ປົກປ້ອງພົນລະເມືອງຫວຽດນາມທີ່ໄປເຮັດວຽກຢູ່ຕ່າງປະເທດ
ຕາມສົນທິສັນຍາສາກົນວ່າດ້ວຍການຮ່ວມມືດ້ານແຮງງານ
ຕາມສົນທິສັນຍາສາກົນວ່າດ້ວຍການຮ່ວມມືດ້ານແຮງງານ
ວກ. - ການປົກປ້ອງພົນລະເມືອງຫວຽດນາມທີ່ໄປເຮັດວຽກຢູ່ຕ່າງປະເທດຕາມສົນທິສັນຍາສາກົນວ່າດ້ວຍການຮ່ວມມືດ້ານແຮງງານ ແມ່ນຄວາມຕ້ອງການຂອງຫຼາຍປະເທດໃນໂລກ ລວມທັງຫວຽດນາມ. ໃນນັ້ນ, ການປັບປຸງລະບຽບກົດໝາຍປົກປ້ອງພົນລະເມືອງຕ້ອງໄດ້ເພີ່ມທະວີຢ່າງບໍ່ຢຸດຢັ້ງ ໃນໄລຍະເວລາທີ່ຈະມາເຖິງ.
ສະພາບຕົວຈິງກ່ຽວກັບການປົກປ້ອງພົນລະເມືອງຫວຽດນາມທີ່ໄປເຮັດວຽກຢູ່ຕ່າງປະເທດ
ກະຊວງການຕ່າງປະເທດ, ໂດຍກົງແມ່ນກົມການກົງສູນແລະຄະນະກຳມະການແຫ່ງລັດກ່ຽວກັບຊາວຫວຽດນາມອາໄສຢູ່ຕ່າງປະເທດ, ມີຄວາມຮັບຜິດຊອບໃນການປະຕິບັດໜ້າທີ່ປົກປັກຮັກສາຜົນປະໂຫຍດຂອງພົນລະເມືອງຫວຽດນາມຢູ່ຕ່າງປະເທດ. ກົມການກົງສູນປະຕິບັດບັນດາພາລະໜ້າທີ່ກ່ຽວຂ້ອງເຖິງການປົກປ້ອງພົນລະເມືອງເຊັ່ນ: ການຄຸ້ມຄອງລັດກ່ຽວກັບການເຄື່ອນໄຫວອົບພະຍົບຂອງພົນລະເມືອງຫວຽດນາມໄປຕ່າງປະເທດ; ການຄຸ້ມຄອງທາງກົງສູນສຳລັບພົນລະເມືອງແລະນິຕິບຸກຄົນຫວຽດນາມໃນຕ່າງປະເທດ; ແນະນຳ, ຊີ້ນຳບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດ ສົມທົບກັບບັນດາອົງການທີ່ມີອຳນາດ ໃນການປົກປ້ອງສິດ ແລະຜົນປະໂຫຍດອັນຊອບທຳ ຂອງພົນລະເມືອງຫວຽດນາມທີ່ເດີນທາງອອກ ແລະອາໄສຢູ່ຕ່າງປະເທດ (3). ເພື່ອເພີ່ມທະວີປະສິດທິຜົນຂອງວຽກງານການປົກປ້ອງພົນລະເມືອງແລະນິຕິບຸກຄົນຫວຽດນາມ, ຫ້ອງການເພື່ອການປົກປ້ອງພົນລະເມືອງແລະນິຕິບຸກຄົນຫວຽດນາມ ສັງກັດກົມການກົງສູນ, ກະຊວງການຕ່າງປະເທດ ໄດ້ຮັບການຈັດຕັ້ງຂຶ້ນໃນເດືອນເມສາ 2012, ເປັນຈຸດປະສານງານໃນການແກ້ໄຂບັນຫາທີ່ກ່ຽວຂ້ອງກັບການປົກປ້ອງພົນລະເມືອງຫວຽດນາມຢູ່ຕ່າງປະເທດ. ຄຽງຄູ່ກັນນັ້ນ, ເວັບໄຊທ໌ກ່ຽວກັບວຽກງານກົງສຸນໄດ້ຮັບການຄຸ້ມຄອງໂດຍກົມການກົງສູນ, ເຊິ່ງເຜີຍແຜ່ຂໍ້ມູນກ່ຽວກັບການປົກປ້ອງພົນລະເມືອງ, ໃຫ້ການເຕືອນໄພທີ່ຈໍາເປັນແກ່ພົນລະເມືອງ ເພື່ອປ້ອງກັນ ແລະ ຫຼີກລ້ຽງຄວາມສ່ຽງແລະໄພພິບັດທີ່ອາດຈະເປັນອັນຕະລາຍຕໍ່ຊີວິດຂອງເຂົາເຈົ້າ ເມື່ອເຂົາເຈົ້າອອກໄປແລະອາໄສຢູ່ຕ່າງປະເທດ. ຫ້ອງຫານໂທລະຄົມສະໜັບສະໜູນການປົກປ້ອງພົນລະເມືອງແລະນິຕິບຸກຄົນຫວຽດນາມຢູ່ຕ່າງປະເທດ ເລີ່ມເຄື່ອນໄຫວຕັ້ງແຕ່ເດືອນກຸມພາ 2015, ຮັບໂທລະສັບທຸກສາຍເພື່ອສະໜອງຂໍ້ມູນ, ສະທ້ອນຄຳຮ້ອງແລະສະເໜີໃຫ້ຄວາມຊ່ວຍເຫຼືອຂອງພົນລະເມືອງແລະນິຕິບຸກຄົນຫວຽດນາມຢູ່ຕ່າງປະເທດ.
ຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ແມ່ນອົງການລະດັບກົມໃຫຍ່ທີ່ສັງກັດກະຊວງການຕ່າງປະເທດ, ເຊິ່ງປະຕິບັດພາລະໜ້າທີ່ການຄຸ້ມຄອງລັດກ່ຽວກັບວຽກງານຕໍ່ຊາວຫວຽດນາມຢູ່ຕ່າງປະເທດ. ຕາມນັ້ນ, ຄະນະກຳມະການມີໜ້າທີ່ສັງລວມ, ປະເມີນສະພາບການຂອງຊຸມຊົນຊາວຫວຽດນາມຢູ່ຕ່າງປະເທດ; ຊ່ວຍເຫຼືອ, ອຳນວຍຄວາມສະດວກໃຫ້ຊາວຫວຽດນາມຢູ່ຕ່າງປະເທດມີຊີວິດເປັນປົກກະຕິ, ເຊື່ອມໂຍງເຂົ້າກັບສັງຄົມທ້ອງຖິ່ນ, ປະຕິບັດມະຫາສາມັກຄີແຫ່ງຊາດ; ຈັດຕັ້ງແລະຊີ້ນຳບັນດາອົງການ ແລະ ບຸກຄົນຊາວຫວຽດນາມຢູ່ຕ່າງປະເທດໃນການພົວພັນຂອງເຂົາກັບປະເທດ(4). ພຶດຕິກຳຕົວຈິງໃຫ້ເຫັນວ່າ, ການປົກປ້ອງສິດແລະຜົນປະໂຫຍດອັນຊອບທຳຂອງພົນລະເມືອງຫວຽດນາມ ໄດ້ຮັບການປະຕິບັດຢ່າງຕັ້ງໜ້າ ແລະມີວິທີທາງ ໂດຍບັນດາອົງການອຳນາດຂອງຫວຽດນາມ. ວຽກງານນີ້ໂດຍພື້ນຖານແມ່ນຜ່ານກົນໄກຊີ້ນຳ ແລະ ດຳເນີນງານ ຈາກກະຊວງການຕ່າງປະເທດ (ກົມການກົງສຸນ) ເຖິງບັນດາອົງການຜູ້ຕາງໜ້າທີ່ກ່ຽວຂ້ອງ.
ບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດມີບົດບາດຫຼັກໃນການເຄື່ອນໄຫວປົກປ້ອງພົນລະເມືອງຫວຽດນາມຢູ່ຕ່າງປະເທດ. ລັດຖະບານຈັດຕັ້ງອົງການຜູ້ຕ່າງໜ້າຂຶ້ນ ໂດຍອີງໃສ່ຄວາມຕ້ອງການ, ການເຄື່ອນໄຫວ, ການພົວພັນຕ່າງປະເທດ, ບົນພື້ນຖານຂໍ້ຕົກລົງກັບບັນດາປະເທດທີ່ຮັບແລະອົງການຈັດຕັ້ງສາກົນ, ແລະຢູ່ພາຍໃຕ້ການຄຸ້ມຄອງໂດຍກົງຂອງກະຊວງການຕ່າງປະເທດ. ອົງການຜູ້ຕາງໜ້າປະຕິບັດໜ້າທີ່ການກົງສຸນ (ລວມທັງການເຄື່ອນໄຫວປົກປ້ອງດ້ານກົງສຸນ) ແລະໜ້າທີ່ສະໜັບສະໜູນ, ປົກປ້ອງຊຸມຊົນຊາວຫວຽດນາມຢູ່ຕ່າງປະເທດ (5).
ໃນຂົງເຂດແຮງງານ, ກົມຄຸ້ມຄອງແຮງງານຢູ່ຕ່າງປະເທດ ສັງກັດກະຊວງແຮງງານ - ທະຫານເສຍອົງຄະ ແລະ ສັງຄົມ ມີຄວາມຮັບຜິດຊອບໃນການຊ່ວຍລັດຖະມົນຕີປະຕິບັດພາລະໜ້າທີ່ຄຸ້ມຄອງລັດ ຕໍ່ຜູ້ອອກແຮງງານຫວຽດນາມທີ່ໄປເຮັດວຽກຢູ່ຕ່າງປະເທດ ຕາມສັນຍາ; ຄະນະຄຸ້ມຄອງແຮງງານພາຍໃຕ້ອົງການຜູ້ຕາງໜ້າຫວຽດນາມ, ໂດຍກະຊວງແຮງງານ - ທະຫານເສຍອົງຄະແລະສັງຄົມ ແລະ ກະຊວງການຕ່າງປະເທດ, ກະຊວງພາຍໃນ ພ້ອມກັນສ້າງຕັ້ງຂຶ້ນຢູ່ບັນດາປະເທດ, ພາກພື້ນທີ່ມີແຮງງານຫວຽດນາມຈຳນວນຫຼາຍ. ປະຈຸບັນ, ຫວຽດນາມມີຄະນະຄຸ້ມຄອງແຮງງານໃນ 6 ປະເທດແລະອານາເຂດ ທີ່ມີຄົນງານຫວຽດນາມເຮັດວຽກຈຳນວນຫຼາຍເຊັ່ນ: ຍີ່ປຸ່ນ, ສ.ເກົາຫຼີ, ໃຕ້ຫວັນ (ຈີນ), ມາເລເຊຍ, ສະຫະນະຄອນ ເອເມຣັດ ອາຣັບ (UAE), ອາຣັບບີ ຊາອູດິດ. ຢູ່ບັນດາປະເທດທີ່ບໍ່ທັນມີຄະນະຄຸ້ມຄອງແຮງງານ, ອົງການຜູ້ຕາງໜ້າຫວຽດນາມຢູ່ນັ້ນ ຈະຕາງໜ້າລັດຫວຽດນາມ ໃນການຄຸ້ມຄອງແລະຊ່ວຍແກ້ໄຂບັນຫາທີ່ກ່ຽວຂ້ອງກັບຜູ້ອອກແຮງງານທີ່ກຳລັງເຮັດວຽກໃນປະເທດນັ້ນ.
