ການສ້າງແລະໂຄສະນາເຜີຍແຜ່ພາບພົດຂອງຊາດ
ໃນຍຸດທະສາດການທູດວັດທະນະທຳຂອງຫວຽດນາມ
ໃນຍຸດທະສາດການທູດວັດທະນະທຳຂອງຫວຽດນາມ
ວກ. - ໃນສະພາບໂລກາພິວັດແລະການເຊື່ອມໂຍງສາກົນປະຈຸບັນ, ຊື່ສຽງແລະພາບພົດທີ່ດີຂອງປະເທດໜຶ່ງນັບມື້ນັບມີຄວາມສຳຄັນ, ດຶງດູດຄວາມສົນໃຈຂອງປະຊາຄົມສາກົນ ເພາະພາບພົດຂອງປະເທດບໍ່ພຽງແຕ່ສົ່ງຜົນສະທ້ອນເຖິງການພົວພັນລະຫວ່າງປະເທດເທົ່ານັ້ນ ຫາກຍັງສົ່ງຜົນສະທ້ອນເຖິງການພັດທະນາເສດຖະກິດ-ສັງຄົມ ກໍ່ຄືຄວາມສາມາດແຂ່ງຂັນຂອງປະເທດອີກດ້ວຍ. ດັ່ງນັ້ນ, ການສ້າງ ໂຄສະນາເຜີຍແຜ່ ແລະ ເຊີດຊູພາບພົດຂອງຊາດນັບມື້ນັບໄດ້ຮັບຄວາມເອົາໃຈໃສ່ໂດຍປະເທດຕ່າງໆ ເຊິ່ງຖືເປັນຍຸດທະສາດພະລັງທີ່ນຸ່ມນວນໃນສະພາບແວດລ້ອມສາກົນທີ່ມີການປ່ຽນແປງຢູ່ເລື້ອຍ.
ທ່ານປະທານາທິບໍດີ ເມົາຣີຊີໂອ ມາຄຣີ ແຫ່ງອາກຊັງຕີນ ສຳຜັດປະສົບການຫຼິ້ນເຄື່ອງດົນຕີປະຈຳຊາດຫວຽດນາມ ທີ່ງານລ້ຽງຕ້ອນຮັບຈັດຂຶ້ນໂດຍເລຂາທິການໃຫຍ່ ປະທານປະເທດ ຫງວຽນຝູຈ້ອງ ແລະ ພັນລະຍາ ເພື່ອຕ້ອນຮັບທ່ານປະທານາທິບໍດີ ເມົາຣີຊີໂອ ມາຄຣີ ແລະ ພັນລະຍາ ທີ່ມາຢ້ຽມຢາມທາງລັດຖະກິດຫວຽດນາມ, ເດືອນທັນວາ 2019, ທີ່ຮ່າໂນ້ຍ _ພາບ: TTXVN
ທັດສະນະຈຳນວນໜຶ່ງ
ບັນດາປະເທດໃນໂລກ, ເຖິງວ່າຈະເປັນປະເທດທີ່ພັດທະນາແລ້ວຫຼືກຳລັງພັດທະນາ, ລ້ວນແຕ່ໄດ້ເອົາໃຈໃສ່ເປັນພິເສດເຖິງການເຄື່ອນໄຫວທາງການທູດວັດທະນະທຳ, ຖືວ່າສິ່ງນີ້ເປັນເຄື່ອງມືທີ່ມີປະສິດທິພາບຂອງພະລັງທີ່ນຸ່ມນວນ ເພື່ອປົກປັກຮັກສາຜົນປະໂຫຍດຂອງຊາດ ແລະ ຍົກສູງບົດບາດທີ່ຕັ້ງຂອງປະເທດໃນເວທີໂລກ.
ແຕ່ດົນນາວແລ້ວ, ຫຼາຍປະເທດໃນທົ່ວໂລກໄດ້ສ້າງຍຸດທະສາດເພື່ອໂຄສະນາສົ່ງເສີມພາບພົດຂອງຊາດ. ໃນສະພາບແວດລ້ອມຂອງການໂລກາພິວັດ ແລະ ເຊື່ອມໂຍງສາກົນໃນປະຈຸບັນ, ປະເທດສ່ວນໃຫຍ່ໃນໂລກກຳລັງເຂົ້າຮ່ວມການແຂ່ງຂັນໂຄສະນາເຜີຍແຜ່ພາບພົດແຫ່ງຊາດຂອງປະເທດຕົນເອງ ແລະ ເພື່ອໃຫ້ທຸກຄົນຮັບຮູ້ຍິ່ງຫຼາຍຍິ່ງດີ.ເພື່ອບັນລຸເປົ້າໝາຍນີ້, ນອກຈາກການສະໜັບສະໜູນຂອງພະລັງອັນແຂງແກ່ງແລ້ວ (ທະຫານ, ເສດຖະກິດ) ບັນດາປະເທດເຄີຍໃຊ້ຍຸດທະສາດພະລັງທີ່ນຸ່ມນວນ, ໃນນັ້ນ ການທູດວັດທະນະທຳແມ່ນໜຶ່ງໃນບັນດາເສົາຫຼັກ.
ປະຈຸບັນ, ວົງການນັກວິຊາການ, ຜູ້ວາງນະໂຍບາຍ ແລະ ນັກປະຕິບັດຂອງປະເທດຕ່າງໆມີວິທີການເຂົ້າເຖິງຫຼາຍດ້ານ ແລະ ສະເໜີຄວາມເຂົ້າໃຈທີ່ແຕກຕ່າງກັນ ກ່ຽວກັບການທູດວັດທະນະທຳ (cultural diplomacy). ການທູດວັດທະນະທຳອາດຈະເປັນເຄື່ອງມືເພື່ອຂະຫຍາຍອິດທິພົນ, ສ້າງຖານະຕຳແໜ່ງລະດັບຊາດ, ແຕ່ກໍ່ອາດຈະເປັນການຊຸກຍູ້ເສດຖະກິດ, ຫຼືທັງເປັນການພັດທະນາ ທັງເປັນການຢືນຢັນການດຳລົງຄົງຕົວຂອງຊາດຕົນ. ມີແນວຄວາມຄິດວ່າ ການທູດວັດທະນະທໍາເປັນຍຸດທະສາດການທູດສາທາລະນະປະເພດໜຶ່ງທີ່ສໍາຄັນ, ລວມທັງດ້ານພາສາ, ການສະແດງລະຄອນ, ການຟ້ອນ, ສິລະປະ, ວັນນະຄະດີ, ດົນຕີ, ສາດສະໜາ, ປະຫວັດສາດ, ອາຫານ... ເປັນວິທີການສົ່ງເສີມຄວາມເຂົ້າໃຈລະຫວ່າງປະຊາຊົນບັນດາປະເທດ(1). ແຕ່ເບິ່ງລວມແລ້ວ, ທັງໝົດໄດ້ຕົກລົງເຫັນດີວ່າ, ການທູດວັດທະນະທຳແມ່ນຂົງເຂດການທູດທີ່ຜ່ານການເຄື່ອນໄຫວວັດທະນະທຳເພື່ອໂຄສະນາເຜີຍແຜ່ພາບພົດຂອງປະເທດ, ສົ່ງເສີມພາບພົດແລະກຽດສັກສີຂອງຊາດ, ເພີ່ມທະວີຄວາມເຂົ້າໃຈເຊິ່ງກັນແລະກັນ ລະຫວ່າງປະຊາຊົນປະເທດຕ່າງໆ. ຄວາມໝາຍສະເພາະຂອງການທູດວັດທະນະທຳແມ່ນການເຄື່ອນໄຫວການທູດຂອງລັດອະທິປະໄຕ ທີ່ຖືການຮັກສາຜົນປະໂຫຍດດ້ານວັດທະນະທຳຂອງປະເທດຕົນ ແລະ ການປະຕິບັດຈຸດໝາຍຍຸດທະສາດວັດທະນະທຳການຕ່າງປະເທດຂອງຕົນ ເປັນຈຸດປະສົງ, ພາຍໃຕ້ການຊີ້ນຳຂອງນະໂຍບາຍວັດທະນະທໍາການຕ່າງປະເທດທີ່ແນ່ນອນ(2). ເວົ້າຢ່າງອື່ນ, ການທູດວັດທະນະທຳ ແມ່ນແນວຄວາມຄິດທີ່ສະແດງເຖິງຈຸດຕັດກັນ ລະຫວ່າງສອງຂົງເຂດການທູດ ແລະ ວັດທະນະທໍາ. “ການເຄື່ອນໄຫວທາງການທູດ, ແຕ່ກ່ອນມາເຖິງປະຈຸບັນ, ຍາມໃດກໍ່ລວມເຖິງການແລກປ່ຽນຄຸນຄ່າວັດທະນະທຳ ລະຫວ່າງບັນດາຊາດ-ປະເທດຊາດ. ດັ່ງນັ້ນ, ທາດແທ້ຂອງຂອງການເຄື່ອນໄຫວທາງການທູດຍາມໃດກໍ່ມີເນື້ອໃນວັດທະນະທຳ; ວັດທະນະທຳຖືກນໍາໃຊ້ເປັນເຄື່ອງມືທີ່ມີປະສິດທິພາບ ໃນການພົວພັນສາກົນ, ກາຍເປັນສ່ວນປະກອບທີ່ສຳຄັນ ໃນການເຄື່ອນໄຫວທາງການທູດ ຂອງປະເທດສະໄໝໃໝ່. ແນວຄວາມຄິດທົ່ວໄປກ່ຽວກັບການທູດວັດທະນະທຳ ແມ່ນຮູບແບບການທູດໂດຍຜ່ານເຄື່ອງມືວັດທະນະທຳ ເພື່ອສ້າງຕັ້ງ ຮັກສາ ແລະ ພັດທະນາ ການພົວພັນກັບຕ່າງປະເທດ ເພື່ອໃຫ້ບັນລຸເປົ້າໝາຍພື້ນຖານຂອງປະເທດຊາດ, ນັ້ນຄື ຄວາມໝັ້ນຄົງ ການພັດທະນາ ແລະ ການຂະຫຍາຍບົດບາດທີ່ຕັ້ງສາກົນຂອງຊາດ. ນີ້ແມ່ນຂະບວນການທີ່ບັນດາປະເທດເປັນເຈົ້າການເຜີຍແຜ່ ບັນດາລັກສະນະວັດທະນະທຳ ແລະ ລະບົບຄຸນຄ່າ, ເອກະລັກຂອງຕົນ ເພື່ອເພີ່ມທະວີຄວາມເຂົ້າໃຈ ແລະ ຊຸກຍູ້ການພົວພັນກັບບັນດາປະເທດ ເພື່ອການພັດທະນາ; ພ້ອມກັນນັ້ນ ກໍເລືອກຮັບເອົາແກ່ນສານທາງວັດທະນະທຳ ແລະ ຜົນສຳເລັດທາງວິທະຍາສາດຂັ້ນສູງຂອງໂລກ ເພື່ອເພີ່ມພູນຄັງສາງແຫ່ງຄວາມຮູ້ ແລະ ເອກະລັກປະຈຳຊາດ ຂອງປະເທດຕົນເອງ”(3).
ໃນສະພາບແວດລ້ອມແຫ່ງໂລກາພິວົດ, ການທູດວັດທະນະທຳມີບົດບາດນັບມື້ນັບ ສຳຄັນທັງດ້ານການເມືອງ ເສດຖະກິດ ແລະ ວັດທະນະທຳ. ສຳລັບບັນດາປະເທດໃຫຍ່, ການທູດວັດທະນະທຳແມ່ນເສັ້ນທາງເພື່ອຂະຫຍາຍອິດທິພົນຂອງຕົນໄປທົ່ວໂລກ. ຕົວຢ່າງເຊັ່ນ ສະຫະລັດອາເມລິກາໂຄສະນາເຜີຍແຜ່ຄ່ານິຍົມປະຊາທິປະໄຕ ແລະ ສິດທິມະນຸດແບບອາເມລິກາຢ່າງຕໍ່ເນື່ອງ ໄປໃນທົ່ວໂລກ ເພື່ອໃຫ້ບັນລຸເປົ້າໝາຍລະດັບໂລກຂອງຕົນ. ຈີນກຳນົດວັດທະນະທຳເປັນອົງປະກອບຂອງກຳລັງແຫ່ງຊາດ ເພື່ອກາຍເປັນປະເທດມະຫາອຳນາດໂລກ, ດັ່ງນັ້ນ ຈຶ່ງໄດ້ຈັດຕັ້ງສະຖາບັນຂົງຈື໊ຫຼາຍຮ້ອຍແຫ່ງ ເພື່ອສອນພາສາແລະວັດທະນະທຳຈີນ ໃນທຸກທະວີບ. ສຳລັບບັນດາປະເທດທີ່ນ້ອຍກວ່າ, ການທູດວັດທະນະທຳໄດ້ໃຊ້ເພື່ອໂຄສະນາເຜີຍແຜ່ພາບພົດຂອງປະເທດ ແລະ ເພີ່ມທະວີການພັດທະນາ, ຜ່ານນັ້ນ ປະເທດເຫຼົ່ານີ້ຈະໄດ້ຮັບຄວາມສົນໃຈຫຼາຍຂຶ້ນ ແລະ ຍົກສູງສຽງເວົ້າຂອງຕົນໃນເວທີສາກົນ. ຫວຽດນາມເລືອກການທູດວັດທະນະທຳເປັນເຄື່ອງມືຫຼັກ ເພື່ອແນະນຳໃຫ້ໂລກຮູ້ເຖິງ ປະເທດຫວຽດນາມທີ່ມີການເຕີບໂຕຢ່າງໄວວາ ແລະ ມີພື້ນຖານການເມືອງທີ່ໝັ້ນຄົງ(4).
ສຳລັບຄວາມສຳນຶກກ່ຽວກັບພາບພົດຂອງຊາດ (country image), ຜູ້ຂຽນບາງຄົນໃຫ້ທັດສະນະວ່າ, ພາບພົດຂອງຊາດແມ່ນຊັບສິນທີ່ບໍ່ມີຕົວຕົນ, ຍາກທີ່ຈະຫາມາດຕະຖານສະເພາະມາປະເມີນ(5). ແລະໃນອີກທັດສະນະໜຶ່ງ, ພາບພົດຂອງຊາດສາມາດເຂົ້າໃຈໄດ້ວ່າ: “ຜົນລວມຂອງຄວາມເຊື່ອ ແລະ ຄວາມປະທັບໃຈ ທີ່ຜູ້ຄົນມີກ່ຽວກັບສະຖານທີ່ ຫຼືປະເທດໃດປະເທດໜຶ່ງ”(6). ພາບພົດຂອງປະເທດໄດ້ສະທ້ອນຈາກການຮັບຮູ້ຂອງຜູ້ຄົນ ວັດທະນະທຳ ລະດັບການພັດທະນາເສດຖະກິດ, ຄຸນນະພາບຜະລິດຕະພັນຂອງປະເທດ, ຜະລິດຕະພັນທີ່ປະເທດນັ້ນມີທ່າດີປຽບທຽບ...(7). ດັ່ງນັ້ນ, ຕາມຄວາມໝາຍກວ້າງ, ພາບພົດຂອງປະເທດແມ່ນຮູບພາບລວມຂອງປະເທດທີ່ມີທຸກຂົງເຂດການເມືອງ ເສດຖະກິດ ວັດທະນະທໍາ ແລະ ສັງຄົມຂອງປະເທດນັ້ນ. ຕາມຄວາມໝາຍແຄບ, ພາບພົດຂອງປະເທດໄດ້ສະແດງອອກໃນບັນດາຂົງເຂດທີ່ພົ້ນເດັ່ນຂອງປະເທດ ເຊິ່ງເມື່ອເວົ້າເຖິງບັນດາຂົງເຂດນັ້ນ ຜູ້ຄົນສາມາດມະໂນພາບເຖິງປະເທດນັ້ນໄດ້ຢ່າງງ່າຍດາຍ.
