ເສີມຂະຫຍາຍບົດບາດ ແລະ ຍົກສູງປະສິດທິຜົນ
ຂອງວຽກງານການຕ່າງປະເທດປະຊາຊົນ - ເສົາຄ້ຳໜຶ່ງ
ຂອງການທູດຫວຽດນາມທີ່ທັນສະໄໝ ແລະ ຮອບດ້ານ
ຂອງວຽກງານການຕ່າງປະເທດປະຊາຊົນ - ເສົາຄ້ຳໜຶ່ງ
ຂອງການທູດຫວຽດນາມທີ່ທັນສະໄໝ ແລະ ຮອບດ້ານ
ວກ. - ພາຍໃຕ້ການນຳພາຂອງພັກກອມມູນິດຫວຽດນາມ, ສືບທອດມູນເຊື້ອຮັກຊາດ, ເປັນເອກະລາດ, ເປັນເຈົ້າຕົນເອງ, ມິດຕະພາບ, ຄວາມເມດຕາກາລຸນາ ແລະການໝູນໃຊ້ແນວຄິດການທູດໂຮ່ຈີມິນຢ່າງປະດິດສ້າງ, ການຕ່າງປະເທດຫວຽດນາມບັນລຸບັນດາຜົນງານອັນໃຫຍ່ຫຼວງ, ປະກອບສ່ວນອັນສຳຄັນ ເຂົ້າໃນໄຊຊະນະຂອງການຕໍ່ສູ້ຂອງປະຊາຊົນຫວຽດນາມ ເພື່ອເອກະລາດ, ເສລີພາບ, ສັນຕິພາບ ແລະ ການໂຮມປະເທດເປັນເອກະພາບໃນອະດີດ ກໍຄືຜົນສຳເລັດຂອງພາລະກິດການປ່ຽນແປງໃໝ່, ການກໍ່ສ້າງແລະປົດປັກຮັກສາປະເທດຊາດ ແລະ ການເຊື່ອມໂຍງເຂົ້າກັບສາກົນໃນປະຈຸບັນ. ໃນຜົນງານເຫຼົ່ານັ້ນ ມີສ່ວນປະກອບທີ່ສຳຄັນທີ່ສຸດ ຂອງການຕ່າງປະເທດປະຊາຊົນ.
ບັນດາຜູ້ແທນປຶກສາຫາລືຢູ່ນອກກອງປະຊຸມສາກົນກ່ຽວກັບ “ການເພີ່ມທະວີບົດບາດຂອງແມ່ຍິງໃນການສ້າງແລະປັບປຸງສັນຕິພາບ: ຈາກຄວາມມຸ່ງໝັ້ນສູ່ຜົນສຳເລັດ” ຈັດໂດຍກະຊວງການຕ່າງປະເທດຫວຽດນາມຮ່ວມກັບອົງການສະຫະປະຊາຊາດ ໃນຮູບແບບການລວມກັນໂດຍກົງ ແລະ ອອນລາຍ _ພາບ: TTXVN
ແນວຄິດການທູດໂຮ່ຈີມິນ ແລະ ທັດສະນະຂອງພັກກອມມູນິດຫວຽດນາມ
ກ່ຽວກັບບົດບາດທີ່ຕັ້ງຂອງການຕ່າງປະເທດປະຊາຊົນ
ການຕ່າງປະເທດປະຊາຊົນແມ່ນໜຶ່ງໃນຄວາມຄິດປະດິດທີ່ໂດດເດັ່ນຂອງການປະຕິວັດຫວຽດນາມ. ການຊາບຊຶມຢ່າງເລິກເຊິ່ງ ແນວຄິດການທູດໂຮ່ຈີມິນ ແລະ ທັດສະນະຂອງພັກກອມມູນິດຫວຽດນາມ ກ່ຽວກັບການຕ່າງປະເທດປະຊາຊົນ ແມ່ນປັດໄຈທີ່ມີຄວາມໝາຍຕັດສິນ, ແມ່ນບົດຮຽນທີ່ສຳຄັນອັນດັບໜຶ່ງ ທີ່ຖອດຖອນມາຈາກພຶດຕິກຳປະຕິວັດຫວຽດນາມ ແລະ ການເຄື່ອນໄຫວການຕ່າງປະເທດປະຊາຊົນຕະຫຼອດປະຫວັດສາດຂອງປະເທດ.
ໜຶ່ງໃນເນື້ອໃນຫຼັກຂອງແນວຄິດໂຮ່ຈີມິນ ແລະ ແນວທາງແຫ່ງການປະຕິວັດຂອງຫວຽດນາມ ແມ່ນຄວາມສາມັກຄີແຫ່ງຊາດຕ້ອງຕິດພັນກັບຄວາມສາມັກຄີສາກົນ, ລັດທິຮັກຊາດທີ່ແທ້ຈິງຕ້ອງຕິດພັນກັບລັດທິສາກົນທີ່ຜ່ອງໃສຂອງຊົນຊັ້ນກຳມະກອນ, ຄວາມສາມັກຄີຂອງປະຊາຊົນພາຍໃນປະເທດຕິດພັນກັບຄວາມສາມັກຄີຂອງປະຊາຊົນທົ່ວໂລກ. ການໃຫ້ຄວາມສຳຄັນແລະເສີມຂະຫຍາຍບົດບາດຂອງຄວາມສາມັກຄີສາກົນ ແລະ ການຕ່າງປະເທດປະຊາຊົນ ແມ່ນແຜນນະໂຍບາຍທີ່ສະເໝີຕົ້ນສະເໝີປາຍ ແລະສອງຄ່ອງຕະຫຼອດ ຂອງພັກກອມມູນິດຫວຽດນາມ. ປະທານໂຮ່ຈີມິນຊີ້ແຈງວ່າ: “ໃນທ້ອງຟ້າບໍ່ມີສິ່ງໃດມີຄ່າກວ່າປະຊາຊົນ. ໃນໂລກນີ້ບໍ່ມີຫຍັງເຂັ້ມແຂງໄປກວ່າຄວາມສາມັກຄີຂອງປະຊາຊົນ”(2) ແລະ ເພິ່ນເອງໄດ້ວາງຮາກຖານ, ນຳພາ ແລະ ຜັນຂະຫຍາຍການຕ່າງປະເທດປະຊາຊົນໂດຍກົງ.
ໃນວັນເດືອນທຳອິດພາຍຫຼັງການກຳເນີດຂອງສາທາລະນະລັດປະຊາທິປະໄຕຫວຽດນາມ, ເມື່ອປະເທດເຮົາຍັງບໍ່ທັນສ້າງການພົວພັນທາງການທູດກັບປະເທດອື່ນ, ພັກ ແລະ ປະທານໂຮ່ຈີມິນ ໄດ້ຊີ້ນຳການຈັດຕັ້ງບັນດາອົງການການຕ່າງປະເທດປະຊາຊົນທຳອິດຂອງຫວຽດນາມຄື: ສະມາຄົມມິດຕະພາບຫວຽດນາມ-ອາເມລິກາ (ວັນທີ 17 ຕຸລາ 1945) ແລະ ສະມາຄົມມິດຕະພາບຫວຽດນາມ-ຈີນ (ປີ 1946), ກຳນົດແລະຈັດຕັ້ງປະຕິບັດ ບັນດານະໂຍບາຍກ່ຽວກັບຄວາມສາມັກຄີແລະການຮ່ວມສຳພັນ ກັບສອງປະເທດເພື່ອນບ້ານລາວ ແລະ ກໍາປູເຈຍ. ນອກຈາກການສ້າງຕັ້ງການພົວພັນທາງການທູດກັບຫຼາຍປະເທດ, ຫຼາຍອົງການມິດຕະພາບກັບປະຊາຊົນບັນດາປະເທດກໍໄດ້ຮັບການສ້າງຕັ້ງຂຶ້ນໃນຊຸມປີຕໍ່ໄປ ເພື່ອຍາດແຍ່ງເອົາຄວາມເຫັນດີເຫັນພ້ອມ, ການສະໜັບສະໜູນ ແລະ ການຊ່ວຍເຫຼືອຂອງເພື່ອນມິດສາກົນ.
