ບາງບັນຫາກ່ຽວກັບການປ້ອງກັນແລະຕ້ານການສໍ້ລາດບັງຫຼວງ
ໃນເວລາທີ່ຜ່ານມາ
ໃນເວລາທີ່ຜ່ານມາ
ວກ. - ນັບແຕ່ເມື່ອສ້າງຕັ້ງຄະນະຊີ້ນຳສູນກາງກ່ຽວກັບການປ້ອງກັນແລະຕ້ານການສໍ້ລາດບັງຫຼວງ (ຄຊສປຕສ) (1) ມາເຖິງດຽວນີ້ (ເຖິງເດືອນພຶກສະພາ 2020), ໂດຍສະເພາະແມ່ນພາຍຫຼັງກວ່າ 4 ປີແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ ໄດ້ຮັບການຊີ້ນຳນຳພາແລະຜັນຂະຫຍາຍປະຕິບັດ ຢ່າງດຸເດືອດ, ເຂັ້ມແຂງ, ໜຽວແໜ້ນ, ຄົບຊຸດ, ຮອບດ້ານ, ເປັນແບບສະບັບ ແລະ ເຂົ້າສູ່ລວງເລິກ; ເສີມຂະຫຍາຍກຳລັງແຮງສັງລວມ, ສົມທົບລະຫວ່າງການປ້ອງກັນ ກັບການຄົ້ນເຜີຍແລະຈັດການແກ້ໄຂ, ລະຫວ່າງການປ້ອງກັນ ຕ້ານການສໍ້ລາດບັງຫຼວງ ກັບການກໍ່ສ້າງ ປັບປຸງພັກແລະລະບົບການເມືອງ, ລະຫວ່າງພາຍໃນສຳນັກງານອົງການຈັດຕັ້ງ ກັບໃນສັງຄົມ, ລະຫວ່າງໃນປະເທດ ກັບຕ່າງປະເທດ; ປະຕິບັດບັນດາມາດຕະການທາງການເມືອງ, ແນວຄິດ, ການຈັດຕັ້ງ, ການບໍລິຫານ, ເສດຖະກິດ ແລະ ທາງອາຍາຢ່າງຄົບຊຸດ.
ເລຂາທິການໃຫຍ່, ປະທານປະເທດ ຫງວຽນຝູຈ້ອງ ເຂົ້າຮ່ວມແລະຄວບຄຸມກອງປະຊຸມຄະນະປະຈຳການ ຄຊສປຕສ ເພື່ອປຶກສາຫາລືແລະໃຫ້ຄຳເຫັນຕໍ່ບາງຄະດີແລະວຽກງານພາຍໃຕ້ການຊີ້ນຳແລະນຳພາຂອງຄະນະຊີ້ນຳ, ວັນທີ 26 ພຶກສະພາ 2020 _ພາບ: TTXVN
ບັນດາຜົນໄດ້ຮັບທີ່ພົ້ນເດັ່ນ
ໃນເວລາທີ່ຜ່ານມາ, ວຽກງານການປ້ອງກັນແລະຕ້ານການສໍ້ລາດບັງຫຼວງ ໄດ້ມີຄວາມກ້າວໜ້າ, ບັນລຸຜົນງານຫຼາຍຢ່າງທີ່ສຳຄັນ, ຮອບດ້ານ ແລະຈະແຈ້ງ, ສ້າງຄວາມປະທັບໃຈ, ສ້າງຜົນກະທົບໃນທາງບວກ ແລະ ແຜ່ກະຈາຍໄປທົ່ວສັງຄົມຢ່າງແຂງແຮງ, ຄືດັ່ງຄຳຢືນຢັນຂອງສະຫາຍເລຂາທິການໃຫຍ່, ປະທານປະເທດ ຫງວຽນຝູຈ້ອງ: “ວຽກງານປ້ອງກັນແລະຕ້ານການສໍ້ລາດບັງຫຼວງ, ການໃຊ້ຈ່າຍຟຸມເຟືອຍ, ຄວາມຫຍໍ້ທໍ້ ໄດ້ກາຍເປັນຂະບວນການແລະທ່າອຽງ”, ໄດ້ຮັບຄວາມເຫັນດີເຫັນພ້ອມ, ການຕອບສະໜອງແລະຕີລາຄາສູງ ຈາກພະນັກງານ ສະມາຊິກພັກແລະປະຊາຊົນ ແລະ ໄດ້ຮັບການຍອມຮັບຈາກອົງການຈັດຕັ້ງສາກົນ(2). ການສໍ້ລາດບັງຫຼວງຄ່ອຍໆຖືກຄວບຄຸມ, ກີດກັ້ນ, ຍູ້ຖອຍ ແລະມີທ່າອຽງທີ່ຈະຫຼຸດລົງ(3), ປະກອບສ່ວນສຳຄັນເຂົ້າໃນການຮັກສາຄວາມໝັ້ນຄົງທາງການເມືອງ, ການພັດທະນາເສດຖະກິດ - ສັງຄົມ, ປັບປຸງຄວາມເຊື່ອໝັ້ນຂອງພະນັກງານ ສະມາຊິກພັກ ແລະ ປະຊາຊົນ ຕໍ່ພັກ, ລັດ ແລະລະບອບການປົກຄອງ. ຜົນງານເຫຼົ່ານັ້ນສະແດງອອກໃນ 5 ບັນຫາຕໍ່ໄປນີ້:
ທີໜຶ່ງ, ສຸມໃສ່ຊີ້ນຳວຽກງານກວດຫາແລະຈັດການແກ້ໄຂການສໍ້ລາດບັງຫຼວງ, ສົມທົບລະຫວ່າງການຈັດການທາງການບໍລິຫານ, ການປະຕິບັດລະບຽບວິໄນຂອງພັກ, ຂອງລັດ, ຂອງອົງຄະນະມະຫາຊົນ ກັບການຈັດການທາງອາຍາ; ລະບຽບວິໄນຂອງພັກຕ້ອງໄດ້ປະຕິບັດກ່ອນ, ເປີດທາງ, ສ້າງເງື່ອນໄຂໃຫ້ແກ່ການປະຕິບັດລະບຽບວິໄນຂອງລັດ, ຂອງອົງຄະນະມະຫາຊົນ ແລະ ການຈັດການທາງອາຍາ, ບໍ່ມີເຂດຫວງຫ້າມ, ບໍ່ມີຂໍ້ຍົດເວັ້ນ.
ວຽກງານກວດກາ, ຕິດຕາມກວດກາຂອງພັກ ແລະ ວຽກງານກວດກາ, ກວດສອບຂອງລັດໄດ້ຮັບການເພີ່ມທະວີ, ຄົ້ນເຜີຍແລະຈັດການການລະເມີດຢ່າງເຂັ້ມງວດ, ຮັດແໜ້ນລະບຽບວິໄນໃຫ້ເຂັ້ມງວດ, ປະກອບສ່ວນທີ່ຕັ້ງໜ້າ ເຂົ້າໃນການຍົກສູງປະສິດທິຜົນຂອງວຽກງານປ້ອງກັນແລະຕ້ານການສໍ້ລາດບັງຫຼວງ. ຕັ້ງແຕ່ເລີ່ມຕົ້ນກອງປະຊຸມໃຫຍ່ຄັ້ງທີ XII ຂອງພັກຈົນເຖິງປະຈຸບັນນີ້, ບັນດາຄະນະພັກ, ຄະນະກຳມະການກວດກາທຸກຂັ້ນ ໄດ້ປະຕິບັດວິໄນຕໍ່ພະນັກງານ ແລະສະມາຊິກພັກ 2.300 ກວ່າຄົນ ຍ້ອນການສໍ້ລາດບັງຫຼວງ, ການກະທຳຜິດໂດຍເຈດຕະນາ; ຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ, ຄະນະກຳມະການກວດກາສູນກາງ, ຄະນະພັກທີ່ມີອຳນາດຕັດສິນ ໄດ້ລົງໂທດທາງວິໄນຕໍ່ພະນັກງານພາຍໃຕ້ການຄຸ້ມຄອງຂອງສູນກາງກວ່າ 90 ຄົນ (4). ນີ້ແມ່ນບາດກ້າວບຸກທະລຸໃນວຽກງານກວດກາແລະວິໄນຂອງພັກ, ຮັດແໜ້ນລະບຽບວິໄນພາຍໃນພັກແລະກົງຈັກຂອງລັດໃຫ້ເຂັ້ມງວດ. ບັນດາອົງການກວດກາ, ກວດສອບໄດ້ເພີ່ມທະວີການກວດກາ ກວດສອບຕໍ່ບັນດາຂົງເຂດທີ່ມີປະກົດການຫຍໍ້ທໍ້ ມີການສໍ້ລາດບັງຫຼວງ, ບັນດາໂຄງການທີ່ມີການສິ້ນເປືອງຮົ່ວໄຫຼ, ຂາດທຶນຫຼາຍ, ແກ່ຍາວ, ຖືກປະຊາຊົນຕິຊົມ ເພື່ອກວດຫາແລະຈັດການການລະເມີດຢ່າງເຂັ້ມງວດ. ແຕ່ປີ 2016 ເຖິງປະຈຸບັນນີ້, ຜ່ານການກວດກາ ກວດສອບ ໄດ້ສະເໜີໃຫ້ຈັດການກູ້ຄືນຊັບສິນເກືອບ 455 ພັນຕື້ດົ່ງ ແລະ ທີ່ດິນຫຼາຍກວ່າ 8.100 ເຮັກຕາ; ສະເໜີໃຫ້ຈັດການຄວາມຮັບຜິດຊອບຂອງເກືອບ 8.000 ກຸ່ມແລະບຸກຄົນ; ໂອນໄປໃຫ້ໜ່ວຍງານສືບສວນເພື່ອຈັດການຄະດີລະເມີດ 409 ຄະດີ.
ວຽກງານການສືບສວນ, ການຟ້ອງຮ້ອງ, ການພິຈາລະນາພິພາກສາໄດ້ຮັບການຊີ້ນຳຢ່າງເຂັ້ມງວດເລັ່ງລັດ; ໄດ້ຄົ້ນເຜີຍຢ່າງທັນການ, ຈັດການແກ້ໄຂຢ່າງເຂັ້ມງວດ ຫຼາຍຄະດີສໍ້ລາດບັງຫຼວງ ຄະດີເສດຖະກິດທີ່ຮ້າຍແຮງ, ສັບສົນ, ປະຊາຊົນສົນໃຈ, ດ້ວຍຄຳຕັດສິນທີ່ເຂັ້ມງວດ ແຕ່ກໍມີມະນຸດສະທຳຫຼາຍ, ສ້າງບາດກ້າວບຸກທະລຸໃນວຽກງານການປ້ອງກັນແລະຕ້ານການສໍ້ລາດບັງຫຼວງ. ຕັ້ງແຕ່ເມື່ອສ້າງຕັ້ງ ຄຊສປຕສ ຈົນເຖິງປະຈຸບັນນີ້, ບັນດາອົງການດຳເນີນຄະດີໃນທົ່ວປະເທດໄດ້ເລີ່ມການຟ້ອງຮ້ອງ ສືບສວນ 12.178 ຄະດີ / ຜູ້ຕ້ອງຫາ 20.668 ຄົນ, ຟ້ອງສານ 10.397 ຄະດີ / ຜູ້ຕ້ອງຫາ 20.354 ຄົນ, ໄດ້ພິຈາລະນາຄະດີຂັ້ນຕົ້ນ 9.918 ຄະດີ / ຈຳເລີຍ 19.026 ຄົນ ກ່ຽວກັບການສໍ້ຫຼາດບັງຫຼວງ, ລະບຽບການຄຸ້ມຄອງເສດຖະກິດ ແລະ ອາຊະຍາກຳອື່ນໆກ່ຽວກັບຕຳແໜ່ງ (5). ຄະນະຊີ້ນຳໄດ້ຈັດ 120 ຄະດີ ແລະ 95 ກໍລະນີສໍ້ລາດບັງຫຼວງແລະຄະດີເສດຖະກິດທີ່ຮ້າຍແຮງ, ສັບສົນ, ຫາງສຽງສັງຄົມສົນໃຈ ເຂົ້າໃນການຕິດຕາມຊີ້ນຳ (ໃນນັ້ນ, ຄະນະຊີ້ນຳ 110 ທີ່ໄດ້ຮັບການສ້າງຕັ້ງຂຶ້ນພາຍໃຕ້ຂໍ້ຕົກລົງເລກທີ 110-QĐ/TW, ລົງວັນທີ 24 ມັງກອນ 2018, ຂອງຄະນະເລຂາທິການສູນກາງ ເປັນຜູ້ຕິດຕາມ, ຊີ້ນຳການຈັດການແກ້ໄຂ 10 ຄະດີ / ຈຳເລີຍ 68 ຄົນ ທີ່ກ່ຽວຂ້ອງກັບ ຟານວັນແອັງຫວູ ແລະ ດິງງ້ອກເຮ້); ໄດ້ພິພາກສາຂັ້ນຕົ້ນ 76 ຄະດີ / ຈຳເລີຍ 775 ຄົນ, ຕັດສິນປະຫານຊີວິດຈຳເລີຍ 11 ຄົນ (10 ຄົນ), ຕັດສິນຈຳຄຸກຕະຫຼອດຊີວິດຈຳເລີຍ 23 ຄົນ, ຈຳຄຸກ 30 ປີຈຳເລີຍ 12 ຄົນ, ຈຳຄຸກແຕ່ 20 ປີເຖິງຕ່ຳກວ່າ 30 ປີຈຳເລີຍ 23 ຄົນ, ຈຳຄຸກແຕ່ 12 ເດືອນເຖິງຕ່ຳກວ່າ 20 ປີຈຳເລີຍ 658 ຄົນ (6). ຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ, ຄຊສປຕສ ໄດ້ນຳພາຊີ້ນຳຢ່າງເດັດດ່ຽວ, ຈັດການແກ້ໄຂຢ່າງເຂັ້ມງວດ, ມີເຫດຜົນແລະດ້ວຍຄວາມຮັກແພງ ຕໍ່ພະນັກງານຂັ້ນສູງຈຳນວນໜຶ່ງທັງໃນຕຳແໜ່ງແລະບຳນານ, ທີ່ມີການລະເມີດກ່ຽວຂ້ອງກັບຄະດີສໍ້ລາດບັງຫຼວງຄະດີເສດຖະກິດທີ່ຮ້າຍແຮງ, ສັບສົນ, ຫາງສຽງສັງຄົມສົນໃຈ (7). ແຕ່ວາລະກອງປະຊຸມໃຫຍ່ຄັ້ງທີ XII ຂອງພັກຈົນເຖິງປະຈຸບັນນີ້, ບັນດາອົງການດຳເນີນຄະດີທຸກລະດັບ ໄດ້ເລີ່ມການຟ້ອງຮ້ອງ ສືບສວນ 7.270 ຄະດີ / ຜູ້ຕ້ອງຫາ 12.303 ຄົນ, ຟ້ອງສານ 5.976 ຄະດີ / ຜູ້ຕ້ອງຫາ 11.613 ຄົນ, ໄດ້ພິພາກສາຂັ້ນຕົ້ນ 5.641 ຄະດີ / ຈຳເລີຍ 10.970 ຄົນ ກ່ຽວກັບການສໍ້ຫຼາດບັງຫຼວງ, ລະບຽບການຄຸ້ມຄອງເສດຖະກິດ ແລະ ອາຊະຍາກຳອື່ນໆກ່ຽວກັບຕຳແໜ່ງ (8), ດ້ວຍເຫດນັ້ນ, ສະພາບການ “ຂັ້ນເທິງຮ້ອນ, ຂັ້ນລຸ່ມເຢັນ” ຈຶ່ງຄ່ອຍໆໄດ້ຮັບການແກ້ໄຂຜ່ານຜ່າ (9); ການກູ້ຄືນຊັບສິນທີ່ຖືກສູນເສຍໃນຄະດີສໍ້ລາດບັງຫຼວງຄະດີເສດຖະກິດ ມີການປ່ຽນແປງໃນທາງບວກຫຼາຍຢ່າງ (10). ບາງກໍລະນີ ຄະດີທີ່ຮ້າຍແຮງເປັນພິເສດ, ທີ່ຖືກຖືວ່າເປັນ “ເຂດຈຳກັດ, ເຂດອ່ອນໄຫວ” ແລະ ຫຼາຍກໍລະນີຄະດີທີ່ແກ່ຍາວມາຈາກປີກ່ອນ ໄດ້ຖືກຊີ້ນຳໃຫ້ຈັດການແກ້ໄຂຢ່າງຂາດຕົວແລະເຂັ້ມງວດ, ມີຄຸນປະໂຫຍດປຸກສະຕິ, ກ່າວເຕືອນ ແລະ ປ້ອງກັນການສໍ້ລາດບັງຫຼວງຢ່າງມີປະສິດທິຜົນ. ນີ້ແມ່ນຈຸດສະຫວ່າງໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ, ສະແດງເຖິງຄວາມຕັດສິນໃຈຂອງພັກແລະລັດ ກໍຄືປະສິດທິຜົນການເຄື່ອນໄຫວຂອງ ຄຊສປຕສ ແລະ ບັນດາອົງການຮັບຜິດຊອບໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງໃນເວລາທີ່ຜ່ານມາ, ໄດ້ຮັບການເຫັນດີເຫັນພ້ອມ, ສະໜັບສະໜູນແລະຕີລາຄາສູງຈາກປະຊາຊົນ.
