ການນຳພາຂອງພັກເປັນປັດໄຈຕັດສິນໄຊຊະນະ
ຂອງການຕໍ່ສູ້ຕ້ານຈັກກະພັດອາເມລິກາ ແລະ ເປັນຮາກຖານໃນ
ການນຳປະເທດຊາດເຂົ້າສູ່ຍຸກໃໝ່ແຫ່ງການພັດທະນາຢ່າງໝັ້ນຄົງ
ຂອງການຕໍ່ສູ້ຕ້ານຈັກກະພັດອາເມລິກາ ແລະ ເປັນຮາກຖານໃນ
ການນຳປະເທດຊາດເຂົ້າສູ່ຍຸກໃໝ່ແຫ່ງການພັດທະນາຢ່າງໝັ້ນຄົງ
ວກ. - ການຕໍ່ຕ້ານຈັກກະພັດອາເມລິກາເພື່ອກູ້ຊາດຂອງປະຊາຊົນຫວຽດນາມແມ່ນ “ໜຶ່ງໃນໜ້າປະຫວັດສາດອັນສະຫງ່າລາສີຂອງຊາດ, ເປັນເຫດການທີ່ມີສະຖານະລະດັບສາກົນ ແລະ ມີຄວາມສຳຄັນຮ່ວມສະໄໝຢ່າງເລິກເຊິ່ງ”(1), ປະກອບສ່ວນຢ່າງໃຫຍ່ຫຼວງເຂົ້າໃນການສ້າງ “ປະຫວັດສາດອັນລ້ຳຄ່າຂອງຊາດ” ໃນຍຸກໂຮ່ຈີມິນ. ໄຊຊະນະອັນຍິ່ງໃຫຍ່ຂອງການຕໍ່ຕ້ານຈັກກະພັດອາເມລິກາເພື່ອກູ້ຊາດ ພາຍໃຕ້ການນຳພາຂອງພັກ ໄດ້ສ້້າງບົດຮຽນອັນລ້ຳຄ່າຫຼາຍຢ່າງໄວ້ໃຫ້ກັບພາລະກິດການສ້າງສາ ແລະ ປົກປັກຮັກສາປະເທດຊາດ.
ປະຊາຊົນຮັບຟັງຄຳສັ່ງສອນຂອງລຸງໄຮ່ _ແຫຼ່ງ: tapchimythuat.vn
ພັກກອມມູນິດຫວຽດນາມໄດ້ນຳພາການຕໍ່ສູ້ຕ້ານຈັກກະພັດອາເມລິກາເພື່ອກູ້ຊາດຢ່າງສຳເລັດຜົນ
ປະທານໂຮ່ຈີມິນຢັ້ງຢືນວ່າ: “ດ້ວຍການນຳພາຂອງພັກ, ການປະຕິວັດ ແລະ ການຕໍ່ຕ້ານຈຶ່ງໄດ້ຮັບໄຊຊະນະ, ການສ້າງສາປະເທດຊາດຈຶ່ງປະສົບຜົນສຳເລັດ”(2); “ເມື່ອພັກເຂັ້ມແຂງຈຶ່ງຈະເຮັດໃຫ້ການປະຕິວັດສຳເລັດໄດ້, ເຊັ່ນດຽວກັບນາຍເຮືອທີ່ເຂັ້ມແຂງຈຶ່ງຈະອອກເຮືອໄດ້”(3). ທັດສະນະຂອງທ່ານຊີ້ອອກຢ່າງຈະແຈ້ງວ່າ: ຖ້າຫາກພັກຢາກນຳພາການປະຕິວັດປະສົບຜົນສຳເລັດ, ຕ້ອງມີແນວທາງທີ່ຖືກຕ້ອງ, ມີການຈັດຕັ້ງທີ່ແໜ້ນແຟ້ນ, ມີຖັນແຖວພະນັກງານທີ່ໃກ້ຊິດຕິດແທດກັບປະຊາຊົນ; ພັກຈະດຳລົງຢູ່ບໍ່ໄດ້ ຖ້າບໍ່ໄດ້ເກີດຈາກປະຊາຊົນ, ຮັບໃຊ້ປະຊາຊົນ ແລະ ອີງໃສ່ປະຊາຊົນ. ຕັ້ງແຕ່ບັນດາຂະບວນການປະຕິວັດປີ 1930-1931, ປີ 1936-1939, ການປະຕິວັດເດືອນສິງຫາປີ 1945, ໄຊຊະນະ ດ້ຽນບຽນຝູ ປີ 1954, ໄຊຊະນະອັນຍິ່ງໃຫຍ່ໃນລະດູບານໃໝ່ປີ 1975 ຈົນເຖິງບັນດາຜົນສຳເລັດອັນຍິ່ງໃຫຍ່ທີ່ມີຄວາມໝາຍປະຫວັດສາດຂອງ 40 ປີແຫ່ງການດຳເນີນກິດຈະການປ່ຽນແປງໃໝ່... ທັງໝົດລ້ວນສະແດງເຖິງການນຳພາທີ່ຖືກຕ້ອງ ແລະ ສະຫຼາດສ່ອງໃສຂອງພັກກອມມູນິດຫວຽດນາມ.
ການຕໍ່ຕ້ານຈັກກະພັດອາເມລິກາເພື່ອກູ້ຊາດ ເຊິ່ງເຖິງຈຸດສຸດຍອດໃນຍຸດທະການໂຮ່ຈີມິນອັນເປັນປະຫວັດສາດ ໄດ້ເປີດສັກກະລາດແຫ່ງເອກະລາດ, ເສລີພາບ ແລະ ສັງຄົມນິຍົມໃຫ້ປະເທດຊາດ. ໄຊຊະນະຂອງການຕໍ່ຕ້ານຈັກກະພັດອາເມລິກາເພື່ອກູ້ຊາດ ໄດ້ສະແດງໃຫ້ເຫັນເຖິງການຫຼອມລວມກຳລັງແຮງທີ່ບໍ່ອາດເອົາຊະນະໄດ້ ຂອງນ້ຳໃຈມະຫາສາມັກຄີປວງຊົນທັງຊາດ ແລະ ເຈດຈຳນົງທີ່ອົງອາດກ້າແກ່ນຂອງຊາດວິລະຊົນ, ໂດຍສະເພາະແມ່ນ ບັນດາໝາກຜົນທີ່ຫຼີກລ່ຽງບໍ່ໄດ້ ຂອງການນຳພາທີ່ຖືກຕ້ອງ, ໝັ້ນຄົງ, ຍືດຫຍຸ່ນ ແລະ ປະດິດສ້າງ ຂອງພັກກອມມູນິດຫວຽດນາມ. ການຕໍ່ຕ້ານແມ່ນເຄື່ອງພິສູດເຖິງຄວາມກ້າຫານ, ສະຕິປັນຍາ ແລະ ສະຖານະທີ່ຍິ່ງໃຫຍ່ຂອງພັກ ໂດຍເນັ້ນໃຫ້ເຫັນບົດບາດການນຳພາທີ່ເດັດຂາດ, ຮອບດ້ານ ແລະ ສະຫຼາດສ່ອງໃສຂອງພັກ, ສະແດງໃຫ້ເຫັນເຖິງພອນສະຫວັນດ້ານຍຸດທະສາດທີ່ຍອດຍ້ຽມ ແລະ ສິລະປະການນຳພາທີ່ໄດ້ຮັບການເສີມຂະຫຍາຍເຕັມທີ່ໃນທຸກດ້ານຄື: ການເມືອງ, ການທະຫານ, ການທູດ, ແນວຄິດ ແລະ ການຈັດຕັ້ງກຳລັງ, ການສົມທົບກຳລັງແຮງຂອງຊາດກັບກຳລັງແຮງຂອງຍຸກສະໄໝ.
