ຊຸກຍູ້ການພົວພັນລະຫວ່າງຫວຽດນາມກັບ
ສະຫະພັນເສດຖະກິດອາຊີ-ເອຣົບ ໃນສະຖານະການໃໝ່
ສະຫະພັນເສດຖະກິດອາຊີ-ເອຣົບ ໃນສະຖານະການໃໝ່
ວກ. - ສະຫະພັນເສດຖະກິດອາຊີ-ເອີຣົບລວມມີຫ້າປະເທດສະມາຊິກ (ລັດເຊຍ, ເບລາຣຸດ, ຄາຊັກສະຖານ, ກຽກກິດສະຖານ ແລະ ອາກເມນີ) ແລະ ມີການພົວພັນດ້ານເສດຖະກິດ-ການເມືອງທີ່ເປັນມູນເຊື້ອ ກັບຫວຽດນາມ. ໃນຊຸມປີທີ່ຜ່ານມາ, ການພົວພັນດ້ານການຄ້າສອງຝ່າຍລະຫວ່າງຫວຽດນາມ ແລະ ບັນດາປະເທດດັ່ງກ່າວ ມີການພັດທະນາຢ່າງບໍ່ຢຸດຢັ້ງ, ໂດຍສະເພາະແມ່ນ ນັບແຕ່ພາຍຫຼັງທີ່ສັນຍາການຄ້າເສລີລະຫວ່າງຫວຽດນາມ ແລະ ສະຫະພັນເສດຖະກິດອາຊີ-ເອີຣົບ ມີຜົນບັງຄັບໃຊ້ໃນປີ 2016.
ສະຖານະການພົວພັນສອງຝ່າຍ ລະຫວ່າງຫວຽດນາມ
ແລະ ສະຫະພັນເສດຖະກິດອາຊີ-ເອີຣົບ
ປີ 2015, ການພົວພັນດ້ານການຄ້າສອງຝ່າຍ ລະຫວ່າງຫວຽດນາມ ແລະ ສະຫະພັນເສດຖະກິດອາຊີ-ເອີຣົບ (Eurasian Economic Union - EAEU) ບັນລຸມູນຄ່າ 3,6 ຕື້ໂດລາສະຫະລັດ, ເພີ່ມຂຶ້ນ 6% ເມື່ອທຽບກັບປີ 2014. ແຕ່ວ່າ ຖ້າຄິດໄລ່ຕາມອັດສ່ວນທົ່ວໄປ, ມູນຄ່າສິນຄ້າສົ່ງອອກຂອງຫວຽດນາມໄປຍັງ EAEU ກວມເອົາພຽງ 1,1% ຂອງມູນຄ່າການນຳເຂົ້າທັງໝົດຂອງກຸ່ມ ແລະ ມູນຄ່າການນຳເຂົ້າຂອງຫວຽດນາມຈາກ EAEU ກວມພຽງປະມານ 0,5% ຂອງມູນຄ່າການສົ່ງອອກທັງໝົດຂອງກຸ່ມ.
ການທີ່ຫວຽດນາມກາຍເປັນຄູ່ຮ່ວມມືທຳອິດທີ່ລົງນາມໃນສັນຍາການຄ້າເສລີກັບ EAEU ໄດ້ເປີດກາລະໂອກາດໃຫຍ່ ໃຫ້ແກ່ຕະຫຼາດສົ່ງອອກຂອງຫວຽດນາມ, ສ້າງກຳລັງໜູນໃຫ້ການເປີດຕະຫຼາດ, ດຶງດູດຄວາມສົນໃຈຂອງວິສາຫະກິດສອງຝ່າຍ, ຫຼຸດຜ່ອນອຸປະສັກດ້ານພາສີ ແລະອຸປະສັກອື່ນ ແລະ ເປັນຊ່ອງທາງທີ່ສະດວກໃນການສົ່ງເສີມການນຳເຂົ້າແລະສົ່ງອອກ ລະຫວ່າງປະເທດຫວຽດນາມແລະກຸ່ມປະເທດ EAEU. ດ້ວຍອັດຕາເກືອບ 90% ຂອງປະເພດພາສີທີ່ຖືກຕັດແລະຫຼຸດພາສີນຳເຂົ້າ (ໃນນັ້ນ 59,3% ຂອງປະເພດພາສີ ຈະຖືກຍົກເລີກທັນທີທີ່ສັນຍາດັ່ງກ່າວມີຜົນບັງຄັບໃຊ້) ເປັນທ່າດີອັນໃຫຍ່ສຳລັບຫວຽດນາມ ໃນການແຂ່ງຂັນກັບບັນດາປະເທດໃນໂລກ ໃນການສົ່ງອອກສິນຄ້າເຂົ້າໃນຕະຫຼາດ EAEU. ໂດຍສະເພາະ, ພາຍໃຕ້ສັນຍາດັ່ງກ່າວ, ຂະແໜງການແຜ່ນແພແລະເຄື່ອງນຸ່ງຫົ່ມ ໃຫ້ຄຳໝັ້ນສັນຍາທີ່ຈະຍົກເລີກ ຫຼຸດຜ່ອນ 82% ຂອງປະເພດພາສີທັງໝົດ, ຍົກເລີກຢ່າງສົມບູນ 42% ໂດຍມີກໍານົດເວລາຍາວສຸດ 10 ປີ, ຍົກເລີກ 36% ທັນທີທີ່ສັນຍາມີຜົນບັງຄັບໃຊ້; ສຳລັບຂະແໜງການເກີບ ຈະຍົກເລີກແລະຫຼຸດຜ່ອນ 77% ຂອງປະເພດພາສີ, ໃນນັ້ນຈະຍົກເລີກຢ່າງສົມບູນ 73% ໂດຍມີກໍານົດເວລາຍາວສຸດ 5 ປີ; ສໍາລັບອຸດສາຫະກໍາອາຫານທະເລ, ຈະຍົກເລີກແລະຫຼຸດຜ່ອນພາສີ 95% ຂອງປະເພດພາສີທັງໝົດ ໃນກຳນົດເວລາຍາວສຸດແມ່ນ 10 ປີ, ໃນນັ້ນ 71% ຂອງປະເພດພາສີມີອັດຕາພາສີນຳເຂົ້າເປັນ 0% ທັນທີທີ່ສັນຍາມີຜົນບັງຄັບໃຊ້, ສ່ວນທີ່ເຫຼືອອີກ 5% ຂອງປະເພດພາສີ ເປັນຜະລິດຕະພັນທີ່ຫວຽດນາມບໍ່ມີທ່າແຮງໃນການສົ່ງອອກ.
