ວກ.- ໃນໄລຍະປີ 2020-2025, ອົງຄະນະພັກກອງທັບໄດ້ນຳພາກອງທັບທັງໝົດໃນການຊາບຊຶມ ແລະຜັນຂະຫຍາຍປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກອມມູນິດຫວຽດນາມ ແລະມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກກອງທັບ ຢ່າງເຂັ້ມງວດແລະມີປະສິດທິຜົນ ເຊິ່ງບັນລຸໄດ້ໝາກຜົນໃນທາງບວກແລະຮອບດ້ານ. ໜຶ່ງໃນຄວາມສຳເລັດທີ່ໂດດເດັ່ນແມ່ນ ການປັບໂຄງສ້າງກຳລັງພົນຂອງກອງທັບໃຫ້ກະທັດລັດຮັດກຸມ, ຄ່ອງຕົວ, ມີປະສິດທິພາບ ແລະ ເຂັ້ມແຂງ ເຊິ່ງເປັນການສ້າງຮາກຖານທີ່ໝັ້ນຄົງໃຫ້ແກ່ການກໍ່ສ້າງກອງທັບທີ່ທັນສະໄໝໃນຍຸກໃໝ່.

ການປັບໂຄງສ້າງການຈັດຕັ້ງກອງທັບໃຫ້ກະທັດລັດຮັດກຸມ, ຄ່ອງຕົວ,
ມີປະສິດທິພາບ ແລະ ເຂັ້ມແຂງໄດ້ສຳເລັດເສັດສິ້ນໂດຍພື້ນຖານ

ໃນໄລຍະປີ 2020-2025, ອົງຄະນະພັກກອງທັບໄດ້ນຳພາກອງທັບທັງໝົດໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກ ແລະ ມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກກອງທັບ ທ່າມກາງສະຖານະການໂລກ ແລະພາກພື້ນທີ່ສັບສົນແລະຄາດເດົາບໍ່ໄດ້. ບັນດາປະເທດມະຫາອຳນາດໄດ້ເພີ່ມທະວີການແກ່ດຶງແລະເຕົ້ນໂຮມກຳລັງ, ແຂ່ງຂັນແລະປະເຊີນໜ້າກັນຢ່າງດຸເດືອດໃນຫຼາຍຂົງເຂດ; ຄວາມຂັດແຍ້ງທາງທະຫານ ແລະຂໍ້ພິພາດກ່ຽວກັບອະທິປະໄຕແລະດິນແດນ ໄດ້ເກີດຂຶ້ນໃນຫຼາຍແຫ່ງ.  ການປະຕິວັດອຸດສາຫະກຳຄັ້ງທີ 4, ໂດຍສະເພາະ ການພັດທະນາວິທະຍາສາດແລະເຕັກໂນໂລຊີທາງທະຫານ ສົ່ງຜົນກະທົບຢ່າງເລິກເຊິ່ງໃນຫຼາຍຂົງເຂດ, ກໍ່ໃຫ້ເກີດສົງຄາມຮູບແບບໃໝ່, ພື້ນທີ່ທາງຍຸດທະສາດ, ຮູບແບບແລະວິທີການດຳເນີນສົງຄາມແບບໃໝ່ ແລະ ສ້າງຄວາມທ້າທາຍໃໝ່ຕໍ່ສັນຕິພາບ, ສະຖຽນລະພາບ ແລະຄວາມໝັ້ນຄົງຂອງທຸກປະເທດ. ຄວາມທ້າທາຍດ້ານຄວາມໝັ້ນຄົງທີ່ບໍ່ແມ່ນແບບດັ້ງເດີມ, ໂດຍສະເພາະ ຄວາມໝັ້ນຄົງທາງໄຊເບີ, ໄພພິບັດທາງທຳມະຊາດ ແລະໂລກລະບາດ ໄດ້ກໍ່ໃຫ້ເກີດຜົນກະທົບທີ່ຮຸນແຮງ.

ສຳລັບຫວຽດນາມ, ຫຼັງຈາກດຳເນີນກິດຈະການປ່ຽນແປງໃໝ່ເກືອບ 40 ປີ, ທ່າແຮງ, ສະຖານະ ແລະ ກຽດສັກສີໃນເວທີສາກົນຂອງປະເທດ ໄດ້ພັດທະນາຂຶ້ນຢ່າງຕໍ່ເນື່ອງ, ສ້າງຮາກຖານທີ່ສຳຄັນສຳລັບການພັດທະນາທີ່ເຂັ້ມແຂງ ແລະ ຍືນຍົງຍິ່ງຂຶ້ນໃນໄລຍະໃໝ່. ຢ່າງໃດກໍ່ຕາມ, ປະເທດຍັງປະເຊີນກັບຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງ. ກອງກຳລັງທີ່ເປັນສັດຕູຍັງສືບຕໍ່ເພີ່ມທະວີການເຄື່ອນໄຫວໂຄ່ນລົ້ມຕໍ່ຫວຽດນາມ ຜ່ານຍຸດທະສາດ "ການຫັນປ່ຽນໂດຍສັນຕິ" ໂດຍສົ່ງເສີມ "ການປ່ຽນແປງຕົນເອງ" ແລະ "ການຫັນປ່ຽນຕົນເອງ" ພາຍໃນປະເທດ. ທະເລຕາເວັນອອກແລະພື້ນທີ່ທີ່ກ່ຽວຂ້ອງຍັງມີປັດໄຈທີ່ສັບສົນຫຼາຍຢ່າງ. ສິ່ງເຫຼົ່ານີ້ກໍ່ໃຫ້ເກີດສິ່ງທ້າທາຍໃໝ່ ແລະສ້າງຄວາມຕ້ອງການສູງຫຼາຍຕໍ່ວຽກງານກໍ່ສ້າງກອງທັບ, ປັບປຸງການປ້ອງກັນປະເທດ ແລະ ປົກປັກຮັກສາປະເທດຊາດ. ໃນສະພາບການນີ້, ຄະນະພັກການທະຫານສູນກາງ ແລະ ກະຊວງປ້ອງກັນປະເທດ ໄດ້ກຳນົດວ່າ ການປັບໂຄງສ້າງການຈັດຕັ້ງແລະກຳລັງພົນ ບໍ່ໄດ້ໝາຍເຖິງພຽງແຕ່ການຫຼຸດຈຳນວນບຸກຄະລາກອນ ຫຼື ໜ່ວຍງານເທົ່ານັ້ນ, ແຕ່ແມ່ນການປະຕິວັດແນວຄິດການຈັດຕັ້ງກຳລັງ, ການແກ້ໄຂຄວາມສັບສົນຂອງພາລະບົດບາດແລະໜ້າທີ່, ການຫຼຸດໄລຍະເວລາໃນການຕັດສິນໃຈ ແລະ ການປັບປຸງປະສິດທິພາບຂອງການປະຕິບັດງານ ເຊິ່ງເປັນການວາງຮາກຖານສຳລັບການສ້າງກອງທັບທີ່ທັນສະໄໝ, ຕອບສະໜອງຄວາມຕ້ອງການ ແລະໜ້າທີ່ປົກປັກຮັກສາປະເທດຊາດໃນສະຖານະການໃໝ່. ນີ້ແມ່ນໜ້າທີ່ທີ່ສຳຄັນຫຼາຍ, ມັນກ່ຽວຂ້ອງກັບຫຼາຍຊັ້ນ, ຫຼາຍຂະແໜງການ ແລະຫຼາຍໜ່ວຍງານ ແລະ ສົ່ງຜົນກະທົບໂດຍກົງຕໍ່ຂວັນກຳລັງໃຈ ແລະຄວາມຮູ້ສຶກຂອງນາຍທະຫານແລະພົນທະຫານ ຕະຫຼອດຈົນຄວາມພ້ອມຮົບ ແລະກຳລັງແຮງສູ້ຮົບຂອງກອງທັບ. ຄະນະພັກການທະຫານສູນກາງ ແລະກະຊວງປ້ອງກັນປະເທດ ໄດ້ລະບຸວ່າ ນີ້ແມ່ນຂອດບຸກທະລຸທີ່ສຳຄັນ ແລະ ກຳລັງສຸມການນຳພາແລະຊີ້ນຳການຜັນຂະຫຍາຍປະຕິບັດຢ່າງຈິງຈັງ ແລະເດັດຂາດຂອງກອງທັບທັງໝົດ ເພື່ອຮັບປະກັນວ່າ ການຈັດຕັ້ງປະຕິບັດນັ້ນລະອຽດຖີ່ຖ້ວນ, ຮອບດ້ານ, ຄົບຊຸດ, ມີວິທະຍາສາດ, ມີຈຸດໜັກໃຈກາງ ແລະ ເປັນໄປຕາມແຜນງານທີ່ເໝາະສົມ; ປະສານສົມທົບວຽກງານດ້ານແນວຄິດ ກັບວຽກງານການຈັດຕັ້ງ ແລະນະໂຍບາຍຢ່າງໃກ້ຊິດ, ລະບຸແລະແກ້ໄຂບັນຫາທີ່ເກີດຂຶ້ນຢ່າງທັນທ່ວງທີ,...

