ວັນຈັນ, 18/11/2019
ເປັນເຈົ້າການໃນການກໍ່ສ້າງຍຸດທະສາດ ເພື່ອປົກປ້ອງການຜະລິດພາຍໃນປະເທດ ໃຫ້ສອດຄ່ອງກັບຄຳໝັ້ນສັນຍາສາກົນ
27/10/2019 10:3' ສົ່ງ ພິມ
ພິທີເຊັນສັນຍາການຄ້າເສລີ (EVFTA) ແລະ ສັນຍາປົກປ້ອງການລົງທຶນ (EVIPA) ລະຫວ່າງຫວຽດນາມ ແລະ ສະຫະພາບເອີຣົບ ວັນທີ 30 ມິຖຸນາ 2019. (ພາບ: VGP)

ເອ​ກະ​ສານກອງ​ປະ​ຊຸມ​ໃຫຍ່​ຜູ້​ແທນ​ທົ່​ວ​ປະ​ເທດ​ຄັ້ງ​ທີ XII ຂອງ​ພັກ​ກອມ​ມູນິດ​ຫວຽດນາມ ​ໄດ້​ລະບຸ: ສວຍ​ໃຊ້​ສຸດຂີດ​ ບັນ​ດາ​ເງື່ອນ​ໄຂ​ທີ່​ສະ​ດວກ​ຂອງ​ບັນ​ດາ​ສັນ​ຍາ​ແລະຂໍ້​ຕົກ​ລົງ​ການ​ຄ້າ​ ເພື່ອ​ຊຸກ​ຍູ້​ການ​ສົ່ງ​ອອກ; ພ້ອມ​ທັງ​ມີ​ມາດ​ຕະ​ການ​ປ້ອງ​ກັນ​ຕົວທີ່​ເໝາະ​ສົມ​ ເພື່ອ​ປົກ​ປັກ​ຮັກ​ສາ​ການ​ຜະ​ລິດ ແລະ ຜົນ​ປະ​ໂຫຍດ​ຂອງ​ຜູ້​ບໍ​ລິ​ໂພກ. ໃນ​ສະ​ພາບ​ການ​ຜັນ​ແປ​ຢ່າງ​ສັບ​ສົນ​ຂອງ​ເສດ​ຖະ​ກິດ​ພາກ​ພື້ນແລະໂລກ, ນະ​ໂຍ​ບາຍ​​ປົກ​ປ້ອງ​ການ​ຄ້າ​ຂອງ​ບັນດາປະ​ເທດ​ໃຫຍ່​ໃນ​ໂລກ​ທີ່​ກຳ​ລັງ​ເພີ່​ມຂຶ້ນ ແລະ ຄວາມຂັດ​ແຍ່ງ​ທາງການ​ຄ້າລະຫວ່າງອາ​ເມລິ​ກາ​ແລະ​ຈີ​ນໄດ້​ແກ່​ຍາວ, ດັ່ງ​ນັ້ນ ກ​ານກໍ່​ສ້າງ, ປົກ​ປ້ອງ ແລະ ພັດ​ທະ​ນາ​ຄວາມ​ສາ​ມາດ​ການ​ຜະ​ລິດ​ຢູ່​ພາຍ​ໃນ​ປະ​ເທດ​ ຈຶ່ງ​ກາຍ​ເປັນ​ຄວາມ​ຮຽກ​ຮ້ອງ​ຕ້ອງ​ການ​ອັນ​ຮີບ​ດ່ວນ​ ​ເພື່ອແນໃສ່​ປະ​ຕິ​ບັດເປົ້າ​ໝາຍ​ເຮັດ​ໃຫ້​ເສດ​ຖະ​ກິດ​ມະ​ຫາ​ພາກມີ​ຄວາມ​ໝັ້ນ​ຄົງ, ຮັກ​ສາການ​ເຕີບ​ໂຕ​ແບບ​ຍືນ​ຍົງ ແລະ ຮັບ​ປະ​ກັນສະ​ຖຽມ​ລະ​ພາບ​ທາງ​ສັງ​ຄົມ.

​​ໂດຍເປັນ​ສະ​ມາ​ຊິກ​ຂອງ​ອົງ​ການ​ການ​ຄ້າ​ໂລກ (WTO), ຄຽງ​ຄູ່​ກັບ​ການ​ເຄື່ອນ​ໄຫວ​ຕາມ​ທ່າ​ອຽງ​ຫັນ​ເປັນ​ການ​ຄ້າ​ເສ​ລີ, ຫວຽດ​ນາມຮູ້​ດີ​ເຖິງ​ຄວາມ​ຈຳ​ເປັນ​ຂອງ​ບັນ​ດາ​ເຄື່ອງ​ມື​ປ້ອງ​ກັນ​ການ​ຄ້າ, ລວມ​ທັງ​ການຕໍ່​ຕ້ານ​ການ​ຂາຍ​ບຸບ​ລາ​ຄາ, ​ຕໍ່ຕ້ານ​ການ​ອຸດ​ໜູນ ແລະ ການປ້ອງ​ກັນ​ການ​ຜະ​ລິດ​ພາຍ​ໃນ​ປະ​ເທດ ​ທັງ​ໃນ​ຕະຫຼາດ​ພາຍ​ໃນ​ປະ​ເທດ ແລະຕະຫຼາດ​ສົ່ງ​ອອກ.

