ຫວຽດນາມເປັນຄູ່ຮ່ວມມືການພັດທະນາທີ່ໃຫຍ່ ຂອງສາທາລະນະລັດເກົາຫຼີ
ວກ.ອອນໄລ - ໂດຍຕອບສະໜອງຕາມຄຳເຊີນຂອງທ່ານ ມູນຮີຊາງ ປະທານສະພາແຫ່ງຊາດແຫ່ງສາທາລະນະລັດເກົາຫຼີ, ທ່ານນາງ ຫງວຽນທິກິມເງິນ ປະທານສະພາແຫ່ງຊາດ ແລະຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ໄປຢ້ຽມຢາມແລະເຮັດວຽກທີ່ປະເທດສາທາລະນະລັດເກົາຫຼີ ແຕ່ວັນທີ 4 ເຖິງວັນທີ 7 ທັນວາ 2018.
ຢູ່ທີ່ການພົບປະເຈລະຈາຫາລືລະຫວ່າງການນຳຂັ້ນສູງຂອງສອງປະເທດ, ບັນດາຜູ້ນຳຂອງ ສ.ເກົາຫຼີ ສະແດງຄວາມເຊື່ອໝັ້ນວ່າ ການຢ້ຽມຢາມສ.ເກົາຫຼີຢ່າງເປັນທາງການ ຂອງປະທານສະພາແຫ່ງຊາດ ຫງວຽນທິກິມເງິນ ແລະຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ຈະສືບຕໍ່ຊຸກຍູ້ການພົວພັນລະຫວ່າງສະພາແຫ່ງຊາດຂອງສອງປະເທດ ໃຫ້ພັດທະນາຍິ່ງກວ່າອີກ, ພ້ອມນັ້ນກໍ່ປະກອບສ່ວນຢ່າງຕັ້ງໜ້າເຂົ້າໃນການພັດທະນາການພົວພັນຄູ່ຮ່ວມມືຍຸດທະສາດຫວຽດນາມ - ສ.ເກົາຫຼີ ໃຫ້ຂະຫຍາຍຕົວຢ່າງກວ້າງຂວາງເລິກເຊິ່ງແລະມີປະສິດທິຜົນຍິ່ງກວ່າອີກ.
ບັນດາຜູ້ນຳຂອງສອງປະເທດໄດ້ເນັ້ນເຖິງຄວາມຕ້ອງການຕ້ອງສືບຕໍ່ຮັກສາການຕິດຕໍ່ແລະພົບປະລະຫວ່າງຜູ້ນຳຂັ້ນສູງຢ່າງເປັນປົກກະຕິ, ສ້າງເງື່ອນໄຂອຳນວຍຄວາມສະດວກເພື່ອຊຸກຍູ້ການຕິດຕໍ່ຮ່ວມມືລະຫວ່າງບັນດາຂັ້ນ, ບັນດາຂະແໜງການ, ບັນດາທ້ອງຖິ່ນຂອງສອງປະເທດ, ຈາກນັ້ນ ປະກອບສ່ວນເພີ່ມທະວີຄວາມເຂົ້າໃຈຊຶ່ງກັນແລະກັນ ແລະປັບປຸງຄວາມໄວ້ວາງໃຈທາງດ້ານການເມືອງ, ພັດທະນາຄວາມສຳພັນລະຫວ່າງສອງປະເທດຢ່າງໝັ້ນຄົງແລະຍາວນານ, ສ້າງສິ່ງແວດລ້ອມທີ່ສະດວກດີເພື່ອເປີດກວ້າງການຮ່ວມມືໃນບັນດາຂົງເຂດຄືທີ່ໄດ້ລະບຸໄວ້ໃນ “ຖະແຫຼງການຮ່ວມຫວຽດນາມ - ສ.ເກົາຫຼີ ມຸ່ງໄປສູ່ອະນາຄົດ”.