ດ້ວຍຄວາມຕັດສິນໃຈທາງການເມືອງອັນແຮງກ້າ, ຄວາມເປັນເອກະພາບ, ຄວາມສາມັກຄີ ແລະຄວາມເປັນຈິດໜຶ່ງໃຈດຽວໃນທົ່ວກອງທັບ, ມາເຖິງປະຈຸບັນ ກອງທັບໄດ້ສຳເລັດໂດຍພື້ນຖານ ການປັບໂຄງສ້າງການຈັດຕັ້ງຕາມທິດທາງກະທັດລັດຮັດກຸມ, ຄ່ອງຕົວ, ມີປະສິດທິພາບ ແລະເຂັ້ມແຂງ. ສິ່ງທີ່ໜ້າສົນໃຈຄື ເພື່ອຕອບໜອງຕໍ່ຄວາມຮຽກຮ້ອງຕ້ອງການອັນຮີບດ່ວນແລະເດັດຂາດ ຂອງການປະຕິວັດດ້ານກປັບການຈັດຕັ້ງກົງຈັກຂອງລະບົບການເມືອງໃຫ້ກະທັດລັດຮັດກຸມ, ຄ່ອງຕົວ, ເຂັ້ມແຂງ, ມີປະສິດທິພາບ, ປະສິດທິຜົນ, ມີຜົນສັກສິດ ແລະ ການປັບຂອບເຂດການບໍລິຫານ ແລະ ການຈັດຕັ້ງປະຕິບັດຮູບແບບການປົກຄອງສ່ວນທ້ອງຖິ່ນສອງຊັ້ນ, ຄະນະພັກການທະຫານສູນກາງ ແລະກະຊວງປ້ອງກັນປະເທດ ໄດ້ຊາບຊຶມນະໂຍບາຍ ແລະຄຳສັ່ງຂອງຄະນະບໍລິຫານງານສູນກາງພັກ, ກົມການເມືອງສູນກາງ ແລະ ເລຂາທິການໃຫຍ່ ໂຕເລິມ, ໂດຍການຄົ້ນຄວ້າ, ໃຫ້ຄຳແນະນຳ ແລະ ຊີ້ນຳການປະຕິບັດໂຄງການປັບໂຄງສ້າງການຈັດຕັ້ງທະຫານທ້ອງຖິ່ນແຂວງທີ່ກະທັດລັດຮັດກຸມ ຄ່ອງຕົວ ແລະເຂັ້ມແຂງ ເພື່ອຕອບສະໜອງຄວາມຕ້ອງການ ແລະໜ້າທີ່ໃນສະຖານະການໃໝ່... ຮອດເດືອນກັນຍາ 2025, ກອງທັບທັງໝົດໄດ້ປັບໂຄງສ້າງອົງການຈັດຕັ້ງຫຼາຍກວ່າ 4.400 ແຫ່ງ; ການອອກລະບຽບຂໍ້ບັງຄັບກ່ຽວກັບພາລະບົດບາດ, ໜ້າທີ່, ອຳນາດ ແລະ ຄວາມສຳພັນການເຮັດວຽກຂອງອົງການແລະໜ່ວຍງານທີ່ລວມເຂົ້າກັນ, ປັບປຸງ ແລະ ຈັດຕັ້ງຂຶ້ນໃໝ່; ການພັດທະນາແຜນການຈັດຕັ້ງ ແລະບັນຈຸພະນັກງານທີ່ເໝາະສົມ ເພື່ອຮັບປະກັນວ່າ ການດຳເນີນງານທຸກດ້ານຂອງອົງການ ແລະໜ່ວຍງານເປັນໄປຢ່າງມີປະສິດທິພາບ. ໂຄງສ້າງການຈັດຕັ້ງຂອງກອງທັບຮັບປະກັນຄວາມຄົບຊຸດ ສອດຄ່ອງ ແລະສົມເຫດສົມເຫດຜົນ ລະຫວ່າງສ່ວນປະກອບຕ່າງໆ ຂອງກຳລັງພົນ, ຫຼີກລ່ຽງການທັບຊ້ອນກັນທາງດ້ານພາລະບົດບາດແລະໜ້າທີ່, ຫຼຸດຈຳນວນຕົວກາງແລະໜ່ວຍບໍລິການ; ຮັບປະກັນ ແລະ ສ້າງຮາກຖານທີ່ໝັ້ນຄົງ ເພື່ອພັດທະນາຄຸນນະພາບໂດຍລວມ, ກຳລັງແຮງສູ້ຮົບ ແລະ ການສ້າງກອງທັບທີ່ທັນສະໄໝ.