ນັບແຕ່ກອງປະຊຸມສູນກາງພັກຄັ້ງທີ 11 (ເດືອນຕຸລາ 2019) ເຖິງປະຈຸບັນນີ້ (ຮອດເດືອນພຶດສະພາ 2020), ສຳລັບບັນດາກໍລະນີຄະດີ ພາຍໃຕ້ການຕິດຕາມຊີ້ນຳ ຂອງ ຄຊສປຕສ, ໄດ້ສິ້ນສຸດການສືບສວນ 13 ຄະດີ / ຜູ້ຕ້ອງຫາ 79 ຄົນ, ຟ້ອງສານ 15 ຄະດີ / ຜູ້ຕ້ອງຫາ 105 ຄົນ, ພິພາກສາ 19 ຄະດີ / ຈຳເລີຍ 106 ຄົນ, ໂດຍສະເພາະຢ່າງຍິ່ງແມ່ນ: 1- ເປັນຄັ້ງທຳອິດທີ່ໄດ້ດຳເນີນການພິພາກສາຄະດີຢ່າງເປີດເຜີຍແລະເຂັ້ມງວດ ຕໍ່ພະນັກງານ 2 ຄົນທີ່ເປັນອະດີດກຳມະການສູນກາງພັກ, ອະດີດລັດຖະມົນຕີ ໃນຂໍ້ຫາຮັບເອົາສິນບົນ ແລະ ຜູ້ນຳວິສາຫະກິດທີ່ບໍ່ແມ່ນຂອງລັດ ໃນຂໍ້ຫາໃຫ້ສິນບົນ ໃນຄະດີ MobiFone ຊື້ 95% ຫຸ້ນຂອງ AVG (ບໍລິສັດຫຸ້ນສ່ວນເຄື່ອງພາບສຽງທົ່ວໂລກ); 2- ພິພາກສາພະນັກງານ 2 ຄົນທີ່ເປັນອະດີດປະທານແຂວງ ແລະ ພະນັກງານ 2 ຄົນທີ່ເປັນອະດີດຮອງປະທານແຂວງ ມີຄວາມຜິດທີ່ກ່ຽວຂ້ອງກັບການລະເມີດໃນການຄຸ້ມຄອງ ນຳໃຊ້ຊັບສິນຂອງລັດ, ການຄຸ້ມຄອງທີ່ດິນໃນກໍລະນີຂອງ ຟານວັນແອັງຫວູ; ພະນັກງານ 1 ຄົນທີ່ເປັນອະດີດລັດຖະມົນຕີ ໃນຂໍ້ຫາກະທຳຜິດໂດຍເຈດຕະນາ ລະເມີດກົດລະບຽບຂອງລັດກ່ຽວກັບການຄຸ້ມຄອງເສດຖະກິດ ກໍ່ໃຫ້ເກີດຜົນກະທົບຮ້າຍແຮງ; ພະນັກງານ 1 ຄົນທີ່ເປັນອະດີດຮອງລັດຖະມົນຕີ ໃນຂໍ້ຫາຂາດຄວາມຮັບຜິດຊອບ ກໍ່ໃຫ້ເກີດຜົນກະທົບຮ້າຍແຮງ ໃນກໍລະນີຂອງ ດິງງ້ອກເຮ້;... 3- ຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ, ຄະນະກຳມະການກວດກາສູນກາງ ໄດ້ປະຕິບັດວິໄນຕໍ່ອົງການຈັດຕັ້ງພັກ 2 ອົງການ (11) ແລະພະນັກງານ 12 ຄົນທີ່ຢູ່ພາຍໃຕ້ການຄຸ້ມຄອງຂອງສູນກາງ (12); 4- ບັນດາອົງການດຳເນີນຄະດີຢູ່ທ້ອງຖິ່ນໄດ້ເລິ່ມການຟ້ອງຮ້ອງ 268 ຄະດີ / ຜູ້ຕ້ອງຫາ 475 ຄົນ; ຟ້ອງສານ 105 ຄະດີ / ຜູ້ຕ້ອງຫາ 163 ຄົນ; ພິພາກສາ 127 ຄະດີ / ຈຳເລີຍ 268 ຄົນໃນຂໍ້ຫາສໍ້ລາດບັງຫຼວງ (13).
ທີສອງ, ຄຽງຄູ່ກັບການສຸມໃສ່ຊີ້ນຳວຽກງານກວດຫາແລະຈັດການກັບການສໍ້ລາດບັງຫຼວງ, ແມ່ນວຽກງານການສ້າງແລະປັບປຸງບູລະນະ ລະບຽບກົດໝາຍກ່ຽວກັບການຄຸ້ມຄອງເສດຖະກິດ-ສັງຄົມ ແລະ ການປ້ອງກັນ ຕ້ານການສໍ້ລາດບັງຫຼວງ ກໍໄດ້ຍູ້ແຮງ, ປັບປຸງບູລະນະເທື່ອລະກ້າວກົນໄກປ້ອງກັນ ເພື່ອ "ບໍ່ສາມາດສໍ້ລາດບັງຫຼວງໄດ້" 14).
ມີຫຼາຍຂໍ້ກຳນົດຂອງພັກ ແລະ ກົດໝາຍຂອງລັດ ກ່ຽວກັບການກໍ່ສ້າງ ປັບປຸງພັກ, ຄຸ້ມຄອງເສດຖະກິດ-ສັງຄົມ ແລະ ປ້ອງກັນ, ຕ້ານການສໍ້ລາດບັງຫຼວງ ໄດ້ຮັບການປະກາດໃຊ້ ແລະ ໄດ້ຮັບການຈັດຕັ້ງປະຕິບັດຢ່າງຂຸ້ນຂ້ຽວ, ເຂົ້າສູ່ຊີວິດສັງຄົມ, ມີຄຸນປະໂຫຍດໃນການອົບຮົມສຶກສາ, ປ້ອງກັນ, ກີດກັ້ນ, ທັງເປັນຫຼັກຖານເພື່ອກວດຫາແລະຈັດການຕໍ່ການລະເມີດກົດໝາຍ, ການສໍ້ລາດບັງຫຼວງ.
ທີສາມ, ວຽກງານພະນັກງານ; ການປະຕິຮູບການບໍລິຫານ, ເປີດເຜີຍ, ໂປ່ງໃສ, ຄວາມຮັບຜິດຊອບໃນການອະທິບາຍລາຍງານ ໃນການເຄື່ອນໄຫວຂອງບັນດາສຳນັກງານ ອົງການ ໜ່ວຍງານ ແລະ ບັນດາວິທີການປ້ອງກັນການສໍ້ລາດບັງຫຼວງ ໄດ້ຮັບການເອົາໃຈໃສ່, ສຸມໃສ່ຊີ້ນຳນຳພາ ແລະ ບັນລຸຜົນໄດ້ຮັບທີ່ດີຫຼາຍຢ່າງ.
ຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ ໄດ້ມີການປ່ຽນແປງໃໝ່ຫຼາຍຢ່າງ, ສອດຄ່ອງແລະຊັດເຈນ, ໄດ້ຊີ້ນຳແກ້ໄຂຫຼາຍບັນຫາທີ່ມີມາກ່ອນໃນວຽກງານພະນັກງານ; “ບໍ່ວິ້ງເຕັ້ນຫາຕຳແໜ່ງ, ບໍ່ວິ້ງເຕັ້ນຫາອຳນາດ” ໄດ້ກາຍເປັນຄຳຖະແຫຼງທີ່ໜັກແໜ້ນ ພ້ອມດ້ວຍຂໍ້ກຳນົດກົດລະບຽບຫຼາຍສະບັບທີ່ອອກມາພ້ອມກັນແລະເປັນໄປໄດ້(15). ການຄວບຄຸມຊັບສິນ, ລາຍໄດ້; ການຊຳລະເງິນແບບບໍ່ໃຊ້ເງິນສົດ; ການຍູ້ແຮງການປະຕິຮູບການບໍລິຫານ, ການເພີ່ມທະວີຄວາມເປີດເຜີຍ ໂປ່ງໃສ, ຄວາມຮັບຜິດຊອບໃນການອະທິບາຍລາຍງານ, ການປັບປຸງສະພາບແວດລ້ອມການລົງທຶນທຸລະກິດໃຫ້ດີຂຶ້ນ, ການຍົກສູງຄວາມສາມາດແຂ່ງຂັນແຫ່ງຊາດ... ໄດ້ປະກອບສ່ວນສຳຄັນເຂົ້າໃນການເຕີບໂຕເສດຖະກີດ ແລະ ປ້ອງກັນຄວາມຫຍໍ້ທໍ້, ການສໍ້ລາດບັງຫຼວງ (16). ຄະນະພັກ, ອຳນາດການປົກຄອງ, ພະນັກງານການນຳທຸກຂັ້ນ ໄດ້ເອົາໃຈໃສ່ໃຫ້ຄວາມສຳຄັນກັບການຮັບເອົາ ສົນທະນາ ແກ້ໄຂ ການສະທ້ອນ, ຄຳສະເໜີແນະ, ຄຳຮ້ອງທຸກ, ຄຳ ຕຳນິ, ບັນຫາແລະຄວາມຜິດຫວັງຂອງປະຊາຊົນ, ວິສາຫະກິດ.
ທີສີ່, ວຽກງານການສື່ສານ, ການໂຄສະນາ, ການອົບຮົມສຶກສາກ່ຽວກັບການປ້ອງກັນແລະຕ້ານການສໍ້ລາດບັງຫຼວງ ໄດ້ຮັບການປ່ຽນແປງໃໝ່ແລະເພີ່ມທະວີ; ບົດບາດຂອງແນວໂຮມແຫ່ງຊາດ, ປະຊາຊົນ ແລະ ສື່ມວນຊົນໃນການປ້ອງກັນແລະຕ້ານການສໍ້ລາດບັງຫຼວງໄດ້ຮັບການສົ່ງເສີມໃຫ້ດີຂຶ້ນ.
ຍູ້ແຮງການສື່ສານ, ການໂຄສະນາ, ການອົບຮົມສຶກສາ, ຍົກສູງຄວາມຮັບຮູ້ແລະຄວາມຮັບຜິດຊອບຂອງພະນັກງານ, ສະມາຊິດພັກ, ລັດຖະກອນ ພາລະກອນ ແລະ ປະຊາຊົນ ໃນການປ້ອງກັນແລະຕ້ານການສໍ້ລາດບັງຫຼວງ, ສ້າງຄວາມເປັນເອກະພາບ, ຄວາມຕັດສິນໃຈສູງໃນການກະທຳ, ສ້າງຜົນກະທົບທີ່ດີໃນສັງຄົມ. ເປີດເຜີຍຜົນຂອງການກວດກາ ກວດສອບ, ຜົນຂອງການຈັດການແກ້ໄຂກໍລິນີ ຄະດີສໍ້ລາດບັງຫຼວງ, ຄະດີເສດຖະກິດ; ເປັນເຈົ້າການໃນການສະໜອງຂໍ້ມູນກ່ຽວກັບບັນຫາລະອຽດອ່ອນ ທີ່ປະຊາຊົນສົນໃຈ, ຊ່ວຍແນະນຳຄວາມຄິດເຫັນຂອງປະຊາຊົນໃຫ້ໄດ້ເປັນຢ່າງດີ, ສະແດງໃຫ້ເຫັນເຖິງຄວາມເປີດເຜີນ, ໂປ່ງໃສຂອງພັກແລະລັດ ໃນການຈັດການແກ້ໄຂການສໍ້ລາດບັງຫຼວງ. ບັນດາສຳນັກຂ່າວແລະສື່ມວນຊົນໄດ້ຮ່ວມກັບພັກ, ລັດ ແລະໜ່ວຍງານທີ່ປະຕິບັດໜ້າທີ່ໃນການປ້ອງກັນແລະຕ້ານການສໍ້ລາດບັງຫຼວງ, ຕໍ່ສູ້ຕ້ານກັບຖ້ອຍທຳນອງບິດເບືອນຂອງອິດທິກຳລັງສັດຕູ ກ່ຽວກັບວຽກງານການປ້ອງກັນແລະຕ້ານການສໍ້ລາດບັງຫຼວງ. ອົງການໂດຍປະຊາຊົນເລືອກຕັ້ງ, ແນວໂຮມປະເທດຊາດຫວຽດນາມທຸກຂັ້ນ ແລະອົງການຈັດຕັ້ງສະມາຊິກ ຈະຕ້ອງເພີ່ມທະວີການຕິດຕາມກວດກາວຽກງານການປ້ອງກັນແລະຕ້ານການສໍ້ລາດບັງຫຼວງ.