ຄວາມສຳຄັນ, ບົດບາດ ແລະ ໜ້າທີ່ຂອງການຕ່າງປະເທດປະຊາຊົນ ໄດ້ຖືກລວມຢ່າງເປັນທາງການ ເຂົ້າໃນເອກະສານກອງປະຊຸມໃຫຍ່ຂອງພັກກອມມູນິດຫວຽດນາມໃນໄລຍະຕົ້ນ. ເອກະສານກອງປະຊຸມໃຫຍ່ຄັ້ງທີ 2 ຂອງພັກ (ເດືອນກຸມພາ 1951) ກ່ຽວກັບນະໂຍບາຍການທູດ ໄດ້ເນັ້ນໜັກການພັດທະນາການທູດປະຊາຊົນຢ່າງກວ້າງຂວາງ, ເອົາໃຈໃສ່ເປັນພິເສດເຖິງການເຂົ້າຮ່ວມບັນດາຂະບວນການໃໝ່ໃນທົ່ວໂລກ ແລະ ຮັດແໜ້ນການຈັດຕັ້ງການເຄື່ອນໄຫວ ລະຫວ່າງບັນດາອົງການປະຊາຊົນຫວຽດນາມ ແລະ ອົງການປະຊາຊົນໂລກ. ຫຼັງຈາກປະເທດເປັນເອກະພາບ, ທັດສະນະຂອງພັກກອມມູນິດຫວຽດນາມກ່ຽວກັບການຕ່າງປະເທດປະຊາຊົນ ແລະ ແຜນນະໂຍບາຍຜັນຂະຫຍາຍສາມເສົາຄ້ຳການຕ່າງປະເທດຢ່າງຄົບຊຸດ ໄດ້ຮັບການພັດທະນາ ແລະ ປັບປຸງຢ່າງຕໍ່ເນື່ອງ. ເອກະສານກອງປະຊຸມໃຫຍ່ຄັ້ງທີ 4 ຂອງພັກ (ປີ 1976) ໄດ້ກຳນົດໜ້າທີ່ການຕ່າງປະເທດສຳລັບກຸ່ມເປົ້າໝາຍສະເພາະແຕ່ລະກຸ່ມ. ເອກະສານກອງປະຊຸມໃຫຍ່ຄັ້ງທີ 6 ຂອງພັກ (ປີ 1986) ຊີ້ແຈງກ່ຽວກັບອັດຕະພາບ ແລະ ການປະສານງານລະຫວ່າງອັດຕະພາບຂອງການເຄື່ອນໄຫວການຕ່າງປະເທດ, ລວມມີພັກ, ລັດ ແລະ ປະຊາຊົນຫວຽດນາມ. ດ້ວຍຈິນຕະນາການໃໝ່ກ່ຽວກັບການຕ່າງປະເທດ, ກອງປະຊຸມໃຫຍ່ຄັ້ງທີ 7 ຂອງພັກ (ປີ 1991) ໄດ້ເນັ້ນໜັກແຜນນະໂຍບາຍ “ສາມັກຄີກັບບັນດາກອງກຳລັງຕໍ່ສູ້ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມ”, ສ້າງບາດກ້າວບຸກທະລຸ ແລະ ນຳພະລັງໃໝ່ມາໃຫ້ວຽກງານການຕ່າງປະເທດປະຊາຊົນ (3).
ໃນເອກະສານຂອງບັນດາກອງປະຊຸມໃຫຍ່ຄັ້ງທີ 8, 9, 10, 11, 12 ຂອງພັກ ມີເນື້ອໃນທີ່ຕ້ອງການຂະຫຍາຍວຽກງານການຕ່າງປະເທດປະຊາຊົນຕື່ມອີກ, ຊີ້ແຈງເນື້ອໃນແລະໜ້າທີ່ຂອງການຕ່າງປະເທດປະຊາຊົນ ແລະ ຄວາມຈຳເປັນຕ້ອງ “ສົມທົບຢ່າງແໜ້ນແຟ້ນລະຫວ່າງກິດຈະກຳທາງການທູດຂອງລັດ ກັບກິດຈະກຳການຕ່າງປະເທດຂອງພັກ ແລະ ການເຄື່ອນໄຫວດ້ານການຕ່າງປະເທດປະຊາຊົນ... ເຮັດໃຫ້ໂລກເຂົ້າໃຈແຈ້ງກວ່າອີກກ່ຽວກັບດິນແດນ, ຜູ້ຄົນ ແລະ ພາລະກິດການປ່ຽນແປງໃໝ່ຂອງຫວຽດນາມ, ແນວທາງນະໂຍບາຍຂອງພັກແລະລັດຫວຽດນາມ”(4).
ຄໍາສັ່ງເລກທີ 44-CT/TW, ລົງວັນທີ 20 ກັນຍາ 1994, ຂອງຄະນະເລຂາທິການສູນກາງພັກ ຊຸດທີ 7, “ກ່ຽວກັບການເປີດກວ້າງແລະປ່ຽນແປງໃໝ່ກິດຈະກຳການຕ່າງປະເທດປະຊາຊົນ”, ແມ່ນເອກະສານສະບັບທຳອິດຂອງພັກທີ່ໃຊ້ສຳລັບວຽກງານການຕ່າງປະເທດປະຊາຊົນ, ກຳນົດຢ່າງຈະແຈ້ງການຕ່າງປະເທດປະຊາຊົນເປັນພາກສ່ວນໜຶ່ງຂອງວຽກງານການຕ່າງປະເທດທົ່ວໄປຂອງປະເທດເຮົາ, ກຳນົດແຈ້ງຄວາມຕ້ອງການ, ເປົ້າໝາຍ ແລະ ມາດຕະການ ເພື່ອດຳເນີນວຽກງານການຕ່າງປະເທດປະຊາຊົນ(5). ພາຍຫຼັງສະຫຼຸບຄຳສັ່ງເລກທີ 44-CT/TW, ຄະນະເລຂາທິການສູນກາງພັກ ຊຸດທີ 11 ໄດ້ອອກຄຳສັ່ງເລກທີ 04-CT/TW, ລົງວັນທີ 6-7-2011, “ກ່ຽວກັບການສືບຕໍ່ປ່ຽນແປງໃໝ່ ແລະ ຍົກສູງປະສິດທິຜົນຂອງການຕ່າງປະເທດປະຊາຊົນໃນສະພາບການໃໝ່”, ຢືນຢັນທັດສະນະວ່າ ການຕ່າງປະເທດປະຊາຊົນແມ່ນພາກສ່ວນໜຶ່ງຂອງວຽກງານການຕ່າງປະເທດທົ່ວໄປຂອງພັກ ແລະ ລັດຂອງພວກເຮົາ. ການປ່ຽນແປງໃໝ່ ແລະ ຍົກສູງປະສິດທິຜົນຂອງກິດຈະກຳການຕ່າງປະເທດປະຊາຊົນ ແມ່ນໜ້າທີ່ຂອງທັງລະບົບການເມືອງ ແລະ ທົ່ວປວງຊົນ ເຊິ່ງມີແກ່ນຫຼັກຄືແນວໂຮມປະເທດຊາດຫວຽດນາມ, ສະຫະພັນບັນດາອົງການມິດຕະພາບຫວຽດນາມ, ບັນດາອົງການຈັດຕັ້ງມະຫາຊົນ ແລະ ບັນດາອົງການປະຊາຊົນ.
