ສືບຕໍ່ຍູ້ແຮງການຮ່ຳຮຽນແລະປະຕິບັດຕາມ
ແນວຄິດ, ຄຸນສົມບັດ, ແບບແຜນໂຮ່ຈີມິນ, ຕອບສະໜອງ
ຄວາມຕ້ອງການຂອງໜ້າທີ່ການປະຕິວັດໃນໄລຍະໃໝ່
ແນວຄິດ, ຄຸນສົມບັດ, ແບບແຜນໂຮ່ຈີມິນ, ຕອບສະໜອງ
ຄວາມຕ້ອງການຂອງໜ້າທີ່ການປະຕິວັດໃນໄລຍະໃໝ່
ວກ. - ປະທານໂຮ່ຈີມິນ, ຜູ້ນຳທີ່ອັດສະລິຍະແລະໂດດເດັ່ນຂອງປະເທດຊາດ, ຄູທີ່ຍິ່ງໃຫຍ່ຂອງການປະຕິວັດຫວຽດນາມ. ເພິ່ນ “ແມ່ນສັນຍາລັກທີ່ສວຍງາມທີ່ສຸດຂອງນ້ຳໃຈຮັກຊາດ ແລະ ລັດທິວິລະຊົນປະຕິວັດຫວຽດນາມ. ເພິ່ນເປັນການຕົກຜະລຶກທີ່ປະກາຍແຫ່ງສິນລະທໍາ, ປັນຍາ, ຄວາມກ້າຫານ, ມະໂນທໍາຂອງຊາດແລະຍຸກສະໄໝ”(1). ຕະຫຼອດຊີວິດ, ເພິ່ນອຸທິດຕົນເພື່ອພາລະກິດການປົດປ່ອຍຊາດ, ປົດປ່ອຍຊົນຊັ້ນ ແລະ ປົດປ່ອຍມະນຸດ. ແນວຄິດ, ຄຸນສົມບັດ, ແບບແຜນຂອງໂຮ່ຈີມິນ ແມ່ນຊັບສິນທາງຈິດໃຈອັນລ້ຳຄ່າຂອງພັກ ແລະ ປະເທດຊາດຫວຽດນາມ. ການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ ແມ່ນໜ້າທີ່ທີ່ສຳຄັນແລະຂາດບໍ່ໄດ້ ສຳລັບອົງການຈັດຕັ້ງພັກ ແລະ ສະມາຊິກພັກທຸກຄົນ ໃນການຝຶກຝົນຫຼໍ່ຫຼອມ, ອຸທິດຕົນ ແລະ ຮັບໃຊ້ປະເທດຊາດ.
ລຸງໂຮ່ ແລະ ນັກຮົບແຂ່ງຂັນຍິງພາກເໜືອ _ພາບແຕ້ມໂດຍຈິດຕະກອນ ເວືອງຈິ່ງ ແຕ່ງເມື່ອປີ 1967
ເບິ່ງຄືນ 5 ປີແຫ່ງການປະຕິບັດຄຳສັ່ງເລກທີ 05-CT/TW ຂອງກົມການເມືອງ
ໃນຊຸມປີທີ່ຜ່ານມາ, ການປະຕິບັດຄຳສັ່ງເລກທີ 05-CT/TW, ລົງວັນທີ 15 ພຶດສະພາ 2016, ຂອງກົມການເມືອງສູນກາງພັກສະໄໝທີ 12 “ກ່ຽວກັບການຍູ້ແຮງການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ (ຕໍ່ໄປນີ້ຮຽກວ່າຄຳສັ່ງເລກທີ 05), ຕິດກັບມະຕິເລກທີ 04-NQ/TW, ລົງວັນທີ 30 ຕຸລາ 2016, ຂອງກອງປະຊຸມຄັ້ງທີ 4 ຄະນະບໍລິຫານງານສູນກາງພັດສະໄໝທີ 12, “ກ່ຽວກັບການເພີ່ມທະວີການກໍ່ສ້າງ, ປັບປຸງພັກ; ກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ບັນດາປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ” ຢູ່ພາຍໃນ” (ຕໍ່ໄປນີ້ຮຽກວ່າມະຕິກອງປະຊຸມສູນກາງຄັ້ງທີ 4 ສະໄໝທີ 12) ໄດ້ບັນລຸຜົນສຳເລັດຫຼາຍຢ່າງທີ່ສຳຄັນ, ຮອບດ້ານ, ແທດຈິງ, ດ້ວຍຫຼາຍວິທີໃໝ່ທີ່ປະດິດສ້າງ, ນັບມື້ນັບເຂົ້າສູ່ເນື້ອແທ້ ເລິກເຊິ່ງ, ຄ່ອຍໆກາຍເປັນໜ້າທີ່ທີ່ສຳຄັນ ເປັນປະຈຳຂອງທຸກອົງການຈັດຕັ້ງພັກ ແລະ ພະນັກງານ ສະມາຊິກພັກທຸກຄົນ. ຜ່ານນັ້ນ, ຂະບວນການໄດ້ສ້າງການປ່ຽນແປງຢ່າງແຂງແຮງ, ມີແຮງແຜ່ກະຈາຍໃນພັກແລະທົ່ວສັງຄົມ, ເຮັດໃຫ້ມີການປ່ຽນແປງທີ່ດີ ໃນລະບົບການເມືອງທັງໝົດ, ໂດຍສະເພາະໃນວຽກງານກໍ່ສ້າງແລະປັບປຸງພັກ; ປະກອບສ່ວນປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກໃຫ້ສຳເລັດຜົນ, ສ້າງຮາກຖານ, ພື້ນຖານທີ່ສຳຄັນໃຫ້ທົ່ວພັກ, ທົ່ວກອງທັບ, ທົ່ວປວງຊົນເຮົາອອກແຮງແຂ່ງຂັນ, ສືບຕໍ່ປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກຢ່າງສຳເລັດຜົນ ໃນເວລາທີ່ຈະມາເຖິງ.
ນີ້ແມ່ນບາດກ້າວສືບທອດ, ສືບຕໍ່ ແລະ ພັດທະນາຜົນງານຂອງໄລຍະກ່ອນ(2), ໄດ້ແກ້ໄຂຜ່ານຜ່າຂໍ້ຈຳກັດ, ຈຸດບົກພ່ອງຈຳນວນໜຶ່ງເຊັ່ນ ຄວາມຮັບຮູ້ບໍ່ຄົບຖ້ວນແລະເລິກເຊິ່ງຂອງພະນັກງານ ສະມາຊິກພັກຫຼາຍຄົນ, ໃນນັ້ນມີພະນັກງານຫຼັກແຫຼ່ງ ກ່ຽວກັບຄວາມໝາຍ, ຄວາມສຳຄັນຂອງການຮ່ຳຮຽນແລະປະຕິບັດຕາມລຸງໂຮ່; ຄວາມຮັບຜິດຊອບໃນການເປັນແບບຢ່າງຂອງຫົວໜ້າ ແລະ ພະນັກງານ ສະມາຊິກພັກບໍ່ສູງ; ການສ້າງມາດຕະຖານດ້ານຈະລິຍະທຳຍັງຊັກຊ້າ, ຍັງມີລັກສະນະຮູບນອກ; ວຽກງານການອົບຮົມສຶສາ, ໂຄສະນາ ບໍ່ມີຊີວິດຊີວາຫຼາຍ, ຍັງບໍ່ດຶງດູດໃຈ ແລະ ບໍ່ໄດ້ສ້າງຜົນກະທົບແຜ່ຫຼາຍໃນສັງຄົມ.
ບາງຜົນສຳເລັດທີ່ໂດດເດັ່ນໃນການປະຕິບັດຄຳສັ່ງເລກທີ 05 ໃນເວລາທີ່ຜ່ານມາ:
ທີໜຶ່ງ, ວຽກງານການນຳພາ ຊີ້ນຳ ການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ ພາຍຫຼັງທີ່ກົມການເມືອງສູນກາງພັກອອກຄຳສັ່ງເລກທີ 05 ໄດ້ຮັບການປະຕິບັດຢ່າງຈິງຈັງ, ເປັນລະບຽບ ແລະ ມີຄຸນນະພາບໃນທົ່ວທັງລະບົບການເມືອງ.