ການສ້າງຄວາມກ້າວໜ້າທີ່ສຳຄັນເພື່ອເສີມຂະຫຍາຍກຳລັງແຮງສູ້ຮົບຂອງກອງທັບ

ຄຽງຄູ່ກັບການປັບໂຄງສ້າງການຈັດຕັ້ງແລະກຳລັງພົນ, ການສ້າງກອງທັບທີ່ເຂັ້ມແຂງທາງດ້ານການເມືອງແມ່ນໜ້າທີ່ທີ່ສຳຄັນທີ່ສຸດ. ນີ້ແມ່ນປັດໄຈຕັດສິນຊີ້ຂາດໃນການເຕີບໂຕ, ຄວາມເຂັ້ມແຂງ ແລະ ໄຊຊະນະຂອງກອງທັບຂອງເຮົາ, ຮັບປະກັນວ່າກອງທັບຈະຮັກສາທິດທາງ ແລະ ເປົ້າໝາຍໃນການສູ້ຮົບຢູ່ສະເໝີ, ເປັນເຄື່ອງມືແຫ່ງຄວາມຮຸນແຮງທີ່ແຫຼມຄົມ, ເປັນກຳລັງທາງການເມືອງ ແລະ ກອງກຳລັງຕໍ່ສູ້ທີ່ຈົງຮັກພັກດີ ແລະ ໜ້າເຊື່ອຖືຢ່າງແທ້ຈິງຕໍ່ພັກ, ລັດ ແລະປະຊາຊົນ. ໃນໄລຍະທີ່ຜ່ານມາ, ອົງຄະນະພັກກອງທັບໄດ້ເປັນແບບຢ່າງໃນການຈັດຕັ້ງປະຕິບັດ ມະຕິກອງປະຊຸມເຕັມຄະນະຄັ້ງທີ 4 ຂອງຄະນະບໍລິຫານງານສູນກາງພັກ ຊຸກທີ XIII ແລະ ບົດສະຫຼຸບທີ 21-KL/TW, ລົງວັນທີ 25 ຕຸລາ 2021, ຂອງຄະນະບໍລິຫານສູນກາງພັກ ວ່າດ້ວຍການກໍ່ສ້າງແລະປັບປຸງພັກ ແລະ ລະບົບການເມືອງ; ເດັດດ່ຽວກີດກັ້ນ, ຍູ້ຖອຍ, ຈັດການຢ່າງເຂັ້ມງວດກັບພະນັກງານແລະສະມາຊິກພັກ ທີ່ເສື່ອມໂຊມທາງດ້ານແນວຄິດການເມືອງ, ຄຸນສົມບັດສິນທຳ ແລະວິຖີຊີວິດ ແລະ ປະກົດການ "ປ່ຽນແປງຕົນເອງ", "ການຫັນປ່ຽນຕົນເອງ", ໂດຍຕິດກັບການຈັດຕັ້ງປະຕິບັດບົດສະຫຼຸບເລກທີ 01-KL/TW, ລົງວັນທີ 18 ພຶດສະພາ 2021, ຂອງກົມການເມືອງສູນກາງພັກ (ສະໄໝທີ XIII). ພາຍໃຕ້ການນຳພາຂອງຄະນະພັກການທະຫານສູນກາງ, ບັນດາຄະນະພັກ ແລະ ການຈັດຕັ້ງພັກທຸກລະດັບໃນກອງທັບ ໄດ້ຮັບການກໍ່ສ້າງໃຫ້ມີຄວາມສະອາດ, ເຂັ້ມແຂງ ແລະ ເປັນແບບຢ່າງທີ່ດີທາງດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະ ພະນັກງານ; ໄດ້ຮັບການປັບປຸງຍົກສູງຄວາມສາມາດໃນການນຳພາ ແລະ ກຳລັງແຮງສູ້ຮົບຢ່າງຕໍ່ເນື່ອງ, ຍຶດໝັ້ນໃນຫຼັກການລວມສູນປະຊາທິປະໄຕຢ່າງເຂັ້ມງວດ; ເຊີດຊູລັກສະນະນຳໜ້າແລະເປັນແບບຢ່າງຂອງຫົວໜ້າຄະນະພັກ ແລະຜູ້ບັນຊາການກົມກອງ, ຮັບປະກັນການຮັກສາ ແລະເພີ່ມທະວີການນຳພາເດັດຂາດແລະໂດຍກົງ ຂອງພັກຕໍ່ກອງທັບໃນທຸກດ້ານ. ນຳພາການຈັດຕັ້ງເປັນຢ່າງດີ ການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ ແລະ ແບບແຜນຂອງໂຮ່ຈີມິນ ຄວບຄູ່ໄປກັບມະຕິເລກທີ 847-NQ/QUTW, ລົງວັນທີ 28 ທັນວາ 2021, ຂອງຄະນະພັກການທະຫານສູນກາງ ວ່າດ້ວຍການເສີມຂະຫຍາຍຄຸນສົມບັດຂອງ "ທະຫານລຸງໂຮ່", ເດັດດ່ຽວຕໍ່ສູ້ກັບລັດທິອັດຕະບຸກຄົນໃນສະຖານະການໃໝ່ ແລະ ຂະບວນການຂົນຂວາຍສົ່ງເສີມມູນເຊື້ອ, ການອຸທິດສະຕິປັນຍາ ໃຫ້ສົມກັບຊື່ສຽງຂອງ "ທະຫານລຸງໂຮ່" ໃນຍຸກໃໝ່, ດ້ວຍຮູບແບບທີ່ດີ ແລະວິທີການສ້າງສັນຫຼວງຫຼາຍ. ຄຸນນະພາບແລະປະສິດທິພາບຂອງວຽກງານພັກ ແລະ ວຽກງານການເມືອງໃນທຸກດ້ານ ໄດ້ຮັບການປັບປຸງໃຫ້ດີຂຶ້ນ. ກອງທັບໄດ້ເສີມຂະຫຍາຍບົດບາດຫຼັກແຫຼ່ງແລະນຳໜ້າ ໃນການປົກປ້ອງພື້ນຖານແນວຄິດຂອງພັກ, ຕໍ່ສູ້ກັບທັດສະນະທີ່ຜິດພາດ, ຜາບແພ້ແຜນການ "ຫັນປ່ຽນໂດຍສັນຕິ" ແລະ "ການລົບລ້າງດ້ານການເມືອງ" ຂອງກອງທັບ ໂດຍກອງກຳລັງທີ່ເປັນສັດຕູ, ຮັກສາຖານທີ່ໝັ້ນທາງອຸດົມການຂອງພັກພາຍໃນກອງທັບ. ກອງທັບໃຫ້ຄໍາແນະນໍາ ແລະປະສານງານການຈັດກິດຈະກໍາສະເຫຼີມສະຫຼອງວັນສໍາຄັນຂອງພັກແລະປະເທດ, ສອດຄ່ອງກັບຂະໜາດ, ຄວາມໝາຍ ແລະ ຄວາມສໍາຄັນຂອງເຫດການ, ປະກອບສ່ວນເຂົ້າໃນການເຜີຍແຜ່ນ້ຳໃຈຮັກຊາດ, ຄວາມພາກພູມໃຈໃນຊາດ, ຄວາມເຄົາລົບຕົນເອງ, ຄວາມເຂັ້ມແຂງຂອງຄວາມສາມັກຄີໃນຊາດ ແລະ ພາບພົດຂອງຫວຽດນາມ ໃນເວທີສາກົນ ຢ່າງເລິກເຊິ່ງ. ພະນັກງານແລະທະຫານທົ່ວກອງທັບຍຶດໝັ້ນຄວາມເຂັ້ມແຂງທາງການເມືອງ, ຝຶກຝົນຫຼໍ່ຫຼອມຄຸນສົມບັດປະຕິວັດທີ່ບໍລິສຸດ, ຮັກສາຄວາມມີລະບຽບວິໄນແລະຄວາມເຂັ້ມງວດໃນການຈັດຕັ້ງ, ຈົງຮັກພັກດີຢ່າງບໍ່ມີເງື່ອນໄຂ ແລະສັດທາຢ່າງແທ້ຈິງ ຕໍ່ການນໍາພາຂອງພັກ, ມີຄວາມສາມັກຄີຢ່າງໃກ້ຊິດກັບປະຊາຊົນ ແລະ ພ້ອມທີ່ຈະຮັບແລະປະຕິບັດພາລະກິດທີ່ໄດ້ຮັບມອບໝາຍໃຫ້ສໍາເລັດລຸລ່ວງຢ່າງດີ.