ແຕ່ລະປະເທດມີ “ຍີ່ຫໍ້” ຂອງຕົນເອງ, ມີພາບພົດທີ່ແນ່ນອນ ໃນສາຍຕາຂອງປະຊາຄົມສາກົນ, ບໍ່ວ່າປະເທດນັ້ນຈະເຂັ້ມແຂງຫຼືອ່ອນແອ, ທັນສະໄໝ ຫຼືຫຼ້າຫຼັງ, ພັດທະນາ ຫຼືບໍ່ມີການພັດທະນາ. ຕາມການພັດທະນາຂອງປະຫວັດສາດ ແລະ ຄວາມກ້າວໜ້າຂອງມະນຸດຊາດ, ພາບພົດຂອງປະເທດບໍ່ຄົງທີ່ ແຕ່ຍັງສາມາດປ່ຽນແປງໄດ້. ເພາະສະນັ້ນ, ແຕ່ລະສະໄໝແລະໄລຍະການພັດທະນາ ປະເທດຈຳເປັນຕ້ອງມີຍຸດທະສາດເພື່ອໂຄສະນາເຜີຍແຜ່ພາບພົດ ແລະ ຄຸນລັກສະນະສະເພາະ ຂອງປະເທດຕົນເອງ.
ການສ້າງຕັ້ງແລະໂຄສະນາເຜີຍແຜ່ພາບພົດຂອງຊາດແມ່ນການສັງເຄາະບັນດາການເຄື່ອນໄຫວທາງທິດສະດີ ແລະ ພຶດຕິກຳໃນທຸກວິທີທາງຂອງຊີວິດ ເພື່ອແນໃສ່ເພີ່ມທະວີກຳລັງແຮງ ແລະ ຄວາມງາມຂອງປະເທດ (ຈາກເງື່ອນໄຂທຳມະຊາດ ເຖິງສະພາບສັງຄົມ ເສດຖະກິດ ວັດທະນະທຳ ການເມືອງ ສະພາບມະນຸດ,...), ພ້ອມກັນນັ້ນ ແກ້ໄຂຜ່ານຜ່າ ແລະ ຄ່ອຍໆລົບລ້າງຈຸດອ່ອນ, ຂໍ້ຈຳກັດຂອງປະເທດນັ້ນ. ໃນນັ້ນ, ມະນຸດແມ່ນປັດໄຈສຳຄັນ, ເພາະວ່າພົນລະເມືອງແຕ່ລະຄົນແມ່ນ “ຜູ້ສົ່ງຂ່າວ” ຂອງປະເທດ, ມີບົດບາດໃນການເຊື່ອມໂຍງທາງວັດທະນະທຳ, ສະແດງໃຫ້ເຫັນພາບທີ່ສວຍງາມຂອງປະເທດໃນຫົວໃຈຂອງຜູ້ຄົນປະເທດອື່ນໆ.
ການໂຄສານາເຜີຍແຜ່ພາບພົດຊອງຊາດໄດ້ຮັບການລະບຸມາແຕ່ດົນນານຈາກຫຼາຍປະເທດໃນທົ່ວໂລກວ່າ ແມ່ນ “ຫົວຫອກ” ໃນຍຸດທະສາດການກໍ່ສ້າງ ແລະ ປະຕິບັດນະໂຍບາຍການຕ່າງປະເທດຂອງຕົນ, ເປັນເຄື່ອງມືໃນການສ້າງພະລັງທີ່ນຸ່ມນວນຂອງປະເທດ. ຖ້າຫາກພາບພົດຂອງຊາດດີງາມຈະເພີ່ມພະລັງທີ່ນຸ່ມນວນໃຫ້ກັບປະເທດ, ປະກອບສ່ວນນຳເສດຖະກິດເຂົ້າສູ່ເສັ້ນທາງພັດທະນາ ແລະ ເຊື່ອມໂຍງເຂົ້າກັບສາກົນ. ໃນທາງກົງກັນຂ້າມ, ຖ້າພາບພົດຂອງປະເທດມີການປ່ຽນແປງໄປໃນແງ່ລົບ, ກຽດສັກສີ ແລະ ຖານະບົດບາດຂອງປະເທດນັ້ນກໍ່ຈະຖືກກະທົບ, ສົ່ງຜົນກະທົບທາງລົບຕໍ່ການພົວພັນຕ່າງປະເທດຂອງປະເທດນັ້ນ. ດັ່ງນັ້ນ, ພາບພົດທີ່ປະເທດໜຶ່ງພະຍາຍາມທີ່ຈະສ້າງ ແລະ ສ້າງຂຶ້ນໂດຍຜ່ານນະໂຍບາຍການຕ່າງປະເທດ, ຕ້ອງສອດຄ່ອງກັບຜົນປະໂຫຍດແຫ່ງຊາດ ແລະ ຄວາມປາດຖະໜາຂອງປະຊາຄົມສາກົນ.
ບັນດາປະເທດໃນໂລກລ້ວນແຕ່ມີວິທີ ແລະ ເສັ້ນທາງຜັນຂະຫຍາຍທີ່ຕ່າງກັນເພື່ອສ້າງແລະໂຄສະນາເຜີຍແຜ່ພາບພັດຂອງຊາດ, ແຕ່ທັງໝົດມີຈຸດມຸ່ງໝາຍເພື່ອຮັບໃຊ້ເປົ້າໝາຍສູງສຸດ ແມ່ນຮັບໃຊ້ຜົນປະໂຫຍດຂອງປະເທດຊາດ.
ທີໜຶ່ງ, ການໂຄສະນາພາບພົດຂອງຊາດແມ່ນຊ່ອງທາງ “ການລົງທຶນ” ທີ່ມີປະສິດທິຜົນ ເພື່ອດຶງດູດກະແສການລົງທຶນ, ພັດທະນາການທ່ອງທ່ຽວ, ເສີມຂະຫຍາຍເຄື່ອງໝາຍສິນຄ້າແຫ່ງຊາດ. ຜ່ານການທູດວັດທະນະທຳ, ບັນດາຂໍ້ມູນແລະຮູບພາບກ່ຽວກັບປະເທດ, ຜູ້ຄົນທີ່ມີວັດທະນະທໍາ, ປະຫວັດສາດແລະປະເພນີທີ່ຍາວນານ ຈະໄດ້ຮັບການໂຄສະນາເຜີຍແຜ່, ແຜ່ຂະຫຍາຍ, ຈາກນັ້ນ ຈະນໍາໄປສູ່ການຕັດສິນໃຈທີ່ຈະເລືອກເອົາສິ່ງນັ້ນເປັນ “ຈຸດໝາຍປາຍທາງ” ສໍາລັບການລົງທຶນແລະການຮ່ວມມື.
ທີສອງ, ເຮັດໃຫ້ມີການປ່ຽນແປງໃນຄວາມຮັບຮູ້, ປ່ຽນແປງອະຄະຕິແບບດັ້ງເດີມ, ສ້າງຄວາມໄວ້ເນື້ອເຊື່ອໃຈໃນການພົວພັນສາກົນ, ຈາກນັ້ນ ບັນດາປະເທດສາມາດບັນລຸຂໍ້ຕົກລົງ, ການຮ່ວມມືດ້ານການເມືອງ, ເສດຖະກິດ ແລະ ການທະຫານ. ຄວາມໄວ້ວາງໃຈແມ່ນຈຸດເລີ່ມຕົ້ນຂອງການພົວພັນທັງໝົດ. ເມື່ອສ້າງຄວາມໄວ້ວາງໃຈໄດ້, ໂດຍສະເພາະຄວາມໄວ້ວາງໃຈທາງຍຸດທະສາດ, ປະເທດນັ້ນຈະເອົາຊະນະຈິດໃຈຂອງປະຊາຊົນຢ່າງແທ້ຈິງ, ສ້າງຄວາມເຫັນອົກເຫັນໃຈ, ປັບປຸງການພົວພັນທາງການທູດ, ແກ້ໄຂຂໍ້ຂັດແຍ່ງ, ສ້າງປະຖົມປັດໄຈເພື່ອເພີ່ມທະວີການຮ່ວມມືສາກົນ.