ຕະຫຼອດຂະບວນການປະຕິວັດເວົ້າລວມ, ໃນການຕໍ່ສູ້ຕ້ານຈັກກະພັດອາເມລິກາເພື່ອກູ້ຊາດເວົ້າສະເພາະ, ພັກກອມມູນິດຫວຽດນາມໄດ້ສະແດງໃຫ້ເຫັນເຖິງວິໄສທັດທີ່ກວ້າງໄກ ແລະ ແນວຄິດຍຸດທະສາດກ່ຽວກັບສະຖານະການ, ຈາກນັ້ນ ໄດ້ເປັນເຈົ້າການໃນການກຳນົດແນວທາງປະຕິວັດທີ່ຖືກຕ້ອງ ແລະ ຈັດຕັ້ງປະຕິບັດແນວທາງທີ່ເໝາະສົມກັບເງື່ອນໄຂສະເພາະ ແລະ ພັດທະນາການຂອງການປະຕິວັດຂອງປະເທດເຮົາ.
ເມື່ອກອງທັບແລະປະຊາຊົນຫວຽດນາມຍາດເອົາຄວາມເປັນເຈົ້າການໃນການຕໍ່ຕ້ານພວກລ່າເມືອງຂຶ້ນຝຣັ່ງຜູ້ຮຸກຮານໄດ້ແລ້ວ; ພວກຈັກກະພັດອາເມລິກາຊ່ວຍເຫຼືອພວກລ່າເມືອງຂຶ້ນຝຣັ່ງ ແລະ ເຂົ້າແຊກແຊງແນວຮົບອິນດູຈີນຫຼາຍຂຶ້ນ, ພັກກອມມູນິດຫວຽດນາມຈຶງລະບຸແຜນການ ແລະ ກົນອຸບາຍຂອງຈັກກະພັດອາເມລິກາໄດ້ຢ່າງຈະແຈ້ງ. ໃນເດືອນກຸມພາປີ 1954, ກົມການເມືອງສູນກາງພັກປະເມີນວ່າ: ພວກຈັກກະພັດອາເມລິກາກໍາລັງເຄື່ອນຕົວໄປສູ່ການແຊກແຊງໂດຍກົງຢ່າງເປີດແປນ ໃນສົງຄາມອິນດູຈີນ(4). ພາຍຫຼັງໄຊຊະນະ ດ້ຽນບຽນຝູ ທີ່ “ດັງກ້ອງໄປທົ່ວ 5 ທະວີບ ແລະ ສັ່ນສະເທືອນແຜ່ນດິນໂລກ”, ໃນລະຫວ່າງຂະບວນການເຈລະຈາສັນຍາເຊີແນວປີ 1954, ພັກສືບຕໍ່ລະບຸວ່າ: ໃນໄລຍະໃໝ່ນີ້, ຈັກກະພັດອາເມລິກາ ພວມກາຍເປັນສັດຕູຕົ້ນຕໍ ແລະ ໂດຍກົງຂອງປະຊາຊົນອິນດູຈີນ(5). ພາຍຫຼັງສັນຍາເຊີແນວປີ 1954, ປະເທດຫວຽດນາມຖືກແບ່ງອອກເປັນສອງພາກຊົ່ວຄາວ. ທີ່ກອງປະຊຸມສູນກາງພັກຄັ້ງທີ 7 ສະໄໝທີ II (ເດືອນມີນາ 1955), ພັກໄດ້ກຳນົດທິດທາງການປະຕິວັດໃນໄລຍະໃໝ່ຄື: ປັບປຸງພາກເໜືອ; ຮັກສາ ແລະຊຸກຍູ້ຂະບວນການຕໍ່ສູ້ທາງດ້ານການເມືອງຂອງປະຊາຊົນພາກໃຕ້; ເພື່ອປັບປຸງສັນຕິພາບ, ດຳເນີນການໂຮມປະເທດເປັນໜຶ່ງ ແລະ ບັນລຸຄວາມເປັນເອກະລາດ ແລະ ປະຊາທິປະໄຕໃນທົ່ວປະເທດ(6).
ພາກເໜືອໄດ້ຮັບເອກະລາດແລະກ້າວເຂົ້າສູ່ການກໍ່ສ້າງສັງຄົມນິຍົມ; ພາກໃຕ້ເຊິ່ງຈັກກະພັດອາເມລິກາຂັບໄລ່ພວກລ່າເມືອງຂຶ້ນຝຣັ່ງອອກໄປ ແລະຕັ້ງລັດຖະບານຫຸ່ນຂອງ ໂງດິ່ງຢ້ຽມ, ກາຍເປັນເມືອງຂຶ້ນແບບໃໝ່ທີ່ມີແຜນການແບ່ງແຍກປະເທດຫວຽດນາມຢ່າງຖາວອນ. ມະຕິກອງປະຊຸມສູນກາງພັກຄັ້ງທີ 15, ຊຸດທີ II (ເດືອນກໍລະກົດ 1959) ໄດ້ກຳນົດສອງໜ້າທີ່ຍຸດທະສາດຂອງການປະຕິວັດຫວຽດນາມ ແມ່ນ ການປະຕິວັດສັງຄົມນິຍົມຢູ່ພາກເໜືອ ແລະ ການປະຕິວັດຊາດປະຊາທິປະໄຕປະຊາຊົນຢູ່ພາກໃຕ້. “ໜ້າທີ່ຍຸດທະສາດທັງສອງນີ້, ເຖິງວ່າຈະມີລັກສະນະທີ່ແຕກຕ່າງກັນ ແຕ່ກໍມີຄວາມກ່ຽວຂ້ອງກັນແບບອິນຊີ, ດຳເນີນໄປຄຽງຄູ່ກັນ, ມີອິດທິພົນຢ່າງເລິກເຊິ່ງຕໍ່ກັນ ແລະ ສະໜັບສະໜູນເຊິ່ງກັນແລະກັນຢ່າງແຂງແຮງ ໂດຍມຸ່ງເປົ້າໄປທີ່ທິດທາງຮ່ວມກັນໃນການຮັກສາສັນຕິພາບ, ໂຮມປະເທດຊາດເປັນເອກະພາບ ແລະ ສ້າງເງື່ອນໄຂທີ່ເອື້ອອຳນວຍເພື່ອນຳປະເທດຫວຽດນາມທັງໝົດໄປສູ່ລັດທິສັງຄົມນິຍົມ”(7). ກອງປະຊຸມໄດ້ກຳນົດແນວທາງທີ່ຖືກຕ້ອງແລະຮີບດ່ວນ ໃນການດຳເນີນການຕໍ່ສູ້ດ້ວຍອາວຸດ ສົມທົບກັບການຕໍ່ສູ້ທາງການເມືອງຢູ່ພາກໃຕ້; ແມ່ນຈຸດຫັນປ່ຽນຍຸດທະສາດຂອງຂະບວນການຕໍ່ສູ້ຢູ່ພາກໃຕ້ຢ່າງແຂງແຮງ, ເລີ່ມຕົ້ນແຕ່ຂະບວນການ ດົ່ງເຂີຍ ປີ 1959–1960 ເຊິ່ງໄດ້ສະແດງໃຫ້ເຫັນເຖິງຄວາມຖືກຕ້ອງ ແລະ ຄວາມສະຫຼາດສ່ອງໃສຂອງຍຸດທະສາດ ແລະ ຍຸດໂທບາຍຂອງພັກ.
