ວກ. - ເນື່ອງໃນໂອກາດສະເຫຼີມສະຫຼອງວັນສ້າງຕັ້ງພັກກອມມູນິດຫວຽດນາມຄົບຮອບ 96 ປີ (3 ກຸມພາ 1930 - 3 ກຸມພາ 2026), ສະຫາຍໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ, ໄດ້ຂຽນບົດຄວາມທີ່ມີຫົວຂໍ້ວ່າ “ກ້າວໄປຂ້າງໜ້າຢ່າງໝັ້ນຄົງພາຍໃຕ້ທຸງຂອງພັກ”. ວາລະສານກອມມູນິດຂໍນຳສະເໜີເນື້ອໃນບົດຄວາມຂອງເລຂາທິການໃຫຍ່ດ້ວຍຄວາມເຄົາລົບ.

ຫຼັງຈາກຜົນສຳເລັດຢ່າງສະຫງ່າງາມຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ, ທົ່ວພັກ, ທົ່ວປະຊາຊົນ ແລະ ທົ່ວກອງທັບໄດ້ຮ່ວມກັນສະເຫຼີມສະຫຼອງຄົບຮອບ 96 ປີ ແຫ່ງການສ້າງຕັ້ງພັກກອມມູນິດຫວຽດນາມ (3 ກຸມພາ 1930 - 3 ກຸມພາ 2026) ດ້ວຍຈິດໃຈແຫ່ງຄວາມປິຕິຍິນດີເປັນພິເສດ. ການຄົບຮອບ 96 ປີຂອງພັກມີຄວາມໝາຍສຳຄັນຍິ່ງຂຶ້ນ ຍ້ອນວ່າປະເທດກຳລັງເຂົ້າສູ່ປີທຳອິດຂອງວາລະໃໝ່ ເຊິ່ງເປັນປີທີ່ສຳຄັນໃນການຈັດຕັ້ງປະຕິບັດມະຕິຂອງກອງປະຊຸມໃຫຍ່ຄັ້ງທີ XIV ຂອງພັກ ແລະ ຫັນເປົ້າໝາຍຍຸດທະສາດໃຫ້ກາຍເປັນຄວາມຈິງ. ຄວາມພາກພູມໃຈໃນເສັ້ນທາງອັນສະຫງ່າງາມ 96 ປີພາຍໃຕ້ທຸງອັນຮຸ່ງເຮືອງຂອງພັກ ເປັນພະລັງທີ່ຈຸດປະກາຍຄວາມກະຕືລືລົ້ນ ແລະຄວາມໝັ້ນໃຈໃໝ່ໃຫ້ແກ່ປະຊາຊົນຊາວຫວຽດນາມ ໃນການກ້າວໄປຂ້າງໜ້າດ້ວຍຄວາມຕັດສິນໃຈທີ່ບໍ່ຫວັ່ນໄຫວ.

ຕະຫຼອດ 96 ລະດູໃບໄມ້ປົ່ງ ນັບຕັ້ງແຕ່ການສ້າງຕັ້ງພັກ ແລະໂດຍສະເພາະໃນຫຼາຍກວ່າ 80 ປີແຫ່ງການກຳອຳນາດ, ພັກກອມມູນິດຫວຽດນາມໄດ້ສະແດງໃຫ້ເຫັນເຖິງພະລັງທີ່ຍືນຍົງ, ຄວາມຕັ້ງໃຈທີ່ບໍ່ສັ່ນຄອນ ແລະແນວທາງນຳພາທີ່ຖືກຕ້ອງ, ນຳພາການປະຕິວັດຫວຽດນາມຈາກໄຊຊະນະໜຶ່ງໄປສູ່ໄຊຊະນະໃໝ່. ນັບຕັ້ງແຕ່ມີການນຳພາຂອງພັກ, ປະເທດຊາດຫວຽດນາມເຊິ່ງມີປະເພນີທາງວັດທະນະທຳອັນຍາວນານນັບພັນປີ, ໄດ້ຈາລຶກບົດປະຫວັດສາດອັນຮຸ່ງເຮືອງຢ່າງຕໍ່ເນື່ອງ: ນຳພາປະຊາຊົນໄປສູ່ການລຸກຮືຂຶ້ນຄັ້ງໃຫຍ່ໃນເດືອນສິງຫາ 1945 ຢ່າງສຳເລັດຜົນ, ສ້າງຕັ້ງສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນສາທາລະນະລັດສັງຄົມນິຍົມຫວຽດນາມ; ນຳພາປະເທດຊາດໄປສູ່ໄຊຊະນະເໜືອລັດທິລ່າເມືອງຂຶ້ນແລະຈັກກະພັດນິຍົມ ໃນສົງຄາມຕໍ່ຕ້ານທີ່ຍືດເຍື້ອຍາວນານ, ທ້ອນໂຮມປະເທດຊາດເປັນເອກະພາບ, ປິ່ນປົວບາດແຜຈາກສົງຄາມ ແລະນຳພາປະເທດຊາດໃນຂະບວນການປ່ຽນແປງໃໝ່, ກໍ່ສ້າງ, ພັດທະນາ ແລະປົກປ້ອງປະເທດຊາດສັງຄົມນິຍົມຫວຽດນາມ. ການຂຶ້ນແລະລົງຂອງປະຫວັດສາດແຕ່ລະຄັ້ງ ລ້ວນເປັນບົດທົດສອບທີ່ຫຼໍ່ຫຼອມພັກ, ເຮັດໃຫ້ພັກເຕີບໂຕແລະເຂັ້ມແຂງຍິ່ງຂຶ້ນບົນເສັ້ນທາງແຫ່ງການຮັບໃຊ້ປະເທດຊາດແລະປະຊາຊົນ.

ຕະຫຼອດ 96 ປີທີ່ຜ່ານມາໄດ້ຢືນຢັນວ່າ ບໍ່ມີກຳລັງທາງການເມືອງໃດນອກຈາກພັກກອມມູນິດຫວຽດນາມທີ່ມີອິດທິພົນ, ຄວາມສາມາດ ແລະຄຸນສົມບັດການນຳພາທີ່ເໝາະສົມໃນການນຳພາການປະຕິວັດເພື່ອຮັບໃຊ້ປະຊາຊົນ. ບົດບາດຂອງພັກໃນການກຳອຳນາດ ແລະນຳພາຢ່າງຮອບດ້ານ ແມ່ນປັດໄຈຕັດສິນຊີ້ຂາດໃນໄຊຊະນະທຸກຄັ້ງໃນການສ້າງສາ ແລະປົກປັກຮັກສາປະເທດຊາດ. ຄວາມເຂັ້ມແຂງແລະກຽດສັກສີຂອງພັກບໍ່ໄດ້ຢູ່ໃນຜົນສຳເລັດອັນຍິ່ງໃຫຍ່ພຽງຢ່າງດຽວ, ແຕ່ຍັງຢູ່ທີ່ການເປີດກວ້າງທາງຄວາມຄິດ, ຄວາມເຕັມໃຈທີ່ຈະປະເຊີນກັບຄວາມຈິງ, ຄວາມກ້າຫານທີ່ຈະຍອມຮັບຂໍ້ບົກຜ່ອງ ແລະ ຄວາມຕັດສິນໃຈທີ່ຈະແກ້ໄຂຂໍ້ບົກພ່ອງເຫຼົ່ານັ້ນ. ດ້ວຍເຫດນີ້, ພັກຈຶ່ງໄດ້ປັບປຸງແລະແກ້ໄຂຕົນເອງຢ່າງຕໍ່ເນື່ອງ ເພື່ອມີຄວາມສະອາດແລະເຂັ້ມແຂງຂຶ້ນເລື້ອຍໆ.

