ເສີມຂະຫຍາຍບົດບາດສຳຄັນຂອງການຮ່ວມມືແລະເຊື່ອມໂຍງສາກົນດ້ານການປ້ອງກັນປະເທດ,
ປະກອບສ່ວນເຂົ້າໃນການສ້າງແລະຮັກສາສະພາບແວດລ້ອມທີ່ສັນຕິພາບ
ແລະເອື້ອອຳນວຍໃຫ້ແກ່ພາລະກິດການສ້າງສາແລະພັດທະນາປະເທດ.

ໃນໄລຍະ 95 ປີຜ່ານມາ ພາຍໃຕ້ການນຳພາຂອງພັກກອມມູນິດຫວຽດນາມ, ປະຊາຊົນຫວຽດນາມໄດ້ບັນລຸຜົນງານທາງປະຫວັດສາດຫຼາຍຢ່າງໃນການຕໍ່ສູ້ເພື່ອເອກະລາດແຫ່ງຊາດ, ການສ້າງສາ ແລະ ປົກປັກຮັກສາປະເທດຊາດ (ໄລຍະ 1930-1975), ກ້າວເຂົ້າສູ່ໄລຍະແຫ່ງສັນຕິພາບ ເອກະພາບ ແລະ ການປ່ຽນແປງໃໝ່ (ໄລຍະ 1975-2025). ປະຈຸບັນ, ປະເທດໄດ້ບັນລຸເງື່ອນໄຂທຸກປະການໃນການເຂົ້າສູ່ຍຸກໃໝ່, ຍຸກແຫ່ງການບືນຕົວຂຶ້ນຂອງຊາດ, ຍຸກແຫ່ງການພັດທະນາທີ່ກ້າວກະໂດດ ເລັ່ງສ້າງຫວຽດນາມໃຫ້ເປັນປະເທດສັງຄົມນິຍົມທີ່ເຂັ້ມແຂງ, ປະຊາທິປະໄຕ, ຍຸຕິທຳ, ອາລະຍະທຳ, ຈະເລີນຮຸ່ງເຮືອງ ແລະ ມີຄວາມສຸກຢ່າງສຳເລັດຜົນ.

ໃນໄລຍະຜ່ານມາ, ກົມການເມືອງສູນກາງ, ຄະນະບໍລິຫານງານສູນກາງ, ຄະນະເລຂາທິການສູນກາງ, ຄະນະພັກການທະຫານສູນກາງ ແລະ ກະຊວງປ້ອງກັນປະເທດ ໄດ້ສຸມໃສ່ການນຳພາ, ຊີ້ນຳ ແລະ ອອກເອກະສານຫຼາຍສະບັບ, ກຳນົດທິດທາງ ແລະ ແຜນນະໂຍບາຍທີ່ສຳຄັນກ່ຽວກັບການຮ່ວມມື ແລະເຊື່ອມໂຍງສາກົນດ້ານການປ້ອງກັນປະເທດ⁽¹⁾.   

ການຮ່ວມມືດ້ານການປ້ອງກັນປະເທດສອງຝ່າຍໄດ້ຮັບການຜັນຂະຫຍາຍຢ່າງຄົບຊຸດ, ນັບມື້ນັບເຂົ້າສູ່ລວງເລິກ ແລະມີເນື້ອຫາສາລະຫຼາຍຂຶ້ນ, ເສີມສ້າງຄວາມໄວ້ເນື້ອເຊື່ອໃຈທາງການເມືອງ, ຮັກສາສາຍພົວພັນມິດຕະພາບກັບບັນດາປະເທດ, ແກ້ໄຂບັນຫາຊາຍແດນ ແລະ ອານາເຂດຢ່າງມີປະສິດທິພາບ; ປົກປ້ອງແລະຮັກສາຄວາມໝັ້ນຄົງ ແລະ ຄວາມປອດໄພຢູ່ຊາຍແດນຂອງປະເທດ. ມາຮອດປະຈຸບັນ, ຫວຽດນາມໄດ້ຂະຫຍາຍ ແລະສ້າງສາຍພົວພັນຮ່ວມມືດ້ານການປ້ອງກັນປະເທດກັບຫຼາຍກວ່າ 100 ປະເທດ,  ລວມທັງ 5 ສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ແລະ ບັນດາປະເທດມະຫາອຳນາດທັງໝົດໃນໂລກ. ເອກະສານສຳຄັນຫຼາຍສະບັບກ່ຽວກັບການຮ່ວມມືດ້ານການປ້ອງກັນປະເທດໄດ້ຮັບການລົງນາມ ແລະ ຈັດຕັ້ງປະຕິບັດຢ່າງມີປະສິດທິພາບ, ເຊັ່ນ: ຖະແຫຼງການວິໄສທັດຮ່ວມວ່າດ້ວຍການຮ່ວມມືດ້ານການປ້ອງກັນປະເທດ, ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການປ້ອງກັນປະເທດສອງຝ່າຍ, ພິທີການ, ໂຄງການ ແລະ ແຜນການການຮ່ວມມືໄລຍະຍາວ 3 ປີ, 5 ປີ, ແລະອື່ນໆ. ເອກະສານຂ້າງເທິງໄດ້ເສີມສ້າງການພົວພັນດ້ານການປ້ອງກັນປະເທດໃຫ້ແໜ້ນແຟ້ນຍິ່ງຂຶ້ນ, ເສີມສ້າງຄວາມໄວ້ເນື້ອເຊື່ອໃຈທາງການເມືອງ ແລະ ເພີ່ມປະສິດທິພາບການຮ່ວມມືກັບທຸກໆຄູ່ຮ່ວມງານໃນທຸກຂົງເຂດ. ກິດຈະກຳແລກປ່ຽນມິດຕະພາບດ້ານການປ້ອງກັນຊາຍແດນກັບຈີນ, ລາວ ແລະ ກຳປູເຈຍ⁽²⁾; ການແລກປ່ຽນມິດຕະພາບດ້ານການປ້ອງກັນຊາຍແດນຫວຽດນາມ - ລາວ - ກຳປູເຈຍ; ການປະຊຸມປະຈຳປີລະຫວ່າງລັດຖະມົນຕີກະຊວງປ້ອງກັນປະເທດຂອງຫວຽດນາມ - ລາວ - ກຳປູເຈຍ ແລະ ການຝຶກຊ້ອມທາງທະຫານຮ່ວມກັນຂອງຫວຽດນາມ - ລາວ - ກຳປູເຈຍ ໃນເລື່ອງການຄົ້ນຫາແລະກູ້ໄພ, ການແພດທະຫານ ແລະອື່ນໆ, ປະກອບສ່ວນເສີມສ້າງສາຍພົວພັນດ້ານການປ້ອງກັນປະເທດໃຫ້ເຂັ້ມແຂງຂຶ້ນໃນທິດທາງແຫ່ງຄວາມສາມັກຄີ, ມິດຕະພາບ ແລະ ຄວາມໄວ້ເນື້ອເຊື່ອໃຈກັບປະເທດເພື່ອນບ້ານ ແລະ ຮັບປະກັນຄວາມໝັ້ນຄົງໂດຍກົງຂອງປະເທດ. 