ທີຫ້າ, ເອົາໃຈໃສ່ປັບປຸງທາງດ້ານການຈັດຕັ້ງ, ຍົກສູງຄຸນນະພາບແລະປະສິດທິຜົນຂອງການເຄື່ອນໄຫວ ແລະ ການປະສານງານລະຫວ່າງບັນດາອົງການ, ໜ່ວຍງານທີ່ປະຕິບັດໜ້າທີ່ປ້ອງກັນແລະຕ້ານການສໍ້ລາດບັງຫຼວງ; ຍູ້ແຮງການຮ່ວມມືສາກົນກ່ຽວກັບ ການປ້ອງກັນແລະຕ້ານການສໍ້ລາດບັງຫຼວງ, ເປີດກວ້າງການເຄື່ອນໄຫວປ້ອງກັນແລະຕ້ານການສໍ້ລາດບັງຫຼວງອອກສູ່ຂົງເຂດນອກພາກລັດເທື່ອລະກ້າວ.
ບັນດາອົງການກວດກາແລະອົງການກິດຈະການພາຍໃນຂອງພັກ, ອົງການກວດກາ, ກວດສອບ, ຕຳຫຼວດ, ອົງການຕຸລາການໃນກອງທັບ, ອົງການໄອຍະການ, ສານ ໄດ້ເຄື່ອນໄຫວນັບມື້ນັບຕັ້ງໜ້າແລະມີປະສິດທິຜົນ; ບັນດາໜ່ວຍງນານສະເພາະກິດຕ້ານການສໍ້ລາດບັງຫຼວງ ສືບຕໍ່ໄດ້ຮັບການປັບປຸງທາງດ້ານການຈັດຕັ້ງກົງຈັກ, ຍົກສູງປະສິດທິຜົນຂອງການກວດຫາແລະຈັດການແກ້ໄຂກໍລະນີ ຄະດີສໍ້ລາດບັງຫຼວງ. ການພົວພັນປະສານງານລະຫວ່າງອົງການ, ໜ່ວຍງານທີ່ປະຕິບັດໜ້າທີ່ປ້ອງກັນແລະຕ້ານການສໍ້ລາດບັງຫຼວງ ນັບມື້ນັບແໜ້ນແຟ້ນ ແລະມີປະສິດທິຜົນ. ປະມວນກົດໝາຍອາຍາປີ 2015 (ສະບັບປັບປຸງເພີ່ມເຕີມປີ 2017) ໄດ້ເພີ່ມ 4 ອາຊະຍາກຳສໍ້ລາດບັງຫຼວງ ສຳລັບຂົງເຂດນອກພາກລັດ (ການຍັກຍອກເອົາຊັບ, ການກິນສິນບົນ, ການໃຫ້ສິນບົນ, ການເປັນນາຍໜ້າໃຫ້ສິນບົນ); ກົດໝາຍວ່າດ້ວຍການປ້ອງກັນແລະຕ້ານການສໍ້ລາດບັງຫຼວງປີ 2018 ມີໝວດສະເພາະ ກ່ຽວກັບການເຄື່ອນໄຫວປ້ອງກັນແລະຕ້ານການສໍ້ລາດບັງຫຼວງ ໃນຂົງເຂດນອກພາກລັດ.
ສາເຫດຕົ້ນຕໍຂອງຜົນທີ່ໄດ້ຮັບ ແມ່ນ: 1- ຄວາມຕັດສິນໃຈການເມືອງສູງຂອງພັກແລະລັດ ໃນການຕໍ່ສູ້ປ້ອງກັນແລະຕ້ານການສໍ້ລາດບັງຫຼວງ; 2- ການນຳພາຊີ້ນຳທີ່ໃກ້ຊິດ, ຂຸ້ນຂ້ຽວ, ດຸເດືອດ ດ້ວຍການຕັດສິນໃຈທີ່ຖືກຕ້ອງແລະທັນການ ຂອງຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ, ຄຊສປຕສ, ສະພາແຫ່ງຊາດ, ລັດຖະບານ; ພິເສດແມ່ນຄວາມເປັນແບບຢ່າງ, ໜັກແໜ້ນ, ການເວົ້າໄປຄຽງຄູ່ກັບການເຮັດ ຂອງສະຫາຍເລຂາທິການ, ປະທານປະເທດ, ຫົວໜ້າ ຄຊສປຕສ ແລະ ບັນດາຜູ້ນຳຫຼັກແຫຼ່ງຂອງພັກແລະລັດ; 3- ຄວາມມານະພະຍາຍາມຂອງບັນດາອົງການທີ່ປຶກສາ ແລະ ຄະນະພັກ, ອົງການຈັດຕັ້ງພັກ, ກະຊວງ, ຂະແໜງການ, ທ້ອງຖິ່ນ, ໂດຍສະເພາະແມ່ນຄວາມມານະພະຍາຍາມທີ່ສູງທີ່ສຸດຂອງບັນດາອົງການ, ໜ່ວຍງານທີ່ປະຕິບັດໜ້າທີ່ປ້ອງກັນແລະຕ້ານການສໍ້ລາດບັງຫຼວງ ແລະ ບັນດາອົງການດຳເນີນຄະດີຢູ່ສູນກາງ ແລະທ້ອງຖິ່ນ; 4- ການເຂົ້າຮ່ວມຢ່າງຕັ້ງໜ້າຂອງແນວໂຮມປະເທດຊາດຫວຽດນາມ ແລະບັນດາອົງການຈັດຕັ້ງການເມືອງ-ສັງຄົມ, ຄວາມເຫັນດີເຫັນພ້ອມ, ສະໜັບສະໜູນ ແລະປຸກກຳລັງໃຈຂອງປະຊາຊົນ, ຄວາມເປັນເຈົ້າການເຂົ້າຮ່ວມຢ່າງຂະຫຍັນຂັນແຂງຂອງສື່ມວນຊົນ, ສ້າງກຳລັງແຮງສັງລວມໃນ ການປ້ອງກັນແລະຕ້ານການສໍ້ລາດບັງຫຼວງ.ບາງບົດຮຽນປະສົບການ
ຈາກພຶດຕິກຳຂອງວຽກງານການປ້ອງກັນແລະຕ້ານການສໍ້ລາດບັງຫຼວງໃນເວລາທີ່ຜ່ານມາ, ສາມາດຖອດຖອນບົດຮຽນປະສົບການຈຳນວນໜຶ່ງດັ່ງນີ້:
1- ຕ້ອງຫັນຄວາມຕັດສິນໃຈການເມືອງຂອງພັກແລະລັດກ່ຽວກັບ ການປ້ອງກັນແລະຕ້ານການສໍ້ລາດບັງຫຼວງ ໃຫ້ກາຍເປັນການກະທຳຕົວຈິງຂອງພະນັກງານ, ສະມາຊິກພັກ, ລັດຖະກອນ ພາລະກອນ ແລະ ປະຊາຊົນ; ກ່ອນອື່ນໝົດແມ່ນຄວາມເປັນແບບຢ່າງ, ເດັດດ່ຽວ, ການເວົ້າໄປຄຽງຄູ່ກັບການເຮັດ ຂອງບັນດາສະຫາຍການນຳຂອງພັກ, ລັດ, ຫົວໜ້າຂອງຄະນະພັກ, ອົງການຈັດຕັ້ງພັກ, ອຳນາດການປົກຄອງ, ສຳນັກງານອົງການ, ໜ່ວຍງານທີ່ປະຕິບັດໜ້າທີ່ການປ້ອງກັນແລະຕ້ານການສໍ້ລາດບັງຫຼວງ; ເຊື່ອມຕິດການຕໍ່ສູ້ ປ້ອງກັນແລະຕ້ານການສໍ້ລາດບັງຫຼວງ ກັບການຍູ້ແຮງວຽກງານການກໍ່ສ້າງແລະປັບປຸງພັກ, ການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ ແລະແບບແຜນໂຮ່ຈີມິນ.
2- ຕ້ອງມີການສົມທົບຢ່າງແໜ້ນແຟ້ນລະຫວ່າງ ການສະກັດກັ້ນຢ່າງຫ້າວຫັນ, ການກວດຈັບຢ່າງເປັນເຈົ້າການ, ການຈັດການແກ້ໄຂຢ່າງເຂັ້ມງວດແລະທັນການ ຕໍ່ຜູ້ກະທຳຜິດຖານສໍ້ລາດບັງຫຼວງ, ຜູ້ທີ່ປົກປິດ ປ່ອຍມືໃຫ້ ສະໜັບສະໜູນການສໍ້ລາດບັງຫຼວງ, ຜູ້ທີ່ແຊກແຊງແລະກີດຂວາງການຕໍ່ສູ້ຕ້ານການສໍ້ລາດບັງຫຼວງ ຕາມຂໍ້ກຳນົດຂອງພັກ ແລະ ກົດໝາຍຂອງລັດ, ບໍ່ມີເຂດຫວງຫ້າມ, ບໍ່ມີຂໍ້ຍົກເວັ້ນ. ໃນສະພາບການປະຈຸບັນ, ການປ້ອງກັນເປັນຫຼັກ, ພື້ນຖານແລະຍາວນານ, ການກວດພົບ ການຈັດກາແກ້ໄຂເປັນສຳຄັນ, ຮີບດ່ວນ.
3- ຕ້ອງສ້າງແລະປັບປຸງບູລະນະ ລະບົບສະຖາບັນລະບຽບກົດໝາຍ ກ່ຽວກັບການຄຸ້ມຄອງເສດຖະກິດ-ສັງຄົມ ແລະ ການປ້ອງກັນແລະຕ້ານການສໍ້ລາດບັງຫຼວງ ທີ່ຄົບຊຸດ, ເປັນເອກະພາບ, ປະຕິບັດໄດ້ ແລະ ຈັດຕັ້ງປະຕິບັດຢ່າງເຂັ້ມງວດແລະມີປະສິດທິຜົນ. ເອົາໃນໃສ່ຢ່າງແທ້ຈິງເຖິງການກວດກາ, ຕິດຕາມກວດກາ ແລະຄວບຄຸມການໃຊ້ອຳນາດຂອງຜູ້ມີຕຳແໜ່ງແລະອຳນາດ; ລົບລ້າງສະຖານະອະພິສິດ ຜົນປະໂຫຍດພິເສດ, ຄວບຄຸມການຜູດຂາດຂອງລັດເປັນຢ່າງດີ.
4- ເສີມຂະຫຍາຍຢ່າງເຕັມສ່ວນ ບົດບາດແລະຄວາມຮັບຜິດຊອບ ຂອງອົງການຈັດຕັ້ງແລະຜູ້ແທນທີ່ໄດ້ຮັບເລືອກຕັ້ງ, ແນວໂຮມປະເທດຊາດ, ອົງການຈັດຕັ້ງການເມືອງ-ສັງຄົມ, ປະຊາຊົນ, ສຳນັກຂ່າວສານ ແລະ ສື່ມວນຊົນ, ວິສາຫະກິດ ແລະນັກທຸລະກິດ ໃນການປ້ອງກັນແລະຕ້ານການສໍ້ລາດບັງຫຼວງ. ເປັນເຈົ້າການໃນການເປີດເຜີຍຂໍ້ມູນຂ່າວສານ, ສະໜອງຂໍ້ມູນຂ່າວສານຢ່າງທັນການ, ແນະນຳທິດທາງໂຄສະນາກ່ຽວກັບຜົນຂອງການກວດພົບແລະການຈັດການແກ້ໄຂການສໍ້ຫຼາດບັງຫຼວງ ເພື່ອໃຫ້ສື່ມວນຊົນແລະປະຊາຊົນຕິດຕາມ ກວດກາ. ຕ້ອງຮັບຟັງປະຊາຊົນ, ຮັບຟັງຄຳຄິດເຫັນຂອງສັງຄົມ ເພື່ອເລືອກຮັບເອົາສິ່ງທີ່ຖືກຕ້ອງເໝາະສົມ, ບໍ່ແລ່ນຕາມກົ້ນຫາງສຽງ. ນີ້ແມ່ນໜຶ່ງໃນບັນດາປັດໄຈສຳຄັນ ທີ່ສ້າງຄວາມເຫັນດີເຫັນພ້ອມໃນສັງຄົມສູງ ສຳລັບວຽກງານການປ້ອງກັນແລະຕ້ານການສໍ້ລາດບັງຫຼວງ ໃນເວລາທີ່ຜ່ານມາ.
5- ຮັບປະກັນການຊີ້ນຳເປັນເອກະພາບ, ແໜ້ນແຟ້ນ, ຂຸ້ນຂ້ຽວ, ໝັ້ນຄົງ, ສອດຄ່ອງ, “ຖືກກັບບົດບາດ” ຂອງ ຄຊສປຕສ; ຄວາມເຫັນດີເຫັນພ້ອມ, ການສົມທົບຢ່າງແໜ້ນແຟ້ນ, ທັນການ, ມີປະສິດທິຜົນ ຂອງບັນດາອົງການຂອງພັກ ກັບບັນດາອົງການຂອງລັດເວົ້າລວມ, ເອົາໃຈໃສ່ເສີມຂະຫຍາຍບົດບາດເປັນຫຼັກແຫຼ່ງ ແລະ ການປະສານງານລະຫວ່າງບັນດາອົງການກວດກາ, ຕິດຕາມກວດກາ, ອົງການກິດຈະການພາຍໃນຂອງພັກ ກັບອົງການກວດກາ, ກວດສອບ, ສືບສວນ, ອົງການໄອຍະການ, ພິພາກສາ, ປະຕິບັດຄຳພິພາກສາ (ບັງຄັບຄະດີ) ເວົ້າສະເພາະ. ຮັບປະກັນຄວາມຊື່ສັດທ່ຽງທຳຂອງຖັນແຖວພະນັກງານ, ລັດຖະກອນໃນອົງການ, ໜ່ວຍງານທີ່ເຮັດໜ້າທີ່ປ້ອງກັນແລະຕ້ານການສໍ້ລາດບັງຫຼວງ.
6- ບັນດາວິທີແກ້ໄຂໃນການປ້ອງກັນແລະຕ້ານການສໍ້ລາດບັງຫຼວງ ຕ້ອງສອດຄ່ອງກັບເສດຖະກິດຕະຫຼາດກຳນົດທິດສັງຄົມນິຍົມຫວຽດນາມ, ສອດຄ່ອງກັບປະເພນີວັດທະນະທຳຂອງຊາດ. ໃນແຕ່ລະໄລຍະທີ່ຕ່າງກັນຈະຕ້ອງກຳນົດໜ້າທີ່ໃຈກາງແລະບັນດາວິທີແກ້ໄຂທີ່ມີລັກສະນະບຸກທະລຸ ທີ່ສອດຄ່ອງກັບສະພາບການຂອງປະເທດ, ຂອງທ້ອງຖິ່ນ ເພື່ອຈະສຸມໃສ່ຊີ້ນຳນຳພາການປະຕິບັດໃຫ້ມີປະສິດທິຜົນ. ເພີ່ມທະວີແລະເປີດກວ້າງການຮ່ວມມືສາກົນກ່ຽວກັບການປ້ອງກັນແລະຕ້ານການສໍ້ລາດບັງຫຼວງ.