ທີສາມ, ການສ້າງແລະໂຄສະນາເຜີຍແຜ່ພາບພົດຂອງຊາດບໍ່ແມ່ນເສັ້ມທາງທາງດຽວ ແຕ່ຍັງແມ່ນຂະບວນການປະຕິສຳພັນ, ການຮຽນຮູ້ ແລະ ການແລກປ່ຽນ. ເຂົ້າໃຈແລະເຄົາລົບຄວາມແຕກຕ່າງແມ່ນພື້ນຖານເພື່ອແລກປ່ຽນ ແບ່ງປັນ ຮ່ວມມື ແລກປ່ຽນວັດທະນະທໍາ, ດູດຊຶມແກ່ນສານແຫ່ງວັດທະນະທຳຈາກພາຍນອກ, ສົ່ງເສີມເອກະລັກວັດທະນະທຳຂອງຊາດໃຫ້ສົມບູນຍິ່ງຂຶ້ນ.
ການສ້າງແລະໂຄສະນາເຜີຍແຜ່ພາບພົດຂອງຫວຽດນາມໃນການພັດທະນາປະເທດ
ພັກແລະລັດຫວຽດນາມນັບມື້ນັບຮັບຮູ້ຢ່າງຈະແຈ້ງແລະເລິກເຊິ່ງບົດບາດ ທີ່ຕັ້ງ ຄວາມສຳຄັນຂອງວັດທະນະທຳ ແລະ ການທູດວັດທະນະທຳໃນຂະບວນການສ້າງສາແລະພັດທະນາປະເທດ, ພິເສດແມ່ນໃນໄລຍະຍູ້ແຮງການຫັນເປັນອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນ. ໃນເວລາທີ່ຜ່ານມາ, ພັກແລະລັດໄດ້ກຳນົດວ່າ ການສ້າງແລະໂຄສະນາເຜີຍແຜ່ພາບພົດຂອງຊາດແມ່ນໜ້າທີ່ສຳຄັນຂອງວຽກງານຂໍ້ມູນຂ່າວສານຕ່າງປະເທດ, ໂດຍສະເພາະແມ່ນ ໃນສະພາບແວດລ້ອມທີ່ຫວຽດນາມກຳລັງເຊື່ອມໂຍງເຂົ້າກັບຊີວິດສາກົນຢ່າງກວ້າງຂວາງແລະຮອບດ້ານ. ຍຸດທະສາດໂດຍລວມເພື່ອການເຊື່ອມໂຍງເຂົ້າກັບສາກົນເຖິງປີ 2020, ວິໄສທັດຮອດປີ 2030 ໄດ້ລະບຸເປົ້າໝາຍ: ເຊີດຊູພາບພົດຂອງປະເທດແລະຜູ້ຄົນຫວຽດນາມ, ແນະນຳພາບພົດຂອງຊາດຫວຽດນາມໄປທົ່ວໂລກ, ວັດທະນະທຳຫວຽດນາມມີສ່ວນຮ່ວມໃໝ່ທີ່ໄດ້ຮັບການຮັບຮູ້ໃນຊີວິດວັດທະນະທຳສາກົນ. ຄຳສັ່ງເລກທີ 25/CT-TTg, ລົງວັນທີ 10 ເດືອນກັນຍາ 2021, ຂອງນາຍົກລັດຖະມົນຕີ, “ກ່ຽວກັບການຍູ້ແຮງ ການຜັນຂະຫຍາຍ ຍຸດທະສາດວັດທະນະທຳການຕ່າງປະເທດຫວຽດນາມ” ເຊິ່ງໄດ້ເນັ້ນໜັກວ່າ ຕ້ອງເພີ່ມທະວີການໂຄສະນາເຜີຍແຜ່ພາບພົດຂອງຂາດໄປຕ່າງປະເທດພາຍໃຕ້ຫຼາຍຮູບການ.
ໃນຊຸມປີທີ່ຜ່ານມາ, ຫວຽດນາມໄດ້ພະຍາຍາມຜັນຂະຫຍາຍການເຄື່ອນໄຫວໂຄສະນາເຜີຍແຜ່ພາບພົດຂອງຊາດ ໂດຍຜ່ານວິທີການຕ່າງໆເຊັ່ນ: ການໂຄສະນາຊວນເຊື່ອຕ່າງປະເທດ; ການຮ່ວມມືສາກົນໃນການຈັດຕັ້ງກິດຈະກໍາວັດທະນະທໍາ, ຜະລິດຜະລິດຕະພັນວັດທະນະທຳ; ການກໍ່ສ້າງສະຖານທີ່ແລະພື້ນຖານວັດຖຸທາງວັດທະນະທຳ ແລະປະຫວັດສາດ; ການແລກປ່ຽນວັດທະນະທຳ ການສຶກສາ, ການແລກປ່ຽນຄະນະວັດທະນະທຳແລະສິລະປະ ແລະ ຈັດຕັ້ງການເຄື່ອນໄຫວວັດທະນະທຳຜ່ານຊຸມຊົນຊາວຫວຽດນາມຢູ່ຕ່າງປະເທດ, ຜ່ານການເຄື່ອນໄຫວສົ່ງເສີມການລົງທຶນ ການຄ້າ. ຜ່ານສິ່ງເຫຼົ່ານັ້ນ, ພາບພົດແລະຜູ້ຄົນຫວຽດນາມ ທີ່ມີຄຸນຄ່າວັດທະນະທຳທີ່ເປັນເອກະລັກສະເພາະນັບມື້ນັບໃກ້ຊິດກັບປະຊາຊົນປະເທດເຈົ້າພາບ. ຂໍ້ມູນຂ່າວສານກ່ຽວກັບຫວຽດນາມ ໄດ້ຮັບການແນະນຳຢ່າງວ່ອງໄວ, ມີປະສິດທິຜົນ, ເໝາະສົມກັບຜູ້ຊົມທຸກກຸ່ມ, ສ້າງຄວາມປະທັບໃຈໃຫ້ແກ່ປະຊາຊົນບັນດາປະເທດ. ບັນດາເພື່ອນມິດສາກົນ, ໂດຍສະເພາະແມ່ນບັນດາປະເທດທີ່ມີຂໍ້ມູນຂ່າວໜ້ອຍກ່ຽວກັບຫວຽດນາມ, ສາມາດເຂົ້າໃຈແລະເຂົ້າໃຈຫວຽດນາມ ເປັນຢ່າງດີ, ເຊື່ອໝັ້ນໃນແນວທາງການປ່ຽນແປງໃໝ່ ແລະ ການເຊື່ອມໂຍງເຂົ້າກັບສາກົນຂອງຫວຽດນາມ, ປະເມີນຢ່າງຖືກຕ້ອງ ບັນດາທ່າແຮງ ຂໍ້ໄດ້ປຽບ ແລະ ການປະກອບສ່ວນຂອງຫວຽດນາມ ເຂົ້າໃນຂະບວນການພັດທະນາຮ່ວມຂອງພາກພື້ນ ແລະ ໃນໂລກ. ຄວາມສົມໃຈໃນການຮຽນຮູ້ກ່ຽວກັບຫວຽດນາມຂອງປະເທດຕ່າງໆໃນໂລກເພີ່ມຂຶ້ນດ້ວຍຄວາມເລິກແລະການປະຕິບັດຈິງທີ່ຫຼາຍຂຶ້ນ.
ໂລກຮູ້ດີວ່າ ຫວຽດນາມບໍ່ພຽງແຕ່ແມ່ນປະເທດທີ່ມີເອກະລັກສະເພາະດ້ານວັດທະນະທຳປະຈຳຊາດ ພ້ອມດ້ວຍບັນດາມໍລະດົກວັດທະນະທຳທີ່ມີຊື່ສຽງ ແລະ ມູນເຊື້ອປະຫວັດສາດໃນການຕໍ່ສູ້ກັບຜູ້ຮຸກຮານຈາກຕ່າງປະເທດເທົ່ານັ້ນ, ຫາກຍັງແມ່ນປະເທດພວມມີການຫັນປ່ຽນຢ່າງແຂງແຮງ, “ຈຸດໝາຍປາຍທາງທີ່ໜ້າເຊື່ອຖືຂອງນັກລົງທຶນຕ່າງປະເທດ”, “ເສດຖະກິດທີ່ພົ້ນເດັ່ນໃໝ່”, “ຈຸດໝາຍປາຍທາງວັດທະນະທຳແຖວໜ້າຂອງອາຊີ”, ປະເທດທີ່ພວມບືນຕົວຂຶ້ນຢ່າງແຂງແຮງ, ແມ່ນໜຶ່ງໃນບັນດາ “ແບບຢ່າງ” ໃນການປະຕິບັດຢ່າງມີປະສິດທິຜົນໃນການຫຼຸດຜ່ອນຄວາມທຸກຍາກ, ຮັກສາສະພາບແວດລ້ອມສັນຕິພາບແລະສະຖຽນລະພາບ; ເປັນປະເທດທີ່ປະຕິບັດການປ່ຽນແປງໃໝ່ສຳເລັດຜົນ, ເຊື່ອມໂຍງເຂົ້າກັບສາກົນຢ່າງກວ້າງຂວາງ, ເປັນຄູ່ຮ່ວມມືທີ່ເຊື່ອຖືໄດ້ ແລະ ມີຄວາມຮັບຜິດຊອບ, ສະແດງບົດບາດຢ່າງເປັນເຈົ້າການແລະຕັ້ງໜ້າ ເຂົ້າໃນວຽກງານຮ່ວມຂອງພາກພື້ນ ແລະ ໂລກ.