ພ້ອມກັນນັ້ນ, ກິດຈະກຳຮ່ວມມື ແລະເຊື່ອມໂຍງສາກົນດ້ານການປ້ອງກັນປະເທດມີບົດບາດສຳຄັນໃນການສ້າງ ແລະປັບປຸງຄວາມໄວ້ເນື້ອເຊື່ອໃຈດ້ານຍຸດທະສາດກັບບັນດາປະເທດ ແລະອົງການສາກົນ, ພ້ອມທັງໃຊ້ປະໂຫຍດຈາກການສະໜັບສະໜູນຂອງປະຊາຄົມໂລກ ເພື່ອຜົນປະໂຫຍດຫຼັກຂອງປະເທດ. ກະຊວງປ້ອງກັນປະເທດຫວຽດນາມໄດ້ເປັນເຈົ້າການໃນການເຂົ້າຮ່ວມເວທີປາໄສຫຼາຍຝ່າຍໃນພາກພື້ນ ແລະສາກົນ (ກອງປະຊຸມລັດຖະມົນຕີກະຊວງປ້ອງກັນປະເທດອາຊຽນ (ADMM), ກອງປະຊຸມລັດຖະມົນຕີກະຊວງປ້ອງກັນປະເທດອາຊຽນເປີດກວ້າງ (ADMM+), ກອງປະຊຸມສົນທະນາ ຊັງກຣີລາ, ກອງປະຊຸມຄວາມໝັ້ນຄົງສາກົນ ມົດສະກູ, ເວທີປາໄສ ຊຽງຊານ ປັກກິ່ງ ແລະອື່ນໆ); ປະສົບຄວາມສຳເລັດໃນການເປັນປະທານກິດຈະກຳຮ່ວມມືຕົວຈິງຫຼາຍຢ່າງ, ສົ່ງກຳລັງພົນເຂົ້າຮ່ວມກິດຈະກຳຮ່ວມມືພາຍໃນຂອບອາຊຽນຢ່າງຕັ້ງໜ້າ; ລະດົມການຮ່ວມມືຢ່າງຕັ້ງໜ້າ ແລະຍືດຫຍຸ່ນ ແລະ ສົ່ງເສີມການປະຕິບັດຕາມຄຳໝັ້ນສັນຍາກັບຄູ່ຮ່ວມມືໃນການສະໜັບສະໜູນການເອົາຊະນະຜົນທີ່ຕາມມາ ແລະ ປະສານງານການຄົ້ນຫາທະຫານທີ່ຫາຍສາບສູນ ຫຼືສູນຫາຍໃນການປະຕິບັດໜ້າທີ່ລະຫວ່າງສົງຄາມ. ຕັ້ງແຕ່ປີ 2014 ກອງທັບປະຊາຊົນຫວຽດນາມໄດ້ສົ່ງທະຫານຫຼາຍກວ່າ 1,100 ຄົນເຂົ້າຮ່ວມປະຕິບັດການຮັກສາສັນຕິພາບທີ່ພາລະກິດຂອງສະຫະປະຊາຊາດ ເຊິ່ງລວມເຖິງທະຫານລະດັບບຸກຄົນ, ໜ່ວຍ ແລະ ທີ່ສຳນັກງານໃຫຍ່ຂອງສະຫະປະຊາຊາດ. ໃນປີ 2023, ກະຊວງປ້ອງກັນປະເທດໄດ້ສົ່ງກຳລັງພົນເຂົ້າຮ່ວມການຄົ້ນຫາກູ້ໄພ ແລະ ແກ້ໄຂຜົນທີ່ຕາມມາຈາກໄພພິບັດແຜ່ນດິນໄຫວໃນປະເທດ ຕວກກີ; ໃນປີ 2025, ກອງກຳລັງກູ້ໄພແຜ່ນດິນໄຫວໃນມຽນມາສະແດງໃຫ້ເຫັນເຖິງຄວາມຄິດລິເລີ່ມ ແລະຄວາມຮັບຜິດຊອບສູງ ແລະ ໄດ້ຮັບການຍ້ອງຍໍຊົມເຊີຍຈາກສະຫະປະຊາຊາດ, ປະຊາຊົນມຽນມາ ແລະ ປະຊາຄົມໂລກ.