ບາງບັນຫາໄດ້ມາຈາກການຊີ້ນຳການຈັດການກັບຄະດີສໍ້ລາດບັງຫຼວງແລະຄະດີເສດຖະກິດ
ໃນໄລຍະທີ່ຜ່ານມາ
ທີໜຶ່ງ, ບັນດາຄະດີສໍ້ລາດບັງຫຼວງແລະເສດຖະກິດທີ່ຮ້າຍແຮງແລະສັບສົນ ທີ່ຄົ້ນພົບແລະຈັດການແກ້ໄຂໃນເວລາທີ່ຜ່ານມາ ສ່ວນໃຫຍ່ແມ່ນເກີດຂຶ້ນໃນໄລຍະກ່ອນ(17). ຄວາມເປັນມາແລະສາເຫດຕົ້ນຕໍຂອງສະພາບນັ້ນແມ່ນ: 1- ປະເທດໃນຂະບວນການພັດທະນາ ແລະເຊື່ອມໂຍງສາກົນຢ່າງກວ້າງຂວາງເລິກເຊິ່ງ, ມັນຮຽກຮ້ອງໃຫ້ເລັ່ງການເຕີບໂຕ, ແຕ່ຄວາມຮັບຮູ້ເບື້ອງຕົ້ນກ່ຽວກັບເສດຖະກິດຕະຫຼາດ ແລະ ເສດຖະກິດຕະຫຼາດກຳນົດທິດສັງຄົມນິຍົມ, ກ່ຽວກັບການພັດທະນາແບບປົກຫຸ້ມ, ຍືນຍົງ... ໃນພະນັກງານ, ລັດຖະກອນຈຳນວນໜຶ່ງ ຍັງຖືກຈຳກັດ; ກົນໄກ, ນະໂຍບາຍບໍ່ສົມບູນ, ເຮັດໃຫ້ເກີດຊ່ອງຫວ່າງແລະຂໍ້ຕິດຂັດລະຫວ່າງ ຄວາມຕ້ອງການໃນການພັດທະນາ ກັບກອບກົດໝາຍແລະຄວາມສາມາດໃນການຄຸ້ມຄອງບໍລິຫານ, ພາໃຫ້ເກີດ “ການມ້າງຮົ້ວ” ຢູ່ຫຼາຍແຫ່ງ; 2- ໃນຂະບວນການຫັນປ່ຽນກົນໄກການຄຸ້ມຄອງປະຈຸບັນ, ຂາດກອບກົດໝາຍທີ່ຜູກມັດ ແລະ ບໍ່ໄດ້ເອົາໃຈໃສ່ຖືກລະດັບເຖິງວຽກງານການກວດກາ ຕິດຕາມກວດກາ ຄຸ້ມຄອງ, ບໍ່ເອົາໃຈໃສ່ປະເມີນຢ່າງຈະແຈ້ງວ່າ ສິ່ງທີ່ຂະຫຍັນຂັນເຄື່ອນ ປະດິດສ້າງ, ສິ່ງທີ່ເປັນການສ່ຽງໄພ, ການເຮັດລ້ຳໄປເພື່ອຜົນປະໂຫຍດສ່ວນຕົວ; ຂາດການກວດກາ ຄົ້ນເຜີຍ ກ່າວເຕືອນຢ່າງທັນການ ເຄັ່ງຄັດ ຂອງອົງການທີ່ປະຕິບັດໜ້າທີ່ຂັ້ນເທິງ, ນຳໄປສູ່ການກະທຳຜິດກົດໝາຍ, ສວຍໃຊ້ອຳນາດ, ລະເມີດກົດໝາຍ, ການສໍ້ລາດບັງຫຼວງ; 3- ຜົນສະທ້ອນຂອງ “ຈິນຕະນາການສັ້ນພຽງໄລຍະ”, ຮີບຮ້ອນທີ່ຈະເຕີບໃຫຍ່, ຈາກນັ້ນຈຶງມັກງ່າຍ, ປ່ອຍປະລະເຫຼີງລະບຽບວິໄນ ໃນວຽກງານຊີ້ນຳນຳພາ ຄຸ້ມຄອງເສດຖະກິດ-ສັງຄົມ; 4- ການຄວບຄຸມອຳນາດຂອງຜູ້ມີຕຳແໜ່ງແລະອຳນາດ ແມ່ນບໍ່ມີປະສິດຕິຜົນ; ການກວດກາຕົວເອງ, ການຄົ້ນເຜີຍການສໍ້ລາດບັງຫຼວງຢູ່ພາຍໃນ ຍັງແມ່ນຂອດທີ່ອ່ອນແອ; 5- ຈິດສຳນຶກໃນການບຳລຸງສ້າງ, ຝຶກຝົນຫຼໍ່ຫຼອມ, ຮັກສາຄຸນສົມບັດສິນທຳ ແລະ ບົດບາດເປັນແບບຢ່າງຂອງຫົວໜ້າຄະນະພັກ, ອົງການຈັດຕັ້ງພັກ, ອົງການແລະໜ່ວຍງານຕ່າງໆ ຍັງມີຂໍ້ຈຳກັດ, ບາງສະຖານທີ່ບາງຄັ້ງ ຍັງໄດ້ເບິ່ງຂ້າມ; ພະນັກງານ ລັດຖະກອນຈຳນວນໜຶ່ງໄດ້ເສື່ອມໂຊມທາງດ້ານຄຸນນະທຳ, ຄຸນນະວຸດທິ ແລະ ຄວາມສາມາດທີ່ຍັງບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການ.
ທີສອງ, ການພິຈາລະນາຄະດີແລະການຈັດການກັບການລະເມີດໃນກໍລະນີ ຄະດີທີ່ຜ່ານມາ ຈະຕ້ອງເຫັນຢ່າງສັດຈະວິພາກທີ່ສຸດ, ດ້ວຍທັດສະນະຮອບດ້ານ, ທັດສະນະປະຫວັດສາດ-ສະເພາະ ແລະ ທັດສະນະການພັດທະນາ; ວິເຄາະໄຈ້ແຍກສະພາບປະຫວັດສາດສະເພາະ ກ່ຽວກັບສະພາບການຕົວຈິງ ແລະ ຂໍ້ບັງຄັບທາງກົດໝາຍໃນເວລາທີ່ມີການລະເມີດ; ພິຈາລະນາສິ່ງຊຸກຍູ້, ຈຸດປະສົງຂອງການກະທຳຜິດ, ຜົນທີ່ຕາມມາ, ຄວາມເສຍຫາຍ ແລະສາເຫດ ຢ່າງຮອບຄອບ ເພື່ອມີການປະເມີນຢ່າງພາວະວິໄສ, ຮອບດ້ານ ໃນຜົນລວມຂອງການພົວພັນ. ຈາກນັ້ນ, ກຳນົດລັກສະນະທີ່ແທ້ຈິງຂອງຄະດີການລະເມີດ ແມ່ນການລະເມີດທາງການບໍລິຫານ, ທາງແພ່ງ ຫລືທາງອາຍາ ເພື່ອຈະຕັດສິນການຈັດການແກ້ໄຂທີ່ເໝາະສົມ, “ສົມເຫດສົມຜົນ”, “ເຂັ້ມງວດທີ່ສຸດ, ແຕ່ກໍມະນຸດສະທຳທີ່ສຸດ”, “ຟ້ອງຮ້ອງຄະດີໜຶ່ງ, ກ່າວເຕືອນທົ່ວທັງເຂດ”; ຈັດການລົງໂທດຢ່າງເຂັ້ມງວດຕໍ່ຜູ້ກະທຳຜິດເພື່ອຜົນປະໂຫຍດສ່ວນຕົວແລະສິ່ງຊຸກຍູ້ສ່ວນຕົວ, ພ້ອມກັນນັ້ນກໍປົກປ້ອງ, ສົ່ງເສີມຊົມເຊີຍຜູ້ທີ່ກ້າຄິດ, ກ້າເຮັດ, ກ້າບຸກບືນ, ປ່ຽນແປງໃໝ່ປະດິດສ້າງ ເພື່ອພາລະກິດລວມ ຕາມຄຳສະຫຼຸບຂອງສະຫາຍເລຂາທິການໃຫຍ່ ຫງວຽນຝູຈ້ອງ, ຫົວໜ້າ ຄຊສປຕສ(18). ຄະນະປະຈຳ ຄຊສປຕສ ໄດ້ຊາບຊຶມຢ່າງເລິກເຊິ່ງ ຄຳຊີ້ນຳຂອງສະຫາຍເລຂາທິການໃຫຍ່, ປະທານປະເທດ ໃນການຊີ້ນຳການຈັດການບັນດາກໍລະນີຄະດີທີ່ຜ່ານມາ (19); ຄະນະຈັດຕັ້ງສູນກາງກຳລັງສ້າງແລະໃຫ້ຄຳແນະນຳແກ່ກົມການເມືອງຢ່າງຮີບດ່ວນ ກ່ຽວກັບກົນໄກເພື່ອສົ່ງເສີມ ແລະປົກປ້ອງພະນັກງານທີ່ມີຄວາມຂະຫຍັນຂັນເຄື່ອນ, ປ່ຽນແປງໃໝ່, ປະດິດສ້າງ, ກ້າຄິດ, ກ້າເຮັດ, ກ້າຮັບຜິດຊອບ ເພື່ອຜົນປະໂຫຍດລວມ.
ທີສາມ, ບັນດາຄະດີສໍ້ລາດບັງຫຼວງແລະຄະດີເສດຖະກິດທີ່ເກີດຂຶ້ນໃນເວລາທີ່ຜ່ານມາແມ່ນສັບສົນ, ຮ້າຍແຮງທີ່ສຸດ ແລະ ຮ້າຍແຮງພິເສດ, ກໍ່ໃຫ້ເກີດຄວາມເສຍຫາຍຢ່າງໃຫຍ່ຫຼວງ(20); ການກະທຳຜິດມີການປະສົມປະສານແລະເຊື່ອມໂຍງລະຫວ່າງການກະທຳລະເມີດລະບຽບການຄຸ້ມຄອງເສດຖະກິດ, ຕຳແໜ່ງ ແລະ ການກະທຳສໍ້ລາດບັງຫຼວງ (21); ຜູ້ກະທຳຜິດແມ່ນຜູ້ທີ່ມີຕຳແໜ່ງແລະອຳນາດ, ພະນັກງານຂັ້ນສູງ, ນັບທັງພະນັກງານໃນກອງກຳລັງປາບປາມການສໍ້ລາດບັງຫຼວງ, ແມ່ນຜູ້ທີ່ມີຄວາມຮູ້ແລະປະສົບການ, ເຂົາໃຊ້ທຸກກົນອຸບາຍ ວິທີທາງເພື່ອຕ້ານທານ, ຫລີກລ້ຽງ, ປົກປິດຄວາມຜິດພາດ, ທຳລາຍຫຼັກຖານ, ກະແຈກກະຈາຍຊັບສິນທີ່ໄດ້ມາຈາກອາດຊະຍາກຳ...,ກໍ່ຄວາມຫຍຸ້ງຍາກໃນການສືບສວນ ແລະຈັດການແກ້ໄຂ ຂອງອົງການດຳເນີນຄະດີ; ແຕ່ກໍມີຜູ້ທີ່ເປັນພະນັກງານ, ລັດຖະກອນ, ຜູ້ອອກແຮງງານທີ່ຂຶ້ນກັບ, ພາຍໃຕ້ການນຳພາແລະຊີ້ນຳຂອງຜູ້ກະທຳຜິດທີ່ເປັນຫົວໜ້າໜ່ວຍງານຫຼືອົງການຈັດຕັ້ງ, ຖືກຜູກມັດດ້ວຍກົນໄກແລະຄຳສັ່ງທາງການບໍລິຫານ, ຍັງບໍ່ທັນຮູ້ເຖິງການກະທຳຜິດເທື່ອ.
ດັ່ງນັ້ນ, ຂະບວນການຊີ້ນຳ, ຈັດການຕ້ອງຊາບຊຶມຫຼັກການ “ບໍ່ມີເຂດຫວງຫ້າມ”, “ບໍ່ມີການຍົກເວັ້ນ”, “ແຈ້ງຊັດຮອດບ່ອນໃດ, ການຈັດການໄປທີ່ນັ້ນ”; ພິຈາລະນາແລະປະເມີນຢ່າງຖືກຕ້ອງກ່ຽວກັບ ທາດແທ້, ບົດບາດ, ລັກສະນະ, ລະດັບການລະເມີດຂອງຜູ້ກະທຳຜິດ, ຖືກຕ້ອງຕາມຫຼັກການເຄື່ອນໄຫວຂອງອົງການແລະການຈັດຕັ້ງບໍລິຫານລັດ ໃນບັນດາສາຍພົວພັນ ລະຫວ່າງອົງການເຈົ້າພາບ ແລະ ອົງການປະສານງານ (ວຽກງານໜຶ່ງ ໄດ້ມອບໝາຍໃຫ້ພຽງໜ່ວຍງານຫຼືອົງການໜຶ່ງເທົ່ານັ້ນ, ຜູ້ເປັນປະທານຮັບຜິດຊອບຫຼັກ), ລະຫວ່າງຫົວໜ້າແລະພະນັກງານ, ລະຫວ່າງຜູ້ທີ່ມີອຳນາດຕັດສິນ ແລະ ຜູ້ທີ່ໃຫ້ຄຳແນະນຳ, ຊ່ວຍເຫຼືອ, ດຳເນີນການ; ຈາກນັ້ນ ກຳນົດຄວາມຮັບຜິດຊອບທາງອາຍາ ຫຼືທາງບໍລິຫານຢ່າງຈະແຈ້ງ ແລະແຍກເປັນລາຍບຸກຄົນໃຫ້ເໝາະສົມ(22), ດ້ວຍຈິດໃຈ “ການປິ່ນປົວພະຍາດເພື່ອຊ່ວຍຊີວິຜູ້ຄົນ”, ຫລີກລ້ຽງການຈັດການທາງອາຍາແບບແຜ່ລາມ; ພ້ອມກັນນັ້ນ ຕ້ອງເອົາໃຈໃສ່ເປັນສຳຄັນ ເຖິງການກູ້ຄືນຊັບສິນທີ່ສູນເສຍ, ໃຫ້ອະໄພຢ່າງເໝາະສົມແກ່ຜູ້ທີ່ຮູ້ກິນແໜງ, ກັບໃຈ, ຕັ້ງໜ້າແກ້ໄຂຜົນກະທົບທີ່ເກີດຈາກພວກເຂົາ.