ສຳລັບກຳລັງພິເສດດ້ານການຕ່າງປະເທດປະຊາຊົນຄືສະຫະພັນບັນດາອົງການມິດຕະພາບຫວຽດນາມ (ສະຫະພັນມິດຕະພາບ), ຄະນະເລຂາທິການສູນກາງໄດ້ອອກຄຳສັ່ງເລກທີ 27-CT/TW, ລົງວັນທີ 27 ກໍລະກົດ 1993, “ກ່ຽວກັບໜ້າທີ່ ແລະ ການຈັດຕັ້ງຂອງສະຫະພັນບັນດາອົງການສັນຕິພາບ, ຄວາມສາມັກຄີ ແລະ ມິດຕະພາບຫວຽດນາມ”, ຄຳສັ່ງເລກທີ 28-CT/TW, ລົງວັນທີ 2 ທັນວາ 2008, “ກ່ຽວກັບການສືບຕໍ່ປ່ຽນແປງໃໝ່ ແລະ ປັບປຸງໝາກຜົນການເຄື່ອນໄຫວຂອງສະຫະພັນບັນດາອົງການມິດຕະພາບຫວຽດນາມ”, ແລະ ທີ່ຜ່ານມາມໍ່ນີ້ແມ່ນຄໍາສັ່ງເລກທີ 38-CT/TW, ລົງວັນທີ 19 ກັນຍາ 2019, “ກ່ຽວກັບການສືບຕໍ່ປ່ຽນແປງໃໝ່, ເສີມຂະຫຍາຍບົດບາດ ແລະ ຍົກສູງຄຸນນະພາບ, ປະສິດທິຜົນການເຄື່ອນໄຫວຂອງສະຫະພັນບັນດາອົງການມິດຕະພາບຫວຽດນາມໃນສະພາບການໃໝ່”.
ຜົນງານ ແລະ ການປະກອບສ່ວນຂອງການຕ່າງປະເທດປະຊາຊົນ
ພຶດຕິກຳຕົວຈິງໃຫ້ເຫັນວ່າ ພາຍໃຕ້ການທຳພາສະຫຼາດສ່ອງໃສຂອງພັກ, ໝູນໃຊ້ຢ່າງປະດິດສ້າງ ແນວຄິດໂຮ່ຈີມິນກ່ຽວກັບການສົມທົບກຳລັງແຮງຂອງຊາດກັບກຳລັງແຮງຂອງຍຸກສະໄໝ, ຊັກຈູງໃຈຄົນດ້ວຍສິນທຳ, ຫັນປ່ຽນດ້ວຍຄວາມຮັກແພງມະນຸດ ເພື່ອເພີ່ມທະວີກຳລັງແຮງຂອງຄວາມເປັນທຳ, ດັ່ງນັ້ນການຕ່າງປະເທດປະຊາຊົນຈຶ່ງໄດ້ຮັບຜົນສໍາເລັດອັນໃຫຍ່ຫຼວງ ແລະ ໄດ້ປະກອບສ່ວນອັນສຳຄັນໃນທຸກໄລຍະແຫ່ງການປະຕິວັດຂອງປະເທດ. ການຕ່າງປະເທດປະຊາຊົນໄດ້ສ້າງຕັ້ງ ແລະ ພັດທະນາການພົວພັນກັບປະຊາຊົນຂອງປະເທດຕ່າງໆ, ຊ່ວຍໃຫ້ປະຊາຊົນໃນໂລກເຂົ້າໃຈຢ່າງຊັດເຈນກ່ຽວກັບຊາດຫວຽດນາມທີ່ບໍ່ຫຍໍ້ທໍ້ ແລະ ອົງອາດກ້າແກ່ນໃນການຕໍ່ສູ້ ເພື່ອເອກະລາດແລະເສລີພາບ, ດຳລົງຊີວິດຢ່າງມີມະນຸດສະທຳ ຊື່ສັດ, ຮັກຫອມສັນຕິພາບ ແລະ ໃຫ້ຊາວໂລກເຂົ້າໃຈແຈ້ງກ່ຽວກັບການຕໍ່ສູ້ທີ່ເປັນທຳ ຂອງປະຊາຊົນຫວຽດນາມ, ສ້າງແນວໂຮມປະຊາຊົນໂລກທີ່ໃຫຍ່ໂຕ ທີ່ສາມັກຄີ ແລະ ສະໜັບສະໜູນຫວຽດນາມຢ່າງແຂງແຮງ, ປະກອບສ່ວນອັນສຳຄັນເຂົ້າໃນໄຊຊະນະ ຂອງການຕໍ່ສູ້ເພື່ອປົດປ່ອຍຊາດ ແລະ ທ້ອນໂຮມປະເທດຊາດເປັນເອກະພາບ ຂອງປະຊາຊົນຫວຽດນາມ.
ຫຼັງຈາກທີ່ປະເທດເປັນເອກະພາບໃນປີ 1975, ການຕ່າງປະເທດປະຊາຊົນ ພ້ອມກັນກັບການຕ່າງປະເທດຂອງພັກ ແລະ ການທູດຂອງລັດ ໄດ້ຕັ້ງໜ້າ “ເດີນໜ້າປູທາງ”, ມ້າງການປິດລ້ອມ ຂວ້ຳບາດຂອງສັດຕູ, ເປີດກວ້າງການພົວພັນຕ່າງປະເທດ, ເສີມສ້າງມິດຕະພາບ, ຊຸກຍູ້ການພົວພັນເປັນປົດກະຕິລະຫວ່າງຫວຽດນາມ ກັບບັນດາຄູ່ຮ່ວມມືທີ່ສຳຄັນ, ລະດົມເອົາການສະໜັບສະໜູນຂອງປະຊາຊົນໂລກ ເພື່ອແກ້ໄຂຜ່ານຜ່າຜົນຮ້າຍຢ້ອນຫຼັງຈາກສົງຄາມ ແລະ ສ້າງສາປະເທດຄືນໃໝ່. ມີຫຼາຍການເຄື່ອນໄຫວສັນຕິພາບ, ການກຸສົນ ແລະ ໜູນຊ່ວຍຫວຽດນາມ, ເຊັ່ນ: ການຜ່າຕັດຍິ້ມ, ການເກັບກູ້ລະເບີດຝັງດິນ, ການຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມ, ການຍ່າງເພື່ອສັນຕິພາບ, ການຢ້ຽມຢາມຂອງນັກຮົບເກົ່າ... ປະກອບສ່ວນຮຳບາດແຜສົງຄາມ,ເພີ່ມທະວີຄວາມເຂົ້າໃຈເຊິ່ງກັນແລະກັນ.
ໂດຍກຳແໜ້ນທິດນຳ “ເປັນເຈົ້າການ, ໄຫວພິບ, ປະດິດສ້າງ, ມີປະສິດທິຜົນ”, ໃນຊຸມປີທີ່ປ່ານມາ, ການຕ່າງປະເທດປະຊາຊົນໄດ້ມີຄວາມຄືບໜ້າໃນທາງບວກ ແລະ ພັດທະນາຢ່າງແຂງແຮງ(6), ປະສານງານກັບການຕ່າງປະເທດຂອງພັກ ແລະ ການທູດຂອງລັດຢ່າງມີປະສິດທິຜົນ, ປະກອບສ່ວນອັນສຳຄັນເຂົ້າໃນການປະຕິບັດນະໂຍບາຍ ແລະ ແນວທາງການຕ່າງປະເທດຂອງພັກ ແລະ ລັດໃຫ້ປະສົບຜົນສຳເລັດ. ການຕ່າງປະເທດປະຊາຊົນປະກອບສ່ວນອັນສຳຄັນໃນການຊ່ວຍໃຫ້ປະຊາຊົນໂລກເຂົ້າໃຈແຈ້ງກ່ຽວກັບຫວຽດນາມ ແລະ ຊ່ວຍໃຫ້ປະຊາຊົນເຮົາເຂົ້າໃຈແຈ້ງກວ່າອີກ ກ່ຽວກັບແນວທາງ ນະໂຍບາຍການຕ່າງປະເທດຂອງພັກ ແລະ ລັດຫວຽດນາມ, ເພີ່ມທະວີນ້ຳໃຈສາມັກຄີສາກົນ ແລະ ມິດຕະພາບກັບປະຊາຊົນບັນດາປະເທດ, ຍົກສູງຖານະບົດບາດຂອງຫວຽດນາມໃນເວທີສາກົນ, ສ້າງສະພາບແວດລ້ອມທີ່ເອື້ອອຳນວຍຕໍ່ການການພັດທະນາການພົວພັນຕ່າງປະເທດ, ຍາດແຍ່ງເອົາການສະໜັບສະໜູງ ແລະ ແຫຼ່ງພະລັງສາກົນ, ປະກອບສ່ວນຮັກສາສະພາບແວດລ້ອມສັນຕິພາບ ສະຖຽນລະພາບ, ປົກປັກຮັກສາເອກະລາດ ອຳນາດອະທິປະໄຕ ຜືນແຜ່ນດິນອັນຄົບຖ້ວນ ຂອງປະເທດຊາດ ແລະ ຜົນປະໂຫຍດຂອງປະຊາຊົນ-ປະເທດຊາດຫວຽດນາມ.