ການເດີນທາງ 96 ປີຂອງພັກໄດ້ກໍ່ໃຫ້ເກີດບົດຮຽນອັນລ້ຳຄ່າຫຼາຍຢ່າງ. ກ່ອນອື່ນໝົດ, ທຸງແຫ່ງເອກະລາດແຫ່ງຊາດແລະລັດທິສັງຄົມນິຍົມ ໄດ້ຮັບການຍຶດໝັ້ນຢ່າງໜັກແໜ້ນສະເໝີມາ - ນີ້ແມ່ນສອງເປົ້າໝາຍຍຸດທະສາດທີ່ກ່ຽວພັນກັນຢ່າງໃກ້ຊິດຕະຫຼອດຂະບວນການປະຕິວັດ. ເອກະລາດແຫ່ງຊາດແມ່ນເງື່ອນໄຂຕັດສິນເບື້ອງຕົ້ນສຳລັບການກໍ່ສ້າງສັງຄົມນິຍົມ ແລະລັດທິສັງຄົມນິຍົມແມ່ນພື້ນຖານທີ່ໜັກແໜ້ນເຊິ່ງຮັບປະກັນເອກະລາດທີ່ແທ້ຈິງ ແລະຍືນຍົງຂອງຊາດ. ໂດຍຊາບຊຶມສັດຈະທຳດັງກ່າວ, ພັກກອມມູນິດຫວຽດນາມຈຶງຍຶດໝັ້ນໃນເສັ້ນທາງທີ່ປະທານໂຮ່ຈີມິນ ແລະປະຊາຊົນເລືອກໄວ້ສະເໝີມາ: ເຮົາຕັດສິນໃຈທີ່ຈະປົກປ້ອງເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ ພ້ອມທັງສ້າງສັງຄົມນິຍົມ ເພື່ອຄວາມສຸກຂອງປະຊາຊົນຢ່າງຕໍ່ເນື່ອງ.

ບົດຮຽນອັນເລິກເຊິ່ງແລະສຳຄັນຍິ່ງຄື ພາລະກິດການປະຕິວັດເປັນຂອງປະຊາຊົນ, ໂດຍປະຊາຊົນ ແລະເພື່ອປະຊາຊົນ. ປະຊາຊົນທັງເປັນຜູ້ສ້າງໄຊຊະນະທາງປະຫວັດສາດ ແລະເປັນແຫຼ່ງພະລັງອັນບໍ່ສິ້ນສຸດສຳລັບການດຳລົງຢູ່ ແລະການເຕີບໃຫຍ່ເຂັ້ມແຂງຂອງພັກ. ແນວທາງແລະແຜນນະໂຍບາຍທັງໝົດຂອງພັກຕ້ອງມາຈາກຜົນປະໂຫຍດ ແລະຄວາມປາດຖະໜາອັນຊອບທຳຂອງປະຊາຊົນ. ພັກໄດ້ຮັບມອບໝາຍພາລະກິດຈາກປະຊາຊົນ ແລະພັກບໍ່ມີຜົນປະໂຫຍດອື່ນໃດນອກຈາກຮັບໃຊ້ປະເທດຊາດ ແລະປະຊາຊົນ. ປະທານໂຮ່ຈີມິນເຄີຍເນັ້ນໜັກວ່າ: “ພັກບໍ່ແມ່ນອົງການຈັດຕັ້ງເພື່ອສະແຫວງຫາຄວາມຮັ່ງມີ ແລະອຳນາດ. ພັກຕ້ອງປະຕິບັດໜ້າທີ່ປົດປ່ອຍປະເທດຊາດ, ເຮັດໃຫ້ປະເທດຊາດຮັ່ງມີແລະເຂັ້ມແຂງ ແລະເຮັດໃຫ້ປະຊາຊົນມີຄວາມສຸກ”⁽¹⁾. ຄຳສອນຂອງລຸງໂຮ່ຍັງຄົງມີຄຸນຄ່າເຊັ່ນເດີມ, ເຕືອນໃຈເຮົາວ່າ ພັກຕ້ອງເຊື່ອມໂຍງກັບປະຊາຊົນຢ່າງໃກ້ຊິດສະເໝີ, ປະຊາຊົນແມ່ນພື້ນຖານ ແລະ ຄວາມສຸກຂອງປະຊາຊົນແມ່ນເປົ້າໝາຍສູງສຸດ. ພຶດຕິກຳຕົວຈິງກໍ່ສະແດງໃຫ້ເຫັນວ່າ ເມື່ອຫ່າງເຫີນຈາກປະຊາຊົນ, ກາຍເປັນລະບົບອາດຍາສິດ ແລະສໍ້ລາດບັງຫຼວງ, ມັນຈະເປັນໄພຂົ່ມຂູ່ຢ່າງໃຫຍ່ຫຼວງ ຕໍ່ຊະຕາກຳຂອງປະເທດ ແລະການຢູ່ລອດຂອງພັກເອງ. ດັ່ງນັ້ນ, ການຮັກສາສາຍພົວພັນທີ່ໃກ້ຊິດກັບປະຊາຊົນ ແລະການອີງໃສ່ປະຊາຊົນໃນການສ້າງພັກ ຈຶ່ງເປັນຫຼັກການແຫ່ງຊີວິດການເປັນຢູ່ສະເໝີມາ. ການສະໜັບສະໜູນແລະຄວາມໄວ້ວາງໃຈຂອງປະຊາຊົນ ແມ່ນເຄື່ອງວັດກຽດສັກສີຂອງພັກ, ເປັນແຫຼ່ງກຳເນີດຄວາມເຂັ້ມແຂງຂອງພັກ ແລະເປັນ “ຄວາມລັບ” ແຫ່ງໄຊຊະນະໃນທຸກໄລຍະຂອງການປະຕິວັດ.

