ຄວາມປາດຖະໜາໃນການພັດທະນາປະເທດ ແລະການປ່ຽນແປງໃໝ່ປະດິດສ້າງ - ຈຸດພົ້ນເດັ່ນຂອງກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ - ບົດຄວາມທີ່ມີປະລິມາດຂະໜາດໃຫຍ່

ວກ. - ໃນບົດຂຽນ “ການກະກຽມແລະດຳເນີນຢ່າງດີ ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ, ນຳປະເທດກ້າວເຂົ້າສູ່ໄລຍະໃໝ່ແຫ່ງການພັດທະນາ”, ທ່ານ ຫງວຽນຝູຈ້ອງ ເລຂາທິການໃຫຍ່, ປະທານປະເທດ ໄດ້ເນັ້ນໜັກວ່າ: “ສ້າງການຫັນປ່ຽນຂັ້ນພື້ນຖານ ຈາກເສດຖະກິດໄປສູ່ຮູບແບບການເຕີບໂຕ ບົນພື້ນຖານການນຳໃຊ້ຊັບພະຍາກອນ, ຄວາມກ້າວໜ້າທາງວິທະຍາສາດ-ເຕັກໂນໂລຊີ ແລະການປ່ຽນແປງໃໝ່ປະດິດສ້າງຢ່າງມີປະສິດທິຜົນ... ກໍ່ສ້າງແລະເສີມຂະຫຍາຍຄຸນຄ່າວັດທະນະທຳແລະກຳລັງແຮງຂອງຄົນຫວຽດນາມ; ປັບປຸງບູລະນະແລະດຳເນີນການສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທຳ ແລະມາດຕະຖານມະນຸດ ຄວບຄູ່ໄປກັບການສົ່ງເສີມເຈດຈຳນົງ, ຄວາມປາດຖະໜາໃນການພັດທະນາ ແລະ ກຳລັງແຮງຂອງຄົນ ຫວຽດນາມໃນໄລຍະໃໝ່”⁽¹⁾.

ຈຸດໃໝ່ແລະເຄື່ອງໝາຍທີ່ໂດດເດັ່ນຫຼາຍຢ່າງ

1- ຮ່າງເອກະສານຍື່ນສະເໜີຕໍ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມມີຫຼາຍຈຸດໃໝ່. ເລີ່ມຈາກຄວາມຕ້ອງການພາວະວິໄສອັນຮີບດ່ວນ ຂອງປະເທດແລະໂລກ ດ້ວຍກາລະໂອກາດແລະສິ່ງທ້າທາຍຫຼາຍຢ່າງທີ່ສະຫຼັບກັນ, ວາງອອກຫຼາຍບັນຫາໃໝ່ ກ່ຽວກັບທິດສະດີແລະພຶດຕິກຳ ເຊິ່ງຮຽກຮ້ອງໃຫ້ຫວຽດນາມຕ້ອງມີການບືນຕົວຂຶ້ນຢ່າງແຂງແຮງກ່າວອີກ, ມີການປ່ຽນແປງໃໝ່ຢ່າງຮອບດ້ານ ຄົບຊຸດກວ່າອີກ ແລະໃນລະດັບທີ່ສູງກວ່າ. ຈຸດໃໝ່ ແມ່ນຍ້ອນຄວາມສາມາດຕົວຈິງຂອງປະເທດພາຍຫຼັງເກືອບ 35 ປີ ແຫ່ງການປ່ຽນແປງໃໝ່ ດ້ວຍບັນດາຜົນງານອັນຍິ່ງໃຫຍ່, ມີຄວາມໝາຍປະຫວັດສາດ ແລະ ບັນດາບົດຮຽນອັນລ້ຳຄ່າ ທີ່ໄດ້ສະຫຼຸບຈາກຂະບວນວິວັດການອອກແຮງງານ, ຈາກຄວາມຄິດປະດິດສ້າງຂອງທົ່ວພັກ, ທົ່ວປວງຊົນ, ທົ່ວກອງທັບ; ຍ້ອນການສົ່ງເສີມກິດຈະກຳຕ່າງປະເທດ ແລະການເຊື່ອມໂຍງສາກົນ ທີ່ປະສົບຄວາມສຳເລັດ ເຮັດໃຫ້ຫວຽດນາມສາມາດກ້າວໜ້າໄປຕາມກາລະເວລາ, ກຳໄດ້ ຄາດຄະເນ ແລະເຂົ້າເຖິງ ບັນດາທ່າອຽງການພັດທະນາ ແລະ ບັນດາຄຸນຄ່າທີ່ແຜ່ຫຼາຍທົ່ວຂອງມະນຸດຊາດ - ບັນດາປັດໄຈດັ່ງກ່າວ ໄດ້ສ້າງພື້ນຖານອັນໜັກແໜ້ນ ເພື່ອໃຫ້ຫວຽດນາມອາດສາມາດພັດທະນາຢ່າງໄວວາ ໝັ້ນຄົງກວ່າອີກ ໃນລະດັບໃໝ່. ດ້ວຍເຫດນັ້ນ, ບັນດາຈຸດໃໝ່ຂອງຮ່າງເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ກໍ່ໄດ້ສ່ອງແສງຄວາມຄ້າຍຄືກັນ ລະຫວ່າງຄວາມຕ້ອງການພັດທທະນາແບບພາວະວິໄສຂອງປະເທດ ໃນສະຖານະການໃໝ່ ແລະ ຄວາມສາມາດສືບຕໍ່ປ່ຽນແປງໃໝ່ຂອງພັກກອມມູນິດ ແລະ ປະຊາຊົນຫວຽດນາມ.

ບັນດາຈຸດໃໝ່ໃນຮ່າງເອກະສານກອງປະຊຸມໃຫຍ່ຄັ້ງທີ 13 ຂອງພັກກອມມູນິດ ຫວຽດນາມ ບໍ່ພຽງແຕ່ໃໝ່ໃນດ້ານຄຳສັບເທົ່ານັ້ນ ແຕ່ຍັງໃໝ່ທາງດ້ານການເຂົ້າເຖິງ, ລະດັບກວມລວມ, ແນວຄິດຊີ້ນຳ, ເປົ້າໝາຍສູ້ຊົນ ແລະ ບັນດາການກຳນົດທິດການພັດທະນາປະເທດ ບົນພື້ນຖານສະຫຼຸບຢ່າງຈິງຈັງ ກ່ຽວກັບການປ່ຽນແປງໃໝ່ທີ່ເຕັມໄປດ້ວຍຄວາມປະດິດສ້າງ ຂອງປະຊາຊົນຫວຽດນາມໃນ 30 ປີແຫ່ງການປະຕິບັດ ໂຄງການການເມືອງກໍ່ສ້າງປະເທດໃນໄລຍະຂ້າມຜ່ານຂຶ້ນສູ່ລັດທິສັງຄົມນິຍົມ (ໂຄງການການເມືອງປີ 1991), ໂດຍສຸມໃສ່ 10 ປີແຫ່ງການປະຕິບັດ ໂຄງການການເມືອງ (ສະບັບປັບປຸງ, ພັດທະນາປີ 2011) ແລະຍຸດທະສາດການພັດທະນາເສດຖະກິດ-ສັງຄົມໄລຍະປີ 2011-2020, 5 ປີແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ; ຈາກການວິເຄາະແລະຄາດການທ່າອຽງການພັດທະນາຂອງໂລກ; ຄົ້ນຄວ້າແລະຮັບເອົາຜົນຂອງການພັດທະນາທິດສະດີ.