ບັນດາອົງການຈັດຕັ້ງປະຊາຊົນຫວຽດນາມໄດ້ສ້າງການພົວພັນກັບຫຼາຍພັນອົງການ ແລະ ບຸກຄົນ ຢູ່ບັນດາປະເທດແລະເຂດແຄ້ວນໃນທົ່ວໂລກ; ການພົວພັນຕ່າງປະເທດໄດ້ຮັບການເປີດກວ້າງ, ເນື້ອໃນຂອງການເຄື່ອນໄຫວນັບມື້ນັບອຸດົມສົມບູນ ແລະ ມີຄວາມຫຼາກຫຼາຍ, ນຳມາເຊິ່ງໝາກຜົນອັນຕັ້ງໜ້າໃນທຸກຂົງເຂດ. ບັນດາອົງການປະຕິບັດການຕ່າງປະເທດປະຊາຊົນ ທັງຢູ່ສູນກາງແລະທ້ອງຖິ່ນ ໄດ້ປະສານສົມທົບຢ່າງເປັນເຈົ້າການແລະປະດິດສ້າງ ກັບຄະນະການທູດຫວຽດນາມຢູ່ຕ່າງປະເທດ ແລະ ບັນດາຄູ່ຮ່ວມມື ໃນການດຳເນີນກິດຈະກຳເພື່ອສັນຕິພາບ, ຄວາມສາມັກຄີ, ມິດຕະພາບ ແລະ ການຮ່ວມມື ລະຫວ່າງປະຊາຊົນບັນດາປະເທດ(7), ປະສົບຄວາມສຳເລັດໃນການປະຕິບັດຄວາມຄິດລິເລີ່ມຫຼາຍຢ່າງ ເພື່ອສົ່ງເສີມຄວາມສຳພັນກັບປະເທດເພື່ອນບ້ານ, ບັນດາຄູ່ຮ່ວມມືຍຸດທະສາດ, ຄູ່ຮ່ວມມືສຳຄັນ, ເພື່ອນມິດດັ້ງເດີມ, ອົງການຝ່າຍຊ້າຍ, ອົງການກ້າວໜ້າ ໃຫ້ນັບມື້ນັບເຂົ້າສູ່ລວງເລິກ(8). ບາງອົງການຈັດຕັ້ງປະຊາຊົນຂອງຫວຽດນາມໄດ້ເຂົ້າຮ່ວມຢ່າງເປັນເຈົ້າການ ແລະ ຕັ້ງໜ້າເສີມຂະຫຍາຍບົດບາດ ສຽງເວົ້າຂອງຕົນໃນບັນດາກົນໄກ, ເວທີປາໄສປະຊາຊົນຫຼາຍຝ່າຍ(9), ຍາດແຍ່ງເອົາຄວາມເຫັນດີເຫັນພ້ອມ ແລະ ການສະໜັບສະໜູນຢ່າງກວ້າງຂວາງຂອງປະຊາຊົນໂລກ ຕໍ່ຫວຽດນາມ, ປະກອບສ່ວນເຂົ້າການຊຸກຍູ້ສັນຕິພາບ, ການຮ່ວມມື ແລະ ການພັດທະນາ, ເຂົ້າຮ່ວມການແກ້ໄຂບັນດາບັນຫາລວມຂອງພາກພື້ນ ແລະ ທົ່ວໂລກ.
ການຕ່າງປະເທດປະຊາຊົນໄດ້ຕັ້ງໜ້າຍູ້ແຮງການຮ່ວມມືສາກົນ ເພື່ອຍາດແຍ່ງເອົາແຫຼ່ງພະລັງຮັບໃຊ້ການພັດທະນາເສດຖະກິດ-ສັງຄົມ ຜ່ານການເສີມຂະຫຍາຍບົດບາດຂົວຕໍ່ ລະຫວ່າງຊຸມຊົນວິສາຫະກິດໃນປະເທດ ແລະ ຕ່າງປະເທດ, ສົ່ງເສີມການລົງທຶນແລະການຄ້າ, ປົກປ້ອງຜົນປະໂຫຍດທີ່ຖືກກົດໝາຍ ຊອບທຳຂອງວິສາຫະກິດຫວຽດນາມ, ຊັກຊວນແລະຮ່ວມມືກັບອົງການບໍ່ຂຶ້ນກັບລັດຖະບານຕ່າງປະເທດ, ປະກອບສ່ວນທີ່ແທດຈິງເຂົ້າໃນການລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ແກ້ໄຂຜ່ານຜ່າຜົນຮ້າຍຢ້ອນຫຼັງຈາກສົງຄາມແລະໄພທຳມະຊາດ, ແກ້ໄຂບັນດາບັນຫາສັງຄົມ, ພັດທະນາແຫຼ່ງຊັບພະຍາກອນມະນຸດ ແລະ ການເຊື່ອມໂຍງເຂົ້າກັບສາກົນຂອງຫວຽດນາມ (10).
ສະຫະພັນມິດຕະພາບ ແລະ ບັນດາອົງການຈັດຕັ້ງມະຫາຊົນໄດ້ຕັ້ງໜ້າຜັນຂະຫຍາຍວຽກງານຂໍ້ມູນຂ່າວສານ, ໂຄສະນາເຜີຍແຜ່ພາບພົດຂອງປະເທດ, ຜູ້ຄົນ ແລະວັດທະນະທຳຫວຽດນາມ, ແນວທາງ ນະໂຍບາຍຂອງພັກແລະລັດຫວຽດນາມ ແລະ ຜົນສຳເລັດຂອງພາລະກິດການປ່ຽນແປງໃໝ່, ເຂົ້າຮ່ວມການຂົນຂວາຍ, ຕໍ່ສູ້ປົກປ້ອງຜົນປະໂຫຍດຂອງປະຊາຊົນ ປະເທດຊາດ, ໂດຍສະເພາະແມ່ນ ກ່ຽວກັບອະທິປະໄຕຊາຍແດນ, ອານາເຂດ, ປະຊາທິປະໄຕ, ສິດທິມະນຸດ(11) ແລະ ຍູ້ແຮງວຽກງານຂົນຂວາຍຊາວຫວຽດນາມຢູ່ຕ່າງປະເທດ. ອົງຄະນະມະຫາຊົນແລະອົງການຈັດຕັ້ງປະຊາຊົນຈຳນວນໜຶ່ງ ທີ່ເຮັດໜ້າທີ່ດ້ານການຕ່າງປະເທດປະຊາຊົນ ຢູ່ສູນກາງແລະທ້ອງຖິ່ນ ໄດ້ສຸມໃສ່ວຽກງານຄົ້ນຄວ້າ, ແນະນຳ, ສະເໜີໃຫ້ຜູ້ນຳທຸກຂັ້ນ, ປະກອບສ່ວນເຂົ້າໃນວຽກງານການຕ່າງປະເທດຂອງປະເທດ, ຂອງທ້ອງຖິ່ນ ກໍຄືການເຄື່ອນໄຫວດ້ານວິຊາຊີບຂອງບັນດາກະຊວງ, ຂະແໜງການ.