ອົງຄະນະພັກກອງທັບໄດ້ນຳພາການຈັດຕັ້ງປະຕິບັດວຽກງານການຝຶກອົບຮົມ ແລະຄວາມພ້ອມຮົບຢ່າງສຳເລັດຜົນ, ສ້າງຄວາມກ້າວໜ້າທີ່ສຳຄັນໃນການເສີມຂະຫຍາຍກຳລັງແຮງສູ້ຮົບຂອງກອງທັບ. ຄະນະພັກການທະຫານສູນກາງໄດ້ອອກມະຕິແລະນຳພາການຈັດຕັ້ງປະຕິບັດມະຕິສະເພາະດ້ານການຝຶກອົບຮົມ, ການສຶກສາ, ວິທະຍາສາດການທະຫານ, ພະລາທິການ, ເຕັກໂນໂລຊີຢ່າງວ່ອງໄວ. ທົ່ວກອງທັບໄດ້ເພີ່ມທະວີການປັບປຸງເນື້ອໃນ, ການຈັດຕັ້ງ ແລະ ວິທີການການຝຶກອົບຮົມ ໃຫ້ສອດຄ່ອງກັບແນວຄິດໃໝ່ຂອງພັກກ່ຽວກັບການທະຫານ ແລະ ການປ້ອງກັນປະເທດ; ຄວາມຕ້ອງການຂອງການປົກປັກຮັກສາປະເທດຊາດ ແລະ ສະພາວະການຮົບໃໝ່. ບັນດາອົງການແລະໜ່ວຍງານໄດ້ຍຶດໝັ້ນໃນຄຳຂວັນທີ່ວ່າ "ພື້ນຖານ, ແທດຈິງ ແລະ ໝັ້ນຄົງ" ໃນການຝຶກອົບຮົມ ແລະ ຄຳຂວັນທີ່ວ່າ "ຄຸນນະພາບການຝຶກອົບຮົມຂອງໂຮງຮຽນແມ່ນຄວາມພ້ອມໃນການສູ້ຮົບຂອງກົມກອງ" ໃນການຝຶກອົບຮົມ, ດຳເນີນການຝຶກອົບຮົມຢ່າງຮອບດ້ານ, ຄົບຊຸດ ແລະ ເລິກເຊິ່ງ ໂດຍມີຈຸດໜັກໃຈກາງ, ສອດຄ່ອງກັບສະຖານະການສູ້ຮົບຕົວຈິງ, ພື້ນທີ່ປະຕິບັດການ ແລະ ເປົ້າໝາຍການຮົບ, ພ້ອມທັງເໝາະສົມກັບໂຄງສ້າງການຈັດຕັ້ງ, ການພັດທະນາອາວຸດຍຸດໂທປະກອນ ແລະສິລະປະການທະຫານຂອງຫວຽດນາມ; ຖືເອົາການຝຶກຮົບພາຍໃຕ້ສະພາວະທີ່ສັດຕູໃຊ້ອາວຸດເຕັກໂນໂລຢີສູງເປັນສະພາບແວດລ້ອມໃນການຝຶກຝົນທັກສະ ແລະຄວາມສາມາດຂອງກຳລັງພົນ; ຖືເອົາໜ້າທີ່ປົກປັກຮັກສາປະເທດຊາດ, ປົກປ້ອງລະບອບການເມືອງ, ປົກປ້ອງຊີວິດແລະຊັບສິນຂອງປະຊາຊົນ ເປັນຈຸດປະສົງຂອງການຝຶກອົບຮົມ. ປະສົມປະສານການຝຶກອົບຮົມທາງທະຫານຢ່າງໃກ້ຊິດ ກັບການສຶກສາທາງການເມືອງ, ການຝຶກອົບຮົມດ້ານລະບຽບຂໍ້ບັງຄັບ ແລະຄວາມແຂງແຮງທາງຮ່າງກາຍ; ໃຫ້ຄວາມສຳຄັນກັບການຖ່າຍທອດປະສົບການການຮົບ ແລະ ການຮັບມືກັບສະຖານະການດ້ານຄວາມໝັ້ນຄົງທີ່ບໍ່ແມ່ນແບບດັ້ງເດີມ. ຜ່ານສິ່ງນີ້, ລະດັບຄວາມພ້ອມຮົບ ແລະກຳລັງແຮງສູ້ຮົບຂອງກອງທັບທັງໝົດ ຈຶ່ງໄດ້ຮັບການຍົກຂຶ້ນສູ່ລະດັບໃໝ່.

ຕໍ່ໜ້າການພັດທະນາທີ່ສັບສົນແລະຄາດເດົາບໍ່ໄດ້ຂອງໂລກແລະພາກພື້ນ, ແລະການແຊກຊ້ອນກັນລະຫວ່າງເປົ້າໝາຍຕໍ່ສູ້ແລະຄູ່ຮ່ວມມືນັ້ນ, ຄະນະພັກການການທະຫານສູນກາງ ແລະ ກະຊວງປ້ອງກັນປະເທດ ໄດ້ນຳພາແລະຊີ້ນຳໃຫ້ກອງທັບທັງໝົດຮັກສາແລະດຳເນີນການຕາມພາລະກິດຄວາມພ້ອມຮົບຢ່າງເຄັ່ງຄັດ, ຄຸ້ມຄອງເຂດນ່ານຟ້າ, ທະເລ, ຊາຍແດນ, ພື້ນທີ່ພາຍໃນ ແລະ ໄຊເບີຣ໌ສະເປດຢ່າງໃກ້ຊິດ, ຈັດການສະຖານະການໄດ້ຢ່າງຍືດຫຍຸ່ນແລະມີປະສິດທິພາບ, ຫຼີກລ່ຽງການຕົກໃນທ່າຮັບ ຫຼືປະຫຼາດໃຈ. ສຸມໃສ່ນຳພາແລະຊີ້ນຳການຈັດຕັ້ງການຝຶກຊ້ອມຂະໜາດໃຫຍ່ທີ່ໃຊ້ກຳລັງພົນ, ອາວຸດຍຸດໂທປະກອນຈຳນວນຫຼາຍໄດ້ຢ່າງປະສົບຄວາມສຳເລັດໃນເວລາທີ່ເໝາະສົມ⁽²⁾, ປະກອບສ່ວນເຂົ້າໃນການປັບປຸງລະດັບການບັງຄັບບັນຊາ, ການປະສານງານການຮົບ ແລະ ຄວາມພ້ອມຮົບຂອງກອງທັບທັງໝົດ.

