ວັນເສົາ, 21/9/2019
ການພັດທະນາຂົງເຂດການເງິນ-ທະນາຄານ ໃນສະພາບການການປະຕິວັດອຸດສາຫະກຳຄັ້ງທີສີ່
29/6/2019 9:39' ສົ່ງ ພິມ
ພາບປະກອບ: (ພາບ: AFP/TTXVN)

ບົດຮຽນ​ສາ​ກົນ​ກ່ຽວ​ກັບ​ການ​ພັດ​ທະ​ນາຂົງ​ເຂດ​ການ​ເງິນ-ທະ​ນາ​ຄານ ​ໃນ​ສະ​ພາບ​ການການ​ປະຕິວັ​ດ​ອຸດ​ສາ​ຫະ​ກຳ 4.0

ບັນ​ດາ​ປະ​ເທດ​ໃນ​ໂລກ​​ມີ​​ວິ​ທີ​ການທີ່​ແຕກ​ຕ່າງ​ກັນ​ໃນ​ການ​ເຂົ້າ​ເຖິງການ​ປະ​ຕິ​ວັດ​ອຸດ​ສາ​ຫະ​ກຳ 4.0 ເວົ້າ​ລວມ ແລະ ຂົງ​ເຂດ​ການ​ເງິນ-ທະ​ນາ​ຄານ 4.0 ເວົ້າ​ສະ​ເພາະ. ແຕ່​, ໃນ​ຂົງ​ເຂດການ​ເງິນ-ທະນາຄານ, ການ​ຕອບ​ສະໜອງຂອງ​ບັນ​ດາ​ປະ​ເທດ​ສາ​ມາດ​​ແບ່ງ​ອອກເປັນ​ສອງວິ​ທີ​ການຄື: ​ຕອບສະໜອງ​ແບບ​ເປັນ​ເຈົ້າ​ການ ແລະ ​ຕອບສະໜອງ​ແບບ​ອົດ​ຮັບ. ໃນ​ນັ້​ນ, ບັນ​ດາ​ປະ​ເທດ​ທີ່​ເລືອກ​ເອົາ​ວິ​ທີ​​ການ​ເຂົ້າ​ເຖິງ​ບັນຫາແບບ​ເປັນ​ເຈົ້າ​ການ​ເຄີຍ​ເອົາ​ໃຈ​ໃສ່​​ເຖິງການ​ພົວ​ພັນ​ຢ່າງ​ແໜ້ນ​ແຟ້ນ​ກັບ​ບັນ​ດາ​ນັກ​ປະ​ດິດ​ສ້າງ​ ເພື່ອ​ເກັບ​ກຳ​​ເອົາ​ການ​ພັດ​ທະ​ນາ​ໃໝ່​ຂອງ​ເຕັກ​ໂນ​ໂລ​ຊີ​ການ​ເງິນ (Fintech), ອຸປະສັກ​ທາງ​ກົດໝາຍຕໍ່​ການ​ປ່ຽນ​ແປງ​ໃໝ່ ແລະ ສະໜັບສະໜູນ​ການ​ເລີ່ມ​ທຸລະກິດ​ ແນໃສ່​ແກ້​ໄຂ​ຄວາມ​ທ້າ​ທາຍ​ທີ່​ເກີດ​ຂຶ້ນ. ​ນະ​ໂຍ​ບາຍ​ທົ່ວ​ໄປທີ່​ນິຍົມ​ໃຊ້​ຄື ​​ຂອບກົດໝາຍການ​ທົດ​ລອງ, ເຊັນ​​ຂໍ້​ຕົກ​ລົງ​ການ​ຮ່ວມ​ມືຫຼາຍ​ປະ​ເທດ ແລະ ກໍ່​ສ້າງ​ສູນ​ປ່ຽນ​ແປງ​ໃໝ່ປະ​ດິດ​ສ້າງ... ບັນດາ​ປະ​ເທດ​ໄປ​ຕາມ​ວິ​ທີ​ເຂົ້າ​ເຖິງ​ແບບນີ້​ເຄີຍ​ມີ​ຕະຫຼາດທີ່​ພັດ​ທະ​ນາ, ເຕັກ​ໂນ​ໂລ​ຊີ​ການປ່ຽນ​ແປງ​ໃໝ່​ສູງ​ທີ່ສຸດ.

ສຳ​ລັບ​ບັນ​ດາ​ປະ​ເທດ​ທີ່​​ເລືອກ​ເອົາ​ວິ​ທີ​ເຂົ້າ​ເຖິງບັນຫາ​ແບບ​ອົດ​ຮັບ, ບັນ​ດາ​ນັກ​ວາງ​ກຳ​ນົດ​ນະ​ໂຍ​ບາຍມີ​ບົດ​ບາດ​ຕັ້ງ​ໜ້າ​ໃນ​ຄວາມ​ພະ​ຍາ​ຍາມ​ເຮັດ​ໃຫ້ Fintech ບັນລຸ​ຜົນ​ສຳ​ເລັດ, ແຕ່​ການຕອບສະໜອງ​ບໍ່ເຄີຍ​​ເປັນ​ທາງ​ບວກ ແລະ ບໍ່​ພ້ອມ​​ທີ່​ຈະດັດ​ແປງ​ລະບຽບ​ກົດໝາຍ​ເມື່ອຈຳ​ເປັນ. ການ​ເຂົ້າ​ເຖິງ​ແບບນີ້​ຕົ້ນຕໍ​ແມ່ນໄດ້​ໝູນ​ໃຊ້​ຢູ່​ບັນ​ດາ​ປະ​ເທດ​ທີ່​ຖື​ວ່າ ​ການ​ປະ​ຕິ​ວັດອຸດ​ສາ​ຫະ​ກຳ 4.0 ສົ່ງ​ຜົນກະທົບບໍ່ຫຼາຍ​ເຖິງ​ຕະ​ຫຼາດ​ຂອງ​ເຂົາ​ເຈົ້າ. ບັນດາປະ​ເທດ​ເຫຼົ່ານີ້​ມັກ​ມີ​ຂໍ້ຈຳ​ກັດຫຼາຍ​ຢ່າງ​ກ່ຽວ​ກັບ​ໂຄງ​ສ້າງພື້ນຖານ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ, ແຫຼ່ງ​ບຸກ​ຄະ​ລາ​ກອນ ແລະ ລະ​ບຽບ​ກົດ​ໝາຍ. ຄວາມ​​ຈິງນີ້​ກາ​ຍ​ເປັນອຸປະສັກ​ຕໍ່​ຂະຊວນ​ວິວັດ​ການປ່ຽນ​ແປງ​ໃໝ່, ການ​ນຳ​ເອົາ​ເຕັກ​ໂນ​ໂລ​ຊີຂອງ​ການ​ປະຕິວັດອຸດ​ສາ​ຫະ​ກຳ 4.0 ເຂົ້າ​ນຳ​ໃຊ້ຢູ່​​ໃນປະ​ເທດກໍ່​ມີ​ຄວາມ​ຫຍຸ້ງ​ຍາກ. ດັ່ງ​ນັ້​ນ, ບັນ​ດາ​ນັກ​ບໍລິ​ຫານ​ເຄີຍຖືກ​ກົດ​ດັນ​ນ້ອຍລົງ​ໃນ​ການ​ດັດ​ແປງກອບ​ກົດໝາຍ, ໃນ​ຂະ​ນະນັ້ນ​ລະ​ດັບ​ການ​ປ່ຽນ​ແປງ​ຂອງ​ເຕັກ​ໂນ​ໂລ​ຊີ​ແມ່ນ​​ໄວ​ທີ່​ສຸດ​ທຽບ​ກັບ​ການ​ປ່ຽນ​ແປງ​ຂອງ​ກອບ​ກົດໝາຍ.

ເພື່ອ​​ກຽມຄວາມ​ພ້ອມ​ສຳລັບ​ກອບກົດໝາຍ, ບາງ​ປະ​ເທດ​ໄດ້​​ສ້າງ sandbox” (ເຕັກ​ນິກ​ອັນ​ສຳ​ຄັນ​ໃນ​ຂົງ​ເຂດ​ຮັກ​ສາ​ຄວາມ​ລັບ) ທາງ​ກົດໝາຍ​ທົ່ວ​ໄປ ​ແລະ​ບັນ​ດາ sandbox ສະ​ເພາະຂະ​ແໜງ​ການ. ບັນ​ດາ sandbox ທາງ​ກົດໝາຍ​ທົ່ວ​ໄປສະ​ໜອງ​​ສະ​ພາບ​ແວດ​ລ້ອມ​ ເພື່ອ​ທົດ​ລອງ​​ຜະ​ລິດ​ຕະ​ພັນແລະກິດຈະ​ກຳໃໝ່​ ເຊິ່ງ​ນັກ​ພັດ​ທະ​ນາ​ກຳ​ລັງ​​ຫາ​ວິ​ທີ​​ເອົາ​ເຂົ້າ​ໃນ​ຕະ​ຫຼາດ. ໃນຂັ້ນ​ຕອນ​ນີ້, ບັນ​ດາ​ບໍ​ລິ​ສັດ Fintech ໄດ້​ຮັບ​ການ​ຍົກ​ເວັ້ນ​ຈາກ​ຂໍ້​ກຳນົດ​ທາງ​ກົດໝາຍ ຫຼືຂໍ້​ບັງຄັບ​ບາງ​ຢ່າງ​ທີ່ອາ​ດຈະ​ຂັດ​ຂ​ວາງ​ການ​ພັດ​ທະ​ນາ​ເຕັກ​ໂນ​ໂລ​ຊີ. ບັນ​ດາ sandbox ຂອງ​ຂະ​ແໜງ​ການ​ໄດ້​ຮັບ​ການນຳ​ພາແລະສະໜັບະ​ໜູນ​ໂດຍ​ຜູ້​ທີ່​ກ່ຽວ​ຂ້ອງ​ໃນ​ຂະ​ແໜງ​ການ ແລະ ສະ​ໜອງ​​ໂອ​ກາດ​ເພື່ອ​ທົດ​ສອບ​ຜະ​ລິດ​ຕະ​ພັນ​ໃນ​ສະ​ພາບ​​​ແວດ​ລ້ອມຂອງ​ຕະລາດ​ຈຳລອງ​ໂດຍບໍ່ມີ​ລູກ​ຄ້າ. ນອກ​ຈາກນີ້, ບາງ​ປະ​ເທດ​ເລືອກ​ເອົາ​ການ​​ເຂົ້າ​ເຖິງ​ບັນຫາ​ແບບ ທົດ​ລອງແລະຮຽນ​ຮູ້”, ​ເຊັ່ນ ອິນ​ໂດ​ເນ​​ເຊຍ, ຟີ​ລິບ​ປີນ, ເກ​ນີ​ອາ...; ຫຼື ລໍ​ຖ້າແລະພິ​ຈາ​ລະ​ນາ” ​ເຊັ່ນ ຈີນ.

ກ່ຽວ​ກັບ​ການ​ກະ​ກຽມທາງ​ດ້ານ​ແຫຼ່ງບຸກ​ຄະ​ລາ​ກອນ, ບາງ​ປະ​ເທດ​ໄດ້​​ເອົາ​ໃຈ​ໃສ່​​ເປັນພິ​ເສດ​ເຖິງ​ແຫຼ່ງ​ບຸກ​ຄະ​ລາ​ກອນ ​ໃນ​ສະ​ພາບ​ການປະຕິວັດອຸດ​ສາ​ຫະ​ກຳ 4.0. ໃນ​ນັ້​ນ, ທ່າ​ອຽງ​ທີ່​ພົ້ນ​ເດັ່ນ​ແມ່ນ​ການ​ຫັນ​ປ່ຽນ​ລະ​ບົບ​ນິ​ເວດ​ການ​ສຶກ​ສາ​ ໂດຍ​ຜ່ານ​ບັນ​ດາ​ມາດ​ຕະ​ການ​ຕົ້ນ​ຕໍ່​ເຊັ່ນ ​ການ​ສຶກ​ສາ​ເດັດ​ນ້ອຍ​ແຕ່​ຍັງ​ນ້ອຍ, ພັດ​ທະ​ນາ​ໂຄງ​ການ ກຽມ​ພ້ອມ​ໃນ​ອະນາ​ຄົດ”; ຝຶກ​ອົບຮົມ​ຖັນ​ແຖວ​ຄູອາ​ຈານ​ມືຊາ​ຊີບ; ຝຶກ​ອົບຮົມ​ແຫຼ່ງ​ບຸກ​ຄະ​ລາ​ກອນ​ທີ່​ຊຳ​ນິຊຳ​ນານ​ດ້ານ​ດິຈິຕອນ; ສົ່ງ​ເສີມ​ການ​ສຶກ​ສາ​ດ້ານ​ເຕັກ​ນິກແລະອາ​ຊີວະ​ສຶກສາ; ເຜີຍ​ແຜ່​ທັດ​ສະ​ນະການຮຽນຮູ້​ຕະຫຼອດ​ຊີ​ວິດ. ບາງ​ປະ​ເທດປະສົບຄວາມ​ສຳ​ເລັດ​​ໃນ​ການ​ໃຊ້ຍຸດ​ທະ​ສາດການ​ລົງ​ທຶນ​ດ້ານຊັບພະຍາກອນ​ມະນຸດ ​ເຊັ່ນ ​ຍຸດ​ທະ​ສາດການ​ສຶກສາກໍ່​ສ້າງແລະຝຶກອົບຮົມ​ຮອບ​ດ້ານ​ສຳລັບ​ຜູ້​ໃຫຍ່​ຂອງສິງ​ກະ​ໂປ; ຍຸດ​ທະ​ສາດ​ການສຶ​ກ​ສາ​ພື້ນ​ຖານ​ຄວາມ​ພ້ອມ​ໃນ​ອະ​ນາ​ຄົດ​ຂອງ​ແຟງລັງ; ຂອບແລະມາດ​ຕະ​ຖານ​ສຳລັບ​ການ​ຂະຫຍາຍການ​ສຶກ​ສາ​ຂອງພາກ​ເອ​ກະ​ຊົນ​ຢູ່ອິນ​ເດຍ; ວິ​ທີ​ການ​ທີ່​ສົມບູນ​ແບບສຳລັບ​ລະ​ບົບການ​ຝຶກ​ອົບຮົມ​ວິຊາອາຊີບ​ຢູ່​ເຢຍ​ລະ​ມັນ ແລະ ສະວິດ...

ສຳ​ລັບ​ໂຄງ​ສ້າງພື້ນຖານ, ການ​ກະ​ກຽມ​ບໍ່​ພຽງ​ແຕ່​ມາ​ຈາກລັດ​ເທົ່າ​ນັັ້ນ ​ແຕ່​ຍັງ​ມາ​ຈາກບັນດາວິ​ສາ​ຫະ​ກິດ​ແລະ​ບໍ​ລິ​ສັດ​ການ​ເງິນທີ່​ສຳຄັນ. ປະ​ເທດຕ່າງໆ​ໄດ້​ສຸມ​ໃສ່​ການ​ພັດ​ທະ​ນາ​ໂຄງສ້າງ​ພື້ນຖານເພື່ອ​ຮັບ​ໃຊ້​ເປົ້າ​ໝາຍ​ຍຸດ​ທະ​ສາດ​ຂອງ ​Fintech, ​ຄື​ລະ​ບົບການ​ຊຳ​ລະ​ເງິນທັນ​ທີ ແລະ ບັນ​ຊີ​​ແຍກ​ປະ​ເພດ​ກະ​ຈາຍ​ຢູ່​ອາ​ເມ​ລິ​ກາ; ການເຊື່ອມ​ຕໍ່​ໂຄງສ້າງພື້ນຖານ​ການ​ຊຳ​ລະ​ເງິນ​ຂອງທະ​ນາ​ຄານແລະການ​ສື່ສານໂທ​ລະ​ຄົມ​ມະ​ນາ​ຄົມ​​ໃນປະ​ເທດ​ຈີນ ແລະ ປະ​ເທດ​ໄທ;​ ການລົງ​ທຶນ​ຍົກ​ສູງ​ຄຸນ​ນະ​ພາບ​ຂອງລະ​ບົບການ​ຫັກ​ບັນຊີ ແລະ ລະ​ບົບການ​ຊຳລະ​ເງິນ​ຢູ່​ເອີ​ຣົບ; ​ສ້າງພື້ນ​ຖານ​ການເຊື່ອມ​ຕໍ່​ສຳລັບ​ວິ​ສາ​ຫະ​ກິດ​ຢູ່ສິງ​ກະ​ໂປ. ບັນ​ດາ​ບໍ​ລິ​ສັດ​​ການ​ເງິນທີ່​ສຳຄັນ​ໃນ​ໂລກ​ ​ໄດ້​ເອົາ​ໃຈ​ໃສ່​ຫຼາຍ​ກວ່າ​ອີກເຖິງ​ໂຄງສ້າງພື້ນຖານ​ໃນ​ກາ​ຊຳ​ລະ​​ເງິນ​ລະຫວ່າງ​ປະ​ເທດ, ​ເຊັ່ນ ການທີ່ 6 ​ທະ​ນາ​ຄານໃຫຍ່ທີ່​ສຸດ​ໃນ​ໂລກ​ໄດ້ສ້າງ​ຕັ້ງໂຄງ​ການ Blockchain Utility Settlement Coin” (ເງິນ​​ເອ​ເລັກ​ໂຕຣນິກ) ອະ​ນຸ​ຍາດການ​ຊື້​ຂາຍຫຼັກ​ຊັບ​​ໂດຍບໍ່​ຕ້ອງ​ໂອນ​ເງິນ, ຫຼື ເຄືອ​ຂ່າຍ​ຜູ້​ໃຫ້​ບໍ​ລິ​ການ​ຊຳ​ລະ​ເງິນ​ຂ້າມ​ຊາດ (PSP) (​ເຊັ່ນ Earthport) ​ອະ​ນຸ​ຍາດ​ໃຫ້​ຊຳ​ລະ​​ເງິນດ່ວນ​ໄປ​ຍັງບັນ​ຊີ​ທະ​ນາ​ຄານທັງ​ໝົດ​ໃນກວ່າ 65 ​ປະ​ເທດທົ່ວ​ໂລກ.

ເບິ່ງ​ລວມ​, ການ​ເຂົ້າ​ເຖິງການ​ປະຕິວັດອຸດ​ສາ​ຫະ​ກຳ 4.0 ຢູ່​​ໃນ​ປະເທດຕ່າງໆ​ແຕກ​ຕ່າງ​ກັນ, ແຕ່ທຸກ​ປະ​ເທດ​ລ້ວນ​ແຕ່ຮັບ​ຮູ້ວ່າ ການ​ປະຕິວັດອຸດ​ສາ​ຫະ​ກຳ 4.0 ເປັນ​ໂອ​ກາດທີ່​ສຳຄັນ​ສຳລັບການ​ພັດ​ທະ​ນາ​ເສດ​ຖະ​ກິດ-ສັ​ງຄົມ, ດັ່ງ​ນັ້​ນ ລັດ​ຖະ​ບານ​ໄດ້​ຊີ້​ນຳ​ການຄົ້​ນ​ຄວ້າແລະຕິດ​ຕາມຢ່າງ​ໃກ້ຊິດກັບ​ການພັດທະນາ​​ຂອງການ​ປະຕິວັດອຸດ​ສາ​ຫະ​ກຳ 4.0. ຫວຽດ​ນາມ​ສາ​ມາດ​ຄົ້ນ​ຄວ້າພິ​ຈາ​ລະ​ນາ​ວິ​ທີ​ການເຂົ້າ​ເຖິງ​ແບບ​ເປັນ​ເຈົ້າ​ການ, ໝູນ​ໃຊ້ sandbox ໃນ​ການກໍ່​ສ້າງ​ນະ​ໂຍ​ບາຍ, ສົ່ງ​ເສີມ​ການ​ພັດ​ທະ​ນາ​ເຕັກ​ໂນ​ໂລ​ຊີ​ໃນ​ຂົງ​ເຂດ​ການ​ເງິນ-ທະ​ນາ​ຄານ, ​ໃຫ້​ຄວາມ​ສຳຄັນ​ແກ່​ການ​ປັບປຸງ​ໂຄງ​ສ້າງພື້ນຖານ​ດ້ານ​ເຕັດ​ໂນ​ໂລ​ຊີ​ຂໍ້​ມູນ​ຂ່າວ​ສານ, ຍົກ​ສູງ​ຄຸນ​ນະ​ພາບຂອງ​ແຫຼ່ງ​ບຸກ​ຄະ​ລາ​ກອນ ແລະ ປະ​ຕິ​ຮູບ​ລະ​ບຽບ​ກົດ​ໝາຍ​ຕາມ​ທິດແກ້​ໄຂອຸປະສັກ​ທີ່ກີດ​ຂວາງ​ການ​ພັດ​ທະ​ນາ​ເຕັກ​ໂນ​ໂລ​ຊີ.

ການ​ປະ​ຕິ​ວັດ​ອຸ​ດ​ສາ​ຫະ​ກຳ 4.0 ໃນ​ຂົງ​ເຂດ​ການ​ເງິນ-ທະ​ນາ​ຄານ ຢູ່​ຫວຽດ​ນາມ

ການ​ເງິນທະ​ນາ​ຄານ​ແມ່ນ​ຂົງ​ເຂດ​ທີ່ຂະຫຍັນ​ຂັນ​ເຄື່ອນ​ທີ່​ສຸດ​ຢູ່​ຫວຽດ​ນາມ ​ໃນ​ການ​ຜັນ​ຂະ​ຫຍາຍ​ການ​ຄົ້ນ​ຄວ້າແລະໝູນ​ໃຊ້ການ​ປະຕິວັດອຸດ​ສາ​ຫະ​ກຳ 4.0. ຜົນການ​ສຳຫຼ​ວດ​ຂອງ​ສະ​ຖາ​ບັນ​ຍຸດ​ທະ​ສາດ​ທະ​ນາ​ຄານ​ທີ່​ດຳ​ເນີນ​ການໃນ​ເດືອນພຶດ​ສະ​ພາ 2017 ສະ​ແດງໃຫ້​ເຫັນ​ວ່າ, 92% ຂອງ​ຜູ້​ຕອບ​ຄຳ​ຖາມບອກ​ວ່າ  ກຳ​ລັງ​​ກະ​ກຽມເພື່ອ​ລົງ​ທຶນສຳລັບ​ການ​ປ່ຽນ​ແປງ​ໃໝ່​ເຕັກ​ໂນ​ໂລ​ຊີ ແລະ ພັດ​ທະ​ນາ​ຊ່ອງທາງ​ການ​ຂາຍ​ຜ່ານ​ເຕັກ​ໂນ​ໂລ​ຊີດິຈິ​ຕອນ ​ເພື່ອ​ຮັບແລ​ະປັບ​ໃຫ້​ເຂົ້າ​ກັບ​ຄວາມ​ຄືບ​ໜ້າ​ຂອງການ​ປະຕິວັດອຸດ​ສາ​ຫະ​ກຳ 4.0; 76%: ບອກ​ວ່າ​ໄດ້​ກະ​ກຽມ​ເພື່ອ​ດຶງ​ດູດ​ແຮງ​ງານ​ໃນ​ຂົງ​ເຂດ​ເຕັກ​ນິກ-ເຕັກ​ໂນ​ໂລ​ຊີສູງ ແລະ ເຕັກ​ໂນ​ໂລ​ຊີຂໍ້​ມູນ​ຂ່າວ​ສານ; 96% ຂອງ​ທະ​ນາ​ຄານກຳລັງ​ສ້າງ​ຍຸດ​ທະ​ສາດການ​ພັດ​ທະ​ນາ​ເຕັກ​ໂນ​ໂລ​ຊີ​ສູງ, ເຕັກ​ໂນ​ໂລ​ຊີລັກສະນະ​ສະ​ເພາະ​ຂອງການ​ປະຕິວັດອຸດ​ສາ​ຫະ​ກຳ 4.0 ເຖິງ​ປີ 2025; ໃນ​ນັ້ນ​ທະ​ນາ​ຄານ 3 ແຫ່ງ (ທະ​ນາ​ຄານຫວຽດ​ນາມ​ທິ້ງ​ເວື້ອງ - VP bank; ທະ​ນາ​ຄານ​ຕ່ຽນ​ຟອງ - TP bank; ​ບໍ​ລິ​ສັດທະ​ນາ​ຄານ ຮ່ອງ​ກົງແລະຊ່ຽງ​ໄຮ້ - HSBC) ໄດ້​ມີ​ຍຸດ​ທະ​ສາດ​ການພັດ​ທະ​ນາ​ກ່​ຽວ​ກັບຫຸ່ນ​ຍົນຊັ້ນ​ສູງ​ແລະ​ອັດ​ຕະ​ໂນ​ມັດ. ບັນ​ດາ​ທ່າ​ອຽງ​ທີ່​ພົ້ນ​ເດັ່ນ​ໃນ​ການ​ໝູນ​ໃຊ້ການ​ປະຕິວັດອຸດ​ສາ​ຫະ​ກຳ 4.0 ຢູ່ຫວຽດ​ນາມລວມ​ມີ​ ເພີ່ມ​ທະ​ວີ​ການ​ພັດ​ທະ​ນາ​ທະ​ນະ​ຄານ​ດິ​ຈິຕອນ (Digital Banking), ການ​ປະ​ຢຸກ​ໃຊ້​ຖານຂໍ້​ມູນ​ໃຫ​ຍ່ (big data), ການ​ປະ​ຢຸກ​ໃຊ້​ປັນຍາ​ປະດິດ (AI) ເຂົ້າ​ໃນ​ການ​ຮັບ​ໃຊ້​ລູກ​ຄ້າ​ໃນ​ທະ​ນາ​ຄານ​ດິຈິຕອນ, ການ​ປະ​ຢຸກ​ໃຊ້​ເຕັກ​ໂນ​ໂລ​ຊີ​ຄອມ​ພິວ​ເຕີ​ເມກ (Cloud Computing), ການຄົ້​ນ​ຄວ້າ​ແລະ​ການ​ປະ​ຢຸກໃຊ້​ຂະ​ບວນການ​ອັດ​ຕະ​ໂນ​ມັດ​​ໂດຍຫຸ່ນ​ຍົນ (Robotic Process Automation - RPA).