ວຽກງານການປົກປ້ອງພົນລະເມືອງໃນເວລາທີ່ຜ່ານມາໄດ້ບັນລຸຜົນງານທີ່ຕັ້ງໜ້າ, ຄຽງຄູ່ກັບຄວາມພະຍາຍາມຂອງບັນດາອົງການທາງການຫວຽດນາມຢູ່ຕ່າງປະເທດ, ຍັງມີການປະສານງານຢ່າງແໜ້ນແຟ້ນຂອງອຳນາດການປົກຄອງປະເທດເຈົ້າພາບ. ເກືອບໝົດທຸກປະເທດທີ່ມີຜູ້ອອກແຮງງານຫວຽດນາມອາໄສແລະເຮັດວຽກ ລ້ວນແຕ່ໄດ້ ອຳນວຍເງື່ອນໄຂທີ່ດີ ໃຫ້ວຽກງານການປົກປ້ອງພົນລະເມືອງ. ບາງປະເທດທີ່ມີພົນລະເມືອງໄປເຮັດວຽກຢູ່ຕ່າງປະເທດເປັນຈຳນວນຫຼາຍ ຫຼືມີຄົນອົບພະຍົບຈຳນວນຫຼາຍທີ່ຄ້າຍຄືກັບຫວຽດນາມ ກໍ່ໄດ້ສ້າງກົນໄກທີ່ຍືດຫຍຸ່ນແລະມີປະສິທິຜົນ, ເຊັ່ນ: ການສ້າງຕັ້ງອົງການສະເພາະ. ສີລັງກາສ້າງຕັ້ງຄະນະກຳມະການທີ່ປຶກສາລະດັບສູງ ດ້ວຍການເຂົ້າຮ່ວມຂອງບັນດາກະຊວງ, ຂະແໜງການ, ອົງການຈັດຕັ້ງເອກະຊົນ, ກຳມະບານ, ບັນດາອົງການສັງຄົມ, ໄດ້ສ້າງຕັ້ງຄະນະກຳມະການປະສານງານລະຫວ່າງກະຊວງ ເພື່ອຊຸກຍູ້ວຽກງານຜ່ານຈຸດປະສານງານຈາກກະຊວງ, ຂະແໜງການທີ່ສຳຄັນ(6). ຕາມນັ້ນ, ອົງການນີ້ມີອຳນາດໃນການຕັດສິນໃຈກ່ຽວກັບການປະຕິບັດງານ ຫຼືມອບໜ້າທີ່ໂດຍກົງໃຫ້ອົງການຮັບຜິດຊອບເມື່ອມີກໍລະນີ, ເຫດການເກີດຂຶ້ນ; ອາດຈະກຳນົດ ລະບຽບການແລກປ່ຽນ, ປັບປຸງຂໍ້ມູນຂ່າວສານ, ສ້າງຕັ້ງໜ່ວຍງານປະສານງານຢ່າງວ່ອງໄວລະຫວ່າງອົງການທີ່ກ່ຽວຂ້ອງ ເພື່ອແກ້ໄຂກໍລະນີ, ຄະດີ.
