວ​ກັບ​ການ​ປັບ​ໂຄງ​ສ້າງ​ເສດຖະກິດ​ ຕິດ​ກັບການ​ປ່ຽນ​ແປງ​ຮູບ​ແບບການ​ເຕີບ​ໂຕ ທີ່​ໄດ້​ຮັບ​ການ​ອະນຸມັດ​ໂດຍ​ນາຍົກລັດຖະມົນຕີ​ໃນ​ຂໍ້​ຕົກລົງ​ເລກທີ 339/2013/QĐ-TTg, ລົງ​ວັນ​ທີ 19-02-2013, ​ແລະ ​ແຜນການ​ປັບ​ໂຄງ​ສ້າງ​ຂະ​ແໜງ​ການ​ອຸດສາຫະກຳ ຕິດ​ກັບການ​ຊຸກຍູ້​ການ​ປ່ຽນ​ແປງ​ໃໝ່​ປະດິດ​ສ້າງ, ການປະຢຸກໃຊ້ການປະຕິວັດອຸດສາຫະກຳຄັ້ງທີສີ່ ຢ່າງແຂງແຮງແລະແທ້ຈິງໃນບັນດາຂົງເຂດການເຄື່ອນໄຫວ. ໃນ​ນັ້ນ ກຳນົດ​ແຈ້ງ, ຈຸດ​ໜັກ​ຂອງ​ການ​ປັບ​ໂຄງ​ສ້າງ​ໃນ​ໄລຍະ​ຕໍ່​ໄປຕ້ອງ​ໄດ້​ຍູ້​ແຮງ​ການ​ປະຕິບັດ​ຕາມ​ຫຼັກການຄຸນ​ນະພາ​ບ, ຖື​ເອົາ​ການ​ຍົກ​ສູງ​ຄວາມ​ສາມາດ​ແຂ່ງຂັນ​ຂອງ​ຜະລິດ​ຕະພັນ, ປະສິດທິ​ຜົນ​ຂອງ​ການ​ລົງທຶນ, ຄວາມ​ສາມາດ​ຂອງ​ວິ​ສາ​ຫະກິດ​ໃນ​ການເຂົ້າ​ຮ່ວມພວງ​ຄຸນຄ່າ​ທົ່ວ​ໂລກ ​ເປັນ​ບັນທັດຖານ​ສຳລັບ​ຂະ​ບວນການ​ນີ້.

ທີ​ສາ​ມ, ຍົກ​ສູງ​ຄວາມ​ສາມາດ​ຂອງ​ວິ​ສາ​ຫະກິດ​ພາຍ​ໃນ​ປະ​ເທດ​ໃນ​ຂົງ​ເຂດ​ອຸດສາຫະກຳ​ສະໜັບສະໜູນ ​ເພື່ອ​ສ້າງ​ມູນ​ຄ່າ​ເພີ່ມ​ທີ່​ສູງ​ໃຫ້​ແກ່​ອຸດສາຫະກຳ. ພັດທະນາ​ອຸດສາຫະກຳ​ສະໜັບສະໜູນ​ຖືກ​ຖື​ວ່າ​ເປັນ​ເສົາ​ຫຼັກ ​ເພື່ອ​ຊຸກຍູ້​ຂະ​ບວນວິວັດ​ການ​ຫັນປ່ຽນ​ຈາກ​ອຸສາ​ຫະກຳ​ໃຊ້​ແຮງ​ງານ​ຜະລິດ/ປະກອບ​ເຂົ້າ​ເຄື່ອງ ມາ​ເປັນ​ອຸດສາຫະກຳ​ປຸງ​ແຕ່ງ​ເລິກ, ມີ​ຄຸນຄ່າ​ເພີ່ມ​ສູງ. ພັດທະນາ​ອຸດສາຫະກຳ​ສະໜັບສະໜູນ​ຖືກ​ຖື​ວ່າ​ເປັນ​ຂົງ​ເຂດ​ບຸລິມະສິດ​ໃນ​ແຜນ​ຍຸດ​ທະ​ສາດ​ການ​ພັດທະນາ​ອຸດສາຫະກຳ​ຫວຽດນາມ​ເຖິງ​ປີ 2025, ວິ​ໄສ​ທັດ​​ເຖິງ​ປີ 2035.  ສືບ​ຕໍ່​ຜັນ​ຂະຫຍາຍ​ຢ່າງ​ແຂ​ງ​ແຮງ​ໂຄງການ​ພັດທະນາ​ອຸດສາຫະກຳ​ສະ​ໜັບສະ​ໜູນ​ແຕ່​ປີ 2016 ​ເຖິງ​ປີ 2025 ທີ່​ນາຍົກລັດຖະມົນຕີ​ໄດ້​ອະນຸມັດ​ໃນ​ຂໍ້​ຕົກລົງ​ສະບັບ​ເລກທີ 68/QĐ-TTg, ລົງ​ວັນ​ທີ 18-01-2017. ຄຽງ​ຂ້າງ​ນັ້ນ, ​ຕ້ອງ​ຮ່ວມ​ມື​ຢ່າງ​ຕັ້ງໜ້າ​ກັບ​ບັນດາ​ອົງກາ​ນຈັດ​ຕັ້ງ​ສາກົນ, ຜູ້​ບໍລິຈາກ​ແລະ​ກຸ່ມ​ບໍລິສັດ​ຂ້າມ​ຊາດ ​ໃນ​ການ​ຜັນ​ຂະຫຍາຍ​ຫຼາຍ​ໂຄງການ​ທີ່​ຕ່າງ​ກັນ, ​ເພື່ອ​ຍົກ​ສູງ​ຄວາມ​ສາມາດ​ຂອງ​ວິ​ສາ​ຫະກິດ​ອຸດສາຫະກຳ​ພາຍ​ໃນ​ປະ​ເທດ; ຝຶກ​ອົບຮົມ​ຊັບພະຍາກອນ​ມະນຸດ​ໃນ​ປະ​ເທດ ​ແລະ​ຜັນ​ຂະຫຍາຍ​ບັນດາ​ໂຄງການ​ເພື່ອ​ຍູ້​ແຮງ​ການ​ເຊື່ອມ​ໂຍງ​ລະຫວ່າງ​ວິ​ສາ​ຫະກິດ​ອຸດສາຫະກຳ​ສະໜັບສະໜູນ​ໃນ​ປະ​ເທດ ກັບບັນດາ​ວິ​ສາ​ຫະກິດ FDI. ຈາກ​ນັ້ນ, ປະກອບສ່ວນ​ສ້າງ​ການ​ຫັນປ່ຽນ​ຢ່າງ​ຈະ​ແຈ້ງ​ແລະ​ແທ້​ຈິງ​ໃນ​ການ​ປັບ​ໂຄງ​ສ້າງ​ເສດຖະກິດ ຕິດ​ກັບ​ການ​ປ່ຽນ​ແປງ​ໃໝ່​ຮູບ​ແບບການ​ເຕີບ​ໂຕ, ຍົກ​ສູງ​ຄຸນ​ນະພາ​ບການ​ເຕີບ​ໂຕ, ຍົກ​ສູງ​ປະສິດທິພາບ​ຂອງ​ງານ​ແລະ​​ແຮງ​ແຂ່ງຂັນ​ຂອງ​ພື້ນຖານ​ເສດຖະກິດ.