ສຳ​ລັບ​ສິນ​ຄ້າ​ພາຍ​ໃນ​ປະ​ເທດ, ດ້ວຍ​ລະ​ດັບ​ຫຼຸດ​ພາ​ສີ​ອາ​ກອນ​ທັງ​ໝົດ​ເປັນ 0% ຕາມສັນ​ຍາ​ການ​ຄ້າ​ເສ​ລີ 13 ສະ​ບັບນັ້ນ ​ໄດ້​ເຮັດ​ໃຫ້ຫວຽດ​ນາມກາຍ​ເປັນ​ໜຶ່ງ​ໃນ​ບັນ​ດາ​ພື້ນ​ຖານ​ເສດ​ຖະ​ກິດ​ທີ່​ມີ​ລະດັບເປີດ​ປະ​ຕູສູງ​ທີ່​ສຸດ​​ໃນ​ໂລກ. ແຕ່​ວ່າ, ​ຄຽງ​ຄູ່​ກັບ​ຄວາມ​ສະ​ດວກ​ຂອງ​ບັນ​ດາ​ສັນ​ຍາ​ດັ່ງ​ກ່າວ ​ໃນ​ເມື່ອ​ໝູນ​ໃຊ້​ທ່າ​ແຮງ​ປຽບ​ທຽບ​ເພື່ອ​ເພີ່ມ​​ປະ​ສິດ​ທິ​ຜົນ​ຂອງ​ການ​ຜະ​ລິດນັ້ນ, ຫວຽດ​ນາມກໍ່​ປະ​ເຊີນກັບ​ສິ່ງ​ທ້າ​ທາຍຫຼາຍ​ຢ່າງ​ໃນ​ການ​ປະ​ຕິ​ບັດ​ເປົ້າ​ໝາຍການ​ພັດ​ທະ​ນາ​ແບບ​ຍືນ​ຍົງ. ທີ​ໜຶ່ງ, ຂະ​ບວນການ​ເປີດ​ປະ​ຕູກັບ​ບັນ​ດາ​ຄູ່​ຮ່ວມ​ມື​ການ​ຄ້າ​ໃຫຍ່​, ເຖິງວ່າຈະ​ເປັນ​ໄປຕາມ​ກຳນົດ​ເວລາ ກໍ່ອາດຈະ​ເຮັດ​ໃຫ້​ຂະ​ແໜງ​ການ​ຜະ​ລິດ​ພາຍ​ໃນ​ປ​ະ​ເທດ​ຈຳ​ນວນ​ໜຶ່ງ​ ບໍ່ປັບ​ຕົວ​ທັນກັບ​ການ​ແຂ່ງ​ຂັນ​ທີ່​ສັບ​ສົນ ຊ້ຳ​ຍັງ​​ເປັນ​ການ​ແຂ່ງຂັນ​ທີ່​ບໍ່​ທຽງທຳ (ຄື​ການ​ຂາຍ​ບຸບ​ລາ​ຄາ, ການຮັບ​ການ​ອຸດ​ໜູນ) ຂອງ​ສິນ​ຄ້າ​ທີ່​ນຳ​ເຂົ້າ​ຈາກ​ຕ່າງ​ປະ​ເທດ. ທີ​ສອງ, ສິນ​ຄ້າ​ສົ່ງ​ອອກ​ຂອງຫວຽດ​ນາມກໍ່​ຖືກ​ປະ​ເທດ​ຕ່າງໆນຳ​ໃຊ້​ມາດ​ຕະ​ການປ້ອງ​ກັນ​ການ​ຄ້າ​​ດ້ວຍ​ຄວາມ​ຖີ່​ສູງ. ການ​ຟ້ອງ​ຮ້ອງ​ເຫຼົ່ານີ້​ບໍ່​ພຽງ​ແຕ່​ເກີດ​ຂຶ້ນ​ຕໍ່​ສິນ​ຄ້າ​ທີ່​ມີ​ທ່າ​ແຮງ​ໃນ​ການ​ສົ່ງ​ອອກ​ເທົ່າ​ນັ້ນ ຫາກ​ຍັງ​​ເກີດ​ຂຶ້ນ​ຕໍ່​ສິນ​ຄ້າ​ທີ່​ມີ​ມູນ​ຄ່າ​ການ​ສົ່ງອອກຕ່ຳອີກ​ນຳ. ​ເລື່ອງ​ນີ້​ອາດ​ຈະ​​ເປັນ​ຜົນຮ້າຍ​ໂດຍ​ກົງ​ເຖິງ​ບັນ​ດາ​ຂະ​ແໜງ​ການ​ຜະ​ລິດ, ສົ່ງ​ອອກ ແລະ ວາງພາ​ລະອັນໜັກໜ່ວງ​ທາງ​ເສດ​ຖະ​ກິດ-ສັງ​ຄົມ​ໂດຍ​ທາງອ​ອ້ມ.

ກົດ​ໝາຍ​ວ່າ​ດ້ວຍ​ການ​ປ້ອງ​ກັນ​ການ​ຄ້າ​ຂອງຫວຽດ​ນາມ​ໄດ້​ຖືກ​ສ້າງ​ຂຶ້ນ​ເມື່ອ 15 ປີ​ກ່ອນ, ກ່ອນ​ເວ​ລາ​ທີ່ຫວຽດ​ນາມເຂົ້າ​ຮ່ວມອົງ​ການ​ການ​ຄ້າ​ໂລກ​ຢ່າງ​ເປັນ​ທາງ​ການ. ແຕ່​ວ່າ, ພຽງ​ແຕ່​ໃນ​ 5 ປີທີ່​ຜ່ານ​ມາ​ເທົ່າ​ນັ້ນ ຫວຽດ​ນາມ​ຈຶ່ງ​ເປັນ​ເຈົ້າ​ການ​ໃນ​ການ​ນຳ​ໃຊ້​ເຄື່ອງ​ມື​ທາງກົດ​ໝາຍ ທີ່ອົງ​ການ​ການ​ຄ້າ​ໂລກ ແລະ ສັນ​ຍາ​ການ​ຄ້າ​ເສ​ລີ​ອາ​ນຸ​ຍາດ. ມາ​ຮອດ​ປະ​ຈຸ​ບັນ, ຈຳ​ນວນ​ມາດ​ຕະ​ການ​ປ້ອງ​ກັນ​ຄ້າ​ທີ່ຫວຽດ​ນາມໃຊ້​ເພື່ອ​ປ້ອງ​ກັນ​ຂະ​ແໜງ​ການ​ຜະ​ລິດ​ພາຍ​ໃນ​ປະ​ເທດ ​ແມ່ນ​ໜ້ອຍຫຼາຍ​ເມື່ອ​ທຽບ​ກັບ​ກໍລະນີ​ສິນ​ຄ້າ​ສົ່ງ​ອອກ​ຖືກ​​ຟ້ອງ​ຮ້ອງ. ລະ​ອຽດຄື, ຫວຽດ​ນາມ​ໄດ້​​ສືບສວນ​ແລະ​ນຳ​ໃຊ້ 10 ມາດ​ຕະ​ການ​ປ້ອງ​ກັນການ​ຄ້າ (5 ກໍລະນີ, ຄະດີ​ການ​ຕ້ານການ​ຂາຍ​ບຸບ​ລາ​ຄາ ​ແລະ 5 ກໍລະນີ, ຄະດີ​ການ​ປ້ອງ​ກັນ​​​ການ​ຄ້າ). ​ໃນ​​ທິດ​ກົງ​ກັນ​ຂ້າມ, ສິນ​ຄ້າ​ສົ່ງ​ອອກຂອງ​ຫວຽດນາມ​ໄດ້ແລ​ະກຳ​ລັງ “​ເບັ່ງ​ຕົວ” ຍອມຮັບເອົາ 160 ກວ່າ​ມາດ​ຕະ​ການ​ປ້ອງ​ກັນ​ການ​ຄ້າຂອງ​ຕ່າງປະ​ເທດ,  ໃນ​ນັ້​ນ 100 ​ມາດ​ຕະ​ການ​ຕໍ່ຕ້ານ​ການ​ຂາຍ​ບຸບ​ລາ​ຄາ, 20 ມາດ​ຕະ​ການ​ຕໍ່​ຕ້ານການ​ຮັບ​ເງິນ​ອຸດ​ໜູນ, 15 ມາດ​ຕະ​ການ​ຕໍ່​ຕ້ານການ​ຫຼົບຫຼີກ​ພາ​ສີອາ​ກອນ ແລະ 30 ມາດ​ຕະ​ການ​ປ້ອງ​ກັນ​ການ​ຄ້າ. ລະ​ດັບ​ໝູນ​ໃຊ້ມາດ​ຕະ​ການ​ປ້ອງ​ກັນການ​ຄ້າ​​ຕໍ່​ສິນ​ຄ້າ​ນຳ​ເຂົ້າ​ ກໍ່​ຍັງ​ຕ່ຳ​​ເມື່ອທຽບ​ກັບ​ລະ​ດັບ​ພາ​ສີ​ອາ​ກອນ​ສູງ​ທີ່​ສຸດ​ໂດຍປະ​ເທດ​ຕ່າງໆໝູນ​ໃຊ້​ຕໍ່​ສິນ​ຄ້າ​ສົ່ງ​ອອກຂອງຫວຽດ​ນາມ​, ດ້ານ​ໜຶ່ງ, ຢືນ​ຢັນ​ແຜນ​ນະ​ໂຍ​ບາຍ​ເປັ​ນ​ເຈົ້າ​ການ​​ເປີດ​ປະ​ຕູ, ເຊື່ອມ​ໂຍງ​ເສດ​ຖະ​ກິດ​ສາ​ກົນ​ຂອງ​ຫວຽດ​ນາມ; ດ້ານ​ອື່ນ, ​ວາງ​ຄວາມ​ຮຽກ​ຮ້ອງ​ຕ້ອງການເປັນ​ເຈົ້າ​ການ, ຕັ້ງ​ໜ້າກວ່າ​ອີກ ​ເພື່ອ​ຮັບ​ປະ​ກັນ​ສະ​ພາບ​ແວດ​ລ້ອມ​ການ​ແຂ່ງ​ຂັນ​ແບບ​ສະ​ເໝີ​ພາບ, ສ້າງ​ເງື່ອນ​ໄຂອຳນວຍ​ຄວາມສະ​ດວກ​ໃຫ້​ບັນ​ດາ​ຂະ​ແໜງ​ການ​ຜະ​ລິດ​ພາຍ​ໃນ​ປ​ະ​ເທດ​ພັດ​ທະ​ນາ.

