ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ເຂົ້າຮ່ວມກອງປະຊຸມສຸດຍອດ ACMECS ຄັ້ງທີ 8 ແລະກອງປະຊຸມສຸດຍອດ CLMV ຄັ້ງທີ 9
ກອງປະຊຸມ ACMECS ມີຫົວຂໍ້ “ມຸ່ງໄປສູ່ປະຊາຄົມເສດຖະກິດແມ່ນ້ຳເຢຢາວາດີ-ແມ່ນ້ຳເຈົ້າພະຍາ-ແມ່ນ້ຳຂອງທີ່ຕິດຈອດແລະເຊື່ອມໂຍງ”
ໃນກອງປະຊຸມ, ບັນດາຜູ້ນຳໄດ້ສຸມໃສ່ປຶກສາສົນທະນາກ່ຽວກັບມາດຕະການຕ່າງໆ ເພື່ອຊຸກຍູ້ການພັດທະນາເສດຖະກິດ-ສັງຄົມ, ເພີ່ມທະວີຄວາມສາມາດແຂ່ງຂັນໃຫ້ບັນດາພື້ນຖານເສດຖະກິດສະມາຊິກ ກຳປູເຈຍ, ລາວ, ມຽນມາ, ໄທ, ຫວຽດນາມ ແລະ ກຳນົດທິດທາງການຮ່ວມມືເພື່ອການພັດທະນາແບບລົ້ນຫຼາມແລະຍືນຍົງຂອງພາກພື້ນແມ່ນ້ຳຂອງ. ຄຽງຂ້າງນັ້ນ, ບັນດາຜູ້ນຳໄດ້ປຶກສາຫາລືກ່ຽວກັບການສ້າງຕັ້ງກອງທຶນ ACMECS ແນໃສ່ຊ່ວຍເຫຼືອການຜັນຂະຫຍາຍບັນດາໂຄງການບຸລິມະສິດສະເພາະໜ້າ ຂອງບັນດາປະເທດສະມາຊິກ. ບັນດາຜູ້ນຳໄດ້ຮັບຮອງຜ່ານຖະແຫຼງການບາງກອກ ແລະແຜນການກວມລວມ ACMECS ໄລຍະ 2019 - 2023 ດ້ວຍເປົ້າໝາຍເຮັດໃຫ້ພາກພື້ນ ACMECS ກາຍເປັນສູນກາງທາງເສດຖະກິດທີ່ເຊື່ອມຕໍ່ໄດ້ຢ່າງກົມກຽວ ແລະເຊື່ອມໂຍງຢ່າງແຂງແຮງ. ກອງປະຊຸມໄດ້ເປັນເອກະສັນວ່າ ກຳປູເຈຍ ຈະເປັນປະເທດເຈົ້າພາບຈັດຕັ້ງກອງປະຊຸມສຸດຍອດ ACMECS ຄັ້ງທີ 10 ໃນປີ 2020.
ໃນການປະກອບຄວາມເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຕີລາຄາສູງຕໍ່ຄວາມພະຍາຍາມກໍ່ສ້າງແຜນການກວມລວມ ACMECS ແລະຢືນຢັນວ່າ ຫວຽດນາມຈະສົມທົບກັບບັນດາປະເທດສະມາຊິກ ໃນການສ້າງແຜນການປະຕິບັດງານ ເພື່ອປະຕິບັດບັນດາໂຄງການຮ່ວມມືໃນເວລາໄວທີ່ສຸດ. ໂດຍເນັ້ນເຖິງທັດສະນະສ້າງສຸລະສຽງລວມຂອງບັນດາປະເທດ ACMECS ໃນການຮ່ວມມືກັບບັນດາຄູ່ຮ່ວມມືທີ່ພັດທະນາແລ້ວ ເພື່ອສາມາດ “ເພີ່ມທະວີບົດບາດທີ່ຕັ້ງຂອງພາກພື້ນຂອງພວກເຮົາ, ຮັບປະກັນຜົນປະໂຫຍດທີ່ກົມກຽວ ແລະດີສຸດຂອງບັນດາປະເທດສະມາຊິກ”, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສະເໜີມາດຕະການຈຳນວນໜຶ່ງ ແນໃສ່ຍົກສູງປະສິດທິຜົນຂອງການຮ່ວມມືໃນ ACMECS. ຕາມນັ້ນ, ການຮ່ວມມື ACMECS ຕ້ອງການປະກອບສ່ວນໂດຍກົງກວ່າອີກ ແລະກາຍເປັນພາກສ່ວນໜຶ່ງທີ່ຂາດບໍ່ໄດ້ ໃນຂະບວນວິວັດການສ້າງຕັ້ງປະຊາຄົມ ອາຊຽນ ໂດຍຜ່ານການເຊື່ອມຕໍ່ລະຫວ່າງ ການຜັນຂະຫຍາຍແຜນການກວມລວມ ACMECS ກັບວິໄສທັດປະຊາຄົມ ອາຊຽນ 2025, ແຜນການກວມລວມແລະເຊື່ອມຕໍ່ ອາຊຽນ ແລະບັນດາໂຄງການຮ່ວມມືອື່ນອີກຂອງອາຊຽນ. ຕ້ອງດັດແປງກົນໄກເຄື່ອນໄຫວຂອງ ACMECS ແລະເອົາໃຈໃສ່ເປັນສຳຄັນເຖິງການລະດົມແຫຼ່ງພະລັງການເງິນໃຫ້ແກ່ການຮ່ວມມື ACMECS.