ກ່ຽວກັບບັນດາບັນຫາສາກົນ, ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມເນັ້ນວ່າ ຫວຽດນາມຊົມເຊີຍ “ນະໂຍບາຍພາກໃຕ້ໃໝ່” ຂອງ ສ.ເກົາຫຼີ, ນະໂຍບາຍນີ້ໄດ້ໃຫ້ຄວາມສຳຄັນເຖິງການຊຸກຍູ້ການຮ່ວມມືກັບບັນດາປະເທດອາຊຽນ, ເຊິ່ງຈຸດສຸມແມ່ນຫວຽດນາມ. ຫວຽດນາມພ້ອມແລ້ວທີ່ຈະເປັນຂົວຕໍ່ໃນການຊຸກຍູ້ການຮ່ວມມືໃນຫຼາຍດ້ານລະຫວ່າງ ສ.ເກົາຫຼີ ແລະ ບັນດາປະເທດອາຊຽນ.
ຫວຽດນາມຕີລາຄາສູງຫຼັກໝັ້ນຂອງ ສ.ເກົາຫຼີ ກ່ຽວກັບບັນຫາທະເລຕາເວັນອອກ, ສະເໜີໃຫ້ ສ.ເກົາຫຼີ ສືບຕໍ່ສະໜັບສະໜູນຫຼັກໝັ້ນຂອງຫວຽດນາມ ແລະ ອາຊຽນ ໃນການຮັກສາສັນຕິພາບ ສະຖຽນລະພາບ, ແກ້ໄຂຂໍ້ຂັດແຍ້ງພິພາດຢູ່ທະເລຕາເວັນອອກດ້ວຍສັນຕິວິທີ ສອດຄ່ອງກັບກົດໝາຍສາກົນ, ປະຕິບັດຖະແຫຼງການກ່ຽວກັບການປະພຶດຢູ່ທະເລຕາເວັນອອກ (DOC) ຢ່າງຄົບຖ້ວນ, ແລະບັນລຸເຖິງປະມວນຂໍ້ກຳນົດການປະພຶດຢູ່ທະເລຕາວັນອອກ (COC) ໂດຍໄວ.
ກ່ຽວກັບການພົວພັນລະຫວ່າງສອງສະພາແຫ່ງຊາດ, ປະທານສະພາແຫ່ງຊາດຫວຽດນາມໃຫ້ທັດສະນະວ່າ ໃນໄລຍະທີ່ຜ່ານມາ, ສອງຝ່າຍໄດ້ຮັກສາເປັນຢ່າງດີ ການແລກປ່ຽນຄະນະຜູ້ແທນຂັ້ນຕ່າງໆຕາມເນື້ອໃນຂໍ້ຕົກລົງລະຫວ່າງສອງສະພາແຫ່ງຊາດທີ່ໄດ້ລົງນາມໃນເດືອນກໍລະກົດ 2013. ສະພາແຫ່ງຊາດຫວຽດນາມມຸ່ງຫວັງແລະກຽມຄວາມພ້ອມທີ່ຈະຮ່ວມມືຢ່າງແໜ້ນແຟ້ນກັບສະພາແຫ່ງຊາດແຫ່ງ ສ.ເກົາຫຼີ ເພື່ອສົ່ງເສີມແລະຊຸກຍູ້ພັດທະນາການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ; ຜ່ານຊ່ອງທາງການທູດຂອງລັດຖະສະພາເພື່ອປະກອບສ່ວນເພີ່ມທະວີຄວາມໄວ້ວາງໃຈທາງດ້ານການເມືອງ, ການພົບປະສັງສັນລະຫວ່າງປະຊາຊົນ, ເປີດກວ້າງແລະຍົກສູງປະສິດທິຜົນຂອງການຮ່ວມມືໃນຫຼາຍຂົງເຂດ.