ນັບແຕ່ເມື່ອສັນຍາກາຄ້າເສລີລະຫວ່າງຫວຽດນາມ ແລະ ສະຫະພັນເສດຖະກິດ ອາຊີ-ເອີຣົບ ມີຜົນບັງຄັບໃຊ້ໃນປີ 2016, ມູນຄ່າການຄ້າລະຫວ່າງສອງຝ່າຍມີການເຕີບໂຕຢ່າງແຂງແຮງ ໂດຍເພີ່ມຂຶ້ນສະເລ່ຍ 30% ຕໍ່ປີ(2). ສິ່ງດັ່ງກ່າວສະແດງໃຫ້ເຫັນວ່າ, ສັນຍາແມ່ນຂອບກົດໝາຍທີ່ສຳຄັນ, ສ້າງແລວທາງທີ່ປອດໂປ່ງ ໃຫ້ແກ່ບັນດາວິສາຫະກິດຂອງສອງຝ່າຍຊຸກຍູ້ການຄ້າ ແລະ ການລົງທຶນ. ຕາມຂໍ້ມູນຂອງກົມສຸນລະກາກອນຫວຽດນາມ, ທາງຝ່າຍຫວຽດນາມ, ບັນດາປະເພດສິນຄ້າທີ່ໃຊ້ປະໂຫຍດຈາກສິ່ງຈູງໃຈຈາກສັນຍາສ່ວຍໃຫຍ່ແມ່ນ ແຜ່ແຜ ເຄື່ອງນຸ່ງຫົ່ມ, ເກີບ, ສິນໃນນ້ຳ, ຜະລິດຕະພັນກະສິກຳ, ໂທລະສັບ ແລະ ສ່ວນປະກອບ. ທາງຝ່າຍ EAEU, ບັນດາປະເພດສິນຄ້າທີ່ໄດ້ຮັບຜົນປະໂຫຍດນັ້ນແມ່ນ ປາແຊມອນນ້ຳຈືດ, ສາລີ, ຝຸ່ນປະເພດຕ່າງໆ, ນ້ຳມັນພືດ, ເຫຼັກກ້າ, ລົດບັນທຸກສິນຄ້າແລະພາຫະນະຂົນສົ່ງທີ່ໃຊ້ເຄື່ອງຈັກກາຊວນ,… ນອກຈາກນີ້, ສິນຄ້າຫຼາຍປະເພດຂອງຫວຽດນາມ ແລະຂອງບັນດາປະເທດ EAEU ໄດ້ໝູນໃຊ້ລະດັບພາສີນຳເຂົ້າແບບເອື້ອອຳນວຍພິເສດ ຕາມສັນຍາສະບັບນີ້ ມີທ່າອຽງເພີ່ມຂຶ້ນຫຼາຍ. ໃນປີ 2016, ມູນຄ່າການຄ້າສອງສົ້ນລະຫວ່າງຫວຽດນາມ ແລະ EAEU ບັນລຸ 3,04 ຕື້ໂດລາສະຫະລັດ, ເພີ່ນຂຶ້ນ 23% ເມື່ອທຽບກັບປີ 2015, ປີ 2017 ມູນຄ່າການສົ່ງອອກນຳເຂົ້າລະຫວ່າງຫວຽດນາມ ແລະ EAEU ບັນລຸ 3,9 ຕື້ໂດລາສະຫະລັດ, ເພີ່ມຂຶ້ນ 28,3% ເມື່ອທຽບກັບປີ 2016(3).
ຈາກນັ້ນ, ສາມາດເຫັນໄດ້ວ່າ ນັບແຕ່ເມື່ອມີຜົນບັງຄັບໃຊ້, ສັນຍາການຄ້າເສລີລະຫວ່າງຫວຽດນາມແລະ EAEU ໄດ້ສ້າງຄວາມສະດວກໃຫ້ແກ່ການພັດທະນາການຄ້າສອງສົ້ນ ລະຫວ່າງຫວຽດນາມ ແລະ ກຸ່ມປະເທດ EAEU ເພີ່ມຂຶ້ນຢ່າງແຂງແຮງກວ່າແຕ່ກ່ອນ (ອັດຕາການເຕີບໂຕສະເລ່ຍແຕ່ລະປີໃນໄລຍະ 2011 - 2015 ພຽງແຕ່ປະມານ 5%/ປີ, ໃນໄລຍະ 2013 - 2015 ການຄ້າສອງຝ່າຍມີທ່າອຽງຫຼຸດລົງ). ຕາມການຄາດຄະເນຂອງຜູ້ຊ່ຽວຊາຍຫຼາຍຄົນ, ທ່າອຽງເຕີບໂຕການຄ້າຍັງຈະສືບຕໍ່ໄດ້ຮັບການຮັກສາໃນຊຸມປີຕໍ່ໜ້າ, ໂດຍສະເພາະແມ່ນ ໄປຄຽງຄູ່ກັບການກຳນົດແຜນງານຕັດພາສີຫຼາຍປະເພດໃຫ້ເຫຼືອ 0%.
ກ່ຽວກັບອັດຕາການນໍາໃຊ້ປະໂຫຍດຈາກຄວາມເອື້ອອຳນວຍຂອງສັນຍາ, ນັບແຕ່ ສັນຍາການຄ້າເສລີລະຫວ່າງຫວຽດນາມແລະ EAEU ມີຜົນບັງຄັບໃຊ້ (ເດືອນທັນວາ 2016) ຮອດທ້າຍເດືອນມິຖຸນາ 2018, ຫວຽດນາມໄດ້ສົ່ງອອກສິນຄ້າໄປຍັງຕະຫຼາດ EAEU ກວ່າ 869 ລ້ານໂດລາສະຫະລັດ ໂດຍໃຊ້ໃບຮັບຮອງແຫຼ່ງກຳເນີດສິນຄ້າ (C/O) ຮູບແບບ EAV ຕາມສັນຍາການຄ້າເສລີລະຫວ່າງຫວຽດນາມແລະ EAEU. ສະເພາະຫົກເດືອນຕົ້ນປີ 2018 ເທົ່ານັ້ນ, ຫວຽດນາມໄດ້ສົ່ງອອກສິນຄ້າໄປຍັງຕະຫຼາດ EAEU ກວ່າ 281 ລ້ານໂດລາສະຫະລັດ ໂດຍໃຊ້ໃບຮັບຮອງແຫຼ່ງກຳເນີດສິນຄ້າ ຮູບແບບ EAV, ກວມເອົາປະມານ 23% ຂອງຍອດມູນຄ່າການສົ່ງອອກໄປຍັງຕະຫຼາດ EAEU. ສິນຄ້າສົ່ງອອກບາງປະເພດທີ່ມີອັດຕາການໃຊ້ໃບຮັບຮອງແຫຼ່ງກຳເນີດສິນຄ້າ ຮູບແບບ EAV ໃນລະດັບສູງລວມມີ ແຜ່ນແພເຄື່ອງນຸ່ງຫົ່ມກວມເອົາເກືອບ 78%, ເກີບກວມເອົາ 59%, ພລາສຕິກແລະຜະລິດຕະພັນພລາສຕິກກວມເອົາ 87%(4).
ນອກຈາກນັ້ນ, ເພື່ອເພີ່ມທະວີການຮ່ວມມືເສດຖະກິດສອງຝ່າຍ ໃນຂອບຂອງສັນຍາການຄ້າເສລີລະຫວ່າງຫວຽດນາມແລະ EAEU, ສອງຝ່າຍກໍ່ໄດ້ມີການເຈລະຈາ ແລະລົງນາມໃນອະນຸສັນຍາຕ່າງໆ, ລະອຽດຄື: ອະນຸສັນຍາລະຫວ່າງລັດຖະບານ ຫວຽດນາມ ແລະ ລັດຖະບານສະຫະພັນຖະລັດລັດເຊຍ ວ່າດ້ວຍການຊ່ວຍເຫຼືອການຜະລິດພາຫະນະຂົນສົ່ງທີ່ມີເຄື່ອງຈັກໃນປະເທດຫວຽດນາມ ທີ່ໄດ້ລົງນາມໃນວັນທີ 21 ມີນາ 2016 (ອະນຸສັນຍາກ່ຽວກັບລົດໂອໂຕ ກັບ ລັດເຊຍ); ອະນຸສັນຍາລະຫວ່າງລັດຖະບານຫວຽດນາມ ແລະ ລັດຖະບານສາທາລະນະລັດເບລາຣຸດ ວ່າດ້ວຍການຊ່ວຍເຫຼືອການຜະລິດພາຫະນະຂົນສົ່ງທີ່ມີເຄື່ອງຈັກໃນປະເທດຫວຽດນາມ ທີ່ໄດ້ລົງນາມໃນວັນທີ 23 ມີນາ 2016 (ອະນຸສັນຍາກ່ຽວກັບລົດໂອໂຕ ກັບ ເບລາຣຸດ); ອະນຸສັນຍາວ່າດ້ວຍການແລກປ່ຽນຂໍ້ມູນສຸລະກາກອນ ທີ່ລົງນາມໃນວັນທີ 28 ມິຖຸນາ 2018.
