ວັນຈັນ, 18/11/2019
ບັນດາບັນຫາທີ່ວາງອອກມາສຳລັບ ຍຸດທະສາດການພັດທະນາຊັບພະຍາກອນມະນຸດ ຂອງຫວຽດນາມ ໃນໄລຍະ 2021 - 2030
11/10/2019 15:47' ສົ່ງ ພິມ
ການພັດທະນາຊັບພະຍາກອນມະນຸດຄຸນນະພາບສູງ ແມ່ນໜຶ່ງໃນບັນດາຂົງເຂດທີ່ຖືກຜົນກະທົບຢ່າງແຮງ ແລະ ໂດຍກົງທີ່ສຸດ ຈາກການປະຕິວັດອຸດສາຫະກຳຄັ້ງທີສີ່ (ພາບ: thanglong.chinhphu.vn)

ບັນດາ​ບັນຫາ​ທີ່ວາງ​ອອກ​ມາ​​ສຳລັບ ຍຸດ​ທະ​ສາດການພັດທະນາ​ຊັບພະຍາກອນ​ມະນຸດ ຂອງ​ຫວຽດນາມ ​ໃນໄລຍະ 2021 - 2030

ການ​ພັດທະນາ​ຊັບພະຍາກອນ​ມະນຸດ ​ໂດຍ​ເນື້ອ​ແທ້​ແລ້ວ​ແມ່ນ ການ​ພັດທະນາ​ຄວາມ​ສາມາດ​ແລະ​ການ​ນຳ​ໃຊ້​ຄວາມ​ສາມາດ (ກຳລັງ​ກາຍ, ​ປັນຍາຄວາມ​ຮູ້ ​ແລະ ກຳລັງ​ຈິດ) ຂອງ​ມະນຸດ, ​ໂດຍ​ສະ​ເພາະ​ແມ່ນ​ຜູ້​ໃຫຍ່ທີ່ມີ​ຄວາມ​ສາມາດ​ໃນ​ການ​ເຄື່ອນ​ໄຫວ​ເສດຖະກິດ, ສັງຄົມ, ການ​ເມືອງ, ວິທະຍາສາດ-​ເຕັກນິກ ​ແລະ ວັດທະນະທຳ... ນີ້​ແມ່ນ​ໜຶ່ງ​ໃນ​ບັນດາ​ບຸລິມະສິດອັນ​ດັບ​ໜຶ່ງ​ຂອງປະ​ເທດ​ຊາດ ​ເພື່ອ​ແນ​ໃສ່​ຍົກ​ສູງ​ຄວາມ​ສາມາດ​ແຂ່ງຂັນ​ຂອງ​ປະ​ເທດ​ໃນ​ຕະຫຼາດ​ແຮງ​ງານ​ພາຍ​ໃນ​ປະ​ເທດ​ແລະ​​ຕ່າງປະ​ເທດ.

ຫວຽດນາມ​ພວມ​ຢູ່​ໃນ​​ເວລາ​ທີ່​ມີ​ໂຄງ​ສ້າງ “ປະຊາກອນ​ຄຳ”. ນີ້​ແມ່ນ​ທ່າ​ແຮງ​ແລະ​ຂໍ້​ໄດ້​ປຽບ​ອັນໃຫຍ່ຫຼວງ ຖ້າ​ຫາກ​ໄດ້​ຮັບ​ການ​ເສີມ​ຂະຫຍາຍ. ​ແຕ່​ວ່າ, ສະພາບ​ຕົວ​ຈິງ​ຂອງຄົນ​ຫວຽດນາມ​​ໃນປະຈຸ​ບັນ​ແມ່ນຍັງ​ມີ​ຂໍ້​ຈຳກັດ​ແລະ​ຂໍ້​ບົກພ່ອງ​ຫຼາຍ.

ທີ​ໜຶ່ງ, ກຳລັງກາຍຂອງຄົນຫວຽດນາມໂດຍທົ່ວໄປ, ຮ່າງກາຍຄົນໂດຍສະເພາະ ມີການປົວແປງ ແຕ່ຍັງຕ່ຳເມື່ອທຽບກັບປະເທດອື່ນໆໃນໂລກແລະພາກພື້ນ, ສະແດງອອກໃນມາດຕະຖານດ້ານສຸຂະພາບ, ຄວາມສູງ, ນ້ຳໜັກ, ຄວາມແຂງແຮງ, ຄວາມອົດທົນ, ຄວາມໝັ້ນໜຽວ, ຄວາມສາມາດຮັບການກົດດັນ ຂອງເສັ້ນປະສາດ, ກ້າມເນື້ອ,... ຍັງຕ່ຳກວ່າລະດັບປານກາງ ຂອງບັນດາປະເທດໃນໂລກ ແລະ ຕາມມາດຕະຖານສາກົນ (​ມາດຕະຖານ​ຂອງ​ອົງການ​ອະນາ​ໄມ​ໂລກ - WHO).

ທີ​ສອງ, ຄຸນ​ນະພາ​ບຊັບພະຍາກອນ​ມະນຸດ​ບໍ່​ສູງ, ອັດຕາຄົນງານທີ່​ໄດ້​ຮັບ​ການ​ຝຶກ​ອົບຮົມ​ຕັ້ງ​ແຕ່ 3 ​ເດືອນ​ຂຶ້ນ​ໄປ ​ມີ​ປະກາດ​ສະ​ນິຍະ​ບັດ, ​ໃບຢັ້ງຢືນ ມີ​ພຽງປະມານ 23% - 23,5% (1), ຂ້ອນ​ຂ້າງ​ຕ່ຳ​ເມື່ອ​ທຽບ​ກັບປະ​ເທດ​ອື່ນໆ; ຍັງ​ມີ​ຂໍ້​ຈຳກັດ, ຂໍ້​ບົກພ່ອງ​ຫຼາຍ​ຢ່າງ​ທາງ​ດ້ານ​ ຄວາມ​ຮູ້, ທັກ​ສະ​ວິຊາ​ຊີບ, ຄວາມ​ຊຳ​ນາ​ນດ້ານ​ວິ​ຊາ​ສະ​ເພາະ, ​ໂດຍ​ສະ​ເພາະ​ແມ່ນ​ທັກ​ສະ​ອ່ອນ, ​ເຊັ່ນ​ພາສາ​ຕ່າງປະ​ເທດ, ຄວາມ​ສາມາດ​ໃນ​ການ​ເຮັດວຽກ​ເປັນ​ທີ​ມ, ຄວາມ​ເປັນ​ມື​ອາຊີບ​ໃນ​ສະພາບ​ແວດ​ລ້ອ​ມທີ່ມີ​ຄວາມ​ຫຼາກ​ຫຼາຍ​ທາງ​ວັດທະນະທຳ...

ທີ​ສາມ, ລະດັບ​ການ​ຫັນປ່ຽນ​ທ່າ​ແຮງ​ມະນຸດ​ເປັນ​ທຶນ​ມະນຸດ ​ແລະ ຄວາມ​ສາມາດ​ແຂ່ງຂັນ​ດ້ານ​ພອນ​ສະຫວັນ​ລະດັບ​ໂລກ ຍັງ​ຢູ່​ໃນ​ລະດັບ​ຕ່ຳ. ຕາມ​ທະນາຄານ​ໂລກ (WB) ທີ່​ເວທີ​ປາ​ໄສ​ເສດຖະກິດ​ໂລກ​ປີ 2018, ດັດຊະນີ​ທຶນ​ມະນຸ​ດຂອງ​ຫວຽດນາມ​​ໃນປີ 2018 ມີ​ພຽງ 0,67 ຄະ​ແນນ, ອັນ​ດັບທີ 48 ຈາກ 157 ປະ​ເທດ​ທີ່​ເຂົ້າ​ຮ່ວມ​ການຈັດ​ອັນ​ດັບ. ດັດຊະນີ​ການ​​ແຂ່ງຂັນ​ພອນ​ສະຫວັນ (TCI) ​ໃນ​ປີ 2018 ຂອງ​ຫວຽດນາມບັນລຸ 33,41 ຄະ​ແນນ, ອັນ​ດັບ​ທີ 92/125, ​ເຖິງ​ວ່າ​ສູງ​ກວ່າຄະ​ແນນ​ສະ​ເລ່ຍຂອງ​ກຸ່ມ​ປະ​ເທດ​ທີ່​ມີ​ລາຍ​ໄດ້​ປານ​ກາງ​ຕ່ຳ, ​ແຕ່​ກໍ່ຕ່ຳ​ທີ່​ສຸດ​ໃນ 8 ປະ​ເທດ​ອາຊີ​ຕາ​ເວັນ​ອອກສຽງ​ໃຕ້​ທີ່​ເຂົ້າ​ຮ່ວມ​ການຈັດ​ອັນ​ດັບ (ປີ 2013 ຫວຽດນາມ​ຖືກ​ຈັດ​ໃນ​ອັນ​ດັບ​ທີ 82/103, ປີ 2018 ຢູ່​ໃນ​ອັນ​ດັບ​ທີ 92/125).

ທີ​ສີ່, ຄວາມ​ສາມາດ​ໃນ​ການ​ຝຶກ​ຝົນ​ແລະ​ນຳ​ໃຊ້​ເຕັກ​ໂນ​ໂລ​ຊີ​ຊັ້ນ​ສູງ​ໃນ​ຂະ​ບວນການ​ອອກ​ແຮງ​ງານ, ​ເຮັດ​ວຽກ ​ໃນ​ສະຖານ​ທີ່​ທີ່​ຕ້ອງການ​ຄວາມ​ຄິດ​ສ້າງສັນ, ​ໃນ​ສະພາບ​ແວດລ້ອມ​ທີ່​ມີ​ແຮງ​ກົດ​ດັນ​ໃນ​ການ​ແຂ່ງຂັນ​ສູ​ງນັ້ນ ​ແມ່ນ​ຍັງ​ຈຳກັດ​ແລະ​ອ່ອນ​ແອ; ຄວາມ​ສາມາດ​ໃນ​ການ​ແກ້​ໄຂ​ຂໍ້​ຂັດ​ແຍ່ງ​ ຂໍ້​ພິພາດ​ກ່ຽວ​ກັບ​ສິດທິ​ແລະ​ຜົນ​ປະ​ໂຫຍ​ດ​ໃນ​ຂະ​ບວນການ​ອອກ​ແຮງ​ງານ​ຕາມ​ກົດໝາຍ ​ແມ່ນ​ຍັງ​ບໍ່​ພຽງພໍ; ວັດທະນະທຳ​ວິ​ສາ​ຫະກິດ, ວັດທະນະທຳ​ແຮງ​ງານຂອງພື້ນຖານ​ການຜະລິ​ດອຸດສາຫະກຳ​ທັນ​ສະ​ໄໝ​ໄດ້​ເປັນ​ຮູ​ບ​ເປັນ​ຮ່າງ​ຂຶ້ນ​ແລະ​ພັດທະນາສ່ວນ​ໄດ​ສ່ວນ​ໜຶ່ງ​ແລ້ວ ​ແຕ່​ຍັງ​ບໍ່​ທັນ​ສົມ​ຄູ່​ກັບ​ຂະ​ບວນການ​ຍູ້​ແຮງ​ການ​ຫັນປະ​ເທດ​ ເປັນ​ອຸດສາຫະກຳ ທັນ​ສະ​ໄໝ.