ທີສອງ, ເພື່ອຜັນຂະຫຍາຍຄຳສັ່ງເລກທີ 05, ບັນດາຄະນະພັກ, ອົງການຈັດຕັ້ງພັກໄດ້ສ້າງເປັນໂຄງການ, ແຜນງານສະເພາະ ໂດຍຕິດກັບວຽກງານກໍ່ສ້າງພັກ, ໜ້າທີ່ຈຸດໜັກໃຈກາງ, ຂັ້ນຕອນບຸກທະລຸ, ບັນດາຂະບວນການແຂ່ງຂັນ ແລະ ການຂົນຂວາຍ ເພື່ອສຸມໃສ່ຊີ້ນຳນຳພາ ແລະ ຈັດຕັ້ງປະຕິບັດຢ່າງມີປະສິດທິຜົນ. ຈາກພຶດຕິກຳຕົວຈິງປະກົດມີຫຼາຍແບບຢ່າງທີ່ດີ, ວິທີການທີ່ສ້າງສັນ, ໝູ່ຄະນະແລະບຸກຄົນທີ່ດີເດັ່ນ ເປັນແບບຢ່າງ.
ທີສາມ, ການຈັດຕັ້ງຮ່ຳຮຽນແລະຊາບຊຶມ ຄຳສັ່ງເລກທີ 05, ຫົວຂໍ້ສະເພາະຂອງໄລຍະໜຶ່ງ, ຫົວຂໍ້ສະເພາະປະຈຳປີ ແລະ ບັນດາເນື້ອໃນຕົ້ນຕໍຂອງແນວຄິດ, ຄຸນສົມບັດ, ແບບແຜນໂຮ່ຈີມິນ ໄດ້ຮັບການປະຕິບັດຢ່າງເຂັ້ມງວດ, ເປັນລະບຽບ, ສ້າງການຫັນປ່ຽນຢ່າງແຂງແຮງໃນຄວາມຮັບຮູ້ແລະການກະທຳຂອງພະນັກງານ ສະມາຊິກພັກ (3), ກາຍເປັນຄວາມຕັດສິນໃຈທາງການເມືອງສູງ ແລະ ການກະທຳເດັດດ່ຽວໃນບັນດາຄະນະພັກ, ອົງການຈັດຕັ້ງພັກ ແລະພະນັກງານ ສະມາຊິກພັກ.
ທີສີ່, ຄໍາໝັ້ນສັນຍາທີ່ຈະຝຶກຝົນຫຼໍ່ຫຼອມແລະປູກຝັງຄຸນນະທຳ, ຕິດກັບຄວາມຮັບຜິດຊອບໃນການເປັນແບບຢ່າງນັ້ນ ໄດ້ຮັບການຜັນຂະຫຍາຍຢ່າງຄົບຊຸດ ກວ້າງຂວາງ, ນັບມື້ນັບກາຍເປັນການດຳເນີນງານທີ່ເປັນເຈົ້າການ ເປັນປົກກະຕິ ຂອງພະນັກງານສະມາຊິກພັກແຕ່ລະຄົນ ແລະຂອງອົງການຈັດຕັ້ງພັກ (4), ປະກອບສ່ວນຄວບຄຸມແລະກີດກັ້ນສະພາບການເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ບັນດາປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ” ຢູ່ພາຍໃນ (5); ກໍ່ສ້າງຖັນແຖວພະນັກງານ, ພິເສດແມ່ນພະນັກງານລະດັບຍຸດທະສາດ ໃຫ້ມີຫຼັກໝັ້ນການເມືອງທີ່ໜັກແໜ້ນ, ຄຸນສົມບັດສິນທໍາອັນບໍລິສຸດ, ມີຄວາມຮັບຜິດຊອບແລະສິ່ງຊຸກຍູ້ທີ່ເໝາະສົມ, ນຳໜ້າ, ເປັນແບບຢ່າງ; ຕໍ່ສູ້ຢ່າງມີປະສິດທິພາບໃນການປົກປ້ອງພື້ນຖານແນວຄິດຂອງພັກ, ປະຕິເສດບັນດາທັດສະນະທີ່ຜິດພາດ ເປັນປະຕິປັກ, ສ້າງເຄື່ອງໝາຍທີ່ຊັດເຈນໃນການສ້າງວັດທະນະທຳພັກ ທີ່ມີຄຸນນະທຳແລະມີອາລະຍະທຳ. ປະສິດທິຜົນຂອງການເປັນແບບຢ່າງເຮັດໃຫ້ເກີດຜົນກະທົບຢ່າງແຮງ, ປະກອບສ່ວນສຳຄັນເຂົ້າໃນການປ່ຽນໂສມໜ້າທາງເສດຖະກິດ-ສັງຄົມຂອງປະເທດໃນໄລຍະທີ່ຜ່ານມາ, ປະກອບສ່ວນແກ້ໄຂບັນດາບັນຫາສັບສົນທີ່ກໍ່ຄວາມຮ້ອນເຄືອງໃນປະຊາຊົນ, ຢືນຢັນແຜນນະໂຍບາຍແລະແນວທາງການປ່ຽນແປງໃໝ່ທີ່ຖືກຕ້ອງຂອງພັກ (6).
ທີ່ຫ້າ, ວຽກງານໂຄສະນາໄດ້ດຳເນີນພາຍໃຕ້ຫຼາຍຮູບການທີ່ອຸດົມສົມບູນແລະໂດດເດັ່ນພໍຄວນ, ໄດ້ປະກອບສ່ວນຊຸກຍູ້ການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ, ເຮັດໃຫ້ມັນຂະຫຍາຍແຜ່ກວ້າງອອກ ແລະສົ່ງຜົນກະທົບຢ່າງແຂງແຮງ, ຕັ້ງໜ້າເຖິງຄວາມຮັບຮູ້, ແນວຄິດຈິດໃຈ ແລະ ການກະທຳຂອງພະນັກງານ ສະມາຊິກພັກ ແລະ ປະຊາຊົນ, ໄດ້ຮັບການຕີລາຄາສູງຈາກເພື່ອນມິດຕ່າງປະເທດ, ເຮັດໃຫ້ແນວຄິດ, ຄຸນສົມບັດ, ແບບແຜນຂອງເພິ່ນກາຍເປັນພື້ນຖານຈິດໃຈທີ່ໜັກແໜ້ນຂອງຊີວິດສັງຄົມ.
ທີຫົກ, ວຽກງານການອົບຮົມສຶກສາທິດສະດີການເມືອງ ແລະບັນດາເນື້ອໃນຂອງ ແນວຄິດ, ຄຸນສົມບັດ, ແບບແຜນໂຮ່ຈີມິນ ໃຫ້ພະນັກງານ ສະມາຊິກພັກ, ສະມາຊິກຊາວໜຸ່ມ, ນັກຮຽນ, ນັກສຶກສາ ໄດ້ຮັບການປະຕິບັດຢ່າງຈິງຈັງ, ມີການປ່ຽນແປງໃໝ່ທັງເນື້ອໃນແລະວິທີການ; ເພີ່ມທະວີການຄຸ້ມຄອງແລະເຕັກນິກໃນການສິດສອນ ແລະ ຮ່ຳຮຽນ; ແກ້ໄຂຜ່ານຜ່າແຕ່ລະກ້າວ ສະພາບການຂີ້ຄ້ານຮຽນ ຢ້ານທີ່ຈະຮຽນທິດສະດີການເມືອງ, ປະກອບສ່ວນຍົກສູງລະດັບແລະຄວາມກ້າຫານທາງການເມືອງໃຫ້ພະນັກງານ ສະມາຊິກພັກ ແລະ ປະຊາຊົນ, ພິເສດແມ່ນຊາວໜຸ່ມ.
ທີເຈັດ, ການສະຫຼຸບເບື້ອງຕົ້ນຜົນຂອງການປະຕິບັດຄຳສັ່ງເລກທີ 05 ໄດ້ຮັບການປະຕິບັດເປັນປະຈຳທຸກປີ ໂດຍຄະນະພັກ, ອົງການຈັດຕັ້ງພັກ, ເຊິ່ງຊີ້ໃຫ້ເຫັນຈຸດດີ, ຂໍ້ ຈຳກັດ, ສາເຫດ ແລະ ຖອດຖອນບົດຮຽນປະສົບການທີ່ລ້ຳຄ່າ, ວາງທິດທາງ, ໜ້າທີ່, ວິທີແກ້ໄຂທີ່ເໝາະສົມ ແລະ ມີຄວາມສາມາດເປັນໄປໄດ້ ແນໃສ່ຍົກສູງຄຸນນະພາບການຮ່ຳຮຽນ ແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ ໃນຊຸມປີຕໍ່ໄປ.
