ພັດທະນາສາຍພົວພັນມິດຕະພາບ ແລະການຮ່ວມມື ຫວຽດນາມ - ອີຣານ
ວກ.ອອນໄລ - ຕອບສະໜອງຕາມຄຳເຊີນຂອງທ່ານນາງ ຫງວຽນທິກີມເງິນ ປະທານສະພາແຫ່ງຊາດ ແຫ່ງສາທາລະນະລັດສັງຄົມນິຍົມຫວຽດນາມ, ຄະນະຜູ້ແທນຂັ້ນສູງສະພາແຫ່ງຊາດ ແຫ່ງສາທາລະນະລັດອິດສະລາມອີຣານ ນຳໂດຍທ່ານ ອາລີ ອາກເດຊີ ລາຣີຈານີ, ປະທານສະພາແຫ່ງຊາດອີຣານ ໄດ້ດຳເນີນການຢ້ຽມຢາມປະເທດຫວຽດນາມຢ່າງເປັນທາງການ ໃນລະຫວ່າງວັນທີ 15 - 18 ເມສາ 2018.
ໃນຂອບຂອງການຢ້ຽມຢາມ, ທ່ານ ອາລີ ອາກເດຊີ ລາຣີຈານີ ປະທານສະພາແຫ່ງຊາດແຫ່ງສາທາລະນະລັດອິດສະລາມອີຣານ ໄດ້ພົບປະເຈລະຈາກັບທ່ານນາງ ຫງວຽນທິກີມເງິນ ປະທານສະພາແຫ່ງຊາດຫວຽດນາມ; ຢ້ຽມຄຳນັບທ່ານເລຂາທິການໃຫຍ່ ຫງວຽນຝູຈ້ອງ, ນາຍົກລັດຖະມົນຕີ ຫງວຽຊວັນຝຸກ; ພົບປະກັບທ່ານເລຂາທິການຄະນະພັກນະຄອນໂຮ່ຈີມິນ ຫງວຽນທ້ຽນເຍິນ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ເຈິ່ນແທັງເໝິນ; ຕ້ອນຮັບການນຳຂອງສະມາຄົມມິດຕະພາບ ຫວຽດນາມ - ອີຣານ; ເຂົ້າຮ່ວມເວທີປາໄສການທຸລະກິດຫວຽດນາມ - ອີຣານ. ເນື່ອງໃນໂອກາດນີ້, ຄະນະໄດ້ໄປວາງພວງມາລາໄຫວ້ອາໄລທີ່ອະນຸສາວະລີຫໍສົບປະທານໂຮ່ຈີມິນ, ຢ້ຽມຊົມເຮືອນຂອງລຸງໂຮ່ ແລະ ບູຮານສະຖານປະຫວັດສາດ ວັດທະນະທຳບາງແຫ່ງຂອງຫວຽດນາມ.
ຜ່ານການພົບປະເຈລະຈາ ການແລກປ່ຽນ, ຫວຽດນາມໄດ້ສະແດງຄວາມຊົມເຊີຍຕໍ່ລັດຖະບານ ແລະປະຊາຊົນອີຣານ ທີ່ໄດ້ແລະພວມບັນລຸຜົນສຳເລັດອັນໄຫຍ່ຫຼວງຫຼາຍຢ່າງ, ຮັກສາໄດ້ຄວາມໝັ້ນຄົງທາງການເມືອງ ສັງຄົມ, ບັນລຸການຜັນປ່ຽນທາງບວກຕ່າງໆກ່ຽວກັບເສດຖະກິດ ແລະຖານະຕຳແໜ່ງຂອງອີຣານຢູ່ພາກພື້ນ ແລະໃນໂລກ. ຫວຽດນາມແບ່ງປັນກັບຄວາມຫຍຸ້ງຍາກຂອງປະຊາຊົນອີຣານ ຍ້ອນການກະທົບຂອງສະພາບການຜັນປ່ຽນຢູ່ພາກພື້ນຕາເວັນອອກກາງ ແລະ ຄວາມຫຍຸ້ງຍາກຕ່າງໆ ເນື່ອງຈາກການຄວ້ຳບາດທາງເສດຖະກິດ, ຫວຽດນາມສະແດງຄວາມຊົມເຊີຍຕໍ່ສັນຍານີວເຄຼຍທີ່ມີຊື່ ແຜນປະຕິບັດການຮ່ວມກັນຢ່າງຮອບດ້ານ (JCPOA) ໄດ້ຮັບການປະຕິບັດເທື່ອລະກ້າວຢ່າງມີປະສິດທິຜົນ, ສ້າງເງື່ອນໄຂອຳນວຍຄວາມສະດວກໃຫ້ອີຣານພັດທະນາເສດຖະກິດ-ສັງຄົມ.