ເສີນຂະຫຍາຍບົດບາ ແລະ ຍົກສູງປະສິດທິຜົນ
ຂອງວຽກງານການຕ່າງປະເທດປະຊາຊົນ ໃນສະພາບການໃໝ່
ໃນບົດຄວາມ “ບາງບັນຫາທິດສະດິ ແລະ ພຶດຕິກຳກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ລັດທິສັງຄົມນິຍົມຢູ່ຫວຽດນາມ”, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ຊີ້ແຈງວ່າ: “ຄຽງຄູ່ກັບການກຳນົດແຜນນະໂຍບາຍ, ແນວທາງຢ່າງຖືກຕ້ອງ, ຮັບປະກັນບົດບາດນຳພາຂອງພັກນັ້ນ, ຕ້ອງເສີມຂະຫຍາຍຢ່າງແຂງແຮງ ບົດບາດຂອງຄວາມຄິດສ້າງສັນ, ການສະໜັບສະໜູນ ແລະ ການເຂົ້າຮ່ວມຢ່າງຕັ້ງໜ້າຂອງປະຊາຊົນ... ກຳລັງແຮງຂອງປະຊາຊົນແມ່ນບໍ່ເກີດທີ່ເລິກເຊິ່ງຂອງໄຊຊະນະ, ຂອງການພັດທະນາ”(12). ກອງປະຊຸມໃຫຍ່ຄັ້ງທີ 13 ຂອງພັກໄດ້ກຳນົດແຈ້ງໜ້າທີ່ຂອງການຕ່າງປະເທດ. ຍິ່ງກວ່າເວລາໃດໝົດ, ບົດບາຂອງການຕ່າງປະເທດປະຊາຊົນຕ້ອງໄດ້ຮັບການເສີມຂະຫຍາຍ ເພື່ອສ້າງຮາກຖານທາງສັງຄົມ, ນຳການພົວພັນລະຫວ່າງບັນດາປະເທດເຂົ້າສູ່ລວງເລິກແລະໝັ້ນຄົງ ເພື່ອການສ້າງສະພາບແວດລ້ອມສັນຕິພາບ, ມິດຕະພາບ, ການສ້າງຄວາມໄວ້ເນື້ອເຊື່ອໃຈແມ່ນເພື່ອປ້ອງກັນຄວາມສ່ຽງຂອງການປະທະກັນແລະສົງຄາມຕັ້ງແຕ່ຕົ້ນ, ຈາກໄລຍະໄກ. ການຕ່າງປະເທດປະຊາຊົນໄດ້ປະກອບສ່ວນອັນໃຫຍ່ຫຼວງເຂົ້າໃນພາລະກິດປະຕິວັດຂອງປະເທດຊາດ, ເຊິ່ງເປັນທັງຄຸນລັກສະນະສະເພາະ, ຄວາມຄິດປະດິດສ້າງ, ທັງແມ່ນທຶນອັນມີຄ່າ ແລະ ປະສົບການອັນລ້ຳຄ່າ ຂອງການຕ່າງປະເທດຫວຽດນາມ. ໃນສະພາບແວດລ້ອມສາກົນທີ່ສັບສົນ, ຄູ່ຕໍ່ສູ້ແລະຄູ່ຮ່ວມມືແຊກຊ້ອນກັນ, ທັງຕໍ່ສູ້ກັນແລະທັງຮ່ວມມືກັນ ບົນພື້ນຖານຜົນປະໂຫຍດ, ດັ່ງນັ້ນ, ການຕ່າງປະເທດປະຊາຊົນທີ່ມີທ່າໄດ້ປຽບຂອງຕົວເອງ, ໄຫວພິບ ແລະ ຍືດຫຍຸ່ນ, ມີຄວາມສາມາດໃນການເຂົ້າເຖິງແລະສ້າງການພົວພັນທີ່ກວ້າງຂວາງກັບບັນດາເປົ້າໝາຍ, ເຊິ່ງສາມາດສະໜັບສະໜູນການຕ່າງປະເທດຂອງພັກ ແລະ ການທູດຂອລັດ ຢ່າງມີປະສິດທິຜົນ.
ສະພາບການໃນປະຈຸບັນສ້າງຄວາມໄດ້ປຽບຫຼາຍຢ່າງໃຫ້ແກ່ວຽກງານການຕ່າງປະເທດປະຊາຊົນ. ໃນໂລກ, ສັນຕິພາບ ການຮ່ວມມື ແລະ ການພັດທະນາຍັງຄົງແມ່ນທ່າອຽງໃຫຍ່. ພ້ອມກັນກັບການພັດທະນາຂອງວິທະຍາສາດ-ເຕັກໂນໂລຊີ, ພິເສດແມ່ນເຕັກໂນໂລຊີຂໍ້ມູນຂ່າວສານ, ແລະ ທ່າອຽງເປີດປະຊາທິປະໄຕໃນຊີວິດສາກົນ, ດັ່ງນັ້ນ ບົດບາດ, ສຽງເວົ້າ ແລະ ການເຂົ້າຮ່ວມ ຂອງອົງການຈັດຕັ້ງປະຊາຊົນ ນັບມື້ນັບໄດ້ຮັບການຕີລາຄາສູງທັງລະດັບຊາດ, ພາກພື້ນ ແລະ ທົ່ວໂລກ. ບັນດາຜົນງານອັນໃຫຍ່ຫຼວງທີ່ມີຄວາມໝາຍປະຫວັດສາດໃນ 35 ປີແຫ່ງການປ່ຽນແປງໃໝ່ທີ່ຜ່ານມາ ໄດ້ສ້າງທ່າແລະກຳລັງໃໝ່, ເພີ່ມທະວີກຳລັງແຮງສັງລວມຂອງປະເທດ, ເພື່ອນມິດສາກົນຍັງຄົງໃຫ້ຄວາມຮູ້ສຶກທີ່ດີກັບຫວຽດນາມຕໍ່ໄປ. ພັກກອມມູນິດຫວຽດນາມເນັ້ນໜັກເປັນພິເສດເຖິງບົດບາດນຳໜ້າຂອງການຕ່າງປະເທດ, ກໍຄືບົດບາດທີ່ຕັ້ງສຳຄັນຂອງການຕ່າງປະເທດປະຊາຊົນ.
ຄຽງຄູ່ກັນກັບຂໍ້ສະດວກພື້ນຖານເຫຼົ່ານີ້, ການປ່ຽນແປງຢ່າງເລິກເຊິ່ງແລະໄວວາຂອງສະຖານະການໂລກແລະພາກພື້ນ, ໂດຍສະເພາະແມ່ນການແຜ່ລະບາດຂອງພະຍາດໂຄວິດ-19 ກໍໄດ້ວາງສິ່ງທ້າທາຍໃໝ່ຫຼາຍຢ່າງຕໍ່ວຽກງານການຕ່າງປະເທດປະຊາຊົນ, ເຊັ່ນ: ການແຂ່ງຂັນລະຫວ່າງບັນດາປະເທດໃຫຍ່, ລັດທິຝ່າຍດຽວ, ແນວຄິດຂວາຈັດ, ແນວຄິດຊາດທີ່ເຫັນແກ່ຕົວເອງ, ການຂັດແຍ້ງດ້ານອະທິປະໄຕຢູ່ທະເລ, ໝູ່ເກາະ ແລະ ສິ່ງທ້າທາຍດ້ານຄວາມປອດໄພທີ່ບໍ່ແມ່ນແບບດັ້ງເດີມ. ບາງກອງກຳລັງໄດ້ເພີ່ມທະວີການນຳໃຊ້ຊ່ອງທາງການຮ່ວມມືຂອງປະຊາຊົນ ເພື່ອເຂົ້າແຊກແຊງກິດຈະການພາຍໃນ ແລະ ຍູ້ແຮງການເຄື່ອນໄຫວຕ້ານຫວຽດນາມ.
ເພື່ອເສີມຂະຫຍາຍບົດບາດ “ເສົາຄ້ຳ”, ຍົກສູງປະສິດທິຜົນການຕ່າງປະເທດປະຊາຊົນ, ຈໍາເປັນຕ້ອງປະຕິບັດບາງວິທີແກ້ໄຂຕໍ່ໄປນີ້:
ທີໜຶ່ງ, ຮັບປະກັນການນຳພາຮອບດ້ານ, ເດັດຂາດຂອງພັກ ແລະ ການຄຸ້ມຄອງລວມສູນຂອງລັດ ຕໍ່ວຽກງານການຕ່າງປະເທດປະຊາຊົນ. ຊາບຊຶມຢ່າງເລິກເຊິ່ງແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ 13 ຂອງພັກ, ສ້າງການຫັນປ່ຽນຢ່າງເລິກເຊິ່ງ ແລະ ຄວາມເປັນເອກະພາບສູງ ໃນລະບົບການເມືອງທັງໝົດກ່ຽວກັບບົດບາດ, ທີ່ຕັ້ງ ແລະ ຄວາມສຳຄັນຂອງການຕ່າງປະເທດປະຊາຊົນ, ກຳນົດຢ່າງຈະແຈ້ງວ່າ ການຜັນຂະຫຍາຍວຽກງານການຕ່າງປະເທດປະຊາຊົນ ແມ່ນໜ້າທີ່ຂອງລະບົບການເມືອງທັງໝົດ.