ກ່ຽວກັບການຜັນຂະຫຍາຍບັນດາອະນຸສັນຍາວ່າດ້ວຍການຜະລິດພາຫະນະຂົນສົ່ງ ກັບລັດເຊຍແລະເບລາຣຸດເວົ້າລວມ ແລະ ໂດຍສະເພາະການຈັດຕັ້ງບໍລິສັດຮ່ວມທຶນ ຈະຊ່ວຍຂະຫຍາຍຕະຫຼາດລົດຂົນສົ່ງໃນຫວຽດນາມ, ສ້າງເງື່ອນໄຂເພື່ອເພີ່ມການມີຢູ່ຂອງສິນຄ້າອຸດສາຫະກຳຂອງລັດເຊຍແລະເບລາຣຸດ ໃນຫວຽດນາມ. ສຳລັບອະນຸສັນຍາການແລກປ່ຽນຂໍ້ມູນສຸລະກາກອນທາງເອເລັກໂຕຣນິກ ຜ່ານກົນໄກການແລກປ່ຽນຂໍ້ມູນແລະການສື່ສານຢ່າງສະໝ່ຳມະເໝີ ແລະ ທັນທີຫຼັງຈາກການຜ່ານດ່ານສິນຄ້າ, ອະນຸສັນຍາຈະປະກອບສ່ວນໃນການຕໍ່ສູ້ປ້ອງກັນແລະຕ້ານການລະເມີດກົດໝາຍໃນດ້ານສຸລະກາກອນ, ຍູ້ແຮງຂະບວນການຜ່ານດ່ານຂອງສິນຄ້າ, ອຳນວຍຄວາມສະດວກໃຫ້ແກ່ການຄ້າ ແລະ ຊຸກຍູ້ສິນຄ້າສົ່ງອອກ ນຳເຂົ້າຂອງແຕ່ລະປະເທດ.
ຄຽງຄູ່ກັນກັບບັນດາອະນຸສັນຍາດັ່ງກ່າວ, ສອງຝ່າຍກໍ່ພວມເຈລະຈາອະນຸສັນຍາກ່ຽວກັບການສ້າງລະບົບການຮັບຮອງແລະກວດສອບແຫຼ່ງກຳເນີດສິນຄ້າທາງເອເລັກໂຕຣນິກ, ເຊິ່ງຄາດວ່າຈະສຳເລັດໃນໄວໆນີ້, ແນໃສ່ສະໜັບສະໜູນການກວດສອບຄວາມຖືກຕ້ອງຂອງໃບຮັບຮອງແຫຼ່ງກຳເນີດສິນຄ້າ ເພື່ອໃຫ້ໄດ້ຮັບຜົນປະໂຫຍດຈາກການປະຕິບັດພິເສດພາຍໃຕ້ສັນຍາການຄ້າເສລີລະຫວ່າງຫວຽດນາມແລະ EAEU.
ປີ 2019, ມູນຄ່າການຄ້າສອງສົ້ນລະຫວ່າງຫວຽດນາມແລະ EAEU ບັນລຸ10,4 ຕື້ໂດລາສະຫະລັດ, ເພີ່ມຂຶ້ນ 20,78% ເມື່ອທຽບກັບປີ 2018, ກວມ 2% ຂອງຍອດມູນຄ່າການນຳເຂົ້າແລະສົ່ງອອກ ຂອງຫວຽດນາມກັບໂລກ. ໃນນັ້ນ, ການສົ່ງອອກຂອງຫວຽດນາມເພີ່ມຂຶ້ນ 6,43%, ບັນລຸ 7,2 ຕື້ໂດລາສະຫະລັດ(5).ພິເສດ, ໃນ 10 ເດືອນຕົ້ນປີ 2020, ເຖິງວ່າຕ້ອງປະເຊີນກັບການຜັນແປຢ່າງສັບສັບສົນຂອງການຄ້າໂລກ ແລະ ການລະບາດຂອງພະຍາດໂຄວິດ-19, ມູນຄ່າການຄ້າສອງຝ່າຍລະຫວ່າງຫວຽດນາມແລະ EAEU ກໍ່ຍັງເຕີບໂຕຢ່າງປະທັບໃຈ, ດ້ວຍມູນຄ່າການຄ້າສອງສົ້ນ 10,34 ຕື້ໂດລາສະຫະລັດ, ເພີ່ມຂຶ້ນ 17,98%. ໃນນັ້ນ, ມູນຄ່າການສົ່ງອອກບັນລຸ 7,18 ຕື້ໂດລາສະຫະລັດ, ເພີ່ມຂຶ້ນ 16,15%; ມູນຄ່າການນຳເຂົ້າບັນລຸ 1,16 ຕື້ໂດລາສະຫະລັດ, ເພີ່ມຂຶ້ນ 22,35% ເມື່ອທຽບກັບໄລຍະດຽວກັບຂອງປີ 2019(6). ແຕ່ວ່າ, ພື້ນທີ່ສົ່ງອອກຂອງຫວຽດນາມໄປຍັງພາກພື້ນອາຊີ-ເອຣົບ ຍັງມີຫຼາຍທີ່ສຸດ, ເພາະຖ້າຄິດໄລ່ຈາກມູນຄ່າການນຳເຂົ້າລວມຂອງ 10 ເດືອນຕົ້ນປີ 2020 ຂອງ EAEU ປະມານ 1.400 ຕື້ໂດລາສະຫະລັດ ເຊິ່ງມູນຄ່າການສົ່ງອອກຂອງຫວຽດນາມກວມເອົາພຽງ 0,5% ຂອງສ່ວນແບ່ງຕະຫຼາດເທົ່ານັ້ນ. ຄວນຮູ້ວ່າ, ລັດເຊຍແມ່ນຕະຫຼາດທີ່ກວມເອົາ 90% ຂອງຍອດມູນຄ່າການຄ້າທັງໝົດລະຫວ່າງຫວຽດນາມແລະ EAEU, ແຕ່ການຄ້າສອງຝ່າຍລະຫວ່າງຫວຽດນາມ ແລະ ລັດເຊຍ ກວມອັດຕາສ່ວນໜ້ອຍຂອງວົງເງິນການຄ້າຂາເຂົ້າຂາອອກຂອງສອງປະເທດ, ເຊິ່ງກວມພຽງ 0,7% ຂອງມູນຄ່າການຄ້າທັງໝົດຂອງລັດເຊຍ ແລະ ກວມເອົາ 0,9% ຂອງມູນຄ່າການຄ້າທັງໝົດຂອງຫວຽດນາມ.
ໃນໄລຍະສັ້ນ, ອາດຈະເວົ້າໄດ້ວ່າ ຫວຽດນາມພວມບັນລຸປະສິດທິຜົນສູງກວ່າ EAEU ນັບແຕ່ສັນຍາການຄ້າເສລີລະຫວ່າງຫວຽດນາມແລະ EAEU ມີຜົນບັງຄັບໃຊ້. ສາເຫດຫຼັກໜຶ່ງແມ່ນ ກະແສການສົ່ງອອກຂອງຫວຽດນາມມີຄວາມຫຼາກຫຼາຍ, ຕົ້ນຕໍແມ່ນສິນຄ້າອຸປະໂພກບໍລິໂພກ ທີ່ປະຊາຊົນນຳໃຊ້ຢ່າງກວ້າງຂວາງເຊັ່ນ: ໂທລະສັບມືຖື, ຄອມພິວເຕີ, ອາຫານ ແລະ ເສື້ອຜ້າ. ກຸ່ມສິນຄ້າບໍລິໂພກເຫຼົ່ານີ້ເຕີບໂຕຂຶ້ນຕັ້ງແຕ່ວັນທຳອິດທີ່ສັນຍາມີຜົນບັງຄັບໃຊ້. ກ່ຽວກັບຝ່າຍ EAEU, ເຫດຜົນທີ່ການສົ່ງອອກເຕີບໂຕບໍ່ສູງເທົ່າກັບຂອງຫວຽດນາມແມ່ນຍ້ອນວ່າ ສິນຄ້າສົ່ງອອກຈາກ EAEU ແມ່ນສິນຄ້າເພື່ອການລົງທຶນເຊັ່ນ ນ້ຳມັນ, ຜະລິດຕະພັນນ້ຳມັນ, ຝຸ່ນ, ໂລຫະ ແລະເຄື່ອງອາໄຫຼ່ລົດໂອໂຕ. ປະເພດສິນຄ້າເຫຼົ່ານີ້ເພີ່ມປະລິມານການສົ່ງອອກໄດ້ຍາກ ຍ້ອນວ່າຕ້ອງມີສັນຍາຊື້ຂາຍຂະໜາດໃຫຍ່, ຂໍ້ຕົກລົງການຂົງສົ່ງພິເສດ ແລະ ລູກຄ້າຕ້ອງເປັນບໍລິສັດຂະໜາກໃຫຍ່.