ທີສີ່, ຈາກການຈັດການລົງໂທດຢ່າງເຂັ້ມງວດ ຕໍ່ພະນັກງານ ສະມາຊິກພັກທີ່ກະທຳຜິດຫຼາຍຄົນໃນເວລາທີ່ຜ່ານມານັ້ນ, ມີຄວາມຄິດເຫັນວ່າ, ການຈັດການຢ່າງເຂັ້ມງວດຄືແນວນັ້ນ ຈະຫຼຸດຜ່ອນການປ່ຽນແປງໃໝ່, ຄວາມຄິດສ້າງສັນ, ເຮັດໃຫ້ຜູ້ທີ່ກ້າຄິດ, ກ້າເຮັດ, ກ້າຮັບຜິດຊອບ "ທໍ້ຖອຍໃຈ", ເຮັດໃຫ້ການພັດທະນາ "ຊ້າລົງ"; ພະນັກງານ ລັດຖະກອນແລະພະນັກງານນຳພາຄຸ້ມຄອງຈຳນວນໜຶ່ງ ມີປະກົດການຂາດຄວາມເດັດດ່ຽວ, ບໍ່ກ້າເຮັດ, ຫຼີກລ້ຽງ, ຍູ້ວຽກ, ຢ້ານຄວາມຜິດ, ນຳໄປສູ່ການຢຸດສະງັກຊັກຊ້າ. ຕາມຈິງແລ້ວ, ວຽກງານການປ້ອງກັນແລະຕ້ານການສໍ້ລາດບັງຫຼວງ ແລະ ການປັບປຸງພັກໃນເວລາທີ່ຜ່ານມາ ບໍ່ໄດ້ເຮັດໃຫ້ການພັດທະນາ“ຢຸດສະງັກຊັກຊ້າ", ແຕ່ໄດ້ປະກອບສ່ວນຊຸກຍູ້ການພັດທະນາເສດຖະກິດ-ສັງຄົມ (23); ປັບປຸງຄວາມເຊື່ອໝັ້ນ, ສ້າງຄວາມເຫັດດີເຫັນພ້ອມ, ຄວາມເບີກບານມ່ວນຊື່ນໃນປະຊາຊົນ; ເຮັດໃຫ້ພະນັກງານ ລັດຖະກອນມີຄວາມຮອບຄອບ ລະມັດລະວັງກວ່າ ໃນການແກ້ໄຂວຽກງານ. ການຍູ້ແຮງການປ້ອງກັນແລະຕ້ານການສໍ້ລາດບັງຫຼວງ ແລະ ການປັບປຸງພັກ ພຽງແຕ່ເຮັດໃຫ້ຜູ້ທີ່ມີເຈດຕະນາບໍ່ບໍລິສຸດ, ບໍ່ກຳແໜ້ນແນວທາງ ແຜນນະໂຍບາຍຂອງພັກ ແລະນະໂຍບາຍ ກົດໝາຍຂອງລັດ, ຜູ້ທີ່ຂາດຄວາມກ້າຫານ ຕ້ອງ “ທໍ້ຖອຍ”. ດັ່ງນັ້ນ, ຕ້ອງຊາບຊຶມແລະປະຕິບັດຢ່າງເຂັ້ມງວດ ຄຳຊີ້ນຳຂອງສະຫາຍເລຂາທິການໃຫຍ່, ປະທານປະເທດ, ຫົວໜ້າ ຄຊສປຕສ ກ່ຽວກັບການປັບປຸງແລະຕໍ່ສູ້ກັບແນວຄິດກັງວົນນີ້ ໃນພະນັກງານສະມາຊິກພັກ, ໂດຍສະເພາະແມ່ນພະນັກງານນຳພາ, ຄຸ້ມຄອງທຸກລະດັບ; ຕ້ອງມີ “ວັກຊີນ” ເພື່ອປ້ອງກັນ “ໄວຣັດຢຸດນິ່ງ” ໃນໄວໆນີ້ ຄືທີ່ທ່ານນາຍົກລັດຖະມົນຕີໄດ້ຊີ້ນຳ. ເດັດຂາດບໍ່ເປັນອັດຕະວິໄສ, ພຶງພໍໃຈ, ບໍ່ລັ່ງເລ ລໍຖ້າ, ແຕ່ຕ້ອງສືບຕໍ່ຊຸກຍູ້, ຂຸ້ນຂ້ຽວ, ເປັນປົກກະຕິ, ຕໍ່ເນື່ອງ, ດ້ວຍຄວາມຕັດສິນໃຈສູງກວ່າ, ແຂງແຮງກວ່າ, ມີປະສິດທິຜົນກວ່າ ໃນວຽກງານການປ້ອງກັນແລະຕ້ານການສໍ້ລາດບັງຫຼວງ ແລະປັບປຸງພັກ. ເອົາໃນໃສ່ຊີ້ນຳການແກ້ໄຂບັນດາກໍລີ, ຄະດີທີ່ເກີດຂຶ້ນຢ່າງເຄັ່ງຄັດ, ທັງຍູ້ແຮງການປ້ອງກັນການສໍ້ບາດບັງຫຼວງ, ພ້ອມທັງຍົກສູງສະຕິລະວັງຕົວ ແລະຈັດການກັບການກະທຳທີ່ສວຍໃຊ້ການຕ້ານການສໍ້ລາດບັງຫຼວງເພື່ອກໍ່ຄວາມວຸ້ນວາຍ, ໃສ່ຮ້າຍປ້າຍສີ, ທຳລາຍຄວາມສາມັກຄີພາຍໃນ, ທຳລາຍກອງປະຊຸມໃຫຍ່ຂອງພັກທຸກຂັ້ນ.
ທີຫ້າ, ຜ່ານການຈັດການແກ້ໄຂກໍລະນີ ຄະດີສໍ້ລາດບັງຫຼວງແລະຄະດີເສດຖະກິດ, ຕ້ອງເອົາໃຈໃສ່ໃນການກວດຫາຊ່ອງຫວ່າງແລະຂໍ້ບົດພ່ອງ ເພື່ອຈະໄດ້ດັດແປງ, ປັບປຸງ, ບູລະນະ ແລະ ຈັດຕັ້ງປະຕິບັດ ລະບົບສະຖາບັນກົດໝາຍກ່ຽວກັບການຄຸ້ມຄອງເສດຖະກິດ-ສັງຄົມ, ກໍ່ສ້າງພັກ ແລະ ປ້ອງກັນແລະຕ້ານການສໍ້ລາດບັງຫຼວງ ຢ່າງເຂັ້ມງວດ ແລະ ມີປະສິດທິຜົນ.
ບາງບັນຫາທີ່ຕ້ອງໄດ້ຮັບການເອົາໃຈໃສ່ ໃນວຽກງານການປ້ອງກັນແລະຕ້ານການສໍ້ລາດບັງຫຼວງ
ໃນໄລຍະທີ່ຈະມາເຖິງ
ເຖິງວ່າໄດ້ບັນລຸຜົນສຳເລັດທີ່ສຳຄັນຫຼາຍຢ່າງ, ແຕ່ການສໍ້ລາດບັງຫຼວງໃນບາງຂົງເຂດຍັງຮ້າຍແຮງ, ສັບສົນ, ສ້າງຄວາມເດືອດຮ້ອນໃນສັງຄົມ 24); ການສໍ້ລາດບັງຫຼວງຍັງແມ່ນໜຶ່ງໃນບັນດາໄພອັນຕະລາຍທີ່ນາບຂູ່ຄວາມຢູ່ລອດຂອງພັກ ແລະລະບອບປະຊາທິປະໄຕປະຊາຊົນ.
1- ການສໍ້ລາດບັງຫຼວງເກີດຂຶ້ນພາຍໃນໂດຍບຸກຄົນທີ່ມີຕຳແໜ່ງແລະອຳນາດ. ການປ້ອງກັນແລະຕ້ານການສໍ້ລາດບັງຫຼວງແມ່ນການຕໍ່ສູ້ພາຍໃນຕົວເຮົາເອງ, ໃນແຕ່ລະອົງການ, ການຈັດຕັ້ງ, ໜ່ວຍງານ, ທ້ອງຖິ່ນ; ມັນກ່ຽວຂ້ອງກັບຜົນປະໂຫຍດ, ເງິນຄຳຊັບສິນ, ຕຳແໜ່ງ, ຊື່ສຽງ, ກຽດສັກສີຂອງອົງການຈັດຕັ້ງແລະບຸກຄົນ; ດັ່ງນັ້ນ, ແມ່ນການຕໍ່ສູ້ທີ່ຫຍຸ້ງຍາກ, ສັບສົນ, ຍາວນານທີ່ສຸດ, ມັກຈະຖືກສວຍໃຊ້ໂດຍບັນດາອິດທິກຳລັງສັດຕູແລະພວກຜູ້ບໍ່ດີ ເພື່ອທຳລາຍແລະເຮັດໃຫ້ເກີດຄວາມບໍ່ໝັ້ນຄົງທາງການເມືອງ, ດັ່ງນັ້ນ:
- ຕ້ອງມີຄວາມເດັດດ່ຽວໃນການກວດຄົ້ນແລະຈັດການກັບການສໍ້ລາດບັງຫຼວງ; ທັງຕ້ອງຕັ້ງໝັ້ນໃນການອົບຮົມສຶກສາ, ຄຸ້ມຄອງ, ປ້ອງກັນ, ບໍ່ໃຫ້ການສໍ້ລາດບັງຫຼວງເກີດຂຶ້ນ; ພ້ອມກັນນັ້ນ, ເສີມຂະຫຍາຍປັດໄຈທີ່ຕັ້ງໜ້າ ໃນການຕໍ່ສູ້ຕ້ານການສໍ້ລາດບັງຫຼວງ, ກໍ່ສ້າງວັດທະນະທຳການປະຢັດບໍ່ທຸຈະລິດໃຫ້ຈົນໄດ້, ກ່ອນອື່ນແມ່ນໃນພະນັກງານ ສະມາຊິກພັກ ລັດຖະກອນ ພາລະກອນ.
- ເສີມຂະຫຍາຍບົດບາດຂອງປະຊາຊົນ, ອົງການຈັດຕັ້ງສັງຄົມ, ສື່ມວນຊົນ ໜັງສືພິມຂ່າວສານ ໃນການຕໍ່ສູ້ຕ້ານການສໍ້ລາດບັງຫຼວງ; ທັງຕ້ອງມີສະຕິລະວັງຕົວ ແລະຕໍ່ສູ້ກັບກົນອຸບາຍ, ການເຄື່ອນໄຫວຂອງບັນດາອິດທິກຳລັງສັດຕູແລະພວກຜູ້ບໍ່ດີ ທີ່ສວຍໃຊ້ການຕໍ່ສູ້ຕ້ານການສໍ້ລາດບັງຫຼວງ ເພື່ອໃສ່ຮ້າຍປ້າຍສີ, ທຳລາຍພັກ, ລັດ ແລະລະບອບປະຊາທິປະໄຕປະຊາຊົນ.
2- ການປ້ອງກັນແລະຕ້ານການສໍ້ລາດບັງຫຼວງແມ່ນໜ້າທີ່ສຳຄັນແລະເປັນປົກກະຕິ; ຕ້ອງໄດ້ດຳເນີນການໃນທຸກລະດັບ, ຂະແໜງການ ແລະທຸກຂົງເຂດ, ປະຕິບັດມາດຕະການຕ່າງໆຢ່າງຄົບຊຸດ; ມີຈຸດໜັກໃຈການ, ບໍ່ມີເຂດຫວງຫ້າມ, ບໍ່ມີການຍົກເວັ້ນ.
ຫົວໜ້າຕ້ອງເປັນແບບຢ່າງ, ເດັດດ່ຽວ ແລະມີຄວາມຮັບຜິດຊອບຕໍ່ຈຸດອ່ອນ ແລະຂໍ້ຜິດພາດໃນການສໍ້ລາດບັງຫຼວງ ຢູ່ໃນອົງການຈັດຕັ້ງ, ໜ່ວຍງານ ຫຼືທ້ອງຖິ່ນຂອງຕົນ. ຕ້ອງຈັດການແກ້ໄຂຢ່າງເດັດຂາດ ຕໍ່ການກະທຳທີ່ຫຼີກລ້ຽງ, ປົກປິດ, ປ່ອຍມືໃຫ້ການສໍ້ລາດບັງຫຼວງ; ແຕ່ຕ້ອງປະເມີນຢ່າງຖືກຕ້ອງ ແລະ ປົກປ້ອງອົງການ, ການຈັດຕັ້ງ, ໜ່ວຍງານ, ຫົວໜ້າອົງການທີ່ມີຄວາມເປັນເຈົ້າການ, ຕັ້ງໜ້າໃນການກວດຫາ, ກີດກັ້ນ, ຈັດການແກ້ໄຂການສໍ້ລາດບັງຫຼວງ.
3- ການສໍ້ລາດບັງຫຼວງແມ່ນ “ຂໍ້ບົກພ່ອງແຕ່ກຳເນີດຂອງອຳນາດ”, ດັ່ງນັ້ນ ຜູ້ທີ່ໄດ້ຮັບຕຳແໜ່ງແລະອຳນາດຕ້ອງຝຶກຝົນຫຼໍ່ຫຼອມຢ່າງບໍ່ຢຸດຢັ້ງ, ຕ້ອງກວດາຕົນເອງແລະແກ້ໄຂຕົນເອງຢ່າງເປັນປະຈຳ; ພ້ອມກັນນັ້ນ ກໍຕ້ອງເພີ່ມທະວີການກວດກາ, ຕິດຕາມກວດກາການໃຊ້ອຳນາດ ຂອງຜູ້ທີ່ມີຕຳແໜ່ງແລະອຳນາດ; ທຸກອຳນາດຕ້ອງຖືກຄວບຄຸມຢ່າງແໜ້ນແຟ້ນດ້ວຍກົນໄກ, ອຳນາດຕ້ອງໄດ້ຜູດມັດດ້ວຍຄວາມຮັບຜິດຊອບ, ມີອຳນາດເທົ່າໃດຄວາມຮັບຜິດຊອບເທົ່ານັ້ນ, ອຳນາດຍິ່ງສູງຄວາມຮັບຜິດຊອບກໍຍິ່ງໜັກໜ່ວງ, ການລ່ວງອຳນາດ ໃຊ້ອຳນາດໃນທາງທີ່ຜິດ ຈະຕ້ອງໄດ້ຮັບການກວດສອບເພື່ອຮັບຜິດຊອບແລະຈັດການກັບການລະເມີດ. ດັ່ງນັ້ນ, ການເຄື່ອນໄຫວຂອງອົງການ, ການຈັດຕັ້ງ, ໜ່ວຍງານຕ້ອງໄດ້ເປີດເຜີຍໂປ່ງໃສ, ຕ້ອງກວດກາຊັບສິນ, ລາຍໄດ້ຂອງຜູ້ທີ່ມີຕຳແໜ່ງແລະອຳນາດຢ່າງແໜ້ນແຟ້ນ ແລະ ຍົກສູງຄວາມຮັບຜິດຊອບໃນການອະທິບາຍລາຍງານຂອງຜູ້ທີ່ມີຕຳແໜ່ງແລະອຳນາດ; ກໍ່ສ້າງແລະປັບປຸງບູລະນະລະບົບສະຖາບັນລະບຽບກົດໝາຍຂອງພັກແລະລັດ ເພື່ອໃຫ້ “ບໍ່ສາມາດສໍ້ລາດບັງຫຼວງ”, “ບໍ່ກ້າສໍ້ລາດບັງຫຼວງ” ແລະ “ບໍ່ຕ້ອງການສໍ້ລາດບັງຫຼວງ”.