ທີແປດ, ວຽກງານກວດກາ, ຕິດຕາມກວດກາໄດ້ຮັບຄວາມເອົາໃຈໃສ່ປະຕິບັດຢ່າງຈິງຈັງ, ເປັນແບບແຜນ; ກວດພົບແລະຊີ້ແຈງບັນດາການກະທຳລະເມີດ ແລະ ຂໍ້ບົກຜ່ອງຂອງພະນັກງານ, ສະມາຊິກພັກ ແລະ ອົງການຈັດຕັ້ງພັກໂດຍທັນທີ (7); ຄົ້ນພົບ, ໃຫ້ກຽດ, ຍ້ອງຍໍຊົມເຊີຍໝູ່ຄະນະແລະບຸກຄົນທີ່ດີເດັ່ນ; ສິ່ງເຫຼົ່ານີ້ ມີຄຸນປະໂຫຍດສົ່ງເສີມແລະສະໜັບສະໜູນຢ່າງແຂງແຮງຕໍ່ພະນັກງານ ສະມາຊິກພັກ ແລະປະຊາຊົນ ໃນການ ຮ່ຳຮຽນແລະປະຕິບັດຕາມລຸງໂຮ່, ກວດກາຕົນເອງ, ແກ້ໄຂຕົນເອງ, ປັບປ່ຽນການປະພຶດຂອງຕົນ, ຝຶກຝົນສິນລະທໍາ ແບບແຜນດຳລົງຊີວິດ ແລະ ແບບການເຮັດວຽກ.
ເລຂາທິການໃຫຍ່ ຫງວຽນຝູຈ້ອງ ພ້ອມກັບບັນດາຜູ້ນຳຂອງພັກ, ລັດ ແລະບັນດາຜູ້ແທນ ເຂົ້າຢ້ຽມຊົມງານວາງສະແດງ “ບັນດາຕົວຢ່າງທີ່ງ່າຍດາຍແຕ່ສູງສົ່ງ” ທີ່ຈັດສະແດງໃນລະບຽງກອງປະຊຸມລະດັບຊາດເພື່ອສະຫຼຸບ 5 ປີການປະຕິບັດຄຳສັ່ງເລກທີ 05-CT/TW “ກ່ຽວກັບການຍຸ້ແຮງການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ” _ພາບ: TTXVN
ເບິ່ງລວມແລ້ວ, ການປະຕິບັດຄຳສັ່ງເລກທີ 05 ແລະມະຕິກອງປະຊຸມສູນກາງພັກຄັ້ງທີ 4 ສະໄໝທີ 13 ໄດ້ເສີມຂະຫຍາຍແຮງແຜ່ກະຈາຍ, ຊຸກຍູ້ການຮ່ຳຮຽນ ແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ ໃນດ້ານຕ່າງໆຂອງຊີວິດສັງຄົມ, ປະກອບສ່ວນສ້າງກຳລັງແຮງສະທ້ອນ, ຄວາມເຫັນດີເຫັນພ້ອມ, ຄວາມຕັດສິນໃຈຂອງທົ່ວພັກ, ທົ່ວສັງຄົມໃນການປະຕິບັດບັນດາໜ້າທີ່ເສດຖະກິດ - ສັງຄົມ, ປົກປັກຮັກສາປະເທດຊາດ, ເພີ່ມທະວີຄວາມໄວ້ເນື້ອເຊື່ອໃຈຂອງປະຊາຊົນຕໍ່ພັກ, ລັດ ແລະລະບອບ.
ຢ່າງໃດກໍ່ຕາມ, ການຈັດຕັ້ງປະຕິບັດຄຳສັ່ງເລກທີ 05 ຕິດກັບມະຕິກອງປະຊຸມສູນກາງພັກຄັ້ງທີ 4 ສະໄໝທີ 12 ຍັງມີຂໍ້ຈຳກັດເຊັ່ນ ວຽກງານການນຳພາຊີ້ນຳການຈັດຕັ້ງປະຕິບັດຢູ່ບາງບ່ອນ ໃນບາງຄັ້ງບໍ່ມີຄວາມເດັດດ່ຽວ, ບໍ່ສະແດງໃຫ້ເຫັນເຖິງບົດບາດຂອງຫົວໜ້າຄະນະພັກ, ສຳນັກງານ ອົງການ. ການໃຫ້ຄຳໝັ້ນສັນຍາໃນການຝຶກຝົນຫຼໍ່ຫຼອມບຳລຸງສ້າງຕົນເອງ ໂດຍສະເພາະແມ່ນການປະຕິບັດຂໍ້ກຳນົດກ່ຽວກັບການເປັນແບບຢ່າງຂອງພະນັກງານ ແລະ ສະມາຊິກພັກພາກສ່ວນໜຶ່ງ ຍັງບໍ່ທັນກາຍເປັນລະບຽບ ແລະ ບໍ່ມີປະສິດທິຜົນ. ການກຳນົດຂອດການບຸກທະລຸຢູ່ບາງບ່ອນຍັງງຸ່ມງ່າມ. ວຽກງານການໂຄສະນາຍັງບໍ່ໄດ້ຜັນຂະຫຍາຍຢ່າງກວ້າງຂວາງຢູ່ບັນດາເຂດອຸດສາຫະກຳ, ເຂດປຸງແຕ່ງສິນຄ້າສົ່ງອອກ, ເຂດຊຸມຊົນ. ການຕໍ່ສູ້ປະຕິເສດບັນດາທັດສະນະທີ່ຜິດພາກ ເປັນປໍລະປັກຍັງຕົກໃນທ່າຮັບ, ຄວາມສາມາດໃນການຕໍ່ສູ້ແມ່ນບໍ່ສູງ. ການຕໍ່ສູ້ກັບການສະແດງອອກຂອງຄວາມດສື່ອມໂຊມທາງດ້ານຄຸນສົມບັດ ແລະວິຖີຊີວິດ ຍັງບໍ່ແຂງແຮງ. ວຽກງານກວດກາ, ຕິດຕາມກວດກາການຝຶກຝົນຫຼໍ່ຫຼອມຄຸນສົມບັດ ແລະວິຖີຊີວິດຂອງພະນັກງານ ສະມາຊິກພັກຢູ່ບາງແຫ່ງບໍ່ເປັນປົກກະຕິ, ຈິງຈັງ; ຂອບເຂດ, ເປົ້າໝາຍຍັງແຄບ; ປະສິດທິພາບໃນການກ່າວເຕືອນ, ປ້ອງກັນຍັງຖືກຈຳກັດ; ວຽກງານການສະຫຼຸບຜົນເບື້ອງຕົ້ນຍັງຊ້າ, ບໍ່ໄດ້ຮັບຄວາມເອົາໃຈໃສ່ຢ່າງພຽງພໍ. ສິ່ງດັ່ງກ່າວຮຽກຮ້ອງໃຫ້ຕ້ອງມີວິທີແກ້ໄຂທີ່ເໝາະສົມ ເພື່ອຍູ້ແຮງການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ, ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.
ຊຸກຍູ້ການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ ໃນໄລຍະໃໝ່
ໃນສະຖານະການປະຈຸບັນ, ໂລກກຳລັງຜ່ານການຜັນປ່ຽນທີ່ຍິ່ງໃໝ່ ແລະສືບຕໍ່ມີການຫັນປ່ຽນທີ່ສັບສົນທີ່ສຸດ ແລະບໍ່ສາມາດຄາດເດົາໄດ້. ສັນຕິພາບ, ການຮ່ວມມື ແລະ ການພັດທະນາຍັງແມ່ນທ່າອຽງໃຫຍ່ໃນທົ່ວໂລກ, ແຕ່ບັນຫາການແກ່ງແຍ້ງແຂ່ງຂັນຍຸດທະສາດລະຫວ່າງບັນດາປະເທດໃຫຍ່, ການປະທະກັນໃນທ້ອງຖິ່ນຍັງເກີດຂຶ້ນພາຍໃຕ້ຫຼາຍຮູບແບບ, ຍາກກວ່າ, ຮ້າຍແຮງກວ່າ, ເພີ່ມຄວາມສ່ຽງຕໍ່ສະພາບແວດລ້ອມເສດຖະກິດ, ການເມືອງ ແລະ ຄວາມປອດໄພສາກົນ.