Fintech ໄດ້​ປ​ະ​ກອ​ບ​ສ່ວນ​ເຂົ້າ​ໃນ​ການ​ປ່ຽນ​ແປງ​ຢ່າງ​ເລິກ​ເຊິ່ງ​ໃນ​ຮູ​ບລັກສະນະຂອງ​ຂະ​ແໜງອຸດ​ສາ​ຫະ​ກຳ​ການ​ເງິນ​ຢູ່ຫວຽດນາມ. ອີງຕາມ​ການ​ສຳຫຼວດ​ກ່ຽວ​ກັບ Fintech ຂອງ​ພາກ​ພື້ນອາ​ຊຽນປີ 2018 ຂອງ Ernst & Young (ໜຶ່ງ​ໃນ 4 ບໍ​ລິ​ສັດ​ກວດ​ສອບ​ບັນ​ຊີ​ຊັ້ນ​ນຳ​ຂອງ​ໂລກ​ໃນ​ປະ​ຈຸ​ບັນ), ປະຈຸ​ບັນຫວຽດ​ນາມມີ​ 78 ບໍ​ລິ​ສັດ Fintech ທີ່​ກຳລັງ​ເຄື່ຶອນ​ໄຫວ​ໂດຍມີ​ການ​ລົງ​ທຶນ​ທັງ​ໝົດ​ເຖິງ 129 ລ້ານໂດ​ລາ​ສະ​ຫະ​ລັດ. ​ໃນ​ນັ້ນ, ປະ​ຈຸ​ບັນ 90% ຂອງ​ການ​ຊຳ​ລະ​​ເງິນ​ເປັນເງິນ​ສົດ ແລະ ບັນ​ດາ​ບໍ​ລິ​ສັດ Fintech ຫວຽດ​ນາມ​ໃຫ້​ຄວາມ​ສຳຄັນ​ກັບ​ການ​ຈ່າຍ​ເງິນ​ຊຳ​ລະ​ເງິນ ​ເຊິ່ງກວມ​ເອົາ 47% ຂອງ 78 ບໍລິສັດ​ຫວຽດນາມ, ນີ້​ແມ່ນ​ອັດ​ຕາ​ສ່ວນທີ່​ສູງທີ່​ສຸດໃນພາກ​ພື້ນອາ​ຊຽນ. ​ຜະ​ລິດ​ຕະ​ພັນ​ຕົ້ນ​ຕໍຂອງ Fintech ໃນ​ຂົງ​ເຂດ​ທະນາຄານ​ສາ​ມາດ​ເວົ້າ​ເຖິງ, ​ເຊັ່ນ: ກະ​ເປົ໋າ​ເງິນ​ເອ​ເລັກ​ໂຕຣນິກ, ການ​ໂອນ​ເງິນ​ແນວ​ນອນ, ການ​ບໍ​ລິ​ການ​ຂໍ້​ມູນດ້ານ​ການ​ເງິນ, ການໃຫ້​ກູ້​ຢືມ​​ເພື່ອນ​ມິດ, ການ​ຮຽກ​ທຶນ​ຊຸມ​ຊົ, ເງິ​ນວິ​ທີ​ຄະ​ນິດ Bitcoin... ການ​ປະ​ຕິ​ວັດ​ເຕັກ​ໂນ​ໂລ​ຊີ 4.0 ກັ​ບ​ຕະຫຼາດຫຼັກ​ຊັບຫວຽດ​ນາມ ກຳລັງ​ເຮັດ​ໃຫ້​ມີ​ການເພີ່ມຄຸນ​ນະ​ພາບ​ຂອງສິນ​ຄ້າ, ເພີ່​ມອັດຖະ​ປະ​ໂຫຍດ​ສຳລັບ​ນັກ​ລົງ​ທຶນ ແລະ ປັບປຸງ​ແບບວິ​ທີ​ການ​ດຳ​ເນີນ​ງານ ​ໂດຍ​ຜ່ານ​​ການ​ສົ່ງຜົນ​ກະ​ທົບ​ເຖິງ​ຄຸນ​ນະ​ພາບ​ຂອງບໍລິສັດ​ຈົດ​ທະບຽນ, ບັນ​ດາ​ອົງ​ການ​ຕົວ​ກາງ​ໃນ​ຕະຫຼາດຫຸ້ນ ແລະ ​ນັກ​ລົງ​ທຶນ​ໃນ​ຕະຫຼາດຫຸ້ນ.

ເບິ່ງ​ລວມ​ແລ້ວ, ຜົນ​ກະ​ທົບ​ຂອງການ​ປະຕິວັດອຸດ​ສາ​ຫະ​ກຳ 4.0 ເຖິງ​ຂົງ​ເຂດການ​ເງິນທະ​ນາ​ຄານ ຢູ່ຫວຽດ​ນາມແມ່ນ​ຈະ​ແຈ້ງ​ພໍ​ສົມ​ວນ. ອາດຈະ​ເວົ້າ​ໄດ້​ວ່າ, ຂົງເຂດ​​ບໍ​ລິ​ການດ້ານການ​ເງິນທະ​ນາ​ຄານຢູ່ ຫວຽດ​ນາມ ມີ​ການ​​ຕອບສະໜອງ​ໄວ​ທີ່​ສຸດ​ທຽບ​ກັບ​ຂົງເຂດອື່ນ ​ໃນ​ການ​ເປັນ​ເຈົ້າ​ການ​ຄົ້ນ​ຄວ້າແລະ​ປະ​ຢຸກໃຊ້​ວິ​ທະ​ຍາ​ສາດ-ເຕັກ​ໂນ​ໂລ​ຊີ ຂອງການ​ປະຕິວັດອຸດ​ສາ​ຫະ​ກຳ 4.0 ເຂົ້າ​ໃນ​ການ​ປ່ຽນ​ແປງ​ໃໝ່​ວິ​ທີ​ການຄຸ້ມ​ຄອງ​ທະ​ນາ​ຄານ; ປ່ຽນ​ແປງ​ໃໝ່​ການ​ພົວ​ພັນ​ກັບ​ລູກ​ຄ້າ; ຫັນ​ເປັນ​ທັນ​ສະ​ໄໝຕໍ່​ວິ​ທີ​ການ​ພົວ​ພັນ​ແລກ​ປ່ຽນ, ຊ່ອງທາງ​ການສະ​ໜອງ​ແລະ​ຈຳໜ່າຍ​ຜະ​ລິດ​ຕະ​ພັນ; ການ​ປະ​ຢຸກໃຊ້​ຖານຂໍ້​ມູນ​ໃຫຍ່; ການ​ປະ​ຢຸກ​ໃຊ້​ປັນ​ຍາປະດິດ; ການ​ປະ​ຢຸກໃຊ້​ເຕັກ​ໂນ​ໂລ​ຊີ​ຄອມ​ພິວ​ເຕີ​ເມກ; ເຕັກ​ໂນ​ໂລ​ຊີ Fintech ໃນ​ການ​ຊຳ​ລະ​ເງິນ... ສາ​ເຫດ​ຂອງ​ການ​ກ້າວກະ​ໂດດ​​ໃນ​ຂົງເຂດການ​ເງິນທະນາ​ຄານແມ່ນ: ຄ່າ​ໃຊ້​ຈ່າຍຫຼຸດ​ລົງ​ໄດ້​ຊຸກ​ຍູ້​​ໃຫ້​​​ເຕັກ​ໂນ​ໂລ​ຊີ​​ແຜ່​ຂະຫຍາຍໃນຂົງ​ເຂດການ​ເງິນທະ​ນາ​ຄານ; ການ​ປະ​ສົມຫຼາຍ​ຮູບ​ແບບ​ເຕັກ​ໂນ​ໂລ​ຊີ​ດິຈິຕອນ, ການ​ລວມ​ເຕັກ​ໂນ​ໂລ​ຊີ​ດິຈິຕອນ​​ເຂົ້າກັບ​ເຕັກ​ໂນ​ໂລ​ຊີ​ອື່ນ​ ​ໄດ້​ຊ່ວຍ​ໃຫ້​ຍົກ​ສູງ​ປະ​ສິດ​ທິ​ຜົນ​ການ​ເຄື່ອນ​ໄຫວ, ເຮັດ​ໃຫ້​ວິ​ວັດ​ການ​ເຄື່ອນ​ໄຫວ​ກາຍ​ເປັນ​ງ່າຍ​ດາຍກວ່າ, ຊັດ​ເຈນ​ກວ່າ; ລະ​ບົບການ​ເງິນທະ​ນາ​ຄານໃນ​ປະ​ຈຸ​ບັນກຳ​ລັງ​ເຂົ້າ​ເຖິງ​ດີ​ພໍ​ຄວນ ​ກັບທ່າ​ອຽງ​ເຕັກ​ໂນ​ໂລ​ຊີ​ຢູ່ໃນ​ໂລກ. ແຕ່​, ​ເມື່ອ​ທຽບ​ກັບ​ຂະ​ໜາດ​​ໂດຍລວມຂອງ​ທັງລະ​ບົບ​ການ​ເງິນທະ​ນາ​ຄານຫ​ວຽດ​ນາມ, ຈະ​ເຫັນ​ໄດ້​ຢ່າງ​ຊັດ​ເຈນ​ວ່າ​ ການ​ຄົ້ນ​ຄວ້າ​ແລະ​ການ​ປະ​ຢຸກ​ໃຊ້​ເຕັກ​ໂນ​ໂລ​ຊີ​ຂອງການ​ປະຕິວັດອຸດ​ສາ​ຫະ​ກຳ 4.0 ຍັງ​ມີ​ຄວາມ​ກະ​ແຈກ​ກະ​ຈາຍຫຼາຍ ແລະ ພຽງ​ແຕ່​​ເກີດ​ຂຶ້ນຢູ່​​ໃນ​ສະ​ຖາ​ບັນ​ການ​ເງິນ​ແລະທະ​ນາ​ຄານທີ່​ສຳຄັນ​ເທົ່າ​ນັ້ນ - ເປັນ​ກຸ່ມ​ທີ່​ມີ​ທ່າ​ແຮງ​ທາງ​ດ້ານ​ວິ​ທະ​ຍາ​ສາດ-ເຕັກ​ໂນ​ໂລ​ຊີ​ ເຊິ່ງກ່ອນນັ້ນ​ໄດ້​ຮັບຮູ້ຄວາມ​ສຳ​ຄັນ​ຂອງການ​ປະ​ຕິ​ວັດອຸດ​ສາ​ຫະ​ກຳ 4.0. ຄຽງ​ຄູ່​ກັນ​ນັ້ນ, ຍັງ​ມີຫຼາຍ​ອົງການການ​ເງິນ​ທະ​ນາ​ຄານທີ່​ຢູ່​ໃນຂັ້ນ​ຕອນ​ການ​ຄົ້ນ​ຄວ້າ ຫຼື​ບໍ່​ມີ​ການ​ເຄື່ອນ​ໄຫວ​ແຕ່​ຢ່າງ​ໃດ​ເລີຍ. ກຸ່ມ​ອົງ​ການ​ນີ້​ມີ​ຂະ​ຫຍາດ​ນ້ອຍ, ພື້ນ​ຖານ​ວິ​ທະ​ຍ​ສາດ-ເຕັກ​ໂນ​ໂລ​ຊີ​ຍັງຖືກ​ຈຳ​ກັດ, ຍັງ​ບໍ່​ທັນ​ກັບ​ທ່າ​ອຽງ​ການ​ປ່ຽນ​ແປງ​ໃໝ່​ຂອງການ​ປະ​ຕິ​ວັດອຸດ​ສາ​ຫະ​ກຳ 4.0 ພາຍ​ໃນ​ປະ​ເທດແລະໃນ​ໂລກ. ຮູບ​ແບບ​ການເຄື່ອນ​ໄຫວ​ຍັງ​ຕາມ​ແບບດັ້ງ​ເດີມເປັນ​ຕົ້ນ​ຕໍ. ສະ​​ພາບ​ການນີ້​ຈະ​ສ້າງ​ແຮງ​ກົດ​ດັນຢ່າງ​ຫຼາຍ​ຕໍ່ກຸ່ມອື່ນ​ໆ ​ໃນ​ການຕ້ອງ​ປັບ​ໂຄງ​ສ້າງ​ການ​ເຄື່ອນ​ໄຫວຄືນ​ໃໝ່​ ບົນ​ພື້ນ​ຖານ​ການ​ປະ​ຢຸກໃຊ້​ເຕັກ​ໂນ​ໂລ​ຊີ​ຂອງການປະ​ຕິ​ວັດ​ອຸດ​ສາ​ຫະ​ກຳ 4.0 ເພື່ອ​ຄວາມ​ຢູ່​ລອດ.

