ແບບວິທີການນຳພາຂອງພັກ ຕໍ່ບັນດາສະມາຄົມຊາວຫວຽດນາມຢູ່ຕ່າງປະເທດ
ຜ່ານບັນດາ​ໄລຍະ​ການ​ປະຕິວັດ

ຕະຫຼອດ​ໄລຍະ​ປະຫວັດສາດ​ການ​ປະຕິວັດ, ພາຍ​ໃຕ້​ການ​ນຳພາ​ຂອງ​ພັກ, ປະຊາ​ຄົມ​ຊາວ​ຫວຽດນາມ​ຢູ່​ຕ່າງປະ​ເທດ​ໄດ້​ປະກອບສ່ວນ​ສຳຄັນ​ຫຼາຍ​ຢ່າງ, ຍາມ​ໃດ​ກໍ່​ຮ່ວມຂະບວນການ ແລະ ຄຽງ​ບ່າ​ຄຽງ​ໄລ່ກັບ​ພີ່ນ້ອງ​ຮ່ວມ​ຊາດ​ໃນ​ທົ່ວ​ປະ​ເທດ, ປະກອບສ່ວນ​ເຂົ້າ​ໃນ​ໄຊຊະນະ​ລວມ. ສະມາຄົມແມ່ນ “ບ່ອນອີງ”, ແມ່ນກອງກຳລັງ “ຫຼັກແຫຼ່ງ” ໃນການຈັດຕັ້ງປະຕິບັດແຜນນະໂຍບາຍ, ນະໂຍບາຍຂອງພັກກອມມູນິດຫວຽດນາມ ແລະ ລັດຫວຽດນາມ ກ່ຽວກັນການຂົນຂວາຍຊາວຫວຽດນາມຢູ່ຕ່າງປະ​ເທດ​ກັບ​ຄືນ​ເມືອ​ບ້ານ​ເກີດ​ເມືອງ​ນອນ.  

ປະຈຸບັນ, ມີ​ຊາວ​ຫວຽດນາມ​ກວ່າ 5,3 ລ້ານ​ຄົນ ​ພວມ​ດຳລົງ​ຊີວິດ, ຮ່ຳຮຽນ ​ແລະ ​ເຮັດ​ວຽກ​ຢູ່ໃນກວ່າ 130 ​ປະ​ເທດ​ແລະດິນແດນ, ໂດຍມີ​ສະມາຄົມ​ຊາວຫວຽດນາມປະມານ 1.000 ແຫ່ງ​ໃນ​ທົ່ວ​ໂລກ, ​ໃນ​ນັ້ນ 500 ກວ່າແຫ່ງ​ ມີ​ການ​ພົວພັນ​ຢ່າງ​ແໜ້ນ​ແຟ້ນ ກັບສຳນັກງານຜູ້ຕາງໜ້າຫວຽດນາມຢູ່​ຕ່າງປະ​ເທດ. ອາດຈະເວົ້າໄດ້ວ່າ, ສະມາຄົມຊາວຫວຽດນາມຢູ່ຕ່າງປະເທດ ໄດ້ພັດທະນາທາງດ້ານປະລິມານ ແລະ ສ່ວນປະກອບ ເຊິ່ງມີຮູບການແລະລັກສະນະການເຄື່ອນໄຫວທີ່ຫຼາກຫຼາຍ ອຸດົມສົມບູນ, ໂຄງປະກອບການຈັດຕັ້ງກໍໄດ້ຮັບການປັບປຸງຢ່າງຕໍ່ເນື່ອງ. ສະ​ມາ​ຄົມ​ຊາວ​ຫວຽດ​ນາມ​ຢູ່​ຕ່າງ​ປະ​ເທດ​ສ່ວນ​ໃຫຍ່​ໄດ້​ເຄື່ອນ​ໄຫວ​ປະ​ຕິ​ບັດ​ຫຼາຍ​ກິດ​ຈະ​ກຳ​ທີ່​ອຸດົມສົມບູນ ແລະ ​ແທດ​ຈິງ ເພື່ອຊ່ວຍໜູນພີ່ນ້ອງຮ່ວມຊາດ ໃນການປັບປຸງຊີວິດໃຫ້ໝັ້ນຄົງ ແລະ ເຊື່ອມໂຍງເຂົ້າກັບສັງຄົມທ້ອງຖິ່ນ, ສ້າງຄວາມຜູກພັນ ຮັກສາເອກະລັກວັດທະນະທຳທີ່ເປັນມູນເຊື້ອ ແລະ ສົ່ງເສີມຄວາມພາກພູມໃຈຂອງຊາດ, ປະກອບສ່ວນເຂົ້າໃນການພັດທະນາຂອງປະເທດ; ພ້ອມກັນນັ້ນ, ຊຸກຍູ້ການພົວພັນມິດຕະພາບ ແລະ ການ​ພົບ​ປະ​ແລກປ່ຽນ​ປະຊາຊົນ​ ລະຫວ່າງ​ຫວຽດນາມ ກັບ​ບັນດາ​ປະ​ເທດ​ໃນ​ໂລກ.

ພັກກອມມູນິດຫວຽດນາມ ແລະ ລັດຫວຽດນາມ ຍາມໃດກໍ່ເອົາໃຈໃສ່ຢ່າງໃກ້ຊິດເຖິງວຽກງານຊາວຫວຽດນາມຢູ່ຕ່າງປະເທດເວົ້າລວມ, ວຽກງານສະມາຄົມເວົ້າສະເພາະ. ໃນແຕ່ລະໄລຍະປະຫວັດສາດ, ພັກໄດ້ກຳນົດແບບວິທີການນຳພາທີ່ສອດຄ່ອງກັບສະມາຄົມຊາວຫວຽດນາມຢູ່ຕ່າງປະເທດ ເພື່ອລະດົມການປະກອບສ່ວນຂອງຊາວຫວຽດນາມຢູ່ຕ່າງປະເທດ ເຂົ້າໃນພາລະກິດປະຕິວັດຂອງຊາດ.

​ໃນ​ໄລຍະ​ຕໍ່ສູ້​ປົດ​ປ່ອຍ​ຊາດ ​ແລະ ​ໂຮມ​ປະ​ເທດ​ຊາດ​ເປັນ​ເອກະ​ພາບ, ການ​ນຳ​ພັກ ​ແລະ ລັດ ​ແລະ ປະທານ​ໂຮ່ຈີ​ມິນ ​ໄດ້​ສ້າງ​ຂະບວນການ​ຊາວຫວຽດນາມຢູ່​ຕ່າງປະ​ເທດທີ່ຮັກຊາດຂຶ້ນໂດຍກົງ, ຈາກ​ນັ້ນ ​​ພັດທະນາ​ເປັນ​ສະມາຄົມ​ຜູ້ຮັກຊາດ​ຫວຽດນາມ​ຢູ່​ຕ່າງປະ​ເທດ. ​ໃນ​ສະພາບ​ການ​ໂລກ​ສອງຂົ້ວ ແລະ ການ​ຕໍ່ສູ້​ທາງອຸດົມ​ການໄດ້​ກາຍ​ເປັນ​ສາຍ​ເຫດ​ເຮັດ​ໃຫ້​ອຳນາດ​ການ​ປົກຄອງ​ຂອງ​ບາງ​ປະ​ເທດ​ສັ່ງຫ້າມ​ ບໍ່​ໃຫ້​ສະມາຄົມ​ຜູ້ຮັກ​ຊາດ ຫວຽດນາມຢູ່​ຕ່າງປະ​ເທດ​ດຳ​ເນີນ​ການ, ດັ່ງນັ້ນ ສະມາຄົມສ່ວນໃຫຍ່ຈຶ່ງເຄື່ອນໄຫວຢ່າງລັບໆ. ຕໍ່ໜ້າສະພາບການດັ່ງກ່າວ, ພັກ​ຈຶ່ງໄດ້​ຊີ້​ນຳ​ບັນດາສະມາຄົມໂດຍ​ກົງ​ ຜ່ານ​ກອງກຳລັງ​ຫຼັກແຫຼ່ງຂອງຜູ້​ຮັກ​ຊາດ, ສະມາຊິກ​ພັກ ​ແລະ ປັນຍາ​ຊົນ ດ້ວຍ​ຮູບ​ການ​ຕົ້ນຕໍ​ແມ່ນ​ ການ​ໂຄສະນາ​ຊວນ​ເຊື່ອ ການຂົນຂວາຍຊັກຊວນ ​ແລະ ການປຸກລະດົມ. ບັນດາອົງການຈັດຕັ້ງພັກຮາກ​ຖານ​ໃນຕ່າງປະ​ເທດ ກໍ່​ຢູ່​ພາຍ​ໃຕ້​ການ​ຄຸ້ມ​ຄອງ ​ແລະ ນຳພາ​ຂອງ​ຄະນະ​ເລຂາທິການ​ສູນ​ກາງ​ພັກ​ໂດຍ​ກົງ. ຈຸດໝາຍສູງສຸດຂອງໄລຍະນີ້ແມ່ນ ປົກປ່ອຍຊາດ ແລະ ໂຮມ​ປະ​ເທດ​ຊາດ​ເປັນ​ເອກະ​ພາບ.