ຈາກ​ຂໍ້​ບົກພ່ອງ​ຂ້າງ​ເທິງ, ບັນຫາ​ທີ່​ວາງ​ອອກ​ມາ​ຕໍ່​ຍຸດ​ທະ​ສາດ​ການ​ພັດທະນາ​ຊັບພະຍາກອນ​ມະນຸດ​ຂອງ​ຫວຽດນາມ​ໃນ​ໄລຍະ 2021 - 2030 ​ແມ່ນ​ດັ່ງ​ນີ້:

ທີ່​ໜຶ່ງ, ພັດທະນາ​ຊັບພະຍາກອນ​ມະນຸດ​ຢ່າງຮອບດ້ານ ​ເພື່ອຍົກ​ສູງ​ຄວາມ​ສາມາດ​ບົ່ມ​ຊ້ອນ​ແລະ​ກຳລັງ​ແຮງ​ຂອງ​ຄົນ​ຫວຽດນາມ (ທຶນ​ມະນຸດ) ຕາມ​ທິດ​ພັດທະນາ​ຄົນ​ຫວຽດນາມ​​ໃຫ້ມີກຳລັງ​ກາຍທີ່​ດີ (ສຸຂະພາບ, ຄວາມ​ສູງ, ອາຍຸ​ຍືນ...); ພັດທະນາ​ຢ່າງຮອບດ້ານ​ກ່ຽວ​ກັບ​ປັນຍາ​ຄວາມ​ຮູ້ (ມີ​ປັນຍາ, ມີຄວາມ​ຮູ້ ​ແລະ​ທັກ​ສະ​ວິຊາ​ຊີບ​ສູງ, ມີ​ຄວາມ​ສາມາດ​ຮຽນຮູ້​ດ້ວຍ​ຕົນ​ເອງ, ຝຶກ​ອົບຮົມ​ດ້ວຍ​ຕົນ​ເອງ...); ມີ​ຈິດ​ໃຈ​ບໍລິສຸດ (​ເຈດ​ຈຳນົງ, ຄຸນສົມບັດ, ຄວາມຂະຫຍັນ​ຂັນ​ເຄື່ອນ, ຄວາມປະດິດ​ສ້າງ, ​ອີງ​ໃສ່​ກຳລັງ​ຂອງ​ຕົນ​ເອງ, ຄວາມ​ສາມາດ​ເປັນ​ເຈົ້າ​ການ, ປັບ​ຕົວ​ໄດ້​ຢ່າ​ງງ່າຍ​ໃນ​ສະພາບ​ແວດ​ລ້ອມ​ການ​ດຳລົງ​ຊີວິດ​ແລະ​ການເຮັດ​ວຽກທີ່​ປ່ຽນ​ແປງ​ເລື້ອຍໆ) ​ແນ​​ໃສ່​ເພີ່ມ​ທະວີ​ຄວາມ​ສາມາດ​ບົ່ມ​ຊ້ອນ, ກຳລັງ​ແຮງສັງ​ລວມຂອງ​ຄົນ​ຫວຽດນາມ (ທຶນມະນຸດ) ສຳລັບ​ພາລະກິດ​ການ​ຫັນ​ເປັນ​ອຸດສາຫະກຳ ທັນ​ສະ​ໄໝ, ​ເຂົ້າ​ສູ່​ເສດຖະກິດ​ພູມ​ປັນຍາ...

ທີ​ສອງ, ບັນຫາ​ພັດທະນາ​ຊັບພະ​ຍາກ​ອນມະນຸດທີ່ປັບ​ໃຫ້​ເຂົ້າ​ກັບ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່. ​ໃນ​ໄລຍະ 2021 - 2030 ຫວຽດນາມ​ຖືກ​ຜົນ​ກະທົບ​ຢ່າງ​ແຮງ (ທັງ​ດ້ານ​ບວກ​ແລະ​ລົບ) ຈາກ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ ຍ້ອນ​ການ​ເກີດ​ມີ​ເຕັກ​ໂນ​ໂລ​ຊີ​ໃໝ່​ຕ່າງໆ (ລະ​ບົບອັດຕະ​ໂນ​ມັດ, ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ, ການ​ຫັນ​ເປັນ​ດິຈິ​ຕອນ,...) ທີ່​ໄດ້​ປະ​ຢຸກ​ໃຊ້​ຢ່າງ​ກວ້າງຂວາງ ​ແລະ ​ດ້ວຍ​ຄວາມໄວ​ສຸດ ​ເຊິ່ງຈະລົບ​ລ້າງ​ເຂດ​ແດນ​ບະ​ຫວ່າງບັນດາ​ຂົງ​ເຂດ​ຂອງ​ຊີວິດ​ສັງຄົມ, ​ໂດຍ​ສະ​ເພາະ​ແມ່ນ ການ​ສ້າງ​​ການ​ປ່ຽນ​ແປງຂ​ອງ​ລະບົບ​ການ​ຜະລິດ, ການ​ຄຸ້ມ​ຄອງ ​ແລະ​ ການ​ບໍລິຫານ​ທັງ​ໝົດ​ຂອງ​ປະ​ເທດ. ​ເພາະສະ​ນັ້ນ, ຍຸດ​ທະ​ສາດ​ການ​ພັດທະນາ​ຊັບພະຍາກອນ​ມະນຸດ​ໃນ​ໄລຍະ 2021 - 2030 ຕ້ອງ​ແກ້​ໄຂ​ບັນ​ຫາ​ທີ່​ວາງ​ອອກ​ມາຄື ​ເປັນ​ເຈົ້າ​ການ​ປັບ​ຕົວ​ໃຫ້​ເຂົ້າ​ເຖິງຄວາມ​ສຳ​ເລັດ​ທາງ​ວິທະຍາສາດ​ແລະ​ເຕັກ​ໂນ​ໂລ​ຊີ​ໃໝ່ ​ໂດຍ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່​ນຳ​ມາ​ໃຫ້ ​ແລະ ​ແກ້​ໄຂ​ສິ່ງ​ທ້າ​ທາຍ​ຂອງ​ມັນ ຕາມ​ທິດ​ພັດທະນາຊັບພະຍາກອນ​ມະນຸດ​ທີ່​ມີ​ລະດັບ​ແລະ​ຄຸນ​ນະພາ​ບສູງ ​ເພື່ອ​ແທນ​ທີ່​ກຳລັງ​ຄົນ​ທີ່​ມີ​ລະດັບ​ແລະ​ຄຸນ​ນະພາ​ບຕ່ຳ​ໃນ​ປະຈຸ​ບັນ.

ທີ່​ສາມ, ​ປະສົມ​ກົມກຽວ​ຄວາມ​ສຳພັນ​ລະຫວ່າງ​ການ​ພັດທະນາ​ຊັບພະຍາກອນ​ມະນຸດ​ເພື່ອ​ຕອບ​ສະໜອງ​ຄວາມ​ຕ້ອງການ​ຂອງ​ຕະຫຼາດ​ແຮງ​ງນ​ໂດຍ​ໃຊ້​ເຕັກ​ໂນ​ໂລ​ຊີ​ສູງ (ຊັ້ນ​ສູງ) ​ແລະ ​ເຕັກ​ໂນ​ໂລ​ຊີທີ່​ໃຊ້​ແຮງ​ງານ​ຫຼາຍ (ຊັ້ນ​ຕ່ຳ​ແລະ​ກາງ). ຫວຽດນາມ​ຕ້ອງ​ເລືອກ​ເອົາ​ບາດກ້າວ​ຂ້າມ​ຜ່ານ, ດ້ານ​ໜຶ່ງ, ​ໃຫ້​ບຸລິມະສິດ​ແກ່​ການ​ພັດທະນາຊັບພະຍາກອນ​ມະນຸດ​ທີ່​ມີ​ລະດັບ​ແລະ​ຄຸນ​ນະພາ​ບສູງ ທີ່​ຄ່ອງ​ຕົວກັບ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່; ດ້ານ​ອື່ນ, ຕ້ອງ​ເອົາ​ໃຈ​ໃສ່​ເຖິງ​ການ​ພັດທະນາ​ຊັບພະຍາກອນ​ມະນຸດ​ທີ່​ມີ​ລະດັບ​ປານ​ກາງ ​ແລະ ການ​ສຶກສາ​ວີ​ຊາ​ຊີບ​ທົ່ວ​ໄປ​ໃຫ້​ຜູ້​ອອກ​ແຮງ​ງານ, ​ໂດຍ​ສະ​ເພາະ​ແມ່ນ​ຜູ້​ອອກ​ແຮງ​ງານ​​ຢູ່ຊົນນະບົດ ​ແລະ ​ໃນ​ຂົງ​ເຂດ​ທີ່​ບໍ່​ເປັນ​ທາງ​ການ.