ທີສອງ, ປ່ຽນແປງໃໝ່ຈິນຕະນາການ, ເນື້ອໃນ ແລະ ແບບວິທີການເຄື່ອນໄຫວການຕ່າງປະເທດປະຊາຊົນຢ່າງແຂງແຮງ ຕາມທິດຫັນເປັນຫຼາກຫຼາຍ ແລະ ເປີດກວ້າງຂອບເຂດການເຄື່ອນໄຫວ, ຄູ່ຮ່ວມມື, ກອງປະລັງທີ່ເຂົ້າຮ່ວມ, ສ້າງຜົນປະໂຫຍດທີ່ທັບຊ້ອນ ແລະ ຄວາມໜ້າເຊື່ອຖື, ຊຸກຍູ້ການພົວພັນກັບປະຊາຊົນປະເທດເພື່ອນບ້ານ, ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ), ຄູ່ຮ່ວມມືຍຸດທະສາດ ຄູ່ຮ່ວມມືຮອບດ້ານ ແລະ ເພື່ອມິດດັ້ງເດີມ ໃຫ້ເຂົ້າສູ່ລວງເລິກແລະແທ້ຈິງ, ເພື່ອຮັບໃຊ້ຜົນປະໂຫຍດແຫ່ງຄວາມໝັ້ນຄົງ, ການພັດທະນາ ແລະ ຖານະທີ່ຕັ້ງຂອງປະເທດ, ເຮັດເປັນຢ່າງດີບົດບາດ “ຂົວຕໍ່” ໃນການສົ່ງເສີມການຮ່ວມມືດ້ານເສດຖະກິດ - ການຄ້າ, ການທ່ອງທ່ຽວ, ການລົງທຶນ, ວັດທະນະທຳ, ການສຶກສາ, ການປົກປັກຮັກສາສິ່ງແວດລ້ອມ, ການຮັບມືກັບການປ່ຽນແປງຂອງດິນຟ້າອາກາດ, ການແກ້ໄຂຜົນຮ້າຍຢ້ອນຫຼັງຈາກສົງຄາມ... ສອດຄ່ອງກັບທ່າແຮງ ແລະ ຄວາມຕ້ອງການຂອງແຕ່ລະຄູ່ຮ່ວມມື ແລະ ແຕ່ລະທ້ອງຖິ່ນ. ເສີມຂະຫຍາຍບົດບາດທີ່ຕັ້ງໜ້າ, ຍົກສູງຄວາມຮັບຜິດຊອບ ແລະ ເພີ່ມທະວີການເຂົ້າຮ່ວມຢ່າງກວ້າງຂວາງແລະມີປະສິດທິຜົນ ຂອງບັນດາອົງການຈັດຕັ້ງປະຊາຊົນຫວຽດນາມ ໃນບັນດາເວທີປາໄສພະຫຸພາຄີພາກພື້ນ ແລະ ສາກົນ, ປະກອບສ່ວນທີ່ເໝາະສົມໃນຄວາມພະຍາຍາມຂອງປະຊາຄົມສາກົນ ໃນການຮັບມືກັບສິ່ງທ້າທາຍຕໍ່ສັນຕິພາບ, ຄວາມໝັ້ນຄົງ ແລະ ການພັດທະນາ, ສະແດງໃຫ້ເຫັນເຖິງບົດບາດ ແລະ ຖານະທີ່ຕັ້ງຂອງຫວຽດນາມ. ເບິ່ງແຍງດູແລ, ໜູນຊ່ວຍພີ່ນ້ອງຮ່ວມຊາດຊາວຫວຽດນາມຢູ່ຕ່າງປະເທດ, ເສີມຂະຫຍາຍບົດບາດທີ່ຕັ້ງໜ້າຂອງພວກເຂົາ ໃນວຽກງານການຕ່າງປະເທດປະຊາຊົນ ແລະ ໃນການສ້າງສາແລະປົກປັກຮັກສາປະເທດຊາດ.
ທີສາມ, ຕັ້ງໜ້າເຊື່ອມໂຍງເຂົ້າກັບສາກົນ, ລະດົມແຫຼ່ງພະລັງພາຍນອກຮັບໃຊ້ໃຫ້ແກ່ຄວາມຕ້ອງການ ແລະ ເປົ້າໝາຍການພັດທະນາແບບຍືນຍົງ ຂອງປະເທດ ຮອດປີ 2025, ປີ 2030 ແລະ ປີ 2045. ຍົກສູງປະສິດທິຜົນຂອງກິດຈະກຳທີ່ບໍ່ແມ່ນລັດຖະບານຕ່າງປະເທດ, ເປີດກວ້າງ ແລະ ຊຸກຍູ້ການຮ່ວມມືກັບບັນດາຄູ່ຮ່ວມມືທີ່ມີທ່າແຮງ, ໂດຍສະເພາະໃນຂົງເຂດການຝຶກອົບຮົມຊັບພະຍາກອນມະນຸດ, ການປ່ຽນແປງໃໝ່ ປະດິດສ້າງ, ການຫັນເປັນດິຈິຕອນ, ການພັດທະນາສີຂຽວແລະຍືນຍົງ, ການຮັບມືກັບສິ່ງທ້າທາຍດ້ານຄວາມໝັ້ນຄົງທີ່ບໍ່ແມ່ນແບບດັ້ງເດີມ...
ທີສີ່, ສະໜັບສະໜູນການຕ່າງປະເທດຂອງພັກ ແລະ ການທູດຂອງລັດຢ່າງມີປະສິດທິຜົນ ໃນການປົກປັກຮັກສາ ແລະ ຊຸກຍູ້ຜົນປະໂຫຍດຂອງປະຊາຊົນ-ປະເທດຊາດ, ໂດຍສະເພາະແມ່ນໃນບັນດາບັນຫາປະຊາທິປະໄຕ, ສິດທິມະນຸດ, ອະທິປະໄຕໃນທະເລ ໝູ່ເກາະ, ເຂົ້າຮ່ວມການແກ້ໄຂບັນດາບັນຫາທີ່ເກີດຂຶ້ນ, ປະກອບສ່ວນເພີ່ມທະວີ ແລະ ຊຸກຍູ້ການພົວພັນມິດຕະພາບ ແລະ ການຮ່ວມມືກັບຕ່າງປະເທດ.
ທີຫ້າ, ເພີ່ມທະວີຄຸນນະພາບຂອງວຽກງານການຄົ້ນຄວ້າ, ຄາດຄະເນສະຖານະການ, ເສີມຂະຫຍາຍບົດບາດຂອງຖັນແຖວຜູ້ຊ່ຽວຊານການຕ່າງປະເທດ ໃນການຄົ້ນຄວ້າ, ໃຫ້ຄຳແນະນຳ, ປະກອບສ່ວນເຂົ້າໃນການສ້າງນະໂຍບາຍ ແລະ ການຜັນຂະຫຍາຍແນວທາງການຕ່າງປະເທດ. ປ່ຽນແປງໃໝ່ເນື້ອໃນ ແລະ ວິທີການສື່ສານການຕ່າງປະເທດ, ນຳໃຊ້ບັນດາຜົນງານດ້ານເຕັກໂນໂລຊີຂໍ້ມູນຂ່າວສານແລະ ການສື່ສານ ເພື່ອເພີ່ມທະວີຂໍ້ມູນຂ່າວສານທີ່ດີກ່ຽວກັບປະເທດ, ປະຊາຊົນ ແລະ ຜົນງານຂອງຫວຽດນາມ, ແນວທາງ ນະໂຍບາຍຂອງພັກແລະລັດຂອງພວກເຮົາ, ການຕໍ່ສູ້ກັບບັນດາຖ້ອຍທຳນອງທີ່ຜິດພາດກ່ຽວກັບຫວຽດນາມ.