ປະທານສະພາແຫ່ງຊາດຫວຽດນາມ ຫງວຽນທິກິມເງິນ ກໍເຫັນດີນຳຄວາມເຫັນຂອງທ່ານ ມູນຮີຊາງ ປະທານສະພາແຫ່ງຊາດແຫ່ງ ສ.ເກົາຫຼີ ກ່ຽວກັບການທີ່ສອງຝ່າຍສືບຕໍ່ຮັກສາການແລກປ່ຽນຄະນະຜູ້ແທນຂັ້ນຕ່ງໆຢ່າງເປັນປົກກະຕິ ເພື່ອພ້ອມກັນແລກປ່ຽນບົດຮຽນກ່ຽວກັບການເຄື່ອນໄຫວລັດຖະສະພາ, ສົມທົບຕິດຕາມກວດກາການປະຕິບັດບັນດາຂໍ້ຕົກລົງການຮ່ວມມືທີ່ສອງລັດຖະບານໄດ້ລົງນາມ, ຮັບຟັງຄວາມຄິດຄວາມເຫັນຂອງຊຸມຊົນທຸລະກິດແລະພົນລະເມືອງສອງປະເທດ ແນໃສ່ສ້າງສິ່ງແວດລ້ອມນິຕິທຳທີ່ສະດວກດີໃຫ້ແກ່ການຮ່ວມມື, ການແລກປ່ຽນ ແລະ ການປົກປ້ອງພົນລະເມືອງ.
ສອງຝ່າຍສືບຕໍ່ເສີມຂະຫຍາຍບົດບາດເປັນຂົວຕໍ່ຂອງກຸ່ມ ສສ ມິດຕະພາບ ເພື່ອຊຸກຍູ້ການແລກປ່ຽນຄະນະຜູ້ແທນ, ແລກປ່ຽນຂໍ້ມູນຂ່າວສານ, ເປີດກວ້າງບັນດາຮູບການແລກປ່ຽນຮ່ວມມືໃໝ່ທີ່ມີປະສິດທິຜົນຕົວຈິງ. ພ້ອມກັນນັ້ນ ເພີ່ມທະວີການເຄື່ອນໄຫວຮ່ວມມືລະຫວ່າງບັນດາອົງການຊ່ວຍວຽກສະພາແຫ່ງຊາດ ເພື່ອແນໃສ່ຍົກສູງຄວາມສາມາດ, ພັດທະນາແຫຼ່ງບຸກຄະລາກອນ, ແລກປ່ຽນຂໍ້ມູນຂ່າວສານ, ແບ່ງປັນບົດຮຽນໃນການການເຄື່ອນໄຫວໃຫ້ຄຳປຶກສາ, ຮັບໃຊ້ສະພາແຫ່ງຊາດ.
ສອງຝ່າຍເພີ່ມທະວີການປະສານສົມທົບ, ສະໜັບສະໜູນຊຶ່ງກັນແລະກັນຢູ່ໃນບັນດາເວທີປາໄສລະຫວ່າງລັດຖະສະພາ, ປະກອບສ່ວນຢ່າງຕັ້ງໜ້າເຂົ້າໃນການຮັກສາສິ່ງແວດລ້ອມສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ໃນພາກພື້ນແລະໃນໂລກ.
ໃນເວລາຢ້ຽມຢາມແລະເຮັດວຽກຢູ່ ສ.ເກົາຫຼີ, ທ່ານນາງ ຫງວຽນທິກິມເງິນ ປະທານສະພາແຫ່ງຊາດ ແລະຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ໄປຢາມນະຄອນປູຊານ, ເຊິ່ງເປັນສູນກາງເສດຖະກິດ ວັດທະນະທຳ ການສຶກສາ, ນະຄອນໃຫຍ່ທີສອງຂອງ ສ.ເກົາຫຼີ ແລະເປັນເມືອງທ່າເຮືອທີ່ໃຫຍ່ທີ່ສຸດໃນ ສ.ເກົາຫຼີ. ຢູ່ທີ່ນີ້, ປະທາສະພາແຫ່ງຊາດໄດ້ຕ້ອນຮັບກົງສຸນໃຫຍ່ກິຕິມະສັກຫວຽດນາມປະຈຳເຂດປູຊານ - ຄະຢອງນຳ, ຕ້ອນຮັບນາຍົກເທດສະມົນຕີຂອງເມືອງປູຊານ, ພົບກັບຜູ້ຕາງໜ້າຂອງ 10 ຄອບຄົວວັດທະນະທຳເກົາຫຼີ-ຫວຽດນາມ.