ຢູ່ຫວຽດນາມ, ເມື່ອມີຄວາມຈຳເປັນຕ້ອງການ ໃນການປົກປ້ອງພົນລະເມືອງ, ອົງການຜູ້ຕາງໜ້າຈະເປັນເຈົ້າການ ຜັນຂະຫຍາຍບັນດາມາດຕະການດ້ານວິຊາຊີບ, ປະກອບສ່ວນຢ່າງຕັ້ງໜ້າແລະມີປະສິດທິຜົນ ເຂົ້າໃນວຽກງານການປົກປ້ອງພົນລະເມືອງ; ຍົກຕົວຢ່າງເຊັ່ນ: ຕິດຕໍ່ສື່ສານກັບອົງການປົກຄອງທ້ອງຖິ່ນຢ່າງເປັນປົກກະຕິ ເພື່ອອຳນວຍຄວາມສະດວກໃຫ້ພົນລະເມືອງຫວຽດນາມອາໄສ, ຮ່ຳຮຽນ, ເຮັດວຽກຢ່າງຖືກຕາມກົດໝາຍ; ປົກປ້ອງພົນລະເມືອງທັນທີເມື່ອຖືກຈັບ, ກັກຂັງ ຫຼື ກັກຂັງຊົ່ວຄາວ ຍ້ອນລະເມີດກົດໝາຍຂອງປະເທດເຈົ້າພາບ; ສະໜັບສະໜູນ, ຊ່ວຍເຫຼືອໃນກໍລະນີທີ່ມີຄວາມຫຍຸ້ງຍາກ; ຂົນຂວາຍສະມາຄົມຊາວຫວຽດນາມໃຫ້ການຊ່ວຍເຫຼືອຢ່າງຕັ້ງໜ້າແກ່ວຽກງານປົກປ້ອງພົນລະເມືອງ; ແຕ່ງຕັ້ງພະນັກງານເຂົ້າຮ່ວມກອງປະຊຸມສານ ເພື່ອປົກປ້ອງສິດຜົນປະໂຫຍດຂອງຜູ້ອອກແຮງງານ ແລະ ຮຽກຮ້ອງໃຫ້ນາຍຈ້າງ, ບໍລິສັດປະກັນໄພ ທົດແທນຄ່າເສຍຫາຍໃຫ້ແກ່ພົນລະເມືອງ ເມື່ອປະສົບອຸບັດເຫດຈາກການເຮັດວຽກ; ເຜີຍແຜ່ຂໍ້ມູນຂ່າວສານ ແນະນຳພົນລະເມືອງ ແລະ ແຕ່ງຕັ້ງພະນັກງານ ດຳເນີນການສາຍດ່ວນທຸກວັນຕະຫຼອດ 24 ບົ່ວໂມງ ເພື່ອໃຊ້ມາດຕະການປ້ອງກັນໃນສະຖານະການວິກິດໂດຍທັນທີ. ບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດ ໄດ້ປະກອບສ່ວນແກ້ໄຂຫຼາຍກໍລະນີ ຄະດີ ເຊິ່ງໄດ້ຮັບການຍອມຮັບແລະຕີລາຄາສູງຈາກຍາດພີ່ນ້ອງ ແລະ ຄອບຄົວຂອງພົນລະເມືອງຫວຽດນາມ ທີ່ປະສົບກັບບັນຫາ ແລະຄວາມທຸກຍາກລຳບາກຢູ່ຕ່າງປະເທດ.
ຢ່າງໃດກໍຕາມ, ຄຽງຄູ່ກັບບັນດາຜົນງານທີ່ບັນລຸໄດ້ນັ້ນ, ກົນໄກປະສານງານກັບປະເທດເຈົ້າພາບຍັງແມ່ນຈຸດອ່ອນ ໃນວຽກງານປົກປ້ອງຊາວຫວຽດນາມທີ່ໄປເຮັດວຽກຢູ່ຕ່າງປະເທດ, ໂດຍສະເພາະແມ່ນ ຢູ່ປະເທດທີ່ຍັງບໍ່ມີອົງການຜູ້ຕາງໜ້າຫວຽດນາມ. ປະຈຸບັນ, ຫວຽດນາມຍັງບໍ່ມີກົນໄກປະສານສົມທົບຢ່າງແໜ້ນແຟ້ນ, ກຳນົດຄວາມຮັບຜິດຊອບລະຫວ່າງອົງການອຳນາດໃນປະເທດເທດ ແລະອົງການຜູ້ຕາງໜ້າຫວຽດນາມຢູ່ຕ່າງປະເທດ. ໃນກໍລະນີຕ້ອງຮັບມືກັບສະຖານະການວິກິດຢ່າງວ່ອງໄວແລະຮີບດ່ວນນັ້ນ ບໍ່ໄດ້ສ້າງຄວາມສອດຄ່ອງແລະປະສິດທິພາບ. ສິ່ງດັ່ງກ່າວໄດ້ຫຼຸດປະສິດທິຜົນສ່ວນໜຶ່ງ ຂອງວຽກງານການປົກປ້ອງພົນລະເມືອງເວົ້າລວມ ແລະ ການປົກປ້ອງຜູ້ອອກແຮງງານຫວຽດນາມທີ່ໄປເຮັດວຽກຢູ່ຕ່າງປະເທດຕາມສັນຍາເວົ້າສະເພາະ. ໃນຫຼາຍກໍລະນີ, ອົງການເຈົ້າໜ້າທີ່ຂອງປະເທດທີ່ບໍ່ໄດ້ລົງນາມໃນສັນຍາກົງສຸນກັບປະເທດຂອງພວກເຮົາ ບໍ່ແຈ້ງໃຫ້ອົງການຜູ້ຕາງໜ້າຂອງຫວຽດນາມຊາບ ກ່ຽວກັບການຈັບກຸມ ແລະການພິຈາລະນາຄະດີຂອງຊາວຫວຽດນາມ. ສິ່ງນີ້ເປັນອັນຕະລາຍຕໍ່ວຽກງານການປົກປ້ອງພົນລະເມືອງ. ຂໍ້ເສຍອີກຢ່າງຫນຶ່ງແມ່ນ, ຢູ່ບັນດາປະເທດທີ່ຍັງບໍ່ທັນລົງນາມໃນສັນຍາຊ່ວຍເຫຼືອດ້ານກົດໝາຍກັບຫວຽດນາມ, ພົນລະເມືອງຫວຽດນາມຈະຕ້ອງຜ່ານຂັ້ນຕອນການເຮັດໃຫ້ຖືກຕ້ອງຕາມກົດໝາຍ ຖ້າຫາກຢາກໃຊ້ເອກະສານທີ່ອອກໂດຍອົງການຫວຽດນາມ, ຕ້ອງຈ່າຍຄ່າທຳນຽມສານລ່ວງໜ້າເມື່ອຖືກຟ້ອງສານ, ຄຳພິພາກສາ ຫຼືຄຳຕັດສິນຂອງສານຕ່າງປະເທດບໍ່ໄດ້ຮັບການຍອມຮັບແລະບັງຄັບໃຊ້ໃນຫວຽດນາມ(7).