ການຮ່ວມມືແລະເຊື່ອມໂຍງສາກົນດ້ານການປ້ອງກັນປະເທດ ເປັນປັດໄຈໜຶ່ງທີ່ມີຜົນກະທົບຢ່າງຫຼວງຫຼາຍຕໍ່ໜ້າທີ່ການປັບປຸງທ່າແຮງດ້ານການປ້ອງກັນປະເທດ, ກໍ່ສ້າງກອງທັບທີ່ຊຳນານການຮົບ ແລະທັນສະໄໝ ເພື່ອຕອບສະໜອງຄວາມຕ້ອງການໃນການປົກຜັກຮັກສາປະເທດຊາດໃນສະຖານະການໃໝ່. ຜ່ານໂຄງການການຮ່ວມມືຝຶກອົບຮົມກັບກອງທັບຕ່າງປະເທດ ແລະ ການເຂົ້າຮ່ວມກິດຈະກຳຮັກສາສັນຕິພາບຂອງສະຫະປະຊາຊາດ, ພະນັກງານ ແລະ ທະຫານຂອງກອງທັບປະຊາຊົນຫວຽດນາມ ມີໂອກາດທີ່ຈະແລກປ່ຽນ, ຮຽນຮູ້, ໄດ້ຮັບປະສົບການ ແລະ ແຂ່ງຂັນໃນສະພາບແວດລ້ອມສາກົນ, ດັ່ງນັ້ນຈຶ່ງສະສົມປະສົບການ, ເສີມຂະຫຍາຍພາບລັກສະນະ, ຕຳແໜ່ງ ແລະ ກຽດສັກສີຂອງປະເທດ ແລະ ກອງທັບໃນສາຍຕາຂອງເພື່ອນມິດສາກົນ. ນອກຈາກນັ້ນ, ຜ່ານການຮ່ວມມືໃນການຈັດຊື້, ການຄົ້ນຄວ້າ, ການຖ່າຍທອດເຕັກໂນໂລຊີ ແລະ ການເຂົ້າຮ່ວມໃນງານວາງສະແດງການປ້ອງກັນປະເທດລະດັບສາກົນ, ພວກເຮົາມີໂອກາດເຂົ້າເຖິງເຕັກໂນໂລຊີຂັ້ນສູງ, ສົ່ງເສີມການຮ່ວມມືໃນການຖ່າຍທອດ ແລະ ເປັນເຈົ້າການໃນເຕັກໂນໂລຊີສະໄໝໃໝ່; ເສີມຂະຫຍາຍຄວາມສາມາດໃນການຜະລິດອາວຸດ ແລະອຸປະກອນເຕັກໂນໂລຊີຂັ້ນສູງດ້ວຍຕົນເອງ ແລະ ປັບປຸງທ່າແຮງດ້ານການປ້ອງກັນປະເທດ. ໂດຍສະເພາະ, ໃນປີ 2022 ແລະ 2024, ກະຊວງປ້ອງກັນປະເທດໄດ້ຈັດງານວາງສະແດງການປ້ອງກັນປະເທດສາກົນທີ່ຫວຽດນາມສຳເລັດແລ້ວສອງຄັ້ງ ໂດຍດຶງດູດການເຂົ້າຮ່ວມຂອງຜູ້ນຳຫຼາຍຄົນຂອງກະຊວງປ້ອງກັນປະເທດ, ກອງທັບຂອງປະເທດຕ່າງໆ ແລະ ບໍລິສັດ ວິສາຫະກິດດ້ານການປ້ອງກັນປະເທດຂະໜາດໃຫຍ່ຫຼາຍຮ້ອຍແຫ່ງທັງໃນແລະຕ່າງປະເທດ ເຂົ້າຮ່ວມຢ້ຽມຢາມ ແລະຈັດງານວາງສະແດງ ສົ່ງຜົນໃຫ້ປະຊາຊົນມີຄວາມເຊື່ອໝັ້ນໃນຄວາມສາມາດ ແລະ ທ່າແຮງດ້ານການປ້ອງກັນປະເທດຂອງປະເທດຫວຽດນາມ.

ເພີ່ມທະວີການຮ່ວມມື ແລະ ເຊື່ອມໂຍງສາກົນດ້ານການປ້ອງກັນປະເທດ,
ຮັບໃຊ້ພາລະກິດການສ້າງສາ ແລະ ປົກປັກຮັກສາປະເທດຊາດ ໃນຍຸກໃໝ່ຢ່າງໄດ້ການໄດ້ງານ.

ໂລກໃນປະຈຸບັນນີ້ກຳລັງປະເຊີນກັບອຸປະສັກ ແລະ ຄວາມຫຍຸ້ງຍາກຫຼາຍຢ່າງທີ່ບໍ່ເຄີຍມີມາກ່ອນ ດ້ວຍການປ່ຽນແປງທີ່ວ່ອງໄວ, ສັບສົນ ແລະ ບໍ່ສາມາດຄາດເດົາໄດ້, ແຕ່ "ສັນຕິພາບ, ການຮ່ວມມື ແລະ ການເຊື່ອມໂຍງເພື່ອການພັດທະນາ ຍັງຄົງເປັນທ່າອ່ຽງຫຼັກ. ໂລກາພິວັດແລະການເຊື່ອມໂຍງສາກົນນັບມື້ນັບເລິກເຊິ່ງ ແລະກວ້າງຂວາງຂຶ້ນ, ແຕ່ກຳລັງຖືກທ້າທາຍດ້ວຍການແຂ່ງຂັນເພື່ອອິດທິພົນລະຫວ່າງມະຫາອຳນາດ ແລະ ການເພີ່ມຂຶ້ນຂອງລັດທິຊາດນິຍົມສຸດໂຕ່ງ”⁽³⁾. ສະຖານະການໂລກທີ່ຫຼາຍຂົ້ວ, ຫຼາຍສູນກາງ ແລະ ແບ່ງຂົ້ວໃນການພົວພັນສາກົນ ໄດ້ຖືກເປີດເຜີຍຢ່າງຈະແຈ້ງຫຼາຍຂຶ້ນ, ນຳໄປສູ່ບັນຫາໃນການດຶງດູດແລະລວບລວມພະລັງ. ແນວໂນ້ມທີ່ເພີ່ມຂຶ້ນຂອງການຂົ່ມຂູ່ ແລະ ໃຊ້ກຳລັງເພື່ອແກ້ໄຂຂໍ້ຂັດແຍ່ງລະຫວ່າງປະເທດ ສົ່ງຜົນກະທົບທາງລົບຕໍ່ຈິດໃຈແຫ່ງການເຄົາລົບສັນຕິພາບ, ກົດໝາຍ ແລະ ລະບຽບສາກົນ. ບັນຫາຄວາມໝັ້ນຄົງທີ່ບໍ່ແມ່ນແບບດັ້ງເດີມ, ເຊັ່ນ: ອາຊະຍາກຳຂ້າມຊາດ, ຄວາມໝັ້ນຄົງດ້ານພະລັງງານ, ຄວາມໝັ້ນຄົງດ້ານອາຫານ, ຄວາມໝັ້ນຄົງທາງໄຊເບີ, ການປ່ຽນແປງຂອງດິນຟ້າອາກາດ ແລະອື່ນໆ, ກຳລັງມີຄວາມສັບສົນເພີ່ມຂຶ້ນເລື້ອຍໆ, ສົ່ງຜົນກະທົບຢ່າງແຂງແຮງຕໍ່ແຕ່ລະປະເທດ, ພາກພື້ນ ແລະ ທົ່ວໂລກ ເຊິ່ງຮຽກຮ້ອງໃຫ້ປະຊາຄົມໂລກຮ່ວມມືກັນ ແລະ ປະກອບສ່ວນໃນການຕອບສະໜອງ.