4- ເອົາໃຈໃສ່ຍົກສູງຄຸນນະພາບແລະຄວາມສາມາດຂອງຖັນແຖວພະນັກງານທີ່ເຮັດໜ້າທີ່ປ້ອງກັນແລະຕ້ານການສໍ້ລາດບັງຫຼວງ; ໂດຍສະເພາະແມ່ນພະນັກງານກວດກາ, ການເມືອງພາຍໃນພັກ, ອົງກວດການ, ກວດສອບ, ສືບສວນ, ອົງການໄອຍະການ, ສານ ແລະ ອົງການບັງຄັບຄະດີ ທີ່ເຮັດວຽກງານກວດຫາ, ສືບສວນ ແລະຈັດການກໍລະນີ ຄະດີສໍ້ລາດບັງຫຼວງໂດຍກົງ. ການຄວບຄຸມອຳນາດແລະການປະຕິບັດຄວາມຊື່ສັດ ຈະຕ້ອງໄດ້ປະຕິບັດຢ່າງມີປະສິດທິຜົນໃນກອງກຳລັງເຫຼົ່ານີ້ກ່ອນ, ຕ້ອງ “ຕ້ານການສໍ້ລາດບັງຫຼວງໃນກະໂຕອົງການຕ້ານການສໍ້ລາດບັງຫຼວງ” ຕາມທີ່ສະຫາຍເລຂາທິການໃຫຍ່ ຫງວຽນຝູຈ້ອງ ຊີ້ນຳ (25).
5- ສຸມໃສ່ຊີ້ນຳນຳພາການຫັນ ຈຸດປະສົງ, ທັດສະນະ, ໜ້າທີ່, ວິທີແກ້ໄຂການປ້ອງກັນແລະຕ້ານການສໍ້ລາດບັງຫຼວງ ທີ່ວາງອອກໃນມະຕິ, ຂໍ້ສະຫຼຸບ, ຄຳສັ່ງຂອງພັກ ເປັນນິຕິກຳ ເພື່ອຈັດຕັ້ງປະຕິບັດຢ່າງເຂັ້ມງວດ. ຜ່ານຜ່າສະຖານະການທີ່ມະຕິຕົກລົງຖືກຕ້ອງ, ຂໍ້ກຳນົດກົດລະບຽບຂອງພັກແລະກົດໝາຍຂອງລັດບໍ່ຂາດແຄນ ແຕ່ການຈັດຕັ້ງປະຕິບັດບໍ່ເຂັ້ມງວດ ແລະບໍ່ມີປະສິດຕິຜົນ.
6- ສຸມໃສ່ຊີ້ນຳເພື່ອເລ່ງຄວາມຄືບໜ້າ, ຊີ້ແຈງກໍລະນີພະນັກງານສະມາຊິກພັກທີ່ກ່ຽວຂ້ອງກັບຄະດີຢ່າງຮີບດ່ວນ ເພື່ອຮັບໃຊ້ວຽກງານບຸກຄະລາກອນຂອງກອງປະຊຸມໃຫຍ່ຂອງພັກທຸກຂັ້ນ.
ສະຫາຍເລຂາທີການໃຫຍ່ຫງວຽນຝູຈ້ອງຮຽກຮ້ອງ: “ຕ້ອງສຸມໃສ່ການເຮັດ, ການກະທຳ, ການປະຕິບັດ, ບໍ່ພຽງແຕ່ຄຳເວົ້າ, ໃນເຈ້ຍໜັງສື, ຮ້ອງໂຮລວມໆເທົ່ານັ້ນ, ແຕ່ດ້ວຍການເຮັດສິ່ງທີ່ສະເພາະ, ແທດຈິງ, ມີປະສິດທິຜົນ ແລະເບິ່ງເຫັນໃນຄວາມເປັນຈິງ”(26); “ສູນກາງໄດ້ແລະພວມເຮັດຢ່າງເດັດດ່ຽວ, ທ້ອງຖິ່ນກໍຕ້ອງເຮັດຢ່າງເດັດດ່ຽວ. ໃນວຽກງານຊີ້ນຳຂອງພັກ, ເອກະສານທາງກົດໝາຍບໍ່ຂາດແຄນ, ແຕ່ສິ່ງທີ່ຕ້ອງການທີ່ສຸດໃນປະຈຸບັນນີ້ແມ່ນຄວາມຮູ້ສຶກຕື່ນຕົວ, ຄວາມເປັນເອກະພາບສູງ ກ່ຽວກັບເຈດຈຳນົງແລະການກະທຳ. ບັນດາຄະນະພັກ ອົງການຈັດຕັ້ງພັກ, ບັນດາກະຊວງ ຂະແໜງການ ທ້ອງຖິ່ນ, ບັນດາຫົວໜ້າຄະນະພັກແລະອຳນາດການປົກຄອງ ຕ້ອງເຂົ້າຮ່ວມຢ່າງຄົບຊຸດ ດ້ວຍຄວາມຕັດສິນໃຈສູງ ແລະເດັດດ່ຽວຂຸ້ນຂ້ຽວກວ່າອີກ”(27).
-------------------------
(1) ຄະນະຊີ້ນຳສູນກາງກ່ຽວກັບການປ້ອງກັນແລະຕ້ານການສໍ້ລາດບັງຫຼວງ ໄດ້ຮັບການສ້າງຕັ້ງໃນວັນທີ 1 ກຸມພາ 2013 ຕາມມະຕິຕົກລົງເລກທີ 162-QĐ/TW ຂອງກົມການເມືອງສູນກາງພັກ.
(2) ປີ 2019, ທຽບກັບຕົ້ນວາລະກອງປະຊຸມໃຫຍ່ຄັ້ງທີ XII ຂອງພັກ (ປີ 2016), ອັດຕາສ່ວນການປະເມີນວຽກງານ “ການປ້ອງກັນແລະຕ້ານການສໍ້ລາດບັງຫຼວງ, ການຟຸມເຟືອຍ, ຜົນປະໂຫຍດໝູ່ພວກ” ໄດ້ບັນລຸຜົນງານທີ່ໜ້າຍິນດີ, ເພີ່ມຂຶ້ນຈາກ 29% ເປັນ 48%; ປີ 2020, ອັດຕາສ່ວນການປະເມີນວຽກງານການປ້ອງກັນແລະຕ້ານການສໍ້ລາດບັງຫຼວງ ຄາດວ່າຈະມີການປ່ຽນແປງໃນທາງບວກບັນລຸ 75% (ປີ 2018 ຄາດວ່າປີ 2019 ຈະບັນລຸອັດຕາສ່ວນ 66%; ປີ 2017 ຄາດວ່າປີ 2018 ຈະບັນລຸອັດຕາສ່ວນ 52%; ປີ 2016 ຄາດວ່າປີ 2017 ຈະບັນລຸອັດຕາສ່ວນ 45% - ຕາມລາຍງານສະບັບເລກທີ 23-BCĐT/DLXH, ວັນທີ 16 ເມສາ 2020, ຂອງສະຖາບັນຫາງສຽງສັງຄົມ, ຄະນະໂຄສະນາອົບຮົມສູນກາງ). ຕາມອົງການຄວາມໂປ່ງໃສສາກົນ, ດັດຊະນີຄວາມຮັບຮູ້ກ່ຽວກັບການສໍ້ລາດບັງຫຼວງ (CPI) ຂອງຫວຽດນາມໃນປີ 2015 ບັນລຸໄດ້ 31/100 ຄະແນນ, ເປັນອັນດັບທີ 112/168 ໃນຕາຕະລາງຈັດອັນດັບໂລກ; ປີ 2016 ບັນລຸ 33/100 ຄະແນນ, ເປັນອັນດັບ 113/176 ໃນຕາຕະລາງຈັດອັນດັບໂລກ; ປີ 2019 ບັນລຸ 37/100 ຄະແນນ, ເປັນອັນດັບ 96/180 ໃນຕາຕະລາງຈັດອັນດັບໂລກ.
(3) ຕາມດັດຊະນີປະສິດທິຜົນການຄຸ້ມຄອງແລະບໍລິຫານສາທາລະນະຂັ້ນແຂວງຢູ່ຫວຽດນາມປີ 2019 (PAPI 2019), ຄວາມຮັບຮູ້ກ່ຽວກັບລະດັບການປ່ຽນແປງຂອງການສໍ້ລາດບັງຫຼວງ ຢູ່ອຳນາດການປົກຄອງຂັ້ນຕ່າງໆ ສະແດງອອກດັ່ງນີ້: ລະດັບປະເທດ, ລະດັບການສໍ້ລາດບັງຫຼວງຫຼຸດລົງ ຢູ່ໃນອັດຕາສ່ວນ 54,22% (ປີ 2018 ຢູ່ໃນອັດຕາສ່ວນ 49,32%); ລະດັບແຂວງ / ນະຄອນ, ລະດັບການສໍ້ລາດບັງຫຼວງຫຼຸດລົງ ຢູ່ໃນອັດຕາສ່ວນ 59,71% (ປີ 2018 ຢູ່ໃນອັດຕາສ່ວນ 55,68%); ລະດັບຕາແສງ, ລະດັບການສໍ້ລາດບັງຫຼວງຫຼຸດລົງ ຢູ່ໃນອັດຕາສ່ວນ 65,42% (ປີ 2018 ຢູ່ໃນອັດຕາສ່ວນ 59,78%).
(4) ໃນນັ້ນ ກຳມະການສູນກາງພັກ, ອະດີດກຳມະການສູນກາງພັກມີ 23 ສະຫາຍ (2 ສະຫາຍເປັນກຳມະການກົມການເມືອງສູນກາງ, 1 ສະຫາຍເປັນອະດີດກຳມະການກົມການເມືອງສູນກາງ), ນາຍທະຫານຊັ້ນນາຍພົນໃນກອງກຳລັງປະກອບອາວຸດມີ 22 ສະຫາຍ.
(5) ໃນນັ້ນ, ອາດຊະຍາກຳການສໍ້ລາດບັງຫຼວງ: ເລີ່ມການຟ້ອງຮ້ອງ, ສືບສວນ 1.753 ຄະດີ / ຜູ້ຕ້ອງຫາ 3.800 ຄົນ, ຟ້ອງສານ 1.796 ຄະດີ / ຜູ້ຕ້ອງຫາ 4.113 ຄົນ, ພິພາກສາຄະດີຂັ້ນຕົ້ນ 1.691 ຄະດີ / ຈຳເລີຍ 3.841 ຄົນ; ອາດຊະຍາກຳອື່ນກ່ຽວກັບຕຳແໜ່ງ: ເລີ່ມການຟ້ອງຮ້ອງ, ສືບສວນ 226 ຄະດີ / ຜູ້ຕ້ອງຫາ 712 ຄົນ, ຟ້ອງສານ 204 ຄະດີ / ຜູ້ຕ້ອງຫາ 721 ຄົນ, ພິພາກສາຄະດີຂັ້ນຕົ້ນ 185 ຄະດີ / ຈຳເລີຍ 704 ຄົນ; ອາດຊະຍາກຳເສດຖະກິດ: ເລີ່ມການຟ້ອງຮ້ອງ, ສືບສວນ 10.199 ຄະດີ / ຜູ້ຕ້ອງຫາ 16.174 ຄົນ, ຟ້ອງສານ 8.397 ຄະດີ / ຜູ້ຕ້ອງຫາ 15.517 ຄົນ, ພິພາກສາຄະດີຂັ້ນຕົ້ນ 8.042 ຄະດີ / ຈຳເລີຍ 14.481 ຄົນ.
(6) ແຕ່ຕົ້ນວາລະກອງປະຊຸມໃຫຍ່ຄັ້ງທີ XII ຂອງພັກມາເຖິງປະຈຸບັນນີ້, ໄດ້ຕິດຕາມແລະຊີ້ນຳການຈັດການແກ້ໄຂ 114 ຄະດີ, ໃນນັ້ນ 92 ຄະດີທາງເສດຖະກິດແລະການສໍ້ລາດບັງຫຼວງທີ່ຮ້າຍແຮງ, ສັບສົນ, ໄດ້ຮັບຄວາມສົນໃຈທີ່ສຸດຈາກປະຊາຊົນ. ມາເຖິງປະຈຸບັນ, ໄດ້ສິ້ນສຸດການສືບສວນ, ຟ້ອງສານ ແລະ ນຳເຂົ້າສູ່ການພິພາກສາຄະດີຂັ້ນຕົ້ນ 62 ຄະດີ / ຈຳເລີຍ 598 ຄົນ, ຕັດສິນປະຫານຊີວິດຈຳເລີຍ 3 ຄົນ, ຕັດສິນຈຳຄຸກຕະຫຼອດຊີວິດ 12 ຈຳເລີຍ (11 ຄົນ), ຈຳເລີຍ 8 ຄົນຖືກຈຳຄຸກ 30 ປີ, ຈຳເລີຍ 19 ຄົນຖືກຈຳຄຸກຕັ້ງແຕ່ 20 ປີເຖິງຕ່ຳກວ່າ 30 ປີ, ຈຳເລີຍ 510 ຄົນຖືກຈຳຄຸກຕັ້ງແຕ່ 12 ເດືອນເຖິງຕ່ຳກວ່າ 20 ປີ, ໃນນັ້ນຈຳເລີຍ 120 ຄົນຖືກຈຳຄຸກດ້ວຍການຜັດໂທດ, ຈຳເລີຍ 16 ຄົນຖືກດັດສ້າງໂດຍບໍ່ຄຸມຕົວ, ຈຳເລີຍ 29 ຄົນຖືກປັບໄໝ, ຈຳເລີຍ 1 ຄົນໄດ້ຮັບການຍົກເວັ້ນບໍ່ຕ້ອງຮັບຜິດຊອບທາງອາຍາ; ພິພາກສາຄະດີຂັ້ນອູທອນ 48 ຄະດີ / ຈຳເລີຍ 459 ຄົນ, ຕັດສິນປະຫານຊີວິດຈຳເລີຍ 5 ຄົນ, ຈຳຄຸດຕະຫຼອດຊີວິດຈຳເລີຍ 12 ຄົນ, ຈຳຄຸກ 30 ປີຈຳເລີຍ 14 ຄົນ, ຈຳຄຸກແຕ່ 20 ເຖິງຕ່ຳກວ່າ 30 ປີ ຈຳເລີຍ 16, ຈຳຄຸກແຕ່ 20 ເດືອນເຖິງຕ່ຳກວ່າ 20 ປີ ຈຳເລີຍ 377 ຄົນ... ໃນນັ້ນ, ມີພະນັກງານພາຍໃຕ້ການຄຸ້ມຄອງຂອງສູນກາງ 14 ຄົນ (4 ຄົນແມ່ນກຳມະການສູນກາງພັກ, 1 ຄົນແມ່ນກຳມະການກົມການເມືອງສູນກາງພັກ); ນາຍທະຫານຊັ້ນສູງໃນກອງກຳລັງປະກອບອາວຸດຫຼາຍຄົນ (3 ຄົນແມ່ນອະດີດຮອງລັດຖະມົນຕີກະຊວງປ້ອງກັນປະເທດ, 6 ຄົນແມ່ນນາຍທະຫານຊັ້ນນາຍພົນ, 11 ຄົນແມ່ນນາຍທະຫານຊັ້ນພັນເອກ, ພັນໂທ).