ຄຽງຄູ່ກັນນັ້ນ, ພັກເຮົາໄດ້ໃຫ້ຄວາມສຳຄັນແລະສືບຕໍ່ປັບປຸງກຸ່ມກ້ອນມະຫາສາມັກຄີປວງຊົນທັງຊາດມາໂດຍຕະຫຼອດ. “ສາມັກຄີ, ສາມັກຄີ, ມະຫາສາມັກຄີ - ຄວາມສຳເລັດ, ຄວາມສຳເລັດ, ຄວາມສຳເລັດອັນຍິ່ງໃຫຍ່” - ຄຳຮຽກຮ້ອງຂອງປະທານໂຮ່ຈີມິນ ໄດ້ສະທ້ອນສັດຈະທຳທີ່ວ່າ: ຄວາມສາມັກຄີແມ່ນປະເພນີອັນລ້ຳຄ່າ ແລະເປັນແຫຼ່ງພະລັງທີ່ຍິ່ງໃຫຍ່ທີ່ສຸດ ສຳລັບການປະຕິວັດຫວຽດນາມ. ພັກຕ້ອງຮູ້ວິທີເສີມຂະຫຍາຍພະລັງແຫ່ງຄວາມສາມັກຄີອັນຍິ່ງໃຫຍ່ຂອງຊາດໃຫ້ເກີດປະໂຫຍດສູງສຸດ ໂດຍປະສານກຳລັງແຮງຂອງຊາດເຂົ້າກັບກຳລັງແຮງຂອງຍຸກສະໄໝ. ນີ້ແມ່ນທັງບົດຮຽນແລະຫຼັກການຊີ້ນຳສຳລັບພັກໃນການນຳພາປະຊາຊົນຜ່ານຜ່າອຸປະສັກທັງປວງ ແລະນຳພາປະເທດໄປສູ່ຄວາມຈະເລີນຮຸ່ງເຮືອງໃໝ່ໃນສະພາບການໂລກາພິວັດໃນປະຈຸບັນ.

ບົດຮຽນສຳຄັນທີ່ສຸດຄື: ການນຳພາທີ່ຖືກຕ້ອງຂອງພັກແມ່ນປັດໄຈຫຼັກທີ່ກຳນົດໄຊຊະນະທັງໝົດຂອງການປະຕິວັດຫວຽດນາມ. ຕະຫຼອດ 96 ປີທີ່ຜ່ານມາ ໄດ້ຢືນຢັນບົດບາດການບຸກເບີກ, “ກອງທັບນຳພາ” ຂອງພັກກອມມູນິດຫວຽດນາມ ໃນພາລະກິດປົດປ່ອຍຊາດ, ການສ້າງສາແລະການພັດທະນາປະເທດຊາດ. ເພື່ອໃຫ້ພັກນຳພາປະເທດໄດ້ຢ່າງຍືນຍົງ, ພັກຕ້ອງປັບປຸງຕົນເອງຢ່າງຕໍ່ເນື່ອງ, ປ່ຽນໃໝ່ຕົນເອງແລະຮັກສາທາດແທ້ແຫ່ງການປະຕິວັດ ແລະ ຈິດໃຈບຸກເບີກຂອງຕົນ. ພັກຕ້ອງສຶກສາແລະໝູນໃຊ້ລັດທິມາກ-ເລນິນ ແລະແນວຄິດໂຮ່ຈິມິນຢ່າງສ້າງສັນຢ່າງຕໍ່ເນື່ອງ, ພັດທະນາສະຕິປັນຍາ, ຄວາມສຽບແຫຼມທາງການເມືອງ, ຄຸນສັມບັດສິນທຳ ແລະຄວາມສາມາດໃນການຈັດຕັ້ງຕົວຈິງຂອງຕົນຢ່າງຕໍ່ເນື່ອງ ເພື່ອສາມາດຮັບມືກັບຄວາມທ້າທາຍໃໝ່ ທີ່ເກີດຈາກການປະຕິວັດໄດ້ຢ່າງມີປະສິດທິພາບ. ພ້ອມກັນນັ້ນ, ພັກຕ້ອງມີສະຕິລະວັງຕົວຢູ່ສະເໝີ ແລະຕໍ່ສູ້ປ້ອງກັນແລະຕ້ານໄພຂົ່ມຂູ່ທີ່ສຳຄັນຢ່າງເດັດດ່ຽວ, ໂດຍສະເພາະຄວາມຜິດພາດໃນແນວທາງ, ການຜິດເຂວຈາກເສັ້ນທາງທີ່ວາງໄວ້, ຄວາມຫຼ້າຫຼັງທາງເສດຖະກິດ, ພະຍາດອາດຍາສິດ, ການສໍ້ລາດບັງຫຼວງ ແລະ ການເສື່ອມຖອຍ, “ການປ່ຽນແປງຕົນເອງ” ແລະ “ການຫັນປ່ຽນຕົນເອງ” ພາຍໃນພັກ. ການສ້າງພັກທີ່ສະອາດແລະເຂັ້ມແຂງໃນດ້ານການເມືອງ, ແນວຄິດ, ຄຸນສົມບັດສິນທຳ, ການຈັດຕັ້ງ ແລະພະນັກງານ ຍັງຄົງເປັນໜ້າທີ່ສຳຄັນ, ທີ່ມີຄວາມໝາຍຕັດສິນຊີ້ຂາດຕໍ່ການຢູ່ລອດຂອງພັກ ແລະລະບອບການປົກຄອງ.

ໃນທຸກຈຸດປ່ຽນທາງປະຫວັດສາດ, ພັກໄດ້ກຳນົດແຜນນະໂຍບາຍທີ່ຖືກຕ້ອງ ແລະແກ້ໄຂຂໍ້ຜິດພາດແລະຂໍ້ບົກຜ່ອງຢ່າງເຂັ້ມງວດໂດຍທັນທີ. ການ “ທົບທວນແລະແກ້ໄຂຕົນເອງ” ຢ່າງກ້າຫານນີ້ ຊ່ວຍໃຫ້ພັກຫຼີກລ່ຽງຄວາມຄິດຄຳພີຕາຍຕົວແລະຄວາມຫຼ້າຊ້າ, ເຮັດໃຫ້ພັກສາມາດເຕີບໃຫຍ່ເຂັ້ມແຂງຂຶ້ນຢ່າງຕໍ່ເນື່ອງ ເພື່ອຕອບສະໜອງຄວາມຕ້ອງການຂອງການປະຕິວັດໃນແຕ່ລະໄລຍະ. ໂດຍອີງໃສ່ບົດຮຽນຈາກປະຫວັດສາດ, ພັກໄດ້ເປັນເຈົ້າການໃນການກຳນົດນະໂຍບາຍທີ່ຖືກຕ້ອງຢ່າງທັນທ່ວງທີ; ຕົວຢ່າງທີ່ດີເດັ່ນແມ່ນ ຂະບວນການປ່ຽນແປງໃໝ່ເຊິ່ງເລີ່ມຕົ້ນໃນຊຸມປີ 1980 ໄດ້ຊ່ວຍກອບກູ້ປະເທດໃຫ້ຫຼຸດພົ້ນຈາກວິກິດການ ແລະ ນຳໄປສູ່ການພັດທະນາຢ່າງເຂັ້ມແຂງ. ບໍ່ດົນມານີ້, ຕໍ່ໜ້າການສໍ້ລາດບັງຫຼວງ ແລະ ການເສື່ອມຖອຍທາງສິນທຳໃນໝູ່ພະນັກງານ, ສະມາຊິກພັກບາງສ່ວນ, ພັກໄດ້ອອກມະຕິແລະຂໍ້ສະຫຼຸບຫຼາຍສະບັບ ແລະ ຕັດສິນໃຈທີ່ຈະດຳເນີນການແກ້ໄຂສະຖານະການ ແລະເພີ່ມທະວີການຕໍ່ສູ້ຕ້ານການສໍ້ລາດບັງຫຼວງດ້ວຍຈິດໃຈ “ບໍ່ມີເຂດຫວງຫ້າມ, ບໍ່ມີຂໍ້ຍົກເວັ້ນ, ທຸກຄົນສະເໝີພາບກັນຕໍ່ໜ້າກົດໝາຍ”.