ທີ​ສີ່, ສືບ​ຕໍ່​ສຸມ​ໃສ່​ການ​ກໍ່ສ້າງ, ປັບປຸງ​ບູລະນະ​ລະບຽບ​ກົດໝາຍ​ ​ແນ​ໃສ່​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ແກ່​ການ​ລົງທຶນທຸລະ​ກິດ, ປຸກ​ຕື່ນ​ແຫຼ່ງພະລັງ​ຕ່າງໆ​ເພື່ອ​ຮັບ​ໃຊ້​ໃຫ່​ແກ່​ການ​ພັດທະນາ, ຄຽງ​ຂ້າງ​ນັ້ນ​ແມ່ນ​ການ​ສືບ​ຕໍ່​ຫຼຸ​ດຜ່ອນ​ເງື່ອນ​ໄຂ​ການ​ລົງທຶນ​ທຸລະ​ກິດ, ​ເຮັດ​ໃຫ້​ຂັ້ນ​ຕອນ​ການ​ບໍລິຫານ​ງ່າຍດາຍກວ່າ​ອີກ, ສ້າງ​ສະພາບ​ແວດ​ລ້ອມ​ການ​ທຸລະ​ກິດ​ທີ່​ສະດວກ​ດີ​ເພື່ອ​ພັດທະນາ​ເສດຖະກິດ​ເອກະ​ຊົນ. ສົມທົບ​ກັບ​ບັນດາ​ກະຊວງ, ຂະ​ແໜງ​ການ​ທີ່​ກ່ຽວຂ້ອງ​ ໃນ​ການ​ສົ່ງ​ເສີມ​​ເສດຖະກິ​ດ​ເອກະ​ຊົນ ​ແລະ​ການ​ສ້າງ​ກຸ່ມ​ເສດຖະກິດ​ເອກະ​ຊົນຂະໜາດ​ໃຫຍ່ ​ໃຫ້​ມັນ​ຜະລິດ​ແລະ​ຂະຫຍາຍຕົວ. ນີ້​ຈະ​ເປັນ​ຮາກ​ຖານ​ສຳຄັນທີ່​ປະກອບສ່ວນ​ຢ່າງ​ຫຼວງ​ຫຼາຍ​ໃຫ້​ແກ່​ການ​ພັດທະນາ​ອຸດສາຫະກຳ​ຂອງ​ຫວຽດນາມ./.

​ໂດຍ ​ເຈິ່ນຕວັນ​ແອັງ

ກຳມະການ​ສູນ​ກາງ​ພັກ, ລັດຖະມົນຕີ​ກະຊວງ​ອຸດສາຫະກຳ​ການ​ຄ້າ

-------------------------

ບົດ​ນິ້​ໄດ້​ລົງ​ພິມ​ໃນ​ວາ​ລາ​ສານ​ກອມ​ມູນິດ ສະບັບ​ທີ 918 (​ເດືອນ​ເມສາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