ເນື້ອໃນ, ບົດບາດ ແລະ ທີ່ຕັ້ງຂອງວຽກງານທີ່ປຶກສາໃນຂົງເຂດການຈັດຕັ້ງກໍ່ສ້າງພັກ

ຕາມ​ພົດ​ຈະ​ນາ​ນຸ​ກົມພາສາ​ຫວຽດ​ນາມ, ການໃຫ້ຄຳປຶກສາຄື: “1. ໃຫ້​ຄຳ​ເຫັນ, ຊ່ວຍ​ເຫຼືອ​ຜູ້​ບັນ​ຊາ​ການ​ໃນ​ການ​ສ້າງ ແລະ ຈັດ​ຕັ້ງ​ປະ​ຕິ​ບັດ​ແຜນ​ການ​ການ​ທະ​ຫານ; 2. ໃຫ້​ຄຳ​ເຫັນ​ກ່ຽວ​ກັບແຜນ​ນະ​ໂຍ​ບາຍ, ແຜນ​ການ ແລະ ມາດ​ຕະ​ການ​ໃຫ້​ແກ່​ບຸກ​ຄົນ ຫຼື ອົງ​ການ”⁽¹⁾. ດັ່ງ​ນັ້ນ, ການ​ໃຫ້ຄຳປຶກສາ​​ແມ່ນ​ໃຫ້​ຄຳ​ເຫັນ, ຂໍ້ສະ​ເໜີ, ​ຄຳແນະນຳ​ກ່ຽວ​ກັບ​ແຜນນະ​ໂຍບາຍ, ​ແຜນງານ, ​ເນື້ອ​ໃນ, ຂົງ​ເຂດ, ຂັ້ນຕອນ​ຕາມ​ເປົ້າ​ໝາຍ ​ແລະ ຄວາມ​ຕ້ອງການທີ່ຕ້ອງການການ​ໃຫ້​ຄຳ​ປຶກສາ.

ວຽກງານທີ່ປຶກສາແມ່ນການສັງລວມວຽກງານ, ກິດຈະກໍາ, ມາດຕະການທີ່ດໍາເນີນໄປຕາມຂະບວນການສະເພາະຂອງອົງການຈັດຕັ້ງ ຫຼືບຸກຄົນ ທີ່ມີວິຊາສະເພາະ ແລະເປັນມືອາຊີບ ຕາມຫຼັກການຂອງການຈັດຕັ້ງແລະການດໍາເນີນງານ, ຕອບສະໜອງຄວາມຕ້ອງການ ຂອງອົງການ ຫຼືບຸກຄົນ ທີ່ຕ້ອງການຄໍາປຶກສາກ່ຽວກັບແຜນນະໂຍບາຍ, ເນື້ອໃນ ແລະວຽກງານທີ່ແນ່ນອນ ໂດຍເປົ້າໝາຍແລະຄວາມຕ້ອງການທີ່ວາງໄວ້. ວຽກງານທີ່ປຶກສາໃນຂົງເຂດການຈັດຕັ້ງກໍ່ສ້າງພັກ ແມ່ນການຄົ້ນຄວ້າ, ການສະເໜີບົນພື້ນຖານວິທະຍາສາດແລະພຶດຕິກຳ ເພື່ອຊ່ວຍໃຫ້ຜູ້ນໍາມີພື້ນຖານໃນການຕັດສິນໃຈ ແລະ ການຈັດຕັ້ງປະຕິບັດ ວຽກງານການຈັດຕັ້ງກໍ່ສ້າງພັກ ຢ່າງມີປະສິດທິຜົນ.    

ວຽກ​ງານ​ທີ່​ປຶກ​ສາ​ຍຸດ​ທະ​ສາດໃນຂົງເຂດການຈັດຕັ້ງກໍ່ສ້າງ​ພັກ ແມ່ນວຽກງານທີ່ປຶກສາລະດັບສູນກາງ ເພື່ອໃຫ້ຄຳປຶກສາແກ່ຄະນະບໍລິຫານງານສູນກາງພັກ ເຊິ່ງໂດຍກົງແມ່ນກົມການເມືອງ ແລະຄະນະເລຂາທິການສູນກາງ ກ່ຽວກັບວຽກງານານການຈັດຕັ້ງ ແລະພະນັກງານຂອງທົ່ວພັກ. ໃນນັ້ນ, ຄະນະຈັດຕັ້ງສູນກາງຖືບົດບາດເປັນອົງການຮັບຜິດຊອບຕົ້ນຕໍ ໃນການປະຕິບັດ​ວຽກ​ງານ​ທີ່ປຶກສາຍຸດ​ທະ​ສາດ​ກ່ຽວ​ກັບ​ວຽກ​ງານ​ກໍ່ສ້າງ​ພັກ. ນອກຈາກນີ້, ຍັງມີການປະສານສົມທົບຂອງບັນດາອົງການພັກສູນກາງ, ບັນດາຄະນະສູນກາງ, ກົມການຈັດຕັ້ງພະນັກງານຂອງອົງການສູນກາງ, ບັນດາຄະນະຈັດຕັ້ງພັກທຸກຂັ້ນ ແລະ ບັນດາອົງການທີ່ກ່ຽວຂ້ອງ.

​ເນື້ອ​ໃນ​ທີ່​ປຶກສາ​ໃນ​ດ້ານ​ການຈັດ​ຕັ້ງ​ກໍ່ສ້າງ​ພັກ ລວມມີ​ການ​ກໍ່ສ້າງ ​ແລະ ຄຸ້ມ​ຄອງການຈັດ​ຕັ້ງກົງຈັກ, ການບັນຈຸບຸກຄະລາກອນ, ລັດຖະກອນ ພາລະກອນ ​ໃນ​ລະບົບ​ການ​ເມືອງ; ການກໍ່ສ້າງລະບົບການຈັດຕັ້ງຂອງພັກ; ການກໍ່ສ້າງແລະຄຸ້ມຄອງຖັນແຖວສະມາຊິກພັກ; ວຽກງານພະນັກງານ; ການປົກປ້ອງທາງດ້ານການເມືອງພາຍໃນ. ວຽກ​ງານ​ທີ່​ປຶກ​ສາ​ຍຸດ​ທະ​ສາດຂອງບັນດາ​ອົງການ​ສູນ​ກາງ​ພັກ​ໃນ​ຂົງ​ເຂດການຈັດຕັ້ງກໍ່ສ້າງ​ພັກ ​ແມ່ນ​ດຳ​ເນີນການຜ່ານ​ວິທີ​ການ​ຕົ້ນຕໍ​ດັງຕໍ່ໄປນີ້: ໃຫ້ຄຳປຶກສາດ້ານ​ການ​ວາງ​ແຜນແນວ​ທາງ ​ແລະ ແຜນນະ​ໂຍບາຍ​ຂອງ​ພັກ; ໃຫ້ຄຳປຶກສາແກ່​ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາທິການ ​ໃນ​ການ​ຊີ້​ນຳ​ປະຕິບັດ​ໂດຍ​ກົງ​ ອອກ​ເອກະສານ​ຊີ້​ນຳ​ການປະຕິບັດ, ການກວດກາ​ ແລະ ຕິດຕາມກວດກາການປະຕິບັດ, ການຈັດ​ຕັ້ງ​ປະຕິບັດເອກະສານຂອງພັກ​ໂດຍ​ກົງ; ການສະຫຼຸບເບື້ອງຕົ້ນ, ສະຫຼຸບສັງລວມ, ປະ​ເມີນ​ຜົນ​ການ​ປະຕິບັດ​ເອກະສານ​ຂອງ​ພັກ ກ່ຽວ​ກັບ​ການ​ຈັດຕັ້ງກໍ່ສ້າງ​ພັກ; ດຳ​ເນີນ​ການ​ຄົ້ນ​ຄ້ວາ, ວິ​ເຄາະ, ໃຫ້ຄຳປຶກສາ​ແລະ ຄາດ​ຄະ​ເນ​ຍຸດ​ທະ​ສາດ ​ກ່ຽວ​ກັບ​ວຽກ​ງານ​ຈັດ​ຕັ້ງ ​ແລະ ພະນັກງານ​ໃນ​ແຕ່ລະ​ໄລຍະ; ປະກອບສ່ວນຄວາມຄິດເຫັນ; ການກວດກາ; ການປະເມີນເອກະສານ, ໂຄງການ... ຂອງບັນດາອົງການໃນລະບົບການເມືອງ ທີ່ກ່ຽວຂ້ອງກັບວຽກງານການຈັດຕັ້ງກໍ່ສ້າງພັກ; ສະເໜີ, ເປັນປະທານໃນການຈັດຕັ້ງປະຕິບັດ ຫຼື ປະສານງານການປະຕິບັດຫົວຂໍ້ ແລະ ໂຄງການຄົ້ນຄວ້າວິທະຍາສາດ, ພັດທະນາທິດສະດີ ໃນຂົງເຂດການຈັດຕັ້ງກໍ່ສ້າງພັກ.