ເຖິງໃນກອງປະຊຸມໃຫຍ່ຄັ້ງທີ III (ປີ 1960), ວິໄສທັດ, ຄວາມຕັດສິນໃຈ ແລະ ແນວທາງການນຳພາຂອງພັກໃນການຕໍ່ສູ້ຕ້ານຈັກກະພັດອາເມລິກາເພື່ອກູ້ຊາດໄດ້ສະແດງໃຫ້ເຫັນຢ່າງຈະແຈ້ງວ່າ: “ປະເທດຫວຽດນາມຂອງພວກເຮົາເປັນໜຶ່ງ, ຊາດຫວຽດນາມຂອງເຮົາເປັນໜຶ່ງ. ປະເທດຂອງພວກເຮົາຈະເປັນເອກະພາບຢ່າງແນ່ນອນບົນພື້ນຖານເອກະລາດ ແລະ ປະຊາທິປະໄຕ, ປະຊາຊົນຂອງພວກເຮົາຈະໄດ້ເຕົ້າໂຮມກັນໃນສັນຕິພາບ, ເສລີ ແລະ ຄວາມຜາສຸກ. ແມ່ນໍ້າອາດຈະເຫືອດແຫ້ງ, ພູເຂົາອາດຈະເຊາະເຈື່ອນ, ແຕ່ຄວາມຕັ້ງໃຈທີ່ຈະໂຮມປະເທດຊາດເປັນເອກະພາບຂອງປະຊາຊົນເຮົາຈະບໍ່ຫວັ່ນໄຫວ ແລະ ໃນທີ່ສຸດ ພວກເຮົາຈະຊະນະຢ່າງແນ່ນອນ”(8). ພັກໄດ້ຊີ້ອອກຢ່າງຈະແຈ້ງສອງໜ້າທີ່ຍຸດທະສາດຂອງການປະຕິວັດຫວຽດນາມຄື: ກໍ່ສ້າງລັດທິສັງຄົມນິຍົມຢູ່ພາກເໜືອ ແລະ ປົດປ່ອຍພາກໃຕ້, ມຸ່ງໄປເຖິງການໂຮມປະເທດຊາດເປັນເອກະພາບ. ປີ 1960, ແນວໂຮມແຫ່ງຊາດປົດປ່ອຍພາກໃຕ້ຫວຽດນາມໄດ້ກຳເນີດຂຶ້ນ, ເປີດໄລຍະໃໝ່, ນຳການປະຕິວັດພາກໃຕ້ພັດທະນາຢ່າງແຂງແຮງທາງດ້ານສະຖານະ ແລະກຳລັງແຮງ.
ກອງປະຊຸມໃຫຍ່ຄັ້ງທີ III ຂອງພັກໄດ້ຂີດໝາຍດາບາດກ້າວການພັດທະນາທາງດ້ານຈິນຕະນາການ, ຄວາມຮັບຮູ້ ແລະ ການນຳພາຂອງພັກ ຕໍ່ການປະຕິວັດຫວຽດນາມທີ່ເຕັມໄປດ້ວຍຄວາມລຳບາກ ແລະ ການເສຍສະລະ. ພັກໄດ້ສືບຕໍ່ເຊີດຊູຄັນທຸງເອກະລາດແຫ່ງຊາດ ແລະລັດທິສັງຄົມນິຍົມ, ສົມທົບກຳລັງແຮງຂອງຊາດ ກັບກຳລັງແຮງຂອງຍຸກສະໄໝຢ່າງມີປະສິດທິຜົນ, ປຸກລະດົມກຳລັງແຮງອັນຊະນະເລີດຂອງກ້ອນກຳລັງມະຫາສາມັກຄີປວງຊົນທັງຊາດ ແລະນ້ຳໃຈຮັກຊາດ - “ຄື້ນໃຫຍ່” ທີ່ມີພະລັງມະຫາສານແຫ່ງເຈດຈຳນົງ ຄວາມຕັດສິນໃຈ ແລະ ການກະທຳຂອງທົ່ວພັກ, ທົ່ວປວງຊົນ ແລະ ກອງທັບ - ເພື່ອ “ທັບມ້າງ” ພວກຈັກກະພັດນິຍົມຜູ້ຮຸກຮານ ແລະ ພວກລູກແຫຼ້ງຕີນມືຂອງພວກເຂົາ. ດ້ານໜຶ່ງ, ພັກນຳພາການປະຕິວັດຢ່າງເດັດດ່ຽວໜຽວແໜ້ນໃນການປະຕິບັດແນວທາງ ແລະ ຍຸດທະສາດ; ຄຽງຄູ່ກັນນັ້ນ, ໃນແຕ່ລະໄລຍະ, ເວລາ, ສະຖານທີ່ ແລະ ພື້ນທີ່, ພັກຂອງພວກເຮົາໄດ້ນຳພາ ແລະ ກຳນົດຍຸດໂທບາຍ, ມາດຕະການຮັບມື ແລະ ຍຸດທະວິທີທີ່ເໝາະສົມຢ່າງວ່ອງໄວ.
ພາຍໃຕ້ການນຳພາຂອງພັກ, ຕັ້ງແຕ່ຄະນະບໍລິຫານງານສູນກາງພັກ ເຖິງບັນດາອົງການຫຼັກຂອງພັກ, ກອງກຳລັງປະກອບອາວຸດທັງສາມໄດ້ຮັບການສ້າງຕັ້ງ, ປັບປຸງ ແລະ ເຕີບໃຫຍ່ເຂັ້ມແຂງ. ບັນດາຂະບວນການຕໍ່ສູ້ທາງການເມືອງ, ການຂົນຂວາຍທາງທະຫານ ແລະ ການຕໍ່ສູ້ພາຍໃນສູນກາງຂອງສັດຕູ ໄດ້ຮັບການສົ່ງເສີມຢ່າງແຂງແຮງ. ພັກໄດ້ນຳພາກອງທັບປະຊາຊົນຫວຽດນາມ ໂດຍກົງ ແລະ ຮອບດ້ານ, ເສີມຂະຫຍາຍສິລະປະການທະຫານ ແລະ ສົງຄາມປະຊາຊົນຫວຽດນາມ. ບົດບາດອັນໃຫຍ່ຫຼວງຂອງວຽກງານພັກ ແລະ ວຽກງານການເມືອງໃນກອງທັບ ມີຄວາມໂດດເດັ່ນໃນຜົນງານແຕ່ລະຄັ້ງ, ພ້ອມທັງໄຊຊະນະທັງໝົດຂອງສົງຄາມຕໍ່ຕ້ານຈັກກະພັດອາເມລິກາ ເພື່ອກູ້ຊາດ.
ໃນດ້ານການທະຫານ, ພັກໄດ້ໝູນໃຊ້ແນວຄິດໂຮ່ຈີມິນ ແລະ ມູນເຊື້ອຂອງຊາດໃນການຕໍ່ສູ້ກັບຜູ້ຮຸກຮານຕ່າງປະເທດຢ່າງປະດິດສ້າງ ໂດຍປະສົມປະສານສິລະປະການຊີ້ນຳສົງຄາມປະຊາຊົນ ເຂົ້າກັບວິທີການຕໍ່ສູ້ທີ່ຍືດຫຍຸ່ນ. ໃນໄລຍະປີ 1961-1964, ພັກໄດ້ມີແຜນນະໂຍບາຍຍູ້ແຮງການຮົບແບບກອງຫຼອນ, ເອົາຊະນະໂຄງການສ້າງໝູ່ບ້ານຍຸດທະສາດຂອງສັດຕູ, ເປີດກວ້າງເຂດປົດປ່ອຍ; ປັບປຸງກອງກຳລັງປະກອບອາວຸດສາມປະເພດຄື: ກອງທະຫານຫຼວງ, ກອງທະຫານທ້ອງຖິ່ນ ແລະ ທະຫານລາດກອງຫຼອນ, ຂະຫຍາຍແນວຮົບທາງການເມືອງ, ສົມທົບການປະກອບອາວຸດ ແລະ ການເມືອງ, ຈາກນັ້ນ ທັບມ້າງ “ສົງຄາມພິເສດ” ຂອງສັດຕູ. ໃນໄລຍະປີ 