ເສີມຂະຫຍາຍມູນເຊື້ອອັນພິລະອາດຫານແລະພາລະກິດອັນສະຫງ່າລາສີ,
ສ້າງກອງທັບປະຊາຊົນຫວຽດນາມທີ່ເຂັ້ມແຂງ,
ປົກປັກຮັກສາປະເທດຊາດສັງຄົມນິຍົມຫວຽດນາມຢ່າງໝັ້ນຄົງ
ສ້າງກອງທັບປະຊາຊົນຫວຽດນາມທີ່ເຂັ້ມແຂງ,
ປົກປັກຮັກສາປະເທດຊາດສັງຄົມນິຍົມຫວຽດນາມຢ່າງໝັ້ນຄົງ
ສະຫາຍ ໂຕເລິມ ເລຂາທິການໃຫຍ່ຂອງພັກ, ເລຂາຄະນະພັກການທະຫານສູນກາງ ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 80 ປີ (22-12-1944 - 22-12-2024) ແລະ ວັນປ້ອງກັນປະເທດທົ່ວປວງຊົນ ຄົບຮອບ 35 ປີ (22-12-1989 – 22-12-2024) _ ແຫຼ່ງ: dantri.vn
ກ່ອນໜ້ານີ້ 80 ປີ, ປະຕິບັດຄຳສັ່ງຂອງຜູ້ນຳໂຮ່ຈີມິນ, ວັນທີ 22 ທັນວາ 1944, ກອງໂຄສະນາປົດປ່ອຍປະເທດ - ຕົ້ນກຳເນີດຂອງກອງທັບປະຊາຊົນຫວຽດນາມ ໄດ້ຮັບການສ້າງຕັ້ງຂຶ້ນ. ນີ້ແມ່ນເຫດການສຳຄັນ ເປັນບາດກ້າວພັດທະນາໃໝ່ ຂອງກຳລັງປະກອບອາວຸດປະຕິວັດ ພາຍໃຕ້ການນຳພາຂອງພັກກອມມູນິດຫວຽດນາມ. ເປັນຄັ້ງທຳອິດໃນປະຫວັດສາດທີ່ຊົນຊັ້ນກຳມະກອນ ແລະ ປະຊາຊົນຫວຽດນາມ ມີກອງທັບປະເພດໃໝ່ທີ່ຖືກຈັດຕັ້ງ, ນຳພາ, ອົບຮົມສຶກສາ ແລະ ຝຶກຝົນຫຼໍ່ຫຼອມ ໂດຍພັກກອມມູນິດຫວຽດນາມ ແລະ ປະທານໂຮ່ຈີມິນ.
ກອງທັບປະຊາຊົນຫວຽດນາມຖືກຳເນີດຂຶ້ນໃນໄລຍະເວລາທີ່ຫຍຸ້ງຍາກຂອງການປະຕິວັດຫວຽດນາມ, ແຕ່ພາຍໃຕ້ການນຳພາຢ່າງເດັດດ່ຽວແລະໂດຍກົງຂອງພັກ, ການຊ່ວຍເຫຼືອ, ປົກປັກຮັກສາຂອງປະຊາຊົນ ແລະ ການສະໜັບສະໜູນຂອງເພື່ອນມິດສາກົນ,ໃນ 80 ປີທີ່ຜ່ານມາ, ກອງທັບປະຊາຊົນຫວຽດນາມ ໄດ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ, ບັນລຸໄດ້ບັນດາຜົນງານອັນສະຫງ່າລາສີ, ໄດ້ເສີມຂະຫຍາຍມູນເຊື້ອອັນພິລະອາດຫານຂອງຊາດ, ສົມຄວນໄດ້ຮັບການຍ້ອງຍໍຂອງປະທານໂຮ່ຈີມິນ: “ກອງທັບຂອງເຮົາຈົງຮັກພັກດີຕໍ່ພັກ, ກະຕັນຍູຕໍ່ປະຊາຊົນ, ພ້ອມແລ້ວທີ່ຈະຕໍ່ສູ້ ແລະ ເສຍສະຫຼະເພື່ອເອກະລາດ ອິດສະຫຼະພາບຂອງປະເທດຊາດ, ເພື່ອລັດທິສັງຄົມນິຍົມ. ສາມາດສຳເລັດທຸກໜ້າທີ່, ຜ່ານຜ່າຄວາມທຸກຍາກລຳບາກທຸກປະການ ແລະ ເອົາຊະນະສັດຕູທຸກໂຕ”(1).