ບົດບາດ ທີ່ຕັ້ງສຳຄັນຂອງວຽກງານທີ່ປຶກສາຍຸດທະສາດໃນຂົງເຂດການຈັດຕັ້ງກໍ່ສ້າງພັກນັ້ນ ກ່ອນອື່ນໝົດແມ່ນມາຈາກຄວາມສຳຄັນເປັນພິເສດຂອງການຈັດຕັ້ງກໍ່ສ້າງພັກ. ​ໃນ​ວຽກ​ງານ​ກໍ່ສ້າງ​​ແລະປັບປຸງພັກໂດຍລວມນັ້ນ ​ພັກໄດ້ໃຫ້ຄວາມສຳຄັນຕໍ່ການຈັດຕັ້ງກໍ່ສ້າງພັກສະເໝີ ​ແລະ ​ໄດ້​ຮັບ​ການ​ຮັບ​ຮູ້​ຢ່າງ​ເລິກ​ເຊິ່ງ​ກວ່າ​ໃນ​ແຕ່ລະ​ວາລະຂອງ​ກອງ​ປະຊຸມໃຫຍ່. ຈາກ​ເປົ້າ​ໝາຍ​ທີ່​ກຳນົດໄວ້​ໃນ​ມະຕິ​ກອງ​ປະຊຸມ​ສູນ​ກາງພັກ​ຄັ້ງ​ທີ 4 (ສະໄໝ​ທີ XII) “ເອົາ​ໃຈ​ໃສ່​ແກ້​ໄຂ​ຈຸດ​ອ່ອນ​ໃນ​ວຽກ​ງານ​ບຸກຄະລາ​ກອນ ແລະການຄຸ້ມຄອງ​ບຸກຄະລາ​ກອນ; ກໍ່ສ້າງ​ຖັນ​ແຖວ​ພະນັກງານ, ສະມາຊິກ​ພັກ, ​ໂດຍ​ສະ​ເພາະ​ແມ່ນ​ ພະນັກງານ​ນຳພາ ຄຸ້ມຄອງທຸກລະດັບ ໃຫ້ມີ​ເຈດ​ຈຳນົງ​ທາງ​ການ​ເມືອງທີ່ເຂັ້ມແຂງ, ມີ​ຈັນຍາ​ບັນ, ມີຄວາມ​ຮັບຜິດຊອບ, ມີຄວາມ​ສາມາດ ​ແລະ ມີແຮງ​ຈູງ​ໃຈ​ທີ່​ຖືກຕ້ອງ, ເປັນຜູ້ບຸກ​ເບີກ​ຢ່າງ​ແທ້​ຈິງ, ເປັນ​ແບບຢ່າງທີ່ດີ, ຍາມ​ໃດ​ກໍ່​ຖື​ຜົນ​ປະ​ໂຫຍດຂອງສ່ວນ​ລວມ, ຂອງ​ຊາດ ແລະ ປະ​ຊາ​ຊົນ ເໜືອ​ຜົນ​ປະ​ໂຫຍດ​ສ່ວນ​ຕົວ, ເປັນ​ພະນັກງານ​ຂອງ​ປະ​ຊາ​ຊົນ ແລະຮັບ​ໃຊ້​ປະ​ຊາ​ຊົນຢ່າງແທ້ຈິງ. ເສີມສ້າງຄວາມ​ໄວ້​ເນື້ອ​ເຊື່ອ​ໃຈ​ຂອງ​ປະຊາຊົນ​ຕໍ່​ພັກ”⁽²⁾, ລາຍງານການເມືອງຂອງກອງປະຊຸມໃຫຍ່ພັກກອມມູນິດຫວຽດນາມຄັ້ງທີ XIII ໄດ້ສະແດງໃຫ້ເຫັນເຖິງການພັດທະນາອັນສໍາຄັນທາງດ້ານທັດສະນະ ແລະ ຄວາມຮັບຮູ້ ເມື່ອເນັ້ນໜັກເຖິງອົງປະກອບທຳອິດໃນເປົ້າໝາຍການພັດທະນາທົ່ວໄປໃນຊຸມປີຕໍ່ໜ້າຄື: “ຍົກສູງຄວາມສາມາດນຳພາ, ຄວາມສາມາດກຳອຳນາດ ແລະ ກຳລັງຕໍ່ສູ້ຂອງພັກ; ກໍ່ສ້າງ​ພັກ ​ແລະ ລະບົບ​ການ​ເມືອງ​ທີ່​ສະອາດ ​ແລະ ​ໝັ້ນຄົງເຂັ້ມ​ແຂງ​ໃນ​ທຸກ​ດ້ານ”⁽³⁾, ໂດຍສອດຄ່ອງ​ກັບ​ການ​ເນັ້ນ​ໜັກ ແລະການລວມ “ການເພີ່ມທະວີ​ການ​ກໍ່ສ້າງ ປັບປຸງພັກ ແລະ ລະບົບ​ການ​ເມືອງ​ ທີ່​ສະອາດ ​ແລະ ເຂັ້ມ​ແຂງ” ໄວ້​ເປັນອົງປະກອບທຳ​ອິດ​ໃນ​ຫົວ​ຂໍ້​ຂອງ​ກອງ​ປະຊຸມ​ໃຫຍ່​ຄັ້ງ​ທີ XIII. ນີ້​ແມ່ນບາດກ້າວ​ພັດທະນາການໃໝ່ທາງດ້ານຈິນຕະນາການ, ສືບ​ຕໍ່​ຊີ້​ແຈ້ງ​ແນວທາງ​ການ​ສ້າງຄວາມສາມາດນຳພາ ແລະກຳອຳນາດງ​ຂອງ​ພັກ ​ທີ່ກຳນົດ​ໄວ້​ໃນ ໂຄງການການເມືອງກໍ່ສ້າງປະເທດໃນສະໄໝຂ້າມຜ່ານໄປສູ່ລັດທິສັງຄົມນິຍົມ (ສະບັບເພີ່ມເຕີມ, ພັດທະນາ​ໃນ​ປີ 2011). ເອກະສານ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XIII ຂອງ​ພັກ​ໄດ້​ສະ​ແດງ​ໃຫ້​ເຫັນຢ່າງຄົບຖ້ວນ ແລະເລິກເຊິ່ງ ເຖິງ​ຄວາມ​ສຳຄັນ​ຂອງ​ວຽກ​ງານການຈັດຕັ້ງ​ກໍ່ສ້າງ​ພັກ​ໃນ​ເງື່ອນໄຂ​ທີ່​ພັກກຳອຳນາດການປົກຄອງ, ກໍ່ສ້າງ ​ແລະ ປັບປຸງບູລະນະລັດແຫ່ງອຳນາດກົດໝາຍ​ສັງຄົມ​ນິຍົມ​, ພັດທະນາ​ເສດຖະກິດ​ຕະຫຼາດ​ຕາມ​ທິດ​ສັງຄົມ​ນິຍົມ ​ແລະ ​ເຊື່ອມ​ໂຍງ​ເຂົ້າ​ກັບ​ສາກົນ. ບົດລາຍ​ງານ​ສະຫຼຸບ​ວຽກ​ງານ​ກໍ່ສ້າງ​ພັກ ​ແລະ ການຈັດ​ຕັ້ງ​ປະຕິບັດກົດລະບຽບຂອງ​ພັກ ​ໄດ້​ນຳ​ສະ​ເໜີບົດຮຽນປະສົບການ 5 ປະການ; ​ໃນ​ນັ້ນ, ບົດຮຽນ​ທີ 3 ​ໄດ້​ເນັ້ນ​ໜັກ​ວ່າ: “​ຕ້ອງຊາບຊຶມ​ຢ່າງ​ເລິກ​ເຊິ່ງເຖິງທັດສະນະທີ່ວ່າ ວຽກ​ງານ​ພະນັກງານ​ແມ່ນ “ກຸນແຈ”​ ຂອງ​ການ​ກໍ່ສ້າງ​ພັກ, ຕິດ​ພັນ​ກັບ​ການ​ຢູ່​ລອດ​ຂອງ​ພັກ ​ແລະ ຊະ​ຕາ​ກຳ​ຂອງ​ລະບອບ; ພະນັກງານ​ແມ່ນ​ຮາກ​ເຫງົ້າ​ຂອງ​ທຸກ​ວຽກ​ງານ, ​ເປັນ​ປັດ​ໄຈ​ຕັດສິນ​ຄວາມ​ສຳ​ເລັດ​ຂອງ​ການ​ປະຕິວັດ”⁽⁴⁾. ໂດຍຖືເປັນ​ວິທີ​ການ​ຊີ້​ນຳ​ນຳພາ​ຂອງ​ພັກຜູ້ກຳອຳນາດ, ວຽກ​ງານ​ການຈັດ​ຕັ້ງ​ກໍ່ສ້າງ​ພັກຕ້ອງ​ເຮັດໜ້າທີ່ໃຫ້ຄຳປຶກສາກ່ຽວກັບການຈັດ​ຕັ້ງ ​ແລະສັບຊ້ອນກົນໄກຂອງ​ລະບົບ​ການ​ເມືອງ ​ແລະ ປັບປຸງ​ປະສິດທິ​ຜົນ​ການ​ດຳເນີນງານ, ສ້າງ​ຖັນ​ແຖວ​ພະນັກງານ​ທີ່​ມີ​ຄຸນ​ສົມບັດ ​ແລະ ຄຸນ​ນະພາ​ບສຳລັບ​ພັກ ​ເພື່ອ​ຮັບປະກັນ​ການ​ປະຕິບັດ​ເປົ້າ​ໝາຍ​ກໍ່ສ້າງ​ພັກ ​ແລະ ລະບົບ​ການ​ເມືອງ​ທີ່ສະອາດ​ປອດ​ໃສ ​ແລະ ເຂັ້ມ​ແຂງ​ໃນ​ທຸກ​ດ້ານ; ສ້າງກົງຈັກລັດທີ່ກະທັດລັດຮັດກຸມ ແລະເຄື່ອນໄຫວຢ່າງມີປະສິດທິພາບແລະປະສິດທິຜົນ.​ເວົ້າ​ອີກຢ່າງໜຶ່ງ, ການ​ປະຕິບັດ​ວຽກ​ງານຈັດຕັ້ງກໍ່ສ້າງ​ພັກເປັນ​ຢ່າງ​ດີ ປະກອບສ່ວນ​ສຳຄັນ​ເຂົ້າ​ໃນ​ການ​ຍົກ​ສູງ​ຖານະ​ຕຳ​ແໜ່​ງຂອງພັກ, ຢືນຢັນ​ບົດບາດ​ນຳພາ ​ແລະ ແນວ​ທາງ​ທີ່​ຖືກຕ້ອງ​ຂອງ​ພັກ, ​ແມ່ນ​ເງື່ອນ​ໄຂ​ສຳຄັນ​ເພື່ອ​ຮັບປະກັນ​ເປົ້າ​ໝາຍການ​ພັດທະນາ​ຮອດ​ປີ 2025, 2030, 2045 ຕາມ​ກຳນົດ​ຂອງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XIII.