ທຸກລະດັບຊັ້ນເປັນເຈົ້າການໃນການທົບທວນແລະປັບປຸງລະບົບເອກະສານ ແລະ ແຜນປະຕິບັດການ; ຄົ້ນຄວ້າ ແລະ ພັດທະນາຍຸດທະວິທາທາງການຮົບ ແລະ ສ້າງແຜນການວາງກຳລັງຍຸດທະສາດທີ່ສອດຄ່ອງກັບການປັບປ່ຽນຂອບເຂດການບໍລິຫານຂອງແຂວງແລະນະຄອນ ໃນຂະນະທີ່ມີການຈັດຕັ້ງປະຕິບັດອຳນາດການປົກຄອງສ່ວນທ້ອງຖິ່ນສອງຊັ້ນ ແລະ ໃນພາວະສົງຄາມທີ່ໃຊ້ອາວຸດເຕັກໂນໂລຊີສູງ. ກອງທັບທັງໝົດໄດ້ເປັນເຈົ້າການ ໃນການພັດທະນາແຜນຮັບມືທີ່ມີປະສິດທິພາບ ຕໍ່ຄວາມທ້າທາຍດ້ານຄວາມໝັ້ນຄົງແບບດັ້ງເດີມ ແລະບໍ່ແມ່ນແບບດັ້ງເດີມ, ໂດຍສົ່ງກຳລັງພົນທະຫານຫຼາຍລ້ານຄົນ ພ້ອມຍຸດໂທປະກອນຈຳນວນຫຼາຍ ໄປຮ່ວມສ້າງພື້ນທີ່ຊົນນະບົດໃໝ່ ແລະເຂດຕົວເມືອງທີ່ມີອາລະຍະທຳ, ປ້ອງກັນແລະບັນເທົາຜົນກະທົບຈາກໄພພິບັດທາງທຳມະຊາດ ແລະໂລກລະບາດ, ໂດຍສະເພາະໃນການປ້ອງກັນແລະຄວບຄຸມພະຍາດໂຄວິດ-19, ການຄົ້ນຫາກູ້ໄພກູ້ຊີບ ແລະ ປະຕິບັດໜ້າທີ່ "ການຕໍ່ສູ້ໃນຍາມສັນຕິພາບ" ໃຫ້ສຳເລັດລຸລ່ວງ.

ກອງທັບໄດ້ເຂົ້າຮ່ວມຢ່າງຕັ້ງໜ້າແລະມີປະສິດທິຜົນ ໃນການແກ້ໄຂຜົນກະທົບຈາກແຜ່ນດິນໄຫວຢູ່ປະເທດຕວກກີ ແລະມຽນມາ, ຍົກສູງບົດບາດ, ຖານະ, ຄວາມສາມາດ ແລະ ປະສົບການຂອງຫວຽດນາມ ໃນການຮັບມືກັບເຫດການແລະໄພພິບັດ ເຊິ່ງໄດ້ຮັບການຍ້ອງຍໍຊົມເຊີຍຢ່າງສູງ ຈາກປະເທດເຈົ້າພາບ ແລະ ປະຊາຄົມສາກົນ. ຜ່ານນັ້ນ, ບຳລຸງຄູນສ້າງອຸດົມການປະຕິວັດ, ຄວາມກ້າຫານ ແລະ ພະລັງກໍາລັງໃນການຕໍ່ສູ້ໃນໝູ່ພະນັກງານ-ນັກຮົບຢ່າງຕໍ່ເນື່ອງ, ຕອບສະໜອງຄວາມຕ້ອງການໃນການປົກປັກຮັກສາປະເທດຊາດຕັ້ງແຕ່ຕົ້ນແລະຈາກໄລຍະໄກ; ຮັກສາປະເທດໄວ້ກ່ອນທີ່ມັນຈະຕົກຢູ່ໃນອັນຕະລາຍ.

ຄະນະພັກການທະຫານສູນກາງ ແລະກະຊວງປ້ອງກັນປະເທດ ໄດ້ຈັດຕັ້ງປະຕິບັດນະໂຍບາຍແລະແນວທາງຂອງພັກແລະລັດ ກ່ຽວກັບການສ້າງ ແລະພັດທະນາອຸດສາຫະກຳປ້ອງກັນປະເທດຢ່າງມີປະສິດທິພາບ. ນີ້ແມ່ນໜຶ່ງໃນຜົນສຳເລັດທີ່ໂດດເດັ່ນທີ່ສຸດໃນການນຳພາການກໍ່ສ້າງກອງທັບທີ່ກະທັດລັດຮັດກຸມ, ຄ່ອງຕົວ, ເຂັ້ມແຂງ ແລະ ທັນສະໄໝ ໂດຍອົງຄະນະພັກກອງທັບໃນໄລຍະປີ 2020-2025. ກອງທັບໄດ້ສ້າງຄວາມກ້າວໜ້າຫຼາຍຢ່າງທາງດ້ານສະຖາບັນ, ກົນໄກ ແລະນະໂຍບາຍ ເພື່ອພັດທະນາທ່າແຮງຂອງວິທະຍາສາດ, ເຕັກໂນໂລຊີ ແລະ ອຸດສາຫະກຳປ້ອງກັນປະເທດ ເພື່ອຕອບສະໜອງຄວາມຕ້ອງການໃນການສ້າງກອງທັບທີ່ທັນສະໄໝ ແລະຄວາມຕ້ອງການຂອງກອງກຳລັງປະກອບອາວຸດ. ອຸດສາຫະກຳປ້ອງກັນປະເທດໄດ້ຊ່ຽວຊານເຕັກໂນໂລຊີພື້ນຖານ ແລະເຕັກໂນໂລຊີຫຼັກຫຼາຍປະເພດ; ປະສົບຄວາມສຳເລັດໃນການຄົ້ນຄວ້າ ອອກແບບ, ຜະລິດ ແລະ ສ້າງອາວຸດ ແລະຍຸດໂທປະກອນທີ່ທັນສະໄໝ ແລະມີຄວາມສຳຄັນທາງຍຸດທະສາດຫຼາຍປະເພດ. ຂະແໜງອຸດສາຫະກຳປ້ອງກັນປະເທດໄດ້ປ່ຽນຈາກການຄົ້ນຄວ້າ ແລະ ຜະລິດອາວຸດສຳລັບທະຫານຮາບ ໄປສູ່ການຄົ້ນຄວ້າ ແລະ ຜະລິດອາວຸດສຳລັບເຫຼົ່າທັບແລະໜ່ວຍງານທາງທະຫານ ທີ່ມີຄວາມຊັບຊ້ອນ, ເຄື່ອນຍ້າຍໄດ້ສະດວກ ແລະ ປະສານລວມລະບົບຄວບຄຸມອັດຊະລິຍະທີ່ທັນສະໄໝ. ປະສົບຜົນສຳເລັດໃນການຜະລິດສິນຄ້າອະເນດປະສົງທີ່ທັນສະໄໝຈຳນວນຫຼາຍ ເຊິ່ງມີສ່ວນຊ່ວຍໃນການຫັນເປັນອຸດສາຫະກຳແລະທັນສະໄໝຂອງປະເທດ, ບຸກເບີກການພັດທະນາວິທະຍາສາດ, ເຕັກໂນໂລຊີ ແລະການປ່ຽນແປງໃໝ່ປະດິດສ້າງ ແລະ ປະກອບສ່ວນເຂົ້າໃນການເສີມຂະຫຍາຍກຳລັງແຮງທາງທະຫານ ແລະການປ້ອງກັນປະເທດ.