ໃນປະເທດ, ຫຼັງຈາກດຳເນີນກິດຈະການປ່ຽນແປງໃໝ່ເກືອບ 40 ປີ “ປະເທດຂອງພວກເຮົາບໍ່ເຄີຍມີຮາກຖານ, ທ່າແຮງ, ຖານະ ແລະ ກຽດສັກສີສາກົນຫຼາຍຄືກັບທຸກມື້ນີ້”⁽⁴⁾. ຈາກປະເທດທີ່ໄດ້ຮັບຜົນກະທົບຢ່າງໜັກຈາກສົງຄາມ, ຖືກປິດລ້ອມ, ຖືກໂດດດ່ຽວ ແລະ ປະເຊີນກັບຄວາມຫຍຸ້ງຍາກນັບບໍ່ຖ້ວນ, ມາຮອດປະຈຸບັນ, ຫວຽດນາມໄດ້ສ້າງສາຍພົວພັນທາງການທູດກັບ 194 ປະເທດ, ສ້າງສາຍພົວພັນຄູ່ຮ່ວມມືຍຸດທະສາດ ແລະ ຄູ່ຮ່ວມມືຮອບດ້ານກັບຫຼາຍກວ່າ 30 ປະເທດ (ຮອດວັນທີ 12 ມີນາ 2025, ຫວຽດນາມມີສາຍພົວພັນຄູ່ຮ່ວມມືຍຸດທະສາດຮອບດ້ານກັບ 12 ປະເທດ)⁽⁵⁾ ແລະ ເຂົ້າຮ່ວມຢ່າງແຂງຂັນໃນ ອົງການຈັດຕັ້ງພາກພື້ນ ແລະສາກົນຫຼາຍກວ່າ 70 ແຫ່ງ... ຢ່າງໃດກໍ່ຕາມ, ປະເທດຂອງເຮົາຍັງປະເຊີນກັບອຸປະສັກ ແລະຄວາມທ້າທາຍສຳຄັນຫຼາຍຢ່າງ ຈາກອິດທິພົນໂດຍທົ່ວໄປຂອງສະຖານະການ ແລະ ການພັດທະນາໃນໂລກແລະພາກພື້ນ, ສະຖານະການໃນທະເລຕາເວັນອອກ, ການຮັກສາການຮ່ວມມືແລະການນຳໃຊ້ຊັບພະຍາກອນນ້ຳແມ່ນ້ຳຂອງ, ໜ້າທີ່ໃນການຮັບມືກັບສິ່ງທ້າທາຍດ້ານຄວາມໝັ້ນຄົງທີ່ບໍ່ແມ່ນແບບດັ້ງເດີມ ແລະອື່ນໆ. ພ້ອມກັນນັ້ນ, ບັນດາອິດທິກຳລັງສັດຕູພວມເພີ່ມທະວີການທຳລາຍປະເທດຂອງພວກເຮົາດ້ວຍແຜນການ ແລະກົນອຸບາຍໃໝ່ໆ ທີ່ເລິກແລບແນບນຽນ, ເປີດເຜີຍ ແລະ ໂດຍກົງຫຼາຍຂຶ້ນ. ໃນສະພາບການປະຈຸບັນ, ໜ້າທີ່ໃນການສ້າງກອງທັບທີ່ “ຍອດຍ້ຽມ, ກະທັດຮັດ ແລະ ເຂັ້ມແຂງ” ທີ່ປະຕິວັດ, ເປັນແບບຫຼວງ, ຊຳນານການຮົບ, ທັນສະໄໝເທື່ອລະກ້າວ, ຮ່ວມມື ແລະເຊື່ອມໂຍງເຂົ້າກັບສາກົນດ້ານການປ້ອງກັນປະເທດນັ້ນ ມີຄວາມຕ້ອງການໃໝ່ໆທີ່ສູງຂຶ້ນເລື້ອຍໆ. ດັ່ງນັ້ນ, ເພື່ອປັບປຸງຍົກສູງປະສິດທິພາບ ແລະ ເສີມຂະຫຍາຍບົດບາດຂອງການຮ່ວມມື ແລະເຊື່ອມໂຍງສາກົນດ້ານການປ້ອງກັນປະເທດ, ຮັບໃຊ້ພາລະກິດການສ້າງສາ ແລະ ປົກປັກຮັກສາປະເທດຊາດໃນຍຸກໃໝ່ຢ່າງມີປະສິດທິພາບ, ຈຳເປັນຕ້ອງສຸມໃສ່ການປະຕິບັດໜ້າທີ່ ແລະວິທີແກ້ບັນຫາທີ່ສຳຄັນຈຳນວນໜຶ່ງໃຫ້ດີ ດັ່ງຕໍ່ໄປນີ້:   