​ໃນ​ທຸກຂົງ​ເຂດ, ວຽກ​ງານທີ່ປຶກສາ​ມີ​ບົດບາດ​ສຳຄັນ​ທີ່​ສຸດ​ໃນ​ການ​ພັດທະນາ​ອົງການ, ໜ່ວຍງານ ແລະ ການຈັດຕັ້ງ. ຝ່າຍທີ່ປຶກສາ​ຂອງ​ໜ່ວຍ​ງານໄດ້ຮັບການ​ສ້າງ​ຂຶ້ນ​ດ້ວຍ​ໜ້າ​ທີ່​ທີ່​ເໝາະ​ສົມ ​ເພື່ອ​ຊ່ວຍ​ໃຫ້​ຜູ້​ນຳ​ສາມາດຕັດສິນ​ໃຈ​ໄດ້ຢ່າງ​ຖືກຕ້ອງ, ສົມ​ເຫດ​ສົມ​ຜົນ ​ແລະ ມີ​ປະສິດທິ​ຜົນ, ພ້ອມ​ທັງ​ເພີ່ມ​​​ປະສິດທິພາບຂອງ​ການຈັດຕັ້ງປະຕິບັດຕາມການ​ຕັດສິນ​ໃຈ. ຜະລິດຕະພັນຂອງພະນັກງານແມ່ນປັດໄຈນໍາເຂົ້າໃນຂະບວນການຕັດສິນໃຈ ແລະການຕັດສິນໃຈສຸດທ້າຍຂອງຜູ້ນໍາ. ຜະລິດຕະພັນທີ່ປຶກສາເປັນຂໍ້ມູນໃນການຕັດສິນໃຈ ແລະ ການຕັດສິນໃຈຂັ້ນສຸດທ້າຍຂອງຜູ້ນຳ. ຜະລິດຕະພັນທີ່ປຶກສາຍິ່ງເປັນວິທະຍາສາດ ມີທິດສະດີ ມີພື້ນຖານພຶດຕິກຳຫຼາຍເທົ່າໃດ ການຕັດສິນໃຈຂອງຜູ້ນຳກໍ່ຈະແມ່ນຢຳຫຼາຍຂຶ້ນເທົ່ານັ້ນ ເຊິ່ງຊ່ວຍເພິ່ມປະສິດທິພາບໃນການພັດທະນາ ແລະ ຄວາມກ້າວໜ້າຂອງອົງການ ໜ່ວຍງານ ແລະການຈັດຕັ້ງ. ກົງກັນຂ້າມ, ຫານຜະລິດຕະພັນທີ່ປຶກສາບໍ່ສົມເຫດສົມຜົນ ແລະ ບໍ່ສາມາດເປັນໄປໄດ້ ການຕັດສິນໃຈຂອງຜູ້ນຳກໍ່ຈະພົບກັບຄວາມຫຍຸ້ງຍາກລຳບາກຫຼາຍຢ່າງ ແລະ ບໍ່ເໝາະສົມຕໍ່ຄວາມເປັນຈິງ.    

ຄວາມຮຽກຮ້ອງຕ້ອງການສຳລັບ​ວຽກ​ງານທີ່ປຶກສາຍຸດ​ທະ​ສາດ​ໃນ​ຂົງ​ເຂດການຈັດຕັ້ງ​ກໍ່ສ້າງ​ພັກ

ທີໜຶ່ງ, ຄວາມຕ້ອງການດ້ານຄຸນນະພາບຂອງຄຳປຶກສາ.