ທ່ານນາຍົກລັດຖະມົນຕີ ຫງວຽນຊວັນຝຸກ ສະເໜີໃຫ້ ACMECS ສຸມໃສ່ພັດທະນາແລວເສດຖະກິດຕາເວັນອອກ-ຕາເວັນຕົກ (EWEC), ແລວເສດຖະກິດທາງທິດໃຕ້ (SEC), ຄົ້ນຄວ້າການກໍ່ສ້າງບາງສາຍທາງບົກໃໝ່ທີ່ເຊື່ອນຕໍ່ພາກພື້ນ, ອຳນວຍຄວາມສະດວກໃຫ້ແກ່ວິສາຫະກິດຂອງບັນດາປະເທດ ACMECS ໃນການລົງທຶນເຂົ້າຕະຫຼາດຂອງກັນແລະກັນ... ທ່ານນາຍົກລັດຖະມົນຕີ ໄດ້ສະເໜີຫຼາຍເນື້ອໃນການຮ່ວມມືໃນບັນດາຂົງເຂດການຄ້າ ແລະການລົງທຶນ, ກະສິກຳ, ການທ່ອງທ່ຽວ, ປົກປັກຮັກສາສະພາບແວດລ້ອມ, ຄຸ້ມຄອງນຳໃຊ້ແຫຼ່ງນ້ຳໃນແມ່ນ້ຳຂອງຢ່າງມີປະສິດທິຜົນ ຍືນຍົງ ແລະຄຸ້ມຄອງບັນດາແຫຼ່ງຊັບພະຍາກອນແຮ່ທາດ ແລະພັດທະນາຊັບພະຍາກອນມະນຸດ; ບັນດາວິທີແກ້ກວມລວມຫຼາຍຂົງເຂດນ້ຳ-ສະບຽງອາຫານ-ພະລັງງານ-ສິ່ງແວດລ້ອມ.
ກອງປະຊຸມສຸດຍອດການຮ່ວມມືລະຫວ່າງກຳປູເຈຍ-ລາວ-ມຽນມາ-ຫວຽດນາມ ຄັ້ງທີ 9 ມີຫົວຂໍ້ “ເພື່ອການເຊື່ອມໂຍງ ແລະເຊື່ອມຕໍ່ທີ່ເລິກເຊິ່ງກວ່າອີກ”
ໃນກອງປະຊຸມ, ບັນດາຜູ້ນຳໄດ້ທົບທວນສະພາບການຮ່ວມມືນັບແຕ່ກອງປະຊຸມສຸດຍອດ CLMV ຄັ້ງທີ 8 (ຢູ່ຮ່າໂນ້ຍ, ເດືອນຕຸລາ 2016) ແລະປຶກສາສົນທະນາທິດທາງແລະມາດຕະການຍົກສູງປະສິດທິຜົນຂອງການຮ່ວມມືໃນໄລຍະທີ່ຈະມາເຖິງ. ບັນດາຜູ້ນຳໄດ້ຮັບຮອງຜ່ານຖະແຫຼງການຮ່ວມຂອງກອງປະຊຸມສຸດຍອດ CLMV ຄັ້ງທີ 9 ແລະເປັນເອກະສັນວ່າ ລາວຈະເປັນເຈົ້າພາບຈັດຕັ້ງກອງປະຊຸມສຸດຍອດ CLMV ຄັ້ງທີ 10 ໃນປີ 2020.