ພາຍຫຼັງ 35 ປີແຫ່ງການປ່ຽນແປງໃໝ່, ຫວຽດນາມໄດ້ບັນລຸຜົນສຳເລັດຫຼາຍຢ່າງທີ່ໃຫຍ່ຫຼວງແລະມີຄວາມໝາຍປະຫວັດສາດ. ທ່າ, ພະລັງ ແລະ ກຳລັງແຮງສັງລວມຂອງປະເທດຊາດນັບມື້ນັບໄດ້ຮັບການຍົກສູງ. “ປະເທດເຮົາບໍ່ເຄີຍມີພາລະກິດອັນຍິ່ງໃຫຍ່, ຄວາມສາມາດຊ້ອນແຝງ, ຖານະຕຳ ແລະ ກຽດສັກສີສາກົນຄືທຸກວັນນີ້”(8). ສະພາບການສາກົນແລະໃນປະເທດ ມີທັງຄວາມສະດວກ ແລະ ຄວາມຫຍຸ້ງຍາກ, ສິ່ງທ້າທາຍແຊກຊ້ອນກັນ, ກໍ່ໃຫ້ເກີດບັນຫາໃໝ່ທີ່ຮີບດ່ວນ ຫຼາຍກວ່າ ແລະໜັກກວ່າອີກ ຕໍ່ພາລະກິດການກໍ່ສ້າງແລະການປົກປັກຮັກສາປະເທດຊາດ. “ໄພອັນຕະລາຍສີ່ປະການທີ່ພັກຊີ້ອອກຍັງມີຢູ່ ແລະ ຮ້າຍແຮງກວ່າ; ໄພຂົ່ມຂູ່ຕໍ່ເອກະລາດ, ອະທິປະໄຕ, ຜົນປະໂຫຍດຍຸດທະສາດຂອງປະເທດ... ພາວະການເຊື່ອມໂຊມ, “ການຫັນປ່ຽນຕົນເອງ”, “ການປ່ຽນແປງຕົນເອງ” ຢູ່ພາຍໃນ; ການຕໍ່ຕ້ານຢ່າງດຸເດືອດແລະການທຳລາຍຢ່າງຮ້າຍແຮງຂອງກຳລັງສັດຕູແລະອົງການຈັດຕັ້ງປະຕິການ...”(9). ສິ່ງດັ່ງກ່າວຮຽກຮ້ອງໃຫ້ທົ່ວພັກສືບຕໍ່ປ່ຽນໃໝ່ຈິນຕະນາການຢ່າງແຂງແຮງ, ມີຄວາມຕັດສິນໃຈການເມືອງສູງ, ເປັນເຈົ້າການຮັບມືຢ່າງທັນການກັບທຸກສະຖານະການ, ສືບຕໍ່ຍູ້ແຮງການປ່ຽນແປງໃໝ່ຢ່າງຮອບດ້ານ ຄົບຊຸດ, ເພີ່ມກຳລັງແຮງທຸກດ້ານຂອງປະເທດ, ນຳປະເທດກ້າວຂຶ້ນຢ່າງໜັ້ກໜ້ນ. ໃນນັ້ນ, ຕ້ອງເອົາໃຈໃສ່ເປັນພິເສດເຖິງການຍູ້ແຮງວຽກງານການກໍ່ສ້າງແລະປັບປຸງພັກຍິ່ງກວ່າອີກ, ເພື່ອໃຫ້ພັກເຮົາສະອາດປອດໃສ ໝັ້ນຄົງເຂັ້ມແຂງຢ່າງແທ້ຈິງ, ນຳພາປະເທດພັດທະນາຢ່າງໄວແລະຍືນຍົງ.
ກອງປະຊຸມໃຫຍ່ຄັ້ງທີ 13 ຂອງພັກໄດ້ເນັ້ນໝັກວ່າ: “ໃນຊຸມປີທີ່ຈະມາເຖິງຕ້ອງໃຫ້ຄວາມສຳຄັນເປັນພິເສດ ແລະຍູ້ແຮງກວ່າອີກ ການກໍ່ສ້າງແລະປັບປຸງພັກຢ່າງຮອບດ້ານ ທາງດ້ານການເມືອງ, ແນວຄິດ, ຄຸນສົມບັດ, ການຈັດຕັ້ງ ແລະ ພະນັກງານ... ຍຶດໝັ້ນ, ໝູນໃຊ້ ແລະ ພັດທະນາລັດທິມາກ-ເລນິນ ແລະ ແນວຄິດໂຮ່ຈີມິນຢ່າງປະດິດສ້າງ ໃຫ້ສອດຄ່ອງກັບພຶດຕິກຳຕົວຈິງຂອງຫວຽດນາມໃນແຕ່ລະໄລຍະ. ຍຶດໝັ້ນເປົ້າໝາຍເອກະລາດແຫ່ງຊາດແລະລັດທິສັງຄົມນິບົມ. ຍຶດໝັ້ນແນວທາງການປ່ຽນແປງໃໝ່ ເພື່ອເປົ້າໝາຍປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ ຍຸຕິທຳ ແລະສີວິໄລ”(10).
ມະຕິກອງປະຊຸມໃຫຍ່ຄັ້ງທີ 13 ຂອງພັກກໍ່ໄດ້ຢືນຢັນ: ເດັດດ່ຽວ, ຕັ້ງໝັ້ນໃນການປະຕິບັດມະຕິກອງປະຊຸມສູນກາງພັກຄັ້ງທີ 4 ສະໄໝທີ 11, ມະຕິກອງປະຊຸມສູນກາງພັກຄັ້ງທີ 4 ສະໄໝທີ 12 ກ່ຽວກັບການກໍ່ສ້າງພັກ ຕິດກັບການຍູ້ແຮງການຮ່ຳຮຽນແລະປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ ດ້ວຍບັນດາວິທີການທີ່ແຂງແຮງ, ດຸເດືອດ ແລະ ຄົບຊຸດ ເພື່ອກີດກັ້ນ, ຍູ້ຖອຍການເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ບັນດາປະກົດການ “ຫັນປ່ຽນຕົນເອງ”, “ປ່ຽນແປງຕົນເອງ” ຢູ່ພາຍໃນ. ປະຕິບັດການຕິຊົມແລະຕິຊົມຕົນເອງຢ່າງເຂັ້ມງວດແຕ່ສູນກາງຈົນເຖິງໜ່ວຍພັກ; ຄະນະພັກຂັ້ນເທິງແນະນຳການທົບທວນຄືນຢ່າງຕັ້ງໜ້າສຳລັບໝູ່ຄະນະ ແລະ ບຸກຄົນ ໃນສະຖານທີ່ທີ່ມີບັນຫາສັບສົນ, ມີປະກົກການຂອງການເສື່ອມໂຊມ, “ປ່ຽນແປງຕົນເອງ”, “ຫັນປ່ຽນຕົນເອງ”; ໃຫ້ຄວາມສຳຄັນກັບການກວດກາການແກ້ໄຂຜ່ານຜ່າຂໍ້ຈຳກັດ, ຂໍ້ບົກພ່ອງ (11)
ບົນຈິດໃຈສົ່ງເສີມຜົນສຳເລັດ, ປະສົບການໃນການຈັດຕັ້ງປະຕິບັດຄຳສັ່ງເລກທີ 05 ໃນເວລາທີ່ຜ່ານມາ, ທົ່ວພັກ, ທົ່ວປວງຊົນ ແລະ ທົ່ວກອງທັບສືບຕໍ່ຍູ້ແຮງການຮ່ຳຮຽນແລະ ປະຕິບັດຕາມລຸງໂຮ່. ຊຸກຍູ້ ແລະສ້າງການຫັນປ່ຽນຢ່າງແຂງງແຮງຈາກ “ການຮ່ຳຮຽນ” ໄປເປັນ “ການປະຕິບັດຕາມ” ລຸງໂຮ່, ເຮັດໃຫ້ແນວຄິດ, ຄຸນສົມບັດ, ແບບແຜນຂອງເພິ່ນຊຶມເລິກເຂົ້າໃນຊີວິດສັງຄົມ, ກາຍເປັນວິຖີຊີວິດ, ຄວາມນຶກຄິດ ແລະວິທີປະຕິບັດ ຂອງພະນັກງານ ສະມາຊິກພັກ ແລະປະຊາຊົນທຸກຄົນ. ຈາກນັ້ນ, ຍົກສູງນ້ຳໃຈຮັກຊາດ, ເຈດຈຳນົງສ້າງຊາດໃຫ້ເຂັ້ມແຂງ, ຄວາມປາຖະໜາອຸທິດ, ການພັດທະນາປະເທດໃຫ້ຈະເລີນຮຸ່ງເຮືອງ ແລະ ຄວາມສຸກ ຂອງບະນດາຄະນະພັກ, ອົງການຈັດຕັ້ງພັກ, ພະນັກງານ ສະມາຊິກພັກ ແລະ ປະຊາຊົນ, ປະກອບສ່ວນປະຕິບັດມະຕິກອງປະຊຸມໃຫຍ່ຄັ້ງທີ 13 ຂອງພັກໃຫ້ສຳເລັດຜົນ. ໃນເວລາທີ່ຈະມາເຖິງ, ຕ້ອງສຸມໃສ່ປະຕິບັດສາມບັນຫາໃຫ້ໄດ້ເປັນຢ່າງດີຄື: “ຮ່ຳຮຽນ, ປະຕິບັດຕາມລຸງໂຮ່ ແລະ ການເປັນແບບຢ່າງຂອງພະນັກງານ ສະມາຊິກພັກ”, ປະຕິບັດຢ່າງມີປະສິດທີຜົນ ບັນດາໜ້າທີ່, ວິທີແກ້ໄຂທີ່ສຳຄັນດັ່ງນີ້:
ທີໜຶ່ງ, ສືບຕໍ່ຍົກສູງຄວາມຮັບຮູ້ຂອງໃຫ້ພະນັກງານ ສະມາຊິກພັກ ກ່ຽວກັບເນື້ອໃນ ຄວາມໝາຍຂອງແນວຄິດ, ຄຸນສົມບັດ, ແບບແຜນໂຮ່ຈີມິນ; ເຮັດໃຫ້ທົ່ວພັກ, ທົ່ວກອງທັບ, ທົ່ວປວງຊົນເຮົາຮັບຮູ້ຢ່າງເລິກເຊິ່ງເຖິງຄວາມໝາຍອັນໃຫຍ່ຫຼວງຂອງແນວຄິດໂຮ່ຈີມິນ; ເຮັດໃຫ້ແນວຄິດ, ຄຸນສົມບັດ, ແບບແຜນຂອງເພິ່ນ ກາຍເປັນພື້ນຖານຈິດໃຈອັນໜັກແໜ້ນ, ເປັນແຫຼ່ງຄວາມເຂັ້ມແຂງຂອງຊີວິດສັງຄົມ, ກໍ່ສ້າງວັດທະນະທຳແລະຄົນຫວຽດນາມທີ່ຕອບສະໜອງຄວາມຕ້ອງການພັດທະນາແບບຍືນຍົງ ແລະປົກປັກຮັກສາປະເທດຊາດຢ່າງໝັ້ນຄົງ, ເພື່ອເປົ້າໝາຍປະຊາຊົນຮັ່ງມີ, ປະເທດຊາດເຂັ້ມແຂງ, ມີປະຊາທິປະໄຕ, ຍຸຕິທຳ ແລະ ສີວິໄລ.
ທີສອງ, ສົມທົບຢ່າງແໜ້ນແຟ້ນລະຫວ່າງ “ການຮ່ຳຮຽນ” ແລະ “ການປະຕິບັດຕາມ” ລຸງໂຮ່ ໃນການປະຕິບັດໜ້າທີ່ຂອງແຕ່ລະທ້ອງຖິ່ນ, ສຳນັກງານ ອົງການ ກົມກອງ. ເພີ່ມທະວີວຽກງານການນຳພາ ຊີ້ນຳ, ສ້າງຄວາມເປັນເອກະພາບທາງດ້ານເຈດຈຳນົງແລະການກະທຳ ໃນບັນດາຄະນະພັກ, ໂດຍສະເພາະແມ່ນຄວາມຮັບຜິດຊອບຂອງຫົວໜ້າ ກ່ຽວກັບການສືບຕໍ່ຍູ້ແຮງການປະຕິບັດຄຳສັ່ງເລກທີ 05. ສືບຕໍ່ຫັນບັນດາເນື້ອໃນ, ໜ້າທີ່ຂອງຄຳສັ່ງເລກທີ 05 ເປັນແຜນງານການກະທຳ, ກຳນົດ ຢ່າງຖືກຕ້ອງແລະຊັດເຈນຂອດບຸກທະລຸແລະບັນຫາທີ່ຍັງຄົງຄ້າງ, ແກ້ໄຂບັນຫາທີ່ຍັງຄ້າງຄາ ບັນຫາທີ່ເຮັດໃຫ້ເກີດຄວາມວຸ້ນວາຍໃຫ້ໄດ້ຢ່າງຂາດຕົວ, ປະຕິບັດໜ້າທີ່ເສດຖະກິດ-ສັງຄົມຢ່າງມີປະສິດທິຜົນ.
ທີສາມ, ສົ່ງເສີມການເພີ່ມທະວີບົດບາດແລະຄວາມຮັບຜິດໃນການເປັນແບບຢ່າງຂອງພະນັກງານ ສະມາຊິກພັກ, ໂດຍສະເພາຂອງຫົວໜ້າ, ກ່ອນອື່ນໝົດແມ່ນບັນດາສະຫາຍກຳມະການກົມການເມືອງ, ກຳມະການຄະນະເລຂາທິການ, ກຳມະການຄະນະບໍລິຫານງານສູນກາງພັກ, ພະນັກງານມີຕຳແໜ່ງສູງແມ່ນຕ້ອງເປັນແບບຢ່າງທີ່ດີ, ເພື່ອຢືນຢັນບົດບາດນຳພາ, ການນຳໜ້າ ແລະ ການເປັນແບບຢ່າງ “ຂັ້ນເທິງກ່ອນ, ຂັ້ນລຸ່ມຕາມຫຼັງ”, “ສະມາຊິກພັກໄປກ່ອນ, ມະຫາຊົນຕາມຫຼັງ” ຂອງພະນັກງານ ສະມາຊິກພັກ. ເຊື່ອມຕໍ່ຄວາມຮັບຜິດຊອບເປັນແບບຢ່າງໃນການຮ່ຳຮຽນແລະປະຕິບັດຕາມລຸງໂຮ່ ກັບຂະບວນການແຂ່ງຂັນ, ການຂົນຂວາຍຂອງບັນດາທ້ອງຖິ່ນ, ຂະແໜງການ, ແນໃສ່ສົ່ງເສີມຈິດໃຈອຸທິດຕົນ, ຄວາມປາດຖະໜາພັດທະນາປະເທດໃຫ້ຈະເລີນຮຸ່ງເຮືອງ ແລະມີຄວາມສຸກ ຢູ່ໃນທົ່ວພັກ ທົ່ວສັງຄົມ. ຖືວ່ານີ້ເປັນແບບວິທີການນຳພາທີ່ສຳຄັນໃນວຽກງານການກໍ່ສ້າງພັກ.
ທີສີ່, ຄົ້ນຄວ້າ, ເພີ່ມເຕີມ, ບູລະນະບັນດາມາດຕະຖານຄຸນສົມບັດປະຕິວັດ ໃຫ້ສອດຄ່ອງກັບເງື່ອນໄຂໃໝ່, ເພື່ອເປັນພື້ນຖານໃຫ້ພະນັກງານ ສະມາຊິກພັກຝຶດຝົນຫຼໍ່ຫຼອມຕົນເອງຢ່າງຕື່ນຕົວ. ຍູ້ແຮງການອົບຮົມສຶກສາຄຸນສົມບັດປະຕິວັດ, ເຮັດໃຫ້ພະນັກງານ ສະມາຊິກພັກທຸກຄົນເຫັນແຈ້ງໜ້າທີ່ແລະຄວາມຮັບຜິດຊອບຂອງຕົນ, ຍົກສູງຄວາມກ້າຫານການເມືອງ, ຕໍ່ສູ້ຢ່າງມີປະສິດທິພາບ ກັບປະກົດການທຸກຢ່າງຂອງລັດທິເອກະຊົນ, ພະຍາດອາດຍາສິດ, ສວຍໂອກາດ, ພາກສ່ວນພັກພວກ, ຜົນປະໂຫຍດໝູ່ພວກ, ເສຍຄວາມສາມັກຄີພາຍໃນ, ຕ້ານຄວາມເສື່ອມໂຊມທາງດ້ານແນວຄິດການເມືອງ, ຍົກສູງຄວາມຮັບຮູ້ໃນການຝຶກຝົນຫຼໍ່ຫຼອມຕົນເອງ, “ເວົ້າໄປຄຽງຄູ່ກັບເຮັດ”, “ຝຶກຝົນຫຼໍ່ຫຼອມຕົນຕະຫຼອດຊີວິດ”, “ກວດກາຕົນເອງ”, “ແກ້ໄຂດ້ວຍຕົນເອງ” ຢ່າງເປັນປົກກະຕິ.