ການໃຫ້ຄໍາປຶກສາຕ້ອງຮັບປະກັນຄຸນນະພາບ, ຕ້ອງຊັດເຈນ, ຕ້ອງມີວິໄສທັດໂດຍອີງໃສ່ການວິເຄາະຂໍ້ມູນ, ຂໍ້ມູນທີ່ມີພື້ນຖານວິທະຍາສາດ, ຮັບປະກັນຄວາມເປັນໄປໄດ້. ເພື່ອໃຫ້ຄຳປຶກສາ ແລະ ຂໍ້ສະເໜີແນະມີຄຸນນະພາບ, ຮັບປະກັນຄວາມຖືກຕ້ອງແລະແມ່ນຢຳ, ພະນັກງານທີ່ປຶກສາໃນດ້ານການຈັດຕັ້ງກໍ່ສ້າງພັກ ຈະຕ້ອງມີຄຸນສົມບັດ ແລະ ຄວາມສາມາດດ້ານວິຊາສະເພາະ, ມີຂໍ້ມູນທີ່ຄົບຖ້ວນ, ກຳແໜ້ນແຜນນະໂຍບາຍຂອງພັກໃນການຈັດຕັ້ງກໍ່ສ້າງພັກ, ຕ້ອງມີຄວາມຊື່ສັດ ແລະ ພາວະວິໄສ; ຜະລິດຕະພັນທີ່ປຶກສາຕ້ອງແທດຈິງ, ຮັບປະກັນຄວາມເປັນໄປໄດ້. ຜູ້​ເຮັດ​ວຽກງານທີ່ປຶກສາ​ຕ້ອງເຊີດຊູ​ຄວາມ​ຮັບ​ຜິດ​ຊອບ​ສ່ວນ​ຕົວ​ໃນ​ການ​ໃຫ້​ຄຳ​ປຶກ​ສາ ແລະ ການສະ​ເໜີ​ບັນ​ຫາ; ຕ້ອງ​ບໍ່​ເປັນອັດຕະວິໄສ, ເຈດຈຳນົງນິຍົມ ​ແລະ ຕ້ອງ​ມີ​ວິ​ໄສ​ທັດ​ຍຸດ​ທະ​ສາດ, ​ເບິ່ງ​ກວ້າງມອງໄກ ​ແລະ ​ເລິກ​ເຊິ່ງ; ຕ້ອງ​ຄິດ​ໄລ່ ​ແລະ ຄາດ​ຄະ​ເນ​ບັນດາ​ຄວາມ​ໄດ້​ປຽບ, ຄວາມ​ຫຍຸ້ງຍາກ, ຄວາມ​ສ່ຽງ, ລວມທັງ​ຜົນ​ກະທົບພາວະວິໄສແລະອັດຕະວິໄສ​ທີ່ອາດຈະເກີດຂຶ້ນ ​ເພື່ອເປັນເຈົ້າການໃນການ​ສະ​ເໜີ​​ມາດ​ຕະການ​ແກ້​ໄຂ​ຢ່າງ​ທັນ​ການ ​ແລະ ມີ​ປະສິດທິ​ຜົນ.   

ທີສອງ, ຮັບປະກັນ​ຄວາມຖືກຕ້ອງຕາມແຜນນະ​ໂຍບາຍ ແລະແນວທາງ​ຂອງ​ພັກ ​ກ່ຽວ​ກັບວຽກງານ​ການຈັດ​ຕັ້ງ​ກໍ່ສ້າງ​ພັກ.

ການໃຫ້ຄຳ​ປຶກສາໃນຂົງເຂດການຈັດ​ຕັ້ງ​ກໍ່ສ້າງ​ພັກ ຕ້ອງ​ອີງ​ໃສ່​ພາລະບົດບາດ ແລະ​ໜ້າ​ທີ່ຂອງ​ຄະນະ​ຈັດຕັ້ງທຸກ​ຂັ້ນ; ກຳ​ແໜ້ນ, ຊາບຊຶມຢ່າງເລິກເຊິ່ງ ​ແລະ ປະຕິບັດ​ແນວທາງ ແຜນ​ນະ​ໂຍບາຍ​ຂອງ​ພັກ ​ກ່ຽວ​ກັບ​ການຈັດ​ຕັ້ງ​ກໍ່ສ້າງ​ພັກ​ ຢ່າງ​ເຂັ້ມ​ງວດ, ຕິດຕາມ​ການ​ນຳພາ ​ແລະ ຊີ້​ນຳ​ຂອງ​ຄະນະ​ບໍລິຫານ​ງານ​ສູນ​ກາງ, ກົມ​ການ​ເມືອງ, ຄະນະ​ເລຂາທິການ ແລະ ຄະນະ​ພັກ​ທຸກ​ຂັ້ນຢ່າງໃກ້ຊິດ. ການ​ໃຫ້​ຄຳ​ປຶກສາ​ຕ້ອງ​ອີງ​ໃສ່​ຂໍ້ກຳນົດກົດລະບຽບ​ໃນ​ປະຈຸ​ບັນຂອງພັກ, ຢ່າເຮັດຕາມຄວາມຄິດ ແລະຄວາມຕ້ອງການສ່ວນຕົວຂອງທີ່ປຶກສາ ຫຼືຜູ້ສະເໜີສ່ວນບຸກຄົນ ຢ່າງບໍ່ສົມເຫດສົມຜົນ. ໃນ​ການໃຫ້ຄຳ​ປຶກສາ ​ແລະ ສະ​ເໜີວິທີ​ແກ້​ໄຂ​ວຽກ​ງານ​ທີ່​ໄດ້​ຮັບ​ມອບ​ໝາຍ, ​ຖ້າຫາກ​ພົບຄວາມຫຍຸ້ງຍາກໃນການ​ປະຕິບັດ​ໜ້າ​ທີ່​ທີ່​ໄດ້​ຮັບ​ມອບ​ໝາຍ ຫຼືພົບບັນຫາ​ຈາກ​ການ​ປະຕິບັດ​ລະບຽບ​ການ ​ແມ່ນ​ຕ້ອງ​ລາຍ​ງານ, ​ແນະນຳ ​ແລະ ສະ​ເໜີຕໍ່ໜ່ວຍງານທີ່​ມີອຳນາດໜ້າທີ່ ເພື່ອຄົ້ນຄວ້າ, ແກ້ໄຂ ແລະ ​ເພີ່ມ​ເຕີມ.

ທີ​ສາມ, ຮັບປະກັນ​ເນື້ອ​ໃນ​ຂອງຄຳ​ປຶກສາມີຄວາມພາວະວິໄສ ​ແລະ ຊື່​ສັດ.

ຫຼັກການນີ້ແມ່ນມາຈາກຄວາມຕ້ອງການໃນການຮັບປະກັນຄຸນນະພາບ ແລະ ຄວາມຖືກຕ້ອງຊັດເຈນ ຂອງບັນຫາຄຳປຶກສາແລະຂໍ້ສະເໜີ. ເວົ້າອີກຢ່າງໜຶ່ງ, ການປະຕິບັດຕາມຫຼັກການນີ້ສ້າງພື້ນຖານ ແລະ ຮັບຮອງວ່າບັນຫາຄຳປຶກສາ ແລະ ຂໍ້ສະເໜີມີຄວາມຖືກຕ້ອງ ແລະມີຄຸນນະພາບສູງ. ພຽງ​ແຕ່​ບົນ​ພື້ນຖານ​ການ​ວິ​ເຄາະ, ການກຳແໜ້ນຫຼັກຖານ​ວິ​ທະ​ຍາ​ສາດ, ພື້ນຖານທິດ​ສະ​ດີ​ ແລະພຶດຕິກຳ ຂອງວຽກງານຈັດຕັ້ງກໍ່ສ້າງ​ພັກ​ເທົ່າ​ນັ້ນ ທີ່ປຶກສາຈຶ່ງ​ສາມາດໃຫ້ຄຳປຶກສາ ​ແລະ ສະ​ເໜີ​​ໂຄງການ, ​ແຜນການ ​ແລະ ວິທີ​ແກ້​ໄຂ​ທີ່​ມີປະສິດທິຜົນແລະເໝາະ​ສົມ.