ຕາມ​ທິດດັ່ງກ່າວ, ໃນ 3 ປີຜ່ານ​ມາ​ມໍ່​ນີ້, ພັກ, ລັດ, ກະ​ຊວງ​ອຸດ​ສາ​ຫະ​ກຳແລະການ​ຄ້າ ແລະ ກະ​ຊວງ, ຂະ​ແໜງ​ການທີ່​ກ່ຽ​ວ​ຂ້ອງ​ຕ່າງໆ​ ​ໄດ້​ມີ​ແຜນ​ນະ​ໂຍ​ບາຍ, ນະ​ໂຍ​ບາຍ ແລະ ມາດ​ຕະ​ການ​ເປັນ​ເຈົ້າ​ການ​ຈຳ​ນວນຫຼາຍ ​ເພື່ອ​ແນ​ໃສ່​ປ້ອງ​ກັນ​ບັນ​ດາ​ຂະ​ແໜງ​ການ​ຜະ​ລິດ​ພາຍ​ໃນ​ປະ​ເທດ​ໃຫ້​ສອດ​ຄ່ອງ​ກັບ​ຄຳ​ໝັ້ນ​ສັນ​ຍາ​ສາ​ກົນ:

ທີ​ໜຶ່ງ, ປັບປຸງ​ບູ​ລະ​ນະ​ພື້ນ​ຖານກົດໝາຍ ​ແລະ ​ສະ​ຖາ​ບັນ​​ໃນ​ການ​ປ້ອງ​ກັນການ​ຄ້າ.

ຮັບ​ຮູ້​ຄວາມ​ສຳ​ຄັນ​ຂອງ​ກົດ​ໝາຍ​ວ່າ​ດ້ວຍ​ການ​ປ້ອງ​ກັນ​​ການ​ຄ້າ​, ວັນ​ທີ 12 ມິຖຸ​ນາ 2017 ສະ​ພາ​ແຫ່ງ​ຊາດ​ຊຸດ​ທີ 14 ໄດ້​ຮັບ​ຮອງ​ເອົາ​ໂຄງ​ການ​ກົດ​ໝາຍ​ວ່າ​ດ້ວຍ​ການ​ຄຸ້ມ​ຄອງ​ການ​ຄ້າ​ຕ່າງ​ປະ​ເທດ, ໃນ​ນັ້ນ​ມີພາກ​ສະ​ເພາະ​ກ່ຽວ​ກັບ​ການ​ປ້ອງ​ກັນ​ການ​ຄ້າ, ປ່ຽນ​ແທນ​​ໃຫ້ລັດ​ຖະ​ດຳ​ລັດ​ສະ​ບັບ​ເກົ່າ. ໃນ​ວັນ​ທີ 15 ມັງ​ກອນ 2018 ລັດ​ຖະ​ບານ​ໄດ້​ປະ​ກາດ​ໃຊ້ ດຳ​ລັດ​ເລກ​ທີ 10/2018/NĐ-CP “ກຳ​ນົດ​ລະ​ອຽດ​ບາງ​ມາດ​ຕາ​ຂອງ​ກົດ​ໝາຍ​ວ່າ​ດ້ວຍ​ການ​ຄຸ້ມ​ຄອງ​ການ​ຄ້າ​ຕ່າງ​ປະ​ເທດ ກ່ຽວ​ກັບ​ມາດ​ຕະ​ການ​ປ້ອງ​ກັນ​ການ​ຄ້າ​ຕ່າງໆ”. ວັນ​ທີ 20 ເມ​ສາ 2018 ລັດ​ຖະ​ມົນ​ຕີກະ​ຊວງ​ອຸດ​ສາ​ຫະ​ກຳແລະການ​ຄ້າ ໄດ້​ປະ​ກາດ​ໃຊ້ ຈົດ​ໝາຍ​ວຽນ​ເລກ​ທີ 06/2018/TT-BCT ວ່າ​ດ້ວຍ “ກຳ​ນົດ​ຢ່າງ​ລະ​ອຽດ ບາງ​ເນື້ອ​ໃນ​ກ່ຽວ​ກັບ​ມາດ​ຕະ​ການ​ປ້ອງ​ກັນ​ການ​ຄ້າ”. ເອ​ກະ​ສານກົດ​ໝາຍ 3 ສະ​ບັບ​ນີ້​ໂດຍ​ພື້ນ​ຖານ​ໄດ້​ສ້າງເປັນ​ຂອບ​ກົດ​ໝາຍ​ອັນ​ຄົບ​ຖ້ວນ, ສອດ​ຄ່ອງ​ກັບ​ຄຳ​ໝັ້ນ​ສັນ​ຍາ​ສາ​ກົດ ແລະ ພາ​ກ​ຕົວ​ຈິງ​ຂອງຫວຽດ​ນາມ ເພື່ອ​ປະ​ຕິ​ບັດ​ການ​ປ້ອງ​ກັນ​​ການ​ຄ້າ​ໃຫ້​ມີ​ປະ​ສິດ​ທິ​ຜົນ​ກວ່າ​ອີກ.