2- ນັບແຕ່ເມື່ອປະເທດດຳເນີນພາລະກິດການປ່ຽນແປງໃໝ່ ມາຮອດປະຈຸບັນ, ໃນແຕ່ລະກອງປະຊຸມໃຫຍ່ຂອງພັກກອມມູນິດຫວຽດນາມ ລ້ວນແຕ່ມີຈຸດພົ້ນເດັ່ນທີ່ສ້າງຄວາມປະທັບໃຈອັນເລິກເຊິ່ງ ໃນການຮັບຮູ້ຂອງພະນັກງານ, ສະມາຊິກພັກ ແລະ ປະຊາຊົນ, ສ້າງຄວາມເປັນເອກະພາບ, ຄວາມເຫັນດີເຫັນພ້ອມ, ເຊື່ອໝັ້ນໃນສັງຄົມ. ຈຸດພົ້ນເດັ່ນຂອງກອງປະຊຸມໃຫຍ່ຄັ້ງທີ 6 ຂອງພັກກອມມູນິດຫວຽດນາມ ແມ່ນກອງປະຊຸມປ່ຽນແປງໃໝ່; ກອງປະຊຸມໃຫຍ່ຄັ້ງທີ 7 ຂອງພັກກອມມູນິດຫວຽດນາມ ແມ່ນກອງປະຊຸມໃຫຍ່ທີ່ໄດ້ວາງໂຄງການການເມືອງພັດທະນາປະເທດໃນໄລຍະຂ້າມຜ່ານຂຶ້ນສູ່ສັງຄົມນິຍົມ; ກອງປະຊຸມໃຫຍ່ຄັ້ງທີ 8 ຂອງພັກກອມມູນິດຫວຽດນາມ ແມ່ນກອງປະຊຸມໃຫຍ່ທີ່ວາງແຜນນະໂຍບາຍຍູ້ແຮງການຫັນປະເທດເປັນອຸດສາຫະກຳ ທັນສະໄໝ; ກອງປະຊຸມໃຫຍ່ຄັ້ງທີ 9 ຂອງພັກກອມມູນິດຫວຽດນາມ ແມ່ນກອງປະຊຸມໃຫຍ່ທີ່ໄດ້ກຳນົດເສດຖະກິດຕະຫຼາດຕາມທິດສັງຄົມນິຍົມ ເປັນຮູບແບບເສດຖະກິດທົ່ວໄປ ໃນໄລຍະຂ້າມຜ່ານຂຶ້ນສັງຄົມນິຍົມ; ກອງປະຊຸມໃຫຍ່ຄັ້ງທີ 10 ຂອງພັກກອມມູນິດຫວຽດນາມ ແມ່ນກອງປະຊຸມໃຫຍ່ສະຫຼຸບ 20 ປີແຫ່ງການປ່ຽນແປງໃໝ່, ກຳນົດເປົ້າໝາຍນຳປະເທດຊາດຫຼຸດພັ້ນອອກຈາກ ສະຖານະພາບປະເທດດ້ອຍພັດທະນາ ໂດຍໄວ; ກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ ແມ່ນກອງປະຊຸມໃຫຍ່ທີ່ປັບປຸງພັດທະນາ ໂຄງການການເມືອງພັດທະນາປະເທດໃນໄລຍະຂ້າມຜ່ານຂຶ້ນສູ່ສັງຄົມນິຍົມ ແລະ ຕົກລົງປ່ຽນແປງໃໝ່ຮູບແບບການເຕີບໂຕ, ສ້າງໂຄງປະກອບເສດຖະກິດຄືນໃໝ່ ແລະ ເຊື່ອມໂຍງສາກົນ; ກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ແມ່ນກອງປະຊຸມໃຫຍ່ທີ່ວາງແຜນນະໂຍບາຍ ກໍ່ສ້າງແລະດັດແປງພັກຢ່າງຮອບດ້ານ ທາງດ້ານການເມືອງ, ແນວຄິດ, ການຈັດຕັ້ງ, ຄຸນສົມບັດສິນທຳ, ກໍ່ສ້າງລະບົບການເມືອງທີ່ກະທັດຮັດແລະເຄື່ອນໄຫວຢ່າງມີປະສິດທິພາບ ປະສິດທິຜົນ, ຍົກສູງຄຸນນະພາບ ປະສິດທິຜົນ ແລະຄວາມສາມາດແຂ່ງຂັນຂອງພຶື້ນຖານເສດຖະກິດ... ດັ່ງນັ້ນ ຈຸດເດັ່ນຂອງກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມແມ່ນຫຍັງ?

ຮ່າງເອກະສານທີ່ຍື່ນສະເໜີຕໍ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ມີຈຸດພົ້ນເດັ່ນຫຼາຍຈຸດ ເຊິ່ງໃນນັ້ນມີສອງປັດໄຈໃໝ່ທີ່ໄດ້ເຕື້ອງເຖິງ ແລະ ເນັ້ນໜັກເປັນຫຼາຍເທື່ອ, ຈາກຫົວຂໍ້ຂອງກອງປະຊຸມໃຫຍ່, ທັດສະນະຊີ້ນຳ, ເປົ້າໝາຍທົ່ວໄປ, ທິດທາງການພັດທະນາ, ໜ້າທີ່ຈຸດສຸມໃຈກາງ, ການບຸກທະລຸຍຸດທະສາດ . ນັ້ນແມ່ນຄວາມປາດຖະໜາໃນການພັດທະນາປະເທດໃຫ້ຈະເລີນຮຸ່ງເຮືອງ, ມີຄວາມຜາສຸກ ດ້ວຍເປົ້າໝາຍເຖິງກາງສະຕະວັດທີ 21 ຫວຽດນາມຈະກາຍເປັນປະເທດພັດທະນາ, ຕາມທິດທາງສັງຄົມນິຍົມ ແລະ ການປ່ຽນແປງໃໝ່ປະດິດສ້າງ. ເຊິ່ງສາມາດຖືໄດ້ວ່າ ເປັນຈຸດພົ້ນເດັ່ນຂອງຮ່າງເອກະສານ ແລະ ຂອງກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ, ສ່ອງແສງຄວາມຮັບຮູ້ໃໝ່ຂອງພັກ ກ່ຽວກັບກຳລັງແຮງພາຍໃນ ແລະ ວິທີການພັດທະນາປະເທດໃນສະຖານະການໃໝ່.

ຄວາມປາດຖະໜາໃນການພັດທະນາປະເທດທີ່ຈະເລີນຮູ່ງເຮືອງແລະມີຄວາມສຸກນັ້ນ
ແມ່ນແຫຼ່ງພະລັງພາຍໃນ, ແມ່ນພະລັງງານບົ່ມຊ້ອນທີ່ສ້າງກຳລັງແຮງອັນຍິ່ງໃຫຍ່ຂອງຊາດໃນໄລຍະໃໝ່

1- ຄວາມປາດຖະໜາ, ຕາມຄວາມເຂົ້າໃຈທົ່ວໄປ, ແມ່ນສະພາບຈິດໃຈທີ່ສະທ້ອນເຖິງຄວາມມຸ່ງຫວັງ, “ຄວາມປາດຖະໜາ, ຄວາມຕ້ອງການຢ່າງແຂງແຮງ”⁽²⁾. Keith D. Harrell - ນັກປາຖະກະຖາອາເມລິກາທີ່ມີຊື່ສຽງ ໃນນິພົນຫຼາຍບົດ⁽³⁾ໄດ້ນຳສະເໜີຄວາມໝາຍຂອງຄວາມປາດຖະໜາ ຢ່າງເລິກເຊິ່ງແລະຊັດເຈນ ເປັນຮູບແບບທີ່ຕັ້ງໜ້າຂອງທັດສະນະຄະຕິຂອງມະນຸດຕໍ່ຊີວິດ. ຈາກປັດຊະຍາທີ່ວ່າ “ທັດສະນະຄະຕິແມ່ນທັງໝົດ”, Keith D. Harrell ວິເຄາະຄວາມໝາຍອັນຍິ່ງໃຫຍ່ຂອງຄວາມປາດຖະໜາ. ຕາມທ່ານ, ຄວາມປາດຖະໜາ ແມ່ນແຫຼ່ງພະລັງທີ່ບໍ່ມີສິ້ນສຸດພາຍໃນແຕ່ລະຄົນ, ສະແດງອອກຜ່ານການເຄື່ອນໄຫວທີ່ບໍ່ມີເວລາພັກຜ່ອນ ເພື່ອໃຫ້ຜູ້ຄົນບໍ່ປະລະຄວາມໄຝ່ຝັນ ແລະບໍ່ຍອມຈຳນົນຕໍ່ສະຖານະການ.

ຄວາມປາດຖະໜາໃນການພັດທະນາ ຂອງຊາດໜຶ່ງແມ່ນສຽງສະທ້ອນແຫ່ງຄວາມປາດຖະໜາໃນການບືນຕົວຂຶ້ນຂອງຊຸມຊົນ, ຜູ້ຄົນໃນປະເທດ - ປະຊາຊາດດຽວກັນ, ກໍ່ໃຫ້ເກີດແຫຼ່ງພະລັງພາຍໃນອັນຍິ່ງໃຫຍ່, ມີຊີວິດຊີວາ ແລະ ມີກຳລັງແຮງອັນມະຫາສານ. ນັ້ນແມ່ນກຳລັງຂັບເຄື່ອນສູນກາງຂອງປະເທດ - ປະຊາຊາດໃນເສັ້ນທາງສູ່ອະນາຄົດ⁽⁴⁾. ສຳລັບຫວຽດນາມ, ປະເທດທີ່ມີມູນເຊື້ອສາມັກຄີ, ອາລະຍະທຳ, ອົງອາດກ້າຫານ, ຄວາມປາດຖະໜາອັນແຮງກ້າໃນການພັດທະນາປະເທດ ແມ່ນກຳລັງແຮງພາຍໃນທີ່ບໍ່ທຳມະດາຢ່າງແທ້ຈິງ, ເປັນແຫຼ່ງທີ່ມາຂອງສິ່ງມະຫັດສະຈັນໃນຫຼາຍພັນປີຂອງການສ້າງສາ ແລະປົກປັກຮັກສາປະເທດ.