ສະເພາະຄະນະຊີ້ນຳ 110 ໄດ້ຕິດຕາມ, ຊີ້ນຳການຈັດການ 10 ຄະດີ / ຜູ້ຕ້ອງຫາ 68 ຄົນທີ່ກ່ຽວຂ້ອງກັບ ຟານວັນແອງຫວູ ແລະ ດິງງ້ອກເຮ້ (ໃນນັ້ນ, 7 ຄະດີ / ຜູ້ຕ້ອງຫາ 39 ຄົນທີ່ກ່ຽວຂ້ອງກັບ ຟານວັນແອງຫວູ; 3 ຄະດີ / ຜູ້ຕ້ອງຫາ 29 ຄົນທີ່ກ່ຽວຂ້ອງກັບ ດິງງ້ອກເຮ້). ມາຮອດປະຈຸບັນ, ໄດ້ພິພາກສາຄະດີຂັ້ນຕົ້ນ 8 ຄະດີ / ຈຳເລີຍ 50 ຄົນ, ໄດ້ຕັດສິນຈຳຄຸກ 30 ປີຈຳເລີຍ 2 ຄົນ, ຈຳຄຸກແຕ່ 18 ເດືອນເຖິງຕ່ຳກວ່າ 20 ປີຈຳເລີຍ 46 ຄົນ (ໃນນັ້ນ, ຈຳເລີຍ 2 ຄົນຖືກຈຳຄຸກດ້ວຍການຜັດໂທດ), ຈຳເລີຍ 1 ຄົນຖືກດັດສ້າງໂດຍບໍ່ຄຸມຕົວ, ຈຳເລີຍ 1 ຄົນໄດ້ຮັບການຍົກເວັ້ນບໍ່ຕ້ອງຮັບຜິດຊອບທາງອາຍາ; ພິພາກສາຄະດີຂັ້ນອູທອນ 4 ຄະດີ / ຈຳເລີຍ 15 ຄົນ, ຕັດສິນຈຳຄຸກ 30 ປີຈຳເລີຍ 1 ຄົນ, ຈຳຄຸກແຕ່ 18 ເດືອນເຖິງຕ່ຳກວ່າ 12 ປີ ຈຳເລີຍ 13 ຄົນ, ດັດສ້າງໂດຍບໍ່ຄຸມຕົວຈຳເລີຍ 1 ຄົນ.
(7) ມີພະນັກງານພາຍໃຕ້ການຄຸ້ມຄອງຂອງສູນກາງ 15 ຄົນຖືກຈັດການທາງອາຍາ (5 ຄົນແມ່ນອະດີດກຳມະການສູນກາງພັກ, 1 ຄົນແມ່ນອະດີດກຳມະການກົມການເມືອງສູນການ, 6 ຄົນແມ່ນນາຍທະຫານຊັ້ນນາຍພົນ), ນາຍທະຫານຊັ້ນພັນເອກ, ພັນໂທ 11 ຄົນ.
(8) ໃນນັ້ນ, ອາດຊະຍາກຳສໍ້ລາດບັງຫຼວງ: ເລີ່ມຟ້ອງຮ້ອງ, ສືບສວນ 970 ຄະດີ / ຜູ້ຕ້ອງຫາ 2.137 ຄົນ, ຟ້ອງສານ 939 ຄະດີ / ຜູ້ຕ້ອງຫາ 2.209 ຄົນ, ພິພາກສາຄະດີຂັ້ນຕົ້ນ 892 ຄະດີ / ຈຳເລີຍ 2.118 ຄົນ; ອາດຊະຍາກຳອື່ນກ່ຽວກັບຕຳແໜ່ງ: ໄດ້ເລີ່ມຟ້ອງຮ້ອງ, ສືບສວນ 126 ຄະດີ / ຜູ້ຕ້ອງຫາ 471 ຄົນ, ຟ້ອງສານ 106 ຄະດີ / ຜູ້ຕ້ອງຫາ 424 ຄົນ, ພິພາກສາຄະດີຂັ້ນຕົ້ນ 101 ຄະດີ / ຈຳເລີຍ 441 ຄົນ; ອາດຊະຍາກຳເສດຖະກິດ: ໄດ້ເລີ່ມຟ້ອງຮ້ອງ, ສືບສວນ 6.174 ຄະດີ / ຜູ້ຕ້ອງຫາ 9.695 ຄົນ, ຟ້ອງສານ 4.868 ຄະດີ / ຜູ້ຕ້ອງຫາ 9.010 ຄົນ, ພິພາກສາຄະດີຂັ້ນຕົ້ນ 4.648 ຄະດີ / ຈຳເລີຍ 8.411 ຄົນ.
(9) ຫຼາຍທ້ອງຖິ່ນໄດ້ຊີ້ນຳການກວດຫາ, ຈັດການຢ່າງເຂັ້ມງວດຕໍ່ຫຼາຍກໍລະນີ ຄະດິສໍ້ລາດບັງຫຼວງ ຄະດີເສດຖະກິດ, ໄດ້ຈັດການຢ່າງເຂັ້ມງວດຕໍ່ພະນັກງານພາຍໃຕ້ການຄຸ້ມຄອງຂອງຄະນະພັກແຂວງ, ຄະນະພັກນະຄອນ ເຊັ່ນ ຮ່າໂນ້ຍ, ນະຄອນໂຮ່ຈີມິນ, ນາມດິ້ງ, ແທັງຫວາ, ກວ໋າງນິງ, ບັກຢາງ, ບັກນິງ, ຝູທໍ້, ບິ່ງເຢືອງ, ດັກລັກ, ດັກນົງ, ອານຢາງ,...
(10) ໂດຍສະເພາະແມ່ນ ໃນບັນດາຄະດີພາຍໃຕ້ການຕິດຕາມຊີ້ນຳຂອງ ຄຊສປຕສ ໄດ້ດຳເນີນການຍຶດ, ຍຶດຊົ່ວຄາວ, ຂຶ້ນບັນຊີ, ປິດລ້ອມ, ຢຸດການທຸລະກຳ ສຳລັບຊັບສິນທີ່ມີມູນຄ່າກວ່າ 50.000 ຕື້ດົ່ງ.
ໃນໄລຍະເວລາການປະຕິບັດຄຳຕັດສິນ (ບັງຄັບຄະດີ), ການກູ້ຄືນຊັບສິນກໍມີການປ່ຽນແປງ; ໄລຍະ 2016 - 2018, ໄດ້ກູ້ຄືນຊັບສິນເປັນເງິນ 10.255 ຕື້ດົ່ງ, ຫຼາຍກວ່າໄລຍະ 2013 - 2015 ເກືອບ 2 ເທົ່າ.
(11) ຄະນະປະຈຳຄະນະພັກນະຄອນໂຮ່ຈີມິນ; ຄະນະກຳກັບວຽກງານພັກ ຄະນະກຳມະການປະຊາຊົນແຂວງແຂງຮ່ວາ.
(12) ປະກອບດ້ວຍ: ກຳມະການສູນກາງພັກ, ອະດີດກຳມະການສູນກາງພັກ 6 ຄົນ (ໃນນັ້ນ, 1 ຄົນແມ່ນກຳມະການກົມການເມືອງສູນກາງ, 1 ຄົນແມ່ນອະດີດ ກຳມະການກົມການເມືອງສູນກາງ, 1 ຄົນແມ່ນອະດີດຮອງນະຍົກລັດຖະມົນຕີ); 3 ຄົນແມ່ນຮອງລັດຖະມົນຕີ, ອະດີດຮອງລັດຖະມົນຕີ, 5 ຄົນແມ່ນຮອງເລຂາທິການ, ປະທານສະພາປະຊາຊົນ, ປະທານຄະນະກຳມະການປະຊາຊົນແຂວງ, ນະຄອນສັງກັດສູນກາງ.
(13) ບັນດາທ້ອງຖິ່ນທີ່ໄດ້ດຳເນີນການສືບສວນ, ຟ້ອງສານ, ພິພາກສາກໍລະນີ ຄະດີສໍ້ລາດບັງຫຼວງ, ຄະດີເສດຖະກິດຫຼາຍຄະດີເຊັ່ນ ຮ່າໂນ້ຍ, ນະຄອນໂຮ່ຈີມິນ, ແທັງຫວາ, ບັກນິງ, ນາມດິ້ງ, ເຊີນລາ, ຮ່ວາບິ່ງ,...
(14) ແຕ່ຕົ້ນວາລະກອງປະຊຸມໃຫຍ່ຄັ້ງທີ XII ມາເຖິງປະຈຸບັນ, ຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ ໄດ້ປະກາດໃຊ້ເອກະສານເກືອບ 80 ສະບັບ ເພື່ອເພີ່ມທະວີວຽກງານກໍ່ສ້າງພັກ, ລະບົບການເມືອງ ແລະ ການປ້ອງກັນແລະຕ້ານການສໍ້ລາດບັງຫຼວງ. ສະພາແຫ່ງຊາດ, ຄະນະກຳມະການປະຈຳສະພາແຫ່ງຊາດ ໄດ້ປະກາດໃຊ້ກົດໝາຍ 62 ສະບັບ, ກົດດຳລັດ 1 ສະບັບ, ມະຕິ 66 ສະບັບ; ລັດຖະບານ, ນາຍົກລັດຖະມົນຕີ ໄດ້ອອກດຳລັດ 611 ສະບັບ, ມະຕິ 532 ສະບັນ, ຂໍ້ຕົກລົງ 197 ສະບັບ ເພື່ອຍົກສູງປະສິດທິພາບແລະປະສິດທິຜົນ ຂອງການຄຸ້ມຄອງລັດໃນບັນດາຂົງເຂດຂອງຊີວິດສັງຄົມ.
(15) ບົດສະຫຼຸບເລກທີ 12-KL/TW, ລົງວັນທີ 23 ມີນາ 2017, ຂອງກົມການເມືອງສູນກາງ, ກ່ຽວກັບ “ປັບປຸງ, ເພີ່ມເຕີມບາງຂໍ້ກຳນົດກ່ຽວກັບວຽກງານພະນັກງານ”; ແຈ້ງການຂໍ້ສະຫຼຸບເລກທີ 36-TB/TW, ລົງວັນທີ 19 ກໍລະກົດ 2017, ຂອງກົມການເມືອງສູນກາງ “ກ່ຽວກັບວຽກງານຜັດປ່ຽນພະນັກງານ”; ຂໍ້ກຳນົດເລກທີ 89-QĐ/TW, ລົງວັນທີ 4 ສິງຫາ 2017, ຂອງກົມການເມືອງສູນກາງ, ກ່ຽວກັບ “ກອບມາດຕະຖານຍົດຕຳແໜ່ງ, ການກຳນົດທິດກອບເກນການປະເມີນພະນັກງານນຳພາ, ຄຸ້ມຄອງທຸກລະດັບ”; ຂໍ້ກຳນົດເລກທີ 90-QĐ/TW, ລົງວັນທີ 4 ສິງຫາ 2017, ຂອງກົມການເມືອງສູນກາງ, ກ່ຽວກັບ “ກອບມາດຕະຖານຍົດຕຳແໜ່ງ, ເກນການປະເມີນພະນັກງານພາຍໃຕ້ການຄຸ້ມຄອງຂອງຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ”; ຂໍ້ກຳນົດເລກທີ 98-QĐ/TW, ລົງວັນທີ 7 ຕຸລາ 2017, ຂອງກົມການເມືອງສູນກາງ, “ກ່ຽວກັບການຜັດປ່ຽນພະນັກງານ”; ຂໍ້ສະຫຼຸບເລກທີ 24-KL/TW, ລົງວັນທີ 15 ທັນວາ 2017, ຂອງກົມການເມືອງສູນກາງ, “ກ່ຽວກັບຫຼັກການຍົກຍ້າຍ, ມອບໝາຍ, ຈັດວາງວຽກງານໃຫ້ພະນັກງານທີ່ສູນກາງຜັດປ່ຽນ”; ຂໍ້ກຳນົດເລກທີ 105-QĐ/TW, ລົງວັນທີ 19 ທັນວາ 2017, ຂອງກົມການເມືອງສູນກາງ, “ກ່ຽວກັບການແບ່ງຂັ້ນຄຸ້ມຄອງພະນັກງານ ແລະ ການແຕ່ງຕັ້ງ, ແນະນຳພະນັກງານຮັບສະໝັກເລືອກຕັ້ງ”; ຂໍ້ກຳນົດເລກທີ 179-QĐ/TW, ລົງວັນທີ 25 ກຸມພາ 2019, ຂອງກົມການເມືອງສູນກາງ, “ກ່ຽວກັບລະບອບການກວດກາ, ຕິດຕາມກວດກາພະນັກງານ”; ແຈ້ງການຂໍ້ສະຫຼຸບເລກທີ 48-KL/TW, ລົງວັນທີ 26 ເມສາ 2019, ຂອງຄະນະເລຂາທິການສູນກາງ, “ກ່ຽວກັບຜົນຂອງການກວດກາຕົວເອງ ແລະ ທົບທວນການປະຕິບັດວຽກງານພະນັກງານ”; ຄຳສັ່ງເລກທີ 35-CT/TW, ລົງວັນທີ 30 ພຶດສະພາ 2019, ຂອງກົມການເມືອງສູນກາງ, “ກ່ຽວກັບກອງປະຊຸມໃຫຍ່ຄະນະພັກຂັ້ນຕ່າງໆ ກ້າວໄປເຖິງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກ”; ຂໍ້ກຳນົດເລກທີ 205-QĐ/TW, ລົງວັນທີ 23 ກັນຍາ 2019, ຂອງກົມການເມືອງສູນກາງ, “ກ່ຽວກັບການຄວບຄຸມອຳນາດໃນວຽກງານພະນັກງານ ແລະ ການຕໍ່ສູ້ຕ້ານການວິ້ງເຕັ້ນຫາຕຳແໜ່ງ, ວິ້ງເຕັ້ນຫາອຳນາດ”; ຂໍ້ກຳນົດເລກທີ 214-QĐ/TW, ລົງວັນທີ 2 ມັງກອນ 2020, ຂອງກົມການເມືອງສູນກາງ, ກ່ຽວກັບ “ກອບມາດຕະຖານຍົດຕຳແໜ່ງ, ເກນການປະເມີນພະນັກງານພາຍໃຕ້ການຄຸ້ມຄອງຂອງຄະນະບໍລິຫານງານສູນກາງ, ກົມການເມືອງສູນກາງ, ຄະນະເລຂາທິການສູນກາງ”; ແຈ້ງການຂໍ້ສະຫຼຸບເລກທີ 71-KL/TW, ລົງວັນທີ 24 ມີນາ 2020, ຂອງຄະນະເລຂາທິການສູນກາງ, “ກ່ຽວກັບການຈັດການກັບການລະເມີດໃນວຽກງານຮັບສະໝັກ ພະນັກງານ, ລັດຖະກອນ, ພາລະກອນ ຕາມແຈ້ງການຂໍ້ສະຫຼຸບເລກທີ 43-TB/TW ລົງວັນທີ 28 ທັນວາ 2017 ຂອງກົມການເມືອງສູນກາງ”...