ດ້ວຍການນຳພາທີ່ຖືກຕ້ອງຂອງພັກ ແລະ ການເຄື່ອນໄຫວທີ່ຂະຫຍັນຂັນແຂງຂອງກອງກຳລັງຫຼັກແຫຼ່ງ ແລະ ຂະບວນການຮັກຊາດຂອງສະມາຄົມຊາວຫວຽດນາມຢູ່ຕ່າງປະເທດ ໄດ້ລະດົມ​ການ​ເຂົ້າ​ຮ່ວມ​ຢ່າງ​ແຂງ​ຂັນ​ຂອງ​ຊາວ​ຫວຽດນາມທີ່ອາ​ໄສ​ຢູ່​ຕ່າງປະ​ເທດ ສະໜັບສະໜູນ​ຂະບວນການ​​ປະຕິວັດ​​ໃນ​ປະ​ເທດຢ່າງຕັ້ງໜ້າ. ຕົວຢ່າງເຊັ່ນຢູ່ປະເທດໄທ, ​ມີຊາວ​ຫວຽດນາມຕ່າງດ້າວໃນໄທຫຼາຍກວ່າ 6.000 ​ຄົນ​ໄດ້​ເຂົ້າ​ຮ່ວມ​ໂດຍ​ກົງ​ ໃນ​ກອງ​ກຳລັງ​ປະກອບ​ອາວຸດ​ຕໍ່ຕ້ານໃນສະໜາມ​ຮົບ​ລາວ. ຫຼາຍ​ຄົນໄດ້​ເສຍ​ສະຫຼະ​ໃນການ​ຕໍ່ສູ້​ຕ້ານ​ພວກ​ລ່າ​ເມືອງ​ຂຶ້ນ​ຝຮັ່ງ ​ເພື່ອ​ປົກ​ປັກ​ຮັກສາ​ເອກະລາດຂອງປະເທດ​ຊາດ. ນັກ​ສຶກສາ​ຫວຽດນາມຈຳນວນຫຼາຍ​ທີ່​ຮ່ຳຮຽນ​ຢູ່​ບັນດາ​ປະ​ເທດ​ຕາ​ເວັນ​ຕົກ​ ​ໄດ້​ປຸກຂະບວນການ​ເຄື່ອນ​ໄຫວ​ຕ້ານ​ສົງຄາມ, ທວງເອົາ​ເອກະລາດ ແລະ ​ເສລີພາບ​ມາໃຫ້​ປະ​ເທດ​ຕົນ. ​ນັກ​ສຶກສາຫຼັກແຫຼ່ງ​ສ່ວນໃຫຍ່​ກາຍ​ເປັນ​ແກນນຳຂອງ​ຂະບວນການ​ຮັກ​ຊາດຫວຽດນາມ​ຢູ່​ຕ່າງປະ​ເທດໃນເວລາຕໍ່ມາ.    

ພາຍຫຼັງ​ປີ 1975, ປະ​ເທດ​ໄດ້ຮັບ​ເອກະລາດ​ ເປັນ​ເອກະ​ພາບຢ່າງສົມບູນ ​ແລະ ກ້າວ​ເຂົ້າ​ສູ່​ໄລຍະການ​ກໍ່ສ້າງ ​ແລະ ພັດທະນາ, ​ແຕ່​ນີ້​ກໍ່​ແມ່ນ​ຈຸດ​ເວລາ​ທີ່​ປະ​ເທດ​ປະເຊີນກັບ​ຄວາມ​ຫຍຸ້ງຍາກ​ຫຼາຍ​ຢ່າງ. ຕໍ່ໜ້າສະພາບການດັງກ່າວ, ບັນດາສະມາຄົມຊາວຫວຽດນາມທີ່ຮັກຊາດຢູ່ຕ່າງປະເທດ ໄດ້ຊອກຫາວິທີການປ່ຽນແປງແບບວິທີການເຄື່ອນໄຫວ, ດຳ​ເນີນ​ກອງ​ປະຊຸມ​ປ່ຽນ​ຊື່​ເປັນ​ສະມາຄົມ​ຫວຽດນາມ ​ເພື່ອ​ດຶງ​ດູດ​ສະມາຊິກ ​ແລະ ​ຂະຫຍາຍການເຄື່ອນໄຫວ. ​ໃນ​ຊຸມ​ປີຕົ້ນທົດສະວັດທີ 80 ຂອງ​ສະຕະວັດ​ທີ 20, ການ​ເຄື່ອນ​ໄຫວ​ຂອງ​ບັນດາ​ອົງການ​ຮັກ​ຊາດ​ຫວຽດນາມ ຢູ່​ຕ່າງປະ​ເທດ​ໄດ້​ຊັກ​ຊ້າ​ລົງ ​ແລະ ​ອົງການ​ຊາວ​ຫວຽດນາມຢູ່​ຕ່າງປະ​ເທດ​ກໍ່​ຫຼຸດ​ລົງ. ໃນ​ຊຸມ​ຊົນ​ໄດ້​ເລີ່ມ​ກໍ່​ຕັ້ງ​​ສະ​ມາ​ຄົມ​ໃໝ່​ຈໍາ​ນວນ​ໜຶ່ງຂຶ້ນ ໂດຍມີວັດຖຸປະສົງເພື່ອສົ່ງເສີມການ​ພົບປະແລກ​ປ່ຽນ, ສະໜັບ​ສະໜູນ​ ແລະ ​ຊ່ວຍ​ເຫຼືອ​ເຊິ່ງ​ກັນ​ແລະ​ກັນ ໃນການດຳລົງ​ຊີ​ວິດ​ໃນ​ປະ​ເທດ​ເຈົ້າບ້ານ. ມາເຖິງປະຈຸບັນ, ເມື່ອຊີວິດການເປັນຢູ່ຂອງພີ່ນ້ອງຮ່ວມຊາດໝັ້ນຄົງກວ່າເກົ່າ, ຄວາມ​ຕ້ອງ​ການ​ເຊື່ອມ​ໂຍງ​ຊຸມ​ຊົນ​ກັບ​ບ້ານ​ເກີດ​ເມືອງ​ນອນ​​ເພີ່ມຫຼາຍ​ຂຶ້ນ​, ມີ​ຫຼາຍ​ສະ​ມາ​ຄົມ​ໄດ້​ຮັບ​ການ​ສ້າງ​ຕັ້ງ ແລະ ດຳ​ເນີນ​ການ​ໂດຍໄດ້ຮັບ​ການ​ໜູນ​ຊ່ວຍຈາກ​ຄະ​ນະຜູ້ແທນທາງການ​ທູດຂອງຫວຽດນາມຢູ່​ຕ່າງ​ປະ​ເທດ ແລະ ໄດ້ຮັບ​ການຍອມຮັບ​ຈາກ​ລັດ​ຖະ​ບານ​ເຈົ້າ​ພາບ.

ໃນສະພາບການນັ້ນ, ແບບວິທີການນຳພາຂອງພັກຕໍ່ບັນດາສະມາຄົມກໍ່​ໄດ້​ຮັບ​ການ​ດັດແປງໃຫ້ເໝາະສົມ. ຄຳສັ່ງຂອງຄະນະບໍລິຫານງານສູນກາງພັກກອມມູນິດຫວຽດນາມສະບັບເລກທີ 09/CT-TW, ລົງວັນທີ 4 ຕຸລາ 1982, ກ່ຽວກັບວຽກງານຂົນຂວາຍຊາວຫວຽດນາມຢູ່ຕ່າງປະເທດ, ໄດ້ເນັ້ນໜັກວ່າ: ຂະບວນການຮັກ​ຊາດຂອງ​ຊາວ​ຫວຽດ​ນາມ​ຢູ່ຕ່າງປະ​ເທດ ​ແມ່ນ​ກຳ​ລັງມະຫາຊົນ​ປະ​ຕິ​ວັດ​ ຂອງ​ຊາວ​ຫວຽດ​ນາມ​ຢູ່​ຕ່າງ​ປະ​ເທດ, ແມ່ນບ່ອນອີງຂອງພັກແລະລັດຫວຽດນາມ ໃນວຽກງານຂົນຂວາຍຊາວຫວຽດນາມຢູ່ຕ່າງປະເທດ, ແມ່ນ​ຜູ້​ຊ່ວຍ​ດ້ານ​ການ​ເມືອງ ແລະ ການ​ທູດ​ຂອງ​ຫວຽດ​ນາມ ຢູ່​ຕ່າງ​ປະ​ເທດ.... ຄຳສັ່ງຍັງລະບຸຢ່າງຈະແຈ້ງ ເຖິງຄວາມຈຳເປັນຕ້ອງປັບປຸງການຈັດຕັ້ງ​ຂະບວນການຮັກ​ຊາດ​​ ຂອງຊາວ​ຫວຽດ​ນາມຢູ່ຕ່າງປະເທດ... ປັບປຸງແລະພັດທະນາສະມາຄົມຊາວຫວຽດນາມທີ່ຮັກຊາກ... ຈັດຕັ້ງກໍາລັງຫຼັກແຫຼ່ງເປັນແກນນໍາພາຂະບວນການເຄື່ອນໄຫວ. ພັກກອມມູນິດຫວຽດນາມສຸມໃສ່ການກຳນົດທິດ, ສະໜັບສະໜູນ ແລະ ໄປ​ຄຽງ​ຄູ່​ກັບ​ການ​ເຄື່ອນ​ໄຫວ​ຂອງ​ສະມາຄົມ​ ໃນ​ຮູບ​ແບບ​ການ​ຊັກ​ຊວນ ​ແລະ ການປຸກລະດົມ​ທັງ​ທາງ​ດ້ານ​ວັດຖຸ ​ແລະ ທາງ​ຈິດວິນ​ຍານ. ​ເປົ້າ​ໝາຍ​ລວມ​ແມ່ນ ​ກໍ່ສ້າງ​ປະຊາ​ຄົມ​ທີ່ສາມັກຄີ, ພັດທະນາ, ​ເຊື່ອມ​ໂຍງ​ເຂົ້າ​ກັບ​ສັງຄົມ​ເຈົ້າພາບ ​ແລະ ຫັນມາສູ່​ບ້ານ​ເກີດ​ເມືອງ​ນອນ, ປະກອບສ່ວນ​ກໍ່ສ້າງ ​ແລະ ປົກປັກຮັກສາ​ປະ​ເທດ​ຊາດ​ຫວຽດນາມ.