ເພື່ອເພີ່ມທະວີ, ປັບປຸງບູລະນະສະຖາບັນ ກົນໄກປົກປ້ອງພົນລະເມືອງ
ທີ່ໄປເຮັດວຽກຢູ່ຕ່າງປະເທດ ຕາມສົນທິສັນຍາສາກົນກ່ຽວກັບການຮ່ວມມືດ້ານແຮງງານ
ເພື່ອເພີ່ມທະວີ, ປັບປຸງບູລະນະສະຖາບັນ ກົນໄກປົກປ້ອງພົນລະເມືອງທີ່ໄປເຮັດວຽກຢູ່ຕ່າງປະເທດ ຕາມສົນທິສັນຍາສາກົນກ່ຽວກັບການຮ່ວມມືດ້ານແຮງງານ, ຕ້ອງສຸມໃສ່ປະຕິບັດໜ້າທີ່ສຳຄົນຈຳນວນໜຶ່ງດັ່ງລຸ່ມນີ້:
ທີໜຶ່ງ, ເພີ່ມທະວີບົດບາດແລະປະສິດທິຜົນການເຄື່ອນໄຫຍຂອງອົງການຜູ້ຕາງໜ້າ, ສຳນັກງານກົງສຸນຫວຽດນາມຢູ່ຕ່າງປະເທດ ໃນການເຂົ້າເຖິງແລະຊ່ວຍເຫຼືອຜູ້ອອກແຮງງານຫວຽດນາມຢູ່ຕ່າງປະເທດ, ການແກ້ໄຂບັນຫາແລະຂໍ້ຂັດແຍ່ງກັບນາຍຈ້າງແລະນາຍຫນ້າຕ່າງປະເທດ ກ່ຽວກັບວຽກເຮັດງານທຳ, ເງື່ອນໄຂການເຮັດວຽກ, ຄ່າຈ້າງ, ລາຍໄດ້, ຊໍາລະພາສີລາຍໄດ້ ແລະຄ່າໃຊ້ຈ່າຍຕາມລະບຽບການ. ວຽກງານການປົກປ້ອງພົນລະເມືອງ ຢູ່ສະຖານທູດຫວຽດນາມປະຈຳຕ່າງປະເທດ. ວຽກງານການປົກປ້ອງພົນລະເມືອງຕ້ອງຮັບປະກັນຄວາມສະເໝີພາບທາງເພດ, ຊ່ວຍເຫຼືອຜູ້ອອກແຮງງານຍິງແລະຊາຍໃນກໍລະນີຖືກຂົ່ມເຫັງແລະການລ່ວງລະເມີດ, ເຮັດແນວໃດເພື່ອປົກປ້ອງໄດ້ ສິດທິຂອງພົນລະເມືອງແລະຜູ້ອອກແຮງງານ ແລະ ປົກປ້ອງຕົວຕົນຂອງພວກເຂົາ, ເຄົາລົບຄວາມເປັນສ່ວນຕົວແລະຄວາມລັບສ່ວນຕົວຂອງພວກເຂົາ. ສຳລັບບັນດາຕະຫຼາດທີ່ໄດ້ຮັບຄົນງານຍິງຫວຽດນາມເປັນຈຳນວນຫຼວງຫຼາຍນັ້ນ ຕ້ອງມີພະນັກງານເພດຍິງຢ່າງໜ້ອຍ 1 ຄົນ ເພື່ອປະຕິບັດວຽກງານຄຸ້ມຄອງແຮງງານ.