ທີ​ສີ່, ບັນຫາ​ປະສົມ​ກົມກຽວ​ລະຫວ່າງການ​ຮັບປະກັນ​ຄວາມ​ທ່ຽງ​ທຳ​ແລະ​ຜົນ​ປະ​ໂຫຍ​ດ​ແຫ່ງ​ຊາດ ກັບ​ການນຳ​ໃຊ້​ກົນ​ໄກ​ແລະ​ເຄື່ອງມື​ຂອງ​ເສດຖະກິດ​ຕະຫຼາດ ​ໃນ​ການ​ພັດທະນາ​ແລະ​ນຳ​ໃຊ້​ຊັບພະຍາກອນ​ມະນຸດ. ​ໃນ​​ເສດຖະກິດ​ຕະຫຼາດ, ດ້ານໜຶ່ງ, ຕ້ອງ​ສົມທົບ​​ຜົນ​ປະ​ໂຫຍ​ດຂອງ​ຊາດ ​ແລະ ຜົນ​ປະ​ໂຫຍດຂອງ​ແຕ່​ລະບຸ​ກຄົນ ​ໃນ​ການ​ພັດທະນາຊັບພະຍາກອນ​ມະນຸດ; ດ້ານ​ອື່ນ, ​ເພື່ອ​ຮັບປະກັນ​ຄວາມ​ທ່ຽງ​ທຳ​ແລະ​ຜົນ​ປະ​ໂຫຍ​ດ​ແຫ່ງ​ຊາດ, ບົດບາດ​ຂອງ​ລັດຕໍ່​ການ​ພັດທະນາ​ຊັບພະຍາກອນ​ມະນຸດ​ເປັນ​ຫຼັກ ​ແຕ່ກໍ່​ຕ້ອງ​ນຳ​ໃຊ້​ກົນ​ໄກ​ແລະ​ເຄື່ອງມື​ຂອງ​ຕະຫຼາດ ​ໃນ​ການ​ພັດທະນາ​ແລະນຳ​ໃຊ້ຊັບພະຍາກອນ​ມະນຸດ, ​ໂດຍ​ສະ​ເພາະ​ແມ່ນ​ຜ່ານ​ການ​ຝຶກ​ອົບຮົມ ສຶກສາ​ວິຊາ​ຊີບ, ນະ​ໂຍບາຍວຽກ​ເຮັດ​ງານ​ທຳ, ການ​ຈ້າງ​ງານ, ການ​ຈ່າຍ​ຄ່າ​ແຮງ​ງານ ທີ່​ຖືກ​ກັບ​ຄຸນຄ່າ​ແຮງ​ງານ, ຕາມ​ສະມັດ​ຕະພາບ​ຂອງ​​ແຮງງານ ​ແລະ ປະສິດທິ​ຜົນ​ຂອງ​ວຽກ​ງານ.

ທີ​ຫ້າ, ບັນຫາ​ພັດທະນາ​ຊັບພະຍາກອນ​ມະນຸດ​ແບບ​ຍືນ​ຍົງ ຮັບປະກັນ​ປະລິມານ​ແລະຄຸນ​ນະພາບ​ໃນ​ໄລຍະ 2021 - 2030. ຢາກ​ໄດ້​ຄື​ແນວ​ນັ້ນ, ບັນຫາ​ທີ່​ວາງ​ອອກ​ມາ​ແມ່ນ ການພັດທະນາ​ຊັບພະຍາກອນ​ມະນຸດນັ້ນ​ ຕ້ອງ​ບໍ່​ເກີດຂຶ້ນ​ເອງ, ຈະ​ຕ້ອງ​ເປັນ​ເຈົ້າ​ການ​ຢ່າງແທ້​ຈິງ ​ແລະ ​ໄປ​ກ່ອນ​ກ້າວ​ໜຶ່ງ, ຕ້ອງ​ຄິດ​ໄລ່​ເຖິງບາດກ້າວ​ຫັນປ່ຽນ​ໄລຍະ ຈາກ​ປະ​ເທດທີ່​ມີ​ແຮງ​ງານ​​ເຫຼືອຫຼາຍ ກາຍ​ເປັນ​ຂາດ​ແຄນ​​ແຮງ​ງານ​ໃນ​ຕະຫຼາດ​ແຮງ​ງານ​ອະນາຄົດ, ມຸ່ງ​ໄປ​ສູ່​ການ​ຮັບປະກັນ​ການ​ເພີ່ມ​ຂຶ້ນ​ຢ່າງ​ໄວ​ຂອງ​ກຳລັງ​ຄົນ​ທີ່​ມີ​ລະດັບ​ແລະ​ຄຸນ​ນະພາ​ບສູງ ສອດຄ່ອງ​ກັບ​ຂະ​ບວນການ​ຫັນ​ໄປ​ສູ່​ຮູບ​ແບບ​ການ​ເຕີບ​ໂຕ​ແບບ​ປະດິດ​ສ້າງ (ການ​ເຕີບ​ໂຕ​ຕາມ​ລວງ​ເລິກ) ​ແລະ ​ການ​ພັດທະນາ​ເສດ​ຖະກິດ​ພູມ​ປັນຍາ; ການ​ນຳ​ໃຊ້​ກຳລັງ​ຄົນຕ້ອງ​ຮັບປະກັນ​ຄວາມ​ສົມ​ເຫດ​ສົມ​ຜົນ​ແລະ​ມີປະສິດທິ​ຜົນ, ທັງ​ສອດຄ່ອງ​ກັບ​ຄວາມ​ຕ້ອງການ​ພັດທະນາ​ປະ​ເທດ​ໃນ​ແຕ່ລະ​ໄລຍະ, ທັງ​ປະຕິບັດ​ຄວາມ​ຍຸດຕິ​ທຳ​ທາງ​ສັງຄົມ​ໃນ​ການພົວພັນ​ແຈກ​ຢາຍ, ຮັບປະກັນ​ຄວາມ​ໝັ້ນຄົງ​ທາງ​ດ້ານ​ວຽກ​ເຮັດ​ງານ​ທຳ ​ແລະ ຄວາມ​ປອດ​ໄພ​ທາງ​ສັງຄົມ ​ແນ​ໃສ່​ຈຳກັດ​ການ​ແບ່ງຊັ້ນ​ທາງ​ສັງຄົມ ກໍ​ຄື​ການ​​ແບ່ງ​ແຍກຄົນ​ຮັ່ງ​ແລະ​ຄົນທຸກ​ຍາກ.

ທິດ​ທາງ​ຍຸດ​ທະ​ສາດການ​ພັດທະນາ​ຊັບພະຍາກອນ​ມະນຸດ​ ໃນ​ໄລຍະ 2021 - 2030

- ພັດທະນາ​ແລະ​ນຳ​ໃຊ້​ຊັບພະຍາກອນ​ມະນຸດ​ຕາມ​ທິດ ​ຖືເອົາປະຊາຊົນ​ເປັນຈຸດ​ໃຈກາງ ​ແລະ ປົດ​ປ່ອຍປະ​ຊາ​ຊົນ ​ແຮງ​ງານ​ຢ່າງ​ເຖິງ​ຖອງ ​ໃນ​ເສດຖະກິດ​ຕະຫຼາດ​ກຳນົດ​ທິດ​ສັງຄົມ​ນິຍົມ ​ແລະ ​ເຊື່ອມ​ໂຍງ​ສາກົນ. ການ​ພັດທະນາ​ຊັບພະຍາກອນ​ມະນຸດ​ ຕ້ອງກາຍ​ເປັນ​ໜຶ່ງ​ໃນ​ບັນດາ​ການ​ບຸກທະລຸ​ຍຸດ​ທະ​ສາດ​ການ​ພັດທະນາ​ເສດຖະກິດ-ສັງ​ຄົມ​ຢ່າງ​ແທ້​ຈິງ ໃນ​ໄລຍະ 2021 - 2030; ​ແມ່ນ​ໜ້າ​ທີ່​ຂອງ​ທົ່ວ​ສັງຄົມ, ​ເປັນຄວາມ​ຮັບຜິດຊອບຂອງ​ບັນດາ​ການ​ນຳ​ຂອງ​ພັກ-ລັດ, ຂອງ​ໂຮງຮຽນ, ວິ​ສາ​ຫະກິດ, ຄອບຄົວ ​ແລະ ຂອງ​ກະ​ໂຕ​ພົນລະ​ເມືອງ, ຜູ້​ອອກ​ແຮງ​ງານ​ແຕ່ລະຄົນ.

- ພັດທະນາ​ຊັບພະຍາກອນ​ມະນຸດ​ຢ່າງຮອບດ້ານ ທັງ​ຄວາມ​ສາມາດ​ແລະຄຸນ​ນະພາ​ບ (ກຳລັງ​ກາຍ, ​ປັນຍາຄວາມ​ຮູ້ ​ແລະ ກຳລັງ​ຈິດ) ​ໃຫ້​ສອດຄ່ອງ​ເໝາະ​ສົມ​ແລະ​ຕອບ​ສະໜອງ​ຄວາມ​ຕ້ອງການ​ ທາງ​ດ້ານ​ປະລິມານ, ​ໂຄງສ້າງ ​ແລະ ​ຄຸນ​ນະພາ​ບ ຂອງ​ຍຸດ​ທະ​ສາດ​ການ​ພັດທະນາ​ເສດຖະກິດ-ສັງຄົມ ​​ໃນໄລຍະ 2021 - 2030 .

- ການ​ພັດທະນາ​ຊັບພະຍາກອນ​ມະນຸດ​ຕ້ອງ​ເປັນ​ເຈົ້າ​ການ, ຕັ້ງໜ້າ ​ແລະ​ ໄປ​ກ່ອນ​ກ້າວ​ໜຶ່ງ, ສ້າງ​ບາດກ້າວ​ການ​ປ່ຽນ​ແປງ​ຢ່າງ​ໄວ ​ແລະ ຕອບ​ສະໜອງຄວາມ​ຕ້ອງການ​ດ້ານ​ກຳລັງ​ຄົນ​ຂອງ​ບັນດາ​ຂົງ​ເຂດ ຂະ​​ແໜງ​ການ ທ້ອງ​ຖິ່ນ​ ໄດ້​ຢ່າງ​ທັນ​ການ ​​ເພື່ອ​ຮັບປະກັນຄວາມ​ສົມ​ດຸນ​ຂອງ​ຊັບພະຍາກອນ​ມະ​ນຸດ​ໃນ​ການ​ພັດທະນາ​ເສດຖະກິດ-ສັງຄົມ ຕາມ​ແຜນ​ແມ່​ບົດ​ການ​ພັດທະນາ​ຊັບພະຍາກອນມະນຸດ​ແຫ່ງ​ຊາດ, ພິ​ເສດ, ​ໃຫ້​ບຸລິມະສິດ​ແກ່ຂະ​ແໜງ​ເສດຖະກິດປາຍ​ແຫຼມ, ຂະ​ແໜງ​ເສດຖະກິດ​ທີ່​ຫວຽດນາມ​ມີ​ທ່າ​ໄດ້​ປຽບ​ໃນ​ການ​ແຂ່ງຂັນ.