2- ໃນສະໄໝກາງ, ຫວຽດນາມຊະນະສົງຄາມຮຸກຮານຂອງສັກດິນາເໜືອທັງໝົດ, ຮັກສາເອກະລາດແຫ່ງຊາດ, ສ້າງອາລະຍະທຳປະເທດດ້າຍຫວຽດທີ່ຮຸ່ງເຮືອງເຫຼືອງເຫຼື້ອມ ບໍ່ແມ່ນດ້ວຍທ່າແຮງດ້ານການທະຫານ, ດ້ວຍກຳລັງແຮງດ້ານວັດຖຸ, ແຕ່ກ່ອນອື່ນໝົດແລະຕົ້ນຕໍ່ແມ່ນ ດ້ວຍກຳລັງແຮງລຸກຮືຂຶ້ນຕໍ່ສູ້ຢ່າງທະນົງອົງອາດ ທີ່ເລີ່ມແຕ່ຄວາມປາດຖະໜາກ່ຽວກັບອຳນາດອະທິປະໄຕຂອງຊາດ: “ດິແດນອານາເຂດທາງໃຕ້, ປົກຄອງໂດຍກະສັດແຫ່ງທິດໃຕ້” (ຫຼີເທື່ອງກຽດ), ກ່ຽວກັບປະເທດດ້າຍຫວຽດ “ໄດ້ສ້າງອາລະຍະທຳມາແຕ່ດົນນານ; ພູຜາຊາຍແດນທີ່ໄດ້ແບ່ງກັນແລ້ວ, ຮີດຄອງປະເພນີເໜືອ, ໃຕ້ກໍ່ຕ່າງກັນ” (ຫງວຽນຈ້າຍ) ແລະຄວາມປາດຖະໜາກ່ຽວກັບປະເທດຊາດທີ່ຮັ່ງມີເຂັ້ມແຂງແຮງກ້າ “ປະເທດຊາດໝັ້ນຄົງນັບພັນປີ” (ເຈິ່ນເຍິນຕົງ).

ໃນສະໄໝໂຮ່ຈິມິນ, ພາຍໃຕ້ການນຳພາຂອງພັກກອມມູນິດຫວຽດນາມ, ປະຊາຊົນຫວຽດນາມ ໄດ້ທັບມ້າງໂສ້ຄາກົດຂີ່ຂູດຮີດຂອງຈັກກະພັດ ສັກດິນາ, ກໍ່ສ້າງແລະປົກປັກຮັກສາລັດປະຕິວັດ; ເອົາຊະນະພວກຮູກຮານທີ່ມີກຳລັງເຂັ້ມແຂງ, ປົກປັກຮັກສາເອກະລາດ ອຳນາດອະທິປະໄຕ ຜືນແຜ່ນດິນອັນຄົບຖ້ວນ ແລະ ທ້ອນໂຮມປະເທດເປັນເອກະພາບ, ນຳພາປະຊາຊົນທົ່ວປະເທດກ້າວຂຶ້ນສູ່ສັງຄົມນິຍົມ. ບັນດາວິລະກຳອັນສະຫງ່າລາສີນັ້ນ ຖືກສ້າງຂຶ້ນໂດຍກຳລັງແຮງຊະນະເລີດ ຂອງຄວາມຮັກຊາດແລະລັດທິອົງອາດກ້າຫານປະຕິວັດ ເລີ່ມຈາກຄວາມປາດຖະໜາອັນແຮງກ້າທີ່ທ່ານປະທານ ໂຮ່ຈິມິນ ໄດ້ສັງເຂບເປັນສັດຈະທຳທີ່ວ່າ: “ພວກເຮົາຍອມເສຍສະຫຼະທັງໝົດ, ແຕ່ບໍ່ຍອມເສຍປະເທດ, ບໍ່ຍອມເປັນທາດຢ່າງແນ່ນອນ”⁽⁵⁾; “ບໍ່ມີສິ່ງໃດ້ທີ່ປະເສີດກວ່າຄວາມເປັນເອກະລາດແລະເສລີພາບ”⁽⁶⁾; ປະເທດຫວຽດນາມເປັນໜຶ່ງ, ປະຊາຊາດຫວຽດນາມເປັນໜຶ່ງ, “ແມ່ນ້ຳອາດຈະແຫ້ງ, ພູເຂົາອາດຈະຖືກເຊາະເຈື່ອນ, ແຕ່ຄວາມຈິງນັ້ນບໍ່ເຄີຍປ່ຽນແປງ”⁽⁷⁾.

ຫຼັງຈາກທີ່ປະເທດເປັນເອກະພາບ, ການກໍ່ສ້າງສັງຄົມນິຍົມໄດ້ດຳເນີນໃນທົ່ວປະເທດ, ດ້ວຍຄວາມປາດຖະໜາທີ່ຈະເອົາຊະນະຄວາມທຸກຍາກ, ຫຼ້າຫຼັງ, ປະຊາຊົນເປັນຈິດໜຶ່ງໃຈດຽວໃຫ້ຄວາມເຊື່ອໝັ້ນໃນພັກກອມມູນິດຫວຽດນາມ ເພື່ອດຳເນີນພາລະກິດການປ່ຽນແປງໃໝ່. ຄວາມປາດຖະໜາໃນຄວາມສຸກ ຄວາມອິ່ມໜຳສຳລານ ໄດ້ຫັນປ່ຽນເປັນກຳລັງແຮງອັນຍິ່ງໃຫຍ່ທີ່ຈະຊ່ວຍໃຫ້ປະເທດກ້າວຜ່ານວິກິດການເສດຖະກິດ - ສັງຄົມທີ່ຮຸນແຮງໃນຊຸມປີ 80, ຕົ້ນຊຸມປີ 90 ຂອງສະຕະວັດທີ 20; ຜ່ານຜ່າຄວາມວຸ່ນວາຍທາງການເມືອງທົ່ວໂລກ ເມື່ອຮູບແບບລະບອບສັງຄົມນິຍົມໃນສະຫະພາຍໂຊວຽດ ແລະເອີຣົບຕາເວັນອອກລົ້ມລະລາຍ, ລວມທັງສິ່ງທ້າທາຍທີ່ຮ້າຍແຮງຍ້ອນຜົນກະທົບຂອງວິກິດການເສດຖະກິດ, ການເງິນໃນພາກພື້ນໃນຊຸມປີ 1997 - 1998 ແລະວິກິດການທາງການເງິນ, ພາວະເສດຖະກິດໂລກຖົດຖອຍໃນຊຸມປີ 2008 - 2009, ພາປະເທດອອກຈາກສະຖານະເປັນປະເທດທີ່ທຸກຍາກດ້ອຍພັດທະນາ ໄປສູ່ປະເທດກຳລັງພັດທະນາທີ່ມີລາຍໄດ້ປານກາງ; ຜ່ານຜ່າແລະຄວບຄຸມການລະບາດຂອງພະຍາດໂຄວິດ-19 ໄດ້ ແລະຫຼຸດຄວາມເສຍຫາຍທີ່ເກີດຈາກການລະບາດຂອງພະຍາດໃຫ້ນ້ອຍທີ່ສຸດ, ເຮັດໃຫ້ເສດຖະກິດ-ສັງຄົມເຂົ້າເປັນປົກກະຕິ, ຮັບປະກັນຊີວິດການເປັນຢູ່ຂອງປະຊາຊົນ, ຟື້ນຟູແລະຮັກສາຄວາມເຕີບໂຕ. ຄວາມປາດຖະໜາບືນຕົວຂຶ້ນຂອງປະເທດຊາດໄດ້ແສງອອກຢ່າງລະອຽດ ແລະມີຊີວິດຊີວາ ຜ່ານຄວາມປາດຖະໜາໃນໄຊຊະນະ ຂອງທີມບານເຕະແຫ່ງຊາດ U23 ໃນປີ 2018, 2019 ໃນສະໜາມກິລາພາກພື້ນແລະທະວີບອາຊີ. ຖັນແຖວນັກເຕະບານທີ່ໄດ້ກໍ່ສ້າງຢ່າງມີແບບມີແຜນ; ໄດ້ຈັດຕັ້ງຢ່າງແໜ້ນແຟ້ນ ເໝາະສົມ; ໄດ້ນຳພາດ້ວຍຍຸດທະວິທີວິທະຍາສາດ ແລະພິເສດ ດ້ວຍຄວາມປາດຖະໜາຫວຽດນາມຈະໄດ້ໄຊຊະນະ, ຫວຽດນາມເປັນຜູ້ຊະນະເລີກ ໄດ້ສ້າງຄວາມສຳເລັດອັນມະຫັດສະຈັນ ໃນເດີ່ນຫຍ້າຂອງທີມຊາດ U23, ເຮັດໃຫ້ຄວາມປາດຖະໜາບືນຕົວຂຶ້ນຢ່າງແຮງກ້າຂອງທັງຊາດ. ນີ້ແມ່ນການວັດແທກນັ້ນເອງ ແລະ ກໍ່ເປັນຫຼັກຖານພະຍານໃຫ້ເຫັນເຖິງກຳລັງແຮງອັນມະຫັດສະຈັນຂອງຄວາມປາດຖະໜາບືນຕົວຂຶ້ນຂອງປະເທດຊາດມັງໝົດ.