​ໂອ​ກາດແລະສິ່ງ​ທ້າ​ທາຍສຳລັບການ​ພັດ​ທະ​ນາ​ ຂອງຂົງ​ເຂດ​ການ​ເງິນ-ທະ​ນາ​ຄານຫວຽດ​ນາມ

ການ​ປະ​ຕິ​ວັດ​ອຸດ​ສາ​ຫະ​ກຳ 4.0 ນຳ​ເອົາໂອ​ກາດ​ການພັດ​ທະ​ນາ​ໃໝ່ຫຼວງ​ຫຼາຍ​ມາ​ໃຫ້​ຂົງ​ເຂດການ​ເງິນທະ​ນາ​ຄານຫວຽດ​ນາມ, ໃນ​ນັ້ນຈຸດ​ເດັ່ນ​ແມ່ນ:

1 - ຫຼຸດຜ່ອນ​ຊ່ອງ​ຫວ່າງ​ດ້ານ​ເຕັກ​ໂນ​ໂລ​ຊີ​ເມື່ອ​ທຽບ​ກັບ​ໂລກ. ຄວາມ​​ຕ້ອງ​ການປະ​ຢຸກ​ໃຊ້ແລະພັດ​ທະ​ນາ​ເຕັກ​ໂນ​ໂລ​ຊີ​ສູງ ໃນ​ການ​ເຄື່ອນ​ໄຫວ​ຂອງ​ທະ​ນາ​ຄານຢູ່ຫວຽດ​ນາມ ພວມ​ເພີ່ມ​ຂຶ້ນຫຼາຍ. ການ​ສຳຫຼວດ​ຂອງ​ທະ​ນາ​ຄານ​ແຫ່ງ​ລັດ​ໃຫ້​ເຫັນ​ວ່າ, ມີ​ບາງທະ​ນາ​ຄານ​ຄາດວ່າ​ຈະ​ລົງ​ທຶນ 8% - 10% ຄ່າ​ໃຊ້​ຈ່າຍ​ການ​ເຄື່ອນ​ໄຫວທັງ​ໝົດຂອງ​ແຕ່​ລະ​ປີ ​ໃຫ້​ແກ່​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ. ຄວາມ​ກ້າວ​ໜ້າ​​ໃນ​ການ​ປະ​ຕິ​ວັດ​ເຕັກ​ໂນ​ໂລ​ຊີ​ດິຈິຕອນ ແລະ​ຫຼັງ​ຈາກ​ນັ້ນແມ່ນການ​ປະ​ຕິວັດ​ອຸດ​ສາ​ຫະ​ກຳ 4.0 ຈະ​ສ້າງ​ເງື່ອນ​ໄຂອັນ​ສະ​ດວກ​ໃຫ້​​​ທະ​ນາ​ຄານຫວຽດ​ນາມ ມີ​ໂ​ອ​ກາດດຶງ​ດູດ​​ເງິນ​ລົງ​ທຶນ ​ແລະ ເຂົ້າ​ເຖິງ​ຕະຫຼາດ​ສາ​ກົນ; ປັບປຸງ​ລະດັບຄຸ້ມ​ຄອງ​ບໍ​ລິ​ຫານແລະທຸ​ລະ​ກິດ​ທັນ​ສະ​ໄໝ; ຮັບ​ເອົາ​ບັນ​ດາຕົວ​ແບບ​ທະ​ນາ​ຄານ​ດິ​ຈິ​ຕອນ​ອັດສະລິ​ຍະ; ປ່​ຽນ​ແປງ​ໃໝ່​ເຕັກ​ໂນ​ໂລຊີ​​ໂດຍ​ການ​ໝູນ​ໃຊ້ ຫຼືມອບ​ຮັບ​ເຕັກ​ໂນ​ໂລ​ຊີ​ສູງ, ພັດ​ທະ​ນາ​ຜະ​ລິດ​ຕະ​ພັນ​​ບໍ​ລິ​ການ​ທະ​ນາ​ຄານ​ທີ່ທັນ​ສະ​ໄໝ, ເສີມ​ຂະ​ຫຍາຍ​ຄວາມ​ສາ​ມາດ​ບົ່ມ​ຊ້ອນ​ອັນ​ໃຫຍ່ຫຼວງ​ຂອງ​ຂົງ​ເຂດການ​ເງິນທະ​ນາ​ຄານ ແລະ ມີ​​ການ​ປ່ຽນ​ແປງ​ທີ່​ທັນ​ເວລາ​ກັບ​ທ່າ​ອຽງ​ເຕັກ​ໂນ​ໂລ​ຊີ​ໃໝ່ ເມື່ອຫວຽດ​ນາມເຂົ້າ​ຮ່ວມອົງ​ການ​ການ​ຄ້າ​ໂລກ (WTO)  ແລະເຊັ​ນ​ສັນ​ຍາ​ການ​ຄ້າ​ເສ​ລີ (FTA)​ ຫຼາຍ​ສະບັບ, ​ພິ​ເສດ​ແມ່ນສັນຍາ​ການ​ຄ້າ​ເສລີ​ລະຫວ່າງ​ຫວຽດນາມ​ແລະ​ສະຫະພາບເສດ​ຖະ​ກິດອາ​ຊີ - ເອ​ຣົບ, ຫຼືສັນ​ຍາ​ການ​ຄ້າ​ເສ​ລີລະຫວ່າງຫວຽດ​ນາມ​ແລະ​ສາທາລະນະ​ລັດເກົາຫຼີ, ສັນ​ຍາ​ການ​ຄ້າ​ເສ​ລີລະ​ຫວ່າງຫວຽດ​ນາມ​ແລະຍີ່​ປຸ່ນ

2- ​ຍົກ​ສູງ​ຄວາມ​ສາ​ມາດ​ເຂົ້າ​ເຖິງ​ຕະຫຼາດ​ສາ​ກົນ: ໃນ​ປະ​ຈຸ​ບັນ ຫວຽດ​ນາມມີ​ການ​ພົວ​ພັນ​ທາງການ​ທູດ​ແລະການ​ຄ້າ​ກັບ​ເກືອບ​ທຸກ​ປະ​ເທດແລະດິນ​ແດນ​ໃນ​ໂລກ, ​ແລະ​ໄດ້ເຂົ້າ​ຮ່ວມ​​ໃນ​ສັນຍາ​ການ​ຄ້າ​ເສລີ​ຂະ​ໜາດ​ໃຫ​ຍ່​ສ່ວນ​ຫຼາຍໃນ​ໂລກ, ການ​ມີ​ໜ້າ​ຂອງກ​ານ​ປະ​ຕິ​ວັດອຸ​ສາ​ຫະ​ກຳ 4.0 ຈະ​ເປັນ​ໂອ​ກາດ​ດີໃຫ້​​ອົງ​ການການ​ເງິນທະ​ນາ​ຄາ​ນຂະໜາດ​ໃຫຍ່ ​ແລະ​ລະ​ບົບ​ການ​ເງິນ​ທະນາຄານ​ທັງ​ໝົດ ​ສາ​ມາດຂະຫຍາຍ​ຕົວ​ອອກ​ນອກ​ອານາ​ເຂດ, ເປີດກວ້າງ​ຂອບ​ເຂດ​ການ​ເຄື່ອນ​ໄຫວແລະສ້າງ​ຕັ້ງ​ເຄື່ອງ​ໝາຍ​ການ​ຄ້າ​ສາ​ກົນ ​ໃນສະພາບ​ເງື່ອນ​ໄຂຂອງ​ການ​ແຂ່ງຂັນ​ທຸ​ລະ​ກິດ​​ເທົ່າ​ທຽມ​ກັນ​ໃນ​ທົ່ວ​ໂລ​ກ, ມີ​ລັກ​ສະ​ນະ​ມື​ອາ​ຊີບ​ສູງ. ສິ່ງ​ເຫຼົ່າ​ນີ້​ຈະ​ເປີດ​ໂອ​ກາດທີ່​ດີ​ສຳລັບ​​ຂົງ​ເຂດ​ການ​ເງິນທະ​ນາ​ຄານ​ ໃນ​ການ​ກ້າວ​ທັນ​ລະ​ດັບ​ໂລກ, ເປີດກວ້າງ​ຕະຫຼາດ, ປະ​ກອ​ບສ່ວນ​ເຂົ້າ​ໃນການ​ເຕີບ​ໂຕ​ເສດ​ຖະ​ກິດຂອງຫວຽດ​ນາມ.

3- ຍົກ​ສູງ​ຄຸນ​ນະ​ພາບ​ຜະ​ລິດ​ຕະ​ພັນ​​ບໍ​ລິ​ການດ້ານການ​ເງິນທະ​ນາ​ຄານ ຕາມ​ທິດ​ທັນ​ສະ​ໄໝ, ມີປະ​ສິດ​ທິ​ຜົນ​ທາງ​ດ້າ​ນ​ເວລາ, ພື້ນ​ທີ່, ຄ່າ​​ໃຊ້​ຈ່າຍ ແລະ ເພີ່ມ​ຜົນ​ກຳ​ໄລ: ການ​ປະ​ຕິ​ວັດ​ອຸດ​ສາ​ຫະ​ກຳ 4.0 ບົນ​ພື້ນ​ຖານ​ເຕັກ​ໂນ​ໂລ​ຊີດິິຈິຕອນ ແລະການ​ປະສານ​ລວມ​ເຕັກ​ໂນ​ໂລ​ຊີ​ອັດ​ສະ​ລິ​ຍະ, ເປີດ​ໂອ​ກາດທີ່​ດີ​ເພື່ອຫຼຸດຜ່ອນ​ຄ່າ​ໃຊ້​ໃນ​ການທຸລະ​ກິດ, ຂົນ​ສົ່ງ, ຄຸ້ມ​ຄອງ, ຕອບ​ສະ​ໜອງ​ຄວາມ​ຮຽກ​ຮ້ອງ​ຕ້ອງ​ການ​ຂອງ​ລູກ​ຄ້າ​ໄດ້​ເປັນ​ຢ່າງ​ດີ…​ໂດຍ​ສະ​ເພາະ​ແມ່ນ​ຈະ​ທ້າ​ທາຍ​ຮູບ​ແບບ​ດັ້ງ​ເດີມ, ສ້າງ​​ແຮງ​ກົດ​ດັນ​​ເພື່ອ​ເຮັດ​ໃຫ້ການ​ດຳ​ເນີນ​ງານ​ຂອງ​ຂະ​ແໜງ​ການ​ເງິນ​ທະນາຄານ​ມີ​ຄວາມ​ທັນ​ສະ​ໄໝ ຖ້າບໍ່​ດັ່ງ​ນັ້ນ​ຈະ​ຖືກ​ແຍກ​ອອກ​ຈາກ​ຕະຫຼາດ, ສ້າງ​ການ​ແຂ່ງ​ຂັນ​ພັດ​ທະ​ນາ​ໃນ​ທາງ​ບວກ​ສຳລັບຂົງ​ເຂດ​ການ​ເງິນທະ​ນາ​ຄານ, ​ເຊິ່ງ​ເປັນ​ສິ່ງ​ທີ່​ຂະ​ແໜງການ​ເງິນທະ​ນາ​ຄານຫວຽດ​ນາມຕ້ອງ​ການ​ໃນ​ສະ​ພາບ​ການ​ເຊື່ອມ​ໂຍງ​ສາ​ກົນ ແລະ ເຕັກ​ໂນ​ໂລ​ຊີ​ອັດ​ສະ​ລິ​ຍະ.