ເພີ່ມທະວີກຳລັງແຮງດ້ານການປ້ອງກັນປະເທດ, ກໍ່ສ້າງກອງທັບທີ່ປະຕິວັດ,
ເປັນແບບຫຼວງ, ຊຳນານການຮົບ ແລະ ທັນສະໄໝ ໃນຍຸກແຫ່ງການພັດທະນາໃໝ່

ໃນຊຸມປີຕໍ່ໜ້າ, ຄາດວ່າສະຖານະການໂລກຈະປ່ຽນແປງຢ່າງໄວວາ ແລະ ສັບສົນຫຼາຍຂຶ້ນໄປສູ່ໂລກທີ່ມີຫຼາຍຂົ້ວ, ຫຼາຍສູນກາງ, ຫຼາຍຊັ້ນ, ກະຈັດກະຈາຍ ແລະແບ່ງແຍກ. ສັນຕິພາບ, ການຮ່ວມມື ແລະ ການພັດທະນາຍັງຄົງເປັນທ່າອ່ຽງທີ່ສຳຄັນ, ແຕ່ກໍ່ປະເຊີນກັບຄວາມທ້າທາຍໃໝ່ຫຼາຍຢ່າງ. ການແຂ່ງຂັນຍຸດທະສາດລະຫວ່າງປະເທດມະຫາອຳນາດທະວີຄວາມຮຸນແຮງຂຶ້ນເລື້ອຍໆ. ຄວາມຂັດແຍ້ງແລະສົງຄາມເກີດຂຶ້ນໃນຫຼາຍພາກພື້ນດ້ວຍຮູບແບບ ແລະວິທີການໃໝ່ ແລະອາດຈະແຜ່ຂະຫຍາຍກວ້າງ. ໃນປະເທດ, ຄຽງຄູ່ກັບໂອກາດ ແລະຂໍ້ໄດ້ປຽບພື້ນຖານ, ຍັງມີຄວາມຫຍຸ້ງຍາກແລະສິ່ງທ້າທາຍຫຼາຍຢ່າງ ເຊິ່ງບາງຢ່າງຮຸນແຮງແລະຮ້າຍແຮງກວ່າເດິມ; ຄວາມທ້າທາຍດ້ານຄວາມໝັ້ນຄົງທີ່ບໍ່ແມ່ນແບບດັ້ງເດີມ, ໂດຍສະເພາະການປ່ຽນແປງຂອງດິນຟ້າອາກາດ, ໄພພິບັດທາງທຳມະຊາດ ແລະ ໂລກລະບາດ ກຳລັງສັບສົນແລະຄາດເດົາໄດ້ຍາກຂຶ້ນເລື້ອຍໆ. ພາລະກິດການປົກປ້ອງເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນ ແລະ ການປົກປ້ອງພັກ, ລັດ ແລະ ລະບອບສັງຄົມນິຍົມ ຍັງສືບຕໍ່ປະເຊີນກັບສິ່ງທ້າທາຍຫຼາຍຢ່າງ. ການຈັດວາງສັບຊ້ອນການຈັດຕັ້ງກົງຈັກ, ການປະຕິບັດຮູບແບບການປົກຄອງສ່ວນທ້ອງຖິ່ນສອງຊັ້ນ ແລະ ເປົ້າໝາຍການພັດທະນາເສດຖະກິດ-ສັງຄົມຈົນເຖິງປີ 2030 ກໍ່ໃຫ້ເກີດບັນຫາໃໝ່ໆ ທີ່ກ່ຽວຂ້ອງກັບວຽກງານການທະຫານ ແລະ ການປ້ອງກັນປະເທດ. ໜ້າທີ່ປົກປ້ອງປະເທດຊາດ ແລະ ກໍ່ສ້າງກອງທັບທີ່ປະຕິວັດ, ເປັນແບບຫຼວງ, ຊຳນານການຮົບ ແລະ ທັນສະໄໝ ໃນຍຸກແຫ່ງການພັດທະນາໃໝ່ ໄດ້ສ້າງຄວາມຕ້ອງການ ແລະຂໍ້ກຳນົດທີ່ສູງກວ່າແຕ່ກ່ອນ.

ໃນສະພາບການໃໝ່, ອົງຄະນະພັກກອງທັບສືບຕໍ່ເຂົ້າໃຈຢ່າງເລິກເຊິ່ງເຖິງແນວທາງແລະທັດສະນະຂອງພັກ ກ່ຽວກັບການທະຫານ, ການປ້ອງກັນປະເທດ, ການປົກປັກຮັກສາປະເທດຊາດ ພ້ອມທັງການຕັດສິນໃຈຍຸດທະສາດກ່ຽວກັບການພັດທະນາປະເທດ.

ທີໜຶ່ງ, ຮັກສາແລະເພີ່ມທະວີການນຳພາໂດຍກົງແລະເດັດຂາດຂອງພັກໃນທຸກດ້ານ ແລະ ການຄຸ້ມຄອງບໍລິຫານແລະດຳເນີນງານແບບລວມສູນແລະເປັນເອກະພາບຂອງລັດຕໍ່ກອງທັບ ແລະພາລະກິດການປ້ອງກັນປະເທດ. ນຳພາກອງທັບທັງໝົດໃນການເສີມຂະຫຍາຍມູນເຊື້ອວິລະຊົນ ແລະ ກຳລັງແຮງສັງລວມ, ສ້າງອົງຄະນະພັກກອງທັບທີ່ສະອາດ, ເຂັ້ມແຂງເປັນແບບຢ່າງ, ສ້າງກອງທັບທີ່ປະຕິວັດ, ເປັນແບບຫຼວງ, ຊຳນານການຮົບ ແລະ ທັນສະໄໝ; ສ້າງກອງກຳລັງສຳຮອງທີ່ເຂັ້ມແຂງແຮງກ້າ ແລະ ກອງທະຫານລາດປ້ອງກັນຕົວທີ່ເຂັ້ມແຂງແລະກວ້າງຂວາງທົ່ວເຖິງ. ຍົກສູງສະຕິລະວັງຕົວຢ່າງເປັນປະຈຳ, ເສີມສ້າງຄວາມສາມາດພ້ອມຮົບ ແລະ ຮັບປະກັນໄຊຊະນະໃນທຸກສະຖານະການ. ເປັນເຈົ້າການໃນການໃຫ້ຄຳແນະນຳ, ວາງແຜນ ແລະ ຈັດຕັ້ງການປະຕິບັດແນວທາງການທະຫານ ແລະ ການປ້ອງກັນປະເທດໃຫ້ປະສົບຜົນສຳເລັດ; ປະຕິບັດພາລະໜ້າທີ່ແລະບົດບາດຂອງຕົນຢ່າງມີປະສິດທິພາບ ໃນການສ້າງລະບົບປ້ອງກັນຊາດທົ່ວປວງຊົນທີ່ເຂັ້ມແຂງ ແລະ ປົກປ້ອງປະເທດຊາດສັງຄົມນິຍົມຫວຽດນາມຢ່າງໝັ້ນຄົງ.