ຄຳປຶກສາຈະຕ້ອງມາຈາກຄວາມເປັນຈິງ ຫຼືສະຖານະການພາວະວິໄສຂອງວຽກງານ, ພາລະກິດທີ່ກຳລັງແກ້ໄຂ ແລະ ຄວາມສາມາດໃນການເຮັດໃຫ້ພາລະກິດນັ້ນເກີດຂຶ້ນຈິງ. ຂໍ້ມູນຕ້ອງໄດ້ສັງລວມ ແລະ ກັ່ນກອງຈາກຫຼາຍແຫຼ່ງ, ຕິດແທດກັບໜ້າທີ່ຂອງພັກຢ່າງໃກ້ຊິດ, ຮັບປະກັນທິດທາງການເມືອງ, ຖືກຕ້ອງ ແລະ ທັນການ. ການເຄົາລົບຕາມຫຼັກການພາວະວິໄສ ຈະລົບລ້າງປັດໄຈອັດຕະວິໄສ ເຈດຈຳນົງນິຍົມໃນການໃຫ້ຄໍາປຶກສາ. ການເຄົາລົບ​ຕາມຫຼັກການ​ພາວະວິໄສໃນ​ການໃຫ້ຄຳ​ປຶກສາ ຈະ​ຮັບປະກັນ​ຄວາມ​ເປັນ​ໄປ​ໄດ້ ​ແລະ ​ແທດ​ຈິງ, ບັນລຸ​ໄດ້​ໝາກຜົນ​ສູງ. ຄຸນ​ນະພາ​ບຂອງ​ວຽກ​ງານ​ທີ່​ປຶກສາ​ໃນ​ຂົງ​ເຂດການຈັດຕັ້ງ​ກໍ່ສ້າງ​ພັກ​ນັ້ນ ມີຄວາມກ່ຽວຂ້ອງຢ່າງໃກ້ຊິດກັບ​ຄຸນ​ນະພາ​ບ ຂອງການ​ສະຫຼຸບ​ສັງລວມພາກປະຕິບັດ ​ແລະ ການຄົ້ນຄວ້າ​ທິດ​ສະ​ດີ. ສະນັ້ນ, ຕ້ອງເພີ່ມທະວີການສະຫຼຸບສັງລວມພຶດຕິກຳ ແລະ ສະຫຼຸບການຈັດຕັ້ງປະຕິບັດຮູບແບບການຈັດຕັ້ງໃໝ່ ເພື່ອຖອດຖອນບັນຫາ, ຊ່ອງຫວ່າງ ແລະຂໍ້ບົກຜ່ອງທົ່ວໄປອອກມາ ເພື່ອສະໜອງຂໍ້ພິນິດວິທະຍາສາດ ແນໃສ່ປັບປຸງບູລະນະແນວທາງ ແຜນນະໂຍບາຍ, ສະເໜີແນະວິທີແກ້ໄຂໃນການນຳພາ ແລະຊີ້ນຳປະຕິບັດ.

ການໃຫ້ຄໍາປຶກສາຢ່າງຊື່ສັດແມ່ນຄວາມຕ້ອງການພາວະວິໄສ ແລະ ແມ່ນຫຼັກການທີ່ສໍາຄັນຫຼາຍ ໃນການໃຫ້ຄຳປຶກສາ, ຮັບປະກັນການໃຫ້ຄໍາປຶກສານັ້ນຖືກຕ້ອງແລະແມ່ນຢຳ. ຫຼັກການນີ້ກຳນົດວ່າ ພະນັກງານທີ່ປຶກສາໃນຂົງເຂດການຈັດຕັ້ງກໍ່ສ້າງພັກ ຕ້ອງມີຄວາມຮູ້, ຄວາມສາມາດ, ມີຄຸນທຳ ຄວາມກົງໄປກົງມາ, ຄວາມຊື່ສັດ ແລະ ຄວາມພາວະວິໄສພຽງພໍ ໃນການໃຫ້ຄຳປຶກສາ ແລະສະເໜີຄຳແນະນຳແກ່ຜູ້ນຳ. ຖ້າ​ຄຳປຶກສາບໍ່​ສັດ​ຊື່​ຈະ​ພາ​ໃຫ້​ເກີດ​ຄວາມ​ເສຍ​ຫາຍ​ໃນ​ວຽກ​ງານ​ບຸກຄະລາ​ກອນ, ສ້າງ​ເງື່ອນ​ໄຂ​ໃຫ້​ແກ່​ການ​ປະກົດ​ຕົວ​ຂອງ​ພັກ​ຝ່າຍ​ຄ້ານ, “ຜົນ​ປະ​ໂຫຍ​ດຂອງ​ກຸ່ມ”, ພາກສ່ວນທ້ອງ​ຖິ່ນ ​ແລະອື່ນໆ ​ໃນ​ວຽກ​ງານພະນັກງານ.

ທີສີ່, ສົ່ງເສີມ​ຄວາມ​ຮັບຜິດຊອບ​ຂອງ​ທີ່​ປຶກສາ​ລວມໝູ່ ​ແລະ ບຸກຄົນ.

ການສົ່ງເສີມຄວາມຮັບຜິດຊອບແມ່ນໜ້າທີ່ຂອງທີ່ປຶກສາລວມໝູ່ແລະບຸກຄົນ ຕໍ່ໜ້າຄວາມໄວ້ວາງໃຈແລະການມອບໝາຍຂອງຂັ້ນເທິງ ເພື່ອຈໍາກັດຄວາມຜິດພາດທີ່ບໍ່ຈໍາເປັນ ແລະຄວາມສ່ຽງທີ່ອາດຈະເກີດຂຶ້ນ. ທີ່​ປຶກສາ​ລວມໝູ່​ແລະບຸກຄົນ​ຕ້ອງ​ມີ​ຄວາມ​ລະມັດລະວັງ​ທີ່​ສຸດ, ພິ​ຈາ​ລະ​ນາ, ຄິດ​ໄລ່​ຢ່າງ​ຮອບຄອບ ​ແລະ ຕ້ອງ​ຄາດ​ຄະ​ເນ​ຜົນ​ທີ່ຕາມມາ. ຖ້າຄໍາປຶກສາແລະຂໍ້ສະເໜີບໍ່ຖືກຕ້ອງ ຫຼືບໍ່ຊັດເຈນເໝາະສົມ, ບຸກຄົນແລະທີມງານຕ້ອງຮັບຜິດຊອບ. ທີ່ປຶກສາຕ້ອງໃຫ້ຄໍາໝັ້ນສັນຍາຕໍ່ຜູ້ນໍາກ່ຽວກັບຄວາມຖືກຕ້ອງແມ່ນຢຳຂອງບັນຫາທີ່ເຂົາໃຫ້ຄຳແນະນໍາແລະສະເໜີ.

ບັນດາ​ປັດ​ໄຈ​ສົ່ງ​ຜົນ​ສະທ້ອນ​ເຖິງ​ຄຸນ​ນະພາ​ບການໃຫ້ຄຳປຶກສາຍຸດ​ທະ​ສາດ​ໃນ​ຂົງ​ເຂດການຈັດຕັ້ງ​ກໍ່ສ້າງ​ພັກ

ທີ​ໜຶ່ງ​, ​ການ​ນຳພາ, ຊີ້ນຳ ​ແລະ ການ​ມອບ​ໝາຍ​ໜ້າ​ທີ່​ຂອງ​ຄະນະ​ພັກ.