ທີສອງ ກະຊວງການຕ່າງປະເທດຕ້ອງກຳນົດຢ່າງຈະແຈ້ງພາລະ, ໜ້າທີ່ ແລະ ກົນໄກປະສານງານລະຫວ່າງກົມການກົງສຸນ ແລະຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ເພື່ອຫັນເປັນວິຊາຊີບແລະຍົກສູງປະສິດທິຜົນ ຂອງວຽກງານການປົກປ້ອງພົນລະເມືອງຫວຽດນາມຢູ່ຕ່າງປະເທດ. ໃນນັ້ນ, ກົມການກົງສຸນເປັນໜ່ວຍງານກາງ ທີ່ຮັບຜິດຊອບຕໍ່ຜູ້ນຳກະຊວງການຕ່າງປະເທດ ກ່ຽວກັບວຽກງານການປົກປ້ອງພົນລະເມືອງຫວຽດນາມຢູ່ຕ່າງປະເທດ, ຮັບຜິດຊອບແລະສົມທົບກັບບັນດາໜ່ວຍງານ, ອົງການທາງການທີ່ກ່ຽວຂ້ອງ ເພື່ອດຳເນີນກິດຈະກຳປົກປ້ອງພົນະເມືອງເມື່ອຈໍາເປັນ. ຕ້ອງສ້າງສູນແກ້ໄຂວິກິດການ ຂຶ້ນກັບກະຊວງການຕ່າງປະເທດ. ຕາມນັ້ນ, ສູນນີ້ອາດຈະມີພະແນກເຕັມເວລາຫຼືນອກເວລາ ເພື່ອວາງແຜນການແຫ່ງຊາດກ່ຽວການແກ້ໄຂວິກິດການ. ບົນພື້ນຖານນັ້ນ, ບັນດາກະຊວງ, ຂະແໜງການທີ່ກ່ຽວຂ້ອງຈະສ້າງແຜນການຮັບມືທີ່ເໝາະສົມກັບພາລະໜ້າທີ່ຂອງຕົນ. ເມື່ອສະຖານະການວິກິດເກີດຂຶ້ນ, ສູນຈະດໍາເນີນຂະບວນການຈັດການກັບວິກິດການ; ຈັດຕັ້ງການປະຈຳງານທຸກວັນຕະຫຼອດ 24 ຊົ່ວໂມງເພື່ອຮັບ, ສະເໜີ ແລະປະມວນຜົນຂໍ້ມູນທີ່ກ່ຽວຂ້ອງ. ຄຽງຂ້າງນັ້ນ, ສູນຈະສ້າງຊຸດເອກະສານຝຶກອົບຮົມກ່ຽວກັບວຽກງານປົກປ້ອງພົນລະເມືອງໃນສະຖານະການວິກິດ; ເປັນເອກະພາບກ່ຽວກັບຂັ້ນຕອນການແກ້ໄຂວິກິດການໃນບັນດາລະດັບທີ່ຕ່າງກັນ.
ທີສາມ, ສືບຕໍ່ເພີ່ມຈຳນວນອົງການຜູ້ຕາງໜ້າ, ຈຳກັດອົງການຜູ້ຕາງໜ້ານອກເວລາ, ພິເສດແມ່ນໃນປະເທດທີ່ມີຜູ້ອອກແຮງງານຫວຽດນາມເຮັດວຽກແລະອາໄສເປັນຈຳນວນຫຼວງຫຼາຍ. ຄຽງຂ້າງນັ້ນ, ຈໍາເປັນຕ້ອງໄດ້ເພີ່ມພະນັກງານໃຫ້ພາກສ່ວນກົງສຸນໃນອົງການຜູ້ຕາງໜ້າ. ໃນກໍລະນີຈຳເປັນ, ຕ້ອງການຄົ້ນຄວ້າການຈັດຕັ້ງຫ້ອງການເຄື່ອນທີ່ ເພື່ອແກ້ໄຂວຽກງານກົງສຸນຢູ່ບັນດາປະເທດຄຽງຂ້າງໃນເຂດກົງສຸນ, ໃຫ້ການຊ່ວຍເຫຼືອພົນລະເມືອງຢ່າງທັນການເມື່ອຈຳເປັນ. ພ້ອມກັນນັ້ນ, ເອົາໃຈໃສ່ເຖິງການຍົກສູງລະດັບ, ຄວາມສາມາດ ແລະ ຄຸນນະພາບຂອງພະນັກງານເຮັດວຽກງານກົງສູນຢູ່ຕ່າງປະເທດ.
ທີສີ່, ສືບຕໍ່ເພີ່ມທະວີການປະສານສົມທົບລະຫວ່າງບັນດາອົງການທີ່ກ່ຽວຂ້ອງ ໃນວຽກງານການປົກປ້ອງພົນລະເມືອງຫວຽດນາມທີ່ໄປເຮັດວຽກຢູ່ຕ່າງປະເທດ. ຍ້ອນຄວາມສັບສົນແລະຫຼາກຫຼາຍຂອງວຽກງານການປົກປ້ອງພົນລະເມືອງ ດັ່ງນັ້ນການປະສານສົມທົບລະຫວ່າງບັນດາອົງການທີ່ເຮັດວຽກງານນີ້ໂດຍກົງ ກັບບັນດາອົງການທີ່ກ່ຽວຂ້ອງອື່ນ ຈຶ່ງເປັນວຽກງານຈຳເປັນທີ່ສຸດ, ມັນຕັດສິນປະສິດທິຜົນຂອງວຽກງານການປົກປ້ອງພົນລະເມືອງ. ຕາມນັ້ນ, ໃນສະເພາະໜ້າ ຕ້ອງກຳນົດຢ່າງລະອຽດກ່ຽວກັບກົນໄກການປະສານງານເປັນປົກກະຕິແລະເປັນໄລຍະ ລະຫວ່າງບັນດາອົງການທາງການ, ກ່ອນອື່ນໝົດແມ່ນລະຫວ່າງກະຊວງການຕ່າງປະເທດ ກັບກະຊວງແຮງງານ-ທະຫານເສຍອົງຄະແລະສັງຄົມ, ກະຊວງຕໍາຫຼວດ, ກະຊວງຍຸຕິທຳ, ສານປະຊາຊົນສູງສຸດ, ສະຖາບັນໄອຍະການປະຊາຊົນສູງສຸດ ເພື່ອເປັນເອກະພາບໃນວິທີການປົກປ້ອງພົນລະເມືອງ, ຫຼີກລ້ຽງບັນຫາຄ້າງຄາໃນຂະບວນການປົກປ້ອງຄົນງານຫວຽດນາມຢູ່ຕ່າງປະເທດທີ່ມີສອງສັນຊາດ; ບັນຫາໃຫ້ພົນລະເມືອງກັບຄືນປະເທດ; ບັນຫາການເນລະເທດພົນລະເມືອງຫວຽດນາມຢູ່ຕ່າງປະເທດ; ບັນຫາການຍົກເລີກຫຼືຄືນສັນຊາດຫວຽດນາມ...