ທັນທີຫຼັງຈາກການກໍ່ຕັ້ງ, ກອງທັບມີພະນັກງານແລະນັກຮົບພຽງ 34 ຄົນ ແລະ ການປະກອບອາວຸດທີ່ປະຖົມປະຖານ, ແຕ່ດ້ວຍຄວາມກ້າຫານ, ສະຕິປັນຍາ ແລະ ຄວາມປາດຖະໜາໃນເອກະລາດ ແລະ ອິດສະຫຼະພາບຂອງປະເທດຊາດ, ກົມກອງທຳອິດຂອງກອງກຳລັງປະກອບອາວຸດປະຕິວັດ ສາມາດຊະນະການຮົບທີ່ ຟາຍຄັດ ແລະ ນາເງິ່ນ ຕິດຕໍ່ກັນເຖິງສອງຄັ້ງ, ເປີດປະຫວັດສາດ “ຮ້ອຍຮົບ, ຮ້ອຍໄຊຊະນະ” ຂອງກອງທັບປະຊາຊົນຫວຽດນາມ. ໃນເວລາບໍ່ຮອດ 1 ປີ, ກອງທັບປະຊາຊົນຫວຽດນາມ ໄດ້ກາຍເປັນແກນຫຼັກ ພ້ອມກັບທົ່ວປວງຊົນ ດຳເນີນການລຸກຮືຂຶ້ນທົ່ວປະເທດ, ເຮັດການປະຕິວັດເດືອນສິງຫາທີ່ຍິ່ງໃຫຍ່, ຍາດເອົາອຳນາດມາຢູ່ໃນມືປະຊາຊົນ, ສ້າງຕັ້ງສາທາລະນະລັດປະຊາທິປະໄຕຫວຽດນາມ ເຊິ່ງເປັນລັດປະຊາທິປະໄຕປະຊາຊົນແຫ່ງທຳອິດຢູ່ອາຊີຕາເວັນອອກສຽງໃຕ້.
ໃນໄລຍະສົງຄາມຕໍ່ຕ້ານລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາ, ກອງທັບປະຊາຊົນຫວຽດນາມ ທັງກໍ່ສ້າງແລະຕໍ່ສູ້, ຕໍ່ສູ້ແລະກໍ່ສ້າງ, ເພີ່ມທະວີກຳລັງແຮງ ແລະ ເຕີບໃຫຍ່ເຂັ້ມແຂງຂຶ້ນເທື່ອລະກ້າວ, ເສີມຂະຫຍາຍບົດບາດຫຼັກແຫຼ່ງ, ພ້ອມກັບທົ່ວປວງຊົນດຳເນີນການຕໍ່ຕ້ານ, ຍາດເອົາໄຊຊະນະເທື່ອລະກ້າວ, ກ້າວໄປສູ່ໄຊຊະນະຢ່າງສົມບູນ. ບັນດາໄຊຊະນະອັນສະຫງ່າອົງອາດ ເຊັ່ນ ດ້ຽນບຽນຝູ (ປີ 1954), “ດ້ຽນບຽນຝູໃນອາກາດ” (ປີ 1972), ການບຸກໂຈມຕີຍຸດທະສາດໃນລະດູບານໃໝ່ ປີ 1975 ເຊິ່ງຈຸດສຸດຍອດໃນຍຸດທະການໂຮ່ຈີມິນ, ແມ່ນບັນດາຂີດໝາຍອັນສະຫງ່າລາສີທີ່ກອງທັບປະຊາຊົນຫວຽດນາມບັນທຶກໄວ້ ເພື່ອສານຕໍ່ມູນເຊື້ອອັນສະຫງ່າອົງອາດ ແລະ ວິລະຊົນໃນປະຫວັດສາດຂອງຊາດ. ຜ່ານສົງຄາມຕໍ່ຕ້ານອັນສັກສິດ 2 ຄັ້ງທີ່ແກ່ຍາວມາເປັນເວລາ 30 ປີ, ກອງທັບປະຊາຊົນຫວຽດນາມ ແລະ ປະຊາຊົນຫວຽດນາມ ໄດ້ບັງຄັບໃຫ້ມະຫາອຳນາດອານານິຄົມ ແລະ ຈັກກະພັດຊັ້ນນຳຂອງໂລກຖອນທະຫານອອກຈາກຫວຽດນາມ, ເຮັດໃຫ້ພາລະກິດປົດປ່ອຍຊາດ ແລະ ການທ້ອນໂຮມປະເທດຊາດເປັນເອກະພາບສຳເລັດຢ່າງສະຫງ່າຜ່າເຜີຍ ແລະ ນຳປະເທດເຮົາເຂົ້າສູ່ຍຸກໃໝ່ ຍຸກແຫ່ງເອກະລາດ, ເອກະພາບ ແລະ ສັງຄົມນິຍົມ.