ນອກຈາກ​ໂອກາດ​ດັ່ງກ່າວ, ການ​ພັດ​ທະ​ນາການ​ປະ​ຕິ​ວັດອຸດ​ສາ​ຫະ​ກຳ 4.0 ໃນ​ຂົງ​ເຂດການ​ເງິນທະ​ນາ​ຄານຢູ່ຫວຽດ​ນາມ ຍັງ​ພົບກັບ​ຄວາມທ້າ​ທາຍ​ບາງ​ຢ່າງ, ​ໂດ​ຍສະ​ເພາະ​ແມ່ນ:

1- ຊ່ອງ​ຫວ່າງ​ນະ​ໂຍ​ບາຍ​​ຮຽກ​ຮ້ອງ​​ໃຫ້ກໍ່​ສ້າງ​ຂໍ້​ກຳ​ນົດ​ກົດໝາຍ​ ເພື່ອ​ຕອບ​ສະ​ໜອງຄວາມ​ຕ້ອງການ​ປະຕິ​ຮູບ​ເຕັກໂນໂລ​ຊີ​ໃນ​ຂົງເຂດ​ການ​ເງິນທະ​ນາ​ຄານ. ເຕັກ​ໂນ​ໂລ​ຊີ​ໃນ​ການ​ປະ​ຕິ​ວັດອຸດ​ສາ​ຫະ​ກຳ 4.0 ພັດ​ທະ​ນາໄວ​ເກີນ​ໄປ, ເຮັດ​ໃຫ້ຫຼາຍ​ປະ​ເທດ, ໃນ​ນັ້ນ​ມີຫວຽດ​ນາມ, ​​ອຶດ​ອັດ​ໃຈໃນ​ການ​ອອກ​ແບບ​ຂອບ​ກົດໝາຍ, ວາງ​ຄວາມ​ຮຽ​ກ​ຮ້ອງ​ໃໝ່​ໃຫ້​​ລັດ​ຖະ​ບານ​ໃນ​ການ​ອອກ​ແບບ​​ຂອບ​​ນະ​ໂຍ​ບາຍ​ໃໝ່​ ເພື່ອຄຸ້ມ​ຄອງ, ກວດ​ກາຕິດ​ຕາມ ບັນ​ດາ​ປັດ​​ໄຈ​ໃໝ່​ຂອງ​ຂົງ​ເຂດ​ການ​ເງິນທະ​ນາ​ຄານ, ຄື: ເງິນວິ​ທີ​ຄະ​ນິດ (cryptocurrency), ເງິນ​​ເອ​ເລັກ​ໂຕຣນິກ (e-money), ​ບໍ​ລິ​ສັດ Fintech... ນອກ​ຈາກນີ້, ຄວາມ​ຂາດ​ລັກ​ສະ​ນະ​ຄົບ​ຊຸດ, ເປັນ​ເອ​ກະ​ພາບ​ໃນ​ບັນ​ດາ​ຂໍ້​ກຳ​ນົດ, ກົດ​ລະ​ບຽບ ກໍ​ໄດ້​ພາ​ໃຫ້​ເກີດ​ອຸປະສັກ​ທີ່​ສຳຄັນຕໍ່​ການພັດທະນາ​ລະບຽບ​ກົດໝາຍໃໝ່​ ເພື່ອ​ຕອບ​ສະ​ໜອງ​ຄວາມ​ຕ້ອງ​ການ​​ໃນກາ​ນປະ​ຕິ​ຮູບ​ເຕັກ​ໂນ​ໂລ​ຊີ​​ໃນຂົງ​ເຂດ​ການ​ເງິນທະ​ນາ​ຄານ.

2- ໂຄງ​ສ້າງພື້ນຖານ​ການ​ຊຳ​ລະ​​ເງິນ​ບໍ່​ສະ​ໝ່ຳສະ​ເໝີ ແລະ ຍັງ​ບໍ່​ສຳ​ເລັດສົມບູນ. ໃນ​ປະ​ຈຸ​ບັນ, ລະ​ບົບ​ຊຳ​ລະ​​ເງິນຂອງຫວຽດ​ນາມຍັງ​ມີ​ຄວາມ​ຈຳ​ກັດຫຼາຍ​ຢ່າງ​ທາງ​ດ້​ານ​ເຕັກ​ໂນ​ໂລ​ຊີ, ມາດ​ຕະ​ຖານ​ກ່ຽວ​ກັບ​ບັດຊິບ​ພາຍ​ໃນ​ປະ​ເທດ, ມາດ​ຕະ​ຖານ​ຂໍ້​ມູນ​​ເອ​ເລັກ​ໂຕຣນິກການ​ເງິນ, ລັກ​ສະ​ນະ​ຄົບ​ຊຸດທັງ​ລະ​ບົບສະ​ພາບ​ຕົວ​ຈິງດັ່ງກ່າວ​​ຂັດ​ຂ​ວາງ​ການ​ເຊື່ອມ​ໂຍງ, ເຊື່ອມ​ຕໍ່​ກັ​ບ​ລະ​ບົບ​ການ​ຊຳ​ລະ​​ເງິນຢູ່​​ໃນພາກ​ພື້ນແລະສາ​ກົນ.

3- ແຫຼ່ງ​​ບຸກ​ຄະ​ລາ​ກອນ​ບໍ່​ໄດ້​ຮັບ​ການ​ກະ​ກຽມ​ເພື່ອ​ຮັບ​ມື​ກັ​ບ​ການ​ປ່​ຽນ​ແປງ​ຂອງການ​ປະ​ຕິ​ວັດ​ອຸດ​ສາ​ຫະ​ກຳ 4.0: ການ​ປະ​ຕິ​ວັດຄັ້ງນີ້​ຈະມີ​ການ​ປ່ຽນ​ແປງວິ​ທີ​ການ​ຄັດ​ເລືອກ​ບຸກຄະລາ​ກອນ, ການ​ໃຫ້​ຄ່າ​ຕອບ​ແທນ, ການນຳ​ໃຊ້ແນໃສ່​ດຶງ​ດູດ​ຄົນ​ທີ່​​ເກັ່ງ​ກ້າ​ສາມາດ​ມາ​ເຮັດ​ວຽກຍາວ​ນານ​ໃນ​ຂົງ​ເຂດ​ການ​ເງິນທະ​ນາ​ຄານ. ຄວາມ​ຕ້ອງການ​ກ່ຽວ​ກັບຄຸນ​ນະ​ພາບ​ບຸກ​ຄະ​ລາ​ກອນ​ຈະ​ປ່​ຽນ​ແປງ​ໄປ ພ້ອມ​ກັບຄວາມ​ຕ້ອງການ​ຂອງ​ທັກ​ສະ​ການດຳ​ເນີນ​ງານ​ເຕັກ​ໂນ​ໂລ​ຊີ​ດິຈິຕອນ, ລັກ​ສະ​ນະ​ປະ​ຕິ​ບັດ​ຕາມ​ກຳ​ນົດ​ການ​ເຄື່ອນ​ໄຫວ​ສະ​ໜອງ​ຜະ​ລິດ​ຕະ​ພັນ​ບໍ​ລິ​ການ​ດ້ານ​ການ​ເງິນທະ​ນາ​ຄານ,… ວາ​ງອອກ​ບັນ​ດາ​ບັນ​ຫາ​ໃໝ່​ກ່ຽວ​ກັບ​ການຝຶກ​ອົບຮົມ​ແຫຼ່ງບຸກ​ຄະ​ລາ​ກອນ​ສຳລັບ​ຂົງ​ເຂດ​ການ​ເງິນທະ​ນາ​ຄານ 4.0 ຢູ່​ສະ​ຖາບັນການ​ຝຶກ​ອົບຮົມຕ່າງໆ.

4- ການ​ຄວບ​ຄຸມ ແລະ ຕິດ​ຕາມ​ກວດກາເງິນ​ຕາ​ຂອງທະ​ນາ​ຄານ​ແຫ່ງ​ຊາດຫວຽດ​ນາມ ໃນ​ສະ​ພາບ​ການ​​ໃຊ້ເງິນ​​ເອ​ເລັກ​ໂຕຣນິກ​ນັ​ບມື້​ນັບ​ຫຼາຍ ແລະ ​ໄດ້ຮັບ​ການ​ຍອມຮັບ​ຢ່າງກວ້າງ​ຂວາງ.ານປະກົດ​ຕົວ​ຂອງ​ເງິນ​ເອ​ເລັກ​ໂຕຣນິກ​ກໍ່​​ໃຫ້​ເກີດ​ຄວາມ​ທ້າ​ທາຍ​ອັນ​ໃຫຍ່ຫຼວງ​ຕໍ່ທະ​ນາ​ຄານ​ແຫ່ງ​ຊາດຫວຽດ​ນາມ ໃນ​ການ​ວັດ​ແທກ, ການຄວບ​ຄຸມ ແລະ ການພະ​ຍາ​ກອນປະລິມານ​ເງິນໝູນວຽນ. ນອກ​ຈາກນີ້, ທ່າ​ອຽງການ​ແຊກ​ຊຶມ​ລະ​ຫວ່າງ​ບັນ​ດາ​ບໍ​ລິ​ສັດ​ເຕັກ​ໂນ​ໂລ​ຊີ Fintech ເຂົ້າ​ໃນ​ຂົງ​ເຂດການ​ເງິນທະ​ນາ​ຄານ ກໍ່​ເປັນ​ສິ່ງ​ທ້າ​ທາຍຕໍ່​ການ​ເຄື່ອນ​ໄຫວ​​ທະ​ນາ​ຄານ​ແບບ​ດັ້ງ​ເດີມ​ເຊັ່ນ: ​ການ​ຊຳ​ລະ​ເງິນ, ການ​ໂອນ​ເງິນ

5- ຄວາມ​ສ່ຽງ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ, ຄ​ວາມ​ປອດ​ໄພ​ໃນ​ການ​ຮັກສາ​ຄວາມ​ລັບ, ອາດ​ຊະ​ຍາ​ກຳ​ເຕັກ​ໂນ​ໂລ​ຊີ. ການ​ເຊື່ອມ​ຕໍ່​ທຸກ​ສິ່ງ (IoT) ແລະຖານຂໍ້​ມູນ​ໃຫຍ່​ ເຮັດ​ໃຫ້​ຄວາມ​ສ່ຽງ​ທາງ​ດ້ານ​ເຕັກ​ໂນ​ໂລ​ຊີ​ຕໍ້​ມູນ​ຂ່າວສານອາດຈະ​ເພີ່ມ​ຂຶ້​ນ, ​ໂດຍ​ສະ​ເພາະ​ແມ່ນ​ຄວາມ​ປອດ​ໄພ​ຂອງ​ເຄືອ​ຂ່າຍ ແລະ ຄວາມ​ປອດ​ໄພ​ຂອງ​ຂໍ້​ມູນ. ດ້ວຍ​ການ​ພັດ​ທະ​ນາ​ນັ​ບມື້​ນັບ​ແນບ​ນຽນ​ຂອງ​ເຕັກ​ໂນ​ໂລ​ຊີ​ດິ​ຈິຕອນ ແລະ ທ່າ​ອຽງຄ່ອຍໆ​ປ່ຽນ​ເປັນຄອມພິວ​ເຕີ​ເມກ, ຊ່ອງ​ໂວ່​ຄວາມ​ປອດ​ໄພ​​ອາດ​ຈະ​ເພີ່ມ​ຂຶ້ນຕາມ​ລຳດັບ, ນຳ​ໄປ​ສູ່ຄວາມທ້າ​ທາຍ​ທີ່​ໃຫ​ຍ່ຫຼວງທາງ​ດ້ານ​ຄວາມ​ສ່ຽງ​​ແຮກ​ເກີ. ຄວາມ​ສ່ຽງ​​ເຫຼົ່ານີ້​​ສາ​ມາດ​ເຮັດ​ໃຫ້​ເກີດ​ການ​ສູນເສຍຢ່າງຫຼວງຫຼາຍຕໍ່​ລະບົບການ​ເງິນທະ​ນາ​ຄານ, ​ຈາກນັ້ນ​ສົ່ງ​ຜົນ​ກະ​ທົບ​ຕໍ່​ຄວາມ​ໝັ້ນຄົງ​ທາງ​ການ​ເງິນ, ຫຼຸດຜ່ອນ​ຊື່​ສຽງ​ໃນ​ການ​ດຳ​ເນີນ​ງານ​ຂອງ​ລັດ​ຖະ​ບານ.

​ເມື່ອ​ປຽບ​ທຽບ​​ພື້ນ​ຖານ​ທີ່ຫວຽດ​ນາມມີ​ຢູ່ ​ກັບຄຸນ​ລັກສະ​ນະ​ຂອງ​ການ​ປະ​ຕິ​ວັດ​ອຸດ​ສາ​ຫະ​ກຳ 4.0 ສາມາດ​​ເຫັນ​ໄດ້​ວ່າ, ຫວຽດ​ນາມມີ​ເງື່ອນ​ໄຂທີ່​ເອື້ອ​ອຳນວຍ​ຈຳ​ນວນ​ໜຶ່ງເປັນ​ພື້ນ​ຖານທີ່​ດີສຳລັບ​ພັດ​ທະ​ນາ ການ​ປະ​ຕິ​ວັດອຸດ​ສາ​ຫະ​ກຳ 4.0 ໃນ​ຂະ​ແໜງ​ການອາ​ຊີບ​ຕ່າງໆ​ເວົ້າ​ລວມ ແລະ ​ໃນຂະ​ແໜງ​ການ​ເງິນທະນາຄາ​ນເວົ້າ​ສະ​ເພາະ ​ເຊິ່ງ​​ສະ​ແດງ​ຢູ່: ທີ​ໜຶ່ງ, ດ້ວຍ​ກຳລັງ​ແຮງ​ງານທີ່​ອຸ​ດົນ​ສົມ​ບຸນ, ມີ​ຄຸນສົມບັດ​ສະຫຼາດ, ມັກ​ຮຽນ​ຮູ້, ມີ​ຄວາມສາມາດເກັບ​ກຳຮັບ​ເອົາ​ຄວາມ​ສຳ​ເລັດທາງ​ວິ​ທະ​ຍາ​ສາດ-ເຕັກ​ໂນ​ໂລ​ຊີ​ຂອງ​ມະ​ນຸດຊາດ; ຍິ່ງ​ກວ່າ​ນັ້​ນ, ຊາວ​ໜຸ່ມຫວຽດ​ນາມຍັງ​ເປັນ​ຄົນ​ມັກ​ເຕັກ​ໂນ​ໂລ​ຊີ, ການ​ໃຊ້​ໂທ​ລະ​ສັບແລະອິນ​ເຕີ​ແນດ​ເປັນ​ມາດ​ຕະ​ຖານ​ໃນ​ຊີ​ວິດ​ປະ​ຈຳ​ວັນ; ທີ​ສອງ, ມີ​ໂຄງ​ສ້າງພື້ນຖານ​ເຄືອ​ຂ່າຍ​ໂທ​ລະ​ຄົມ​ມະ​ນາ​ຄົມ​ທີ່​ສົມບູນ​ແລະພັດ​ທະ​ນາ​ພໍ​ຄວນ ດ້ວຍຫຼາຍ​ຮູບ​ແບບ. ທີ​ສາມ​, ຄວາມ​ຕັດ​ສິນ​ໃຈ​ຂອງ​ທັງ​ລະ​ບົບ​ການ​ເມືອງ. ໃນ​ການ​ປະ​ຕິ​ວັດອຸດ​ສາ​ຫະ​ກຳ 4.0, ລັດ​ຖະ​ບານ​ໄດ້​ກຳ​ນົດ, ນີ້​ແມ່ນ​ໂອ​ກາດ​ທີ່​ດີ​ເພື່ອ​ໃຫ້ຫວຽດ​ນາມ​ສຳ​ເລັດ​ເປົ້າ​ໝາຍ​ການຫັນ​ເປັນ​ອຸດ​ສາ​ຫະ​ກຳ ທັນ​ສະ​ໄໝ​ຢ່າງ​​ໄວ, ທັນ​ກັບ​ບັນ​ດາ​ປະ​ເທດ​ທັ​ນ​ສະໄໝໃນ​ພາກ​ພື້ນ ແລະໃນ​ໂລກ.

ມາດ​ຕະ​ການ​ພັດ​ທະ​ນາ​ຂົງ​ເຂດ​ການ​ເງິນ-ທະ​ນາ​ຄານ 4.0 ຢູ່ຫ​ວຽດ​ນາມ

ເພື່ອ​​ໃຫ້​ໂອ​ກາດການ​ພັດ​ທະ​ນາກາຍ​ເປັນຕົວ​ຈິງ, ພ້ອມກັນ​ນັ້ນ​ກໍ່​ຈຳກັດຄວາມ​ທ້າ​ທາຍ​ຂ້າງ​ເທິງ​ຕໍ່​ຂົງເຂດ​ການ​ເງິນທະ​ນາ​ຄານ ໃນ​ສະ​ພາບ​ການການປະ​ຕິ​ວັດ​ອຸ​ສາ​ຫະ​ກຳ 4.0, ຈຳ​ເປັນ​ຕ້ອງ​ປະ​ຕິບັດ​ກຸ່ມ​ມາດ​ຕະການຕໍ່​ໄປ​ນີ້ຢ່າງ​ຄົບ​ຊຸດແລະມີ​ປະ​ສິດ​ທິ​ຜົນ:

ທີ​ໜຶ່ງ, ກຸ່ມ​ມາດ​ຕະ​ການ​ກ່ຽວ​ກັບ​ລະ​ບຽບ​ກົດ​ໝາຍ, ນະ​ໂຍ​ບາຍ. ລະ​ບຽບ​ກົດ​ໝາຍ​ແລະນະ​ໂຍ​ບາຍມີ​ບົດ​ບາດ​ສຳ​ຄັນ​ທີ່​ສຸດໃນ​ກາ​ສ້າງ​​ຂອບ​​ພື້ນ​ຖານ​ໃຫ້​ແກ່​ການ​ພັດ​ທະ​ນາ​ຂອງ​ຂົງ​ເຂດ​ການ​ເງິນທະ​ນາ​ຄານ. ການ​ປັບປຸງ​ບູ​ລະ​ນະ​ລະ​ບຽບ​ກົດ​ໝາຍ​ແລະນະ​ໂຍ​ບາຍ​ຕ້ອງ​ສຸມ​ໃສ່​ບາງ​ບັນ​ຫາ​ລຸ່ມ​ນີ້:

- ເປັນ​ເອ​ກະ​ພາບ​​ໃນ​ຄວາມ​ສຳ​ນຶກ, ການ​ເຂົ້າ​ໃຈ​ກ່ຽວ​ກັບ​​ຜະ​ລິດ​ຕະ​ພັນ​ຂອງການ​ປະ​ຕິ​ວັດອຸດ​ສາ​ຫະ​ກຳ 4.0 ​ອີງ​ໃສ່​ຫຼັກການສາ​ກົນ ແລະ ລະ​ບົບກົດໝາຍ​ໃນ​ປະຈຸ​ບັນ. ຄວາມ​ເປັນ​ເອ​ກະ​ພານ​ໃນ​ການ​ເຂົ້າ​ໃຈ​ແມ່ນ​ສຳ​ຄັນ​ທີ່​ສຸດສຳ​ລັບການກວດ​ສອບ​ເອ​ກະ​ສານ​ທາງ​ກົດໝາຍ​ທີ່​ກ່ຽວຂ້ອງ, ​ເຊັ່ນ​ດຽວ​ກັນ​ກັບ​ການ​ມອບ​ໝາຍ​ຄວາມ​ຮັບ​ຜິດ​ຊອບດ້ານ​ການ​ຄຸ້ມ​ຄອງ​ໃຫ້​ແກ່​ກະ​ຊວງ​ແລະຂະ​ແໜງ​ການ​ທີ່​ກ່ຽວ​ຂ້ອງ.

- ກວດ​ຄືນ​ແລະປັບ​ປຸງ​​ເອ​ກະ​ສານກົດໝາຍທີ່​ມີ​ຢູ່ຕາມ​ທິດ​ສ້າງ​ເງື່ອນ​ໄຂ​ໃຫ້​ແກ່​ການ​ໝູນ​ໃຊ້, ການ​ທຸລະ​ກິດແລະການພັດ​ທະ​ນາ​ຜະ​ລິດ​ຕະ​ພັນ​ຂອງການ​ປະ​ຕິ​ວັດອຸ​ດ​ສາ​ຫະ​ກຳ 4.0. ​ໃນປະ​ຈຸ​ບັນ, ​ຢູ່​ຫວຽດ​ນາມ​ມີ​ເອ​ກະ​ສານ​ກົດໝາຍຫຼາຍ​ສະ​ບັບ, ​ແຕ່​​​ເມື່ອ​ປະ​ກາດ​ໃຊ້​​​ເອກະສານ​ກົດໝາຍ​ເຫຼົ່າ​ນັ້ນ ຜະ​ລິດ​ຕະ​ພັນ​ແລະ​ກິດຈະກຳ​ຂອງການ​ເງິນທະ​ນາ​ຄານ 4.0 ຍັງ​ບໍ່​ໄດ້​​ເກີດຂຶ້ນ, ດັ່ງ​ນັ້ນ​ຈຶ່ງມີ​​ຈຸດ​ທີ່​​ບໍ່​ເໝາະ​ສົມ​ກັບ​ທ່າ​ອຽງ​ການພັດ​ທະ​ນາ.