ສຳລັບການຄ້າບໍລິການ, ການແລກປ່ຽນບໍລິການລະຫວ່າງປະເທດຫວຽດນາມແລະກຸ່ມປະເທດ EAEU ຍັງໜ້ອຍພໍສົມຄວນ. ນອກຈາກບໍລິການຂົນສົ່ງ ແລະ ປະກັນໄພທີ່ກ່ຽວຂ້ອງກັບການຄ້າສິນຄ້າແລ້ວ ບໍລິການການທ່ອງທ່ຽວແລະການສຶກສາຍັງເປັນບໍລິການແລກປ່ຽນກັນຫຼາຍທີ່ສຸດໃນປະຈຸບັນ.
ໃນຂົງເຂດການລົງທຶນ, ລັດເຊຍຢູ່ໃນອັນດັບທີ 25 ຈາກ 135 ປະເທດແລະດິນແດນທີ່ລົງທຶນໃນຫວຽດນາມ (ເຖິງວັນທີ 20 ທັນວາ 2019). ຕາມກະຊວງແຜນການ ແລະການລົງທຶນ, ໃນ 11 ເດືອນຕົ້ນປີ 2019, ລັດເຊຍມີໂຄງການລົງທຶນໂດຍກົງເຂົ້າ ຫວຽດນາມ 13 ໂຄງການ, ດ້ວຍຈຳນວນທຶນທັງໝົດ 3,31 ລ້ານໂດລາສະຫະລັດ; ໃນຂະນະນັ້ນມີ 72 ໂຄງການທີ່ລົງທຶນທາງອ້ອມຂອງບັນດາວິສາຫະກິດລັດເຊຍ ດ້ວຍຈຳນວນທຶນຈົດທະບຽນທັງໝົດ 25,61 ລ້ານໂດລາສະຫະລັດ. ຈຳນວນໂຄງການລົງທຶນຂອງວິສາຫະກິດລັດເຊຍເຂົ້າໃນຫວຽດນາມ ໂດຍຜ່ານຮູບການປະກອບທຶນແລະຊື້ຫຸ້ນ. ຕາມຂໍ້ມູນຂອງສະຖານກົງສູນໃຫຍ່ ແຫ່ງສະຫະພັນທະລັດລັດເຊຍ ໃນນະຄອນໂຮ່ຈິມິນ, ຈົນເຖິງປະຈຸບັນ, ເງິນລົງທຶນທັງໝົດຂອງລັດເຊຍໃນຫວຽດນາມສູງເຖິງ 2,6 ຕື້ໂດລາສະຫະລັດ. ທ່າອ່ຽງການລົງທຶນໂດຍກົງຂອງລັດເຊຍໃນຫວຽດນາມ ແມ່ນສຸມໃສ່ບັນດາຂົງເຂດຜະລິດອຸດສາຫະກຳ, ພື້ນຖານໂຄງລ່າງຄົມມະນາຄົມ, ພະລັງງານ, ນ້ຳມັນແລະອາຍແກັສ, ອຸດສາຫະກຳປະກອບ, ເຕັກໂນໂລຊີສູງ. ທ່າອ່ຽງນີ້ກຳລັງເພີ່ມຂຶ້ນ ຍ້ອນວ່ານີ້ແມ່ນກຳລັງແຮງຂອງບັນດາວິສາຫະກິດລັດເຊຍ ແລະ ຫວຽດນາມກໍ່ກຳລັງເຊື້ອເຊີນການລົງທຶນເຂົ້າໃນບັນດາຂົງເຂດອຸດສາຫະກຳນີ້. ກົງກັນຂ້າມ, ຫວຽດນາມກໍ່ມີ 22 ໂຄງການລົງທຶນເຂົ້າໃນລັດເຊຍ ດ້ວຍຈຳນວນທຶນໃໝ່ແລະເພີ່ມທຶນຂຶ້ນ ເກືອບ 3 ຕື້ໂດລາສະຫະລັດ. ບັນດາໂຄງການໃຫຍ່ຄື ບໍລິສັດຮ່ວມທຶນ Rusvietpetro, ສູນການຄ້າແລະວັດທະນະທຳອະເນກປະສົງຮ່າໂນ້ຍ - ມົດສະກູ ແລະ ກອມແພຼດອຸດສາຫະກຳ-ກະສິກຳ ຂອງກຸ່ມບໍລິສັດ TH TrueMilk. ໃນນັ້ນ, ໂຄງການລ້ຽງງົວນົມ ແລະການປຸງແຕ່ງນົມ ມີມູນຄ່າກວ່າ 2 ຕື້ໂດລາສະຫະລັດ ທີ່ລົງທຶນໂດຍບໍລິສັດ TH TrueMilk ໃນມົດສະກູ ແລະ ຄາລູກ້າ ໄດ້ກາຍເປັນຈຸດສະຫວ່າງໃນການພົວພັນລົງທຶນຫວຽດນາມ - ລັດເຊຍ. ຄຽງຂ້າງນັ້ນ, ນັກລົງທຶນລັດເຊຍຍັງຕ້ອງການເສີມສ້າງຄວາມຮ່ວມມືດ້ານການລົງທຶນໃນພາກການກະເສດຂອງຫວຽດນາມ. ຄາດວ່ານີ້ຈະເປັນທິດທາງໃໝ່ໃນການເພີ່ມກະແສການລົງທຶນໂດຍກົງຈາກຕ່າງປະເທດ (FDI) ຈາກລັດເຊຍເຂົ້າໃນຫວຽດນາມ. ຕາມນັ້ນ, ຮູບແບບການຮ່ວມມືຈະໄດ້ຜັນຂະຫຍາຍແມ່ນນຳໃຊ້ເຕັກໂນໂລຊີ, ເຕັກນິກ, ແນວພັນຂອງບັນດານັກລົງທຶນຕ່າງປະເທດ ແນໃສ່ຮັບປະກັນຄຸນນະພາບຜະລິດຕະພັນກະສິກຳ.
ຫວຽດນາມແລະກາຊັກສະຖານສ້າງຕັ້ງວິສາຫະກິດຮ່ວມທຶນເພື່ອລົງທຶນກໍ່ສ້າງໂຮງຈັກທີ່ຕະຫຼາດຂອງກັນແລະກັນ, ຕົວຢ່າງເຊັ່ນໂຮງຈັກຜະລິດໝີ່ເສັ້ນແລະບັນດາຜະລິດຕະພັນຈາກແປ້ງຂອງບໍລິສັດ Mareven Food Holdings ດ້ວຍທຶນ 100% ຂອງຫວຽດນາມ ທີ່ກຳລັງເຄື່ອນໄຫວຢ່າງມີປະສິດທິຜົນໃນກາຊັກສະຖານ, ຜະລິດຕະພັນ 80% ຂອງບໍລິສັດນີ້ສົ່ງອອກໄປຍັງຕ່າງປະເທດ.