3- ກ້າວເຂົ້າສູ່ທົດສະວັດທີສາມຂອງສະຕະວັດ 21, ໃນຮ່າງເອກະສານທີ່ຍື່ນສະເໜີຕໍ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ມີແຜນນະໂຍບາຍຍົກລະດັບຄວາມປາດຖະໜາໃນການພັດທະນາປະເທດຫວຽດນາມໃຫ້ຈະເລີນຮຸ່ງເຮືອງແລະມີຄວາມຜາສຸກ ຂຶ້ນສູ່ລະດັບໃໝ່.

ຄວາມປາດຖະໜາໃນການພັດທະນາປະເທດຫວຽດນາມໃຫ້ຈະເລີນຮຸ່ງເຮືອງແລະມີຄວາມຜາສຸກ ບໍ່ແມ່ນແນວຄິດທີ່ລະເມີເພີ້ຝັນ ເລີ່ມຈາກຄວາມຮູ້ສຶກບັງເອີນອັດຕະວິໄສ, ເຈດຈຳນົງນິຍົມແຕ່ຢ່າງໃດ, ມັນແມ່ນຄວາມປາດຖະໜາທີ່ເລີ່ມຈາກຄວາມເຊື່ອໝັ້ນອັນໜັກແໜ້ນຕໍ່ພາລະກິດອັນຍິ່ງໃຫຍ່, ຄວາມສາມາດບົ່ມຊ້ອນ, ຖານະບົດບາດ ແລະ ອິດທິພົນຂອງປະເທດພາຍຫຼັງເກືອບ 35 ປີແຫ່ງການດຳເນີນພາລະກິດການປ່ຽນແປງໃໝ່; ເຊື່ອໝັ້ນໃນຄວາມກ້າຫານແລະບົດຮຽນປະສົບການອັນກ້າກັ່ນ ເຊິ່ງພັກແລະປະຊາຊົນຫວຽດນາມໄດ້ພິສູດ ແລະ ສະຫຼຸບໃນພຶດຕະກຳການອອກແຮງງານແລະຄວາມຄິດປະດິດສ້າງມາຫຼາຍສິບປີທີ່ຜ່ານມາ. ນັ້ນກໍ່ບໍ່ແມ່ນຄວາມປາດຖະໜາອັນງ່າຍດາຍ ຍິນຍອມຕາມ, ແຕ່ແມ່ນຄວາມປາດຖະໜາທີ່ໄດ້ເພີ່ມພູນຄູນສ້າງບົນພື້ນຖານການວິເຄາະ, ຄາດຄະເນ, ຄາດການຢ່າງຮອບຄອບຖີ່ຖ້ວນ ກ່ຽວກັບກາລະໂອກາດ, ຄວາມສະດວກທີ່ອາດສາມາດກຳໄດ້ແລະເສີມຂະຫຍາຍ; ພ້ອມກັນນັ້ນ, ມີການໄຕ່ຕອງ, ຄິດໄລ່ຢ່າງສ່ອງໃສທຸ່ນທ່ຽງຕໍ່ຄວາມຫຍຸ້ງຍາກ ສິ່ງທ້າທາຍຢູ່ພາຍນອກ ແລະ ບັນດາຄວາມຈຳກັດ ສິ່ງກີດຂວາງຢູ່ພາຍໃນທີ່ຕ້ອງການແກ້ໄຂ ຜ່ານຜ່າດ້ວຍທິດນຳທີ່ວ່າ “ເອົາຫຼັກການເປັນພື້ນເພື່ອໝູນໃຊ້ຢ່າງໄຫວພິບ”, ຄວາມອ່ອນໄຫວໃນການຍຶດເອົາໂອກາດ, ເປັນເຈົ້າການຮັບມືກັບຄວາມສ່ຽງ, ຫັນປ່ຽນຄວາມສ່ຽງໃຫ້ເປັນໂອກາດໃນການພັດທະນາ.

ຄວາມປາດຖະໜາໃນການພັດທະນາປະເທດຫວຽດນາມໃຫ້ຈະເລີນຮຸ່ງເຮືອງແລະມີຄວາມຜາສຸກ ບໍ່ພຽງແຕ່ເປັນຄວາມໄຝ່ຝັນເທົ່ານັ້ນ ແຕ່ຍັງແມ່ນຄວາມມຸ້ງຫວັງທີ່ ນຳຊີວິດມາສູ່ຄວາມເປັນຈິງ, ໄດ້ຮັບການສ້າງຕັ້ງແລະເພີ່ມພູນຄູນສ້າງບົນພື້ນຖານວິທະຍາສາດຕາມເສັ້ນທາງໄປສູ່ຈຸດໝາຍປາຍທາງ ດ້ວຍບາດກ້າວຂັ້ນຕອນການວາງແຜນທີ່ຊັດເຈນ. ສືບທອດແລະປັບປຸງບູລະນະບັນດາເປົ້າໝາຍທີ່ໄດ້ກຳນົດ ໂດຍບັນດາກອງປະຊຸມໃຫຍ່ກ່ອນນີ້ຂອງພັກ; ອີງໃສ່ເງື່ອນໄຂ, ຄວາມສາມາດຕົວຈິງຂອງປະເທດ ແລະທ່າອຽງການພັດທະນາຂອງໂລກ, ຮ່າງເອກະສານທີ່ຍື່ນສະເໜີຕໍ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ ໄດ້ກຳນົດບັນດາເປົ້າໝາຍອັນລະອຽດວ່າ: ສູ້ຊົນເຖິງປີ 2025, ຫວຽດນາມເປັນປະເທດກຳລັງພັດທະນາ ທີ່ມີອຸດສາຫະກຳຕາມທິດທັນສະໄໝ, ມີລາຍໄດ້ລື່ນກາຍລະດັບລາຍໄດ້ປານກາງທີ່ຕ່ຳ; ເຖິງປີ 2030, ເປັນປະເທດກຳລັງພັດທະນາ ທີ່ມີອຸດສາຫະກຳທັນສະໄໝ, ມີລາຍໄດ້ປານກາງສູງ; ເຖິງປີ 2045, ກາຍເປັນປະເທດພັດທະນາແລ້ວ, ມີລາຍໄດ້ສູງ.

ຄວາມປາດຖະໜາໃນການພັດທະນາປະເທດຫວຽດນາມໃຫ້ຈະເລີນຮຸ່ງເຮືອງແລະມີຄວາມຜາສຸກ ຕິດພັນກັບຂະບວນວິວັດການກໍ່ສ້າງແລະເສີມຂະຫຍາຍລະບົບຄຸນຄ່າຂອງຊາດ, ລະບົບຄຸນຄ່າວັດທະນະທຳ ແລະ ຄຸນຄ່າມາດຕະຖານ, ພ້ອມກັບກຳລັງແຮງຂອງຄົນຫວຽດນາມໃນໄລຍະໃໝ່⁽⁸⁾, ຕິດພັນກັບການພັດທະນາລະບົບກຳລັງໜູນການພັດທະນາແບບຄົບຊຸດ: ປະຊາທິປະໄຕສັງຄົມນິຍົມ; ມະຫາສາມັກຄີປວງຊົນທັງຊາດ; ກຳລັງແຮງສັງລວມຂອງລະບົບການເມືອງ; ແຫຼ່ງບຸກຄະລາກອນຄຸນນະພາບສູງ, ຜູ້ເກັ່ງກ້າສາມາດ; ວິທະຍາສາດ, ເຕັກໂນໂລຊີ ແລະ ການປ່ຽນແປງໃໝ່ປະດິເສ້າງ...⁽⁹⁾.

ການປ່ຽນແປງໃໝ່ປະດິດສ້າງ - ແຮງຂັບເຄື່ອນທີ່ເຂັ້ມແຂງ
ເພື່ອສືບຕໍ່ການປ່ຽນແປງໃໝ່ຢ່າງຄົບຊຸດແລະຮອບດ້ານ

1- ສັດຈະທຳແມ່ນລະອຽດຕົວຈິງ, ການປະຕິວັດແມ່ນການປະດິດສ້າງ. ການປ່ຽນແປງໃໝ່ແມ່ນຂະບວນການສ້າງການປ່ຽນແປງທີ່ມີລັກສະນະປະຕິວັດ; ການປ່ຽນແປງໃໝ່ແລະຄວາມຄິດປະດິດສ້າງ ແມ່ນສອງດ້ານທີ່ມີການພົວພັນແໜ້ນແຟ້ນນຳກັນ ໃນການພັດທະນາໜຶ່ງໆ. ໃນການປ່ຽນແປງໃໝ່ມີຄວາມຄິດປະດິດສ້າງ; ຄວາມຄິດປະດິດສ້າງຕິດພັນກັບການປ່ຽນແປງໃໝ່. ພາລະກິດແຫ່ງການປ່ຽນແປງໃໝ່ໂດຍພັກກອມມູນິດຫວຽດນາມເປັນຜູ້ລິເລີ່ມ, ນຳພາແຕ່ປີ 1996 ມາຮອດປະຈຸບັນ ແມ່ນກິດຈະກຳແຫ່ງຄວາມຄິດປະດິດສ້າງທີ່ອັນຍິ່ງໃຫຍ່ຂອງທົ່ວພັກ ແລະປະຊາຊົນຫວຽດນາມທຸກຄົນ. ນັ້ນແມ່ນຂະບວນການນຶກຄິດປະດິດສ້າງຢ່າງຕໍ່ເນື່ອງ ແນໃສ່ລົບລ້າງອັນເກົ່າ, ກໍ່ສ້າງອັນໃໝ່ຕັ້ງແຕ່ຕົ້ນຫາປາຍ, ສ້າງເປັນກຳລັງການຜະລິດໃໝ່ ແລະການພົວພັນການຜະລິດໃໝ່, ທັງພື້ນຖານເສດຖະກິດແລະໂຄງບົນໃໝ່, ທັງຊີວິດວັດຖຸໃໝ່ແລະຊີວິດຈິດໃຈໃໝ່⁽¹⁰⁾.