ທີສອງ, ສຸມໃສ່ນຳພາແລະຊີ້ນຳການດຳເນີນງານເພື່ອປັບປຸງຄຸນນະພາບການຄົ້ນຄວ້າ, ຂໍ້ສະເໜີແນະ ແລະຄຳແນະນຳ ຕໍ່ພັກແລະລັດ ກ່ຽວກັບນະໂຍບາຍ ແລະຍຸດທະສາດໃຫ້ດີຍິ່ງຂຶ້ນ, ປັບປຸງສະຖາບັນ ກົນໄກ ແລະນະໂຍບາຍດ້ານການທະຫານ ແລະການປ້ອງກັນປະເທດ, ສ້າງກອງທັບທີ່ປະຕິວັດ, ເປັນແບບຫຼວງ, ຊຳນານການຮົບ ແລະທັນສະໄໝ; ຈັດຕັ້ງປະຕິບັດໂຄງການ ແລະແຜນງານຢ່າງມີປະສິດທິພາບ ເພື່ອສ້າງກຳລັງພົນ, ຮັບປະກັນອາວຸດຍຸດໂທປະກອນ ແລະພັດທະນາອຸດສາຫະກຳປ້ອງກັນປະເທດ ໃຫ້ສອດຄ່ອງກັບຄວາມຕ້ອງການຂອງການປັບປຸງກອງທັບໃຫ້ທັນສະໄໝ ແລະ ການພັດທະນາເສດຖະກິດ-ສັງຄົມ ຄວບຄູ່ໄປກັບການເພີ່ມທະວີກຳລັງແຮງຂອງການປ້ອງກັນປະເທດ. ສືບຕໍ່ປະສານງານຢ່າງໃກ້ຊິດກັບຄະນະ, ກະຊວງ, ຂະແໜງການສູນກາງແລະທ້ອງຖິ່ນ ເພື່ອສ້າງແລະປັບປຸງພື້ນຖານການປ້ອງກັນປະເທດທົ່ວປວງຊົນ, ທ່າສະໜາມຮົບປ້ອງກັນປະເທດທົ່ວປວງຊົນ ເຊິ່ງເຊື່ອມໂຍງກັບລະບົບຄວາມໝັ້ນຄົງປະຊາຊົນ ແລະທ່າສະໜາມຮົບຄວາມໝັ້ນຄົງປະຊາຊົນ, ສ້າງ “ທ່າສະໜາມຮົບໃນໃຈປະຊາຊົນ” ທີ່ໜັກແໜ້ນ; ລະດົມຊັບພະຍາກອນເພື່ອສ້າງເຂດປ້ອງກັນ ແລະ ເສີມສ້າງທ່າແຮງການປ້ອງກັນປະເທດ. ໂດຍສະເພາະ, ການຄົ້ນຄວ້າ, ສະເໜີແນະ ແລະ ຜັນຂະຫຍາຍປະຕິບັດການກໍ່ສ້າງພື້ນຖານການປ້ອງກັນປະເທດທົ່ວປວງຊົນທີ່ເຂັ້ມແຂງ ແລະ ທັນສະໄໝ.

ທີສາມ, ສືບຕໍ່ນຳພາກອງທັບທັງໝົດໃນການຍົກສູງສະຕິລະວັງຕົວຢ່າງເປັນປະຈຳ, ປະຕິບັດໜ້າທີ່ກຽມພ້ອມສູ້ຮົບຢ່າງມີປະສິດທິພາບ, ຍູ້ແຮງການຈັດຕັ້ງກອງກຳລັງທີ່ຄ່ອງຕົວ, ມີປະສິດທິພາບແລະເຂັ້ມແຂງ ແລະ ສ້າງຄວາມກ້າວໜ້າໃນການປັບປຸງຍົກສູງຄຸນນະພາບການຝຶກອົບຮົມ, ການສຶກສາ ແລະການບຳລຸງສ້າງ, ການສ້າງກອງທັບເປັນແບບຫຼວງ, ການຄຸ້ມຄອງລະບຽບວິໄນ, ການສ້າງກົມກອງທີ່ເຂັ້ມແຂງຮອບດ້ານ, ເປັນແບບຢ່າງ ແລະ ໂດດເດັ່ນ. ສຸມໃສ່ການຄົ້ນຄວ້າແລະປັບປຸງແຜນການຈັດວາງກຳລັງ ແລະທ່າສະໜາມຮົບໃຫ້ເໝາະສົມກັບສະຖານະການ ແລະການປັບໂຄງສ້າງການຈັດຕັ້ງຂອງກອງທັບ. ພ້ອມກັນນັ້ນ, ສືບຕໍ່ທົບທວນແລະຈັດວາງສັບຊ້ອນກຳລັງພົນ ເພື່ອຮັບປະກັນໂຄງສ້າງການຈັດຕັ້ງທີ່ສອດຄ່ອງແລະສົມເຫດສົມຜົນ; ປັບປຸງກົດລະບຽບແລະຂໍ້ບັງຄັບໃຫ້ສົມບູນແບບ ເພື່ອຮັບປະກັນພາລະບົດບາດ, ໜ້າທີ່, ຄວາມສຳພັນການເຮັດວຽກ, ກົນໄກການປະສານງານ, ການຄຸ້ມຄອງ, ການບັງຄັບບັນຊາ ແລະການດຳເນີນງານທີ່ຊັດເຈນ ຫຼັງຈາກການປັບໂຄງສ້າງອົງການ ແລະໜ່ວຍງານທີ່ສຳຄັນ ແລະ ການຈັດຕັ້ງທາງທະຫານທ້ອງຖິ່ນ,...