ການ​ຊີ້​ນຳ​​ນຳ​ພາທີ່ສຽບແຫຼມແລະສະຫຼາດສ່ອງໃສຂອງຄະນະພັກມີບົດບາດສຳຄັນ, ສ້າງ​ພື້ນຖານ​ໃຫ້​ວຽກ​ງານທີ່ປຶກສາພັດທະນາ​ໄປໃນທິດທາງທີ່ຖືກຕ້ອງ ​ແລະ ບັນລຸ​ປະສິດທິພາບສູງ. ຜ່ານ​ການ​ມອບ​ໝາຍ​ວຽກ​ງານທີ່ປຶກສາ, ຄະນະ​ພັກ​ບໍ່​ພຽງ​ແຕ່​ມອບ​ໜ້າ​ທີ່​ໃຫ້ກັບຜູ້ໃຕ້ບັງຄັບບັນຊາ​ເທົ່າ​ນັ້ນ, ແຕ່​ຍັງ​ສ້າງ​ເງື່ອນ​ໄຂທີ່ເອື້ອອຳນວຍ​ໃຫ້ພວກເຂົາດ້ວຍ​ການສະໜັບສະໜູນ​ດ້ານ​ວັດຖຸ, ເງິນທຶນ ແລະ ກົນ​ໄກ​ທີ່​ເໝາະ​ສົມອີກນຳ; ດ້ວຍ​ເຫດ​ນີ້, ​ໄດ້​ສະ​ແດງ​ໃຫ້​ເຫັນເຖິງ​ຄວາມ​ໄວ້​ເນື້ອ​ເຊື່ອ​ໃຈ ກຳລັງໃຈ​ ແລະ ກະຕູ້ນ​ໃຫ້ໜ່ວຍງານທີ່ປຶກສາ ແລະພະນັກງານທີ່ປຶກສາຍົກ​ສູງ​ບົດບາດ ​ແລະ ຄວາມ​ຮັບຜິດຊອບ​ໃນ​ຂະ​ບວນການ​ເຮັດ​ວຽກ. ຄວາມເປັນຈິງສະແດງໃຫ້ເຫັນວ່າ ສະຖານທີ່ທີ່ຄະນະພັກສຸມໃສ່ ແລະ ເອົາໃຈໃສ່ໃນການມອບໝາຍໜ້າທີ່ວຽກງານທີ່ປຶກສາ ຈະບັນລຸເຖິງຄຸນນະພາບ ແລະ ປະສິດທິພາບໃນການເຮັດວຽກ; ພ້ອມ​ກັນ​ນັ້ນ, ກໍ​ຈະ​ຊ່ວຍ​ໃຫ້ພະນັກງານທີ່ປຶກສາເສີມຂະຫຍາຍຄວາມ​ສາມາດຂອງຕົນໃດ້​ຢ່າງ​ເຕັມທີ. ກົງກັນຂ້າມ, ໃນສະຖານທີ່ທີ່ຄະນະພັກບໍ່ເອົາໃຈໃສ່ ຫຼື ບໍ່ຊີ້ແຈ້ງຄວາມຮຽກຮ້ອງຕ້ອງການໃນເວລາມອບໝາຍໜ້າທີ່, ໜ່ວຍງານທີ່ປຶກສາແລະພະນັກງານທີ່ປຶກສາ ມັກຈະພົບຄວາມຫຍຸ້ງຍາກໃນການເສີມຂະຫຍາຍບົດບາດ ແລະ ຄວາມສາມາດຂອງຕົນ. ເນື້ອໃນຂອງງານທີ່ມອບໝາຍຍິ່ງມີຄວາມສະເພາະເຈາະຈົງເທົ່າໃດ, ທິດທາງທີ່ຊັດເຈນ ແລະ ລະອຽດອ່ອນຕໍ່ແນວໂນ້ມການພັດທະນາຫຼາຍເທົ່າໃດ ກໍ່ຈະຊ່ວຍຍົກສູງຄຸນນະພາບ ແລະ ປະສິດທິພາບຂອງວຽກງານທີ່ປືກສາໄດ້ຫຼາຍຂຶ້ນເທົ່ານັ້ນ. ຄວາມຖືກຕ້ອງຊັດເຈນແລະທັນເວລາ ໃນການກໍານົດເນື້ອໃນຂອງການມອບໝາຍໜ້າທີ່ບໍ່ພຽງແຕ່ຊ່ວຍໃຫ້ໜ່ວຍງານທີ່ປຶກສາເຂົ້າໃຈເປົ້າໝາຍ ແລະ ຄວາມຕ້ອງການເທົ່ານັ້ນ, ແຕ່ຍັງສ້າງເງື່ອນໄຂໃຫ້ພວກເຂົານໍາໃຊ້ວິທີການເຮັດວຽກແບບວິທະຍາສາດ ແລະສ້າງສັນ, ດ້ວຍເຫດນີ້, ສາມາດແກ້ໄຂບັນຫາທີ່ສັບສົນໄດ້ເປັນຢ່າງດີ.

ທີສອງ, ການຈັດຕັ້ງກົງຈັກ ແລະ ຖັນແຖວພະນັກງານຂອງອົງການທີ່ປຶກສາ.

ກົງຈັດການ​ຈັດ​ຕັ້ງ​ຂອງ​ອົງການ​ທີ່​ປຶກສາ​ຕ້ອງ​ໄດ້​ຮັບ​ການສັບຊ້ອນແລະປັບປຸງໃຫ້ມີຄວາມກະທັດລັດ ແລະການ​ເຄື່ອນ​ໄຫວ​ຢ່າງ​ມີ​ປະສິດທິພາບ ແລະປະສິດທິຜົນ, ສອດຄ່ອງ​ກັບ​ຄວາມ​ຮຽກຮ້ອງ​ຕ້ອງການ ​ແລະໜ້າທີ່ໃນ​ໄລຍະ​ໃໝ່. ພະນັກງານ​ທີ່​ປຶກສາ​ໃນ​ຂົງ​ເຂດ​ການຈັດ​ຕັ້ງກໍ່ສ້າງ​ພັກ ຕ້ອງ​ໄດ້​ມາດຕະຖານ​ທົ່ວ​ໄປ​ຂອງ​ພະນັກງານ, ສະມາຊິກ​ພັກ. ນັ້ນ​ແມ່ນ: ມີ​ລະດັບ​ຄວາມຮູ້ດ້ານ​ທິດ​ສະ​ດີ​ການ​ເມືອງ, ທັດສະນະ ​ແລະ ແນວ​ທາງ​ຂອງ​ພັກ, ນະ​ໂຍບາຍ ແລະກົດໝາຍ​ຂອງ​ລັດ; ມີ​ຄຸນ​ວຸດ​ທິ​ທາງ​ດ້ານ​ວັດ​ທະ​ນະ​ທຳ ​ແລະ ວິຊາ​ສະ​ເພາະ, ມີ​ສຸຂະພາບແລະຄວາມ​ສາມາດ​ພຽງພໍ ​ເພື່ອ​ເຮັດ​ວຽກ​ຢ່າງ​ມີ​ປະສິດທິ​ຜົນ, ຕອບ​ສະໜອງ​ຄວາມ​ຮຽກຮ້ອງ​ຕ້ອງການ ​ແລະໜ້າທີ່​ທີ່​ໄດ້​ຮັບ​ມອບ​ໝາຍ. ການຈັດ​ຕັ້ງກໍ່ສ້າງ​ພັກ ​ແມ່ນ​ຂະແໜງການ ​ແລະ ອາຊີບ​ທີ່​ຫຍຸ້ງຍາກ​ຫຼາຍ ​ເພາະ​ມັນ​ຕິດ​ພັນ​ກັບ​ການຈັດ​ຕັ້ງກົງຈັກຂອງ​ລະບົບ​ການ​ເມືອງ, ສົ່ງ​ຜົນ​ສະທ້ອນ​ເຖິງ​ຜູ້ຄົນ ​ແລະຖານະ​ຂອງເຂົາໃນ​ສັງຄົມ. ດັງ​ນັ້ນ, ຜູ້​ທີ່​ເຮັດວຽກ​ງານທີ່ປຶກສາ​ໃນ​ຂົງ​ເຂດ​ການຈັດ​ຕັ້ງກໍ່ສ້າງ​ພັກ​ ຕ້ອງ​ມີຄວາມກ້າຫານດ້ານການເມືອງ, ມີຈິດໃຈທີ່​ບໍລິສຸດ ແລະ ມີ “ດວງຕາ” ທີ່ສຽບແຫຼມໃນການ​ເບິ່ງໂລກ ເບິ່ງ​ຄົນ​ເພື່ອ​ປະເມີນ​ຄວາມ​ສາມາດ​ຂອງ​ພະນັກງານ​ຢ່າງ​ຖືກຕ້ອງ...