ປະຕິບັດສອງໜ້າທີ່ “ສ້າງ” ແລະ “ຕ້ານ” ໄປພ້ອມໆກັນ, ຖືເອົາການ “ສ້າງ” ເປັນພື້ນຖານ ເປັນຍຸດທະສາດ, ການ “ຕ້າມ” ເປັນສຳຄັນ ຮີບດ່ວນ. “ສ້າງ” ແມ່ນການຈັດຕັ້ງເປັນຢ່າງດີ ບັນດາຂະບວນການແຂ່ງຂັນກັນຮັກຊາດ, ບັນດາໜ້າທີ່ພັດທະນາເສດຖະກິດ-ສັງຄົມ. “ຕ້ານ” ແມ່ນການຕໍ່ສູ້, ກີດກັ້ນ, ຍູ້ຖອຍສະພາບຄວາມເສື່ອມໂຊມທາງດ້າແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ. ຕັ້ງໝັ້ນ, ເດັດດ່ຽວຕໍ່ສູ້ປ້ອງກັນແລະຕ້ານຢ່າງມີປະສິດທິພາບ ກັບລັດທິສວຍໂອກາດ, ລັດທິແກ້, ຄຳພີຕາຍຕົວ, ອະນຸລັກນິຍົມ, ພັກພວກ, ບັນດາປະກົດການຂອງຄວາມເສື່ອມໂຊມ, “ການປ່ຽນແປງຕົນເອງ”, “ການຫັນປ່ຽນຕົນເອງ”, ການສໍ້ລາດບັງຫຼວງ, ຄວາມຫຍໍ້ທໍ້ຕ່າງໆ ດ້ວຍຈິດໃຈບໍ່ມີເຂດຈໍາກັດ, ບໍ່ມີຂໍ້ຍົກເວັ້ນ, ບໍ່ຢຸດຢັ້ງ, ບໍ່ຍອມຮັບການກະທົບຈາກອົງການຈັດຕັ້ງຫຼືບຸກຄົນໃດໆ. ຍົກສູງການປຸກສະຕິ, ກ່າວເຕືອນຕໍ່ແນວຄິດແລະປະກົດການຂອງຄວາມຫຍໍ້ທໍ້ເລວຊາມ. ສົ່ງເສີມ, ປຸກລະດົມກຳລັງໃຈໃຫ້ພະນັກງານ ສະມາຊິກພັກຄົ້ນຄິດແລະກະທຳ ເພື່ອຜົນປະໂຫຍດແລະຄວາມສຸກຂອງປະຊາຊົນ.
ທີຫ້າ, ປ່ຽນແປງໃໝ່ຢ່າງແຂງແຮງໃນເນື້ອໃນ, ຮູບການ, ວິທີການຮ່ຳຮຽນແລະໂຄສະນາກ່ຽວກັບແນວຄິດ, ຄຸນສົມບັດ, ແບບແຜນໂຮ່ຈີມິນ ໃນພະນັກງານ ສະມາຊິກພັກ ປະຊາຊົນ, ໂດຍສະເພາະແມ່ນໃນຊາວໜຸ່ມ, ຊຸມຊົນຊາວຫວຽດນາມຢູ່ຕ່າງປະເທດ. ຍູ້ແຮງການຄົ້ນພົບ, ບຳລຸງສ້າງ, ຍ້ອງຍໍຊົມເຊີຍ, ໂຄສະນາເຜີຍແຜ່ບັນດາແບບຢ່າງແລະຮູບແບບທີ່ດີເດັ່ນໃນການຮ່ຳຮຽນແລະປະຕິບັດຕາມລຸງໂຮ່. ສ້າງແຮງແຜ່ກະຈາຍ ຜົນກະທົບກວ້າງຂວາງ, ເຮັດໃຫ້ການ “ຮ່ຳຮຽນ” ມີການປ່ຽນແປງຢ່າງຕັ້ງໜ້າໄປເປັນ “ການປະຕິບັດຕາມ”, ນຳເອົາການ “ປະຕິບັດຕາມ” ລຸງໂຮ່ ປະຈຳວັນຂອງພະນັກງານສະມາຊິກພັກ ຈາກວຽກນ້ອຍໆ, ຕິດພັນກັບຄວາມຮັບຜິດຊອບ, ຈັນຍາບັນການງານ ນັບມື້ນັບເປັນລະບຽບແລະ ຄ່ອຍໆຍົກສູງຄຸນນະພາບ ແລະປະສິດທິຜົນ.
ທີຫົກ, ສືບຕໍ່ປ່ຽນແປງໃໝ່ແລະຍົກສູງຄຸນນະພາບຂອງການຄົ້ນຄວ້າ, ໝູນໃຊ້ແລະພັດທະນາລັດທິມາກ-ເລນິນ ແລະ ແນວຄິດໂຮ່ຈີມິນ, ຕອບສະໜອງຄວາມຕ້ອງການຂອງພາລະກິດການສ້າງສາ ແລະ ປົກປັກຮັກສາປະເທດຊາດ ໃນສະພາບການໃໝ່, ຕາມທິດວິທະຍາສາດ, ປະດິດສ້າງ, ທັນສະໄໝ ແລະ ຕິດແໜ້ນທິດສະດິກັບພຶດຕິກຳຕົວຈິງ, ສອດຄ່ອງກັບແຕ່ລະເປົ້າໝາຍ. ສຸມໃສ່ການຄົ້ນຄວ້າ, ກຳນົດ ແລະຜັນຂະຫຍາຍການກໍ່ສ້າງລະບົບຄຸນຄ່າແຫ່ງຊາດ, ລະບົບຄຸນຄ່າວັດທະນະທໍາ ແລະ ມາດຕະຖານມະນຸດ ຕິດກັບການປົກປັກຮັກສາ ແລະ ພັດທະນາລະບົບຄຸນຄ່າຄອບຄົວຫວຽດນາມ ໃນໄລຍະໃໝ່. ກໍ່ສ້າງແລະປະຕິບັດບັນດາມາດຕະຖານວັດທະນະທໍາໃນການນຳພາ, ຄຸ້ມຄອງ. ສົ່ງເສີມການສ້າງສັນແລະເຜີຍແຜ່ງານວັນນະກຳ ສິລະປະ ແລະ ສື່ວມນຊົນກ່ຽວກັບການຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ແບບແຜນໂຮ່ຈີມິນ.
ທີເຈັດ, ຍົກສູງລັກສະນະວິທະຍາສາດ ແລະ ລັກສະນະສູ້ຮົບ ໃນການຕໍ່ສູ້ປະຕິເສດບັນດາທັດສະນະທີ່ຜິດພາດ ເປນປໍລະປັກ, ສວຍໂອກາດທາງການເມືອງ; ເປັນເຈົ້າການໃນການສື່ສານຢ່າງທັນການ, ຊັດເຈນ, ພາວະວິໄສ, ຖືກຕ້ອງຕາມການກຳນົດທິດ ໃນການປ້ອງກັນແລະຕ້ານ “ການຫັນປ່ຽນໂດຍສັນຕິ”, ລົບຂໍ້ມູນທີ່ບໍ່ດີແລະເປັນພິດໃນອິນເຕີເນັດ, ເຄືອຂ່າຍສັງຄົມ, ເພື່ອໃຫ້ພະນັກງານ ສະມາຊິກພັກ ແລະ ປະຊາຊົນມີຄວາມຮັບຮູ້ຢ່າງຖືກຕ້ອງ ແລະ ຕັ້ງໜ້າ ໃນການເຂົ້າຮ່ວມການປົກປ້ອງຮາກຖານແນວຄິດຂອງພັກ, ເຮັດໃຫ້ແນວຄິດທີ່ກ້າວໜ້າຊຶມເລິກເຂົ້າໃນຊີວິດສັງຄົມ, ມີຄຸນປະໂຫຍດໃນການດັດປັບແນວຄິດ ປະກົດການທີ່ຜິດເຂວ, ບຳລຸງສ້າງໂລກກະທັດ, ວິທີວິທະຍາ ແລະ ຄວາມເຊື່ອຖືດ້ານວິທະຍາສາດ ໃນພະລັກງານ ສະມາຊິກພັກ ແລະ ປະຊາຊົນ, ປັບປຸງຄວາມສາມັກຄີ ເປັນເອກະພາບໃນພັກ ແລະ ຄວາມເຫັນດີເຫັນພ້ອມໃນສັງຄົມ.