ທ່ານປະທານສະພາແຫ່ງຊາດອີຣານ ອາລີ ອາກເດຊີ ລາຣີຈານີ ສະແດງຄວາມດີໃຈແລະພາກພູມໃຈກ່ຽວກັບບັນດາຜົນສຳເລັດທາງດ້ານເສດຖະກດິ-ສັງຄົມທີ່ຫວຽດນາມຍາດໄດ້. ສະແດງຄວາມຊົມເຊີຍຕໍ່ສະພາແຫ່ງຊາດຫວຽດນາມທີ່ໄດ້ຈັດຕັ້ງຢ່າງສຳເລັດຜົນ ກອງປະຊຸມປະຈຳປີຄັ້ງທີ 26 ຂອງເວທີປາໄສລັດຖະສະພາອາຊີ-ປາຊີຟິກ (APPF-26), ທ່ານປະທານສະພາແຫ່ງຊາດອີຣານໃຫ້ທັດສະນະວ່າ, ການຢ້ຽມຢາມປະເທດຫວຽດນາມຢ່າງເປັນທາງການຄັ້ງນີ້ ເປັນພື້ນຖານເພື່ອຊຸກຍູ້ການພົວພັນລັດຖະສະພາ ລະຫວ່າງສອງປະເທດ. ສອງຝ່າຍເຫັນດີເປັນເອກະສັນຈະເພີ່ມທະວີການແລກປ່ຽນຄະນະຜູ້ແທນຂັ້ນຕ່າງໆ, ພິເສດແມ່ນຄະນະຜູ້ແທນຂັ້ນສູງ; ສືບຕໍ່ປະສານສົມທົບກັນຢ່າງແໜ້ນແຟ້ນກວ່າອີກຢູ່ໃນບັນດາເວທີປາໄສພາກພື້ນ ແລະສາກົນ. ຫວຽດນາມຫວັງວ່າ ໃນໄວໆນີ້ຈະໄດ້ຮັບຈົດໝາຍທາງການທູດຂອງອີຣານ ກ່ຽວກັບການສະໜັບສະໜູນຫວຽດນາມອອກສະໝັກຮັບເລືອກເຂົ້າສະພາຄວາມໝັ້ນຄົງແຫ່ງສະຫະປະຊາຊາດ ວາລະ 2020 - 2021. ກ່ຽວກັບການຮ່ວມມືລະຫວ່າງສອງປະພາແຫ່ງຊາດ, ສອງຝ່າຍເຫັນດີເປັນເອກະສັນຈະຊຸກຍູ້ການເຄື່ອນໄຫວແລກປ່ຽນຄະນະຜູ້ແທນນຳກັນ, ພິເສດແມ່ນ ລະຫວ່າງຄະນະກຳມະການວິຊາສະເພາະ ເພື່ອແນໃສ່ແບ່ງປັນບົດຮຽນປະສົບການກ່ຽວກັບການສ້າງກົດໝາຍ ແລະການຕິດຕາມກວດກາ.
ປະເມີນການຄ້າ, ມູນຄ່າການຄ້າສອງສົ້ນຫວຽດນາມ-ອີຣານໃນປີ 2017 ເຖິງວ່າບັນລຸໄດ້ 164,6 ລ້ານໂດລາສະຫະລັດ, ເພີ່ມຂຶ້ນ 41% ທຽບກັບປີ 2016 ກໍ່ຕ້າມ ແຕ່ກໍ່ບໍ່ສ່ອງແສງຖືກຕ້ອງຕາມຄວາມສາມາດບົ່ມຊ້ອນອັນໃຫຍ່ຫຼວງຂອງສອງປະເທດ, ສອງຝ່າຍຈະສູ້ຊົນເພື່ອບັນລຸເປົ້າໝາຍຍົກມູນຄ່າການຄ້າສອງຝ່າຍຂຶ້ນເປັນ 2 ຕື້ໂດລາສະຫະລັດໃນຊຸມປີຈະເຖິງນີ້ ໂດຍຜ່ານມາດຕະການບຸລິມະສິດການແລກປ່ຽນສິນຄ້າປະເພດຕ່າງໆ ທີ່ແຕ່ລະຝ່າຍມີທ່າແຮງ, ແກ້ໄຂບັນຫາການຊຳລະເງິນໂດຍໄວ ເພື່ອຊ່ວຍໜູນໃຫ້ແກ່ການແລກປ່ຽນການຄ້າ, ສົ່ງເສີມແລະເພີ່ມທະວີການເຄື່ອນໄຫວຂອງວິສາຫະກິດ ຂອງສອງປະເທດ ໃນການຄົ້ນຄວາຕະຫຼາດ, ດຳເນີນການຄ້າ ການລົງທຶນ.
ໂດຍເນັ້ນວ່າ ເຕັກໂນໂລຊີຂໍ້ມູນຂ່າວສານແລະການສື່ສານໂທລະຄົມມະນາຄົມ ມີຄວາມສາມາດຮ່ວມມືທີ່ໃຫຍ່ຫຼວງ, ຫວຽດນາມມີຄວາມປະສົງຈະຊຸກຍູ້ການຮ່ວມມືໃນຂົງເຂດນີ້ ໃຫ້ກາຍເປັນຂອດບຸກທະລຸໃນການຮ່ວມມືສອງຝ່າຍ, ຜ່ານນັ້ນ ຍູ້ແຮງການຮ່ວມມືໃນບັນດາຂົງເຂດອື່ນ.