ທັນທີພາຍຫຼັງການໂຮມປະເທດຊາດເປັນເອກະພາບ (ວັນທີ 30 ເມສາ 1975), ກອງທັບໄດ້ຕໍ່ສູ້ຢ່າງກ້າຫານ, ເສຍສະຫຼະ, ພ້ອມກັບທົ່ວປວງຊົນເອົາຊະນະສົງຄາມຮຸກຮານຢູ່ເຂດຊາຍແດນຕາເວັນຕົກສຽງໃຕ້, ປະຕິບັດພັນທະສາກົນທີ່ມີຕໍ່ປະຊາຊົນກຳປູເຈຍ ແລະ ປົກປັກຮັກສາເຂດຊາຍແດນພາກເໜືອຂອງປະເທດຕົນ. ໃນກິດຈະກການປ່ຽນແປງໃໝ່ປະເທດ, ກອງທັບປະຊາຊົນຫວຽດນາມ ສືບຕໍ່ເສີມຂະຫຍາຍທາດແທ້ ແລະມູນເຊື້ອອັນດີງາມຂອງ “ທະຫານລຸງໂຮ່”, ເປັນແກນຫຼັກໃນການກໍ່ສ້າງພື້ນຖານການປ້ອງກັນປະເທດທົ່ວປວງຊົນ, ປົກປັກຮັກສາປະເທດຊາດສັງຄົມນິຍົມຢ່າງໝັ້ນຄົງ; ປະຈັນບານ, ນຳໜ້າໃນການຕອບສະໜອງຕໍ່ຄວາມທ້າທາຍດ້ານຄວາມໝັ້ນຄົງທີ່ບໍ່ເປັນແບບດັ້ງເດີມ, ການປ້ອງກັນ ແລະຕໍ່ສູ້ກັບໄພທຳມະຊາດ, ໄພພິບັດ, ພະຍາດລະບາດ, ການຊອກຫາ ແລະ ກູ້ໄພກູ້ຊີບ. ພ້ອມກັນນັ້ນ, ຕັ້ງໜ້າເຂົ້າຮ່ວມການກໍ່ສ້າງ ແລະ ພັດທະນາປະເທດ; ເປັນເຈົ້າການໃນການຕໍ່ສູ້ເພື່ອເອົາຊະນະຍຸດທະສາດ “ຫັນປ່ຽນໂດຍສັນຕິ” ຂອງອິດທິກຳລັງສັດຕູ; ຍູ້ແຮງການເຊື່ອມໂຍງເຂົ້າກັບສາກົນ ແລະ ການທູດດ້ານປ້ອງກັນຊາດ, ເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ, ປະກອບສ່ວນຍົກສູງທີ່ຕັ້ງ ແລະ ກຽດສັກສີຂອງຫວຽດນາມ ໃນເວທີສາກົນ, ປົກປັກຮັກສາປະເທດຊາດຕັ້ງແຕ່ຕົ້ນ ຈາກໄລຍະໄກ, ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ ເພື່ອສ້າງສາແລະພັດທະນາປະເທດຊາດ.
ສາມາດຢັ້ງຢືນໄດ້ວ່າ, ຕະຫຼອດໄລຍະ 80 ປີແຫ່ງການກໍ່ສ້າງ, ການຕໍ່ສູ້, ການໄດ້ຮັບໄຊຊະນະ ແລະ ການເຕີບໃຫຍ່ເຂັ້ມແຂງ ທ່າມກາງຄວາມລຳບາກ ແລະການເສຍສະຫຼະ, ກອງທັບປະຊາຊົນຫວຽດນາມ ໄດ້ຂຽນມູນເຊື້ອອັນສະຫງ່າອົງອາດ, ຄວາມສຳເລັດທີ່ຍອດຢ້ຽມ ແລະ ຈາລຶກເຫດການອັນຍິ່ງໃຫຍ່ໄວ້ໃນປະຫວັດສາດຂອງຊາດ. ບັນດາຜົນງານອັນສະຫງ່າລາສີທີ່ກອງທັບປະຊາຊົນຫວຽດນາມໄດ້ຮັບມານັ້ນ ກໍ່ແມ່ນໄຊຊະນະຂອງປະຊາຊົນຫວຽດນາມ, ປະເທດຊາດຫວຽດນາມ, ຕິດພັນກັບບັນດາຜົນງານອັນຍິ່ງໃຫຍ່ຂອງການປະຕິວັດຫວຽດນາມ ໃນສະໄໝ ໂຮ່ຈີມິນ.
ໃນປະຈຸບັນ, ສະຖານະການໂລກແລະພາກພື້ນກຳລັງປະສົບກັບການປ່ຽນແປງຢ່າງໃຫຍ່ຫຼວງ ແລະບໍ່ສາມາດຄາດຄະເນໄດ້. ສັນຕິພາບ, ການຮ່ວມມື ແລະການພັດທະນາຍັງຄົງແມ່ນທ່າອ່ຽງໃຫຍ່, ແຕ່ການແຂ່ງຂັນດ້ານຍຸດທະສາດ, ການປະທະກັນຕາມທ້ອງທີ່, ການຂັດແຍ້ງອະທິປະໄຕເຂດດິນແດນໃນຫຼາຍພາກພື້ນ ແລະອື່ນໆ ສືບຕໍ່ເພີ່ມຂຶ້ນ ພ້ອມກັບການເກີດຂຶ້ນຂອງສົງຄາມຮູບແບບໃໝ່, ວິທີການ ແລະ ຍຸດທະວິທີການຮົບຫຼາຍຢ່າງ ທັງໃນດ້ານແບບດັ້ງເດີມ ແລະ ແບບບໍ່ດັ້ງເດີມ, ນາບຂູ່ເຖິງສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງໂລກ. ພາກພື້ນອາຊີ-ປາຊີຟິກ ລວມທັງພາກພື້ນອາຊີຕາເວັນອອກສຽງໃຕ້ ຍັງສືບຕໍ່ພັດທະນາຢ່າງຕັ້ງໜ້າ, ແຕ່ມີຄວາມສ່ຽງທີ່ອາດຈະເກີດຄວາມບໍ່ສະຖຽນລະພາບ, ເຊິ່ງອາດເຮັດໃຫ້ເກີດການປະທະກັນໃນທ້ອງທີ່. ໃນປະເທດ, ຂະບວນການປ່ຽນແປງໃໝ່ປະເທດໄດ້ເຮັດໃຫ້ຊັບສິນ, ທ່າແຮງ, ທີ່ຕັ້ງ ແລະ ກຽດສັກສີຂອງສາກົນຂອງຊາດຫວຽດນາມນັບມື້ນັບເພີ່ມສູງຂຶ້ນ, ແຕ່ຍັງຄົງມີຄວາມຫຍຸ້ງຍາກ, ຄວາມທ້າທາຍ ແລະ ບັນຫາໃໝ່ໆ ທີ່ສັບສົນເກີດຂຶ້ນອີກຫຼາຍ. ບັນດາອິດທິກຳລັງປະຕິການ ແລະ ສວຍໂອກາດທາງການເມືອງ ສືບຕໍ່ຊຸກຍູ້ “ການຫັນປ່ຽນໂດຍສັນຕິ”, ຊຸກຍູ້ “ການປ່ຽນແປງຕົນເອງ”, “ການຫັນປ່ຽນຕົນເອງ”, “ເຮັດໃຫ້ກອງທັບປອດການເມືອງ” ດ້ວຍກົນອຸບາຍອຳມະຫິດ ເລິກແລບແນບນຽນ.
ສະພາບການດັ່ງກ່າວຮຽກຮ້ອງໃຫ້ທົ່ວກອງທັບສືບຕໍ່ເສີມຂະຫຍາຍມູນເຊື້ອອັນພິລະອາດຫານ ແລະ ພາລະກິດອັນສະຫງ່າລາສີ ໃນ 80 ປີຜ່ານມາ, ສຸມໃສ່ກໍ່ສ້າງກອງທັບໃຫ້ເຂັ້ມແຂງ, ແໜ້ນແຟ້ນ ແລະ ກ້າວສູ່ຄວາມທັນສະໄໝ, ຕອບສະໜອງຄວາມຮຽກຮ້ອງຕ້ອງການ ແລະ ໜ້າທີ່ປົກປັກຮັກສາປະເທດຊາດໃນທຸກສະຖານະການ, ດ້ວຍຫຼາຍວິທີແກ້ໄຂທີ່ຄົບຊຸດ ແລະມີປະສິດທິພາບ; ໃນນັ້ນ, ໃຫ້ຄວາມສຳຄັນກັບການປະຕິບັດເປັນຢ່າງດີບັນດາເນື້ອໃນ ແລະ ວິທີແກ້ໄຂຕົ້ນຕໍດັ່ງນີ້:
ທີໜຶ່ງ, ຕັ້ງໝັ້ນ ແລະ ຍົກສູງຄຸນນະພາບການກໍ່ສ້າງກອງທັບທີ່ໝັ້ນຄົງເຂັ້ມແຂງທາງການເມືອງ.
ນີ້ແມ່ນບັນຫາຫຼັກການໃນການກໍ່ສ້າງກຳລັງປະກອບອາວຸດປະຕິວັດ ຂອງພັກກອມມູນິດຫວຽດນາມ, ແມ່ນບົດຮຽນອັນສຳຄັນແລະສອດຄ່ອງ ທີ່ຖອດຖອນໄດ້ຈາກໄລຍະ 80 ປີແຫ່ງການກໍ່ສ້າງ, ການຕໍ່ສູ້, ການໄດ້ຮັບໄຊຊະນະ ແລະ ການເຕີບໃຫຍ່ຂອງກອງທັບປະຊາຊົນຫວຽດນາມ. ການກໍ່ສ້າງກອງທັບທີ່ເຂັ້ມແຂງທາງດ້ານການເມືອງແມ່ນພື້ນຖານອັນໜັກແໜ້ນ ເພື່ອໃຫ້ກອງທັບປະຊາຊົນຫວຽດນາມຮັກສາ ແລະເພີ່ມທະວີທາດແທ້ຊົນຊັ້ນກໍາມະກອນ, ລັກສະນະປະຊາຊົນ ແລະລັກສະນະຊາດ; ຍາມໃດກໍ່ກຳນົດແຈ້ງເປົ້າໝາຍແລະອຸດົມຄະຕິໃນການຕໍ່ສູ້ເພື່ອເອກະລາດຂອງຊາດ ແລະ ລັດທິສັງຄົມນິຍົມ, ເພື່ອຄວາມຜາສຸກຂອງປະຊາຊົນ. ດັງນັ້ນ, ການກໍ່ສ້າງກອງທັບທີ່ເຂັ້ມແຂງທາງດ້ານການເມືອງຕ້ອງເປັນບັນຫາຫຼັກແຫຼ່ງ ແລະສຳຄັນອັນດັບໜຶ່ງ ໃນການກໍ່ສ້າງກອງທັບທີ່ປອດໃສ, ແໜ້ນແຟ້ນ, ເຂັ້ມແຂງ ແລະ ກ້າວສູ່ຄວາມທັນສະໄໝ ເຊິ່ງຈຸດສຸມແມ່ນຮັກສາ, ເພີ່ມທະວີ ແລະ ຮັບປະກັນຫຼັກການພັກນຳພາກອງທັບຢ່າງເດັດຂາດ ໂດຍກົງ ແລະ ຮອບດ້ານ.
ທີສອງ, ສຸມໃສ່ກໍ່ສ້າງແຫຼ່ງຊັບພະຍາກອນມະນຸດ, ໂດຍສະເພາະແມ່ນແຫຼ່ງຊັບພະຍາກອນມະນຸດທີ່ມີຄຸນນະພາບສູງ ເພື່ອກໍ່ສ້າງກອງທັບທີ່ເຂັ້ມແຂງ, ແໜ້ນແຟ້ນ ແລະ ກ້າວໜ້າ.