ກ້າວເຂົ້າສູ່ຍຸກແຫ່ງການປ່ຽນແປງໃໝ່, ພິ​ເສດ​ແມ່ນ​ນັບ​ແຕ່ເມື່ອ​ເຊື່ອມ​ໂຍງ​ເຂົ້າ​ກັບ​ສາ​ກົນ​ຢ່າງ​ເລິກ​ເຊິ່ງ, ພັກແລະລັດໄດ້ປະກາດໃຊ້ແຜນນະໂຍບາຍ ແລະ ນະໂຍບາຍຫຼາຍສະບັບ ກ່ຽວກັບວຽກງານຊາວຫວຽດນາມຢູ່ຕ່າງປະເທດ. ມະຕິຂອງກົມການເມືອງສູນກາງພັກສະບັບເລກທີ 36-NQ/TW, ລົງວັນທີ 26 ມີນາ 2004, ກ່ຽວກັບວຽກງານຊາວຫວຽດນາມຢູ່ຕ່າງປະເທດ ໄດ້ເນັ້ນໜັກເຖິງຄວາມຕ້ອງການ, ໜ້າທີ່ປັບປຸງ ແລະ ພັດທະນາ ບັນດາອົງການຈັດຕັ້ງສັງຄົມ ທີ່ເຮັດວຽກງານຂົນຂວາຍຊາວຫວຽດນາມຢູ່ຕ່າງປະເທດ, ເຊັ່ນ ສະ​ມາ​ຄົມ​ພົວ​ພັນ​ກັບ​ຊາວ​ຫວຽດ​ນາມ​ຢູ່​ຕ່າງ​ປະ​ເທດ, ສະມາຄົມພີ່ນ້ອງຂອງຊາວຫວຽດນາມຢູ່ຕ່າງປະເທດ ແລະ ຮູບ​ແບບ​ການ​ເຕົ້າ​ໂຮມ​ອື່ນໆ​ ທີ່​ຖືກ​ຕ້ອງ​ຕາມກົດໝາຍ ຕາມຄວາມປະສົງ​ ແລະ ​ລັກ​ສະ​ນະ​ຂອງ​ຊຸມ​ຊົນ​ໃນ​ພື້ນ​ທີ່​ທີ່​ຢູ່​ອາ​ໄສ. ຄຳສັ່ງຂອງກົມການເມືອງສູນກາງພັກສະບັບເລກທີ 45-CT/TW, ລົງວັນທີ 19 ພຶດສະພາ 2015, ຮຽກຮ້ອງໃຫ້ຄົ້ນຄວ້າ ພັດທະນາ​ນະ​ໂຍບາຍ, ໜູນ​ຊ່ວຍ​ບັນດາ​ສະມາຄົມ ​ແລະ ບັນດາ​ກຳລັງ​ສຳຄັນ​ໃນ​ຊຸມ​ຊົນ; ຄົ້ນຄວ້າທົດ​ລອງ​ການ​ຮັບ​ຮູ້​ບັນດາ​ສາຂາສະມາຄົມຊາວ​ຫວຽດນາມ ຢູ່​ຕ່າງປະ​ເທດ​ ເປັນ​ສະມາຊິກ​ຂອງ​ແນວ​ໂຮມ​ປະ​ເທດ​ຊາດຫວຽດນາມ, ສະຫະພັນ​ບັນດາ​ອົງການ​ມິດຕະພາບຫວຽດນາມ, ສະຫະພັນ​ແມ່ຍິງຫວຽດນາມ, ສະຫະພັນ​ຊາວ​ໜຸ່ມຫວຽດນາມ... ຄຳສັ່ງຂອງນາຍົກລັດຖະມົນຕີສະບັບເລກທີ 19/2008/CT-TTg, ລົງວັນທີ 6 ມິຖຸນາ 2008, ໄດ້ກຳນົດໜ້າທີ່ການຈັດຕັ້ງ ​ແລະ ສ້າງ​ຕັ້ງ​ສະມາຄົມ​ຊາວ​ຫວຽດນາມ​ຢູ່​ຕ່າງປະ​ເທດ ​ໃນພື້ນທີ່ທີ່ຜັນຂະຫຍາຍໄດ້, ກຳນົດທິດທາງ ​ແລະ ພັດທະນາ​ກິດຈະກຳຂອງ​ສະມາຄົມ​ຊາວ​ຫວຽດນາມຢູ່​ຕ່າງປະ​ເທດ.

ຄວາມຕ້ອງການ​ໃໝ່​ ໃນ​ແບບວິທີການ​ນຳພາ​ຂອງ​ພັກ​ກອມ​ມູນິດ​ຫວຽດນາມ
ຕໍ່ບັນດາສະມາຄົມ​ຊາວ​ຫວຽດນາມຢູ່​ຕ່າງປະ​ເທດ

ສະພາບການໂລກ ແລະ ປະຊາຄົມຊາວຫວຽດນາມຢູ່ຕ່າງປະເທດໃນປະຈຸບັນ ພວມ​ວາງ​ຄວາມຕ້ອງການໃໝ່​ ໃນແບບວິທີ​ການ​ນຳພາ​ຂອງ​ພັກ ​ຕໍ່ບັນດາ​ສະມາຄົມ.

ກ່ຽວກັບສະພາບການໂລກ, ສະຖານະການ​ໂລກ​ພວມ​ຄ່ອຍໆ​ຫັນ​ປ່ຽນໄປເປັນ​ຫຼາຍຂົ້ວ, ຫຼາຍສູນກາງ; ການເຕົ້າໂຮມກຳລັງ, ການເຊື່ອມໂຍງ, ການແກ່ງແຍ້ງກັນ ລະຫວ່າງບັນດາປະເທດ ເກີດຂຶ້ນຢ່າງສັບສົນ; ບັນດາປະເທດທີ່ມີລະບອບການເມືອງ-ສັງຄົມ ​ທີ່​ແຕກ​ຕ່າງ​ກັນ ທັງ​ຮ່ວມ​ມືແລະທັງຕໍ່ສູ້​ກັນ ເພື່ອ​ການ​ຢູ່​ຮ່ວມ​ກັນ​ໂດຍ​ສັນຕິ. ໃນສະຖານະການດັ່ງກ່າວ, ການນຳພາຂອງພັກຕໍ່ບັນດາສະມາຄົມຊາວຫວຽດນາມຢູ່ຕ່າງປະເທດ ຕ້ອງໄດ້ເນັ້ນໜັກເຂົ້າໃນເປົ້າໝາຍ ລະດົມການເຂົ້າຮ່ວມຂອງຊາວຫວຽດນາມຢູ່ຕ່າງປະເທດ ເພື່ອສ້າງແລະຮັກສາສະພາບແວດລ້ອມສັນຕິພາບ, ສະຖຽນລະພາບ, ສິ່ງອຳນວຍຄວາມສະດວກ ໃຫ້ແກ່ການພັດທະນາ ແລະ ປົກປ້ອງເອກະລາດ, ອຳນາດອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດ; ລະດົມຊັບພະຍາກອນເພື່ອປະກອບສ່ວນໂດຍກົງໃຫ້ແກ່ການພັດທະນາປະເທດ; ພ້ອມກັນນັ້ນ, ປະກອບສ່ວນຊຸກຍູ້ການພົວພັນມິດຕະພາບ ການຮ່ວມມືໃນຫຼາຍດ້ານ ແລະ ການ​ພົບ​ປະ​ແລກປ່ຽນ​ປະຊາຊົນ​ລະຫວ່າງຫວຽດນາມ​ ແລະ ປະ​ເທດ​ເຈົ້າພາບ, ຜ່ານນັ້ນ ຊ່ວຍຍົກສູງຖານະບົດບາດຂອງປະເທດຫວຽດນາມ.   