ພາລະກິດການປ່ຽນແປງໃໝ່ແມ່ນຜົນງານແຫ່ງຄວາມຄິດປະດິດສ້າງຂອງທົ່ວພັກ, ທົ່ວກອງທັບ ແລະປະຊາຊົນທຸກຊັ້ນວັນນະໃນຊີວິດຂອງປະເທດ, ໃນທຸກພື້ນທີ່ທີ່ມີລະດັບແລະຊັ້ນຂັ້ນທີ່ແຕກຕ່າງກັນ, ຈາກລະດັບຕໍ່າຫາສູງ, ແຕ່ສ່ວນໜຶ່ງເຖິງທັງໝົດ, ຈາກບໍ່ຄົບຖ້ວນຈົນຄົບຖ້ວນ, ເໝາະສົມກັບເງື່ອນໄຂແລະລະດັບການພັດທະນາເສດຖະກິດ - ສັງຄົມໃນແຕ່ລະໄລຍະ. ການປ່ຽນແປງໃໝ່ເລີ່ມຕົ້ນຈາກການສະຫຼຸບພຶດຕິກຳ, ຖອດຖອນບົດຮຽນປະສົບການທີ່ປະສົບຄວາມສຳເລັດຜົນ ແລະບໍ່ປະສົບຄວາມສຳເລັດ, ບົນພື້ນຖານດັ່ງກ່າວ ເພື່ອຄົ້ນຫາແລະສ້າງວິທີການໃໝ່ ໃນການຄິດແລະການເຮັດ. ກອງປະຊຸມໃຫຍ່ຄັ້ງທີ 6 ຂອງພັກອມມູນິດຫວຽດນາມ ໄດ້ລິເລີ່ມພາລະກິດການປ່ຽນແປງໃໝ່ ແມ່ນເລີ່ມຕົ້ນແຕ່ບັນດາບົດຮຽນທີ່ເລິກເຊິ່ງນັ້ນເອງ ທີ່ໄດ້ຖອດຖອນຈາກພາກຕົວຈິງຂອງຊຸມປີກ່ອນການປ່ຽນແປງໃໝ່ ແລະ ການສະຫຼຸບບັນດາຮູບແບບໃໝ່, ບັນດາວິທີການປະຕິບັດທີ່ປະດິດສ້າງຂອງປະຊາຊົນ. ກ້າວເຂົ້າສູ່ໄລຍະຍູ້ແຮງການຫັນປະເທດເປັນອຸດສາຫະກຳ ທັນສະໄໝ, ຄວາມຄິດປະດິດສ້າງໄດ້ຮັບການຍົກຂຶ້ນສູ່ລະດັບໃໝ່, ອີງໃສ່ການດັດແປງ, ໝູນໃຊ້ຄວາມກ້າວໜ້າດ້ານວິທະຍາສາດ ເຕັກໂນໂລຊີ ເຂົ້າໃນການນຳພາ, ຄຸ້ມຄອງ, ການຜະລິດ, ການທຸລະກິດ, ສ້າງເປັນການພັດທະນາໃນບັນດາຂົງເຂດ, ບັນດາຂອບເຂດ, ບັນດາພື້ນທີ່... ລະດັບຄວາມຄິດປະດິດສ້າງໃນໄລຍະນີ້ຕ້ອງມີບາດກ້າວໃໝ່. ບັນດາຜົນງານອັນຍິ່ງໃຫຍ່ ທີ່ມີຄວາມໝາຍປະຫວັດສາດຂອງປະເທດໃນເກືອບ 35 ປີທີ່ຜ່ານມາ ຕິດພັນກັບຂະບວນການປ່ຽນແປງໃໝ່ ແລະຄວາມຄິດປະດິດສ້າງຢ່າງບໍ່ຢຸດຢັ້ງ ຂອງທົ່ວພັກແລະທົ່ວປວງຊົນ. ແຕ່, ຍ້ອນວິທະຍາສາດ, ເຕັກໂນໂລຊີ ແລະ ລະດັບການພັດທະນາເສດຖະກິດ - ສັງຄົມຂອງປະເທດຍັງຢູ່ໃນລະດັບຕ່ຳ ດັ່ງນັ້ນລະດັບແລະປະສິດທິຜົນ ຂອງຄວາມຄິດປະດິດສ້າງ ໃນປະເທດຫວຽດນາມ ຍັງຖືກຈຳກັດ, ບໍ່ພຽງພໍທີ່ຈະສ້າງການພັດທະນາແບບກ້າວກະໂດດ.

2- ໃນປະຈຸບັນ, ໂລກກຳລັງເຂົ້າສູ່ຍຸກໃໝ່ຂອງການພັດທະນາ. ການປະຕິວັດເຕັກໂນໂລຊີໃໝ່, ຍັງໄດ້ເອີ້ນວ່າການປະຕິວັດອຸດສາຫະກຳຄັ້ງທີສີ່, ທີ່ກຳລັງເກີດຂຶ້ນຢ່າງກວ້າງຂວາງເລິກເຊິ່ງ ໃນຄວາມໄວທີ່ບໍ່ເຄີຍມີມາກ່ອນ, ດ້ວຍການບຸກທະລຸທາງດ້ານເຕັກໂນໂລຊີ, ໂດຍສະເພາະທາງດ້ານປັນຍາປະດິດ, ເຕັກໂນໂລຊີຫຸ່ນຍົນ, ອີນເຕີເນັດເຊື່ອມຕໍ່ສັບພະສິ່ງ, ນາໂນເຕັກໂນໂລຊີ, ເຕັກໂນໂລຊີຊີວະພາດ, ວັດສະດຸສາດ... ບັນດາການບຸກທະລຸ ຕັ້ງແຕ່ການປະຕິສຳພັນ, ການຊຸກຍູ້ເຊິ່ງກັນແລະກັນທາງດ້ານເຕັກໂນໂລຊີ ທີ່ກຳລັງສ້າງເປັນໂລກດິຈິຕອນແລະອັດຕະໂນມັດ ເຊິ່ງກິດຈະກຳທັງໝົດມີປະສິດທິຜົນແລະສະຫຼາດກວ່າເກົ່າ. ການປະຕິວັດອຸດສາຫະກຳຄັ້ງທີສີ່ທີ່ໄດ້ສົ່ງຜົນກະທົບຢ່າງແຂງແຮງເຖິງທຸກໆປະເທດ, ສ້າງທັງໂອກາດແລະຄວາມທ້າທາຍ ດ້ວຍການກະໂດດຂັ້ນຫຼາຍຢ່າງໃນດ້ານການຄຸ້ມຄອງ, ການປ້ອງກັນຊາດ, ປ້ອງກັນຄວາມປອດໄພ, ການຜະລິດ ທຸລະກິດ, ສິ່ງແວດລ້ອມ, ຊີວິດປະຈຳວັນແລະຊີວິດໃນສັງຄົມ, ຜູ້ຄົນ⁽¹¹⁾.

ບັນດາປະເທດລ້ວນແຕ່ເອົາໃຈໃສ່ເຖິງການກໍ່ສ້າງ ປະຕິບັດຍຸດທະສາດເພື່ອໃຊ້ປະໂຫຍດຈາກຄວາມສຳເລັດ ແລະຕອບສະໜອງຕໍ່ຄວາມທ້າທາຍຂອງການປະຕິວັດອຸດສາຫະກຳຄັ້ງທີສີ່ - ປັດໄຈທີ່ກຳນົດການພັດທະນາກະໂດດຂັ້ນ ຫຼື ການຊັກຊ້າຫຼ້າຫຼັງຂອງປະເທດໜຶ່ງ. ການປ່ຽນແປງໃໝ່ປະດິດສ້າງ ແມ່ນຈິນຕະນາການໃໝ່ໃນຍຸດທະສາດການພັດທະນາຂອງທຸກປະເທດ ແລະ ກາຍເປັນພາສາກາງທີ່ມີຄວາມໝາຍລະດັບໂລກ, ສະແດງເຖິງລະດັບໃໝ່, ລະດັບຄວາມຮູໃໝ່ຂອງຄວາມຄິດປະດິດສ້າງ, ການປ່ຽນແປງໃໝ່, ການພັດທະນາ - ການປ່ຽນແປງໃໝ່ຢ່າງແຂງແຮງກວ່າແລະມີປະສິດທິຜົນສູງກວ່າ ບົນພື້ນຖານຄວາມຄິດປະດິດສ້າງ ແລະການປະຢຸກໃຊ້ຄວາມສຳເລັດທາງວິທະຍາສາດ ເຕັກໂນໂລຊີ ເພື່ອສ້າງເປັນຄຸນນະພາບໃໝ່ ຄຸນຄ່າໃໝ່ໃນການພັດທະນາເສດຖະກິດ - ສັງຄົມເວົ້າລວມ, ໃນບັນດາຜະລິດຕະພັນສິນຄ້າເວົ້າສະເພາະ. ການພັດທະນາລະບົບການປ່ຽນແປງໃໝ່ປະດິດສ້າງແຫ່ງຊາດ, ຍົກສູງ ດັດຊະນີການປ່ຽນແປງໃໝ່ປະດິດສ້າງ ແມ່ນວຽກງານທີ່ດຶງດູດຄວາມມານະພະຍາຍາມຂອງປະເທດຕ່າງໆ ແລະຊຸມຊົນແຮງງານສ້າງສັນທົ່ວໂລກ.