ກ່າວຄວາມເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຊີ້ແຈງສາມປະການທີ່ການຮ່ວມມື CLMV ຕ້ອງເອົາໃຈໃສ່ ເພື່ອບັນລຸເຖິງປະສິດທິຜົນແຫ່ງການເຄື່ອນໄຫວສູງສຸດ ຄື: ການຮ່ວມມື CLMV ຕ້ອງສຸມໃສ່ບັນດາຂົງເຂດຮ່ວມມືທີ່ສອດຄ່ອງກັບທ່າແຮງຂອງກົນໄກຮ່ວມມື ແລະມີຄວາມສາມາດປະຕິບັດໄດ້ດີ, ພິເສດແມ່ນໃນເງື່ອນໄຂແຫຼ່ງພະລັງຖືກຈຳກັດ ແລະທັງສີ່ປະເທດລ້ວນແຕ່ເຂົ້າຮ່ວມໃນຫຼາຍກົນໄກຮ່ວມມືແມ່ນ້ຳຂອງ; ບາງຂົງເຂດຕ້ອງໄດ້ຮັບຄວາມເອົາໃຈໃສ່ເຊັ່ນ ການເຊື່ອມຕໍ່ໂຄງສ້າງພື້ນຖານແບບນຸ່ມນວນ, ກະສິກຳ ແລະການທ່ອງທ່ຽວ, ຝຶກອົບຮົມແຫຼ່ງບຸກຄະລາກອນ ແລະກໍ່ສ້າງສະພາບແວດລ້ອມແຫ່ງການທຸລະກິດທີ່ສະດວກດີ ແລະສະເໝີພາບ. ທີສອງ, ປະດິດສ້າງໃນວິທີລະດົມແຫຼ່ງພະລັງ ແລະກໍ່ສ້າງບັນດາໂຄງການຮ່ວມກັນຂອງຫຼາຍປະຊາຊາດ (ສັບຊ້ອນເນື້ອໃນຂອງ CLMV ເຂົ້າກັບບັນດາກົນໄກຮ່ວມມືແມ່ນ້ຳຂອງອື່ນ), ຊຸກຍູ້ການເຂົ້າຮ່ວມຂອງບັນດາອົງການຈັດຕັ້ງການເງິນສາກົນເຊັ່ນ ທະນາຄານພັດທະນາອາຊີ, ທະນາຄານໂລກ… ລັດຖະບານຂອງບາງປະເທດຄູ່ຮ່ວມມື… ໃນການປະຕິບັດໂຄງການ. ທີສາມ, ກໍ່ສ້າງຍຸດທະສາດການຮ່ວມມືໄລຍະກາງ, ໄລຍະຍາວ ເພື່ອເປັນພື້ນໃຫ້ແກ່ການຜັນຂະຫຍາຍການເຄື່ອນໄຫວຕ່າງໆ.
ທ່ານນາຍົກລັດຖະມົນຕີຫວຽດນາມ ກໍ່ໄດ້ມີຂໍ້ສະເໜີແນະທີ່ລະອຽດຫຼາຍປະການ ເຊິ່ງສະແດງໃຫ້ເຫັນເຖິງຄວາມເປັນເຈົ້າການໃນການປະກອບສ່ວນຕໍ່ກອງປະຊຸມ, ເຊັ່ນການກຽມພ້ອມສະໜັບສະໜູນບັນດາປະເທດມາຮ່ວມງານສະແດງສີນຄ້າຂະໜາດໃຫຍ່ໃນຫວຽດນາມ, ການກໍ່ສ້າງລັດຖະບານເອເລັກໂຕຣນິກ, ການຍົກສູງຄວາມສາມາດແລະທັກສະດິຈິຕອນ, ສືບຕໍ່ປະຕິບັດໂຄງການທຶນການສຶກສາ CLMV, ເພີ່ມຈຳນວນນັກສຶກສາຂອງສາມປະເທດ ກຳປູເຈຍ, ລາວ, ມຽນມາ ມາຮຽນຢູ່ສູນຝຶກອົບຮົມວິຊາຊີບຢູ່ແຂວງກອນຕຸມ...
ການເຂົ້າຮ່ວມກອງປະຊຸມສຸດຍອດ ACMECS ຄັ້ງທີ 8 ແລະ CLMV ຄັ້ງທີ 9 ຂອງທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຢືນຢັນຫວຽດນາມໃຫ້ຄວາມສຳຄັນຕໍ່ການຮ່ວມມືດ້ານເສດຖະກິດ ແມ່ນ້ຳເຢຢາວາດີ-ແມ່ນ້ຳເຈົ້າພະຍາ-ແມ່ນ້ຳຂອງ ແລະການຮ່ວມມືລະຫວ່າງກຳປູເຈຍ-ລາວ-ມຽນມາ-ຫວຽດນາມ; ຍົກສູງຖານະບົດບາດແລະທີ່ຕັ້ງຂອງຫວຽດນາມ, ປະກອບສ່ວນໃນການເປີດບົດໃໝ່ສຳລັບການຮ່ວມມືໃນພາກພື້ນແມ່ນ້ຳຂອງ, ປະກອບສ່ວນນັບມື້ນັບຫຼາຍເຂົ້າໃນການພັດທະນາແບບຍືນຍົງ ແລະຄວາມຈະເລີນຮຸ່ງເຮືອງຮ່ວມກັນໃນພາກພື້ນ./.
ໂດຍ ຫງວຽນດຶກ