ດ້ວຍບົດບາດການປູທາງ ກະຕູ້ນ ສົ່ງເສີມ ລະດົມ ດູດຊຶມ, ປະສານສົມທົບຢ່າງແໜ້ນແຟ້ນກັບບັນດາການເຄື່ອນໄຫວທາງການທູດທີ່ຫຼາກຫຼາຍແລະອຸດົມສົມບູນ, ການທູດວັດທະນະທຳໄດ້ແລະພວມປະກອບສ່ວນຍົກສູງລະດັບແລະຖານະບົດບາດຂອງປະເທດ, ຍາດແຍ່ງເອົາຄວາມເຫັນດີເຫັນພ້ອມ ແລະ ສະໜັບສະໜູນ ຂອງປະຊາຊົນໂລກຕໍ່ການພັດທະນາເສດຖະກິດແລະສັງຄົມຂອງປະຊາຊົນຫວຽດນາມ. ສິ່ງດັ່ງກ່າວສະແດງອອກຢ່າງຈະແຈ້ງໃນດ້ານຕ່າງໆຕໍ່ໄປນີ້:
ທີໜຶ່ງ, ປັບປຸງແລະຮັກສາສະພາບແວດລ້ອມສັນຕິພາບ ແລະ ຄວາມໝັ້ນຄົງ, ສ້າງເງື່ອນໄຂທີ່ເອື້ອອຳນວຍຕໍ່ການພັດທະນາຂອງປະເທດ. ດ້ວຍພາລະກິດອັນໃຫຍ່ຫຼວງໃນການປະກອບສ່ວນ “ປົກປັກຮັກສາປະເທດແຕ່ກ່ອນ, ແຕ່ໄກ, ແຕ່ເມື່ອປະເທດບໍ່ມີໄພອັນຕະລາຍ”, ພ້ອມກັນນັ້ນກໍ່ໄຫວພິບແລະປະດິດສ້າງ ໃນການຊອກຫາວິທີການໃໝ່ເພື່ອຊຸກຍູ້ການຮ່ວມມືສາກົນ, ສ້າງເງື່ອນໄຂສາກົນທີ່ເອື້ອອຳນວຍ ເພື່ອສ້າງສາແລະພັດທະນາປະເທດ, ເພີ່ມທະວີທ່າແລະກຳລັງແຮງຂອງປະເທດ, ການທູດຫວຽດນາມໃນນັ້ນມີການທູດວັດທະນະທຳ ໄດ້ປະກອບສ່ວນຍົກສູງປະສິດທິຜົນ ແລະ ເພີ່ມທະວິການພົວພັນກັບບັນດາຄູ່ຮ່ວມມືສາກົນ, ເປີດກວ້າງການພົວພັນກັບຄູ່ຮ່ວມມືສາກົນ ໃນນັ້ນມີ 30 ຄູ່ຮ່ວມມືຍຸດທະສາດແລະຄູ່ຮ່ວມມືຮອບດ້ານ ລວມທັງທຸກປະເທດທີ່ເປັນສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ, ປະເທດສ່ວນໃຫຍ່ທີ່ເປັນສະມາຊິກຂອງກຸ່ມການເມືອງ, ເສດຖະກິດທີ່ສຳຄັນຂອງໂລກ, ໂດຍສະເພາະປະເທດເພື່ອນບ້ານ.
ທີສອງ, ປະກອບສ່ວນຊຸກຍູ້ການພັດທະນາເສດຖະກິດ, ສ້າງພື້ນຖານເພື່ອຜັນຂະຫຍາຍການທູດໃນທຸກດ້ານ: ການເມືອງ - ເສດຖະກິດ - ວັດທະນະທຳ - ສັງຄົມ, ໂດຍສະເພາະທາງດ້ານເສດຖະກິດ ເພື່ອຮັບໃຊ້ຜົນປະໂຫຍດຂອງປະເທດ. ການໂຄສະນາເຜີຍແຜ່ພາບພົດຂອງປະເທດປະກອບສ່ວນໃນການດຶງດູດຊັບພະຍາກອນການລົງທຶນຂະໜາດໃຫຍ່, ສົ່ງເສີມການຄ້າ ການທ່ອງທ່ຽວ, ຍາດແຍ່ງເອົາແຫຼ່ງພະລັງ, ຄວາມຮູ້ດ້ານວິທະຍາສາດ ເຕັກໂນໂລຊີແລະການສຶກສາ ຂອງປະເທດທີ່ກ້າວໜ້າ... ປະກອບສ່ວນຢ່າງຕັ້ງໜ້າເຂົ້າໃນການປະຕິບັດບັນດາເປົ້າໝາຍການພັດທະນາເສດຖະກິດແລະສັງຄົມ.
ທີສາມ, ຍາດແຍ່ງເອົາຄວາມເຫັນດີເຫັນພ້ອມແລະການສະໜັບສະໜູນ ຂອງປະຊາຊົນໂລກ ຕໍ່ພາລະກິດການຕໍ່ສູ້ເພື່ອປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດ. ການທູດຫວຽດນາມໄດ້ປະກອບສ່ວນຕໍ່ສູ້ໃນດ້ານການທູດ, ກົດໝາຍ ແລະ ຫາງສຽງສາກົນຢູ່ບັນດາອົງການແລະສະຖາບັນພາກພື້ນ, ປະກອບສ່ວນແກ້ໄຂບັນດາບັນຫາທີ່ກ່ຽວຂ້ອງກັບຜົນປະໂຫຍດຂອງຊາດ-ປະເທດຊາດ, ປົກປ້ອງອະທິປະໄຕ ເອກະພາບ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດ. ພ້ອມກັນນັ້ນ, ຕໍ່ສູ້ປະຕິເສດຖ້ອຍທຳນອງທີ່ບໍ່ຖືກຕ້ອງ, ເປັນສັດຕູ, ຂໍ້ມູນໃນແງ່ລົບແລະບິດເບືອນສະພາບການຢູ່ຫວຽດນາມ, ປະກອບສ່ວນປົກປັກຮັກສາລະບອບ ແລະ ຄວາມໝັ້ນຄົງແຫ່ງຊາດ.
ທີ່ສີ່, ປະກອບສ່ວນເປີດກວ້າງການແລກປ່ຽນວັດທະນະທຳກັບຕ່າງປະເທດ, ເພີ່ມທະວີຄວາມເຂົ້າໃຈເຊິ່ງກັນແລະກັນ ລະຫວ່າງຫວຽດນາມກັບບັນດາປະເທດທີ່ຫວຽດນາມຍັງບໍ່ທັນມີການແລກປ່ຽນເປັນປະຈຳ ເພື່ອສ້າງພື້ນຖານໃຫ້ແໜ້ນແຟ້ນກ່ວາອີກ ແລະ ຮັດແໜ້ນການພົວພັນລະຫວ່າງຫວຽດນາມ ແລະ ບັນດາປະເທດ. ຄ່ອຍໆສ້າງຄວາມໄວ້ເນື້ອເຊື່ອໃຈ, ນຳການພົວພັນຄູ່ຮ່ວມມືເຂົ້າສູ່ລວງເລິກ, ສະຖຽນລະພາບ ແລະ ຍືນຍົງ. ຜ່ານບັນດາເຫດການພົວພັນຕ່າງປະເທດທີ່ສຳຄົນທີ່ຈັດຕັ້ງຢູ່ຫວຽດນາມ, ບັນດາການຢ້ຽມຢາມຂອງການນຳພັກແລະລັດໃນປະເທດຕ່າງໆ, ບັນດາການເຄື່ອນໄຫວແລກປ່ຽນວັດທະນະທຳ ສິລະປະ ໄດ້ປະກອບສ່ວນທີ່ຕັ້ງໜ້າ ເຮັດໃຫ້ມີການປ່ຽນແປງໃນຄວາມຮັບຮູ້ກ່ຽວກັບຫວຽດນາມຂອງບັນດາຄູ່ຮ່ວມມືສາກົນ, ເພີ່ມທະວີຄວາມເຂົ້າໃຈເຊິ່ງກັນແລະກັນ, ຊຸກຍູ້ການຮ່ວມມືແລະມິດຕະພາບ.