ທາງ​ດ້ານການ​ຈັດ​ຕັ້ງ, ລັດ​ຖະ​ບານ​ໄດ້​ມີ​ຄວາມ​ຮັບ​ຮູ້​ວ່າ​ ​ມີ​ຄວາມ​ຈຳ​ເປັນຕ້ອງ​ສ້າງ​ຕັ້ງ​ອົງ​ການ​ຄຸ້ມ​ຄອງ​ລັດກ່ຽວ​ກັບ​ການ​ປ້ອງ​ກັນ​​ຄ້າອົງການ​ໜຶ່ງຂຶ້ນ ເພື່ອ​ຊຸກ​ຍູ້​ແຜນ​ນະ​ໂຍ​ບາຍ​ປົກ​ປ້ອງ​ການ​ຜະ​ລິດ​ພາຍ​ໃນປະ​ເທດ​ທີ່​ສອດຄ່ອງ​ກັບ​ຄຳ​ໝັ້ນ​ສັນ​ຍາ​ສາ​ກົນ, ດັ່ງ​ນັ້ນ ດຳ​ລັດ​ສະ​ບັບ​ເລ​ກ​ທີ 98/2017/NĐ-CP ວ່າ​ດ້ວຍ​ພາ​ລະ, ໜ້າ​ທີ່, ສິດ ແລະ ໂຄງ​ສ້າງ​ການ​ຈັດ​ຕັ້ງ​ຂອງ ກະ​ຊວງ​ອຸດ​ສາ​ຫະ​ກຳແລະການ​ຄ້າ ​ໄດ້​ກຳ​ນົດ​ສ້າງ​ຕັ້ງກົມ​ປ້ອງ​ກັນ​​ການ​ຄ້າ. ​ແລວ​ທາງ​ກົດ​ໝາຍ​​ແລະ​ສະ​ຖາ​ບັນ​ໃໝ່​​ອາ​ນຸ​ຍາດ​ໃຫ້ມີ​ຄວາມ​ເປັນ​ເຈົ້າ​ການ​ໃນ​ການ​ປະ​ຕິ​ບັດ​ແຜນນະ​ໂຍ​ບາຍ, ນະ​ໂຍ​ບາຍ​ກ່ຽວ​ກັບ​ການ​ປ້ອງ​ກັນ​​ການ​ຄ້າ, ພ້ອມກັນ​ນັ້ນ ​ເຂົ້າ​ໃກ້​ຈິດ​ໃຈ​​ຂອງສົນ​ທິ​ສັນ​ຍາສາ​ກົນ​ ທີ່ຫວຽດ​ນາມ​ເປັນ​ສະ​ມາ​ຊິກ ແລະ ຄວາມ​ເປັນ​ຈິງ​ແຫ່ງ​ການ​ປ້ອງ​ກັນ​ການ​ຄ້າ​ຢູ່​ໃນ​ໂລກ, ສ້າງ​ເງື່ອນ​ໄຂ​ເພື່ອກໍ່​ສ້າງ​ບັນ​ດາ​ໂຄງ​ການ​ປະ​ຕິ​ບັດງານ​ທີ່​ລະ​ອຽດ, ຕໍ່​ເນື່ອງ ແລະ ເປັນ​ເອ​ກະ​ພາບ​ໃນ​ບັນ​ດາ​ໄລ​ຍະ​ສັ້​ນ, ໄລ​ຍະ​ກາງ ແລະ ໄລ​ຍະ​ຍາ​ວ.

ທີ​ສອງ, ເພີ່ມ​ທະ​ວີ​ວຽກ​ງານການປະຕິບັດ

ໂດຍ​ປະ​ຕິ​ບັດ​ຄຳ​ໝັ້​ນ​ສັນ​ຍາ​ພາຍ​ໃຕ້​ສັນ​ຍາ​ການ​ຄ້າ​ເສ​ລີທີ່​ໄດ້​ລົງ​ນາມ​ແລ້ວ, ມາ​ຮ​ອດ​ປະ​ຈຸ​ບັນ ຫວຽດ​ນາມໄດ້​ເປີດຕະຫຼາດ ແລະ ຫຼຸດຜ່ອນ​ພາ​ສີ​ນຳ​ເຂົ້າສິນ​ຄ້າຫຼາຍ​ປະ​ເພດ​ຈາກ​ຄູ່​ຮ່ວມ​ມື​ການ​ຄ້າ​ທີ່​ສຳ​ຄັນ. ສິ່ງ​​ນີ້​​ເຮັດ​ໃຫ້​​ວິ​ສາ​ຫະ​ກິດ​ແລະຂະ​ແໜງ​ສິນ​ຄ້າ​ຂອງຫວຽດ​ນາມ ​ປະ​ເຊີນ​ກັບ​ການ​ແຂ່ງ​ຂັນທີ່​ຮຸນ​ແຮງຈາກ​ສິນ​ຄ້າ​ນຳ​ເຂົ້າ, ພິ​ເສດ​ແມ່ນ​ຈາກ​ບັນ​ດາ​ປະ​ເທດ​ໃນ​ພາກ​ພື້ນ. ​ເຖິງ​ທ້າຍ​ປີ 2015, ຫວຽດ​ນາມຫາ​ກໍ່​ນຳ​ໃຊ້​ພຽງ 2 ມາດ​ຕະ​ການ​ປ້ອງ​ກັນ​ການ​ຄ້າສຳລັບ​ນ້ຳ​​ນັນ​ຄົວ​ກິນ ແລະ ສະ​ແຕນ​ເລດ. ແຕ່​ວ່າ, ໃນ​ໄລ​ຍະ​ແຕ່​ປີ 2016 ມາ​ຮອດ​ປະ​ຈຸ​ບັນ, ກະ​ຊວງ​ອຸດ​ສາ​ຫະ​ກຳ​ແລະການ​ຄ້າ​ໄດ້​ນຳ​ໃຊ້ 6 ມາດ​ຕະ​ການ​ປ້ອງ​ກັນ​​ການ​ຄ້າ​ ເພື່ອ​ປົກ​ປ້ອງການ​ຜ​ະ​ລິດ​ພາຍ​ໃນ​ປະ​ເທດ​ສຳ​ລັບ ຟຸ່ນ DAP, ແ​ປ້ງ​ນົວ, ບັນ​ດາ​ຜະ​ລິດ​ຕະ​ພັນ​ເຫຼັກ​ແລະເຫຼັກ​ກ້າ​ເຊັ່ນ ​ເຫຼັກ​​ວັດຖຸ​ດິບ, ເຫຼັກ​​ແທ່ງ​ຍາວ, ເຫຼັກ​ຊຸບ, ເຫຼັກ​ຮູບ ແລະ ​ເຫຼັກ​ແຜ່ນສັງ​ກະ​ສີ​. ປະ​ຈຸ​ບັນ, ກະ​ຊວງ​ອຸດ​ສາ​ຫະ​ກຳແລະການ​ຄ້າ​​ກຳ​ລັງ​ດຳ​ເນີນ​ການ​ສືບ​ສວນ​ຄະ​ດີ, ກໍ​ລະ​ນີອື່ນ​ອີກ 5 ລາຍ ​ສຳ​ລັບ​ຜະ​ລິດ​ຕະ​ພັນຕ່າງໆ​ເຊັ່ນ ອາ​ລູ​ມີ​ນຽນ​ແທ່ງ​ສຳ​ເລັດ​ຮູບ, ໄມ້​ແຜ່ນ​ອຸດ​ສາ​ຫະ​ກຳ, ແຜ່ນ BOPP, ເຫຼັກ​​ເຄືອບ​ສີ, ເຫຼັກ​​ແຜ່ນ​ຮີດ​ເຢັນ, ພ້ອມ​ທັງ​ສືບ​ຕໍ່​ຕິດ​ຕາມ​ຢ່າງ​​ໃກ້ຊິດ​ ເພື່ອ​ຊ່ວຍ​ເຫຼືອ​ໃຫ້​ວິ​ສາ​ຫະ​ກິດ​ຜະ​ລິດ​ພາຍ​ໃນ​ປະ​ເທດ​ຜັນ​ຂະ​ຫຍາຍ​ບັນ​ດາ​ມາດ​ຕະ​ການ​ປ້ອງ​ກັນ​​ການຄ້າ​ຢ່າງ​ທັນ​ເວ​ລາ ​ເພື່ອ​ປົກ​ປັກ​ຮັກ​ສາ​ບັນ​ດາ​ຂະ​ແໜງ​ການ​ຜະ​ລິດ​ພາຍ​ໃນ​ປະ​ເທດ​ຢ່າງຖືກຕ້ອງ​ເໝາະ​ສົມ.