ສຳລັບເບລາຣຸດ, ປະຈຸບັນ ເບລາຣຸດມີສາມໂຄງການລົງທຶນໃນຫວຽດນາມ ດ້ວຍຈຳນວນທຶນທີ່ລົງທັງໝົດ 16,25 ລ້ານໂດລາສະຫະລັດ. ຫວຽດນາມມີໂຄງການລົງທຶນໃນເບລາຣຸດ ໃນດ້ານການຄ້າຂາຍສົ່ງແລະຂາຍຍ່ອຍ ຂອງບໍລິສັດການຄ້າຕ່າງປະເທດ IP Hapaco ເປັນເຈົ້າຂອງລົງທຶນ, ໃນຮູບແບບຂອງທຶນ FDI 100% ເປັນຈຳນວນ 1,6 ລ້ານໂດລາສະຫະລັດ. ໃນເດືອນກັນຍາ 2019, ໂຮງງານຜະລິດລົດບັນທຸກ Maz Asia ດ້ວຍກຳລັງການຜະລິດ 3.000 ຜະລິດຕະພັນ/ປີ ທີ່ຮ່ວມທຶນລະຫວ່າງຫວຽດນາມແລະເບລາຣຸດ ໄດ້ເປີດຂຶ້ນໃນແຂວງຮືງອຽນ. ຂັ້ນຕອນການຮ່ວມທຶນໃນການຜະລິດຜະລິດຕະພັນນົມໃນແຂວງນີ້ ໄດ້ຮັບການນລົງນາມດ້ວຍການກຳນົດທິດໄລຍະຍາວນານ ເພື່ອເຂົ້າເຖິງຕະຫຼາດບັນດາປະເທດອາຊຽນ ເຊິ່ງນຳເອົາຜົນປະໂຫຍດມາໃຫ້ທັງສອງຝ່າຍ.ສາມາດເຫັນໄດ້ວ່າ, ເຖິງວ່າການແຜ່ລະບາດຂອງໂຄວິດ-19 ໄດ້ເຮັດໃຫ້ການແລກປ່ຽນສິນຄ້າພົບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ການແລະປ່ຽນການຄ້າລະຫວ່າງຫວຽດນາມແລະ EAEU ຍັງບັນລຸຜົນງານທີ່ດີຫຼາຍຢ່າງ. ຂົງເຂດເສດຖະກິດ, ການຄ້າ ແລະການລົງທຶນລະຫວ່າງຫວຽດນາມແລະ EAEU ໄດ້ເປີດໂອກາດການຮ່ວມມືໃໝ່ໆຫຼາຍຢ່າງເຊັ່ນ ກະສິກຳ, ການລ້ຽງງົວນົມແລະປຸງແຕ່ງນົມ, ສ້າງຕັ້ງພວງພະນັງຄຸນຄ່າໃໝ່ໃນຂະແໜງສິນໃນນ້ຳ, ການຮ່ວມມືໃນບັນດາຂົງເຂດເຕັກໂນໂລຊີສູງ ແລະ ເຕັກໂນໂລຊີຂໍ້ມູນຂ່າວສານ.
ຄວາມສະດວກແລະຄວາມຫຍຸ້ງຍາກໃນການຜັນຂະຫຍາຍ
ສັນຍາການຄ້າເສລີລະຫວ່າງຫວຽດນາມ ແລະ ສະຫະພັນເສດຖະກິດອາຊີ-ເອຣົບ
ດ້ວຍບັນດາໝາກຜົນທີ່ໄດ້ຮັບພາຍຫຼັງທີ່ສັນຍາການຄ້າເສລີລະຫວ່າງຫວຽດນາມ ແລະ EAEU ມີຜົນບັງຄັບໃຊ້ຢ່າງເປັນທາງການ, ຂໍ້ສະດວກທີ່ເກີດຈາກສັນຍາສາມາດກ່າວເຖິງໄດ້ດັ່ງນີ້:
ທີໜຶ່ງ, ສັນຍາການຄ້າເສລີລະຫວ່າງຫວຽດນາມແລະ EAEU ມີຄວາມໝາຍຍຸດທະສາດ, ສ້າງຂອບກົດໝາຍແລະເງື່ອນໄຂທີ່ສະດວກ ເພື່ອພັດທະນາການພົວພັນຮ່ວມມືເສດຖະກິດ, ການຄ້າ ລະຫວ່າງຫວຽດນາມແລະ EAEU ເວົ້າລວມ ກໍ່ຄືກັບແຕ່ລະປະເທດສະມາຊິກເວົ້າສະເພາະ. ສັນຍາສະບັບນີ້ໄດ້ເປັນຂີດໝາຍໃຫຍ່ໃນຂະບວນວິວັດການເຊື່ອມໂຍງເສດຖະກິດສາກົນເລິກເຊິ່ງກວ້າງຂວາງຂອງຫວຽດນາມ.
ທີສອງ, EAEU ແມ່ນພາກພື້ນເສດຖະກິດທີ່ມີອັດຕາການເຕີບໂຕທີ່ດີ, ເປັນຕະຫຼາດຂະໜາດໃຫຍ່ ທີ່ມີສະມາຊິກຫ້າປະເທດ, ມີປະຊາກອນປະມານ 183 ລ້ານຄົນ (ປີ 2018); ລວມຍອດຜະລິດຕະພັນພາຍໃນສູງເຖິງ 1.900 ຕື້ໂດລາສະຫະລັດ ເຖິງທ້າຍປີ 2018 ແລະ ເພີ່ມຂຶ້ນເກືອບ 1% ໃນສາມເດືອນຕົ້ນປີ 2019(7). ເຖິງວ່າ EAEU ຫາກໍ່ໄດ້ສ້າງຕັ້ງໃນປີ 2015 ແຕ່ນີ້ແມ່ນກຸ່ມສະຫະພັນທີ່ມີຄວາມສາມາດບົ່ມຊ້ອນໃນການພັດທະນາ. ໃນອະນາຄົດ, EAEU ມີໂອກາດຂະຫຍາຍຕົວດີ ໂດຍການເພີ່ມບາງປະເທດຈາກປະຊາຄົມລັດເອກະລາດ (SNG). ນີ້ຈະແມ່ນທ່າໄດ້ປຽບສຳລັບບັນດາປະເທດທີ່ໄດ້ລົງນາມໃນສັນຍາການຄ້າເສລີກັບ EAEU ຄືປະເທດຫວຽດນາມ.
ທີສາມ, ບັນດາປະເທດ EAEU ໃນປະຈຸບັນກຳລັງຊຸກຍູ້ເປີດກວ້າງການພົວພັນດ້ານການຄ້າ, ການລົງທຶນ ກັບປະຊາຄົມອາຊຽນ ແນໃສ່ເພີ່ມທະວີການພົວພັນກັບພາກພື້ນອາຊີ-ປາຊີຟິກ. ໃນຂະນະທີ່ຫວຽດນາມກຳລັງຕັ້ງໜ້າພັດທະນາຕ່ອງໂສ້ການສະໜອງການຜະລິດສິນຄ້າ ແລະ ການບໍລິໂພກໃນພາກພື້ນ, ດັ່ງນັ້ນ ການເພີ່ມທະວີການພົວພັນເສດຖະກິດການຄ້າກັບຫວຽດນາມ ຕາມລວງເລິກ ຈະເປັນປະຖົມປັດໃຈເພື່ອໃຫ້ບັນດາຜູ້ຜະລິດແລະຜູ້ສະໜອງຜະລິດຕະພັນ ຂອງບັນດາປະເທດ EAEU ມີໂອກາດເຂົ້າຮ່ວມບັນດາຕ່ອງໂສ້ສະໜອງຜະລິດຕະພັນໃນພາກພື້ນອາຊີ-ປາຊີຟິກ.