ກ່ຽວກັບສະພາບການພາຍໃນປະເທດ, ຄວາມຮັ່ງມີ, ຄວາມສາມາດບົ່ມຊ້ອນ, ຖານະບົດບາດ ແລະ ກຽດສັກສີຂອງປະເທດ ໄດ້ຮັບການປັບປຸງ ແລະ ເພີ່ມທະວີຢ່າງຕໍ່ເນື່ອງ; ການພົວພັນລະຫວ່າງຫວຽດນາມກັບບັນດາປະເທດນັບມື້ນັບເຂົ້າສູ່ລວງເລິກ. ດັ່ງນັ້ນ, ຄຽງ​ຂ້າງ​ການຂົນຂວາຍ​ສະມາຄົມຊາວຫວຽດນາມຢູ່ຕ່າງປະເທດຫັນ​ສູ່​ບ້ານ​ເກີດ​ເມືອງ​ນອນ, ພັກ​ກອມ​ມູນິດ​ຫວຽດນາມກໍ່​ກຳນົດ​ໜ້າ​ທີ່​ຮັບຜິດຊອບ ​ໃນ​ການ​ເບິ່ງ​ແຍງ ​ແລະ ໜູນ​ຊ່ວຍ​ຊາວ​ຫວຽດນາມຢູ່​ຕ່າງປະ​ເທດ​ສ້າງຄວາມໝັ້ນຄົງໃນຊີວິດ, ປົກ​ປ້ອງ​ຜົນ​ປະ​ໂຫຍ​ດທີ່ຖືກຕ້ອງຕາມກົດໝາຍຂອງ​ບັນດາ​ອົງການ ​ແລະ ບຸກຄົນຊາວຫວຽດນາມຢູ່​ຕ່າງປະ​ເທດ, ປັບປຸງຖານະ ແລະ ກຽດສັກສີໃນ​ສັງຄົມ​ເຈົ້າບ້ານ. ສິ່ງ​ດັ່ງກ່າວ​ກໍ່​ໄດ້​ກຳນົດຄວາມຕ້ອງການ​ໃໝ່​ ສຳລັບ​ບັນດາສຳນັກງານຜູ້ຕາງໜ້າຫວຽດນາມໃນ​ຕ່າງປະ​ເທດ, ຄະນະ​ພັກ, ອົງການ​ຈັດ​ຕັ້ງພັກ​ຢູ່​ຕ່າງປະ​ເທດ, ຄຽງ​ຄູ່​ກັບ​ການ​ດຳເນີນ​ການ​ທູດ​ດ້ານ​ການ​ເມືອງ, ​ເສດຖະກິດ ແລະ ວັດທະນະທຳ, ຄວນ​ເອົາ​ໃຈ​ໃສ່​ກວ່າ​ອີກ​ ເຖິງ​ການ​ຜັນ​ຂະຫຍາຍ​ວຽກ​ງານ​ຊາວ​ຫວຽດນາມ​ຢູ່​ຕ່າງປະ​ເທດ. 

ກ່ຽວ​ກັບ​ສະພາບ​ການ​ຂອງ​ປະຊາ​ຄົມ ​ແລະ ສະມາຄົມ​ຊາວ​ຫວຽດນາມ​ຢູ່​ຕ່າງປະ​ເທດ: ການ​ຂະຫຍາຍ​ແລະເປີດກວ້າງພື້ນທີ່ ​ແລະ ການກໍ່ຕົວຂອງ​ຊາວ​ຫວຽດນາມ​ຢູ່​ຕ່າງປະ​ເທດ​ລຸ້ນ​ໃໝ່ ດ້ວຍ​ຄວາມ​ຫຼາກ​ຫຼາຍ ​ແລະ ຄວາມສັບສົນ​ດ້ານ​ທັດສະນະ​ການ​ເມືອງ ຮຽກຮ້ອງ​ໃຫ້​ພັກ​ກອມ​ມູນິດ​ຫວຽດນາມ ຕ້ອງ​ເສີມ​ຂະຫຍາຍ​ບົດບາດ​ນຳພາ, ກຳນົດ​ທິດທາງ ແລະ ​ຊີ້​ນຳ​ບັນດາ​ສະມາຄົມ.

ໃນ​ຊຸມ​ປີ​ມໍ່ໆ​ມາ​ນີ້, ສະມາຄົມ​ໃໝ່​ຫຼາຍ​ແຫ່ງ​ໄດ້​ຮັບ​ການ​ສ້າງ​ຕັ້ງ ​ແລະ ມີ​ບົດບາດ​ຫຼາຍ​ກວ່າ​ເກົ່າ ​ໃນ​ການ​ສາມັກຄີ ແລະ ເຕົ້າໂຮມຊຸມຊົນ, ໃນ​ນັ້ນ ​ມີອົງການ​​ຂ້າມ​ຊາດເກີດຂຶ້ນ ​ແລະ ປະກົດຕົວ​ຫຼາຍ​ກວ່າ​ເກົ່າ. ອີກຈຸດທີ່ໜ້າສັງເກດແມ່ນ, ບັນດາສະມາຄົມ​ແບບດັ້ງເດີມ​ສືບ​ຕໍ່​ໄດ້ຮັບການປັບປຸງທາງດ້ານ​ການຈັດ​ຕັ້ງ, ​ແຕ່​ພວມ​ປະເຊີນກັບ​ຄວາມ​ຫຍຸ້ງຍາກ​ໃນ​ການ​ຮັກສາ ​ແລະ ​ເປີດ​ກວ້າງ​ການ​ເຄື່ອນ​ໄຫວ, ກໍ່ສ້າງ​ແກນຫຼັກ ​ແລະ ພັດທະນາ​ຄົນ​ລຸ້ນຕໍ່ໄປ. ຜູ້ນຳລຸ້ນຫຼັກແຫຼ່ງສ່ວນໃຫຍ່​ແມ່ນ​ຜູ້​ສູງອາຍຸ ​ແລະ ​ສຸຂະພາບ​ບໍ່​ດີ,​ໃນ​ຂະນະ​ທີ່​ຄົນ​ລຸ້ນໃໝ່​ມີ​ຄວາມ​ສົນ​ໃຈ​ໃນ​ການ​ທຳມາຫາກິນຫຼາຍກວ່າ, ບໍ່​​ຢາກເຂົ້າ​ຮ່ວມ​ວຽກ​ງານ​ສະມາຄົມ​ເວົ້າສະເພາະ ແລະ ​ວຽກ​ງານ​ຂອງ​ຊຸມ​ຊົນ​ໂດຍ​ທົ່ວ​ໄປ.

ປະຈຸບັນ, ຍັງບໍ່ມີກົນໄກສຳລັບໜູນຊ່ວຍທາງດ້ານແຫຼ່ງພະລັງໃຫ້ແກ່ສະມາຄົມຊາວຫວຽດນາມຢູ່ຕ່າງປະເທດ. ເງິນທຶນສຳລັບການເຄື່ອນໄຫວ ແລະ ການຈັດຕັ້ງກິດຈະກຳຂອງສະມາຄົມນັ້ນ ສ່ວນຫຼາຍແມ່ນມາຈາກການ​ປະກອບສ່ວນຂອງ​ຊາວ​ຫວຽດນາມຢູ່​ຕ່າງປະ​ເທດ ຫຼື ລະດົມ​ຈາກ​​ແຫຼ່ງສະໜັບສະ​ໜູນ. ເນື່ອງຈາກຊັບພະຍາກອນທີ່ມີຢູ່ຢ່າງຈໍາກັດ, ວຽກງານຂອງສະມາຄົມຈຶງຢຸດຢູ່ທີ່ການໃຫ້ກຳລັງໃຈ ຊຸກຍູ້ທາງຈິດວິນຍານເທົ່ານັ້ນ, ຍັງ​ບໍ່​ທັນ​ຕອບ​ສະໜອງ​ຄວາມ​ຕ້ອງການທາງ​ດ້ານການ​ເງິນ, ການຈັດກິດຈະກຳເພື່ອອະນຸລັກເອກະລັກທາງ​ວັດທະນະທຳ​ຂອງ​ຊາດ, ການຫັນສູ່​ບ້ານ​ເກີດ​ເມືອງ​ນອນ ຫັນມາຫາປະ​ເທດ​ຊາດຂອງພີ່ນ້ອງຮ່ວມຊາດ... ຢູ່ບາງແຫ່ງ, ສຳນັກງານຜູ້ຕາງໜ້າຫວຽດນາມໃນຕ່າງປະເທດ ບໍ່​ໄດ້​ເອົາ​ໃຈ​ໃສ່​ຢ່າງ​ພຽງພໍ​ເຖິງ​ການ​ກໍ່ສ້າງ ​ແລະ ພັດທະນາ​ກຳລັງ​ຫຼັກ​ແຫຼ່ງ​ໃນ​ຊຸມ​ຊົນ. ເລື່ອງນີ້ເປັນຜົນສະທ້ອນເຖິງການກຳນົດທິດ, ການສະໜັບສະໜູນ ແລະ ການຮ່ວມງານກັບການເຄື່ອນໄຫວຂອງສະມາຄົມ, ໂດຍສະເພາະແມ່ນ ສະມາຄົມຂອງນັກສຶກສາ ແລະ ຜູ້ອອກແຮງງານ ເຊິ່ງເປັນກຳລັງຫຼັກແຫຼ່ງໃນການຜັນຂະຫຍາຍວຽກງານຊາວຫວຽດນາມຢູ່ຕ່າງປະເທດ. ໃນຂະນະນັ້ນ, ບັນດາການຈັດຕັ້ງ, ບຸກຄົນ​ຫວຽດນາມ​ຫົວ​ຮຸນ​ແຮງຢູ່​ຕ່າງປະ​ເທດ ໄດ້​ປ່ຽນ​ໃໝ່​ຮູບແບບການ​ເຄື່ອນ​ໄຫວ​ຢ່າງ​ຕໍ່ເນື່ອງ ສັບຊ້ອນກວ່າເກົ່າ, ພະຍາຍາມ​ສວຍ​ໃຊ້​ບັນດາ​ບັນຫາ “​ຮ້ອນ​ເຄືອງ ​ແລະ ຂໍ້​ບົກພ່ອງ” ໃນປະເທດ​ເພື່ອ​ທຳລາຍ​ພັກ​ແລະລັດຫວຽດນາມ. ພວກສຸດຂົ້ວ ຫົວຮຸນແຮງມັກຕ້ານຢັນທຳລາຍ, ຂົ່ມຂູ່, ຊອກ​ຫາ​ວິທີ​ທຳລາຍ​ສະມາຄົມ ​ແລະ ບຸກຄົນທີ່ຂະຫຍັນຂັນເຄື່ອນ.