ບັນ​ດາ​ມາດ​ຕະ​ການ​ປ້ອງ​ກັນການ​ຄ້າທີ່​ໄດ້ແລະກຳ​ລັງຖືກ​ນຳ​ໃຊ້​ນັ້ນ ​ໄດ້​ປະ​ກອບ​ສ່ວນ​ເຂົ້າ​ໃນ​ການ​ຮັກ​ສາ​ວຽກ​ເຮັດ​ງານ​ທຳ​ຂອງຜູ້​ອອກ​ແຮງ​ງານ 100.000 ກວ່າ​ຄົນ ​ໃນ​ບັນ​ດາ​ຂົງ​ເຂດ​ຂ້າງ​ເທິງ, ຊຸກຍູ້​ການ​ຜະ​ລິດ​ພາຍ​ໃນ​ໃຫ້​ພັດ​ທະ​ນາ ແລະ ຊ່ວຍ​ຄວາມ​ສົມ​ດຸນ​ຂອງການ​ຊຳ​ລະ​ເງິນ​ລະຫວ່າງ​ປະ​ເທດ. ຕາມການ​ຄິດໄລ່, ບັນ​ດາ​ຂ​ະ​ແໜງ​ການ​ຜະ​ລິດ​ທີ່​ໄດ້​ຮັບການປົກ​ປ້ອງ​ດ້ວຍມາດ​ຕະ​ການ​ປ້ອງ​ກັນ​ການ​ຄ້າ ​ໄດ້​ປະ​ກອບ​ສ່ວນ​ປະ​ທານ 6,3% ຂອງລວມຍອດ​ຜະ​ລິດ​ຕະ​ພັນ​ພາຍ​ໃນ​ປະ​ເທດ (GDP). ດ້ວຍ​ການ​ເພີ່ມ​​ພາ​ສີ​ນຳ​ເຂົ້າ, ບັນ​ດາ​ມາດ​ຕະ​ການ​ປ້ອງ​ກັນ​​ການ​ຄ້າ​ທີ່ໄດ້​ນຳ​ໃຊ້​ກໍ່​ໄດ້​ປະ​ກອບ​ສ່ວນ​ເຂົ້າ​ໃນ​ການ​ເພີ່ມ​​ແຫຼ່ງ​ລາຍ​ຮັບ​ໃຫ້​ງົບ​ປະ​ມານ​ແຫ່ງ​ລັດ ​​ໂດ​ຍມີ​ລາຍ​ໄດ້ຈາກ​ພາ​ສີ​ປະມານພັນຕື້​ດົ່ງຫວຽດ​ນາມ. ​ຜ່ານ​ການ​ຕິດ​ຕາມ​ຜົນ​ກະ​ທົບ​ຂອງ​ບັນ​ດາ​ມາດ​ຕະ​ການ​ປ້ອງ​ກັນ​ການ​ຄ້າ, ກະ​ຊວງ​ອຸດ​ສາ​ຫະ​ກຳແລະການ​ຄ້າໄດ້​ຮັບ​ຮູ້​ວ່າ ການ​ເຕີບ​ໂຕຂອງ​ການ​ນຳ​ເຂົ້າ​​ຜະ​ລິດ​ຕະ​ພັນ​ເຫຼົ່າ​ນີ້​ໄດ້ຫຼຸດ​ລົງ​ຫຼາຍພໍ​​ຄວນ. ຕົວ​ຢ່າງ, ກ່ອນໜ້ານີ້ ​ຈຳ​ນວນຜະລິດ​ຕະພັນ​ແຜ່ນ​ສັງ​ກະ​ສີ​​ທີ່​ນຳ​ເຂົ້າ​ໃນ​​ປີຕໍ່​ມາໄດ້​ເພີ່ນ​ຂຶ້ນທົບ​ສອງ​ເທົ່າ​ທຽບ​​ໃສ່​ປີກ່ອນ, ພາຍຫຼັງ​ທີ່​ໄດ້​ນຳ​ໃຊ້​ມາດ​ຕະ​ການ​ຕໍ່​ຕ້ານ​ການ​ຂາຍ​ບຸບ​ລາ​ຄາ, ປະລິມານ​ການ​ນຳ​ເຂົ້າ​ສິນ​ຄ້ານີ້​ຫຼຸດ​ລົງຢ່າງ​ຫຼວງ​ຫຼາຍ​. ດ້ວຍ​ເຄື່ອງ​ມື​ປ້ອງ​ກັນ​​ການ​ຄ້າ, ວິ​ສາ​ຫະ​ກິດ​ຈຳ​ນວນຫຼາຍຂອງ​ຂະ​ແໜງ​​ເສດ​ຖະ​ກິດຕ່າງໆ​​ ໄດ້​ປັບປຸງ​ການ​ຜະ​ລິດທຸ​ລະ​ກິດ​ໃຫ້​ດີ​ຂຶ້ນ​ຫຼາຍ, ພົ້ນ​​ຈາກສະພາບ​ຂາດ​ທຶນ ແລະ ຄ່ອຍໆ​ເຮັດ​ໃຫ້ການ​ຜະ​ລິດມີ​ສະຖຽນ​ລະ​ພາບ​ ເຊັ່ນ ບໍ​ລິ​ສັດ​ຝຸ່ນ DAP ຫາຍ​ຟ່ອງ, ບໍ​ລິ​ສັດເຫຼັກຫວຽດ-ຈີນ, ບໍ​ລິ​ສັດ​ເຫຼັກຫວຽດນາມອີຕາ​ລີ, ບໍ​ລິ​ສັດ​ເຫຼັກ Pomina...