- ປ່ຽນ​ແປງ​ໃໝ່​ການ​ຝຶກ​ອົບຮົມ ການ​ສຶກສາ​ວິຊາຊີບ ຢ່າງ​ເປັນ​ພື້ນຖານ ຮອບດ້ານ​ແລະ​ຄົບ​ຊຸດ ຕາມ​ຄວາມ​ຕ້ອງການ​ຂອງ​ສັງຄົມ, ຄວາມ​ຕ້ອງການ​ຂອງ​ຕະຫຼາດ​ແຮງ​ງານ; ​ເຊື່ອມ​ຕໍ່​ການ​ຝຶກ​ອົບຮົມ ສຶກສາ​ວິຊາ​ຊີບ ກັບວິ​ສາ​ຫະກິດ, ກັບ​ການ​ຄົ້ນຄວ້າ​ວິທະຍາສາດ​ແລະການ​ປະ​ຢຸກ​ໃຊ້​ເຕັກ​ໂນ​ໂລ​ຊີ; ພັດທະນາ​ລະບົບ​ການ​ຝຶກ​ອົບຮົມ ສຶກສາ​ວິຊາ​ຊີບ​ ຕາມ​ທິດ​ເປີດກວ້າງ, ຍືດຫຍຸ່ນ ​ແລະ ​ເຊື່ອມ​ໂຍງ; ຍູ້​ແຮງ​ການ​ຫັນ​ເປັນ​ສັງຄົມ​ໃນ​ການ​ຝຶກ​ອົບຮົມ ​ສຶກສາ​ວິຊາ​ຊີບ ຕາມ​ທິດ​ມອບ​ສິດ​ເປັນ​ເຈົ້າ​ຕົນ​ເອງ​ ໃຫ້​ໂຮງຮຽນ, ສະຖານ​ສຶກສາ​ແລະ​ຝຶກ​ອົບຮົມ​ພາກ​ລັດ, ສົ່ງ​ເສີມ​ໃຫ້​ພາກ​ເອກະ​ຊົນແລະ​ຕ່າງປະ​ເທດມາ​ລົງທຶນ​ເຂົ້າ​ໃນ​ການ​ຝຶກ​ອົບຮົມ ການ​ສຶກສາ​ວິຊາ​ຊີບທີ່​ມີຄຸນ​ນະພາ​ບສູງ​ລະດັບ​​ໂລກ.

- ສືບ​ຕໍ່​ປ່ຽນ​ແປງ​ໃໝ່ ​ແລະ ປັບປຸງບູລະນະສະຖາ​ບັນ​ລະບຽບ​ກົດໝາຍ, ສ້າງ​ຂອບ​ກົດໝາຍ ​ແລະ ກຳລັງ​ໜູນ​ໃໝ່​ ໃຫ້​ແກ່​ການ​ພັດທະນາ​ແລະ​ນຳ​ໃຊ້ຊັບພະຍາກອນ​ມະນຸດ, ລວມທັງ​ສະ​ຖາ​ບັນ​ວິທະຍາສາດ​ແລະ​ເຕັກ​ໂນ​ໂລ​ຊີ, ຝຶກ​ອົບຮົມ​ແລະສຶກສາວິຊາ​ຊີບ, ພັດທະນາ​ຕະຫຼາດ​ແຮງ​ງານ ​ແລະ ວຽກ​ເຮັດ​ງານ​ທຳ, ລາຍ​ໄດ້, ຮັບປະກັນ​ຄວາມ​ປອດ​ໄພ​ທາງ​ສັງຄົມ...; ສ້າງ​ບັນດາ​ກົນ​ໄກ​ແລະນະ​ໂຍບາຍ ​ເພື່ອ​ດຶງ​ດູດ, ນຳ​ໃຊ້ ​ແລະ ​ເກື້ອກູນອຸດ​ໜູນຊັບພະຍາກອນ​ມະນຸດຄຸນ​ນະພາ​ບສູງ ​ແລະ ຄົນ​ທີ່​ມາ​ຄວາມ​ສາມາດຂອງ​ປະ​ເທດ; ມີ​ນະ​ໂຍບາຍ​ສົ່ງ​ເສີມ​ພັດທະນາຕະຫຼາດຊັບພະຍາກອນ​ມະນຸດ​ຄຸນ​ນະພາ​ບສູງ, ຕະຫຼາດ​ແລະ​ຜະລິດ​ຕະພັນວິທະຍາສາດ-​ເຕັກ​ໂນ​ໂລ​ຊີ​ໃໝ່ ​ເພື່ອ​ປະກອບສ່ວນ​ພັດທະນາ​ເສດຖະກິດ​ພູມ​ປັນຍາ ​ແລະ ການ​ເຊື່ອມ​ໂຍງ​ສາກົນ; ປ່ຽນ​ແປງ​ໃໝ່​ນະ​ໂຍບາຍການ​ຮັບ​ສະໝັກ​ງານ, ການຈັດສັນ​ແລະນຳ​ໃຊ້​ຊັບພະຍາກອນ​ມະນຸດ, ​ໂດຍ​ສະ​ເພາະ​ແມ່ນ​ ຊັບພະຍາກອນ​ມະນຸດ​ຄຸນ​ນະພາ​ບສູງ, ສ້າງ​ເງື່ອນ​ໄຂ​ແລະ​ສະພາບ​ແວດ​ລ້ອມ​ການ​ເຮັດ​ວຽກ​ທີ່​ດີ ​ໃຫ້​ພວກເຂົາ​ເສີມ​ຂະ​ຫຍາ​ຍຄວາມ​ສາມາດ​ແລະ​ການ​ອຸທິດ​ຕົນ​ຂອງ​ພວກ​ເຂົາ.

- ​ເພີ່ມ​ທະວີ​ແລະ​ເປີດ​ກວ້າງ​ການ​ຮ່ວມ​ມື​ສາກົນ ດ້ວນ​ຈິດ​ໃຈ​ເປັນ​ເຈົ້າການ, ຕັ້ງໜ້າ​​ແລະ​ມີ​ຄວາມ​ຮັບຜິດຊອບ ​ໃນ​ການ​ເຂົ້າ​ຮ່ວມ​ແລະ​ປະຕິບັດ​ບັນດາ​ຄຳ​ໝັ້ນ​ສັນຍາ​ສາກົນທີ່​ມີ​ຄວາມ​ພົວພັນ​ເຖິງ​ການ​ພັດທະນາ​ຊັບພະຍາກອນ​ມະນຸດ ​ໃນ​ຂະ​ບວນການ​ເຊື່ອມ​ໂຍງ​ສາກົນ, ພ້ອມ​ກັນ​ນັ້ນ​ກໍ່​ຍາດ​ແຍ່ງ​ເອົາ​​ແຫຼ່ງພະລັງ​​ແລະ​ບົດຮຽນຕື່ມ​ອີກ ​ເພື່ອ​ສ້າງ​ແລະ​ປະ​ຕິ​ບັດ​ນະ​ໂຍບາຍ, ​ໂຄງການ​ພັດທະນາ​ຊັບພະຍາກອນ​ມະນຸດ​ທີ່​ເຂົ້າ​ເຖິງ​ບັນດາ​ມາດຕະຖານ​ສາກົນ.

ໜ້າ​ທີ່​ຍຸດ​ທະ​ສາດ​ເພື່ອດຳ​ເນີນ​ການ

ທີ​ໜຶ່ງ, ພັດທະນາ​ຊັບພະຍາກອນ​ມະນຸດທາງ​ດ້ານ​ກຳລັງ​ກາຍ​ແລະ​ລະດັບ​ການ​ສຶກສາ ​ເພື່ອ​ຕອບ​ສະໜອງ​ຄວາມ​ຕ້ອງການກຳລັງ​ຄົນ​ໃນ​ອະນາຄົດ ກ່ອນ​ທີ່​ຈະ​ເຖິງ​ອາຍຸ​ການ​ເຮັດ​ວຽກ​ ແລະ ​ໃນ​ໄວ​ຜູ້​ໃຫຍ່. ຕາມ​ທິດ​ທາງ​ນີ້, ​ຕ້ອງ​ປະຕິບັດ​ໜ້າ​ທີ່:

- ປະສົມ, ​ເຊື່ອມ​ຕໍ່​ຍຸດ​ທະ​ສາດ​ການ​ພັດທະນາຊັບພະຍາກອນ​ມະນຸດ​ຫວຽດນາມ​ໃນ​ໄລຍະ 2021 - 2030 ກັບ​ຍຸດ​ທະ​ສາດ​ການ​ຮັກສາ, ​ເບິ່ງ​ແຍງ​ດູ​ແລ ​ແລະ ຍົກ​ສູງ​ສຸຂະພາບ​ຂອງ​ປະຊາຊົນ, ​ເອົາ​ໃຈ​ໃສ່​ເປັນພິ​ເສດ​​ເຖິງ​ການ​ຮັກສາ​ແລະ​ເບິ່ງ​ແຍງ​ດູ​ແລ​ສຸຂະພາບ​ຂອງ​ແມ່​ທີ່​ຖືພາ​ແລະ​ເດັກ​ອາຍຸ​ຕ່ຳ​ກວ່າ 6 ປີ.

- ປະສົມ, ​ເຊື່ອມ​ຕໍ່​ກັບ​ຍຸດ​ທະ​ສາດ​ການ​ສຶກສາ, ການ​ຝຶກອົບ​ຮົມ​ວິຊາ​ຊີບ ​ເພື່ອ​ຍົກສູງ​ລະດັບ​ຄວາມ​ຮູ້​ ​ແລະ ​ລະດັບ​ການ​ສຶກສາ​ຂອງ​ປະຊາຊົນ.