ມື້ນີ້, ເມື່ອຫວນຄືນໄປເບິ່ງເກືອບສະຕະວັດທີ່ຜ່ານມາ, ເຮົາສາມາດພາກພູມໃຈໄດ້ວ່າ, ພາຍໃຕ້ການນຳພາຂອງພັກກອມມູນິດຫວຽດນາມ, ຈາກປະເທດທີ່ເຄີຍຕົກເປັນເມືອງຂຶ້ນແລະທຸກຍາກ, ຫວຽດນາມໄດ້ກ້າວຂຶ້ນມາເປັນປະເທດເອກະລາດ, ເອກະພາບ, ເປັນເຈົ້າຕົນເອງໄດ້ ແລະມີບົດບາດທີ່ໂດດເດັ່ນຂຶ້ນໃນເວທີສາກົນ. ຈາກປະເທດທີ່ຖືກທຳລາຍລ້າງດ້ວຍສົງຄາມ, ເຮົາໄດ້ດຳເນີນຂະບວນການປ່ຽນແປງໃໝ່ (ຕັ້ງແຕ່ປີ 1986) ເຊິ່ງຊ່ວຍໃຫ້ຫວຽດນາມພົ້ນຈາກວິກິດການ ແລະປ່ຽນແປງເປັນປະເທດກຳລັງພັດທະນາທີ່ມີລາຍໄດ້ປານກາງ ໂດຍມີມາດຕະຖານການດຳລົງຊີວິດຂອງປະຊາຊົນທີ່ດີຂຶ້ນຢ່າງຕໍ່ເນື່ອງ. ເມື່ອເບິ່ງໂລກ, ເຮົາສາມາດຢືນຢັນໄດ້ວ່າ ຄວາມເຂັ້ມແຂງ, ທ່າແຮງ, ສະຖານະ ແລະ ກຽດສັກສີສາກົນຂອງຫວຽດນາມກຳລັງເພີ່ມຂຶ້ນຢ່າງຕໍ່ເນື່ອງ. ມິດປະເທດທົ່ວໂລກຮູ້ຈັກຫວຽດນາມໃນຖານະຊາດວິລະຊົນໃນການຕໍ່ສູ້ເພື່ອເອກະລາດ, ພ້ອມທັງເປັນຄູ່ຮ່ວມມືທີ່ໜ້າເຊື່ອຖື, ປະເທດທີ່ຮັກສັນຕິພາບ ແລະປະເທດທີ່ມີເສດຖະກິດກຳລັງພັດທະນາຢ່າງວ່ອງໄວ. ຜົນສຳເລັດອັນຍິ່ງໃຫຍ່ ແລະມີຄວາມໝາຍທາງປະຫວັດສາດເຫຼົ່ານີ້ ຢືນຢັນຄວາມຈິງທີ່ວ່າ ການນຳພາທີ່ຖືກຕ້ອງຂອງພັກແມ່ນປັດໄຈຕັດສິນໄຊຊະນະທັງໝົດຂອງການປະຕິວັດຫວຽດນາມ ແລະ ເປັນ “ທຸງທີ່ລວມພະລັງຂອງຊາດທັງຊາດ” ບົນເສັ້ນທາງແຫ່ງການສ້າງສາແລະປົກປັກຮັກສາປະເທດຊາດ.