3- ດ້ວຍຈິນຕະນາການທີ່ສ້ຽມແຫຼມ, ໃນຊຸມປີທີ່ຜ່ານາ, ພັກແລະລັດຫວຽດນາມ ໄດ້ນຳພາ ຊີ້ນຳບັນດາຂັ້ນ ຂະແໜງການຕ່າງໆ ໃນການຍູ້ແຮງການນຳໃຊ້ແລະພັດທະນາວິທະຍາສາດ, ເຕັກໂນໂລຊີ ແລະ ການປ່ຽນແປງໃໝ່ປະດິດສ້າງ, ຄົ້ນຄວ້າເພື່ອກຳແໜ້ນແລະຍົກສູງຄວາມສາມາດໃນການເຂົ້າເຖິງແລະເປັນເຈົ້າການເຂົ້າຮ່ວມການປະຕິວັດອຸດສາຫະກຳຄັ້ງທີສີ່. ພິເສດ, ໃນວັນທີ 27 ກັນຍາ 2019, ກົມການເມືອງສູນກາງພັກກອມມູນິດຫວຽດນາມ ໄດ້ປະກາດໃຊ້ມະຕິເລກທີ 52-NQ/TW “ກ່ຽວກັບບາງແຜນນະໂຍບາຍ, ນະໂຍບາຍເພື່ອເຂົ້າຮ່ວມຢ່າງຕັ້ງໜ້າໃນການປະຕິວັດອຸດສາຫະ ກຳຄັ້ງທີ 4”. ມະຕິກຳນົດທັດສະນະຊີ້ນຳ 4 ຂໍ້ ເຊິ່ງເນັ້ນໜັກວ່າ: “ເປັນເຈົ້າການ, ຕັ້ງໜ້າເຂົ້າຮ່ວມການປະຕິວັດອຸດສາຫະກຳຄັ້ງທີສີ່ ແມ່ນຄວາມຕ້ອງການທີ່ຈຳເປັນພາວະວິໄສ; ເປັນໜ້າທີ່ທີ່ມີຄວາມໝາຍຍຸດທະສາດສຳຄັນພິເສດ, ທັງຮີບດ່ວນທັງຍາວນານ ຂອງລະບົບການເມືອງທັງໝົດແລະທົ່ວສັງຄົມ..., ຖືວ່າ ນີ້ແມ່ນວິທີການແກ້ໄຂບຸກທະລຸ ດ້ວຍບາດກ້າວແລະຂັ້ນຕອນທີ່ເໝາະສົມ ເປັນໂອກາດເພື່ອໃຫ້ຫວຽດນາມມີການກະໂດດຂັ້ນໃນການພັດທະນາເສດຖະກິດ - ສັງຄົມ”; “ການປະຕິວັດອຸສາຫະກຳຄັ້ງທີສີ່ຮຽກຮ້ອງໃຫ້ມີການຄົ້ນຄິດໃໝ່ ກ່ຽວກັບການຄຸ້ມຄອງເສດຖະກິດ, ການຄຸ້ມຄອງສັງຄົມ, ການສ້າງແລະປັບປຸງບູລະນະສະຖາບັນໃຫ້ເໝາະສົມ. ຈຳເປັນຕ້ອງມີວິທີການທີ່ເປີດກວ້າງແລະມີຫົວຄິດປະດິດສ້າງ, ທົດລອງບັນຫາຕົວຈິງ, ສ້າງເງື່ອນໄຂສະດວກໃຫ້ ໃຫ້ແກ່ການປ່ຽນແປງໃໝ່ປະດິດສ້າງ”⁽¹²⁾.

ຈິນຕະນາການທີ່ສ້ຽມແຫຼມ ແລະ ຈິດໃຈຂອງມະຕິເລກທີ 52-NQ/TW ຂອງກົມການເມືອງສູນກາງ ໄດ້ຮັບການຢືນຢັນແລະຍົກສູງ ໃນຮ່າງເອກະສານຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ແລະ ການປ່ຽນແປງໃໝ່ປະດິດສ້າງ ສາມາດຖືເປັນຈຸດເດັ່ນຂອງກອງປະຊຸມໃຫຍ່.

4- ຕ້ອງເຂົ້າໃຈຢ່າງຖືກຕ້ອງກ່ຽວກັບການປ່ຽນແປງໃໝ່ປະດິດສ້າງ ເພື່ອເປັນເອກະພາບໃນການຮັບຮູ້ແລະປະຕິບັດໃນທົ່ວພັກ, ທົ່ວສັງຄົມ.

ການປ່ຽນແປງໃໝ່ປະດິດສ້າງ ດ້ວຍປັດຊະຍາທີ່ວ່າ ບໍ່ມີຫຍັງທີ່ເປັນໄປບໍ່ໄດ້ ແມ່ນຄຸນລັກສະນະສຳຄັນຂອງການປະຕິວັດອຸດສາຫະກຳຄັ້ງທີສີ່, ສ່ອງແສງຈິນຕະນາການ ແລະ ວິທີການພັດທະນາໃໝ່ ມີລັກສະນະທົ່ວໄປຂອງມວນມະນຸດ. ຫວຽດນາມເຊື່ອມໂຍງເຂົ້າກັບສາກົນ ນັບມື້ນັບກວ້າງຂວາງເລິກເຊິ່ງ ໂດຍກົງ, ດັ່ງນັ້ນ ພວກເຮົາຈຳເປັນຕ້ອງເຂົ້າຫາແລະດູດຊືມເອົາສິ່ງທີ່ດີງາມໃນວັດທະນະທຳມະນຸດ, ຄຸນຄ່າທາງປັນຍາໃໝ່ ແລະປະສົບການແຫ່ງຄວາມສຳເລັດຂອງໂລກ ເພື່ອກ້າວໜ້າໄປຕາມກາລະເວລາ. ຍິ່ງໄປກວ່ານັ້ນ, ການປ່ຽນແປງໃໝ່ປະດິດສ້າງ ແມ່ນການພັດທະນາທີ່ຖືກກັບກົດເກນໃນລະດັບສູງໃໝ່, ລະດັບຄວາມຮູ້ໃໝ່ທີ່ໄດ້ເຄີຍມີຂອງພັກ, ປະຊາຊົນ ຫວຽດນາມນັ້ນເອງ ໃນສາມທົດສະວັດກວ່າທີ່ຜ່ານມາ; ເປັນກຳລັງໜູນເພື່ອສືບຕໍ່ຍູ້ແຮງ ພາລະກິດການປ່ຽນແປງໃໝ່ຢ່າງຮອບດ້ານແລະຄົບຊຸດ ເພື່ອຕອບສະໜອງການກໍ່ສ້າງປະເທດໃນໄລຍະໃໝ່. ປະທານໂຮ່ຈິມິນແມ່ນຕົວແທນຂອງການປ່ຽນແປງໃໝ່ແລະຄວາມຄິດປະດິດສ້າງ. ເວລາຍັງຊີວິດຢູ່, ເພິ່ນເຄີຍຕັກເຕືອນວ່າ: ໂລກກຳລັງປ່ຽນແປງໃໝ່ໃນທຸກມື້, ສັງຄົມນັບມື້ນັບພັດທະນາ, ປະຊາຊົນນັບມື້ນັບຈະໄດ້ຮັບຄວາມກ້າວໜ້າ, ດັ່ງນັ້ນ ພະນັກງານ, ສະມາຊິກພັກຈຶ່ງບໍ່ສາມາດ “ຮັກສາເຫຼັກໜີບເຈ້ຍເກົ່າທີ່ບໍ່ມີການປ່ຽນແປງ”⁽¹³⁾, ເຊິ່ງແນວຄິດແລະການປະຕິບັດກໍ່ຕ້ອງມີການພັດທະນາ.