ທີ​ສາມ, ​ເງື່ອນ​ໄຂ​ຮັບປະກັນ​ວຽກ​ງານ​ຂອງຖັນແຖວ​ພະນັກງານທີ່ປຶກສາ.

ເພື່ອສົ່ງເສີມຄວາມຄິດສ້າງສັນຂອງທີມງານທີ່ປຶກສາ, ຕ້ອງສ້າງສະພາບແວດລ້ອມການເຮັດວຽກທີ່ມີປະຊາທິປະໄຕຢ່າງແທ້ຈິງ, ເພື່ອໃຫ້ພະນັກງານທີ່ປຶກສາສາມາດເຂົ້າເຖິງແຫຼ່ງຂໍ້ມູນຂ່າວສານໄດ້ຢ່າງເຕັມສ່ວນແລະໂດຍກົງ ກ່ຽວກັບບັນຫາທີ່ກ່ຽວຂ້ອງກັບຂົງເຂດ ແລະວຽກງານຂອງພວກເຂົາ. ພະນັກງານທີ່ປຶກສາຕ້ອງການໃຫ້ຜູ້ນໍາໄວ້ວາງໃຈພວກເຂົາ, ກ້າມອບວຽກໃຫ້ພວກເຂົາ ແລະ ສ້າງເງື່ອນໄຂທີ່ເອື້ອອຳນວຍໃຫ້ພະນັກງານປະຕິບັດໜ້າທີ່ຂອງພວກເຂົາ. ຄວາມໄວ້ເນື້ອເຊື່ອໃຈຂອງອົງການ ແລະ ຂອງຜູ້ນໍາຕໍ່ພະນັກງານທີ່ປຶກສາ ແມ່ນພື້ນຖານສໍາຄັນເພື່ອສົ່ງເສີມຄວາມຄິດສ້າງສັນ, ຄວາມກ້າຫານຄົ້ນຄວ້າ, ສະເໜີແນວຄວາມຄິດໃໝ່, ຄົ້ນຄວ້າ, ຄົ້ນພົບສິ່ງໃໝ່ ແລະ ຍົກສູງຄຸນນະພາບຂອງການໃຫ້ຄຳປຶກສາ. ຄູ່ຂະໜານກັບການ​ສ້າງ​ສະພາບ​ແວດ​ລ້ອມ​ການເຄື່ອນໄຫວທີ່ເປັນ​ປະຊາທິປະ​ໄຕ ເປີດເຜີຍ ​ແລະ ​ໂປ່​ງ​ໃສ ເພື່ອໃຫ້ພະນັກງານເສີມຂະຫຍາຍປະຊາທິປະ​ໄຕ​ໃນ​ການ​ປຶກສາ​ຫາລື ແລະໂຕ້ວາທີບັນຫາຕ່າງໆ, ສະແດງຄວາມ​ຄິດ​ເຫັນ​ສ່ວນ​ຕົວ, ​ສົນທະນາ​ກັບ​ການ​ນຳ​ທຸກ​ຂັ້ນ, ຮັບ​ຟັງແລະເຂົ້າ​ໃຈ,..., ນອກນັ້ນຍັງຕ້ອງສ້າງກົນໄກ ເພື່ອໃຫ້ພະນັກງານທີ່ປຶກສາສາມາດວິພາກວິຈານທາງວິທະຍາສາດໃນບັນຫາທີ່ກ່ຽວຂ້ອງກັບນະໂຍບາຍ ແລະ ໂຄງການຕ່າງໆ ທີ່ຈະໄດ້ຮັບການພິຈາລະນາ ແລະຕັດສິນໃຈໂດຍຜູ້ນຳທຸກຂັ້ນ ໄດ້ຢ່າງໝັ້ນໃຈ.

ຄຽງຄູ່ກັນນັ້ນ, ການປ່ຽນແປງໃໝ່ລະບອບ, ກົນໄກ ແລະ ນະໂຍບາຍສຳລັບພະນັກງານທີ່ປຶກສານັ້ນ ຕ້ອງສ້າງແຮງຈູງໃຈໃນທາງບວກ ເພື່ອດຶງດູດພະນັກງານທີ່ມີຄຸນທຳ, ຄວາມສາມາດ ແລະ ມີແນວໂນ້ມດີ ເຂົ້າມາເຮັດວຽກໃນໜ່ວຍງານທີ່ປຶກສາຂອງພັກນັບມື້ນັບຫຼາຍຂຶ້ນ. ດັງນັ້ນ, ຕ້ອງ​ມີ​ນະ​ໂຍບາຍ​ທີ່​ສອດຄ່ອງ​ກັນ ຕັ້ງແຕ່​ການສັນຫາ, ການດຶງດູດ, ການຝຶກອົບຮັມ ບຳລຸງ​ສ້າງ, ລະບອບ​ການ​ນຳ​ໃຊ້​ພະນັກງານ, ​ໂອກາດໃນການ​ພັດທະນາ​ວິຊາ​ຊີບ ຈົນ​ເຖິງ​ນະ​ໂຍບາຍຈ່າຍເງິນ​ຕອບ​ຕອບ​ແທນແລະອື່ນໆ.

ນອກຈາກນັ້ນ, ຄວາມຕ້ອງການທີ່ສຳຄັນອີກອັນໜຶ່ງແມ່ນຕ້ອງສຸມໃສ່ການລົງທຶນດ້ານຂໍ້ມູນຂ່າວສານ, ເອກະສານ ແລະ ຖານຂໍ້ມູນໃຫ້ພຽງພໍ ເພື່ອໃຫ້ຄະນະທີ່ປຶກສາໄດ້ຮັບຂໍ້ມູນທີ່ຖືກຕ້ອງ, ຄົບຖ້ວນ ແລະ ທັນທ່ວງທີ ເພື່ອໃຊ້ໃນການຄົ້ນຄວ້າ ແລະ ມີເງື່ອນໄຂໃນການສະເໜີຄວາມຄິດເຫັນ ຄຳແນະນຳທີ່ເໝາະສົມ ຕໍ່ຜູ້ນຳທຸກຂັ້ນ.

ທີ​ສີ່, ກົນ​ໄກການ​ປະສານງານ ​ແລະ ການປະສານສົມທົບ​ໃນການໃຫ້ຄຳປຶກສາຍຸດ​ທະ​ສາດ​ລະຫວ່າງບັນດາ​ຄະນະຂອງ​ພັກ.