ທີຫ້າ, ເປັນຂົວຕໍ່ລະຫວ່າງປະຊາຄົມຊາວຫວຽດນາມອາໄສຢູ່ຕ່າງປະເທດ ກັບ ປະຊາຊົມພາຍໃນປະເທດ ແລະ ບ້ານເກີດເມືອງນອນ, ປະເທດຊາດ, ເພີ່ມທະວີກຳລັງແຮງແຫ່ງຊາດ, ຮັດແໜ້ນຄວາມສາມັກຄີ, ປຸກລຸກຄວາມເອກອ້າງທະນົງໃຈຂອງຊາດ ແລະຈິດໃຈຫັນໜ້າມາຫາຕົ້ນກຳເນີດ, ປຸກພະລັງແຮງອັນໃຫຍ່ຫຼວງຂອງປະຊາຄົມຊາວຫວຽດນາມຢູ່ຕ່າງປະເທດ ເພື່ອປະກອບສ່ວນທີ່ຕັ້ງໜ້າເຂົ້າໃນການພັດທະນາປະເທດ.
ໃນສະພາບທີ່ໂລກພວມປະເຊີນໜ້າກັບວິກິດການໃນທຸກຂົງເຂດຍ້ອນການລະບາດຂອງໂຄວິດ-19, ບັນດາປະເທດລ້ວນແຕ່ລວມສູນການນຳໃຊ້ແຫຼ່ງກຳລັງຂອງຕົນໃນການໂຄສະນາເຜີຍແຜ່ພາບພົດຂອງປະເທດທາງອອນລາຍ ເພື່ອສະໜອງຂໍ້ມູນຂ່າວສານ, ໂຄສະນາແລະສົ່ງເສີມການທ່ອງທ່ຽວ. ສິ່ງດັ່ງກ່າວສ້າງການແຂ່ງຂັນແລະການແກ່ງແຍ້ງທີ່ຮຸນແຮງລະຫວ່າງປະເທດຕ່າງໆ ໃນການສົ່ງເສີມພາບພົດແລະເຄື່ອງໝາຍການຄ້າຂອງຊາດຕົນ.
ເພື່ອເພີ່ມ “ການຮັບຮູ້ກ່ຽວກັບຫວຽດນາມ” ໃນຂອບເຂດທົ່ວໂລກ, ຄວນພິຈາລະນາວິທີແກ້ບັນຫາຕໍ່ໄປນີ້:
ທີໜຶ່ງ, ສ້າງຍຸດທະສາດແຫ່ງຊາດໂດຍລວມແລະຮອບດ້ານໃນການໂຄສະນາ ເຜີຍແຜ່ພາບພົດຂອງຫວຽດນາມໄປທົ່ວໂລກ, ເໝາະສົມກັບແຕ່ລະສະໄໝ ໄລຍະເວລາແຫ່ງການພັດທະນາຂອງປະເທດ, ໂດຍມີການປະສານງານແລະເຊື່ອມໂຍງລະຫວ່າງບັນດາເຂດ ພາກ ທ້ອງຖິ່ນ ຂະແໜງການ ຂົງເຂດ, ດ້ວນການເຂົ້າຮ່ວຂອງຫຼາຍພາກສ່ວນໃນສັງຄົມ. ໃນໂລກປະຈຸບັນ, ຫຼາຍປະເທດໄດ້ສ້າງຍຸດທະສາດການສື່ສານ, ໂຄສະນາເຜີຍແຜ່ພາບພົດແລະເຄື່ອງໝາຍການຄ້າຂອງຊາດ, ເຊິ່ງໄດ້ຜັນຂະຫຍາຍຂະໜາດໃຫຍ່ ແລະໄດ້ຮັບຜົນສຳເລັດ; ບັນດາກົນໄກ ນະໂຍບາຍໄດ້ຮັບການເພີ່ມເຕີມ, ອັບເດດ ແລະ ປັບປຸງບູລະນະຢ່າງສະໝ່ຳສະເໝີ, ສອດຄ່ອງກັບພຶດຕິກຳຕົວຈິງແຫ່ງການພັດທະນາປະເທດ. ສ້າງຍຸດທະສາດໂດຍລວມ, ເຊື່ອມໂຍງກິດຈະກຳການທູດວັດທະນະທຳໃນການຜັນຂະຫຍາຍຍຸດທະສາດພັດທະນາເສດຖະກິດ - ສັງຄົມ, ຍຸດທະສາດພັດທະນາວັດທະນະທຳ, ຍຸດທະສາດພັດທະນາການທ່ອງທ່ຽວຫວຽດນາມ,... ເພື່ອແນໃສ່ສ້າງຜົນກະທົບສັງເຄາະຕໍ່ການປະຕິບັດເປົ້າໝາຍການພັດທະນາເສດຖະກິດ - ສົງຄົມຂອງບັນດາທ້ອງຖິ່ນແລະທົ່ວປະເທດ ເຊິ່ງຈະເປັນພື້ນຖານເພື່ອຜັນຂະຫຍາຍຢ່າງເປັນລະບົບແລະມີປະສິດທິຜົນ ໃນການນຳພາບພົດຂອງຫວຽດນາມໄປທົ່ວໂລກ.
ທີສອງ, ກຳນົດທີ່ຕັ້ງຂອງພາບພົດຂອງຫວຽດນາມ, ເຫັນໄດ້ຊັດເຈນວ່າ ພວກເຮົາຢູ່ ໃສໃນແຜນທີ່ເຄື່ອງໝາຍການຄ້າໂລກ. ເພື່ອສ້າງແລະໂຄສະນາເຜີຍແຜ່ພາບພົດຂອງປະເທດແມ່ນຕ້ອງມີຄວາມດຶງດູດ, ມີລັກສະນະສະເພາະ, ມີເອກະລັກທີ່ໂດດເດັ່ນ. ໃນປະຫວັດສາດ, ຊາດຫວຽດນາມໄດ້ສ້າງເອກະລັກສະເພາະ ໂດດເດັ່ນຂອງຕົນ. ໃນສະພາບການປະຈຸບັນ, ຕ້ອງມີຄວາມປະດິດສ້າງຫຼາຍກວ່າອີກ ໃນການສ້າງຜະລິດຕະພັນວັດທະນະທຳ “ຫວຽດນາມລ້ວນໆ”, ຜະລິດຕະພັນທີ່ປະສົມປະສານທັງຄຸນຄ່າດັ້ງເດີມແລະສຽງສະທ້ອນຂອງສະໄໝໃໝ່, ສ້າງຄວາມດຶງດູດ “ຈັບໃຈ” ທີ່ແຕກຕ່າງກັນໃນຮູບພາບທີ່ມີສີສັນຂອງວັດທະນະທໍາໂລກ.