ທີແປດ, ເພີ່ມທະວີວຽກງານກວດກາ ຕິດຕາມກວດກາການປະຕິບັດ ຄຳສັ່ງເລກທີ 05 ຕິດກັບການປະຕິບັດມະຕິກອງປະຊຸມສູນກາງພັກຄັ້ງທີ 4 (ສະໄໝທີ 11 ແລະ 12) ແນໃສ່ປຸກສະຕິ, ກ່າວເຕືອນ, ຄົ້ນເຜີຍໄວ, ກີດກັ້ນຢ່າງທັນການ ຕໍ່ການລະເມີດວິໄນຂອງພັກ, ລະເມີດກົດໝາຍຂອງລັດ, ຮັບປະກັນໃຫ້ການຮ່ຳຮຽນແລະປະຕິບັດຕາມລຸງໂຮ່ ດຳເນີນໄປຢ່າງເຂັ້ມງວດ ມີປະສິດທິຜົນ ແລະແທດຈິງ. ເສີມຂະຫຍາຍບົດບາດຕິດຕາມກວດກາຂອງບັນດາອົງການໂດຍປະຂາຂົນເລືອກຕັ້ງ, ແນວໂຮມປະເທດຊາດຫວຽດນາມ, ບັນດາອົງການຈັດຕັ້ງການເມືອງ-ສັງຄົມ, ໜັງສືພິມສື່ມວນຊົນ ແລະ ປະຊາຊົນ ຕໍ່ການປະຕິບັດຂໍ້ກຳນົດກ່ຽວກັບການເປັນແບບຢ່າງ. ຖືເອົາຜົນຂອງວຽກງານ, ຄວາມເພີງພໍໃຈ ແລະຄວາມໄວ້ວາງໃຈຂອງປະຊາຊົນ ເປັນຕົວຊີ້ວັດປະເມີນຄຸນນະພາບຂອງອົງການຈັດຕັ້ງພັກ, ຂອງພະນັກງານ ສະມາຊິກພັກ. ປະຕິບັດຢ່າງເຂັ້ມງວດຕາມລະບຽບການຕໍ່ພະນັກງານ ສະມາຊິກພັກທີ່ລະເມີດລະບຽບວິໄນ. ຍ້ອງຍໍຢ່າງທັນເວລາຕໍ່ແບບຢ່າງທີ່ກ້າວໜ້າ, ຕົວຢ່າງທີ່ສົດໃສຂອງຄຸນສົມບັດ ແລະ ວິຖີຊີວິດ.
ປະທານໂຮ່ຈີມິນໄດ້ສ້າງແລະມອບໂອນມໍລະດົກອັນລ້ຳຄ່າ ໃຫ້ພັກກອມມູນິດຫວຽດນາມ ແລະ ປະຊາຊົນຫວຽດນາມ. ນັ້ນແມ່ນຍຸກສະໄໝໂຮ່ຈີມິນ; ແມ່ນແນວຄິດ, ຄຸນສົມບັດ, ແບບແຜນໂຮ່ຈີມິນ. “ຊາດເຮົາ, ປະຊາຊົນເຮົາ, ແຜ່ນດິນປະເທດເຮົາ ໄດ້ໃຫ້ກຳເນີດປະທານໂຮ່ຈີມິນ ວິລະຊົນແຫ່ງຊາດຜູ້ຍິ່ງໃຫຍ່ ແລະ ເພິ່ນເອງເປັນຜູ້ເຮັດໃຫ້ຊາດເຮົາ, ປະຊາຊົນເຮົາ ແລະ ແຜ່ນດິນປະເທດເຮົາ ຮຸ່ງເຮືອງເຫຼືອງເຫຼື້ອມ”(12). ຊີວິດແລະພາລະກິດປະຕິວັດອັນຍິ່ງໃຫຍ່ຂອງເພີ່ນ ຍາມໃດກໍ່ແມ່ນສັນຍາລັກແຫ່ງການປະຕິວັດ, ແມ່ນປະພາຄານຊີ້ທິດໃຫ້ແກ່ພາລະກິດປະຕິວັດຂອງປະເທດຊາດ, ແລະ ເປັນແບບຢ່າງທີ່ໃສແຈ້ງໃຫ້ຄົນລຸ້ນຫຼັງຂອງຊາວຫວຽດນາມ ສືບຕໍ່ປະຕິບັດຕາມ. ການຮ່ຳຮຽນແລະຝຶກຝົນຫຼໍ່ຫຼອມຕາມແບບຢ່າງຂອງປະທານໂຮ່ຈີມິນ ໄດ້, ກຳລັງ ແລະ ຍາມໃດກໍ່ເປັນເກນ, ບັນທັດຖານ, ທິດນຳ ສຳລັບການກະທຳ ແລະ ມາດຕະການການປະຕິບັດງານຂອງພະນັກງານ ສະມາຊິກພັກ, ຖືກຖືວ່າເປັນກຳລັງໜູນແລະແຫຼ່ງກຳລັງ ເພື່ອໃຫ້ທົ່ວພັກສູ້ຊົນຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ຕອບສະໜອງຄວາມຮຽກຮ້ອງຕ້ອງການຂອງການປະຕິສັດໃນໄລຍະໃໝ່./.
--------------
(1) ສຸນທອນພົດຂອງເລຂາທິການໃຫຍ່, ປະທານປະເທດ ຫງວຽນຝູຈ້ອງ ໃນພິທີສະເຫຼີມສະຫຼອງວັນຄ້າຍວັນເກີດຂອງປະທານໂຮ່ຈີມິນຄົບຮອບ 130 ປີ, https://nhandan.vn/tin-tuc-su-kien/dien-van-cua-tong-bi-thu-chu-tich-nuoc-nguyen-phu-trong-tai-le-ky-niem-130-nam-ngay-sinh-chu-tich-ho-chi-minh-458617/
(2) ຕັ້ງແຕ່ຂະບວນການປະຕິບັດຄຳສັ່ງເລກທີ 23-CT/TW, ວັນທີ 27 ມີນາ 2003, ຂອງຄະນະເລຂາທິການສູນກາງພັກສະໄໝທີ 9, “ກ່ຽວກັບການຍູ້ແຮງການຄົ້ນຄວ້າ, ໂຄສະນາ ແລະສຶກສາອົບຮົມແນວຄິດໂຮ່ຈີມິນໃນໄລຍະໃໝ່”, ຄຳສັ່ງເລກທີ 06-CT/TW, ວັນທີ 7 ພະຈິກ 2006, ຂອງກົມການເມືອງສູນກາງສະໄໝທີ 10, “ກ່ຽວກັບການຈັດຕັ້ງການຂົນຂວາຍໃຫ້ “ຮ່ຳຮຽນແລະປະຕິບັດຕາມແບບຢ່າງຄຸນສົມບັດຂອງໂຮ່ຈີມິນ”” ແລະຄຳສັ່ງເລກທີ 03-CT/TW, ວັນທີ 14 ພຶດສະພາ 2011, ຂອງກົມການເມືອງສູນກາງສະໄໝທີ 11, “ກ່ຽວກັບການສືບຕໍ່ຍູ້ແຮງການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດໂຮ່ຈີມິນ”
(3) ຕາມຜົນການສຳຫຼວດຄວາມເຫັນຂອງສັງຄົມໃນເດືອນມີນາ 2021 ຂອງຄະນະໂຄສະນາອົບຮົມສູນກາງ: 79% ຂອງຜູ້ຕອບແບບສອບຖາມເຊື່ອວ່າການປະຕິບັດຄໍາສັ່ງເລກທີ 05 “ຊ່ວຍໃຫ້ພະນັກງານ ສະມາຊິກພັກ ແລະປະຊາຊົນ ມີຄວາມຮັບຮູ້ຢ່າງເລິກເຊິ່ງກ່ຽວກັບບັນດາເນື້ອໃນພື້ນຖານ ແລະ ຄຸນຄ່າອັນໃຫຍ່ຫຼວງຂອງແນວຄິດ, ຄຸນສົມບັດ ແລະ ແບບແຜນໂຮ່ຈີມິນ.”