ຄວາມເຂັ້ມແຂງຂອງກອງທັບປະຕິວັດແມ່ນໝາກຜົນສັງລວມຂອງຫຼາຍປັດໄຈຄື: ຜູ້ຄົນ, ການຈັດຕັ້ງ, ອາວຸດ, ອຸປະກອນ, ສິລະປະແຫ່ງການຮົບແລະອື່ນໆ. ໃນນັ້ນ, ມະນຸດເປັນປັດໄຈຕັດສິນ, ອາວຸດແລະອຸປະກອນເຕັກນິກ ແມ່ນປັດໄຈສຳຄັນທີ່ສຸດ. ມະນຸດເປັນອັດຕະພາບ, ເປັນສູນກາງ, ມີເຈດຈຳນົງ ສະຕິປັນຍາ ແລະ ທັກສະ ທີ່ຈະຕັດສິນການພັດທະນາຄວາມເຂັ້ມແຂງດ້ານວັດຖຸຂອງອາວຸດ ແລະອຸປະກອນເຕັກນິກຢ່າງສຸດຂີດ; ບໍ່ວ່າອາວຸດແລະອຸປະກອນເຕັກນິກຈະທັນສະໄໝເຖິງປານໃດ, ສິ່ງເຫຼົ່ານີ້ກໍ່ຍັງຖືກສ້າງແລະຄວບຄຸມໂດຍມະນຸດ ເພື່ອສ້າງພະລັງທີ່ແທ້ຈິງ. ການກໍ່ສ້າງກອງທັບທີ່ເຂັ້ມແຂງ, ແໜ້ນແຟ້ນ ແລະກ້າວສູ່ທັນສະໄໝນັ້ນ ຈຳເປັນຕ້ອງສຸມໃສ່ກໍ່ສ້າງແຫຼ່ງຊັບພະຍາກອນມະນຸດ, ພິເສດແມ່ນແຫຼ່ງຊັບພະຍາກອນມະນຸດທີ່ມີຄຸນນະພາບສູງ; ເອົາໃຈໃສ່ກໍ່ສ້າງຖັນແຖວພະນັກງານທຸກຂັ້ນ, ພິເສດແມ່ນຂັ້ນຍຸດທະການ, ຍຸດທະສາດທີ່ມີປະລິມານ ແລະໂຄງສ້າງທີ່ສົມເຫດສົມຜົນ, ມີຄຸນນະພາບສູງ, ມີບົດບາດຫຼັກແຫຼ່ງ, ເປັນແບບຢ່າງ, ນໍາໜ້າວຽກງານການທະຫານ ແລະການປ້ອງກັນປະເທດ.
ທີສາມ, ຍູ້ແຮງການປັບປຸງການຈັດກຳລັງພົນ, ການປັບປຸງອາວຸດຍຸດໂທປະກອນທີ່ທັນສະໄໝໃຫ້ກັບແຕ່ລະເຫຼົ່າທັບ, ເຫຼົ່າທະຫານ, ກອງກຳລັງ ແລະ ທົ່ວກອງທັບ.
ເຂົ້າໃຈຊາບຊຶມແນວທາງ ແຜນນະໂຍບາຍຂອງພັກ ໂດຍສະເພາະ ມະຕິໝາຍເລກ 18-NQ/TW, ລົງວັນທີ 25 ຕຸລາ 2017 ຂອງກອງປະຊຸມສູນກາງພັກຄັ້ງທີ 6 ສະໄໝທີ XII, ວ່າດ້ວຍ “ບາງບັນຫາໃນການສືບຕໍ່ການປ່ຽນແປງໃໝ່, ຈັດຕັ້ງສັບຊ້ອນກົງຈັກຂອງລະບົບການເມືອງໃຫ້ມີຄວາມຄ່ອງຕົວ ແລະ ເຄື່ອນໄຫວຢ່າງມີປະສິດທິພາບ ແລະປະສິດທິຜົນ”, ມະຕິໝາຍເລກ 05-NQ/TW, ລົງວັນທີ 17 ມັງກອນ 2022, ຂອງກົມການເມືອງສູນກາງ ແລະ ມະຕິໝາຍເລກ 230-NQ/QUTW, ລົງວັນທີ 2 ເມສາ 2022, ຂອງຄະນະພັກການທະຫານສູນກາງ, ກ່ຽວກັບການນໍາພາການຈັດຕັ້ງກອງທັບປະຊາຊົນຫວຽດນາມ ໃນໄລຍະປີ 2021-2030 ແລະຊຸມປີຕໍ່ໄປ, ໃນເວລາທີ່ຜ່ານມາ, ຄະນະພັກການການທະຫານສູນກາງ ແລະ ກະຊວງປ້ອງກັນປະເທດ ໄດ້ສຸມໃສ່ນຳພາ ແລະ ຊີ້ນຳຜັນຂະຫຍາຍບັນດາມາດຕະການແກ້ໄຂ ເພື່ອກໍ່ສ້າງກອງທັບປອດໃສ, ແໜ້ນແຟ້ນ ແລະ ເຂັ້ມແຂງ, ສ້າງຄວາມດຸ່ນດ່ຽງແລະຄົບຊຸດໂດຍພື້ນຖານ ລະຫວ່າງບັນດາເຫຼົ່າທັບ ເຫຼົ່າທະຫານ, ລະຫວ່າງບັນດາອົງການແລະກົມກອງ, ລະຫວ່າງກຳລັງປະຈຳການ ແລະ ກຳລັງສຳຮອງ. ພ້ອມກັນນັ້ນ, ເອົາໃຈໃສ່ເຖິງການລົງທຶນ ແລະ ພັດທະນາອຸດສາຫະກຳປ້ອງກັນປະເທດຕາມທິດທາງເປັນເຈົ້າການ, ອີງໃສ່ຕົນເອງສ້າງຄວາມເຂັ້ມແຂງດ້ວຍຕົນເອງ, ນຳໃຊ້ສອງທາງ ແລະ ທັນສະໄໝ; ຂະຫຍາຍການຮ່ວມມືສາກົນ; ຄົ້ນຄ້ວາ, ພັດທະນາ, ເປັນເຈົ້າການດ້ານເຕັກໂນໂລຊີການຜະລິດ ແລະ ຜະລິດອາວຸດຍຸດທະສາດທີ່ຈຳເປັນຕໍ່ການປ້ອງກັນປະເທດໄດ້ສຳເລັດຫຼາຍປະເພບ ແລະ ໝັ້ນໃຈເຖິງການກ້າວໄປຂ້າງໜ້າໃນດ້ານປະລິມານ ແລະ ຍົກສູງຄຸນນະພາບອາວຸດ ແລະອຸປະກອນທາງເຕັກນິກ.