1965-1968, ພວກຈັກກະພັດອາເມລິກາເຂົ້າຮ່ວມສົງຄາມໂດຍກົງ, ປ່ຽນເປັນ “ສົງຄາມພາກສ່ວນ” ແລະ ດຳເນີນສົງຄາມຖິ້ມລະເບີດຍິງທໍາລາຍພາກເໜືອຫວຽດນາມ. ພັກໄດ້ດຳເນີນນະໂຍບາຍ “ຜະລິດໄປພ້ອມກັບການສູ້ຮົບ” ໂດຍຮັກສາແນວຫຼັງທາງພາກເໜືອຢ່າງໝັ້ນຄົງ, ໜູນຊ່ວຍສະໜາມຮົບພາກໃຕ້ ແລະ ຈັດການສົງຄາມປະຊາຊົນໃນທັງສອງພາກ. ບັນດາໄຊຊະນະທີ່ເປັນແບບສະບັບໃນສະໜາມຮົບຕ່າງໆເຊັ່ນ: ໜູຍແທ່ງ, ວ້ານເຕື່ອງ, ເປລີຍແມ, ເບົ່າບ່າງ ແລະອື່ນໆ ເຊິ່ງຈຸດສຸດຍອດແມ່ນການບຸກໂຈມຕີ ແລະລຸກຮື້ຂຶ້ນໃນບຸນປີໃໝ່ປີວອກ 1968 ໄດ້ເຮັດໃຫ້ຍຸດທະສາດຂອງຈັກກະພັດອາເມລິກາ ຕ້ອງຢຸດຊະງັກລົງ. ໃນໄລຍະປີ 1969-1973, ເມື່ອອາເມລິກາແລະອຳນາດການປົກຄອງຫຸ່ນ ໄຊ່ງ່ອນ ປ່ຽນໄປໃຊ້ “ການຫັນສົງຄາມເປັນຂອງຫວຽດນາມ” ແລະ ຍູ້ແຮງສົງຄາມທຳລາຍພາກເໜືອ, ພັກໄດ້ນຳພາທົ່ວປວງຊົນ ແລະ ກອງທັບທັງໝົດ ໃຫ້ສືບຕໍ່ສົມທົບການຕໍ່ສູ້ທາງການທະຫານ-ການເມືອງ-ການທູດ ແລະ ປະຕິບັດບັນດາໄຊຊະນະອັນຍິ່ງໃຫຍ່ຄື: ບັ້ນຮົບເສັ້ນທາງເລກ 9 - ພາກໃຕ້ລາວ (ປີ 1971), ບັ້ນຮົບຢູ່ ຈີ້ - ທຽນ (ປີ 1972), ບັ້ນຮົບ “ຮ່າໂນ້ຍ - ດ້ຽນບຽນຝູທາງອາກາດ” (ເດືອນທັນວາ 1972) ແລະອື່ນໆ, ບັງຄັບໃຫ້ຈັກກະພັດອາເມລິກາ ລົງນາມໃນສັນຍາປາຣີ (ປີ 1973) ເພື່ອຢຸດຕິສົງຄາມ ແລະ ຟື້ນຟູສັນຕິພາບຢູ່ຫວຽດນາມ. ໃນໄລຍະປີ 1973-1975, ເມື່ອເຫັນແຈ້ງວ່າໂອກາດການປະຕິວັດໄດ້ສຸກງອມແລ້ວ, ພັກຈຶ່ງປ່ຽນຍຸດທະສາດເປັນການບຸກໂຈມຕີຢ່າງແຂງແຮງ, ມຸ່ງສູ່ການບຸກໂຈມຕີທົ່ວໄປ, ປົດປ່ອຍພາກໃຕ້ໂດຍສົມບູນ ແລະ ໂຮມປະເທດເປັນເອກະພາບ.
ໂດຍຮັບຮູ້ຢ່າງຈະແຈ້ງເຖິງບົດບາດສຳຄັນຂອງແນວຄິດແລະວັດທະນະທຳ ພັກຈຶ່ງໃຫ້ຄວາມສຳຄັນທີ່ສຸດເຖິງວຽກງານໂຄສະນາເຜີຍແຜ່ ແລະ ການສຶກສາດ້ານການເມືອງແລະແນວຄິດ. ໄດ້ກຳນົດຢ່າງຈະແຈ້ງເຖິງບົດບາດສຳຄັນຂອງແນວຮົບອຸດົມການ ແລະ ວັດທະນະທຳ, ພັກໄດ້ເອົາໃຈໃສ່ເປັນຢ່າງດີຕໍ່ວຽກງານໂຄສະນາເຜີຍແຜ່ ແລະ ການສຶກສາດ້ານການເມືອງ ແລະ ອຸດົມຄະຕິ. ຕະຫຼອດໄລຍະສົງຄາມຕໍ່ຕ້ານ, ວຽກງານຂໍ້ມູນຂ່າວສານ, ການໂຄສະນາເຜີຍແຜ່, ສື່ປະຕິວັດ, ວັນນະກຳແລະສິລະປະການຕໍ່ຕ້ານໄດ້ຮັບການສົ່ງເສີມ, ປະກອບສ່ວນຊຸກຍູ້ຈິດໃຈຕໍ່ສູ້, ເພີ່ມທະວີຄວາມເຊື່ອໝັ້ນປະຕິວັດ ແລະ ຫຼໍ່ຫຼອມອຸດົມການໃຫ້ແກ່ທະຫານ, ຊາວໜຸ່ມ, ນັກສຶກສາ, ປັນຍາຊົນທີ່ເຂົ້າຮ່ວມສົງຄາມຕໍ່ຕ້ານ. ບັນດາຂະບວນການ “ສຽງເພງທັບສຽງລະເບີດ”, “ສາມກຽມພ້ອມ”, “ຫ້າອາສາສະໝັກ”... ແມ່ນໝາກຜົນແຫ່ງການນຳພາດ້ານແນວຄິດແລະວັດທະນະທຳຢ່າງມີປະສິດທິຜົນ. ໃນດ້ານການທູດ, ພັກໄດ້ສະແດງໃຫ້ເຫັນເຖິງສະຖານະທາງການເມືອງ ແລະ ຄວາມໝັ້ນຄົງ ໂດຍປະສານສົມທົບການເຄື່ອນໄຫວທາງການທະຫານ ແລະ ການເຈລະຈາທາງການທູດຢ່າງໃກ້ຊິດ. ໃນສະຖານະການປ່ຽນແປງຢ່າງໄວໃນປະເທດແລະສາກົນ, ພັກໄດ້ສະເໜີຍຸດທະສາດການທູດທີ່ເໝາະສົມ. ໂດຍຊາບຊຶມທັດສະນະແລະແນວຄິດການທູດຂອງ ໂຮ່ຈີມິນ ທີ່ວ່າ: “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, “ກຳລັງແຮງແມ່ນຄ້ອງ, ການທູດແມ່ນສຽງ. ຄ້ອງໃຫຍ່ຂຶ້ນເທົ່າໃດ ສຽງດັງກ້ອງເທົ່ານັ້ນ”, ການທູດຫວຽດນາມ ໄດ້ຜັນຂະຫຍາຍຢ່າງຍືດຫຍຸ່ນແລະໄຫວພິບ, ຍາດແຍ່ງເອົາຄວາມເຫັນອົກເຫັນໃຈ ແລະ ການສະໜັບສະໜູນຂອງໂລກ, ໂດຍສະເພາະ ການສະໜັບສະໜູນຂອງບັນດາປະເທດສັງຄົມນິຍົມ, ບົນພື້ນຖານຄວາມເດັດດ່ຽວ ແລະ ຄວາມຕັ້ງໝັ້ນໃນເປົ້າໝາຍການປະຕິວັດ ແລະໄຊຊະນະໃນແນວຮົບທະຫານ. ສັນຍາປາຣີ ປີ 1973 ແມ່ນໄຊຊະນະທາງການເມືອງແລະການທູດອັນໃຫຍ່ຫຼວງ, ປະກອບສ່ວນສ້າງເງື່ອນໄຂທີ່ສະດວກໃຫ້ແກ່ການປົດປ່ອຍພາກໃຕ້ຢ່າງສົມບູນ.