ທີສີ່, ໃນການຈັດຕັ້ງປະຕິບັດແຜນນະໂຍບາຍສ້າງກອງທັບທີ່ທັນສະໄໝ, ຄະນະພັກການການທະຫານສູນກາງ ແລະ ກະຊວງປ້ອງກັນປະເທດ ໄດ້ສຸມໃສ່ການນຳພາການສ້າງກອງທັບທີ່ມີຄວາມເຂັ້ມແຂງທາງການເມືອງ, ພ້ອມກັນນັ້ນກໍ່ເປັນເຈົ້າການໃນການສ້າງແລະສະເໜີແຜນຍຸດທະສາດ, ໂຄງການ ແລະ ແຜນງານລະດົມຊັບພະຍາກອນເພື່ອການຈັດຊື້, ຄົ້ນຄວ້າ, ປະດິດແລະຜະລິດ ເພື່ອຮັບປະກັນອາວຸດຍຸດໂທປະກອນທີ່ທັນສະໄໝໃຫ້ກັບກອງທັບ. ສືບຕໍ່ຈັດຕັ້ງປະຕິບັດຕາມມະຕິເລກທີ 08-NQ/TW, ລົງວັນທີ 26 ມັງກອນ 2022 ວ່າດ້ວຍການສົ່ງເສີມການພັດທະນາອຸດສາຫະກຳປ້ອງກັນປະເທດຈົນເຖິງປີ 2030 ແລະຫຼັງຈາກນັ້ນ, ແລະ ມະຕິເລກທີ 57-NQ/TW, ລົງວັນທີ 22 ທັນວາ 2024, ຂອງກົມການເມືອງສູນກາງພັກ ວ່າດ້ວຍຄວາມກ້າວໜ້າໃນການພັດທະນາວິທະຍາສາດ ເຕັກໂນໂລຊີ, ການປ່ຽນແປງໃໝ່ປະດິດສ້າງ ແລະ ການຫັນປ່ຽນດິຈິຕອນແຫ່ງຊາດ ຢ່າງມີປະສິດທິພາບ. ໃຫ້ຄວາມສຳຄັນກັບການພັດທະນາໂຄງສ້າງພື້ນຖານດິຈິຕອນ, ຂໍ້ມູນດິຈິຕອນ ແລະ ຊັບພະຍາກອນມະນຸດທີ່ມີຄຸນນະພາບສູງ, ສ້າງນາຍທະຫານແລະພົນທະຫານທຸກຄົນໃຫ້ເປັນ "ທະຫານດິຈິຕອນ" ທີ່ຊ່ຽວຊານແພລດຟອມດິຈິຕອນ, ມີທັກສະດິຈິຕອນ, ປະຕິບັດໜ້າທີ່ທີ່ໄດ້ຮັບມອບໝາຍຢ່າງມີປະສິດທິພາບ ແລະ ປະກອບສ່ວນຕົວຈິງໃນການສ້າງກອງທັບທີ່ທັນສະໄໝໃນຍຸກໃໝ່.

ໜ້າທີ່ການປັບປຸງແລະເພີ່ມທະວີກຳລັງແຮງປ້ອງກັນປະເທດ, ການສ້າງກອງທັບທີ່ປະຕິວັດ, ເປັນແບບຫຼວງ, ຊຳນານການຮົບ ແລະທັນສະໄໝ ເພື່ອປົກປັກຮັກສາປະເທດຊາດໃນຍຸກໃໝ່ຂອງການພັດທະນາປະເທດຊາດນັ້ນ ປະເຊີນກັບທັງໂອກາດ ຄວາມຫຍຸ້ງຍາກ ແລະ ຄວາມທ້າທາຍໃໝ່ໆ ທີ່ແຊກຊ້ອນກັນ ໂດຍມີເປົ້າໝາຍແລະຄວາມຕ້ອງການທີ່ສູງສົ່ງແລະຮອບດ້ານຢ່າງຍິ່ງ. ໂດຍເສີມຂະຫຍາຍມູນເຊື້ອອັນສະຫງ່າງາມແຫ່ງການກໍ່ສ້າງ, ການສູ້ຮົບ ແລະ ການເຕີບໃຫຍ່ຂະຫຍາຍຕົວຂອງກອງທັບໃນໄລຍະ 80 ກວ່າປີ ແລະ ອີງໃສ່ຜົນງານແລະປະສົບການຈາກການນຳພາແລະການຊີ້ນຳ, ກອງປະຊຸມໃຫຍ່ຜູ້ແທນອົງຄະນະພັກກອງທັບຄັ້ງທີ XII ສຳລັບວາລະປີ 2025-2030 ຍຶດໝັ້ນໃນຄວາມຮັບຜິດຊອບ, ສະຕິປັນຍາ, ຄວາມກ້າຫານ ແລະ ຈິດໃຈ “ສາມັກຄີ - ປະຊາທິປະໄຕ - ວິໄນ - ຄວາມໝັ້ນຄົງ - ການກ້າວກະໂດດ - ການພັດທະນາ” ໄດ້ກຳນົດທິດທາງ, ເປົ້າໝາຍ, ບັນດາໜ້າທີ່ ແລະວິທີແກ້ໄຂ ເພື່ອນຳພາກອງທັບທັງໝົດໃຫ້ປະຕິບັດໜ້າທີ່ແລະພາລະກິດ ທີ່ໄດ້ຮັບມອບໝາຍຈາກພັກ ລັດ ແລະ ປະຊາຊົນ ໄດ້ຢ່າງສຳເລັດລຸລ່ວງ, ປົກປ້ອງປະເທດຊາດສັງຄົມນິຍົມຫວຽດນາມຢ່າງໝັ້ນຄົງ ແລະ ຮັກສາສະພາບແວດລ້ອມທີ່ສະຫງົບສຸກແລະໝັ້ນຄົງສຳລັບການສ້າງແລະພັດທະນາປະເທດຫວຽດນາມໃຫ້ມີຄວາມເຂັ້ມແຂງ, ຈະເລີນຮຸ່ງເຮືອງ, ມີອາລະຍະທຳ ແລະ ມີຄວາມສຸກ./.

----------------

 (1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 49.

(2) ກະຊວງປ້ອງກັນປະເທດໄດ້ຊີ້ນຳການຈັດຕັ້ງການຝຶກຊ້ອມທາງທະຫານ 13 ຄັ້ງຢ່າງສຳເລັດຜົນ (ການຝຶກຊ້ອມບັນຊາການແລະເສນາທິການຍຸດທະສາດໃນສະໜາມຮົບພາກກາງ 1 ຄັ້ງ; ການຝຶກຊ້ອມປ້ອງກັນພາກພື້ນເຂດທະຫານ 2 ຄັ້ງ; ການຝຶກຊ້ອມລະດັບກອງທັບ, ເຫຼົ່າທັບ ແລະ ເຫຼົ່າທະຫານຕ່າງໆ 10 ຄັ້ງ); ໜ່ວຍງານໃນສັງກັດກະຊວງ ແລະກົມກອງ ໄດ້ຊີ້ນຳແລະຈັດການຝຶກຊ້ອມຫຼາຍພັນຄັ້ງ ໃນພູມິປະເທດແລະຮູບແບບການປະຕິບັດການແລະຍຸດທະວິທີທີ່ຫຼາກຫຼາຍ.