ທີ່ປຶກສາດ້ານ​ການຈັດ​ຕັ້ງກໍ່ສ້າງ​ພັກ​ ແມ່ນການ​ໃຫ້​ຄຳ​ປຶກສາດ້ານການຈັດຕັ້ງ, ການ​ປະຕິບັດ​ວຽກ​ງານພະນັກງານ, ຈຶງ​ເປັນ​ວຽກ​ງານທີ່ກວມ​ລວມແລະສະຫະວິຊາ ກ່ຽວຂ້ອງ​ກັບ​ຫຼາຍ​ຂົງ​ເຂດ​ຄື: ການກວດກາ, ການຕິດຕາມກວດກາ, ກິດຈະການ​ພາຍ​ໃນ... ດັງນັ້ນ, ເພື່ອ​ຍົກ​ສູງ​ຄຸນ​ນະພາ​ບ ​ແລະ ປະສິດທິ​ຜົນ​ຂອງ​ວຽກ​ງານ​ທີ່​ປຶກສາ​ດ້ານ​ການຈັດ​ຕັ້ງກໍ່ສ້າງ​ພັກ ​ແມ່ນຈຳເປັນ​ຕ້ອງ​ມີ​ກົນ​ໄກ​ປະສານສົມທົບ​ຢ່າງ​ມີ​ປະສິດທິ​ຜົນ ລະຫວ່າງບັນດາ​ຄະນະຂອງ​ພັກ. ມີຄວາມຈຳເປັນຕ້ອງຮັບຮອງຫຼັກການຕໍ່ໄປນີ້: ວຽກງານໜຶ່ງຈະມອບໝາຍໃຫ້ສະເພາະພະແນກ ຫຼືໜ່ວຍງານດຽວເທົ່ານັ້ນ ເພື່ອຄວບຄຸມແລະຮັບຜິດຊອບຫຼັກ, ສ່ວນພະແນກແລະໜ່ວຍງານອື່ນໆ ມີໜ້າທີ່ປະສານງານເພື່ອດຳເນີນງານຮ່ວມກັນ.

ທີ​ຫ້າ, ຄວາມ​ຕັ້ງໜ້າ, ເປັນເຈົ້າການ, ​ປະດິດ​ສ້າງ ​ແລະ ເປັນມືອາຊີບ ຂອງພະນັກງານທີ່ປຶກສາ.​

ການໃຫ້ຄຳປຶກສາຍຸດທະສາດນັ້ນບໍ່ໄດ້ໝາຍເຖິງການອົດຮັບ, ລໍຖ້າຜູ້ບັງຄັບບັນຊາສັ່ງ ຫຼືຮ້ອງຂໍ ກ່ອນທີ່ຈະເລີ່ມຄົ້ນຄວ້າ, ສະເໜີ  ແລະ ໃຫ້ຄໍາແນະນໍາ, ແຕ່ກົງກັນຂ້າມ ອົງການທີ່ປຶກສາແລະຖັນແຖວພະນັກງານທີ່ປຶກສາຍຸດທະສາດຕ້ອງກະຕືລືລົ້ນ ປະດິດສ້າງ ແລະ ເປັນເຈົ້າການໃນການຄົ້ນຄວ້າ, ສະຫຼຸບສັງລວມພຶດຕິກຳ, ກຳແໜ້ນພື້ນຖານທິດສະດີ, ວິທະຍາສາດ ແລະ ພາກປະຕິບັດ, ຄາດຄະເນສະຖານະການຢ່າງຖືກຕ້ອງ, ຕັ້ງໜ້າສະເໜີ ແລະ ໃຫ້ຄຳປຶກສາກ່ຽວກັບຮູບແບບການຈັດຕັ້ງໃໝ່ ແລະ ແຜນການໃໝ່ ເພື່ອແກ້ໄຂ “ຂໍ້ບົກຜ່ອງ” ທີ່ພາກປະຕິບັດວາງອອກມາ. ຄວາມຕັ້ງໜ້າ, ຄວາມເປັນເຈົ້າການ, ຄວາມຄິດປະດິດສ້າງ ແລະ ຄວາມເປັນມືອາຊີບ ໃນການຈັດຕັ້ງ ແລະ ປະຕິບັດວຽກງານທີ່ປຶກສາຂອງອົງການທີ່ປຶກສານັ້ນ ມີຄວາມສຳຄັນຕໍ່ຄຸນນະພາບຂອງຄຳປຶກສາ.

​ຢ່າງ​ໃດ​ກໍຕາມ, ຍັງຈຳເປັນຕ້ອງ​ເອົາ​ໃຈ​ໃສ່ເຖິງຄວາມຈິງທີ່ວ່າ ພະນັກງານ​ທົ່ວ​ໄປ ​ແລະ ພະນັກງານທີ່ປຶກສາ​ໃນ​ຂົງເຂດ​ການຈັດຕັ້ງກໍ່ສ້າງ​ພັກ ລ້ວນ​ແຕ່​ມີ​ຄວາມ​ຕ້ອງການ​ທີ່ຈະກ້າວໜ້າ ​ແລະ ພັດທະນາ​ອາຊີບຂອງຕົນ, ດັ່ງ​ນັ້ນ ຈຶງຈຳເປັນຕ້ອງ​ສ້າງ​ແຮງຈູງໃຈທີ່ຖືກຕ້ອງ​ສຳລັບກິດຈະກຳທີ່ກະຕືລືລົ້ນ​ຂອງ​ພະນັກງານ. ດັ່ງ​ນັ້ນ, ຄະນະ​ພັກ​ຈຶ່ງ​ມີ​ຄວາມ​ຮັບຜິດຊອບ​ໃນ​ການ​ສ້າງ​ສະພາບ​ແວດ​ລ້ອມ​ແຫ່ງ​ການ​ເຮັດ​ວຽກ​ທີ່​ເໝາະ​ສົມ ເອື້ອອຳນວຍ, ມີ​ກົນ​ໄກ​ຕອບ​ສະໜອງ ຄ່າຕອບແທນ ແລະ ໃຫ້​ລາງວັນທີ່ເໝາະສົມ, ລວມທັງໃຫ້ຄວາມເຄົາລົບຕໍ່ບຸກຄົນທີ່​ມີ​ຄວາມ​ສາມາດ ​ເພື່ອກະຕູ້ນ​ຄວາມ​ຕັ້ງໜ້າ ຄວາມເປັນເຈົ້າການ ແລະ ຄວາມ​ຄິດ​​ສ້າງສັນ​ຂອງ​ພະນັກງານທີ່ປຶກສາ​ຍຸດ​ທະ​ສາດ ​ໃນ​ຂົ​ງເຂດການຈັດຕັ້ງກໍ່ສ້າງພັກ./. (ຍັງມີອີກ)

-------------------------

(1) ພົດ​ຈະ​ນາ​ນຸ​ກົມພາສາ​ຫວຽດ​ນາມ, ສພຈ. ວັດທະນະທຳ ແລະ ຂໍ້ມູນຂ່າວສານ, ຮ່າໂນ້ຍ, 1999, ໜ້າ 1523.
(2) ເບິ່ງ: ມະຕິໝາຍເລດ 04-NQ/TW, ລົງວັນທີ 30 ຕຸລາ 2016, ຂອງກອງປະຊຸມ ຄັ້ງທີ່ 4 ຄະນະບໍລະຫານງານສູນກາງພັກ ຊຸດທີ XII, “ວ່າດ້ວຍການເພີ່ມທະວີການກໍ່ສ້າງແລະ ປັບປຸງພັກ; ກີດກັ້ນ, ຍູ້ຖອຍຄວາມເຊື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ, ແບບແຜນດຳລົງຊີວິດ ແລະ ບັນດາປະກົດການຂອງ “ການປ່ຽນແປງຕົນເອງ”, “ການຫັນປ່ຽນຕົນເອງ” ຢູ່ພາຍໃນ”, https://tulieuvankien.dangcongsan.vn/van-kien-tu-lieu-ve-dang/hoi-nghi-bch-trung-uong/khoa-xii/nghi-quyet-so-04nq-tw-ngay-30102016-hoi-nghi-lan-thu-tu-ban-chap-hanh-trung-uong-dang-khoa-xii-ve-tang-cuong-xay-dung-chinh-550
(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 111.
(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 2, ໜ້າ 226.