- ປະ​ກາດ​ໃຊ້​ຂອບ​ກົດໝາຍທົດ​ລອງ​ທີ່​ມີ​ການຄວບ​ຄຸມ. Sandbox ຕ້ອງ​ກວດ​ສອບຮັບ​ປະ​ກັນ​​ມາດ​ຕະ​ຖານ​ກ່ອນແລະຫຼັງ​ຜະ​ລິດ​ຕະ​ພັນ-ກິດຈະ​ກຳ​ຖືກ​ໃສ່​ລົງ​ໃນ sandbox. ກ່ອນທີ່​ຈະ​ວາງ​ຜະ​ລິດ​ຕະ​ພັນ-ກິດຈະ​ກຳ​ລົງ​ໃນ sandbox, ຜະ​ລິດ​ຕະ​ພັນ​ທີ່​ເລືອກ​ນັ້ນ​ຕ້ອງ​ເປັນ​ຜະ​ລິດ​ຕະ​ພັນ​-ກິດຈະກຳ​ໃໝ່​ຂອງການ​ເງິນ​ທະນາຄານ 4.0, ສ້າງມູນ​ຄ່າ​ເພີ່ມທີ່​ດີ​ໃຫ້​ສັງ​ຄົມ. ເມື່ອ​ໄດ້​ເອົາ​ເຂົ້າ​ໃນ sandbox, ຜະ​ລິດ​ຕະ​ພັນ-ກິດຈະ​ກຳ​ນີ້ຈະ​ຜ່ານສິ່ງກີດ​ຂ​ວາງທາງ​ກົດໝາຍແລະກົນ​ໄກກາ​ນຄວບຄຸມ​ແລະກວດ​ກາ​ໃນ​ປະ​ຈຸ​ບັນ; ດັ່ງ​ນັ້ນຈຶ່ງ​ຈຳ​ເປັນ​ຕ້ອງ​ກຳນົດ​ມາດ​ຕະ​ຖານ​ເພື່ອປ້ອງ​ກັນ​ບໍ່​ໃຫ້​ໃຊ້ sandbox ສຳລັບ​ຈຸດ​ປະ​ສົງ​ທີ່​ຫຍໍ້​ທໍ້​, ຄື​ການ​ສວຍ​ໃຊ້​sandbox ເພື່ອປະຕິບັດ​ກິດຈະກຳ​ທີ່ຜິດ​ກົດໝາຍ, ຫຼື​ຈົງໃຈວາງ​ຜະລິດ​ຕະພັນ​ທີ່​ມີ​ເຕັກ​ໂນ​ໂລ​ຊີ​ທຳ​ມະ​ດາ​ລົງ​ໃນ sandbox ​ເພື່ອ​ຫຼີກ​ລ່ຽງ​ພາ​ສີ. ຫຼັງຈາກ​ການ​ເຄື່ອນ​ໄຫວ​​ໃນໄລຍະ​ໜຶ່ງ, ຕ້ອງ​ມີ​ຄະ​ນະ​ກຳ​ມະ​ການພິ​ເສດ​ກ່ຽວ​ກັບ​ການຕິດຕາມ​ກວດກາ​ແລະປະ​ເມີນ​ຜົນ ​ເພື່ອ​ຫຼັງຈາກ​ໄລຍະ​ເວ​ລາຂອງ​ການທົດລອງ​ ສາມາດ​ອອກ​ໜັງສື​ວຽນ ​ແລະ ຂໍ້​ກຳກົດ​ທີ່​ກ່ຽວຂ້ອງ​ໄດ້​ຢ່າງ​ໄວວາ. ສິ່ງ​ນີ້​ຈະຫຼີກ​ລ່ຽງການ​ຜູກ​ຂາດ​ໃນ​ຕະຫຼາດ ແລະຫຼີກ​ລ່ຽງການ​ສ້າງ​ກົນ​ໄກ​ ຂໍ - ໃຫ້.

ນອກ​ຈາກ​ບັນ​ດາ​ມາດ​ຕະ​ການ​ເທິງນີ້, ໃນ​ກຸ່​ມ​ມາດ​ຕະ​ການ​ກ່ຽວ​ກັບ​ລະ​ບຽບ​ກົດ​ໝາຍກໍ່​ຕ້ອງປັບປຸງບູ​ລະ​ນະ​ຕາມ​ທິ​ດທາງທີ່​ຄ້າຍ​ຄື ຫຼືເຂົ້າ​​ໃກ້​ກັບ​ມາ​ດ​ຕະ​ຖານ​​ກ່ຽວ​ກັບເຕັກ​ໂນ​ໂລ​ຊີ, ກ່ຽວ​ກັບ​ລະ​ບຽບ​ກົດ​ໝາຍ, ກ່ຽວ​ກັບ​ກົດ​ໝາຍ​ສາ​ກົນ; ປະ​ກາດ​ໃຊ້​​ໂດຍ​ໄວ​ບັນ​ດາ​ຂໍ້​ກຳ​ນົດກົດ​ລະບຽບ​ກ່ຽວ​ກັ​ບ​ຄ​ວາມ​ຮັບ​ຜິດ​ຊອບ, ສິດ​ອຳ​ນາດ​ຂອງ​ອົງ​ການ​ຄຸ້ມ​ຄອງ​​ລັດ, ​ໂດຍ​ສະ​ເພາະ​ແມ່​ນອົງການກ​ວດ​ກາ ຕິດ​ຕາມກວດກາ ​ໃຫ້​ສອດຄ່ອງ​ກັບ​ສະ​ພາບ​ການຂອງ​ຂົງເຂດ​ການ​ເງິນທະ​ນາ​ຄານ 4.0, ພ້ອມກັນ​ນັ້ນ​ກໍ​ກໍ່​ສ້າງ​ບັນ​ດາ​ມາດ​ຕະ​ການ​ແລະນະ​ໂຍ​ບາຍ​ເພື່ອ​ສົ່ງ​ເສີມ​ບັນ​ດາ​ບໍ​ລິ​ສັດ​ເຕັກ​ໂນ​ໂລ​ຊີ​ການ​ເງິນ​​ ໃຫ້​ຂະຫຍາຍຕົວ​ທັງ​ໃນ​ຫວຽດ​ນາມ ​ແລະ​ຕະຫຼາດ​ສາ​ກົນ.

ທີ​ສອງ, ກຸ່ມ​ມາດ​ຕະ​ການ​ກ່ຽວ​ກັບ​ບົດ​ບາດ​ສະ​ໜອງ​ການ​ບໍ​ລິ​ການ​ສາ​ທະ​ລະ​ນະ ​ເພື່ອ​ສະ​ແດງ​ບົດບາດ​ກຳ​ນົດ​ທິດ​ຂອ​ງ​ລັດ ​ຕໍ່​ການ​ຊຸກ​ຍູ້ການ​ເງິນ​ທະ​ນາ​ຄານ​ຢູ່​ຫວຽດ​ນາມ. ລັດ​ຄວານໃຊ້​ການ​ເງິນ​ທະ​ນາ​ຄານ 4.0 ໃນ​ການ​ສະ​ໜອງແລະຈ່າຍ​ຄ່າ​ບໍ​ລິ​ການ​ສາ​ທາ​ລະ​ນະ. ​ປະ​ຈຸ​ບັນອັດ​ຕາ​​ການ​ຊຳ​ລະຄ່າ​ບໍ​ລິ​ການ​ສາ​ທາ​ລະ​ນະ​ໂດຍ​ໃຊ້​ເງິນ​ສົດ​​ໃນຫວຽດ​ນາມ ​ຍັງ​ສູງກວ່າຕັ້ງ​ຫຼາຍ​ເມື່ອ​ທຽບ​ກັບ​​ປະ​ເທດອື່ນ​ໃນ​ພາກ​ພຶື້ນ ແລະ ບັນ​ດາ​ປະ​ເທດ​ທີ່​ມີ​ລະ​ດັບການ​ພັດ​ທະ​ນາທີ່​ຄ້າຍຄື​ກັນໃນ​ໂລກ. ສິ່ງ​ນີ້ສາມາດ​ປ່​ຽ​ນ​ແປງ​ໄດ້​ຢ່າງ​ໄວ​ຖ້າຫາກ​ລັດ​ໃຊ້​ເຕັດ​ໂນ​ໂລ​ຊີການຊຳລະ​ເງິນ​ໃໝ່​ ໃນ​ການ​ຊຳ​ລະຄ່າ​ບໍ​ລິ​ການ​ສາ​ທາ​ລະ​ນະ. ໃນ​ໄລຍະ​ຍາວ ສິ່ງນີ້​ສາ​ມາດ​ຊ່ວຍລົດຈຳນວນພະນັກງານແລະປະ​ຢັດ​ເງິນ​ໄດ້. ນອກ​ຈາກນີ້, ລັດຄວນ​ຊີ້​ນຳ​ບັນ​ດາ​ວິ​ສາ​ຫະ​ກິດ ບໍ​ລິ​ສັດ, ​ໂດຍ​ສະ​ເພາະ​ແມ່ນ​ບັນ​ດາ​ວິ​ສາ​ຫະ​ກິດ ບໍ​ລິ​ສັ​ດ​ທີ່​ກຳລັງ​​ໃຫ້ບໍ​ລິ​ການ​ສາ​ທາ​ລະ​ນະ, ​​ໃຫ້ສ້າງ​ເງື່ອນ​ໄຂ ແລະມີກົນ​ໄກ​ສົ່ງ​ເສີມ​ປະ​ຊາ​ຊົ​ນ​ນຳ​ໃຊ້​ວິທີ​ການ​ຊຳ​ລະ​ເງິນ​ໃໝ່.​

ລັດ​ຕ້ອງ​ຕັ້ງ​ໜ້າ​ໝູນ​ໃຊ້ການ​ເງິນທະ​ນາ​ຄານ 4.0 ໃນ​ການກວດ​ກາ, ຕິດ​ຕາມ​ລະ​ບົບການ​ເງິນ​ທະນາ​ຄານ (reg-tech) ຕາມ​ທິດອັດ​ຕະ​ໂນ​ມັດ ແລະ ຫຼືນຳ​ໃຊ້ປັນ​ຍາປະດິດ. ສິ່ງນີ້​ຊ່ວຍໃຫ້​​ເພີ່ມຄວາມ​ໂປ່​ງ​ໄສ ​ແລະປະ​ສິດ​ທິ​ຜົນ​ໃນ​ການ​ເຄື່ອນ​ໄຫວ​ຂອງ​ຂົງ​ເຂດ​ການ​ເງິນ​ທະ​ນາຄານ. ປະ​ຈຸ​ບັນ, ການກວດ​ສອບ​ກິດຈະກຳ​ການ​ກຳນົດ​ລາຄາ​ຫຸ້ນ​ໂດຍ​​ໃຊ້​ປັນຍາ​ປະດິດ​ນັ້ນ ​ໄດ້​ຖືກ​ນຳ​ໃຊ້​ໃນ​ບາງ​ປະ​ເທດ​ທີ່​ກ້າວ​ໜ້າ.

ທີ​ສາມ, ກຸ່ມ​ມາດ​ຕະ​ການ​ກ່ຽວ​ກັບ​ໂຄງ​ສ້າງພື້ນຖານຂໍ້​ມູນ​ຂ່າວ​ສານ​ ​ເພື່ອ​ຕອບ​ສະ​ໜອງ​ຮາກ​ຖານຂອງເຕັກ​ໂນ​ໂລ​ຊີ​ ເພື່ອ​ໝູນ​ໃຊ້​ແລະພັດ​ທະ​ນາ​​ຜົນ​ສຳ​ເລັດ​ຂອງ​ການ​ປະ​ຕິ​ວັດອຸດ​ສາ​ຫະ​ກຳ 4.0.

- ຍົກ​ລະ​ດັບ​ການ​ເຊື່ອມ​ຕໍ່​ຄວາມ​ໄວ​ສູງ. ​ເມື່ອ​ປຽບ​ທຽບ​ກັບ​​ປະ​ເທດອື່ນໆ​ໃນ​ພາກ​ພື້ນ, ລະ​ດັບ​ການຄອບ​ຄຸມ​ສັນຍານ wifi ຂອງຫ​ວຽດ​ນາມ ແມ່ນ​ສູງ​ພໍ​ສົມ​ຄວນ. ແຕ່​ວ່າ, ຄວາມ​ໄວ​ໃນ​ການ​ສົ່ງ  (download) ​ຍັງ​ຕ່ຳກ່​ວາ​​ເມື່ອທຽບ​ກັບ​ບັນ​ດາ​ປະ​ເທດ​ໃນ​ພາກ​ພື້ນ, ຄ່າ​ໃຊ້​ຈ່າຍ​ download ກໍ່​ຍັງ​ສູງ. ສິ່ງນີ້​ຕ້ອງ​ໄດ້​ຮັບ​ການ​ປັບປຸງ​ຢ່າງ​ໄວວາ ​ເພື່ອ​ສ້າງລະ​ບົບ​ໂຄງ​ສ້າງພື້ນຖານ​ທີ່​ດີ​ໃຫ້​ແກ່​ການ​ປະ​ຕິ​ວັດ​ອຸດ​ສາ​ຫະ​ກຳ 4.0 ເວົ້າ​ລວມ ແລະການ​ເງິນທະ​ນາ​ຄານ​ 4.0 ​ເວົ້າ​ສະ​ເພາະ.