(16) ຕາມການປະເມີນຂອງທະນາຄານໂລກ, ສະພາບແວດລ້ອມທາງທຸລະກິດຂອງຫວຽດນາມໃນປີ 2017 ເພີ່ມຂຶ້ນ 14 ຊັ້ນເມື່ອທຽບກັບປີ 2016 (ອັນດັບທີ 68/190 ເສດຖະກິດໃນໂລກ); ປີ 2019 ຢູ່ໃນອັນດັບທີ 69/190 ເສດຖະກິດໃນໂລກ. ຕາມດັດຊະນີຄວາມສາມາດແຂ່ງຂັນລະດັບແຂວງ (PCI) ປີ 2019, 81,3% ຂອງຈຳນວນວິສາຫະກິດເຫັນວ່າ “ພະນັກງານລັດແກ້ໄຂວຽກງານມີປະສິດທິຜົນ” (ເພີ່ມຂຶ້ນເມື່ອທຽບກັບລະດັບ 67,4% ໃນປີ 2015; 74,1% ໃນປີ 2018); 72,6% ຂອງຈຳນວນວິສາຫະກິດເວົ້າວ່າ “ເວລາປະຕິບັດຂັ້ນຕອນການບໍລິຫານສັ້ນລົງເມື່ອທຽບໃສ່ລະບຽບການ” (ປີ 2017 ແມ່ນ 67%, ປີ 2018 ແມ່ນ 68,9%)… ຕາມຜົນການຄົ້ນຄວ້າຂອງ PAPI ປີ 2019, 87% ຂອງຜູ້ຊົມໃຊ້ ພໍໃຈກັບການບໍລິການກວດສອບ, ຢັ້ງຢືນ ແລະການບໍລິການບໍລິຫານລະດັບຕາແສງ,...
(17) ເຊັ່ນ ຄະດີເຢືອງຈີຢຸ໊ງ, ຄະດີຫວູ ກວັກບ໋າວ, ຄະດີຮວິ່ງທິຮ່ວຽນຍື, ຄະດີຟ້າມກົງແຢັງ, ຄະດີຮ່າວັນຖຳ, ຄະດີຢາງກິມດາດ, ຄະດີດິງລາທັງ, ຄະດີຈິ້ງຊວັນແທັງ, ຄະດີຟານວັນແອັງຫວູ, ຄະດີການພະນັນແລະການຈັດຕັ້ງການພະນັນ ເກີດຂຶ້ນໃນແຂວງຝູທໍ້ແລະບາງທ້ອງຖິ່ນ, ຄະດີບໍລິສັດ AVG, ຄະດີດິງງ້ອກເຮ້...
(18) “ຄຽງຄູ່ກັບການຈັດການຢ່າງເຂັ້ມງວດ ກັບກໍລະນີການລະເມີດ, ພວກເຮົາກໍຕ້ອງມີກົນໄກເພື່ອປົກປ້ອງ, ສົ່ງເສີມພະນັກງານ, ສະມາຊິກພັກ, ຫົວໜ້າອົງການທີ່ກ້າຄິດ, ກ້າເຮັດ, ກ້າຮັບຜິດຊອບ, ກ້າຫານນຳໜ້າໃນການປ່ຽນແປງໃໝ່ ເພື່ອພາລະກິດການພັດທະນາປະເທດ; ການປະເມີນແລະການຮັບຮູ້ຄວາມຜິດພາດ ກໍຕ້ອງໄດ້ຈັດຢູ່ໃນເງື່ອນໄຂແລະສະພາບການປະຫວັດສາດສະເພາະ ເພື່ອໃຫ້ມີທັດສະນະການຈັດການທີ່ພາວະວິໄສແລະເໝາະສົມ.” (ຄຳສະຫຼຸບຂອງສະຫາຍເລຂາທິການໃຫຍ່ ຫງວຽນຝູຈ້ອງ, ຫົວໜ້າຄະນະຊີ້ນຳ ກ່າວທີ່ກອງປະຊຸມທົ່ວປະເທດກ່ຽວກັບວຽກງານປ້ອງກັນແລະຕ້ານການສໍ້ລາດບັງຫຼວງປີ 2018)
(19) ເຊັ່ນ ບັນດາຄະດີທີ່ເກີດຂຶ້ນຢູ່: ກຸ່ມບໍລິສັດນ້ຳມັນອາຍແກ໊ສແຫ່ງຊາດຫວຽດນາມ (PVN), ສະຫະບໍລິສັດການຂົນສົ່ງທາງທະເລຫວຽດນາມ (Vinalines), ທະນາຄານ ດ້າຍເຢືອງ, ທະນາຄານກໍ່ສ້າງຫວຽດນາມ, ທະນາຄານດົງອ໋າ, ທະນາຄານດ້າຍຕິ້ນ, ທະນາຄານເພື່ອການລົງທຶນແລະພັດທະນາຫວຽດນາມ...
(20) ເຊັ່ນ ຄະດີບໍລິສັດ AVG ແມ່ນຫຼາຍກວ່າ 8.770 ຕື້ດົ່ງ; ບັນດາຄະດີກ່ຽວກັບຟານວັນແອງຫວູ ແມ່ປະມານ 20.000 ຕື້ດົ່ງ; ຄະດີເກີດຂຶ້ນທີ່ທະນາຄານດ້າຍຕິ້ນ ແມ່ນຫຼາຍກວ່າ 10.000 ຕື້ດົ່ງ; ຄະດີເກີດຂຶ້ນທີ່ທະນາຄານກໍ່ສ້າງຫວຽດນາມ ແມ່ນຫຼາຍກວ່າ 9.000 ຕື້ດົ່ງ...
(21) ອັດຕາສ່ວນຄະດີການສໍ້ລາດບັງຫຼວງ / ຄະດີການສໍ້ລາດບັງຫຼວງແລະເສດຖະກິດ ທີ່ຖືກຟ້ອງສານແຕ່ປີ 2011 ເຖິງປີ 2016 ແມ່ນ 19,2% (1.667 ຄະດີ / 8.668 ຄະດີ); ແຕ່ປີ 2016 ເຖິງປີ 2019 ແມ່ນ 23,5% (1.267 ຄະດີ / 5.380 ຄະດີ). ໃນຄະດີເສດຖະກິດແລະການສໍ້ລາດບັງຫຼວງທັງໝົດ 119 ຄະດີພາຍໃຕ້ການຕິດຕາມຊີ້ນຳຂອງ ຄຊສປຕສ, ມີຄະດີສໍ້ລາດບັງຫຼວງ 34 ຄະດີ (28,57%); ຫຼາຍຄະດີໄດ້ຖືກຂະຫຍາຍການສືບສວນ, ເຊັ່ນ: 1- ຄະດີເກີດຂຶ້ນທີ່ສະຫະບໍລິສັດກະສິກຳໄຊງ່ອນ, ໃນເບື້ອງຕົ້ນດຳເນີນຄະດີໃນຄວາມຜິດ “ລະເມີດກົດລະບຽບວ່າດ້ວຍການຄຸ້ມຄອງ ແລະນຳໃຊ້ຊັບສິນຂອງລັດ, ກໍ່ໃຫ້ເກີດການສູນເສຍແລະສິ້ນເປືອງ”; ຫຼັງຈາກການສືບສວນເປີດກວ້າງ, ອົງການສືບສວນໄດ້ເພີ່ມຄຳຕັດສິນໃນການດຳເນີນຄະດີ ໃນຂໍ້ຫາ “ການຍັກຍອກເອົາຊັບສິນ”, ດຳເນີນຄະດີຈຳເລີຍ 7 ຄົນໃນຂໍ້ຫາ “ການຍັກຍອກເອົາຊັບສິນ”; 2- ເປີດກວ້າງການສືບສວນໄລຍະ II ຄະດີການພະນັນແລະການຈັດຕັ້ງການພະນັນເກີດຂຶ້ນທີ່ແຂວງ ຝູທໍ້ ແລພ ບ້ງທ້ອງຖິ່ນ, ອົງການສືບສວນໄດ້ດຳເນີນຄະດີຕື່ມອີກໃນຂໍ້ຫາ “ການສວຍໃຊ້ຕຳແໜ່ງແລະອຳນາດ ໃນຂະນະປະຕິບັດໜ້າທີ່”, ດຳເນີນຄະດີກັບຜູ້ຖືກກ່າວຫາຕໍ່ຫົວໜ້າອົງການກວດກາກະຊວງຖະແຫຼງຂ່າວແລະສື່ສານ; 3- ຄະດີ Mobifone ຊື້ 95% ຈຳນວນຫຸ້ນສ່ວນຂອງບໍລິສັດ AVG, ໃນເບື້ອງຕົ້ນ ດຳເນີນຄະດີໃນຂໍ້ຫາ “ລະເມີດກົດລະບຽບວ່າດ້ວຍການຄຸ້ມຄອງແລະນຳໃຊ້ທຶນລົງທຶນ ກໍ່ໃຫ້ເກີດຜົນກະທົບຮ້າຍແຮງ”; ໃນຂະບວນການສືບສວນເປີດກວ້າງ, ໄດ້ດຳເນີນຄະດີຕື່ມອີກໃນຂໍ້ຫາ “ການຮັບເອົາສິນບົນ” ແລະ “ການໃຫ້ສິນບົນ”, ດຳເນີນຄະດີຕື່ມອີກຈຳເລີຍ 4 ຄົນໃນຂໍ້ຫາ “ການຮັບເອົາສິນບົນ”, ດຳເນີນຄະດີຈຳເລີຍ 1 ຄົນໃນຂໍ້ຫາ “ການໃຫ້ສິນບົນ”; 4- ຄະດີ ຟານວັນແອັງຫວູ ແລະຜູ້ສົມຮູ້ຮ່ວມຄິດ; ດິງງ້ອກເຮ້ ແລະຜູ້ສົມຮູ້ຮ່ວມຄິດ, ມາເຖິງປະຈຸບັນ ໄດ້ເປີດກວ້າງການສືບສວນ ແລະຈັດການຕໍ່ 11 ຄະດີ ແລະ 11 ກໍລະນີທີ່ກ່ຽວຂ້ອງ, ໃນນັ້ນຫຼາຍຄະດີແລະຈຳເລີຍຫຼາຍຄົນ ຖືກນຳຕົວໄປພິພາດສາຄະດີ ໃນຂໍ້ຫາການສໍ້ລາດບັງຫຼວງ.
(22) ລະຫວ່າງກໍລະນີການລະເມີດເຊິ່ງຜູ້ຕ້ອງຫາ, ຈຳເລີຍເປັນຜູ້ນຳ, ຜູ້ມີອຳນາດຕັດສິນ ແລະ ຜູ້ເປັນທີ່ປຶກສາ, ຜູ້ປະຕິບັດງານ, ຜູ້ປະຕິບັດໜ້າທີ່ທີ່ຂັ້ນເທິງມອບໝາຍ; ລະຫວ່າງຫົວໜ້າ ແລະ ພະນັກງານ, ຜູ້ອອກແຮງງານຮັບເງີນເດືອນ; ລະຫວ່າງ ຜູ້ບົງການ, ຜູ້ນຳການດຳເນີນການຢ່າງຫ້າວຫັນ ແລະ ຜູ້ສົມຮູ້ຮ່ວມຄິດ; ລະຫວ່າງຜູ້ທີ່ຄົດໂກງ, ປົກປິດປະຕິເສດຄວາມຜິດ ແລະ ຜູ້ມີ່ໃຫ້ການດ້ວຍຄວາມຈິງໃຈ, ກັບໃຈກິນແໜງ, ຕັ້ງໜ້າແກ້ໄຂຜົນທີ່ຕາມມາ...
(23) ປີ 2017, ສຳເລັດແລະລື່ນກາຍຄາດໝາຍເສດຖະກິດ - ສັງຄົມ ສຳລັບ 12 ໃນ 13 ຄາດໝາຍ, ການເຕີບໂຕ ຈີດີພີ ບັນລຸ 6,81%; ປີ 2018, ສຳເລັດແລະລື່ນຄາດໝາຍເສດຖະກິດ - ສັງຄົມ ສຳລັບ 13 ໃນ 13 ຄາດໝາຍ, ການເຕີບໂຕ ຈີດີພີ ບັນລຸ 7,08%, ແມ່ນລະດັບສູງທີ່ສຸດໃນຊຸມປີທົດສະວັດທີ່ຜ່ານມາ; ປີ 2019, ມີ 12 ໃນ 12 ຄາດໝາຍໝາຍເສດຖະກິດ - ສັງຄົມ ໄດ້ສຳເລັດແລະລື່ນຄາດໝາຍແຜນການ, ການເຕີບໂຕ ຈີດີພີ ບັນລຸ 7,02%, ແມ່ນປີທີ່ສອງທີ່ການເຕີບໂຕ ຈີດີພີ ລື່ນລະດັບ 7% ນັບແຕ່ປີ 2011;…
(24) ຕາມບົດລາຍງານສະບັບເລກທີ 16-BCĐT/DLXH, ວັນທີ 6 ສິງຫາ 2019, ຂອງສະຖາບັນຫາງສຽງສັງຄົມ ຄະນະໂຄສະນາອົບຮົມສູນກາງ, 80% ຂອງຄົນທີ່ຖືກຖາມກ່າວວ່າ, ບັນຫາສໍ້ລາດບັງຫຼວງຢູ່ໃນອັນດັບໜຶ່ງຂອງບັນຫາທີ່ປະຊາຊົນມີຄວາມເປັນຫ່ວງແລະກັງວົນທີ່ສຸດ.
(25), (26) ຄຳຖະແຫຼງສະຫຼຸບຂອງສະຫາຍເລຂາທິການໃຫຍ່ຫງວຽນຝູຈ້ອງ, ຫົວໜ້າ ຄຊສປຕສ ທີ່ກອງປະຊຸມທົ່ວປະເທດກ່ຽວກັບວຽກງານການປ້ອງກັນແລະຕ້ານການສໍ້ລາດບັງຫຼວງ, ວັນທີ 5 ພຶດສະພາ 2014.
(27) ໜັງສືພິມ ປະຊາຊົນ, ສະບັບອອກໃນໂອກາດບຸນປີໃໝ່ ປີຈໍ 2018.
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 943 (ເດືອນມິຖຸນາ 2020)