ຕໍ່ໜ້າສະພາບການທີ່ກ່າວມາຂ້າງເທິງ, ພັກແລະລັດຫວຽດນາມໄດ້ວາງຂໍ້ກຳນົດໃໝ່ຫຼາຍຂໍ້ກ່ຽວກັບວຽກງານຊາວຫວຽດນາມຢູ່ຕ່າງປະເທດເວົ້າລວມ ແລະ ວຽກງານສະມາຄົມເວົ້າສະເພາະ. ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມຊີ້ແຈ້ງວ່າ ໃນເວລາທີ່ຈະມາເຖິງ “ຕ້ອງຜັນຂະຫຍາຍວຽກງານຊາວຫວຽດນາມຢູ່ຕ່າງປະເທດຢ່າງຮອບດ້ານ ແລະ ແຂງແຮງ”. ບົນພື້ນຖານນັ້ນ, ບົດສະຫຼຸບຂອງກົມການເມືອງສູນກາງພັກສະບັບເລກທີ 12-KL/TW, ລົງວັນທີ 12 ສິງຫາ 2021, “ກ່ຽວກັບວຽກງານຊາວຫວຽດນາມຢູ່ຕ່າງປະເທດໃນສະພາບການໃໝ່” ໄດ້ກຳນົດວ່າ ບັນດາໜ້າທີ່ແລະວິທີການແກ້ໄຂໃນເວລາຕໍ່ໜ້າ ຈະຕ້ອງສະແດງຢ່າງຈະແຈ້ງເຖິງ ຄວາມ​ຮັກ​ແພງ ​ແລະ ຄວາມ​ຮັບຜິດຊອບ​ຂອງ​ພັກ ​ແລະ ລັດ ​ໃນ​ການ​ເບິ່ງ​ແຍງ​ດູ​ແລ​ປະຊາ​ຄົມ​ຊາວ​ຫວຽດນາມ​ຢູ່​ຕ່າງປະ​ເທດ. ໃນນັ້ນມີຄວາມຕ້ອງການກ່ຽວກັບການປ່ຽນແປງໃໝ່, ​ຮູບ​ແບບ​ການ​ດຳ​ເນີນ​ງານທີ່ຫຼາກຫຼາຍ, ຄວາມ​ຍືດຫຍຸ່ນ​ໃນ​ການ​ລະດົມ​ຊາວ​ຫວຽດນາມ​ຢູ່​ຕ່າງປະ​ເທດ; ສືບຕໍ່ໃຫ້ຄວາມສຳຄັນ, ເອົາໃຈໃສ່ຊ່ວຍໜູນ ແລະ ເສີມຂະຫຍາຍບົດບາດຂອງບັນດາກຳລັງຫຼັກແຫຼ່ງໃນປະຊາຄົມ.

ສືບຕໍ່ປ່ຽນແປງໃໝ່ແບບວິທີການນຳພາຂອງພັກ
ຕໍ່ບັນດາສະມາຄົມຊາວຫວຽດນາມຢູ່ຕ່າງປະເທດ

ທີໜຶ່ງ, ເພີ່ມທະວີການນຳພາຂອງພັກຜ່ານມະຕິ ແລະ ບັນດາທິດທາງ ແຜນນະໂຍບາຍ, ນະໂຍບາຍສຳຄັນ ກ່ຽວກັບວຽກງານຊາວຫວຽດນາມຢູ່ຕ່າງປະເທດ.

ພັກນຳພາລັດໃນການສືບຕໍ່ຫັນບັນດາທັດສະນະຊີ້ນຳຂອງພັກເປັນນິຕິກຳ ເປັນຂໍ້ບັງຄັບລະອຽດ ເຊິ່ງທັດສະນະຊີ້ນຳເຫຼົ່ານັ້ນມີຢູ່ໃນມະຕິສະບັບເລກທີ 36-NQ/TW, ຄຳສັ່ງສະບັບເລກທີ 45-CT/TW ແລະ ບົດສະຫຼຸບເລກທີ 12-KL/TW ຂອງກົມການເມືອງສູນກາງພັກ ກ່ຽວກັບວຽກງານຊາວຫວຽດນາມຢູ່ຕ່າງປະເທດ. ຕາມນັ້ນ, ລັດຕ້ອງສືບຕໍ່ປັບປຸງບູລະນະແລະຫັນເປັນອັນລະອຽດ ບັນດາແຜນນະໂຍບາຍ ແລະ ນະໂຍບາຍທີ່ກ່ຽວຂ້ອງກັບການສະໜັບສະໜູນ ການເຄື່ອນໄຫວຂອງສະມາຄົມຊາວຫວຽດນາມຢູ່ຕ່າງປະເທດ ໃນພື້ນທີ່ສຳຄັນຈຳນວນໜຶ່ງ, ມີຊາວຫວຽດນາມຈຳນວນຫຼວງຫຼາຍ, ໂດຍສະເພາະ​ແມ່ນ​ດ້ານ​ແຫຼ່ງກຳລັງ ແລະ ເງິນທຶນ. ສຳລັບສະມາຄົມຈຳນວນໜຶ່ງທີ່ດຳເນີນງານຢ່າງມີປະສິດທິຜົນ, ມີອິດທິພົນກັບອຳນາດການປົກຄອງທ້ອງຖິ່ນ, ມີບົດບາດສຳຄັນໃນການສົ່ງເສີມການພົວພັນລະຫວ່າງຫວຽດນາມກັບປະເທດອື່ນໆ, ຈຳເປັນຕ້ອງຄົ້ນຄວ້າແລະສະໜັບສະໜູນເງິນທຶນຕາມກົນໄກສະເພາະ ບົນຫຼັກການທີ່ສະມາຄົມດຳເນີນການດ້ວຍຄວາມສະໝັກໃຈ, ເປັນເຈົ້າຕົນເອງ, ປົກຄອງຕົນເອງ, ໃຊ້ຈ່າຍການ​ເງິນ​ດ້ວຍຕົນ​​ເອງ​, ລັດ​ໃຫ້​ທຶນ​ດຳ​ເນີນ​ງານ​ຮ່ວມ​ກັບ​ວຽກ​ງານ​ທີ່​ໄດ້​ຮັບ​ມອບ​ໝາຍ. ຄຽງ​ຂ້າງ​ການ​ໜູນ​ຊ່ວຍ​ດ້ານ​ການ​ເງິນ, ​ໃນ​ການ​ປຶກສາ​ຫາລື​ກັບ​ລັດຖະບານປະເທດເຈົ້າພາບ, ຕ້ອງ​ສືບ​ຕໍ່​ຂົນຂວາຍ​ລັດຖະບານເຈົ້າພາບ​ສ້າງ​ເງື່ອນ​ໄຂ​ ໃຫ້ບັນດາ​ສະມາຄົມ​ຊາວ​ຫວຽດນາມໃນ​ປະ​ເທດນັ້ນ​ ດຳ​ເນີນ​ງານ ປະກອບສ່ວນໃຫ້ປະເທດເຈົ້າພາບ, ອະນຸຍາດໃຫ້ຊາວຫວຽດນາມສ້າງສະມາຄົມທີ່ສອດຄ່ອງກັບກົດໝາຍຂອງປະເທດເຈົ້າພາບ, ປົກປ້ອງສິດແລະຜົນປະໂຫຍດທີ່ຖືກຕ້ອງຕາມກົດໝາຍ ຂອງສະມາຊິກສະມາຄົມ ແລະ ຂອງຊາວຫວຽດນາມຢູ່ຕ່າງປະເທດ. 

ໃນໄລຍະຍາວ, ບົນພື້ນຖານການສະຫຼຸບສັງລວມ 20 ປີແຫ່ງການຜັນຂະຫຍາຍມະຕິຂອງກົມການເມືອງສູນກາງພັກສະບັບເລກທີ 36-NQ/TW, ຄວນຄິດເຖິງການປະກາດໃຊ້ ມະຕິໃໝ່ຂອງກົມການເມືອງສູນກາງພັກ ກ່ຽວກັບການເພີ່ມທະວີການນຳພາຂອງພັກຕໍ່ວຽກງານຊາວຫວຽດນາມຢູ່ຕ່າງປະເທດໃນສະພາບການໃໝ່.

ທີສອງ, ປ່ຽນແປງໃໝ່ວຽກງານການຂົນຂວາຍ, ໂຄສະນາຊວນເຊື່ອ, ໃນນັ້ນເອົາໃຈໃສ່, ປຸກລະດົມທາງດ້ານວັດຖຸແລະຈິດໃຈ.