ທີໜຶ່ງ, ສືບຕໍ່ເພີ່ມທະວີການນຳພາຂອງພັກ, ປັບປຸງຍົກສູງປະສິດທິພາບ ແລະ ປະສິດທິຜົນຂອງການຄຸ້ມຄອງລັດຕໍ່ພາລະກິດການທະຫານ, ການປ້ອງກັນປະເທດ ແລະ ປົກປັກຮັກສາປະເທດຊາດໂດຍທົ່ວໄປ ແລະ ການຮ່ວມມືແລະເຊື່ອມໂຍງສາກົນດ້ານການປ້ອງກັນປະເທດໂດຍສະເພາະ. ນີ້ຖືເປັນທັງວິທີແກ້ບັນຫາທີ່ສຳຄັນແລະເດັດຂາດ ແລະ ເປັນຄວາມຕ້ອງການໃນການນຳພາ ແລະ ການຄຸ້ມຄອງໜ້າທີ່ສົມທົບການທູດ ກັບການຮັບປະກັນການປ້ອງກັນປະເທດແລະຄວາມໝັ້ນຄົງ. ເຂົ້າໃຈແລະຈັດຕັ້ງປະຕິບັດຕາມມະຕິ, ຄຳສັ່ງ ແລະ ບົດສະຫຼຸບຂອງພັກຢ່າງເປັນປະຈຳ, ນຳໃຊ້ຢ່າງຍືດຫຍຸ່ນແລະສ້າງສັນໃນການປະຕິບັດງານ ເພື່ອເສີມສ້າງທ່າແຮງດ້ານການປ້ອງກັນປະເທດ ຄວາມໝັ້ນຄົງ ແລະ ກິດຈະການຕ່າງປະເທດ, ໂດຍປະຕິບັດຕາມຄຳແນະນຳຂອງສະຫາຍ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກ, ເລຂາທິການຄະນະພັກການທະຫານສູນກາງ ໃນກອງປະຊຸມຄັ້ງທີ 12 ຂອງຄະນະພັກການທະຫານສູນກາງ. ຜັນຂະຫຍາຍປະຕິບັດແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ການຮ່ວມມື ແລະ ການພັດທະນາຢ່າງສະໝ່ຳສະເໝີ, ຂະຫຍາຍການພົວພັນຮ່ວມມືຫຼາຍຝ່າຍ ແລະຫຼາກຫຼາຍ ຕາມຄຳຂວັນ “ມີເພື່ອນຫຼາຍຂຶ້ນ, ສັດຕູໜ້ອຍລົງ”, ຮັບປະກັນຜົນປະໂຫຍດສູງສຸດຂອງຊາດ ບົນພື້ນຖານຂອງຫຼັກການພື້ນຖານຂອງກົດບັດສະຫະປະຊາຊາດ ແລະ ກົດໝາຍສາກົນ, ຄວາມສະເໝີພາບ, ການຮ່ວມມື ແລະ ຜົນປະໂຫຍດຮ່ວມກັນ. ການກຳນົດຄວາມເປັນເອກະລາດ, ເປັນເຈົ້າຕົນເອງ, ການເພິ່ງພາຕົນເອງ ແລະສ້າງຄວາມເຂັ້ມແຂງດ້ວຍຕົນເອງ ຕິດພັນກັບຄວາມສາມັກຄີ ແລະ ການຮ່ວມມືສາກົນ ແມ່ນບັນຫາສຳຄັນອັນດັບໜຶ່ງໃນຍຸດທະສາດການປົກປັກຮັກສາປະເທດຊາດ. ເຊື່ອມຕໍ່ການຮ່ວມມືແລະເຊື່ອມໂຍງດ້ານການປ້ອງກັນປະເທດ ກັບຍຸດທະສາດໂດຍລວມຂອງການຕ່າງປະເທດຂອງພັກ, ການທູດຂອງລັດ ແລະ ການທູດປະຊາຊົນ, ດຳເນີນການແກ້ໄຂແລະຈັດການຄວາມສ່ຽງໃນການລະເມີດເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ຢ່າງເປັນເຈົ້າການຕັ້ງແຕ່ຕົ້ນ ແລະ ຈາກໄລຍະໄກ, ສ້າງຄວາມໄວ້ວາງໃຈ, ໃຊ້ມາດຕະການສັນຕິຢ່າງມີປະສິດທິພາບບົນພື້ນຖານກົດໝາຍສາກົນ. ໃນດ້ານອື່ນ, ຈຳເປັນຕ້ອງຍຶດໝັ້ນໃນນະໂຍບາຍປ້ອງກັນປະເທດແບບ “ຫ້າມສີ່ຂໍ້”⁽⁶⁾ ໃນການພົວພັນສາກົນ.

ທີສອງ, ບົນພື້ນຖານປະເພນີອັນດີງາມຂອງຊາດ ແລະ ການທູດຫວຽດນາມ, ສືບຕໍ່ເສີມຂະຫຍາຍບົດບາດນຳໜ້າໃນການປົກປ້ອງປະເທດຊາດຕັ້ງແຕ່ຕົ້ນ ຈາກໄລຍະໄກ, ການຮ່ວມມືແລະເຊື່ອມໂຍງດ້ານການປ້ອງກັນປະເທດຈຳເປັນຕ້ອງບັນລຸເປົ້າໝາຍພື້ນຖານດັ່ງຕໍ່ໄປນີ້: 1- ເປັນຊ່ອງທາງທັງການຮ່ວມມື ແລະ ການຕໍ່ສູ້, ປະກອບສ່ວນປ້ອງກັນຄວາມສ່ຽງຈາກການຂັດແຍ້ງ ແລະສົງຄາມ, ຫຼຸດຜ່ອນຄວາມທ້າທາຍດ້ານຄວາມໝັ້ນຄົງທີ່ບໍ່ແມ່ນແບບດັ້ງເດີມ, ປົກປ້ອງເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນຂອງປະເທດຊາດ, ຜົນປະໂຫຍດຂອງຊາດ-ປະເທດຊາດ, ປົກປ້ອງປະຊາຊົນ, ປົກປ້ອງພັກ ແລະ ລະບອບສັງຄົມນິຍົມ; 2- ເພີ່ມທະວີແລະຂະຫຍາຍການພົວພັນດ້ານການປ້ອງກັນປະເທດ ແລະ ຄວາມໝັ້ນຄົງກັບບັນດາປະເທດ, ອົງການຈັດຕັ້ງສາກົນ ແລະ ສະຖາບັນຕ່າງໆ, ຮັບປະກັນວ່າ ການພົວພັນເຂົ້າສູ່ລວງເລິກ, ແທ້ຈິງ ແລະ ມີປະສິດທິພາບ; ເພີ່ມການເຊື່ອມໂຍງດ້ານຜົນປະໂຫຍດຍຸດທະສາດ, ເສີມຂະຫຍາຍຖານະຂອງປະເທດ ແລະ ກອງທັບ, ໃຊ້ປະໂຫຍດຈາກຊັບພະຍາກອນພາຍນອກຢ່າງມີປະສິດທິພາບ ເພື່ອປັບປຸງຖານະ ແລະຄວາມເຂັ້ມແຂງ ຂອງພື້ນຖານການປ້ອງກັນປະເທດທົ່ວປວງຊົນ;  3- ສ້າງເງື່ອນໄຂທີ່ເອື້ອອຳນວຍໃຫ້ແກ່ການເຊື່ອມໂຍງເສດຖະກິດສາກົນ ແລະ ຂະບວນການເຊື່ອມໂຍງຢ່າງຮອບດ້ານຂອງປະເທດໃນຂົງເຂດອື່ນໆ; ຮັກສາສະພາບແວດລ້ອມສາກົນທີ່ໝັ້ນຄົງ ແລະ ເອື້ອອຳນວຍໃຫ້ແກ່ກິດຈະການສ້າງ ແລະປົກປັກຮັກສາປະເທດຊາດ, ພ້ອມທັງປະກອບສ່ວນຢ່າງຕັ້ງໜ້າໃນການປົກປ້ອງສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຮ່ວມກັນ ໃນພາກພື້ນ ແລະໃນໂລກ.