ບັນ​ດາ​ມາດ​ຕະ​ການ​ປ້ອງ​ກັນ​ການ​ຄ້າກໍ່​ປະ​ກອບ​ສ່ວນ​ຮັກສາ​ສະຖຽນ​ລະ​ພາບ​ຂອງລາ​ຄາຂາ​ເຂົ້າ​ສຳລັບ​ຂະ​ແໜງ​ການ​ຜະ​ລິດພາຍ​ໃນ​ປະ​ເທດ​ຈຳ​ນວ​ນ​ໜຶ່ງ. ຍົກ​ຕົວຢ່າງ, ສຳລັບ​ຝຸ່ນ DAP, ​ໃນເວ​ລາ​ທີ່​ມີ​ການ​ຜະ​ລິດ​ຢູ່​ພາຍ​ໃນ​ປະ​ເທດ​ເພື່ອ​ຖ່ວງດຸນ, ​ລາ​ຄາສິນ​ຄ້າດັ່ງກ່າວ​​ໄດ້ຕ່ຳ​ກວ່າໄລ​ຍະ​​ເວລາທີ່​ຕ້ອງ​ເພິ່ງ​ພາອາ​ໄສ​ການ​ນຳ​ເຂົ້າ​ກ່ອນນັ້​ນ. ​ກ່ອນ​ປີ 2009, ​ໃນເວ​ລາ​ທີ່​ຫວຽດ​ນາມບໍ່​ມີ​ຂະ​ແໜງ​ການ​ຜະ​ລິດ DAP ຢູ່​ພາຍ​ໃນ​ປະ​ເທດ, ລາ​ຄາ​ຝຸ່ນ DAP (ສ່ວນ​ຫຼາຍມາຈາກ​ຈີນ) ​ເຄີຍ​ຢູ່​ລະ​ດັບ​ສູງ (18.000 ດົ່ງ/ກີ​ໂລ ໃນ​ປີ 2008) ເຮັດ​ໃຫ້​ຕົ້ນ​ທຶນການ​ຜະ​ລິດ​ເຂົ້າ​ສູງ​ຂຶ້ນ. ແຕ່​ຫຼັງຈາກ​ໂຮງ​ງານ​ຜະ​ລິດ DAP ສອງ​ແຫ່ງ​​ເລີ່​ມດຳ​ເນີນ​ການ​ຜະລິດ​ແລ້ວ, ລາ​ຄາ DAP ​ໄດ້ຫຼຸດ​ລົງ​ຢ່າງ​ຕໍ່​ເນື່ອງ ແລະ ​ເຫຼືອ​ພຽງ 8.000 ດົ່ງ/ກີ​ໂລ ໃນ​ທ້າຍ​ປີ 2017. ​ເພາະສະ​ນັ້ນ​, ການນຳ​ໃຊ້​ເຄື່ອງ​ມື​ປ້ອງ​ກັນ​​ການ​ຄ້າ​ ເພື່ອ​ຮັກ​ສາ​ບັນ​ດາ​ຂະ​ແໜງ​ການ​ຜະ​ລິດ​ທີ່​ພົວ​ພັນ​ເຖິງ​ກະ​ສິ​ກຳ, ການກໍ່​ສ້າງ… ທັງ​ຮັກ​ສາ​ການ​ຜະ​ລິດແລະວຽກ​ເຮັດ​ງານ​ທຳ​ຢູ່​ພາຍ​ໃນ​ປະ​ເທດ​ໄດ້, ທັງຫຼຸດ​ຜ່ອນການ​ເພິ່ງ​ພາອາ​ໄສສິນ​ຄ້າ​ທີ່​ນຳ​ເຂົ້າ. ​ຫຼາຍ​ປະ​ເທດສະ​ມາ​ຊິກອົງ​ການ​ການ​ຄ້າ​ໂລກ, ນັບ​ທັງປະ​ເທດ​ເສດ​ຖະ​ກິດ​ໃຫຍ່, ຄື​ອາ​ເມ​ລິ​ກາ, ສະ​ຫະ​ພາບເອ​ຣົບ (ອີ​ຢູ), ກາ​ນາ​ດາ, ອົດ​ສະ​ຕຣາ​ລີ… ລ້ວນ​ແຕ່​ໄດ້ແລະກຳ​ລັງ​ຍູ້​ແຮງ​ການ​ນຳ​ໃຊ້​ບັນ​ດາ​ມາດ​ຕະ​ການ​ປ້ອງ​ກັນ​​ການ​ຄ້າ ​ເພື່ອ​ຮັບ​ປະ​ກັນ​​ຮັກ​ສາ​ການ​ຜະ​ລິດ​ຢູ່​ພາຍ​ໃນ​ປະ​ເທດ.