ກ່ອນອື່ນໝົດ, ຈຳເປັນຕ້ອງປ່ຽນແປງໃໝ່ເນື້ອໃນ, ແບບວິທີ ແລະ ຈິນຕະນາການກ່ຽວ​ກັບ​ວຽກ​ງານ​ຂໍ້​ມູນ​ຂ່າວ​ສານ ແລະ ການໂຄສະນາ​ຊວນເຊື່ອ​ ຕໍ່​ຊາວ​ຫວຽດ​ນາມ ແລະ ສະ​ມາ​ຄົມຊາວ​ຫວຽດ​ນາມ​ຢູ່​ຕ່າງ​ປະ​ເທດ. ກ່ຽວກັບຈິນຕະນາການ, ໃຫ້ຖືວ່າຊາວຫວຽດນາມຢູ່ຕ່າງປະເທດເປັນທັງເປົ້າໝາຍ ແລະ ອັດຕະພາບ ຂອງວຽກງານຂໍ້ມູນຂ່າວສານ ແລະ ການໂຄສະນາ​ຊວນເຊື່ອ. ກ່ຽວກັບເນື້ອໃນ, ສຸມໃສ່ການໂຄສະນາ ສຶກສາອົບຮົມ ເພື່ອຍົກສູງຄວາມຮູ້ກ່ຽວກັບການເມືອງ, ແນວຄິດຂອງພະນັກງານສະມາຄົມ, ສະມາຊິກສະມາຄົມ ແລະ ຊາວຫວຽດນາມຢູ່ຕ່າງປະເທດ, ເອົາໃຈໃສ່ເປັນພິເສດເຖິງການຊາບຊຶມບັນດາແຜນນະໂຍບາຍ, ທັດສະນະ, ແນວທາງຂອງພັກ ກ່ຽວກັບວຽກງານສາມັກຄີທົ່ວ​ປວງ​ຊົນ​ທັງ​ຊາດ ​ເພື່ອ​ຍົກ​ສູງ​ຄວາມ​ຮັບ​ຮູ້ ​ແລະ ຄວາມ​ຮັບຜິດຊອບ​ຂອງ​ປະຊາ​ຄົມ ​ແລະ ສະມາຄົມ. ສິ່ງສຳຄັນທີ່ສຸດແມ່ນ ຕ້ອງເຜີຍແຜ່ກ່ຽວກັບ​ສະຖານະການ​ຂອງ​ປະ​ເທດ, ທິດ​ທາງ ແລະ ນະ​ໂຍບາຍ​ຂອງ​ພັກ​ແລະລັດໂດຍທັນທີ ໃນລັກສະນະທີ່​ເໝາະ​ສົມ​ ຕໍ່​ປະຊາ​ຄົມ​ຊາວ​ຫວຽດນາມ​ຢູ່​ຕ່າງປະ​ເທດ; ເພີ່ມທະວີການໂຄສະນາ, ອົບຮົມສຶກສາກ່ຽວກັບປະຫວັດສາດ, ວັດທະນາະທຳ ແລະ ມູນເຊື້ອຂອງຊາດ ໃຫ້ຊາວຫວຽດນາມຢູ່ຕ່າງປະເທດ ເພື່ອຫຼໍ່ລ້ຽງແລະເສີມຂະຫຍາຍນ້ຳໃຈຮັກບ້ານເກີດເມືອງນອນ ​ແລະ ຄວາມ​ພາກພູມ​ໃຈ​ໃນ​ຊາດ​ ຂອງ​ຊາວ​ຫວຽດນາມ​ຢູ່​ຕ່າງປະ​ເທດ​ແຕ່ລະຄົນ. ກ່ຽວກັບແບບວິທີ, ເສີມຂະຫຍາຍປະສິດທິຜົນ ຂອງສື່​ເອ​ເລັກ​ໂຕຣ​ນິກກະແສຫຼັກ​ໃນ​ປະ​ເທດ ແລະ ສື່​ມວນ​ຊົນ​ທີ່​ຫຼາກ​ຫຼາຍ​ຂອງ​ປະຊາ​ຄົມ​ຊາວ​ຫວຽດນາມ​ຢູ່​ຕ່າງປະ​ເທດ; ເພີ່ມທະວີການສື່ຂ່າວແລະການໂຄສະນາຊວນເຊື່ອໃນເວທີດິຈິຕອນ ແລະ ສື່ມວນຊົນສັງຄົມ ເພື່ອໃຫ້ອົງການແລະບຸກຄົນຕ່າງໆສາມາດເຂົ້າເຖິງແຫຼ່ງຂ່າວທີ່ເປັນທາງການແລະເປັນກາງໄດ້ທຸກເວລາ, ທຸກບ່ອນ. ປັບປຸງແລະພັດທະນາປະສິດທິພາບຂອງກົນໄກການປະສານງານ, ຕອບສະໜອງຢ່າງໄວແລະທັນການ, ຕໍ່ສູ້ປະຕິ​ເສດ​​ບັນດາ​ຂໍ້​ກ່າວ​ຫາ​ທີ່​ບໍ່​ຖືກຕ້ອງ, ບິດ​ເບືອນ​ສະພາບ​ການ​ຂອງ​ປະ​ເທດ​ຢ່າງ​ມີ​ປະສິດທິ​ຜົນ.

ນອກຈາກນັ້ນ, ຈຳເປັນຕ້ອງປ່ຽນແປງໃໝ່ ແລະ ເປີດຄວາມຫຼາກຫຼາຍຂອງບັນດາຮູບການໂຄສະນາຊວນເຊື່ອ, ຂົນຂວາຍຊາວຫວຽດນາມຢູ່ຕ່າງປະເທດເວົ້າລວມ ແລະ ບັນດາສະມາຕົມເວົ້າສະເພາະ. ນີ້ແມ່ນໜ້າທີ່ຈຸດສຸມ ທີ່ຮີບດ່ວນ ແລະ ຍາວນານ. ຜ່ານແຜນນະໂຍບາຍເບິ່ງແຍງດູແລຂອງພັກແລະລັດ, ຕ້ອງເພີ່ມທະວີບັນດາມາດຕະການ​ຊັກ​ຊວນ​ບັນດາ​ອົງການ ​ແລະ ບຸກຄົນ​ຊາວ​ຫວຽດນາມຢູ່​ຕ່າງປະ​ເທດ​ ທັງ​ທາງ​ດ້ານວັດຖຸ ແລະ ຈິດ​ໃຈ. ເພີ່ມທະວິບົດບາດຂອງການຮ່ວມງານ, ແນະນຳທິດທາງການເຄື່ອນໄຫວຂອງສະມາຄົມ, ບໍ່​ແຊກ​ແຊງ​ຫຼາຍ​ເກີນ​ໄປ, ບໍ່ຄອບງຳ, ບັງຄັບ ແລະ ບໍ່​ບໍລິຫານກິດຈະກຳ​ຂອງ​ສະມາຄົມ. ເອົາໃຈ​ໃສ່ການ​ປຶກສາ​ຫາລື​ໂດຍ​ກົງ, ຕິດ​ຕໍ່​ພົວພັນ​ກັບ​ບັນດາ​ຝ່າຍ​ ເພື່ອ​ແກ້​ໄຂ​ຄວາມ​ຂັດ​ແຍ່ງ​ທີ່​ມີ​ຢູ່​ພາຍ​ໃນ​ບາງ​ສະມາຄົມ. ຍ້ອນ​​ລັກສະນະ​ຂອງ​ຊຸມ​ຊົນ​ໃນ​ແຕ່ລະ​ທ້ອງ​ທີ່ທີ່​ແຕກ​ຕ່າງ​ກັນ, ​ໃນ​ວຽກງານການ​ຂົນຂວາຍ, ການ​ນຳ​ຂອງ​ພັກ​ຕໍ່​ສະຫະພັນ​ຕ້ອງ​ມີ​ວິທີ​ທີ່​ເໝາະ​ສົມ​ກັບ​ສະຖານະການ​ຕົວ​ຈິງໃນ​ແຕ່ລະ​ທ້ອງ​ທີ່, ​ເພີ່ມ​ທະວີການແນະນຳທິດທາງ, ການ​ໄປຮ່ວມກັນ, ​ບໍ່ບັງຄັບໃຊ້ຮູບແບບລວມກັນ. ນອກຈາກນັ້ນ, ຕ້ອງສົ່ງເສີມ, ສ້າງເງື່ອນໄຂ, ເສີມຂະຫຍາຍສິດເປັນເຈົ້າຕົນເອງ, ຄຸ້ມຄອງຕົນເອງ, ເປັນເຈົ້າການ, ການປະດິດສ້າງຂອງສະມາຄົມ.  