ທີສີ່, ສືບຕໍ່ເສີມຂະຫຍາຍກຳລັງແຮງສັງລວມຂອງລະບົບການເມືອງ ແລະ ບົດບາດແກນກາງຂອງກອງທັບໃນການກໍ່ສ້າງກຳລັງປ້ອງກັນປະເທດທົ່ວປວງຊົນທີ່ເຂັ້ມແຂງ.
ຕະຫຼອດ 80 ປີທີ່ຜ່ານມາ, ດ້ວຍການປະຕິບັດແນວທາງສົງຄາມປະຊາຊົນ ແລະ ແນວທາງປ້ອງກັນປະເທດທົ່ວປວງຊົນຂອງພັກ, ກຳລັງແຮງຂອງທົ່ວປະເທດສົມທົບກັບກຳລັງແຮງຂອງຍຸກສະໄໝ ໄດ້ຮັບການເສີມຂະຫຍາຍໃນລະດັບສູງ; ຖືເອົາກຳລັງປະກອບອາວຸດປະຊາຊົນ ເຊິ່ງໂດຍກົງແມ່ນກອງທັບປະຊາຊົນ ເປັນແກນກາງໃນການສ້າງກຳລັງແຮງສັງລວມ ເພື່ອເອົາຊະນະສັດຕູໃນການປະຕິວັດປົດປ່ອຍປະເທດຊາດ ແລະໃນການຮັກສາ ແລະ ເພີ່ມທະວີການປ້ອງກັນປະເທດ, ປ້ອງກັນຄວາມໝັ້ນຄົງ, ປົກປັກຮັກສາປະເທດຊາດຢ່າງໝັ້ນຄົງໃນໄລຍະສ້າງສາ ແລະ ພັດທະນາປະເທດ. ເສີມຂະຫຍາຍມູນເຊື້ອ ແລະ ບົດຮຽນປະສົບການນັ້ນ, ໃນໄລຍະຈະມາເຖິງ, ການກໍ່ສ້າງກອງທັບທີ່ເຂັ້ມແຂງ, ໜັກແໜ້ນ ແລະກ້າວສູ່ທັນສະໄໝ ຕ້ອງຕິດພັນກັບການປັບປຸງ, ເພີ່ມທະວີບົດບາດແກນກາງຂອງກອງທັບ ໃນການສ້າງພື້ນຖານການປ້ອງກັນປະເທດທົ່ວປວງຊົນ, ຕິດພັນກັບຄວາມໝັ້ນຄົງຂອງປະຊາຊົນ. ນີ້ແມ່ນຫຼັກການ ແລະ ເງື່ອນໄຂເພື່ອຮັບປະກັນຄວາມສຳເລັດໃນການປະຕິບັດຈຸດໝາຍກໍ່ສ້າງກອງທັບທີ່ທັນສະໄໝ ຕາມມະຕິຂອງກອງປະຊຸມໃຫຍ່ຄັ້ງທີ XIII ຂອງພັກ. ຕາມນັ້ນ, ຈຳເປັນຕ້ອງກຳແໜ້ນ ແລະ ປະຕິບັດແນວທາງແລະແຜນນະໂຍບາຍຂອງພັກ, ນະໂຍບາຍແລະກົດໝາຍຂອງລັດ ກ່ຽວກັບການທະຫານ, ການປ້ອງກັນປະເທດ, ການປົກປັກຮັກສາປະເທດຊາດຢ່າງຄົບຊຸດແລະມີປະສິດທິພາບ ເຊິ່ງຈຸດສຸມແມ່ນມະຕິກອງປະຊຸມສູນກາງພັກຄັ້ງທີ 8 ສະໄໝທີ XIII ກ່ຽວກັບ "ຍຸດທະສາດການປົກປັກຮັກສາປະເທດຊາດໃນສະພາບການໃໝ່", ຍຸດທະສາດການປ້ອງກັນປະເທດຫວຽດນາມ, ຍຸດທະສາດການທະຫານຫວຽດນາມ, ຍຸດທະສາດການປ້ອງກັນຄວາມໝັ້ນຄົງແຫ່ງຊາດ, ຍຸດທະສາດການປ້ອງກັນຊາຍແດນແຫ່ງຊາດ, ຍຸດທະສາດການປົກປັກຮັກສາປະເທດຊາດໃນໂລກໄຊເບີຣ໌ ແລະອື່ນໆ.