ສາມາດຢືນຢັນໄດ້ວ່າ ປັດໄຈຕັດສິນໄຊຊະນະຂອງສົງຄາມຕໍ່ຕ້ານຈັກກະພັດອາເມລິກາເພື່ອກູ້ຊາດ ບໍ່ພຽງແຕ່ຢູ່ໃນແນວທາງທີ່ຖືກຕ້ອງເທົ່ານັ້ນ, ແຕ່ຍັງຢູ່ໃນການຕັ້ງໝັ້ນໃນອຸດົມຄະຕິເອກະລາດແຫ່ງຊາດ ແລະ ລັດທິສັງຄົມນິຍົມອີກດ້ວຍ. ພັກແມ່ນຜູ້ຊີ້ທາງ, ຈັດຕັ້ງ ພ້ອມທັງສ້າງແຮງບັນດານໃຈ ແລະ ນຳພາປະຊາຊົນຜ່ານຜ່າຄວາມຫຍຸ້ງຍາກ ແລະ ການເສຍສະຫຼະທັງປວງ. ຄວາມສະໜິດຕິດພັນລະຫວ່າງພັກ ແລະປະຊາຊົນ ໄດ້ສ້າງພະລັງແຂງແຮງອັນຫາທີ່ປຽບບໍ່ໄດ້, ເສີມສ້າງກຸ່ມກ້ອນມະຫາສາມັກຄີປວງຊົນທັງຊາດ. ໄຊຊະນະອັນຍິ່ງໃຫຍ່ຂອງປະຊາຊົນຫວຽດນາມ ຍັງເກີດຈາກຄວາມຈິງທີ່ວ່າ ພັກຂອງພວກເຮົາສົ່ງເສີມກຳລັງແຮງສັງລວມຂອງລະບົບການເມືອງທັງໝົດ, ຂອງທົ່ວປວງຊົນ, ການປະສານສົມທົບຢ່າງເຂົ້າແກັບເຂົ້າເກຍລະຫວ່າງສູນກາງ ແລະທ້ອງຖິ່ນ, ລະຫວ່າງແນວຫຼັງ ແລະ ແນວໜ້າ, ລະຫວ່າງໃນປະເທດ ແລະ ຕ່າງປະເທດ. ພັກເຮົາໄດ້ລະດົມກຳລັງແຮງສູງສຸດຂອງທົ່ວປະເທດ, ທັງກຳລັງແຮງດ້ານວັດຖຸ ແລະກຳລັງແຮງທາງດ້ານການເມືອງ-ຈິດໃຈ, ກຳລັງແຮງຂອງມູນເຊື້ອຮັກຊາດອັນແຮງກ້າ ຂອງປະເທດທີ່ມີອາລະຍະທຳຍາວນານນັບພັນປີ ໃນການຕໍ່ຕ້ານສົງຄາມຈັກກະພັດອາເມລິກາເພື່ອກູ້ຊາດ. “ວັນເວລາຈະຜ່ານໄປ, ແຕ່ໄຊຊະນະຂອງປະຊາຊົນຂອງພວກເຮົາໃນສົງຄາມຕໍ່ຕ້ານອາເມລິກາເພື່ອກູ້ຊາດ ຈະຖືກບັນທຶກໄວ້ໃນປະຫວັດສາດຂອງຊາດເຮົາຕະຫຼອດໄປ ໃນຖານະໜຶ່ງໃນໜ້າປະຫວັດສາດທີ່ສະຫວ່າງສະໄໝທີ່ສຸດ, ເປັນສັນຍາລັກທີ່ສ່ອງປະກາຍແຫ່ງໄຊຊະນະອັນສົມບູນ ຂອງລັດທິວິລະຊົນປະຕິວັດ ແລະ ສະຕິປັນຍາຂອງມະນຸດຊາດ ແລະ ຈະຖືກຈາລຶກໄວ້ໃນປະຫວັດສາດໂລກ ໃນຖານະຄວາມສຳເລັດອັນຍິ່ງໃຫຍ່ຂອງສະຕະວັດທີ 20, ເປັນເຫດການທີ່ມີຄວາມສໍາຄັນລະດັບສາກົນ ແລະມີຄວາມໝາຍຍຸກສະໄໝອັນເລິກເຊິ່ງ”(9).
ເສີມຂະຫຍາຍບົດບາດນຳພາຂອງພັກ, ນຳພາປະເທດຊາດກ້າວເຂົ້າສູ່ຍຸກໃໝ່ຢ່າງໝັ້ນຄົງ
ເຄິ່ງສະຕະວັດຜ່ານໄປ, ນັບຕັ້ງແຕ່ປະເທດໄດ້ຮັບການທ້ອນໂຮມເປັນເອກະພາບຢ່າງສົມບູນ, ບົດບາດການນຳພາຂອງພັກຍັງຄົງຢູ່ ແລະ ຈຳເປັນຕ້ອງໄດ້ຮັບການສືບທອດ ແລະ ເສີມຂະຫຍາຍໃນພາລະກິດການສ້າງສາ, ພັດທະນາ ແລະ ປົກປັກຮັກສາປະເທດຊາດໃນປະຈຸບັນ. ໄຊຊະນະຂອງສົງຄາມຕໍ່ຕ້ານຈັກກະພັດອາເມລິກາເພື່ອກູ້ຊາດ ໄດ້ຖອດຖອນບົດຮຽນອັນລ້ຳຄ່າຂອງຍຸກສະໄໝຄື: ຍຶດໝັ້ນບົດບາດການນຳພາທີ່ເດັດຂາດ ແລະ ຮອບດ້ານຂອງພັກ, ລວມທັງການນຳພາທີ່ເດັດຂາດ ແລະ ໂດຍກົງໃນທຸກດ້ານຕໍ່ກອງທັບ, ເສີມຂະຫຍາຍສິລະປະການທະຫານ ແລະ ສົງຄາມປະຊາຊົນຫວຽດນາມໃຫ້ເຖິງລະດັບສູງສຸດ; ຍຶດໝັ້ນເປົ້າໝາຍເອກະລາດແຫ່ງຊາດ ຕິດພັນກັບລັດທິສັງຄົມນິຍົມ; ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີປວງຊົນທັງຊາດ; ຮູ້ວິທີສົມທົບກຳລັງແຮງຂອງຊາດກັບກຳລັງແຮງຂອງຍຸກສະໄໝ; ຖືພຶດຕິກຳຕົວຈິງເປັນພື້ນຖານໃນການພັດທະນາທິດສະດີ, ປ່ຽນແປງໃໝ່ວິທີການນຳພາຢ່າງບໍ່ຢຸດຢັ້ງ, ປັບປຸງຍົກສູງຄວາມສາມາດນຳພາ ແລະກຳອຳນາດຂອງພັກ...
ພາລະກິດອັນສັກສິດຂອງພັກໃນຍຸກແຫ່ງການພັດທະນາ ແມ່ນການນຳພາປະເທດໃຫ້ສາມາດສ້າງຫວຽດນາມທີ່ເປັນສັງຄົມຄົມນິຍົມ, ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ, ອາລະຍະທຳ ທີ່ເທົ່າທຽມກັບມະຫາອຳນາດທັງ 5 ທະວີບໄດ້ສຳເລັດ; ຮັບປະກັນໃຫ້ປະຊາຊົນມີຊີວິດທີ່ຈະເລີນຮຸ່ງເຮືອງ ແລະມີຄວາມສຸກ; ປະກອບສ່ວນນັບມື້ນັບຫຼາຍສຳລັບສັນຕິພາບ, ສະຖຽນລະພາບ, ການພັດທະນາຂອງພາກພື້ນແລະໂລກ, ເພື່ອຄວາມຜາສຸກຂອງມະນຸດຊາດ ແລະ ອາລະຍະທຳທົ່ວໂລກ(10). ໃນທຸກສະຖານະການ, ການຮັກສາບົດບາດການນຳພາຂອງພັກແມ່ນກຸນແຈໃນການພັດທະນາປະເທດຊາດ, ຮັບປະກັນຄວາມໝັ້ນຄົງຍືນຍົງ ແລະຄວາມວັດທະນາຖາວອນຂອງປະເທດຊາດ.