(4) ຄະນະພັກ, ພະນັກງານ, ສະມາຊິກພັກ, ຫົວໜ້າ, ໂດຍສະເພາະແມ່ນບັນດາສະຫາຍກຳມະການກົມການເມືອງສູນກາງ, ກຳມະການຄະນະເລຂາທິການສູນກາງ, ກຳມະການຄະນະບໍລິຫານງານສູນກາງ ໄດ້ປະຕິບັດການເປັນແບບຢ່າງ ດ້ວຍວຽກງານແລະການກະທໍາສະເພາະ, ໃນທຸກດ້ານ ຕັ້ງແຕ່ແນວຄິດການເມືອງ ຈົນເຖິງຄຸນສົມບັດ, ແບບແຜນດຳລົງຊີວິດ, ການຕິຊົມຕົນເອງແລະຕິຊົມ, ໃນການພົວພັນກັບປະຊາຊົນ, ຄວາມຮັບຜິດຊອບ, ສະຕິຕໍ່ການຈັດຕັ້ງລະບຽບວິໄນ,... ດ້ວຍທິດນຳ “ຂັ້ນເທິງກ່ອນ, ຂັ້ນລຸ່ມຕາມຫຼັງ”, “ສະມາຊິກພັກໄປກ່ອນ, ມະຫາຊົນຕາມຫຼັງ”, “ການຮ່ຳຮຽນໄປຄຽງຄູ່ກັບການປະຕິບັດຕາມ”. ຜ່ານນັ້ນ, ແກ້ໄຂແບບແຜນວິທີເຮັດວຽກ ແລະ ຊີວິດການເປັນຢູ່ຂອງພະນັກງານ ສະມາຊິກພັກຢ່າງທັນການ, ເປັນແບບຢ່າງ ນຳໜ້າໃນການປະຕິບັດວິຖີຊີວິດທີ່ມີອາລະຍະທຳ, ລຽບງ່າຍ ແລະປະຢັດ, ສ້າງການປ່ຽນແປງທີ່ສຳຄັນທາງດ້ານຄວາມຮັບຮູ້ແລະການກະທຳຂອງພະນັກງານ ສະມາຊິກພັກ ໃນການປະຕິບັດບັນດາໜ້າທີ່ການເມືອງ.
(5) ຜົນການສຳຫຼວດຄວາມເຫັນຂອງສັງຄົມໃນເດືອນກຸມພາ 2020 ຂອງຄະນະໂຄສະນາອົບຮົມສູນກາງ: ການກໍ່ສ້າງແລະປັບປຸງພັກ, ກີດກັ້ນແລະຍູ້ຖອຍຄວາມເສື່ອມໂຊມທາງດ້ານແນວຄິດການເມືອງ, ຄຸນສົມບັດ, ແບບແຜນດຳລົງຊີວິດ, ບັນດາປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ” ໄດ້ຮັບການປະເມີນຈາກພະນັກງານ ສະມາຊິກພັກວ່າ ບັນລຸຜົນສຳເລັດທີ່ຫນ້າພໍໃຈ, ເພີ່ມຂຶ້ນຈາກ 39% ໃນປີ 2018 ເປັນ 59% ໃນປີ 2019; ການປ້ອງກັນແລະຕ້ານການສໍ້ລາດບັງຫຼວງ, ການຟຸມເຟືອຍ, “ຜົນປະໂຫຍດໝູ່ພວກ” ໄດ້ຮັບການປະເມີນຈາກພະນັກງານ ສະມາຊິກພັກວ່າ ບັນລຸຜົນສຳເລັດທີ່ຫນ້າພໍໃຈ, ເພີ່ມຂຶ້ນຈາກ 29% ໃນປີ 2018 ເປັນ 48% ໃນປີ 2019. ຜົນການສຳຫຼວດຄວາມເຫັນຂອງສັງຄົມໃນເດືອນມີນາ 2021: 70% ຂອງຜູ້ຕອບແບບສອບຖາມໃຫ້ຮູ້ວ່າ ການປະຕິບັດຄຳສັ່ງເລັກທີ 05 ໄດ້ “ກີດກັ້ນ, ຍູ້ຖອຍຄວາມເສື່ອມໂຊມທາງດ້ານແນວຄິດ, ການເມືອງ, ຄຸນສົມບັດ, ແບບແຜນດຳລົງຊີວິດ, ບັນດາປະກົດການ “ປ່ຽນແປງຕົນເອງ”, “ຫັນປ່ຽນຕົນເອງ” ຢູພາຍໃນ”.
(6) ຍົກຕົວຢ່າງຄື, ການປັບປຸງແລະຈັດວາງສັບຊ້ອນກົງຈັກໃຫ້ກະທັດລັດຮັດກຸມ, ຍົກສູງປະສິດທິພາບແລະປະສິດທິຜົນການເຄື່ອນໄຫວຂອງລະບົບການເມືອງ ໄດ້ບັນລຸໝາກຜົນທີ່ສຳຄັນ, ມີຈຸດໜັກໃຈກາງ, ໃນເບື້ອງຕົ້ນໄດ້ຜ່ານຜ່າບາງບັນຫາຈຳກັດໃນໄລຍະຍາວ. ກົນໄກການແບ່ງງານ, ການສົມທົບ ແລະ ການຄວບຄຸມອຳນາດລັດລະຫວ່າງບັນດາອົງການຂອງລັດໃນການປະຕິບັດບັນດາອຳນາດນິຕິບັນຍັດ, ອຳນາດບໍລິຫານ ແລະ ອຳນາດຕຸລາການ ນັບມື້ນັບຈະແຈ້ງ; ການປັບປຸງລະບຽບລະບອບກ່ຽວກັບວຽກງານພະນັກງານໃຫ້ສົມບຸນເທື່ອລະກ້າວ, ຍູ້ແຮງການແບ່ງຂັ້ນ, ມອບອຳນາດໄປຄຽງຄູ່ກັບການເພີ່ມທະວີການກວດກາ, ຕິດຕາມກວດກາ, ຄວບຄຸມອຳນາດ. ຫຼາຍບັນຫາທີ່ສັບສົນໃນການກໍ່ສ້າງພັກ ໄດ້ຖືກກ່າວເຖິງໃນຫຼາຍວາລະກອງປະຊຸມໃຫຍ່ຂອງພັກ, ຮອດກອງປະຊຸມໃຫຍ່ຄັ້ງທີ 12 ຂອງພັກ ຈຶ່ງໄດ້ຮັບການແກ້ໄຂໂດຍພື້ນຖານ ແລະ ຊັດເຈນ.
(7) ໃນວາລະກອງປະຊຸມໃຫຍ່ຄັ້ງທີ 12 ຂອງພັກ, ກົມການເມືອງ, ຄະນະເລຂາທິການ ໄດ້ສ້າງຕັ້ງຄະນະກວດກາ 20 ກວ່າຄະນະຢູ່ 30 ກວ່າຄະນະ, ກະຊວງ, ຂະແໜງການ ແລະ ທ້ອງຖິ່ນ ກ່ຽວກັບການຈັດຕັ້ງປະຕິບັດຄຳສັ່ງເລກທີ 05-CT/TW ຕິດກັບມະຕິກອງປະຊຸມສູນກາງພັກຄັ້ງທີ 4 ສະໄໝທີ 12. ຄະນະພັກ, ຄະນະກຳມະການກວດກາທຸກລະດັບ ໄດ້ດຳເນີນການກວດກາຕໍ່ 15.920 ອົງການຈັດຕັ້ງພັກ ແລະ ສະມາຊິກພັກ 47.701 ຄົນ.
(8) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2021, ເຫຼັ້ມ I, ໜ້າ 104
(9) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ II, ໜ້າ 228
(10) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ I, ໜ້າ 180
(11) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ປຶ້ມທີ່ໄດ້ແນະນຳ, ເຫຼັ້ມ II, ໜ້າ 236
(12) ໂຮ່ຈີມິນ: ນິພົນຄົບຊຸດ, ສພຈ. ການເມືອງແຫ່ງຊາດ ສື້ເຖິດ, ຮ່າໂນ້ຍ, 2011, ເຫຼັ້ມ 15, ໜ້າ 627
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 967 (ເດືອນມິຖຸນາ 2021)