ທີຫ້າ, ສ້າງຖານຂໍ້ມູນກ່ຽວກັບຄົນງານຂ້າມຊາດ, ປະຕິບັດການຈົດທະບຽນພົນລະເມືອງຫວຽດນາມຢູ່ຕ່າງປະເທດ. ຄວາມເປັນຈິງໃຫ້ເຫັນວ່າ, ຖານຂໍ້ມູນກ່ຽວກັບຄົນງານຫວຽດນາມໄປເຮັດວຽກຢູ່ຕ່າງປະເທດບໍ່ໄດ້ຮັບການອັບເດດເປັນປົກກະຕິແລະບໍ່ມີຖານຂໍ້ມູນທີ່ເປັນເອກະພາບ, ຍ້ອນອົງການ, ວິສາຫະກິດບໍ່ໄດ້ສົ່ງລາຍງານມາໃຫ້ກົມຄຸ້ມຄອງຄົນງານຫວຽດນາມຢູ່ຕ່າງປະເທດ ກໍຄືໃຫ້ກົມການກົງສຸນ. ດັ່ງນັ້ນ, ຖ້າຫາກມີຖານຂໍ້ມູນທີ່ຊັດເຈນກ່ຽວກັບຄົນງານຂ້າມຊາດ ຫຼືຖານຂໍ້ມູນກ່ຽວກັບການຈົດທະບຽນພົນລະເມືອງຫວຽດນາມຢູ່ຕ່າງປະເທດ, ບັນດາອົງການຜູ້ຕາງໜ້າຫວຽດນາມຢູ່ຕ່າງປະເທດ ຈະສາມາດກຳແໜ້ນຈຳນວນຄົນງານຫວຽດນາມທີ່ອາໄສໃນພື້ນທີ່ທີ່ຕົນຄຸ້ມຄອງ, ກຳຂໍ້ມູນສ່ວນຕົວຂອງຄົນເຫຼົ່ານີ້ ເພື່ອສາມາດດຳເນີນບັນດາມາດຕະການປົກປ້ອງຢ່າງທັນການເມື່ອຈຳເປັນ. ເພື່ອຜັນຂະຫຍາຍປະຕິບັດວຽກງານເຫຼົ່ານີ້, ໃນສະເພາະໜ້າ, ຈຳເປັນຕ້ອງດຳເນີນການສະຫຼຸບສັງລວມ, ປະເມີນຜົນວຽກງານການຈົດທະບຽນພົນລະເມືອງໃນເວລາທີ່ຜ່ານມາ ເພື່ອສາມາດເຫັນໄດ້ຂໍ້ບົກພ່ອງ ຂໍ້ຈຳກັດໃນວຽກງານນີ້ ແລະ ມີທິດທາງໃນການແກ້ໄຂຜ່ານຜ່າ; ໂຄສະນາເຜີຍແຜ່ງຢ່າງກວ້າງຂວາງກ່ຽວກັບຄວາມສຳຄັນ ແລະຄຸນປະໂຫຍດ ຂອງການຈົດທະບຽນພົນລະເມືອງ; ຂັ້ນຕອນການຈົດທະບຽນພົນລະເມືອງສຳລັບພົນລະເມືອງຫວຽດນາມຢູ່ຕ່າງປະເທດ; ຍົກສູງລະດັບວິຊາຊີບ, ຄວາມຮັບຮູ້ຂອງພະນັກງານເຮັດວຽກງານກົງສຸນ ກ່ຽວກັບການເຄື່ອນໄຫວຈົດທະບຽນພົນລະເມືອງຢູ່ຕ່າງປະເທດ. ໃນຍາວນານ, ກະຊວງການຕ່າງປະເທດຕ້ອງສົມທົບຢ່າງແໜ້ນແຟ້ນກັບກະຊວງຕໍາຫຼວດ, ກະຊວງແຮງງານ-ທະຫານເສຍອົງຄະ ແລະສັງຄົມ ໃນການສ້າງເອກະສານທາງກົດໝາຍ ເພື່ອກຳນົດກ່ຽວກັບກິດຈະກຳຈົດທະບຽນພົນລະເມືອງຫວຽດນາມຢູ່ຕ່າງປະເທດ, ສ້າງເງື່ອນໄຂອຳນວຍຄວາມສະດວກໃຫ້ວຽກງານການຢືນຢັນສັນຊາດຂອງຊາວຫວຽດນາມໄປເຮັດວຽກຢູ່ຕ່າງປະເທດເມື່ອຕ້ອງການການປົກປ້ອງ.