- ປະສົມ, ​ເຊື່ອມ​ຕໍ່​ກັບຍຸດ​ທະ​ສາດ​ການ​ຮັກສາ​ຄວາມ​ປອດ​ໄພ​ທາງສັງຄົມ ໃຫ້ປະຊາຊົນ​ເຂົ້າ​ເຖິງສະຫວັດດີ​ການ​ສັງຄົມ​ອີງ​ໃສ່​ສິດທິ, ຕາມ​ທິດ​ທົ່ວ​ປວງ​ຊົນ ​ແລະ ຕາມ​ວົງ​ຈອນ​ຊີວິດ ​ເພື່ອປ້ອງ​ກັນ, ຈຳກັດ ​ແລະ ​ເອົາ​ຊະນະ​ຄວາມ​ສ່ຽງ​ໃນ​ຊີວິດ​ຂອງ​ຄົນ​ຄົນ​ໜຶ່ງ.

ທີ​ສອງ, ພັດທະນາຊັບພະຍາກອນ​ມະນຸດຄຸນ​ນະພາ​ບສູງ ​ເພື່ອສ້າງ​ບາດກ້າວ​ບຸກທະລຸ​ໃນ​ການ​ປະດິດ​ສ້າງ​ຂອງ​ຮູບ​ແບບ​ເຕີບ​ໂຕ​ຕາມ​ລວງ​ເລິກ ​ແລະ ຊຸກຍູ້​ການ​ພັດທະນາ​ເສດຖະກິດ​ພູມ​ປັນຍາ. ຕາມ​ນັ້ນ​ຕ້ອງ:

- ປ່ຽນ​ແປງ​ໃໝ່​ຈິນຕະນາການ, ​ເຮັດ​ໃຫ້​ມີ​ການ​ປ່ຽນ​ແປງ​​ແລະ​ຍົກ​ສູງຄວາມ​ຮັບ​ຮູ້​ຂອງ​ທົ່ວ​ສັງຄົມ, ຂອງ​ປະຊາຊົນ​ແຕ່ລະຄົນ​ ກ່ຽວ​ກັບ​ການຖື​ຊັບພະຍາກອນ​ມະນຸດ​​ເປັນ​ຊັບພະຍາກອນ​ທີ່​ລ້ຳ​ຄ່າ​ທີ່​ສຸດ​ຂອງ​ຫວຽດນາມ ​ເພື່ອ​ພັດທະນາ​ປະ​ເທດ, ​ໂດຍ​ສະ​ເພາະ​ແມ່ນ​ ໃນ​ຍຸກສະ​ໄໝ​ເຕັກນິກ​ດິຈິ​ຕອນ ​ແລະ ການ​ພັດທະນາ​ເສດຖະກິດ​ພູມ​ປັນຍາ.

- ສຸມ​ໃສ່ພັດທະນາຊັບພະຍາກອນ​ມະນຸດຄຸນ​ນະພາ​ບສູງ, ມີ​ຄຸນ​ນະພາ​ບດ້ານ​ການ​ເມືອງ, ຄຸນສົມບັດ​ແລະ​ແບບ​ແຜນ​ດຳລົງ​ຊີວິດ​ທີ່​ດີ; ມີ​ລະດັບ​ການ​ສຶກສາ, ມີ​ຄວາມ​ຊຳນານ​ດ້ານ​ເຕັກນິກ​ສູງ; ມີ​ສຸຂະພາບ​ແຂງ​ແຮງ; ນຳ​ໜ້າ​ໃນ​ການ​ອອກ​ແຮງ​ງານ​ ແລະ ​ມີ​ຄວາມ​ປະດິດ​ສ້າງ​ວິທະຍາສາດ.

- ​ເຊື່ອມ​ຕໍ່​ແໜ້ນ​ແຟ້ນກັບ​ຄວາມ​ຕ້ອງການ​ພັດທະນາ ​ແລະ ປະ​ຢຸກ​ໃຊ້​ວິທະຍາສາດ​ເຕັກ​ໂນ​ໂລ​ຊີ​ໃໝ່ຈາກ​ຜົນສຳ​ເລັດ​ຂອງ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່ ​ເຊິ່ງ​ເປັນ​ສອງ​ເສົາ​ຄ້ຳຂອງ​ການ​ພັດທະນາ​ຍຸດ​ທະ​ສາດ, ສ້າງ​ກຳລັງ​ໜູນ​ໃໝ່​ໃຫ້​ແກ່​ການ​ພັດທະນາ​ປະ​ເທດ​ຢ່າງ​ໄວວາ​ແລະ​ຍືນ​ຍົງ, ​ໃນ​ນັ້ນ, ​ເນັ້ນ​ໜັກ​ເຖິງ​ຄວາມ​ສຳຄັນ​ພິ​ເສດ​ຂອງ​ການ​ພັດທະນາ​ຊັບພະຍາກອນ​ມະນຸດ​ທາງວິທະຍາສາດ-​ເຕັກ​ໂນ​ໂລ​ຊີ ​ເປັນ​ປັດ​ໄຈຕັດສິນ​ສຳລັບການ​ພັດທະນາ​ແລະ​ປະ​ຢຸກ​ໃຊ້​ວິທະຍາສາດ-​ເຕັກ​ໂນ​ໂລ​ຊີ.

- ປ່ຽນ​ແປງ​ໃໝ່​ກົນ​ໄກ​ແລະນະ​ໂຍບາຍກ່ຽວ​ກັບ​ການພັດທະນາຊັບພະຍາກອນ​ມະນຸດຄຸນ​ນະພາ​ບສູງຕາມ​ທິດ: ວິ​ເຄາ​ະ​​ແລະປະ​ເມີນ​ຢ່າງ​ຖືກຕ້ອງ​ກ່ຽວ​ກັບສະຖານະ​ການຈິງ​ ຂອງການ​ພັດທະນາ​ຊັບພະຍາກອນ​ມະນຸດ​ຄຸນ​ນະພາ​ບສູງ​ໃນ​ທຸກ​ດ້ານ, ຈາກ​ນັ້ນ​ມີ​ຄວາມ​ຮັບ​ຮູ້​ຢ່າງ​ຖືກຕ້ອງ ​ແລະ ສະ​ເໜີ​ລະບົບ​ບັນດາ​ວິທີ​ແກ້​ໄຂ​ພິ​ເສດ ສຳລັບ​ການ​ພັດທະນາ​ຊັບພະຍາກອນ​ມະນຸດ; ຍົກ​ສູງ​ປະສິດທິພາບ​ຂອງ​ວຽກ​ງານ​ວາງ​ແຜນການ, ຄຸ້ມ​ຄອງ​ ແລະ ​ນຳ​ໃຊ້​ຊັບພະຍາກອນ​ຄຸນ​ນະພາ​ບສູງ ບົນ​ພື້ນຖານການ​ຄາດ​ຄະ​ເນ​ຍຸດ​ທະ​ສາດກ່ຽວ​ກັບ​ຄວາມ​ຕ້ອງການ​ຊັບພະຍາກອນ​ມະນຸດ​ຄຸນ​ນະພາ​ບສູງ ​ແລະ ​ແຜນດຸນ​ດ່ຽງ​ລະຫວ່າງ​ການ​ສະໜອງ - ຄວາມ​ຕ້ອງການ​ກ່ຽວ​ກັບ​ຊັບພະຍາກອນ​ມະນຸດ​ຄຸນ​ນະພາ​ບສູງ; ປ່ຽນ​ແປງ​ໃໝ່​ກົນ​ໄກ​ຄຸ້ມ​ຄອງ​ແລະນຳ​ໃຊ້ຖັນ​ແຖວ​ພະນັກ​ງາ​ນ​ຄຸນ​ນະພາ​ບສູງ, ​ເສີມ​ຂະຫຍາຍ​ຄວາມ​ຕັ້ງໜ້າ​ແລະ​ການ​ເຄື່ອນ​ໄຫວ​ອອກ​ແຮງ​ງານ​ປະດິດ​ສ້າງ; ​ເບິ່ງ​ແຍງ​ດູ​ແລ​ຊີວິດ​ການ​ເປັນ​ຢູ່​ທຸກ​ດ້ານ​ຂອງ​ຜູ້​ອອກ​ແຮງ​ງານ.

ທີ​ສາມ, ພັດທະນາຊັບພະຍາກອນ​ມະນຸດຢ່າງ​ເໝາະ​ສົມ​ກັບ​ເຕັກ​ໂນ​ໂລ​ຊີ​ທີ່​ໃຊ້​ແຮງ​ງານ​ຫຼາຍ ​ເພື່ອ​ສ້າງ​ໂອກາດ​ໃຫ້​ຜູ້​ອອກ​ແຮງ​ງານ​ມີ​ວຽກ​ເຮັດ​ງານ​ທຳ​ແລະ​ມີ​ລາຍ​ໄດ້​ ເພື່ອ​ຮັບປະກັນຊີວິດການ​ເປັນ​ຢູ່. ສຳລັບ​ໜ້າ​ທີ່​ນີ້ ຄວນ​ເອົາ​ໃຈ​ໃສ່:

- ພັດທະນາຊັບພະຍາກອນ​ມະນຸດມີ​ທັກ​ສະ​ວິຊາ​ຊີບ​ທີ່​ເໝາ​ະສົມ​ກັບ​ລະດັບການ​ໃຊ້​ເຕັກ​ໂນ​ໂລ​ຊີ​ທີ່​ໃຊ້​ແຮງ​ງານ​ຫຼາຍ (ຊັ້ນ​ຕ່ຳ​ແລະ​ກາງ) ​ໃນ​ຂົງ​ເຂດ​ກະສິກຳ ​ແລະ ຊົນນະບົດ; ຕອບ​ສະໜອງ​ກຳລັງ​ຄົນ​ໃຫ້​ແກ່​ແຕ່​ລະບາດ​ກ້າວ​ການຫັນປ່ຽນ​ການຜະລິດກະສິກຳ ຈາກ​ຂະໜາດ​ຄົວ​ເຮືອນ​ ໄປ​ເປັນ​ເສດຖະກິດ​ຟາ​ມ, ວິ​ສາ​ຫະກິດ​ກະສິກຳ ​ເພື່ອ​ສ້າງ​ວຽກ​ເຮັດ​ງານ​ທີ່​ມີ​ລາຍ​ໄດ້​ດີ​ ​ໃຫ້​ຜູ້​ອອກ​ແຮງ​ງານ.