ນອກ​ນັ້​ນ, ກະ​ຊວງ​ອຸດ​ສາ​ຫະ​ກຳແລະການ​ຄ້າກໍ່​​ໄດ້​ຕິດ​ຕາມ​ຢ່າງ​ໃກ້ຊິດ​ກັບການ​ຜັນ​ແປ​ຂອງ​ລາ​ຄາ ກໍ່​ຄື​ສະ​ພາບ​ການ​ນຳ​ເຂົ້າ ແລະ ທົບ​ທວນ​ເປັນ​ໄລຍະ​ ເພື່ອ​ດັດ​ແປງ​ມາດ​ຕະ​ການ​ປ້ອງ​ກັນ​​ການ​ຄ້າ​ໃຫ້​ສອດຄ່ອງ​ກັບ​ພາກ​ຕົວ​ຈິງ, ຫຼີກ​ລ່ຽງ​ປະ​ກົດ​ການ​ເພີ່ມ​ຂຶ້ນຂອງ​ລາ​ຄາ​ສິນຄ້າ​ເນື່ອງ​ຈາກ​ມາດ​ຕະ​ການ​ປ້ອງ​ກັນ​ການ​ຄ້າ ຫຼື ຫຼຸດຜ່ອນກຳ​ລັງ​ໜູນການ​ແຂ່ງ​ຂັນ​ຂອງວິ​ສາ​ຫະ​ກິດ​ພາຍ​ໃນ​ປະ​ເທດ. ​​ໃນ​ຄວາມ​ເປັນ​ຈິງ ​ຜູ້ຜະ​ລິດພາຍ​ໃນ​ປະ​ເທດຈຳນວຫຼາຍ ໄດ້​​ເພີ່ມການ​ນຳ​ເຂົ້າ​ຫຼັງຈາກ​ມີ​ການ​ນຳ​ໃຊ້​ມາດ​ຕະ​ການ​ປ້ອງ​ກັນ​ການ​ຄ້າ​ເຊັ່ນ ບໍລິສັດເຫຼັກກ້າ ຮ​ວ່າ​ຟາດ, ບໍລິສັດ​ແຜ່ນສັງ​ກະ​ສີ ດົງ​ອາ, ​ໂຮງງານ DAP ຫາຍ​ຟ່ອງ, ບໍລິສັດເຫຼັກ​ກ້າ Posco SS Vina... ສິ່ງ​ເຫຼົ່າ​ນີ້​ໃຫ້​ເຫັນ​ວ່າ, ຄວາມ​ສາ​ມາດ​​ແຂ່ງ​ຂັນ​ສາ​ກົນ​ຂອງວິ​ສາ​ຫະ​ກິດ​ໄດ້​ຮັບ​ປະ​ກັນ. ຄື​ແນວນັ້ນ, ກະ​ຊວງ​ອຸດ​ສາ​ຫະ​ກຳແລະການ​ຄ້າໄດ້​​ໝູນ​ໃຊ້​ມາດ​ຕະ​ການ​ປ້ອງ​ກັນ​ການ​ຄ້າ​ຢ່າງ​ທັນ​ການ​ ​ເຊິ່ງ​ໄດ້​ປະ​ກອບ​ສ່ວນ​ເຂົ້າ​ໃນ​ການ​ສະ​ກັດ​ກັ້ນ​​ຜົນ​ກະ​ທົບທາງ​ລົບ​ຂອງ​ສິນ​ຄ້າ​ນຳ​ເຂົ້າ​ຈຳນວນ​ຫຼາຍ, ການແຂ່ງ​ນັນ​ບໍ່ມີ​ຄວາມ​​ປອດ​ໃສ​ກັບ​ສິນ​ຄ້າພາຍ​ໃນ​ປະ​ເທດ ແລະ ຮັບ​ປະ​ກັນ​​ຮັກ​ສາ​ການ​ຜະ​ລິດ​ພາຍ​ໃນ​ປະ​ເທດ ພ້ອມຄວາມ​ສາ​ມາດ​ແຂ່ງ​ຂັນ.

ທີ​ສາມ, ​ສ້າງ​ຍຸດ​ທະ​ສາດ​ໄລຍະຍາວ

ເພື່ອ​ສືບ​ຕໍ່​ຍຸດ​ທະ​ສາດ​ປົກປ້ອງ​ການ​ຜະ​ລິດ, ຮັກ​ສາ​ວຽກ​ເຮັດ​ງານ​ທຳ​ໃຫ້​ຜູ້​ອອກ​ແຮງ​ງານ, ໃນ​ວັນ​ທີ 28 ມີ​ນາ 2019 ກະ​ຊວງ​ອຸດ​ສາ​ຫະ​ກຳແລະການ​ຄ້າ​ໄດ້​ປະ​ກາດ​ໃຊ້​ຂໍ້​ຕົກ​ລົງ​ສະ​ບັບ​ເລກ​ທີ 755/QĐ-BCT ວ່າ​ດ້ວຍ “ໂຄງ​ການ​ສັງ​ລວມ​ກ່ຽວ​ກັບ​ການ​ນຳ​ໃຊ້ ແລະ ຮັບ​ມື​ກັບ​ບັນ​ດາ​ມາດ​ຕະ​ການ​ປ້ອງ​ກັນ​ການ​ຄ້າ ​ແນ​ໃສ່​ຊ່ວຍ​ເຫຼືອ​​ການ​ພັດ​ທະ​ນາ​ຂະ​ແໜງ​ການ​ອຸດ​ສາ​ຫະ​ກຳຫວຽດ​ນາມຈຳ​ນວນ​ໜຶ່ງ ໃນ​ໄລ​ຍະ 2018 - 2020, ຄິດ​ເຖິງ​ປີ 2025”. ໂຄງ​ການ​ສັງ​ລວມ​ກ່ຽວ​ກັບການ​ປ້ອງ​ກັນ​​ການ​ຄ້າ​ໄດ້​ເນັ້ນວ່າ ​ບັນ​ດາ​ມາດ​ຕະ​ການ​ປ້ອງ​ກັນ​ການ​ຄ້າເພື່ອ​ຊ່ວຍ​ເຫຼືອ​​ການ​ພັດ​ທະ​ນາ​ອຸດ​ສາ​ຫະ​ກຳຫວຽດ​ນາມນັ້ນ ຕ້​ອງ​ການ​ອີງ​ຕາມ​ຄວາມ​ຮັບ​ຮູ້​ຢ່າງ​ຄົບ​ຖ້ວນ, ໝູນ​ໃຊ້​ຢ່າງ​ຖືກ​ຕ້ອງ​ແຜນ​ນະ​ໂຍ​ບາຍ​ຂອງ​ພັກ ​ແລະ ນະ​ໂຍ​ບາຍ​ຂອງ​ລັດ​ກ່ຽວ​ກັບ​ບັນ​ດາ​ມາດ​ຕະ​ການ​ປ້ອງ​ກັນ​​ການ​ຄ້າ, ພ້ອມ​ທັງ​ປະ​ຕິ​ບັດ​ຢ່າງ​ເຂັ້ມ​ງວດ​​ຂໍ້​ກຳ​ນົດ​​ກົດ​ໝາຍ ແລະ ຄຳ​ໝັ້ນ​ສັນ​ຍາ​ສາ​ກົນ. ໂຄງການ​ຊີ້​​ແຈ້ງວ່າ ​ບັນ​ດາ​ກົນ​ໄກ, ນ​ະ​ໂຍ​ບາຍ​ກ່ຽວ​ກັບ​ມາດ​ຕະ​ການ​ປ້ອງ​ກັນ​​ການ​ຄ້າສຳລັບ​ອຸດ​ສາ​ຫະ​ກຳ​ ຕ້ອງ​ຕິດ​ແໜ້ນກັບ​ຍຸດ​ທະ​ສາດ, ນະ​ໂຍ​ບາຍ​ພັດ​ທະ​ນາ​ອຸດ​ສາ​ຫະ​ກຳ​ແຫ່ງ​ຊາດ, ພິ​ເສດ​ແມ່ນ​ບັນ​ດາ​ຂະ​ແໜງ​ການ​ອຸດ​ສາ​ຫະ​ກຳ​ບຸລິ​ມະ​ສິດ, ອຸດ​ສາ​ຫະ​ກຳສະໜັບສະໜູນ, ​ວິ​ສາ​ຫະ​ກິດ​ຂະ​ໜາດ​ໜ້ອຍແລະຂະ​ໜາດ​ກາງ.