ທີຫ້າ, ຕັ້ງໜ້າ, ເປັນເຈົ້າການໃນການເປີດກວ້າງ ແລະ ຍົກສູງປະສິດທິຜົນການຮ່ວມມືສາກົນ ແລະ ການທູດດ້ານປ້ອງກັນປະເທດ ໃນສະພາບການໃໝ່.
ການເຊື່ອມໂຍງເຂົ້າກັບສາກົນ, ການທູດດ້ານປ້ອງກັນປະເທດ ແມ່ນໜຶ່ງໃນເສົາຄ້ຳສຳຄັນຂອງການພົວພັນຕ່າງປະເທດຂອງພັກ, ການທູດຂອງລັດ ແລະ ການທູດປະຊາຊົນ, ປະກອບສ່ວນເພີ່ມທະວີແຫຼ່ງກຳລັງກໍ່ສ້າງກອງທັບ, ປັບປຸງການປ້ອງກັນປະເທດໃຫ້ໝັ້ນຄົງເຂັ້ມແຂງ, ຕອບສະໜອງຄວາມຕ້ອງການແລະໜ້າທີ່ການປະຕິວັດໃນແຕ່ລະໄລຍະ. ໃນການຕໍ່ສູ້ຕ້ານພວກລ່າເມືອງຂຶ້ນຝະລັ່ງຜູ້ຮຸກຮານ, ການທູດດ້ານປ້ອງກັນປະເທດໄດ້ຕັ້ງໜ້າໃນການລະດົມຄວາມເຫັນອົກເຫັນໃຈ, ການສະໜັບສະໜູນແລະຊ່ວຍເຫຼືອຈາກບັນດາປະເທດສັງຄົມນິຍົມອ້າຍນ້ອງ ແລະ ເພື່ອນມິດສາກົນ, ປະກອບສ່ວນກໍ່ສ້າງກອງທັບປະຊາຊົນຫວຽດນາມ ໃຫ້ເຂັ້ມແຂງເທື່ອລະກ້າວ, ກາຍເປັນກອງທັບທີ່ມີຄວາມສາມາດເຄື່ອນໄຫວສູງ ແລະ ມີກຳລັງໄຟທີ່ແຂງແຮງ, ສາມາດເປີດບັ້ນຮົມຂະໜາດໃຫຍ່ ໄລຍະຍາວ ແລະ ຕໍ່ເນື່ອງໄດ້ດີ, ສາມາດຍາດເອົາແລະຮັກສາຄວາມເປັນເຈົ້າການທາງຍຸດທະສາດ, ກ້າວສູ່ການທັບມ້າງຄວາມພະຍາຍາມທາງການທະຫານສູງສຸດຂອງພວກລ່າເມືອງຂຶ້ນຝະລັ່ງ ຢູ່ ດ້ຽນບຽນຝູ (ປີ 1954). ໃນສົງຄາມຕໍ່ຕ້ານຈັກກະພັດອາເມລິກາເພື່ອກູ້ຊາດ, ອີກເທື່ອໜຶ່ງ, ການທູດດ້ານປ້ອງກັນປະເທດໄດ້ປະກອບສ່ວນສຳຄັນເຂົ້າໃນການກໍ່ສ້າງກອງທັບໃຫ້ກາຍເປັນກອງທັບທີ່ທັນສະໄໝພໍຄວນ ໂດຍມີບັນດາເຫຼົ່າທັບ, ເຫຼົ່າທະຫານທີ່ຄົບຊຸດ, ພ້ອມກັບປະຊາຊົນເອົາຊະນະກອງທັບອາຊີບ ທີ່ມີຄວາມສາມາດບົ່ມຊ້ອນດ້ານເສດຖະກິດ, ອາວຸດທີ່ທັນສະໄໝ ແລະ ວິທີສົງຄາມທາງບົກ, ທາງທະເລ ແລະ ທາງອາກາດ ເພື່ອຍາດເອົາເອກະລາດ ແລະໂຮມປະເທດເປັນເອກະພາບ.