ທີຫົກ, ປັບປຸງບູລະນະກົນໄກ, ຍົກສູງປະສິດທິຜົນຂອງການຊີ້ນຳ, ຄຸ້ມຄອງ, ປະສານງານໃນວຽກງານການຕ່າງປະເທດປະຊາຊົນ, ຮັບປະກັນການສົມທົບຢ່າງແໜ້ນແຟ້ນລະຫວ່າງບັນດາເສົາຄ້ຳການຕ່າງປະເທດ, ລະຫວ່າງຄະນະການຕ່າງປະເທດຂອງສູນກາງພັກ, ກະຊວງການຕ່າງປະເທດ, ຄະນະກຳມະການການຕ່າງປະເທດຂອງສະພາແຫ່ງຊາດ ກັບຄະນະກຳມະການສູນກາງແນວໂຮມປະເທດຊາດຫວຽດນາມ, ສະຫະພັນບັນດາອົງການຈັດຕັ້ງມິດຕະພາບຫວຽດນາມ ໃນການສ້າງແຜນນະໂຍບາຍ ແລະ ການຜັນຂະຫຍາຍກິດຈະກຳການຕ່າງປະເທດ. ເພີ່ມທະວີການປະສານງານລະຫວ່າງບັນດາອົງການຈັດຕັ້ງປະຊາຊົນຢູ່ສູງການ ແລະ ລະຫວ່າງສູນກາງກັບທ້ອງຖິ່ນ, ໃຫ້ຄວາມສຳຄັນກັບການເສີມຂະຫຍາຍບົດບາດຂອງບັນດາອົງການຈັດຕັ້ງການຕ່າງປະເທດປະຊາຊົນຢູ່ທ້ອງຖິ່ນ.
ທີເຈັດ, ເບິ່ງແຍງການກໍ່ສ້າງ, ລົງທຶນດ້ານການເງິນ ແລະ ຊັບພະຍາກອນມະນຸດ ໃຫ້ແກ່ການຕ່າງປະເທດປະຊາຊົນ. ປັບປຸງ, ບູລະນະການຈັດຕັ້ງ, ກົງຈັກ ແລະ ຖັນແຖວພະນັກງານຕາມທິດກະທັດລັດຮັດກຸມ, ມີປະສິດທິຜົນ, ຫັນເປັນມືອາຊີບ ແລະໜຸ່ມນ້ອຍ, ເອົາໃຈໃສ່ດຶງດູດຜູ້ມີຄວາມສາມາດ, ຝຶກອົບຮົມແລະບຳລຸງສ້າງຖັນແຖວພະນັກງານການຕ່າງປະເທດປະຊາຊົນ ທີ່ເຮັດວຽກເຕັມເວລາ, ໝັ້ນຄົງ, “ເຂັ້ມແຂງ” ຢູ່ທັງສູນກາງແລະທ້ອງຖິ່ນ, ມີຄວາມກ້າຫານທາງການເມືອງ, ມີຄຸນສົມບັດປະຕິວັດ, ສຸດອົກສຸດໃຈຕໍ່ວຽກງານ, ມີຄວາມສາມາດທາງວິຊາຊີບ ແລະ ພາສາຕ່າງປະເທດ ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານ./.
----------------
(1) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2021, ເຫຼັ້ມ 1, ໜ້າ 162.
(2) ໂຮ່ຈີມິນ: ນິພົນຄົບຊຸດ, ສພຈ ການເມືອງແຫ່ງຊາດ ສື້ເຖິ້ດ, ຮ່າໂນ້ຍ, 2011, ເຫຼັ້ມ 10, ໜ້າ 453.
(3) ຕົ້ນປີ 1992, ສະຫະພັນບັນດາອົງການຈັດຕັ້ງສັນຕິພາບ, ສາມັກຄີ, ມິດຕະພາບກັບປະຊາຊົນບັນດາປະເທດຂອງຫວຽດນາມ ຖືກແຍກອອກຈາກຄະນະການຕ່າງປະເທດສູນກາງ, ກາຍເປັນອົງການຈັດຕັ້ງການເມືອງ-ສັງຄົມເອກະລາດທີ່ຮັບຜິດຊອບວຽກງານການຕ່າງປະເທດປະຊາຊົນ ແລະ ແຕ່ປີ 1993 ປ່ຽນຊື່ເປັນສະຫະພັນບັນດາອົງການຈັດຕັ້ງມິດຕະພາບຫວຽດນາມ.
(4) ເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 9, ສພຈ ການເມືອງແຫ່ງຊາດ, ຮ່າໂນ້ຍ, 2001, ໜ້າ 122 – 123.
(5) ຄຳສັ່ງເລກທີ 44-CT/TW, ລົງວັນທີ 20 ກັນຍາ 1994, ຂອງຄະນະເລຂາທິການສູນກາງ, “ກ່ຽວກັບການເປີດກວ້າງ ແລະ ປ່ຽນແປງໃໝ່ການເຄື່ອນໄຫວການຕ່າງປະເທດປະຊາຊົນ”, https://thuvienphapluat.vn/van-ban/Van-hoa-Xa-hoi/Chi-thi-44-CT-TW-mo-rong-va-doi-moi-hoat-dong-doi-ngoai-nhan-dan-128074.aspx
(6) ສະຫະພັນບັນດາອົງການຈັດຕັ້ງມິດຕະພາບຫວຽດນາມມີ 116 ອົງການສະມາຊິກ (64 ອົງການຈັດຕັ້ງມິດຕະພາບຢູ່ສູນການ ແລະ 52 ສະຫະພັນມິດຕະພາບຢູ່ທ້ອງຖິ່ນ); ຈຳນວນອົງການຈັດຕັ້ງປະຊາຊົນທີ່ເຮັດວຽກງານການຕ່າງປະເທດ ແລະ ຈຳນວນຄົນເຂົ້າຮ່ວມການເຄື່ອນໄຫວການຕ່າງປະເທດນັບມື້ນັບເພີ່ມຂຶ້ນ.
(7) ແນວໂຮມປະເທດຊາດ, ບັນດາອົງການຈັດຕັ້ງການເມືອງ ສັງຄົມ, ບັນດາອົງການຈັດຕັ້ງມິດຕະພາບ ຢູ່ສູນກາງແລະທ້ອງຖິ່ນ ໄດ້ເພີ່ມທະວີການພົວພັນ ແລະ ເຊັນຂໍ້ຕົກລົງການຮ່ວມມືກັບບັນດາອົງການຈັດຕັ້ງປະຊາຊົນທີ່ກ່ຽວຂ້ອງຂອງຈີນ, ລາວ, ກຳປູເຈຍ, ສົມທົບກັນຈັດຕັ້ງການເຄື່ອນໄຫວຫຼາຍຮູບຫຼາຍແບບ ທີ່ມີຄວາມໝາຍດ້ານການເມືອງ, ຂະໜາດ, ການແຜ່ກະຈາຍທີ່ຍິ່ງໃຫຍ່, ເຊັ່ນ: ງານບຸນປະຊາຊົນ, ງານບຸນຊາວໜຸ່ມ; ເວທີປາໄສປະຊາຊົນຫວຽດນາມ - ຈີນ; ງານບຸນປະຊາຊົນຊາຍແດນ; ສະເຫຼີມສະຫຼອງປີແຫ່ງມິດຕະພາບແລະຄວາມສາມັກຄີ, ບັນດາໂຄງການອົບຮົມສຶກສາມູນເຊື້ອ “ຕາມຮອຍປະທານໂຮ່ຈິມິນ, ປະທານໄກສອນ ພົມວິຫານ”, “ຫວ່ານເມັດພັນແຫ່ງມິດຕະພາບ” ເບິ່ງແຍງນັກຮຽນຈາກປະເທດລາວ ແລະ ກຳປູເຈຍ; ກວດສຸຂະພາບດ, ແຈກຢາຟຣີ, ສ້າງບ້ານມິດຕະພາບ...