- ພັດທະນາຊັບພະຍາກອນ​ມະນຸດ​ໃນ​ຂົງ​ເຂ​ດບໍ່​ເປັນ​ທາງ​ການ​ທີ່​ມີ​ຄວາມ​ສາມາດ​ຜະລິດ, ທຸລະ​ກິດ ສ້າງ​ເງື່ອນ​ໄຂ​ເພື່ອ​ຫັນປ່ຽນ​ຮູບ​ການ​ທຸລະ​ກິດ​ຄົວ​ເຮືອນ ​ເປັນ​ວິ​ສາ​ຫະກິດ​ຂະໜາ​ກນ້ອຍ​ແລະ​ຂະໜາດ​ກາງ (ເຮັດ​ໃຫ້ຂົງ​ເຂດ​ບໍ່​ເປັນ​ທາງ​ການ ກາຍ​ເປັນ​​ເປັນ​ທາງ​ການ).

- ພັດທະນາຊັບພະຍາກອນ​ມະນຸດທີ່​ຫາ​ກໍ່​ກ້າວ​ເຂົ້າ​ສູ່​ໄວ​ເຮັດ​ວຽກ ຕາມ​ທິດ​ເຜີ​ຍ​ແຜ່ວິຊາ​ຊີບ​ທົ່ວ​ໄປ, ຕອບ​ສະໜອງ​ຄວາມ​ຕ້ອງການ​ຂອງ​ສັງຄົມ, ຂອງ​ຕະຫຼາດ​ແຮງ​ງານ ​ແລະ ​ຄວາມ​ຕ້ອງການ​ວຽກ​ເຮັດ​ງານ​ທຳ​ຂອງ​ຊາວ​ໜຸ່ມ.

ທີ​ສີ່, ປ່ຽນ​ແປງ​ໃໝ່, ຫັນປ່ຽນ​ຢ່າງ​ແຮງ​ ການ​ຝຶກ​ອົບຮົມ ສຶກສາ​ວິຊາ​ຊີບ​ຕາມ​ຄວາມ​ຕ້ອງການ​ຂອງ​ສັງຄົມ, ຊຸກ​ດັນ​ຄວາມ​ຕ້ອງການ​ຂອງ​ຕະຫຼາດ​ແຮງ​ງານ ​ແລະ ຄວາມ​ຕ້ອງການ​ວຽກ​ເຮັດ​ງານ​ທຳ​ຂອງ​ຜູ້​ອອກ​ແຮງ​ງານ. ລະອຽດ​ຄື:

- ຫັນປ່ຽນ​ຂະ​ບວນການ​ຝຶກ​ອົບຮົມ ສຶກສາ​ວິຊາ​ຊີບ​ ຈາ​ກການ​ສິດສອນ​ຄວາມ​ຮູ້ (ທິດ​ສະ​ດີ) ​ໄປ​ເປັນ​ການພັດທະນາ​ຄວາມ​ສາມາດ​ທຸກ​ດ້ານ, ​ໂດຍ​ສະ​ເພາະ​ແມ່ນ​ ຄວາມ​ສາມາດ​ປະດິດ​ສ້າງ, ທັກ​ສະການ​ປະຕິບັດ ຕາມ​ມາດຕະຖານທັກ​ສະ​ອາຊີບ​ແຫ່ງ​ຊາດ ​ເຂົ້າ​ໃກ້​ກັບ​ມາດຕະຖານ​ທັກ​ສະ​ອາຊີ​ບລະດັບ​ພາກ​ພື້ນ​ແລະ​ໂລກ.

- ປະຕິບັດ​ບັນດາ​ໂຄງການ, ​ແຜນ​ງານ​ການ​ຝຶກ​ອົບຮົມ​ຊັບພະຍາກອນ​ມະນຸດ​ຄຸນ​ນະພາ​ບສູງ ສຳລັບ​ບັນດາ​ຂະ​ແໜງ​ການ, ຂົງ​ເຂດ​ປາຍ​ແຫຼມ; ຝຶກ​ອົບຮົມ​ກຳລັງ​ຄົນ​ໃຫ້​ແກ່​ການ​ພັດທະນາ​ເສດຖະກິດ​ພູມ​ປັນຍາ; ​ເອົາ​ໃຈ​ໃສ່​ເຖິງ​ການ​ຄົ້ນ​ເຜີຍ, ບຳລຸງ​ສ້າງ ​ແລະ ​ເສີມ​ຂະຫຍາຍ​ບຸກຄົນ​ທີ່​ມີພອນ​ສະຫວັນ.

- ສຸມ​ໃສ່​ຍົກ​ສູງ​ຄຸນ​ນະພາ​ບຂອງ​ການ​ຝຶກ​ອົບຮົມ ສຶກສາ​ວິຊາ​ຊີບ ຕາມ​ທິດ​ຂະຫຍາຍ​ລະບົບ​ການ​ຝຶກ​ອົບຮົມ ສຶກສາ​ວິຊາ​ຊີບ​ເປີດ​ກວ້າງ ​ແລະ ຍືດຫຍຸ່ນ; ຝຶກ​ອົບຮົມ ສຶກສາ​ວິຊາ​ຊີບ​ຫຼາຍ​ຂະ​ແໜງ​ການ, ຫຼາຍ​ອາຊີບ, ​ເພີ່ມ​ເຕີມ​ຂະ​ແໜງ​ການ ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ແລະ​ການ​ສື່ສານ (ICT), ບຼ໊ອກ​ເຊນ (blockchain), ປັນຍາ​ປະ​ດິດ (AI) ​ເພື່ອ​ຕອບ​ສະໜອງ​ຄວາມ​ຕ້ອງການດ້ານ​ກຳລັງ​ຄົນ​ໃນ​ການ​ປະຕິວັດ​ອຸດສາຫະກຳ​ຄັ້ງ​ທີ​ສີ່.

- ​ເພີ່ມ​ທະວີ​ການ​ເຊື່ອມ​ຕໍ່​ລະຫວ່າງ​ບັນດາ​ພື້ນຖານ​ການ​ຝຶກ​ອົບຮົມ ສຶກສາ​ວິຊາ​ຊີບ ​ກັບ ວິ​ສາ​ຫະກິດ ດ້ວຍ​ບັນດາ​ຮູບ​ການ​ທີ່​ຫຼາກ​ຫຼາຍ​ແລະ​ມີ​ປະສິດທິ​ຜົນ; ການ​ສຶກສາ​ວິຊາ​ຊີບ​ຕິດ​ແໜ້ນ​ກັບ​ວິ​ສາ​ຫະກິດຕາມ​ຮູບ​ແບບ “ການ​ຝຶກ​ອົບຮົມ​ຕິດ​ກັບ​ການຖ່າຍ​ທອດ​ເຕັກ​ໂນ​ໂລ​ຊີ”, ກ້າວ​ແຕ່ລະ​ຂັ້ນ​ສູ່​ຮູບ​ແບບການ​ເຊື່ອມ​ຕໍ່​ລະຫວ່າງ​ການ​ຝຶກ​ອົບຮົມ ສຶກສາ​ວິຊາ​ຊີບ ກັບ “ການ​ຄົ້ນຄວ້າ, ການ​ນຳ​ໃຊ້”.

ທີ​ຫ້າ, ພັດທະນາ​ຕະຫຼາດ​ແຮງ​ງານ​ໃຫ້​ກາຍ​ເປັນ​ເຄື່ອງມືທີ່​ມີ​ປະສິດທິ​ຜົນ​ ໃນ​ການຈັດ​ແບ່ງ, ດຸນ​ດ່ຽງ, ດັດປັບການ​ສະໜອງ​ແລະຄວາມ​ຕ້ອງການຊັບພະຍາກອນ​ມະນຸດຢ່າງ​ເໝາະ​ສົມ, ຕອບ​ສະໜອງ​ຄວາມ​ຕ້ອງການ​ນຳ​ໃຊ້​ທາງ​ດ້ານ​ປະລິດ​ມານ, ​ໂຄງ​ສ້າງ, ຄຸນ​ນະພາ​ບ ຂອງ​ແຕ່ລະ​ຂະ​ແໜງ​ການ, ​ແຕ່ລະ​ເຂດ​ແລະ​ຂົງ​ເຂດ. ລະອຽດ​ຄື:

- ສືບ​ຕໍ່​ປົດ​ປ່ອຍ​ກຳລັງ​ການ​ຜະລິດ ​ແລະ​ກຳລັງ​ແຮງ​ງານ​ຢ່າງ​ເຖິງ​ຖອງ, ຊຸກຍູ້​ການ​ສ້າງ​ວຽກ​ເຮັດ​ງານ​ທຳ​ແບບ​ຍືນ​ຍົງ ທີ​ມີ​ລາຍ​ໄດ້​ສູງ.

- ພັດທະນາ​ຕະຫຼາດ​ແຮງ​ງານ​ຢ່າງ​ຄົບ​ຊຸດ​ໃນ​ຂອບ​ເຂດ​ທົ່ວ​ປະ​ເທດ ​ເພື່ອ​ເຊື່ອມ​ຕໍ່​ການ​ສະໜອງ-ຄວາມ​ຕ້ອງການກ່ຽວ​ກັບ​ແຮງ​ງານ; ກໍ່ສ້າງ​ການ​ພົວພັນ​ແຮງ​ງານ​ທີ່​ກົມກຽວ, ​ເປັນ​ປົດ​ກະຕິ ​ແລະ​ກ້າວໜ້າ; ປະຕິບັດ​ຄວາມ​ຍຸຕິ​ທຳ​​ໃນການ​ແຈກ​ຈ່າຍ​ເງິນ​ເດືອນ​ແລະ​ລາຍ​ໄດ້; ຮັບປະກັນ​ເງື່ອນ​ໄຂ​​ເຮັດ​ວຽກ​ທີ່​ປອດ​ໄພ ​ແລະສຸຂະ​ອະນາ​ໄມ; ຍູ້​ແຮງ​ການ​ກໍ່ສ້າງ​ວັດທະນະທຳ​ປອດ​ໄພ​ໃນ​ການ​ອອກ​ແຮງ​ງານ ​ແລະ​ໃນ​ວິ​ສາ​ຫະກິດ.