ກ່ຽວກັບເປົ້າໝາຍ, ບັນດາມາດຕະການຂົນຂວາຍ ໂຄສະນາຊວນເຊື່ອຄວນ​ສຸມ​ໃສ່​ບັນດາ​ກຳລັງ​ຫຼັກ​ແຫຼ່ງ, ຄົນ​ໜຸ່ມ​ຊາວຫວຽດນາມຢູ່​ຕ່າງປະ​ເທດ, ຜູ້​ມີ​ຊື່​ສຽງ ​ແລະ ມີ​ອິດ​ທິພົນ​ ​ແລະ ຊາວ​ຫວຽດນາມ​ຢູ່​ຕ່າງປະ​ເທດ​ຍັງ​ມີ​ອະຄະຕິ. ໃນນັ້ນ, ສືບຕໍ່ຜັນຂະຫຍາຍປະຕິບັດນະໂຍບາຍການໃຫ້ລາງວັນ ແລະ ໃຫ້ກຳລັງໃຈ ແກ່ສະມາຄົມ, ຜູ້ນຳສະມາຄົມ ແລະ ພະນັກງານຫຼັດແຫຼ່ງ ທີ່ມີຜົນງານຫຼາຍຢ່າງ ໃນການສ້າງຊຸມຊົນ ແລະ ປະກອບສ່ວນໃຫ້ແກ່ປະເທດ; ເອົາໃຈໃສ່​ການ​ຈັດ​ຕັ້ງ​ກິດ​ຈະ​ກໍາ​ທີ່​ມີ​ຄວາມໝາຍ​, ມຸ່ງ​ໄປ​ສູ່​ຮາກ​ເຫງົ້າ ​ໃຫ້​ຊາວ​ໜຸ່ມຫວຽດນາມຢູ່​ຕ່າງປະ​ເທດ ເພື່ອບຳລຸງ​ສ້າງ​ຄວາມ​ເອກອ້າງ​ທະນົງ​ໃຈ​ຂອງ​ຊາດ, ຄວາມຮູ້ສຶກຜູກພັນ ​ແລະ ຄວາມ​ຮັກ​​ຕໍ່​ປະ​ເທດ​ຊາດ; ຂົນຂວາຍແລະເສີມຂະຫຍາຍບົດບາດຂອງບັນດາ​ອົງການ ​ແລະ ບຸກຄົນ​ຊາວຫວຽດນາມຢູ່​ຕ່າງປະ​ເທດ ​ທີ່​ມີ​ຊື່​ສຽງ​ແລະມີ​ອິດ​ທິພົນ ​ໃນ​ການ​ເຕົ້າ​ໂຮມ ​ແລະ ສາມັກຄີຊຸມຊົນ.  ສຳລັບບັນດາອົງການ ແລະ ບຸກຄົນຊາວຫວຽດນາມຢູ່ຕ່າງປະເທດທີ່ຍັງມີອະຄະຕິ, ຕ້ອງ​ມີ​ມາດ​ຕະ​ການ​ທີ່​ຮອບ​ດ້ານ​ແລະ​ຕັ້ງໜ້າ​ກວ່າ ເພື່ອຂະຫຍາຍ​ເຂດ​ການ​ຕິດ​ຕໍ່​ພົວພັນ, ສືບ​ຕໍ່ຂົນຂວາຍ ​ໂຄສະນາຊວນເຊື່ອ ​​ບົນ​ພື້ນຖານ​ເພີ່ມຄວາມ​ຄ້າຍຄື​ກັນຫຼາຍຂຶ້ນ, ຍອມຮັບໃນ​ຄວາມ​ແຕກ​ຕ່າງ​ທີ່​ບໍ່​ຂັດ​ກັບ​ຜົນ​ປະ​ໂຫຍ​ດລວມຂອງຊາດ, ສະ​ແດງ​ໃຫ້​ເຫັນ​ຢ່າງ​ຄົບ​ຖ້ວນເຖິງມູນເຊື້ອມະຫາ​ສາ​ມັກ​ຄີປວງຊົນທັງ​ຊາດ​, ນັ້ນ​ແມ່ນ: ຊາວ​ຫວຽດນາມ​ທຸກ​ຄົນ​ ບໍ່​ວ່າ​ຊົນ​ເຜົ່າ, ສາສະໜາ, ​ແຫຼ່ງກຳ​ເນີ​ດ, ສະຖານະທາງສັງຄົມ, ​ເຫດຜົນ​ໃນການໄປ​ຕ່າງປະ​ເທດ, ທີ່ປາດ​ຖະໜາ​ປະກອບສ່ວນ​ເຂົ້າໃນການປະຕິບັດ​ຈຸດໝາຍ ປະຊາຊົນ​ຮັ່ງມີ, ປະ​ເທດ​ຊາດ​ເຂັ້ມ​ແຂງ, ມີປະຊາທິປະ​ໄຕ ຍຸຕິ​ທຳ ແລະ ອາລະຍະທຳ, ທັງໝົດ​ເຕົ້າ​ໂຮມກັນ​ເປັນກຸ່ມກ້ອນມະຫາສາມັກຄີປວງຊົນທັງຊາດ.

ທີສາມ, ເພີ່ມທະວີການນຳພາຂອງພັກຕໍ່ບັນດາສະມາຄົມ ໂດຍວຽກ​ງານ​ການຈັດ​ຕັ້ງ ​ແລະ ພະນັກງານ.

ກ່ຽວກັບວຽກງານການຈັດຕັ້ງ ແລະ ພະນັກງານ, ຕ້ອງ​ຍົກສູງ​ບົດ​ບາດ​ພິ​ເສດສະເພາະ, ການ​ຄຸ້ມ​ຄອງ​ລັດ​ເປັນ​ເອກະ​ພາບ​ກ່ຽວ​ກັບ​ວຽກ​ງານ​ຊາວຫວຽດນາມ​ຢູ່​ຕ່າງປະ​ເທດ. ສືບຕໍ່ປັບປຸງການ​ຈັດ​ຕັ້ງອົງການທີ່ເຮັດ​ວຽກ​ງານ​ຊາວ​ຫວຽດ​ນາມ​ຢູ່​ຕ່າງ​ປະ​ເທດ ​ຂອງ​ຄະ​ນະ​ກຳ​ມະ​ການແຫ່ງ​ລັດ​ກ່ຽວ​ກັບ​ຊາວ​ຫວຽດ​ນາມ​ຢູ່​ຕ່າງ​ປະ​ເທດ ​ເພື່ອ​ໃຫ້​ມີ​ອົງການ​ວິຊາ​ສະ​ເພາະ​ທີ່ສົມກັບໜ້າທີ່, ​ສະ​ແດງ​ຄວາມ​ຮູ້ສຶກ ​ແລະ ຄວາມ​ຮັບຜິດຊອບ​ຂອງ​ພັກ ​ແລະ ລັດ​ທີ່​ມີ​ຕໍ່​ຊາວ​ຫວຽດນາມ​ຢູ່​ຕ່າງປະ​ເທດ, ພ້ອມ​ກັນ​ນັ້ນ​ກໍ​ຕອບສະໜອງ​ຄວາມ​ຄາດຫວັງ​ຂອງ​ຊາວ​ຫວຽດນາມ​ຢູ່​ຕ່າງປະ​ເທດ. ເພີ່ມທະວີກຳລັງ ແລະ ຍົກສູງຂີດຄວາມສາມາດຂອງຖັນແຖວພະນັກງານທີ່ເຮັດວຽກງານຊຸມຊົນ; ໃນນັ້ນ, ເອົາໃຈໃສ່​ບັນດາ​ໜ່ວຍງານທີ່​ເຮັດ​ວຽກໂດຍກົງໃນ​ປະ​ເທດ​ເຈົ້າພາບ ໃນລັກສະນະທີ່​ໃກ້ຊິດ, ​ແທດ​ຈິງ, ມີ​ປະສິດທິ​ຜົນ ​ແລະ ທັນ​ການ ​ເພື່ອ​ຕອບ​ສະໜອງ​ຄວາມ​​ປາດ​ຖະໜາ​ອັນ​ຊອບ​ທຳ​ຂອງ​ປະຊາ​ຄົມ​ຊາວ​ຫວຽດນາມຢູ່​ປະ​ເທດ​ເຈົ້າພາບ. ພຶດຕິກຳຕົວຈິງ​ໃຫ້​ເຫັນ​ວ່າ, ຢູ່ພື້ນທີ່ທີ່ສຳນັກງານ​ຜູ້ຕາງໜ້າ​ຫວຽດນາມ​ມີ​ພະນັກງານ​ຊຸມ​ຊົນປະຈຳ ຫຼື ມີການຈັດ​ຕັ້ງ​ຄະນະ​ເຮັດ​ວຽກ​ຊຸມ​ຊົນ ເຊິ່ງ​ວຽກງານຊາວຫວຽດນາມ​ຢູ່​ນັ້ນ​ຈະໄດ້​ຮັບ​ການຜັນຂະຫຍາຍ​ຢ່າງ​ຕັ້ງໜ້າ, ເປັນເຈົ້າການ ​ແລະ ມີ​ຫົວຄິດ​ປະດິດ​ສ້າງ. ດັ່ງນັ້ນ, ຮູບ​ແບບ​ຄະນະ​ເຮັດ​ວຽກ​ຊຸມ​ຊົນໃນສຳນັກງານ​ຜູ້ຕາງໜ້າ​ຄວນ​ໄດ້​ຮັບ​ການຈັດຕັ້ງໃນ​ບັນດາພື້ນທີ່​ອື່ນ, ໂດຍສະເພາະໃນພື້ນທີ່ທີ່ມີ​ຊາວ​ຫວຽດນາມອາ​ໄສ​ຢູ່​​ເປັນ​ຈຳນວນ​ຫຼວງ​ຫຼາຍ.

ຄຽງຄູ່ກັນນັ້ນ, ຄວນສຸມໃສ່ເບິ່ງແຍງດູແລ, ປັບປຸງ, ສ້າງສະມາຄົມດັ້ງເດີມທີ່ເຂັ້ມແຂງ, ສົ່ງເສີມການລວມຕົວແບບໃໝ່, ຍົກສູງຄຸນນະພາບການເຄື່ອນໄຫວຂອງສະມາຄົມຕາມທິດທາງແທດຈິງ, ມີປະສິດທິຜົນ, ປະຊາທິປະໄຕ, ເປີດເຜີຍ, ໂປ່ງໃສ. ປັບປຸງຄະ​ນະ​​ບໍ​ລິ​ຫານ​ງານສະມາຄົມ, ເອົາໃຈ​ໃສ່ຂົນຂວາຍ​ຊາວ​ຫວຽດນາມ​ຢູ່​ຕ່າງປະ​ເທດ​ທີ່​ເປັນ​ສະມາຊິກ​ພັກ, ​ຜູ້ເປັນຫຼັກແຫຼ່ງ ມີ​ຊື່​ສຽງ ​ແລະ ມີ​ອິດ​ທິພົນ​ ໃຫ້​ເຂົ້າ​ຮ່ວມ​ຄະນະ​ບໍລິຫານ​ງານ​ ແລະ ຕັ້ງໜ້າ​ປະກອບສ່ວນ​ເຂົ້າ​ໃນ​ວຽກ​ງານ​ຂອງ​ສະມາຄົມ, ຜ່ານ​ນັ້ນ ຈຶງເຂົ້າໃຈເຖິງພັດທະນາການທາງອຸດົມ​ການ ​ຂອງ​ສະມາຊິກຢ່າງທັນທ່ວງທີ, ເພື່ອຮັບ​ໃຊ້​ໃຫ້ແກ່ການອະນຸມັດ ຄະນະບໍລິຫານງານສະມາຄົມທີ່​ໃກ້ຊິດ​ກັບ​ສະພາບ​ຕົວ​ຈິງ, ພ້ອມ​ທັງ​ຮັບປະກັນ​ທິດ​ທາງ​ການ​ເຄື່ອນ​ໄຫວ​ຂອງ​ສະມາຄົມ​ຊາວ​ຫວຽດນາມ​ຢູ່​ຕ່າງປະ​ເທດ.