ໃນເສັ້ນທາງຂ້າງໜ້າມີຄວາມຮຽກຮ້ອງຕ້ອງການສູງສຸດສະລັບພັກ. ກ້າວເຂົ້າສູ່ຍຸກໃໝ່ແຫ່ງການພັດທະນາດ້ວຍກາລະໂອກາດ ແລະ ສິ່ງທ້າທາຍທີ່ຕິດພັນກັນ, ບົດບາດນຳພາປະເທດຂອງພັກກອມມູນິດຫວຽດນາມ ຮຽກຮ້ອງໃຫ້ຕ້ອງປັບປຸງແລະປ່ຽນແປງໃໝ່ຢ່າງບໍ່ຢຸດຢັ້ງ ເພື່ອຍົກສູງຄຸນນະພາບແລະປະສິດທິຜົນ. ຄວາມເປັນຈິງແລະຄວາມສຳເລັດຂອງການຕໍ່ຕ້ານ, ການສ້າງສາປະເທດ ແລະ ການດຳເນີນກິດຈະການປ່ຽນແປງໃໝ່ ແລະ ເຊື່ອມໂຍງສາກົນ ໄດ້ຢືນຢັນເຖິງບົດບາດນຳພາ ແລະ ກຳອຳນາດຂອງພັກກອມມູນິດຫວຽດນາມ. ເພື່ອສືບຕໍ່ປະຕິບັດສຳເລັດຜົນໃນພາລະກິດການສ້າງສາ ແລະ ປົກປັກຮັກສາປະເທດຊາດໃນຍຸກໃໝ່ ຍຸກແຫ່ງການບືນຕົວຂຶ້ນຂອງຊາດ, ພັກກອມມູນິດຫວຽດນາມຈະຕ້ອງມີຄວາມເປັນເລີດທັງໃນດ້ານສະຕິປັນຍາ, ຄວາມກ້າຫານ, ຄວາມສາມາດ ແລະ ຈັນຍາບັນໃນການກຳອຳນາດການປົກຄອງ. ມີພຽງພັກການເມືອງທີ່ນຳໜ້າທາງການເມືອງ, ຍຶດໝັ້ນໃນອຸດົມຄະຕິ, ມີສະຕິປັນຍາສ່ອງໃສ, ສຽບແຫຼມໃນຍຸດທະສາດ, ໃກ້ຊິດກັບຄວາມເປັນຈິງ ແລະ ຜູກພັນຢ່າງໃກ້ຊິດກັບປະຊາຊົນເທົ່ານັ້ນ ຈຶ່ງສາມາດນຳພາປະເທດຊາດກ້າວສູ່ລັດທິສັງຄົມນິຍົມຢ່າງໝັ້ນຄົງ, ສ້າງປະເທດຫວຽດນາມທີ່ເຂັ້ມແຂງ, ຈະເລີນຮຸ່ງເຮືອງ ແລະ ມີຄວາມສຸກ.
ພັກນຳພາປະເທດຊາດປະຕິບັດພາລະກິດປະຕິວັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ໃນໄລຍະຫັນປ່ຽນໃໝ່, ຕອບສະໜອງຄວາມມຸ່ງມາດປາຖະໜາພັດທະນາຂອງປະຊາຊົນຫວຽດນາມ. ພັກກຳນົດວ່າ, ໃນຂະບວນການກ້າວເຂົ້າສູ່ຍຸກໃໝ່ຢ່າງໜັກແໜ້ນນັ້ນ ມີໜ້າທີ່ ແລະ ວິທີການດຳເນີນການທີ່ມີລັກສະນະປະຕິວັດ ເຊິ່ງຕ້ອງອາໄສຄວາມພ້ອມທີ່ຈະອຸທິດ ແລະເສຍສະຫຼະ ຂອງພະນັກງານ, ສະມາຊິກພັກ ແລະ ປະຊາຊົນ ເພື່ອອະນາຄົດທີ່ສົດໃສຂອງຊາດໂດຍລວມ. ການນຳພາທີ່ຖືກຕ້ອງຂອງພັກ ພ້ອມກັບຄວາມຕັດສິນໃຈຂອງທົ່ວພັກ, ທົ່ວປວງຊົນ, ທົ່ວກອງທັບ, ກຳລັງແຮງແຫ່ງມະຫາສາມັກຄີປວງຊົນທັງຊາດ, ສົມທົບກຳລັງແຮງຂອງຊາດ ກັບກຳລັງແຮງຂອງຍຸກສະໄໝ ແນ່ນອນວ່າ ຈະນຳພາຫວຽດນາມກ້າວສູ່ໄຊຊະນະໃໝ່ອັນສະຫງ່າລາສີ, ສືບຕໍ່ຂຽນ “ປະຫວັດສາດທອງຂອງປະເທດຊາດ”.
ໂດຍເສີມຂະຫຍາຍບົດຮຽນທີ່ໄດ້ຮຽນຮູ້ຈາກສົງຄາມຕໍ່ຕ້ານຈັກກະພັດອາເມລິກາເພື່ອກູ້ຊາດ ແລະ ເພື່ອປະຕິບັດພາລະກິດນຳພາປະເທດໃນຍຸກໃໝ່, ພັກກອມມູນິດຫວຽດນາມຕ້ອງສືບຕໍ່ປະຕິບັດບັນດາຂໍ້ກຳນົດ ແລະ ວິທີແກ້ໄຂຕໍ່ໄປນີ້ຢ່າງມີປະສິດທິຜົນ:
ທີໜຶ່ງ, ໃນສະພາບການໂລກາພິວັດທີ່ກວ້າງຂວາງ ແລະ ການປະຕິວັດອຸດສາຫະກຳຄັ້ງທີສີ່ທີ່ແຂງແຮງ, ພັກຕ້ອງສືບຕໍ່ຍົກສູງຄວາມສາມາດໃນການວາງແຜນຍຸດທະສາດການພັດທະນາປະເທດຊາດ. ການສ້າງແຜນກຳນົດແລະແຜນພັດທະນາເສດຖະກິດ-ສັງຄົມ, ຮັບປະກັນການປ້ອງກັນຊາດ-ຄວາມໝັ້ນຄົງ ແລະ ການຕ່າງປະເທດຕ້ອງຕິດພັນກັບຄວາມເປັນຈິງ, ແທດຈິງ ແລະ ແທດເໝາະກັບການປ່ຽນແປງຂອງສາກົນຢ່າງໄວ. ເສີມຂະຫຍາຍບົດບາດຊີ້ນຳ ແລະ ນຳພາຂອງພັກ ໃນການພັດທະນາວິທະຍາສາດເຕັກໂນໂລຊີ, ການປ່ຽນແປງໃໝ່ປະດິດສ້າງ, ຊຸກຍູ້ການຫັນເປັນດິຈິຕອນ, ພັດທະນາເສດຖະກິດພູມປັນຍາ, ເສດຖະກິດສີຂຽວ, ເສດຖະກິດໝຽນວຽນ ແລະອື່ນໆ.
ທີສອງ, ພັກສືບຕໍ່ເສີມຂະຫຍາຍບົດບາດນຳພາຂອງຕົນໃນການປັບປຸງ ແລະ ພັດທະນາບັນດາອົງປະກອບຄື: ເສດຖະກິດຕະຫຼາດຕາມທິດສັງຄົມນິຍົມ; ລັດແຫ່ງອຳນາດກົດໝາຍສັງຄົມນິຍົມຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ, ລະບົບປະຊາທິປະໄຕສັງຄົມນິຍົມ. ໃນນັ້ນ, ເສດຖະກິດຕະຫຼາດຕາມທິດສັງຄົມນິຍົມແມ່ນພະລັງຂັບເຄື່ອນຕົ້ນຕໍ ເພື່ອປົດປ່ອຍກຳລັງການຜະລິດ; ລັດແຫ່ງອຳນາດກົດໝາຍສັງຄົມນິຍົມຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ມີບົດບາດໃນການສ້າງການພັດທະນາ; ລະບົບປະຊາທິປະໄຕສັງຄົມນິຍົມແມ່ນທັງເປົ້າໝາຍ ແລະ ພະລັງຂັບເຄື່ອນການພັດທະນາ.
ການສ້າງແຕ່ລະອົງປະກອບ ແລະ ແກ້ໄຂການພົວພັນລະຫວ່າງອົງປະກອບຢ່າງເໝາະສົມ ປະກອບສ່ວນເຂົ້າໃນການພັດທະນາກຳລັງການຜະລິດທີ່ທັນສະໄໝ, ຄ່ອຍໆປັບປຸງການພົວພັນການຜະລິດ ແລະ ແບບວິທີການຜະລິດທີ່ກ້າວໜ້າ; ຮັບປະກັນຄວາມເໜືອກວ່າອັນເປັນເອກະລັກຂອງຮູບແບບສັງຄົມນິຍົມຫວຽດນາມ.