(8) ບັນດາອົງການຈັດຕັ້ງປະຊາຊົນຂອງຫວຽດນາມ ໄດ້ຈັດຕັ້ງການພົບປະແລກປ່ຽນວັດທະນະທຳ ແລະ ສິລະປະຢ່າງແຂງຂັນ, ສະເຫຼີມສະຫຼອງບັນດາເຫດການສຳຄັນ, ສະແດງຄວາມເຄົາລົບນັບຖືປະທານໂຮ່ຈິມິນ... ພ້ອມກັບບັນດາປະເທດອາຊຽນ, ບັນດາປະເທດຄູ່ຮ່ວມຍຸດທະສາດລັດເຊຍ, ອິນເດຍ, ຝຣັ່ງ, ຍີ່ປຸ່ນ, ສ.ເກົາຫຼີ... ແລະບັນດາປະເທດເພື່ອນມິດດັ້ງເດີມ ຢູ່ທະວີບອາຊີ, ທະວີບເອີຣົບ, ທິວີບອາເມລິກາ, ທິວີບອາຟຣິກາ; ບັນດາການເຄື່ອນໄຫວສາມັກຄີກັບກູບາ, ເວເນຊູເອລາ; ຮ່ວມມືກັບເພື່ອນມິດ, ບັນດານັກຮົບເກົ່າອາເມລິກາ ໃນການຈັດຕັ້ງການເຄື່ອນໄຫວຫຼາຍຢ່າງເພື່ອຊຸກຍູ້ການປອງດອງ, ເພີ່ມທະວີມິດຕະພາບ ແລະ ຄວາມເຂົ້າໃຈເຊິ່ງກັນແລະກັນ; ເຂົ້າຮ່ວມຢ່າງເປັນເຈົ້າການ ໄວວາ ຕັ້ງໜ້າ ໃນການເຄື່ອນໄຫວປ້ອງກັນແລະຄວບຄຸມການແຜ່ລະບາດຂອງພະຍາດໂຄວີດ-19, ຈາກການບໍລິຈາກເພື່ອຊ່ວຍເຫຼືອປະຊາຊົນ ແລະ ກອງກຳລັງແນວໜ້າ ໃນການຕໍ່ສູ້ກັບໂລກລະບາດ, ໜູນຊ່ວຍປະຊາຊົນປະເທດເພື່ອນມິດ ແລະ ຊາວຕ່າງປະເທດໃນຫວຽດນາມ ທີ່ໄດ້ຮັບຜົນກະທົບຈາກໂລກລະບາດ, ຈົນເຖິງການລະດົມເພື່ອນມິດສາກົນໜູນຊ່ວຍຫວຽດນາມ ດ້ວຍອຸປະກອນການແພດ ແລະ ວັກແຊງ ເພື່ອປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19, ສະແດງໃຫ້ເຫັນເຖິງປະເພນີມະນຸດສະທໍາ, ແບ່ງປັນເຂົ້າປາອາຫານແລະເຄື່ອງນຸ່ງຫົ່ມ, ຊ່ວຍເຫຼືອເຊິ່ງກັນແລະກັນ ໃນຍາມທຸກຍາກຂອງປະເທດຊາດຫວຽດນາມ, ໄດ້ຮັບການຮັບຮູ້ແລະຕີລາຄາສູງຈາກເພື່ອນມິດສາກົນ.
(9) ບັນດາອົງການຈັດຕັ້ງປະຊາຊົນຂອງຫວຽດນາມໄດ້ເຂົ້າຮ່ວມຢ່າງຕັ້ງໜ້າໃນບັນດາຂະບວນການປະຊາທິປະໄຕ ແລະ ກ້າວໜ້າແບບດັ້ງເດີມ ເຊັ່ນ: ສະພາສັນຕິພາບໂລກ, ສະຫະພັນຊາວໜຸ່ມປະຊາທິປະໄຕໂລກ; ສະຫະພັນແມ່ຍິງປະຊາທິປະໄຕໂລກ, ສະມາຄົມນັກກົດໝາຍປະຊາທິປະໄຕໂລກ, ສະຫະພັນກຳມະບານໂລກ; ບັນດາກົນໄກພາກພື້ນ ເຊັ່ນ: ເວທີປາໄສປະຊາຊົນອາຊຽນ, ເວທີປາໄສປະຊາຊົນອາຊີ - ເອີຣົບ, ສະຫະພັນວິສະວະກອນອາຊຽນ, ກິດຈະກໍາຂອງເຍົາວະຊົນຍິງແລະນັກສຶກສາໃນອາຊຽນ; ບັນດາກົນໄກສາກົນຂອງສະພາເສດຖະກິດແລະສັງຄົມແຫ່ງສະຫະປະຊາຊາດ, ອົງການແຮງງານສາກົນ...
(10) ມາເຖິງດຽວນີ້, ຫວຽດນາມມີການພົວພັນກັບອົງການຈັດຕັ້ງທີ່ບໍ່ຂຶ້ນກັບລັດຖະບານຂອງຕ່າງປະເທດ 1.200 ກວ່າແຫ່ງ, ໃນນັ້ນຫຼາຍກວ່າ 500 ອົງການຈັດຕັ້ງມີການເຄື່ອນໄຫວເປັນປະຈຳຢູ່ຫວຽດນາມ. ຍອດມູນຄ່າການຊ່ວຍເຫຼືອຂອງອົງການຈັດຕັ້ງທີ່ບໍ່ຂຶ້ນກັບລັດຖະບານຕ່າງປະເທດໃນໄລຍະ 2003 - 2020 ບັນລຸກວ່າ 5 ຕື້ໂດລາສະຫະລັດ (ການຊ່ວຍເຫຼືອລ້າ), ເຊິ່ງໄດ້ຈ່າຍເງິນແລ້ວໃນ 63 ແຂວງ, ນະຄອນໃນທົ່ວປະເທດ.
(11) ສະມາຄົມນັກກົດໝາຍ, ສະຫະພັນມິດຕະພາບປະສານສົມທົບກັບບັນດາຄູ່ຮ່ວມມື ເພື່ອຈັດຕັ້ງກອງປະຊຸມສຳມະນາແລະສົນທະນາຫຼາຍຄັ້ງ ກ່ຽວກັບທະເລຕາເວັນອອກ; ສະຫະພັນມິດຕະພາບປະສານສົມທົບກັບບັນດາອົງການຈັດຕັ້ງປະຊາຊົນອື່ນ ເພື່ອເພີ່ມທະວີການແລກປ່ຽນ, ສະໜອງຂໍ້ມູນ ແລະ ເປັນເຈົ້າການໃນການຜັນຂະຫຍາຍການຂົນຂວາຍ, ຕໍ່ສູ້ສະກັດກັ້ນບັນດາການເຄື່ອນໄຫວຕ້ານຫວຽດນາມ ຢູ່ບັນດາກົນໄກ ແລະ ເວທີປາໄສຫຼາຍຝ່າຍ, ປະສານສົມທົບກັບຊ່ອງທາງການທູດຂອງລັດ ໃນກົນໄກການລາຍງານການທົບທວນເປັນໄລຍະ, ການສົນທະນາກ່ຽວກັບປະຊາທິປະໄຕ ແລະ ສິດທິມະນຸດ; ບັນດາອົງການຂ່າວ, ເວັບໄຊຂອງແນວໂຮມປະເທດຊາດ, ຂອງບັນດາອົງການການເມືອງ-ສັງຄົມ ແລະ ຫຼາຍອົງການຂອງປະຊາຊົນ ໄດ້ສະໜອງຂໍ້ມູນຢ່າງສະໝ່ຳສະເໝີ ກ່ຽວກັບຄວາມສຳເລັດຂອງຫວຽດນາມໃນຂົງເຂດສິດທິມະນຸດ, ອຳນາດອະທິປະໄຕໃນທະເລ ໝູ່ເກາະ, ຜົນຮ້າຍຈາກທາດຜິດສີສົ້ມ, ແລະຕໍ່ສູ້ເພື່ອປະຕິເສດຖ້ອຍທຳນອງທີ່ຜິດພາດກ່ຽວກັບຫວຽດນາມ.
(12) ຫງວຽນຝູຈ້ອງ: “ບາງບັນຫາທິດສະດີ ແລະ ພຶດຕິກຳກ່ຽວກັບລັດທິສັງຄົມນິຍົມ ແລະ ເສັ້ນທາງຂຶ້ນສູ່ລັດທິສັງຕົມນິຍົມຢູ່ຫວຽດນາມ”, ວາລະສານກອມມູນິດ, ສະບັບທີ 976, ເດືອນພຶດສະພາ 2021, ໜ້າ 14.
- ບົດນີ້ໄດ້ລົງພິມໃນວາລະສານກອມມູນິດ ສະບັບທີ 983 (ເດືອນກຸມພາ 2022)