ນອກຈາກນັ້ນ, ຕ້ອງໃຫ້ຄວາມສຳຄັນ, ເບິ່ງແຍງ ແລະ ບຳລຸງສ້າງພະນັກງານໜຸ່ມ;ຕິດຕາມຄຽງ​ຂ້າງ ​ແລະ ຊີ້​ນຳ​ການ​ເຄື່ອນ​ໄຫວ​ຂອງ​ສະມາຄົມ​ນັກ​ນັກຮຽນ ແລະ ສະມາຄົມ​ນັກ​ສຶກສາ, ​ເພາະວ່າ​ນີ້​ແມ່ນ​ກຳລັງ​ຫຼັກ​ແຫຼ່ງ​ໃນ​ການ​ດຶງ​ດູດ ​ແລະ ​ເຊື່ອມ​ໂຍງ​​ຊາວ​ຫວຽດນາມທີ່ອາ​ໄສ​ຢູ່​ຕ່າງປະ​ເທດ. ຈັດຕັ້ງການຝຶກອົບຮົມ ບຳລຸງສ້າງ ແລະ ການຂົນຂວາຍ ເພື່ອດຶງດູດລຸ້ນ​ໜຸ່ມຂອງ​ຊາວ​ຫວຽດ​ນາມ​ຢູ່​ຕ່າງ​ປະ​ເທດ​ ໃຫ້ເຂົ້າ​ຮ່ວມ​ສະ​ມາ​ຄົມ ແລະ ສ້າງທີມຜູ້ນໍາຂອງສະມາຄົມຕໍ່ໄປ.​ ​ສ້າງ​ມາດຕະຖານໃຫ້ກັບ​ພະນັກງານ​ສະມາຄົມເທື່ອລະກ້າວ, ​ໃຫ້ຄວາມສຳຄັນກັບການ​ຝຶກ​ອົບຮົມ ບຳລຸງສ້າງ ​ແລະ ຍົກສູງ​ລະດັບຄວາມຮູ້ ​ແລະ ທັກ​ສະ​ໃນການຂົນຂວາຍ​ມະຫາຊົນ; ສົ່ງເສີມບົດບາດຂອງຄວາມກະຕືລືລົ້ນ ແລະ ຄວາມເປັນແບບຢ່າງຂອງພະນັກງານສະມາຄົມ.

ທີສີ່, ປ່ຽນແປງໃໝ່ ແລະ ເພີ່ມທະວີການກວດກາ, ຕິດຕາມກວດກາຕໍ່ວຽກງານຊາວຫວຽດນາມຢູ່ຕ່າງປະເທດເວົ້າລວມ, ວຽກງານສະມາຄົມເວົ້າສະເພາະ.

ມະຕິ, ຄຳສັ່ງ, ຂໍ້ສະຫຼຸບຂອງພັກແມ່ນຫຼັກຖານເພື່ອຕີລາຄາ, ກວດກາ, ຕິດຕາມກວດກາການປະຕິບັດຂອງອົງການຈັດຕັ້ງພັກ ແລະ ສະມາຊິກພັກ ໃນບັນດາອົງການຈັດຕັ້ງຂອງລະບົບການເມືອງ. ດັ່ງນັ້ນ, ຕ້ອງກວດກາ, ຕິດຕາມກວດກາຢ່າງເປັນປະຈຳ ຕໍ່ການປະຕິບັດແຜນນະໂຍບາຍ, ແນວທາງຂອງພັກກ່ຽວກັບວຽກງານຊາວຫວຽດນາມຢູ່ຕ່າງປະເທດ, ໃນນັ້ນມີມະຕິສະບັບເລກທີ 36-NQ/TW, ຄຳສັ່ງສະບັບເລກທີ 45-CT/TW ແລະ ບົດສະຫຼຸບສະບັບເລກທີ 12-KL/TW ຂອງກົມການເມືອງສູນກາງພັກ. ວຽກງານກວດກາ, ຕິດຕາມກວດກາຕ້ອງໄດ້ດຳເນີນຢ່າງຄົບຊຸດ, ໜັກແໜ້ນ, ເຂັ້ມງວດ ແລະ ເສີມຂະຫຍາຍໄດ້ເປັນຢ່າງດີ ບົດບາດຕິດຕາມກວດກາຂອງຖັນແຖວພະນັກງານ, ສະມາຊິກພັກ, ມະຫາຊົນ ແລະ ປະຊາຄົມຊາວຫວຽດນາມຢູ່ຕ່າງປະເທດ. ຍົກສູງປະສິດທິພາບ ແລະ ປະສິດທິຜົນ ຂອງວຽກງານການຄຸ້ມຄອງສະມາຊິກພັກຢູ່ຕ່າງປະເທດ. ຈັດການແກ້ໄຂກໍລະນີທີ່ສະມາຊິກພັກຢູ່ຕ່າງປະເທດລະເມີດກົດລະບຽບຂອງພັກທັນທີ. ດັງນັ້ນ, ການ​ປ່ຽນ​ໃໝ່​ແບບວິທີ​ການ​ນຳພາ​ຂອງ​ພັກ​ຕໍ່​ສະມາຄົມ​ຊາວ​ຫວຽດນາມທີ່ອາ​ໄສ​ຢູ່​ຕ່າງປະ​ເທດ ​ແມ່ນ​ຄວາມ​ຮຽກຮ້ອງ​ຕ້ອງການ​ອັນ​ຮີບ​ດ່ວນ ​ໃນ​ສະພາບ​ການ​ປະຈຸ​ບັນ ​ເພື່ອ​ໃຫ້​ພັກ​ຂອງ​ພວກ​ເຮົາ​ເພີ່ມ​ທະວີ​ການ​ນຳພາ, ​ເອົາ​ໃຈ​ໃສ່, ໜູນ​ຊ່ວຍ ​ແລະ ຊີ້​ນຳ​ ເພື່ອສ້າງ​ສະມາຄົມ​ໃຫ້​ເຂັ້ມ​ແຂງ ແລະ ມີຊີວິຊີວາ, ​ເສີມ​ຂະຫຍາຍປະສິດທິຜົນຂອງ​ບົດບາດ​ຄວາມ​ສາມັກຄີ​ ​ແລະ ​ເຕົ້າ​ໂຮມ​ພີ່ນ້ອງ​ຮ່ວມ​ຊາດ​ເປັນ​ຈຳນວນ​ຫຼວງ​ຫຼາຍ, ​ສົມຄວນທີ່ເປັນ “ບ່ອນອີງ” ໃນ​ວຽກງານການ​ຂົນຂວາຍຊາວ​ຫວຽດນາມທີ່ອາ​ໄສ​ຢູ່​ຕ່າງປະ​ເທດ ໃຫ້ຫັນມາ​​ສູ່​ບ້ານ​ເກີດ​ເມືອງ​ນອນ, ປະກອບສ່ວນ​ປັບປຸງກຸ່ມກ້ອນມະຫາສາມັກຄີ​​ປວງ​ຊົນ​ທັງ​ຊາດໃຫ້ແໜ້ນແຟ້ນ, ຮ່ວມມືຮ່ວມແຮງກັນກໍ່ສ້າງປະເທດຫວຽດນາມໃຫ້ເຂັ້ມແຂງ ແລະ ຈະເລີນຮຸ່ງເຮືອງ./.

-------------------

(1) ປະຈຸ​ບັນ, ມີ​ຄະນະ​ກຳມະການ​​ຊາວ​ໜຸ່ມ​ 4 ຄະນະ​ໃນ​ລັດ​ເຊຍ, ກູ​ບາ, ລາວ ​ແລະ ຈີນ, ຂຶ້ນກັບ​ສູນ​ກາງ​ຄະນະ​ຊາວ​ໜຸ່ມກອມມູນິດໂຮ່ຈີມິນ; ສະມາຄົມ​ນັກ​ສຶກສາ ຫວຽດນາມ 11 ແຫ່ງຢູ່ ອັງກິດ, ຝະລັ່ງ, ເຢຍລະມັນ, ແບນຊິກ, ໂຮນລັງ, ຮຸງ​ກາຣີ, ສ.​ເກົາຫຼີ, ​ໄທ, ສິງກະ​ໂປ, ໂອຕຮິກ, ອົດ​ສະ​ຕາ​ລີ, ຂຶ້ນກັບ​ສະມາຄົມນັກສຶກສາຫວຽດນາມສູນກາງ; ສະ​ມາ​ຄົມ​ຊາວ​ໜຸ່ມ-ນັກ​ສຶກ​ສາ 4 ແຫ່ງຢູ່ ຍີ່​ປຸ່ນ, ອາ​ເມ​ລິ​ກາ, ສາ​ທາ​ລະ​ນະ​ລັດເຊັກ​ ແລະ ຣູມານີ ແມ່ນ​ສະ​ມາ​ຊິກ​ຂອງ​ສະຫະພາບ​ຊາວ​ໜຸ່ມ​ຫວຽດ​ນາມ.

- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 999 (ເດືອນຕຸລາ 2022)