ກ່ຽວກັບການຮ່ວມມືທາງດ້ານວັດທະນະທຳ-ການສຶກສາ, ອີຣານພ້ອມແລ້ວທີ່ຈະຊ່ວຍເຫຼືອແລະສະໜອງທຶນສຶກສາໃຫ້ນັກສຶກສາຫວຽດນາມມາຮຽນພາສາເປີເຊຍ ແລະຂະແໜງວິຊາສະເພາະອື່ນ; ສືບຕໍ່ໂຄງການແລກປ່ຽນຄູອາຈານ ແລະນັກຮຽນ ລະຫວ່າງບັນດາມະຫາວິທະຍາໄລຂອງສອງປະເທດ; ຍູ້ແຮງການຮ່ວມມືໃນຂົງເຂດວັດທະນະທຳ, ທ່ອງທ່ຽວ, ຈັດຕັ້ງບັນດາເຫດການຄື: ຈັດງານວາງສະແດງຮູບພາບຮູບແຕ້ມ, ສາຍຟີມຮູບເລົາ, ສະແດງດົນຕີ, ຈັດວັນວັດທະນະທຳອີຣານຢູ່ຫວຽດນາມ, ຈັດວັນວັດທະນະທຳຫວຽດນາມຢູ່ອີຣານ…
ສອງຝ່າຍເຫັນດີເປັນເອກະສັນວ່າ, ໃນເວລາທີ່ຈະເຖິງ, ຈະເພີ່ມທະວີບົດບາດຕິດຕາມກວດກາ ແລະຊຸກຍູ້ການປະຕິບັດຢ່າງມີປະສິດທິຜົນ ບັນດາສັນຍາ, ຂໍ້ຕົກລົງທີ່ສອງປະເທດໄດ້ລົງນາມ, ໃນນັ້ນມີຂໍ້ຕົກລົງຕ່າງໆ ທີ່ຄະນະກຳມະການລະຫວ່າງລັດຖະບານສອງປະເທດໄດ້ປຶກສາເຈລະຈາ, ເປັນເອກະພາບ. ຕາມນັ້ນ, ສອງຝ່າຍໄດ້ແລກປ່ຽນ ແລະເປັນເອກະພາບກ່ຽວກັບຫຼາຍມາດຕະການເພີ່ມທະວີການຮ່ວມມືໃນບັນດາຂົງເຂດຄື ກະສິກຳ, ສິນໃນນ້ຳ-ອາຫານທະເລ, ພະລັງງານ, ຂຸດຄົ້ນແຮ່ທາດ, ນ້ຳມັນອາຍແກສ, ທະນາຄານ…, ພິເສດແມ່ນ ຂົງເຂດນ້ຳມັນອາຍແກສ, ອີຣານອາດຈະຊ່ວຍໜູນໃຫ້ຫວຽດນາມ, ໃນນັ້ນມີການສະໜອງບັນດາຜະລິດຕະພັນປິໂຕຣເຄມີ, ອາຍແກສແຫຼວ, ຢາງປູທາງ... ອີຣານຫວັງຮ່ຳຮຽນນຳບົດຮຽນໃນຂົງເຂດກະສິກຳຂອງຫວຽດນາມ. ນອກຈາກນັ້ນ, ສອງຝ່າຍຈະຍູ້ແຮງການຮ່ວມມືໃນບັນດາຂົງເຂດທີ່ອີຣານມີຄວາມສາມາດບົ່ງຊ້ອນຄື: ຜະລິດຕະພັນເພສັດຊະກຳ, ອຸປະກອນທາງການແພດ, ເຊື່ອມຕໍ່ທະນາຄານ, ການທ່ອງທ່ຽວ-ວັດທະນະທຳ, ຟີມຮູບເງົາ, ໂທລະພາບ, ແລກປ່ຽນຄູອາຈານ, ນັກຮຽນມະຫະວິທະຍາໄລ…
ການຢ້ຽມຢາມປະເທດຫວຽດນາມຢ່າງເປັນທາງການຂອງທ່ານປະທານສະພາແຫ່ງຊາດແຫ່ງສາທາລະນະລັດອິດສະລາມ ອາລີ ອາກເດຊີ ລາຣີຈານີ ແລະ ຄະນະ ໄດ້ສຳເລັດຜົນຢ່າງຈົບງານ, ປະກອບສ່ວນປັບປຸງ, ພັດທະນາສາຍພົວພັນມິດຕະພາບ, ການຮ່ວມມືລະຫວ່າງປະຊາຊົນສອງປະເທດ./.
ໂດຍ ນຂ.