ໃນປະຈຸບັນ, ເພື່ອກໍ່ສ້າງກອງທັບທີ່ເຂັ້ມແຂງ ແໜ້ນແຟ້ນ ກ້າວສູ່ຄວາມທັນສະໄໝນັ້ນ ຄຽງຄູ່ກັບການເສີມຂະຫຍາຍກຳລັງແຮງພາຍໃນ, ອີງໃສ່ກຳລັງຂອງຕົນເປັນຕົ້ນຕໍ, ຍັງຕ້ອງຕັ້ງໜ້າແລະເປັນເຈົ້າການໃນການເປີດກວ້າງ ແລະ ຍົກສູງປະສິດທິຜົນການຮ່ວມມືສາກົນ ແລະ ການທູດດ້ານປ້ອງກັນປະເທດ. ຕາມນັ້ນ, ບັນດາຄະນະພັກ, ຜູ້ບັນຊາການອົງການ, ກົມກອງຕ້ອງສຸມໃສ່ໂຄສະນາເຜີຍແຜ່, ສຶກສາອົບຮົມພະນັກງານແລະນັກຮົບ, ໂດຍສະເພາະແມ່ນ ພະນັກງານການຕ່າງປະເທດ, ໃຫ້ຊາບຊຶມກຳແໜ້ນແນວທາງ ແຜນນະໂຍບາຍການຕ່າງປະເທດຂອງພັກ, ລັດ ຕາມທີ່ໄດ້ກຳນົດໄວ້ໃນມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກ, ມະຕິກອງປະຊຸມໃຫຍ່ຜູ້ແທນຄະນະພັກກອງທັບຄັ້ງທີ XI, ມະຕິກອງປະຊຸມສູນກາງພັກຄັ້ງທີ 8 ສະໄໝທີ XIII ກ່ຽວກັບ “ຍຸດທະສາດການປົກປັກຮັກສາປະເທດຊາດໃນສະພາບການໃໝ່; ໂດຍສະເພາະແມ່ນ ບົດສະຫຼຸບໝາຍເລກ 53-KL/TW, ລົງວັນທີ 28 ເມສາ 2023, ຂອງກົມການເມືອງສູນກາງ ແລະ ມະຕິໝາຍເລກ 2662-NQ/QUTW, ລົງວັນທີ 26 ກຸມພາ 2024, ຂອງຄະນະພັກການການທະຫານສູນກາງ, ກ່ຽວກັບການເຊື່ອມໂຍງເຂົ້າກັບສາກົນ ແລະ ການທູດດ້ານປ້ອງກັນປະເທດ ຮອດປີ 2030 ແລະຊຸມປີຕໍ່ໄປ, ບັນດາບົດສະຫຼຸບ, ຄຳສັ່ງຂອງກົມການເມືອງສູນກາງ, ຄະນະເລຂາທິການສູນກາງ, ຄະນະພັກການທະຫານສູນກາງ, ກະຊວງປ້ອງກັນປະເທດ, ພ້ອມທັງທັດສະນະ, ຫຼັກການ, ເປົ້າໝາຍ, ຄວາມຕ້ອງການ, ໜ້າທີ່ວຽກງານການເຊື່ອມໂຍງເຂົ້າກັບສາກົນ ແລະ ການທູດດ້ານປ້ອງກັນຊາດ; ການໝູນໃຊ້ແນວທາງ “ການທູດແບບໄມ້ໄຜ່” ຢ່າງປະດິດສ້າງ, ພາຍໃຕ້ການນຳພາໂດຍກົງຂອງຄະນະພັກການທະຫານສູນກາງ, ກະຊວງປ້ອງກັນປະເທດ, ບັນດາອົງການ, ກົມກອງໃນທົ່ວກອງທັບ ຕ້ອງຜັນຂະຫຍາຍການຮ່ວມມືດ້ານປ້ອງກັນປະເທດສອງຝ່າຍ ແລະ ຫຼາຍຝ່າຍ ຢ່າງຄົບຊຸດ ປະດິດສ້າງ ແທ້ຈິງ ມີຈຸດໜັກໃຈກາງ. ເປັນເຈົ້າການໃນການແກ້ໄຂເປັນຢ່າງດີ ການພົວພັນຮ່ວມມືດ້ານການປ້ອງກັນປະເທດ ກັບບັນດາປະເທດບ້ານໃກ້ເຮືອນຄຽງ, ປະເທດໃຫຍ່, ປະເທດຄູ່ຮ່ວມມືຍຸດທະສາດ, ບັນດາປະເທດອາຊຽນ ແລະ ບັນດາປະເທດເພື່ອນມິດທີ່ເປັນມູນເຊື້ອ; ຍຶດໝັ້ນນະໂຍບາຍປ້ອງກັນປະເທດ “ສີ່ບໍ່ມີ”; ຮັບປະກັນຜົນປະໂຫຍດສູງສຸດຂອງຊາດ-ປະເທດຊາດ ບົນພື້ນຖານກົດໝາຍສາກົນ; ເພີ່ມທະວີການຄົ້ນຄ້ວາ, ເປັນເຈົ້າການໃນການກຳສະພາບການ, ຄາດຄະເນທ່າອ່ຽງການພົວພັນສາກົນໄດ້ຢ່າງແມ່ນຢຳ ແລະທັນທ່ວງທີ, ໂດຍສະເພາະການພົວພັນລະຫວ່າງບັນດາປະເທດ ແລະ ອົງການທີ່ມີຜົນສະທ້ອນໂດຍກົງຕໍ່ຜົນປະໂຫຍດດ້ານຄວາມໝັ້ນຄົງແຫ່ງຊາດຂອງຫວຽດນາມ./.
------------------
(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 14, ໜ້າ 435.
(2) ຈິດໃຈແຫ່ງຄວາມກ້າຫານທັງ 7 ພາຍໃຕ້ການນຳຂອງເລຂາທິການໃຫຍ່ຜູ້ລ່ວງລັບ ຫງຽນຝູຈ້ອງ: ກ້າຄິດ, ກ້າເວົ້າ, ກ້າເຮັດ, ກ້າຮັບຜິດຊອບ, ກ້າປ່ຽນແປງໃໝ່, ກ້າປະດິດສ້າງ, ກ້າປະເຊີນໜ້າກັບຄວາມຫຍຸ້ງຍາກແລະສິ່ງທ້າທາຍ, ກ້າກະທຳເພື່ອຜົນປະໂຫຍດສ່ວນລວມ.