ທີສາມ, ສ້າງລະບົບຄຸນຄ່າມາດຕະຖານ, ຮູບພາບທີ່ສວຍງາມ, ບຸກຄະລິກກະພາບທົ່ວໄປຂອງຜູ້ຄົນຫວຽດນາມ, ໂດຍສະເພາະໃນສະພາບການທີ່ປະເທດກຳລັງກ້າວເຂົ້າສູ່ໄລຍະແຫ່ງການເຊື່ອມໂຍງເຂົ້າກັບສາກົນຢ່າງຮອບດ້ານແລະເລິກເຊິ່ງ. ເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມໄດ້ລະບຸ: “ສຸມໃສ່ການຄົ້ນຄວ້າ, ກຳນົດ ແລະ ຜັນຂະຫຍາຍການກໍ່ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະ ມາດຕະຖານຜູ້ຄົນ ໂດຍຕິດພັນກັບການຮັກສາ, ພັດທະນາລະບົບຄຸນຄ່າຄອບຄົວຫວຽດນາມ”(8). ບັນດາຄຸນຄ່າຫຼັກຂອງຜູ້ຄົນຫວຽດນາມ ເຊັ່ນ: ນ້ຳໃຈຮັກຊາດອັນແຮງກ້າ, ເຈດຈຳນົງເປັນເຈົ້າຕົນເອງແຫ່ງຊາດ, ນ້ຳໃຈສາມັກຄີ, ຈິດສຳນຶກຊຸມຊົນ, ຄວາມເມດຕາ, ຄວາມອະນຸໂລມ, ການເຄົາລົບໃນຄຸນທໍາ, ຄວາມກະຕັນຍູ, ຂະຫຍັນໝັ່ນພຽນ, ມີຄວາມຄິດສ້າງສັນໃນການເຮັດວຽກ…, ຕ້ອງໄດ້ຮັບການເພີ່ມເຕີມ, ດັດປັບ ແລະ ຍົກຂຶ້ນສູ່ລະດັບໃໝ່ ໃຫ້ສອດຄ່ອງກັບຄວາມຕ້ອງການພັດທະນາໃໝ່. ວຽກງານການສຶກສາອົບຮົມຄຸນສົມບັດ, ມູນເຊື້ອວັດທະນະທຳ ແນວຄິດ, ສ້າງບຸກຄະລິກແລະວິຖີຊີວິດທີ່ດີງາມ ຕ້ອງໄດ້ຮັບຄວາມເອົາໃຈໃສ່ເປັນສຳຄັນ; ການຍົກສູງຄວາມຮູ້ຂອງປະຊາຊົນຕ້ອງຖືເປັນນະໂຍບາຍແຫ່ງລັດ, ໂດຍສະເພາະຢ່າງຍິ່ງເມື່ອຫວຽດນາມຍັງຕາມຫຼັງບັນດາປະເທດພັດທະນາແລ້ວໃນດ້ານວິທະຍາສາດ-ເຕັກໂນໂລຢີ; “ເຄື່ອງຂອງເດີນທາງ” ຂອງພວກເຮົາເພື່ອການເຊື່ອມໂຍງເຂົ້າກັບສາກົນຍັງມີໜ້ອຍໃນແງ່ຂອງ ຊັບພະຍາກອນບຸຄົນທີ່ມີຄຸນນະພາບ. ແລະ ສິ່ງສຳຄັນແມ່ນວິທີການ “ປຸກລະດົມນ້ຳໃຈຮັກຊາດ, ຈິດສຳນຶກຊຸມຊົນ, ເຈດຈຳນົງເປັນເຈົ້າຕົນເອງ, ຄວາມພາກພູມໃຈຂອງຊາດ ແລະ ຄວາມປາຖະໜາທີ່ຈະບືນຕົວຂຶ້ນ”(9), ເພື່ອໃຫ້ປະຊາຊົນແຕ່ລະຄົນໄດ້ຮັບຮູ້ເຖິງການເຄົາລົບ, ອະນຸລັກຮັກສາ, ສືບຕໍ່ ແລະ ສົ່ງເສີມບັນດາຄຸນຄ່າຄວາມງາມແບບດັ້ງເດີມນັ້ນ.
ທີສີ່, ເສີມຂະຫຍາຍພະລັງນຸ່ນວນຂອງຊາດ ເພື່ອຍູ້ແຮງວຽກງານໂຄສະນາເຜີຍແຜ່ບັນດາຄຸນຄ່າ ແລະ ຜົນງານທີ່ຫວຽດນາມບັນລຸໄດ້ສູ່ໂລກ. ຄຽງຄູ່ກັບການເສີມຂະຫຍາຍກຳລັງແຮງ ຖານະບົດບາດ ແລະ ກຽດສັກສີຂອງປະເທດຫວຽດນາມໃນເວທີສາກົນໄດ້ຮັບການຍົກສູງຂຶ້ນ, ຄຸນຄ່າພູມສາດ-ຍຸດທະສາດຂອງຫວຽດນາມ ກໍ່ໄດ້ຮັບຄວາມສົນໃຈຈາກ ປະເທດໃຫຍ່ຫຼາຍປະເທດ. ນັ້ນແມ່ນຄວາມສະດວກ ຂໍ້ໄດ້ປຽບພື້ນຖານ ເພື່ອໃຫ້ຫວຽດນາມຍາດແຍ່ງເອົາການສະໜັບສະໜູນຂອງບັນດາປະເທດ ຕໍ່ນະໂຍບາຍປ່ຽນແປງໃໝ່ແລະເຊື່ອມໂຍງເຂົ້າກັບສາກົນ, ຫັນປ່ຽນທັດສະນະຂອງໂລກຕໍ່ຫວຽດນາມໃນທາງບວກ ແລະ ແທດຈິງ.
ທີຫ້າ, ເພີ່ມທະວີການຮ່ວມມືແລະແລກປ່ຽນວັດທະນະທຳດ້ວຍບັນດາຮູບການທີ່ຫຼາກຫຼາຍ ອຸດົມສົມບູນ, ຊຶມເລິກເຂົ້າໃນທຸກຂົງເຂດຂອງຊີວິດສັງຄົມ. ໃນສະພາບການແຜ່ລະບາດຂອງພະຍາດໂຄວິດ-19 ຍັງສັບສົນ ແລະ ບໍ່ສາມາດຄາດຄະເນໄດ້, ເພື່ອປັບຕົວເຂົ້າກັບສະພາບການໃໝ່ຢ່າງຍືດຫຍຸ່ນ, ຈຳເປັນຕ້ອງມີການປ່ຽນແປງໃໝ່ ແລະສົ່ງເສີມວິທີການໃໝ່ໃນການໂຄສະນາ ເຜີຍແຜ່, ນຳໃຊ້ເຕັກນິກດິຈີຕອນໃນລາຍການວັດທະນະທຳ ສິລະປະອອນລາຍ, ສົ່ງສີມພາບພົດຂອງປະເທດຜ່ານໂຊຊຽນມີເດຍ, ບັນດາເວັບໄຊສັງຄົມເຊັ່ນ fanpage, youtube ເພື່ອສົ່ງເສີມການເຊື່ອມຕໍ່ຂໍ້ມູນຂ່າວສານແລະການໂຄສະນາ.
ທີຫົກ, ຫັນການເຄື່ອນໄຫວໂຄສະນາເຜີຍແຜ່ເປັນສັງຄົມ, ລວມເນື້ອໃນໂຄສະນາພາບພົດຂອງປະເທດໃນການເຄື່ອນໄຫວການເມືອງ ເສດຖະກິດ ວັດທະນະທຳ... ລະດົມທຸກແຫຼ່ງພະລັງ, ທຸກພາກສ່ວນ ແລະ ຊຸມຊົນໃຫ້ເຂົ້າຮ່ວມການໂຄສະນາເຜີຍແຜ່ເຄື່ອງໝາຍການຄ້າ ແລະ ພາບພົດຂອງຫວຽດນາມ. ບົດບາດສໍາຄັນຂອງບັນດາອົງການ, ກະຊວງ, ຂະແໜງການ, ການເຂົ້າຮ່ວມຂອງວິສາຫະກິດແລະປະຊາຊົນ, ການເຊື່ອມໂຍງບົດບາດຂອງເຄືອຂ່າຍກົງສຸນຫວຽດນາມໃນນັບຮ້ອຍປະເທດທົ່ວໂລກ ກໍ່ຄືເຄືອຂ່າຍນັກສຶກສາຫວຽດນາມໃນຕ່າງປະເທດ..., ເປັນກຳລັງລວມເພື່ອນຳພາບພົດຂອງຫວຽດນາມໄປທົ່ວໂລກ ແລະ ນຳໂລກມາສູ່ຫວຽດນາມ. ນອກຈາກນັ້ນ, ການເຂົ້າຮ່ວມຂອງຊຸມຊົນຊາວຫວຽດນາມຢູ່ຕ່າງປະເທດກໍ່ຈະ “ປະກອບສ່ວນຮັກສາແລະສົ່ງເສີມພາສາຫວຽດນາມ, ເອກະລັກວັດທະນະທຳ ແລະ ມູນເຊື້ອຂອງຊາດ, ດຶງດູດແຫຼ່ງພະລັງທີ່ມີຄຸນນະພາບສູງຢູ່ຕ່າງປະເທດ ເພື່ອປະກອບສ່ວນເຂົ້າໃນການພັດທະນາແບບຍືນຍົງຂອງປະເທດ”(10).