ການປ່ຽນແປງໃໝ່ປະດິດສ້າງ ຕ້ອງດຳເນີນການຢ່າງຄວບຄູ່ຄົບຊຸດ ທັງດ້ານຈິນຕະນາການແລະການປະຕິບັດ, ຕ້ອງ “ປ່ຽນແປງວິທີການນຶກຄິດ, ວິທີການປະຕິບັດ, ປ່ຽນແປງໃໝ່ດ້ານຈິນຕະນາການ, ເປັນຕົ້ນແມ່ນຈິນຕະນາການດ້ານເສດຖະກິດ, ປ່ຽນແປງໃໝ່ແບບແຜນການເຮັດວຽກ, ປ່ຽນແປງໃໝ່ການຈັດຕັ້ງ ແລະ ພະນັກງານ”⁽¹⁴⁾.

ພາລະກິດການປ່ຽນແປງໃໝ່ຢູ່ຫວຽດນາມ ໄດ້ເລີ່ມຕົ້ນແຕ່ການປ່ຽນແປງໃໝ່ດ້ານຈິນຕະນາການ ຂອງພັກກອມມູນິດຫວຽດນາມ, ກ່ອນອື່ນໝົດແມ່ນຈິນຕະນາການດ້ານເສດຖະກິດ, ຕາມຫຼັກການເຄົາລົບ ແລະ ປະຕິບັດຕາມກົດເກນພາວະວິໄສ. ໃນສະພາບການຂອງໂລກປັດຈຸບັນ, ມີບັນຫາທາງທິດສະດີແລະພາກປະຕິບັດໃໝ່ຫຼາຍຢ່າງ, ເຊິ່ງຮຽກຮ້ອງໃຫ້ພັກຕ້ອງສືບຕໍ່ປ່ຽນແປງໃໝ່ຈິນຕະນາການ, ຍົກລະດັບທາງປັນຍາແລະນຳປະເທດກ້າວຂຶ້ນໃຫ້ທ່ວງທັນ ແລະ ໄປພ້ອມກັນກັບຍຸກສະໄໝ. ປະທານໂຮ່ຈີມິນເປັນແວ່ນແຍງອັນໃສແຈ້ງ ໂດດເດັ່ນກ່ຽວກັບແບບແຜນຈິນຕະນາການປ່ຽນແປງໃໝ່: ອ່ອນໄຫວໃນການກຳການພັດທະນາປະຫວັດສາດ, ກຳແໜ້ນໂອກາດຢ່າງຈິງຈັງ, ຍຶດໝັ້ນຫຼັກການແລະກ້າປະດິດສ້າງ, ປ່ຽນແປງໃໝ່ຢ່າງທັນການ, ເຊື່ອມໂຍງທິດສະດີກັບພຶດຕິກຳ⁽¹⁵⁾. ການປ່ຽນແປງໃໝ່ປະດິດສ້າງ ທາງດ້ານຈິນຕະນາການຕ້ອງກຳແໜ້ນ ແລະແກ້ໄຂໃຫ້ດີ ການພົວພັນລະຫວ່າງ “ຍືດໝັ້ນແລະປ່ຽນແປງໃໝ່, ໝູນໃຊ້ຢ່າງປະດິດສ້າງ” ຕາມວິທີສັດຈະວິພາກຂອງລັດທິມາກ-ເລນິນ ແລະ ແນວຄິດໂຮ່ຈິມິນ. ການຍຶດໝັ້ນຕ້ອງຕິດແໜ້ນກັບການປະດິດສ້າງ ແລະການປະດິດສ້າງຕ້ອງບົນພື້ນຖານຂອງການຍຶດໝັ້ນ, ສອດຄ່ອງກັບພຶດຕິກຳ, ກັບຄວາມຕ້ອງການປ່ຽນແປງໃໝ່, ການເຊື່ອມໂຍງແລະພັດທະນາປະເທດ. ການຍືດໝັ້ນແບບກົນຈັກຕາຍຕົວ ກໍ່ງ່າຍທີ່ຈະພາໄປເຖິງຄຳພີ, ແຂງກະດ້າງ, ອະນຸລັກນິຍົມ, ຄວາມຫຼ້າຊ້າ, ແຕ່ຖ້າບໍ່ຍືດໝັ້ນ, ມີແຕ່ດຳເນີນການປະດິດສ້າງແບບບໍ່ມີຫຼັກການ ກໍ່ງ່າຍທີ່ຈະຕົກໃສ່ລັດທິແກ້, ຜີກຈາກທິດທາງທີ່ໄດ້ວາງໄວ້, “ປ່ຽນສີ”⁽¹⁶⁾.

ໃນພາກປະຕິບັດ, ການປ່ຽນແປງໃໝ່ປະດິດສ້າງ ຕ້ອງໄດ້ຜັນຂະຫຍາຍຢ່າງຮອບດ້ານໃນບັນດາຂົງເຂດ ດ້ວຍຫຼາຍມາດຕະການທີ່ຄົບຊຸດ, ມີຈຸດສຸມໃຈກາງ ແລະ ດ້ວຍລຳດັບການດຳເນີນງານ ບາດກ້າວທີ່ໄດ້ຄິດໄລ່ຢ່າງທີ່ຖ້ວນ, ວິທະຍາສາດ, ເໝາະສົມກັບເງື່ອນໄຂຕົວຈິງຂອງປະເທດ, ຫຼີກລ່ຽງຄວາມຮ້ອນຮົນ, ເຈດຈຳນົງນິຍົມ ທີ່ນຳໄປສູ່ການຜະຈົນໄພ, ຄວາມສ່ຽງ ຫຼືຄວາມເມີນເສີຍ, ຄວາມລັ່ງເລ, ຢ້ານຄວາມຫຍຸ້ງຍາກ ຢ້ານຄວາມທຸກຍາກ, ເກີດຄວາມຫຼ້າຊ້າ, ພາດໂອກາດໃນການພັດທະນາ. ຕ້ອງເອົາໃຈໃສ່ກໍ່ສ້າງສະພາບແວດລ້ອມຂອງສະຖາບັນກົດໝາຍທີ່ເອື້ອອຳນວຍ; ສຸມໃສ່ການພັດທະນາແຫຼ່ງບຸກຄະລາກອນທີ່ມີຄຸນນະພາບສູງ. ຍູ້ແຮງການຄົ້ນຄວ້າ, ການຖ່າຍໂອນ ແລະ ການປະຢຸກໃຊ້ວິທະຍາສາດແລະເຕັກໂນໂລຊີ; ສົ່ງເສີມການພັດທະນາໂຄງສ້າງພື້ນຖານຂໍ້ມູນຂ່າວສານ, ໂທລະຄັມມະນາຄົມ..., ສ້າງບັນດາປະຖົມປັດໄຈທີ່ຈຳເປັນ ເພື່ອປະຕິບັດ ການປ່ຽນແປງໃໝ່ປະດິດສ້າງ ຢ່າງມີປະສິດທິຜົນ. ບຸລິມະສິດຊຸກຍູ້ ການປ່ຽນແປງໃໝ່ປະດິດສ້າງ ໃນການພັດທະນາເຕັກໂນໂລຊີດິຈິຕອນ, ປະຕິບັດການປ່ຽນດິຈິຕອນໃນບັນດາຂົງເຂດເສດຖະກິດ, ສັງຄົມ, ການຄຸ້ມຄອງ..., ກໍ່ສ້າງເສດຖະກິດດິຈິຕອນ, ສັງຄົມດິຈິຕອນ, ລັດຖະບານດິຈິຕອນ, ສ້າງຄຸນຄ່າໃໝ່ແລະກຳລັງແຮງສັງລວມໃໝ່ ຂອງປະເທດ. ເຄື່ອງວັດແທກຄວາມສົມເຫດສົມຜົນຂອງການປ່ຽນແປງໃໝ່ປະດິດສ້າງ ແມ່ນປະສິດທິຜົນຂອງການຮັບໃຊ້ປະເທດຊາດແລະປະຊາຊົນ ຕາມສັດຈະທຳໂຮ່ຈິມິນ ທີ່ວ່າ: ສັດຈະທຳ ແມ່ນສິ່ງທີ່ເປັນປະໂຫຍດຕໍ່ປະເທດແລະປະຊາຊົນ. ສິ່ງໃດທີ່ຂັດຕໍ່ຜົນປະໂຫຍຂອງປະເທດຊາດແລະປະຊາຊົນບໍ່ແມ່ນສັດຈະທຳ”⁽¹⁷⁾.

ການປ່ຽນແປງໃໝ່ປະດິດສ້າງ ແມ່ນພາລະກິດຂອງທົ່ວພັກ, ທົ່ວປວງຊົນ, ໃນນັ້ນມີຖັນແຖວພະນັກງານ ສະມາຊິກພັກ, ພິເສດແມ່ນຖັນແຖວພະນັກງານຂັ້ນຍຸດທະສາດ, ບັນດາຫົວໜ້າຄະນະພັກ, ອຳນາດການປົກຄອງຂັ້ນຕ່າງໆ, ຕ້ອງເປັນຜູ້ນຳໜ້າ, ຜູ້ເປັນແບບຢ່າງທີ່ສົດໃສ, ກ້າຄິດ, ກ້າເຮັດ, ກ້າທີ່ຈະສ້າງສັນສິ່ງໃໝ່ໆ ເພື່ອພາລະກິດລວມ; ຖັນແຖວປັນຍາຊົນ, ນັກທຸລະກິດທີ່ມີບົດບາດສຳຄັນໃນການເລິ່ມຕົ້ນທຸລະກິດ ແລະປ່ຽນແປງໃໝ່ປະດິດສ້າງທາງທຸລະກິດ; ປຸກລະດົມ, ສົ່ງເສີມບົດບາດເຈົ້າຂອງ ແລະຄວາມຄິດສ້າງສັນທີ່ຍິ່ງໃຫຍ່ຂອງປະຊາຊົນ; ແລະດ້ວຍເຫດນັ້ນ, ສ້າງລະບົບນິເວດເລີ່ມຕົ້ນການປ່ຽນແປງໃໝ່ປະດິດສ້າງຫວຽດນາມ.