ເພື່ອ​ພັດ​ທະ​ນາ​ແບບ​ຍືນ​ຍົງ​ບໍ່​ສາ​ມາດ​ພຽງ​ແຕ່ອີງ​ໃສ່​​ການ​ດຶງ​ດູດ​ການລົງ​ທຶນຢ່າງຫຼວງ​ຫຼາຍ​ຈາກ​ຕ່າງ​ປະ​ເທດ ​ຫຼື​ເພີ່ມ​ການ​ສົ່ງ​ອອກຢ່ງ​ໄວວາ​ເທົ່າ​ນັ້ນ, ​ແຕ່​ຕ້ອງ​ຮັບ​ປະ​ກັນ​ປະ​ສິດ​ທິ​ຜົນ​ໃນ​ໄລ​ຍະ​ຍາວ. ເພື່ອ​ປະ​ຕິ​ບັດ​ເປົ້າ​ໝາຍດັ່ງກ່າວ, ດ້ານ​ໜຶ່ງ, ຫວຽດ​ນາມຕ້ອງ​​ສືບ​ຕໍ່​ສ້າງ​ສະ​ພາບ​ແວດ​ລ້ອມ​ແຫ່ງ​ການ​ລົງ​ທຶນ, ການ​ຜະ​ລິດ​ໃຫ້​ປອດ​ໂປ່ງລຸ​ລ່ວງ, ແນ​ໃສ່​ກຳ​​ເອົາ​ໂອ​ກາດ​ຍົກ​ສູງ​ຄວາມ​ສາ​ມາດ​ການ​ຜະ​ລິດ​ຢູ່​ພາຍ​ໃນ​ປະ​ເທດ, ​ໂດຍ​ສະ​ເພາະ​ແມ່ນ​ ບັນ​ດາ​ຂະ​ແໜງ​ສິ​ນ​ຄ້າ​ທີ່ຫວຽດ​ນາມມີ​ທ່າ​ດີ​ປຽບ​ທຽບ, ມີ​ແຜນ​ນະ​ໂຍ​ບາຍ​ສົ່ງ​ເສີມ​ການ​ລົງ​ທຶນ; ອີກ​ດ້ານ​ໜຶ່ງ, ຕ້​ອງເພີ່ມ​ທະ​ວີ​ບັນ​ດາມາດ​ຕະ​ການ​ຄຸ້ມ​ຄອງ​ແນ​ໃສ່​ພະ​ຍາ​ກອນ, ສະ​ກັດ​ກັ້ນ, ແກ້​ໄຂຢ່າງ​ເຂັ້ມ​ງວດ​ບັນ​ດາ​ການ​ກະ​ທຳຫຼົບຫຼີກ​ໜີ​ພາ​ສີ, ການ​ສໍ້​ໂກງ​ແຫຼ່ງ​ກຳ​ເນີດ. ຄວາມ​ຮຽກ​ຮ້ອງຕ້ອງການນີ້​ນັບ​ມື້ນັບຮີບ​ດ່ວນ​ໃນ​ສະ​ພາບ​ການທີ່ ​ຄວາມ​ຂັດ​ແຍ້ງ​ດ້ານ​ການ​ຄ້າລະຫວ່າງອາ​ເມລິ​ກາ​ແລະຈີນ​ຜັນ​ແປ​ຢ່າງ​ສັບ​ສົນ ແລະ ຫວຽດ​ນາມປະ​ຕິ​ບັດ​ບັນ​ດາ​ສັນ​ຍາ​ການການ​ຄ້າ​ເສ​ລີ​ຮຸ້ນ​ໃໝ່, ຄື CPTPP, EVFTA. ດັ່ງ​ນັ້​ນ, ໃນ​ວັນ​ທີ 4 ກໍ​ລະ​ກົດ 2019, ກະ​ຊວງ​ອຸດ​ສາ​ຫະ​ກຳແລະການ​ຄ້າ​ໄດ້​ຍື່ນ​ຕໍ່ນາ​ຍົກ​ລັດ​ຖະ​ມົນ​ຕີ​ ເພື່ອພິຈາລະນາ​ອະນຸມັດ​ໂຄງ​ການ “ເພີ່ມ​ທະ​ວີ​ການ​ຄຸ້ມ​ຄອງ​ລັດ​ກ່ຽວ​ກັບ​ການຕໍ່​ຕ້ານການຫຼົບຫຼີກ​ມາ​ດ​ຕະ​ການ​ປ້ອງ​ກັນ​ການ​ຄ້າ ແລະ ການ​ສໍ້​ໂກງ​ແຫຼ່ງ​ກຳ​ເນີດ”.

ດ້ວຍ​ຍຸດ​ທະ​ສາດແລະມາດ​ຕະ​ການສະ​ເພາະ​ກ່ຽວ​ກັບການ​ປ້ອງ​ກັນ​ການ​ຄ້າດັ່ງ​ກ່າວຂ້າງ​ເທິງ, ພວກ​ເຮົາ​ມີ​ພື້ນ​ຖານ​ຄົບ​ຖ້ວນ​ແລະ​ພຽງ​ພໍ​ເພື່ອ​ເຊື້ອ​ໝັ້ນ​ວ່າ, ບັນ​ດາ​ຂະ​ແໜງ​ການ​ຜະ​ລິດ​ຢູ່​ພາຍ​ໃນ​ປະ​ເທດ​ຈະ​ມີ​ສະ​ພາບ​ແວດ​ລ້ອມ​ແຫ່ງ​ການແຂ່ງ​ຂັນ​ແລະ​ທຸ​ລະ​ກິດ​ແບບ​ສະ​ເໝີ​ພາບ, ເພື່ອ​ປະ​ກອບ​ສ່ວນເຂົ້າ​ໃນ​ການ​ປະ​ຕິ​ບັດ​ເປັນ​ຢ່າງ​ດີ​ແຜນ​ບະ​ໂຍ​ບາຍ​ກ່ຽວ​ກັບ​ການຍົກ​ສູງ​ປະ​ສິດ​ທິ​ຜົນ​ຂອງ​ການ​ເຊື່ອມ​ໂຍງ​ເສດ​ຖະ​ກິດ​ສາ​ກົນ ທີ່​ພັກ​ແລະລັດ​ໄດ້​ວາງ​ອອກ./.

​ໂດຍ ເຈິ່ນ​ຕວັນ​ແອງ

ກຳ​ມະ​ການ​ສຸນ​ກາງ​ພັກ, ລັດ​ຖະ​ມົນ​ຕີ​ກະ​ຊວງອຸດ​ສາ​ຫະ​ກຳແລະການ​ຄ້າ

Other Stories

ບົດທີ່ມີຜູ້ອ່ານຫລາຍສຸດ

ບົດໃໝ່ສຸດ