  ທີສາມ, ຈັດຕັ້ງປະຕິບັດການຮ່ວມມືແລະເຊື່ອມໂຍງສາກົນດ້ານການປ້ອງກັນປະເທດຢ່າງຄົບຊຸດ, ຮອບດ້ານ ແລະ ມີປະສິດທິພາບ, ສ້າງຄວາມເຊື່ອໝັ້ນ ແລະສ້າງຄວາມສົມດຸນທາງຍຸດທະສາດ, ຫຼີກລ່ຽງການປະເຊີນໜ້າ ແລະ ບໍ່ຖືກດຶງເຂົ້າສູ່ການແກ່ງແຍ້ງຍຸດທະສາດ ແລະ ການລວມກຳລັງຂອງບັນດາປະເທດມະຫາອຳນາດ. ສືບຕໍ່ປັບປຸງ, ເພີ່ມທະວີ ແລະ ເປັນເຈົ້າການ ໃນການແກ້ໄຂການພົວພັນດ້ານການປ້ອງກັນປະເທດກັບບັນດາປະເທດເພື່ອນບ້ານ, ບັນດາປະເທດໃນພາກພື້ນ, ບັນດາປະເທດໃຫຍ່, ຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ ແລະ ເພື່ອນມິດດັ້ງເດີມ, ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ບົນພື້ນຖານການເຄົາລົບກົດບັດສະຫະປະຊາຊາດ ແລະ ກົດໝາຍສາກົນ, ຄວາມສະເໝີພາບ, ການຮ່ວມມື ແລະ ຜົນປະໂຫຍດຮ່ວມກັນ. ໃນລະຫວ່າງຂະບວນການຈັດຕັ້ງປະຕິບັດ, ຈຳເປັນຕ້ອງຍຶດໝັ້ນໃນບັນຫາຫຼັກການເຊັ່ນ: ອະທິປະໄຕໃນດິນແດນ, ເອກະລາດ, ຄວາມເປັນເຈົ້າຕົນເອງ ແລະ ຜົນປະໂຫຍດຂອງຊາດ, ພ້ອມທັງມີຄວາມຍືດຫຍຸ່ນໃນພຶດຕິກຳ, ເປັນເຈົ້າການໃນການລະບຸ “ຄູ່ຮ່ວມມື” ແລະ “ເປົ້າໝາຍ” ເພື່ອຮ່ວມມືແລະຕໍ່ສູ້, ເພີ່ມທະວີການຮ່ວມມືໂດຍບໍ່ກໍ່ໃຫ້ເກີດຄວາມຂັດແຍ້ງ ຫຼືການປະເຊີນໜ້າ, ຫຼີກລ່ຽງການຖືກໂດດດ່ຽວ ຫຼື ຕົກຢູ່ໃນສະຖານະການທີ່ຕ້ອງ “ເລືອກຝ່າຍ” ຫຼື “ເລືອກຂ້າງ”. ສຸມໃສ່ປະສິດທິພາບຕົວຈິງໃນການຮ່ວມມືດ້ານການປ້ອງກັນປະເທດ, ທົບທວນ ແລະ ສົ່ງເສີມການປະຕິບັດຂໍ້ຕົກລົງຮ່ວມມືກັບປະເທດທີ່ຫວຽດນາມມີສ່ວນຮ່ວມເປັນປະຈຳ, ໂດຍສຸມໃສ່ຂົງເຂດທີ່ສຳຄັນ; ຮັກສາແລະເສີມຂະຫຍາຍກົນໄກການປຶກສາຫາລື ແລະ ການສົນທະນາ; ເພີ່ມທະວີການຮ່ວມມືດ້ານການຝຶກອົບຮົມ, ການຮ່ວມມືທາງເຫຼົ່າທະຫານ, ເຕັກໂນໂລຊີທາງທະຫານ, ອຸດສາຫະກໍາປ້ອງກັນປະເທດ, ຄວາມໝັ້ນຄົງທາງທະເລ, ການຄົ້ນຄວ້າຍຸດທະສາດ, ການເອົາຊະນະຜົນທີ່ຕາມມາຂອງສົງຄາມ, ການຊ່ວຍເຫຼືອດ້ານມະນຸດສະທໍາ, ການບັນເທົາໄພພິບັດ, ການແພດທະຫານ, ການຮັກສາສັນຕິພາບຂອງສະຫະປະຊາຊາດ...  ເສີມສ້າງການທູດຊາຍແດນ, ປັບປຸງປະສິດທິພາບຂອງກົນໄກ ແລະ ຮູບແບບການແລກປ່ຽນ ແລະ ການຮ່ວມມືລະຫວ່າງກອງກໍາລັງປ້ອງກັນຊາຍແດນ, ສ້າງຊາຍແດນທີ່ສັນຕິ, ໝັ້ນຄົງ, ຮ່ວມມື, ເປັນມິດ ແລະ ພັດທະນາ. ສຸມໃສ່ສົ່ງເສີມການຮ່ວມມືທາງດ້ານເຕັກນິກ - ການທະຫານ, ປະສົມປະສານການຄ້າທາງທະຫານເຂົ້າກັບການຖ່ານທອດເຕັກໂນໂລຊີ ແລະ ການຮ່ວມມືດ້ານການຜະລິດ ແລະ ການບໍລິໂພກຜະລິດຕະພັນ ຊ່ວຍປັບປຸງຄວາມສາມາດໃນການຜະລິດດ້ວຍຕົນເອງ, ນໍາໃຊ້ຂະບວນການຄຸ້ມຄອງ ແລະ ການຜະລິດຂັ້ນສູງ, ຈາກນັ້ນ ຊຸກຍູ້ການປັບປຸງອາວຸດຍຸດໂທປະກອນ ແລະ ຍົກສູງຄວາມສາມາດໃນການຮົບຂອງກອງທັບໃຫ້ສອດຄ່ອງກັບຄວາມຕ້ອງການຂອງການປົກປັກຮັກສາປະເທດຊາດໃນຍຸກໃໝ່.