ທີຫົກ, ເພີ່ມທະວີກົນໄກປະສານງານກັບປະເທດທີ່ຮັບແຮງງານ ກ່ຽວກັບການປົກປ້ອງພົນລະເມືອງຫວຽດນາມທີ່ໄປເຮັດວຽກຢູ່ຕ່າງປະເທດ ຕາມສົນທິສັນຍາສາກົນກ່ຽວກັບການຮ່ວມມືດ້ານແຮງງານ. ໃນເວລາທີ່ຈະມາເຖິງ, ເພື່ອຍົກສູງປະສິດທິຜົນການການປົກປ້ອງຊາວຫວຽດນາມທີ່ໄປເຮັດວຽກຢູ່ຕ່າງປະເທດ ຕາມສົນທິສັນຍາສາກົນ ກ່ຽວກັບການຮ່ວມມືດ້ານແຮງງານ ຕ້ອງເອົາໃຈໃສ່ເຖິງການພົວພັນປະສານສົມທົບລະຫວ່າງຫວຽດນາມ ກັບປະເທດທີ່ຮັບຄົນງານຜ່ານສັນຍາສອງຝ່າຍ, ຫຼາຍຝ່າຍກ່ຽວກັບການສົ່ງອອກແຮງງານ. ຕາມນັ້ນ, ຕ້ອງປັບປຸງບູລະນະກົດໝາຍກ່ຽວກັບການປົກປ້ອງພົນລະເມືອງທີ່ໄປເຮັດວຽກຢູ່ຕ່າງປະເທດ ເມື່ອປະສົບກັບຄວາມຫຍຸ້ງຍາກ. ສືບຕໍ່ຍູ້ແຮງການຮ່ວມມືສາກົນໃນການຕໍ່ສູ້ຕ້ານການອົບພະຍົບຜິດກົດໝາຍ; ເພີ່ມທະວີການຮ່ວມມື, ຊ່ວຍເຫຼືອບັນດາອົງການຈັດຕັ້ງສາກົນ ກໍຄືອົງການອຳນາດຂອງປະເທດເຈົ້າພາບ. /.
-------------------------------
(1) ຂໍ້ 3, ມາດຕາ 17, ລັດຖະທຳມະນູນຂອງປະເທດສາທາລະນະລັດສັງຄົມນິຍົມຫວຽດນາມປີ 2013
(2) ມາດຕາ 6, ກົດໝາຍວ່າດ້ວຍສັນຊາດຫວຽດນາມປີ 2008, ສະບັບປັບປຸງ ເພີ່ມເຕີມປີ 2014
(3) ເບິ່ງ: ຂໍ້ຕົກລົງເລກທີ 227/QĐ-BNG, ລົງວັນທີ 21 ມັງກອນ 2014, ຂອງລັດຖະມົນຕີກະຊວງການຕ່າງປະເທດ, “ກຳນົດ ພາລະ, ໜ້າທີ່, ສິດຂອບເຂດ ແລະ ໂຄງປະກອບການຈັດຕັ້ງຂອງກົມການກົງສຸນ”
(4) ເບິ່ງ: ຂໍ້ຕົກລົງເລກທີ 11/2019/QĐ-TTg, ລົງວັນທີ 18 ກຸມພາ 2019, ຂອງນາຍົກລັດຖະມົນຕີ, “ກຳນົດ ພາລະ, ໜ້າທີ່, ສິດຂອບເຂດ ແລະ ໂຄງປະກອບການຈັດຕັ້ງຂອງຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ສັງກັດກະຊວງການຕ່າງປະເທດ
(5) ມາດຕາ 7 ແລະມາດຕາ 8, ກົດໝາຍວ່າດ້ວຍອົງການຜູ້ຕາງໜ້າປະເທດສາທາລະນະລັດສັງຄົມນິຍົມຫວຽດນາມຢູ່ຕ່າງປະເທດປີ 2009, ສະບັບປັບປຸງ ເພີ່ມເຕີມປີ 2017
(6) ເບິ່ງ: ຟ້າມທິຮ່ວານ: ການຄຸ້ມຄອງລັດຕໍ່ການສົ່ງອອກແຮງງານຂອງຫວຽດນາມໃນໄລຍະປະຈຸບັນ, ວິທະຍານິພົນປະລິນຍາເອກເສດຖະສາດ. LA 11.0284.2, ຫໍສະໝຸດແຫ່ງຊາດ, 2011, ໜ້າ 79
(7) ເບິ່ງ: ກົມການກົງສຸນ - ກະຊວງການຕ່າງປະເທດ: ການປົກປ້ອງສິດຜົນປະໂຫຍດຂອງພົນລະເມືອງຫວຽດນາມຢູ່ຕ່າງປະເທດ, ຫົວຂໍ້ຄົ້ນຄວ້າວິທະຍາສາດ, ເດືອນຕຸລາ 1998, ຮ່າໂນ້ຍ, ໜ້າ 132
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 969 (ເດືອນກໍລະກົດ 2021)