ດ້ວຍຄວາມປາດຖະໜາທີ່ຈະສ້າງປະເທດຫວຽດນາມທີ່ຈະເລີນຮຸ່ງເຮືອງແລະມີຄວາມສຸກ ດ້ວຍກຳລັງຂັບເຄື່ອນຂອງການປ່ຽນແປງໃໝ່ປະດິດສ້າງ, ຫວຽດນາມຈະ “ກ້າວສູ່ຫໍຄອຍທີ່ສະຫງ່າງາມ ເພື່ອຄຽງບ່າຄຽງໄຫຼ່ກັບບັນດາປະເທດມະຫາອຳນາດໃນໂລກ”⁽¹⁸⁾ ຢ່າງແນ່ນອນ ໃນສະຕະວັດທີ 21, ຄືຄວາມປາດຖະໜາຂອງປະທານໂຮ່ຈິມິນຜູ້ຍິ່ງໃຫຍ່ ແລະ ຄວາມປາດຖະໜາອັນແຮງກ້າຂອງທັງປະເທດຫວຽດນາມ./.

---------------------

(1) ເບິ່ງ ຫງວຽນຟູຈ້ອງ: “ການກະກຽມແລະດຳເນີນຢ່າງດີ ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫງຽດນາມ, ນຳປະເທດກ້າວເຂົ້າສູ່ໄລຍະໃໝ່ແຫ່ງການພັດທະນາ” ວາລະສານກອມມູນິດ, ສະບັບເລກທີ 949 (ເດືອນກັນຍາ 2020) ໜ້າ 10 - 11.

(2) ສະຖາບັນພາສາ: ວັດຈະນານຸກົມຫວຽດນາມ, ສພຈ. ດ່າໜັງ, 2006, ໜ້າທີ 493.

(3) Keith D. Harrell: ຂອບໃຈຊີວິດ, ສພຈ. ສັງລວມ ນະຄອນໂຮ່ຈີມິນ, 2015; ການປ່ຽນແປງທັດສະນະຄະຕິ - ການປ່ຽນແປງຊີວິດ, ສພຈ. ສັງລວມ ນະຄອນໂຮ່ຈີມິນ, 2016, ໜ້າ 2, 3.

(4) ເບິ່ງ: ຫວູມິນເຄືອງ: “ຫວຽດນາມປີ 2045: ວິໄສທັດຄວາມປາດຖະໜາ ແລະ ພາລະກຳປະຫວັດສາດ” ວາລະສານວິທະຍາສາດແລະເຕັກໂນໂລຊີຫວຽດນາມ ອອນໄລ, ສະບັບລົງວັນທີ 17 ມັງກອນ 2020; “ຄວາມປາດຖະໜາໃນການປ່ຽນແປງໃໝ່ເພື່ອການພັດທະນາ", baodauthau.vn, ວັນທີ 12 ກຸມພາ 2018.

(5) ໂຮ່ຈີມິນ. ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2001, ເຫຼັ້ມ 4, ໜ້າ 534.

(6) ໂຮ່ຈີມິນ. ນິພົນຄົບຊຸດ, ປື້ມທີ່ໄດ້ແນະນຳ, ເຫຼັ້ມ 15, ໜ້າ 131.

(7) ໂຮ່ຈິີມິນ. ນິພົນຄົບຊຸດ, ປື້ມທີ່ໄດ້ແນະນຳ, ເຫຼັ້ມ 4, ໜ້າ 280.

(8) ເບິ່ງ ຫງວຽນຝູຈ້ອງ: “ການກະກຽມແລະດຳເນີນຢ່າງດີ ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫງຽດນາມ, ນຳປະເທດກ້າວເຂົ້າສູ່ໄລຍະໃໝ່ແຫ່ງການພັດທະນາ”, ເອກະສານທີ່ໄດ້ແນະນຳ, ໜ້າ 11.

(9) ເບິ່ງ: ພັກກອມມູນິດຫວຽດນາມ, ຮ່າງເອກະສານທີ່ຍື່ນສະເໜີຕໍ່ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫວຽດນາມ (ເອກະສານນຳໃຊ້ທີ່ກອງປະຊຸມໃຫຍ່ຂັ້ນເມືອງ, ແຂວງແລະອົງການທຽບເທົ່າ) ເດືອນເມສາ 2020.

(10) ເບິ່ງ ເອກະສານຄົບຊຸດຂອງພັກ, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2004, ເຫຼັ້ມ 7, ໜ້າ 504 - 505.

(11) ເບິ່ງ: ຫງວຽນຖັງ: ການປະຕິວັດອຸດສາຫະກຳຄັ້ງທີ 4: ບາງຄຸນລັກສະນະ, ຜົນກະທົບແລະຄວາມໝາຍດ້ານນະໂຍບາຍ ສຳລັບຫວຽດນາມ, ໜ້າອອນໄລທາງການທູດເສດຖະກິດ, http://ngkt.mofa.gov.vn/cmcn4-mot-so-dac-trung-tac-dong-va-ham-y-chinh-sach-cho-viet-nam/, ວັນທີ 13 ທັນວາ 2016.

(12) ມະຕິເລກທີ 52-NQ/TW, ລົງວັນທີ 27 ກັນຍາ 2019, ຂອງກົມການເມືອງສູນກາງພັກ, “ກ່ຽວກັບບາງແຜນນະໂຍບາຍ, ນະໂຍບາຍເປັນເຈົ້າການເຂົ້າຮ່ວມການປະຕິວັດອຸດສາຫະກຳຄັ້ງທີສີ່”.

(13) ໂຮ່ຈີມິນ: ນິພົນຄົບຊຸດ, ປື້ມທີ່ໄດ້ແນະນຳ, ເຫຼັ້ມ 8, ໜ້າ 55.

(14) ເບິ່ງ: ເຈື່ອງຈິງ: ການປ່ຽນແປງໃໝ່ແມ່ນຄວາມຮຽກຮ້ອງຕ້ອງການອັນຮີບດ່ວນຂອງປະເທດ, ຂອງຍຸກສະໄໝ, ສພຈ. ການເມືອງແຫ່ງຊາດ, ຮ່າໂນ້ຍ, 1987, ໜ້າ 66.

(15) ເບິ່ງ: ຟ້າມວັນດົ່ງ: ໂຮ່ຈີມິນ - ແກ່ນສານແລະຄວາມກ້າຫານຂອງປະເທດຊາດ, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2009, ໜ້າ 219.

(16) ເບິ່ງ ຫງວຽນຝູຈ້ອງ: “ການກະກຽມແລະດຳເນີນຢ່າງດີ ກອງປະຊຸມໃຫຍ່ຄັ້ງທີ 13 ຂອງພັກກອມມູນິດຫງຽດນາມ, ນຳປະເທດກ້າວເຂົ້າສູ່ໄລຍະໃໝ່ແຫ່ງການພັດທະນາ”, ເອກະສານທີ່ໄດ້ແນະນຳ, ໜ້າ 8.

(17) ໂຮ່ຈີມິນ: ນິພົນຄົບຊຸດ, ປື້ມທີ່ໄດ້ແນະນຳ, ເຫຼັ້ມ 10, ໜ້າ 378.

(18) ໂຮ່ຈີມິນ: ນິພົນຄົບຊຸດ, ປື້ມທີ່ໄດ້ແນະນຳ, ເຫຼັ້ມ 4, ໜ້າ 35.

- ບົດນີ້ໄດ້ລົງພິມໃນວາລະສານກອມມູນິດສະບັບທີ 953 (ເດືອນພະຈິກ 2020)

ຄວາມເປັນຈິງທີ່ມີຊີວິດຊີວາແລະທິດສະດີທີ່ສ່ອງແສງສົດໃສ ໃນນິພົນຂອງສະຫາຍເລຂາທິການໃຫຍ່ ຫງວຽນຝູຈ້ອງ

ອີງໃສ່ປະຊາຊົນເພື່ອກໍ່ສ້າງ ແລະ ປັບປຸງພັກ ຕາມຈິດໃຈຂອງກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ

ສຸມໃສ່ຄົ້ນຄວ້າ, ພັດທະນາ ແລະ ປັບປຸງບູລະນະທິດສະດີກ່ຽວກັບການປົກປັກຮັກສາຄວາມໝັ້ນຄົງຂອງຊາດໃນໄລຍະໃໝ່