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກໄດ້ກຳນົດທິດທາງແລະເປົ້າໝາຍຍຸດທະສາດທີ່ສຳຄັນສຳລັບໄລຍະທີ່ຈະມາເຖິງ, ໂດຍສະເພາະຄວາມຕັດສິນໃຈໃນການປະຕິບັດສອງເປົ້າໝາຍຍຸດທະສາດ 100 ປີໃຫ້ສຳເລັດ. ຄວາມຮັບຜິດຊອບທາງປະຫວັດສາດທີ່ວາງໄວ້ເທິງບ່າຂອງທົ່ວພັກ, ທົ່ວປະຊາຊົນ ແລະທົ່ວກອງທັບ ຄືການເຮັດໃຫ້ເປົ້າໝາຍແລະຄວາມປາດຖະໜາເຫຼົ່ານີ້ເປັນຈິງຢ່າງມີຊີວິດຊີວາ. ອົງການຈັດຕັ້ງພັກທຸກແຫ່ງ, ພະນັກງານແລະສະມາຊິກພັກທຸກຄົນ - ໂດຍສະເພາະຜູ້ທີ່ຢູ່ໃນຕຳແໜ່ງຫົວໜ້າ - ຈຳເປັນຕ້ອງເຊີດຊູຄວາມຮັບຜິດຊອບຢ່າງສູງ, ເປັນແບບຢ່າງໃນການປະຕິບັດມະຕິກອງປະຊຸມໃຫຍ່ຄັ້ງທີ XIV ຂອງພັກ, ເປັນເຈົ້ານປະດິດສ້າງ, ກ້າຄິດ, ກ້າກະທຳ ແລະກ້າຮັບຜິດຊອບ. ທົ່ວພັກຕ້ອງສືບຕໍ່ເພີ່ມທະວີການກໍ່ສ້າງແລະປັບປຸງພັກ ແລະ ຮັກສາລະບຽບວິໄນຢ່າງເດັດຂາດ; ເສີມຂະຫຍາຍຄວາມສາມາດໃນການນຳພາ ແລະເພີ່ມກຳລັງແຮງສູ້ຮົບໃຫ້ສູງຂຶ້ນ; ປັບປຸງສາຍພົວພັນອັນໃກ້ຊິດກັບປະຊາຊົນ, ອີງໃສ່ປະຊາຊົນເພື່ອຄວບຄຸມອຳນາດ ແລະປັບປຸງອົງການ. ພ້ອມກັນນັ້ນ, ລະບົບການເມືອງທັງໝົດຕ້ອງເຂົ້າຮ່ວມຢ່າງພ້ອມພຽງ ແລະມີປະສິດທິພາບ ໃນການນຳມະຕິຂອງພັກໄປສູ່ການປະຕິບັດຈິງ; ສືບຕໍ່ຍູ້ແຮງຂະບວນການແຂ່ງຂັນກັນຮັກຊາດ, ປຸກຕື່ນຄວາມປາດຖະໜາທີ່ຈະພັດທະນາປະເທດໃຫ້ຈະເລີນຮຸ່ງເຮືອງແລະມີຄວາມສຸກ ໃນປະຊາຊົນຊາວຫວຽດນາມທຸກຄົນ.

ຕະຫຼອດໄລຍະເວລາເກືອບໜຶ່ງສະຕະວັດນັບຕັ້ງແຕ່ການສ້າງຕັ້ງ, ການຕໍ່ສູ້ ແລະ ການເຕີບໃຫຍ່ຂະຫຍາຍຕົວ, ພັກກອມມູນິດຫວຽດນາມໄດ້ເປັນຜູ້ນຳ ແລະຜູ້ຮັບໃຊ້ທີ່ຈົງຮັກພັກດີຂອງປະຊາຊົນຢ່າງແທ້ຈິງ. ເສັ້ນທາງຂ້າງໜ້າຈະເຕັມໄປດ້ວຍຄວາມຫຍຸ້ງຍາກແລະຄວາມທ້າທາຍ, ແຕ່ດ້ວຍຄວາມກ້າຫານ, ປັນຍາ ແລະປະສົບການຂອງພັກຜູ້ກຳອຳນາດ, ດ້ວຍມູນເຊື້ອອັນພິລະອາດຫານ ແລະຄວາມສາມັກຄີຂອງຊາດທັງມວນ, ເຮົາຈະເອົາຊະນະອຸປະສັກທັງໝົດ, ຄວ້າເອົາໂອກາດ ແລະບັນລຸໄຊຊະນະທີ່ຍິ່ງໃຫຍ່ກວ່າເກົ່າຢ່າງແນ່ນອນ. ທົ່ວພັກ, ທົ່ວປະຊາຊົນ ແລະທົ່ວກອງທັບ ຈະສືບຕໍ່ຮ່ວມແຮງຮ່ວມໃຈກັນ, ເສີມຂະຫຍາຍລັດທິຮັກຊາດ, ລັດທິວິລະຊົນປະຕິວັດ ແລະ ຄວາມຄິດສ້າງສັນຂອງປະຊາຊົນຫວຽດນາມໃນຍຸກໃໝ່ຢ່າງສຸດຊີດ. ພາຍໃຕ້ທຸງອັນສະຫງ່າລາສີຂອງພັກ, ປະຊາຊົນຫວຽດນາມຈະກ້າວໄປຂ້າງໜ້າດ້ວຍຄວາມຕັດສິນໃຈທີ່ຈະປະຕິບັດມະຕິກອງປະຊຸມໃຫຍ່ຄັ້ງທີ XIV ໃຫ້ສຳເລັດ ແລະມຸ່ງໝັ້ນທີ່ຈະສ້າງປະເທດຫວຽດນາມທີ່ມີສັນຕິພາບ, ເອກະລາດ, ປະຊາທິປະໄຕ, ຈະເລີນຮຸ່ງເຮືອງ, ອາລະຍະທຳ ແລະມີຄວາມສຸກ, ກ້າວໄປສູ່ສັງຄົມນິຍົມຢ່າງໝັ້ນຄົງ.

ກ້າວໄປຂ້າງໜ້າຢ່າງໝັ້ນຄົງພາຍໃຕ້ທຸງອັນສະຫງ່າງາມຂອງພັກ, ທົ່ວພັກ, ທົ່ວປະຊາຊົນ ແລະທົ່ວກອງທັບ ຂໍໃຫ້ຄຳໝັ້ນສັນຍາວ່າ ຈະອຸທິດທັງຫົວໃຈ, ສະຕິປັນຍາ ແລະ ຄວາມກ້າຫານ ເພື່ອສ້າງປະເທດຫວຽດນາມທີ່ເຂັ້ມແຂງແລະຈະເລີນຮຸ່ງເຮືອງ, ເພື່ອເຊື່ອມໂຍງຫວຽດນາມເຂົ້າສູ່ເວທີການເມືອງໂລກ, ເສດຖະກິດສາກົນ ແລະ ອາລະຍະທຳມະນຸດຢ່າງເລິກເຊິ່ງຍິ່ງຂຶ້ນ ແລະເພື່ອເຮັດໃຫ້ຫວຽດນາມສາມາດຢືນຄຽງຂ້າງປະເທດມະຫາອຳນາດຂອງໂລກໃນຍຸກໃໝ່ໄດ້. ລະດູໃບໄມ້ປົ່ງຂອງຊາດຈະສວຍງາມແລະຍືນຍົງຕະຫຼອດໄປ ເມື່ອຊາວຫວຽດນາມທຸກຄົນ ບໍ່ວ່າຈະມີຖານະຕຳແໜ່ງໃດ ຕ່າງມຸ່ງໝັ້ນທີ່ຈະສ້າງປະເທດຊາດໃຫ້ຈະເລີນຮຸ່ງເຮືອງຂຶ້ນເລື້ອຍໆ ແລະຮ່ວມມືກັນສ້າງພັກທີ່ສະອາດແລະເຂັ້ມແຂງຂຶ້ນເລື້ອຍໆ. ເພື່ອທີ່ໃນອະນາຄົດ, ພະນັກງານ, ສະມາຊິກພັກ ແລະປະຊາຊົນຫວຽດນາມທຸກຄົນ ຈະສາມາດຫວນຄືນຫຼັງດ້ວຍຄວາມພາກພູມໃຈ ແລະໄດ້ມີສ່ວນຮ່ວມຢ່າງຄຸ້ມຄ່າຕໍ່ອຸດົມການອັນສູງສົ່ງຂອງຊາດ, ໂດຍໄດ້ດຳລົງຊີວິດແລະອຸທິດຕົນຢ່າງສົມຄວນແກ່ປະເທດຊາດແລະປະຊາຊົນ.

------------------------------

(1) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ 5, ໜ້າ 289.