- ກໍ່​ຮ່າງ​ສ້າງ​ຮູບ​ແລະ​ພັດທະນາ​ຕະຫຼາດ​ແຮງ​ງານ​ລະດັບ​ສູງ​ຢ່າງ​ໄວ ສ້າງ​ສະພາບ​ແວດ​ລ້ອມ​ໃຫ້​ແຮງ​ງານສະຕິ​ປັນຍາ, ​ແຮງ​ງານ​ຄຸນ​ນະພາ​ບສູງ ​ໄດ້​ເຄື່ອນ​ຍ້າຍ​ໂດຍ​ເສລີ​ ລະຫວ່າງ​ບັນດາ​ຂະ​ແໜງ​ການ, ​ເຂດ ​ແລະ ​ຂົງ​ເຂດ ​ເພື່ອຍູ້​ແຮງ​ການ​ຫັນປ່ຽນ​ໂຄງ​ສ້າງ​ເສດຖະກິດ​ແລະ​ແຮງ​ງານ ຕາມ​ທິດ​ທັນ​ສະ​ໄໝ, ພັດທະນາ​ເສດຖະກິດ​ພູມ​ປັນຍາ, ​ເຂົ້າ​ຮ່ວມ​ຢ່າງ​ຕັ້ງໜ້າ​ໃນ​ຫ່ວງ​ໂຊ້​ຄຸນຄ່າລະດັບ​​ໂລກ ​ແລະ ​ການ​ແບ່ງ​ງານລະຫວ່າງ​ປະ​ເທດ.

- ປະຕິບັດ​ຫຼັກການລາຄາ​ແຮງ​ງານ (​ເງິນ​ເດືອນ, ຄ່າ​ແຮງ) ​ໂດຍ​ຕະຫຼາດ​ກຳນົດ ​ແລະ ​ໄດ້​ແຈກ​ຢາຍ​ຕາມ​ຜົນ​ຂອງ​ການ​ອອກ​ແຮງ​ງານ, ປະສິດທິ​ຜົນເສດຖະກິດ ​ແລະ ສ່ວນ​ອຸທິດ; ປະຕິບັດ​ຄວາມ​ຍຸດຕິ​ທຳໃນ​ການ​ແຈກ​ຢາຍ ​ແລະ ສົ່ງ​ເສີມ, ​ເຊີ​ດຊູ​ແຮງ​ງານ​ປະດິດ​ສ້າງ, ຊຸກຍູ້​ການ​ພັດທະນາ​ຊັບພະຍາກອນ​ມະນຸດ​ລະດັບ​ສູງ, ນຳ​ໃຊ້​ແລະ​ປະພຶດ​ເປັນ​ຢ່າງ​ດີ​ຕໍ່​ຜູ້​ທີ່​ມີ​ຄວາມ​ເກັ່ງ​ກ້າ​ສາມາດ.

ບາງ​ວິທີ​ແກ້​ໄຂ​ທີ່​ສຳຄັນ​ເຊິ່ງຈະຕ້ອງ​ໄດ້​ຮັບ​ການ​ປະຕິບັດ​ໃນ​ເວລາ​ຕໍ່ໜ້າ

ທີ​ໜຶ່ງ, ສືບ​ຕໍ່​ປັບປຸງບູລະນະລະບຽບ​ກົດໝາຍ ​ແລະ ປ່ຽນ​ແປງ​ໃໝ່​ຢ່າງ​ແຂງ​ແຮງ ​ການ​ຄຸ້ມ​ຄອງ​ລັດ​ຕໍ່​ການພັດທະນາຊັບພະຍາກອນ​ມະນຸດ. ລະອຽດ​ຄື, ສືບ​ຕໍ່​ປັບປຸງ​ບູລະນະ​ລະບົບ​ກົດໝາຍ ສ້າງ​​ແລວທາງ​ກົດໝາຍ​ໃຫ້​ແກ່ການພັດທະນາຊັບພະຍາກອນ​ມະນຸດ, ​ໂດຍ​ສະ​ເພາະ​ແມ່ນ ພັດທະນາຊັບພະຍາກອນ​ມະນຸດຄຸນ​ນະພາ​ບສູງ; ມີ​ກົນ​ໄກ, ນະ​ໂຍບາຍ​ບຸລິມະສິດ​ເພື່ອ​ດຶງ​ດູ​ນ, ນຳ​ໃຊ້ ​ແລະ ​ເກື້ອກູນ​ອຸດ​ໜູນ​ຊັບພະຍາກອນ​ມະນຸດຄຸນ​ນະພາ​ບສູງ​ແລະຜູ້​ເກັ່ງ​ກ້າ​ສາມາດ​ຂອງ​ປະ​ເທດ; ຍູ້​ແຮງ​ການ​ຄາດ​ຄະ​ເນ ​ແລະ ​ສະໜອງ​ຂໍ້​ມູນ​ກ່ຽວ​ກັບ​ການ​ສະໜອງ-ຄວາມ​ຕ້ອງການກຳລັງ​ຄົນ​ໃນ​ຕະຫຼາດ​ແຮງ​ງານ; ​ເພີ່ມ​ທະວີ​ແລະ​ຍົກ​ສູງ​ຄຸນ​ນະພາ​ບຂອງ​ວຽກ​ງານ​ຄົ້ນ​ຄວ້າ​ວາງ​ແຜນ​ກຳນົດ, ສ້າງ​ແຜນການ​​ເຄື່ອນ​ໄຫວ​ກ່ຽວ​ກັບ​ການ​ພັດທະນາ​ຊັບພະຍາກອນ​ມະນຸດ​ລະດັບ​ຊາດ, ຂະ​ແໜງ​ການ, ​ເຂດ​ແລະ​ທ້ອງ​ຖິ່ນ ​ໃຫ້​ສອດຄ່ອງ​ກັບ​ແຜນ​ກຳນົດ,​ແຜນການ​ພັດທະນາ​ເສດຖະກິດ-ສັງຄົມປະຈຳ​ປີ, 5 ປີ; ສືບ​ຕໍ່​ປັບປຸງ​ບູລະນະ​ລະບົບ​ຈັກ​ຄຸ້ມ​ຄອງ​ການ​ພັດທະນາ​ຊັບພະຍາກອນ​ມະ​ນຸດທີ່​ເປັນ​ເອກະ​ພາບ​ໃນອົງການ​ໜຶ່ງ ຕາມ​ທິດຫັນ​ເປັນ​ວິຊາ​ສະ​ເພາະ​ຊ່ຽວຊານ ມື​ອາຊີບ ​ແລະ ການ​ນຳ​ໃຊ້​ເຕັກ​ໂນ​ໂລ​ຊີ​ຂັ້ນ​ສູງ. ​ເຊີດ​ຊູ​ບົດບາດ ​ແລະ ປະສິດທິພາບ, ປະສິດທິ​ຜົນ​ຂອງສະພາ​ແຫ່ງ​ຊາດ​ເພື່ອ​ການ​ສຶກສາ​ແລະ​ພັດທະນາ​ມະນຸດ.

ທີ​ສອງ, ສ້າງ​ໂຄງການ​ໂດຍ​ລວມກ່ຽວ​ກັບ​ການພັດທະນາ​ມະນຸດ​ແຫ່ງ​ຊາດ ບົນ​ພື້ນຖານຂອງ​ການ​​ເຊື່ອມ​ໂຍງ​ບັນດາ​ໂຄງການ​ເປົ້າ​ໝາຍທີ່​ກ່ຽວຂ້ອງ​ກັບ​ການ​ພັດທະນາ​ຊັບພະຍາກອນ​ມະນຸດ​ໄລຍະ 2021 - 2030. ນັ້ນ​ແມ່ນ​ໂຄງການ​ເລືອກ​ເຟັ້ນ, ຫຼາຍ​ເປົ້າ​ໝາຍ ມຸ່ງ​​ໄປສູ່​ການ​ພັດທະນາຊັບພະຍາກອນ​ມະນຸດ​ຢ່າງຮອບດ້ານ, ​ແຕ່​ບຸລິມະສິດ​ສຸມ​ໃສ່​ເປົ້າ​ໝາຍພັດທະນາ​ຊັບພະຍາກອນ​ມະນຸດ​ຄຸນ​ນະພາ​ບສູງ ​ເພື່ອ​ຈະ​ມີ​ກົນ​ໄກ, ນະ​ໂຍບາຍ​ພິ​ເສດ ​ແລະ ​ເຕົ້າ​ໂຮມລວມສູນ​ແຫຼ່ງພະລັງ​ເພື່ອ​ປະຕິບັດ.

ທີ​ສາມ, ພັດທະນາ​ແລະ​ຍົກ​ສູງ​ຄຸນ​ນະພາ​ບການ​ເຄື່ອນ​ໄຫວ​ຂອງລະບົບການ​ໃຫ້​ບໍລິການ​ດ້ານ​ການ​ພັດທະນາ​ຊັບພະຍາກອນ​ມະນຸດ. ລະບົບ​ບໍລິການ​ນີ້ລວມມີ ການ​ບໍລິການ​ສາທາລະນະ​ໃນ​ຂົງ​ເຂດປັບປຸງ​ຍົກ​ສູງ​ກຳລັງ​ກາຍ, ສະຕິ​ປັນຍາ ​ແລະ ກຳລັງ​ຈິດ​ຂອງຄົນ, ຊັບພະຍາກອນ​ມະນຸດ​ຫວຽດນາມ ທີ່ພັດທະນາ​ໄປ​ຕາມ​ທິດ​ທາງ​ຂອງ​ຄວາມ​ຊ່ຽວຊານ​ເປັນ​ມື​ອາຊີບ ​ແລະ ​ເປັນ​ເຈົ້າ​ຕົນ​ເອງ.