ທີສີ່, ໂຄງສ້າງການຄ້າຜະລິດຕະພັນລະຫວ່າງຫວຽດນາມແລະ EAEU ມີລັກສະນະເພີ່ມເຕີມເຊິ່ງກັນແລະກັນ, ບໍ່ມີການແຂ່ງຂັນກັນໂດຍກົງ, ດັ່ງນັ້ນ ຜົນກະທົບຈາກການເປີດຕະຫຼາດຫວຽດນາມສູ່ຄູ່ຮ່ວມມື ໂດຍຜ່ານສັນຍາການຄ້າເສລີ ຈະຫຼຸດລົງຫຼາຍ.
ເຖິງຢ່າງໃດກໍຕາມ, ນອກຈາກບັນດາທ່າໄດ້ປຽບທີ່ກ່າວມານັ້ນ, ຍັງມີຄວາມຫຍຸ້ງຍາກບາງຢ່າງເມື່ອປະຕິບັດສັນຍາການຄ້າເສລີລະຫວ່າງຫວຽດນາມແລະ EAEU.
ທີໜຶ່ງ, ເຖິງວ່າໄດ້ມີບາດກ້າວພັດທະນາທີ່ດີ ແຕ່ລະດັບການໝູນໃຊ້ຄວາມເອື້ອອຳນວຍຈາກສັນຍາການຄ້າເສລີລະຫວ່າງຫວຽດນາມແລະ EAEU ກໍ່ຍັງຕ່ຳ, ໂດຍສະເພາະອັດຕາການນໍາໃຊ້ໃບຮັບຮອງແຫຼ່ງກໍາເນີດສິນຄ້າ ຮູບແບບ EAV.
ທີສອງ, ຫວຽດນາມປະຈຸບັນເປັນຄູ່ຮ່ວມສັນຍາການຄ້າເສລີທຳອິດຂອງ EAEU, ເລື່ອງນີ້ຈະຊ່ວຍໃຫ້ສິນຄ້າຂອງຫວຽດນາມມີທ່າດີພິເສດກວ່າ. ແຕ່ວ່າ, ໃນສະພາບການການແຜ່ລະບາດຂອງໂຄວິດ-19, ບັນດາວິສາຫະກິດຂອງຫວຽດນາມປະເຊີນກັບຄວາມທ້າທາຍບໍ່ໜ້ອຍ, ໂດຍສະເພາະໃນຂົງເຂດກະສິກຳແລະການປະມົງ. ຄວາມທ້າທາຍຕົ້ນຕໍເກີດຈາກຂໍ້ກຳນົດຂອງ TBT (ການປົກປ້ອງທາງເຕັກນິກທາງການຄ້າ) ແລະ SPS (ມາດຕະການສຸຂະອະນາໄມ ແລະ ການກັກກັນສັດ, ພືດ). ຄຽງຂ້າງນັ້ນ, ຂັ້ນຕອນແລະລະບຽບການນໍາເຂົ້າຂ້ອນຂ້າງສັບສົນແລະບໍ່ຊັດເຈນ, ບໍ່ສອດຄ່ອງກັນພາຍໃນ EAEU. ຕາມກຳນົດຂອງ EAEU, ຫາກວິສາຫະກິດໄດ້ຮັບການຮັບຮອງຈາກໜ່ວຍງານບໍລິຫານຄຸ້ມຄອງຂອງລັດໃຫ້ມີສິດສົ່ງອອກ ຝ່າຍ EAEU ຈະຍອມຮັບວິສາຫະກິດດັ່ງກ່າວ. ແຕ່ໃນຕົວຈິງ, ວິສາຫະກິດຫວຽດນາມຍັງບໍ່ໄດ້ຮັບການຍອມຮັບ ເນື່ອງຈາກຝ່າຍ EAEU ຍັງບໍ່ໄວ້ວາງໃຈລະບົບການກວດສອບ ແລະກັກກັນຂອງຫວຽດນາມ.
ທີສາມ, ອຸປະສັກອື່ນໆທີ່ອາດສາມາດກ່າວເຖິງຄື ການຕິດຕໍ່ແລກປ່ຽນກັບບັນດາຄູ່ຮ່ວມມືພາຍໃນ EAEU, ສ່ວນໃຫຍ່ໃຊ້ເງິນ ຣູເບີນ ແລະພາສາລັດເຊຍ, ກົນໄກຊຳລະເງິນບໍ່ສະດວກ...
ທີສີ່, ມູນຄ່າການຄ້າແລະການລົງທຶນລະຫວ່າງຫວຽດນາມ ກັບບັນດາປະເທດ EAEU ຍັງຕ່ຳເມື່ອທຽບກັບຄວາມສາມາດບົ່ມຊ້ອນ ແລະ ທຽບກັບຄູ່ຮ່ວມມືອື່ນຂອງຫວຽດນາມ. ນັກຊ່ຽວຊານດ້ານເສດຖະກິດລະບຸວ່າ, ໂຄຕາການສົ່ງອອກທີ່ໄດ້ຮັບສິດທິພິເສດຈາກ EAEU ແຕ່ບໍ່ໄດ້ຈັດຢູ່ໃນຜະລິດຕະພັນຫຼັກຂອງຫວຽດນາມ.
ມາດຕະການຊຸກຍູ້ການພົວພັນດ້ານການຄ້າ
ລະຫວ່າງຫວຽດນາມ ແລະ ສະຫະພັນເສດຖະກິດອາຊີ-ເອີຣົບ
ທີໜຶ່ງ, ບັນດາກະຊວງ, ຂະແໜງການທີ່ກ່ຽວຂ້ອງ ຕ້ອງສືບຕໍ່ໄປພ້ອມກັນກັບຊຸນຊົນວິສາຫະກິດ, ໂດຍຜ່ານບັນດາກົນໄກເຊັ່ນ ຄະນະກຳມະການປະສົມ, ຄະນະກຳມະການລະຫວ່າງລັດຖະບານ..., ເພື່ອສືບຕໍ່ສະໜັບສະໜູນແລະແກ້ໄຂຂະຈັດອຸປະສັກທີ່ບໍ່ແມ່ນພາສີ ໂດຍສະເພາະໃຫ້ຄວາມຮ່ວມມື ເພື່ອເຮັດໃຫ້ຂັ້ນຕອນການບໍລິຫານ ແລະສຸລະກາກອນເປັນແບບເອເລັກໂຕຣນິກ; ຂະຈັດອຸປະສັກໃນການອອກໃບຮັບຮອງແຫຼ່ງກຳເນີດ, ເຈລະຈາຍອມຮັບຮ່ວມກັນໃນດ້ານການກະສິກຳ; ກຳນົດກອບກົດໝາຍທີ່ເອື້ອອຳນວຍ; ເພີ່ມທະວີການຈັດກິດຈະກຳສົ່ງເສີມການຄ້າ ແລະ ການເຊື່ອມຕໍ່ທາງການຄ້າ ສຳລັບຊຸມຊົນວິສາຫະກິດຫວຽດນາມ ແລະ EAEU; ຄົ້ນຄວ້າຜັນຂະຫຍາຍປະຕິບັດບັນດາມາດຕະການ, ວິທີການແກ້ໄຂ ເພື່ອເພີ່ມທະວີການຮ່ວມມື, ຊຸກຍູ້ການຄ້າສອງຝ່າຍລະຫວ່າງຫວຽດນາມແລະ EAEU, ໃຊ້ປະໂຫບດສູງສຸດຈາກສັນຍາດັ່ງກ່າວ.