ທ່ານນາງ ຫງວຽນທິກິມເງິນ ປະທານສະພາແຫ່ງຊາດແຫ່ງ ສສ ຫວຽດນາມ ໄດ້ຮັບປະລິນຍາເອກກິຕິມະສັກສາຂາລັດຖະສາດຈາກມະຫາວິທະຍາໄລແຫ່ງຊາດ ປູກີອົງ; ໂອ້ລົມກັບນັກຮຽນຫວຽດນາມທີ່ກຳລັງຮຽນຢູ່ມະຫາວິທະຍາໄລແຫ່ງນີ້.
ເນື່ອງໃນໂອກາດນີ້, ປະທານສະພາແຫ່ງຊາດ ຫງວຽນທິກິມເງິນ ໄດ້ຕ້ອນຮັບຜູ້ຕາງໜ້າຂອງວົງຕະກູນຫຼີໃນເກົາຫຼີ, ປະດັບຫຼຽນໄຊມິດຕະພາບໃຫ້ ສຈ.ອານກຽງຮວານ, ປະທານສະມາຄົມຄົ້ນຄວ້າກ່ຽວກັບຫວຽດນາມທີ່ປະເທດ ສ.ເກົາຫຼີ; ເປັນສັກຂີພະຍານໃນພິທີລົງນາມບັນທຶກຄວາມເຂົ້າໃຈລະຫວ່າງລັດຖະມົນຕີກະຊວງອຸດສາຫະກຳ ການຄ້າຫວຽດນາມ ແລະ ລັດຖະມົນຕີກະຊວງອຸດສາຫະກຳການຄ້າແລະພະລັງງານເກົາຫຼີ ກ່ຽວກັບໂຄງການປະຕິບັດງານເພື່ອເປົ້າໝາຍຍົກມູນຄ່າການຄ້າສອງຝ່າຍຂຶ້ນເປັນ 100 ຕື້ໂດລາສະຫະລັດໃນປີ 2020 ຕາມທິດທາງການຄ້າສົມດຸນ.
ປະທານສະພາແຫ່ງຊາດຫວຽດນາມ ຫງວຽນທິກິມເງິນ ແລະ ປະທານສະພາແຫ່ງຊາດແຫ່ງສ.ເກົາຫຼີ ມູນຮີຊາງ ໄດ້ເຂົ້າຮ່ວມເວທີປາໄສການລົງທຶນແລະການຄ້າຫວຽດນາມ - ສ.ເກົາຫຼີ. ເຫດການນີ້ໄດ້ມີການເຂົ້າຮ່ວມຂອງຜູ້ແທນແລະນັກທຸລະກິດ 350 ຄົນຈາກສອງປະເທດ.
ໃນເວທີປາໄສນີ້, ປະທານສະພາແຫ່ງຊາດຫວຽດນາມ ຫງວຽນທິກິມເງິນ ແລະ ປະທານສະພາແຫ່ງຊາດແຫ່ງສ.ເກົາຫຼີ ມູນຮີຊາງ ໄດ້ເປັນສັກຂີພະຍານພິທີເປີດສາຍການບິນເຊື່ອນຕໍ່ ຝູກວັກ (ຫວຽດນາມ) ກັບເຊອູນ (ສ.ເກົາຫຼີ) ຂອງບໍລິສັດການບິນ Vietjet./.
ສັງລວມໂດຍ ບກ