ທີ​ສີ່, ຮັບປະກັນ​ແຫຼ່ງພະລັງ​ໃຫ້​ແກ່​ການ​ພັດທະນາ​ຊັບພະຍາກອນ​ມະນຸດ. ​ເພີ່ມ​ລະດັບ​ແລະ​ອັດຕາ​ການ​ລົງທຶນ​ໃຫ້​ແກ່​ການ​ພັດທະນາ​ຊັບພະຍາກອນ​ມະນຸດ ​ໃນລວມຍອດ​ການ​ລົງທຶນ​ສັງຄົມ; ຈັດ​ສັນ​ຄືນ​ໃໝ່ແຫຼ່ງ​ເງິນ​ງົບປະມານ​ຂອງ​ລັດທີ່​ລົງທຶນ​ປະຕິບັດ​ບັນດາ​ໜ້າ​ທີ່, ​ໂຄງການ, ​ແຜນ​ງານ​ການ​ຝຶກ​ອົບຮົມ ສຶກສາ​ວິຊາ​ຊີບ ຕາມ​ທິດ​ບຸລິມະສິດ​ການ​ລົງທຶນ​ໃຫ້​ແກ່​ການ​ພັດທະນາ​ຊັບພະຍາກອນ​ມະນຸດ​ຄຸນ​ນະພາ​ບສູງ ​ແລະ ປະຕິບັດ​ຄວາມ​ຍຸຕິ​ທຳ​ທາງ​ສັງຄົມ (ຊ່ວຍໜູນ​ການ​ຝຶກ​ອົບຮົມ, ພັດທະນາ​ກຳລັງ​ຄົນ​ຢູ່​ເຂດຫ່າງ​ໄກ​ສອກຫຼີກ, ​ບັນດາ​ເປົ້າ​ໝາຍ​ທີ່​ປັນ​ຄົນ​ຊົນ​ເຜົ່າ​ສ່ວນ​ນ້ອຍ, ​ເປົ້າ​ໝາຍ​ຂອງນະ​ໂຍບາຍ​ສັງຄົມ...).

- ປະຕິບັດ​ການມອບ​ສິດ​ໃຫ້​ບັນດາ​ພື້ນຖານ​ຝຶກ​ອົບຮົມ ສຶກສາ​ວິຊາ​ຊີບ​ພາກ​ລັດ ຕາມ​ທິດ​ໃຫ້​ບໍ​ລິການ​ສາທາລະນະ​ດ້ວຍ​ຕົນ​ເອ​ງ, ຮັບຜິດຊອບ​ດ້ວຍ​ຕົນ​ເອງ ​ແລະ ​​ຊຳລະ​ສະ​ສາງ​ດ້ວຍ​ຕົນ​ເອງ. ລັດມອບ​ອຳນາດ, ສັ່ງ​ຊື້​ຊຸດຝຶກ​ອົບຮົມສຶກສາ​ວິຊາ​ຊີບ ນຳ​ບັນດາ​ວິ​ສາ​ຫະກິດ, ຄູ່​ຮ່ວມ​ງານ​ສັງຄົມ ​ເພື່ອ​ຝຶກ​ອົບຮົມກຳລັງ​ຄົນ​ຄຸນ​ນະພາ​ບສູ​ງ ຕາມລາຄາ​ບໍລິການ​ໃກ້​ກັບ​ລາຄາ​ຕະຫຼາດ ຖືກ​ກຳນົດ​ໂດຍ​ລັດ.

- ​ເປີດ​ກວ້າງ​ການ​ຫັນ​ເປັນ​ສັງຄົມ ​ເພື່ອ​ເພີ່ມ​ທະວີ​ການ​ລະດົມ​ແຫຼ່ງທຶນ​ຕ່າງໆ ​ໃຫ້​ແກ່​ການ​ພັດທະນາຊັບພະຍາກອນ​ມະນຸດ​ຄຸນ​ນະພາ​ບສູງ, ​ໂດຍ​ສະ​ເພາະ​ແມ່ນ​ທຶນ​ຂອງ​ວິ​ສາ​ຫະກິດ, ທຶນ​ຂອງ​ຕ່າງປະ​ເທດ (FDI) ທີ່​ລົງທຶນ​ໂດຍ​ກົງ​ເຂົ້າ​ໃນ​ການ​ຝຶກ​ອົບຮົມ ສຶກສາ​​ວິຊາ​ຊີບ ສຳລັບຊັບພະຍາກອນ​ມະນຸດ​ຄຸນ​ນະພາ​ບສູງ ​ແລະ ບັນດາ​ຂົງ​ເຂດ, ຂະ​ແໜງ​ການ, ອາຊີບ ​ເຊິ່ງ​ໃນ​ປະ​ເທດບໍ່​ມີ​ຄວາມ​ສາມາດ​ໃນ​ການ​ຝຶກ​ອົບຮົມ; ນຳ​ໃຊ້​ຢ່າງ​ມີ​ປະສິດທິ​ຜົນ ບັນດາ​ແຫຼ່ງທຶນ​ຊ່ວຍ​ເຫຼືອ​ຢ່າງ​ເປັນ​ທາງ​ການ​ຂອງ​ຕ່າງປະ​ເທດ (ODA) ​ເພື່ອ​ຊ່ວຍ​ໜູນ​ການ​ພັດທະນາ​ຊັບພະຍາກອນ​ມະນຸດ; ລັດ​ມີກົນ​ໄກ, ນະ​ໂຍບາຍ​ເພື່ອ​ລະດົມ​ບັນດາແຫຼ່ງທຶນ​ຂອງ​ປະຊາຊົນ ​ເພື່ອ​ລົງທຶນ​ແລະ​ປະກອບສ່ວນ​ເຂົ້າ​ໃນ​ການ​ພັດທະນາ​ຊັບພະຍາກອນ​ມະນຸດ ດ້ວຍ​ບັນດາ​ຮູບ​ການ​ທີ່​ເໝາະ​ສົມ​ແລະ​ມີ​ປະສິດທິ​ຜົນ.

-  ​ເປີດ​ກວ້າງ​ບັນດາ​ຮູບ​ການ​ສິນ​ເຊື່ອ​ພິ​ເສດ ຈາກ​ທະນາຄານ​ນະ​ໂຍບາຍ​ສັງ​ຄົມ, ທະນາຄານ​ລົງທຶນ​ແລະ​ພັດທະນາ,... ​ໃຫ້​ພື້ນຖານ​ຝຶກ​ອົບຮົມ ສຶດສາ​ວິຊາ​ຊີບ ​ແລະ ​ໃຫ້​ນັກ​ສຶກສາ​ກູ້​ຢຶມ; ຊ່ວຍ​ເຫຼືອ​ຜູ້​ອອກ​ແຮງ​ງານ​ຮ່ຳຮຽນ, ບຳລູງສຶກສາ​ຍົກ​ສູງ​ລະດັບ​ຄວາມ​ສາມາດ.

ທີ​ຫ້າ, ​ເພີ່ມ​ທະວີ​ແລະ​ເປີ​ດກວ້າງ​ການ​ຮ່ວມ​ມື​ສາກົນ​ກ່ຽວ​ກັບ​ການພັດທະນາຊັບພະຍາກອນ​ມະນຸດ.

- ຕັ້ງໜ້າ​ແລະ​ມີ​ຄວາມ​ຮັບຜິດຊອບ​ໃນ​ການ​ປະຕິບັດ​ຄຳ​ໝັ້ນ​ສັນຍາ​ສາກົນ​ກ່ຽວ​ກັບການ​ພັດທະນາ​ຊັບພະຍາກອນ​ມະນຸດ; ​ເຂົ້າ​ຮ່ວມ​ຢ່າງ​ເປັນ​ເຈົ້າ​ການ​ພ້ອມກັບ​ປະຊາ​ຄົມ​ໂລກ​ແກ້​ໄຂ​ບັນດາ​ບັນຫາລະດັບ​ໂລກ​ແລະ​ພາກ​ພື້ນ​ກ່ຽວ​ກັບ​ການພັດທະນາຊັບພະຍາກອນ​ມະນຸດ.

- ​ເປັນ​ເຈົ້າ​ການ​ເຂົ້າ​ຮ່ວມ​ການ​ກໍ່ສ້າງ, ​ເຂົ້າ​ເຖິງ​ມາດຕະຖານ​ການ​ຝຶກ​ອົບຮົມ, ມາດຕະຖານ​ທັກ​ສະ​ອາຊີບ, ພ້ອມ​ທັງຕົກລົງ​ຮັບຮອງຊຶ່ງ​ກັນ​ແລະ​ກັນກ່ຽວ​ກັບ​ບັນດາ​ມາດຕະຖານ​ທັກ​ສະ​ອາຊີບລະດັບພາກ​ພື້ນ (ອາ​ຊຽນ) ​ແລະລະດັບ​ໂລກ.

- ​ເປີດ​ກວ້າງ​ການ​ຮ່ວມ​ມື​ສາກົນ​ກ່ຽວ​ກັບ​ການ​ພັດທະນາ​ບັນດາ​ພື້ນຖານ​ການ​ຝຶກ​ອົບຮົມ ສຶກສາ​ວິຊາ​ຊີບ ​ໃຫ້​ບັນລຸ​ລະດັບ​ໂລກ ​ແລະ ການ​ຝຶກ​ອົບຮົມ​ຖັນ​ແຖວ​ຜູ້​ຊ່ຽວຊານຊັ້ນ​ນຳ, ຊັບພະຍາກອນ​ມະນຸດ​ທີ່​ມີ​ຄຸນ​ວຸດ​ທິ​ສູງ ​ໃຫ້​ບັນດາ​ຂະ​ແໜງ​ການ​ປາຍ​​ແຫຼມ ​ແລະ ​ເຂດ​ເສດຖະກິດ​ຈຸດ​ໜັກ.

- ຍາດ​ແຍ່ງ​ເອົາ​ການ​ຊ່ວຍ​ເຫຼື​ອສາກົນ​ກ່ຽວ​ກັບ​ເຕັກນິກ, ການ​ຝຶກ​ອົບຮົມ​ພະນັກງານ ​ແລະ ການ​ເງິນ,... ​ແນ​ໃສ່​ເພີ່ມ​ແຫຼ່ງພະລັງ​ຕື່ມ​ອີກ​ ເພື່ອ​ລົງທຶນ​ເຂົ້າ​ໃນ​ການພັດທະນາຊັບພະຍາກອນ​ມະນຸດ./.

--------------------

(1) ສະຫະ​ກົມ​ສະຖິຕິ​ປີ 2018.

ຫງວຽນ​ຫຶ​ວຢຸ້ງ

ປອ, ອະດີດ​ຜູ້ອຳນວຍການ​ສະ​ຖາ​ບັນວິທະຍາສາດ​ແຮງ​ງານ - ສັງຄົມ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