ທີສອງ, ເພີ່ມທະວີການຮ່ວມມືໃນຂົງເຂດການລົງທຶນ, ລວມທັງການລົງທຶນຂອງ ຫວຽດນາມເຂົ້າໃນ EAEU ແລະຂອງ EAEU ເຂົ້າໃນຫວຽດນາມ. ເພື່ອຊຸກຍູ້ການຮ່ວມມືໃນຂົງເຂດນີ້, ຕ້ອງການກຳນົດຄືນໃໝ່ບັນດາບຸລິມະສິດໃນການລົງທຶນຂອງທັງສອງຝ່າຍ ເຊິ່ງແຕ່ລະຝ່າຍລ້ວນແຕ່ມີທ່າດີ.
ທີສາມ, ສົ່ງເສີມພາລະບົດບາດຂອງລະບົບສະຖານທູດແລະສຳນັກງານການຄ້າຂອງຫວຽດນາມໃນບັນດາປະເທດ ແລະ ສຳນັກງານຕົວແທນການຄ້າຂອງບັນດາປະເທດໃນຫວຽດນາມ ໃນການສະໜອງຂໍ້ມູນຕະຫຼາດທີ່ທັນສະໄໝໃຫ້ແກ່ຊຸມຊົມວິສາຫະກິດ, ຊ່ວຍເພີ່ມໂອກາດໃນການນຳເຂົ້າແລະສົ່ງອອກສິນຄ້າ, ຂະຫຍາຍຕະຫຼາດແລະປະເພດສິນຄ້າສົ່ງອອກໃຫ້ມີຄວາມຫຼາກຫຼາຍ. ນີ້ເປັນຂົວຕໍ່ທີ່ສຳຄັນສຳລັບການສົ່ງເສີມການຄ້າ, ໂຄສະນາແລະແນະນຳພາບລັກສະນະແລະຜະລິດຕະພັນຂອງຫວຽດນາມ ສູ່ສາຍຕາຊາວໂລກ, ໂດຍສະເພາະສິນຄ້າສົ່ງອອກທີ່ສຳຄັນຂອງຫວຽດນາມເຊັ່ນ ອາຫານທະເລ, ຜັກແລະໝາກໄມ້ສົດ, ສິນຄ້າເອເລັກໂຕຣນິກ, ສ່ວນປະກອບເອເລັກໂຕຣນິກ, ສິ່ງທໍແລະເຄື່ອງນຸ່ງຫົ່ມ, ເຟີນີເຈີ, ເກີບ.
ທີສີ່, ຊຸກຍູ້ການຮ່ວມມືໃນຂົງເຂດການທ່ອງທ່ຽວ, ວິທະຍາສາດ-ເຕັກໂນໂລຊີ ແລະ ການສຶກສາ-ບຳລຸງສ້າງ. ນີ້ແມ່ນບັນດາຂົງເຂດທີ່ທັງເປັນຂົວຕໍ່ ທັງມີຄຸນປະໂຫຍດຊ່ວຍໜູນທີ່ໃຫຍ່ຫຼວງ ໃຫ້ແກ່ການເພີ່ມທະວີການຮ່ວມມືທາງດ້ານເສດຖະກິດລະຫວ່າງສອງຝ່າຍ. ເພີ່ມທະວີການຮ່ວມມືໃນຂົງເຂດການອົບຮົມສຶກສາ ບໍ່ພຽງແຕ່ຍົກສູງຄຸນນະພາບແຫຼ່ງຊັບພະຍາກອນມະນຸດຂອງຫວຽດນາມເທົ່ານັ້ນ ແຕ່ຍັງເປັນແຫຼ່ງສະໜອງ ກຳລັງຄົນໃຫ້ແກ່ວິສາຫະກິດ ແລະ ວິສາຫະກິດຮ່ວມທຶນ.
ທີຫ້າ, ສອງຝ່າຍຕ້ອງພັດທະນາໂຄງສ້າງພື້ນຖານ, ເຊັ່ນດຽວກັນກັບການບໍລິການຂົນສົ່ງ, ລວມທັງທ່າກຳເຮືອຂົນຖ່າຍແລະສາງເຢັນ. ເຖິງວ່າບັນດາຜູ້ສະໜອງຈາກເອີຣົບ, ອາເມລິກາ, ໂອເຊຍເນຍ ມາເຖິງຫວຽດນາມໄວກວ່າລັດເຊຍ ແລະບັນດາປະເທດ EAEU, ແຕ່ວ່າມິດຕະພາບອັນຍາວນານ, ການຮ່ວມມື ແລະ ການແລກປ່ຽນວັດທະນະທຳ ລະຫວ່າງປະເທດໃນກຸ່ມ EAEU ແລະຫວຽດນາມນັ້ນ ສົ່ງຜົນດີຕໍ່ຄວາມຫວັງໃນການເຕີບໂຕດ້ານການຄ້າ.
ເວົ້າອີກຢ່າງໜຶ່ງ, ຕ້ອງເປີດເສັ້ນທາງຂົນສົ່ງທາງທະເລລະຫວ່າງຫວຽດນາມ ແລະ EAEU ເພື່ອຍົກສູງປະສິດທິຜົນຂອງກິດຈຳກຳການສົ່ງອອກການນຳເຂົ້າ ແລະ ການລົງທຶນລະຫວ່າງສອງຝ່າຍ. ທັງສອງຝ່າຍຕ້ອງເລືອກເສັ້ນທາງທີ່ມີປະສິດທິຜົນທີ່ສຸດ ເພື່ອຜັນຂະຫຍາຍ ແລະ ພັດທະນາເປັນເສັ້ນທາງປົກກະຕິ.
ທີ່ຫົກ, ເພື່ອເພີ່ມປະລິມານການສົ່ງອອກໄປຍັງຕະຫຼາດອາຊີ-ເອີຣົບ, ບັນດາວິສາຫະກິດຫວຽດນາມຕ້ອງມີຍຸດທະສາດ, ກຳນົດຜະລິດຕະພັນທີ່ມີທ່າແຮງ, ມີຄວາມຕ້ອງການຂອງຕະຫຼາດ EAEU, ຈາກນັ້ນ ເພີ່ມທະວີການລົງທຶນ ແລະ ຍົກສູງຄວາມສາມາດການແຂ່ງຂັນ. ວິສາຫະກິດຫວຽດນາມຍັງຕ້ອງເຂົ້າໃຈແຈ້ງແຜນງານການຫຼຸດພາສີນຳເຂົ້າ ທີ່ກ່ຽວຂ້ອງກັບການຜະລິດແລະທຸລະກິດ, ເປັນເຈົ້າການໃນການສ້າງຍຸດທະສາດການຜະລິດ, ທຸລະກິດໃຫ້ເໝາະສົມໃນໄລຍະສັ້ນແລະໄລຍະຍາວ, ໃຊ້ໂອກາດຢ່າງເຕັມທີ ແລະ ພ້ອມທີ່ຈະແຂ່ງຂັນ. ວິສາຫະກິດຫວຽດນາມຕ້ອງກຳແໜ້ນຂໍ້ມູນກ່ຽວກັບສັນຍາການຄ້າເສດລີລະຫວ່າງຫວຽດນາມແລະ EAEU ເພື່ອຮຽນຮູ້ ແລະ ໃຊ້ປະໂຫຍດຈາກການເອື້ອອຳນວຍ ເພື່ອຊຸກຍູ້ການແລກປ່ຽນທາງທຸລະກິດ; ພ້ອມກັນນັ້ນ, ຕັ້ງໜ້າເຂົ້າຮ່ວມຕະຫຼາດນັດ, ການວາງສະແດງສິນຄ້າ ເພື່ອເຊື່ອມຕໍ່ການລົງທຶນ.