ທີສາມ, ໃນສະພາບການແຂ່ງຂັນດ້ານຍຸດທະສາດທີ່ດຸເດືອດຫຼາຍຂຶ້ນ ລະຫວ່າງບັນດາປະເທດໃຫຍ່, ຄວາມໝັ້ນຄົງແບບດັ້ງເດີມແລະແບບບໍ່ດັ້ງເດີມໄດ້ຕິດພັນກັນຢ່າງຊັບຊ້ອນ, ພັກຕ້ອງເພີ່ມທະວີຄວາມສາມາດນຳພາໃນດ້ານການປ້ອງກັນປະເທດ, ປ້ອງກັນຄວາມໝັ້ນຄົງ ແລະ ການຕ່າງປະເທດ. ເພີ່ມທະວີການນຳພາເດັດຂາດ, ໂດຍກົງໃນທຸກດ້ານຂອງພັກຕໍ່ກອງທັບ; ກໍ່ສ້າງກອງທັບຕາມທິດ “ປະຕິວັດ, ເປັນລະບຽບຫຼວງ, ຊຳນານການຮົບ, ທັນສະໄໝເທື່ອລະກ້າວ”, ເປັນກຳລັງຫຼັກແຫຼ່ງໃນການປະຕິບັດວຽກງານປົກປັກຮັກສາປະເທດຊາດ ແລະ ເປັນກຳລັງການເມືອງທີ່ຈົງຮັກພັກດີ ແລະເຊື່ອຖືໄດ້ຢ່າງແທ້ຈິງຂອງພັກ, ປະເທດຊາດ ແລະ ປະຊາຊົນ; ຍຶດໝັ້ນມູນເຊື້ອແຫ່ງຄວາມຕັດສິນໃຈຕໍ່ສູ້, ຕັດສິນໃຈຍາດເອົາໄຊຊະນະ, ຮູ້ວິທີການຕໍ່ສູ້ ແລະ ການເອົາຊະນະຂອງກອງທັບປະຊາຊົນຫວຽດນາມ; ຕໍ່ສູ້ຢ່າງເດັດດ່ຽວຕ້ານແຜນການແລະກົນອຸບາຍໃນການ “ຫຼຸດບົດບາດທາງການເມືອງ” ຂອງກອງທັບໂດຍກອງກຳລັງສັດຕູ. ຍຶດໝັ້ນຫຼັກການເອກະລາດ, ເປັນເຈົ້າຕົນເອງ, ການຫັນເປັນຫຼາຍຝ່າຍ, ຄວາມຫຼາກຫຼາຍ, ເດັດດ່ຽວປົກປັກຮັກສາອະທິປະໄຕຂອງປະເທດຊາດ, ພ້ອມກັນນັ້ນ ເປັນເຈົ້າການໃນການເຂົ້າຮ່ວມຢ່າງເລິກເຊິ່ງ, ຮອບດ້ານ ແລະ ຕັ້ງໜ້າ ໃນບັນດາໂຄງປະກອບພາກພື້ນແລະໂລກ ດ້ວຍຄຳຂວັນທີ່ວ່າ ຫວຽດນາມເປັນມິດ ແລະ ເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ.
ທີສີ່, ພັກສືບຕໍ່ຍູ້ແຮງວຽກງານກໍ່ສ້າງ ປັບປຸງພັກ ແລະ ລະບົບການເມືອງ ໃຫ້ສະອາດ ແລະ ເຂັ້ມແຂງໃນທຸກດ້ານ, ຕິດພັນກັບການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດສິນທຳ ແລະ ແບບແຜນຂອງປະທານໂຮ່ຈີມິນ. ໃນເງື່ອນໄຂຂອງພື້ນຖານເສດຖະກິດຕະຫຼາດຕາມທິດສັງຄົມນິຍົມ ແລະ ການເຊື່ອມໂຍງເຂົ້າກັບສາກົນນັ້ນ ຄວາມສ່ຽງຕໍ່ການເສື່ອມໂຊມດ້ານແນວຄິດການເມືອງ, ຄຸນສົມບັດສິນທຳ, ວິຖີການດຳເນີນຊີວິດ; “ການປ່ຽນແປງຕົນເອງ”, “ການຫັນປ່ຽນຕົນເອງ” ພາຍໃນພັກ ຂົ່ມຂູ່ການຢູ່ລອດຂອງພັກແລະລະບອບການປົກຄອງ. ການເພີ່ມທະວີລະບຽບວິໄນ, ປັບປຸງຈັນຍາບັນປະຕິວັດ, ກໍ່ສ້າງຖັນແຖວພະນັກງານທີ່ມີຄຸນສົມບັດສິນທຳ, ມຸ່ງໝັ້ນ, ມີວິໄສທັດ, ຮັບໃຊ້ປະເທດຊາດແລະປະຊາຊົນ ຖືເປັນຄວາມຮຽກຮ້ອງຕ້ອງການອັນຮີບດ່ວນ. ພ້ອມກັນນັ້ນ, ຕ້ອງເປັນເຈົ້າການໃນການປ້ອງກັນ, ສະກັດກັ້ນ ແລະ ຍູ້ຖອຍພະຍາດສໍ້ໂກງ, ການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ປະກົດການຫຍໍ້ທໍ້, ກໍ່ສ້າງພັກໃຫ້ມີຈັນຍາບັນ ແລະ ອາລະຍະທຳ, ເສີມສ້າງແລະປັບປຸງຄວາມເຊື່ອຖືຂອງປະຊາຊົນຕໍ່ພັກຢ່າງສະໝ່ຳສະເໝີ. ພັກກໍ່ສ້າງແລະປັບປຸງຕົນເອງຢ່າງບໍ່ຢຸດຢັ້ງ ໃຫ້ມີກຳລັງແຮງແລະຄວາມສາມາດຕໍ່ສູ້ຢ່າງພຽງພໍ ເພື່ອກຳນົດແນວທາງການເມືອງທີ່ຖືກຕ້ອງ, ແກ້ໄຂປະກົດການຫຍໍ້ທໍ້ຕ່າງໆຢ່າງທັນການ, ແກ້ໄຂຂໍ້ຂັດແຍ່ງໃຫຍ່ ແລະ ບັນຫາຫຍຸ້ງຍາກໄດ້ຢ່າງມີປະສິດທິພາບ, ກຳອຳນາດເພື່ອປະຊາຊົນ, ກຳອຳນາດຢ່າງມີວິທະຍາສາດ, ກຳອຳນາດຢ່າງມີປະຊາທິປະໄຕ, ກຳອຳນາດຕາມກົດໝາຍ, ກຳອຳນາດຢ່າງສັດຊື່ສຸຈະລິດ.
ທີຫ້າ, ພັກຕ້ອງເອົາໃຈໃສ່ເປັນພິເສດເຖິງວຽກງານແນວຄິດ ທິດສະດີ, ດຳເນີນການສະຫຼຸບສັງລວມພຶດຕິກຳແລະພັດທະນາທິດສະດີຢ່າງບໍ່ຢຸດຢັ້ງ, ໃຫ້ຄວາມສຳຄັນກັບການຖອດຖອນບົດຮຽນອັນລ້ຳຄ່າຈາກປະສົບການຂອງບັນພະບຸລຸດໃນປະຫວັດສາດຂອງຊາດ ແລະ ປະສົບການນຳພາປະຕິວັດຂອງພັກເຮົາ, ຜ່ານນັ້ນ ສືບທອດແລະນຳໃຊ້, ແລະພັດທະນາຢ່າງປະດິດສ້າງໃນວຽກງານກໍ່ສ້າງ ແລະ ປົກປັກຮັກສາປະເທດຊາດ. ໃຫ້ຄວາມສຳຄັນກັບການສຶກສາອົບຮົມມູນເຊື້ອ ແລະ ຄຸນສົມບັດປະຕິວັດ, ປຸກຕື່ນນ້ຳໃຈຮັກຊາດ, ເຈດຈຳນົງສ້າງຄວາມເຂັ້ມແຂງຂອງຊາດ, ກຳລັງແຮງແຫ່ງມະຫາສາມັກຄີປວງຊົນທັງຊາດ ແລະ ຄວາມມຸ່ງມາດປາດຖະໜາທີ່ຈະພັດທະນາປະເທດໃຫ້ຮັ່ງມີເຂັ້ມແຂງ ຈະເລີນຮຸ່ງເຮືອງ ແລະມີຄວາມສຸກ. ເດັດດ່ຽວຕໍ່ສູ້ແລະເອົາຊະນະກົນອຸບາຍທຳລາຍມ້າງເພຂອງບັນດາກອງກຳລັງສັດຕູ, ປົກປັກຮັກສາພື້ນຖານແນວຄິດຂອງພັກຢ່າງໝັ້ນຄົງ.