***
ໃນໂລກທີ່ເຕັມໄປດ້ວຍຄວາມຜັນຜວນດ້ວຍຄວາມສະດວກ, ໂອກາດ, ຄວາມຫຍຸ້ງຍາກ, ສິ່ງທ້າທາຍທີ່ທັບຊ້ອນກັນ, ມີຄວາມບໍ່ແນ່ນອນທີ່ອາດເກີດຂຶ້ນຫຼາຍຢ່າງຕໍ່ຂະບວນການພັດທະນານັ້ນ, ຫວຽດນາມພວມມີການປ່ຽນແປງຢ່າງຕັ້ງໜ້າໃນທຸກຂົງເຂດເສດຖະກິດ ການເມືອງ ແລະ ສັງຄົມ. ພາບພົດ ຖານະບົດບາດ ແລະ ຊື່ສຽງແຫ່ງຊາດຂອງຫວຽດນາມນັບມື້ນັບໄດ້ຮັບການຢືນຢັນ ແລະ ເຊີດຊູໃນເວທີສາກົນ. ຄວາມເຊື່ອໝັ້ນຂອງປະຊາຄົມສາກົນຕໍ່ສະຖາບັນທາງການເມືອງແລະຄວາມສາມາດໃນການບໍລິຫານປະເທດຂອງຫວຽດນາມນັບມື້ນັບໝັ້ນຄົງ. ຄວາມປາດຖະໜາຢາກສ້າງປະເທດໃຫ້ຈະເລີນຮຸ່ງເຮືອງນັບມື້ນັບໄດ້ຮັບການປຸກຕື່ນຢ່າງແຂງແຮງ. ດັ່ງນັ້ນ, ພາບພົດຂອງຫວຽດນາມມີຄວາມໝັ້ນຄົງ ແລະ ເຕັມໄປດ້ວຍຄວາມສາມາດໃນການພັດທະນາ, ເຂົ້າຮ່ວມໃນການສ້າງສັນຕິພາບຮ່ວມກັບໂລກ ເຊິ່ງຕ້ອງສືບຕໍ່ໂຄສະນາເຜີຍແຜ່ຢ່າງກວ້າງຂວາງ ເພື່ອປະກອບສ່ວນເຂົ້າໃນການເຕີບໂຕເສດຖະກິດ, ສະຖຽນລະພາບທາງການເມືອງ ສັງຄົມ ຄວາມໝັ້ນຄົງ ແລະ ການປ້ອງກັນປະເທດ.
ເອກະສານກອງປະຊຸມໃຫຍ່ຄັ້ງທີ 13 ຂອງພັກໄດ້ລະບຸວ່າ: “ຈັດຕັ້ງເປັນຢ່າງດີວຽກງານຂໍ້ມູນຂ່າວສານຕ່າງປະເທດ ເພື່ອໂຄສະນາເຜີຍແຜ່ພາບພົດຂອງຊາດ, ຜູ້ຄົນ ແລະ ວັດທະນະທຳຫວຽດນາມໄປທົ່ວໂລກ”. ສືບຕໍ່ຍົກສູງຄຸນນະພາບ ແລະ ປະສິດທິຜົນຂອງວຽກງານວັດທະນະທຳກັບຕ່າງປະເທດຂອງຫວຽດນາມ ເພື່ອແນໃສ່ພັດທະນາວັດທະນະທຳ ແລະ ຜູ້ຄົນຫວຽດນາມ ຢ່າງຮອບດ້ານ. ຮັບເອົາບັນດາຄຸນຄ່າວັດທະນະທຳ ຂອງມະນຸດຊາດ; ອະນຸລັກ ເສີມຂະຫຍາຍ ແລະ ໂຄສະນາເຜີຍແຜ່ ບັນດາຄຸນຄ່າວັດທະນະທຳຂອງຫວຽດນາມ; ເຊີດຊູພາບພົດຂອງປະເທດແລະຜູ້ຄົນຫວຽດນາມ, ເຖິງປີ 2030 ພາບພົດຂອງຊາດຫວຽດນາມຈະໄດ້ເຜີຍແຜ່ຢ່າງກວ້າງຂວາງໃນທົ່ວໂລກ, ວັດທະນະທຳຫວຽດນາມຈະໄດ້ຮັບການຍອມຮັບແລະມີສ່ວນຮ່ວມໃໝ່ ໃນຊີວິດວັດທະນະທຳສາກົນ. ສາມາດເວົ້າໄດ້ວ່າ, ນີ້ແມ່ນບັນດາທິດທາງພື້ນຖານເພື່ອໃຫ້ໃນຊຸມປີທີ່ຈະມາເຖິງ, ການທູດວັດທະນະທຳ ພ້ອມກັບການທູດການເມືອງ ແລະ ການທູດເສດຖະກິດ ສືບຕໍ່ເສີມຂະຫຍາຍຄວາມສາມາດບົ່ມຊ້ອນ, ທ່າແຮງ ແລະ ໝາກຜົນທີ່ບັນລຸໄດ້ ເພື່ອປະກອບສ່ວນນຳປະເທດຊາດຂຶ້ນສູ່ໄລຍະໃໝ່ແຫ່ງການພັດທະນາ./.
--------------
(1) Cultural Diplomacy, #https://www.americansecurityproject.org/public-diplomacy-and-strategic-communication/cultural-diplomacy/
(2) ແບັ່ງເຕີນເລືອງ: ການທູດວັດທະນະທຳ ແລະ ພະລັງນຸ່ມນວນຂອງຈີນ: ທັດສະນະໂລກາພິວັດ (ບົດແປພາສາຫວຽດນາມ), ສພຈ ການສອນແລະຄົ້ນຄວ້າພາສາຕ່າງປະເທດ, ປັກກິ່ງ, 2008, ໜ້າ 78.
(3) ເບິ່ງ: ຟ້າມຢາຄຽມ: “ການທູດຫວຽດນາມສະໄໝໃໝ່ໃນໄລຍະການເຊື່ອມໂຍງເຂົ້າກັບສາກົນ”, ໃນປຶ້ມພື້ນຖານການທູດທີ່ຮອບດ້ານຂອງຫວຽດນາມໃນໄລຍະການເຊື່ອມໂຍງເຂົ້າກັບສາກົນ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2015, ໜ້າ 507.
(4) http://nghiencuuquocte.org/2016/01/23/ngoai-giao-van-hoa-cultural-diplomacy/
(5) ແບັ່ງເຕີນເລືອງ: ການທູດວັດທະນະທຳ ແລະ ພະລັງນຸ່ມນວນຂອງຈີນ: ທັດສະນະໂລກາພິວັດ, ປຶ້ມທີ່ໄດ້ແນະນຳ, ໜ້າ 439.
(6), (7) Jorge de Vincente: “State branding in the 21st century”, http://tufts.edu
(8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, ເຫຼັ້ມ 1, ໜ້າ 143.
(9) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ຮ່າໂນ້ຍ, ເຫຼັ້ມ 2, ໜ້າ 135.
(10) ຄຳສັ່ງເລກທີ 25/CT-TTg, ລົງວັນທີ 10 ກັນຍາ 2021, ຂອງນາຍົກລັດຖະມົນຕີ, “ກ່ຽວກັບການຍູ້ແຮງການຜັນຂະຫຍາຍຍຸດທະສາດວັດທະນະທຳການຕ່າງປະເທດຂອງຫວຽດນາມ”.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 976 (ເດືອນຕຸລາ 2021)