ສືບຕໍ່ຊຸກຍູ້ແລະຍົກລະດັບການຮ່ວມມືແລະເຊື່ອມໂຍງສາກົນຫຼາຍຢ່າງດ້ານການປ້ອງກັນປະເທດ ຕາມຈິດໃຈຂອງຄຳສັ່ງເລກທີ 25-CT/TW, ລົງວັນທີ 8 ສິງຫາ 2018, ຂອງຄະນະເລຂາທິການສູນກາງພັກ “ວ່າດ້ວຍການຊຸກຍູ້ແລະຍົກລະດັບການພົວພັນຕ່າງປະເທດຫຼາຍຝ່າຍເຖິງປີ 2030”, ປ່ຽນຈາກການຮັບມາເປັນການປະກອບສ່ວນ, ຈາກການຮຽນຮູ້ໄປສູ່ການນຳພາ, ຈາກການເຊື່ອມໂຍງຢ່າງຮອບດ້ານໄປສູ່ການເຊື່ອມໂຍງທີ່ເລິກເຊິ່ງແລະມີເນື້ອຫາສາລະ ແລະ ຄວາມເປັນເຈົ້າການໃນການເຂົ້າຮ່ວມການສ້າງ ແລະ ສະເໜີຂໍ້ລິເລີ່ມໃນເວທີປາໄສການຮ່ວມມືດ້ານການປ້ອງກັນປະເທດຫຼາຍຝ່າຍ ໃນພາກພື້ນ ແລະສາກົນ, ໂດຍຖືວ່າ ນີ້ເປັນໂອກາດໃນການເພີ່ມຄວາມເຂົ້າໃຈ, ຄວາມໄວ້ວາງໃຈ ແລະ ການຮ່ວມມືໃນການແກ້ໄຂບັນຫາທີ່ເກີດຂຶ້ນ ແລະ ປ້ອງກັນຄວາມຂັດແຍ້ງ, ສົ່ງເສີມສັນຕິພາບ ແລະສະຖຽນລະພາບໃນພາກພື້ນ ແລະທົ່ວໂລກ. ສືບຕໍ່ສົ່ງເສີມການເຂົ້າຮ່ວມໃນການເຄື່ອນໄຫວຮັກສາສັນຕິພາບຂອງສະຫະປະຊາຊາດ, ຂະຫຍາຍຂະໜາດແລະຂອບເຂດການປະຕິບັດງານ, ພ້ອມກັນນັ້ນ, ປະສົມປະສານຜົນປະໂຫຍດຂອງຊາດເຂົ້າກັບຜົນປະໂຫຍດຂອງພາກພື້ນ ແລະສາກົນຢ່າງກົມກຽວ, ປະກອບສ່ວນຮັບປະກັນການສະໜັບສະໜູນຈາກສາກົນ, ພ້ອມທັງສະແດງໃຫ້ເຫັນເຖິງບົດບາດ ແລະ ຄວາມຮັບຜິດຊອບຂອງກອງທັບປະຊາຊົນຫວຽດນາມໃນການຈັດການກັບຄວາມທ້າທາຍດ້ານຄວາມໝັ້ນຄົງໃນພາກພື້ນ ແລະທົ່ວໂລກ; ເສີມສ້າງຖານະແລະກຽດສັກສີ, ເຜີຍແຜ່ຄຸນຄ່າທາງວັດທະນະທຳ, ນະໂຍບາຍການປ້ອງກັນປະເທດ ແລະ ພາບລັກສະນະແລະຄຸນທຳອັນສູງສົ່ງຂອງ “ທະຫານລຸງໂຮ່” ຂອງຫວຽດນາມສູ່ປະຊາຄົມໂລກ.   

ທີສີ່, ສືບຕໍ່ປັບປຸງລະບົບເອກະສານທາງກົດໝາຍທີ່ກ່ຽວຂ້ອງກັບການຮ່ວມມືແລະເຊື່ອມໂຍງສາກົນດ້ານການປ້ອງກັນປະເທດໃຫ້ສົມບູນແບບ ເພື່ອຮັບປະກັນຄວາມຕ້ອງການສູງສຸດຂອງການປົກປັກຮັກສາປະເທດຊາດສັງຄົມນິຍົມ, ເປັນພື້ນຖານໃຫ້ແກ່ການຈັດຕັ້ງປະຕິບັດການຮ່ວມມືແລະເຊື່ອມໂຍງສາກົນດ້ານການປ້ອງກັນປະເທດຢ່າງໃກ້ຊິດ ແລະ ມີປະສິດທິພາບ, ຕອບສະໜອງຄວາມຕ້ອງການທັງໃນໄລຍະສັ້ນ ແລະ ໄລຍະຍາວ. ສົ່ງເສີມການຈັດຕັ້ງປະຕິບັດການພົວພັນຕ່າງປະເທດ; ເສີມຂະຫຍາຍບົດບາດ, ລັກສະນະພິເສດ, ສອດຄ່ອງກັບລັກສະນະ ແລະ ຈຸດແຂງຂອງແຕ່ລະຊ່ອງທາງການຕ່າງປະເທດ, ຍຶດໝັ້ນໃນຫຼັກການ, ມີຄວາມຍືດຫຍຸ່ນໃນຍຸດໂທບາຍ, ສ້າງກຳລັງແຮງສັງລວມ; ເສີມຂະຫຍາຍວຽກງານການຄົ້ນຄວ້າ, ການຄາດຄະເນສະຖານະການ ແລະ ການແລກປ່ຽນທາງວິຊາການ ໃນການປຶກສາຫາລືດ້ານການປ້ອງກັນປະເທດຕໍ່ໄປ.