ການ​ຈັດ​ຕັ້ງສູນ​ປ່​ຽນແປງໃໝ່​ແລະປະ​ດິດ​ສ້າງ​ ​ເປັນສະຖານ​ທີ່​ສຳລັບ​ທົດ​ສອບ​ຜະ​ລິດ​ຕະ​ພັນ-ກິດຈະກຳ​ໃໝ່ຂອງ​ການ​ເງິນ​ທະ​ນາ​ຄານ 4.0. ​ຂອບ​ກົດໝາຍ​ທົດ​ລອງ​ໃຊ້ (regulatory sandbox) ກໍ່​​ອາດຈະ​​ຕັ້ງ​ຢູ່ທີ່ນີ້. ສຳ​ລັບການ​ເງິ​ນທະ​ນາ​ຄານ 4.0, ສະຖານ​ທີ່​ຕັ້ງສູນ​ນີ້ຄວນ​ຢູ່​​ໃນໃຈ​ກາງ​​ນະ​ຄອນຫຼວງຮ່າ​ໂນ້ຍ ເພື່ອ​ໃຫ້​ສາ​ມາດ​ເຊື່ອມ​ຕໍ່​ກັບ​ວິ​ສາ​ຫະ​ກິດ, ທະ​ນາ​ຄານ, ບໍ​ລິ​ສັດ​ການ​ເງິນ​ ​ແລະ ບັນ​ດາ​ກະ​ຊວງ, ຄະ​ນະ, ຂະ​ແໜງ​ການທີ່​ກ່ຽວ​ຂ້ອງ ໄດ້​ຢ່າງ​ງ່າຍ​ດາຍ. ສູນນີ້​ມີ​ໜ້າ​ທີ່​ທົດ​ລອງ​ຜະ​ລິດ​ຕະ​ພັນ​ແລະ​ບໍ​ລິ​ການ​ການ​ເງິນ​ເຕັກ​ໂນ​ໂລ​ຊີ, ຮ່າງ​ແລວ​ທາງ​ດ້ານ​ກົດໝາຍ ​ເພື່ອ​ນຳ​​ຜະ​ລິ​ດ​ຕະ​ພັນ​ແລະ​ບໍ​ລິ​ການ​ເຫຼົ່ານີ້​ມາ​ໃຊ້​ຢ່າງກວ້າງຂວາງ​ໂດຍ​ໄວ. ບັນດາ sandbox ທີ່​ຕັ້ງ​ຢູ່​ໃນ​ສູນ​ນີ້ ຫຼັງ​ຈາກ​​ໄລຍະ​ເວລາ​ຂອງການ​ທົດ​ສອບ​ຜະລິດ​ຕະພັນ​ແລະ​ບໍລິການ​ ​ຈຳ​ເປັນຕ້ອງຮ່າງ​ແລວ​ທາງ​ດ້ານ​ກົດໝາຍ​ທີ່​ຈຳ​ເປັນ (ສ​ະ​ເໜີ​ການ​ດັດ​ແປງ, ການກໍ່​ສ້າງ​ໃໝ່…). ຫຼັງ​ຈາກນັ້ນ, ບັນ​ດາ​ກະ​ຊວງ, ຂະ​ແໜງ​ການ​ທີ່​ກ່ຽວ​ຂ້ອງ​ຕ້ອງວາງ​ເອ​ກະ​ສານທາງ​ກົດ​ໝາຍ​ລາຍ​ລະ​ອຽດອອກ​ມາ. ນອກ​ຈາກນີ້, ເພື່ອ​ຍົກ​ລະ​ດັບແລະປັບປຸງ​ບູ​ລະ​ນະ​ໂຄ​ງສ້າງພື້ນຖານ​ສຳລັບ​ການ​ພັດ​ທະ​ນາການ​ເງິນທະ​ນາ​ຄານ 4.0, ລັດຈຳ​ເປັນ​ຕ້ອງ​​ສ້າງ​ໂຄງສ້າງພື້ນຖານ​ດ້ານ​ເອກະລັກ​ທາງ​ເອ​ເລັກ​ໂຕຣນິກ​ແຫ່ງ​ຊາດ​ໃນ​ໄວໆ​ນີ້ ທີ່​ສອດຄ່ອງ​ກັບ​ລະບຽບ​ສາ​ກົນ ແລະ ​ສາ​ມາດ​ໄດ້ຮັບ​ການ​ຍອມຮັບໃນ​ການ​ເຮັດ​ທຸລະ​ກິດ​ສາ​ກົນ; ບັນ​ດາ​ອົງ​ການ​ຄຸ້ມ​ຄອງ​ລັດ​ຕ້ອງ​ຕັ້ງ​ໜ້າ​ຫັນ​ເປັນ​ດິຈິຕອນ​ ຕໍ່​ການ​ໃຫ້​ບໍ​ລິ​ການ ແລະ ຫັນ​ເປັນ​ດິຈິຕອນຕໍ່ຂະ​ບວນ​ການ​ຄຸ້ມ​ຄອງ​ເມື່ອ​ເປັນ​ໄປ​ໄດ້; ຍົກ​ສູງ​ຄວາມ​ສາ​ມາດ​ຂອງ​ສູນ​ຄວາມ​ປອດ​ໄພ​ເຄືອ​ຂ່າຍ​ແຫ່ງ​ຊ​າດ.

ທີ​ສີ່, ກຸ່ມ​ມາດ​ຕະ​ການ​ກ່ຽວ​ກັບ​ແຫຼ່ງ​​ບຸກ​ຄະ​ລາ​ກອນ ​ເຊິ່ງບໍ່​ພຽງ​ແຕ່​ມີ​ຄວາມ​ສາ​ມາດ​ໝູນ​ໃຊ້​ຜົນ​ສຳ​ເລັດ​ຂອງ​ໂລກ​​ເທົ່າ​ນັ້ນ ຫາກ​ຍັງ​ມີ​ຄວາມ​ສາ​ມາດ​ປະ​ດິດ​ສ້າງ​ແລະໝູນ​ໃຊ້​ໃໝ່​​ໂດຍອີງ​ໃສ່​ພື້ນ​ຖານ​ເຕັກ​ໂນ​ໂລ​ຊີ​ຂອງການ​ປະ​ຕິ​ວັດອຸດ​ສາ​ຫະ​ກຳ 4.0.

ຂະຫຍາຍ​ການ​ສອນດ້ານ​ການຂຽນ​ໂປຣແກຣ​ມ ແລະ ​ຖານ​ຂໍ້​ມູນ​​ໃນ​ລະ​ດັບ​ມາ​ຫາ​ວິ​ທະ​ຍາ​ໄລ​ ແນ​ໃສ່​ກໍ່​ສ້າງ​ບຸ​ກະ​ລາ​ກອນດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ​ ເພື່ອ​ຕອບ​ສະ​ໜອງ​ຄວາມ​ສາ​ມາດ​ໝູນ​ໃຊ້​ແລະ​ປະ​ດິ​ດສ້າງ​ໄດ້ ​ໃນ​ສະ​ພາບ​ການການ​ປະ​ຕິ​ວັດອຸດ​ສາ​ຫະ​ກຳ 4.0 ເວົ້າ​ລວມ ແລະ ໃນ​ຂະ​ແໜງ​ການການ​ເງິນ ທະ​ນາ​ຄານ​ເວົ້າສະ​ເພາະ. ກາ​ນ​ພັດ​ທະ​ນາ​ບັນ​ດາ​ມະ​ຫາ​ວິ​​ທະ​ຍາ​ໄລຫຼາຍ​ຂະ​ແໜງ​ການ, ອ​າ​ຊີບ/ຂົງ​ເຂດ​ແທນ​ໃຫ້​ການກໍ່​ສ້າງ​ສະ​ເພາະ​ຄື​ປະ​ຈຸບ​ບັນ​ ​ເພາະວ່າ​ແຫຼ່ງ​ບຸກ​ຄະ​ລາ​ກອນ​ໃນ​ສະ​ພາບ​ການການ​ປະ​ຕະ​ວັດ​ອຸດ​ສາ​ຫ​ະ​ກຳ 4.0 ເວົ້າ​ລວມ ແລະ ຂະ​ແໜງ​ການການ​ເງິນທະ​ນາ​ຄານ 4.0 ເວົ້າ​ສະ​ເພາະ ຕ້ອງ​ມີ​ຈິນຕະນາການ​ສັງ​ລວມ, ​ໂດຍ​ສະ​ເພາະ​ແມ່ນ​ສ່ວນ​ຄວາມ​ຮູ້​ກ່ຽວ​ກັບ​ເຕັກໂນ​ໂລຊີຂໍ້​ມູນ​ ແລະ ການ​ເງິນທະ​ນາ​ຄານ. ກ່ອນ​ອື່ນ, ລັດ​ຖະ​ບານ​ຕ້ອງ​ພິຈາລະນາການ​ລົງ​ທຶນ​​ໃນ​ສ່ວນ​ສຳຄັນ​ຂອງ​ພະ​ແນ​ກເຕັກ​ໂນ​ໂລ​ຊີ​ຂໍ້​ມູນ​ຂ່າວ​ສານ​ທີ່​ມະຫາ​ວິ​ທະ​ຍາ​ໄລ​ເ​ສດ​ຖະ​ກິດ, ການ​ເງິນທະ​ນາຄານ.​

- ມີ​​ແຜນ​ຍຸດ​ທະ​ສາດ​ການຝຶກ​ອົບຮົມ​ພະ​ນັກ​ງານ​ຄຸ້ມ​ຄອງ​ລັດ​ທີ່​ກ່ຽວ​ຂ້ອງ​ ເພື່ອ​ຕອບ​ສະ​ໜອງ​​ວ​ຽກ​ງານການ​ຄຸ້ມ​ຄອງ​​ລັດຕໍ່​ການ​ເງິນທະ​ນາ​ຄານ 4.0. ສະ​ພາບ​ການການ​ປະ​ຕິ​ວັດ​ອຸດ​ສາ​ຫະ​ກຳ 4.0 ​ໄດ້​ວາງຫຼາຍ​ບັນ​ຫາອອກ​ມາ​ໃຫ້​ແກ່​ກາ​ນ​ຄຸ້ມ​ຄອງ ​ເຊັ່ນ: ກົດ​ໝາຍແລະນະ​ໂຍ​ບາຍ​ໃໝ່​ທີ່​ຫາ​ກໍ່​ໄດ້ປະ​ກາດ​ໃຊ້​, ຄວາມຫຼາກ​ຫຼາຍ​ຂອງ​ຮູບ​ການ​ໃໝ່​ໃນການ​ເ​ຄື່ອນ​ໄຫວການ​ເງິນທະ​ນາ​ຄານ... ຮຽກ​ຮ້ອງ​ໃຫ້​ພະ​ນັກ​ງານ​ຄຸ້ມ​ຄອງ​ລັດ​ຕ້ອງ​ຍົກ​ສູງ​ລະ​ດັບ​ຄວາມ​ຮູ້​ດ້ານ​ວິ​ຊາ​ການ​ຢ່າງບໍ່​ຢຸດຢັ້ງ. ຕ້ອງ​ມີ​ຍຸດ​ທະ​ສາດການຝຶກ​ອົບຮົມ​ພະ​ນັກ​ງານ​ຄຸ້ມ​ຄອງ​ໃນ​ຂະ​ແໜງ​ການ​ການ​ເງິນທະ​ນາ​ຄານ, ​ໂດຍ​ສະ​ເພາະແມ່ນ​ພະ​ນັກ​ງານ​ຄຸ້ມ​ຄອງລະດັບ​ສູງ ​ຕາມ​ທິດ​ໝັ້ນ​ຄົງ​ທາງ​ດ້ານ​ວິ​ຊາ​ສະ​ເພາະ, ປັບປຸງ​ຄວາມ​ຮູ້​ແລະ​ທັກ​ສະ​ອາຊີບ​ຢ່າງ​ສະໝ່ຳສະ​ເໝີ​ຕາມ​ມາດ​ຕະ​ຖານ​ສາ​ກົນ./.

ຮສຈ. ປອ. ດ່າວ​ວັນ​ຮູ່ງ

ຜູ້​ອຳ​ນວຍ​ການ​ສະ​ຖານ​ບັນ​ນະ​ໂຍ​ບາຍແລະພັດ​ທະ​ນາ, ກະ​ຊວງ​ແຜນ​ການແລະການ​ລົງ​ທຶນ

-------------------------------

ບົດ​ນີ້​ໄດ້​ລົງ​ພິມ​ໃນ​ວາລະສານ​ກອມ​ມູນິດ ສະບັບ​ທີ 919 (ເດືອນພຶດ​ສະ​ພາ 2019)

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