ທີຫົກ, ເພີ່ມທະວີແລະປ່ຽນແປງໃໝ່ການນຳພາຂອງພັກຕໍ່ວຽກງານຂົນຂວາຍມະຫາຊົນ; ສ້າງການປ່ຽນແປງຢ່າງແຂງແຮງໃນຄວາມຮັບຮູ້ ແລະ ການກະທຳຂອງຄະນະພັກ ແລະ ລະບົບການເມືອງ ກ່ຽວກັບວຽກງານຂົນຂວາຍມະຫາຊົນ. ຄະນະພັກ, ອົງການຈັດຕັ້ງພັກສືບຕໍ່ປ່ຽນແປງໃໝ່ແບບວິທີການນຳພາໃຫ້ມີຄວາມໃກ້ຊິດກັບປະຊາຊົນ, ໃກ້ຊິດກັບຮາກຖານ, ແກ້ໄຂຄວາມມຸ່ງມາດປາຖະໜາອັນຊອບທຳຂອງປະຊາຊົນໂດຍໄວ, ເສີມຂະຫຍາຍຂໍ້ດີຂອງຮູບແບບການປົກຄອງທ້ອງຖິ່ນສອງຂັ້ນຕໍ່ໄປໃນໄລຍະຈະມາເຖິງ. ປະຕິບັດທັດສະນະ “ປະຊາຊົນແມ່ນຮາກ”; ປະຊາຊົນແມ່ນໃຈກາງຂອງການພັດທະນາ; ແຜນນະໂຍບາຍ, ແນວທາງ ແລະ ນະໂຍບາຍທັງໝົດ ລ້ວນແຕ່ເກີດມາຈາກຄວາມປາດຖະໜາ, ຜົນປະໂຫຍດອັນຊອບທຳ ແລະ ຄວາມສຸກຂອງປະຊາຊົນ. ການນຳຂອງພັກສືບຕໍ່ເປັນແກນຫຼັກ, ເປັນທຸງທີ່ເຕົ້າໂຮມສະຕິປັນຍາ, ຄວາມປາດຖະໜາ ແລະ ກຳລັງແຮງແຫ່ງມະຫາສາມັກຄີປວງຊົນທັງຊາດ, ຮຽກຮ້ອງປະຊາຊົນທັງປະເທດ, ທະວີຄູນຄວາມພາກພູມໃຈ, ຄວາມເຄົາລົບຕົນເອງ ແລະເຈດຈຳນົງຂອງທັງຊາດ, ກະຕູ້ນແລະສ້າງແຮງບັນດານໃຈໃຫ້ຄົນທຸກຊົນຊັ້ນ, ລະດົມຊັບພະຍາກອນທັງໝົດ ແລະ ໃຊ້ປະໂຫຍດຈາກທຸກໂອກາດເພື່ອພັດທະນາປະເທດ.
ປະຫວັດສາດຊີ້ນຳທັງປະຈຸບັນແລະອະນາຄົດ. ບົດຮຽນກ່ຽວກັບການນຳພາຂອງພັກໃນການຕໍ່ຕ້ານຈັກກະພັດອາເມລິກາເພື່ອກູ້ຊາດ ແມ່ນມໍລະດົກທາງຈິດໃຈອັນລ້ຳຄ່າ ແລະ ເປັນເຂັມທິດນຳທາງສູ່ຍຸກສະໄໝໃໝ່ຂອງຊາດ. ພາຍໃຕ້ຄັນທຸງອັນສະຫງ່າລາສີຂອງພັກ, ປະຊາຊົນແລະກອງທັບທັງໝົດໄດ້ບັນລຸໄຊຊະນະອັນຍິ່ງໃຫຍ່ເພື່ອປະເທດຊາດ, ໂດຍສະເພາະການຕໍ່ສູ້ຕ້ານຈັກກະພັດອາເມລິກາເພື່ອກູ້ຊາດ ໄດ້ສະແດງໃຫ້ເຫັນເຖິງຄວາມກ້າຫານ, ຄວາມສະຫຼາດ, ຄຸນທຳ, ສັກສີ ແລະ ຈິດສຳນຶກຂອງປະຊາຊົນຫວຽດນາມ ແລະ ປະເທດຊາດຫວຽດນາມ; ພາຍໃຕ້ການນຳພາຂອງພັກ ແລະ ການຮຽກຮ້ອງຂອງພັກ, ເສີມຂະຫຍາຍຄວາມພາກພູມໃຈ, ຄວາມເຊື່ອໝັ້ນ, ຄວາມເປັນເຈົ້າຕົນເອງ, ຄວາມອີງໃສ່ຕົນເອງແລະສ້າງຄວາມເຂັ້ມແຂງດ້ວຍຕົນເອງ, ປະຊາຊົນເຮົາຈະສືບຕໍ່ຂຽນສິ່ງມະຫັດສະຈັນໃນສະຕະວັດທີ 21, ນຳພາປະເທດຊາດກ້າວເຂົ້າສູ່ຍຸກໃໝ່ຢ່າງໜັກແໜ້ນ, ເພື່ອສັນຕິພາບ, ເອກະລາດ, ປະຊາທິປະໄຕ, ຮັ່ງມີຈະເລີນຮຸ່ງເຮືອງ, ວັດທະນາຖາວອນ, ມີຄວາມຜາສຸກ ແລະ ກ້າວເຂົ້າສູ່ລັດທິສັງຄົມນິຍົມຢ່າງໝັ້ນຄົງ.
--------------------------------------------------------
(1) ສຈ. ປອ. ໂຕເລິມ: “ຫວຽດນາມສະຫວ່າງສົດໃສ”, ວາລະສານກອມມູນິດ, ສະບັບທີ 1055, ເດືອນກຸມພາ 2025, ໜ້າ 5.
(2) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 8, ໜ້າ 273
(3) ໂຮ່ຈີມິນ: ນິພົນຄົບຊຸດ, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 289
(4), (5) ເບິ່ງ: ເອກະສານຄົບຊຸດຂອງພັກ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2001, ເຫຼັ້ມ 15, ໜ້າ 30, 172
(6) ເບິ່ງ: ເອກະສານຄົບຊຸດຂອງພັກ, ປຶ້ມທີ່ໄດ້ແນະນຳ, 2002, ເຫຼັ້ມ 16, ໜ້າ 185
(7) ເບິ່ງ: ເອກະສານຄົບຊຸດຂອງພັກ, ປຶ້ມທີ່ໄດ້ແນະນຳ, 2002, ເຫຼັ້ມ 20, ໜ້າ 62
(8) ເບິ່ງ: ເອກະສານຄົບຊຸດຂອງພັກ, ປຶ້ມທີ່ໄດ້ແນະນຳ, 2002, ເຫຼັ້ມ 21, ໜ້າ528
(9) ເອກະສານຄົບຊຸດຂອງພັກ, ປຶ້ມທີ່ໄດ້ແນະນຳ, 2004, ເຫຼັ້ມ 37, ໜ້າ 457
(10) ສຈ. ປອ. ໂຕເລິມ: “ຫວຽດນາມສະຫວ່າງສົດໃສ”, ເອກະສານທີ່ໄດ້ແນະນຳ, ໜ້າ 7.