ທີຫ້າ, ຕັ້ງໜ້າໃນການປ່ຽນແປງໃໝ່ໂຄງສ້າງ, ການຈັດຕັ້ງ ແລະ ສ້າງຖັນແຖວພະນັກງານທີ່ເຮັດວຽກງານຮ່ວມມື ແລະເຊື່ອມໂຍງສາກົນດ້ານການປ້ອງກັນປະເທດທີ່ເທົ່າທຽມກັນກັບໜ້າທີ່. ໃຫ້ຄວາມສຳຄັນກັບການສຶກສາ ຝຶກອົບຮົມ ກໍ່ສ້າງ ແລະ ປັບປຸງຖັນແຖວພະນັກງານທີ່ເຮັດວຽກງານຮ່ວມມື ແລະເຊື່ອມໂຍງສາກົນດ້ານການປ້ອງກັນປະເທດ ທີ່ທັງມີຄຸນສົມສິນທຳ ແລະເປັນມືອາຊີບ, ມີຄວາມກ້າຫານທາງດ້ານການເມືອງ, ມີຄຸນສົມບັດປະຕິວັດ ແລະ ສຸດອົກສຸດໃຈຕໍ່ໜ້າທີ່ທີີ່ໄດ້ຮັບມອບໝາຍ; ມີທັກສະຄວາມສາມາດດ້ານວິຊາຊີບ ແລະຄວາມສາມາດດ້ານພາສາຕ່າງປະເທດ; ມີຄວາມສາມາດໃນການປັບຕົວໄດ້ຢ່າງຍືດຫຍຸ່ນ, ມີຄວາມຮູ້, ທັກສະ ແລະ ຄວາມເຂົ້າໃຈກ່ຽວກັບການຕ່າງປະເທດ ແລະ ການຮ່ວມມືສາກົນ, ມູນເຊື້ອ, ຮີດຄອງປະເພນີ, ວັດທະນະທຳ ແລະ ກົດໝາຍຂອງປະເທດເຈົ້າພາບ...   

-------------------------------------------------

 (1) ມະຕິໝາຍເລກ 34-NQ/TW, ລົງວັນທີ 9 ມັງກອນ 2023, ຂອງກົມການເມືອງສູນກາງພັກ “ວ່າດ້ວຍບາງທິດທາງແລະແຜນນະໂຍບາຍທີ່ສຳຄັນ ໃນການຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ XIII”; ບົດສະຫຼຸບສະບັບທີ 53-KL/TW, ລົງວັນທີ 28 ເມສາ 2023, ຂອງກົມການເມືອງສູນກາງພັກ “ວ່າດ້ວຍການເຊື່ອມໂຍງສາກົນ ແລະການທູດດ້ານການປ້ອງປັນປະເທດຮອດປີ 2030 ແລະຊຸມປີຕໍ່ໄປ”; ມະຕິໝາຍເລກ 59-NQ/TW, ລົງວັນທີ 24 ມັງກອນ 2025, ຂອງກົມການເມືອງສູນກາງພັກ “ວ່າດ້ວຍການເຊື່ອມໂຍງສາກົນໃນສະພາບການໃໝ່”; ມະຕິໝາຍເລກ 2662-NQ/QUTW, ລົງວັນທີ 26 ກຸມພາ 2024, ຂອງຄະນະພັກການທະຫານສູນກາງ, “ວ່າດ້ວຍການເຊື່ອມໂຍງສາກົນ ແລະການທູດດ້ານການປ້ອງກັນປະເທດ ຮອດປີ 2030 ແລະ ຊຸມປີຕໍ່ໄປ”,...

(2) ໃນປີ 2022, ຫວຽດນາມໄດ້ຈັດການແລກປ່ຽນມິດຕະພາບດ້ານການປ້ອງກັນຊາຍແດນຫວຽດນາມ - ກຳປູເຈຍ ຄັ້ງທີໜຶ່ງ (15 ພຶດສະພາ 2022); ໃນປີ 2024, ຫວຽດນາມໄດ້ຈັດການແລກປ່ຽນມິດຕະພາບດ້ານການປ້ອງກັນຊາຍແດນຫວຽດນາມ - ຈີນ ຄັ້ງທີ 8 (11-12 ເມສາ 2024) ແລະ ການແລກປ່ຽນມິດຕະພາບດ້ານການປ້ອງກັນຊາຍແດນຫວຽດນາມ - ລາວ ຄັ້ງທີ 2 (22-23 ຕຸລາ 2024).

(3) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 105

(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ປຶ້ມທີ່ໄດ້ແນະນຳ, ເຫຼັ້ມ 1, ໜ້າ 25

(5) ເບິ່ງ: ສຳນັກຂ່າວຫວຽດນາມ: “12 ປະເທດມີການພົວພັນຄູ່ຮ່ວມມທືຍຸດທະສາດຮອບດ້ານກັບຫວຽດນາມ”, ວັນທີ 12 ມີນາ 2025, https://www.vietnamplus.vn/12-nuoc-co-quan-he-doi-tac-chien-luoc-toan-dien-voi-viet-nam-post1020114.vnp

(6) ຫວຽດນາມສະໜັບສະໜູນການບໍ່ເຂົ້າຮ່ວມພັນທະມິດທາງທະຫານ; ບໍ່ຮ່ວມກັບປະເທດໜຶ່ງເພື່ອຕໍ່ສູ້ກັບອີກປະເທດໜຶ່ງ; ບໍ່ອະນຸຍາດໃຫ້ປະເທດຕ່າງຊາດຕັ້ງຖານທັບ ຫຼື ໃຊ້ດິນແດນຫວຽດນາມໃນການຕໍ່ສູ້ກັບປະເທດອື່ນ; ບໍ່ໃຊ້ກຳລັງ ຫຼືຂົ່ມຂູ່ວ່າຈະໃຊ້ກຳລັງໃນການພົວພັນສາກົນ.