ທີເຈັດ, ໃນປະຈຸບັນ ຫວຽດນາມແລະບັນດາປະເທດ EAEU ເວົ້າລວມ, ແລະລັດເຊຍເວົ້າສະເພາະ ມີຄວາມຕ້ອງການຈຳນວນຫຼາຍກ່ຽວກັບສິນຄ້າກະສິກຳຂອງກັນແລະກັນ, ດັ່ງນັ້ນ, ສອງຝ່າຍຕ້ອງພັດທະນາການພົວພັນດ້ານການຄ້າຕາມຂົງເຂດນີ້, ສ້າງເງື່ອນໄຂອັນສະດວກໃຫ້ວິສາຫະກິດສົ່ງອອກສິນຄ້າສູ່ຕະຫຼາດຂອງກັນແລະກັນ.
ທີແປດ, ເພື່ອແກ້ໄຂບັນຫາໃນການທຸລະກໍາການຄ້າ, ຫວຽດນາມແລະບັນດາປະເທດ EAEU ເວົ້າລວມ, ກັບລັດເຊຍເວົ້າສະເພາະ ໄດ້ສ້າງກົນໄກຊຳລະສະສາງດ້ວຍເງິນຕາພາຍໃນ (ຫວຽດນາມດົ່ງ / ຣູເບີນ). ບັນດາທະນາຄານການຄ້າຂອງທັງສອງຝ່າຍ ຕ້ອງສົ່ງເສີມຂໍ້ມູນຂ່າວສານໃຫ້ກັບວິສາຫະກິດແລະລູກຄ້າເພີ່ມເຕີມກ່ຽວກັບຜົນປະໂຫຍດຂອງການຊຳລະເງິນດ້ວຍສະກຸນເງິນພາຍໃນປະເທດ ເພື່ອຮອງຮັບສະພາບຄ່ອງສຳລັບການຊຳລະເງິນ ດ້ວຍເງິນ ຣູເບີນ ແລະ ຫວຽດນາມດົ່ງ.
ອາດເຫັນໄດ້ວ່າ, ດ້ວຍຈຳນວນປະຊາກອນກວ່າ 180 ລ້ານຄົນ ແລະ ເນື້ອທີ່ກວມເອົາເກືອບ 20% ຂອງເນື້ອທີ່ດິນທັງໝົດ ໂດຍມີໂຄງປະກອບເສດຖະກິດທີ່ມີລັກສະນະເພີ່ມເຕີມໃຫ້ແກ່ຫວຽດນາມ, EAEU ເປັນຕະຫຼາດທີ່ມີຄວາມສາມາດບົ່ມຊ້ອນສຳລັບການສົ່ງອອກຜະລິດຕະພັນທາງການກະສິກຳ, ສິນໃນນ້ຳ, ເຄື່ອງຕ່ຳແຜ່ນແລະນຸ່ງຫົ່ມ, ເກີບ... ຂອງຫວຽດນາມ, ແລະຍັງເປັນແຫຼ່ງສະໜອງເຄື່ອງກົນຈັກ, ອຸປະກອນ, ທາດເຄມີ, ບັນດາຜະລິດຕະພັນເຕັກໂນໂລຊີຊີວະພາບ, ພະລັງງານທີ່ມີລາຄາຕ່ຳ ຄຸນນະພາບສູງ ໃຫ້ແກ່ຫວຽດນາມ. ແຕ່ວ່າ, ປະຈຸບັນຫວຽດນາມຢູ່ໃນອັນດັບທີ 24 ໃນກຸ່ມປະເທດທີ່ນຳເຂົ້າຈາກ EAEU ແລະ ອັນດັບທີ 11 ໃນກຸ່ມປະເທດທີ່ສົ່ງອອກໄປຍັງ EAEU. ທັງຫວຽດນາມແລະ EAEU ກໍ່ລ້ວນແຕ່ໃຫ້ຄວາມສຳຄັນ ແລະ ມຸ່ງຫວັງຈະຊຸກຍູ້ການພົວພັນລະຫວ່າງສອງຝ່າຍ. ບັນດາປະເທດ EAEU ລ້ວນແຕ່ຖືວ່າ ຫວຽດນາມເປັນຄູ່ຮ່ວມມືສຳຄັນ ທັງທາງດ້ານການເມືອງແລະທາງເສດຖະກິດ. ດັ່ງນັ້ນ, ການຊຸກຍູ້ການພົວພັນຮ່ວມມືກັບຫວຽດນາມ ຈະສ້າງເງື່ອນໄຂທີ່ເອື້ອອຳນວຍສຳລັບບັນດາປະເທດ EAEU ເພື່ອເຊື່ອມຕໍ່ເຂົ້າກັບຕະຫຼາດສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ) ຂະໜາດໃຫຍ່. ສຳລັບຫວຽດນາມ, ການຟື້ນຟູແລະພັດທະນາບັນດາຕະຫຼາດທີ່ເປັນມູນເຊື້ອໃນ EAEU ຈະສ້າງເງື່ອນໄຂໃຫ້ຫວຽດນາມຍູ້ແຮງການສົ່ງອອກສິນຄ້າເຂົ້າໃນຕະຫຼາດບັນດາປະເທດ SNG ແລະ ເອີຣົບຕາເວັນອອກ. ດັ່ງນັ້ນ, ສອງຝ່າຍຕ້ອງພະຍາຍາມກວ່າອີກ ເພື່ອແກ້ໄຂຂໍ້ບົກພ່ອງແລະຂະຈັດບັນຫາ, ເພື່ອໃຊ້ປະໂຫຍດຢ່າງເຕັມທີ່ຈາກຄວາມເອື້ອອຳນວຍ ເຊິ່ງສັນຍາການຄ້າເສລີລະຫວ່າງຫວຽດນາມແລະ EAEU ນຳມາໃຫ້ ແລະ ຈາກນັ້ນການຄ້າແລະການລົງທຶນຈະສືບຕໍ່ຂະຫຍາຍຕົວຢ່າງເຂັ້ມແຂງໃນໄລຍະຈະມາເຖິງ./.
------------------
(1) ຕຸ່ງບາວ: “ຍາດແຍ່ງຄວາມສະດວກFTA ລະຫວ່າງ ຫວຽດນາມ -EAEU”, https://nhandan.com.vn/tin-tuc-kinh-te/tranh-thu-thuan-loi-fta-giua-viet-nam-eaeu-275260, ວັນທີ 15-ຕຸລາ-2016.
(2), (3), (4) ຮວ່າງຮວາ: “ຫວນເບິ່ງຄືນສອງປີທີ່ປະຕິບັດຕາມສັນຍາການຄ້າເສລີລະຫວ່າງຫວຽດນາມ ແລະ ສະຫະພັນເສດຖະກິດອາຊີ-ເອີຣົບ. https://vn.sputniknews.com/vietnam_russia/201810096350254-viet-nam-thuong-mai-tu-do-lien-minh-kinh-te-a-au/, ວັນທີ 9 ຕຸລາ 2018.
(5), (6) ຈຸງຮຶງ: “ການຄ້າຫວຽດນາມ - ພາກພື້ນອາຊີ-ເອີຣົບ ມີຄວາມເຕີບໂຕຢ່າງຕັ້ງໜ້າ”, https://nhandan.com.vn/nhan-dinh/thuong-mai-viet-nam-khu-vuc-a-au-tang-truong-tich-cuc-627648/, ວັນທີ 10 ທັນວາ 2020.
(7) ເຟືອງທາວ: “ສັນຍາການຄ້າເສລີລະຫວ່າງຫວຽດນາມແລະສະຫະພັນເສດຖະກິດອາຊີ-ເອີຣົບພາຍຫຼັງສາມປີ: ຄວາມເຊື່ອໝັ້ນເຂົ້າໃນບັນດາໂອກາດໃໝ່”, https://moit.gov.vn/CmsView-EcoIT-portlet/html/print_cms.jsp?articleId=17368, ວັນທີ 13 ທັນວາ 2019
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 966 (ເດືອນພຶດສະພາ 2021)